৭. কৃমিনিদানম্

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অজীর্ণাত্ ক্রিমিসম্ভব ইত্যতোঽজীর্ণানন্তরং ক্রিমিনিদানমাহ– ক্রিময ইত্যাদি| তত্র বাহ্যাস্ত্বগুপলেপকবাহ্যমলসম্ভবাঃ, আভ্যন্তরা আমাশযাদিসম্ভবাঃ, তে দেশভেদেন দ্বৈবিধ্যেনোক্তাঃ কারণভেদাচ্চতুর্ধা ভবন্তীত্যাহ– বহির্মলেত্যাদি| বহির্মলো গাত্রোপলেপী স্বেদাদিরুক্ত এব বহির্মলাদিষু চতুর্ষু জন্ম বহির্মলাদিজন্ম তদ্ভেদাত্| ত এব চতুর্বিধা নামভেদেন বিংশতিবিধা ভবন্তি, বিংশত্যতিরিক্তাশ্চাতিসূক্ষ্মাঃ কৃমযঃ সহজাশ্চরকেণোক্তাঃ, তে চাবৈকারিকত্বেন রোগাধিকারে নোচ্যন্তে, বিংশতিবিধাস্তু ক্রিমযো দোষপ্রকোপণদ্বারেণ জ্বরশূলাদীন্ জনযন্তীতি রোগা উচ্যন্তে||১-২||–

আতঙ্কদর্পণ ব্যাখ্যা (বাচস্পতি বৈদ্য কৃত)

অজীর্ণাত্কৃমিসম্ভব ইত্যতোঽজীর্ণানন্তরং কৃমিনিদানমাহ– কৃময ইত্যাদি| একে বাহ্যাঃ কেশে বস্ত্রাদিজা যূকালিক্ষাদযঃ, অন্যে চাভ্যন্তরাঃ| তত্র বাহ্যাস্ত্বগুপলেপকবাহ্যমলসম্ভবাঃ, আভ্যন্তরাশ্চ আমাদিসম্ভবাঃ, ত এব দেশভেদাদ্দ্বৈবিধ্যেনোক্তাঃ কারণভেদাচ্চতুর্ধা ভবন্তি| বহির্মলো গাত্রোপলেপী স্বেদাদিরুক্তঃ| এবং বহির্মলাদিষু চতুর্ষু জন্ম বহির্মলাদিজন্ম, তস্য ভেদাত্| কেচিদ্বহির্মলজন্মানঃ, তথা কেচিত্কফজন্মানঃ, কেচিদ্রক্তজন্মানঃ, কেচিত্পুরীষজন্মানশ্চেতি চতুর্ধা| ত এব চতুর্বিধা নামতো নামভেদেন বিংশতিবিধা বক্ষ্যমাণাভিঃ সঞ্জ্ঞাভির্বিংশতিবিধা ভবন্তি তানাহ– নামতো বিংশতিবিধা বিংশতিসঙ্খ্যাকা নামত ইত্যর্থঃ| এতে চ নামবিশেষাঃ কেচিত্সান্বযাঃ, কেচিন্নিরন্বযাঃ, ব্যবহারার্থং পূর্বাচার্যৈঃ প্রণীতাঃ| তেষাং নামানি যূকা, লিক্ষা বহির্মলোত্থে দ্বে, এতযোরাশ্রযঃ কেশবস্ত্রাণি; কফজা– অন্নাদাঃ, উদরাবেষ্টাঃ, হৃদযাদাঃ, মহাগুদাঃ, চুরবঃ, দর্ভকুসুমাঃ, সুগন্ধাঃ, এবং সপ্ত, এষামাশ্রয আমাশযঃ; রক্তজাঃ– কেশাদাঃ, লোমবিধ্বংসাঃ, রোমদ্বীপাঃ, উদুম্বরাঃ, সৌরসাঃ, মাতরঃ, এবং ষট্, এষাং স্থানং রক্তবাহিসিরাঃ| পুরীষোত্থাঃ পঞ্চ– ককেরুকমকেরুকসৌসুরাদাঃ, সশূলাঃ, লেলিহঃ; এষামাশ্রযঃ পক্বাশযঃ| এবং বিংশতিঃ||১-২||–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

