৩৬. শোথনিদানম্

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

উদরে শোথস্যোপদ্রবত্বেনোক্তত্বাত্তদনন্তরং শোথনিদানম্| তস্য সম্প্রাপ্তিমাহ– রক্তপিত্তকফানিত্যাদি| রক্তপিত্তকফান্ স্বহেতুভিঃ স্বাতন্ত্র্যেণ দুষ্টান্ কুপিতান্, দুষ্টঃ স্বহেতুকুপিতো বাযুর্বহিঃসিরা বাহ্যা অগম্ভীরাঃ সিরা নীত্বা গমযিত্বা, তৈঃ রক্তপিত্তকফৈঃ রুদ্ধগতিরাবৃতমার্গো বাযুরুত্সেধমুচ্ছ্রাযং কুর্যাদিতি যোজনা| বহিঃসিরাশব্দেনাত্রাগম্ভীরতযোক্তানাং স্রোতসামপি গ্রহণম্| ত্বঙ্মাংসসংশ্রযমিত্যনেন ব্রণশোথাদ্ভেদং দর্শযতি, অষ্টসু ব্রণবাস্তুষু ব্রণশোথস্য সম্ভবাত্| যদুক্তং সুশ্রুতেন– “ত্বঙ্মাংসসিরাস্নায্বস্থিসন্ধিকোষ্ঠমর্মাণীত্যষ্টৌ ব্রণবাস্তূনি ভবন্তি|” (সু. সূ. অ. ২২) ইতি| সংহতং সংহতাত্মকম্| কুতঃ সংহতাত্মকমিত্যত আহ– নিচযাদত ইতি| অতোঽস্মাত্ পূর্বোক্তাত্ রক্তসহিতদোষত্রযসমুদাযাত্; এতেন রক্তসহিতত্রিদোষজন্যত্বমস্যোক্তং ভবতি| সর্বমিত্যাদি সর্বমিতি পূর্বেণ সম্বধ্যতে, সর্বমুত্সেধং শোথমাহুরিত্যর্থঃ| হেতুবিশেষৈরিতি দোষত্রযাভিঘাতপ্রভৃতিভিঃ কারণভেদৈর্যো রূপভেদস্তস্মাত্ সর্বং নবাত্মকমাহুরিতি পূর্বক্রিযযা সম্বন্ধঃ| ‘সর্বহেতুবিশেষৈঃ’ ইতি পাঠান্তরে সর্বেষাং হেতুবিশেষৈরিত্যর্থঃ| দ্বযৈরিতি দ্বন্দ্বৈঃ, সর্বৈস্ত্রিভিঃ||১-২||–

আতঙ্কদর্পণ ব্যাখ্যা (বাচস্পতি বৈদ্য কৃত)

