Adhikarana ব্রণশোথস্য বিশিষ্টলক্ষণম্ (১-২) · Śloka ২
অথ ব্রণশোথনিদানম্ |
একদেশোত্থিতঃ শোথো ব্রণানাং পূর্বলক্ষণম্ |
ষড্বিধঃ স্যাত্ পৃথক্সর্বরক্তাগন্তুনিমিত্তজঃ ||১||
শোথাঃ ষডেতে বিজ্ঞেযাঃ প্রাগুক্তৈঃ শোথলক্ষণৈঃ |
বিশেষঃ কথ্যতে চৈষাং পক্বাপক্বাদিনিশ্চযে ||২||
View original
अथ व्रणशोथनिदानम् |
एकदेशोत्थितः शोथो व्रणानां पूर्वलक्षणम् |
षड्विधः स्यात् पृथक्सर्वरक्तागन्तुनिमित्तजः ||१||
शोथाः षडेते विज्ञेयाः प्रागुक्तैः शोथलक्षणैः |
विशेषः कथ्यते चैषां पक्वापक्वादिनिश्चये ||२||
Show commentary
মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)
প্রাযেণ চিকিত্সাসাধর্ম্যাদ্ ভাবিব্রণত্বসম্বন্ধতুল্যত্বাচ্চ ব্রণশোথনিদানমাহ– একদেশোত্থিত ইত্যাদি| ষড্বিধ ইতি সঙ্খ্যাকথনং দ্বন্দ্বজনিষেধার্থম্| প্রাগুক্তৈরিতি আমপক্বৈষণীযোক্তৈঃ; তত্র হি “বাতশ্বযথুররুণঃ কৃষ্ণো বা পরুষো মৃদুরনবস্থিতঃ” (সু. সূ. অ. ১৭) ইত্যাদিনা ষট্শোথলক্ষণান্যুক্তানি| বিশেষঃ কথ্যতে চৈষামিতি তত্রানুক্তো বিশেষঃ কথ্যত ইত্যর্থঃ| পক্বাপক্বাদিনিশ্চয ইতি অত্রাদিশব্দেন পচ্যমানস্য পরিগ্রহঃ||১-২||
আতঙ্কদর্পণ ব্যাখ্যা (বাচস্পতি বৈদ্য কৃত)
ব্রণচিকিত্সাসামান্যাদ্ভাবিব্রণত্বসম্বন্ধতুল্যত্বাচ্চ ব্রণশোথনিদানারম্ভঃ| তেষাং প্রাগ্রূপেণ সঙ্খ্যামাহ– একেত্যাদি| একদেশে শোথঃ এতদ্ব্রণপূর্বরূপং; স চ ষড্বিধঃ– ত্রিভির্দোষৈস্ত্রযঃ, সন্নিপাতেনৈকঃ, রক্তেনৈকঃ, অন্য আগন্তুকঃ অভিঘাতজঃ, এবং ষট্, ষড্বিধ ইতি সঙ্খ্যাকথনং দ্বন্দ্বজনিষেধার্থম্| তেষাং লক্ষণনির্দেশং দর্শযন্নাহ– শোথা ইতি| প্রাগুক্তৈরিতি| শোথনিদানোক্তৈশ্চ, ‘রসস্তনুত্বক্পরুষারুণাদিকৈঃ’ ইত্যাদি| সাম্প্রতং পক্বাপক্বাদিনিশ্চয ইত্যত্রাদিশব্দেন পচ্যমানাবস্থাযাঃ গ্রহণম্||১-২||
Adhikarana ব্রণশোথস্য বাতজাদিভেদেন বিশেষলক্ষণম্ (৩) · Śloka ৩
বিষমং পচ্যতে বাতাত্ পিত্তোত্থশ্চাচিরাচ্চিরম্ |
কফজঃ পিত্তবচ্ছোথো রক্তাগন্তুসমুদ্ভবঃ ||৩||
View original
विषमं पच्यते वातात् पित्तोत्थश्चाचिराच्चिरम् |
कफजः पित्तवच्छोथो रक्तागन्तुसमुद्भवः ||३||
Show commentary
মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)
বাতাদিভেদেন বিশেষলক্ষণমাহ– বিষমমিত্যাদি| পিত্তবদিতি পিত্তশোথবদচিরং পচ্যতে||৩||
