৩৫. উদরনিদানম্

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

উদরোত্সেধসাধর্ম্যাদুদরনিদানম্| উদরস্য বিশেষেণ বহ্নিদুষ্টিজন্যত্বমাহ– রোগা ইত্যাদি| অগ্নিমান্দ্যং চ দোষত্রযজনকম্| যদুক্তম্– “বর্ষাস্বগ্নিবলে হীনে কুপ্যন্তি পবনাদযঃ|” (চ. সূ. অ. ৬) ইতি| মলিনৈরিতি অত্যর্থদোষজনকৈর্বিরুদ্ধাধ্যশনাদিভিঃ| মলসঞ্চযাদিতি মলা দোষাঃ পুরীষাদযশ্চ, তেষামতিবৃদ্ধত্বাত্| তন্ত্রান্তরং চ– “অতিসঞ্চিতদোষাণাং পাপং কর্ম চ কুর্বতাম্| উদরাণ্যুপজাযন্তে মন্দাগ্নীনাং বিশেষতঃ||” ইতি| যদ্যপি মন্দাগ্নিত্বমলিনান্নত্বযোঃ প্রত্যেকমপি দোষত্রযজনকত্বমস্তি, তথাঽপ্যত্রোভযহেতুজনকত্বেন দোষদুষ্টিপ্রকর্ষঃ খ্যাপ্যতে, অত এব দুষ্টিপ্রকর্ষখ্যাপনার্থং ‘মলসঞ্চযাত্’ ইত্যত্র সম্পূর্বং কৃতবান্||১||

আতঙ্কদর্পণ ব্যাখ্যা (বাচস্পতি বৈদ্য কৃত)

উদরোত্সেধসাধর্ম্যাদুদরনিদানম্| উদরস্য বিশেষেণ বহ্নিজন্যদুষ্টিত্বমাহ– রোগা ইত্যাদি| অত্রোদরস্থো রোগোঽপ্যুদরশব্দেনোচ্যতে| উক্তঞ্চ– “ তাত্স্থ্যতদ্ধর্মতাভ্যাং চ তত্সমীপতযাঽপি চ| তত্সাহচর্যাচ্ছব্দানাং বৃত্তিরেষা চতুর্বিধা||” ইতি| অগ্নিমান্দ্যং দোষত্রযজনকম্| যদুক্তম্– “তেষামগ্নিবলে হীনে কুপ্যন্তি পবনাদযঃ|” ইতি| মলিনৈরিতি অজীর্ণাদত্যর্থদোষজনকৈর্বিরুদ্ধাধ্যশনাদিভিঃ| মলসঞ্চযাদিতি| মলা দোষাঃ পুরীষাদযশ্চ, তেষামতিবৃদ্ধত্বাত্| উক্তং চ তন্ত্রান্তরে– “অতিসঞ্চিতদোষাণাং পাপং কর্ম চ কুর্বতাম্| উদরাণ্যুপজাযন্তে মন্দাগ্নীনাং বিশেষতঃ||” ইতি| যদ্যপ্যত্র মন্দাগ্নিত্বমলিনান্নত্বযোঃ প্রত্যেকমপি দোষত্রযজনকত্বমস্তি, তথাঽপ্যত্রোভযহেতুজনকত্বেন দুষ্টিপ্রকর্ষঃ খ্যাপ্যতে||১||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

সম্প্রাপ্তিমাহ– রুদ্ধ্বেত্যাদি| স্বেদাম্বুবাহীনীতি স্বেদবহানি অম্বুবহানি চ| অনযোশ্চ ভেদঃ, “উদকবহানাং স্রোতসাং তালুমূলং ক্লোম চ; স্বেদবহানাং স্রোতসাং মেদো মূলং লোমকূপাশ্চ|” (চ. বি. অ. ৫) ইত্যনেনোক্তো জ্ঞেযঃ| স্রোতোরোধশ্চাত্র বহিরেব ন পুনরন্তঃ| যদুক্তং চরকে– “স্বেদস্তু বাহ্যেষু স্রোতঃসু প্রতিহতগতিস্তির্যগবতিষ্ঠমানস্তদেবোদকমাপ্যাযযতি|” (চ. চি. অ. ১৩) ইতি| অত এবোদরপূর্ণতা অন্নরসেন| প্রাণাগ্নীতি পুনরগ্নিদূষণাভিধানেন মন্দস্যাপ্যগ্নেঃ পুনর্দোষকৃতং সুতরাং মান্দ্যং বোধযতি| দোষসঞ্চযগতেনাপি বাযুনা প্রাণাপানযোর্দূষণং ন বিরুদ্ধং, যতো বাযুনা বায্বন্তরদুষ্টিঃ ক্রিযত এব| সুশ্রুতে তু পূর্বরূপমস্যোক্তং; তদ্যথা– “তত্পূর্বরূপং বলবর্ণকাঙ্ক্ষাবলীবিনাশো জঠরে হি রাজ্যঃ| জীর্ণাপরিজ্ঞানবিদাহবত্যো বস্তৌ রুজঃ পাদগতশ্চ শোথঃ||” (সু. নি. অ. ৭) ইতি||২||

