২৮. গুল্মনিদানম্

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

গুল্মেঽপ্যানাহো ভবতীত্যানাহানন্তরং গুল্মমাহ– দুষ্টা ইত্যাদি| পঞ্চধেতি বাতপিত্তকফসন্নিপাতরক্তজাঃ| দ্বন্দ্বজাস্তু প্রকৃতিসমসমবেতত্বান্ন পৃথগ্গণ্যন্তে, অর্শোরোগবত্| কোষ্ঠান্তরামাশযাদিমধ্যে, গ্রন্থিরূপিণং গুডকাকারম্| তস্যেত্যাদি| এতদেব বিবৃণোতি– পার্শ্বেত্যাদি| পার্শ্বে দ্বে গণনীযে, অন্যথা পঞ্চত্বানুপপত্তিঃ, অত এব ‘পার্শ্বে’ ইতি দ্বিবচনান্তমেব ক্বচিত্ পঠ্যতে||১||

আতঙ্কদর্পণ ব্যাখ্যা (বাচস্পতি বৈদ্য কৃত)

গুল্মেঽপ্যাধ্মানং ভবতীত্যাধ্মানানন্তরং গুল্মনিদানং, তস্য সম্প্রাপ্তিমাহ– দুষ্টা ইত্যাদি| দুষ্টাঃ স্বকারণৈঃ মিথ্যাহারাধ্যশনাদিভিঃ, মিথ্যাবিহারো বলবদ্বিগ্রহাদিঃ| পঞ্চধেতি, বাতপিত্তকফসন্নিপাতরক্তজান্যেবং পঞ্চ, দ্বন্দ্বজাস্তু প্রকৃতিসমবেতত্বাত্পৃথঙ্ ন গণ্যন্তে, অর্শোরোগবত্| কোষ্ঠান্তঃ আমাশযাদিমধ্যে, গ্রন্থিরূপিণং গুটিকাকারম্| তেষাং স্থানান্যাহ– তস্যেত্যাদি| পার্শ্বে দ্বে গণনীযে, অন্যথা পঞ্চত্বানুপপত্তিঃ| অন্যে পার্শ্বে ইতি দ্বিবচনান্তমেব পঠন্তি||১||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

সামান্যগুল্মরূপমাহ– হৃদিত্যাদি| নাভিশব্দেন বস্তির্বোধ্যঃ, সামীপ্যাত্; যথা গঙ্গাযাং ঘোষ ইত্যাহুঃ; বস্তেরপি গুল্মাশ্রযত্বেনোক্তত্বাত্| অত এব ‘হৃদ্বস্ত্যোরন্তরে’ ইতি পাঠান্তরম্| অন্যে ত্বাহুঃ– বস্তৌ বিদ্রধিরেব স্যান্নতু গুল্ম ইতি| তন্ন, গুল্মলক্ষণপ্রতীতেঃ| এতত্ পঞ্চস্থানকথনং দোষজাভিপ্রাযেণ, রক্তজস্য তু গর্ভাশযঃ স্থানম্; অথবা পার্শ্বস্থিতত্বাত্ গর্ভাশযস্য পার্শ্বগ্রহণেনৈব গ্রহণম্| বৃত্তো বর্তুলঃ| চযাপচযবানিতি কদাচিদুপচীযতে, কদাচিদপচীযতে; এতচ্চ সামান্যোক্তমপি বাতিকে ব্যবতিষ্ঠতে, তল্লক্ষণে তদভিধানাদিতি জেজ্জটঃ; গদাধরস্তু সামান্যলক্ষণমাহ, সর্বগুল্মানাং বাতমূলত্বাত্| ‘চযোপচযবান্’ ইতি পাঠান্তরে দোষস্য চযেনোপচযবানিতি| গুল্ম ইতি লতাদিপিহিতসংস্থানবিশেষাদৌ গুল্মব্যপদেশো লোকে, তত্সাদৃশ্যাত্ সঞ্চিতপরিপিণ্ডিতদোষেঽপি গুল্মসঞ্জ্ঞেত্যাহুঃ; বাপ্যচন্দ্রস্ত্বাহ– সম্পিণ্ডিতদোষো গুডকেন মীযত ইতি নিরুক্তিঃ||২||

আতঙ্কদর্পণ ব্যাখ্যা (বাচস্পতি বৈদ্য কৃত)

