১৩. স্বরভেদনিদানম্

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

প্রাণোদানদুষ্টিসাধর্ম্যাত্ শ্বাসে চ স্বরভেদো ভবতীতি শ্বাসানন্তরং স্বরভেদমাহ– অত্যুচ্চভাষণেত্যাদি| অধ্যযনমুচ্চৈর্বেদাদিপাঠঃ, অভিঘাতঃ কণ্ঠাদিদেশে লগুডাদিভিরাঘাতঃ, এতৈঃ সন্দূষণৈরন্যৈশ্চ যথাস্বং বাতাদিকোপনৈঃ, বিষং তু সর্বদোষপ্রকোপণমেব| স্রোতঃসু স্বরবহেষু চতুর্ষু; যদুক্তং সুশ্রুতে– “দ্বাভ্যাং ভাষতে, দ্বাভ্যাং ঘোষং করোতি” (সু. শা. অ. ৯) ইতি; ভাষণঘোষণযোরল্পত্বমহত্ত্বাভ্যাং ভেদঃ| প্রতিষ্ঠাং স্থিতিং, বৃদ্ধিং বা| স ইতি স্বরভেদঃ; ষড্বিধো বাতপিত্তকফসন্নিপাতক্ষযমেদোজভেদাত্||১||

আতঙ্কদর্পণ ব্যাখ্যা (বাচস্পতি বৈদ্য কৃত)

হিক্কাশ্বাসৌ প্রাণোদানদুষ্ট্যা সম্ভবতঃ, তদ্দুষ্টিসাধর্ম্যাত্ শ্বাসানন্তরং স্বরভেদমাহ– অত্যুচ্চেত্যাদি| অধ্যযনমুচ্চৈর্বেদাদিপাঠঃ; অভিঘাতঃ কণ্ঠপ্রদেশে লগুডাদিভিঃ, অথবা বলেন ছর্দিজনিতঃ, অথবাঽস্থ্যাদিকঠিনভোজ্যজনিতঃ| বিষতস্তু ত্রিদোষপ্রকোপঃ| স্রোতঃসু স্বরবহেষু চতুর্ষু, যদুক্তং সুশ্রুতে– “দ্বাভ্যাং ভাষতে, দ্বাভ্যাং ঘোষং করোতি” ইতি; ভাষণঘোষণযোরল্পত্বমহত্ত্বাভ্যাং ভেদঃ| এতৈঃ সন্দূষণৈরন্যৈশ্চ যথাস্বং বাতাদিকোপনৈর্দোষাস্তেষু স্রোতঃসু প্রতিষ্ঠাং স্থিতিং বৃদ্ধিং বা গতাঃ স্বরং হন্যুঃ| স স্বরভেদঃ ষড্বিধ ইতি বাতপিত্তকফসন্নিপাত ক্ষযমেদোজনিত ইতি ভেদাত্||১||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

বাতিকমাহ– বাতেনেত্যাদি| কৃষ্ণত্বং মূত্রাদিষু স্বরভেদারম্ভকদোষস্য সর্বাঙ্গব্যাপকত্বাত্, অর্শোবত্| ভিন্নং ভিন্নস্বরং, তদেবাহ– গর্দভবত্ খরমিতি; খরং নিষ্ঠুরম্, উদ্বেজকমিতি যাবত্|২|–

আতঙ্কদর্পণ ব্যাখ্যা (বাচস্পতি বৈদ্য কৃত)

বাতিকমাহ– বাতেনেত্যাদি| কৃষ্ণত্বং স্বরভেদারম্ভকদোষস্য সর্বাঙ্গব্যাপকত্বাত্, অর্শোবত্| ভিন্নং ভিন্নস্বরং, গর্দভস্বরবত্ স্বরং খরমুদ্বেজকমিতি যাবত্| অন্যে গর্দভবত্স্বরমিত্যত্র গর্দভবত্খরমিতি পঠন্তি, গর্দভস্য বচনাভাবাত্; ‘কণ্ঠেন’ ইতি শেষঃ|২|–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পৈত্তিকমাহ– পিত্তেনেত্যাদি| গলেনেতি বিশেষ্যোপদর্শনং, দাহসমন্বিতেনেতি বিশেষণস্য বিশেষ্যাধীনপ্রতীতত্বাত্; গলঃ সদাহো ভবতীত্যর্থঃ||২||

আতঙ্কদর্পণ ব্যাখ্যা (বাচস্পতি বৈদ্য কৃত)