আতঙ্কদর্পণ ব্যাখ্যা (বাচস্পতি বৈদ্য কৃত)
তমেব বিশেষমাহ– বিষমমিত্যাদি| শ্বযথোরেকদেশে অর্ধে বা, পিত্তোত্থোঽচিরং শীঘ্রং, কফজশ্চিরং চরকলং, রক্তাগন্তুজযোঃ পিত্তবত্ পিত্তশোফবদচিরং পচ্যতে||৩||
Adhikarana ব্রণশোথস্যামলক্ষণম্ (৪) · Śloka ৪
মন্দোষ্মতাঽল্পশোথত্বং কাঠিন্যং ত্বক্সবর্ণতা |
মন্দবেদনতা চৈতচ্ছোথানামামলক্ষণম্ ||৪||
View original
मन्दोष्मताऽल्पशोथत्वं काठिन्यं त्वक्सवर्णता |
मन्दवेदनता चैतच्छोथानामामलक्षणम् ||४||
Show commentary
আতঙ্কদর্পণ ব্যাখ্যা (বাচস্পতি বৈদ্য কৃত)
আমশোথলক্ষণমাহ– মন্দেতি| মন্দোষ্মতা ঈষদুষ্ণতা, ত্বক্সবর্ণতা ত্বক্সদৃশ এব বর্ণঃ||৪||
Adhikarana পচ্যমানব্রণশোথলক্ষণম্ (৫-৮) · Śloka ৮
দহ্যতে দহনেনেব ক্ষারেণেব চ পচ্যতে |
পিপীলিকাগণেনেব দশ্যতে ছিদ্যতে তথা ||৫||
ভিদ্যতে চৈব শস্ত্রেণ দণ্ডেনেব চ তাড্যতে |
পীড্যতে পাণিনেবান্তঃ সূচীভিরিব তুদ্যতে ||৬||
সোষাচোষো বিবর্ণঃ স্যাদঙ্গুল্যেবাবঘট্যতে |
আসনে শযনে স্থানে শান্তিং বৃশ্চিকবিদ্ধবত্ ||৭||
ন গচ্ছেদাততঃ শোথো ভবেদাধ্মাতবস্তিবত্ |
জ্বরস্তৃষ্ণাঽরুচিশ্চৈব পচ্যমানস্য লক্ষণম্ ||৮||
View original
दह्यते दहनेनेव क्षारेणेव च पच्यते |
पिपीलिकागणेनेव दश्यते छिद्यते तथा ||५||
भिद्यते चैव शस्त्रेण दण्डेनेव च ताड्यते |
पीड्यते पाणिनेवान्तः सूचीभिरिव तुद्यते ||६||
सोषाचोषो विवर्णः स्यादङ्गुल्येवावघट्यते |
आसने शयने स्थाने शान्तिं वृश्चिकविद्धवत् ||७||
न गच्छेदाततः शोथो भवेदाध्मातबस्तिवत् |
ज्वरस्तृष्णाऽरुचिश्चैव पच्यमानस्य लक्षणम् ||८||
Show commentary
মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)
পচ্যমানলক্ষণমাহ– দহ্যত ইত্যাদি| পচ্যমানশোথে পিত্তলিঙ্গান্যেব ভূযসা ভবন্তি, বিদাহস্য পিত্তপ্রকোপজত্বাত্; বিদাহশ্চাত্র দোষাদীনামেব| তেন জ্বরতৃষ্ণারুচ্যাদযোঽত্র পিত্তলিঙ্গানি| ছিদ্যত ইতি দ্বিধা ক্রিযত ইব| ভিদ্যত ইতি বিদার্যতে| সোষাচোষ ইতি উষা দাহঃ, চোষঃ পার্শ্বস্থাগ্নিসন্তাপবদ্ব্যথা, তাভ্যাং সহ বর্ততে যঃ স তথা||৫-৮||
আতঙ্কদর্পণ ব্যাখ্যা (বাচস্পতি বৈদ্য কৃত)