সামান্যং গুল্মরূপমাহ– হৃদিত্যাদি| হৃদ্ হৃদযং, বস্তিঃ মূত্রাশযঃ| নাভিশব্দেন বস্তির্বোধ্যঃ সামীপ্যাদেব, যথা গঙ্গাযাং ঘোষ ইতি; বস্তেরপি গুল্মাশ্রযত্বেনোক্তত্বাত্| অন্যে ‘হৃদ্বস্ত্যোরন্তরে’ ইত্যেব পাঠান্তরং পঠন্তি| অন্যে তু বস্তৌ বিদ্রধিরেব স্যান্ন তু গুল্ম ইতি| তন্ন, বস্তেরপি গুল্মস্থানত্বাত্, তথা চ চরকে– “পঞ্চস্থানানি গুল্মস্য পার্শ্বে হৃন্নাভিবস্তযঃ|” ইতি| সঞ্চারী চলনশীলঃ, অথবা অচলঃ স্থিরঃ, বৃত্তো বর্তুলঃ| চযাপচযবানিতি কদাচিত্ চীযতে বৃদ্ধিং গচ্ছতি, কদাচিদপচীযতে হীনো ভবতি| এতল্লক্ষণং সামান্যোক্তমপি বাতিকে ব্যবতিষ্ঠতে, তল্লক্ষণে তদভিধানাদিতি জেজ্জটঃ| গদাধরস্তু সামান্যলক্ষণমেবাহ, সর্বগুল্মানাং বাতারব্ধত্বাত্| “চযোপচযবান্” ইতি পাঠান্তরম্| তত্র দোষস্য চযঃ, তেন উপচযবান্ বৃদ্ধিমানিত্যর্থঃ| স গুল্মঃ লতাপিহিতস্থানবিশেষাদৌ গুল্মব্যপদেশো লোকে, তত্সাদৃশ্যবত্সঞ্চিতপরিপিণ্ডিতদোষেঽপি গুল্মসঞ্জ্ঞেত্যাহুঃ| বাপ্যচন্দ্রস্ত্বাহ– সম্পিণ্ডিতো দোষো গুডকত্বেন মীযত ইতি নিরুক্তিঃ||২||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পূর্বোক্তং পঞ্চবিধত্বং বিবৃণোতি– স ইত্যাদি| ব্যস্তৈরিত্যনেনৈকজো দ্বন্দ্বজোঽপি গ্রাহ্যঃ| পঞ্চধা গুল্ম ইত্যনেন বিরোধ ইতি চেত্| ন, নহি তত্রাবধারণং কৃতং, পঞ্চধৈবেতি| অত এব সূত্রস্থানে চরকেণ “পঞ্চ গুল্মা” (চ. সূ. অ. ১৯) ইত্যভিধাযাপি “সংসৃষ্টলিঙ্গানপরাংশ্চ গুল্মাংস্ত্রীনাদিশেদৌষধকল্পনার্থম্|” (চ. চি. অ. ৫) ইত্যুক্তং, সমানচিকিত্স্যত্বেন তত্রান্তর্ভাবাত্| রক্তেন চাপর ইতি স্ত্রীণামেব| বক্ষ্যতি হি– “স রৌধিরঃ স্ত্রীভব এব গুল্মঃ|” (চ. চি. অ. ৫) ইতি| রক্তং চাত্রার্তবং ন ধাতুরূপং, ধাতুরূপরক্তজস্তু গুল্মো যদ্যপ্যন্যোঽস্তি তথাঽপি নৈতত্সম্প্রাপ্তিকো ভবতীতি পৃথগুপদিশ্যতে| পৃথগ্জ্ঞানানভিধানং তু পিত্তগুল্মসমাননিদানচিকিত্স্যতত্বেন তত্রান্তর্ভাবাত্, সুশ্রুতে রক্তাতীসারবত্| বিশেষলক্ষণং চ যদাহ চরকঃ– “তৃষ্ণাজ্বরপরীদাহশূলস্বেদাগ্নিমার্দবৈঃ| গুল্মিনামরুচৌ চাপি রক্তমেবাবসেচযেত্||” (চ. চি. অ. ৫) ইতি| ধাতুরূপরক্তজঃ স্ত্রীণাং পুংসাং চ ভবতীতি ভট্টারহরিচন্দ্রঃ| তথাচ ক্ষারপাণিঃ– “স্ত্রীণামার্তবজো গুল্মো ন পুংসামুপজাযতে| অন্যস্ত্বসৃগ্ভবো গুল্মঃ স্ত্রীণাং পুংসাং চ জাযতে||” ইতি| বাপ্যচন্দ্রস্ত্বাহ– বাতাদিদোষজস্যৈবাপচারাদ্রক্তে দুষ্টে রক্তজব্যপদেশঃ, যথা চরকে– কফপিত্তমেহানামতিকর্ষণাদুত্তরকালং বাতসংসর্গে সতি বাতমেহত্বমুক্তম্| যদুক্তম্– “যা বাতমেহান্ প্রতি পূর্বমুক্তা বাতোল্বণানাং বিহিতা ক্রিযা সা| বাযুর্হি মেহেষ্বতিকর্ষিতেষু কুপ্যত্যসাধ্যান্ প্রতি নাস্তি চিন্তা||” (চ. চি. অ. ৬) ইতি| ক্ষারপাণেরপ্যেবমেবাভিপ্রাযঃ| যদি তু পৃথক্ স্যাত্তদা তমপি নবমং লিঙ্গস্থানাদিভিরভিধাস্যত্, ন চোক্তম্| জেজ্জটগযদাসাভ্যাং তু হরিচন্দ্রমতমেবানুমতমিতি| সর্বগুল্মেষু বাতকারণত্বং জ্ঞেযম্| যদুক্তং চরকে– “গুল্মিনামনিলশান্তিরুপাযৈঃ সর্বশো বিধিবদাচরিতব্যা| মারুতে হ্যবজিতেঽন্যমুদীর্ণং দোষমল্পমপি কর্ম নিহন্যাত্||” (চ. চি. অ. ৫) ইতি; সুশ্রুতেঽপ্যুক্তম্– “কুপিতানিলমূলত্বাত্ সঞ্চিতত্বান্মলস্য চ| তুল্যত্বাদ্বা বিশালত্বাদ্গুল্ম ইত্যভিধীযতে||” (সু. উ. তং. অ. ৪২) ইতি| ন চৈতাবতা নানাত্মজত্বপ্রসঙ্গঃ, বাতস্যানুবন্ধরূপত্বাত্ জ্বরে পিত্তবত্| ননু বাতাব্যভিচারাত্ দ্বিদোষজস্ত্রিদোষজো বা গুল্মঃ স্যান্ন কেবলং কফজঃ পিত্তজো বেতি, ততশ্চ পঞ্চধেতি বিরোধঃ| নৈতত্, অনুবন্ধরূপেণ বাতজব্যপদেশো, ন ত্বনুবন্ধ্যরূপেণেতি||৩||

