২৯. হৃদ্রোগনিদানম্

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

গুল্মস্য হৃদযং স্থানমুক্তম্, অতো হৃদযসঙ্কীর্তনাত্ হৃদ্রোগারম্ভঃ| প্রসঙ্গঃ সাতত্যেন সেবা, অত্যুষ্ণাদযো যথাযোগ্যং বাতাদীনাং ক্রিমেশ্চ নিদানমিতি বোধ্যম্||১||

আতঙ্কদর্পণ ব্যাখ্যা (বাচস্পতি বৈদ্য কৃত)

গুল্মস্য হৃদযং স্থানমুক্তমতো গুল্মানন্তরং হৃদ্রোগারম্ভঃ| তস্য হেতুমাহ– অতীত্যাদি| উষ্ণাদিভিরতিশব্দঃ প্রত্যেকং সম্বধ্যতে| উষ্ণাদযোঽতিসেবিতা বাতাদীনাং হৃদামযানাং ক্রিমিজস্য চ হেতবো ভবন্তি, শ্রমো ধনুঃকর্ষণাদিঃ, অভিঘাতো হৃদ্যেব, সঞ্চিন্তনং নৃপতিভযাদিকং; স চ পঞ্চপ্রকারঃ– বাতাদিভিস্ত্রযঃ, সন্নিপাতেন, ক্রিমিভিশ্চ||১||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

তস্য সম্প্রাপ্তিং সামান্যলক্ষণং চাহ– দূষযিত্বেত্যাদি| দূষযিত্বা রসমিতি রসস্য হৃদযাশ্রযত্বাত্| বিগুণাঃ কুপিতাঃ| হৃদ্রোগমিতি বাচ্যে যদ্বাধাগ্রহণং, তদ্দোষভেদেন বাধাবৈচিত্র্যজ্ঞাপনার্থং, বাধাশব্দেন চাত্র নানাবিধা পীডেতি জেজ্জটঃ, ভঙ্গবত্ পীডেতি গযদাসঃ| হৃদ্রোগমিতি ‘বা শোকষ্যঞ্রোগেষু’ ইতি রোগে পরে হৃদযস্য হৃদ্ভাবঃ, অথবা হৃদো রোগো হৃদ্রোগঃ||২||

আতঙ্কদর্পণ ব্যাখ্যা (বাচস্পতি বৈদ্য কৃত)

তস্য সম্প্রাপ্তিমাহ– দূষযিত্বেত্যাদি| বিগুণাঃ কুপিতা দোষা রসং দূষযিত্বা হৃদযং গতাঃ, হৃদ্রোগমিতি বাচ্যে যদ্বাধাগ্রহণং তদ্দোষভেদেন বাধাবৈচিত্র্যজ্ঞাপনার্থং, বাধাশব্দেনাত্র নানাবিধা পীডেতি জেজ্জটঃ, ভঙ্গবত্পীডেতি গযদাসঃ| হৃদি রোগো হৃদ্রোগ ইতি নিরুক্তিঃ||২||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

বাতিকহৃদ্রোগলক্ষণমাহ– আযম্যত ইত্যাদি| আযম্যতে আকৃষ্যত ইব| তুদ্যতে সূচ্যেব| নির্মথ্যতে দণ্ডেনেব| দীর্যতে দ্বিধেব ক্রিযতে| স্ফোট্যতে আরযেব| পাট্যতে কুঠারেণেব||৩||

আতঙ্কদর্পণ ব্যাখ্যা (বাচস্পতি বৈদ্য কৃত)

বাতিকমাহ– আযম্যত ইত্যাদি| মারুতজে হৃদ্রোগে হৃদযমাযম্যতে আকৃষ্যত ইব, তুদ্যতে সূচ্যেব, নির্মথ্যতে দণ্ডেনেব, স্ফোট্যতে আরযেব, পাট্যতে কুঠারেণেব||৩||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পৈত্তিকলক্ষণমাহ– তৃষ্ণেত্যাদি| ঊষ্মা কিঞ্চিদ্দাহঃ| হৃদযক্লমঃ হৃদযাকুলত্বং, গ্লানিরিতি যাবত্||৪||

আতঙ্কদর্পণ ব্যাখ্যা (বাচস্পতি বৈদ্য কৃত)

