৬. অগ্নিমান্দ্যাজীর্ণবিসূচিকালসকবিলম্বিকানিদানম্

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অর্শঃকার্যত্বাদগ্নিমান্দ্যাদীনাং তান্যাহ– মন্দ ইত্যাদি| মন্দস্য দুর্জযত্বাত্ প্রাগভিধানম্| কফপিত্তানিলাধিক্যাদিতি যথাক্রমং মন্দাদিষু যোজ্যম্| তত্সাম্যাদিতি তেষাং কফাদীনাং সাম্যাত্| সমোঽবিকৃতঃ, ধাতুসাম্যহেতুরিত্যর্থঃ| এতস্যাবিকারস্যাপি বিকারপ্রস্তাবেঽভিধানং প্রকৃতিজ্ঞানানন্তরীযকং বিকৃতিজ্ঞানমিতি বোধনার্থম্| জাঠর ইতি ধাত্বগ্নিভূতাগ্নিব্যবচ্ছেদার্থম্||১||

আতঙ্কদর্পণ ব্যাখ্যা (বাচস্পতি বৈদ্য কৃত)

অর্শোভ্যোঽগ্নিমান্দ্যস্য সম্ভবস্ততোঽর্শোঽনন্তরমগ্নিমান্দ্যাদিজান্ রোগানাহ– মন্দ ইত্যাদি| অনলো বহ্নিশ্চতুর্বিধো ভবতি– মন্দঃ, তীক্ষ্ণো, বিষমঃ, সমশ্চেতি| মন্দস্য দুর্জরত্বাত্প্রাক্ কথনন্| কফপিত্তানিলাধিক্যাদিতি যথাক্রমং মন্দাদিষু যোজ্যম্| তত্সাম্যাদিতি তেষাং কফাদীনাং সাম্যাত্| সমঃ অবিকৃতঃ, ধাতুসাম্যহেতুরিত্যর্থঃ| জাঠর ইতি ধাত্বগ্নিব্যচ্ছেদার্থম্||১||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

প্রতিলোমতন্ত্রযুক্ত্যা তেষাং রূপমাহ– বিষম ইত্যাদি| বাতজান্ রোগানিতি বাতনানাত্মজানামশীতেরন্যতমান্ সামান্যজাংশ্চ জ্বরাতীসারাদীন্, এবং পিত্তনানাত্মজানামোষচোষাদীনাং চত্বারিংশতোঽন্যতমান্, এবং কফনানাত্মজানাং বিংশতেরালস্যাদীনামন্যতমান্| এতে চ বিকারাশ্চরকে মহারোগাধ্যাযে (চ. সূ. অ. ২০) এব দ্রষ্টব্যাঃ| সমেত্যাদি| সমা উচিতা, মাত্রা আহারস্য, সম্যগ্যস্য বিপচ্যতে স সমাগ্নিঃ| তীক্ষ্ণাগ্নিরিতি তং বিদ্যাদিতি ছেদঃ| মাত্রাঽতিমাত্রেত্যুপলক্ষণং, তেনাজীর্ণগুরুভোজনাদিকমপি লক্ষণীযম্| যদুক্তমন্যত্র– “অতিমাত্রমজীর্ণেঽপি গুরু চান্নমথাশ্নতঃ| দিবাঽপি স্বপতো যস্য পচ্যতে সোঽগ্নিরুত্তমঃ||” ইতি| তীক্ষ্ণগ্রহণেন ভস্মকস্যাবরোধঃ, অত্যন্ততীক্ষ্ণাগ্নিরেব হি ‘ভস্মক’ ইত্যুচ্যতে| যদুক্তং চরকে– “নরে ক্ষীণকফে পিত্তং কুপিতং মারুতানুগম্| স্বোষ্মণা পাবকস্থানে বলমগ্নেঃ প্রযচ্ছতি|| তদা লব্ধবলো দেহং বিরুজেত্ সানিলোঽনলঃ| অভিভূয পচত্যন্নং তৈক্ষ্ণ্যাদাশু মুহুর্মুহুঃ|| পক্ত্বাঽন্নং ততো ধাতূন্ শোণিতাদীন্ পচত্যপি| ততো দৌর্বল্যমাতঙ্কান্ মৃত্যুং চোপনযেন্নরম্|| ভুক্তেঽন্নে লভতে শান্তিং জীর্ণমাত্রে প্রতাম্যতি| তৃট্কাসদাহমূর্ছাঃ স্যুর্ব্যাধযোঽত্যগ্নিসম্ভবাঃ||” (চ. চি. অ. ১৫) ইতি||২-৪||

আতঙ্কদর্পণ ব্যাখ্যা (বাচস্পতি বৈদ্য কৃত)