আতঙ্কদর্পণ ব্যাখ্যা (বাচস্পতি বৈদ্য কৃত)

তস্য সঙ্খ্যামাহ– স ইত্যাদি| স গুল্মো ব্যস্তৈর্বাতপিত্তশ্লেষ্মভিঃ, উচ্ছ্রিতৈঃ প্রকুপিতৈস্ত্রিভিরপি জাযতে পুরুষাণাং, ব্যস্তৈরিত্যনেন একজো দ্বন্দ্বজশ্চ গ্রাহ্যঃ| এবং পঞ্চধা গুল্ম ইত্যনেন বচনেন বিরোধ ইতি চেত্| ন, নহি তত্রাবধারণং কৃতং পঞ্চধৈবেতি; অত এব সূত্রস্থানে চরকেণ পঞ্চ গুল্মা ইত্যভিধাযাপি “সংসৃষ্টলিঙ্গানপরাংস্তু গুল্মাংস্ত্রীনাদিশেদৌষধকল্পনার্থম্|” ইত্যভিহিতম্| জ্ঞেযো রক্তেন চাপরঃ ইতি স্ত্রীণামেব| যদুক্তমিহৈব– “স রৌধিরঃ স্ত্রীভবগুল্ম এব|” ইতি| রক্তং চাত্রার্তবং, পৃথগ্জ্ঞানানভিধানং তু পিত্তগুল্মসমাননিদানচিকিত্স্যত্বেন তত্রান্তর্ভাবাত্| চরকসুশ্রুতযো রক্তাতিসারবত্| বিশেষলক্ষণং যদাহ চরকঃ– “তৃষ্ণাজ্বরপরীদাহশূলস্বেদাগ্নিমার্দবৈঃ| গুল্মিনামরুচৌ চাপি রক্তমেবাবসেচযেত্||” ইতি| ধাতুরূপরক্তজশ্চ স্ত্রীণাং পুংসাং চ ভবতীতি ভট্টারকহরিশ্চন্দ্রঃ| তথা চ ক্ষীরপাণিঃ– “স্ত্রীণামার্তবজো গুল্মো ন পুংসামুপজাযতে| অন্যস্ত্বসৃগ্ভবো গুল্মঃ স্ত্রীণাং পুংসাং চ জাযতে||” ইতি| বাপ্যচন্দ্রস্ত্বাহ– বাতাদিদোষজস্যৈবাপচারাদ্রক্তে দুষ্টে রক্তজব্যপদেশঃ; যথা চরকে– কফপিত্তপ্রমেহাণামতিকর্ষণাদুত্তরকালং বাতসংসর্গে সতি বাতমেহত্বমুক্তম্| যদুক্তম্– “যা বাতমেহান্ প্রতি পূর্বমুক্তা বাতোল্বণানাং বিহিতা ক্রিযা সা| বাযুর্হি মেহেষ্বতিকর্ষিতেষু কুপ্যত্যসাধ্যান্ প্রতি নাস্তি চিন্তা||” ইতি| ক্ষীরপাণেরপ্যযমেবাভিপ্রাযঃ| যদি তু পৃথক্ স্যাত্, তদা তস্যাপি লিঙ্গস্থানাদিভিরভিধানং স্যাত্, তচ্চ নোক্তং; জেজ্জটগযদাসাভ্যাং তু হরিশ্চন্দ্রমতমেবানুমতমিতি| সর্বগুল্মেষু বাতকারণত্বং জ্ঞেযম্| যদুক্তং চরকে– “গুল্মিনামনিলশান্তিরুপাযৈঃ সর্বশো বিধিবদাচরণীযা| মারুতে হ্যবজিতেঽন্যমুদীর্ণং দোষমল্পমপি কর্ম নিহন্যাত্||” ইতি| সুশ্রুতেঽপ্যুক্তম্– “কুপিতানিলমূলত্বাতত্সঞ্চিত্বান্মলস্য চ| তুল্যবদ্বা বিশালত্বাদ্গুল্ম ইত্যভিধীযতে||” ইতি||৩||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পূর্বরূপমাহ– উদ্গারেত্যাদি| পুরীষবন্ধো বিড্বন্ধঃ| তৃপ্তিরনন্নাভিলাষঃ| সুশ্রুতেঽপি হি ‘দ্বেষোঽন্নে’ (সু. উ. তং. অ. ৪২) ইতি পঠিতম্| অক্ষমত্বমসামর্থ্যম্| আটোপোঽত্র রুজাপূর্বকঃ ক্ষোভঃ, তলতলং বা; নতু গুডগুডাশব্দঃ, তস্যান্ত্রকূজনেনৈব গৃহীতত্বাত্; নাপ্যাধ্মানং, তস্যোপাত্তত্বাত্| অপক্তিশক্তিঃ মন্দাগ্নিতা; ‘অপক্তৃশক্তিঃ’ ইতি পাঠে স এবার্থঃ||৪||

আতঙ্কদর্পণ ব্যাখ্যা (বাচস্পতি বৈদ্য কৃত)

তস্য পূর্বরূপমাহ– উদ্গারেত্যাদি| উদ্গারবহুলতা, পুরীষবন্ধো বিড্বিবন্ধঃ, তৃপ্তিরনন্নাভিলাষঃ, সুশ্রুতে হি– ‘দ্বেষোঽন্নে’ ইতি পঠিতম্| অক্ষমত্বমসামর্থ্যম্| তৃপ্ত্যক্ষমত্বং সৌহিত্যাসহিষ্ণুতেতি কেচিত্| অন্ত্রবিকূজনমন্ত্রাণামব্যক্তশব্দানুকরণম্| আটোপো রুজাপূর্বকঃ ক্ষোভঃ, ন তু গুডগুডাশব্দঃ, তস্যান্ত্রকূজনেনোক্তত্বাত্| আধ্মানমুপান্তযোরাধ্মানমিব, অপক্তিশক্তিঃ মন্দাগ্নিত্বাদাহারস্যাপাকঃ||৪||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