উদরে শোথস্যোপদ্রবত্বেনোক্তত্বাত্ তদনন্তরং শোথনিদানম্| অস্য সম্প্রাপ্তিমাহ– রক্তেত্যাদি| স্বহেতুভিঃ স্বাতন্ত্র্যেণ দুষ্টান্ কুপিতান্ রক্তপিত্তকফান্ স্বহেতুদুষ্টঃ কুপিতো বাযুর্বহিঃসিরাঃ বাহ্যা অগম্ভীরাঃ সিরাঃ নীত্বা গমযিত্বা তৈঃ রক্তপিত্তকফৈঃ রুদ্ধগতিরাবৃতমার্গো বাযুরুত্সেধমুচ্ছ্রাযং কুর্যাদিতি যোজনা| বহিঃসিরাশব্দেন অগম্ভীরতযা উত্তানস্রোতসামপি গ্রহণম্| ত্বঙ্মাংসসংশ্রযমিত্যনেন ব্রণশোথাদ্ভেদং দর্শযতি, পচ্যতো ব্রণস্য বাস্তূন্যষ্টৌ, শোথস্য ত্বঙ্মাংসে, ইতি ভেদঃ; তদুক্তম্– “ত্বঙ্মাংসসিরাস্নায্বস্থিসন্ধিকোষ্ঠমর্মাণীত্যষ্টৌ ব্রণবাস্তূনি ভবন্তি|” ইতি| অষ্টসু ব্রণবাস্তুষু ব্রণশোথস্য সম্ভবাত্| সংহতং সংহতাত্মকং, কুতঃ সংহতাত্মকমিত্যাহ– নিচযাত্| অতঃ পূর্বোক্তাত্ রক্তসহিতদোষত্রযসমুদাযাত্; এতেন দোষত্রযজন্যত্বমস্যোক্তম্| তস্য সঙ্খ্যামাহ– সর্বমিতি পূর্বেণ সম্বধ্যতে, সর্বমুত্সেধং শোফমিত্যাহুরিত্যর্থঃ| হেতুবিশেষৈর্দোষত্রযাভিঘাতপ্রভৃতিকারণভেদৈর্যো রূপভেদঃ তস্মান্নবাত্মকমাহুরিতি পূর্বক্রিযযা সম্বন্ধঃ, ‘সর্বহেতুবিশেষৈঃ’ ইতি পাঠান্তরে সর্বেষাং শোথানাং হেতুবিশেষৈরিত্যর্থঃ| দোষৈরিতি পৃথক্ ত্রিভির্দোষৈস্ত্রযঃ, মিলিতৈর্দ্বযৈস্ত্রযঃ, অভিঘাতেনৈকঃ, বিষেণ চৈকঃ||১-২||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পূর্বরূপমাহ– তদিত্যাদি| দবথুরুপতাপঃ| সিরাযামঃ সিরাপ্রসরণবত্ পীডা||৩||

আতঙ্কদর্পণ ব্যাখ্যা (বাচস্পতি বৈদ্য কৃত)

পূর্বরূপমাহ– তদিত্যাদি| দবথুশ্চক্ষুরাদিষু তীব্রদাহঃ, যদুক্তং চরকে– “দবথুশ্চক্ষুরাদিভ্যস্তীব্র ঊষ্মা প্রবর্ততে”| সিরাযামঃ সিরাপ্রসারণবত্ পীডা||৩||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পূর্বরূপানন্তরং কামচারান্নিদানমাহ– শুদ্ধ্যামযেত্যাদি| শুদ্ধির্বমনবিরেচনাদিঃ, আমযা জ্বরাদযঃ; অভুক্তমভোজনং বিগুণং চ ভোজনং, তৈঃ কৃশানামবলানাং চ ক্ষারাদিসেবা নিজস্য শ্বযথোর্হেতুঃ| দধ্যাদযঃ স্বতন্ত্রা এব হেতবঃ, আমমপক্বং, দুষ্টং দোষজনকং মন্দকনবোদকাদি, গরং সংযোগজং বিষম্| অচেষ্টা নিষ্ক্রিযত্বম্| ন চ দেহশুদ্ধিরিতি শোধনার্হেঽপি দোষে দেহাশুদ্ধিঃ| মর্মোপঘাত ইহ দোষকৃত এব জ্ঞেযঃ, বাহ্যহেতুজস্তু মর্মোপঘাত আগন্তুশোথহেতুরেব| বিষমা প্রসূতিরামগর্ভপতনাদিকা| মিথ্যোপচারোঽসম্যক্করণমসম্যগুপচারঃ| প্রতিকর্মণাং বমনাদীনাম্||৪-৫||

আতঙ্কদর্পণ ব্যাখ্যা (বাচস্পতি বৈদ্য কৃত)

অথ কারণমাহ– শুদ্ধীত্যাদি| শুদ্ধির্বমনাদিঃ, আমযা জ্বরাদযঃ, অভুক্তমভোজনম্, এতৈর্যে কৃশাস্তথা অবলাশ্চ, তেষাং ক্ষীরাদিসেবনং নিজস্য শ্বযথোঃ কারণং; দধ্যাদি তু স্বতন্ত্রমেব কারণম্| আমমপক্বং, দুষ্টং দোষজনকং মণ্ডকনবোদকাদি, গরং সংযোগজং বিষম্, অচেষ্টা নিষ্ক্রিযত্বং, ন চ দেহশুদ্ধিরিতি শোধনার্হেঽপি দোষে তত্র দেহাশুদ্ধিঃ| মর্মোপঘাত ইহ দোষকৃত এব জ্ঞেযঃ, বাহ্যহেতুজশ্চ মর্মোপঘাত আগন্তুশোফহেতুরেব| বিষমা প্রসূতিরিতি আমগর্ভপতনাদিকা| প্রতিকর্মণাং বমনাদীনাং, মিথ্যোপচারঃ অসম্যগুপচারঃ||৪-৫||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

