১. আযুষ্কামীযাধ্যাযঃ

সর্বাঙ্গসুন্দরী ব্যাখ্যা ( কৃত)

স০ - শ্রী মহাগণপতযে কুরুতে নমঃ| শ্রীআনন্দিনীমঠায নমঃ| দীপ্ত্যা যস্যেন্দ্রনীলোপলশকলরজোনীলযা নীলিতাভাং লক্ষ্মীমুত্তপ্তভাস্বত্কনকরুচিমপি স্পর্শরোমাঞ্চিতাঙ্গীম্| কালীত্যাশঙ্কমানঃ স্ফুরদধরপুটশ্চক্রপাণিঃ কিলাভূদ্ভর্তা লোকস্য শশ্বত্স ভবতু ভবতাং ভূতযে পদ্মনাভঃ|| ১|| কো মত্সরিণি লোকেঽস্মিন্বিদ্বান্কিঞ্চিচ্চিকীর্ষতি| কিন্তু কশ্চিদ্ভবেত্সাধুস্ততোঽযং মত্পরিশ্রমঃ|| ২|| শ্রীমন্মৃগাঙ্কতনযষ্টীকামষ্টাঙ্গহৃদযস্য| শ্রীমানরুণঃ কে সম্যগ্দ্রষ্টুঃ পদার্থবোধায|| ৩|| ইহ হি শাস্ত্রারম্ভে শাস্ত্রপরিসমাপ্তযে সর্ব এব সভাভূষণভূতা নিখিলজনজনিতপ্রমোদসংদোহা রুচিররুচিরচিতবচনচংদনচর্চিতপ্রবংধাঃ প্রবংধবিরচনপ্রবরা ইষ্টদেবতানমস্কারং তন্ত্রকারা বিদধুঃ| তদযমপি তন্ত্রকারোঽভীষ্টদেবতানমস্কারপুরঃসরং তন্ত্রমারিরিপ্সুরিদমাহ-

সর্বাঙ্গসুন্দরী ব্যাখ্যা ( কৃত)

স০ - রাগ আদির্যেষাং তে রাগাদযঃ| আদিশব্দেন দ্বেষলোভাদিপরিগ্রহঃ| রুজন্তীতি রোগাঃ| দেহমনসী সন্তাপযন্তীত্যর্থঃ| ননু মনঃস্থিতত্বান্মন এব তে রুজন্তীতি বক্তুং যুক্তম্| মৈবম্| দেহমনোলক্ষণযোর্বস্তুনোরাধারাধেযভাবেন স্থিতত্বাদ্দ্বযোরপি সন্তাপো যুক্তঃ| যথা আধেযেনাযোগোলকেন সন্তপ্তেন তদাধারস্য কটাহাদেঃ সন্তাপঃ| আধারেণ চ কটাহাদিনা সন্তপ্তেনাধেযস্য ঘৃতাদেঃ সন্তাপঃ| তদেবং রাগাদযো দ্বযং রুজন্তীতি ন্যায্যমেতত্| তথা সততানুষক্তাঃ সর্বকালং প্রসৃতাঃ, সহজা ইত্যর্থঃ| অশেষকাযপ্রসৃতা অশেষশ্চাসৌ কাযশ্চাশেষকাযঃ| তত্র প্রসৃতা অনুগতাঃ| যদ্বাঽশেষাশ্চ তে কাযাশ্চাশেষকাযাঃ| সর্বাণি শরীরাণি গজতুরগোরগাদিসম্বম্ধীনি তানি প্রকর্ষেণ সৃতা গতাঃ| তথা অশেষাঃ ন বিদ্যতে শেষো যেষাং তেঽশেষাঃ সর্বে সমূলাঃ| সবীজা ইত্যর্থঃ| তথৌত্সুক্যমোহারতিদাঃ| ঔত্সুক্যং বিষযোত্কণ্ঠা গতোঽভিলাষঃ| মোহঃ কার্যাকার্যানভিজ্ঞত্বম্| অরতিরনবস্থিতিঃ| স্থানাসনাদিষু| ঔত্সুক্যং চ মোহশ্চারতিশ্চ তা দদতি যে রাগাদযস্ত এবম্| তানেবংবিধান্ যো ভগবান্ জঘান তস্মৈ তথাভূতাযাপূর্ববৈদ্যায নমোঽস্তু| তং পূজযামীত্যর্থঃ| অত এবাসাবপূর্ব আশ্চর্যভূতো বৈদ্যঃ| অন্যো হি যো বৈদ্যঃ স জ্বরাদীনপ্যচিরোত্থিতান্ রোগানেতদ্বিশেষণৈউরপরামৃষ্টান্ন তথা হর্তুং সমর্থঃ| কিমুত রাগাদীনসাধ্যলক্ষণলক্ষিতান্| তথা চাসাধ্যলক্ষণম্|(অস্মিন্নেবাধ্যাযে শ্লো. ৩২)"অনুপক্রম এব স্যাত্ স্থিতোঽত্যন্তবিপর্যযে| ঔত্সুক্যমোহারতিকৃদ্" ইতি| যদ্বা ন বিদ্যতে পূর্বো যস্মাদসাবপূর্বঃ| পূর্বেভ্যঃ প্রথম ইত্যর্থঃ| অপূর্বশ্চাসৌ বৈদ্যোঽপূর্ববৈদ্য ইত্যর্থঃ| এবংবিধং চাভিমতনমস্কারশ্লোকং বিরচযন্ গ্রন্থকৃদ্গ্রন্থস্য রোগোপশাংতিঃ প্রযোজনমিতি প্রতিপাদযতি| তথা চাহ চরকমুনিঃ (সূ. অ. ১|৫২)"ধাতুসাম্যক্রিযা চোক্তা তন্ত্রস্যাস্য প্রযোজনম্" ইতি| এবং চ ধাতুসাম্যেন প্রযোজনেন প্রযোজনবদিদং তন্ত্রম্| তথা তত্পাঠাত্তদর্থাববোধাত্তদ্বিধ্যনুষ্ঠানাচ্চ আরোগ্যাখ্যস্যোপেযস্য তথাভিমতস্যাযুষঃ পরস্য পুরুষার্থস্য মোক্ষাখ্যস্য চ পরমার্থত ইদমেব তন্ত্রমুপাযঃ| অস্মাচ্চোপাযোপেযলক্ষণসম্বধাত্ সম্বন্ধবদিদং তন্ত্রম্| তথা হেতুলিঙ্গৌষধ্যাখ্যস্কন্ধত্রযমস্যাভিধেযং তেনাভিধেযেনাভিধেযবত্তন্ত্রম্| এবং চ গ্রন্থকৃতাত্র প্রযোজনসন্বন্ধাভিধেযা যুক্ত্যৈবোক্তাঃ| ইন্দ্রবজ্রোপেন্দ্রবজ্রাবিরচিতত্বাদুপজাতিবৃত্তম্| যথা, "অনন্তরাপাদিতলক্ষ্মশোভৌ পাদৌ ভবেতাং বিবিধৈর্বিকল্পৈঃ| যাসামিমাবন্যযতিপ্রপঞ্চৌ স্মৃতাঃ স্মৃতিজ্ঞৈরুপজাতযস্তাঃ||" ইতি| সর্বত্রৈব চাত্র তন্ত্রেঽনুষ্টুভা সমানীপ্রমাণীবিতানাদিভেদভিন্নতযা বিরচনম্| যত্পুনরবসরান্তরে বৃত্তান্তরবিরচনমিহ তত্সলক্ষণং ব্যঞ্জযিষ্যামঃ|

আযুর্বেদরসাযনম্ ব্যাখ্যা ( কৃত)

আ০ র০-শ্রীগণেশায নমঃ| পৃষ্ঠে কূর্মতযা চতুর্ভুজতযা দোর্মণ্ডলে মন্দরং রুদ্ধ্বা ক্ষীরসমুদ্রমোষধিভৃতং নির্মথ্য নিষ্পাদিতৈঃ| আনীতৈরমৃতৈর্ভিষক্তমতযা যোষিত্তযা পাযিতৈর্দেবানামজরামরত্বমকরোত্তস্মৈ নমো বিষ্ণবে||১|| হেমাদ্রিণা চতুর্বগচিন্তামণিবিধাযিনা| তদুক্তব্রতদানাদিসিদ্ধ্যাঙ্গারোগ্যসিদ্ধযে||২|| ক্রিযতেঽষ্টাঙ্গহৃদযস্যাযুর্বেদস্য সুগ্রহা| টীকা চরকহারীতসুশ্রুতাদিমতানুগা|| ৩|| চরকে হরিচন্দ্রাদ্যৈঃ সুশ্রুতে জৈজ্জটাদিভিঃ| টীকাকারৈর্ন নির্ণাতমিহ হেমাদ্গিণোদিতম্|| ৪|| দেশভ্রংশভযাদ্বিচাল্য লযিনঃ স্নেহৈঃ প্রতাপৈঃ পরং প্রদ্রাব্য প্রসৃতান্ প্রবেশ্য পরিতো দুর্গোদরং দ্রাক্ততঃ| ঊর্ধ্বাধোগতি নির্গময্য মদনৈর্দন্ত্যাদিভির্বিদ্বিষো দোষানদ্রঢি রামরাজ্যমগদঙ্কারেণ হেমাদ্রিণা|| ৫|| হেমাদ্রির্নাম রামস্য রাজ্ঞঃ শ্রীকরণেষ্বধি| ননূভৌ ভগবন্নিষ্ঠষাঙ্গুণ্যকরণেষ্বধি|| ৬|| সর্বেষাং দ্বীপবর্ণাণাং মেরুরুত্তরতঃ স্থিতঃ| তদস্তু সর্বোত্তরতা হেমাদ্রৌ দৃশ্যতে যতঃ|| ৭|| সেব্যা হেমাদ্রিটীকেযমাযুর্বেদরসাযনম্| আযুর্বেদাত্মনাং পুংসাং নির্দোষত্বম্ হি নান্যথা||৮|| অষ্টাঙ্গহৃদযং মুখ্যমনুক্তেঽষ্টাঙ্গসঙ্গ্রহঃ| তন্ত্রান্তরাণি চোক্তানি বৈষম্যে বিবৃতানি চ||৯|| আযুর্বেদং ব্যাচিখ্যাসুঃ শ্রীবাগ্ভটাচার্যঃ প্রথমশ্লোকেনেষ্টদেবতাং নমস্করোতি-রাগাদিরোগানিতি| স চাপূর্ববৈদ্যঃ| অপূর্বত্বং চ অদ্ভুতশক্তিত্বম্| তচ্চ জ্বরাদিবিলক্ষণানাং রোগাণাং ঘাতেন| তে চ রাগাদযঃ| শুদ্ধস্য চেতসো রজস্তমোভ্যাং রঞ্জনং রাগঃ| তদাদযস্তন্মূলাঃ কামক্রোধাদযঃ| জ্বরাদিবিলক্ষণত্বমেবাহ-সততানুষক্তান্, সর্বকালমাত্মনা সম্বদ্ধান্| ননু, জ্বরাদযোঽপি কুলোদ্ভবাঃ এবমিত্যত আহ-অশোষকাযপ্রসৃতান্, যাবন্ত্যাত্মনঃ শরীরাণি তানি সর্বাণ্যভিব্যাপ্য স্থিতান্| ননু, কুলোদ্ভবা অপি কুষ্ঠার্শোমেহাদ্যা অনন্তব্যক্তিভেদেনৈবমিত্যত আহ-অশেষান্, সর্বানেব যুগপত্প্রতিদেহং স্থিতান্| ননু, সত্কার্যবাদিনাং মতে জ্বরাদযোঽপি সূক্ষ্মরূপেণৈবমিত্যত আহ-ঔত্সুক্যমোহারতিদান্, ঔত্সুক্যম্ অবিচার্যকার্যপ্রবৃত্তিঃ, মোহো বিচারাশক্তিঃ, অরতিঃ অসন্তোষঃ তা দদত্যাত্মনঃ সমর্পযন্তীতি তথা| ঔত্সুক্যাদীনি স্বকার্যণ্যদ্ভুতানি সমর্পযন্তঃ সর্বে সর্বদেহেষু সর্বদা আত্মানং ক্লেশযন্তীতি জ্বরাদিবিলক্ষণা এব রাগাদিরোগাঃ| জঘানেতি মোক্ষশাস্ত্রপ্রণযনেন বধোপাযং দর্শিতবান্| ন তু স্বযং হতবন্| তথা হ্যধুনা কামাদ্যদর্শনং স্যাত্||

সর্বাঙ্গসুন্দরী ব্যাখ্যা ( কৃত)

স০- অথেতি| অথশব্দোঽস্মিন্মঙ্গলাধিকারানন্তর্যেষু দ্রষ্টব্যঃ| মঙ্গলাদীনাং হি শাস্ত্রাণাং তদধ্যেতৄণাং নিষ্প্রতিবন্ধা প্রবৃত্তিরভিপ্রেতার্থসাধনায জাযতে| অথশব্দশ্চাযং মঙ্গলার্থঃ| তথা চোক্তম্-"ওঙ্কারশ্চাথশব্দশ্চ দ্বাবেতৌ ব্রহ্মণঃ পুরা| কণ্ঠং ভিত্বা বিনির্যাতৌ তেনেমৌ মঙ্গলৌ স্মৃতৌ||"ইতি| অতোঽধিকারে| আযুষ্কামীযং শাস্ত্রমধিক্রিযতে যাবদত ঊর্ধ্বং প্রতন্যতে আতন্ত্রপরিসমাপ্তেস্তত্সর্বমাযুষ্কামীযং বেদিতব্যম্| অত আনন্তর্যে চ| নমস্কারাদনন্তরমাযুষ্কামহিতং ব্যাখ্যাস্যাম ইতি| কথং পুনরেকস্যৈব তন্ত্রকারস্য ব্যাখ্যাস্যাম ইতি বহুবচনং যুজ্যতে| ব্রূমঃ| "অস্মদো দ্বযোশ্চ" ইত্যেকত্বেঽপি বহুবচনবিধানাদভিলষন্তীতি| যুক্তমেবাত্রৈকস্মিন্নপি বহুবচনম্| আযুঃ শরীরেন্দ্রিযসত্বাত্মসংযোগঃ| তথা চ মুনিঃ (চ. সূ. অ. ১|৪১)-| "শরীরেন্দ্রিযসত্ত্বাত্মসংযোগো ধারি জীবিতম্| নিত্যগং চানুবদ্ধং চ পর্যাযৈরাযুরুচ্যতে||" ইতি| এতীত্যাযুঃ| সন্ততং যাতীত্যর্থঃ| এবংবিধং গত্বরস্বভাবমপি হিতাহারবিহারসেবাদিভিরহিতবর্জনেন চ কথমেতত্ স্থিরীভবেদিত্যেবং কামযন্তে যে তে আযুষ্কামাঃ| তেভ্যো হিত আযুষ্কামীযঃ| স পুনরাযুর্বেদাগমাদিপ্রকরণসমুদায আযুষ্কামযমানেনেত্যাদিকঃ| আযুষ্কামীয ইতি ইসুসোঃ সামর্থ্যে ইতি ষাদেশঃ| তস্মৈ হিতমিতি ছঃ| আযুষ্কামীযশব্দোঽধ্যাযবিশেষণার্থো নীলোত্পলদলবত্| বহুষ্বধ্যাযেষু সত্সু কতমমধ্যাযং ব্যাখ্যাস্যাম আযুষ্কামীযমিতি| অধিকৃতোঽধ্যাযনাযেত্যধ্যাযস্তং ব্যাখ্যাস্যামঃ বিবিধপ্রকারেণ বিশেষেণ বা কথযিষ্যামঃ| আযুষ্কামৈঃ পূর্বং দৃষ্টত্বাদস্যাধ্যাযস্যাযুষ্কাম ইতি সংজ্ঞা| অর্থগতিমধিকৃত্যাধ্যায ইতি নাম| তথা চোক্তম্| (চ. সূ. অ. ৩০|৬৫)- "অধিকৃত্যেযমধ্যাযনামসংজ্ঞা প্রতিষ্ঠিতা" ইতি| তত্র পদসমুদাযো বাক্যং বাক্যসমুদাযঃ প্রকরণং, প্রকরণসমুদাযো যঃ, সোঽধ্যাযঃ, অধ্যাযসমুদাযঃ স্থানং, স্থানসমুদাযস্তন্ত্রমিতি| বিশব্দো নানার্থঃ| আঙভিবিধৌ| উত্তরাখ্যশ্চাযমলঙ্কারঃ| তস্য হি লক্ষণম্| (কাব্যালঙ্কারে অ, ৭|৯৩)- "উত্তরবচনশ্রবণাদুন্নযনং যত্র পূর্ববচনানাং ক্রিযতে তদুত্তরং স্যাত্" ইত্যাদি| ততোঽনেন বাক্যেন শিষ্যবচনমীদৃশমুন্নীযতে| সংসারেঽস্মিন্নমী প্রাণিনো নানারোগানীকাভিভূতাস্ত্রাতারমলভমানাশ্চতুর্বর্গাদ্ ভ্রশ্যন্তে| তত্কো নু ভগবন্নত্রোপাযঃ স্যাদিতি কৃতপ্রশ্নো গুরুঃ প্রতিজজ্ঞে, অথাত আযুষ্কামীযমধ্যাযং ব্যাখ্যাস্যাম ইতি| অথ শিষ্যবচনানন্তরম্| অতো হেতোর্যস্মাদযং শিষ্যঃ শ্রুতকুলশীলাদিসংপন্নো ধীমেধাগুণভূষণভূতশ্চ| বি বিবিধৈঃ প্রকারৈঃ আ শিষ্যবোধোত্পত্তেঃ| আযুষ্কামীযমধ্যাযং ব্যাখ্যাস্যামো বর্ণযিষ্যামঃ| ননু কীদৃশং তদ্বিবিধপ্রকারমাখ্যানম্| ব্রূমঃ| পদতঃ, তদর্থতঃ, প্রযোজনতঃ, চোদ্যতঃ, পরিহারতঃ, সম্বন্ধাভিধেযতশ্চ| পদতো যথা, আযুরিতীদং পদম্| তদর্থতো যথা এতীত্যাযুঃ| প্রযোজনতো যথা, অত্রৈব ধর্মার্থসুখসাধনম্| চোদ্যতো যথা, ননু কথমেতত্কেবলং ধর্মার্থসুখসাধনমিতি বক্তুং পার্যতে| যতোঽস্যাযুষঃ কর্মৈব কেবলং ধর্মসাধনমিতি বক্তুং নো পার্যতে| যতোঽস্যাযুষঃ পরিপালনার্থং বিশস্তাঃ কাকগৃধ্রভাসাদযো রাজযক্ষ্মচিকিত্সিতে ভোজ্যা ইত্যুক্তম্| অভক্ষ্যাশ্চৈতে| শ্রুতিস্মৃত্যোরভক্ষ্যত্বেনোক্তত্বাত্| এবমভক্ষ্যভক্ষণাদ্ধিংসযা চ পাপযোগঃ| তদ্যোগাচ্চাধর্মসাধনং ন ধর্মসাধনমিতি| পরিহারতো যথা, অত্রৈবং পরিহারো যজ্ঞাধিকারিশরীরনিমিত্তং কাকাদীনাং বিশসনং ভক্ষণং বিধীযমানং নাধর্মায| ইতরথা ক্রীডার্থং ক্রিযমাণমধর্মাযৈব| তথা চ কাকাদযোঽপি তত্সাধনোপযোগাদ্ধর্মেণ তত্ফলেন সম্বধ্যন্তে যজ্ঞিযা ইব পশবঃ| তদেবমাযুষো ধর্মসাধনত্বং স্থিতম্| সম্বন্ধাভিধেযৌ তূক্তাবেব| ননু সন্ত্যেবান্যান্যপি মহর্ষিপ্রণীতান্যাযুর্বেদতন্ত্রাণি, কিমনেন তন্ত্রেণ কৃতেনেতি| অত্র ব্রূমঃ| অপরতন্ত্রাণাং সাবদ্যত্বাদিদমুচ্যতে| অন্যানি হি তন্ত্রাণি সদোষাণি| তথা হি| যদেতত্তাবদ্ভগবতা চরকমুনিনা প্রণীতং তন্ত্রং রত্নাকর ইব গন্ভীর্যাতিশযযোগাদ্দুর্বোধম্| তস্যাপি সদোষতাং প্রকটযন্তি বাচাটাঃ| তথা হ্যাদৌ তত্সূত্রম্| অথাতো দীর্ঘঞ্জীবিতীযমধ্যাযং ব্যাখ্যাস্যাম ইতি| অত্র দীর্ঘঞ্জীবিতীয ইতি শাস্ত্রাদাবযুক্তম্| যতো (চ. সূ. অ. ১ শ্লো. ৩) দীর্ঘং জীবিতমন্বিচ্ছন্নিত্যস্যানুকরণং দীর্ঘঞ্জীবিতমিতি| সোঽস্মিন্নধ্যাযেঽস্তীতি ছঃ| তস্যাধ্যাযানুবাকযোর্লুকি সতি দীর্ঘঞ্জীবিতমিতি প্রাপ্নোতি| তদিদমবিদিতপরমার্থশব্দস্বরূপাণাং বচনম্| তথাহি| অধ্যাযানুবাকযোরিত্যাদৌ সূত্রে বিকল্পেন চাযং লুগিষ্যত ইতি জগাদ জযাদিত্যঃ| তেন লুকঃ পাক্ষিকত্বাদত্র লুক্ ন ভবতীত্যেবং যুক্তমুক্তমিদম্| দীর্ঘশব্দেন গুণোঽভিধীযতে জীবিতশব্দেনাপি গুণ এব| তস্মাদ্দ্বযোরপি গুণত্বাদাধারাধেযভাবো ন যুক্তঃ, যতো গুণাশ্রযো নোক্ত ইতি| তথা চ বৈশেষিকাঃ| নির্গুণা গুণা ইতি| অথ কালশব্দং লুপ্তস্বরূপং নির্দিশ্য দীর্ঘজীবিতীযশব্দো নির্দিশ্যতে তদা যুক্তমেবৈতত্| তথা ইন্দ্রিযোপক্রমণীযেঽধ্যাযে ছপ্রত্যযোত্পত্তিঃ কথমেবং বিধীযতাং যতোঽস্মিন্নধ্যায ইন্দ্রিযোপক্রমণশব্দো নাস্ত্যেব| এবমপামার্গতণ্ডুলীযেঽপামার্গতণ্ডুলশব্দস্যাভাবাচ্চ প্রত্যযোত্পত্তির্দুর্লভা| তথা দিব্যাম্ভসো গাঙ্গসমুদ্রভেদঃ পরীক্ষা চ নোক্তা| প্রত্যুত তত্র পঠ্যতে| (চ. সূ. অ. ২৭|১৯১)- "জলমেকবিধং সর্বং পতত্যৈন্দ্রং নভস্তলাত্| তত্পতত্পতিতং চৈব দেশকালাবপেক্ষতে" ইতি| তথা নালিকেরোদকস্য গুণা নোক্তাঃ| তথা, অপক্বক্বথিতক্ষীরস্য স্বরূপবিশেষো নোক্তঃ| তথা কষাযে কিযদৌষধং কিমবশেষং ক্বথনীযমিত্যাদি চ নোক্তম্| মিশ্রকে স্নেহ এবমভ্যধাদসৌ| "ত্রিবৃত্তাং ত্রিফলাং দন্তীং দশমূলং পলোন্মিতম্| চতুর্গুণং জলং দত্ত্বা" ইত্যাদি| তদেষামৌষধানাং কিযন্মানমপি সলিলেনৈতাবতা কীদৃশং কিমুত ক্বাথনির্যাসাবিতি| তথা ক্বথিতশীততোযমপি কিযতা পাকেন পথ্যং ভবতীতি নোক্তম্| মুদ্গো গ্রাহীতি চ নোক্তম্| তথা চ তত্পাঠঃ (চ. সূ. অ. ২৭|২২)-"কষাযমধুরো রূক্ষঃ শীতঃ পাকে কটুর্লঘুঃ| বিশদঃ শ্লেষ্মপিত্তঘ্নো মুদ্গাঃ সূপ্যোত্তমো মতঃ||" ইতি| তথা বাস্তুকাদীনাং লঘুত্বং নোক্তম্| তথাচ তত্পাঠঃ (চ. সূ. অ. ২৭|৮৫)- "পাঠাসুষাসঠীশাকং বাস্তুকং সুনিষণ্ণকম্| বিদ্যাদ্গ্রাহি ত্রিদোষঘ্নং ভিন্নবর্চস্তু বাস্তুকম্||" ইতি| তথেক্ষুবর্গে, (চ. সূ. অ. ২৭|২৩৪)- " শৈত্যাত্মসাদান্মাধুর্যাত্পৌণ্ড্রকাদ্বাংশিকো বরঃ" ইত্যসাবভ্যধাত্| পৌণ্ড্রকশ্চ বাংশিকাদ্বর ইতি সুপ্রসিদ্ধমেতত্| অত্র মতিবৈভবাদ্ভট্টারকহরিশ্চন্দ্রৌ ব্যাখ্যাবিশেষমবোচতাম্| যথা পৌণ্ড্রকাদ্বাংশিকোঽবর ইতি| এবং চৈতদুপপন্নমেব| তদেবমাত্রেযস্যাপি তন্ত্রে যতো বহবো দোষা উদ্ভাব্যন্তে, ততঃ কা গণনা তন্ত্রান্তরাণাম্| তথা বেদোত্পত্তিরিতি সংজ্ঞা তন্ত্রেঽস্মিন্সদোষত্বান্ন কৃতা| তথা হি| আযুষো বেদ আযুর্বেদঃ, তস্যোত্পত্তিরাযুর্বেদোত্পত্তিরিতি ভবিতব্যম্| অত্র কেচিদাহুঃ| আযুঃশব্দলোপং কৃত্বেহ নির্দেশঃ কৃতঃ| এবমপি সতি লোপস্তাবদমঙ্গলঃ| সোঽপ্যাযুষঃ স চ শাস্ত্রাদৌ| ইত্যন্যায্যৈবৈষা সংজ্ঞা| কিংচ বেদোত্পত্তিরিত্যেতদপি তাবদ্বক্তুং ন যুজ্যতে, নিত্যত্বাদস্য বেদস্য| নিত্যো হ্যযমাযুর্বেদঃ| আযুঃসন্তানাদিনিত্যত্বাত্| তথা হ্যাযুঃসংতানঃ| সর্বপ্রাণিসংবেদ্যশরীরাপরশরীরগো মনঃপ্রবন্ধনিত্যতযা নিত্যঃ| অস্য নিত্যত্বাদাযুর্বেদোঽপি নিত্যঃ| নিত্যত্বাচ্চাস্যোত্পত্তিমত্ত্বং বক্তুমযুক্তম্| নন্বববোধোপদেশাভ্যামুত্পত্তিরস্যোপলভ্যতে| যতঃ প্রাগুপদেশান্নাসাবুপলভ্যতে| অত উপদেশানন্তরমুপদেশদ্বারেণোপলভ্যতে| তস্মাদববোধোপদেশাবস্যোত্পত্তিকারণত্বেন কল্পযিত্বোত্পত্তিমত্ত্বমস্যোচ্যত ইতি কৈশ্চিদূচে| নৈতদ্যুক্তম্| যতঃ সতো বোধোপদেশৌ স্তো নাসতঃ| তথা চাচষ্টে লোকঃ| অমুনা গুরুণা ছাত্রাযোপদিষ্টং শাস্ত্রমিদমিতি| সত এবোপদেশাববোধৌ স্তঃ| তস্মান্নাববোধোপদেশাবস্যোত্পত্তিকারণমিত্যতোঽপি হেতোর্বেদোত্পত্তিসংজ্ঞেত্যযুক্তা| ইতি সংজ্ঞানাং সাবদ্যত্বং নিরূপ্য নিরবদ্যাযুষ্কামীযসংজ্ঞা হি তন্ত্রে কৃতা| যযোচ্চারিতমাত্রযৈবাঽশেষস্তন্ত্রার্থঃ প্রকাশ্যতে| প্রতিস্থানং চ যোঽধ্যাযঃ প্রথমস্তত্সংজ্ঞযা স্থানার্থঃ| অন্যে চ যেঽধ্যাযাস্তন্ত্রেঽস্মিংস্তত্সংজ্ঞাভির্যথাস্বতন্ত্রমর্থজাতং প্রকাশযন্ত ইতি| ইদমিদানীং পৃছ্যতে তন্ত্রকারঃ| যদস্মিংস্তন্ত্রে কিংচিদুচ্যতে স্ম ভবদ্ভিস্তত্স্ববুদ্ধিপরিকল্পিতমুত নেত্যাহ| স০ - ইতিশব্দ এবমর্থে| যথা ইতি হ স্ম, তানাহ| হশব্দোঽনুকম্পাযাম্| ব্রূধাতোঃ স্ম উপপদে ভূতানদ্যতনপরোক্ষে 'লট্ স্মে' ইতি লট আহাদেশঃ| অত্রেরপত্যমাত্রেযঃ| 'ইতশ্চানিঞঃ' ইতি ঢক্| আত্রেয আদির্যেষাং ধন্বন্তরিপ্রভৃতীনাং ত এবম্| মহান্তশ্চ তে ঋষযশ্চ মহর্ষযঃ| মহত্বং তজ্জ্ঞানাতিশযযোগাত্| তেনাযমর্থোঽনেন কারণেনানুকম্পযা, ন তু ফলাকাঙ্ক্ষযা, ভগবন্ত আত্রেযাদযো মহর্ষযোঽব্রুবন্| নাস্মাভিঃ স্বমতিপরিকল্পিতং কিঞ্চিদপ্যত্রোক্তম্| কেবলং দূতসন্দেশবচনন্যাযেন যুগানুরূপঃ ক্রমমাত্রোঽন্যথা কৃত ইত্যর্থঃ| তথা চাস্যৈবসঙ্গ্রহে- (সূ. অ. ১) "ন মাত্রামাত্রমপ্যত্র কিঞ্চিদাগমবর্জিতম্| তেঽর্থাঃ স গ্রন্থসন্দর্ভঃ সংক্ষেপায ক্রমোঽন্যথা" ইতি| তদেবমাগমপ্রামাণ্যমস্য তন্ত্রস্যেত্যুক্তং ভবতি|