পৈত্তিকমাহ– পিত্তেনেত্যাদি| গলস্তস্য সদাহো ভবতীত্যর্থঃ||২||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

শ্লৈষ্মিকমাহ– ব্রূযাদিত্যাদি| দিবা বিশেষাদিতি দিনে সূর্যরশ্মিভিঃ কফস্য মন্দীভাবাদ্বিশেষাদ্বিশিষ্টং বদতীত্যর্থঃ| ‘দিবাবিশেষ’ ইতি পাঠান্তরে স এবার্থঃ|৩|–

আতঙ্কদর্পণ ব্যাখ্যা (বাচস্পতি বৈদ্য কৃত)

কফজমাহ-ব্রূযাদিত্যাদি| ব্রূযাদিত্যত্র কৃচ্ছ্রাদিতি কেচিত্পঠন্তি|৩|–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

সান্নিপাতিকমাহ– সর্বাত্মক ইত্যাদি| সর্ববিকারসম্পদিতি উক্তবাতাদিস্বরভেদলিঙ্গযোগঃ| তং চাপ্যসাধ্যমিতি অপিশব্দো ভিন্নক্রমে, অসাধ্যমপি; তেন “সর্বজে ক্ষযজে চাপি প্রত্যাখ্যাযাচরেত্ ক্রিযাম্||” (সু. উ. তং. অ. ৫৩) ইতি সুশ্রুতবচনমুপপন্নং ভবতীতি||৩||

আতঙ্কদর্পণ ব্যাখ্যা (বাচস্পতি বৈদ্য কৃত)

সন্নিপাতজমাহ– সর্ববিকারসম্পদিত্যাদি| উক্তবাতাদিস্বরভেদলিঙ্গানি| তং চাপ্যসাধ্যমিতি অপিশব্দো ভিন্নক্রমঃ| অসাধ্যমপি; তেন “সর্বজে ক্ষযজে চাপি প্রত্যাখ্যাযাচরেত্ ক্রিযাম্” ইতি সুশ্রুতবচনমুপপন্নং ভবতীতি||৩||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ক্ষযজমাহ– ধূপ্যেতেত্যাদি| ধূপ্যেত বাগিতি সধূমেব নির্গচ্ছন্তী বেদনাযাঽনুভূযতে| ক্ষযকৃত ইতি ধাতুক্ষযকৃত স্বরভেদে| ক্ষযমাপ্নুযাচ্চ বাগিতি পদচ্ছেদঃ| এষ চ যদা হতবাগ্ভবতি ওজঃক্ষযাদ্বচনাক্ষমস্তদা ন সাধ্যতে, অন্যথা তু সাধ্যঃ; তেন প্রত্যাখ্যায ক্রিযাকরণমুপপন্নং ভবতি| ‘এষু চাপি’ ইতি পাঠে বাতাদিস্বরভেদেষু মধ্যে হতবাগসাধ্যঃ, কিন্ত্বযং পাঠষ্টীকাকারৈর্ন ব্যাখ্যাতঃ|৪|–

আতঙ্কদর্পণ ব্যাখ্যা (বাচস্পতি বৈদ্য কৃত)

ক্ষযজমাহ– ধূম্যেত বাগিতি| সধূমেনেব নির্গচ্ছন্তী বেদনযাঽনুভূযতে, ‘ধূমাবতে’ ইতি পাঠান্তরে স এবার্থঃ| ক্ষযকৃত ইতি ধাতুক্ষযকৃতে স্বরভেদে| ক্ষযমাপ্নুযাচ্চ বাগিতি পদচ্ছেদঃ, বচনং ক্ষযমাপ্নুযাত্ ‘বাতাত্’ ইতি শেষঃ| স এব যদা হতবাক্ ওজঃক্ষযাদ্বচনাক্ষমঃ, তদা ন সাধ্যঃ, অন্যথা তু সাধ্যঃ| অন্যে ‘এষু চ’ ইতি পঠন্তি; ততশ্চৈষু বাতাদিস্বরভেদেষু মধ্যে হতবাগসাধ্যঃ; কিং ত্বযং পাঠষ্টীকাকারৈর্ন স্বীকৃতঃ|৪|–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