তেষাং স্বরূপমাহ– বিষম ইত্যাদি| বিষমোঽগ্নির্বাতজান্ রোগানিতি বাতনানাত্মজান্ অশিতেরন্যতমান্সামান্যজাংশ্চ জ্বরাতীসারাদীন্ ; তীক্ষ্ণোঽগ্নিরেবং পিত্তজানিতি পিত্তজানাম্ ওষচোষাদীনাং চত্বারিংশতোঽন্যতমান্; এবং মন্দোঽগ্নিঃ কফজানাং বিংশতেরালস্যাদীনামন্যতমান্; এতে চ রোগাশ্চরক মহারোগাধ্যাযে দ্রষ্টব্যাঃ| তেষাং লক্ষণমাহ– সমেত্যাদি| সমা উচিতা মাত্রা অশিতা উপযুক্তা সতী সম্যগ্যস্য বিপচ্যতে স সমাগ্নিঃ| মন্দাগ্নেঃ মন্দবহ্নেঃ পুরুষস্য স্বল্পাঽপি মাত্রা অশিতা সম্যঙ্নৈব বিপচ্যতে| বিষমাগ্নেস্তু পুরুষস্য কদাচিত্সম্যক্ পাকং গচ্ছতি কদাচিন্ন গচ্ছতি, বাযোর্বিষমগতিত্বাত্| তীক্ষ্ণগ্নিরিতি তং বিদ্যাদিতি তীক্ষ্ণসমাগ্ন্যোরিতি ভেদঃ| মাত্রাঽতিমাত্রেত্যুপলক্ষণং, তেনাতিমাত্রমজীর্ণভোজনাদিকমপি সুখং যস্য বিপাকং গচ্ছতি তং তীক্ষ্ণাগ্নিরিতি জানীযাত্| তদুক্তং তন্ত্রান্তরে– “অতিমাত্রমজীর্ণেঽপি গুরু চান্নং তথাঽশ্নতঃ| দিবাঽপি স্বপতো যস্য পচ্যতে সোঽগ্নিরুত্তমঃ” ইতি| তীক্ষ্ণগ্রহণেন ভস্মকস্যাবরোধঃ, অত্যন্ততীক্ষ্ণাগ্নিরেব হি ভস্মক উচ্যতে| যদুক্তং চরকে– “নরে ক্ষীণকফে পিত্তং কুপিতং মারুতানুগম্| স্বোষ্মণা পাচকস্থানে বলমগ্নেঃ প্রযচ্ছতি|| তদা লব্ধবলো দেহং বিরূক্ষঃ সানিলোঽনলঃ| অভিভূয পচত্যন্নং তৈক্ষ্ণ্যাদাশু মুহুর্মুহুঃ|| পক্ত্বাঽন্নং চ ততো ধাতূঞ্ছোণিতাদীন্ পচত্যপি| ততো দৌর্বল্যমাতঙ্কান্মৃত্যুং চোপনযেন্নরম্|| ভুক্তেঽন্নে লভতে শান্তিং জীর্ণমাত্রে প্রতাম্যতি| তৃড্দাহকাসমূর্ছাঃ স্যুর্ব্যাধযোঽত্যগ্নিসম্ভবাঃ” ইতি| তেষু মধ্যে সমাগ্নিরুত্তমঃ||২-৪||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অগ্নিমান্দ্যাজীর্ণযোঃ পরস্পরকারণত্বাদজীর্ণান্যাহ– আমমিত্যাদি| ত্রিভিরিতি কফাদিভিরেকৈকশো যথাসঙ্খ্যেন| রসশেষত ইতি রসায শেষো রসশেষঃ, প্রকৃতিবিকৃতিভাবে চতুর্থী; যথা– যূপায দারু যূপদারু; অথবা “রসশব্দেন রসবানাহারোঽভিপ্রেতো লক্ষণযা, তেন রসশব্দেন রসবানাহারোঽভিধীযতে, তস্য শেষোঽপরিণতিলক্ষণো রসশেষ” ইতি জেজ্জটঃ| ননু, যদ্যেবং তদা আমবিদগ্ধবিষ্টব্ধানামন্যতমরূপস্যাবশ্যম্ভাবিত্বান্ন তেভ্যো ভেদঃ; কিঞ্চ তল্লিঙ্গৈরম্লোদ্গারাদিভির্ভবিতব্যং, তথাচ সত্যুদ্গারশুদ্ধৌ রসশেষাজীর্ণলক্ষণস্যানুদযপ্রসঙ্গঃ? উক্তং হি সুশ্রুতে– “উদ্গারশুদ্ধাবপি ভক্তকাঙ্ক্ষা ন জাযতে হৃদ্গুরুতা চ যস্য| রসাবশেষেণ তু সপ্রসেকং চতুর্থমেতত্ প্রবদন্ত্যজীর্ণম্||” ইতি (সু. সূ. অ. ৪৬)| আরোগ্যমঞ্জর্যাং নাগার্জুনোঽপ্যাহ– “উদ্গারেঽপি বিশুদ্ধতামুপগতে কাঙ্ক্ষা ন ভক্তাদিষু স্নিগ্ধত্বং বদনস্য সন্ধিষু রুজা কৃত্বা শিরোগৌরবম্| মন্দাজীর্ণরসে তু লক্ষণমিদং, তত্রাতিবৃদ্ধে পুনর্হৃল্লাসজ্বরমূর্ছনাদি চ ভবেত্ সর্বামযক্ষোভণম্||” ইতি| নৈবম্, অবশ্যম্ভাবিবিদগ্ধাদিরূপস্যাপ্যাহারশেষস্যাত্যল্পত্বেন ন তদনুরঞ্জিতোদ্গারোদযপ্রসঙ্গঃ, অকালবুভুক্ষাযামিব| যদাহ সুশ্রুতঃ– “স্বল্পং যদা দোষবিবদ্ধমামং লীনং ন তেজঃপথমাবৃণোতি| ভবত্যজীর্ণেঽপি তদা বুভুক্ষা সা মন্দবুদ্ধিং বিষবন্নিহন্তি||” (সু. সূ. অ. ৪৬) ইতি| তন্ত্রান্তরেঽপ্যাহারাপাকজং রসশেষলক্ষণমুক্তম্– “আমং বিদগ্ধং বিষ্টব্ধং রসশেষমথাপি চ| চতুর্বিধমজীর্ণং স্যাদাহারাপরিপাকতঃ||” ইতি| গদাধরস্ত্বাহ– “রসে শেষো রসশেষঃ, আহারজনিতে রসে শেষ আহারাবযবোঽনুপ্রবিষ্টোঽলক্ষ্যমাণঃ ক্ষীরে নীরমিব রসশেষঃ|” ইতি| ননু, আমাজীর্ণাদিভ্যো রসশেষস্য কো ভেদঃ? উচ্যতে– আমাদিত্রযমন্নজং, রসশেষস্ত্বাহাররসজঃ; বাতিকাদিব্যপদেশশ্চাত্র ন কৃতঃ, অল্পত্বাদ্বাতাদিলিঙ্গানাং; হেতুলক্ষণচিকিত্সাভেদাচ্চাস্য ভেদ ইতি| অজীর্ণমিতি তদ্বিরোধে নঞ্, জীর্ণং পক্বং, তদ্বিরুদ্ধমজীর্ণম্; যথা– অসিতম্| সর্বমজীর্ণং ত্রিদোষজম্, একদোষব্যপদেশস্তূত্কটৈকদোষলিঙ্গত্বেনোক্ত ইতি ব্যাখ্যানযন্তি; যতস্ত্রৈদোষিকমেবাজীর্ণকারণমুক্তম্– “অত্যম্বুপানাত্” ইত্যাদি| অজীর্ণাদপি দোষত্রযকোপো ভবতি| যদুক্তং সুশ্রুতে– “অজীর্ণাত্ পবনাদীনাং বিভ্রমো বলবান্ ভবেত্|” (সু. সূ. অ. ৪৬) ইতি| অজীর্ণং পঞ্চমং কেচিদিত্যাদি| নির্দোষম্ আধ্মানাদিদুষ্টেরকারকম্| দিনপাকি চেত্যহোরাত্রেণাহারঃ পচ্যতে ইত্যুত্সর্গঃ, যত্র তু মাত্রাকালাসাত্ম্যাদিদোষাদপরদিনে পচ্যতে তদ্দিনপাকি| কালব্যতিক্রমেণ পচ্যমানমপ্যাধ্মানাদিকং ন করোতীতি পূর্বেভ্যো ভেদঃ| এতদভিধানস্য তু প্রযোজনং পাককালপ্রতীক্ষণং, নৈশাজীর্ণে ভোজননিষেধাত্| প্রাকৃতং প্রতিবাসরমিতি প্রাকৃতমবৈকারিকং, প্রতিবাসরং প্রতিদিনং ক্রিযমাণম্| অযমভিসন্ধিঃ– অদ্যৈব ভুক্তমন্নং কিং জীর্ণমজীর্ণং বা? ন তাবজ্জীর্ণং, ক্ষুত্পিপাসামলোত্সর্গাদের্জীর্ণলক্ষণস্যানুদযাত্; তস্মাদজীর্ণং, তচ্চাধ্মানাদিকং ন করোতীতি পূর্বেভ্যো ভিন্নম্| তস্য চাভিধানপ্রযোজনম্– পাকার্থং বামপার্শ্বশযনাদ্যাচারসেবা| উক্তং হি সুশ্রুতে– “ভুক্ত্বা পাদশতং গত্বা বামপার্শ্বেন সংবিশেত্| শব্দরূপরসস্পর্শগন্ধাংশ্চ মনসঃ প্রিযান্|| ভুক্তবানুপসেবেত তেনান্নং সাধু তিষ্ঠতি||” (সু. সূ. অ. ৪৬) ইতি| ন চাত্রাহারস্য নিষেধঃ, তস্য শাস্ত্রেণ বিহিতত্বাত্| চরকে তু– “তস্য লিঙ্গমজীর্ণস্য” ইত্যাদিনা “ঘোরমলবিষং চ ” ইত্যন্তেনান্নবিষাখ্যমজীর্ণং” পঠিতং, তচ্চ পিত্তাদিসংসৃষ্টরসশেষাজীর্ণমেবেতি ব্যাচক্ষতে; তেন রসশেষ এব তস্যান্তর্ভাব ইতি পৃথক্ পঠিতম্||৫-৬||

