৪৭. উপদংশনিদানম্

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

স্থানপ্রত্যাসত্তেরুপদংশনিদানমাহ– হস্তেত্যাদি| নখদন্তপাতাদিতি বলবদনুরাগোদযাত্ নখদন্তচ্ছেদস্থানত্বেনানুক্তেঽপি মেহনে নখদন্তপাতঃ; যদুক্তং কামশাস্ত্রে– “শাস্ত্রস্য বিষযস্তাবদ্যাবন্মন্দরসা নরাঃ| প্রবৃত্তে রতিচক্রে তু ন শাস্ত্রং নাপি চ ক্রমঃ||” (কা. সূ. সাং. অ. ২) ইতি| কলহাদিবশাদ্বা মেহনে নখদন্তপাতঃ| অধাবনাদপ্রক্ষালনাত্| রত্যতিসেবনাদিতি ব্যবাযস্যাত্যন্তসেবনাত্| যোনিপ্রদোষাদিতি দীর্ঘকর্কশরোমাদিযোগাদ্যোনিদুষ্টেঃ| শিশ্নে মেহনে| বিবিধাপচারৈরিতি অশুদ্ধসলিলপ্রক্ষালনব্রহ্মচারিণীগমনাদিভিঃ| উপদংশসঞ্জ্ঞা চ দংশনোপাধিমন্তরেণাপি রূঢা বোদ্ধব্যা| যদ্যপ্যভিঘাতক্ষতে মেহনে উপদংশ আগন্তুঃ ষষ্ঠঃ সম্ভাব্যতে, তথাঽপি তস্য দোষলিঙ্গযুক্ততযা দোষজ এবান্তর্ভাবঃ||১||

আতঙ্কদর্পণ ব্যাখ্যা (বাচস্পতি বৈদ্য কৃত)

ব্রণত্বসামান্যাত্স্থানপ্রত্যাসন্নত্বাদুপদংশনিদানম্| তস্য হেতুমাহ– হস্তেত্যাদি| নখদন্তপাতাদিতি বলবদনুরাগোদযাত্প্রবলকামরাগবশাত্ কামিনাং মেহনে দন্তনখপাতো ভবতি| যদুক্তং কামশাস্ত্রে– “শাস্ত্রস্য বিষযস্তাবদ্যাবন্মন্দরসা নরাঃ| রতিচক্রে প্রবৃত্তে চ ন শাস্ত্রং নাপি চ ক্রমঃ||” ইতি| কলহাদিবশাদ্বা মেহনে নখদন্তপাতঃ| অধাবনাদপ্রক্ষালনাত্, অত্যুপসেবনাদিতি ব্যবাযস্যাত্যন্তসেবনাত্, যোনিপ্রদোষাত্ অল্পমহাদ্বারদীর্ঘকর্কশরোমসঙ্কীর্ণদেশত্বাদিযোনিদোষাত্, রোগপ্রভৃতের্বা যোনিদুষ্টেঃ| বিবিধোপচারৈরিতি ক্ষারোষ্ণমলিনাম্ভঃপ্রক্ষালনব্রহ্মচারিণীগমনাদিভিঃ| পঞ্চোপদংশা ইতি বাতেন, পিত্তেন, শোণিতেন, কফেন, সন্নিপাতেন; এবং পঞ্চ| যদ্যপ্যভিঘাতক্ষতে মেহনে উপদংশ আগন্তুঃ ষষ্ঠঃ সম্ভবতি, তথাঽপি তস্য দোষলিঙ্গযুক্ততযা দোষজ এবান্তর্ভাবঃ||১||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পৈত্তিকমাহ– পীতৈরিত্যাদি| স্ফোটৈরিত্যনুসঞ্জনীযম্| এবমুত্তরত্রাপি|২|–

আতঙ্কদর্পণ ব্যাখ্যা (বাচস্পতি বৈদ্য কৃত)

