৪৬. ভগন্দরনিদানম্

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

নাডীবিশেষত্বাত্ সঙ্খ্যাসাম্যাচ্চ ভগন্দরনিদানম্| ভগন্দরপূর্বরূপপিডকামাহ– গুদস্যেত্যাদি| ক্ষেত্রে দেশে| “সৈব ভিন্না ভগন্দরঃ|” নিরুক্তিরস্য সুশ্রুতেন কৃতা| তদ্যথা– “গুদভগবস্তিপ্রদেশদারণাত্ ভগন্দরাঃ|” (সু. নি. অ. ৪) ইতি| ভগশব্দো গুদাদ্যুপলক্ষণম্| ভোজেঽপ্যুক্তম্– “ভগং পরিসমন্তাচ্চ গুদং বস্তিং তথৈব চ| ভগবদ্দারযেদ্যস্মাত্তস্মাজ্জ্ঞেযো ভগন্দরঃ||” ইতি| পূর্বরূপং ত্বস্য সুশ্রুতে পঠ্যতে; যথা– “কটীকপালবেদনা গুদকণ্ডুর্দাহঃ শোথশ্চ গুদস্য ভবতি|” (সু. নি. অ. ৪) ইতি| এতত্ সামান্যং পূর্বরূপম্| কটীকপালমত্র কটীফলকম্| পঞ্চবিধ ইতি সঙ্খ্যাকথনং রক্তজদ্বন্দ্বজভগন্দরসম্ভাবনানিরাসার্থম্||১||

আতঙ্কদর্পণ ব্যাখ্যা (বাচস্পতি বৈদ্য কৃত)

নাডীবিশেষসঙ্খ্যাসামান্যাদ্ ব্রণবদুপক্রমাদ্বাঽতোঽনন্তরং ভগন্দরনিদানম্| তস্যাবস্থানসংশ্রযত্বেন লক্ষণমাহ– গুদস্যেত্যাদি| ক্ষেত্রে দেশে, পার্শ্বতঃ সমীপতঃ, পিডকা, সৈব ভিন্না ভগন্দরার্তিকৃত্, তস্য চ নিরুক্তিঃ সুশ্রুতেন কৃতা– “গুদভগবস্তিপ্রদেশদারণাদ্ভগন্দরঃ” ইতি| ভগন্দরশব্দে ভগশব্দো গুদাদ্যুপলক্ষণঃ, ভোজেঽপ্যুক্তম্– “ভগং পরিসমন্তাচ্চ গুদং বস্তি তথৈব চ| ভগবদ্দারযেদ্যস্মাত্তস্মাজ্জ্ঞেযো ভগন্দরঃ||” ইতি| পূর্বরূপং ত্বস্য সুশ্রুতে পঠিতম্, যথা– “কটীকপালবেদনা গুদকণ্ডুর্দাহঃ শোথশ্চ গুদস্য ভবতি” ইতি| এতত্সামান্যং পূর্বরূপমিতি| কটীকপালমত্র কটীফলকম্| স চ পঞ্চবিধঃ– দোষৈস্ত্রযঃ, সন্নিপাতেনৈকঃ, শল্যেন চাপরঃ, এবং পঞ্চবিধসঙ্খ্যাকথনং রক্তজদ্বন্দ্বজভগন্দরসম্ভাবনানিরাসার্থম্||১||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

শতপোনকমাহ– কষাযেত্যাদি| অপানদেশ ইতি গুদদেশে| উপেক্ষণাদিতি বিম্লাপনাদ্যকরণাত্| রুজা চ ভিন্নেতি রুজা রুজান্বিতা, অর্শআদেরাকৃতিগণত্বাদচ্, ভিন্না বিদীর্ণা| ব্রণৈরনেকৈঃ শতপোনকং বদেদিতি শতপোনকতুল্যত্বাত্ শতপোনকঃ; শতপোনকশ্চালনিকা, সহস্রধারা ইত্যন্যে; কিংবা শতপোনকঃ শূকদোষে পঠিতো বিকারঃ ‘ছিদ্রৈরণুমুখৈঃ’ ইত্যাদিনা, কিন্তু যদি শূকদোষপঠিতশতপোনকতুল্যত্বমস্য তদা ছিদ্রৈরণুমুখৈরিত্যাদিনিমিত্তস্যোভযত্র পঠিতত্বাত্ কিং তত্সাদৃশ্যপ্রবৃত্তেযং সঞ্জ্ঞা, সা বা এতত্সাদৃশ্যপ্রবৃত্তেতি দুর্বিজ্ঞানাত্তত্রাপি চালনিকাতুল্যত্বমেব প্রবৃত্তিনিমিত্তমিতি মন্যমানেন জেজ্জটেন চালনিকাতুল্যত্বমত্র বর্ণিতম্| শতপোনকবদনেকমুখত্বে বাতিকভগন্দরস্বভাব এব হেতুঃ||২||