আতঙ্কদর্পণ ব্যাখ্যা (বাচস্পতি বৈদ্য কৃত)

তস্যাঃ সম্প্রাপ্তিমাহ– রুদ্ধেত্যাদি| দোষাঃ স্বেদাম্বুবাহীনি স্রোতাংসি রুদ্ধ্বা প্রাণাগ্ন্যপানান্ সন্দূষ্য উদরমুত্পাদযন্তি| স্বেদাম্বুবাহীনীতি, অনযোশ্চ ভেদঃ– উদকবহানাং স্রোতসাং তালুমূলং ক্লোম চ, স্বেদবহানাং মেদোমূলং রোমকূপাশ্চেত্যনেন প্রোক্তো জ্ঞেযঃ| স্রোতোনিরোধশ্চ বহিরেব ন পুনরন্তঃ| যদুক্তং চরকে– “স্বেদশ্চ বাহ্যেষু মার্গেষ্বভিহতগতিস্তির্যগবতিষ্ঠমানস্তদেবোদকমাপ্যাযতি” ইতি| অত এবোদরপূর্ণতাঽন্নরসেন| প্রাণাঽগ্নীতি প্রাণো বাযুরগ্নিশ্চ, অপানো বাযুঃ, এতান্; পুনরগ্নিং সন্দূষ্যেত্যভিধানেন মন্দস্যাগ্নেঃ পুনর্দোষকৃতং সুতরাং মান্দ্যং বোধযতি| দোষসঞ্চযগতেনাপি বাযুনা প্রাণাপানযোর্দূষণং ন বিরুদ্ধং, যতো দুষ্টেন বাযুনাঽদুষ্টস্যান্তর্বাযোর্দুষ্টিঃ ক্রিযত এব| অস্য তু পূর্বরূপং সুশ্রুতে পঠিতং, তদ্যথা– “তত্পূর্বরূপং বলবর্ণকাঙ্ক্ষাবলীবিনাশো জঠরে চ রাজ্যঃ| জীর্ণাপরিজ্ঞানবিদাহবত্যো বস্তৌ রুজঃ পাদগতশ্চ শোথঃ||” ইতি||২||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

উদরাণাং সামান্যরূপমাহ– আধ্মানমিত্যাদি| দুর্বলাগ্নিতেতি মন্দোঽগ্নির্যদ্যপ্যত্র হেতুস্তথাঽপ্যগ্নেরতিশযদৌর্বল্যং লিঙ্গত্বেন জ্ঞেযম্| উদরাণ্যষ্টাবিতি যকৃদ্দাল্যুদরস্য প্লীহোদরেণ সার্ধং সমানচিকিত্স্যতযা তথোত্পত্তিবিশিষ্টদকোদরাত্ ক্রমেণ ভূতদকোদরস্যাপি সমানলিঙ্গচিকিত্সিতত্বেনাভিন্নত্বাত্ অষ্টাবেবোদরাণি ভবন্তি| প্লীহোদরাদীনি চ যদ্যপি চত্বারি দোষজানি, তথাঽপি হেতুলিঙ্গচিকিত্সাভেদাত্ পৃথগুক্তানি||৩-৪||–

আতঙ্কদর্পণ ব্যাখ্যা (বাচস্পতি বৈদ্য কৃত)

সর্বেষামুদরাণাং সামান্যলক্ষণমাহ– আধ্মানমিত্যাদি| মন্দাগ্নির্যদ্যপ্যত্র হেতুঃ, তথাঽপ্যগ্নেরতিশযদৌর্বল্যং লিঙ্গত্বেন জ্ঞেযম্| সদনং সাদঃ| বাতপুরীষযোঃ সঙ্গ ইতি অপ্রবৃত্তিঃ| তেষাং সঙ্খ্যামাহ– পৃথগিত্যাদি| বাতপিত্তকফৈস্ত্রযঃ, ত্রিভিরেকঃ, প্লীহ্না বদ্ধেন ক্ষতেন উদকেনৈকৈকঃ, এবমষ্টাবেবোদরাণি| যকৃদ্দাল্যুদরস্য প্লীহোদরেণ সহ সমানচিকিত্সিততযা সমানলিঙ্গত্বেনাভিন্নত্বাত্ অষ্টাবেবোদরাণি ভবন্তি, নতু যকৃদ্দাল্যুদরং পৃথক্| প্লীহোদরাদীনি চ যদ্যপি চত্বারি দোষজানি, তথাঽপি হেতুলিঙ্গচিকিত্সাভেদাত্ পৃথগুক্তানি; তেষাং লিঙ্গানি পৃথক্ শৃণু||৩-৪||–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