আযুর্বেদরসাযনম্ ব্যাখ্যা ( কৃত)

আ০ র০-আযুষ্কামীযমধ্যাযং ব্যাখ্যাতুং প্রতিজানীতে অথেতি| অথ স্বেষ্টদেবতানমস্কারানন্তরম্| অতো হেতোর্ব্যাখ্যেযঃ| যতোঽযমাযুর্বেদো ব্যাধিপ্রতীকারব্যাখ্যানম্| আযুর্বৈরিণো হি ব্যাধযঃ| ব্যাখ্যা চ সামান্যবিশেষাভ্যাং সংক্ষেপবিস্তরাভ্যাং চ কৃতা সুগ্রহা ভবতি| তত্রাদৌ ব্যাধিপ্রতীকারস্য সামান্যসংক্ষেপব্যাখ্যার্থমযমধ্যাযঃ, আযুষ্কামহিতত্বাচ্চ আযুষ্কামীযঃ| নন্বেবং চেত্সর্বেঽপি আযুষ্কামীযাঃ| সত্যং, কিন্তু প্রথমোঽযমধ্যাযো মঙ্গলার্থা চেযং সংজ্ঞা| মঙ্গলাদীনি চ শাস্ত্রাণি প্রথন্ত ইত্যস্যেযং সংজ্ঞা কৃতা| অন্যেষাং তু ব্যাখ্যেযার্থানুরূপা দিনচর্যাদিসংজ্ঞাঃ করিষ্যতি| আ০ র০- আত্মকৃতিং প্রমাণযতি-ইতি হেতি| প্রামাণ্যং চাপ্তবাক্যত্বাত্| আপ্তাশ্চাত্রেযাদযো মহর্ষযঃ| তে চ, ইতি হ এবমেব, আহুঃ স্ম উক্তবন্তঃ, যথা বযং বক্ষ্যামঃ| তেন বযমপ্যাপ্তাঃ|

সর্বাঙ্গসুন্দরী ব্যাখ্যা ( কৃত)

স০- আযুর্বেদযতি জ্ঞাপযতি প্রকৃতিজ্ঞানরসাযনদূতারিষ্টাদ্যুপদেশাদিত্যাযুর্বেদঃ| তস্যোপদেশা আযুর্বেদোপদেশাঃ| উপদিশ্যন্ত আযুর্বেদার্থা উপপত্তিভিরিত্যুপদেশা আযুর্বেদতন্ত্রাণি| তেষু পরমাদরঃ পাঠাববোধানুষ্ঠানরূপ উত্কৃষ্টো যত্নঃ কার্যঃ| আযুর্বেদোপদেশেষ্বিতি বহুবচননির্দেশাদযমর্থো বোধ্যতে| বহুষ্বাযুর্বেদতন্ত্রেষু যত্নঃ কার্যঃ| অনেকাযুর্বেদাবলোকনাদ্ধি চিকিত্সাযাং বৈদ্যস্য ন মনাগপি সন্দেহো জাযতে| কিং কুর্বতা পুরুষেণ-আযুঃ কামযমানেন জীবিতমভিলষতা| কিম্ভূতমাযুঃ, ধর্মার্থসুখসাধনম্| ধ্রিযতে লোকোঽনেনেতি ধর্মঃ| অর্থ্যতে যাচ্যত ইত্যর্থঃ| সুখং দ্বিবিধম্, তাদাত্ত্বিকমাত্যন্তিকং চ| তাদাত্বিকং কিযত্কালান্তরাস্থাযিত্বাত্সুখাবভাসং, ন পরমার্থতঃ সুখম্| তথা চোক্তম্- (চ. সূ. অ. ২৮/৩৭) 'তাদাত্বসুখসংজ্ঞেষু ভাবেষ্বজ্ঞোঽনুরজ্যতে'| ইতি| তদেতত্সংজ্ঞামাত্রেণ সুখং ন ত্বত্যন্তমিতি প্রদর্শযিতুং সুখসংজ্ঞেষ্বিতি মুনিনোক্তম্| আত্যন্তিকং সুখং মোক্ষাখ্যং, যত্র ন দুঃখানাং শ্লেষঃ| তেষাং সাধনমুপাযো ধর্মার্থসুখসাধনম্|

আযুর্বেদরসাযনম্ ব্যাখ্যা ( কৃত)

আ০ র০- প্রেক্ষাবত্প্রবৃত্ত্যর্থং প্রযোজনাধিকারিণৌ দর্শযতি-আযুরিতি| প্রযোজনং চাযুঃ| তস্য চ প্রযোজনত্বং ধর্মার্থসুখসাধনত্বাত্| সুখং কামো মোক্ষশ্চ| অত এব যঃ আযুঃ কামযতে সোঽত্র অধিকারী| তেন চ, আযুর্বেদোপদেশেষ্বস্মদ্বাক্যেষু, পরমত্যর্থম্, আদরো বিধেযঃ পাঠাববোধানুষ্ঠানৈর্যতিতব্যম্|

সর্বাঙ্গসুন্দরী ব্যাখ্যা ( কৃত)

স০- ব্রহ্মেত্যাদি| ব্রহ্মা আযুষো বেদং স্মৃত্বা প্রজাপতিং দক্ষমজিগ্রহদ্ অবাবোধযত্| স্মৃত্বেত্যনেনৈতদ্গমযতি ব্রহ্মণঃ স্মর্তৃত্বমেবাত্র ন কর্তৃত্বম্| নিত্যত্বাদাযুর্বেদস্য| নিত্যত্বং চাস্য প্রাক্ প্রত্যপাদি| গ্রহের্ণ্যন্তস্যাত্র বুদ্ধ্যর্থত্বাত্ প্রজাপতিশব্দস্য গতিবুদ্ধীত্যাদিনা কর্মসংজ্ঞা| স প্রজাপতিরশ্বিনাবজিগ্রহত্| তৌ সহস্রাক্ষমিন্দ্রমজিগ্রহতামিতি বচনবিপরিণামেন সম্বন্ধঃ| স শক্রোঽত্রিপুত্রাদিকান্ মুনীন্ বোধযামাস| অত্রিপুত্র আত্রেয আদির্যেষাং ধন্বন্তরিনিমিকাশ্যপাদীনাং ত এবম্| তে চাত্রেযাদযোঽগ্নিবেশাদিকানজিগ্রহন্| তে ত্বগ্নিবেশাদযঃ ষট্ পৃথক্ প্রত্যেকং তন্ত্রাণি শাস্ত্রাণ্যগ্নিবেশভেডজাতূকর্ণপরাশরহারীতক্ষারপাণিনামাভিধেযানি তন্ত্রাণি তেনিরে বিস্তারিতবন্তশ্চক্রুঃ| তন্ত্র্যন্তে ধার্যন্ত আযুর্বেদার্থা এভিরিতি তন্ত্রাণি|

আযুর্বেদরসাযনম্ ব্যাখ্যা ( কৃত)

আ০ র০- আযুর্বেদস্য শব্দান্তরানভিধেযত্বশঙ্কাং নিরাকর্তুং পুরাবৃত্তং দর্শযতি-ব্রহ্মা স্মৃত্বেতি| ব্রহ্মা অযুর্বেদং স্ভৃত্বা প্রজাপতিং দক্ষমজিগ্রহত্ গ্রাহিতবান্, অধ্যাপিতবানিত্যর্থঃ| আযুষো বেদমিত্যসমাসকরণমাযুর্বেদলক্ষণপ্রতিপাদনার্থম্| আযুষঃ সম্বন্ধী বেদ আযুর্বেদ ইতি| সম্বন্ধশ্চ পাল্যপালকলক্ষণঃ| উক্তং হি সঙ্গ্রহে (সূং অং ১)-"আযুষঃ পালকং বেদমুপবেদমথর্বণঃ" ইতি| স প্রজাপতিরশ্বিনাবাযুর্বেদমজিগ্রহত্| তাবশ্বিনৌ সহস্রাক্ষমজিগ্রহতাম্| স ইন্দ্রোঽত্রিপুত্রাদিকান্ মুনীনজিগ্রহত্| তেঽত্রিপুত্রাদযোঽগ্নিবেশাদিকান্ মুনীনজিগ্রহন্| তে পুনরগ্নিবেশাদযঃ, পৃথক্ প্রত্যেকং, তন্ত্রাণি শাস্ত্রাণি, তেনিরে বিরচযাঞ্চক্রুঃ| সংক্ষেপার্থমাযুর্বেদং শব্দান্তরৈরভিদধুরিত্যর্থঃ|

সর্বাঙ্গসুন্দরী ব্যাখ্যা ( কৃত)

স০- তেভ্য ইতি| তেভ্যো গ্রন্থেভ্যোঽতিবিপ্রকীর্ণেভ্যো বিক্ষিপ্তেভ্য উচ্চাবচোক্তার্থতযৈবেতশ্চেতশ্চ গতেভ্যঃ| অত এব কশ্চিদেবার্থঃ কস্মাদেব তন্ত্রান্তরাজ্জ্ঞাযতে| যথা শল্যচিকিত্সা সুশ্রুতপ্রণীতাত্তন্ত্রাদেবাবগম্যতে ন তথাগ্নিবেশাদিকাত্| ঊর্ধ্বাঙ্গচিকিত্সা চ জনকপ্রণীতাত্তন্ত্রাদ্যথাবগম্যতে ন তথা সুশ্রুতপ্রণীতাত্| অতঃ প্রাযো বাহুল্যেন সারতরোচ্চযঃ ক্রিযতে| উচ্চীযন্তে সঙ্গৃহ্যন্তে বিক্ষিপ্তাঃ পদার্থা অনেনেত্যুচ্চযঃ| যথা বা যবাদীনাং বহুক্ষেত্রজাতানামেকস্মিন্ স্থানে উচ্চযো রাশীকৃত্য স্থাপনং বিধীযতে তথেহ সারতরাণামুচ্চযঃ| সারতরগ্রহণেনৈতদ্দ্যোতযতি, সঙ্গ্রহেণৈব সারাণামুচ্চযঃ কৃতঃ| অনেন তথা সারতরাণাং প্রদেশানামুচ্চযঃ ক্রিযত ইতি| কিং নাম অষ্টাঙ্গহৃদযম্| এতচ্চ সান্বযার্থমস্য নাম| যথা শরীরস্য সর্বাবযবেভ্যঃ প্রধানদেশো হি হৃদযম্, তথেদমষ্টাঙ্গাযুর্বেদস্য প্রধানভূতত্বাদ্ হৃদযমিব হৃদযম্| তথা চ তন্ত্রান্তে বক্ষ্যতি (উ. অ. ৪০|৮৮)- হৃদযমিব হৃদযমেতদিত্যাদি| অষ্টৌ চ তান্যঙ্গান্যষ্টাঙ্গানি, তেষাং প্রত্যেকং হৃদযং, সারতরসঙ্গ্রহণাত্| কীদৃশমষ্টাঙ্গহৃদযম্| নাতিসংক্ষেপবিস্তরম্| সংক্ষেপশ্চ বিস্তরশ্চ সংক্ষেপবিস্তরৌ, অতিশযেন সংক্ষেপবিস্তরৌ যত্র ন, তন্নাতিসংক্ষেপবিস্তরম্| অতিশব্দস্যাত্র প্রত্যেকং সম্বন্ধঃ| অতিসংক্ষেপং কিঞ্চিত্তন্ত্রং যথা সিদ্ধসারাদি, কিঞ্চিচ্চাতিবিস্তরং যথা সঙ্গ্রহাদি| ইদং তু তন্ত্রং নাতিসংক্ষেপবিস্তরম্| অতিসংক্ষেপোক্তং স্বল্পধিযাং নোপকৃতযে| তেষাং হি যথোক্তাগমমাত্রং শ্রেযঃ, ন তু বাক্যার্থপর্যালোচনাদধিকঃ পরামর্শঃ| অতিবিস্তীর্ণং তু পাঠাববোধানুষ্ঠানৈস্তেষাং দুঃশক্যং স্যাত্| তস্মাদল্পমধ্যোত্ত্কৃষ্টবুদ্ধিশিষ্যহিতার্থং তন্ত্রমেতদুদ্দিষ্টম্|

আযুর্বেদরসাযনম্ ব্যাখ্যা ( কৃত)

আ০ র০- অগ্নিবেশাদিশাস্ত্রেষু সত্স্বপি স্বশাস্ত্রস্যোপযোগং দর্শযতি-তেভ্য ইতি| সারতরোচ্চযঃ ক্রিযতে, মযেতি শেষঃ| সারতরাণাং বহূপযোগানামর্থানামুচ্চযঃ| উচ্চীযন্তে একত্র ক্রিযন্তে ব্যস্তা অর্থা অস্মিন্নিত্যুচ্চযঃ| ননু পূর্বশাস্ত্রাণ্যপি মহাকষাযসঙ্গ্রহাদিষু প্রদেশেষ্বেবমিত্যত আহ-অষ্টাঙ্গহৃদযম্| অষ্টাঙ্গস্যাযুর্বেদস্য হৃদযং সর্বার্থাধিষ্ঠানম্| সংজ্ঞাচেযমস্য শাস্ত্রস্য| বক্ষ্যতি হি (উ. অং. ৪০/৮৮)-"হৃদযমিব হৃদযমেতত্সর্বাযুর্বেদবাঙ্মযপযোধেঃ" ইতি| সর্বেষু প্রদেশেষু সারতরোচ্চয ইত্যর্থঃ| ননু পূর্বশাস্ত্রাণ্যপি ক্বচিল্লেশেন ক্বচিত্কার্ত্স্ন্যেনেতি সর্বত্র সারতরোচ্চযরূপাণীত্যত আহ-নাতিসংক্ষিপ্তবিস্তৃতম্, অতিসংক্ষেপাতিবিস্তররহিতং সর্বত্র সংপূর্ণম্| ননু ন্যূনপূরণস্য নির্মূলত্বাদপ্রামাণ্যমিত্যত আহ-তেভ্যঃ,অগ্নিবেশাদিশাস্ত্রেভ্য এবোচ্চযঃ ক্রিযতে| নন্বেবং চেত্কিমনেনেত্যত আহ-অতিবিপ্রকীর্ণেভ্যঃ, যত্র প্রকরণার্থাঃ বিচ্ছিদ্য বিচ্ছিদ্য সর্বত্র কীর্যন্তে তানি বিপ্রকীর্ণানি, যত্র বাক্যার্থাশ্চ তান্যতিবিপ্রকীর্ণানি ইতি| এতদুক্তং ভবতি| সন্তি পরং পূর্বশাস্ত্রেষু সর্ব এবার্থাঃ, কিন্তু অতিবিপ্রকীর্ণত্বাত্ দুর্গ্রহাঃ| ইহ তু রচনাবিশেষেণ সুগ্রহা ইত্যস্যোপযোগঃ| উক্তং চ সঙ্গ্রহে (সু. অ. ১)-"ন মাত্রামাত্রমপ্যত্র কিঞ্চিদাগমবর্জিতম্| তেঽর্থাঃ স গ্রন্থবন্ধশ্চ সংক্ষেপায ক্রমোঽন্যথা||" ইতি|

সর্বাঙ্গসুন্দরী ব্যাখ্যা ( কৃত)

স০- কাযেতি| কাযশ্চ বালশ্চ গ্রহশ্চোর্ধ্বাঙ্গং চ শল্যং চ দংষ্ট্রা চ জরা চ বৃষশ্চেতীতরেতরদ্বন্দ্বঃ| ননু সর্বস্যাশ্চিকিত্সাযাঃ কাযাশ্রিতত্বাত্ কাযশব্দোঽর্থাদাক্ষিপ্ত এব| তত্কিমর্থং কাযশব্দ উপাদীযতে| ব্রূমঃ| প্রকর্ষার্থম্| যথা পুরুষায অভিরূপায কন্যা দেযেত্যত্রাভিরূপগ্রহণাদভিরূপতমাযেতি প্রতিপাদ্যতে, তথেহাপি প্রকৃষ্টো যঃ কাযঃ সম্পূর্ণধাতুঃ প্রকৃষ্টা চ যাবস্থা, তথা যুক্তঃ| তত্সঙ্গ্রহার্থঃ কাযশব্দ উপাত্তঃ| তথা 'চিঞ্ চযনে' ইত্যস্মাদ্ধাতোর্ব্যুত্পাদিতঃ কাযশব্দঃ| চীযতে প্রশস্তদোষধাতুমলৈরিতি কাযঃ| তদেবং সর্বশরীরোপতাপকানামামপক্বাশযস্থনোদ্ভবানাং জ্বররক্তপিত্তাতিসারাদীনাং রোগাণাং যত্রোপশমযোগো নিগদ্যতে, তত্কাযচিকিত্সানামাঙ্গম্| বলসত্ত্বসম্পূর্ণধাতুত্বাদ্ যৌবনাবস্থকাযস্য প্রথমনির্দেশঃ| বালদেহেঽসম্পূর্ণবলধাতুত্বাদপ্রকৃষ্টবযোবস্থাপ্রভাবাত্ তচ্চিকিত্সাঙ্গং পৃথঙ্নির্দিষ্টম্| তথা বালৌপযিকভেষজং ধাত্রীদুগ্ধলক্ষণং দুগ্ধোদ্ভবব্যাধিপ্রশমাদিনির্দেশাচ্চ| নন্বেবং বৃদ্ধস্য প্রকৃষ্টবযোবস্থাযা অভাবাত্তদ্দেহে কাযচিকিত্সেতি কথং ব্যপদেশঃ স্যাত্| অত্র ব্রূমঃ| ভূতপূর্বগত্যা বৃদ্ধদেহেন হি প্রকৃষ্টবযোবস্থা পূর্বমনুভূতা| অতো ভূতপূর্বগত্যা তত্র কাযচিকিত্সোপদেশো যুক্তঃ| এবং গ্রহচিকিত্সা নাম, যত্র দেবাদিগ্রহগৃহীতানাং প্রাণিনাং শান্তিকর্ম বিধীযতে| যত্রোর্ধ্বজত্রুগতানাং রোগাণাংনেত্রকর্ণঘ্রাণাদিসংশ্রিতানামাশ্চোতনশলাকাদিনোপশমো বর্ণ্যতে তদূর্ধ্বাঙ্গচিকিত্সানামাঙ্গম্| অত্র চ জন্মনঃ প্রভৃতি বিচারোপদেশাদ্বালচিকিত্সৈব প্রাগ্বক্তুং যুক্তা| কিন্তু কাযচিকিত্সা প্রাধান্যাত্প্রাগুপন্যস্তা| ততোঽনন্তরং বালচিকিত্সা| বালস্য চ গ্রহসম্বন্ধাদ্ গ্রহচিকিত্সা| ততঃ শরীরস্য মূলরক্ষার্থমূর্ধ্বাঙ্গচিকিত্সা শালাক্যং নাম| ততঃ শস্ত্রসাধনসামান্যেন শল্যচিকিত্সা| পীডাকরণসমানত্বাত্ দংষ্ট্রাচিকিত্সা| দংষ্ট্রা বিষাত্মিকা| বিষেণাশু চ মরণে সম্ভাব্যমানে রসাযনোপযোগো যুক্ত ইতি রসাযনচিকিত্সা| অথবা বিষস্য রসাযনজেযত্বাদ্রসাযনকথনপ্রস্তাবঃ| ততোঽনন্তরং বাজীকরণস্য ভরণেন প্রস্তাবঃ| তথা চাধীতে গ্রন্থকৃত্ (উ.অ.৪০|১)- "বাজীকরণমন্বিচ্ছেত্সততং বিষযী পুমান্ " ইতি| রসাযনস্য পশ্চাদিত্যর্থঃ| যত্রাল্পদুষ্টরেতসাং তদাপ্যাযনপ্রসাদোপজননরূপা চিকিত্সা ক্রিযতে তদ্বাজীকরণম্| এবমেতানি কাযাদীনি, তস্যাযুর্বেদস্য, অষ্টাবঙ্গান্যাহুর্বদন্তি| ব্রহ্মাঽঽত্রেযাদয ইতি শেষঃ| যেষু কাযাদিষু চিকিত্সা সংশ্রিতা ব্যবস্থিতা| (চ.সূ.অ.৯|৫)- " চতুর্ণাং ভিষগাদীনাং শস্তানাং ধাতুবৈকৃতে| প্রবৃত্তির্ধাতুসাম্যার্থা চিকিত্সেত্যভিধীযতে|" ইতি মুনিপ্রোক্তলক্ষণং নেহ তন্ত্রকৃদ্ব্যধত্ত| চিকিত্সাশব্দাদেবাস্যার্থস্য লব্ধত্বাত্| তথা চ নির্দেষ্টুমাহ| নিন্দাক্ষমাব্যাধিপ্রতীকারবিচারণাসু সা নিষ্পদ্যত ইতি| কিতের্ধাতোর্ব্যাধিপ্রতীকার এবাস্য ব্যুত্পাদিতত্বাত্|

আযুর্বেদরসাযনম্ ব্যাখ্যা ( কৃত)