ব্রণশোফস্য পচ্যমানাবস্থামাহ– দহ্যত ইত্যাদি| পচ্যমানশোফে পিত্তলিঙ্গান্যেব ভূযসা ভবন্তি, বিদাহঃ পিত্তপ্রকোপাত্, জ্বরতৃষ্ণারুচ্যাদযোঽপি পিত্তলিঙ্গানি, অগ্নিনা দহ্যত ইব, ক্ষারেণ পচ্যত ইব, পিপীলিকাভির্দশ্যত ইব, ছিদ্যতে দ্বিধাক্রিযত ইব শস্ত্রেণ, ভিদ্যত ইব, দণ্ডেন তাড্যত ইব, অন্তর্মধ্যে, হস্তেন পীড্যত ইব, সূচীভির্বিধ্যত ইব| উষা একদেশিকো দাহঃ, চোষঃ পার্শ্বস্থিতাগ্নিসন্তাপবদ্ব্যথা, তাভ্যাং সহ বর্ততে যঃ স তথা, বিবর্ণঃ ম্লানঃ, অঙ্গুল্যা ইবাবঘট্যতে চাল্যতে| আসনে তথা শযনে তথা স্থানে ঊর্ধ্বভবনে বৃশ্চিকবিদ্ধবত্ শান্তিং ন গচ্ছেত্| আধ্মাতবস্তিবত্ বাযুপূর্ণবস্ত্যাখ্যমূত্রকোশবত্, শ্বযথুঃ সততো ভবতি, ত্বক্সঙ্কোচরহিত ইত্যর্থঃ| জ্বরতৃষ্ণাদযশ্চোপদ্রবা ভবন্তি পচ্যমানব্রণশোফে||৫-৮||
Adhikarana পক্বব্রণশোথলক্ষণম্ (৯-১১) · Śloka ১১
বেদনোপশমঃ শোথোঽলোহিতোঽল্পো ন চোন্নতঃ |
প্রাদুর্ভাবো বলীনাং চ তোদঃ কণ্ডূর্মুহুর্মুহুঃ ||৯||
উপদ্রবাণাং প্রশমো নিম্নতা স্ফুটনং ত্বচাম্ |
বস্তাবিবাম্বুসঞ্চারঃ স্যাচ্ছোথেঽঙ্গুলিপীডিতে ||১০||
পূযস্য পীডযত্যেকমন্তমন্তে চ পীডীতে |
ভক্তাকাঙ্ক্ষা ভবেচ্চৈতচ্ছোথানাং পক্বলক্ষণম্ ||১১||
View original
वेदनोपशमः शोथोऽलोहितोऽल्पो न चोन्नतः |
प्रादुर्भावो वलीनां च तोदः कण्डूर्मुहुर्मुहुः ||९||
उपद्रवाणां प्रशमो निम्नता स्फुटनं त्वचाम् |
बस्ताविवाम्बुसञ्चारः स्याच्छोथेऽङ्गुलिपीडिते ||१०||
पूयस्य पीडयत्येकमन्तमन्ते च पीडीते |
भक्ताकाङ्क्षा भवेच्चैतच्छोथानां पक्वलक्षणम् ||११||
Show commentary
মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)
পক্বলক্ষণমাহ– বেদনোপশম ইত্যাদি| দাহাদিবেদনোপশান্তিঃ, বিদাহোপশমেন পিত্তস্যাবলবত্ত্বাত্| তোদঃ কণ্ডূশ্চাত্র বাতকফলিঙ্গম্| প্রাদুর্ভাবো বলীনামিতি মাংসশৈথিল্যাদ্বলীসম্ভবঃ| উপদ্রবাণাং প্রশম ইতি পিত্তকোপজনিতা উষাচোষতৃষ্ণারুচ্যাদযো রোগা এব উপদ্রবাস্তেষাং প্রশমঃ| নিম্নতা স্বরূপতঃ, অঙ্গুলিপীডনাদ্বা| স্ফুটনং ত্বচামিতি কিঞ্চিত্ত্বগবদরণম্| বস্তাবিবেত্যাদি| বস্তিশ্চর্মপুটকম্, পূযস্যেত্যত্র ‘সঞ্চার’ ইতি শেষঃ| অযমর্থঃ– বস্তৌ যথাঽম্বুসঞ্চারস্তথা শোথেঽঙ্গুলিপীডিতে সতি পূযস্য সঞ্চারঃ| পীডযত্যেকমন্তমন্তে চ পীডিত ইতি একমন্তং দেশম্, অন্তে অবযবে পীডিতে পীডযতি অবগাহতে, ‘পূয’ ইতি শেষঃ||৯-১১||