বাতোদরলক্ষণমাহ– তত্রেত্যাদি| অকস্মাদ্বৃদ্ধিহ্রাসবদিতি অনিযতবৃদ্ধিহ্রাসযুক্তমুদরম্| আধ্মাতদৃতিবদিতি বাতপূর্ণচর্মপুটবদিতি||৫-৮||

আতঙ্কদর্পণ ব্যাখ্যা (বাচস্পতি বৈদ্য কৃত)

তত্র বাতোদরলক্ষণমাহ– তত্রেত্যাদি| হস্তপাদাদিষু শ্বযথুঃ| কুক্ষ্যাদিষু চ পীডা, উদরস্য বামদক্ষিণভাগে কুক্ষিঃ, পর্বভেদনং সন্ধিস্ফুটনম্, অধো নাভেরধঃ পক্বাশযে গুরুতা, মলসঙ্গ্রহঃ পুরীষস্যাপ্রবৃত্তিঃ| ত্বগাদিষু শ্যাবারুণত্বম্, আদিশব্দেন নখনেত্রগ্রহণম্| অকস্মাদ্দৃতিহাসবদিতি দৃতিশ্চর্মখল্লী, হস্তাহতবাতপূর্ণদৃতিবত্ শব্দং করোতি, উদরমিতি শেষঃ| সর্বতোগতিঃ সর্বকোষ্ঠগতো বাযুঃ সরুক্শব্দো ধাবতি||৫-৮||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পৈত্তিকমাহ– পিত্তেত্যাদি| দহ্যত ইতি উদরমাত্রং দহ্যতে| দাহস্তু সকলদেহস্যৈব বোদ্ধব্যঃ| ধূমাযতে ধূম ইবোর্ধ্বমেতি| ক্ষিপ্রপাকমিতি ক্ষিপ্রপাকাজ্জলোদরতাং যাতীত্যর্থঃ| প্রদূযতে ব্যথতে||৯-১০||

আতঙ্কদর্পণ ব্যাখ্যা (বাচস্পতি বৈদ্য কৃত)

পৈত্তিকমাহ– পিত্তোদরেত্যাদি| তিক্তাস্যতা তিক্তমুখত্বং, ‘ কটুকাস্যতা ইতি পাঠান্তরম্| ভ্রমোঽত্র শঙ্খাদৌ পীতজ্ঞানমিতি, হরিত্ শাকবর্ণনম্| দহ্যত ইতি উদরমেব দহ্যতে, দাহস্ত্বত্র সকলদেহস্যৈব বোদ্ধব্যঃ| ধূমাযতে ধূমমিবোর্ধ্বমেতি| ক্ষিপ্রপাকাজ্জলোদরতাং যাতীত্যর্থঃ| প্রদূযতে ব্যথতে||৯-১০||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

সন্নিপাতোদরমাহ– স্ত্রিয ইত্যাদি| স্ত্রীগ্রহণমবিবেকিসন্নিহিতজনোপলক্ষণম্| গরং সংযোগজং বিষম্| দুষ্টমম্বু সগরপ্রাণিতৃণপর্ণাদিকোথযুতং, বিষমেবাগ্ন্যাদ্যুপহতং মন্দপ্রভাবং বা দূষীবিষমুচ্যতে| যদুক্তম্– “জীর্ণং বিষঘ্নৌষধিভির্হতং বা দাবাগ্নিবাতাতপশোষিতং বা| স্বভাবতো বা গুণবিপ্রহীনং বিষং হি দূষীবিষতামুপৈতি||” (সু. ক. অ. ২) ইতি| তেনাশু রক্তমিতি বিষস্যাগ্নেযত্বেন রক্তদুষ্টিঃ| কুপিতাশ্চ দোষা ইতি স্বভাবাত্ দোষত্রযপ্রকোপকং বিষং ভবতি| তচ্ছীতবাতাদিষু কুপ্যতীতি| দূষ্যোদরং কীর্তিতমেতদেবেতি এতদেব সন্নিপাতোদরং দূষ্যোদরং কীর্তিতং, ন পুনরধিকমিত্যর্থঃ| রক্তং দূষ্যং দূষযিত্বা ভবতীতি দূষ্যোদরং; কিংবা পরস্পরং দূষযন্তীতি দোষা এব দূষ্যাস্তৈঃ কৃতমুদরমিতি||১১-১৪||–

আতঙ্কদর্পণ ব্যাখ্যা (বাচস্পতি বৈদ্য কৃত)