আতঙ্কদর্পণ ব্যাখ্যা (বাচস্পতি বৈদ্য কৃত)

অগ্নিমান্দ্যাজীর্ণযোঃ পরস্পরকারণত্বাদজীর্ণান্যাহ– আমমিত্যাদি| আহারস্যৈব অপক্ব উদ্বরিতো রসো রসশেষস্ততঃ| নন্বামাজীর্ণাদিভ্যো রসশেষস্য কো ভেদঃ? উচ্যতে– আমাদিত্রযমন্নজং, রসশেষস্ত্বাহাররসজঃ, বাতিকাদিব্যপদেশশ্চাত্র ন কৃতঃ, অল্পত্বাদ্বাতাদিলিঙ্গানাম্| মতান্তরমাহ– অজীর্ণমিত্যাদি| অজীর্ণং পঞ্চমমিতি নির্দোষমাধ্মানাদিদুষ্টেরকারকং, দিনপাকি চেতি অহোরাত্রেণাহারঃ পচ্যতে ইতি সামান্যং, যত্র তু মাত্রাকালসাত্ম্যাদিদোষাদপরস্মিন্ দিনে পচ্যতে তদ্দিনপাকি, কালব্যতিক্রমেণাহারঃ পচ্যমানোঽপ্যাধ্মানাদিকং ন করোতীতি পূর্বেভ্যো ভেদঃ| এতদভিধানস্য তু প্রযোজনং পাককালপ্রতীক্ষণং, নিশাজীর্ণে ভোজননিষেধাত্| অন্যে ষষ্ঠমাহুঃ– প্রাকৃতমবৈকারিকং, প্রতিবাসরং প্রতিদিনং ক্রিযমাণম্| অযমভিসন্ধিঃ– অদ্যৈব ভুক্তমন্নং কিং জীর্ণং অজীর্ণ বা ? ন তাবজ্জীর্ণং ক্ষুত্পিপাসামলোত্সর্গাদের্জীর্ণলক্ষণস্যানুত্পাদনাত্, তস্মাদজীর্ণম্| তচ্চাধ্মানাদিকং ন করোতি পরং প্রকৃতত্বাদবিকারিত্বমস্যেতি পূর্বেভ্যো ভিন্নম্| তস্য চাভিধানপ্রযোজনং পাকার্থং বামপার্শ্বশযনাদ্যাচারসেবা| উক্তং হি সুশ্রুতে– “ভুক্ত্বা পাদশতং গত্বা বামপার্শ্বেন সংবিশেত্| শব্দরূপরসস্পর্শগন্ধাদীন্ মনসঃ প্রিযান্|| ভুক্তবানুপসেবেত তেনান্নং সাধু তিষ্ঠতি” ইতি| ন চাত্রাহারস্য নিষেধঃ, তস্য শাস্ত্রে বিহিতত্বাত্||৫-৬||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অজীর্ণকারণমাহ– অত্যম্বুপানাদিত্যাদি| সন্ধারণাদিতি বেগানাম্ স্বপ্নবিপর্যযাত্ দিবাস্বপ্নাদেঃ| লঘু চাপীতি ‘অপি’ শব্দেন স্নিগ্ধোষ্ণাদিগুণযুক্তমপি বোধ্যম্| কেচিত্ ‘ঈর্ষ্যাভযক্রোধপরিপ্লুতেন’ ইত্যাদিশ্লোকং পঠন্তি; স চ মানসদোষাজীর্ণবিষযো বোদ্ধব্য ইতি||৭-৯||