সামান্যলিঙ্গমাহ– সেত্যাদি| সগৌরবমিতি অনবস্থিতত্ববিশেষণং, তথা সোত্সেধমিতি চ||৬||

আতঙ্কদর্পণ ব্যাখ্যা (বাচস্পতি বৈদ্য কৃত)

তস্য সামান্যলক্ষণমাহ– সগৌরবমিত্যাদি| ঊষ্মসন্তাপযুক্তং সিরাকৃশত্বং তাসামলাভাত্||৬||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

বাতশোথলিঙ্গমাহ– চল ইত্যাদি| তনুত্বক্ অবহলত্বক্| অসিতঃ কৃষ্ণঃ| সুষুপ্তিঃ স্পর্শাজ্ঞতা; হর্ষো ঝিণিঝিণিবদ্বেদনা, কিংবা রোমহর্ষঃ| অনিমিত্ততঃ প্রশাম্যতীতি বাযোশ্চলত্বেন কদাচিন্নিমিত্তং বিনাঽপি লীনো ভবতি; ‘নিমিত্তত’ ইতি পাঠে স্নেহোষ্ণমর্দনাদের্নিমিত্ততঃ প্রশাম্যতি উপশমং প্রাপ্নোতীতি, উপশযার্থমেতদুক্তম্| প্রোন্নমতি প্রপীডিত ইতি প্রপীডিতঃ সন্নন্তরুন্নমতীত্যর্থঃ| দিবাবলীতি দিবা বলবান্, নত্ববলী| স্নেহোষ্ণমর্দনাদ্যৈশ্চ প্রশাম্যেত্, স চ বাতিকঃ; “যশ্চাপ্যরুণবর্ণাভঃ শোথো নক্তং প্রণশ্যতি|” (চ. সূ. অ. ১৮) ইতি চরকবচনাত্||৭||

আতঙ্কদর্পণ ব্যাখ্যা (বাচস্পতি বৈদ্য কৃত)

অথ বাতশোথলক্ষণমাহ– চলেত্যাদি| চলঃ স্থানাত্ স্থানান্তরগতিঃ, তনুত্বক্ অবহলত্বক্, পরুষঃ কর্কশঃ, অরুণঃ রক্তবর্ণঃ, অসিতঃ কৃষ্ণঃ, সুষুপ্তিঃ স্পর্শাজ্ঞানং, হর্ষো লোমহর্ষঃ, অনিমিত্ততঃ প্রশাম্যতীতি বাযোশ্চলত্বেন চ কদাচিন্নিমিত্তং বিনাঽপি বিলীনো ভবতি, প্রোন্নমতি প্রপীডিত ইতি প্রপীডিতঃ সন্ননন্তরমুন্নমতীত্যর্থঃ| দিবাবলী দিবাবলবান্, যদুক্তং চরকে– “যশ্চাপ্যরুণবর্ণাভঃ শোফো নক্তং প্রশাম্যতি|” ইতি||৭||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পৈত্তিকমাহ– মৃদুরিত্যাদি| উষ্যতে ইতি দহ্যতে||৮||

আতঙ্কদর্পণ ব্যাখ্যা (বাচস্পতি বৈদ্য কৃত)

পৈত্তিকমাহ– মৃদুরিত্যাদি| মৃদুস্পর্শঃ, গন্ধযুক্তঃ, অক্ষ্ণো রোগকৃত্, অতিশযদাহপাকবান্||৮||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