আতঙ্কদর্পণ ব্যাখ্যা (বাচস্পতি বৈদ্য কৃত)
পক্বাবস্থস্য শোফস্য লক্ষণমাহ– বেদনোপশম ইত্যাদি| বিদাহোপশমেন পিত্তস্যাবলত্বাত্| অলোহিতঃ পাণ্ডুঃ ধূসরো বা, যদুক্তং সুশ্রুতে– “ পাণ্ডুতাঽল্পশোথতা” ইতি অল্পবেদনযা ইতি ঈষত্ পীডা বেদনোপশমঃ, ইতি| যদুক্তম্– উক্তঃ বেদনাপেক্ষযা প্রাদুর্ভাবো বলীনামিতি মাংসশৈথিল্যাদ্বলীসম্ভব ইতি| তোদঃ কণ্ডুশ্চাত্র বাতকফলিঙ্গম্| উপদ্রবাণামিত্যাদি| পিত্তকোপজনিতা উষাচোষতৃষ্ণাঽরুচ্যাদয উপদ্রবাস্তেষামুপশমঃ| নিম্নতা স্বরূপতোঽঙ্গুলিনিপীডনাদ্বা| স্ফুটনং ত্বচামিতি কিঞ্চিত্ত্বগবদরণম্| বস্তাবিবেত্যাদি– বস্তিশ্চর্মপুটকম্| পূযস্যেত্যত্র ‘সঞ্চার’ ইতি শেষঃ| অযমর্থঃ– বস্তৌ যথাঽম্বুসঞ্চারঃ, তথাঽঙ্গুলিপীডিতে শোথেঽপি পূযস্য সঞ্চারঃ| একমন্তং দেশম্, অন্তে অবযবে পীডিতে পীডযতি অবগাহতে ‘পূয’ ইতি শেষঃ| ভক্তাকাঙ্ক্ষেতি বেদনাপগমাদেব||৯-১১||
Adhikarana একদোষারব্ধেঽপি শোথে পাককালে সর্বদোষসম্বন্ধঃ (১২) · Śloka ১২
নর্তেঽনিলাদ্রুঙ্ন বিনা চ পিত্তং পাকঃ কফং চাপি বিনা ন পূযঃ |
তস্মাদ্ধি সর্বে পরিপাককালে পচন্তি শোথাংস্ত্রয এব দোষাঃ ||১২||
(সু. সূ. অ. ১৭) |
View original
नर्तेऽनिलाद्रुङ्न विना च पित्तं पाकः कफं चापि विना न पूयः |
तस्माद्धि सर्वे परिपाककाले पचन्ति शोथांस्त्रय एव दोषाः ||१२||
(सु. सू. अ. १७) |
Show commentary
মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)
একদোষারব্ধেঽপি শোথে পাককালে সর্বদোষসম্বন্ধমাহ– নর্তেঽনিলাদ্রুগিত্যাদি| রুগ্রুজা তোদাদিরূপা| সুশ্রুতে– “ত্রিভিরেতৈঃ শোণিতচতুর্থৈশ্চ শরীরমিদং ধার্যতে” (সু. সূ. অ. ২১) ইতি দ্বিতীযং দর্শনং শোণিতপ্রাধান্যাখ্যাপকমাশ্রিত্যোক্তম্– “কালান্তরেণাভ্যুদিতং তু পিত্তং কৃত্বা বশে বাতকফৌ প্রসহ্য| পচত্যতঃ শোণিতমেষ পাকো মতঃ পরেষাং বিদুষাং দ্বিতীযঃ||” (সু. সূ. অ. ১৭) ইতি| অত্র দর্শনে পিত্তং বিদাহকুপিতং শোণিতং দূষ্যং কর্মভূতং পচতি, বাতকফৌ বশে কৃত্বা ক্রোডীকৃত্য; হীনার্থো বা বশেশব্দঃ, বাতকফৌ হীনৌ কৃত্বেত্যর্থঃ; শোণিতং কর্তৃভূতং বা, তেন পক্ত্যনুকূলত্বাদ্বিবক্ষিতং; পূর্বদর্শনে কফাত্ পূযঃ, অত্র দর্শনে শোণিতাত্ পূয ইতি বিশেষঃ| গম্ভীরপাকে শোথে সকলামপচ্যমানলক্ষণানুদযাদজ্ঞাযমানে লক্ষণান্তরমুক্তং