আতঙ্কদর্পণ ব্যাখ্যা (বাচস্পতি বৈদ্য কৃত)

অজীর্ণস্য কারণমাহ– অত্যম্ব্বিত্যাদি| বিষমাশনং “বহু স্তোকমকালে বা তজ্জ্ঞেযং বিষমাশনম্” ইতি| ক্ষুত্তৃড্বাতপুরীষাদিবেগানাং সন্ধারণং, রাত্রিজাগরণং দিবাস্বাপঃ স্বপ্নবিপর্যযঃ| কাযিকং কারণমভিধায মানসং রজস্তমোদোষকারণমাহ– ঈর্ষ্যেত্যাদি| ঈর্ষ্যা পরসম্পত্তেরসহিষ্ণুতা, ভযং পরস্মাত্ত্রাসঃ, ক্রোধঃ পরাভিদ্রোহলক্ষণঃ, তৈঃ পরিপ্লুতেন ঈর্ষ্যাদিভিঃ পরিভূতেন, লুব্ধেন লোভসহিতেন, রুগ্দৈন্যনিপীডিতেন শোকদৈন্যব্যাপ্তেন, দৈন্যং নির্গতিত্বং, প্রদ্বেষো মাত্সর্যমিতি||৭-৯||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

উদ্দিষ্টানামামাজীর্ণাদীনাং লক্ষণমাহ– তত্রেত্যাদি| তত্রেতি তেষু মধ্যে| গণ্ডঃ কপোলঃ অক্ষিকূটঃ চক্ষুর্গোলকঃ, তদ্গতঃ শোথো ভবতি প্রভাবাত্| উদ্গারশ্চ যথাভুক্তমিতি মধুরাদিরূপঃ| অবিদগ্ধোঽনম্লঃ, দ্বিতীযপাকে হ্যাহারস্যাম্লতা দর্শিতা| বিদগ্ধ ইত্যাদি| বিবিধা বাতবেদনা তোদভেদাদিরূপা| অঙ্গপীডনং সামবাতবেদনাদি| পিত্তাচ্চ বিবিধা রুজ ইতি ওষচোষাদযঃ| সধূমাম্ল ইতি ধূমোদ্গারোঽম্লোদ্গারশ্চ||১০-১২||

আতঙ্কদর্পণ ব্যাখ্যা (বাচস্পতি বৈদ্য কৃত)

উদ্দিষ্টানামজীর্ণানাং লক্ষণমাহ– তত্রেত্যাদি| তত্র তেষু মধ্যে আমে অজীর্ণে গুরুতাদিচিহ্নং ভবতি| গুরুতা উদরাঙ্গযোর্গৌরবম্| উত্ক্লেদ উপস্থিতবমনত্বমিব| গণ্ডঃ কপোলঃ, অক্ষিকূটশ্চক্ষুর্গোলকঃ, তদ্গতঃ শোথো ভবতি তত্প্রভাবাত্| উদ্গারশ্চ যথাভুক্তমিতি মধুরাদিরূপঃ| অবিদগ্ধোঽনম্লঃ| এতস্য লক্ষণং সুশ্রুতে উক্তম্– “মাধুর্যমন্নং গতমামসঞ্জ্ঞম্” ইতি| তদেতত্ কফদূষিতান্নস্বভাবকথনমাত্রম্| কফকার্যাণি গৌরবকণ্ডূপ্রভৃতীনি দ্রষ্টব্যানি| বিদগ্ধলক্ষণমাহ– বিদগ্ধং কিঞ্চিদ্বিপক্বম্ অম্লভাবগতম্| উক্তং চ সুশ্রুতে– “বিদগ্ধসঞ্জ্ঞং গতমম্লভাবম্” ইতি| ধূমোদ্গারোঽম্লোদ্গারশ্চ| বিষ্টব্ধলক্ষণমাহ– বিষ্টব্ধ ইত্যাদি| আনদ্ধবাতং বিষ্টব্ধং কথ্যতে| উক্তং চ সুশ্রুতে– “কিঞ্চিদ্বিপক্বং ভৃশতোদশূলং বিষ্টব্ধমানদ্ধবিরুদ্ধবাতম্” ইতি| তত্র তেষু মধ্যে বিষ্টব্ধেঽজীর্ণে বিবিধবাতবেদনাস্তোদভেদাদিরূপাঃ| বিদগ্ধে বিলম্বিকা ন প্রাপ্যতে তাং কফবাতাভ্যাং পঠিষ্যতি বিদগ্ধং পিত্তাত্তস্মাত্ত্রিবিধো জীর্ণো যথাসম্ভবং বিসূচ্যাদিনামুত্পাদক ইতি| উক্তং চরকে– “অজীর্ণাত্ পবনাদীনাং বিভ্রমো বলবান্ ভবেত্|” ইতি|| রসশেষেঽন্নবিদ্বেষো হৃদযাশুদ্ধিগৌরবম্| “ গ্লানিগৌরববিষ্টম্ভো ভ্রমমারুতমূঢতাঃ| বিবন্ধশ্চাপ্রবৃত্তিশ্চ সামান্যাজীর্ণলক্ষণম্||”||১০-১২||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

