১. বেদোত্পত্ত্যধ্যাযঃ

সহস্রাক্ষং গণাধীশং স্বগুরুং চ সরস্বতীম্| জনকং জনযিত্রীং চ শাস্ত্রাদৌ প্রণমাম্যহম্|| সমস্তজনপদতিলককল্পে শ্রীভাদানকদেশে নগরীবরমথুরাসমীপে অঙ্কোলানামকং বৈদ্যস্থানমস্তি| যত্র সৌরবংশজা ব্রাহ্মণাঃ সমস্তভূমিপতিমান্যা অশ্বিনীকুমারসমানাঃ পার্বণচন্দ্ররুচিযশঃপ্রসাধিতদিঙ্মণ্ডলা বৈদ্যা অভূবন্| তদন্বযে গোবিন্দনামা চিকিত্সকশিরোমণিরভূত্, ততস্তত্পুত্রো ভিষক্শিরোমুকুটমণির্জযপালঃ সমজনি, তত্তনযশ্চ সমস্তশাস্ত্রার্থতত্ত্বজ্ঞো ভরতপালঃ সঞ্জাতঃ, তত্পুত্রঃ স্বকুলনভস্তলচন্দ্রমা বিবেকবৃহস্পতিঃ শ্রীসহপালদেবনৃপতিবল্লভঃ শ্রীডল্হণঃ সমভূত্| তেন শ্রীজেজ্জটং টীকাকারং শ্রীগযদাসভাস্করৌ চ পঞ্জিকাকারৌ শ্রীমাধবব্রহ্মদেবাদীন্ টীপ্পনকারাংশ্চোপজীব্য, আযুর্বেদশাস্ত্রসুশ্রুতব্যাখ্যানায নিবন্ধসঙ্গ্রহঃ ক্রিযতে| যদ্যপি সুশ্রুতোপরি জেজ্জটাদিভিষ্টীকা রচিতাঃ, তথাঽপি তাসাং কুশাগ্রীযধিযামভিগম্যত্বাদল্পমেধসামনুগ্রহায সুশ্রুতং ব্যাখ্যাতুকামস্য মম প্রযাসঃ সফলঃ|

অথাতো বেদোত্পত্তিমধ্যাযং ব্যাখ্যাস্যাম ইতি| ননু, কতমত্ সূত্রমিদং? চতুর্বিধানি হি সূত্রাণি ভবন্তি; তদ্যথা- প্রতিসংস্কর্তৃসূত্রম্, একীযসূত্রং, শিষ্যসূত্রং, গুরুসূত্রং চেতি| ইহ প্রতিসংস্কর্তৃসূত্রং নাস্ত্যেবেত্যেকে, অন্যে ত্বস্তীতি ভাষন্তে, যথা চ তদস্তি তথেহৈব নৈকট্যেন কথযিষ্যামঃ; একীযসূত্রং যথা- ‘তত্র লোহিতকপিলপাণ্ডুপীতনীলশুক্লেষ্ববনিপ্রদেশেষু মধুরাম্ললবণকটুতিক্তকষাযাণি যথাসঙ্খ্যমুদকানি ভবন্তীত্যেকে ভাষন্তে’(সূ. অ. ৪৫)- ইতি; শিষ্যসূত্রং যথা- ‘বাযোঃ প্রকৃতিভূতস্য ব্যাপন্নস্য চ লক্ষণম্| স্থানং কর্ম চ রোগাংশ্চ বদস্ব বদতাংবর’ (নি. অ. ১)- ইতি; গুরুসূত্রং যথা- ‘দেহে বিচরতস্তস্য লক্ষণানি নিবোধ মে’ (নি. অ. ১)- ইতি; এবং সূত্রাণামনেকত্বাত্ কস্যেদং সূত্রম্? উচ্যতে- গুরোরেবৈতত্ সূত্রং, শিষ্যেণ গ্রন্থং চিকীর্ষতা লিখিতম্| অন্যে তু শিষ্যস্যৈবেদং সূত্রমিত্যাহুঃ, স ত্বাত্মশিষ্যেষু ধন্বন্তরিপ্রশিষ্যেষু প্রতিজ্ঞাং কৃতবান্; তন্নেচ্ছতি গযী| কিমেতত্ স্বকপোলকল্পিতং সুশ্রুতেনোক্তম্, অথবা যথৈব গুরুণোদীরিতমিতি পৃষ্টঃ প্রতিসংস্কর্তা সুশ্রুতমুখেনেদমাহ- যথোবাচ ভগবান্ ধন্বন্তরিরিতি| ইদং প্রতিসংস্কর্তৃসূত্রং, যত্র যত্র পরোক্ষে লিট্প্রযোগস্তত্র তত্রৈব প্রতিসংস্কর্তৃসূত্রং জ্ঞাতব্যমিতি; প্রতিসংস্কর্তাঽপীহ নাগার্জুন এব| অথশব্দোঽনন্তরার্থ এব| অতো যুষ্মচ্ছল্যতন্ত্রোপদেশকামিতাদনন্তরম্| বেদোত্পত্তিমিতি অস্যাদৌ আযুঃশব্দো লুপ্তো জ্ঞেযঃ; তেন, আযুর্বেদোত্পত্তিমিতি| উত্পত্তিরত্রাভিব্যক্তিঃ, ন ত্বভূতপ্রাদুর্ভাবঃ| অধীযন্তেঽস্মিন্নর্থা ইত্যধ্যাযঃ| ব্যাখ্যাস্যাম ইতি বির্বিশেষে, আঙ্ অভিব্যাপ্তৌ, ব্যাখ্যাস্যামঃ প্রকথযিষ্যামঃ| অন্যে তু, অথশব্দঃ শিষ্যপ্রশ্নানন্তর্যে , অতঃশব্দো হেত্বর্থঃ, যত এতে শিষ্যাঃ প্রজাহিতার্থমাযুর্বেদং গুরুং পপ্রচ্ছুঃ, অতো হেতোরিত্যর্থঃ; অপরে তু বির্বিবিধপ্রকারে, আঙ্ আভিমুখ্যে, শেষং সমম্| এতেনাতঃ শল্যতন্ত্রোপদেশকামিতাদনন্তরম্, আযুর্বেদাভিব্যক্তিমধিকৃত্য কৃতো যোঽধ্যাযস্তং বিশেষাভিব্যাপ্ত্যা প্রকথযিষ্যামঃ| দ্বিতীযব্যাখ্যানপক্ষেঽপীত্থং যোজনীযম্| যথোবাচেতি যাদৃগুক্তবান্| ভগবান্ ধন্বন্তরিরিতি সমস্তৈশ্বর্যমাহাত্ম্যযশঃশ্রীকামার্থপ্রযত্নৈর্যুক্তো ‘ভগবান্’ ইত্যুচ্যতে; অন্যে তু জ্ঞানাতিশযবান্ পুরুষাতিশযো ভগবান্; অপরে তু, অষ্টগুণৈশ্বর্যবানেবাত্র ভগবান্| অথাত ইত্যাদিকং প্রতিজ্ঞাসূত্রং যদ্যপ্যধ্যাযাদৌ লিখিতং, তথঽপি ‘বত্স সুশ্রুত’ (সূ. অ. ১, সূ. অ. ১৪) ইত্যনন্তরং দ্রষ্টব্যম্; অন্যে তু ‘অধ্যাপ্যাশ্চ ভবন্তো বত্সাঃ’ (সূ. অ. ১, সূ. অ. ৫) ইত্যনন্তরং পঠন্তি, তন্নেচ্ছতি গযী| অত্র কেচিদ্ ‘বেদোত্পত্তিং নামাধ্যাযং’ ইতি পঠন্তি||১-২||

অথ খল্বিত্যাদি| অথেতি মঙ্গলার্থঃ, তত্তু শ্রোতৃব্যাখ্যাত্রোঃ ক্রিযাফলসিদ্ধিং কথযতি| খলু বাক্যশোভার্থঃ, অন্যে তু নিশ্চযার্থঃ| অমরবরং দেবশ্রেষ্ঠং, পূর্বজন্মন্যমৃতোদ্ধরণাত্; অন্যে তু ব্রহ্মণোঽবতারত্বাত্| ঋষিগণপরিবৃতং দেবর্ষিব্রহ্মর্ষিরাজর্ষিসমূহৈর্বেষ্টিতং, তপোজ্ঞানবাহুল্যাদুপাদেযবাক্যত্বাচ্চ| আশ্রমস্থং বানপ্রস্থাশ্রমস্থম্, এতেন রাজ্যচিন্তাপরিত্যাগাদনাকুলচিত্তত্বং রাজর্ষিত্বং চ সূচিতম্| কাশিরাজং বারাণসীজনপদনৃপতিং, কাশিরাজস্য নির্বাণপদাভিলাষিত্বাত্তত্পুত্রত্বমাপন্নমিতি কাশিরাজম্| কাশিরাজানামনেকত্বাদ্বিশেষণমাহ- দিবোদাসম্|- দিবিতিশব্দেনাত্র তত্স্থানদেবাঃ কথ্যন্তে, তৈঃ পূজাকাম্যযা সম্প্রদীযতে যস্মৈ স দিবোদাসস্তম্; অন্যে তু দাস(শ)তি কর্মাণি যত্নেন করোতীতি দাসঃ(শঃ), দিবঃ স্বর্গস্য দাসো দিবোদাস(শ)স্তম্| সর্বজনপ্রসিদ্ধং বিশেষণমাহ- ধন্বন্তরিমিতি|- ধনুঃ শল্যশাস্ত্রং, তস্য অন্তং পারম্ ইযর্তি গচ্ছতীতি ধন্বন্তরিঃ , তম্; অপরা ব্যুত্পত্তির্বিস্তরভযান্ন লিখিতা| ঔপধেনবাদযঃ সুশ্রুতান্তাঃ সপ্ত শিষ্যা ঊচুঃ উক্তবন্তঃ| প্রভৃতিশব্দেন ভোজাদযঃ| অন্যে তু ‘গোপুররক্ষিতৌ’ ইতি নামদ্বযং মন্যন্তে, ইত্যৌপধেনবাদযোঽষ্টৌ; প্রভৃতিগ্রহণান্নিমিকাঙ্কাযনগার্গ্যগালবাঃ; এবমেতান্ দ্বাদশ শিষ্যানাহুঃ| ননু, প্রশ্নকর্তৃতযা সুশ্রুতস্য মুখ্যত্বাদাদাবস্য নামগ্রহণমুচিতং স্যাত্, কথমৌপধেনবাদিনামান্যাদাবুক্তানি? সত্যং, দেবর্ষযস্তে রাজর্ষীণাং পূজ্যা ইতি ন দোষঃ||৩||