আ০ র০- আযুর্বেদাঙ্গান্যাহ-কাযেতি| তনি চ কাযাদীনি অষ্টাবাহুঃ| তত্র কাযশব্দেন সর্বাবস্থং সর্বাবযবং চ শরীরং গৃহ্যতে, বালাদিশব্দৈস্তস্যৈবাবস্থাবিশেষা লক্ষ্যন্তে| ঊর্ধ্বাঙ্গং ত্ববযববিশেষঃ| বালঃ প্রথমং বযঃ, গ্রহো গ্রহার্তত্বম্, ঊর্ধ্বাঙ্গং শিরঃ, শল্যং ব্রণার্তত্বম্, দংষ্ট্রা বিষার্তবং, শল্যদংষ্ট্রাশব্দৌ ব্রণবিষমাত্রোপলক্ষণৌ| জরা পশ্চিমং বযঃ, বৃষঃ স্ত্রীপ্রসঙ্গিত্বম্| এষাং চ কাযাদীনাং চিকিত্সাশ্রিতানামেবাঙ্গত্বমিত্যত আহ-চিকিত্সা যেষু সংশ্রিতা ইতি| চিকিত্সা ব্যাধিপ্রতীকারঃ| অত এব কাযচিকিত্সা, বালচিকিত্সেত্যাদযোঽঙ্গানাং সংজ্ঞাঃ| বিবক্ষিতবিবেকাচ্চ চিকিত্সাযা এব হ্যঙ্গত্বম্| অঙ্গান্যবযবাঃ| তত্রাবস্থামাত্রাশ্রযাণাং বালাদিব্যতিরিক্তাবস্থাবিশেষাশ্রযাণামবযবমাত্রাশ্রযাণামূর্ধ্বাঙ্গব্যতিরিক্তাবযববিশেষাশ্রযাণাং চ ব্যাধীনাং কাযচিকিত্সিতে প্রতীকারঃ| বালচিকিত্সাদিষু তু তত্তদ্বিশেষৈকনিষ্ঠানাম্| ইতি শাস্ত্রার্থেতিকর্তব্যতা|

সর্বাঙ্গসুন্দরী ব্যাখ্যা ( কৃত)

স০- বাযুরিতি| চ সমুচ্চযে| কফো দোষমধ্যে সমুচ্চীযতে| ইত্যনেন প্রকারেণ, সমাসতঃ সংক্ষেপাত্, ত্রযো দোষাঃ| ননু প্রস্তুতত্বাদিহ ধাতুসংজ্ঞযা বাতাদযো নির্দেষ্টুং ন্যায্যাঃ, ন দোষসংজ্ঞযা| অস্ত্যেবৈতত্| কিন্তু রসাদিদূষণপূর্বকমেষাং বিকারকরণে সামর্থ্যমিতি প্রদর্শনার্থং দোষসংজ্ঞযা তে নির্দিষ্টাঃ , ন ধাতুসংজ্ঞযা| ন হ্যেতে ধাতুরূপা জাতু বিরুদ্ধত্বং কুর্বতে দেহধারণবর্ধকত্বাত্| এতে মুনিনাপি চরকেণ পূর্বং দোষসংজ্ঞযৈব নির্দিষ্টাঃ| তথা চ তদ্গ্রন্থঃ (সূ.অ.১/৫৬)- "বাযুঃ পিত্তং কফশ্চোক্তঃ শারীরো দোষসঙ্গ্রহঃ " ইতি| 'বাতপিত্তকফা দোষাস্ত্রয এব সমাসতঃ ' ইত্যেবং নির্দেশে কর্তব্যে যদেষাং পৃথগ্বিভক্ত্যা নির্দেশঃ কৃতঃ , স প্রধানত্বখ্যাপনার্থঃ| বহুবচনাদেব ত্রিত্বে লব্ধে ত্রিগ্রহণং নিযমার্থম্| ত্রয এব দোষাঃ , ন চতুর্থোঽস্তীতি| তন্ত্রান্তরীযা হি চতুর্থং দোষমীহন্তে| তেষাং হ্যযমভিপ্রাযঃ| যথা দোষাণাং স্থানলক্ষণকার্যবিকারচিকিত্সাদ্যুপদেশস্তথা রক্তস্যাপি| তত্র স্থানং , সর্বদেহব্যাপিত্বেঽপি প্লীহযকৃতী| লক্ষণং চ, পদ্মেন্দ্রগোপহেমাদীত্যাদি| কার্যং, দেহস্যোত্পত্তিস্থিতী| বিকারঃ, বিসর্পপ্লীহাদি| চিকিত্সা, সিরাব্যধাদিকং কর্মেতি| তদেতদসারম্| বাতাদযো হ্যস্য দূষ্যস্য সতঃ কথং দোষত্বং কর্তুং পারযন্তি| যতঃ প্রাধান্যাদন্বর্থনামত্বাচ্চ বাতাদীনামেব দোষত্বং, ন রসাদীনাম্| বাতাদযো হি স্বাতন্ত্র্যাত্প্রধানাঃ| দূষযন্তীতি দোষা ইতি তেষামেব চানুগতার্থা সংজ্ঞা প্রবৃত্তা| রসাদ্যাস্তু পারতন্ত্র্যাদপ্রধানাঃ| তে চ বাতাদিভির্দূষ্যন্ত ইতি দূষ্যাঃ| তস্মাদ্রক্তস্য দূষ্যত্বম্, ন দোষত্বম্| যদ্যেবং বাতাদীনামন্যোন্যদূষণাদ্ দূষ্যত্বং স্যাত্| পিত্তেন হি শ্লেষ্মা দূষ্যত ইতি দৃশ্যতে| যথা পাণ্ডুরোগনিদানে (নি.অ.১৩) পিত্তপ্রধানা ইত্যারভ্য যাবত্ শ্লেষ্মত্বগ্রক্তমাংসানি প্রদূষ্যেত্যাদি| তদত্র শ্লেষ্মা পিত্তেন দূষ্যতে| তথা শ্লেষ্মবদ্রক্তস্যাপি দোষত্বপ্রসঙ্গ ইতি যো মন্যেত, তং প্রতি ব্রূমঃ| বিষম উপন্যাসঃ| বাতাদযো হি সর্বদৈব রসাদীন্ দূষযন্তি, ন তু রসাদযঃ কদাচিদপি বাতাদীন্ দূষ্যন্তি| বাতাদীনাং তু মধ্যাদ্যদি কশ্চিদ্দূষ্যতে, স তেষামন্যতমেন| তথা চ প্রকৃতিলক্ষণে বাতপ্রকৃতেঃ পিত্তপ্রকৃতেঃ, শ্লেষ্মপ্রকৃতেশ্চ যথা লক্ষণং দৃশ্যতে, নৈবং রক্তপ্রকৃতেঃ| তথা চ তন্ত্রকারেণ জ্বরাদযো বাতাদিবিশেষণবিশিষ্টা এবোক্তাঃ| যথা বাতজ্বরোঽযং পিত্তজ্বরোঽযং শ্লেষ্মজ্বরোঽযম্, ন তু রক্তজ্বরোঽযমিতি নির্দিষ্টঃ| যেঽপি রক্তজা বিকারা বিসর্পাদযস্তেষ্বপি ঘৃতদগ্ধন্যাযেন ব্যপদেশো বোধ্যঃ| যথা ঘৃতস্যান্তর্হিতেনাগ্নিনা দগ্ধো ঘৃতদগ্ধ ইত্যুচ্যতে, তদ্বদ্রক্তস্থৈর্বাতাদিভির্দোষৈর্জাতো রক্তজোঽযমিত্যুচ্যতে| যত্র ক্বচিদ্রক্তস্য দোষসংজ্ঞা কুষ্ঠচিকিত্সিতাদৌ দৃশ্যতে, সা সংজ্ঞামাত্রেণৈব, নাসাবনুগতার্থা| তস্য দূষ্যত্বেনৈব প্রবৃত্তেঃ| তথা চৈবং পুরীষাদীনামপি সংজ্ঞামাত্রেণ ব্যবহারো দৃশ্যতে| যথা (হৃ.চি.অ.১৮|৩৮)- "ন ঘৃতং বহুদোষায দেযং যন্ন বিরেচনম্| তেন দোষো হ্যুপস্তব্ধঃ" ইত্যাদি| অত্র পুরীষস্য দোষত্বমুক্তম্| তথোদরচিকিত্সিতে চরকস্য, জ্বরচিকিত্সিতে বা অস্য, (হৃ.চি.অ.১|১০)- "দোষেণ ভস্মনেবাগ্নৌ ছন্নেঽন্নং ন বিপচ্যতে| তস্মাদাদোষপচনাজ্জ্বরিতানুপবাসযেত্||" ইতি| অত্র আমস্যাপি দোষত্বমুক্তম্| তদেবং বাতাদযস্ত্রয এব দোষাঃ, ন রক্তমিতি স্থিতমেতত্ সমাসতঃ| বিস্তরতস্তু সংসর্গসন্নিপাতক্ষযসমতাভেদভিন্নাস্তারতম্যপরিকল্পনযা চ কল্প্যমানা আনন্ত্যং যান্তি|

আযুর্বেদরসাযনম্ ব্যাখ্যা ( কৃত)

আ০ র০- অথ প্রতিজ্ঞাতং ব্যাধিপ্রতীকারং ব্যাচষ্টে| স তু ত্রেধা, হেতুর্লক্ষণমৌষধং চেতি| হেতুর্দ্বিধা, অন্তরঙ্গো বহিরঙ্গশ্চেতি| অন্তরঙ্গো দ্বিধা, দোষা দূষ্যাশ্চেতি| তত্র দোষানাহ-বাযুরিতি| তে চ ত্রযঃ, বাযুঃ পিত্তং কফশ্চেতি| এষাং ত্রিত্বং চ সমাসতঃ সংক্ষেপেণ| বিস্তরতস্তু প্রাণাদিপাচকাদ্যবলম্বকাদ্যবান্তরভেদপ্রভেদৈরানন্ত্যম্| সমাসত ইতি অধ্যাযপরিসমাপ্তেঃ প্রতিবাক্যং সম্বন্ধনীযম্|

সর্বাঙ্গসুন্দরী ব্যাখ্যা ( কৃত)

স০-বিকৃতাঃ স্বভাবপ্রচ্যুতাঃ, দেহং ঘ্নন্তি| দেহপদমত্র জীবিতোপলক্ষণার্থম্| জীবিতেন বিনা কুর্বন্তীত্যর্থঃ| অবিকৃতাঃ পুনর্দেহং বর্তযন্তি যাপযন্তি| বিকৃতানাং দোষাণাং প্রাগুপন্যাসঃ, তেষাং প্রকৃত্যবস্থানে নিত্যং ভিষজা যত্নবতা ভাব্যমিতি সূচনার্থম্| অন্যথা মহান্প্রত্যবাযঃ স্যাত্|

আযুর্বেদরসাযনম্ ব্যাখ্যা ( কৃত)

আ০ র০- দোষাবস্থাদ্বযমাহ-বিকৃতাবিকৃতা ইতি| তচ্চ বিকৃতত্বমবিকৃতত্বং চেতি| তত্র বিকৃতা দেহং ঘ্নন্তি| অবিকৃতা দেহং বর্তযন্তি| ক্রমাদিতি বক্ষ্যমাণং পদং বাক্যত্রযশেষত্বেন ব্যাখ্যানাদিহ সম্বন্ধনীযম্|

সর্বাঙ্গসুন্দরী ব্যাখ্যা ( কৃত)

স০- অধশ্চ মধ্যশ্চোর্ধ্বং চাধোমধ্যোর্ধ্বানি, তানি সংশ্রয আশ্রযো যেষাং তেঽধোমধ্যোর্ধ্বসংশ্রযাঃ| হৃচ্চ নাভিশ্চ হৃন্নাভী, তযোর্হৃন্নাভ্যোঃ| তে বাতাদযো যাপিনোঽপি সর্বশরীরচরা অপি হৃন্নাভ্যোরধোমধ্যোর্ধ্বসংশ্রযাঃ| বিশেষেণেতি বাক্যশেষঃ| ননু কিমিদং বাক্যশেষত্বং নাম| উচ্যতে| যস্মিন্ খলু পদেঽনুচ্চার্যমাণেঽর্থগতিং পশ্যন্ত্যাচার্যাঃ, তচ্ছেষমিতি| উচ্চারণকালে তেন বিনাঽভিধেযসিদ্ধেঃ| ব্যাখ্যাকালে তু মন্দবুদ্ধিব্যুত্পত্তযে ব্যাচক্ষতে| তত্র নাভেরধো বাযোঃ স্থানম্| হৃন্নাভ্যোর্মধ্যে পিত্তস্য| হৃদযাদূর্ধ্বং কফস্য| ননু হৃন্নাভ্যোরিতি কথং নির্দেশো যাবতা প্রাণ্যঙ্গত্বাদেকবদ্ভাবে সনপুংসকমিতি নপুংসকত্বে হৃন্নাভি ইতি প্রাপ্নোতি| অত্র ব্রূমঃ| প্রাণ্যঙ্গানাং সমাহার এব দ্বন্দ্ব ইত্যস্য প্রাযিকত্বান্নৈকবদ্ভাবঃ| তদভাবাচ্চ তদাশ্রযং নপুংসকত্বং ন ভবতি| তথা চোক্তম্| সর্বোঽপি দ্বন্দ্বো বিভাষৈকবদ্ভবতীতি| দৃশ্যতে চান্যত্রাপি| তথা চ রুদ্রভট্টঃ (রুদ্রটঃ কাব্যালঙ্কারে অ.৭/৮১)- - "কৌটিল্যং কচনিচযে করচরণাধরদলেষু রাগস্তে" ইত্যাদি| তথা, অস্যৈব গ্রন্থকৃতঃ (নি.অ.৭/১৯) "শিরঃপৃষ্ঠোরসাং শূলং" ইতি| তথা, (নি.অ.১৬|৬) "জানুজঙ্ঘোরুকট্যংসহস্তপাদাঙ্গসন্ধিষু" ইতি| তথা, "বাযুঃ সন্ধ্যস্থিমজ্জসু" ইত্যাদি| তস্মাদ্ধৃন্নাভ্যোরিতি প্রযোগো ন্যায্য এব|

আযুর্বেদরসাযনম্ ব্যাখ্যা ( কৃত)

আ০ র০-দোষস্থানান্যাহ-তে ব্যাপিন ইতি| তানি চ ত্রীণি| হৃন্নাভ্যোরধো বাযোঃ স্থানং, মধ্যে পিত্তস্য, ঊর্ধ্বং কফস্য| সর্বদেহব্যাপিত্বেঽপি যো যস্মিন্নাধিক্যেন বর্ততে তত্তস্য স্থানম্| হৃন্নাভিশব্দাভ্যাং তদুভযাবধিপ্রদেশো লক্ষ্যতে| অন্যথা হৃদোঽপ্যধো বাযুর্নাভেরপ্যূর্ধ্বং কফস্তিষ্ঠেত্|

সর্বাঙ্গসুন্দরী ব্যাখ্যা ( কৃত)

স০-বযশ্চ অহশ্চ রাত্রিশ্চ ভুক্তং চ বযোহোরাত্রিভুক্তানি তেষাং, ক্রমাদ্যথাসংখ্যং, তে বাতাদযঃ, অন্তমধ্যাদিগা ভবন্তি| অন্তশ্চ মধ্যশ্চাদিশ্চান্তমধ্যাদযস্তেষু গচ্ছন্তীত্যন্তমধ্যাদিগাঃ| অন্যত্রাপি দৃশ্যত ইতি ডঃ| তেনাযমর্থঃ, বযসঃ মনুষ্যাযুষঃ, অন্তঃ পশ্চিমো ভাগঃ, বাযোঃ কোপকালঃ| মধ্যো ভাগঃ পিত্তস্য| আদ্যো ভাগঃ কফস্য| এবমহ্নো রাত্রেশ্চ যোজ্যম্| ভুক্তমাহারঃ, তস্যান্তে জঠরাগ্নিসংযোগবশাদ্রসানাং জীর্ণপ্রাযাবস্থা, বাযোঃ কোপকালঃ| মধ্যো বিদাহাবস্থা, পিত্তস্য| আদ্যাবস্থা তু যস্যাং মধুরীভাব আহারস্য, তত্র কফস্য কোপকালঃ| যদ্যপি চাহারস্য জঠরাগ্নিসংযোগবশাদ্বহ্ব্যোঽপি সূক্ষ্মা অবস্থাঃ সম্ভাব্যন্তে, তথাপ্যেতাসামেব সুতরামুপযোগিত্বাদিহ নির্দেশঃ| তথা এতা এব তিস্রোঽবস্থাঃ স্বকর্ম দর্শযন্তি| বক্ষ্যতি হি (শা.অ.৩/৫৭)- - "আদৌ ষড্রসমপ্যন্নং মধুরীভূতমীরযেত্| ফেনীভূতং কফং, যাতং বিদাহাদম্লতাং ততঃ| পিত্তমামাশযাত্কুর্যাচ্চ্যবমানং, চ্যুতং পুনঃ| অগ্নিনা শোষিতং পক্বং পিণ্ডিতং কটু মারুতম্" ইতি|

আযুর্বেদরসাযনম্ ব্যাখ্যা ( কৃত)

আ০ র০- দোষকালানাহ-বয ইতি| তত্র বযঃ শরীরপরিণামঃ, তস্যান্তঃ বৃদ্ধত্বাবস্থা বাযোঃ কালঃ| মধ্যঃ যৌবনাবস্থা পিত্তস্য| আদির্বাল্যাবস্থা কফস্য| অহ্নোঽন্তঃ অপরাহ্ণঃ বাযোঃ| মধ্যো মধ্যাহ্নঃ পিত্তস্য| আদিঃ পূর্বাহ্ণঃ কফস্য| রাত্রেরন্তোঽপররাত্রো বাযোঃ| মধ্যো মধ্যরাত্রঃ পিত্তস্য| আদিঃ পূর্বরাত্রঃ কফস্য| ভুক্তং নিগীর্ণমন্নম্, তস্যান্তঃ পক্বাবস্থা বাযোঃ| মধ্যো বিদগ্ধাবস্থা পিত্তস্য| আদিরামাবস্থা কফস্য| ব্যাপিনোঽপীত্যনুবর্ততে|কালবিশেষস্তু স্থানবিশেষবত্|

সর্বাঙ্গসুন্দরী ব্যাখ্যা ( কৃত)

স০- তৈশ্চ বাতাদিভিঃ পুংসো যথাক্রমেণাগ্নির্বিষমস্তীক্ষ্ণো মন্দশ্চ ভবেত্| বাতাদযশ্চ সমুদিতা এব শরীরজননে সমর্থাঃ, ইত্যবশ্যং সর্বৈরেব ভবিতব্যম্| ইহ তু য একস্য ব্যপদেশস্তত্রোত্কর্ষো দ্রষ্টব্যঃ| বাতোত্কর্ষেণ বিষমঃ, পিত্তোত্কর্ষেণ তীক্ষ্ণঃ, কফোত্কর্ষেণ মন্দ ইতি| সমৈর্হান্যুত্কর্ষবর্জিতৈঃ সমঃ| লক্ষণমেষামঙ্গবিভাগে শারীরে বক্ষ্যতি (শা. অ. ৩/৭৪)- যঃ পচেত্সম্যগেবান্নমিত্যারভ্য যাবচ্চিরাত্পচেদিতি| যত্র তু দ্বযোর্দোষযোরুত্কর্ষত্বং, তত্র সদ্বৈদ্যেন স্বধিযা কল্প্যম্| যথা, বাতপিত্তযোরুত্কর্ষে বাযোর্যোগবাহিত্বাত্তীক্ষ্ণঃ| এবং বাতকফযোরুত্কর্ষে মন্দঃ| কফপিত্তযোস্তূত্কর্ষে আহারবিশেষবশাত্কদাচিত্তীক্ষ্ণঃ কদাচিন্মন্দ ইতি|

আযুর্বেদরসাযনম্ ব্যাখ্যা ( কৃত)

আ০ র০- অগ্ন্যবস্থাবিশেষাখ্যং দোষকার্যমাহ-তৈরিতি| তত্র বাতেনাগ্নির্বিষমো ভবেত্| তীক্ষ্ণঃ পিত্তেন| মন্দঃ কফেন| ক্রমাদিত্যনুবর্ততে| সমৈস্ত্রিভিঃ সমঃ| পারিশেষ্যাদ্বিষমাদযস্ত্রযো বিষমৈর্দোষৈঃ| বৈষম্যং চ বৃদ্ধিরেব, ক্ষীণানামীদ্দক্কার্যাদর্শনাত্| অনিযতপাকো বিষমঃ, আশুপাকস্তীক্ষ্ণঃ, চিরপাকো মন্দঃ| শেষঃ সমঃ| উক্তং হি সঙ্গ্রহে (সূ. অ. ১১)-"যামৈশ্চতুর্ভির্দ্বাভ্যাং চ ভোজ্যভৈষজ্যযোঃ সমে| পাকোঽগ্নৌ যুক্তযোর্দ্রাক্তু তীক্ষ্ণে মন্দে পুনশ্চিরাত্" ইতি| যুক্তযোরুচিতযোঃ| সংসর্গসন্নিপাতজাস্ত্ববস্থা নিদর্শনতন্ত্রযুক্ত্যা জ্বরবদবগন্তব্যাঃ| যথা বাতকফজে জ্বরে শীতং, বাতপিত্তজে দাহঃ, বাযোর্যোগবাহিত্বাত্| পিত্তকফজে সন্নিপাতজে চ পর্যাযেণ দাহশীতে| মিথো বিরুদ্ধত্বেন যুগপদসম্ভবান্ন চোভযোরভাবঃ, বিরুদ্ধকার্যাণামপ্যারম্ভকত্বদর্শনাত্| উক্তং চ সঙ্গ্রহে (সূ. অ. ২১)-"আরম্ভকং বিরোধেঽপি মিথো যদ্বদ্গুণত্রযম্| বিশ্বস্য দৃষ্টং যুগপব্দ্যাধের্দোষত্রযং তথা||" ইতি| তদ্বদিহাপি বাতপিত্তাভ্যাং তীক্ষ্ণত্বং, বাতকফাভ্যাং মন্দত্বং, পিত্তকফাভ্যাং সন্নিপাতাচ্চ পর্যাযেণ তীক্ষ্ণত্বমন্দত্বে| ন চৈবং চতুষ্ট্বহানিঃ, অব্যবস্থিততীক্ষ্ণমন্দত্বস্য বৈষম্যে অন্তর্ভাবাত্|

সর্বাঙ্গসুন্দরী ব্যাখ্যা ( কৃত)

স০-তৈর্বাতাদিভিঃ, যথাক্রমং ক্রূরমৃদুমধ্যলক্ষণঃ কোষ্ঠো ভবতি| বাতোত্কর্ষেণ ক্রূরঃ| পিত্তোত্কর্ষেণ মৃদুঃ| কফোত্কর্ষেণ মধ্যঃ| সমৈঃ পুনরেতৈর্হান্যুত্কর্ষবর্জিতৈর্মধ্য এব কোষ্ঠঃ| ক্রূরাদীনাং তু লক্ষণং বমনবিরেচনবিধৌ (সূ.অ.১৮/৩৪) বক্ষ্যতি| ননু সমৈর্বাতাদিভিঃ কথং মধ্যকোষ্ঠতা স্যাদিতি| ব্রূমঃ| সমানাং বাতাদীনাং মধ্যে দ্বযোর্বাতপিত্তযোঃ স্বং স্বং ক্রূরকোষ্ঠত্বমৃদুকোষ্ঠত্বলক্ষণাখ্যং চ বিরুদ্ধং কর্ম যুগপত্কর্তুং ন ঘটতে| তৃতীযস্তু সম এব কফঃ| সোঽনযোর্মধ্যে মধ্যমাং বৃত্তিমাশ্রিত্য স্থিতো নৈকেনাপি সহ বিরুধ্যতে| অত এব তত্কার্যং মধ্যকোষ্ঠতালক্ষণং তে বাতপিত্তে নিষেদ্ধুং নৈব ঘটেতে| এবং চ তেনাবশ্যমাত্মীযং মধ্যকোষ্ঠতালক্ষণং কর্ম কর্তব্যম্, যতো বাতকর্মণঃ ক্রূরকোষ্ঠতালক্ষণস্য পিত্তকর্মণো মৃদুকোষ্ঠতালক্ষণস্য চ বিরুদ্ধত্বাত্| অতো মধ্যকোষ্ঠতৈব সমৈর্বাতাদিভির্ন্যায্যা| ইত্যাংস্তু বিশেষঃ| পূর্বো যো মধ্যকোষ্ঠঃ সোঽবশ্যং প্রমাণাধিকেন কফেন জন্যতে| মধ্যঃ স্যাত্তৈঃ সমৈরপীতি সমগ্রহণলিঙ্গাত্| ইতরস্তু মধ্যকোষ্ঠঃ সমদোষমধ্যস্থিতেন সমেনৈব স্বপ্রমাণস্থিতেন শ্লেষ্মণা ভবতীত্যনযা রীত্যা হেতুভেদাদন্যত্বম্| তথা মধ্যকোষ্ঠযোর্লক্ষণভেদোঽপি দৃশ্যতে| যথা (চ.সি.অ.১/৮)- "শ্লেষ্মাধিকশ্ছর্দযতে হ্যদুঃখং বিরিচ্যতে মন্দকফস্তু সম্যক্" ইতি| তদযমত্রার্থঃ| শ্লেষ্মাধিকে মধ্যকোষ্ঠে ন সম্যগ্ বিরেচিত্বং, সমকফে তু মধ্যকোষ্ঠে সুবিরেচিত্বমিতি|

আযুর্বেদরসাযনম্ ব্যাখ্যা ( কৃত)

আ০ র০-কোষ্টাবস্থাবিশেষাখ্যং দোষকার্যমাহ-কোষ্ঠ ইতি| তত্র বাতেন ক্রূরঃ কোষ্ঠঃ স্যাত্, পিত্তেন মৃদুঃ, কফেন মধ্যঃ, ত্রিভিঃ সমৈরপি মধ্যঃ| অত্রাপি পারিশেষ্যং পূর্ববব্দ্যাখ্যেযম্| মধ্যমেন শোধনেন হীনযোগী ক্রূরঃ, অতিযোগী মৃদুঃ সম্যগ্যোগী মধ্যঃ| সংসর্গসন্নিপাতজাস্ত্ববস্থাঃ পূর্ববত্| যোগবাহিত্বং ত্বত্র কফস্য| যদাহ খারণাদিঃ- "বাতোল্বণা স্যাদ্গ্রহণী ক্রূরকোষ্টস্য দেহিনঃ| পিত্তলা মৃদুকোষ্ঠস্য যোগবাহী তযোঃ কফঃ||" ইতি| তেন বাতকফাভ্যাং ক্রূরঃ, বাতপিত্তাভ্যাং কফপিত্তাভ্যাং সন্নিপাতাচ্চ মৃদুঃ| ননু "বহুবাতশ্লেষ্মভ্যাং ক্রূরঃ" ইতি সুশ্রুতেন (চি.অ,৩৩) বহুকফস্য ক্রূরত্বমুক্তম্, ইহ তু মধ্যত্বম্, ইতি বিরোধঃ|মৈবম্, সুশ্রুতবাক্যস্য সংসর্গপরত্বাত্|