সুশ্রুতেন| তদ্যথা– “কফজেষু খলু শোথেষু গম্ভীরগতিত্বাদভিঘাতজেষু বা কেষুচিদসমস্তং পক্বলক্ষণং দৃষ্ট্বা পক্বমপক্বমিতি ভিষঙ্মোহমুপৈতি, যত্র হি ত্বক্সবর্ণতা শীতশোথতা অল্পরুজতা অশ্মবদ্ঘনতা চ, ন তত্র মোহমুপেযাত্|” (সু. সূ. অ. ১৭) ইতি| অস্যার্থঃ– যদা রাগদাহাদিবেদনাসমুদাযানন্তরং ত্বক্সবর্ণতাদীনি ভবন্তি তদা ন মোহমজ্ঞানতামুপেযাত্ পক্বমেবেতি নিশ্চিনুযাত্| গদাধরেণ তু ত্বক্সবর্ণতাদীনি সংশযহেতূন্যুক্তানি; যতস্তেন “গম্ভীরপাকিত্বাদন্তঃ পাকো বহিঃ পুনস্ত্বক্সাবর্ণ্যং, গম্ভীরপাকিত্বাদেব বহিঃ শীততা, কফারব্ধত্বান্মন্দরুজতাঽশ্মবচ্চ ঘনতা” ইত্যভিধায “শেষং পক্বলক্ষণৈর্জানীযাত্” ইত্যুক্তম্||১২||
আতঙ্কদর্পণ ব্যাখ্যা (বাচস্পতি বৈদ্য কৃত)
একদোষারব্ধেঽপি শোথে পাককালে সর্বদোষসম্বন্ধমাহ– নেত্যাদি| অনিলাদ্বাতাদৃতে রুঙ্ ন ভবতি, পিত্তং বিনা পাকো ন ভবতি, কফং বিনা পূযো ন ভবতি, তস্মাদ্ধেতোঃ সর্বে শোফাঃ পরিপাককালে ত্রিভিরেব দোষৈঃ পাকং গচ্ছন্তি, রুক্ রুজা তোদাদিরূপা, শেষং সুগমম্| সুশ্রুতে– ‘ত্রিভিরেতৈঃ শোণিতচতুর্থৈঃ শরীরমিদং ধার্যতে|’ ইতি দ্বিতীযং নিদর্শনং শোণিতপ্রাধান্যাখ্যাপকমাশ্রিত্যোক্তং মতান্তরমাহ– কালান্তরেণেত্যাদি| পিত্তপ্রকোপপ্রসরস্থানসঙ্গ্রহকালাবধিনা অভি সমন্ততো ভাবেনাভ্যুদিতং কুপিতং পিত্তং, পিত্তমত্র দোষো জ্ঞেযঃ, শোণিতং দূষ্যং, তুশব্দোঽত্র পুনরর্থে, বাতকফৌ বশে কৃত্বা আত্মসাত্ কৃত্বা, পাকক্রিযাযাং পিত্তস্য প্রাধান্যাত্| পূর্বমতে কফাত্ পূযঃ, অত্র তু শোণিতাদিভিরিতি তাত্পর্যার্থঃ||১২||
Adhikarana অবিনিঃসৃতস্য পূযস্য বিকারান্তরকর্তৃত্বম্ (১৩-১৪) · Śloka ১৪
কালান্তরেণাভ্যুদিতং তু পিত্তং কৃত্বা বশে বাতকফৌ প্রসহ্য |
পচত্যতঃ শোণিতমেষ পাকো মতঃ পরেষাং বিদুষাং দ্বিতীযঃ ||১৩||
কক্ষং সমাসাদ্য যথৈব বহ্নির্বায্বীরিতঃ সন্দহতি প্রসহ্য |
তথৈব পূযো হ্যবিনিঃসৃতো হি মাংসং সিরাঃ স্নাযু চ খাদতীহ ||১৪||
(সু. সূ. অ. ১৭) |
View original
कालान्तरेणाभ्युदितं तु पित्तं कृत्वा वशे वातकफौ प्रसह्य |
पचत्यतः शोणितमेष पाको मतः परेषां विदुषां द्वितीयः ||१३||
कक्षं समासाद्य यथैव वह्निर्वाय्वीरितः सन्दहति प्रसह्य |
तथैव पूयो ह्यविनिःसृतो हि मांसं सिराः स्नायु च खादतीह ||१४||