ঋষযস্তে তং কাশিরাজং প্রতি কিমূচুরিত্যাহ- ভগবন্নিত্যাদি|- ভগবন্নিতি সম্বোধনে| তত্র শারীরা বাতাদিবৈষম্যনিমিত্তাঃ, মানসা রজস্তমঃসম্ভূতাঃ কামাদযঃ, আগন্তবো ব্যাঘ্রাদিকৃতাঃ শস্ত্রাদিকৃতাশ্চ| স্বাভাবিকানামত্রাগ্রহণমস্মিঞ্ছাস্ত্রে তত্প্রতীকারস্যাপ্রাধান্যসূচনার্থম্; অথবা ‘আত্মনশ্চ প্রাণযাত্রার্থং’ ইত্যত্রৈবাবরোধাচ্চ, ঋষীণাং হি শারীরমানসাগন্তুব্যাধ্যসম্ভবাত্ কেবলং স্বাভাবিকব্যাধিনিষেধেনৈব প্রাণযাত্রাঽভিপ্রেতা| উপদ্রুতান্ উপসৃষ্টান্| সনাথানপি সমিত্রাদিকানপি| অনাথবত্ একাকিজনবত্| বিচেষ্টমানান্ বিরুদ্ধাং ক্রিযাং কুর্বাণান্| এতেনাযুর্বেদং বিনা মিত্রাদযোঽপ্যনর্থকা ইতি| বিক্রোশতশ্চ বিশেষাদার্তস্বরৈ রুদতশ্চ| নঃ অস্মাকম্| আত্মনশ্চ প্রাণযাত্রার্থং প্রাণানামগ্নীষোমাদীনাং যাত্রার্থং ব্যবহারার্থং স্বস্থবৃত্তানুবর্তনার্থম্| অত্র কেচিত্ ‘আত্মপ্রজাহিতহেতোঃ’ ইতি পঠন্তি| উপদিশ্যমানং সঙ্ক্ষেপতঃ কথ্যমানম্| অত্রাযত্তমিতি অত্রাযুর্বেদোপদেশে, আযত্তং অধীনম্| ঐহিকম্ ইহলোকভবম্, আমুষ্মিকং পরলোকভবং, শ্রেযঃ কল্যাণলাভঃ| অর্থকামৌ মিত্রাদিলাভো যশশ্চ ঐহিকং শ্রেযঃ; স্বর্গাদি বিশিষ্টং জন্মান্তরজ্ঞানাদযশ্চ আমুষ্মিকং শ্রেযঃ, অমরত্বং চ| তদিতি হেতৌ, যস্মাদাযুর্বেদোপদেশাদ্বিবিধং শ্রেয আযত্তং, তস্মাত্; উপপন্নাঃ স্মঃ সমীপমাগতাঃ স্মঃ; শিষ্যত্বেন ছাত্রভাবেনেতি||৪||

তেষামৌপধেনবাদীনাং সমীপগতানাং কাশিরাজেন কিং কৃতমিত্যাহ- তানুবাচ ভগবানিতি| স্বাগতং শোভনমাগতং, বঃ যুষ্মাকম্| অমীমাংস্যাঃ অবিচারণীযাঃ, প্রসিদ্ধজাত্যাদিবত্ত্বাত্| অধ্যাপ্যাশ্চ অধ্যাপনার্হাশ্চ| বত্সা ইতি পক্ষপাতাতিশযত্বসূচকং সম্বোধনম্; অথবা বত্সাঃ প্রথমবযসো গবাং পুত্রাঃ, বত্সা ইব বত্সাঃ; অনেন বিশেষণেন প্রথমবযস্ত্বং পুত্রসাদৃশ্যং দমনীযত্বং চ সূচযতি||৫||

ইদানীমাযুর্বেদস্য সামান্যং লক্ষণং দর্শযন্নাহ- ইহ খল্বিত্যাদি|- ইহ খল্বিতি বাক্যালঙ্কারে, বক্ষ্যমাণং বাক্যমলঙ্করোতি; অন্যে তু ইহ মযি সূত্রকারে, খলু এবার্থঃ; এতেন ময্যেব আযুর্বেদোঽষ্টাঙ্গো নান্যেষু সূত্রকারেষু, অন্যেষামেকৈকস্যৈবাঙ্গস্য প্রণেতৃত্বাত্| ইহেতি বাক্যোপক্রমে, খলু সম্বোধনে, ইত্যপরে| উপাঙ্গম্ অঙ্গমেবাল্পত্বাদুপাঙ্গং; তদ্যথা- দেহস্য বাহুজঙ্ঘে শির ইত্যঙ্গানি, করচরণনাসিকাদীন্যুপাঙ্গানি, এতেনোপাঙ্গমিত্যুক্তম্; উপাঙ্গমঙ্গসমীপমিত্যেকে| অনুত্পাদ্যৈব প্রজাঃ লোকসৃষ্টেঃ প্রাক্, আযুর্বেদং প্রদর্শ্য প্রজাঃ পশ্চাত্ সৃষ্টবানিত্যর্থঃ| কৃতবান্ সংস্কৃতবান্, ন তু পূর্বমুত্পাদিতবান্; কুতঃ? নিত্যত্বাত্| স্বযম্ভূঃ ব্রহ্মা| ততোঽল্পাযুষ্ট্বমিতি ততঃ প্রাক্তনকরণাদনন্তরমধর্মপ্রবৃত্তৌ সত্যাম্, অল্পাযুষ্ট্বম্ অল্পজীবিতত্বম্, অল্পমেধস্ত্বং স্বল্পবুদ্ধিত্বং, ভূযঃ পুনঃ, অষ্টধা অষ্টভিঃ প্রকারৈঃ||৬||

অথ কে তেঽষ্টৌ প্রকারাঃ? ইত্যাহ- তদ্যথেত্যাদি| শল্যমিতি শল্যাহরণপ্রধানং তন্ত্রং শল্যতন্ত্রম্| শলাকাযাঃ কর্ম শালাক্যং, তত্প্রধানং তন্ত্রমপি শালাক্যম্| কাযোঽত্রাগ্নিরুচ্যতে, তস্য চিকিত্সা কাযচিকিত্সা; অথবা কাযো দেহঃ, তস্য চিকিত্সা কাযচিকিত্সা| ভূতানি দেবাসুরগন্ধর্বযক্ষরক্ষঃপিতৃনাগপিশাচা অষ্টৌ, তানি বেত্ত্যনযেতি ভূতবিদ্যা; অথবা ভূতাবেশাপাকরণার্থা বিদ্যা ভূতবিদ্যা| কুমারাঃ বালাঃ, তেষাং ভৃতির্ধারণং পোষণং চ, তস্যা ভৃত্যা ইদং তন্ত্রমিতি কৌমারভৃত্যম্| অগদো বিষপ্রতীকারঃ, তদর্থং তন্ত্রমগদতন্ত্রম্; অন্যে বিষগরবৈরোধিকসম্প্রযোগো গদঃ, গদস্যাভাবঃ অগদঃ, অগদায তন্ত্রমগদতন্ত্রমিত্যাচক্ষতে| রসানাং রসরক্তাদীনামযনমাপ্যাযনং রসাযনং, তদর্থং তন্ত্রং রসাযনতন্ত্রম্; অথবা রসানাং রসবীর্যবিপাকাদীনামাযুঃপ্রভৃতিকারণানামযনং বিশিষ্টলাভোপাযো রসাযনং, তদর্থং তন্ত্রং রসাযনতন্ত্রম্| বাজীকরণতন্ত্রমিতি যেন স্ত্রীষু বিষযে বাজীব নরঃ সামর্থ্যং প্রাপ্নোতি তদ্ বাজীকরণং, যেনাত্যর্থং ব্যজ্যতে স্ত্রীষু তদ্ বাজীকরণম্; অন্যে তু বজনং বাজো বেগঃ প্রকরণাচ্ছুক্রস্য , স বিদ্যতে যেষাং তে বাজিনঃ, অবাজিনো বাজিনঃ ক্রিযন্তেঽনেনেতি বাজীকরণম্; অন্যে তু বাজীশব্দেন শুক্রমভিধীযতে, তেন শুক্ররহিতস্য বাজী শুক্রং ক্রিযতেঽনেনেতি বাজীকরণং, তদর্থং তন্ত্রং বাজীকরণতন্ত্রম্| ইতিশব্দোঽষ্টাঙ্গপরিসমাপ্তৌ||৭||

অথেত্যাদি|- অথেত্যানন্তর্যে, অস্য আযুর্বেদস্য, প্রত্যঙ্গলক্ষণসমাসঃ একমেকমঙ্গং প্রতি লক্ষণসঙ্ক্ষেপঃ|৮|-

কিং তদেকমেকমঙ্গং প্রতি লক্ষণং সঙ্ক্ষেপেণেত্যাহ- তত্রেত্যাদি| তত্র তেষ্বঙ্গেষু| নামশব্দঃ প্রতিপাদনে, শল্যং প্রতিপাদ্যতে কথ্যত ইত্যর্থঃ| বিবিধতৃণাদীনাং পূযাস্রাবান্তানাং দুষ্টব্রণস্যান্তর্মধ্যাদুদ্ধরণার্থমুদ্ধরণপ্রযোজনং, তথা গর্ভশল্যস্যাপি| উদ্ধরণার্থমিত্যস্যাগ্রে ‘ষষ্ট্যা বিধানৈঃ’ ইতি কেচিত্ পঠন্তি, ব্যাখ্যানযন্তি চ- অপতর্পণাদ্যৈ রক্ষাবিধানান্তৈর্দ্বিব্রণীযোক্তৈরিত্যর্থঃ| প্রণিধানার্থং নিবেশনার্থম্| ন কেবলং কাষ্ঠতৃণাদি শল্যং, কিন্তু ‘‘অতিপ্রবৃদ্ধং মলদোষজং বা শরীরিণাং স্থাবরজঙ্গমানাম্| যত্কিঞ্চিদাবাধকরং শরীরে তত্ সর্বমেব প্রবদন্তি শল্যম্’’- ইতি||৮(১)||