আতঙ্কদর্পণ ব্যাখ্যা (বাচস্পতি বৈদ্য কৃত)

বাতিকশতপোনকমাহ– কষাযেত্যাদি| উপেক্ষণাদিতি বিম্লাপনাদ্যকরণাত্| রুজা চ ভিন্নেতি রুজা রুজান্বিতা, ভিন্না বিদীর্ণা| শতপোনকতুল্যত্বাচ্ছতপোনকঃ শূকদোষপঠিতো বিকারঃ, চালনিকাতুল্যত্বমস্য শতপোনকবদনেকমুখত্বেন| তত্র চ বাতিকভগন্দরস্বভাব এব হেতুঃ, শতপোনকোঽস্য নাম||২||–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

উষ্ট্রগ্রীবলক্ষণমাহ– প্রকোপণৈরিত্যাদি| তদাশুপাকাহিমপূতিবাহিনীমিতি তদেতি তত্কালে, পিত্তজত্বেনাশুপাকা চ সা অহিমপূতিবাহিনী উষ্ণপূতিবাহিনী চ সা আশুপাকাহিমপূতিবাহিনী তাম্| অত্র পিডকাবস্থাগতগলবক্রত্বেন উষ্ট্রগ্রীবাকারত্বং, তেনোষ্ট্রগ্রীবসঞ্জ্ঞা||৩-৪||

আতঙ্কদর্পণ ব্যাখ্যা (বাচস্পতি বৈদ্য কৃত)

পিত্তজমুষ্ট্রগ্রীবমাহ– প্রকোপণৈরিত্যাদি| উষ্ণপূতিদুর্গন্ধবাহিনীম্| অত্রাপি পিডকাবস্থাগতগলবক্রত্বে উষ্ট্রগ্রীবাকারত্বং, তেনোষ্ট্রগ্রীবসঞ্জ্ঞা||৩-৪||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পরিস্রাবিণমাহ– কণ্ডূযন ইত্যাদি| পরিস্রাবী কফজঃ, স চ ঘনস্রাবযোগাত্ পরিস্রাবী||৫||

আতঙ্কদর্পণ ব্যাখ্যা (বাচস্পতি বৈদ্য কৃত)

পরিস্রাবিসঞ্জ্ঞং কফজং ভগন্দরমাহ– কণ্ডূযন ইত্যাদি| পরিস্রাবী ভগন্দরঃ কফজঃ, স চ ঘনপরিস্রাবযোগাত্পরিস্রাবী| কণ্ডূযনঃ কণ্ডুবহুলঃ||৫||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

সন্নিপাতজং শম্বূকাবর্তমাহ– বহুবর্ণরুজাস্রাবেত্যাদি| প্রত্যেকদোষজভগন্দরপঠিতবর্ণবেদনাঃ স্রাবশ্চ| শম্বূকাবর্তবত্ পূর্ণনদ্যাঃ শম্বূকাবর্তবদাবর্তনং বেদনা দোষগতিবিশেষাদ্ভবতীতি শম্বূকাবর্তঃ| তথা চ ভোজঃ– “নদীনাং পরিপূর্ণানাং শম্বূকাবর্তকা যথা| সমুত্তিষ্ঠন্তি বেগেন তোযবেগসমীরিতাঃ||” ইতি||৬||

আতঙ্কদর্পণ ব্যাখ্যা (বাচস্পতি বৈদ্য কৃত)

সন্নিপাতজং শম্বূকাবর্তমাহ– বহ্বিত্যাদি| বহুবর্ণেতি প্রত্যেকদোষজভগন্দরপঠিতবর্ণবেদনাস্রাবী, শম্বূকাবর্তবত্ লঘুশঙ্খবত্, পূর্ণনদ্যাঃ শম্বূকাবর্তো যথা আবর্তেন চ বেদনা দোষগতিবিশেষাদ্ভবতীতি শম্বূকাবর্তঃ| তথা চ ভোজঃ– “নদীনাং পরিপূর্ণানাং শম্বূকাবর্তকা যথা| অভ্যুত্তিষ্ঠন্তি বেগেন তোযবেগসমীরিতাঃ||” ইতি||৬||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