গুল্মসাধারণরূপমাহ– অরুচিরিত্যাদি||৫||

আতঙ্কদর্পণ ব্যাখ্যা (বাচস্পতি বৈদ্য কৃত)

সর্বগুল্মানাং সাধারণলক্ষণমাহ– অরুচিরিত্যাদি| কৃচ্ছ্রবিণ্মূত্রবাততা কষ্টেন বিণ্মূত্রবাতপ্রবর্তনম্| অন্ত্রবিকূজনং গুডগুডাশব্দঃ, আনাহ ঊর্ধ্বাধোবাতনিরোধঃ, ঊর্ধ্ববাতত্বমুদ্গারবাহুল্যম্||৫||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

বাতিকমাহ– রূক্ষেত্যাদি| বিষমাতিমাত্রমিতি অন্নপানবিশেষণম্| বিচেষ্টনং বিরুদ্ধচেষ্টাঃ বলবদ্বিগ্রহাদি| অতিমলক্ষযো বিরেকাদিনা| নিরন্নতা নিরাহারতা| বিকল্পশব্দঃ স্থানাদিভিঃ প্রত্যেকং যোজ্যঃ| স্থানবিকল্পো যথা– কদাচিন্নাভৌ, কদাচিত্পার্শ্বযোঃ, কদাচিদ্বস্তাবিত্যাদিস্থানান্তরগমনম্| সংস্থানবিকল্পো যথা– কদাচিদল্পঃ, কদাচিন্মহান্, বৃত্তো, দীর্ঘো বেতি| রুজাবিকল্পো যথা– কদাচিদল্পা, কদাচিন্মহতী, তোদরূপা, ভেদরূপা, অনেকরূপা বেতি| ন চ তত্রোপশেতে ন সুখযতি||৬-৮||

আতঙ্কদর্পণ ব্যাখ্যা (বাচস্পতি বৈদ্য কৃত)

বাতগুল্মস্য হেতুপূর্বকং লক্ষণমাহ– রূক্ষেত্যাদি| বিষমাতিমাত্রমিতি অন্নপানবিশেষণম্| বিষমং বহু স্তোকমকালভোজনম্, এবং জলপানমপি, অতিমাত্রং মাত্রাধিকম্, এবং জলস্যাপি| বিচেষ্টনং বিরুদ্ধচেষ্টা বলবদ্বিগ্রহাদিঃ, অভিঘাতো লগুডাদিনা, অতিমলক্ষযো বিরেকাদিনা, নিরন্নতা নিরাহারতা| য ইত্যাদি| স্থানবিকল্পো যথা– কদাচিন্নাভৌ, কদাচিদ্বস্তৌ, কদাচিত্পার্শ্বযোরিত্যাদিস্থানান্তরগমনম্| সংস্থানবিকল্পো যথা– কদাচিদ্বর্তুলঃ, কদাচিদ্দীর্ঘ ইত্যর্থঃ| রুজাবিকল্পো যথা– কদাচিদল্পা রুক্, কদাচিন্মহতী, তোদরূপা, ভেদরূপা, অনেকরূপা বেতি| বিড্বাতসঙ্গং বিড্বাতাপ্রবৃত্তিঃ, কণ্ঠবক্ত্রযোঃ শোষঃ, শ্যাবারুণত্বং শরীরস্য, শীতজ্বরঃ, হৃত্কুক্ষ্যাদীনাং পীডা, অংসঃ ভুজযোরুপরিভাগঃ| জীর্ণে আহারে প্রকুপ্যতি, ভুক্তে চ শান্তিং গচ্ছতি, স বাতিকো গুল্মঃ| রূক্ষ আহারঃ কষাযতিক্তকটুকা রসাঃ, তত্র তস্মিন্ বাতগুল্মে নোপশেতে ন সুখযতি, বাতকারণত্বাত্||৬-৮||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পৈত্তিকমাহ– কট্বিত্যাদি| আমাভিঘাত ইতি বিদগ্ধাজীর্ণজনিতদুষ্টরসেনাভিভবঃ; অন্যে তু ‘আমাভিঘাতৌ’ ইতি পঠন্তি, তত্রাম উক্তরূপঃ, অভিঘাতো লগুডাদেঃ রক্তদূষকো জ্ঞেযঃ| জীর্যতীতি সপ্তম্যন্তম্| ব্রণবত্ স্পর্শাসহ ইতি যোজ্যম্||৯-১০||

আতঙ্কদর্পণ ব্যাখ্যা (বাচস্পতি বৈদ্য কৃত)

পৈত্তিকগুল্মমাহ– কট্বিত্যাদি| বিদাহি বংশকরীরাদি, অতিশব্দো মদ্যাদিষু যোজ্যঃ| আমাভিঘাত ইতি বিদগ্ধাঽজীর্ণজনিতদুষ্টরসেনাভিভবঃ, অন্যে আমাভিঘাতাবিতি পঠন্তি, তত্রাম উক্তরূপঃ, অভিঘাতো লগুডাদিনা রক্তদূষকো জ্ঞেযঃ| এতে পৈত্তিকগুল্মস্য হেতবঃ| তস্য লক্ষণমাহ– জ্বর ইত্যাদি| জ্বরঃ প্রসিদ্ধঃ, পিপাসা পাতুমিচ্ছা, বদনাঙ্গরাগঃ মুখে শরীরে চারুণতা, আহারে জীর্যতি পচ্যমানে মহচ্ছূলং ভবতি, ব্রণবত্ স্পর্শাসহ ইতি যোজ্যম্| এতত্ পিত্তগুল্মরূপম্||৯-১০||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