শালাক্যমিত্যাদি| জত্রু গ্রীবামূলম্, অন্যে বক্ষোংঽসসন্ধিমাহুঃ| বদনমত্র মুখকুহরমাহুঃ| ঘ্রাণাদিসংশ্রিতানামিত্যত্র আদিশব্দাচ্ছিরঃকপালাদিসংশ্রিতানাম্||৮(২)||

কাযচিকিত্সেত্যাদি| কেচিজ্জ্বরানন্তরমতিসারং পঠন্তি; তন্ন, পঞ্জিকযা দূষিতত্বাত্||৮(৩)||

ভূতবিদ্যেত্যাদি| অসুরাঃ দৈত্যাঃ, গন্ধর্বা দেবগাযকাঃ, যক্ষাঃ ধনদাদযঃ, রক্ষাংসি রাবণপ্রভৃতীনি, পিতরঃ অগ্নিষ্বাত্তাদযঃ, পিশাচাঃ পিশিতাশনাঃ; এতে গ্রহণাদ্ গ্রহাঃ প্রোচ্যন্তে| শান্তিকর্মবলিহরণাদিগ্রহোপশমনার্থং শান্তিকর্মাদিভিরষ্টগ্রহোপশমনপ্রযোজনম্||৮(৪)||

কৌমারভৃত্যমিত্যাদি| দুষ্টস্তন্যগ্রহসমুত্থানাং চেতি দুষ্টস্তন্যেন দুষ্টগ্রহেণ চ জাতানামিত্যর্থঃ; তত্র দুষ্টস্তন্যেন শারীরাঃ, দুষ্টগ্রহেণাগন্তবঃ||৮(৫)||

অগদতন্ত্রমিত্যাদি| কীটা বৃশ্চিকাদযঃ; লূতা মর্কটঃ, কীটভেদো বা| বিবিধবিষসংযোগোপশমনার্থমিতি বিবিধানাং নানাপ্রকারাণাং স্থাবরজঙ্গমানাং বিষাণাং, সংযোগঃ সঙ্গমঃ, তদুপশমায| অন্যে তু ‘বিবিধবিষসংযোগবিষোপহতোপশমার্থং চ’ ইতি পঠন্তি| সংযোগবিষং সমানমধুঘৃতাদি||৮(৬)||

রসাযনতন্ত্রমিত্যাদি| বযঃস্থাপনং বর্ষশতমাযুঃস্থাপনম্| আযুষ্করং শতাধিকমপি করোতি| অন্যে তু বযঃস্থাপনং জরাপহরণং, তারুণ্যং বহুকালং স্থাপযতীত্যর্থঃ||৮(৭)||

বাজীকরণতন্ত্রমিত্যাদি| অল্পরেতসঃ প্রকৃত্যৈব স্তোকরেতসঃ, তেষামাপ্যাযননিমিত্তং; দুষ্টরেতসো বাতাদিদুষ্টরেতসঃ, তেষাং প্রসাদনিমিত্তং; ক্ষীণরেতসঃ কারণৈঃ স্বমানাদল্পীভূতরেতসঃ, তেষামুপচযনিমিত্তং; বিশুষ্করেতসঃ স্বমানাদত্যর্থং ক্ষীণরেতসঃ, তেষাং জনননিমিত্তম্| অথবাঽল্পরেতসঃ পঞ্চবিংশতিমপ্রাপ্তাঃ, ক্ষীণরেতসস্তু মধ্যবযসঃ কারণাদল্পীভূতরেতসঃ, শুষ্করেতসো বৃদ্ধাঃ| প্রহর্ষজননার্থং চেতি স্বস্থস্য শুক্রবৃদ্ধিস্রুতিকরণার্থং চেত্যর্থঃ||৮(৮)||

এবমযমিতি|- এবমনেন প্রকারেণ| অত্রেতি এষু মধ্যে| কিমঙ্গং কস্মৈ শিষ্যাযোপদিশ্যতাং ব্যাখ্যাযতাম্| ইতিশব্দঃ সামান্যেন||৯||

ত ঊচুঃ তে শিষ্যা ধন্বন্তরিং প্রতি ঊচুঃ উক্তবন্তঃ| শল্যজ্ঞানং মূলং কৃত্বা শল্যজ্ঞানমাদৌ কৃত্বা| সঃ ধন্বন্তরিঃ, উবাচ উক্তবান্, এবমস্ত্বিতি এবং ভবত্বিতি| ‘স হোবাচ’ ইতি কেচিত্ পঠন্তি; তৈঃ শিষ্যৈঃ সহেত্যর্থঃ||১০-১১||

প্রক্ষ্যতি পৃচ্ছাং করিষ্যতি||১২-১৩||

‘বত্স সুশ্রুত’ ইতি সম্বোধনে| অস্যাগ্রে ‘অথাত’ ইত্যাদিকা প্রতিজ্ঞা জ্ঞাতব্যেতি পূর্বমেবোক্তম্| ইহ খল্বিত্যধিকারে, ইহ খলু আযুর্বেদোত্পত্ত্যধিকারে ইত্যর্থঃ| ব্যাধিশব্দোঽযং দুষ্টেষু বাতাদিষু, তত্কার্যেষু জ্বরাদিষু ক্লেশেষু, রাগাদিষু দুঃখেষু সংসারানুবৃত্তিজনকেষু চ, বর্ততে; পরিমোক্ষো নিবৃত্তিঃ| ননু, ব্যাধিপরিমোক্ষস্বস্থরক্ষণাভ্যামন্যদপি প্রযোজনমস্তি, কিং তত্? যাপ্যব্যাধিতরক্ষা রসাযনাদাযুরুত্কর্ষশ্চ, তদিদং বক্তব্যম্; উচ্যতে- স্বস্থস্য রক্ষণং চেতি চকারোঽনুক্তসমুচ্চযার্থঃ, তেন যাপ্যব্যাধিতরক্ষণং রসাযনাদাযুরুত্কর্ষশ্চ; অথবা সাধ্যব্যাধৌ ক্রিযৈকত্বাদ্ যাপ্যাবরোধঃ, রসাযনাদাযুরুত্কর্ষস্তু স্বস্থরক্ষযৈব গৃহ্যতে||১৪||

আযুর্বেদস্য নিরুক্তিং দর্শযন্নাহ- আযুরস্মিন্নিত্যাদি| আযুঃ শরীরেন্দ্রিযসত্বাত্মসংযোগঃ, তদস্মিন্নাযুর্বেদে বিদ্যতে অস্তীত্যাযুর্বেদঃ; অথবা আযুর্বিদ্যতে জ্ঞাযতে অনেনেত্যাযুর্বেদঃ; আযুর্বিদ্যতে বিচার্যতে অনেন বেত্যাযুর্বেদঃ; আযুরনেন বিন্দতি প্রাপ্নোতীতি বাঽঽযুর্বেদঃ||১৫||

তস্যাঙ্গবরমিত্যাদি|- অঙ্গবরম্ অঙ্গশ্রেষ্ঠম্| আদ্যম্ আদিভবম্| প্রত্যক্ষাগমানুমানোপমানৈরবিরুদ্ধমিতি অনেন শল্যেনাঙ্গবরেণ যোঽর্থঃ প্রতিপাদ্যতে স খলু প্রত্যক্ষাদিভিরপি তথাঽবগম্যত ইত্যর্থঃ| প্রত্যক্ষমিতি যত্কিঞ্চিদেবার্থস্য সাক্ষাত্কারিজ্ঞানং তদেব প্রত্যক্ষং, তথাহি- “মনোঽক্ষগতমভ্রান্তং বস্তু প্রত্যক্ষমুচ্যতে| ইন্দ্রিযাণামসঞ্জ্ঞানং বস্তুতত্ত্বে ভ্রমঃ স্মৃতঃ”- ইতি; প্রত্যক্ষাবিরুদ্ধং যথা- সূর্যাবলোকনান্নাসান্তঃ সূত্রবর্তিপ্রবেশনাচ্চ ক্ষুতঃ প্রাদুর্ভাবঃ| আগমো বেদঃ, আপ্তানাং শাস্ত্রং বা; তথাহি- “সিদ্ধং সিদ্ধৈঃ প্রমাণৈস্তু হিতং চাত্র পরত্র চ| আগমঃ শাস্ত্রমাপ্তানামাপ্তাস্তত্ত্বার্থবেদিনঃ”- ইতি; আগমাবিরুদ্ধং যথা- পুরাণাদিষ্বপি শ্রূযতে- “রুদ্রেণ যজ্ঞস্য শিরশ্ছিন্নমশ্বিভ্যাং সংহিতম্” ইতি| আগমস্য প্রত্যক্ষফলত্বাদ্ বরীযস্ত্বং, তেনানুমানাত্ পূর্বং নির্দিষ্টবান্| অনু পশ্চাদব্যভিচারিলিঙ্গাল্লিঙ্গী মীযতে জ্ঞাযতে যেন তদনুমানং; তেনানুমানেনাবিরুদ্ধং যথা- প্রনষ্টে শল্যে চন্দনঘৃতোপদিগ্ধাযাং ত্বচি বিশোষণবিলযনাভ্যামনুমীযতে- অত্র শল্যমিতি| প্রসিদ্ধসাধর্ম্যাত্ সূক্ষ্মব্যবহিতবিপ্রকৃষ্টস্যার্থস্য সাধনমুপমানং; তেনাবিরুদ্ধং যথা- মাষবন্মষকঃ, তিলমাত্রস্তিলকালকঃ, বিদারীকন্দবদ্ বিদারীরোগঃ, শালূকবত্ পনসিকেত্যাদি| উচ্যমানম্ উপদিশ্যমানম্| মযা ধন্বন্তরিণেত্যর্থঃ||১৬||