শ্লৈষ্মিকমাহ– শ্লেষ্মেত্যাদি| অঙ্গসদনমঙ্গসাদঃ, স্বাপঃ অঙ্গানামেব, অন্যে আসীনপ্রচলাযিতম্| গৌরবমঙ্গানাম্| নিদ্রা নিদ্রাবাহুল্যম্| উত্ক্লেশো হৃল্লাসঃ| স্তিমিতং নিশ্চলম্, শুক্লসিরানদ্ধম্| চিরাভিবৃদ্ধিরিতি চিরপাক ইত্যর্থঃ| গুরু গৌরবযুক্তম্| স্থিরং গুডগুডাশব্দরহিতম্| সান্নিপাতিকমাহ– স্ত্রিয ইত্যাদি| স্ত্রীগ্রহণমবিবেকিজনোপলক্ষণং, স্ত্রিযো নখরোমাদিভির্যুক্তং যস্মৈ অন্নপানং প্রযচ্ছন্তি, অসাধুবৃত্তাঃ সৌভাগ্যমিচ্ছন্ত্যঃ কার্যাকার্যবিচারবিমুখাঃ, আর্তবং রজঃ| শত্রবো বা যস্মৈ গরং সংযোগজং বিষম্| দুষ্টমম্বু সবিষকীটতৃণপর্ণাদিকোথযুক্তম্| দূষীবিষং বিষমেব বায্বগ্ন্যাদ্যুপহতং যদল্পপ্রভাবং, বিষপীতস্য বা বিণ্মূত্রং, তদ্ দূষীবিষমুচ্যতে; দুষ্টাম্বুদূষীবিষযোঃ সেবনাদ্বা| তেনাশু রক্তং দুষ্টং ভবতি, বিষস্যাগ্নেযত্বেন রক্তস্য দুষ্টিঃ| কুপিতাশ্চ দোষা ইতি স্বভাবাদ্ দোষত্রযপ্রকোপকং বিষং ভবতি| সুঘোরং ভৃশং কষ্টকারি| জঠরমিত্যুদরবিকারম্| তচ্ছীতবাতাদিষু কুপ্যতি কোপং গচ্ছতি, দূষীবিষস্য তত্রৈব কোপাত্| দহ্যতে সন্তপ্যতে| মূর্ছতি বিষযোগাত্| প্রসক্তং নিরন্তরম্| দূষ্যোদরং কীর্তিতমেতদেবেতি এতদেব সান্নিপাতোদরং কীর্তিতং, ন পুনরধিকমিত্যর্থঃ| রক্তং দূষ্যং দূষযিত্বা ভবতীতি দূষ্যোদরম্, অথবা পরস্পরং দূষযন্তীতি দোষা এব দূষ্যাস্তৈঃ কৃতমুদরং দূষ্যোদরম্||১১-১৪||-

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

প্লীহোদরমাহ– প্লীহেত্যাদি| অসৃক্কফশ্চেত্যসৃগ্দুষ্ট্যৈব তত্তুল্যকারণতযা পিত্তদুষ্টিরপ্যুচ্যতে, বিদাহিনা রক্তং পিত্তং চ দূষ্যতে; অত এব পশ্চাত্ বক্ষ্যতি– “কফপিত্তলিঙ্গৈরুপদ্রুতঃ” ইতি| অত্র পিত্তস্য লিঙ্গং মন্দজ্বরঃ, কফস্য লিঙ্গং মন্দাগ্নিত্বমিতি গদাধরঃ| প্লীহোদর এব যকৃদ্দাল্যুদরস্যাবরোধং দর্শযন্নাহ– সব্যান্যপার্শ্ব ইত্যাদি| সব্যান্যপার্শ্বে দক্ষিণপার্শ্বে| তদেবেতি তাদৃশমেব, প্লীহোদরসমমেব; ন বিলক্ষণমিত্যর্থঃ| যকৃদ্দালযতি দোষৈর্ভেদযতীতি যকৃদ্দাল্যুদরম্||১৫-১৭||

আতঙ্কদর্পণ ব্যাখ্যা (বাচস্পতি বৈদ্য কৃত)

প্লীহোদরমাহ– অভিষ্যন্দীত্যাদি| দোষধাতুমলস্রোতসাং ক্লেদপ্রাপ্তিজননম্| অসৃক্কফশ্চেতি অসৃক্কফজৈব তুল্যকারণতযা পিত্তদুষ্টিরুচ্যতে| বিদাহিনা রক্তং পিত্তং চ দূষ্যতি| অত এব বক্ষ্যতি– ‘কফপিত্তলিঙ্গৈরুপদ্রুতঃ’ ইতি| তত্র পিত্তস্য লিঙ্গং মন্দো জ্বরঃ, কফস্য লিঙ্গং মন্দাগ্নিত্বমিতি গদাধরঃ| প্লীহোদর এব যকৃদ্দাল্যুদরস্যাবরোধং দর্শযন্নাহ– সব্যেত্যাদি| সব্যান্যপার্শ্বে দক্ষিণে, তদেবেতি তাদৃশমেব, তেন প্লীহোদরেণ সমমেব, ন বিলক্ষণমিত্যর্থঃ| যকৃদ্দালযতি দোষৈর্ভেদযতীতি যকৃদ্দাল্যুদরম্||১৫-১৭||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