শ্লৈষ্মিকমাহ– শীতমিত্যাদি| সম্পূরণং তৃপ্তিভোজনম্| সর্ব ইতি বাতজাদ্যুক্তঃ| নিচযাত্মকস্য সন্নিপাতজস্য| কঠিনোন্নতত্বং গুল্মস্য||১১-১২||

আতঙ্কদর্পণ ব্যাখ্যা (বাচস্পতি বৈদ্য কৃত)

শ্লৈষ্মিকমাহ– শীতমিত্যাদি| শীতাদিভির্দ্রব্যৈঃ, অচেষ্টনমব্যাযামঃ| সম্পূরণমিতি আহারাদিনা কোষ্ঠস্য তৃপ্তিরিব, এতত্ সর্বং কফগুল্মস্য হেতুঃ| এতস্যৈব শ্লোকপাদেন সান্নিপাতিকস্য হেতুমাহ– সর্ব ইতি| নিচযাত্মকস্য সান্নিপাতিকস্য গুল্মস্য বাতজাদ্যুক্তহেতুঃ কারণং, তথা সর্বদোষোক্তলক্ষণানি চ ভবন্তি| পুনঃ শ্লৈষ্মিকস্যৈব লক্ষণমাহ– স্তৈমিত্যেতি| স্তৈমিত্যং নিশ্চলত্বং, শীতজ্বরাদযঃ সুবোধ্যাঃ, শৈত্যং শীতগাত্রতা, কঠিনোন্নতত্বং গুল্মস্যৈব||১১-১২||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

দ্ব্যাত্মকেষু ত্রিষ্বেকজহেতুলক্ষণাতিদেশার্থমাহ– নিমিত্তেত্যাদি| নিমিত্তানি চ রূপাণি চেতি দ্বন্দ্বঃ| দোষবলাবলং চেত্যনেন সমদ্বিদোষদ্বন্দ্বজত্রযেণ একোল্বণাদিদ্বিদোষজোঽপি গ্রাহ্য ইতি দর্শযতি, অন্যথা বহুত্বাপত্তেঃ| ঔষধকল্পনার্থমিতি একদোষজাভিহিতচিকিত্সামেলকেন তান্ চিকিত্সেদিত্যর্থঃ||১৩||

আতঙ্কদর্পণ ব্যাখ্যা (বাচস্পতি বৈদ্য কৃত)

দ্বন্দ্বাদিকেষু ত্রিষ্বেকজহেতুলক্ষণাতিদেশার্থমাহ– নিমিত্তেত্যাদি| লিঙ্গানি লক্ষণানি, দ্বিদোষজে গুল্মে দোষাণাং বলাবলং চ জ্ঞাত্বা ব্যামিশ্রলিঙ্গান্ মিলিতলিঙ্গান্ পরান্ স্ত্রীন্ গুল্মানৌষধকল্পনার্থমাদিশেত্, একদোষজাভিহিতচিকিত্সামেলকেন চ চিকিত্সেদিত্যর্থঃ||১৩||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

সান্নিপাতিকমাহ– মহারুজমিত্যাদি| অশ্মবত্ ঘনোন্নতং পাষাণবত্ কঠিনমুন্নতং চ| মন ইত্যাদি মনোঽপহারিণং মনোবৈকল্যকারিণং, শরীরাপহারিণং কৃশত্ববৈবর্ণ্যকরম্, অগ্ন্যপহারিণমগ্নিবৈষম্যকরং, বলাপহারিণমসামর্থ্যকরম্| ননু, অসাধ্যমিতি বিরুদ্ধং, “সন্নিপাতোত্থিতে গুল্মে ত্রিদোষঘ্নো বিধির্হিতঃ|” (সু. উ. তং. অ. ৪২) ইতি সুশ্রুতবচনাত্| নৈবম্, অযং চ বিকৃতিবিষমসমবেতোঽসাধ্যঃ, প্রকৃতিসমসমবেতস্তু সাধ্য ইত্যাহুঃ| ননু, সোঽপ্যসাধ্যঃ, যদাহ সুশ্রুতঃ– “সর্বাত্মকে সর্বরুজোপপত্তিস্তং চাপ্যসাধ্যং প্রবদন্তি তজ্জ্ঞাঃ|” (সু. উ. তং. অ. ৪২) ইতি| উচ্যতে– তং চাপীতি অপিশব্দাদচিরোত্থিতঃ সাধ্যো বিশ্বামিত্রসংবাদাদিতি গযদাসঃ||১৪||

আতঙ্কদর্পণ ব্যাখ্যা (বাচস্পতি বৈদ্য কৃত)

ত্রিদোষজস্যাসাধ্যত্বমাহ– মহারুজমিত্যাদি| মহারুজং তীব্রপীডাকরং, দাহপরীতদেহং সন্তাপেন ব্যাপ্তাখিলদেহং, শীঘ্রেণ বিদাহকরং, দারুণং মারণাত্মকম্, অশ্মবদ্ ঘনোন্নতং পাষাণবত্ কঠিনোন্নতম্| মন ইত্যাদি মনোপহারিণং মনোবৈকল্যকরং, শরীরাপহারিণং কৃশত্ববৈবর্ণ্যকরম্, অগ্ন্যপহারিণমগ্নের্বৈষম্যাদিকরং, বলাপহারিণমসামর্থ্যকরম্| এতল্লক্ষণং বিকৃতিবিষমসমবেতস্য, প্রকৃতিসমসমবেতস্তু সাধ্যঃ||১৪||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