শল্যাঙ্গস্যাদ্যত্বং প্রতিপাদযন্নাহ- এতদ্ধীত্যাদি|- হিশব্দোঽবধারণে, এতেনৈতদেবাঙ্গং প্রথমমাদ্যং প্রধানং বা| কস্মাত্ প্রথমং? প্রাগভিঘাতব্রণসংরোহাত্|- শারীরব্যাধীনাং প্রাগেব দেবাসুরসঙ্গ্রামেঽভিঘাতব্রণোত্পত্তিঃ, তত্সংরোহাত্| দ্বিতীযহেতুমাহ- যজ্ঞশিরঃসন্ধানাচ্চেতি| অত্রাপি প্রাগিতি সম্বধ্যতে| অন্যে ত্বত্র যজ্ঞশিরঃসন্ধানাচ্চেতি| অত্রাপি প্রাগিতি সম্বধ্যতে| অন্যে ত্বত্র ‘যজ্ঞপ্রধানশিরঃসন্ধানাচ্চ’ ইতি পঠন্তি| যতঃ প্রাগ্যজ্ঞস্য প্রধানভূতস্য শিরসঃ সন্ধানং তস্মাদিদমাদ্যম্| অত্রৈব পারম্পর্যোপদেশমাহ- শ্রূযতে হীত্যাদি যাবত্সংহিতমিতি| অত্র কেচিত্ ‘সংহিতং’ ইত্যত্র ‘সন্ধিতং’ ইতি পঠন্তি||১৭||

ইদানীং বরত্বে প্রতিজ্ঞাতং হেতুং প্রতিপাদযন্নাহ- অষ্টাস্বিত্যাদি| এতদেবাধিকমিতি এতদেবাধিকং নান্যচ্ছালাক্যাদি| কস্মাত্? আশুক্রিযাকরণাত্| কুতোঽস্য পুনরাশুক্রিযাকরণত্বং? যন্ত্রাদিপ্রণিধানাত্, ন হি যন্ত্রাদিষু প্রণিধানে মন্দা ক্রিযা কর্তুং যুক্তা, মন্দকারিত্বে হ্যাতুরস্য ব্যাপত্তিঃ স্যাত্| বরত্বে দ্বিতীযং হেতুমাহ- সর্বতন্ত্রসামান্যাচ্চ; শালাক্যাদিতন্ত্রতুল্যত্বাচ্চ| ‘অধিকক্রিযাকরণাত্’ ইতি কেচিত্ পঠন্তি| অধিকক্রিযাকরণমপ্যস্য যন্ত্রাদিপ্রণিধানাত্ সর্বতন্ত্রসামান্যাচ্চ হেতুভ্যাম্| অন্যে তু বরত্বে আশুক্রিযাকরণাদিতি হেতুত্রযমাহুঃ; আশুক্রিযাকরণাত্ শীঘ্রং ছেদাদিক্রিযাকরণাদিতি ব্যাখ্যানযন্তি||১৮||

অতঃ শিষ্যোত্সাহনায যথাভূতাং প্রশংসামাহ- তদিদমিত্যাদি|- তদিদং শল্যতন্ত্রং; শাশ্বতম্ অবিনাশি, অথবা শাশ্বতশব্দেন মোক্ষোঽভিধীযতে, তত্সম্পাদনাচ্ছাশ্বতং; পুণ্যং পুণ্যহেতুত্বাত্; স্বর্গস্য নিমিত্তং স্বর্গায হিতং বা স্বর্গ্যং; যশসো নিমিত্তং যশসে হিতং বা যশস্যম্; আযুষো নিমিত্তমাযুষে হিতং বা আযুষ্যং; বৃত্তিকরং চেতি নির্বাহকরম্||১৯||

ইদানীং ক্রমাগতিং প্রতিপাদযন্নাহ- ব্রহ্মা প্রোবাচেত্যাদি| প্রোবাচ প্রথমং কথিতবান্| তস্মাত্ প্রজাপতিরধিজগে ইতি প্রজাপতির্দক্ষঃ, অধিজগে অধীতবান্| মযা ত্বিহেতি স্বর্গে ব্রহ্মণৈবার্থিভ্যঃ প্রথমং দত্তং, মযা ধন্বন্তরিণা পুনরিহ মর্ত্যলোকে প্রদেযং প্রথমং দাতব্যমিতি||২০||

অথ কাশিরাজঃ শিষ্যপ্রতীত্যর্থং শ্লোকমাহ- ভবতি চাত্রেত্যাদি| আদিদেবঃ শঙ্করঃ; অন্যে তু, আদিদেবা ব্রহ্মাদযঃ, কর্মদেবাঃ শতক্রতুপ্রভৃতযঃ, প্রজননদেবাস্তু প্রযোজনজনিতাঃ স্কন্দাদযঃ, তেষামহমাদিদেবঃ; আদিদেবত্বেঽপি কাশিরাজত্বমুপপন্নমবতারান্তরমাপন্নত্বাত্| জরারুজামৃত্যুহরোঽমরাণামিতি এতেনৈতদুক্তং- দেবানামপি পুরা জরাদযস্তস্থুঃ, তে চ মযা আদিদেবেন হৃতাঃ| প্রাপ্তোঽস্মি গাং ভূয ইহোপদেষ্টুমিতি পূর্বমহং দেবকার্যার্থং স্বর্গং প্রাপ্তঃ, ইদানীং গাং পৃথিবীং, ভূযঃ পুনঃ, প্রাপ্তোঽস্মি আগতোঽস্মি; ইহ মর্ত্যলোকে, মনুষ্যকার্যার্থমুপদেষ্টুম্| অন্যে ‘শল্যং মহচ্ছাস্ত্রবরং গৃহীত্বা’ ইতি পঠন্তি| স্বমাহাত্ম্যপ্রকাশনমপি পরার্থত্বাদ্যথাভূতত্বাচ্চ ন দোষায||২১||

অস্মিঞ্ছাস্ত্রে পঞ্চমহাভূতেত্যাদি| পঞ্চমহাভূতানি পৃথিব্যাদীনি, শরীরী আত্মা, সমবাযঃ সংযোগঃ| অন্যে তু ‘তত্রাস্মিঞ্ছাস্ত্রে’ ইতি পঠন্তি; তত্রেত্যনেন শল্যতন্ত্রমধিক্রিযতে, তস্মিন্ শল্যশাস্ত্রে, অস্মিন্নিতি অস্মিন্নধিকারে; কিং বিশেষবতি? উচ্যতে- ক্রিযাধিকারে ব্যাধ্যধিষ্ঠানপ্রস্তাবে চ| তস্মিন্ ক্রিযেতি তস্মিন্নিতি পূর্বনির্দিষ্টে পুরুষে, ক্রিযা শাস্ত্রোদিতং কর্ম, কিং তত্? ভেষজশস্ত্রক্ষারাগ্নিনির্বর্ত্যং স্বাস্থ্যবৃত্তিকরং চ| কস্মাত্ তস্মিন্নেব ক্রিযেত্যাহ- সোঽধিষ্ঠানমিতি|- যস্মাত্ সঃ পুরুষঃ, অধিষ্ঠানং আশ্রযঃ; কস্য? ব্যাধেঃ স্বাস্থ্যস্য চ| অধিষ্ঠানত্বে হেতুমাহ- কস্মাদিতি| লোকস্য জগতঃ, দ্বৈবিধ্যাদ্ দ্বিপ্রকারত্বাত্| লোকো হীত্যাদি হি যস্মাদর্থে| স্থাবরো বৃক্ষাদিঃ, জঙ্গমো মনুষ্যাদিঃ| চিকিত্সোপযোগিধর্মদ্বযং প্রতিপাদযিতুমাহ- দ্বিবিধাত্মক এবেত্যাদি| অগ্নিভূতাধিদৈবতস্বভাবমাগ্নেযং, সোমভূতাধিদৈবতস্বভাবং সৌম্যম্| অন্যে দ্বিবিধাত্মকো দ্বিবিধহেতুক ইতি ব্যাখ্যানযন্তি; তন্ন, পঞ্জিকযা দূষিতত্বাত্| ননু, সর্বভূতানাং সর্বত্র সান্নিধ্যমস্তি তত্ কথং দ্বিবিধাত্মক ইত্যাহ- তদ্ভূযস্ত্বাদিতি| তদ্বাহুল্যাদিত্যর্থঃ| প্রাযেণ হি সর্বং দ্রব্যং শীতমুষ্ণং ন তৃতীযো রাশিরস্তি, অতো দ্বাবেব অগ্নীষোমৌ ভূযাংসৌ | অধুনাঽবিশেষেণ দ্বিতীযং পক্ষমাহ- পঞ্চাত্মকো বেতি|- বাশব্দঃ পক্ষান্তরে; তেন স দ্বিবিধোঽপি লোকঃ পঞ্চাত্মকঃ পঞ্চস্বভাব ইত্যযং বা পক্ষঃ| ইদানীং জঙ্গমান্ পৃথক্কর্তুমাহ- তত্রেত্যাদি|- তত্র তযোঃ স্থাবরজঙ্গমযোর্মধ্যে, চতুর্বিধঃ চতুষ্প্রকারঃ, ভূতগ্রামঃ প্রাণিসমূহঃ| অথ কে তে চত্বারঃ প্রকারা ইত্যাহ- সংস্বেদজেত্যাদি|- ভুবঃ শরীরস্য চ সংস্বেদাদূষ্মণো জাতাঃ সংস্বেদজাঃ; জরাযোর্জাতা জরাযুজাঃ, জরাযুর্গর্ভাশযঃ; অণ্ডাজ্জাতাঃ অণ্ডজাঃ, অণ্ডং প্রাণ্যাধারো বর্তুলং; ভুবমুদ্ভিদ্য জাতা উদ্ভিজ্জাঃ; সঞ্জ্ঞাশব্দঃ প্রত্যেকং সম্বধ্যতে| চতুর্ধা নিপতিতানামূষ্মাণং বিনা কস্যচিত্ সিদ্ধির্নাস্তীতি সংস্বেদজস্য প্রাঙ্নির্দেশঃ; কেচিদন্যথাক্রমং পঠন্তি; তন্ন, পঞ্জিকযা দূষিতত্বাত্| লোকদ্বৈবিধ্যাদিতি প্রাগুদ্দিষ্টহেত্বর্থং স্ফুটীকুর্বন্নাহ- তত্র পুরুষ ইতি|- তত্র তযোঃ স্থাবরজঙ্গমযোর্মধ্যে পুরুষঃ প্রাধান্যেন গুণেন পৃথক্ ক্রিযতে| যদ্যপ্যত্র পঞ্চমহাভূতশরীরিসমবাযঃ পুরুষ ইতি সামান্যেন পুরুষশব্দেন পশ্বাদিরপি বাচ্যঃ, তথাঽপি মনুষ্যজাতিরেবাত্র পুরুষশব্দেনোচ্যতে, তস্যোপকার্যত্বাত্; ইতরস্য চাপ্রাধান্যম্, উপকরণত্বাত্| অত এবাহ- তস্যোপকরণমন্যদিতি|- তস্য মনুষ্যজাতেঃ পুরুষস্য, অন্যত্ স্থাবরসংস্বেদজাদি, উপকরণম্| উপকরণত্বাদপ্রধানত্বমিত্যত আহ- তস্মাত্ পুরুষোঽধিষ্ঠানম্| তত্র পুরুষঃ প্রধানমিত্যত্র ‘তেষু চতুর্ষু সংস্বেদজাদিষু মধ্যে’ ইত্যন্যে ব্যাখ্যানযন্তি||২২||