উপদ্রবানাহ– মূর্ছেত্যাদি| অতিপ্রবৃদ্ধাজীর্ণে তু মরণমপি||১৩||

আতঙ্কদর্পণ ব্যাখ্যা (বাচস্পতি বৈদ্য কৃত)

অজীর্ণস্যোপদ্রবানাহ– মূর্ছেত্যাদি| মূর্ছা চেতনাচ্যুতিঃ, প্রলাপোঽসম্বদ্ধভাষণম্, বমথুঃ ছর্দিঃ, সদনমঙ্গগ্লানিঃ, অন্যে তু স্ফুটনমিবাঙ্গানামিতি বদন্তি||১৩||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

উক্তাজীর্ণকারণেভ্যোঽতিমাত্রভোজনস্য বিশেষকারণত্বমাহ– অনাত্মবন্ত ইত্যাদি| অনাত্মবন্তো দুষ্টমনোযুক্তাঃ, লোলুপত্বেন তদাত্বসুখাকাঙ্ক্ষিণ ইতি| অত এবোক্তম্– পশুবদিতি| রোগানীকস্য রোগসমূহস্য বিসূচ্যাদেঃ, মূলং কারণম্||১৪||

আতঙ্কদর্পণ ব্যাখ্যা (বাচস্পতি বৈদ্য কৃত)

উক্তাজীর্ণকারণেভ্যোঽতিমাত্রভোজনস্য বিশেষকারণত্বমাহ– অনাত্মবন্ত ইত্যাদি যে নরা অপ্রমাণতঃ পশুবদ্ভুঞ্জতে, কিম্ভূতাঃ ? অনাত্মবন্তো দুষ্টমনোযুক্তাঃ লোলুপত্বেন তদাত্বসুখকাঙ্ক্ষিণ ইত্যর্থঃ, অত এবোক্তম্– পশুবদিতি| রোগানীকস্য রোগসমূহস্য বিসূচ্যাদের্মূলং কারণমজীর্ণং প্রাপ্নুবন্তি||১৪||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অজীর্ণসম্ভবত্বাদ্বিসূচ্যাদীনামজীর্ণানন্তরং বিসূচ্যাদীনাহ– অজীর্ণমিত্যাদি| “আমবিষ্টব্ধবিদগ্ধেষু ত্রিষু বিসূচ্যলসকবিলম্বিকা যথাসঙ্খ্যং ভবন্তি” ইতি কার্তিককুণ্ডঃ| ‘তন্ন’ ইতি বকুলকরঃ| যথাসঙ্খ্যে হি বিলম্বিকা বিদগ্ধাত্ প্রাপ্নোতি, তাং চ কফবাতাভ্যাং পঠিষ্যতি, তস্মাত্ত্রিবিধাজীর্ণাদ্যথাসম্ভবং বিসূচ্যাদীনামুত্পাদ ইতি যুক্তম্| উক্তংহি– “অজীর্ণাত্ পবনাদীনাং বিভ্রমো বলবান্ ভবেত্” ইতি||১৫||

আতঙ্কদর্পণ ব্যাখ্যা (বাচস্পতি বৈদ্য কৃত)

অজীর্ণসম্ভবাত্ বিসূচ্যাদয ইত্যজীর্ণানন্তরং বিসূচ্যাদীনাহ– অজীর্ণমিত্যাদি| যদামাদিভেদেনাজীর্ণমুক্তং তস্মাত্ত্রিবিধাজীর্ণাদ্বিসূচ্যলসকৌ স্যাতাং তথা বিলম্বিকাঽপি ভবেত্ যদত্র চতুর্থস্যাজীর্ণস্য রসশেষস্যোপাদানং ন কৃতং তদপরিণামমাত্রত্বেন তস্য বিসূচ্যাদ্যারম্ভকত্বস্বাভাবাদেকোপমতত্বেনোক্তত্বাচ্চ| আমবিষ্টব্ধবিদগ্ধেষু বিসূচ্যালসকবিলম্বিকাখ্যা যথাসঙ্খ্যং ভবন্তীতি কার্তিককুণ্ডঃ| তন্ন, যথাসঙ্খ্যে বিদগ্ধাজীর্ণস্য বিলম্বিকাজনকত্বাসম্ভবাত্, তস্যাঃ কফবাতসমুদ্ভূতত্বেন পঠিষ্যমাণত্বাত্, বিদগ্ধভাবস্য পিত্তজন্যত্বাত্, তস্মাত্ “ত্রিবিধমপ্যজীর্ণং যথাসম্ভবং বিসূচ্যাদীনামুত্পাদকম্” ইতি বকুলঃ||১৫||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

বিসূচ্যা নিরুক্তিমাহ– সূচীভিরিত্যাদি| ‘বাহুল্যাদ্বাযুঃ সূচীভিরিব তুদন্’ ইতি বিসূচীনিরুক্তিঃ| পাণ্ডুরোগবত্ সূচীভিরিব তোদনং বিহাযান্যেঽপি বেদনাভেদা বিবিধা ভবন্ত্যেব| যদুক্তং তন্ত্রান্তরে– “বিবিধৈর্বেদনাভেদৈর্বায্বাদের্ভৃশকোপতঃ| সূচীভিরিব গাত্রাণি ভিনত্তীতি বিসূচিকা||” ইতি বিদিতাগমা বিদিতাযুর্বেদাঃ| মূঢাস্তজ্জ্ঞানানভিজ্ঞাঃ| অজিতাত্মানঃ অজিতেন্দ্রিযাঃ অশনলোলুপাঃ পশুবদপ্রমাণভোজিনঃ||১৬-১৭||