তত্র দোষসম্বন্ধমাহ– উদাবর্তেত্যাদি| উদাবর্তরুজানাহৈর্বাতং, মোহতৃড্দহনজ্বরৈঃ পিত্তং, গৌরবারুচিকাঠিন্যৈঃ কফং জানীযাত্||১৮||

আতঙ্কদর্পণ ব্যাখ্যা (বাচস্পতি বৈদ্য কৃত)

তত্র দোষসম্বন্ধমাহ– উদাবর্তেত্যাদি| তত্র প্লীহোদরযকৃদ্দাল্যুদরযোঃ পৃথগ্লক্ষণলক্ষিতান্ মলান্ বাতাদীন্ ক্রমেণোদাবর্তাদিভির্লিঙ্গৈর্বিদ্যাত্| তত্র উদাবর্তরুজানাহৈর্বাতং, মোহতৃড্দহনজ্বরৈঃ পিত্তং, গৌরবারুচিকাঠিন্যৈঃ কফং জানীযাত্||১৮||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

বদ্ধগুদমাহ– যস্যান্ত্রমন্নৈরিত্যাদি| উপলেপিভিঃ পিচ্ছিলৈরন্নৈঃ শাকশালুকাদিভিঃ| পিহিতং বিবদ্ধম্| যথাবদিতি যথার্হম্| মলঃ পুরীষম্| সদোষ ইতি দোষত্রযসহিতঃ| নাড্যামিত্যন্ত্রনাড্যাম্| সঙ্করবদিতি সম্মার্জনীক্ষিপ্যমাণতৃণাদ্যবকরো যথা চীযতে ক্রমেণ তথেত্যর্থঃ| বদ্ধগুদমিতি গুদোপরি অন্ত্রস্য বদ্ধত্বাদ্বদ্ধগুদম্| যদুক্তং চরকে– “পক্ষ্মবালৈঃ সহান্নেন ভুক্তৈর্বদ্ধাযনে গুদে|” (চ. চি. অ. ১৩) ইতি| পুরীষাযতনস্য রুদ্ধত্বাত্ হৃন্নাভিমধ্যেঽন্নপাকস্থানে বৃদ্ধিঃ; গুদমাত্রনিরোধে তু মলদোষৈর্গুদাদূর্ধ্বমেবোদরবৃদ্ধিঃ স্যাত্||১৯-২০||

আতঙ্কদর্পণ ব্যাখ্যা (বাচস্পতি বৈদ্য কৃত)