সর্বাঙ্গসুন্দরী ব্যাখ্যা ( কৃত)

স০-তৈশ্চ বাতাদিভিস্তিস্রঃ প্রকৃতযঃ পৃথগ্ভবেযুর্হীনমধ্যোত্তমাঃ| প্রকৃতিঃ শরীরস্বরূপম্| শুক্রার্তবস্থৈরিতি, শুক্রং পিতুর্দ্বিত্রিবিন্দুকাবস্থং রেতঃ| ঋতৌ ভবমার্তবম্, মাতুর্দ্বিত্রিবিন্দুকাবস্থং শোণিতম্| শুক্রং চার্তবং চ শুক্রার্তবে, তত্র তিষ্ঠন্তীতি শুক্রার্তবস্থাঃ, তৈস্তথাবিধৈর্জন্মাদৌ গর্ভাধানকালে জন্মপ্রারম্ভে গর্ভাদাবিত্যর্থঃ| ননু চ যদা বাতাদযোঽধিকাঃ শুক্রার্তবে তিষ্ঠন্তি, তদা কুতঃ শরীরস্য নিষ্পত্তির্ভবতীতি| যতশ্চ যো দোষাণামধিকো ভাবঃ সৈব বিকৃতিঃ| তত্কথং দোষা আধিক্যং প্রাপ্তাঃ প্রকৃতেঃ কারণতামুত্সহন্তে, বিকৃতত্বাত্| ন হি বিকৃতিঃ কদাচিত্প্রকৃতেঃ কারণমিতি বক্তুং যুজ্যতে| কারণসদৃশেন চ কার্যেণ ভবিতব্যমিত্যাশংক্য সপরিহারং দৃষ্টান্তমাহ| বিষেণেব বিষক্রিমেরিতি| যথা বিষেণ জীবিতনাশহেতুনাস্য বিষক্রিমের্জন্ম প্রকৃতেঃ সম্ভবো দৃশ্যতে| তথা এতৈর্দূষণস্বভাবৈরপি প্রমাণাধিকৈর্দোষৈঃ শুক্রার্তবস্থৈরেব জন্মাদৌ শরীরস্য নিষ্পত্তির্ভবতীতি| বাতোত্কর্ষেণ হীনা| পিত্তোত্কর্ষেণ মধ্যমা| কফোত্কর্ষেণোত্তমা| সর্বাসু প্রকৃতিষু মধ্যে যা সমধাতুঃ প্রকৃতিঃ, সা সমা শ্রেষ্ঠোত্তমা চতুর্থী| সমা ধাতবো যস্যাঃ| ধাতুশব্দোঽত্র দোষপর্যাযঃ, "ধারণাদ্ধাতবঃ" ইতি (সং.সূ.অ.২০) বচনাত্| যা বাতপিত্তজা বাতশ্লেষ্মজা পিত্তশ্লেষ্মজা ইতি মিশ্রদোষজাস্তিস্রঃ প্রকৃতযস্তা নিন্দ্যা গর্হণীযাঃ, অনারোগ্যাস্পদত্বাত্|

আযুর্বেদরসাযনম্ ব্যাখ্যা ( কৃত)

আ০ র০-দেহজন্মাখ্যং দোষকার্যমাহ-শুক্রার্তবস্থৈরিতি| তচ্চ জন্ম শুক্রার্তবস্থৈর্দোষৈর্ভবেত্| শুক্রেণ যুক্তমার্তবং শুক্রার্তবং, তত্র তিষ্ঠন্তীতি তত্স্থাঃ| শুক্রং পুংরেতঃ, স্ত্রীরেতসো জন্মাহেতুত্বাত্| (উক্তং হি সঙ্গ্রহে (শা. অ. ১)-"যোষিতোঽপি স্রবন্ত্যেব শুক্রং পুংসঃ সমাগমে| গর্ভস্য তু ন তত্কিঞ্চিত্করোতীতি ন চিন্ত্যতে||" ইতি| আর্তবং স্ত্রীরজঃ|কদা, আদৌ জীবসঙ্ক্রমণসমযে| উত্তরকালজৈস্তু দোষৈরবিকৃতৈঃ স্থিতিঃ, বিকৃতৈর্নাশঃ| তদুক্তং "বিকৃতা দেহং ঘ্নন্তি তে বর্তযন্তি চ" ইতি| যে ত্বাদৌ শুক্রার্তবস্থাঃ,তৈর্বিকৃতৈরপি জন্ম ভবতি| কিন্ত্ববিকৃতৈরবিকৃতশরীরত্বং, বিকৃতৈর্বিকৃতশরীরত্বমিতি বিশেষঃ| বক্ষ্যতি হি (শা. অ. ১/৬)-"বিযোনিবিকৃতাকারা জাযন্তে বিকৃতৈর্মলৈঃ" ইতি| ননু বিকৃতৈর্নাশহেতুভিঃ কথং জন্মেত্যত আহ-বিষেণেব বিষক্রিমেরিতি| বিষাত্মকস্য ক্রিমের্নাশহেতুনাপি বিষেণ জন্ম যথা, তথা দোষাত্মকস্য শরীরস্য নাশহেতুভিরপি দোষৈরিত্যবিরোধঃ| প্রকৃতিবিশেষাখ্যং দোষকার্যমাহ-তৈশ্চেতি| তৈর্জন্মহেতুভির্দোষৈঃ, প্রকৃতযশ্চ স্যুঃ| তাশ্চ সপ্ত| তত্র পৃথগ্ভূতৈর্দোষৈস্তিস্রঃ| বাতেন হীনা, পিত্তেন মধ্যা, কফেনোত্তমা| সমধাতুশ্চতুর্থী| সা সমস্তাসু শ্রেষ্ঠা গুণৈঃ পূর্ণা সত্ত্বগুণপ্রধানা উত্তমাযা অপ্যুত্তমা| ধাতবো দোষাঃ| দ্বিদোষজাস্তিস্রঃ, সমস্তাসু নিন্দ্যাঃ, হীনাযা অপি হীনাঃ| তত্রাপি পিত্তকফজা হীনা, ততো বাতকফজা, ততোঽপি বাতপিত্তজেত্যূহ্যম্| যদ্যপি বাতকফযোঃ পরস্পরযোগবাহিত্বং, তথাপি বাতকার্যং ভবতীতি বচনাত্| তদুক্তম্ (হৃ.শা.অ.৩/৮৪)- "বলিত্বাদাশুকারিত্বাদ্বিভুত্বাদন্যকোপনাত্| স্বাতত্র্যাদ্বহুরোগত্বাদ্দোষাণাং প্রবলোঽনিলঃ||" ইতি| তা দ্বিদোষজা নিন্দ্যাঃ, বিরুদ্ধোপক্রমত্বাদুপদেশাচ্চ| উপদেশস্ত্বতিদেশস্য বাধকো ভবতি| ননু, বাযোর্যোগবাহিত্বাত্ বাতপিত্তজবাতশ্লেষ্মজপ্রকৃত্যোর্মধ্যোত্তমত্বে প্রাপ্তে কথং নিন্দ্যত্বম্| উচ্যতে| যোগবাহিত্বেঽপি প্রকৃতৌ স্বকার্যকারিত্বমুপদেশবলাদ্ভবতি| তথা চ সুশ্রুতঃ (শা.অ. ৪)- "সপ্তপ্রকৃতযো ভবন্তি দোষৈঃ পৃথগ্ দ্বিশঃসমস্তৈশ্চ|" তথা, "দ্বযোর্বা তিসৃণাং বাপি প্রকৃতীনাং স্বলক্ষণৈঃ| জ্ঞাত্বা সংসর্গজা বৈদ্যঃ প্রকৃতীরিতি নির্দিশেত্" ইতি| তথা চ বক্ষ্যত্যগ্রে (হৃ.শা.অ. ৩/১০৪)- "প্রকৃতীর্দ্বযসর্বোত্থা দ্বন্দ্বসর্বগুণোদযে| শৌচাস্তিক্যাদিভিশ্চৈবং গুণৈর্গুণমযীর্বদেত্" অত্র পারিশেষ্যাত্ একৈকস্যাধিকত্বেনারম্ভকত্বং, ত্রযাণাং সাম্যেন, তচ্চাধিকত্বেনোপক্রমাত্| তথা চ সুশ্রুতঃ (শা.অ. ৪)-"শুক্রশোণিতসংযোগে যো ভবেদ্দোষ উত্কটঃ| প্রকৃতির্জাযতে তেন তস্যা মে লক্ষণং শৃণূ"| তথা চ বক্ষ্যতি (হৃ.শা.অ. ৩/৮৩)-"শুক্রাসৃগ্গর্ভিণীভোজ্যচেষ্টাগর্ভাশযর্তুষু| যঃ স্যাদ্দোষোঽধিকস্তেন প্রকৃতিঃ সপ্তধোদিতা" ইতি| যদ্বা, সমৈর্বা জাযতে ত্রিভিঃ সমধাতুরিতি| ততো বাতপিত্তজে তূহ্যে| তত্র শ্রেষ্ঠা গুণৈঃ পূর্ণা| উত্তমাদযস্তু ক্রমাত্ ন্যূনাঃ, দোষবৈষম্যাত্পারিশেষ্যাচ্চ|

সর্বাঙ্গসুন্দরী ব্যাখ্যা ( কৃত)

স০-তত্রেতি নির্ধারণে| তত্র তেষু দোষেষু মধ্যে, অনিলো বাযুঃ, রূক্ষো, লঘুঃ, শীতঃ, খরোঽমৃদুঃ, সূক্ষ্মঃ স্রোতঃপ্রচারিত্বাত্, চলো গমনশীলো নৈকত্র তিষ্ঠতীতি| নন্বনুষ্ণাশীতো বাযুঃ কাণাদৈঃ পঠিতঃ| ইহাপি যোগবাহ্যনুজ্ঞানাদনুষ্ণাশীত এবেষ্যত ইতি| তথা চোক্তম্ (চ.চি.অ.৩/৩৮)- "যোগবাহী পরং বাযুঃ সংযোগাদুভযার্থকৃত্| দাহকৃত্তেজসা যুক্তঃ শীতকৃত্সোমসংশ্রযা" ইতি| তথা (হৃংই.অ.২/৪৮)- "পবনে যোগবাহিত্বাচ্ছীতং শ্লেষ্মযুতে ভবেত্| দাহঃ পিত্তযুতে" ইতি| উচ্যতে| সত্যমেতদনুষ্ণাশীত এব বাযুঃ| তস্য যোগবাহিত্বেঽপি তাবন্মাত্রাদ্দাহোদযাচ্ছৈত্যং স্বাভাবিকং ন বিনশ্যতি| শীতগুণব্যাবর্ণনে চেদং প্রযোজনমুষ্ণেনাযমুপশাম্যতীতি প্রতিপত্ত্যর্থম্| স০-সস্নেহমীষত্স্নিগ্ধম্| সশব্দ ঈষদর্থে| যথা (চ.সূ.অ.২৭/২৩৭)- "সতিক্তা যা সশর্করা"| এবমীষত্স্নেহো যস্য তত্সস্নেহম্| তীক্ষ্ণং শীঘ্রকারি মন্দবিপরীতং সূচীব ভিনত্তি| উষ্ণম্| লঘু| বিস্রং দুর্গন্ধি মত্স্যামগন্ধি| সরং ব্যাপ্তিশীলং সরণশীলমূর্ধ্বাধঃ প্রবর্ততে ন স্থিরমাস্তে, শকৃদ্বিস্রংসি বা| দ্রবং চ| স০-স্নিগ্ধগুণযোগাত্স্নিগ্ধঃ| শীতোঽনুষ্ণঃ| গুরুর্লঘুর্ন ভবতি| মন্দশ্চিরকারী, তীক্ষ্ণবিপরীতঃ| শ্লক্ষ্ণোঽপরুষঃ| মৃত্স্নো মৃদ্যমানোঽঙ্গুলিগ্রাহী পিচ্ছিলগুণযুক্তঃ চকচকাযমানঃ| স্থিরোঽব্যাপ্তিশীলঃ| এবং তদ্গুণযোগাত্ গুণগুণিনোরভেদোপচারাদ্বাতাদযো গুণতো নির্দিষ্টাঃ|

আযুর্বেদরসাযনম্ ব্যাখ্যা ( কৃত)

আ০ র০-বাযোর্গুণানাহ-তত্র রূক্ষ ইতি| তে চ রূক্ষাদযঃ ষট্| আ০ র০- পিত্তগুণানাহ-পিত্তমিতি| তে চ সস্নেহাদযঃ সপ্ত| সস্নেহমীষত্স্নিগ্ধম্| সশব্দ ঈষদর্থে| বিস্রং দুর্গন্ধি| আ০ র০-কফগুণানাহ- স্নিগ্ধ ইতি| তে চ স্নিগ্ধাদযঃ সপ্ত| মৃত্স্নঃ পিচ্ছিলঃ|

সর্বাঙ্গসুন্দরী ব্যাখ্যা ( কৃত)

স০-এতদুক্তং ভবতি| দ্বযোঃ স্বপ্রমাণাধিকযোঃ ক্ষীণযোর্বা সংযোগঃ সংসর্গঃ| ত্রযাণাং দোষাণাং বৃদ্ধানাং ক্ষীণানাং বা সংযোগঃ সন্নিপাতঃ|

আযুর্বেদরসাযনম্ ব্যাখ্যা ( কৃত)

আ০ র০- অবস্থাবিশিষ্টসংযোগনিমিত্তং দোষসংজ্ঞাদ্বযমাহ-সংসর্গ ইতি| তচ্চ দোষসংজ্ঞাদ্বযং সংসর্গঃ সন্নিপাতশ্চেতি| তত্র দ্বযোর্দোষযোঃ ক্ষীণযোঃ কুপিতযোর্বা যঃ সংযোগঃ, স সংসর্গঃ| ত্রযাণাং সন্নিপাতঃ| ইতি দ্বিত্বত্রিত্বযোঃ সংসর্গসন্নিপাতাভ্যাং যথাসংখ্যং সম্বন্ধঃ, ন তু ক্ষযকোপাভ্যাম্| যতো দোষভেদীযে সংসর্গস্যাপি বৃদ্ধিভেদান্ সন্নিপাতস্যাপি ক্ষযভেদান্ বক্ষ্যতি| ইতি দোষব্যাখ্যা|

সর্বাঙ্গসুন্দরী ব্যাখ্যা ( কৃত)

স০-রসাদযঃ সপ্ত ধাতুসংজ্ঞাঃ শরীরধারণাদ্ধাতবঃ| তে চ দূষ্যাঃ, বাতাদিভির্দূষ্যন্ত ইতি দূষ্যাঃ| যস্মাদ্বাতাদীনাং দূষণস্বভাবত্বাদ্যা দোষসংজ্ঞা, সান্বর্থসংজ্ঞা| দূষযন্তীতি দোষাঃ| অতোঽবশ্যং তে দূষ্যমপেক্ষন্তে| কর্ম বিনা কর্তুঃ ক্রিযাযা অসম্ভবাত্| কর্তারং বিনা কর্মণো ন কর্মত্বম্| এবং দোষৈর্বিনা রসাদীনাং দূষ্যনাম ন ঘটতে| তৈর্বিনাঽপি বাতাদীনাং দোষনাম| তস্মাত্পরস্পরাপেক্ষত্বাদনযোর্দূষ্যদোষযোর্দূষ্যত্বেন দোষত্বেন চ সংজ্ঞালাভঃ|

আযুর্বেদরসাযনম্ ব্যাখ্যা ( কৃত)

আ০ র০- দূষ্যাপরনামধেযান্ ধাতূন্ মলাংশ্চাহ-রসাসৃগিতি| রসাদযো যে সপ্ত ধাতবঃ, তে দূষ্যাঃ|

সর্বাঙ্গসুন্দরী ব্যাখ্যা ( কৃত)

স০- মূত্রশকৃদাদযো মলা উচ্যন্তে| অপিচেতিশব্দাদ্ দূষ্যাশ্চেতি| ন কেবলং রসাদয এব দূষ্যাঃ, যাবন্মলাস্তেঽপি বাতাদিভির্দূষ্যন্ত ইতি দূষ্যাঃ| এবং চ রসাদীনাং দূষ্যসংজ্ঞা ধাতুসংজ্ঞা চ| তথা বিণ্মূত্রাদীনাং মলসংজ্ঞা দূষ্যসংজ্ঞা চ| ইতি দোষধাতুমলনির্দেশেন দেহো ব্যাখ্যাতঃ| তথা চোত্তরগ্রন্থে (সূ.অ.১১/১)- "দোষধাতুমলা মূলং সদা দেহস্য" ইতি| তস্য চ দেহস্য যথা সন্ততং কেনচিদুপাযেন পরিপালনং নিষ্পদ্যতে, তমুপাযং দর্শযিতুমাহ-

আযুর্বেদরসাযনম্ ব্যাখ্যা ( কৃত)

আ০ র০- মূত্রাদযো যে সপ্ত মলাস্তেঽপি চ দূষ্যাঃ| মূত্রশকৃতী অন্নমলৌ, স্বেদো মেদোমলঃ, আদিশব্দাত্ মাংসাস্থিমজ্জশুক্রমলাঃ| বক্ষ্যতি হি (শা.অ. ৩/৬৩)- "কফঃ পিত্তং মলাঃ খেষু প্রস্বেদো নখরোম চ| স্নেহোঽক্ষিত্বগ্বিশামোজো ধাতূনাং ক্রমশো মলাঃ||" ইতি| কফপিত্তযোর্দোষত্বান্ন দূষ্যত্বম্| সঙ্গ্রহে তু (সূ.অ. ১)-"রসাদিস্থেষু দোষেষু ব্যাধযঃ সম্ভবন্তি যে| তজ্জা ইত্যুপচারেণ তানাহুর্ঘৃতদাহবত্||" ইতি| ইতি দূষ্যব্যাখ্যা| ইত্যন্তরঙ্গো হেতুঃ|

সর্বাঙ্গসুন্দরী ব্যাখ্যা ( কৃত)

স০- সর্বেষাং দোষধাতুমলাদীনাং শরীরাশ্রিতানাং, সমানৈস্তুল্যসদ্ভাবৈঃ, বৃদ্ধিঃ স্বপ্রমাণাধিক্যম্| বিপরীতৈর্বিশিষ্টতযা ব্যবস্থিতৈঃ, বিপর্যযঃ ক্ষযঃ| অযনং অযঃ গতিঃ, বিপরীতা গতির্বিপর্যযোঽপচযঃ| সামান্যবিশেষৈর্দ্রব্যগুণকর্মভেদেন ত্রিপ্রকারোঽধিগচ্ছতি| তথা চাহুঃ- "সর্বেষাং সর্বদা বৃদ্ধিস্তুল্যদ্রব্যগুণক্রিযৈঃ| ভাবৈর্ভবতি ভাবানাং বিপরীতৈর্বিপর্যযঃ"| দ্রব্যতো যথোক্তম্ (সং.সূ.অ.১৯)- "রক্তমাপ্যায্যতে রক্তেন, মাংসং মাংসেন, মেদো মেদসা, অস্থি তরুণাস্থ্না, মজ্জা মজ্না, শুক্রং শুক্রেণ, তথা গর্ভশ্চামগর্ভেণ"| তত্র রক্তেন রক্তমিত্যুভযমপ্যৌদকম্| মাংসেন মাংসমিতি পার্থিবম্| তথা, সলিলাত্মকং পযস্তদাত্মকমেব শ্লেষ্মাণমভিবর্ধযতি| তদ্বত্ক্ষীরজাতং ঘৃতং শুক্রম্| তথা জীবন্তীকাকোল্যাদযঃ সোমাত্মানো দ্রব্যবিশেষাঃ সৌম্যধাত্বেককারণানি স্নেহবলপুংস্ত্বৌজাংসি| মরীচপঞ্চকোলভল্লাতকাদযো বুদ্ধিমেধাগ্ন্যাদীন্ সংবর্ধযন্তি| গুণতঃ- চোচমোচখর্জূরাণি পার্থিবানি দ্রব্যতো নির্দিষ্টান্যপি শ্লেষ্মাণমুদকাত্মকমভিবর্ধযন্তি, স্নিগ্ধগুরুশীতাদিগুণসামান্যাত্| কর্মাপি ত্রিবিধং কাযবাঙ্মনোব্যাপারাত্মকম্| তত্র কাযিকানি- ধাবনলঙ্ঘনপ্লবনাদীনি চলত্বসামান্যাদ্বাযোর্বৃদ্ধযে| বাচিকানি--ভাষ্যাধ্যযনগেযাদীনি, মানসানি-মনোব্যাপারাশ্চিন্তাকামশোকভযানি, তান্যপি মনসঃ ক্ষোভণহেতুত্বাদ্বাযোর্বৃদ্ধিকরাণি| তথা সন্তাপকৃত্ত্বসামান্যাত্ক্রোধের্ষ্যাদি পিত্তস্য| স্বপ্নালস্যশয্যাসুখাদীনি স্থৈর্যসামান্যাত্কফস্যেতি| বিপর্যযস্তু ক্ষযায| যথাহ| দ্রব্যতঃ (সং.সূ.অ.১৪, চ.সূ.অ.২৫)- "গবেধুকান্নং কর্শনীযানাম্"| তত্র বাতাত্মিকযা গবেধুকযা পার্থিবানাং মাংসাদীনাং ক্রশিমা ক্রিযতে| তথা তৈজসেন ক্ষারেণ শ্লেষ্মণঃ| গুণতো যথা- আরনালমৌদকং শ্লেষ্মাণং তদ্বিপরীতৈর্লঘুরূক্ষোষ্ণতীক্ষ্ণবিশদগুণৈঃ ক্ষপযতি| কর্মতঃ- নিদ্রালস্যসৌমনস্যানি সপরিস্পন্দং বাতমপরিস্পন্দস্বভাবতযাঽপচিন্বন্তি| তথা পরিস্পন্দরূপাশ্চিন্তাব্যবাযব্যাযামা মন্দপরিস্পন্দবৈপরীত্যাত্কফমিতি|

আযুর্বেদরসাযনম্ ব্যাখ্যা ( কৃত)

আ০ র০- অথ বহিরঙ্গং ব্যাচষ্টে-দোষদূষ্যবিকৃত্যুত্পাদনদ্বারেণ যো ব্যাধীনাং কারণং, স বহিরঙ্গঃ| স চ দ্বেধা, বৃদ্ধিহেতুঃ ক্ষযহেতুশ্চ| তত্র বৃদ্ধিহেতুমাহ-বৃদ্ধিরিতি| সর্বেষাং দোষদূষ্যাণাং সমানৈস্তুল্যধর্মকৈর্দ্রব্যৈর্বৃদ্ধির্ভবেত্| যথা রূক্ষাদিগুণস্য বাযোঃ, তত্সমানগুণং শ্যামামাকাদি বর্দ্ধনম্| সস্নেহাদিগুণস্য পিত্তস্য তৈলাদি| স্নিগ্ধাদিগুণস্য কফস্য ক্ষীরাদি| দূষ্যেশু স্বেদরক্তযোঃ পিত্তবত্ বৃদ্ধিহেতুঃ| শেষাণাং শ্লেষ্মবত্| বক্ষ্যতি হি (সূ.অ. ১১/২৬)-"তত্রাস্থনি স্থিতো বাযুঃ পিত্তং তু স্বেদরক্তযোঃ| শেল্ষ্মা শেষেষু তেনৈষামাশ্রযাশ্রযিণাং মিথঃ|| যদেকস্য তদন্যস্য বর্দ্ধনক্ষপণৌষধম্| অস্থিমারুতযোর্নৈবম্|" ইতি| ক্ষযহেতুমাহ- বিপরীতৈরিতি| সর্বেষাং দোষদূষ্যাণাং বিপরীতৈর্বিরুদ্ধধর্মকৈর্দ্রব্যৈর্বৃদ্ধের্বিপর্যযঃ ক্ষযো ভবেত্|যথা- বাযোর্গোধূমদি ক্ষপণম্| পিত্তস্য যবাদি| কফস্য কুলত্থাদি| দূষ্যেষু পূর্ববত্|

সর্বাঙ্গসুন্দরী ব্যাখ্যা ( কৃত)

স০- স্বাদ্বাদযঃ ষড্রসাঃ, রসনেন্দ্রিযগ্রাহ্যত্বাদ্রসাঃ| তে চ রসা দ্রব্যং পঞ্চভূতাত্মকমাশ্রিতাঃ, যথাপূর্বং চ বলাবহাঃ| যো যঃ পূর্বো যথাপূর্বং, বলাবহা বলপ্রাপকাঃ| বলমাবহন্তি প্রাপযন্তীতি যাবত্| তস্মাত্সর্বেভ্যো রসেভ্যো মধুরো রসঃ প্রকর্ষেণ দেহিনাং বলকরঃ| কষাযস্তু সর্বেভ্যো জঘন্যবলাবহঃ| তত্র স্বাদুর্মধুরো ঘৃতগুডাদিঃ| অম্লোঽম্লিকামাতুলুঙ্গাদিঃ| লবণঃ সৈন্ধবাদিঃ| তিক্তো ভূনিম্বাদিঃ| ঊষণঃ কটুকো মরীচাদিঃ| কষাযো হরীতক্যাদিঃ| স্বাদুর্মধুরপর্যাযঃ| ঊষণঃ কটুকপর্যাযঃ| যথা ত্র্যূষণং ত্রিকটুকমুচ্যতে| কষায এব কষাযকঃ, যথা কটুরেব কটুকঃ| ষডিতি ষডেব, ন ন্যূনা অধিকা বা| যদ্যপি তে রসা গুণাঃ স্বাদ্বাদিভেদতস্তথা সংসর্গতস্তথাঽনুরসতস্তারতম্যপরিকল্পনাবশতোঽপি ভিদ্যমানরূপা অপি ষট্ত্বং নাতিবর্তন্তে|