রক্তগুল্মমাহ– নবেত্যাদি| আমগর্ভং বিসৃজেদিতি নবমমাসাদর্বাক্ প্রসূতে| ঋতৌ আর্তবপ্রবৃত্তিকালে, অহিতভোজনেতি সম্বন্ধঃ| এতচ্চোপলক্ষণার্থং, তেনাহারাচারাদিকং জ্ঞেযম্| যদাহ চরকঃ– “ঋতাবনাহারতযা ভযেন বিরূক্ষণৈর্বেগবিধারণৈশ্চ| সংস্তম্ভনোল্লেখনযোনিদোষৈর্গুল্মঃ স্ত্রিযং রক্তভবোঽভ্যুপৈতি||” (চ. চি. অ. ৫) ইতি| পৈত্তস্য পৈত্তিকগুল্মস্য| বিশেষণং পৈত্তিকগুল্মাদ্বিশেষলক্ষণম্| পিণ্ডিতঃ সমুদিতঃ| এবকারোঽত্র অবধারণে| এতদেব স্ফুটযতি– নাঙ্গৈর্নাবযবৈশ্চিরাত্ স্পন্দত ইতি সম্বন্ধঃ| সমগর্ভলিঙ্গ ইতি আর্তবাদর্শনমুখস্রবণস্তনমুখকৃষ্ণত্বদোহদাদিগর্ভলক্ষণযুক্তঃ, এতচ্চ ব্যাধিপ্রভাবাত্; যথা– ক্ষযার্শসোঃ স্ত্রীরিরংসাকৃষ্ণত্বঙ্নখাদযঃ| অন্যে তু সমগর্ভলিঙ্গোঽবিকৃতগর্ভলিঙ্গ ইত্যাহুঃ| উক্তবিশেষণৈরেব স্ত্রীভবত্বে লব্ধে স্ত্রীগ্রহণেন কুমারীমতিবৃদ্ধাং চ নিষেধযতি, অনুদ্ভূতক্ষীণরজস্কত্বাত্তযোঃ| ব্যতীতেঽতিক্রান্তে| গর্ভসমানলিঙ্গত্বেন সংশযঃ– গর্ভো বা, রক্তগুল্মো বা, ইতি; তচ্ছঙ্কানিরাসার্থং দশমে মাসে ব্যতীতে ইত্যুক্তং; নবমদশমযোঃ প্রসবকালত্বাদিত্যেকে| তন্ন, ‘যঃ স্পন্দতে পিণ্ডিত এব নাঙ্গৈঃ’ ইত্যাদিনৈব বিশেষদর্শনেন সংশযস্য নিবর্তিতত্বাত্| গর্ভো হি নিরন্তরং প্রত্যঙ্গৈর্নিঃশূলং স্পন্দতে, গুল্মস্তু এতদ্বিপরীতেন| কিঞ্চ নবমে দশমে প্রসূত ইত্যুত্সর্গঃ, নতু নিযমঃ, তদধিককালেঽপি প্রসবদর্শনাত্, আগমাচ্চ| উক্তং হি চরকে– “তং স্ত্রী প্রসূতে সুচিরেণ গর্ভং পুষ্টো যদা বর্ষগণৈরপি স্যাত্|” (চ. শা. অ. ২) ইতি| তস্মান্নেদং দশমমাসব্যতিক্রমে চিকিত্সাবিধানস্য প্রযোজনং, কিন্তু ব্যাধিমহিম্না তাবতৈব কালেন তস্য চিকিত্সযা সুখোচ্ছেদনমিতি| যথা জ্বরে পুরাণে এব ক্ষীরপানবিরেচনে| উক্তং হি তন্ত্রান্তরে– “রক্তগুল্মে পুরাণত্বং সুখসাধ্যস্য লক্ষণম্|” ইতি| পুরাণতা চাস্য দশমমাসব্যতিক্রমেণৈব ভবতি| জেজ্জটেনাপ্যুক্তম্– যদ্যর্বাক্ রক্তভেদনং ক্রিযতে তদা গর্ভশয্যাং ক্ষিণাতি, তল্লীনত্বাদ্রক্তস্য; একাদশমাসে তু পরিপিণ্ডিতগুল্মে স্নেহাদিনোপস্কৃতদেহাযা ন গর্ভশয্যাযা বিকৃতিমাদধাতি রক্তভেদনমিতি||১৫-১৬||

আতঙ্কদর্পণ ব্যাখ্যা (বাচস্পতি বৈদ্য কৃত)