বদ্ধগুদমাহ– যস্যেত্যাদি| যস্য পুংসোঽন্ত্রমুপলেপিভিঃ পিচ্ছিলৈরন্নৈঃ শাকাদিভির্বা, যথাবদিতি যথার্হং পিহিতং বদ্ধং ভবতি| অথবাঽন্নে মলঃ পুরীষঃ, সদোষঃ দোষত্রযসহিতঃ শনৈঃশনৈঃ সঞ্চীযতে সম্মার্জনীক্ষিপ্যমাণতৃণাদ্যবকরো যথা বৃদ্ধিং নীযতে ক্রমেণ তথৈবেত্যর্থঃ| তস্য গুদে পুরীষং নিরুধ্যতে কৃচ্ছ্রাচ্চাল্পমল্পং নিরেতি নিঃসরতি| বদ্ধগুদমিতি গুদোপরি অন্ত্রস্য বদ্ধত্বাদ্বদ্ধগুদম্| যদুক্তং চরকে– “পক্ষ্মবালৈঃ সহান্নেন ভুক্তৈর্বদ্ধাযনে গুদে|” ইতি| পুরীষাযতনস্য রুদ্ধত্বাত্| হৃন্নাভিমধ্য ইতি অন্নপাকস্থানে বৃদ্ধিঃ, গুদমাত্রনিরোধে তু মলদোষৈর্গুদাদূর্ধ্বমেবোদরে বৃদ্ধিঃ স্যাত্||১৯-২০||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ক্ষতোদরমাহ– শল্যমিত্যাদি| শল্যং কণ্টকশর্করাদি| অন্নোপহিতমন্নযুক্তম্| ভুক্তমাগতমিতি অর্থতঃ পাকাশযাত্; বিলোমেনাগতমন্ত্রং ভিনত্তি, ঋজ্বাগতং হি শল্যমপি নান্ত্রভেদকম্| অন্যথা বেতি জৃম্ভণাত্যশনাভ্যামন্ত্রং ভিদ্যতে| যদুক্তং চরকে– “শর্করাতৃণলোষ্টাস্থিকণ্টকৈরন্নসংযুতৈঃ| ভিদ্যেতান্ত্রং যদা ভুক্তৈর্জৃম্ভযাঽত্যশনেন বা||” (চ. চি. অ. ১৩) ইতি| স্রুত ইতি গলিতঃ| ‘স্রাবঃ স্রবেদ্বৈ গুদতস্তু ভূযঃ’ ইতি ভূযো বহু যথা ভবতি তথাঽন্ত্রাত্ স্রুতঃ; দোষজেষু পুনরুপস্নেহন্যাযেনাল্প এব স্রাবো ভূযঃ পুনঃ পুনঃ গুদতশ্চ স্রবেত্| তুশব্দশ্চার্থে, ভূযঃশব্দোঽত্রাবর্তনীযঃ; তেনোক্তা ব্যাখ্যা সাধ্বী ভবতি| ননু, ভিন্নান্ত্রাত্তির্যগত্র স্রাবনির্গমঃ; তত্ কথং “স্রাবঃ স্রবেদ্বৈ গুদতস্তু ভূয” ইত্যুপপদ্যতে? নৈবং, সচ্ছিদ্রান্ত্রমার্গেণ বহির্গতস্যাতিবৃদ্ধস্য পুনরাগমনাত্ উপস্নেহন্যাযাদ্বা গুদতঃ স্রাব উপপন্ন এব| চরকেঽপ্যুক্তম্– “পূরযন্ গুদমন্ত্রং চ জনযত্যুদরং নৃণাম্|” (চ. চি. অ. ১৩) ইতি| তেন স্রাবেণ দ্রবস্য নিম্নগত্বান্নাভেরধো জঠরং বৃদ্ধিমেতি; এতচ্ছিদ্রোদরং জলোদরমিতি ভণ্যতে ইতি গদাধরঃ| যতশ্চরকেণোক্তম্– “তদধো নাভেঃ প্রাযোঽভিনির্বর্তমানং জলোদরং স্যাত্|” (চ. চি. অ. ১৩) ইতি| তদন্যে নানুমন্যন্তে, যতশ্ছিদ্রোদরং শীঘ্রং জলোদরতাং যাতীত্যভিপ্রাযেণ চরকেণোক্তম্, অন্যথা দকোদরং পৃথঙ্ন স্যাত্||২১||–

আতঙ্কদর্পণ ব্যাখ্যা (বাচস্পতি বৈদ্য কৃত)

ক্ষতোদরমাহ– শল্যমিত্যাদি| শল্যং কণ্টকশর্করাস্থিকাষ্ঠাদিকম্| অন্নোপহিতমন্নযুক্তং, ভুক্তমাগতমিত্যর্থতঃ পক্বাশযাত্, বিলোমেন নির্গতমন্ত্রং ভিনত্তি বিদারযতি, ঋজ্বাগতং শল্যমপি নান্ত্রভেদকম্| অন্যথা বেতি জৃম্ভণেনাত্যশিতস্যান্ত্রং ভিদ্যতে| যদুক্তং চরকে– “শর্করাতৃণলোষ্টাস্থিকণ্টকৈরন্নসংযুতৈঃ| ভিদ্যতেঽন্ত্রং যদা ভুক্তৈর্জৃম্ভযাঽত্যশনেন চ||” ইতি| স্রুত ইতি গলিতঃ| স্রাবঃ স্রবেদ্বৈ গুদতস্তু ভূয ইতি ভূযো বহু যথা ভবতি তথাঽন্ত্রাত্ স্রুত ইতি ননু, ভিন্নান্ত্রাত্ তির্যগত্র স্রাবো যুক্তঃ, তত্কথং স্রাবঃ স্রবেদ্বৈ গুদতস্তু ভূয ইত্যুপপদ্যতে? নৈবং, সচ্ছিদ্রান্ত্রমার্গেণ স্রাবস্য নির্গমত্বাদ্বহিষ্কৃতস্যাতিবৃদ্ধস্য পুনর্গমনাদুপস্নেহন্যাযাদ্বা গুদতঃ স্রাব উপপদ্যত এব| চরকেঽপ্যুক্তম্– “পূরযন্ গুদমন্ত্রং চ জনযত্যুদরং নৃণাম্|” ইতি| তেন স্রাবেণ দ্রবস্য নিম্নগত্বান্নাভেরধো জঠরং বৃদ্ধিমেতি, নিস্তুদ্যতে শূলেন দাল্যত ইব| এতত্ পরিস্রাব্যুদরমন্যে এতস্যেব ছিদ্রোদরমাহুঃ||২১||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