আযুর্বেদরসাযনম্ ব্যাখ্যা ( কৃত)

আ০ র০- অথ সাধর্ম্যবৈধর্ম্যজ্ঞানার্থং দ্রব্যধর্মানাহ-তে চ রসপ্রভাববীর্যবিপাকগুণভেদাত্পঞ্চ| তত্র রসনাগ্রাহ্যো রসঃ| শেষো গুণঃ| কাযাগ্নিপাকজো বিশিষ্টো রসো বিপাকঃ| তথৈবোত্পন্নো গুণো বীর্যম্| দ্রব্যস্যাত্মা প্রভাবঃ| তত্র রসভেদানাহ-রসা ইতি| তে চ স্বাদ্বাদযঃ ষট্| স্বাদুর্মধুরঃ, ঊষণঃ কটুকঃ| তে চ দ্রব্যমাশ্রিতাঃ, দ্রব্যধর্মা ইত্যর্থঃ| ক্ষারস্য দ্রব্যবিশেষবাচিত্বাদ্রসবিশেষবাচিত্বেঽপি লবণবিশেষবাচিত্বান্ন সপ্তমরসত্বম্| বলাবহাখ্যং রসকর্মাহ-তে চেতি| তে চ রসা যথাপূর্বং বলাবহাঃ| যো যস্মাত্পূর্বঃ স তস্মাদধিকং বলমাবহতি| যো যস্মাত্পূর্বঃ স তস্মাদধিকং বলমাবহতি| কষাযো বল্যস্তত ঊষণস্ততস্তিক্ত ইত্যাদি|

সর্বাঙ্গসুন্দরী ব্যাখ্যা ( কৃত)

স০- তত্র তেষু রসেষু মধ্যে, আদ্যাস্ত্রযঃ স্বাদ্বম্ললবণাঃ, মারুতং ঘ্নন্তি শমযন্তি| অন্যে তু তিক্তোষণকষাযাস্তমেব চানিলং কুর্বতে কোপযন্তি| তিক্তাদযস্ত্রযস্তিক্তোষণকষাযাঃ কফং ঘ্নন্তি প্রশমযন্তি| অন্যে তু মধুরাম্ললবণাস্তমেব কফং কুর্বতে| কষাযতিক্তমধুরাঃ পিত্তং ঘ্নন্তি| অন্যে ত্বম্ললবণকটুকাস্তদেব পিত্তং কুর্বতে| এতেনেদমুক্তং ভবতি| মধুরো বাতপিত্তঘ্নঃ শ্লেষ্মকরঃ| অম্লো বাতং হন্তি, কফপিত্তে তু জনযতি| লবণো মারুতং হন্তি, কফপিত্তে তু কুরুতে| তিক্তঃ কফপিত্তে নাশযতি, বাতং তু জনযতি| ঊষণঃ কফং নাশযতি, বাতপিত্তে তু জনযতি| কষাযঃ কফপিত্তে হন্তি, বাতং তু করোতীতি|

আযুর্বেদরসাযনম্ ব্যাখ্যা ( কৃত)

আ০ র০- বাতাদীনাং সাক্ষাদ্রসাকথনাদস্পষ্টে দোষদ্রব্যযোঃ সাধর্ম্যবৈধর্ম্যে স্পষ্টযতি-তত্রাদ্যা ইতি| তত্র তেষু রসেষু মধ্যে, আদ্যাস্রযো রসাঃ স্বাদ্বম্ললবণাঃ, মারুতং ঘ্নন্তি| তিক্তাদযস্তিক্তোষণকষাযাঃ কফং ঘ্নন্তি| কষাযতিক্তমধুরাঃ পিত্তং ঘ্নন্তি| অন্যে তু কুর্বত ইতি ত্রিষ্বপি যোজ্যম্| তেন তিক্তোষণকষাযা বাযুং কুর্বন্তি| স্বাদ্বম্ল লবণাঃ কফম্| অম্ললবণকটুকাঃ পিত্তম্| অত এব তে তে রসাস্তত্র তত্র সন্তীত্যনুমেযম্| উক্তং চ কপিলেন-"কট্বম্ললবণং পিত্তং স্বাদ্বম্ললবণঃ কফঃ| কষাযতিক্তকটুকো বাযুর্দৃষ্টোঽনুমানতঃ||" ইতি|

সর্বাঙ্গসুন্দরী ব্যাখ্যা ( কৃত)

স০- ইতি অনেন প্রকারেণ শমনাদিভেদেন, ত্রিধা ত্রিপ্রকারং, দ্রব্যম্| অন্যেন প্রকারেণ দ্বিধা অথবা অনেকধা| ইতিশব্দঃ প্রকারার্থেঽভিহিতঃ| যত্ কুপিতান্ বাতাদীন্ দোষান্ শমযতি, তচ্ছমনম্| যথা- তৈলং ঘৃতং মাক্ষিকম্| তত্র তৈলং স্নেহৌষ্ণ্যগৌরবযোগাদ্বাতং তদ্বিপরীতগুণং শমযতি| সর্পির্মাধুর্যশৈত্যমান্দ্যগুণযোগাত্তদ্বিপরীতগুণং পিত্তম্| মধু চ রৌক্ষ্যতৈক্ষ্ণ্যকষাযযোগাত্তদ্বিপরীতগুণং কফম্| যদ্বাতাদীন্ দোষান্ রসাদীন্ধাতূন্ মূত্রাদীন্মলাংশ্চ কোপযতি, তত্কোপনম্| যথা- যবকপাটলভাষমত্স্যামমূলকসার্ষপমন্দকদধিকিলাটবিরুদ্ধমত্স্যপযঃ প্রভৃতি| দোষাদীনাং মলপর্যন্তানাং স্বপ্রমাণস্থিতানাং সাম্যানুবৃত্তিহেতুর্যদ্দ্রব্যং তত্ স্বস্থেভ্যো হিতম্| যচ্চ স্বাস্থ্যানুবৃত্তিং করোতি, ঋতুচর্যাধ্যাযে সেব্যত্বেনোক্তম্| তথা মাত্রাশিতীযাধ্যাযে রক্তশালিষষ্টিকযবগোধূমজাঙ্গলমাংসজীবন্তীশাকদিব্যোদকক্ষীরাদি| তথা যদূর্জস্করং রসাযনবাজীকরণং সর্বদা শীলনীযত্বেন নির্দিষ্টম্|

আযুর্বেদরসাযনম্ ব্যাখ্যা ( কৃত)

আ০ র০- প্রভাবভেদানাহ- শমনমিতি| প্রভাবো রসাদিষ্বন্তরঙ্গ ইতি দ্যোতযিতুং দ্রব্যশব্দেনোক্তঃ, দ্রব্যমিতি ত্রিধেতি| শমনং কোপনং স্বস্থহিতং চেতি ত্রৈবিধ্যম্| যদ্ দ্রব্যং সমৈঃ সমবিপরীতৈর্বা রসাদিভির্যুক্তমপি বাতাদীন্ শমযতি তচ্ছমনম্| তদ্যথা-মধুরশীতাপি জীবন্তী কফং শমযতি| কটুপাকরসো গুরুঃ স্নিগ্ধোঽপি রসোনঃ কফবাতৌ| যদ্ দ্রব্যং বিপরীতৈঃ সমবিপরীতৈর্বা রসাদিভির্যুক্তমপি বাতাদীন্ কোপযতি তত্কোপনম্| যথা-গুরূষ্ণস্নিগ্ধমধুরমপি ফাণিতং বাতং কোপযতি| তৈরেব গুণৈর্মাষঃ পিত্তকফৌ| যদ্ দ্রব্যং বাতাদীনাং ক্ষযবৃদ্ধ্যোর্হেতুরপি স্বস্থস্য ন তথা, তত্স্বস্থহিতম্| যথা-গুরুমধুররূক্ষশীতোঽপি যবঃ স্বস্থস্য পিত্তং ন ক্ষপযতি| গুরুমধুরস্নিগ্ধশীতমপি ক্ষীরং স্বস্থস্য কফং ন কোপযতি| এবং সর্বত্রাপি প্রভাব উদাহরণীযঃ| বক্ষ্যতি চ (সূ.অ. ৯/২৬)-"রসাদিসাম্যে যত্কর্ম বিশিষ্টং তত্প্রভাবজম্|" ইতি| অন্যে তু শমনাদীন্ দ্রব্যভেদানাহুঃ| তত্তু ন সম্যক্| দ্রব্যভেদত্বে যদেব শমনং, তদেব কোপনং তদেব স্বস্থহিতমিতি সঙ্করো ন যুক্তঃ| ধর্মভেদত্বে তু রসাদিসঙ্করবদ্যুক্তঃ| কিঞ্চ দ্রব্যভেদাশ্বেদমী তদা রসাদিধর্মভেদানাং প্রাক্পশ্চাদ্বা অভিধেযাঃ স্যুঃ, ন মধ্যে| তস্মাত্প্রভাবভেদা এব শমনাদযঃ|

সর্বাঙ্গসুন্দরী ব্যাখ্যা ( কৃত)

স০- তত্র তস্মিন্ দ্রব্যে, বীর্যং দ্বিবিধম্| বিংশতের্গুণানাং মধ্যাদ্দ্বাবুষ্ণশীতৌ, তদুত্কর্ষাদ্বীর্যমিতি সর্বাযুর্বেদপ্রসিদ্ধৌ, দ্বাবেব গুণৌ শীতোষ্ণৌ বীর্যকরণহেতূ| বীর্যং শক্তিঃ| উষ্ণগুণোত্কর্ষ উষ্ণগুণাতিশয এব কশ্চিদুষ্ণবীর্যাখ্যাং লভতে| তথা শীতগুণোত্কর্ষঃ শীতগুণাতিশয এব শীতবীর্যাখ্যাম্| যদ্যপি নানাত্মকমপি দ্রব্যং, তথাপ্যগ্নীষোমাত্মকত্বাজ্জগতো দ্বিধৈব বীর্যম্|

আযুর্বেদরসাযনম্ ব্যাখ্যা ( কৃত)

আ০ র০- বীর্যদ্বৈবিধ্যমাহ-উষ্ণেতি| তচ্চ উষ্ণং শীতং চ| ননু গুরুলঘুস্নিগ্ধরূক্ষমন্দতীক্ষ্ণানামপি বীর্যত্বাত্কথং দ্বে এবেত্যত আহ- উষ্ণশীতগুণোত্কর্ষাত্| যদ্যপি কাযাগ্নিপাকাদষ্টৌ গুণা জাযন্তে, তথাপ্যুষ্ণশীতযোর্গুণযোরুত্কর্ষাত্ দ্বৈবিধ্যম্| গুণান্তরতিরস্কারে শক্তিরুত্কর্ষঃ| শক্ত্যুত্কর্ষে বীর্যশব্দো লোকেঽপি প্রসিদ্ধঃ| তত্র দ্রব্যে| বীর্যমপি দ্রব্যাশ্রযমিত্যর্থঃ|

সর্বাঙ্গসুন্দরী ব্যাখ্যা ( কৃত)

স০- বিপাকস্ত্রিবিধঃ, সর্বদ্রব্যাণাং পরিণামকালভাবী কার্যানুমেযো জাঠরাগ্নিসম্বন্ধাদ্রসস্য স্বরূপান্তরপ্রাদুর্ভাবঃ| স ত্রিধৈব, রসষট্ত্বেঽপি ন ষোঢা| তেন কিঞ্চিত্স্বাদুপাকং, কিঞ্চিদম্লবিপাকং, কিঞ্চিত্কটুবিপাকং, দ্রব্যম্| তত্র মধুরলবণযোর্মধুরো বিপাকঃ| অম্লস্যাম্লঃ| তিক্তকটুকষাযাণাং কটুকঃ| স চ কার্যানুমেযঃ| তথা চ বক্ষ্যতি (সূ.অ.৯/২০)- 'জাঠরেণাগ্নিনা যোগাদ্যদুদেতি রসান্তরম্| রসানাং পরিণামান্তে স বিপাক ইতি স্মৃতঃ' ইতি| অত এব সোপসর্গঃ পাকশব্দ উপাত্তঃ| বিশিষ্টঃ পাকো বিপাকঃ, ন পাকমাত্রস্বরূপঃ| তথা চ ভট্টারকচরকমুনী (চ.সূ.অ.২৬/৬৮)-'রসো নিপাতে দ্রব্যাণাং বিপাকঃ কর্মনিষ্ঠযা| বীর্যং যাবদধীবাসান্নিপাতাচ্চোপলভ্যতে' ইতি| এবং কর্মনিষ্ঠানুমিত একরূপাবস্থো জাঠরাগ্নিসংযোগাদ্যো রসানাং রসান্তরোদ্ভবঃ, স এব বিপাকঃ| ন তু যো জাঠরাগ্নিসংযোগমাত্রাদ্রসানামনেকাবস্থঃ, প্রাঙ্মধুরোঽনন্তরং স এব পচ্যমানোঽম্লস্ততো বিপচ্যমানঃ স এব কটুর্বিপাকঃ|

আযুর্বেদরসাযনম্ ব্যাখ্যা ( কৃত)

আ০ র০-বিপাকভেদানাহ-ত্রিধেতি| তে চ ত্রযঃ, স্বাদুরম্লঃ কটুকশ্চেতি|

সর্বাঙ্গসুন্দরী ব্যাখ্যা ( কৃত)

স০- তত্র দ্রব্যে গুর্বাদযো দশ গুণাঃ সবিপর্যযা বিংশতির্বেজ্ঞেযাঃ| এষাং ক্রমাদ্বিপরীতা লঘুতীক্ষ্ণোষ্ণরূক্ষখরদ্রবকঠিনসরস্থূলপিচ্ছিলাঃ| গুরুস্তদ্বিপর্যযো লঘুঃ| মন্দস্তদ্বিপর্যযস্তীক্ষ্ণঃ| হিমস্তদ্বিপর্যয উষ্ণঃ| স্নিগ্ধস্তদ্বিপর্যযো রূক্ষঃ| শ্লক্ষ্ণস্তদ্বিপর্যযঃ খরঃ| সান্দ্রস্তদ্বিপর্যযো দ্রবঃ| মৃদুস্তদ্বিপর্যযঃ কঠিনঃ| স্থিরস্তদ্বিপর্যযঃ সরঃ| সূক্ষ্মস্তদ্বিপর্যযঃ স্থূলঃ| বিশদস্তদ্বিপর্যযঃ পিচ্ছিলঃ|

আযুর্বেদরসাযনম্ ব্যাখ্যা ( কৃত)

আ০ র০- গুণভেদানাহ-গুরুমন্দেতি| তে চ বিংশতিঃ| তত্র গুর্বাদযো দশ, তদ্বিপর্যযাশ্চ লঘুতীক্ষ্ণোষ্ণরূক্ষখরদ্রবকঠিনচলস্থূলপিচ্ছিলা দশ| দ্রব্যস্য বৃংহণে কর্মণি শক্তির্গুরুঃ, লঙ্ঘনে লঘুঃ, শমনে মন্দঃ, শোধনে তীক্ষ্ণঃ, স্তম্ভনে হিমঃ, স্বেদনে উষ্ণঃ, ক্লেদনে স্নিগ্ধঃ, শোষণে রূক্ষঃ, রোপণে শ্লক্ষ্ণঃ, লেখনে খরঃ, প্রসাদনে সান্দ্রঃ, বিলোডনে দ্রবঃ, শ্লথনে মৃদুঃ, দৃঢনে কঠিনঃ, ধারণে স্থিরঃ, প্রেরণে চলঃ, বিবরণে সূক্ষ্মঃ, সংবরণে স্থূলঃ, ক্ষালনে বিশদঃ, লেপনে পিচ্ছিল ইতি| ননু ব্যবাযিবিকাশ্যাশুকারিপ্রসন্নসুগন্ধাদযঃ সবিপর্যযাশ্চান্যেঽপি গুণা দৃশ্যন্তে| তদ্যথা স্বযমেবাহ (নি.অ. ৬/১)-"তীক্ষ্ণোষ্ণরূক্ষসূক্ষ্মাম্লব্যবায্যাশুকরং লঘু| বিকাশি বিশদং মদ্যমোজসোঽস্মাদ্বিপর্যযঃ||" চরকঃ (সূ.অ.২৭/২১৩)- "স্বাদু শীতং মৃদু স্নিগ্ধং বহলং শ্লক্ষ্ণপিচ্ছিলম্| গুরু মন্দং প্রসন্নং চ গব্যং দশগুণং পযঃ|| তদেবঙ্গুণমেবৌজঃ সামন্যাদভিবর্ধযেত্||" সুশ্রুতঃ (সূ.অ. ৪৬/১৮৯)- "কষাযং কফপিত্তঘ্নং কিঞ্চিত্তিক্তং রুচিপ্রদম্| হৃদ্যং সুগন্ধি বিশদং লবলীফলমুচ্যতে||" অযমেব (সূ.অ. ১/১১)-"পিত্তং সস্নেহতীক্ষ্ণোষ্ণং লঘু বিস্রং সরং দ্রবম্||" চরকঃ (সূ.অ. ২৭/১৯৩)- "শীতং শুচি শিবং মৃষ্টং বিমলং লঘু ষড্গুণম্| প্রকৃত্যা দিব্যমুদকং ভ্রষ্টং পাত্রমপেক্ষতে||" ইত্যাদি| তত্কথং বিংশতির্গুণা ইতি| অত্রোচ্যতে| য এতেঽতিরিক্তা গুণা দর্শিতাঃ, তে বিংশতাবেবান্তর্ভূতাঃ| তথাহি-ব্যবাযিবিকাশ্যাশুকারিণস্তাবন্মদ্যে পঠ্যন্তে| প্রসন্নঃ ক্ষীরে| মদ্যগুণবিপরীতা ওজসি| য এবৌজসি ত এব ক্ষীরে| ততশ্চ তদ্গুণপরস্পরবিপর্যযপর্যালোচনযা ব্যবায়ী-দ্রবেঽন্তর্ভূতঃ| বিকাশী-খরে| আশুকারী-চলে| প্রসন্নঃ-স্থূলে| তে হি পারিশেষ্যাত্ বহলশ্লক্ষ্ণস্থিরসূক্ষ্মাণাং বিপর্যযাঃ| স্বদুশীতমন্দস্নিগ্ধপিচ্ছিলগুরূণাং হ্যম্লোষ্ণতীক্ষ্ণরূক্ষবিশদলঘবো বিপর্যযাঃ প্রসিদ্ধা এব| ব্যবায্যাদিলক্ষণং চ দ্রবাদিষ্বেব সম্ভবতি| যদাহ সুশ্রুতঃ (সূ.অ. ৪৬/৫২১)- "ব্যবাযী দেহমখিলং ব্যাপ্য পাকায কল্পতে| বিকাশী বিকষন্ ধাতূন্ সন্ধিবন্ধান্ বিমুঞ্চতি|| আশুকারী তথাশুত্বাদ্ধাবত্যম্ভসি তৈলবাত্" ইতি| প্রসন্নত্বং স্ফুটত্বম্| তচ্চ স্থূল এব, তস্য স্ফুটপ্রত্যক্ষত্বাত্| সুগন্ধদুর্গন্ধৌ তু মন্দতীক্ষ্ণবিশেষৌ, ইন্দ্রিযপ্রসাদনোদ্বেজনদ্বারা শমনশোধনরূপত্বাত্| যদাহ সুশ্রুতঃ (সূ.অ. ৪৬/৫২০)- "সুগন্ধো রোচনো মৃদুঃ| দুর্গন্ধো বিপরীতোঽস্মাত্" ইতি| শুচিবিমলৌ তু বিশদবিশেষৌ| অদৃষ্টানাং হি মলানাং ক্ষালনে শক্তিঃ শুচিত্বম্| দৃষ্টানাং বিমলত্বম্| শিবং পরিণামে হিতম্| মৃষ্টং জিহ্বাপ্রিযম্| তে চ গুণকার্যে| গুণশব্দস্তূপচারাত্| যথা- "ক্ষুদ্বোধনো বস্তিবিশোধনশ্চ প্রাণাপ্রদঃ শোণিতবর্ধনশ্চ| জ্বরাপহারী কফপিত্তহন্তা বাযুং জযেদষ্টগুণো হি মণ্ডঃ||" ইত্যাদৌ| যত্তু ব্যবাযিবিকাশিনৌ প্রস্তুত্যোক্তং সঙ্গ্রহে (সূ.অ. ১)- "সরতীক্ষ্ণপ্রকর্ষৌ তু কৈশ্চিত্তৌ পরিকল্পিতৌ" ইতি| তদেকীযমতত্বাদনাদরণীযম্| তদাদরণে যত্তৈলে ব্যবাযিবদ্ধবিট্কযোরভিধানং তদ্বিরুদ্ধং স্যাত্| যচ্চ মদ্যে তীক্ষ্ণবিকাশিনোস্তত্পুনরুক্তং স্যাত্| যত্তু পিত্তে তীক্ষ্ণবিস্রযোরভিধানং, তদিন্দ্রিযোদ্বেজকত্বে সত্যপি ঘ্রাণেন্দ্রিযস্যোদ্বেজনাতিশযার্থম্| সঙ্গ্রহে তু (সূ.অ. ১)- "ইন্দ্রিযার্থা ব্যবাযী চ বিকাশী চাপরে গুণাঃ| সত্ত্বং রজস্তমশ্চেতি ত্রযঃ প্রোক্তা মহাগুণাঃ||" ইতি|

সর্বাঙ্গসুন্দরী ব্যাখ্যা ( কৃত)

স০- কালঃ শীতোষ্ণবর্ষলক্ষণস্ত্রিবিধঃ| অর্থাঃ শব্দস্পর্শরূপরসগন্ধা মহাভূতগুণাঃ| তথা চাগমঃ (চ.শা.অ.১/২৯)- "অর্থাঃ শব্দাদযো জ্ঞেযা গোচরা বিষযা গুণাঃ" ইতি| কর্ম ক্রিযা, কাযবাঙ্মনশ্চেষ্টা| কালশ্চার্থশ্চ কর্ম চ তানি কালার্থকর্মাণি, তেষাং যোগঃ সম্বন্ধঃ, কালার্থকর্মণাং যোগঃ| কিম্ভূতঃ, হীনমিথ্যাতিমাত্রকস্তথা সম্যগ্যোগশ্চেতি| যে কালাদীনাং যোগা হীনমিথ্যাতিমাত্রকাঃ, তে রোগৈককারণম্| তেষামেব যঃ সম্যগ্যোগঃ, স আরোগ্যৈককারণং প্রধানকারণমিতি| একশব্দঃ প্রধানবচনঃ| যথা- 'একঃ পার্থো ধনুর্ধরঃ' ইতি| কালস্য হীনযোগঃ স্বরূপহানিঃ| মিথ্যাযোগঃ স্বরূপাদ্বৈপরীত্যম্| অতিযোগঃ স্বরূপাতিশযঃ| যথা- হীনশীততা হীনোষ্ণতা হীনবর্ষতা হীনযোগে| শীতকালাবসরেঽত্যৌষ্ণ্যমুষ্ণকালাবসরে শীতং বর্ষাকালেঽবৃষ্টির্মিথ্যাযোগে| অতিশৈত্যমত্যৌষ্ণ্যমতিবর্ষণমতিযোগে| এতদ্যোগত্রযং রোগকারণম্| সম্যগ্যোগো যথাস্বরূপস্থিতিরারোগ্যকারণম্| অর্থানাং পুনঃ স্বেন স্বেনার্থেনেন্দ্রিযস্য হীনঃ সংযোগো হীনযোগঃ| পুরুষানভিমতাদিনার্থজাতেনেন্দ্রিযস্য যোগো মিথ্যাযোগঃ| অত্যন্তসংযোগোঽতিযোগঃ| এতে ত্রযো রোগকারণম্| যথাস্বং সম্যগ্যোগ আরোগ্যকারণম্| কাযাদিকর্মণো হীনপ্রবৃত্তির্হীনযোগঃ| বেগোদীরণাদিকং সামিভুক্তভাষণাদিকং রাগদ্বেষাদিকং চ যথাস্বমুত্তরত্র (সূ.অ.১২/৪০) বক্ষ্যমাণং মিথ্যাযোগঃ| অতিপ্রবৃত্তিরতিযোগঃ| সর্বেষাং সমা প্রবৃত্তিঃ সমযোগঃ| তেন হীনাদযো যোগাস্ত্রযো রোগকারণম্| সম্যগ্যোগস্ত্বারোগ্যকারণম্|

আযুর্বেদরসাযনম্ ব্যাখ্যা ( কৃত)