আতঙ্কদর্পণ ব্যাখ্যা (বাচস্পতি বৈদ্য কৃত)

বিসূচ্যা নিরুক্তিমাহ-যস্যাং বিসূচিকাযামনিলঃ সূচীভিরিব গাত্রাণি তুদন্ সন্ তিষ্ঠতে বৈদ্যৈরাদিবৈদ্যৈরজীর্ণাত্সা বিসূচীতি কথ্যতে||১৬|| ইতি প্রতিপাদনার্থমাহ– নেত্যাদি| এবংবিধাঃ পুরুষাস্তাং বিসূচিকাং ন প্রাপ্নুবন্তি| বিদিতাগমা বিদিতাযুর্বেদাঃ, মূঢাস্তজ্জ্ঞানানভিজ্ঞাঃ পুরুষাস্তাং ভজন্তে| মুহ্যন্তীতি মূঢাঃ ভক্ষ্যাভক্ষ্যানভিজ্ঞাঃ, অজিতাত্মানোঽজিতেন্দ্রিযাঃ, অশনলোলুপাঃ পশুবদপ্রমাণভোজিনঃ; ‘কলুষাশযাঃ’ ইত্যন্যে পঠন্তি, কলুষো দুষ্ট আমাশযো যেষাং তে কলুষাশযাঃ; আমাশযদুষ্টিশ্চ দুষ্টান্নসম্পর্কাত্, বাতাদিকোপাচ্চ||১৭||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

বিসূচী লক্ষণমাহ– মূর্ছেত্যাদি| বমথুঃ বান্তিঃ| শিরসশ্চ ভেদঃ শিরঃশূলম্| অত্র চ বমনাতীসারৌ মিলিতৌ লক্ষণমিতি সৌশ্রুতাঃ সুশ্রুতে– ত্বধোগাযা আমাতীসারেণ গ্রহণম্, ঊর্ধ্বগাযাশ্ছর্দ্যা চ| (চরকে তু পঠ্যতে– “ঊর্ধ্বং চাধশ্চ প্রবৃত্তামদোষাং যথোক্তরূপাং বিসূচীং বিদ্যাত্||” (চ. বি. অ. ২) ইতি| অত ঊর্ধ্বগা বিসূচী ভবতি, তথাঽধোগাঽপি, চরকে আমাতীসারস্যাপঠিতত্বাত্; চকারাদুভযমার্গগাঽপীতি চেতি ব্যাচক্ষতে, ঊর্ধ্বগাযাশ্চ অপক্বাহারবমনেন ত্রিদোষচ্ছর্দিভ্যো ভেদ ইতি মন্তব্যম্||১৮||

আতঙ্কদর্পণ ব্যাখ্যা (বাচস্পতি বৈদ্য কৃত)

বিসূচীলক্ষণমাহ– মূর্ছেত্যাদি| বমথুর্বান্তিঃ, উদ্বেষ্টনং মোটনং জঙ্ঘাদীনাং, খল্লীতি লোকে| তস্যাং বিসূচ্যাং; শিরসশ্চ ভেদঃ শিরঃশূলম্| অত্র বমনাতীসারৌ মিলিতৌ লক্ষণমিতি সুশ্রুতঃ| সা চ দ্বিধা অধোগা ঊর্ধ্বগা চ| আমাতিসারেণাধোগা ছর্দ্যোর্ধ্বগা চেতি সৌশ্রুতাঃ; চরকে তু “ঊর্ধ্বং চাধশ্চ প্রবৃত্তামদোষাং যথোক্তরূপাং বিদ্যাত্” ইত্যুভযগা| ঊর্ধ্বগাযাশ্চাপক্বাহারবমনেন দোষজচ্ছর্দিভ্যো ভেদ ইতি মন্তব্যম্||১৮||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অলসকমাহ– কুক্ষিরিত্যাদি| আনহ্যতে আধ্মাযতে, মলবিষ্টম্ভস্য বক্ষ্যমাণত্বাত্| প্রতাম্যেত্ মুহ্যতি পুরুষঃ পরিকূজতি আর্তনাদং করোতি| নিরুদ্ধ ইত্যজীর্ণেনাধঃ প্রতিরুদ্ধগতিঃ কুক্ষৌ বা, তেনোপরি ধাবতি ঊর্ধ্বং হৃদযকণ্ঠাদিকং গচ্ছতি| ‘অলসক’ ইতি দোষস্থিরত্বনিমিত্তা সঞ্জ্ঞা| যদুক্তং তন্ত্রান্তরে– “প্রযাতি নোর্ধ্বং নাধস্তাদাহারো ন বিপচ্যতে| আমাশযেঽলসীভূতস্তেন সোঽলসকঃ স্মৃতঃ||” ইতি||১৯-২০||

আতঙ্কদর্পণ ব্যাখ্যা (বাচস্পতি বৈদ্য কৃত)

অলসকলিঙ্গমাহ– কুক্ষিরিত্যাদি| যস্য কুক্ষিরুদরমানহ্যতে আধ্মাযতে, মলবিষ্টম্ভস্য বক্ষ্যমাণত্বাত্| প্রতাম্যেত্ প্রমুহ্যতি পুরুষঃ, পরিকূজতি আর্তনাদং করোতি, মারুতো নিরুদ্ধ ইতি অজীর্ণেনাধঃপ্রতিবদ্ধগতিঃ, কুক্ষৌ তেনোপরি ধাবতি ঊর্ধ্বং হৃদযকণ্ঠাদিকং গচ্ছতি, তস্য পুরুষস্যালসকনামানং রোগমাচষ্টে কথযতি| অলসক ইতি দোষস্থিরত্বনিমিত্তসঞ্জ্ঞা| যদুক্তং তন্ত্রান্তরে– “প্রযাতি নোর্ধ্ব নাধস্তান্ন চাহারো বিপচ্যতে| আমাশযেঽলসীভূতস্তেন সোঽলসকঃ স্মৃতঃ||” ইতি|| ১৯-২০||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