কফজমাহ– গুরুরিত্যাদি| অরোচকান্বিত ইতি অরোচকব্যাধিসহচারী| কৃচ্ছ্রজন্মপ্রশম ইতি চিরোত্পত্তিবিনাশঃ| রাত্রিবলীতি রাত্রৌ স্রোতোঽবরোধজেন দেহক্লেদেনাচেষ্টযা চ কফস্য বৃদ্ধত্বাত্ তজ্জঃ শোথো বলবান্ ভবতি; দিবা তু স্ফুটস্রোতসি শরীরে সচেষ্টে চ ন কফো বলী ভবতি, কিং তর্হি বাযুঃ, তেন তজ্জঃ শোথো দিবাবলী ভবতি||৯||

আতঙ্কদর্পণ ব্যাখ্যা (বাচস্পতি বৈদ্য কৃত)

কফজমাহ– গুরুরিত্যাদি| স্থিরঃ অচলঃ, প্রসেকো লালাস্রাবঃ, স কৃচ্ছ্রজন্মপ্রশম ইতি রাত্রৌ স্রোতোঽবরোধজেন দেহক্লেদেন চেষ্টযা চ কফস্য বৃদ্ধ্যা তজ্জঃ শোথো বলবান্ ভবতি| দিবা স্ফুটস্রোতসি শরীরে চেষ্টাযুক্তে চ কফো ন বলী বাযুস্তেন বলী, তজ্জঃ শোথো দিবাবলী ভবতি||৯||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ব্যামিশ্রৌষধবিধানার্থং ক্বাপি ক্বাপি প্রকৃতিসমসমবেতা অপি শিষ্যহিতৈষিতযা দ্বন্দ্বসন্নিপাতা অতিদেশেন পঠ্যন্তে, যে তু বিকৃতিবিষমসমবেতাস্তান্ কণ্ঠরবেণ পঠন্তি; অতোঽতিদেশেন দ্বন্দ্বত্রযসন্নিপাতানাহ– নিদানাকৃতিসংসর্গাদিত্যাদি| ব্যামিশ্রলক্ষণ ইতি মিলিতবাতাদিত্রযলিঙ্গঃ| অনেনৈব সর্বাকৃতিরিত্যস্যার্থে সিদ্ধে তদভিধানং বাতাদিপ্রত্যেকং কৃত্স্নলিঙ্গনিযমার্থম্||১০||

আতঙ্কদর্পণ ব্যাখ্যা (বাচস্পতি বৈদ্য কৃত)

দ্বন্দ্বজত্রযসন্নিপাতজমাহ– নিদানেত্যাদি| দ্বিদোষযোর্নিদানলক্ষণসংসর্গযোঃ দ্বিদোষজা জ্ঞেযাঃ| সন্নিপাতাত্ সর্বাকৃতিঃ, ব্যামিশ্রলক্ষণঃ মিলিতবাতাদিত্রযলিঙ্গঃ||১০||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অভিঘাতজং শ্বযথুমাহ– অভিঘাতেনেত্যাদি| অভিঘাতেন যঃ শোথঃ স শস্ত্রাদিভির্ভবতি| হিমানিলোদধ্যনিলৈরিতি হিমানিলৈরুদধ্যনিলৈশ্চ; উদধিঃ সমুদ্রঃ| ভল্লাতকপিকচ্ছুজৈ রসৈঃ শূকৈরিতি ভল্লাতকরসৈঃ, কপিকচ্ছ্বা শূকৈশ্চ; কপিকচ্ছুঃ শূকশিম্বী||১১-১২||

আতঙ্কদর্পণ ব্যাখ্যা (বাচস্পতি বৈদ্য কৃত)

অভিঘাতজশোথমাহ– অভিঘাতেনেত্যাদি| স শ্বযথুঃ শস্ত্রাদিভিঃ কৃতো ভবতি| হিমানিলঃ শীতবাযুঃ, উদধ্যনিলঃ সমুদ্রবাতঃ, ভল্লাতকরসৈঃ কপিকচ্ছুশূকৈঃ কপিকচ্ছুঃ শূকশিম্বী, এতেষাং স্পর্শাত্; প্রসরণশীলঃ, ভৃশোষ্মা অতিশযসন্তাপকৃত্, পিত্তশ্বযথুলক্ষণঃ||১১-১২||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