উত্পত্তিবিশিষ্টং দকোদরমাহ– যঃ স্নেহপীত ইত্যাদি| স্নেহপীত ইতি কর্তরি ক্তঃ, তেন স্নেহং পীতবানিত্যর্থঃ| দূষ্যন্তীতি স্বকর্মসু দুষ্টানি ভবন্তি| তদ্বহানি উদকবহানি| তেষ্বিতি উদকবহস্রোতঃসু| পূর্ববদিতি যথা পূর্বমুক্তম্| অন্নরস উপস্নেহন্যাযেন বহির্নিঃসৃত্যোদরং জনযতীত্যর্থ ইতি জেজ্জটঃ| গদাধরস্ত্বাহ– ক্ষতান্ত্রোদরে যথা অধোনাভেরুদরাভিবৃদ্ধির্গুদস্রাবশ্চ তথা জলোদরেঽপি ভবতীতি| ননু, সর্বেষামেব উপস্নেহন্যাযেন বহির্নিঃসৃতান্নরসমূলত্বাত্ কথমনুদকত্বং? নৈবং, তেষু হি প্রথমতো নাতিমন্দত্বাদগ্নেরন্নরসস্যাল্পত্বাচ্চানুদকত্বম্, অল্পত্বেন তদ্ব্যপদেশাত্; অত্র তু প্রাগেব ভূরিজলোত্পত্তিরিতি বিশেষঃ| সমাততং বেদনযা বিস্তার্যমাণমিবোদরং ভবতি| যথা দৃতিঃ ক্ষুভ্যতীতি দৃতিরিব জলপূর্ণা ক্ষুভ্যতীতি, অন্তর্জলচলনমিব ধত্তে| শব্দাযতে গুডগুডাযতে||২২-২৪||

আতঙ্কদর্পণ ব্যাখ্যা (বাচস্পতি বৈদ্য কৃত)

দকোদরমাহ– দকোদরমিত্যাদি| স্নেহপীত ইতি কর্তরি ক্তঃ; তেন স্নেহং পীতবানিত্যর্থঃ| তস্য তদ্বহানি স্রোতাংসি দূষ্যন্তীতি স্বকর্মণ্যসমর্থানি ভবন্তি| তদ্বহানীতি উদকবহানি| অথবা স্নেহোপলিপ্তেষু তেষ্বেব উদকবহস্রোতঃসু, পূর্ববদিতি ক্ষতান্ত্রোদরে যথা নাভেরধঃ উদরাভিবৃদ্ধিঃ, গুদস্রাবস্তথা জলোদরে ভবতীতি| ননু সর্বেষামেব বহির্নিঃসৃতান্নরসমূলত্বাত্কথমনুদকত্বং? উচ্যতে– তেষু হি প্রথমতো নাতিমন্দত্বাদগ্নেরন্নরসস্যাল্পত্বাচ্চানুদকত্বং, স্বল্পত্বেনাব্যপদেশাত্; অত্র তু প্রাগেব জলং ভবতীতি বিশেষঃ| তদুদরং স্নিগ্ধং ভবতি, তথা মহত্, তথা পরিবৃত্তনাভি উচ্ছলিতনাভি, সমাততং বেদনযা বিস্তীর্ণমিবোদরং ভবতি| যথা দৃতিঃ ক্ষুভ্যতীতি দৃতিরিব জলপূর্ণা ক্ষুভ্যতীতি, অন্তর্জলচালনমিব ধত্তে, কম্পতে বেতি কম্পনমতিশযেন চলনং, শব্দাযতে গুডগুডাযতে||২২-২৪||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