আ০ র০- উক্তধর্মকাণাং দ্রব্যাণাম্ সদোপযোগাত্সদৈব দোষবৈষম্যে প্রাপ্তে বিশেষমাহ-কালার্থেতি| দ্রব্যাণি চরকোক্তানি (সূ. অ. ১/৪৭)- "খাদীন্যাত্মা মনঃ কালো দিশশ্চ দ্রব্যসঙ্গ্রহঃ|" ইতি| তত্র কালঃ সাক্ষাদুপযুজ্যতে| মহাভূতানি ত্বর্থদ্বারেণ| দিগাত্মমনাংসি কর্মদ্বারেণ| কালো বর্ষাশীতোষ্ণভেদাত্ ত্রিধা| শব্দস্পর্শরূপরসগন্ধভেদাদর্থঃ পঞ্চধা| কাযিকবাচিকমানসিকভেদাত্কর্ম ত্রিধা| তেষামসম্যগ্যোগো রাগকারণং, সম্যগ্যোগস্ত্বারোগ্যকারণম্| তত্রাসম্যগ্যোগস্ত্রিধা, হীনযোগো মিথ্যাযোগোঽতিযোগশ্চেতি| শীতাদীনাং কাললক্ষণানামল্পত্বং কালস্য হীনযোগঃ, বিপরীতস্বলক্ষণো মিথ্যাযোগঃ, আধিক্যমতিযোগঃ| ইন্দ্রিযৈরিন্দ্রিযার্থানাং যোঽল্পঃ সম্বন্ধঃ, সোঽর্থস্য হীনযোগঃ, অনুচিতো মিথ্যাযোগঃ, অধিকোঽতিযোগঃ| অল্পা চেষ্টা কর্মণাং হীনযোগঃ, অনুচিতো মিথ্যাযোগঃ, অধিকোঽতিযোগঃ| অসম্যগ্যোগাদ্বিপরীতঃ সর্বেষাং সম্যগ্যোগঃ| এতদুক্তং ভবতি| যদ্যপি সর্বদা দ্রব্যৈর্যোগস্তথাপ্যসম্যগ্যোগো যদা, তদা দোষবৈষম্যম্| যদা সম্যগ্যোগস্তদা দোষসাম্যম্| ইতি বহিরঙ্গো হেতুঃ|

সর্বাঙ্গসুন্দরী ব্যাখ্যা ( কৃত)

স০- দোষাণাং বাতাদীনাং, বৈষম্যং স্বপ্রমাণাদেকস্য দ্বযোস্ত্রযাণাং বা বৃদ্ধিঃ ক্ষযো বা, রুজাকরত্বাদ্রোগ এব| বৈষম্যং বিষমতা স্বরূপাচ্চ্যাবঃ| ততঃ কার্যকারণযোরভেদেন পঠিতো রোগ ইতি| দোষাণাং সাম্যং স্বরূপাদপ্রচ্যুতিঃ সমভাবোঽরোগতা আরোগ্যং, স্বাস্থ্যমিতি যাবত্|

আযুর্বেদরসাযনম্ ব্যাখ্যা ( কৃত)

আ০ র০-অথ লক্ষণং ব্যাচষ্টে| রোগং লক্ষযতি-রোগস্ত্বিতি| দোষদূষ্যাণাং যদ্বৈষম্যং বিকৃতত্বং তদ্রোগঃ| দোষশব্দোঽন্তরঙ্গহেতুমাত্রোপলক্ষণঃ| প্রসঙ্গাদারোগ্যং লক্ষযতি-দোষসাম্যমিতি| দোষদূষ্যাণাং যত্সাম্যমবিকৃতত্বং তদারোগ্যম্|

সর্বাঙ্গসুন্দরী ব্যাখ্যা ( কৃত)

স০- তত্র তযো রোগারোগ্যযোঃ, রোগা দ্বিধা নিজাগন্তুভেদেন| নিজা বাতাদিদোষজন্মানঃ| আগন্তবো বাহ্যহেতবঃ| তথা চাচার্যবচনম্ (সং.সূ.অ.২২)- "নিজাস্ত্রিদোষোত্থাঃ| বাহ্যহেতুজাস্ত্বাগন্তবঃ"| অনযোরিযান্বিশেষঃ| নিজে রোগে বাতাদযঃ পূর্বং বৈষম্যং গত্বা পশ্চাদ্ব্যথামভিনির্বর্তযন্তি| আগন্তবঃ পুনঃ ব্যথাপূর্বমেবোত্পদ্যন্তে, অনন্তরং তত্র বাতাদযঃ কুপ্যন্তীতি| অনেনোভযস্য নিজাগন্তুভেদভিন্নস্য ব্যাধেশ্চেতঃ সন্তাপকত্বং বোদ্ধব্যম্|

আযুর্বেদরসাযনম্ ব্যাখ্যা ( কৃত)

আ০ র০- রোগভেদানাহ-নিজেতি| দ্বিবিধো রোগঃ, নিজ আগন্তুশ্চেতি| তত্র যদ্দোষবৈষম্যং স্বযমুত্পাদ্য ব্যথাং নির্বর্তযতি, স নিজো রোগঃ| যস্তু শস্ত্রাদিনা হেত্বন্তরেণোত্পন্নঃ, স আগন্তুঃ|

সর্বাঙ্গসুন্দরী ব্যাখ্যা ( কৃত)

স০- তেষাং নিজাগন্তুকানাং বিকারাণাং রোগাণাং, কাযমনোভেদেন দ্বিবিধমধিষ্ঠানং স্থানম্| জ্বরাস্রপিত্তকাসাদীনাং কাযঃ| মদমূর্ছাসন্ন্যাসগ্রহভূতোন্মাদাপস্মাররাগদ্বেষাদীনাং মনঃ| অধিতিষ্ঠন্ত্যস্মিন্নিত্যধিষ্ঠানম্| কাযঃ শরীরম্| মনশ্চেতঃ|

আযুর্বেদরসাযনম্ ব্যাখ্যা ( কৃত)

আ০ র০- রোগাধিষ্ঠানমাহ-তেষামিতি| তচ্চ দ্বিধা, শরীরং মনশ্চ|

সর্বাঙ্গসুন্দরী ব্যাখ্যা ( কৃত)

স০- মনশ্চেতঃ, তস্য রজস্তমসী দোষৌ, উপপ্লবাববিদ্যাসম্ভবৌ| অত্র চ প্রাধান্যাদাদৌ রজো নিক্ষিপ্তম্| চশব্দঃ পবনাদীনামপ্যুপসঙ্গ্রহার্থঃ| যস্মাত্তেঽপি মনঃ সংশ্রিত্য বিকুর্বতে| সঙ্গ্রহে হ্যুক্তম্ (উ.অ.৯)- "ষডুন্মাদা ভবন্তি বাতপিত্তকফসন্নিপাতাঽঽধিবিষনিমিত্তাঃ" ইত্যাদি| উদাহৃতৌ ইত্যুদাহরণমাত্রমুদ্দেশমাত্রং বচনমাত্রম্| অত্রাযুর্বেদশাস্ত্রে, রজস্তমসোর্ন সাকল্যেন ব্যাকরণমনিলাদীনামিব| তে খল্বত্র স্বভাবস্থানাদিভিঃ প্রকারৈরশেষমুক্তাঃ, ন তু রজস্তমসী|

আযুর্বেদরসাযনম্ ব্যাখ্যা ( কৃত)

আ০ র০- দুষ্টস্য মনসো রোগাধিষ্ঠানত্বাদ্দুষ্টিহেতুমাহ-রজ ইতি| স চ দ্বিধা, রজস্তমশ্চ| দ্বৌ দোষৌ দ্বে দুষ্টিকারণে ইত্যর্থঃ| ন ত্বনযোর্বাতাদিবদ্দোষত্বম্, ততোঽনন্তরমনুক্তের্দোষবিজ্ঞানীযাদিষু চাগ্রহণাত্| কাযোঽপি দুষ্ট এব রোগাধিষ্ঠানম্| তস্য তু দোষা এব দুষ্টিকারণম্|

সর্বাঙ্গসুন্দরী ব্যাখ্যা ( কৃত)

স০- রোগোঽস্যাস্তীতি রোগী ব্যাধিতঃ, তং দর্শনাদিভিঃ পরীক্ষেত| দর্শনেন দৃষ্ট্যা, কাসমেহাদ্যার্তেষু পীতশুক্লবর্ণসংস্থানপ্রমাণোপচযচ্ছাযাবিণ্মূত্রচ্ছর্দিতাদিকম্| স্পর্শনেন হস্তকাযস্পর্শেন, জ্বরগুল্মবিদ্রধ্যাদ্যার্তম্, তথা শীতোষ্ণস্তব্ধস্পন্দশ্লক্ষ্ণখরস্পর্শাদিকং চ| প্রশ্নেন পৃচ্ছযা, শূলারোচকচ্ছর্দিহৃদর্দত্বং সুচ্ছন্দদুশ্ছন্দত্বং মৃদুক্রূরকোষ্ঠতাং স্বপ্নদর্শনমভিপ্রাযং জন্মামযপ্রবৃত্তিনক্ষত্রদ্বিষ্টেষ্টসুখদুঃখানি চ, ইত্যাতুরমুখাত্পরীক্ষেত|

আযুর্বেদরসাযনম্ ব্যাখ্যা ( কৃত)

আ০ র০- রোগিত্বজ্ঞানোপাযমাহ-দর্শনেতি| স চ ত্রিধা, দর্শনং স্পর্শনং প্রশ্নশ্চেতি| তত্র দর্শনেন বৈবর্ণ্যাদিকং, স্পর্শনেন শৈত্যাদিকং, প্রশ্নেন শূলাদিকং, নির্ধার্য রোগ্যযমিতি নিশ্চযঃ|

সর্বাঙ্গসুন্দরী ব্যাখ্যা ( কৃত)

স০- রোগং নিদানাদিভিঃ পঞ্চভিঃ পরীক্ষেত| নিদানং কারণং হেতুরিত্যনর্থান্তরম্| তচ্চাসন্নবিপ্রকৃষ্টভেদেন দ্বিধা| আসন্নমপি দ্বিবিধম্, আসন্নাত্যাসন্নভেদেন| আসন্নং রূক্ষলঘুশীতাদিদ্রব্যোপযোগঃ| অত্যাসন্নং তু যতঃ সমনন্তরমেব রোগোত্পত্তিঃ| যথা বাতাদযো দোষাঃ ক্রুদ্ধাঃ| বিপ্রকৃষ্টং যত্ আদিকালে রুদ্রকোপাদি জ্বরাদীনাম্| তথা হবিঃপ্রাশাদি মেহকুষ্ঠাদীনাম্| তেনৈবংবিধমর্থজাতমেবংবিধস্য রোগস্য হেতুত্বেনোপদিষ্টম্, এবংবিধশ্চোত্পন্নোঽতো নিদানাজ্ঞ্জ্ঞাযতে রোগঃ| প্রাগ্রূপং পূর্বরূপং ভবিষ্যতো ব্যাধেরপ্রকাশিতদোষবিশেষাধিষ্ঠিতস্য লক্ষণম্, উদ্বুভূষুর্জ্বরাদিরামযো বাতাদিদোষবিশেষেণালিঙ্গিতরূপাভাসো যেনাবভাস্যতে, যথাযথমল্পত্বাদ্যদব্যক্তমস্ফুটং লিঙ্গং তত্প্রাগ্রূপম্| লক্ষণং পুনস্তদেব প্রাগ্রূপাদ্বিলক্ষণম্, যেন সকলদোষবিশেষালিঙ্গিতঃ স্ফুটলিঙ্গো ব্যাধির্দৃশ্যতে লক্ষ্যতে| উপশযঃ সুখানুবন্ধ্যাহারাদ্যুপযোগঃ| এবংবিধেনাহারাদিকেন হি তস্য পীডা নাভূত্, এবংবিধেন চাভূত্, অত উপশযাজ্ঞ্জ্ঞাযতেঽযং রোগ ইতি| স ব্যাধিসাত্ম্যঃ স্বাস্থ্যহেতুঃ সুখাবহঃ| আপ্তির্নির্বৃত্তিঃ সম্প্রাপ্তিরাগতির্জাতিরিত্যনর্থান্তরম্| এবং দুষ্টেনৈবং স্থানস্থিতেনৈবমনুগতেনানযা কল্পনযৈবংমার্গেণ দোষেণেতি পরিকল্পনম্, অত আপ্ত্যা জ্ঞাযতেঽযং রোগ ইতি|

আযুর্বেদরসাযনম্ ব্যাখ্যা ( কৃত)

আ০ র০- রোগিত্বে হি জ্ঞাতে কোঽসৌ রোগ ইতি বিশেষজ্ঞানোপাযমাহ-রোগমিতি| স চ পঞ্চধা, নিদানং প্রাগ্রূপং লক্ষণম্ উপশযঃ আপ্তিশ্চ| আপ্তিঃ সম্প্রাপ্তিঃ| নিদানং বহিরঙ্গো হেতুঃ| প্রাগ্রূপং পূর্বজো রোগঃ| রোগস্য হি রাজবত্ প্রকাশমানস্য পরিবারভূতা রোগাঃ কেচিত্পূর্বং প্রকাশন্তে, কেচিত্সহ, কেচিত্পশ্চাত্| তত্র যে পূর্বং, তে পূর্বরূপম্| যে সহ, তে রূপম্| যে পশ্চাত্তে উপদ্রবাঃ| তে চোভযেঽপি লক্ষণপদেন সঙ্গৃহীতাঃ| উপশযঃ ব্যাধিসাত্ম্যম্| আপ্তিরন্তরঙ্গো হেতুঃ| ইতি রোগলক্ষণম্|

সর্বাঙ্গসুন্দরী ব্যাখ্যা ( কৃত)

স০- ইহাস্মিন্নাযুর্বেদশাস্ত্রে, আচার্যা দ্বিধা দ্বিপ্রকারং, দেশমাহুঃ কথযন্তি| ভূমিভেদেন দেহভেদেন চ|

আযুর্বেদরসাযনম্ ব্যাখ্যা ( কৃত)

আ০ র০- অথৌষধং ব্যাচষ্টে| তচ্চ দেশকালাবপেক্ষতে ইতি প্রথমং তাবদ্দেশঃ| তত্র দেশে ভেদদ্বযমাহ-ভূমিদেহেতি| তচ্চ ভূমির্দেহশ্চ| ইহেত্যাযুর্বেদশাস্ত্রে| শাস্ত্রান্তরেষু দেহস্য দেশব্যবহারাভাবাত্|

সর্বাঙ্গসুন্দরী ব্যাখ্যা ( কৃত)

স০- ভূদেশং পুনস্ত্রিধা ত্রিপ্রকারম্, আদিশেত্ বদেত্| তত্র জাঙ্গলো দেশোঽল্পোদকতরুপর্বতত্বেন বক্ষ্যমাণলক্ষণঃ, বাতভূযিষ্ঠো বাতপ্রচুরঃ| তত্র জাতা ওষধিখগপুরুষমৃগাদযো বাতপ্রধানা ভবন্তি| প্রচুরোদকবৃক্ষো যো নির্বাতো দুর্লভাতপঃ সোঽনূপ ইতি| স চ কফপ্রধানঃ| তজ্জাশ্চৌষধ্যাদযঃ স্নিগ্ধা ভবন্তি| সাধারণঃ পুনরুভযলক্ষণো মধ্যপতিতো ব্যামিশ্ররূপঃ| স চ সমমলো বাতাদিসমদোষঃ| অত্র দোষা এব মলশব্দেনোক্তাঃ| বক্ষ্যতি হি (সঙ্গ্রহে সূ.অ.২০)| "দেহস্য মলিনীকরণাদাহারমলত্বাচ্চ মলাঃ|"

আযুর্বেদরসাযনম্ ব্যাখ্যা ( কৃত)

আ০ র০- ভূদেশভেদানাহ-জাঙ্গলমিতি| তে চ ত্রযঃ, জাঙ্গলোঽনূপঃ সাধারণশ্চ| তত্র যো বাতভূযিষ্ঠো বাতরোগবহুলস্তং জাঙ্গলং, যঃ কফোল্বণঃ কফরোগবহুলস্তমনূপং, যঃ সমমলঃ সমদোষত্বাদারোগ্যবহুলস্তং সাধারণমাদিশেত্| দেহভেদাস্তু প্রকৃতিভেদৈরুক্তাঃ|

সর্বাঙ্গসুন্দরী ব্যাখ্যা ( কৃত)

স০- কালো দ্বিবিধঃ, ক্ষণাদিলক্ষণো ব্যাধ্যবস্থালক্ষণশ্চ| ভেষজস্যৌষধস্য, যোগং করোতি| তদর্থসম্পাদনসামর্থ্যং করোতীত্যর্থঃ| ভেষজস্য যোগো ভেষজযোগঃ, তং করোতি| ক্ষণাদিঃ প্রসিদ্ধঃ| আদিগ্রহণাল্লবত্রুটিমুহূর্তযামাহোরাত্রপক্ষমাসর্ত্বযনসংবত্সরাণাং পরিগ্রহঃ| ক্ষণাদিকালস্যোদাহরণম্| যথা- "পূর্বাহ্ণে বমনং দেযং মধ্যাহ্নে তু বিরেচনম্| মধ্যাহ্নে কিঞ্চিদাবৃত্তে বস্তিং দদ্যাদ্বিচক্ষণঃ||" ব্যাধ্যবস্থা সামনিরামমৃদুমধ্যতীক্ষ্ণত্বাত্তত্তদ্যোগ্যৌষধবিসৃষ্টিঃ| যথা (চ,চি.অ.৩/১৪০ , হৃ.চি.অ.১/২১)- "লঙ্ঘনং স্বেদনং কালো যবাগ্বস্তিক্তকো রসঃ| মলানাং পাচনানি স্যুর্যথাবস্থং ক্রমেণ বা||" যথা (চ.চি.অ.৩০/২৮৭)- "জ্বরে পেযাঃ কষাযাশ্চ সর্পিঃ ক্ষীরং বিরেচনম্| ত্র্যহং বা ষডহং যুংজ্যাদ্বীক্ষ্য দোষবলাবলম্||" যথা (হৃ.চি.অ.১/৪৪)- "মৃদুর্জ্বরো লঘুর্দেহশ্চলিতাশ্চ মলা যদা| অচিরজ্বরিতস্যাপি ভেষজং যোজযেত্তদা||" অস্যামবস্থাযাং দত্তমৌষধমারোগ্যায ভবতি|

আযুর্বেদরসাযনম্ ব্যাখ্যা ( কৃত)

আ০ র০- কালভেদদ্বযমাহ-ক্ষণাদিরিতি| তচ্চ ক্ষণাদিরূপো ব্যাধ্যবস্থারূপশ্চ| ক্ষণো মাত্রা, আদিশব্দাত্কাষ্ঠাকলানাডিকামুহূর্তযামাহোরাত্রপক্ষমাসর্ত্বযনবর্ষাণি| তত্রাক্ষিনিমেষো মাত্রা, তাঃ পঞ্চদশ কাষ্ঠা, তাস্ত্রিংশত্কলা, তাঃ সদশভাগা বিংশতির্নাডিকা, তে দ্বে মূহূর্তঃ, তে তুল্যরাত্রিংদিবে রাশিভাগে চত্বারঃ পাদোনা যামঃ, তৈশ্চতুর্ভিরহো রাত্রিশ্চ, পঞ্চদশাহোরাত্রাঃ পক্ষঃ, তৌ দ্বৌ মাসঃ, তৌ দ্বাবৃতুঃ, তে ত্রযোঽযনং, তে দ্বে বর্ষম্| ব্যাধ্যবস্থা আমপচ্যমানপক্বনবপুরাণতীক্ষ্ণমৃদুত্বাদযঃ| দেশকালযোরুপযোগমাহ-ভেষজযোগকৃদিতি| দেশকালবাক্যযোঃ শেষভূতোঽযং গ্রন্থঃ| যোঽযমুক্তো দেশঃ কালশ্চ| তদুভযং ভেষজস্য যোগং যোগ্যতাং করোতি| উক্তং হি সঙ্গ্রহে (সূ.অ. ২৩)- "ভেষজমবচারযন্ প্রাগেব তাবদাতুরং পরীক্ষেত| কস্মিন্নযং দেশে জাত ইত্যাদি| তস্মিংশ্চ দেশে মনুষ্যাণামিদমাহারজাতমিদং বিহারজাতমেতাবদ্বলমেবংবিধং সত্বমেবংবিধং সাত্ম্যমিযং ভক্তিরিমে ব্যাধযো হিতমিদমহিতমিদমিতি| তথা, অতিস্থূলোঽতিকৃশো দুর্বলো দুষ্টমাংসশেণিতাস্থ্যঙ্গাবযবোঽল্পাগ্নিরল্পাহারোঽসাত্ম্যাহারোঽপচিতঃ সাররহিতো বা ব্যাধিবলমেব তাবদসমর্থঃ সোঢুম্| কিং পুনস্তথাবিধো ভেষজবেগমিতি| তথা, কালশ্চ ভেষজস্য যোগ্যতামাপাদযতীত্যুপক্রম্য, শীতোষ্ণবর্ষালক্ষণা ঋতব ইত্যাদ্যুপক্রম্য, ঔষধগ্রামস্ত্বিত্যাদি| তথা, তস্মাত্সাধারণেষ্বেব তদন্তরালেষু বমনাদীনি যোজযেদিতি| তথা, আতুরাবস্থাসু তু কালাকালসংজ্ঞা| যথাঽস্যামবস্থাযামস্যৌষধস্য কালোঽকালো বা| ন হ্যপ্রাপ্তাতীতকালমৌষধং যৌগিকং ভবতি" ইতি|

সর্বাঙ্গসুন্দরী ব্যাখ্যা ( কৃত)

স০- সমাসাত্সংক্ষেপতঃ, যত্কিঞ্চিজ্জগত্যৌষধং সম্ভবতি, তদনেকপ্রকারং সম্ভবদপি দ্বৈরূপ্যানতিক্রমাচ্ছোধনশমনলক্ষণাত্ দ্বিধেত্যুক্তম্| একং শোধনরূপমপরং শমনরূপমিতি| শোধনং যত্ কুপিতান্ দোষান্ বহির্নিঃসার্য রোগোপশমনং করোতি| শমনং যত্স্বস্থানস্থিতানামেব সাম্যহেতুঃ|

আযুর্বেদরসাযনম্ ব্যাখ্যা ( কৃত)

আ০ র০- ঔষধভেদদ্বযমাহ-শোধনমিতি| তচ্চ শোধনং শমনং চ| সমাসত ইত্যনুবর্তমানেঽপি পুনঃ সমাসগ্রহণমতিসংক্ষেপায| সামান্যোক্ত্যা বিশেষসঙ্গ্রহঃ সংক্ষেপঃ| লঙ্ঘনবৃংহণে সামান্যে বিহায লঙ্ঘনবিশেষযোঃ শোধনশমনযোরুক্তিরিত্যতিসংক্ষেপঃ| স চ বৃংহণস্য শমনেঽন্তর্ভাবং মত্বা কৃতঃ| বক্ষ্যতি হি (সূ.অ. ১৪/৭)- "বৃংহণং শমনং ত্বেব বাযোঃ পিত্তানিলস্য চ|" ইতি| শোধনং অধিকবহির্নিরসনেন দোষসাম্যকরম্| শমনং ত্বধিকক্ষীণক্ষপণবর্ধনাভ্যাম্| অতএবাত্যধিকে দোষে শোধনম্, অধিকক্ষীণযোঃ শমনমিতি বিভাগঃ সিদ্ধঃ|

সর্বাঙ্গসুন্দরী ব্যাখ্যা ( কৃত)

স০- শরীরজানাং বাতাদীনাং, ক্রমেণ যথাসংখ্যেন পরিপাঠ্যোদ্দেশনির্দেশেন, পরমৌষধং প্রধানৌষধং, বস্ত্যাদিবমনান্তং শোধনরূপং, তৈলাদিমধ্বন্তং শমনরূপম্| তেন বাতস্য বস্তির্গুদপ্রণিধেযস্নেহক্বাথাদি পরমৌষধম্| পিত্তস্য বিরেকো মুখপীতং গুদমার্গেণান্তঃস্থিতস্য দোষস্য নিঃসারণং পরমৌষধম্| কফস্য বমনং মুখেন পীতং তেনৈব দোষস্য নিঃসারণং পরমৌষধম্| ইতি শোধনরূপেণ দোষাণামৌষধম্| তৈলাদি তু শমনস্বরূপেণৌষধম্| তথেতি ক্রমেণৈব| বাতস্য তৈলং, পিত্তস্য ঘৃতং, কফস্য মাক্ষিকং পরমৌষধম্| প্রধানমৌষধমিতি যাবত্|

আযুর্বেদরসাযনম্ ব্যাখ্যা ( কৃত)

আ০ র০- শোধনশমনবিশেষাণাং বিষযবিভাগমাহ-শরীরজানামিতি| তত্র শোধনবিশেষা বস্ত্যাদযঃ ক্রমেণ দোষাণামৌষধম্| বাতস্য বস্তিঃ, পিত্তস্য বিরেকঃ, কফস্য বমনম্| তথা শমনবিশেষাস্তৈলাদযঃ| বাতস্য তৈলং, পিত্তস্য ঘৃতং, কফস্য মধু| কিং সর্বেষাং, নেত্যাহ-শরীরজানাং, শরীরে জাতাঃ দ্বিতীযং রোগাখ্যং জন্ম প্রাপ্তাঃ শরীরজাঃ শরীরাশ্রিতাস্তেষাম্| কথং, পরমতিশযেন| এতদুক্তং ভবতি| সর্বেষাং দোষাণাং বস্তিরৌষধং বিশেষাদ্বাতস্য| সর্বাণি শোধনানি বাতস্যৌষধং বিশেষাদ্বস্তিঃ| তথা মনঃশরীরাশ্রযাণাং দোষাণাং বস্তিরৌষধং বিশেষাচ্ছরীরাশ্রযাণাম্| এবং বিরেকাদিষু বাচ্যম্|

সর্বাঙ্গসুন্দরী ব্যাখ্যা ( কৃত)

স০- মনোদোষযো রজস্তমসোঃ, রোগবিঘ্নকারি ধীধৈর্যাদিকং, পরমৌষধম্| ধীশ্চ ধৈর্যং চাত্মাদিবিজ্ঞানং চ তত্তথাবিধম্| তত্র ধীর্বুদ্ধির্বাহ্যাধ্যাত্মিকানাং ভাবানাং হিতাহিতপরিচ্ছেদবিভাগকারিণী| ধৈর্যং ধৃতিশ্চেতসঃ স্থিরত্বমচাপলম্, যেন প্রতিষিদ্ধেষু ন প্রবর্ততে, হিতেষু চ ন সীদতি| আত্মবিজ্ঞানং যোগাভ্যাসসমাধিনা পরমাত্মস্বরূপবিজ্ঞানম্| আদিগ্রহণাজ্জ্ঞানবিজ্ঞানস্মৃতিদেশকালাদীনাং পরিগ্রহঃ| মনোদোষসমুত্থকামাদিজরোগার্থঃ পরশব্দো বিশেষণত্বেন নির্দিষ্টঃ|