ননু, কে তে ব্যাধযো যেষাং পুরুষোঽধিষ্ঠানমিত্যাহ- তদ্দুঃখেত্যাদি|- তচ্ছব্দেনানন্তরনির্দিষ্টঃ পুরুষোঽধিক্রিযতে, দুঃখং কাযবাঙ্মানসী পীডা| বিবিধং দুঃখমাদধতীতি ব্যাধযঃ, তস্য পুরুষস্য দুঃখায সংযোগো যেষামাগন্তুপ্রভৃতীনাং তে ব্যাধযঃ; অথবা তস্য পুরুষস্য যেষু সত্সু, যৈর্বা করণভূতৈঃ, যেভ্যো বা দুঃখং জাযতে, তে ব্যাধযঃ| এতৌ বাক্যার্থৌ ন্যায্যৌ| অন্যে তু তস্য পুরুষস্য দুঃখানাং বেদনানাং যে সংযোগাস্তে ব্যাধযঃ; অপরে তু দুর্দুষ্টানি খানি স্রোতাংসি দুঃখানি, তস্য পুরুষস্য দুঃখানাং দুষ্টস্রোতসাং নিমিত্তং সংযোগো যেষাং তে তথোক্তাঃ| এতাবন্যায্যৌ, পঞ্জিকযা দূষিতত্বাত্||২৩||

তে চতুর্বিধা ইত্যাদি| পূর্বমুত্পন্নত্বাদাগন্তোঃ প্রাগভিধানং; ততঃ শারীরাঃ, শরীরস্য প্রাধান্যাত্; ততঃ শেষাবিতি| স্বভাবেন ভবন্তীতি স্বাভাবিকাঃ, স্বভাবো হ্যত্র সহজো ধর্মঃ| আগন্তুপ্রভৃতযঃ পূর্বং ব্যাখ্যাতাঃ| স্বাভাবিকাশ্চেতি চকারঃ স্বাভাবিকস্য ব্যাধেরাগন্তুপ্রভৃতিভিঃ সহাতুল্যবলতাং সূচযতি| ইতিশব্দশ্চতুষ্প্রকারসমাপ্তৌ||২৪||

ইদানীমাগন্তুপ্রভৃতীনেব বিবরিতুমাহ- তেষামিত্যাদি| অভিঘাতনিমিত্তা ইতি অভিঘাতঃ অভিহননং শরাদিপ্রহারঃ, স এব নিমিত্তং যেষাং তে তথোক্তাঃ||২৫(১)||

অন্নপানমূলা ইতি সামর্থ্যাদ্বিষমান্নহেতবঃ, ন হ্যন্নসাম্যং ব্যাধিহেতুঃ| তচ্চান্নবৈষম্যং স্বস্থবৃত্তবৈষম্যমুপলক্ষযতি, তেন কালবৈষম্যং কাযবাঙ্মনোবিহারবৈষম্যমিন্দ্রিযার্থবৈষম্যং চ লক্ষযতি| ‘শারীরাণাং বিকারাণামেষ বর্গশ্চতুর্বিধঃ| প্রকোপে প্রশমে চৈব হেতুরুক্তশ্চিকিত্সকৈঃ’- ইত্যেষাং গ্রহণমকৃত্বা, অন্নগ্রহণেনৈতানুপলক্ষযন্নেতল্লক্ষযতি- যথাঽন্নমেবৈষাং সম্ভবে প্রধানহেতুস্তথা নান্যে| বাতপিত্তকফশোণিতসন্নিপাতবৈষম্যনিমিত্তা ইতি বাতাদীনাং সন্নিপাতান্তানাং বৈষম্যং বিষমতা তদেব নিমিত্তং যেষাং তে তথোক্তাঃ; তে পুনর্বাতাদীনাং সঞ্চযাদিজ্ঞাপকা বাতপূর্ণকোষ্ঠতাদযো ব্যাধযঃ| তচ্চ বৈষম্যং ক্ষযেণ বৃদ্ধ্যা বা| দোষপ্রস্তাবে দূষ্যশোণিতগ্রহণে হেতুর্বক্তব্যঃ? উচ্যতে- এতদ্ধি শল্যতন্ত্রং, শল্যতন্ত্রে চ ব্রণঃ প্রধানভূতঃ, ব্রণে চ দূষ্যেষু মধ্যে রক্তস্য প্রাধান্যমিতি শোণিতোপাদানম্; অন্যে তু দোষদূষিতত্বাদ্রক্তমপি ব্যাধ্যুত্পত্তিনিমিত্তং ভবতি, বক্ষ্যতি চৈবং- “দোষদূষিতেষ্বত্যর্থং ধাতুষু সঞ্জ্ঞা ক্রিযতে- রসজোঽযং, শোণিতজোঽযম্” (সূ. অ. ২৪) ইত্যাদি; শোণিতজোঽযমিত্যাদিব্যপদেশো ঘৃতাদিদগ্ধবত্| অন্যনিবন্ধকারৈর্বহূক্তং, তচ্চ শিষ্যবুদ্ধিব্যাকুলত্বহেতুত্বাদস্মাভিরুপেক্ষিতম্||২৫(২)||

মানসান্ প্রতিপাদযন্নাহ- মানসাস্ত্বিত্যাদি| ক্রোধঃ পরাভিদ্রোহলক্ষণঃ, শোকঃ পুত্রাদিবিযোগে চিত্তোদ্বেগঃ, ভযং পরস্মাত্ত্রাসঃ, হর্ষ উত্সেকঃ, নির্নিমিত্তমন্যস্য দোষোত্পাদনেনাত্মনঃ প্রীতিজননং বা হর্ষঃ, অসিদ্ধিভযাদ্বিবিধেষু কর্মসু সাদোঽপ্রবৃত্তিঃ বিষাদঃ, ঈর্ষ্যা পরসম্পত্তাবসহিষ্ণুতা, ছিদ্রান্বেষিতযা পরগুণেষু দোষারোপণমসূযা, দৈন্যং ক্লিষ্টচিত্ততা, মাত্সর্যং পরগুণেষ্বমাধ্যস্থ্যং ক্রৌর্যং বা, কাম ইন্দ্রিযার্থেষ্বভিকাঙ্ক্ষা, লোভঃ পরস্বগ্রহণাভিলাষঃ, আদিগ্রহণান্মানমদদম্ভাদযঃ| ইচ্ছাদ্বেষভেদৈর্ভবন্তীতি ইচ্ছা সাতিশযোঽর্থাভিলাষঃ, সা চ নানাবস্ত্ববলম্বিনী নানাকামতশ্চ ভিন্না ভবতি; তত্র হর্ষশোকদৈন্যকামলোভাদয ইচ্ছাভেদেন; দ্বেষঃ অপ্রীতিঃ,সোঽপি নানাবস্ত্ববলম্বী নানারূপো ভবতি, ক্রোধভযবিষাদের্ষ্যাসূযামাত্সর্যাণি দ্বেষভেদেন| অন্যে তু ‘মানসাঃ ক্রোধশোকভযদৈন্যের্ষ্যাসূযামাত্সর্যকামাদযঃ’ ইতি পঠন্তি||২৫(৩)||

স্বাভাবিকান্ ব্যাখ্যাতুমাহ- স্বাভাবিকাস্ত্বিত্যাদি| ক্ষুদ্ ভোক্তুমিচ্ছা, পিপাসা পাতুমিচ্ছা, জরা বার্ধক্যং, মৃত্যুঃ শরীরেন্দ্রিযাত্মমনসাং বিযোগঃ, নিদ্রা মেধ্যানাডীমনঃসংযোগাদ্দেহেন্দ্রিযাণাং সুখভোগঃ; প্রকৃতিগ্রহণাত্ প্রকৃতিভবা রোগা গৃহ্যন্তে, তে চ কদাচিত্ স্বাভাবিকাঃ কদাচিদ্দোষজাঃ| তত্র, যদা প্রবৃদ্ধপিত্তস্য ক্ষীণশ্লেষ্মণো ভস্মকানলেন বুভুক্ষা ভবতি সা প্রতীকার্যা দোষজত্বাত্, পিপাসাঽপি যদা দোষৈঃ ক্রিযতে তস্যা অপি দোষতঃ প্রসাধনং কর্তব্যং, জরাঽপি যদাঽকালে ভবতি সা প্রতিকার্যা, মৃত্যুরপ্যকালজঃ প্রতিকার্যঃ, নিদ্রাঽপি দোষজা প্রতীকারাদুপশমং যাতি; তত্র যদৈতে সর্বে দোষেভ্যো জাযন্তে তদা শারীরাঃ প্রতীকার্যাশ্চ; যদা তু স্বভাবতস্তদা নিষ্প্রতীকারা রসাযনতোঽপি ন প্রতীকার্যাঃ| ত এতে স্বভাবসম্ভূতত্বাত্ স্বাভাবিকাঃ কথ্যন্তে| যদ্যপি ক্ষুত্পিপাসাজরাসু স্বভাবসম্ভূতাস্বপি পিত্তজত্বং নিদ্রাযাং শ্লেষ্মতমোভবত্বমস্তি; তথাঽপ্যল্পদোষারব্ধত্বাদদোষজত্বমুচ্যতে, একতণ্ডুলাহারিণামনশনব্যপদেশবত্| মৃত্যুস্তু মহদ্ভিরপি স্বভাবানুবর্তিভির্দোষৈরারব্ধোঽপি ন দোষজব্যপদেশং লভতে; যথা রাজানুবর্তিভির্মহদ্ভিরপি পুরুষৈঃ সম্পাদিতং জযাদিকং রাজব্যপদেশং লভতে- রাজ্ঞা জিতমিতি, তদ্বদত্রাপি; আগন্তুমৃত্যোঃ সম্ভবত্বাচ্চ নাবশ্যং দোষজব্যপদেশং লভতে| অন্যে ‘নিদ্রাপ্রকৃতয’ ইত্যত্র ‘নিদ্রাপ্রভৃতয’ ইতি পঠন্তি; প্রভৃতিগ্রহণাদ্রাত্রিজাগরণাদয ইতি ব্যাখ্যানযন্তি||২৫(৪)||