উক্তান্ বাহ্যান্ বিবৃণোতি– বাহ্যাস্তত্র মলোদ্ভবা ইতি| তিলানামিব প্রমাণং পরিমাণং, সংস্থানমাকৃতিঃ, বর্ণশ্চ শ্বেতঃ কৃষ্ণো বা যেষাং যূকাদিরূপাণাং তে তথা| কেশাম্বরাশ্রযা ইতি অম্বরং বস্ত্রম্| বহুপাদা ইতি যূকাঃ, সূক্ষ্মা ইতি লিক্ষাঃ||২-৩||

আতঙ্কদর্পণ ব্যাখ্যা (বাচস্পতি বৈদ্য কৃত)

উক্তবাহ্যানাহ– বাহ্যা ইত্যাদি| তত্র তেষু চতুর্ষু, বাহ্যাস্তত্র বাহ্যমলোদ্ভবাঃ, তিলানামিব প্রমাণং সংস্থানম্ আকৃতির্বর্ণশ্চ শ্বেতঃ কৃষ্ণো বা যেষাং যূকালিক্ষারূপাণাং তে তথা| কেশাম্বরাশ্রযা ইতি– কেশাঃ কচাঃ অম্বরং বস্ত্রং চ আশ্রযো যেষাম্| তে কে কৃমযো ভবন্তীতি তানাহ– বহুপাদা ইত্যাদি| যূকাঃ কেশবিদ্ধাঃ, বহুপাদাঃ বহুচরণাঃ, লিক্ষাঃ সূক্ষ্মা অণবঃ||২-৩||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

তেষাং নিদানমাহ– অজীর্ণেত্যাদি| অজীর্ণে ভোজনশীলোঽজীর্ণভোজ| মধুরাম্লনিত্যঃ সততমধুরাম্লভোজ| বিরুদ্ধং ক্ষীরমত্স্যাদি||৪||

আতঙ্কদর্পণ ব্যাখ্যা (বাচস্পতি বৈদ্য কৃত)

তেষাং নিদানমাহ– অজীর্ণেত্যাদি| না পুরুষঃ কৃমীন্ লভতে, কথম্ভূতঃ? অজীর্ণে ভোজনশীলোঽজীর্ণভোজ, মধুরাম্লনিত্যঃ সততমধুরাম্লভোজ, বিরুদ্ধং ক্ষীরমত্স্যাদি| তথা দ্রবপ্রিযঃ, পিষ্টং গোধূমচূর্ণকৃতং পূপাদি||৪||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ক্রিমিবিশেষে নিদানবিশেষমাহ– মাষেত্যাদি||৫||–

আতঙ্কদর্পণ ব্যাখ্যা (বাচস্পতি বৈদ্য কৃত)

পুরীষজানাং নিদানমাহ– মাষেত্যাদি| এতৈঃ কারণৈঃ পুরীষজা জাযন্তে, ‘পক্বাশয’ ইতি শেষঃ| কফোদ্ভবনিদানমাহ– মাংসেত্যাদি| শুক্ত ইক্ষুরসঃ কালান্তরেণাম্লীভূতঃ| এতে আমাশযে| শোণিতজানাং কারণমাহ– বিরুদ্ধেত্যাদি| শাকম্ অপক্বহরিতচণকাদিশাকভক্ষণম্||৫||–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

আভ্যন্তরক্রিমিলক্ষণমাহ– জ্বর ইত্যাদি||৬||–

আতঙ্কদর্পণ ব্যাখ্যা (বাচস্পতি বৈদ্য কৃত)

আভ্যন্তরকৃমিলক্ষণমাহ– জ্বর ইত্যাদি| বিবর্ণতা শরীরে শ্যামপীততা, শূলমামাশযে পক্বাশযে চ, হৃদ্রোগো হৃদযবিকারো হৃল্লাসাদিঃ, ভ্রমশ্চক্রারূঢস্যেব, ভক্তদ্বেষো ভোজনবিদ্বেষঃ||৬||–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

