৩০. মূত্রকৃচ্ছ্রনিদানম্

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

সপ্তোত্তরে মর্মশতে ত্রীণি মর্মাণি শিরোহৃদযবস্তযঃ প্রধানানি| তত্র হৃদযগতবিকারানভিধায বস্তিগতবিকারানাহ– ব্যাযামেত্যাদি| মূত্রকৃচ্ছ্রাণীতি মূত্রস্য কৃচ্ছ্রেণ মহতা দুঃখেন প্রবৃত্তিঃ| অষ্টাবিতি দোষৈঃ পৃথক্ ত্রীণি, সন্নিপাতেনৈকং, শল্যজপুরীষজশুক্রজাশ্মরীজানীত্যেকৈকানি| ননু, শর্করাজং মূত্রকৃচ্ছ্রং সুশ্রুতেন পঠিতং; তচ্চাত্র সঙ্গ্রহেঽপি পঠিতম্– “অশ্মরী শর্করা চৈব তুল্যসম্ভবলক্ষণে|” ইত্যাদিনা, তত্ কথমষ্টৌ? নব প্রাপ্নুবন্তি| উচ্যতে– শর্করা অশ্মরীভেদ এব| যদাহ দৃঢবলঃ– “এষাঽশ্মরী মারুতভিন্নমূর্তিঃ স্যাচ্ছর্করা মূত্রপথাত্ ক্ষরন্তী|” (চ. চি. অ. ২৬) ইতি| অতোঽশ্মরীজেনৈব শর্করাজগ্রহণমিতি মন্যমানো দৃঢবলঃ অষ্টাবিত্যপঠত্||১-২||

আতঙ্কদর্পণ ব্যাখ্যা (বাচস্পতি বৈদ্য কৃত)

সপ্তোত্তরে মর্মশতে ত্রীণি মর্মাণি শিরোহৃদযবস্তযঃ প্রধানানি, হৃদযস্য প্রধানমর্মত্বাদ্বস্তেরপি মর্মত্বাত্, অতো হৃদ্রোগানন্তরং বস্তিব্যাধিত্বান্মূত্রকৃচ্ছ্রারম্ভঃ| তস্য হেতুমাহ– ব্যাযামেত্যাদি| তীক্ষ্ণৌষধং রাজিকাদিযুক্তং, মদ্যপ্রসঙ্গোঽতিমদ্যসেবা| নৃত্যেত্যাদি পৃষ্ঠযানাত্ অশ্বাদিপৃষ্ঠযানাত্, অন্যে– নিত্যদ্রুতপৃষ্ঠযানাদিতি পঠন্তি| নিত্যং শীঘ্রং তুরগাদিগমনম্| আনূপাঃ সজলপ্রদেশচারিণো মত্স্যাদযঃ, অধ্যশনং ভুক্তস্যোপরিভোজনম্| মূত্রকৃচ্ছ্রাণীতি মূত্রস্য কৃচ্ছ্রেণ মহতা দুঃখেন প্রবৃত্তিঃ| অষ্টাবিতি দোষৈস্ত্রীণি, সন্নিপাতেনৈকং, শল্যজং, পুরীষজং, শুকজমশ্মরীজমিত্যষ্টৌ| তস্য সম্প্রাপ্তিপূর্বকং লক্ষণমাহ– পৃথগিতি| পৃথক্ ভিন্নাঃ, অথ সর্বৈঃ স্বৈর্হেতুভিঃ কুপিতাস্ততো বস্তৌ মূত্রাশযে কোপং প্রাপ্য যদা মূত্রমার্গে মেঢ্রং পরিপীডযন্তি, তদা নরঃ কষ্টেন মূত্রযতীত্যর্থঃ||১-২||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

মূত্রকৃচ্ছ্রস্য বাতজাদিভেদেন লক্ষণান্যাহ– তীব্রেত্যাদি| সলিঙ্গস্য সমেঢ্রস্য| সপিচ্ছং পিচ্ছিলম্| কৃচ্ছ্রতমং কষ্টসাধ্যম্| কৃচ্ছ্রং মূত্রকৃচ্ছ্রম্| মূত্রবাহিষ্বিতি মূত্রবহস্রোতঃসু| অশ্মরীহেতু তত্পূর্বমিতি অশ্মরীহেত্বিতি লক্ষ্যপদং, তত্পূর্বমিতি লক্ষণপদং, তত্পূর্বমশ্মরীপূর্বকম্||৩-৮||

আতঙ্কদর্পণ ব্যাখ্যা (বাচস্পতি বৈদ্য কৃত)