স্ত্রীণাং রক্তজগুল্মস্য সম্প্রাপ্তিমাহ– নবেত্যাদি| যা স্ত্রী নবপ্রসূতা সতী অহিতভোজনা ভবতি, যা চামগর্ভং বিসৃজেদিতি নবমাসাদর্বাক্ প্রসূতে, ঋতাবার্তবপ্রবৃত্তিকালে অহিতভোজনেতি সম্বন্ধঃ| অন্যথা ঋতৌ তদসম্ভবাত্| এতচ্চোপলক্ষণং, তেনানাহারাদিকমপি জ্ঞেযম্| যদাহ চরকঃ– “ঋতাবনাহারতযা ভযেন বিরূক্ষণৈর্বেগবিধারণৈশ্চ| সংস্তম্ভনোল্লেখনযোনিদোষৈর্গুল্মঃ স্ত্রিযং রক্তভবোঽভ্যুপৈতি||” ইতি| তস্য লক্ষণমাহ– পৈত্তস্যেত্যাদি| পৈত্তিকগুল্মস্যাস্যৈবাপরং বিশেষণং, তদেব স্ফুটযতি– চিরাত্ পিণ্ডীভূত ইব স্পন্দতে হস্তপাদাদিভিরিত্যর্থঃ| সশূলঃ পীডাযুক্তঃ| সমগর্ভলিঙ্গ ইতি আর্তবাদর্শনমুখপাণ্ডুস্তনকৃষ্ণত্বদোহদাদিলক্ষণযুক্তঃ, এতচ্চ ব্যাধিপ্রভাবাত্, যথা– ক্ষযার্শসোঃ স্ত্রীরিরংসাকৃষ্ণত্বঙ্নখাদযঃ| অন্যে তু সমগর্ভলিঙ্গ ইতি অবিকৃতগর্ভলিঙ্গ ইত্যাহুঃ| স স্ত্রীভব এব রক্তজো গুল্মো দশমে মাসে ব্যতীতে সতি চিকিত্স্যঃ স্যাত্| রৌধির ইত্যনেন বিশেষণেনার্তবাযুক্তাং কুমারীমতিবৃদ্ধাং চ নিষেধযতি, অনুদ্ভূতক্ষীণরজস্কত্বাত্তযোঃ| ব্যতীতেঽতিক্রান্তে| গর্ভসমানলিঙ্গত্বেন সংশযঃ– গর্ভো বা রক্তগুল্মো বেতি, তচ্ছঙ্কানিরাসার্থং মাসে ব্যতীতে দশমে ইত্যুক্তং, নবমদশমযোঃ প্রসবকালত্বাদিত্যেকে; তন্ন, “যঃ স্পন্দতে পিণ্ডিত এব নাঙ্গৈঃ” ইত্যাদিনৈব সংশযস্য নিবর্তিতত্বাত্| গর্ভো হ্যঙ্গেন নিরন্তরং নিঃশূলং স্পন্দতে, গুল্মস্তু এতদ্বিপরীতেনেতি| কিঞ্চ নবমে দশমে প্রসূযত ইতি সামান্যং ন তু নিযমঃ, তদধিককালেঽপি প্রসবদর্শনাত্, আগমাচ্চ| যদুক্তং চরকে– “তং স্ত্রী প্রসূতে সুচিরেণ গর্ভং পুষ্টো যদা বর্ষগণৈরপি স্যাত্|” ইতি| তস্মান্নেদং দশমাসব্যতিক্রমে চিকিত্সাভিধানস্য প্রযোজনং, কিন্তু ব্যাধিমহিম্না তাবতা কালেন তস্য চিকিত্সযা সুখোচ্ছেদ্যত্বাত্| যথা জ্বরে পুরাণ এব ক্ষীরপানবিরেচনে; উক্তং হি তন্ত্রান্তরে– “রক্তগুল্মে পুরাণত্বং সুখসাধ্যস্য লক্ষণম্|” ইতি| পুরাণতা চাস্য দশমাসাতিক্রমেণৈব ভবতি| যদুক্তং জেজ্জটেন– যদ্যর্বাক্ রক্তভেদনং ক্রিযতে, তদা গর্ভাশযং ক্ষিণোতীতি, তল্লীনত্বাদ্রক্তস্য, দশমাসাদূর্ধ্বং পিণ্ডিতে গুল্মে স্নেহাদিনোপস্কৃতদেহাযা ন গর্ভাশযে ক্ষতিমাদধাতি রক্তভেদনমিতি||১৫-১৬||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

চিরজস্যাবস্থাযামসাধ্যত্বমাহ– সঞ্চিত ইত্যাদি| মহাবাস্তুপরিগ্রহঃ সকলোদরব্যাপী| কৃতমূলো ধাত্বন্তরাবগাহী| সিরানদ্ধঃ সিরাজালবান্| গৃহীত্বেত্যাদি| হৃদযাদৌ গৃহীত্বা শোথো গুল্মিনং কর্ষতি, ‘মরণায’ ইতি শেষঃ| শ্বাসেত্যাদি| গ্রন্থিমূঢতা গ্রন্থিরূপস্য গুল্মস্যাকস্মাদ্বিলযনমিতি| ননু চ, অন্তর্বিদ্রধিগুল্মযোঃ কো ভেদঃ? সমানস্থানসম্ভবত্বাত্| উচ্যতে– বিদ্রধিঃ পচ্যতে, গুল্মো ন পচ্যতে নিরাশ্রযত্বাত্| যদাহ সুশ্রুতঃ– “ন নিবন্ধোঽস্তি গুল্মস্য বিদ্রধিঃ সনিবন্ধনঃ| গুল্মস্তিষ্ঠতি দোষেষু বিদ্রধির্মাংসশোণিতে|| বিদ্রধিঃ পচ্যতে তস্মাদ্গুল্মঃ ক্বাপি ন পচ্যতে|” (সু. নি. অ. ৯) ইতি| ননু, গুল্মোঽপি পচ্যত এব| যদাহ চরকঃ– “বিদাহশূলসঙ্ক্ষোভস্বপ্ননাশারতিজ্বরৈঃ| বিদহ্যমানং জানীযাদ্গুল্মং তমুপনাহযেত্||” (চ. চি. অ. ৫) ইতি| উচ্যতে– গুল্মো ন পচ্যতে নিরাশ্রযত্বাত্; যদা তু কারণবশাদাশ্রযং মাংসাদিকমাসাদযতি, বাতোপশমনার্থং কৃতস্বেদাদিভির্বা রক্তদুষ্টির্ভবতি, তদা পচ্যমানো বিদাহনিমিত্তকং বিদ্রধিত্বমাপ্নোতি| উক্তং হি– “ স বৈ শীঘ্রবিদাহিত্বাদ্বিদ্রধীত্যভিধীযতে|” (চ. সূ. অ. ১৭) ইতি| ন হি যস্মাত্ বিকারাত্ যদুত্পদ্যতে বিকারান্তরং তত্ স এব ভবতীতি; মাভূত্ প্লীহৈব উদরম্, অশ্মর্যেব শর্করা, ইত্যাদিশাস্ত্রোক্তবিরোধবিস্তরঃ| তস্মাদ্বিদ্রধিঃ পচ্যতে, গুল্মো ন পচ্যতে ইতি সিদ্ধান্তো নিরপবাদঃ| যে তু অন্তর্বিদ্রধিং ন পঠন্তি তেষামযমভিপ্রাযঃ– গুল্মে পক্বে বিদ্রধৌ চ পাটনশোধনরোপণাদেঃ, অপক্বে চ বিরেকলেপবিম্লাপনাদেশ্চিকিত্সিতস্য প্রাযো বিশেষাভাবাদলং পৃথগ্বিকারস্বীকারেণেতি||১৭-২০||