কফজানাহ– কফাদিত্যাদি| কফনিমিত্তাঃ ক্রিমযো যে ত্বামাশযে জাযন্তে, তে চ বৃদ্ধাঃ সন্তঃ সর্বত ঊর্ধ্বমধশ্চ সর্পন্তি; এবং পুরীষজাদিষু দৃষ্টব্যম্| ব্রধ্নশ্চর্মলতা, ‘ব্রধ্নী’ ইতি লোকে| রূঢং প্ররূঢম্| তনবঃ পরিণাহেন, দীর্ঘা আযামেন, অণবঃ উভাভ্যামপি স্বল্পাঃ| তে ইতি কফজাঃ| সপ্ত নামানি বিবৃণোতি– অন্ত্রাদা ইত্যাদি| এতে চ নামবিশেষাঃ কেচিত্ সান্বযাঃ কেচিন্নিরন্বযা ব্যবহারার্থং পূর্বাচার্যৈঃ প্রণীতাঃ; এবং বক্ষ্যমাণেষ্বপি বোধ্যমিতি||৭-১০||–

আতঙ্কদর্পণ ব্যাখ্যা (বাচস্পতি বৈদ্য কৃত)

কফজানাং স্বরূপমাহ– কফাদিত্যাদি| কফনিমিত্তাত্কৃমযঃ আমাশযে নাভেরূর্ধ্বং জাযন্তে| তে চ বৃদ্ধাঃ সন্তঃ সর্বতঃ ঊর্ধ্বমধশ্চ প্রসরন্তি| আকারেণ পৃথুব্রধ্ননিভাঃ বিস্তীর্ণচর্মৈকদেশাকারাঃ, ব্রধ্নশ্চর্মলতা ব্রাধ্নীতি লোকে, কেচিত্কৃমযো গণ্ডূপদোপমাঃ ভূমিলতাকারাঃ, কেচিদ্রূঢধান্যাঙ্কুরাস্তদাকৃতযো ভবন্তি, রূঢং প্ররূঢমঙ্কুরিতমিতি যাবত্| তনবঃ পরিণাহেন, দীর্ঘা আযামেন, তথা কেচিত্ অণবঃ উভাভ্যামপি স্বল্পাঃ| শ্বেতাঃ শুক্লাঃ, তাম্রাবভাসাঃ তাম্রবর্ণাঃ, কেচিদিতি সর্বত্র সম্বন্ধনীযম্| নামতস্তু তে সপ্তধা ইতি কফজাঃ অন্ত্রাদা ইত্যাদি| তে কুপিতা যান্ রোগান্ কুর্বতে তানাহ– হৃল্লাসেত্যাদি| হৃল্লাস উপস্থিতবমনত্বমিব, আস্যস্রবণং লালাস্রাবঃ, আনাহ উদরে নিশ্চলাটোপঃ||৭-১০||–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

রক্তজানাহ-রক্তেত্যাদি| রক্তবাহিসিরাস্থানাশ্চ তে রক্তজাশ্চেতি রক্তবাহিসিরাস্থানরক্তজাঃ; অথবা রক্তবাহিসিরাস্থানং যদ্রক্তং তজ্জাঃ| নামভেদাত্তে ষট্, তত্র কেশাদাদযশ্চত্বারঃ, সহ সৌরসনামমাতৃনামভ্যাং ক্রিমিভ্যাং বর্তন্তে ইতি সহসৌরসমাতরঃ, এবং ষড্ ভবন্তি| কুষ্ঠৈককর্মাণ ইতি কুষ্ঠমেবৈকং কার্যং যেষাং তে তথা, কুষ্ঠজনকা ইতি যাবত্| উক্তং হি সুশ্রুতে– “সর্বাণি কুষ্ঠানি সবাতানি সপিত্তানি সশ্লেষ্মাণি সক্রিমীণি চোপদিশ্যন্তে” (সু. নি. অ. ৫) ইতি ||১১-১২||

আতঙ্কদর্পণ ব্যাখ্যা (বাচস্পতি বৈদ্য কৃত)