বাতজোপদংশলক্ষণমাহ– সতোদেত্যাদি| ভেদো দ্বিধা ক্রিযত ইব| ব্যবস্যেত্ জানীযাত্| পিত্তজমাহ– পীতৈরিত্যাদি| পিত্তৈ রক্তৈর্বেতি বিকল্পঃ, পিত্তেন বহুক্লেদযুতৈঃ আর্দ্রতাবহুলৈঃ, স্ফোটৈরিতি শেষঃ|২|

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

রক্তজমাহ– রক্তাদিত্যাদি| রক্তাত্ পিশিতাবভাসৈরিতি মাংসবত্তাম্রৈঃ স্ফোটৈঃ রক্তাচ্ছোণিতাত্ উপদংশং ব্যবস্যেত্| ‘রক্তৈঃ’ ইতি পাঠান্তরে রক্তৈঃ শোণিতৈঃ||২-৩||

আতঙ্কদর্পণ ব্যাখ্যা (বাচস্পতি বৈদ্য কৃত)

রক্তজমাহ– পিশিতাবভাসৈরিত্যাদি| মাংসবত্তাম্রৈঃ স্ফোটৈঃ রক্তাত্ শোণিতাত্ উপদংশং ব্যবস্যেত্| ‘রক্তৈঃ’ ইতি পাঠান্তরম্, তত্র রক্তৈঃ শোণিতৈঃ| কফজমাহ– সকণ্ডুরৈঃ কণ্ডূযুতৈঃ, মহদ্ভিঃ মহত্পরিগ্রহৈঃ, ঘনৈর্নিবিডৈঃ, স্ফোটৈরিতি শেষঃ||২-৩||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

সন্নিপাতজমাহ– নানাবিধেত্যাদি| নানাবিধস্রাবরুজোপপন্নমিতি প্রত্যেকদোষোক্তস্রাববেদনাযুক্তম্| ত্রিমলোপদংশমিতি ত্রিদোষোপদংশম্|৪|–

আতঙ্কদর্পণ ব্যাখ্যা (বাচস্পতি বৈদ্য কৃত)

সন্নিপাতজমাহ– নানেত্যাদি| প্রত্যেকদোষোক্তস্রাববেদনাযুক্তম্| ত্রিমলোপদংশমিতি ত্রিদোষোপদংশমসাধ্যমাহুঃ|৪|–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অসাধ্যতামাহ– বিশীর্ণেত্যাদি| মুষ্কাবশেষমিতি বিশীর্ণসমস্তমেহনমাংসত্বেনাবশিষ্টফলকোষমাত্রম্||৪||

আতঙ্কদর্পণ ব্যাখ্যা (বাচস্পতি বৈদ্য কৃত)

বর্জ্যমাহ– বিশীর্ণেত্যাদি| বিশীর্ণমাংসং শটিতমাংসং, কৃমিভিঃ প্রজগ্ধং ভক্ষিতং, মুষ্কাবশেষমিতি শীর্ণসমস্তমেহনমাংসত্বেনাবশিষ্টফলকোশমাত্রং, এবমুক্তলক্ষণোপদংশং পরিবর্জযেত্||৪||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

উপক্রমে চিকিত্সাকরণার্থমাহ– সঞ্জাতেত্যাদি| বিষযে প্রসক্ত ইতি অতিব্যবাযরতঃ| কালেন চিরকালেন||৫||

আতঙ্কদর্পণ ব্যাখ্যা (বাচস্পতি বৈদ্য কৃত)

উপক্রমে চিকিত্সাকরণার্থমাহ– সঞ্জাতেত্যাদি| যো মূঢো বিষযে প্রসক্তঃ ব্যবাযাদিতত্পরঃ, স তেনোপদংশেন কালেন কালান্তরেণ ম্রিযতে শোথাদিভিরুপদ্রবৈঃ প্রশীর্ণশিশ্নঃ গলিতমেহনঃ||৫||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