(सु. सू. अ. १७) |
Show commentary
মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)
অবিনিঃসৃতস্য পূযস্য দোষমাহ– কক্ষমিত্যাদি| কক্ষং সমাসাদ্যেতি কক্ষং তৃণাদিগহনম্||১৩-১৪||
আতঙ্কদর্পণ ব্যাখ্যা (বাচস্পতি বৈদ্য কৃত)
অনির্হৃতস্য পূযস্য দোষং দর্শযন্নাহ– কক্ষমিত্যাদি| কক্ষং তৃণাদীনাং সমূহং, স্নাযুমূলাঃ সিরাঃ, বায্বীরিতঃ বাযুপ্রেরিতঃ||১৩-১৪||
Adhikarana আমশোথং ছেদযতঃ পক্বং চোপেক্ষতো বৈদ্যস্য নিন্দা (১৫-১৬) · Śloka ১৬
আমং বিদহ্যমানং চ সম্যক্ পক্বং চ যো ভিষক্ |
জানীযাত্ স ভবেদ্বৈদ্যঃ শেষাস্তস্করবৃত্তযঃ ||১৫||
যশ্ছিনত্ত্যামমজ্ঞানাদ্যো বা পক্বমুপেক্ষতে |
শ্বপচাবিব মন্তব্যৌ তাবনিশ্চিতকারিণৌ ||১৬||
(সু. সূ. অ. ১৭) |
View original
आमं विदह्यमानं च सम्यक् पक्वं च यो भिषक् |
जानीयात् स भवेद्वैद्यः शेषास्तस्करवृत्तयः ||१५||
यश्छिनत्त्याममज्ञानाद्यो वा पक्वमुपेक्षते |
श्वपचाविव मन्तव्यौ तावनिश्चितकारिणौ ||१६||
(सु. सू. अ. १७) |
Show commentary
মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)
শ্বপচাবিব চণ্ডালাবিব, মন্তব্যৌ জ্ঞাতব্যৌ| শেষাস্তস্করবৃত্তয ইতি লোভমাত্রপ্রযুক্তত্বাত্তস্করা ইব শেষাঃ||১৫-১৬||
আতঙ্কদর্পণ ব্যাখ্যা (বাচস্পতি বৈদ্য কৃত)
আমাদিলক্ষণজ্ঞানে গুণমজ্ঞানে চ দোষং দর্শযন্নাহ– আমমিত্যাদি| আমমপক্বং, বিদহ্যমানং পচ্যমানং, সম্যক্ পক্বং চ, যো ভিষক্ জানীযাত্, স বৈদ্যো ভবেত্ আযুর্বেদবিত্ স্যাত্, শেষা অন্যে আমাদিজ্ঞানবর্জিতাঃ লোভমাত্রপ্রযুক্তত্বাত্তস্করা এব| পক্বাপক্বযোশ্ছেদনাছেদনেন বৈদ্যদোষমাহ– য ইত্যাদি| শ্বপচশ্চাণ্ডালঃ, স হি সর্বভক্ষিত্বাত্ শ্বানমপি পচতি| শেষং সুগমম্||১৫-১৬||
Adhikarana পুষ্পিকা · Śloka ৪১
ইতি শ্রীমাধবকরবিরচিতে মাধবনিদানে ব্রণশোথনিদানং সমাপ্তম্ ||৪১||
View original
इति श्रीमाधवकरविरचिते माधवनिदाने व्रणशोथनिदानं समाप्तम् ||४१||
Show commentary
মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)
ইতি শ্রীকণ্ঠদত্তবিরচিতাযাং মধুকোশব্যাখ্যাযাং ব্রণশোথনিদানং সমাপ্তম্||৪১||
আতঙ্কদর্পণ ব্যাখ্যা (বাচস্পতি বৈদ্য কৃত)
ইতি শ্রীবাচস্পতিবৈদ্যবিরচিতাযাং মাধবনিদানব্যাখ্যাযামাতঙ্কদর্পণাখ্যাযাং ব্রণশোথনিদানম্||৪১||