ব্যাধীনামাশ্রযমাহ- ত এতে ইত্যাদি| ত এতে অনন্তরোক্তা ব্যাধযঃ| তত্র মনোঽধিষ্ঠানাঃ ক্রোধাদযঃ, শরীরাধিষ্ঠানা জ্বরাদযঃ, উভযাধিষ্ঠানা অপস্মারাদযঃ| যদ্যপি মানসা অপি শরীরং পীডযন্তি, শারীরা অপি মনঃ পীডযন্তি; তথাঽপি প্রাঙ্মানসা এব মনঃ পীডযন্তি পশ্চাচ্ছরীরম্, এবং শারীরা অপি, ইতি ন দোষঃ| আত্মনি তু ব্যাধ্যধিষ্ঠানত্বং নাস্তি, নির্বিকারত্বাত্||২৬||

ব্যাধীন্ নির্দিশ্য চিকিত্সাং নির্দেষ্টুমাহ- তেষামিত্যাদি| তেষাং ব্যাধীনাম্| সম্যক্ শোধযতীতি সংশোধনং; তদ্দ্বিবিধং বহিরাশ্রযমভ্যন্তরাশ্রযং চ| তত্র বহিরাশ্রযং শস্ত্রক্ষারাগ্নিপ্রলেপাদযঃ; অভ্যন্তরাশ্রযং চতুষ্প্রকারং- বমনং, বিরেচনম্, আস্থাপনং, শোণিতমোক্ষণং চ; অন্যে তু শোণিতমোক্ষণমিত্যত্র শিরোবিরেচনং মন্যন্তে| যত্ কিঞ্চিত্ পীতলীঢাদিকমনির্হৃত্য দোষং শমযতি তত্ সংশমনং; যদুক্তং- “ন শোধযতি যদ্দোষান্ সমান্নোদীরযত্যপি| সমীকরোতি ক্রুদ্ধাংশ্চ তত্ সংশমনমুচ্যতে”- ইতি| তদপি দ্বিবিধং বাহ্যমাভ্যন্তরং চ| তত্র বাহ্যমালেপপরিষেকাবগাহাভ্যঙ্গশিরোবস্তিকবলগ্রহগণ্ডূষাদিকম্, আভ্যন্তরং তু পাচনলেখনবৃংহণরসাযনবাজীকরণবিষপ্রশমনাদিকম্| আহারশ্চতুর্বিধঃ, পেযলেহ্যাদ্যভক্ষ্যভেদাত্; স পুনস্ত্রিবিধঃ- দোষপ্রশমনো, ব্যাধিপ্রশমনঃ, স্বস্থবৃত্তিকরশ্চেতি| দোষসংশমনত্বাত্ সংশমনগ্রহণেনৈবাহারে লব্ধে পৃথক্করণং সংশোধনাদিষ্বাহারস্য প্রাধান্যসূচনার্থম্; অথবা স্বস্থে পুরুষে দোষব্যাধিপ্রশমাভাবাদাহারস্য পৃথগ্গ্রহণম্| আচারঃ কাযবাঙ্মানসং কর্ম; তত্রোত্ক্ষেপণাবক্ষেপণাদিকং কাযিকং কর্ম, পাঠস্বাধ্যাযাদি বাচিকং, ধ্যেযচিন্ত্যসঙ্কল্পাদি মানসম্| সম্যক্প্রযুক্তা ইতি আযুরাদীন্ বীক্ষ্য প্রযুক্তাঃ||২৭||

সংশোধনাদিষ্বাহারস্য প্রাধান্যং দর্শযিতুমাহ- প্রাণিনামিত্যাদি| মূলমিতি মূলমিব মূলং, সম্ভবহেতুত্বাত্; শুক্রশোণিতং তাবদাহারাদেব জাযতে যদ্গর্ভজননসমর্থম্| ন কেবলং প্রাণিনাং মূলং বলবর্ণোজসাং চ| এতেন প্রাণিনামাহারাদেবোত্পত্তিস্থিতী নিদর্শিতে| বলং কর্মসাধনশক্তির্ব্যাযামানুমেযা, বর্ণো গৌরাদিঃ, ওজঃ সোমাত্মকং রসাদিশুক্রান্তসর্বধাতুধামভূতং হৃদিস্থম্| অন্যে তু বলং শরীরোপচযোঽত্রাভিপ্রেত ইতি বদন্তি| এবং পরমার্থতো বলৌজসোর্ভেদেঽপি দোষধাতুমলক্ষযবৃদ্ধিবিজ্ঞানীযে চিকিত্সৈক্যার্থমভেদ উক্তঃ| স ষট্সু রসেষ্বাযত্ত ইতি স আহারঃ, রসেষু মধুরাদিষু, আযত্তঃ অধীনঃ| দ্রব্যাণি পুনরোষধয ইতি ওষধিশব্দোঽত্র সান্নিধ্যাদ্ বক্ষ্যমাণস্থাবরজঙ্গমরাশিদ্বয এব বর্ততে, ন পুনর্যাবদোষধিমাত্রে; অন্যথা হি পার্থিবেষ্বপ্যোষধিশব্দো বর্তত ইতি পার্থিবানামুপাদানং পৃথঙ্গ স্যাত্| অন্যে তু পার্থিবেষ্বপি ওষধিশব্দো বর্তত ইত্যাহুঃ| তাস্ত্বিত্যাদি তা ইতি ওষধযঃ| স্থাবরাণাং বহুতরোপযোগাত্ প্রাগুপাদানম্||২৮||

তাসামিতি দ্বিবিধানামোষধীনাং মধ্যে| কে তে চত্বারঃ প্রকারা ইত্যাহ- বনস্পতয ইত্যাদি| তানেব বিবরিতুমাহ- তাস্বিতি; তাসু মধ্যে| অপুষ্পা ইতি অবিদ্যমানপুষ্পাঃ, ফলবন্ত ইতি ফলং যেষামস্তি তে বনস্পতয ইতি; কে পুনরীদৃশাঃ? প্লক্ষোদুম্বরাদযঃ| পুষ্পফলবন্তো বৃক্ষা ইতি উভযযুক্তা বৃক্ষাঃ; কে তে? আম্রজম্বূপ্রভৃতযঃ| প্রতানবত্য ইত্যাদি প্রতানবত্যো বিস্তারবত্যঃ বীরুধঃ, ন কেবলং প্রতানবত্যো বীরুধঃস্তম্বিন্যশ্চ গুল্মিন্যশ্চ, গুল্মঃ পুনঃ বর্তুললতাসন্ততিবিটপঃ , তাশ্চ বিদারীকোলবল্লীশালপর্ণীপৃশ্নিপর্ণীপ্রভৃতযঃ| কেচিত্ ‘স্তম্বিন্যশ্চ’ ইত্যত্র ‘গুল্মিন্যশ্চ’ ইতি পঠন্তি, তত্রাপি স এবার্থঃ| ফলপাকনিষ্টা ইতি নিষ্ঠা নাশঃ, ফলপাকেন পরিণত্যা নাশো যাসাং তাস্তথোক্তাঃ; তে পুনর্গোধূমাদযঃ| অন্যে তু নিষ্ঠাশব্দং প্রত্যেকং সম্বধ্নন্তি, ফলনিষ্ঠাঃ পাকনিষ্ঠা ইতি; তত্র ফলনিষ্ঠাঃ শালিতিলকুলত্থাদযঃ, পাকনিষ্ঠাঃ কবকাদযঃ; কবকশ্ছত্রক উচ্যতে||২৯||