রক্তজানাং স্বরূপমাহ– রক্তেত্যাদি| রক্তজা জন্তবঃ ক্রিমযঃ, রক্তবহাসু সিরাসু স্থানং যেষাং তে তথা বৃদ্ধাঃ সন্তঃ সর্বতঃ প্রসরন্তীত্যত্রাপি যোজ্যম্| অপাদাঃ পাদরহিতাঃ, বৃত্তাঃ বর্তুলাঃ, বর্ণতস্তাম্রাঃ, তে সৌক্ষ্ম্যাত্ অণুরূপত্বাত্ কেচিদদৃশ্যাঃ| নামতঃ ষট্– কেশাদা, লোমবিধ্বংসাঃ রোমদ্বীপাঃ উদুম্বরাঃ সহসৌরসমাতরঃ, এবং ষড্ ভবন্তি| তে কুষ্ঠৈককর্মাণ ইতি কুষ্ঠমেবৈকং কর্ম কার্যং যেষাং তে তথা, কুষ্ঠজনকাঃ কুষ্ঠৈকফলদা ইত্যর্থঃ| উক্তং চ সুশ্রুতে– “সর্বাণি কুষ্ঠানি সবাতানি সপিত্তানি সশ্লেষ্মাণি সকৃমীণি সরক্তানি চোপদিশ্যন্তে” ইতি| অথবা কুষ্ঠেন সহৈকং সমানং কর্ম হর্ষকণ্ডূতোদাদিকং কেশশ্মশ্রুলোমবিধ্বংসাদিকং ত্বক্সিরাস্নাযুমাংসতরুণাস্থিভক্ষণং চ যেষাং ত এবম্||১১-১২||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পুরীষজানাহ– পক্বাশয ইত্যাদি| অধোবিসর্পিণ ইতি বিসর্পণং গতিঃ, গুদনিঃসরণশীলাঃ; তে যদাঽতিবৃদ্ধাঃ সন্তঃ আমাশযোন্মুখা ভবেযুস্তদাঽস্য রোগিণ উদ্গারনিঃশ্বাস বিড্গন্ধানুবিধাযিনঃ স্যুঃ পুরীষগন্ধযুক্তা ভবন্তীতি যোজ্যম্| শেষং সুবোধম্||১৩-১৬||

আতঙ্কদর্পণ ব্যাখ্যা (বাচস্পতি বৈদ্য কৃত)

পুরীষজানাহ– পক্বাশয ইত্যাদি| পুরীষোত্থাঃ ক্রিমযঃ পক্বাশয এব জাযন্তে, পুরীষস্য পক্বাশযস্থিতত্বাত্| তে চাধোবিসর্পিণঃ স্যুর্নোর্ধ্বগাঃ; অধোবিসর্পিণ ইতি গুদনিঃসরণশীলাঃ| তে যদা বৃদ্ধাঃ সন্ত আমাশযোন্মুখা ভবেযুঃ, তদাঽস্য রোগিণ উদ্গারে নিঃশ্বাসে বিঙ্গন্ধানুবিধাযিনঃ পুরীষগন্ধকারিণো ভবন্তীতি যোজ্যম্| পৃথবো দীর্ঘাঃ, বৃত্তা বর্তুলাঃ, তনবঃ অল্পাঃ, স্থূলা উত্সন্নাঃ ‘আকারেণ’ ইতি শেষঃ| বর্ণতঃ শ্যাবাঃ, ঈষত্পীতশ্বেতাঃ| অসিতাঃ কৃষ্ণাঃ| নামতঃ পঞ্চধা ককরুকাদিভেদেন| এবং তে পঞ্চ যান্ রোগান্ জনযন্তি তানাহ– বিড্ভেদেত্যাদি| বিড্ভেদঃ সান্দ্রমলপ্রবৃত্তিঃ, শূলং পক্বাশযে, বিষ্টম্ভো মলস্য, পারুষ্যং কর্কশাঙ্গত্বম্, অগ্নিসদনং বহ্নিগ্লানিঃ, বিমার্গগা বিমার্গপ্রবৃত্তযঃ||১৩-১৬||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ইতি শ্রীবিজযরক্ষিতকৃতাযাং মধুকোশব্যাখ্যাযাং ক্রিমিনিদানং সমাপ্তম্||৭||

আতঙ্কদর্পণ ব্যাখ্যা (বাচস্পতি বৈদ্য কৃত)

ইতি শ্রীবাচস্পতিবৈদ্যবিরচিতাযাং মাধবনিদানব্যাখ্যাযামাতঙ্কদর্পণাখ্যাযাং ক্রিমিনিদানম্||৭||