একস্থানত্বেনাত্র লিঙ্গার্শ আহ– অঙ্কুরৈরিত্যাদি| অঙ্কুরৈরঙ্কুরসদৃশৈরীষদ্দীর্ঘৈঃ, সঙ্ঘাতৈর্মাংসপ্রতানৈঃ, ‘সঞ্জাতৈঃ’ ইতি পাঠে ‘মাংসৈঃ’ ইতি শেষঃ| তাম্রচূডশিখোপমা ইতি তাম্রচূডঃ, কুক্কুটঃ, তচ্চূডাতুল্যা| সন্ধাবিতি মেঢ্ররন্ধ্রসন্ধৌ, সর্বসন্ধিগতেত্যনেন সর্বসন্ধেরুক্তত্বাত্| এষা ত্রিদোষজা, বর্তিরিতি যোজ্যম্; অত এব ‘সবেদনা পিচ্ছিলা চ দুশ্চিকিত্স্যা ত্রিদোষজা|’ ইতি ক্বচিত্ পাঠঃ| সুশ্রুতে ক্বচিত্ স্ত্রীণামপ্যুপদংশঃ পঠ্যতে| যথা– “মেঢ্রসন্ধৌ ব্রণাঃ কেচিত্ কেচিত্ সর্বাশ্রযাস্তথা| কুলত্থাকৃতযঃ কেচিত্ কেচিত্ পদ্মদলোপমাঃ|| রুজাদাহার্তিবহুলাঃ কৃষ্ণাস্তোদসমন্বিতাঃ| শীঘ্রং কেচিদ্বিসর্পন্তি শনৈঃ কেচিত্তথাঽপরে| স্ত্রীণাং পুংসাং চ জাযন্তে উপদংশাঃ সুদারুণাঃ||” ইতি| কিন্তু সমানতন্ত্রেষ্বদর্শনাদেতদনার্ষমাহুঃ||৬-৭||

আতঙ্কদর্পণ ব্যাখ্যা (বাচস্পতি বৈদ্য কৃত)

একস্থানত্বেনাত্র লিঙ্গার্শ আহ– অঙ্কুরৈরিত্যাদি| অঙ্কুরসদৃশৈরীষদ্দীর্ঘসঙ্ঘাতৈঃ মাংসপ্রতানৈঃ| অন্যে সন্ধাবিতি মেঢ্ররন্ধ্রসন্ধৌ, সর্বসন্ধিগতেত্যনেন সর্বসন্ধেরুক্তত্বাত্, এষা ত্রিদোষজা, অত এব “সবেদনা পিচ্ছিলা চ দুশ্চিকিত্স্যা ত্রিদোষজা” ইতি ক্বচিত্পঠ্যতে| সুশ্রুতে তু ক্বচিত্ স্ত্রীণামপ্যুপদংশাঃ পঠ্যন্তে| তদ্যথা– “মেঢ্রসন্ধৌ ব্রণাঃ কেচিত্কেচিত্সর্বাশ্রযাস্তথা| কুলত্থাকৃতযঃ কেচিত্কেচিত্পদ্মদলোপমাঃ|| রুজাদাহার্তিবহুলাঃ কৃষ্ণাস্তোদসমন্বিতাঃ| স্ত্রীণাং পুংসাং চ জাযন্তে উপদংশাঃ সুদারুণাঃ||” ইতি| কিন্তু সমানতন্ত্রেষ্বদর্শনাদেতদনার্ষমাহুঃ||৬-৭||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ইতি শ্রীকণ্ঠদত্তকৃতাযাং মধুকোশব্যাখ্যাযামুপদংশনিদানং সমাপ্তম্||৪৭||

আতঙ্কদর্পণ ব্যাখ্যা (বাচস্পতি বৈদ্য কৃত)

ইতি শ্রীবাচস্পতিবৈদ্যকৃতাযাং মাধবনিদানব্যাখ্যাযামাতঙ্কদর্পণাখ্যাযামুপদংশনিদানম্||৪৭||