বাতজমাহ– তীব্রেত্যাদি| তীব্রা মারণাত্মিকা, বঙ্ক্ষণে ঊরুবৃষণমেঢ্রাণামন্তরালসন্ধৌ, স্বল্পং স্তোকং, মুহুর্বারংবারং, বাতাত্ কৃচ্ছ্রম্| পৈত্তিকমাহ– পীতমিত্যাদি| ইহ পিত্তাত্ কৃচ্ছ্রে পীতাদিলিঙ্গং মূত্রং মুহুর্মূত্রযতি, ‘নর’ ইতি শেষঃ| পীতং সরক্তং বর্ণদ্বযং ন্যূনাধিকপিত্তপ্রকোপাত্| শ্লৈষ্মিকমাহ– বস্তেরিত্যাদি| বস্তেঃ সলিঙ্গস্য মেহনযুক্তস্য বস্তেঃ গুরুত্বশোথৌ ভবতঃ| সপিচ্ছং পিচ্ছিলং ভবতি| ত্রিদোষজমাহ– সর্বাণীত্যাদি| সর্বাণি সর্বদোষলিঙ্গানি, তত্ কৃচ্ছ্রং ত্রিদোষজং কৃচ্ছ্রতমং কষ্টসাধ্যম্| শল্যজমাহ– মূত্রেত্যাদি| মূত্রবহস্রোতঃসু শল্যেন ক্ষতেষু সত্সু অথবা অভিহতেষু পীডিতেষু তদাঘাতাত্ ভৃশং দারুণং তীব্রং মারণাত্মকম্| পুরীষজমাহ– শকৃত ইত্যাদি| পুরীষস্য প্রতীঘাতাত্ অবরোধাত্ বিগুণীভূতো দূষিতো বাযুঃ আধ্মানং বাতশূলং চ কুর্যাত্, মূত্রনাশং চ কুর্যাত্, ততো মূত্রকৃচ্ছ্রং চ জাযতে| অশ্মরীজমাহ– অশ্মরীহেতু মূত্রকৃচ্ছ্রমিতি তস্য কৃচ্ছ্রস্য অশ্মর্যেব কারণম্| শুক্রজমাহ– শুক্র ইত্যাদি| মূত্রাশযে স্রবণব্যথাযুক্তঃ ‘পুরুষ’ ইতি শেষঃ||৩-৮||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

মূত্রকৃচ্ছ্রহেতুত্বেনোক্তযোরশ্মরীশর্করযোঃ সমানতামবান্তরভেদং চাহ– অশ্মরীত্যাদি| অশ্মরী শর্করা চৈবেত্যনন্তরং ‘এতে’ ইত্যধ্যাহার্য ‘তুল্যসম্ভবলক্ষণে’ ইত্যনেন দ্বিবচনান্তেন সম্বন্ধনীযং, যথা– “তযোর্জগৃহতুঃ পাদান্ রাজা রাজ্ঞী চ মাগধী|” ইত্যাদিবত্| তুল্যঃ সম্ভব উত্পত্তিকারণং লক্ষণং চ যযোস্তে তথা, “তুল্যে সম্ভবলক্ষণৈঃ” ইতি পাঠান্তরে তুল্যে সদৃশে, কৈরিত্যত উক্তম্– সম্ভবলক্ষণৈরিতি; ‘তুল্যা সম্ভবলক্ষণৈঃ’ ইতি পাঠান্তরে স এবার্থঃ| বিশেষণং বিশেষঃ| তমেব বিবৃণোতি– পচ্যমানেত্যাদি| কফসন্ধানং কফেনাবযবসংশ্লেষঃ; কফ এব বা সন্ধানং কফসন্ধানং, সন্ধীযতেঽনেনেতি ব্যুত্পত্ত্যা| তেন পিত্তপাকবাতশোষৌ সন্ধানবিমোক্ষহেতুত্বেনোক্তৌ| ক্ষরন্তীতি বস্তিতঃ| চরকে হি– “স্যাচ্ছর্করা মূত্রপথাত্ ক্ষরন্তী|” (চ. চি. অ. ২৬) ইত্যেবং পঠিতম্| কুক্ষৌ শূলমিতি সম্বন্ধঃ| তযা শর্করযা ইতি||৯-১২||

আতঙ্কদর্পণ ব্যাখ্যা (বাচস্পতি বৈদ্য কৃত)

মূত্রকৃচ্ছ্রহেতুত্বেনোক্তযোরশ্মরীশর্করযোর্নবত্বসঙ্খ্যানিরাসার্থং সমানত্বমবান্তরভেদং চাহ– অশ্মরীত্যাদি| অশ্মরী চ শর্করা চ এতে উভে তুল্যসম্ভবলক্ষণে তুল্যঃ সম্ভব উত্পত্তিঃ লক্ষণং চ যযোস্তে তথা, সমাননিদানলিঙ্গ ইত্যর্থঃ| কীর্তযতঃ কথযতো মম শর্করাযা বিশেষণং শৃণু| পিত্তেন পচ্যতে বাযুনা শোষ্যতে, সন্ধানং কফেনাবলম্বনং সংশ্লেষঃ, অথবা কফ এব সন্ধানং সন্ধীযতেঽনেনেতি ব্যুত্পত্ত্যা; এতেন পবনাদ্বিশোষণাত্ পিত্তবাতৌ সন্ধানরূপস্য কফস্য শোষত্বেন তৌ শর্করাযা হেতুত্বেনোক্তৌ, পিত্তেন পাচিতা, বাযুনা শোষিতা, শ্লেষ্মণা সন্ধিতা অশ্মরী; তাভ্যাং বিমুক্তসন্ধানা শর্করা ক্ষরন্তী সতী শর্করারূপা, ক্ষরন্তীতি বস্তিতঃ| এতাবতা হেতুলক্ষণত্বেন এক এব রোগঃ সন্ধানাভাবাত্ ক্রিযাভেদঃ, অতো মূর্ছা চ মূত্রকৃচ্ছ্রে দ্বে অপি কারণে| তস্য উপদ্রবানাহ– হৃদিত্যাদি| শূলং কুক্ষাবিতি সম্বন্ধঃ| তযা শর্করযা||৯-১২||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ইতি শ্রীবিজযরক্ষিতকৃতাযাং মধুকোশব্যাখ্যাযাং মূত্রকৃচ্ছ্রনিদানং সমাপ্তম্||৩০||

আতঙ্কদর্পণ ব্যাখ্যা (বাচস্পতি বৈদ্য কৃত)

ইতি শ্রীবাচস্পতিবৈদ্যবিরচিতাযাং মাধবনিদানব্যাখ্যাযামাতঙ্কদর্পণাখ্যাযাং মূত্রকৃচ্ছ্রনিদানম্||৩০||