বিলম্বিকামাহ– দুষ্টমিত্যাদি| ভুক্তমন্নং কফমারুতাভ্যাং দুষ্টমিতি সম্বন্ধঃ| ভৃশং দুশ্চিকিত্স্যাম্ অত্যর্থং দুশ্চিকিত্স্যাং, প্রত্যাখ্যেযাং বর্জনীযামিত্যর্থঃ| ননু, অলসকবিলম্বিকযোরুভযোরপি বাতকফপ্রবলযোরূর্ধ্বাধোঽপ্রবর্তনশীলযোস্তুল্যত্বাত্ কো ভেদঃ? উচ্যতে অলসকে তীব্রাঃ শূলাদযো ভবন্তি, যদুক্তম্– “পীডিতং মারুতেনান্নং শ্লেষ্মণা রুদ্ধমন্তরা| অলসং ক্ষোভিতং দোষৈঃ শল্যত্বেনৈব সংস্থিতম্|| শূলাদীন্ কুরুতে তীব্রাংশ্ছর্দ্যতীসারবর্জিতান্||” ইতি||২১||

আতঙ্কদর্পণ ব্যাখ্যা (বাচস্পতি বৈদ্য কৃত)

বিলম্বিকালক্ষণমাহ– দুষ্টমিত্যাদি| যস্য পুরুষস্য ভুক্তমন্নং কফমারুতাভ্যাং দুষ্টং সদূর্ধ্বমধশ্চ ন প্রবর্ততে, পুরাণাঃ শাস্ত্রবিদস্তাং বিলম্বিকামাহুঃ; ভৃশং দুশ্চিকিত্স্যামত্যর্থং দুশ্চিকিত্স্যাং, প্রত্যাখ্যাযোপচরণীযামিত্যর্থঃ| দুষ্টমিত্যত্র লীনমিতি কেচিত্পঠন্তি| ইযমেব বিলম্বিকা তন্ত্রান্তরে দণ্ডকালসক ইতি নাম্না পঠ্যতে| তথাচ– “ দুষ্টা হ্যলসকে দোষাশ্ছর্দ্যতীসারবর্জিতাঃ| কারকাস্তীব্রশূলাদেঃ স্রোতসাং সন্নিরোধকাঃ|| নিজযোগাত্তনুং সর্বাং দণ্ডবত্স্তম্ভযন্তি চ| স দণ্ডালসকঃ শীঘ্রং নরদেহবিনাশকৃত্” ইতি| নন্বলসকবিলম্বিকযোরুভযোরপি বাতকফপ্রবলযোরূর্ধ্বাধোপ্রবর্তনশীলযোস্তুল্যত্বাত্কো ভেদঃ ? উচ্যতে– অলসকে তীব্রাঃ শূলাদযো ভবন্তি, যদুক্তম্– “পীডিতং মারুতেনান্নং শ্লেষ্মণা রুদ্ধমন্তরা| অলসং ক্ষোভিতং দোষৈঃ শল্যত্বেনেব সংস্থিতম্|| শূলাদীন্কুরুতে তীব্রাংশ্ছর্দ্যতীসারবর্জিতান্” ইতি||২১||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অজীর্ণজাতান্ বিসূচ্যাদীনভিধাযাজীর্ণজন্যস্যামস্য কার্যান্তরমাহ– যত্রস্থমিত্যাদি| আমং কর্তৃ, যত্রস্থং তমেব দেশং বিশেষেণ রুজেত্; এতেনান্যদেশেঽপি কিঞ্চিদ্রুজং করোতীতি বোধযতি| যত্রেতিসর্বনামশব্দেন কুপিতবাতাদীনামিবানিযতমেব স্থানমামস্যেতি দর্শিতম্| কৈ রুজেদিত্যাহ– বিকারজাতৈর্বিকারসমূহৈঃ| কিম্ভূতৈরিত্যাহ– দোষেণ যেন স্বকারণকুপিতেন বাতাদিনাঽবততং ব্যাপ্তং শরীরং, তল্লক্ষণৈঃ তল্লিঙ্গৈস্তোদদাহগৌরবাদিভিঃ, ন কেবলং তৈরামসমুদ্ভবৈশ্চ বিকারজাতৈরপাকালসকাদিভিরপি| অনেনৈব শ্লোকেন তন্ত্রান্তরোক্তমামবাতাখ্যং রোগং গৃহীতবান্ সুশ্রুতঃ, তস্য লক্ষণস্য সমানত্বাদিত্যাহুঃ||২২||

আতঙ্কদর্পণ ব্যাখ্যা (বাচস্পতি বৈদ্য কৃত)