জঙ্গমাঃ খল্বপীত্যাদি|- খলুশব্দঃ শিষ্যসম্বোধনে, হে সুশ্রুত, জঙ্গমা অপি চতুর্বিধাঃ চতুষ্প্রকারাঃ| তানাহ- জরাযুজেত্যাদি| এতচ্চ পূর্বং ব্যাখ্যাতম্| জরাযুজাদিষু পূর্বোক্তসংস্বেদজাদিক্রমত্যাগো যোনিসঙ্করং বোধযতি; তেন পক্ষিষু বলাকা জরাযুজা অণ্ডজা চেতি, সর্পজাতিষু অহিপতাকা জরাযুজা, সংস্বেদজেষ্বপি কাশ্চিত্ পিপীলিকা অণ্ডজা উদ্ভিজ্জাশ্চ| ব্যালাদয ইতি ব্যালা হিংস্রপশুব্যাঘ্রাদযঃ, অন্যে তু পশুগ্রহণাদেব হিংস্রপশূনামপি গ্রহণমিতি ব্যালশব্দেন সর্পবিশেষমাহুঃ| তদুক্তং- ‘‘সর্পজাতিষু অহিপতাকা জরাযুজা”- ইতি| আদিগ্রহণাদ্ বলাকাজতুকাদযঃ| ইহোপকরণপ্রস্তাবে পশূনাং প্রাধান্যমিতি প্রাঙ্নির্দেশঃ, প্রাগ্ভূতগ্রামপ্রসঙ্গেন পুরুষপ্রাধান্যখ্যাপনার্থম্, অত্র পুনর্জরাযুজাণ্ডজেত্যাদিপাঠ ওষধিত্বখ্যাপনাযেতি ন পৌনরুক্ত্যম্| খগসর্পেত্যাদি খগাঃ পক্ষিণঃ, সর্পা মন্দগামিনোঽজগরপ্রভৃতযঃ, সরীসৃপাঃ শীঘ্রগামিনঃ কৃষ্ণসর্পাদযঃ, মীনমকরাদযো বা; প্রভৃতিগ্রহণাত্ কূর্মনক্রাদীনাং গ্রহণং; কেচিত্ প্রভৃতিশব্দমপঠিত্বা লুপ্তনির্দিষ্টেনাদিশব্দেন কূর্মাদীন্ গৃহ্ণন্তি| কৃমিকীটেত্যাদি কৃমযঃ কোষ্ঠপুরীষাদিবাষ্পসম্ভবাঃ, কীটা বৃশ্চিকষঙ্বিন্দুপ্রভৃতযঃ, পিপীলিকাশ্চিটিকাঃ, প্রভৃতিগ্রহণাদেবংবিধা অন্যেঽপি দৃশ্যন্তে| ইন্দ্রগোপ ইত্যাদি ইন্দ্রগোপাঃ প্রাবৃট্কালজা অতিরক্তকৃমযঃ ‘ইন্দ্রবধূ’ ইতি লোকে, প্রভৃতিগ্রহণাদীদৃশা অন্যেঽপি||৩০||

স্থাবরজঙ্গমযোর্নির্দিষ্টযোশ্চিকিত্সোপযোগিনোঽবযববিশেষান্ দর্শযিতুমাহ- তত্র স্থাবরেভ্য ইত্যাদি| স্বরসাদয ইত্যাদিগ্রহণাত্তৈলক্ষারভস্মকণ্টকপ্রভৃতীনাং গ্রহণম্| কেচিত্ কন্দং সূত্রে ন পঠন্তি, আদিশব্দাচ্চ গৃহ্ণন্তি| রোমরুধিরাদয ইত্যাদিশব্দান্মাংসবসাঘৃতাস্থিখুরাদযঃ||৩১||

রসাধিকারিকমৌষধিবর্গং স্থাবরজঙ্গমং প্রতিপাদ্য, পরিশিষ্টং প্রতিপাদযিতুমাহ- পার্থিবা ইত্যাদি| পৃথিব্যা বিকারাঃ পার্থিবাঃ, রজতং রৌপ্যং, মণিঃ স্ফটিকাদিঃ, মুক্তা মৌক্তিকং, মৃত্ মৃত্তিকা, কপালং কর্পরম্| সুবর্ণস্যেহ পার্থিবত্বমেবাঙ্গীক্রিযতে গুরুত্বকাঠিন্যস্থৈর্যাদিহেতুভিঃ| সূত্রে আদিগ্রহণাল্লোহমলসিকতাসুধাহরিতাললবণগৈরিকরসাঞ্জনপ্রভৃতীনাং গ্রহণম্| যদ্যপি স্থিতিশীলত্বাত্তথা লোকদ্বিত্বসমাখ্যানেঽপৃথগুক্তত্বাচ্চ স্থাবরশব্দেনৈব পার্থিবা উচ্যন্তে, তথাঽপ্যত্র প্রকরণাদ্যেষ্বাহারোপযোগিত্বং ফলমূলাদ্যবযবেষু রসপ্রধানতযা তত্রৈব চতুর্বিধে বনস্পত্যাদিগণে স্থাবরশব্দো বর্ততে ন তু পার্থিবেষ্বপি, তেষামাহারেষু প্রাযেণানুপযোগাত্; অন্যদপি সমাধানান্তরমস্তি, তচ্চ বিস্তরভযান্ন লিখিতম্||৩২||

কালকৃতা ইত্যাদি| আদিগ্রহণান্নিমেষকাষ্ঠাকলামুহূর্তাদযঃ| অন্যে ত্বেতদ্গদ্যমন্যথা পঠন্তি ব্যাখ্যানযন্তি চ; তচ্চ বর্তমানপ্রতিষ্বপ্রসিদ্ধমিত্যস্মাভিরুপেক্ষিতম্||৩৩||

এষাং প্রযোজনং দর্শযিতুমাহ- ত এত ইত্যাদি| স্বভাবত এবেতি স্বলক্ষণত এব| দূষযন্তি কাযবাক্চিত্তানীতি দোষা বাতাদযঃ; তদারব্ধাশ্চ জ্বরাদযঃ| সঞ্চযঃ স্থানবৃদ্ধিঃ; প্রকোপণং প্রকোপঃ, প্রকোপশব্দেন প্রকোপপ্রসরস্থানসংশ্রযব্যক্তিভেদাঃ পঞ্চোচ্যন্তে; প্রকোপঃ স্থানাদুন্মার্গগমনং; প্রসরঃ পঞ্চদশপ্রকারো ব্রণপ্রশ্নে বক্ষ্যতে; জ্বরাতীসারাদীনাং সামান্যলক্ষণং ব্যক্তিঃ, যথা- সন্তাপলক্ষণো জ্বরঃ, সরণলক্ষণোঽতিসার ইত্যাদি; বিশেষণং ভেদঃ, যথা- অষ্টৌ জ্বরা ইত্যাদি; প্রশমনং প্রশমঃ স্বযমুপশমঃ; হেতুব্যাধিবিপরীতং কর্ম প্রতীকারঃ; অন্যে তু প্রশমপ্রতীকারযোরেকার্থতাং মন্যমানাঃ প্রতীকারং ন পঠন্তি; তন্ন, যস্মাজ্জ্বরাদীনামপ্যস্তি স্বভাবোপশমঃ; তদ্যথা- কফজ্বরপ্রতীকারো বসন্তে পূর্বাহ্ণে চ, স্বভাবেন প্রশমস্তু গ্রীষ্মে মধ্যাহ্নে চেত্যাদি; তস্মাত্ প্রশমনপ্রতীকারযোরর্থভেদোঽস্ত্যেব| প্রযোজনবন্তশ্চেতি চিকিত্সোপকারিণ ইত্যর্থঃ| তদ্যথা ‘লাজোত্পলোশীরকুচন্দনানি দত্ত্বা প্রবাতে নিশি বাসযেচ্চ’ (উ. ত. অ. ৪৮); তথা ‘নিবাতে দেশে নিচিতং কৃত্বা’ (সূ. অ. ১১), তথা ‘মদনফলানামাতপপরিশুষ্কাণাং’- (সূ. অ. ৪৩) ইত্যাদি প্রযোজনং জ্ঞাতব্যম্||৩৪||

ইদানীং গদ্যে বিস্তরেণ প্রতিপাদিতমর্থং শ্লোকৈঃ প্রকটীকুর্বন্নাহ- ভবন্তি চাত্র শ্লোকা ইত্যাদি| যদ্যপি সুশ্রুতে ভবন্তি চাত্রেতি বিনাঽপি শ্লোকা ভবন্তি, তথাঽপ্যত্র মন্দমতীনাং গদ্যপদ্যভেদকথনায ভবন্তি চাত্র শ্লোকা ইতি কৃতম্; অন্যে তু বেদাদিধর্মসংবাদার্থমিতি বদন্তি| অথ কে তে শ্লোকা ইত্যাহ- শারীরাণামিত্যাদি| ন চাত্র দ্বিরুক্তিঃ, পূর্বোক্তস্য গূঢার্থস্যাভিব্যক্তিকরত্বাত্ | শারীরাণামিতি শরীরসম্ভবানাম্| বিকারাণামিতি বিকৃতযো বিকারাঃ, তেন বিকারা অত্র কুপিতা দোষা ব্যাধযোঽপি গৃহ্যন্তে| এষঃ পূর্বোক্তঃ| বর্গশ্চতুর্বিধঃ চতুষ্প্রকারঃ, আহারাচারপার্থিবকালকৃতভেদাত্; ‘স্থাবরজঙ্গমপার্থিবকালকৃতভেদাচ্চতুর্বিধঃ’ ইতি জেজ্জটঃ; পঞ্জিকাকারস্ত্বিদং ন মন্যতে| অত্রাপি প্রকোপশব্দঃ প্রকোপপ্রসরস্থানসংশ্রযব্যক্তিভেদেষু বর্ততে| প্রশমশব্দোঽত্র রোগোপঘাতমাত্রস্যোপলক্ষণং; তেন সাধ্যানাং সিদ্ধঃ, যাপ্যানাং যাপনং, স্বস্থবৃত্তং চ গৃহ্যতে||৩৫||

ইদানীমাগন্তূনামাশ্রযভেদেন চিকিত্সাং বক্তুমাহ- আগন্তবস্ত্বিত্যাদি| মনস্যন্যে ইতি একে, শরীরেঽন্যে ইত্যপরে| শরীরপতিতানামাগন্তূনাং খড্গাদ্যভিঘাতজানাং শারীরাণামিব, মানসানাং মনঃসম্ভূতানাং শব্দাদিবর্গঃ শব্দস্পর্শরূপরসগন্ধাঃ; ইষ্ট ইত্যভিপ্রেতশ্চিকিত্সাত্বেন| সুখাবহ ইতি সুখকারী| অন্যে তু চশব্দমনুক্তসমুচ্চযার্থমাচক্ষতে, তেন ধৈর্যস্মৃতিপ্রভৃতযোঽপি মানসান্ চিকিত্সিতুং নির্দিষ্টাঃ||৩৬-৩৭||