বিষজমাহ– বিষজ ইত্যাদি| সবিষপ্রাণিনঃ সর্পাদযস্তেষাং পরিসর্পণং ভ্রমণং তস্মাত্, সবিষপ্রাণিনাং মূত্রণাচ্চ| দংষ্ট্রাদন্তেতি দংষ্ট্রা কুটিলা ‘দাঢ’ ইতি খ্যাতা, তদ্বিপরীতশ্চ দন্তো গোবলীবর্দন্যাযাত্| বিণ্মূত্রশুক্রোপহতমলবদ্বস্ত্রসঙ্করাদিতি সবিষপ্রাণিনাং বিণ্মূত্রাদ্যুপহতং মলবচ্চ বস্ত্রং যত্তস্য সংস্পর্শাত্| অবলম্বী অধোগমনশীলঃ| শীঘ্রঃ শীঘ্রোত্পত্তিঃ| অযং চাগন্তুরপি বিশিষ্টলিঙ্গচিকিত্সোপযোগাত্ পৃথক্ পঠিতঃ||১৩-১৪||–

আতঙ্কদর্পণ ব্যাখ্যা (বাচস্পতি বৈদ্য কৃত)

বিষজশোথলক্ষণমাহ– বিষজেত্যাদি| সবিষপ্রাণিনঃ সবিষা যে জন্তবঃ শতপদীলূতাদযঃ, তেষাং শরীরোপরি সর্পণং মূত্রণং চ দ্বযমপি শ্বযথোর্হেতুঃ| দংষ্ট্রাদন্তেতি দংষ্ট্রা কুটিলাকারা ‘দাঢ’ ইতি লোকে, দন্তা অগ্রেভবাঃ, অন্যে দংষ্ট্রিদন্তনখেতি পঠন্তি, তত্র দংষ্ট্রিণো ব্যাঘ্রাদযঃ, নখাঃ প্রসিদ্ধাঃ| অবিষপ্রাণিনাং মনুষ্যাদীনামপ্যভিঘাতঃ শোথহেতুঃ| বিণ্মূত্রেত্যাদি সবিষপ্রাণিনাং বিণ্মূত্রাদ্যুপহতমলবদ্বস্ত্রস্য সংস্পর্শাত্; অন্যে ‘মলবদ্বস্তু’ ইতি পঠন্তি, তত্র সবিষপ্রাণিনাং বিণ্মূত্রশুক্রোপহতত্বেনৈতদ্যন্মলবদ্বস্তু তস্য সম্পর্কাদিত্যর্থঃ| সবিষা যে বৃক্ষাস্তেষাং যোঽনিলঃ, তস্য স্পর্শাদপি| গরঃ কৃত্রিমবিষং তস্যাবচূর্ণনাত্, তস্য শরীরস্পর্শাদিত্যর্থঃ| মৃদুঃ মৃদুস্পর্শঃ, চলঃ স্থানান্তরগতিঃ, অবলম্বী অধোগমনশীলঃ, শীঘ্রঃ শীঘ্রোত্পত্তিঃ||১৩-১৪||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

যত্রস্থা দোষা যত্র দেশে শোথং কুর্বন্তি তমাহ– দোষা ইত্যাদি| ঊর্ধ্বমিতি উরঃপ্রভৃত্যূর্ধ্বদেহে| মধ্য ইতি উরঃপক্বাশযমধ্যে| অধ ইতি পক্বাশযাদধঃ| সর্বসরং সর্বশরীরসরণশীলম্||১৫-১৬||

আতঙ্কদর্পণ ব্যাখ্যা (বাচস্পতি বৈদ্য কৃত)