মেদোজলক্ষণমাহ– অন্তর্গতেত্যাদিনা| অন্তর্গতস্বরমিতি ক্রিযাবিশেষণম্; ‘অন্তর্গতং স্বরম্’ ইতি পাঠে তু কণ্ঠস্যান্তর্গতং যথা ভবতি তথা স্বরং বচনং বদতীতি যোজ্যং; ‘অন্তর্গলম্’ ইতি পাঠান্তরে গলস্যান্তরিতি অন্তর্গলং স্বরং বদতীত্যর্থঃ| দিগ্ধগল ইতি শ্লেষ্মণা মেদসা বা লিপ্তগল ইত্যর্থঃ| তৃষার্তশ্চ মেদোরুদ্ধস্রোতস্ত্বাত্||৪||

আতঙ্কদর্পণ ব্যাখ্যা (বাচস্পতি বৈদ্য কৃত)

মেদোজমাহ– অন্তরিত্যাদি| অন্তর্গতস্বরমিতি ক্রিযাবিশেষণম্; তেন কণ্ঠস্থান্তর্গতং যথা ভবতি তথা স্বরং বচনং বদতীতি যোজ্যম্| ‘অন্যে অন্তর্গলম্’ ইতি পঠন্তি, তত্র গলস্য অন্তঃ অন্তর্গলং, তদ্গতং স্বরং বদতীত্যর্থঃ| মেদোন্বযান্মেদঃসম্বন্ধাত্| ‘মেদশ্চযাত্’ ইতি কেচিত্পাঠান্তরং পঠন্তি, মেদশ্চযান্মেদোবৃদ্ধেরিতি; ‘ভেদঃক্ষযাত্’ ইতি পাঠান্তরম্, অত্র স্বরশব্দো লুপ্তো মধ্যেঽতিদিষ্টো দ্রষ্টব্যঃ, তেন মেদসা স্বরক্ষযাদিত্যর্থঃ| দিগ্ধগল ইতি শ্লেষ্মণা মেদসা বা লিপ্তগল ইত্যর্থঃ| তৃষার্ত ইতি মেদোরুদ্ধস্রোতস্ত্বাত্||৪||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

উক্তবাতাদিজানামেবাবস্থাযামসাধ্যত্বমাহ– ক্ষীণস্যেত্যাদিনা সহোপজাত ইত্যন্তেন| ক্ষীণস্য ক্ষীণমাংসস্য| কৃশস্য অবলস্য| সহোপজাতো জন্মপ্রভৃতিবদ্ধঃ, ‘কাকস্বর’ ইতি লোকে| ‘সহোপজাতঃ’ ইত্যত্র ‘মদোপজাতঃ’ ইতি পাঠান্তরম্, মদো রোগবিশেষঃ| মেদস্বিনোঽতিস্থূলস্য মেদসাঽঽবৃতস্রোতস্ত্বেন যো জাতঃ; অমেদস্বিনস্তু মেদোদুষ্ট্যা জাতঃ স সাধ্যঃ পূর্বমুক্ত ইতি ন বিরোধঃ| সর্বসমুদ্ভবশ্চাবগাঢঃ সম্পূর্ণলিঙ্গো বাঽসাধ্যো দ্রষ্টব্য ইতি||৫||

আতঙ্কদর্পণ ব্যাখ্যা (বাচস্পতি বৈদ্য কৃত)

অসাধ্যমাহ– ক্ষীণস্যেত্যাদি| ক্ষীণস্য অবলস্য, কৃশস্য ক্ষীণমাংসস্য, সহজোপজাতঃ জন্মপ্রতিবদ্ধঃ, স চ কাকস্বর ইতি লোকে; ‘সহজোপজাত’ ইত্যস্য স্থানে ‘স মদোপজাত’ ইতি পঠন্ত্যন্যে; তত্র মদো রোগবিশেষঃ| মেদস্বিন ইতি অতিস্থূলস্য মেদসাবৃতস্রোতস্ত্বেন যো জাতঃ, মেদস্বিনস্তু মেদোবৃদ্ধ্যা যো জাতঃ সোঽসাধ্যঃ পূর্বমুক্তমিতি ন বিরোধঃ| সর্বসমুদ্ভবশ্চাবগাঢঃ সম্পূর্ণলিঙ্গো বাঽসাধ্যো দ্রষ্টব্যঃ||৫||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ইতি শ্রীবিজযরক্ষিতকৃতাযাং মধুকোশব্যাখ্যাযাং স্বরভেদনিদানং সমাপ্তম্||১৩||

আতঙ্কদর্পণ ব্যাখ্যা (বাচস্পতি বৈদ্য কৃত)

ইত্যাতঙ্কদর্পণে নিদানব্যাখ্যাযাং স্বরভেদনিদানম্||১৩||