উন্মার্গিভগন্দরমাগন্তুমাহ– ক্ষতাদ্গতিরিত্যাদি| ক্ষতাদিতি কণ্টকাদিঘাতাত্| বিদার্য ত ইতি তে ক্রিমযো বিদার্য মার্গং কুর্বত ইতি যোজনা| অনেকধা মুখৈরনেকমুখৈঃ| অত্রোন্মার্গেণ ক্রিমিকৃতবিমার্গেণ পুরীষাদিগমনাদুন্মার্গিসঞ্জ্ঞা জ্ঞেযা| তন্ত্রান্তরে ত্বর্শোভগন্দরঃ পঠিতঃ| তদ্যথা– “কফপিত্তে তু পূর্বোত্থে দুর্নামাশ্রিত্য কুপ্যতঃ| অর্শোমূলে ততঃ শোথঃ কণ্ডূদাহার্তিমান্ ভবেত্|| স শীঘ্রং পক্বভিন্নোঽস্য ক্লেদযন্ মূলমর্শসঃ| স্রবত্যজস্রং গতিভিরযমর্শোভগন্দরঃ||” ইতি| অযমন্যতমস্মিন্ শতপোনকাদীনাং দোষলক্ষণদর্শনাদন্তর্ভাব্যঃ||৭||

আতঙ্কদর্পণ ব্যাখ্যা (বাচস্পতি বৈদ্য কৃত)

উন্মার্গিভগন্দরমাগন্তুমাহ– ক্ষতাদিত্যাদি| ক্ষতাত্ কণ্টকাদিঘাতাত্, যে কৃমযো বিদার্য মার্গং প্রকুর্বত ইতি যোজনা| অনেকধা মুখৈরনেকমুখৈর্ব্রণৈঃ| অত্রোন্মার্গেণ কৃমিকৃতবিমার্গেণ পুরীষাদিনির্গমাদুন্মার্গিসঞ্জ্ঞা প্রতীতা| তন্ত্রান্তরে ত্বর্শোভগন্দরঃ পঠিতঃ, যথা– “কফপিত্তে তু পূর্বোত্থে দুর্নামাশ্রিত্য কুপ্যতঃ| অর্শোমূলে ততঃ শোফঃ কণ্ডুদাহার্তিমান্ভবেত্|| স শীঘ্রং পক্বভিন্নোঽস্য ক্লেদযন্মূলমর্শসঃ| স্রবত্যজস্রং গতিভিরযমর্শোভগন্দরঃ||” ইতি| অযং শতপোনকাদীনাং দোষলক্ষণদর্শনাদন্তর্ভাব্যঃ||৭||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

প্রতীকারপ্রযত্নাযাহ– ঘোরা ইত্যাদি| দুঃখা ইতি দুঃখপ্রদাঃ| ক্ষতজশ্চ বিশেষত ইতি ক্ষতজোঽপি বিশেষমনেকব্রণযোগং ক্রিমিসম্ভবাদিকং চ বীক্ষ্যাসাধ্যঃ, অত এব চিকিত্সিতে অসাধ্যতাং প্রতিজ্ঞায ক্রিযাং বক্ষ্যতি| বিশেষত ইতি ল্যব্লোপে পঞ্চমী; বিশেষতোঽতিশযাদসাধ্য ইত্যর্থঃ, যাপনার্থং ক্রিযাবিধিরিতি| ক্বচিত্ “ক্ষতজশ্চ ভগন্দরঃ” ইতি পাঠঃ| ক্ষতজো বিশেষতঃ সাধযিতুং ঘোরঃ অসাধ্য এব, স্রাবরূপবিশেষস্য যুক্তত্বাদিতি গদাধরঃ||৮||

আতঙ্কদর্পণ ব্যাখ্যা (বাচস্পতি বৈদ্য কৃত)

অসাধ্যলক্ষণমাহ– ঘোরা ইত্যাদি| ক্ষতজোঽপি বিশেষমনেকব্রণযোগ্যং ক্রিমিসম্ভবাদিকং বীক্ষ্যাসাধ্যঃ||৮||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অবস্থাযামসাধ্যতামাহ– বাতমূত্রপুরীষাণীত্যাদি| ভগন্দরাত্ স্রবন্ত ইত্যত্র ‘অমী বিশেষা’ ইতি শেষঃ||৯||

আতঙ্কদর্পণ ব্যাখ্যা (বাচস্পতি বৈদ্য কৃত)

অবস্থাযামসাধ্যতামাহ– বাতেত্যাদি| ভগন্দরাত্স্রবন্ত ইত্যত্র ‘অমী বিশেষা’ ইতি শেষঃ| অমী বাতাদ্যা বিশেষা ভগন্দরাত্স্রবন্তস্তমাতুরং বিনাশযন্তি||৯||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ইতি শ্রীকণ্ঠদত্তকৃতাযাং মধুকোশব্যাখ্যাযাং ভগন্দরনিদানং সমাপ্তম্||৪৬||

আতঙ্কদর্পণ ব্যাখ্যা (বাচস্পতি বৈদ্য কৃত)

ইতি শ্রীবাচস্পতিবৈদ্যবিরচিতাযাং মাধবনিদানব্যাখ্যাযামাতঙ্কদর্পণাখ্যাযাং ভগন্দরনিদানম্||৪৬||