পৈত্তিকমাহ– তৃষ্ণেত্যাদি| ঊষ্মা প্রাদেশিকো দাহঃ, হৃদি কিঞ্চিদ্দাহ ইত্যর্থঃ| দাহঃ সার্বাঙ্গিকঃ; চোষঃ চূষ্যতে ইব, হৃদযে ক্লমো হৃদযাকুলত্বং গ্লানিরিত্যর্থঃ| ধূমাযনং ধূমোদ্গিরণমিব, ক্লেদঃ কিঞ্চিত্ দুর্গন্ধঃ সটিত ইব, মুখস্যৈব শোষশ্চ||৪||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

শ্লৈষ্মিকমাহ– গৌরবমিত্যাদি| বলাসাবততে কুপিতকফব্যাপ্তে, “দোষা দুষ্টা দূষযিতারো ভবন্তি” ইত্যাগমাত্||৫||

আতঙ্কদর্পণ ব্যাখ্যা (বাচস্পতি বৈদ্য কৃত)

শ্লৈষ্মিকমাহ– গৌরবমিত্যাদি| বলাসাবততে হৃদি কুপিতকফব্যাপ্তে, দুষ্টা দোষা দূষযিতারো ভবন্তীত্যুক্তত্বাত্| গৌরবং হৃদযস্য; স্তম্ভো জডতা, মার্দবং জলপ্লুতমিব, মাধুর্যং মুখে||৫||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

সান্নিপাতিকমাহ– বিদ্যাদিত্যাদি| সর্বলিঙ্গমিত্যনেন প্রকৃতিসমসমবাযারব্ধত্বমুক্তং, তেন চিকিত্সাঽপ্যস্য প্রত্যেকং বাতাদিজস্য যা সা মিলিতৈব কার্যা| অপচারাচ্চেহ গ্রন্থিরুত্পদ্যতে ততঃ ক্রিমিসম্ভবঃ| উক্তং হি চরকেণ– “ত্রিদোষজে তু হৃদ্রোগে যো দুরাত্মা নিষেবতে| তিলক্ষীরগুডাদীনি গ্রন্থিস্তস্যোপজাযতে|| মর্মৈকদেশে সঙ্ক্লেদং রসশ্চাস্যোপগচ্ছতি| সঙ্ক্লেদাত্ ক্রিমযশ্চাস্য ভবন্ত্যুপহতাত্মনঃ||” (চ. সূ. অ. ১৭) ইতি| তস্যৈবেদং লক্ষণমাহ– তীব্রার্তিতোদং ক্রিমিজং সকণ্ডূমিতি| উত্ক্লেদ ইত্যাদিনা তমোঽন্তং ত্রিদোষজহৃদ্রোগলক্ষণং; তত্র তোদশূলে বাতাত্, উত্ক্লেদহৃল্লাসৌ কফাত্, তমঃ পিত্তাত্, ষ্ঠীবনং কফপিত্তাত্| অরুচিরিত্যাদিনা ক্রিমিজস্যেতি জেজ্জটঃ; গযদাসস্ত্বাহ– শ্যাবনেত্রত্বপর্যন্তেন ত্রিদোষজলক্ষণমিতি| স্যাদেতত্, ত্রিদোষজপদং ন তাবদত্র সুশ্রুতেন পঠিতম্; অতঃ সর্বমেব উত্ক্লেদাদি শোথান্তং ক্রিমিজলক্ষণং ভবিষ্যতি| নৈবং, “বিদ্যাত্ত্রিদোষং ত্বপি সর্বলিঙ্গং তীব্রার্তিতোদং ক্রিমিজং সকণ্ডূম্|” (চ. চি. অ. ২৬) ইতি দৃঢবলস্য বাক্যাত্| উত্ক্লেদ ইত্যাদিস্তু এক এব শ্লোকঃ সুশ্রুতেন পঠিতঃ, নতু পৃথক্ সন্নিপাতলক্ষণং, ততস্ত্রিদোষজস্যানভিধানে সুশ্রুতে ন্যূনত্বং স্যাত্| ত্রিদোষাশ্মরীবত্তস্যাসম্ভব এবেতি চেত্? নৈবং, তন্ত্রান্তরেষু পঠিতত্বাত্| তথাচ হারীতঃ– “সর্বাণি রূপাণি চ সন্নিপাতাচ্চিরোত্থিতং চাপি বদন্ত্যসাধ্যম্|” ইতি| চরকেঽপ্যুক্তম্– “হেতুলক্ষণসংসর্গাদুচ্যতে সান্নিপাতিকঃ|” (চ. সূ. অ. ১৭) ইতি; তথা ‘ত্রিদোষজে তু হৃদ্রোগে যো দুরাত্মা নিষেবতে|’ (চ. সূ. অ. ১৭) ইত্যাদি| কণ্ঠরবেণ তু ত্রিদোষজপদং যন্ন পঠিতং সুশ্রুতেন, তত্ ক্রিমিজস্যাপি ত্রিদোষজত্বখ্যাপনার্থমিত্যাচক্ষতে| ননু, দোষজাবান্তরাবস্থাবিশেষত্বাত্ ক্রিমিজোঽপি দোষজ এব, তত্ কথং হৃদামযঃ পঞ্চবিধ ইতি? নৈবং, রোগজস্যাপি রোগস্য পৃথক্ত্বদর্শনাত্| যদুক্তম্– ‘নিদানার্থকর’ (চ. চি. অ. ৮) ইত্যাদি| দ্বিদোষজস্ত্বনুক্তোঽপি প্রকৃতিসমসমবাযত্বাদ্বোধ্যঃ||৬||