আতঙ্কদর্পণ ব্যাখ্যা (বাচস্পতি বৈদ্য কৃত)

চিরজস্যাবস্থাযামসাধ্যত্বমাহ– সঞ্চিত ইত্যাদি| অনুপক্রান্তত্বাত্ চিরকালানুবন্ধিত্বাত্, ক্রমশঃ ক্রমেণ, সঞ্চিতো বৃদ্ধিং গতো, গুল্মো মহাবাস্তুপরিগ্রহঃ সকলোদরব্যাপী, কৃতমূলো ধাত্বন্তরাবগাহী| সিরানদ্ধঃ সিরাজালবান্, যদা কূর্মবদুন্নতঃ স্যাত্, দৌর্বল্যাদিভিরুপদ্রবৈর্যুক্তো ভবতি, তদা ন সিদ্ধ্যতীত্যর্থঃ| পুনরসাধ্যলক্ষণমাহ– গৃহীত্বেত্যাদি| হৃল্লাসাদিষু গৃহীত্বা শোফো গুল্মিনং গুল্মযুক্তং রোগিণং, কর্ষতি মারযতীত্যর্থঃ| সজ্বরশ্বাসং জ্বরশ্বাসাভ্যামুপদ্রুতম্| পুনশ্চাসাধ্যলক্ষণমাহ– শ্বাসেত্যাদি| শ্বাসাদয উপদ্রবাঃ গুল্মিনো মরণায ভবন্তি, গ্রন্থিমূঢতা গ্রন্থিরূপস্যৈব গুল্মস্যাকস্মাদ্বিলযনমদর্শনমিতি| ননু, বাতবিদ্রধিগুল্মযোঃ কো ভেদঃ, সমানস্থানসংস্থানত্বাত্? উচ্যতে, বিদ্রধিঃ পচ্যতে, গুল্মো ন পচ্যতে, নিরাশ্রযত্বাত্| যদাহ সুশ্রুতঃ– “ন নিবন্ধোঽস্তি গুল্মস্য বিদ্রধিঃ সনিবন্ধনঃ| গুল্মস্তিষ্ঠতি দোষে স্বে বিদ্রধির্মাংসশোণিতে|| বিদ্রধিঃ পচ্যতে তস্মাদ্গুল্মঃ ক্বাপি ন পচ্যতে|” ইত্যাদি| ননু, গুল্মোঽপি পচ্যত এব| যদাহ চরকঃ– “বিদাহশূলসঙ্ক্ষোভস্বপ্ননাশারুচিজ্বরৈঃ| বিদহ্যমানং জানীযাদ্গুল্মং তমুপনাহযেত্||” ইতি| উচ্যতে– গুল্মো ন পচ্যতে নিরাশ্রযত্বাত্, যদি তু কারণবশাদাশ্রযং মাংসাদিকমাসাদযতি, বাতোপশমনার্থং কৃতস্বেদাদিভির্বা রক্তদুষ্টির্ভবতি, তদা পচ্যমানো বিদাহনিমিত্তকং বিদ্রধিত্বমেবাপ্নোতীতি| উক্তং হি– “স বৈ শীঘ্রবিদাহিত্বাদ্বিদ্রধীত্যভিধীযতে|” ইতি| যদ্যেবং, তদা যস্মাদ্বিকারান্তরমুত্পদ্যতে তত্স এব ভবতি| মাভূদেবং তদা প্লীহৈব উদরং জঠর এব শোফঃ, এবং শাস্ত্রবিরোধঃ, তস্মাদ্বিদ্রধিঃ পচ্যতে, গুল্মো ন পচ্যত ইতি সিদ্ধান্তঃ| যে তু অন্তর্বিদ্রধিং ন পঠন্তি, তেষামযমভিপ্রাযঃ– গুল্মাপেক্ষযা বিদ্রধৌ চ পাটনশোধনরোপণাদেঃ অপক্বে চ বিরেকলেপনবিম্লাযনাদেশ্চিকিত্সিতস্য প্রাযো বিশেষাভাবাদলং পৃথগ্বিকারস্বীকারেণেতি||১৭-২০||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ইতি শ্রীবিজযরক্ষিতকৃতাযাং মধুকোশব্যাখ্যাযাং গুল্মনিদানং সমাপ্তম্||২৮||

আতঙ্কদর্পণ ব্যাখ্যা (বাচস্পতি বৈদ্য কৃত)

ইতি শ্রীবাচস্পতিবৈদ্যবিরচিতাযাং মাধবনিদানব্যাখ্যাযামাতঙ্কদর্পণাখ্যাযাং গুল্মনিদানম্||২৮||