ইদানীং ব্যাখ্যাতমর্থমুপসংহরন্নাহ- এবমিত্যাদি| এবমিতি অনেন প্রকারেণ| এতদিতি পূর্বনির্দিষ্টং, চতুষ্টযমিতি চতুরবযবং; যদ্যপ্যত্র পুরুষাদযঃ পঞ্চ, তথাঽপি চতুষ্টযং জ্ঞেযং; তথাহি- ‘‘নান্যঃ কালঃ ক্রিযাতোঽস্তি ক্রিযা নান্যাঽথবৌষধাত্| প্রাধান্যাত্ পুরুষস্যাত্র(থ) ততো ব্যাধিচতুষ্টযম্|| ক্রিযাবিশিষ্টঃ কালো বা কালো বা তচ্চতুষ্টযম্’’- ইতি; অতো ন সঙ্খ্যাতিরেকঃ| তত্র যেন যদুপগৃহীতং তত্র তদুপদর্শযিতুমাহ- তত্রেত্যাদি| তত্রেতি তস্মিন্ চতুষ্টযমধ্যে| তত্সম্ভবদ্রব্যসমূহ ইতি তস্য পুরুষস্য সম্ভব উত্পত্তিস্তদর্থো দ্রব্যসমূহঃ স তথা| কঃ পুনরসাবিত্যাহ- ভূতাদিরিতি|- ভূতানি আদীনি প্রথমানি প্রধানানি বা যস্য স ভূতাদিরিতি বাক্যার্থঃ; তেন শুক্রার্তবপঞ্চমহাভূতানীহ গৃহ্যন্তে| অন্যে ত্বন্যথা ব্যাখ্যানযন্তি- তস্য পুরুষস্য সম্ভবদ্রব্যাণি শুক্রশোণিতাদীনি, তেষাং সমূহঃ সংযোগবিশেষঃ, কথম্ভূতঃ সঃ? ভূতাদিঃ; ভূতং মহাভূতং পৃথিব্যাদিকম্, আদির্মূলকারণং যস্য স তথা; অথবা তত্সম্ভবদ্রব্যসমূহঃ শুক্রশোণিতাদিসংযোগঃ স ভূতানাং প্রাণিনামাদিঃ মূলকারণং, তত্র ব্যক্তীভাবাত্| ভূতাদিরিত্যত্রৈকে ভূতানামাদির্ভূতাদিঃ, অব্যক্তাদারভ্য যাবত্ ‘স এষ কর্মপুরুষশ্চিকিত্সাধিকৃতঃ’ (শা ১) ইতি বদন্তি; তন্ন, পঞ্জিকযা নিরস্তত্বাত্| তদঙ্গপ্রত্যঙ্গবিকল্পাশ্চেতি অঙ্গানি মস্তকাদীনি, প্রত্যঙ্গানি চিবুকাদীনি| ত্বঙ্মাংসসিরাস্নাযুপ্রভৃতয ইতি ত্বচঃ সপ্ত, মাংসং পেশীশতানি পঞ্চ, সিরাশতানি সপ্ত, স্নাযুশতানি নব; প্রভৃতিগ্রহণাত্ স্রোতোধমন্যাদযঃ| সর্ব এবেতি সর্বগ্রহণাদাগন্তুমানসস্বাভাবিকানাং গ্রহণম্| দ্রব্যং স্থাবরাদি, রসা মধুরাদযঃ, গুণা গুর্বাদযঃ, বীর্যাণি শীতোষ্ণাদীনি, দ্বৌ বিপাকৌ গুরুলঘূ; ঔষধগ্রহণং ক্রিযাবিশেষণম্, অতো ন সঙ্খ্যাতিরেকঃ| অযমর্থঃ পুরুষাদিচতুষ্টযপ্রস্তাবে ব্যাখ্যাতঃ| ক্রিযাগ্রহণাদিতি ক্রিযাকালশব্দোপাত্তাদিত্যর্থঃ | স্নেহাদীনীত্যাদিশব্দাত্ স্বেদনবমনবিরেচনাস্থাপনানুবাসনধূমনস্যকবলগ্রহগণ্ডূষপাচনসংশমনাদীনাং গ্রহণং; ছেদ্যাদীনীত্যাদিশব্দাদ্ভেদ্যলেখ্যৈষ্যাহার্যবিস্রাব্যসীব্যাদীনাং গ্রহণম্| কালগ্রহণাদিতি স্নেহনস্বেদনবমনবিরেচনাদীনাং কর্মণাং তথা শস্ত্রাদিকর্মণাং চ বক্ষ্যমাণসমযনির্দেশঃ| তত্র স্নেহস্য ‘প্রতপ্তচামীকরপীতলোহিতে সবিতরি’ (চি. অ. ৩১) ইতি বচনাত্ কালনির্দেশঃ, সর্বস্বেদানাং জীর্ণান্নকালঃ, বমনস্য পূর্বাহ্ণকালঃ, বিরেচনস্য প্রাতঃ, প্রাতরিতি দিনস্যাদিত্রযো মুহূর্তাঃ, আস্থাপনং তু মধ্যাহ্নে তৃতীযে প্রহরে, অনুবাসনং সাযাহ্নে ক্বচিত্প্রদোষেঽপি, তথা ভুক্তবন্তমাতুরমুপবেশ্যেত্যাদ্যনুসর্তব্যম্||৩৮||

অনেন চতুষ্টযেন সকলমেব শাস্ত্রং ব্যাপ্তমিতি নিদর্শযিতুমাহ- ভবতি চাত্রেত্যাদি| বীজমিব বীজং, যথৈকং বীজং ভূমৌ নিক্ষিপ্তং মূলকাণ্ডশাখাপত্রৈর্দূরতরবিসারিতমুপজাযতে, তথেদমপি চিকিত্সিতবীজং সূত্রনিদানশারীরচিকিত্সাকল্পস্থানাদ্যৈর্বিস্তৃতমারোগ্যফলং ভবতীতি| সমাসেন সঙ্ক্ষেপেণ| সবিংশমধ্যাযশতমিতি বিংশত্যধিকমধ্যাযশতমিত্যর্থঃ| সবিংশমিতি সহশব্দেন কিং প্রযোজনম্? উচ্যতে, সহশব্দেনাত্রোত্তরতন্ত্রেণ সহ বিংশত্যধিকমিতি উত্তরতন্ত্রসহিতত্বং প্রকাশ্যতে| ননু, অত্র পক্ষে বীজকথনেনৈবাদ্যাধ্যাযস্য গতত্বাত্ কথং বিংশত্যধিকমধ্যাযশতং পূর্যতে? নৈবং, সর্বতন্ত্রোপলক্ষণত্বাত্তস্যেতি নাত্রোনত্বম্| অন্যে তু সশব্দমূনার্থমাচক্ষতে, যথা- সলবণং সতিক্তং সক্ষারমিতি| কথমত্রোনতা? উচ্যতে, বেদোত্পত্তিমধ্যাযং বিহায বিংশত্যধিকমধ্যাযশতং ন পূর্যতে, একেনোনত্বাত্; তস্মাদূনবিংশত্যধিকমধ্যাযশতমস্য ব্যাখ্যা ভবিষ্যতীতি| যদ্যেবং তর্হি উত্তরতন্ত্রস্য কথং প্রাপ্তিঃ? উচ্যতে, অর্থবশাত্| ননু, কঃ পুনরর্থো যদ্বশাত্ প্রাপ্তিঃ? উচ্যতে - শেষা অর্থা উত্তরে তন্ত্রে প্রতিপাদনীযা ইতি| উত্তরতন্ত্রপ্রাপ্তাবন্যো যোঽর্থোঽস্তি স চ ন লিখিতো গ্রন্থগৌরবভযাত্||৩৯||

তচ্চ সবিংশমিত্যাদি| তচ্চ সোত্তরতন্ত্রং বিংশত্যধিকমধ্যাযশতং পঞ্চসু স্থানেষু| ননু কথমেতত্? উত্তরতন্ত্রস্য পঞ্চভ্যঃ স্থানেভ্যঃ পৃথগুক্তত্বাত্; নৈবং, কুতঃ? পঞ্চস্বেবেতি নিযমাভাবাত্| অত এবাগ্রে বক্ষ্যতি- উত্তরে তন্ত্রে শেষানর্থান্ বক্ষ্যাম ইতি| শেষানর্থানিতি শেষশব্দেন রসভেদাদযঃ স্বস্থবৃত্তাদযশ্চ জ্ঞেযাঃ||৪০||

ইদানীং বেদোত্পত্ত্যধ্যাযে নিদর্শিতস্য চিকিত্সাবীজোপদেশন্যাযেন শাস্ত্রস্য পাঠানুশংসামাহ- স্বযম্ভুবেত্যাদি| স্বযম্ভুবা ব্রহ্মণা, প্রোক্তম্ উপদিষ্টম্, ইদমিতি শাস্ত্রং, সনাতনং নিত্যং, যঃ পঠেত্ অধীযীত; অন্যে তু পঠধাতুরত্র চতুর্ষ্বর্থেষু, তথাহি- পাঠে, অর্থজ্ঞানে, কর্মদর্শনে, অভ্যাসে চ| হি স্ফুটম্| কাশিপতিপ্রকাশিতম্ আদিদেবেন ধন্বন্তরিণা প্রকাশিতম্| ভুবি পৃথিব্যাম্| পূজিতো নৃপৈরিতি নৃপৈঃ নরেন্দ্রৈঃ, এতেন ঐহিকং ফলং দর্শযতি| অসুক্ষযে প্রাণক্ষযে| শক্রসলোকতাম্ ইন্দ্রসমানলোকতাং ব্রজতি, এতেন পারলৌকিকং শ্রেযো দর্শযতি| অন্যে তু ‘শক্রসুলোকতাং ব্রজেত্’ ইতি পঠন্তি; সুশব্দঃ পূজাবচনঃ, তেন শক্রলোকপূজ্যতাং ব্রজেত্ প্রাপ্নুযাদিত্যর্থঃ| এতেন ভুবি নরেন্দ্রৈঃ স্বর্গে চ দেবৈঃ পূজিতো ভবেদিত্যর্থঃ||৪১||

ইতি শ্রীডল্হ(হ্ণ)ণবিরচিতাযান্নিবন্ধসঙ্গ্রহাখ্যাযাং সুশ্রুতব্যাখ্যাযাং সূত্রস্থানে বেদোত্পত্তির্নাম প্রথমোঽধ্যাযঃ||১||