অজীর্ণজন্যানি বিসূচ্যাদীন্যভিধায অজীর্ণজন্যস্যামস্য কার্যান্তরমাহ– যত্রেত্যাদি| আমমসম্যক্পরিণতং, তথাচ– “অবিপক্বমসংযুক্তং দুর্গন্ধং বহু পিচ্ছিলম্| সদনং সর্বগাত্রাণামামমিত্যভিধীযতে” ইতি| যত্ আমং কর্তৃ, যত্রস্থং বাযুপ্রেরণাকর্ষণস্যাবৈগুণ্যাদ্যত্র ব্যবস্থিতং তমেব দেশং বিশেষেণ রুজেত্ পীডযেত্, এতেনান্যদেশেঽপি কিঞ্চিদ্রুজং করোতীতি বোধযতি| এতাবতা ধাতুভূতাগ্নীনাং মান্দ্যত্বেনামসম্ভবত্বাত্ শোষব্রণবিদ্রধ্যাদিরোগাণাং তজ্জন্যত্বমুক্তং ভবতি| যদুক্তম্– “ধাতূনাং সপ্ত সপ্তানাং ভূতানাং পঞ্চ পাবকাঃ| ত্রযোদশ ভবন্ত্যেবং সহ জাঠরবহ্নিনা” ইতি| যত্র ধাতুপ্রদেশে বহ্নির্মন্দো ভবতি তত্রৈবামসম্ভবাত্পিডিকাদ্যুত্পত্তিঃ স্যাত্| যত্রেতি গ্রহণেন কুপিতবাতাদীনামিবানিযতমেব স্থানমামস্যেত্যুক্তং ভবতি| কিম্ভূতৈর্বিরুজেদিত্যাহ– দোষেণ যেন স্বকারণাত্ কুপিতেন বাতাদিনা অবততং ব্যাপ্তং শরীরং, তল্লক্ষণৈরেব তস্য লিঙ্গৈস্তোদদাহগৌরবাদিভিঃ ; ন কেবলং তৈঃ আমসমুদ্ভবৈর্বিকারজাতৈরামবাতাদিভিঃ| অনেন শ্লোকেন তন্ত্রান্তরোক্তমামবাতরোগং সঙ্গৃহীতবান্ সুশ্রুতঃ, উক্তলক্ষণস্য সমানত্বাদিত্যাহুঃ||২২||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

বিসূচ্যলসকযোরসাধ্যত্বলক্ষণমাহ– য ইত্যাদি| “বিলম্বিকাযাস্তু স্বরূপেণৈবাসাধ্যত্বম্” ইতি জেজ্জটঃ| অল্পসঞ্জ্ঞো মোহযুক্তঃ| অভ্যন্তরযাতনেত্রঃ কোটরান্তঃপ্রবিষ্টাক্ষিগোলকঃ| সর্ববিমুক্তসন্ধিঃ শ্লথীভূতসর্বপর্বাস্থিসন্ধিঃ| অপুনরাগমায মরণায||২৩||

আতঙ্কদর্পণ ব্যাখ্যা (বাচস্পতি বৈদ্য কৃত)

বিসূচ্চলসকযোরসাধ্যলক্ষণমাহ– য ইত্যাদি| বিলম্বিকাযাস্তু স্বরূপেণৈবাসাধ্যত্বমিতি জেজ্জটঃ| যঃ পুরুষঃ শ্যাবদন্তাদিলক্ষণযুক্তঃ স্যাত্, শ্যাবশব্দো দন্তাদিভিঃ প্রত্যেকং সম্বধ্যতে, অল্পসঞ্জ্ঞো মোহযুক্তঃ, অভ্যন্তরযাতনেত্রঃ কোটরাক্ষঃ অন্তঃপ্রবিষ্টনেত্রঃ| ক্ষামস্বরঃ ক্ষীণধ্বনিঃ, সর্ববিমুক্তসন্ধিশ্চ, স নরঃ অপুনরাগমায অপুনরাবৃত্তযে মরণায, যাযাদ্গচ্ছেত্| অত্রান্যে– নিদ্রানাশাদিভির্লক্ষণান্তরং পঠন্তি| পরং তু “নিদ্রানাশোঽরতিঃ কম্পো মূত্রাঘাতো বিসঞ্জ্ঞিতা| অমী উপদ্রবা ঘোরা বিসূচ্যাঃ পঞ্চ দারুণাঃ||” ইতি মাধবেন সঙ্গৃহীতত্বাত্পৃথঙ্ন লিখিতম্||২৩||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অজীর্ণপ্রতিযোগিতযা জীর্ণাহারলক্ষণমাহ– উদ্গারেত্যাদি| উদ্গারশুদ্ধির্ধূমাম্লাদিরহিতত্বম্| উত্সাহঃ শরীরমনসোর্বলম্| উত্সর্গো মলমূত্রপ্রবৃত্তিঃ, বেগসহিত উত্সর্গো বেগোত্সর্গঃ| যথোচিত উপযুক্তাহারানুরূপঃ| লঘুতা দেহস্য, বিশেষেণ কোষ্ঠস্যেতি||২৪-২৭||

আতঙ্কদর্পণ ব্যাখ্যা (বাচস্পতি বৈদ্য কৃত)

অজীর্ণপ্রতিযোগিতযা জীর্ণাহারলক্ষণমাহ– উদ্গারশুদ্ধিরিত্যাদি| জীর্ণাহারস্য পুংস এতল্লক্ষণম্– উদ্গারশুদ্ধির্ধূমাম্লাদিরহিতত্বম্, উত্সাহঃ শরীরমনসোর্বলম্, উত্সর্গো মলমূত্রপ্রবৃত্তিঃ বেগসহিত উত্সর্গঃ বেগোত্সর্গঃ, যথোচিতঃ উপযুক্তাহারানুরূপঃ, লঘুতা দেহস্য বিশেষেণ কোষ্ঠস্যেতি||২৪-২৭||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ইতি শ্রীবিজযরক্ষিতকৃতাযাং মধুকোশব্যাখ্যাযামগ্নিমান্দ্যাজীর্ণবিসূচিকালসকবিলম্বিকানিদানং সমাপ্তম্||৬||

আতঙ্কদর্পণ ব্যাখ্যা (বাচস্পতি বৈদ্য কৃত)

ইতি শ্রীবৈদ্যবাচস্পতিকৃতে আতঙ্কদর্পণে রুগ্বিনিশ্চযব্যাখ্যানেঽগ্নিমান্দ্যাজীর্ণবিসূচিকালসকবিলম্বিকানিদানম্||৬||