যস্মিন্ দেশে দোষাঃ শোফং কুর্বন্তি তমাহ– দোষা ইত্যাদি| ঊর্ধ্বমিতি উরঃপ্রভৃত্যূর্ধ্বদেহে| মধ্য ইতি উরঃপক্বাশযমধ্যে, অধ ইতি পক্বাশযাদধো বর্চঃস্থানং পুরীষাশযঃ, সর্বশরীরসরণশীলম্||১৫-১৬||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অতঃ পরং কৃচ্ছ্রাদিভেদমাহ– যো মধ্যদেশ ইত্যাদি| মধ্যদেহগস্য কষ্টত্বং তদ্দেশগশোথপ্রভাবাত্| সর্বগ ইতি সর্বদেহগামী| সর্বজ ইতি পাঠান্তরে সর্বজঃ সান্নিপাতিকঃ| রিষ্টভূত ইতি রিষ্টতুল্যঃ, ভূতশব্দ উপমানে; যথা– মাতৃভূতঃ, পিতৃভূত ইতি| ব্যাধেরেবাত্র রিষ্টভূতত্বং, তস্য চ নিমিত্তকৃতত্বাত্ ভূতশব্দ উপাত্ত ইতি কার্তিকঃ| অন্যে তু ভূতশব্দং স্বরূপবচনমাহুঃ| যশ্চোর্ধ্বং পরিসর্পতীতি পুরুষবিষযকমেতত্; চকারাত্ স্ত্রিযাশ্চ উপরিজো যোঽধো যাতি স গৃহ্যতে, তথা গুহ্যজো যঃ সর্বগঃ| বচনং হি– “যস্তু পাদাভিনির্বৃত্তঃ শোথঃ সর্বাঙ্গগো ভবেত্| পুরুষং হন্তি, নারীং চ মুখজো, গুহ্যজো দ্বযম্||” (চ. সূ. অ. ১৮) ইতি| অনন্যোপদ্রবকৃত ইতি অন্যস্য উপদ্রবা অন্যোপদ্রবাস্তদ্বিপরীতা অনন্যোপদ্রবাঃ; এতেনাযমর্থঃ– শোথস্যৈব যে উপদ্রবাস্তৈঃ কৃতঃ| তে চ– “শ্বাসঃ পিপাসা দৌর্বল্যং জ্বরশ্ছর্দিররোচকঃ| হিক্কাতীসারকাসাশ্চ শোথিনং ক্ষপযন্তি হি||” (সু. চি. অ. ২৩) ইতি সুশ্রুতোক্তাঃ| চরকেঽপ্যুক্তম্– “ছর্দিস্তৃষ্ণাঽরুচিঃ শ্বাসো জ্বরোঽতীসার এব চ| সপ্তকোঽযং সদৌর্বল্যঃ শোথোপদ্রবসঙ্গ্রহঃ||” (চ. চি. অ. ১৮) ইতি| অথবা অন্যমুপদ্রবং করোতীতি অন্যোপদ্রবকৃন্নিদানম্| নান্যোপদ্রবকৃদনন্যোপদ্রবকৃত্, ততঃ স্বনিদানাত্ ‘জাতঃ’ ইতি শেষঃ; তেন শোথজনকনিদানাদেব উত্পন্ন ইত্যর্থঃ| পাণ্ডুরোগাদৌ তু যঃ শোথঃ পাদসমুত্থিতঃ সোঽন্যোপদ্রবকৃতো নিদানান্তরাজ্জাতঃ সাধ্য এব| ‘আননোপদ্রবগত’ ইতি পাঠান্তরে অযমর্থঃ– পাদযোরুত্থিতঃ পূর্বং পশ্চাদাননমুপদ্রবেণ প্রসারেণ উপদ্রবত্বেন বা গতঃ| তথাচ তন্ত্রান্তরম্– “ পাদপ্রবৃত্তঃ শ্বযথুর্নৃণাং যঃ প্রাপ্নুযান্মুখম্| স্ত্রীণাং বক্ত্রাদধো যাতি, বস্তিজশ্চ ন সিধ্যতি||” ইতি| ক্ষারপাণিনাঽপ্যুক্তম্– “ঊর্ধ্বগামী নরং পদ্ভ্যামধোগামী মুখাত্ স্ত্রিযম্| উভযং বস্তিসঞ্জাতঃ শোথো হন্তি ন সংশযঃ||” ইতি| গুহ্যজ ইতি বস্তিজাতঃ| দ্বযমিতি নরং নারীং চ| অসাধ্যঃ পুরেরিত ইতি “অর্ধাঙ্গে রিষ্টভূত” ইত্যাদিনা||১৭-২০||

আতঙ্কদর্পণ ব্যাখ্যা (বাচস্পতি বৈদ্য কৃত)