আযুর্বেদরসাযনম্ ব্যাখ্যা ( কৃত)

আ০ র০- অমূর্তস্য শমনস্য বিষযমাহ-ধীতি| তচ্চ ধীপ্রভৃতি| ধীর্বুদ্ধিঃ, যযা হিতাহিতবিবেকঃ| ধৈর্যং দুঃখসহত্বং, যেন হিতসেবনমহিতত্যাগঃ| আত্মাদিবিজ্ঞানং আত্মাদযঃ আত্মদেশকালাস্তেষাং বিজ্ঞানমীদৃশোঽহমীদৃশে দেশে ঈদৃশে কালে ব্যবহরামীতি জ্ঞানং, যেন হিতসেবনস্যাবিচ্ছেদঃ| এতত্সর্বং মনোদোষৌষধং হৃদযাশ্রযাণাং বাতাদীনামৌষধং পরং, সর্বমেব মনোদোষাণামৌষধং বিশেষাদ্ধীপ্রভৃতি| তথা মনঃশরীরাধিষ্ঠিতানাং দোষাণাং ধীপ্রভৃত্যৌষধং বিশেষান্মনোধিষ্ঠিতানামিত্যর্থঃ| ইতি রোগৌষধম্|

সর্বাঙ্গসুন্দরী ব্যাখ্যা ( কৃত)

স০- চিকিত্সিতস্য রোগোপশমলক্ষণস্য, পাদচতুষ্টযমঙ্গচতুষ্টযমুক্তম্| প্রত্যেকং তচ্চতুর্গুণমেবং ষোডশগুণং চিকিত্সিতং ভেষজং ভিষজো ভাষন্তে| ভিষগ্বৈদ্যঃ, তস্য প্রাধান্যাদগ্রে নির্দেশঃ| তথা চাগমঃ (চরকে সূ.অ.৯/১০)- "যোক্তা প্রযোক্তা শাস্তা চ প্রধানো ভিষগত্র তু||" তথা সঙ্গ্রহেঽপি (সূ.অ.২)- "যদ্বৈদ্যে বিগুণে পাদা গুণবন্তোঽপ্যনর্থকাঃ| স পাদহীনানপ্যার্তান্ গুণবান্ যচ্চ যাপযেত্|| চিকিত্সাযাস্তমেবাতঃ প্রধানং কারণং বিদুঃ|" দ্রব্যাণ্যৌষধানি| উপস্থাতা পরিচারকঃ| রোগী আতুরঃ| এতত্পাদচতুষ্টযং নির্দিষ্টমাচার্যেণ|

আযুর্বেদরসাযনম্ ব্যাখ্যা ( কৃত)

আ০ র০- ঔষধপাদানাহ-ভিষগিতি| তে চ চত্বারঃ, ভিষগ্দ্রব্যমুপস্থাতা রোগী চেতি| উপস্থাতা পরিচারকঃ| চিকিত্সিতস্যৌষধস্য| পাদত্বং চৈষাং ক্রিযানিষ্পাদকাবযবত্বাত্| পাদান্বিশিনিষ্টি-প্রত্যেকমিতি| তত্পাদচতুষ্টযং, প্রত্যেকং চ তুর্গুণং জ্ঞেযম্| তত্তদ্গুণবতামেবৈষাং পাদত্বমিত্যর্থঃ|

সর্বাঙ্গসুন্দরী ব্যাখ্যা ( কৃত)

স০- দক্ষঃ- কর্মণি চতুরঃ| তীর্থাদুপাধ্যাযাদ্বিদিতাগমাদাত্তো গৃহীতঃ শাস্ত্রার্থো যেন স তীর্থাত্তশাস্ত্রার্থঃ, "অনেকমন্যপদার্থে" ইতি তৃতীযার্থে বহুব্রীহিঃ, আগমপ্রাপ্তশাস্ত্রস্বরূপঃ| বহুশো দৃষ্টং কর্ম যেন চিকিত্সালক্ষণং স দৃষ্টকর্মা-অভ্যস্তকর্মা শতশশ্চিকিত্সিতরোগঃ| শুচিঃ- কাযবাঙ্মনোব্যাপারৈর্মলীমসৈরপরামৃষ্টঃ, অলিপ্সাবান্ অর্থোপজীবিকাহেতোর্ন করোতি পরং ধর্মোপার্জনেনেতি শুচিঃ|

আযুর্বেদরসাযনম্ ব্যাখ্যা ( কৃত)

আ০ র০- তত্র ভিষগ্গুণানাহ-দক্ষ ইতি| দক্ষঃ-শীঘ্রকারী| তীর্থাত্তশাস্ত্রার্থো-গুরোর্গৃহীতাযুর্বেদার্থঃ| তীর্থং-গুরুঃ| দৃষ্টকর্মা-বহুধাঽনুষ্ঠিতশাস্ত্রার্থঃ| শুচির্মনোবাক্কাযৈঃ শুদ্ধঃ| সঙ্গ্রহে তু (সূ. অ. ২)- "অভেদ্যোঽনুদ্ধতোঽস্তম্ব্ধঃ সূরতঃ প্রিযদর্শনঃ| সূরতঃ-কারুণিকঃ| বহুশ্রুতঃ কালবেদী জ্ঞাতগ্রন্থোঽর্থকর্মবিত্|| অনাথান্ রোগিণো যশ্চ পুত্রবত্সমুপাচরেত্| গুরুণা সমনুজ্ঞাতঃ স ভিষক্শব্দমশ্নুতে|| যস্তু কেবলশাস্ত্রজ্ঞঃ কর্মস্বপরিষ্ঠিতঃ| স মুহ্যত্যাতুরং প্রাপ্য প্রাপ্য ভীরুরিবাহবম্|| যঃ পুনঃ কুরুতে কর্ম ধার্ষ্ট্যাচ্ছাস্রার্থবর্জিতঃ| স সত্সু গর্হামাপ্নোতি বধং চেচ্ছতি রাজতঃ|| হেতৌ লিঙ্গে প্রশমনে রোগাণামপুনর্ভবে| জ্ঞানং চতুর্বিধং যস্য স রাজার্হো ভিষগ্বরঃ|| শাস্ত্রং শস্ত্রাণি সলিলং গুণদোষপ্রবৃত্তযে| পাত্রাপেক্ষীণ্যতঃ প্রজ্ঞাং বাহুশ্রুত্যেন বৃংহযেত্|| প্রদীপভূতং শাস্ত্রং হি দর্শনং বিপুলা মতিঃ| তাভ্যামতঃ সুযুক্তাভ্যাং চিকিত্সন্নাপরাধ্যতি|| আহূত এব যো যাতি সুবেষঃ সুনিমিত্ততঃ| গত্বাঽঽতুরার্থাদন্যত্র ন নিধত্তে মনঃ ক্বচিত্|| ব্যাধিং পরীক্ষতে সম্যঙ্নিদানাদিবিশেষতঃ| হ্নেপণীযাং চ তদ্বার্তাং ন প্রকাশযতে বহিঃ|| সহসা ন চ তস্যাপি ক্রিযাকালমহাপযন্| জানাতি চোপচরিতুং স বৈদ্যঃ সিদ্ধিমশ্র্নুতে|| নাদদীতামিষং স্ত্রীভ্যস্তদধ্যক্ষে পরাঙ্মুখে| তাভিশ্চ রহসি স্থানং পরিহাসাং চ বর্জযেত্|| জিজীবিষুর্ব্যাধিতোঽপি পূর্বোক্তগুণবর্জিতান্| ক্রিযাবিক্রযিণো বৈদ্যান্ মৃত্যোরগ্রেসরা হি তে|| যদ্বৈদ্যে বিগুণে পাদা গুণবন্তোঽপ্যনর্থকাঃ| স পাদহীনানপ্যার্তান্ গুণবান্ যচ্চ যাপযেত্|| চিকিত্সাযাস্তমেবাতঃ প্রধানং কারণং বিদুঃ| ব্যাধিং পুরা পরীক্ষ্যৈবমারভেত ততঃ ক্রিযাম্|| স্বার্থবিদ্যাযশোহানিমন্যথা ধ্রুবমাপ্নুযাত্| সাধ্যযোরপি সংযোগো বলিনোর্যাত্যসাধ্যতম্|| বিদ্যাদসাধ্যমেবাতঃ সাধ্যাসাধ্যসমাগমম্| নাসাধ্যঃ সাধ্যতাং যাতি, সাধ্যো যাতি ত্বসাধ্যতাম্|| পাদাপচারাদ্দৈবাদ্বা যাত্যবস্থান্তরং গদঃ| বরমাশীবিষবিষং দীপ্তমগ্নিমযোঽপি বা|| উপযুঞ্জীত ন ত্বার্তাদামিষং কৃপণাজ্জনাত্| পরো ভূতদযা ধর্ম ইত্যার্তেষু ভিষগ্বরঃ|| বর্ততে যঃ সুসিদ্ধার্থঃ স সর্বমতিবর্ততে" ইতি|

সর্বাঙ্গসুন্দরী ব্যাখ্যা ( কৃত)

স০- বহবঃ কল্পাঃ যস্মিন্ সম্ভবন্তি স্বরসক্বাথচূর্ণাদ্যাস্তদ্বহুকল্পং-ব্যাধীনাং নিবারণক্ষমং ন তু লবণবদেককল্পম্| তদ্ধি সুখমুপযুজ্যতে| নানাশক্তযো হি সত্ত্বাঃ| বহবো গুণা যস্য গুরুমন্দাদযস্তদ্বহুগুণম্, অথবা যদনেকরোগবিনাশনসমর্থম্| সম্পন্নং-সম্পত্তিযুক্তং, ন বিপন্নম্, প্রশস্তভূমিদেশজাতাদিগুণযুক্তম্| তথা চ গ্রন্থঃ (হৃদযে ক.অ.১/১)- "ধন্বে সাধারণে দেশে সমে সন্মৃত্তিকে শুচৌ| শ্মশানচৈত্যাযতনশ্বভ্রবল্মীকবর্জিতে|" ইতি| অথবা পাকসংস্কারাদিযুক্তম্| যোগ্যং-দাতুং যদ্যত্রার্হতি তচ্চ তত্র যোগ্যম্| ব্যাধিদেশকালদোষদূষ্যদেহবযোবলাদীন্ জ্ঞাত্বা, যুজ্যতে দীযত ইতি তদ্যোগ্যং, রোগস্য রোগিণশ্চ|

আযুর্বেদরসাযনম্ ব্যাখ্যা ( কৃত)

আ০ র০- দ্রব্যগুণানাহ-বহুকল্পমিতি| বহবঃ কল্পাঃ স্বরসাদযো যস্য তদ্বহুকল্পম্| বহবো গুণাঃ গুরুমন্দাদযো যস্য তদ্বহুগুণম্| রসাদিসম্পত্ত্যা যদ্যুক্তং তত্সম্পন্নম্| দেশকালাদ্যুচিতং যোগ্যম্| ঔষধমত্র দ্রব্যং, চিকিত্সিতরূপস্যৌষধস্যাঙ্গত্বাযোগাত্|

সর্বাঙ্গসুন্দরী ব্যাখ্যা ( কৃত)

স০- অনুরক্তো-দৃঢভক্ত আতুরস্য| শুচিঃ- কাযবাঙ্মনোব্যাপারৈর্দুষ্টৈরপরামৃষ্টঃ| দক্ষঃ- সর্বচেষ্টাসু চতুরঃ| বুদ্ধিমান্- বিশিষ্টযা বুদ্ধ্যা যুক্তঃ, প্রবীণ ইতি যাবত্|

আযুর্বেদরসাযনম্ ব্যাখ্যা ( কৃত)

আ০ র০- পরিচারকগুণানাহ-অনুরক্ত ইতি| অনুরক্তঃস্নেহলঃ| শুচিদক্ষৌ বৈদ্যবত্| বুদ্ধিমান্-প্রাজ্ঞঃ|

সর্বাঙ্গসুন্দরী ব্যাখ্যা ( কৃত)

স০- আঢ্যো-ধনবান্| ভিষগ্বশ্যো-বৈদ্যাযত্তঃ, তদুক্তকারী| জ্ঞাপকো-নিদানাবস্থাদীনামাবেদকঃ, বৈদ্যং রোগাহারবিহারাদীনামন্বযব্যতিরেকং বোধযিতুং সমর্থঃ| সত্ত্ববান্-ধৈর্যযুতো মোহবর্জিতঃ, ধৈর্যেণ প্রাযশ্চিত্তবচ্চিকিত্সাং করোতি| অপি সমুচ্চযে|

আযুর্বেদরসাযনম্ ব্যাখ্যা ( কৃত)

আ০ র০-রোগিগুণানাহ-আঢ্য ইতি| আঢ্যো-ধনবান্| ভিষগ্বশ্যো-বৈদ্যাধীনঃ| জ্ঞাপকঃ-স্বানুভূযমানরোগাবস্থানিরূপণসমর্থঃ| সত্ত্ববান্-রোগৌষধক্লেশসহঃ| ইতি ভিষগাদিপাদচতুষ্টযম্|

সর্বাঙ্গসুন্দরী ব্যাখ্যা ( কৃত)

স০- সর্বৌষধক্ষমে দেহ উত্পন্নো ব্যাধিঃ সুখসাধ্যঃ সুখোপাযঃ, তথা কালেনাল্পেন সাধ্যতে| সর্বাণ্যৌষধানি যঃ ক্ষমতে সহতে তীক্ষ্ণ্মধ্যমৃদুরূপাণি নানাদেশজানি শমনানি তথা শোধনরূপাণি তথা বিষক্ষারাদীনি| যূনঃ- বযস্যস্য, তরুণস্যেত্যর্থঃ| পুংসো- ন স্ত্রিযাঃ| পুংগ্রহণং স্ত্রীনিবৃত্ত্যর্থম্| যতস্তস্যাঃ সর্বদা ভীরুত্বমবুদ্ধিমত্ত্বং চ, অতো যথোক্তানুরূপগুণাভাবঃ| সা তু যস্মাত্তীক্ষ্ণোষ্ণৌষধানি ন সহতে, সৌকুমার্যাদিযোগাত্| জিতাত্মনোঽলোলুপস্য, জিত আত্মা যেন, বিষযাভিলাষং পরিহরতঃ| অমর্মগো- ন মর্মস্থঃ, মর্মাণি- শিরোহৃদযবস্তিপ্রভৃতীনি, তেষু গচ্ছতীতি মর্মগঃ, ন মর্মগোঽমর্মগঃ, হৃত্কণ্ঠাদিপীডাকরণাসমর্থঃ| অল্পহেত্বগ্ররূপরূপ ইতি| হেতুশ্চাগ্ররূপং চ রূপং চ তানি হেত্বগ্ররূপরূপাণি, অল্পানি হেত্বগ্ররূপরূপাণি যস্য স তথাবিধঃ| হেতুর্নিদানম্, অগ্ররূপং- পূর্বরূপম্, রূপং- লক্ষণম্, এতান্যল্পানি যস্য| অনুপদ্রব ইতি| ন বিদ্যতে উপদ্রবো যস্য, উত্পন্নস্য ব্যাধেরনন্তরং জাযতে যোঽন্যো ব্যাধিঃ, ন তল্লক্ষণভূতোঽপ্রধানঃ, ন যথাস্বলক্ষণঃ, তদুপক্রমনিরোধকঃ, স উপদ্রবঃ| তথা চাগমঃ- "ব্যাধেরুপরি যো ব্যাধির্ভবত্যুত্তরকালজঃ| উপক্রমবিঘাতী চ স হ্যুপদ্রব উচ্যতে||" ইতি| অতুল্যদূষ্যদেশর্তুপ্রকৃতিরিতি| দূষ্যশ্চ দেশশ্চ ঋতুশ্চ প্রকৃতিশ্চ তা দূষ্যদেশর্তুপ্রকৃতযঃ, অতুল্যা দূষ্যদেশর্তুপ্রকৃতযো যস্য| অতুল্যাঃ- ন সদৃশাঃ| যথা- দূষ্যে মেদোমজ্জাদৌ, অনূপদেশে, শীতর্তৌ, আতুরো বাতপ্রকৃতিঃ, তস্য কুপিতং পিত্তং সুখসাধ্যমিতি| অতুল্যদূষ্যো যথা- শ্লেষ্মণা শীতেন রক্তমুষ্ণং দূষিতম্| অতুল্যদেশো ব্যাধির্যথা- অনূপদেশে পিত্তসম্ভূতঃ| অতুল্যর্তুর্যথা- শরদি কফোদ্ভবঃ| অতুল্যপ্রকৃতির্যথা- পিত্তপ্রকৃতেঃ শ্লেষ্মোদ্ভবো ব্যাধিঃ| নন্বতুল্যদূষ্যদেশর্তুপ্রকৃতিত্বাদসৌ কৃচ্ছ্রসাধ্যো যাপ্যো বা প্রাপ্তঃ, ন সুখসাধ্যঃ, অনেকসুখোপক্রমসাধ্যত্বাত্| যতো দূষ্যাদীনামতুল্যত্বাত্পরস্পরমন্য এবোপক্রমঃ| একসুখোপক্রমঃ সুখসাধ্যো ব্যাধিঃ| অত এব সাধ্যযাপ্যপরিত্যাজ্যা মেহাঃ শ্লেষ্মপিত্তবাতোত্থাঃ (হৃংই.অ.১০/৬)- "সমাসমক্রিযতযা মহাত্যযতযাপি চ" ইত্যেবং নির্দিশতি| অত্রোচ্যতে| তথাপ্রভাবত্বাত্প্রমেহাখ্যস্য ব্যাধেঃ, যদুত শ্লেষ্মপ্রমেহঃ সমক্রিযত্বাত্সাধ্যঃ, পিত্তপ্রমেহো বিষমক্রিযত্বাদ্যাপ্যঃ, মহাত্যযত্বাচ্চ বাতপ্রমেহঃ প্রত্যাখ্যেযঃ| কিঞ্চ তুল্যদূষ্যদেশর্তুপ্রকৃতিত্বান্মহারম্ভো নিষ্প্রত্যনীকো ব্যাধির্জাযতে, অতোঽসৌ ন সুখসাধ্যঃ| কুত্রচিদ্ব্যাধৌ তুল্যদূষ্যাদিরপি সুখসাধ্যত্বেন জ্যাযান্| তথা চ গ্রন্থঃ- "জ্বরে তুল্যর্তুদোষত্বং প্রমেহে তুল্যদূষ্যতা| রক্তগুল্মে পুরাণত্বং সুখসাধ্যত্বহেতবঃ||" পাদসম্পদীতি| ভিষগাদীনাং চতুর্ণাং পাদানাং সম্পত্সমৃদ্ধিঃ, তস্যাং সত্যাং, অঙ্গচতুষ্টযে পরিপূর্ণে সতি| গ্রহেষ্বনুগুণেষ্বিতি| গ্রহাঃ- সূর্যাদযঃ, তেষ্বনুগুণেষ্বনুকূলরাশিস্থিতেষু শোভনস্থানগতেষু সত্সু| একদোষমার্গ ইতি| দোষশ্চ মার্গশ্চ দোষমার্গম্, একং দোষমার্গং যস্য স তথোক্তঃ| দোষো- বাতাদিঃ| মার্গস্ত্রিবিধঃ শাখাদির্বক্ষ্যমাণো বাহ্যাভ্যন্তরমধ্যভেদেন| তেনৈকেন বাতাদীনামন্যতমেন দোষেণ যো জাতো ন দ্বাভ্যাং ত্রিভির্বা, তথৈকেনাপি মার্গেণ বাহ্যেন মধ্যেনাভ্যন্তরেণ বা জাতঃ| নবো- ন জরঠঃ, অচিরোত্পন্ন ইত্যর্থঃ| যস্মাদ্বত্সরাতীতা ব্যাধযোঽসাধ্যাঃ| স তথাবিধো ব্যাধিঃ সুখঃ- সুখেন সাধ্যতে| তথা চ গ্রন্থঃ (সং.সূ.অ.২, চংই.অ.৮)- "সুখসাধ্যঃ সুখোপাযঃ কালেনাল্পেন সাধ্যতে" ইতি|

আযুর্বেদরসাযনম্ ব্যাখ্যা ( কৃত)

আ০ র০-উক্তমৌষধমসাধ্যে ব্যাধৌ নিষেদ্ধুং সাধ্যযাপ্যাসাধ্যবিবেকং করোতি| তত্র সাধ্যো দ্বিবিধঃ, সুখঃ কৃচ্ছ্রশ্চ| তত্র সুখসাধ্যং লক্ষযতি-সর্বৌষধেতি| সর্বৌষধক্ষমদেহত্বাদ্যেকোনবিংশতিলক্ষণো রোগঃ সুখঃ-সুখসাধ্যঃ| তানি চ লক্ষণানি বিপর্যযাত্যন্তাবিপর্যযাভ্যাং সহ লিখ্যন্তে, কৃচ্ছ্রাদিষূপযোগাত্| সবৌষধক্ষমদেহজত্বং, কতিপযৌষধক্ষমদেহজত্বং, ঔষধমাত্রাক্ষমদেহজত্বম্| ১| যুবজত্বং, বালবৃদ্ধজত্বং, অতিবালতিবৃদ্ধজত্বম্| ২| পুংজত্বং, স্ত্রীনপুংসকজত্বং, গর্ভিণীসূতিকাস্ত্রীলক্ষণনপুংসকজত্বম্| ৩| বিষযানাসক্তেন্দ্রিযজত্বং, বিষযাসক্তেন্দ্রিযজত্বং, অসদ্বিষযাসক্তেন্দ্রিযজত্বম্| ৪| অমর্মগত্বং, মর্মগত্বং, প্রাণহরমর্মগত্বম্| ৫| অল্পনিদানত্বং, বহুনিদানত্বং, যাবদুক্তনিদানত্বম্| ৬| অল্পসম্প্রাপ্তিত্বং, বহুসম্প্রাপ্তিত্বং, যাবদুক্তসম্প্রাপ্তিত্বম্| ৭| হেতুর্নিদানং সম্প্রাপ্তিশ্চ| অল্পপূর্বরূপত্বং, বহুপূর্বরূপত্বং, যাবদুক্তপূর্বরূপত্বম্| ৮| অল্পরূপত্বং, বহুরূপত্বং, যাবদুক্তরূপত্বম্| ৯| অনুপদ্গবত্বং, সোপদ্রবত্বং, যাবদুক্তোপদ্রবত্বম্| ১০| উত্পাদকদোষাপেক্ষ্যা বিপরীতদূষ্যত্বং, যথা-পিত্তজে রসগত্বম্| তুল্যদূষ্যত্বং, যথা-পিত্তজে রক্তগত্বম্| তুল্যানেকদূষ্যত্বং, যথা-পিত্তজে রক্তস্বেদগত্বম্| ১১| বিপরীতদেশত্বং, যথা-কফজে জাংগলত্বম্| তুল্যদেশত্বং, যথা-কফজেঽনূপগত্বম্| তুল্যদেশজন্মগত্বং, যথা-কফজে জন্মপ্রভৃতিসেবিতানূপগত্বম্| ১২| অতুল্যর্তুত্বং, যথা-বাতজে শারদত্বম্| তুল্যর্তুত্বং, যথা-বাতজে গ্রীষ্মত্বম্| তুল্যপ্রকোপর্তুত্বং, যথা-বাতজে বার্ষিকত্বম্| ১৩| বিপরীতপ্রকৃতিত্বং, যথা-পিত্তজে কফপ্রকৃতিত্বম্| তুল্যপ্রকৃতিত্বং, যথা-পিত্তজে পিত্তপ্রকৃতিত্বম্| তুল্যনিন্দ্যপ্রকৃতিত্বং, যথা-পিত্তজে বাতপিত্তপ্রকৃতিত্বম্| বাতস্য যোগবাহিত্বাত্| ১৪| পাদসম্পদ্ভাবত্বং, পাদবিকৃতত্বং, সর্বপাদবিকৃতত্বম্| ১৫| অনুকূলগ্রহত্বং, প্রতিকূলগ্রহত্বং, প্রতিকূলসর্বগ্রহত্বম্| ১৬| একদোষত্বং, দ্বিদোষত্বং, সর্বদোষত্বম্| ১৭| একমার্গত্বং, অনেকমার্গত্বং, সর্বমার্গত্বম্| ১৮| অনতিক্রান্তবত্সরত্বং, অতিক্রান্তবত্সরত্বং, বহ্বতিক্রান্তবত্সরত্বম্| ১৯|

সর্বাঙ্গসুন্দরী ব্যাখ্যা ( কৃত)

স০- যো গদো রোগঃ, শস্ত্রাদিসাধনঃ শস্ত্রাদিভিঃ সাধ্যতে, স কৃচ্ছ্রসাধ্যঃ কৃচ্ছ্রপ্রতীকারো মহদ্ভিরুপাযৈঃ সাধ্যতে তথা চিরেণ| তথা চ গ্রন্থঃ (সং.সূ.অ.২)- "কৃচ্ছ্রৈরুপাযৈঃ কৃচ্ছ্রস্তু মহদ্ভিশ্চ চিরেণ চ||" আদিগ্রহণেন ক্ষারাগ্নিকর্মবিষলেপাদযো গৃহ্যন্তে| তথা, সঙ্করে চ- ততঃ পূর্বোক্তাত্সাধ্যলিঙ্গাত্সঙ্কীর্ণত্বে সতি- যো গদ উপ্তন্নঃ, সোঽপি কৃচ্ছ্রসাধ্যঃ| চশব্দঃ সমুচ্চযে| ততস্তস্মাদুক্তসাধ্যলক্ষণাদ্যঃ সঙ্করে দ্বিত্রিবিপর্যযে সতি স্থিতঃ| তথা চ- যুবা আতুরঃ কিন্তু ন বিজিতাত্মা| বিজিতাত্মা বা কিন্তু রোগো মর্মস্থানগঃ| সর্বৌষধক্ষমে দেহে জাতঃ কিন্তু বৃদ্ধঃ| কদাচিদ্যুবা ন সর্বৌষধক্ষমো দেহঃ| এবমনযা দিশা সর্বমপ্যূহ্যম্|