উদররোগস্য সাধ্যত্বাদিলক্ষণমাহ– জন্মনৈবেত্যাদি| জন্মনৈবোদরমিতি উত্পন্নমাত্রেণৈব| অজাতোদকস্যোদরস্য লক্ষণং চরকেঽবগন্তব্যং; তদ্যথা– “অশোথমরুণাভাসং সশব্দং নাতিভারিকম্| সদা গুডগুডাযন্তং সিরাজালগবাক্ষিতম্|| নাভিং বিষ্টভ্য পাযৌ তু বেগং কৃত্বা প্রণশ্যতি| হৃদ্বঙ্ক্ষণকটীনাভিগুদপ্রত্যেকশূলিনঃ|| কর্কশং সৃজতো বাতং নাতিমন্দে চ পাবকে| লালযা বিরসে চাস্যে মূত্রেঽল্পে সংহতে বিশি|| অজাতোদকমিত্যেতৈর্যুক্তং বিজ্ঞায লক্ষণৈঃ|” (চ. চি. অ. ১৩) ইতি| অত্র কর্কশমিতি বেগবন্তম্| জাতোদকলক্ষণং চ চরকে যথা– “কুক্ষেরতিমাত্রং বৃদ্ধিঃ সিরান্তর্ধানগমনম্ উদকপূর্ণদৃতিসমানক্ষোভস্পর্শনং চ ভবতি|” (চ. চি. অ. ১৩) ইতি| পক্ষাদিত্যাদি| বদ্ধগুদমুদরং পক্ষাদূর্ধ্বং বিনাশায ভবতীতি| জাতোদকং পক্ষাত্| প্রাযোগ্রহণেন কদাচিত্ পক্ষাদূর্ধ্বমপি ন বিনাশায, তথা শল্যশাস্ত্রাভিমতযা চিকিত্সযা কদাচিজ্জাতোদকং ছিদ্রান্ত্রং বদ্ধগুদং চ সিধ্যতীতি দর্শযতি| জাতোদকং ছিদ্রান্ত্রং চ বিনাশায পক্ষাদূর্ধ্বমিতি সম্বন্ধ ইতি কেচিত্||২৫-২৬||

আতঙ্কদর্পণ ব্যাখ্যা (বাচস্পতি বৈদ্য কৃত)

উদরস্যাসাধ্যত্বমাহ– জন্মনেত্যাদি| উত্পত্তিমাত্রেণৈব কষ্টসাধ্যং তদুদরং বলিনঃ পুরুষস্য অজাতাম্বু অজাতোদকং সত্ যত্নতঃ সাধ্যং কৃচ্ছ্রত্বাদিতি| উদরাণাং বিশেষেণাসাধ্যত্বমাহ– পক্ষাদিত্যাদি| বদ্ধগুদমুদরং পক্ষাদূর্ধ্বং বিনাশায ভবতি| জাতোদকং পক্ষাত্, জাতোদকলক্ষণং চরকে– “কুক্ষেরতিমাত্রং বৃদ্ধিঃ সিরান্তর্ধানমুদকপূর্ণং সক্ষোভস্পর্শনং ভবতি” ইতি| প্রাযোগ্রহণেন কদাচিত্পক্ষাদূর্ধ্বমপি ছিদ্রান্ত্রং বদ্ধগুদং চ সিদ্ধ্যতীতি||২৫-২৬||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

সাধ্যতযাঽভিহিতানামপ্যবস্থাবিশেষেণাসাধ্যতামাহ– শূনাক্ষমিত্যাদি| ‘উদরিণম্’ ইতি শেষঃ| কুটিলোপস্থমিতি বক্রমেহনম্| উপক্লিন্নতনুত্বচমিতি উপক্লিন্না তন্বী ত্বক্ যস্য তম্| অগ্নিপরিক্ষীণমিতি অগ্নিক্ষযশ্চ যদ্যপ্যুদরে পূর্বমেব ভবতি, তথাঽপ্যত্র বিশেষেণাগ্নিক্ষযো লক্ষণান্তরযুক্তশ্চাসাধ্যতালিঙ্গং সম্ভবতীতি জ্ঞেযম্||২৭-২৮||

আতঙ্কদর্পণ ব্যাখ্যা (বাচস্পতি বৈদ্য কৃত)

পুনরপ্যসাধ্যমাহ– শূনেত্যাদি| অত্রোদরেণেতি শেষঃ| কুটিলোপস্থং কুটিলমেহনম্| উপক্লিন্নতনুত্বচমিতি উপক্লিন্না তন্বী ত্বগ্যস্য তম্| তথাঽগ্নিপরিক্ষীণমগ্নিক্ষযশ্চাপ্যুদরে পূর্বমেব ভবতি, তথাঽপ্যত্র বিশেষেণাগ্নিক্ষযো লক্ষণান্তরযুক্তশ্চাসাধ্যতালিঙ্গং ভবতীতি জ্ঞেযম্| পুনরপ্যসাধ্যলক্ষণমাহ– পার্শ্বেত্যাদি| ভগ্নং পার্শ্বে| বিরিক্তমপি পূর্যমাণোদরমিত্যর্থঃ||২৭-২৮||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ইতি শ্রীকণ্ঠদত্তবিরচিতাযাং মধুকোশব্যাখ্যাযামুদরনিদানং সমাপ্তম্||৩৫||

আতঙ্কদর্পণ ব্যাখ্যা (বাচস্পতি বৈদ্য কৃত)

ইতি শ্রীবাচস্পতিবৈদ্যবিরচিতাযাং মাধবনিদানব্যাখ্যাযামাতঙ্কদর্পণাখ্যাযামুদরনিদানম্||৩৫||