অতঃ স্থানাশ্রযত্বে কৃচ্ছ্রাদিভেদমাহ– য ইত্যাদি| মধ্যগশ্বযথোঃ কষ্টসাধ্যত্বং তদ্দেশপ্রভাবাত্| সর্বগ ইতি সর্বদেহগামী, ‘সর্বজ’ ইতি পাঠান্তরং, তত্র সান্নিপাতিকঃ| রিষ্টভূত ইতি রিষ্টতুল্যঃ; ভূতশব্দো হ্যুপমানে, যথা মাতৃভূতঃ পিতৃভূত ইতি| যশ্চোর্ধ্বং পরিসর্পতীতি পুরুষবিষযমেতত্, চকারাত্ স্ত্রিযাশ্চোপরিজো যোঽধো যাতি স গৃহ্যতে, তথা গুহ্যজো যঃ স সর্বগঃ| উপদ্রববিশেষস্যাসাধ্যত্বমাহ– শ্বাস ইতি| যস্যৈতানি সন্তি শ্বযথৌ সতি, তং পরিবর্জযেত্| স্থানভেদেনাসাধ্যত্বমাহ– অনন্যেত্যাদি| ন অন্যোপদ্রবাঃ অনন্যোপদ্রবাঃ শোফস্যোপদ্রবাস্তৈঃ কৃতঃ, তে চ সুশ্রুতোক্তাঃ– “শ্বাসঃ পিপাসা দৌর্বল্যং জ্বরশ্ছর্দিররোচকঃ| হিক্কাতীসারকাসাশ্চ শোথিনং ক্ষপযন্তি হি|” ইতি| চরকেঽপ্যুক্তম্– “ছর্দিঃ শ্বাসোঽরুচিস্তৃষ্ণা জ্বরোঽতীসার এব চ| সপ্তকোঽযং সদৌর্বল্যঃ শোথোপদ্রবসঙ্গ্রহ||” ইতি| অথবা অন্যমুপদ্রবং করোতীতি অন্যোপদ্রবকৃত্ নিদানং, ন অন্যোপদ্রবকৃত্ অনন্যোপদ্রবকৃত্, ততো নিদানাজ্জাত ইত্যনেন শোফজনকনিদানাদেবোত্পন্ন ইত্যর্থঃ| পাণ্ডুরোগাদৌ তু যঃ শোফঃ সোঽন্যোপদ্রবকৃতো নিদানাজ্জাতঃ সাধ্য এব| পাদসমুত্থিতঃ পুরুষং হন্তি নারীং তু মুখজো হন্তি, গুহ্যজো বস্তিসঞ্জাতঃ, দ্বযমিতি নরং নারীং চ| যদুক্তং তন্ত্রান্তরে– “পাদপ্রবৃত্তঃ শ্বযথুর্নৃণাং যঃ প্রাপ্নুযান্মুখম্| বক্রাদধস্তাদ্যো যাতি বস্তিজশ্চ ন সিদ্ধ্যতি|” ক্ষীরপাণিনাঽপ্যুক্তম্– “ঊর্ধ্বগামী নরং পদ্ভ্যামধোগামী মুখাত্স্ত্রিযম্| উভযোর্বস্তিসঞ্জাতঃ শোথো হন্তি ন সংশযঃ||” ইতি| সাধ্যাসাধ্যলক্ষণমাহ– নব ইতি| নবো নবোত্থানঃ, উপদ্রবরহিতঃ, উপদ্রবাঃ পূর্বোক্তাঃ শ্বাসাদযঃ, তৈর্মুক্তঃ স সাধ্যঃ, অসাধ্যঃ পূর্বৈরিত ঊর্ধ্বাঙ্গে রিষ্টভূতঃ||১৭-২০||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ইতি শ্রীকণ্ঠদত্তবিরচিতাযাং মধুকোশব্যাখ্যাযাং শোথনিদানং সমাপ্তম্||৩৬||

আতঙ্কদর্পণ ব্যাখ্যা (বাচস্পতি বৈদ্য কৃত)

ইত্যাতঙ্কদর্পণে নিদানব্যাখ্যাযাং শোথনিদানম্||৩৬||