আযুর্বেদরসাযনম্ ব্যাখ্যা ( কৃত)

আ০ র০- কৃচ্ছ্রসাধ্যং লক্ষযতি-শস্ত্রাদীতি| যো গদঃ শস্ত্রাদিসাধনঃ, স কৃচ্ছ্রঃ-কৃচ্ছ্রসাধ্যঃ| যশ্চ গদস্ততস্তেভ্যঃ সুখসাধ্যলক্ষণেভ্যো জাতে সঙ্করে স্থিতঃ, সোঽপি কৃচ্ছ্রঃ| সুখসাধ্যলক্ষণস্য তদ্বিপর্যযেণ সহৈকত্রাবস্থানং সঙ্করঃ| যথা-যুবজত্বস্য স্ত্রীজত্বেন| বালজত্বস্য বৃদ্ধজত্বেন তু সহানবস্থানান্ন সঙ্করঃ| এবং সর্বত্র| অস্য চ সঙ্করত্রৈবিধ্যাত্ত্রৈবিধ্যম্| অল্পবিপর্যযে সঙ্করে কৃচ্ছ্রঃ, তুল্যবিপর্যযে কৃচ্ছ্রতরঃ, বহুবিপর্যযে কৃচ্ছ্রতমঃ| তথা, শস্ত্রক্ষারাগ্নিসাধনত্বাত্ত্রৈবিধ্যম্| এতেষাং ষণ্ণাং সঙ্করে তারতম্যং স্বযমূহ্যম্|

সর্বাঙ্গসুন্দরী ব্যাখ্যা ( কৃত)

স০- বাহুল্যেন বিপর্যযে সাধ্যলক্ষণবিপরীতত্বে সত্যাযুষো জীবিতস্য শেষত্বাদক্ষীণত্বান্মারযিতুমসমর্থঃ, পথ্যৈরাহারবিহারৈর্যাপ্যো যাপনীযঃ, নাসৌ প্রত্যাখ্যেযঃ| এতাবানেবাস্য প্রত্যাখ্যেযাদ্ব্যাধের্বিশেষো যদাযুঃশেষত্বং, যাপ্যস্য ব্যাধেরাযুঃশেষমাত্রং বর্জযিত্বা যদন্যত্তত্সর্বং সমানং প্রাযেণাস্য চ প্রত্যাখ্যেযস্য ব্যাধেঃ| কস্য বিপর্যযে সতি ? প্রকৃতত্বাত্সুখসাধ্যস্য| পথ্যৈরাহারবিহারৈরভ্যসনমভ্যাসঃ পুনঃ পুনঃ করণম্, তস্মাদ্ধিতাহারবিহারসেবনাদ্যাপ্যঃ| স চ চিকিত্সাযামল্পং সুখং দত্ত্বা পুনঃ সোঽল্পেনৈব হেতুনা প্রতন্যতে| তথা চ গ্রন্থঃ (সং.সূ.অ.২)- "দত্ত্বাল্পং সুখমল্পেন হেতুনা স প্রতন্যতে| যাতি নাশেষতাং রোগঃ কর্মজো নিযতাযুষঃ| প্রপতন্নিব বিষ্কম্ভৈর্ধার্যতেঽত্রাতুরো হিতৈঃ"|

আযুর্বেদরসাযনম্ ব্যাখ্যা ( কৃত)

আ০ র০- যাপ্যং লক্ষত্বাদিতি| তত ইত্যনুবর্ততে| যো গদঃ সুখসাধ্যলক্ষণবিপর্যযে স্থিতঃ, স যাপ্যঃ| নন্বৌষধৈর্নিবর্ততে চেত্সাধ্যত্বং, নো চেদসাধ্যত্বং, কিমিদং তৃতীযং যাপ্যত্বং নামেত্যত আহ-পথ্যাভ্যাসাত্ শেষত্বাত্, পথ্যস্যৌষধস্যাভ্যাসো নিত্যসেবনং, তস্মাদ্যচ্ছেষত্বং ততো যাপ্যঃ| শিষ্যতে নিবর্তমানোঽপি কাত্স্ন্র্যেন ন নিবর্তত ইতি শেষঃ| স চ নিঃশেষানিবর্তনান্ন সাধ্য এব, কিঞ্চিন্নিবর্তনান্নাসাধ্য এব, কিন্তু সাধ্যাসাধ্যো যাপ্যাখ্যঃ| স চ কিযন্তং কালং যাপ্য ইত্যাহ-আ আযুষঃ, যাবদাযুরস্তি তাবদ্যাপ্যঃ| উক্তং হি সঙ্গ্রহে (সূ. অ. ২)- "দত্ত্বাল্পং সুখমল্পেন হেতুনা স প্রতন্যতে| যাতি নাশেষতাং রোগঃ কর্মজো নিযতাযুষঃ|| প্রপতন্নিব বিষ্কম্ভৈর্ধার্যতেঽত্রাতুরো হিতৈঃ" ইতি|

সর্বাঙ্গসুন্দরী ব্যাখ্যা ( কৃত)

স০- ন বিদ্যত উপক্রমঃ প্রতীকারো যস্য সোঽনুপক্রমোঽচিকিত্স্যঃ, প্রত্যাখ্যেয ইতি যাবত্| কোঽসাবনুপক্রমঃ ? যোঽত্যন্তবিপর্যযে স্থিতঃ| যো গদোঽর্থাদ্যাপ্যলক্ষণাদবশিষ্টাযুঃ শেষরূপাদত্যন্তবিপর্যযে স্থিতঃ, সর্বক্রিযাপথাতিক্রান্তঃ, মজ্জশুক্রাদিগম্ভীরধাতুগতঃ, মর্মসন্ধিসমাশ্রিতঃ, সোঽনুপক্রম এবাচিকিত্স্যঃ, সাধযিতুমশক্যত্বাত্| তথৌত্সুক্যাদিকৃদিতি| ঔত্সুক্যং চ মোহশ্চারতিশ্চ তাঃ করোতীত্যৌত্সুক্যমোহারতিকৃত্| ঔত্সুক্যং বিষযোত্কণ্ঠা, মোহো- বৈচিত্যং চিত্তনাশোঽজ্ঞানম্, অরতিরসুখং ন কুত্রচিদবস্থিতিঃ স্থানাসনাদিষ্বনির্বৃতিশ্চেতসঃ, এতাবতো যঃ করোতি সোঽনুপক্রমঃ| তথা দৃষ্টরিষ্ট ইতি| দৃষ্টং রিষ্টং মরণখ্যাপকং চিহ্নং যস্মিন্ স দৃষ্টরিষ্টঃ, দৃষ্টমরণখ্যাপকলক্ষণোঽনুপক্রম এব| তথাঽক্ষনাশন ইতি| অক্ষাণীন্দ্রিযাণ্যুচ্যন্তে| চক্ষুরাদীন্যপি নাশযতি সোঽক্ষনাশনঃ, ইন্দ্রিযোপরোধী রোগোঽনুপক্রমো যঃ শীঘ্রমিন্দ্রিযবিঘাতকৃত্| এবং পুরা পরীক্ষ্য ব্যাধিচিকিত্সামারভেত| অন্যথাঽবশ্যং স্বার্থাদিহানিমবাপ্নুযাদ্বৈদ্যঃ| তথা চ গ্রন্থঃ (সং.সূ.অ.২)- "ব্যাধিং পুরা পরীক্ষ্যৈবমারভেত ততঃ ক্রিযাম্| স্বার্থবিদ্যাযশোহানিমন্যথা ধ্রুবমাপ্নুযাত্" ইতি|

আযুর্বেদরসাযনম্ ব্যাখ্যা ( কৃত)

আ০ র০- অসাধ্যং লক্ষযতি-অনুপক্রম ইতি| যো গদঃ সুখসাধ্যলক্ষণাত্যন্তবিপর্যযে স্থিতঃ, যশ্চ ঔত্সুক্যমোহারতিকৃত্, যশ্চ দৃষ্টরিষ্টঃ-দৃষ্টমরণচিহ্নঃ, যশ্চ অক্ষনাশনঃ- সর্বেন্দ্রিযবিঘাতী, স চতুর্বিধোঽনুপক্রম এব স্যাত্| নাস্ত্যুপক্রমঃ প্রতীকারো যস্যেত্যনুপক্রমঃ| এবশব্দো যাপ্যব্যুদাসার্থঃ| যাপ্যোঽপি নিঃশেষানিবর্তনাদনুপক্রমঃ, কিন্তু কিঞ্চিন্নিবর্তনাত্সোপক্রমোঽপি| অযং ত্বনুপক্রম এব|| তস্মাত্তত্রৌষধং কুর্যাদিত্যর্থাদুক্তম্|

সর্বাঙ্গসুন্দরী ব্যাখ্যা ( কৃত)

স০- এবংবিধমার্তমাতুরমুপক্রম্যমপি ত্যজেত্পরিহরেত্| ভিষগ্ভূপৈর্দ্বিষ্টং- ভিষগ্ভিস্তথা ভূপৈ রাজভির্দ্বিষ্টম্, বৈদ্যা রাজানশ্চ যং দ্বিষন্তি| তথা, তেষাং দ্বিষং-শত্রুং, ভিষগ্ভূপান্যো দ্বেষ্টি, তমপি ত্যজেত্| দ্বিষ্টং-শত্রুং চাত্মনঃ| হীনোপকরণমিতি উপকরণবিকলং হীনচিকিত্সাঙ্গম্| ব্যগ্রং- কার্যবহুলমন্যকার্যাপেক্ষিণং কার্যান্তরাসক্তচেতসম্| অবিধেযং- ভিষজঃ, তদাজ্ঞাং যো ন করোতি, তমপি ত্যজেত্| গতাযুষং- পরিক্ষীণজীবিতম্| চণ্ডং- সহসাপকারকরণবুদ্ধিং ক্রূরকর্মাণম্| শোকাতুরং- স্ত্র্যাদিবিরহোত্থেন শোকেন শুচার্তম্| ভীরুং- সভযম্| কৃতঘ্নং- যঃ কৃতোপকারোঽপ্যপকারং করোতি| বৈদ্যমানিনং- অবৈদ্যোঽপি যো বৈদ্যমিবাত্মানং মন্যতে স্বমতেনৈবৌষধং করোতি মূঢঃ, তমপি ত্যজেত্|

আযুর্বেদরসাযনম্ ব্যাখ্যা ( কৃত)

আ০ র০- আতুরবিশেষেঽপ্যৌষধং নিষেধতি-ত্যজেদিতি| ভিষত্ভূপৈর্দ্বিষ্টমার্তং রোগিণং ত্যজেত্| ভিষজশ্চ ভূপাশ্চ ভিষগ্ভূপাঃ, তৈর্দ্বিষ্টম্-তে যং দ্বিষন্তি| তেষাং দ্বিষং-ভিষগ্ভূপান্ যো দ্বেষ্টি| দ্বিষমাত্মানং যো দ্বেষ্টি| হীনোপকরণং-ঔষধসামগ্রীরহিতম্| ব্যগ্রং-কার্যান্তরব্যাকুলম্| অবিধেযং-বৈদ্যস্যানধীনম্| গতাযুষমুত্পন্নস্থাযিরিষ্টম্| ভীরুং-ব্যাপদ্ভযাত্ ত্যক্তৌষধম্| কৃতঘ্নমুপকারেঽপ্যপকারিণম্| বৈদ্যমানিনং-অবৈদ্যোঽপি য আত্মানং বৈদ্যং মন্যতে| এষাং সাধ্যানামপ্যৌষধং ন কার্যমিত্যর্থঃ| ইতি সুখসাধ্যাদিলক্ষণম্|

সর্বাঙ্গসুন্দরী ব্যাখ্যা ( কৃত)

স০- অস্য- অষ্টাঙ্গহৃদযাখ্যস্য, তন্ত্রস্য- তন্ত্র্যন্তে ধার্যন্তেঽনেনাযুর্বেদার্থা ইতি তন্ত্রম্ তস্য, অধ্যাযসঙ্গ্রহঃ- অধ্যাযানাং সঙ্গ্রহঃ সংক্ষেপ একত্র রাশীকরণম্, অতঃ পরং- অস্মাদূর্ধ্বম্, সুখস্মরণায মযা বক্ষ্যতে| স০-ইমে পূর্বোক্তাস্ত্রিংশদধ্যাযাঃ, সূত্রস্থানমুক্তম্| আযুষ্কামশ্চ দিনর্ত্বীহে চ রোগানুত্পাদনং চ দ্রবশ্চেতি দ্বন্দ্বঃ| ঈহা চর্যা চেষ্টেত্যেকোঽর্থঃ| তেন আযুষ্কামীযো দিনচর্যা ঋতুচর্যা রোগানুত্পাদনীযো দ্রবদ্রব্যবিজ্ঞানীযোঽন্নস্বরূপবিজ্ঞানীযোঽন্নসংরক্ষা মাত্রাশিতীযো দ্রব্যাদিবিজ্ঞানীযো রসভেদীযো দোষাদিবিজ্ঞানীযো দোষভেদীযো দোষোপক্রমণীযো দ্বিবিধোপক্রমণীযঃ শোধনাদিগণসঙ্গ্রহঃ স্নেহবিধিঃ স্বেদবিধির্বমনবিরেচনবিধির্বস্তিবিধির্নস্যবিধির্ধূমবিধির্গণ্ডূষাদিবিধি রাশ্চোতনাঞ্জনবিধিস্তর্পণপুটপাকবিধির্যন্ত্রবিধিঃ শস্ত্রবিধিঃ শিরাব্যধবিধিঃ শল্যাহরণবিধিঃ শস্ত্রকর্মবিধিঃ ক্ষারাগ্নিকর্মবিধিঃ| সূচনাত্সূত্রম্, সূচ্যতেঽনেন সকলতন্ত্রার্থ ইতি সূত্রস্থানম্, সকলস্য তন্ত্রস্য শিরঃস্থানীযম্|

আযুর্বেদরসাযনম্ ব্যাখ্যা ( কৃত)

আ০ র০- ইত্যেষ ব্যাধিপ্রতীকারঃ সামান্যসংক্ষেপাভ্যাং ব্যাখ্যাতঃ, এতাবানেবার্থোঽস্মিন্ শাস্ত্রে ব্যাখ্যেয ইতি জ্ঞাপনার্থম্| এবং হি জ্ঞাতে শাস্ত্রতাত্পর্যং জ্ঞাযতে| শাস্ত্রে হি কেচিদর্থা বিধীযন্তে, কেচিদনূদ্যন্তে, কেচিত্প্রস্তুতসিধ্যর্থং অপ্রস্তুতা অপ্যুচ্যন্তে| শাস্ত্রতাত্পর্যজ্ঞস্তু বিধেযাদীন্বিবিচ্য শাস্ত্রার্থং সুখেন গৃহ্ণাতি| অধ্যাযসঙ্গ্রহোঽপি সুখগ্রহণোপাযঃ| তেনাধ্যাযসঙ্গ্রহং ব্যাখ্যাতুং প্রতিজানীতে-তন্ত্রস্যেতি| অতঃপরং-সঙ্গ্রহানন্তরম্| আ০ র০- অধ্যাযান্ সঙ্গৃহ্ণাতি-আযুষ্কামেতি| তত্র আযুষ্কামাদযস্ত্রিংশদধ্যাযাঃ, সূত্রস্থানম্|

সর্বাঙ্গসুন্দরী ব্যাখ্যা ( কৃত)

স০- শারীরং শারীরস্থানমুচ্যতে| কিংস্থানমধ্যাযসঙ্গ্রহঃ| কে পুনস্তে ? তানাহ| তত্র গর্ভাবক্রান্তিশারীরম্| তস্য ব্যাপত্ তদ্ব্যাপত্ , তস্যেতি গর্ভপরামর্শঃ, গর্ভব্যাপচ্ছারীরম্| অঙ্গবিভাগং শারীরম্| মর্মবিভাগং শারীরম্| বিকৃতিবিজ্ঞানীযং শারীরম্| দূতাদিবিজ্ঞানীযং শারীরম্| এবমেতে ষডধ্যাযাঃ, শারীরস্থানম্|

আযুর্বেদরসাযনম্ ব্যাখ্যা ( কৃত)

আ০ র০- গর্ভাবক্রান্ত্যাদযঃ ষট্, শারীরম্|

সর্বাঙ্গসুন্দরী ব্যাখ্যা ( কৃত)

স০- সর্বরোগনিদানম্| জ্বরনিদানম্| রক্তপিত্তকাসনিদানম্| শ্বাসহিক্কানিদানম্| রাজযক্ষ্মাদিনিদানম্| মদাত্যযাদিনিদানম্| অর্শোনিদানম্| অতীসারগ্রহণীদোষনিদানম্| মূত্রাঘাতনিদানম্| প্রমেহনিদানম্| বিদ্রধিবৃদ্ধিগুল্মনিদানম্| উদরনিদানম্| পাণ্ডুশোফবিসর্পনিদানম্| কুষ্ঠশ্বিত্রকৃমিনিদানম্| বাতব্যাধিনিদানম্| বাতশোণিতনিদানম্| ইত্যেবং ষোডশাধ্যাযাঃ, নিদানস্থানম্|

আযুর্বেদরসাযনম্ ব্যাখ্যা ( কৃত)

আ০ র০- সর্বরোগনিদানাদযঃ ষোডশ, নিদানম্|

সর্বাঙ্গসুন্দরী ব্যাখ্যা ( কৃত)

স০- চিকিত্সিতস্থানং দ্বাবিংশতিরধ্যাযাঃ| জ্বরচিকিত্সিতম্| রক্তপিত্তচিকিত্সিতম্| কাসচিকিত্সিতম্| শ্বাসহিক্কাচিকিত্সিতম্| রাজযক্ষ্মচিকিত্সিতম্| ছর্দিহৃদ্রোগতৃষ্ণাচিকিত্সিতম্| মদাত্যযচিকিত্সিতম্| অর্শশ্চিকিত্সিতম্| অতীসারচিকিত্সিতম্| গ্রহণীদোষচিকিত্সিতম্| মূত্রাঘাতচিকিত্সিতম্| প্রমেহচিকিত্সিতম্| বিদ্রধিবৃদ্ধিচিকিত্সিতম্| গুল্মচিকিত্সিতম্| উদরচিকিত্সিতম্| পাণ্ডুরোগচিকিত্সিতম্| শ্বযথুচিকিত্সিতম্| বিসর্পচিকিত্সিতম্| কুষ্ঠচিকিত্সিতম্| শ্বিত্রকৃমিচিকিত্সিতম্| বাতব্যাধিচিকিত্সিতম্| বাতশোণিতচিকিত্সিতম্| ইমে দ্বাবিংশতিরধ্যাযাশ্চিকিত্সিতস্থানম্|

আযুর্বেদরসাযনম্ ব্যাখ্যা ( কৃত)

আ০ র০- জ্বরচিকিত্সাদযো দ্বাবিংশতিশ্চিকিত্সিতম্|

সর্বাঙ্গসুন্দরী ব্যাখ্যা ( কৃত)

স০- অত ঊর্ধ্বং কল্পস্থানম্| অত্র কল্পে বমনকল্পঃ| বিরেচনকল্পঃ| বমনবিরেচনব্যাপত্সিদ্ধিঃ| বস্তিকল্পঃ| বস্তিব্যাপত্সিদ্ধিঃ| ষষ্ঠো ভেষজকল্পঃ| ইত্যেবং ষডধ্যাযাঃ, কল্পসিদ্ধিস্থানম্|

আযুর্বেদরসাযনম্ ব্যাখ্যা ( কৃত)

আ০ র০ - বমনকল্পাদযঃ ষট্, কল্পস্থানম্|

সর্বাঙ্গসুন্দরী ব্যাখ্যা ( কৃত)

স০- অত উত্তরং, অতোঽস্মাত্কল্পসিদ্ধিস্থানাদূর্ধ্বমুত্তরতন্ত্রম্| বালোপচরণীযঃ| বালামযপ্রতিষেধঃ| বালগ্রহপ্রতিষেধঃ| ভূতবিজ্ঞানীযঃ| ভূতপ্রতিষেধঃ| উন্মাদপ্রতিষেধঃ| অপস্মারপ্রতিষেধঃ| বর্ত্মরোগবিজ্ঞানীযঃ| বর্ত্মরোগপ্রতিষেধঃ| সন্ধিসিতাসিতরোগবিজ্ঞানীযঃ| তিমিরপ্রতিষেধঃ| লিঙ্গনাশপ্রতিষেধঃ| সর্বাক্ষিরোগবিজ্ঞানীযঃ| সর্বাক্ষিরোগপ্রতিষেধঃ| কর্ণরোগবিজ্ঞানীযঃ| কর্ণরোগপ্রতিষেধঃ| নাসারোগবিজ্ঞানীযঃ| নাসারোগপ্রতিষেধঃ| মুখরোগবিজ্ঞানীযঃ| মুখরোগপ্রতিষেধঃ| শিরোরোগবিজ্ঞানীযঃ| শিরোরোগপ্রতিষেধঃ| ব্রণবিজ্ঞানীযপ্রতিষেধঃ| সদ্যোব্রণপ্রতিষেধঃ| ভঙ্গপ্রতিষেধঃ| ভগন্দরপ্রতিষেধঃ| গ্রন্থ্যর্বুদশ্লীপদাদিবিজ্ঞানীযঃ| গ্রন্থ্যর্বুদাদিপ্রতিষেধঃ| ক্ষুদ্ররোগবিজ্ঞানীযঃ| ক্ষুদ্ররোগপ্রতিষেধঃ| গুহ্যরোগবিজ্ঞানীযঃ| গুহ্যরোগপ্রতিষেধঃ| বিষপ্রতিষেধঃ| সর্ববিষপ্রতিষেধঃ| কীটলূতাদিবিষপ্রতিষেধঃ| মূষিকালর্কবিষপ্রতিষেধঃ| রসাযনাধ্যাযঃ| বাজীকরণাধ্যায ইতি| এবমেতে চত্বারিংশদধ্যাযা উত্তরতন্ত্রম্| তদিতি বালস্য পরামর্শঃ| দ্বৌ দ্বাবিতি বর্ত্মনি দ্বৌ, সন্ধৌ দ্বৌ, যথাসংখ্যেন| ত্রয ইতি দৃক্তমোলিঙ্গনাশেষু প্রত্যেকমেকৈকঃ| গ্রন্থ্যাদিক্ষুদ্ররোগগুহ্যরোগেষু পৃথগ্দ্বযং প্রত্যেকং দ্বৌ দ্বৌ| অনপত্যানামপ্রজানাং পুংসাং চত্বারিংশোঽধ্যাযো বীজপোষণঃ শুক্রবৃদ্ধিহেতুরিতি| ইত্যেবমনেন প্রকারেণ, সবিংশমধ্যাযশতং ষড্ভিঃ স্থানৈঃ সূত্রশারীরনিদানচিকিত্সাকল্পসিদ্ধ্যুত্তরতন্ত্রৈরুদীরিতমিতি ভদ্রম্| ইতি শ্রীমৃগাঙ্কদত্তপুত্রশ্রীমদরুণদত্তবিরচিতাযামষ্টাঙ্গহৃদযটীকাযাং সর্বাঙ্গসুন্দরাখ্যাযাং সূত্রস্থান আযুষ্কামীযোঽধ্যাযঃ প্রথমঃ|| ১||

আযুর্বেদরসাযনম্ ব্যাখ্যা ( কৃত)

আ০ র০- বালোপচরণীযাদযশ্চত্বারিংশত্, উত্তরম্| আ০ র০- ইতি ষড্ভিঃ স্থানৈর্বিংশমধ্যাযশতমস্মিন্ শাস্ত্রে উক্তম্| অত্রাযুষ্কামরোগানুত্পাদনদ্রবাদিশব্দাঃ আযুষ্কামীযরোগানুত্পাদনীযদ্গবদ্গব্যবিজ্ঞানীযাদিসংজ্ঞানাং লক্ষকাঃ| দিনর্ত্বীহাদিশব্দাঃ দিনচর্যর্তুচর্যাদিসংজ্ঞানাং বাচকাঃ| শুদ্ধ্যাদযঃ-শোধনাদিদ্রব্যগণাঃ| দৃক্সেকঃ-আশ্চোতনম্| ক্ষারাগ্নিকর্মিক একোঽধ্যাযঃ| মদাদযো-মদাত্যযাদযঃ| বিশি-বিড্রোগযোরতীসারগ্রহণ্যোঃ| মূত্রিতে-মূত্ররোগযোঃ মূত্রকৃচ্ছ্র (মূত্রাঘাত) প্রমেহযোঃ| ভূতগে-ভূতবিজ্ঞানীযতত্প্রতিষেধযোঃ| বর্ত্মসু-বর্ত্মরোগবিজ্ঞানপ্রতিষেধযোঃ| সন্ধিষু-সন্ধিগতরোগবিজ্ঞানপ্রতিষেধযোঃ| দৃগাদিষু ত্রযঃ, ন তু প্রত্যেকম্| সর্বগাদিষু ষট্সু প্রত্যেকং দ্বৌ, বিজ্ঞানপ্রতিষেধভেদাত্, ব্রণে তু ব্রণসদ্যোব্রণভেদাত্| সর্বগে-সর্বাক্ষিরোগে| ভঙ্গে-অস্থিভঙ্গে| গ্রন্থ্যাদিপ্রভৃতিষু ত্রিষু পৃথক্ দ্বযং, বিজ্ঞানপ্রতিষেধভেদাত্| অনপত্যানাং বীজপোষণো-বাজীকরণম্| বিংশংবিংশত্যুত্তরম্| ইত্যধ্যাযসঙ্গ্রহঃ| ইতি হেমাদ্রিটীকাযামাযুর্বেদরসাযনে| অধ্যায আযুষ্কামীযঃ সামস্ত্যেন নিরূপিতঃ|| ১||