আতঙ্কদর্পণ ব্যাখ্যা (বাচস্পতি বৈদ্য কৃত)

ত্রিদোষজকৃমিজযোর্মিলিতমেব লক্ষণমাহ– বিদ্যাদিত্যাদি| বিদ্যাত্ত্রিদোষমিত্যাদি দৃঢবলোক্তলক্ষণম্, উত্ক্লেদ ইত্যাদিকমেকপদ্যং সুশ্রুতোক্তং; তীব্রার্তিতোদমিতি ভিন্নতন্ত্রীযত্বাত্পৌনরুক্ত্যং ন বাচ্যম্| ত্রিদোষজে সর্বদোষাণাং লিঙ্গানি ভবন্তি| সর্বলিঙ্গমিত্যনেন প্রকৃতিসমবাযারব্ধত্বমুক্তং, তেন চিকিত্সাঽপ্যস্য প্রত্যেকং বাতাদিজস্য যা সা মিলিতৈব কার্যা| অপচারাত্ কৃমিজে গ্রন্থির্ভবতি, ততশ্চ কৃমিসম্ভবঃ, কৃমযো জাযন্তেঽস্মিন্নিতি ক্রিমিজ ইতি নিরুক্তিঃ| উক্তং হি চরকে– “ত্রিদোষজে তু হৃদ্রোগে যো দুরাত্মা নিষেবতে| তিলক্ষীরগুডাদীনি গ্রন্থিস্তস্যোপজাযতে||” ইতি| উত্ক্লেদ ইত্যাদিকমেব ত্রিদোষহৃদ্রোগলক্ষণম্| তত্র তোদশূলে বাতাত্, তোদো ব্যথাবিশেষঃ; উত্ক্লেদহৃল্লাসৌ কফাত্, উত্ক্লেদঃ অপক্বদোষাণাং স্বাংশোদযাচ্চ্যুতিঃ, হৃল্লাসঃ হৃদযাদীপদম্বুনির্গমঃ; তমঃ পিত্তাত্ তমোঽন্ধকারপ্রবিষ্টস্যেব; ষ্ঠীবনং কফপিত্তাত্; এতত্ত্রিদোষলক্ষণম্| অরুচীত্যাদিনা কৃমিজস্যেতি | এতত্সুগমম্||৬||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

সর্বেষামুপদ্রবানাহ– ক্লম ইত্যাদি| শ্লৈষ্মিকাণাং কৃমীণাং যে উপদ্রবাস্তে ক্রিমিজহৃদ্রোগেঽপি স্যুঃ| তে চ হৃল্লাসাস্যস্রবণাবিপাকাদযঃ||৭-৮||

আতঙ্কদর্পণ ব্যাখ্যা (বাচস্পতি বৈদ্য কৃত)

সর্বেষামেবোপদ্রবানাহ– ক্লম ইত্যাদি| শ্লৈষ্মিকাণাং কৃমীণাং যে উপদ্রবাঃ তে কৃমিজে হৃদ্রোগেঽপি মতাঃ| তে চ হৃল্লাসাস্যস্রবণাবিপাকাদয ইতি||৭-৮||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ইতি শ্রীবিজযরক্ষিতকৃতাযাং মধুকোশব্যাখ্যাযাং হৃদ্রোগনিদানং সমাপ্তম্||২৯||

আতঙ্কদর্পণ ব্যাখ্যা (বাচস্পতি বৈদ্য কৃত)

ইতি শ্রীবাচস্পতিবৈদ্যবিরচিতাযাং মাধবনিদানব্যাখ্যাযামাতঙ্কদর্পণাখ্যাযাং হৃদ্রোগনিদানম্||২৯||