১৪. অরোচকনিদানম্

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ঊর্ধ্বগবিকারসাধর্ম্যাদরোচকমাহ– বাতাদিভিরিত্যাদি| একৈকশো বাতাদিভিস্ত্রযঃ, সন্নিপাতেনৈকঃ, শোকাদিনা গন্ধান্তেনাগন্তুরেক এব গণনীযঃ, যতঃ পঞ্চানামেকং লক্ষণং বক্ষ্যতি; সুশ্রুতে চোক্তম্– “ভক্তোপঘাতমিহ পঞ্চবিধং বদন্তি|” (সু. উ. তং. অ. ৫৭) ইতি| শোকাদিজস্তু যদ্যপি বাতাদিজঃ, তথাঽপি হেতুপ্রত্যনীকচিকিত্সাকরণার্থং পৃথগুক্তঃ| অতিলোভোঽত্রাহিতস্য সততোপযোগহেতুতযা দোষপ্রকোপক ইতি দর্শযতি| অরোচকাঃ স্যুরিতি ছেদঃ|১|–

আতঙ্কদর্পণ ব্যাখ্যা (বাচস্পতি বৈদ্য কৃত)

ঊর্ধ্বগবিকারসাধর্ম্যাদরোচকমাহ– বাতাদিভিরিতি| একৈকশো বাতাদিভিস্ত্রযঃ, সন্নিপাতেনৈকঃ, শোকভযাদিনাঽঽগন্তুরেক এব গণনীযঃ, যতঃ পঞ্চানামপি লক্ষণং বক্ষ্যতি; সুশ্রুতে চোক্তম্– “ভক্তোপঘাতমিহ পঞ্চবিধং বদন্তি” ইতি| তন্ত্রান্তরেঽপি– “অরোচকো ভবেদ্দোষৈরেকো হৃদযসংশ্রযৈঃ| সন্নিপাতেন মনসঃ সন্তাপেন চ পঞ্চমঃ” ইতি| শোকাদিজো যদ্যপি বাতজস্তথাঽপি হেতুপ্রত্যনীকচিকিত্সার্থং পৃথগুক্তঃ| এতৈর্হেতুভিররোচকা ভবন্তি| মনোঘ্নাশনমুচ্ছিষ্টকৃমিক্লিন্নাদিরূপং শরীরশ্বযথুগতং, গন্ধঃ পূতিঃ, তৈঃ|১|–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

বাতিকলক্ষণমাহ– পরীত্যাদি| পরিহৃষ্টদন্ত ইতি অম্লভক্ষণেনেব||১||

আতঙ্কদর্পণ ব্যাখ্যা (বাচস্পতি বৈদ্য কৃত)

বাতিকমাহ– পরিহৃষ্টদন্ত ইতি অম্লভক্ষণেনেব, কষাযবক্ত্র ইতি লোধ্রচর্বিতস্যেব||১||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পৈত্তিকলক্ষণমাহ– কট্বিত্যাদি| কটুশব্দোঽত্র তিক্তবাচী| যদাহ বিদেহঃ– “পিত্তেন তিক্তাস্যবিদাহকৃত্ স্যাত্, স্বাদ্বাস্যহৃল্লাসকরঃ কফেন|” ইতি|২|–

আতঙ্কদর্পণ ব্যাখ্যা (বাচস্পতি বৈদ্য কৃত)

পিত্তজমাহ– কট্বিত্যাদি| কটুরত্র তিক্তবাচকঃ| যদাহ বিদেহঃ– “পিত্তেন তিক্তাস্যবিদাহকৃত্স্যাত্স্বাদ্বাস্যহৃল্লাসকরঃ কফেন” ইতি| বিরসমিতি রোগস্বভাবাত্, অন্যথা বাতেন বিরসাস্যতা| পিত্তেন পূতি দুর্গন্ধং জানীযাত্| লবণং চ বক্ত্রমিতি কফজলক্ষণে পঠনীযং, যতো বিদগ্ধঃ শ্লেষ্মা লবণভাবমুপৈতি|২|–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

শ্লৈষ্মিকলক্ষণমাহ– লবণমিত্যাদি| লবণং বক্ত্রমিতি বিদগ্ধস্য শ্লেষ্মণো লবণরসত্বাত্| উক্তং হি সুশ্রুতে– “শ্লেষ্মা বিদগ্ধো লবণঃ স্মৃতঃ, পিত্তং বিদগ্ধমম্লম্|” (সু. সূ. অ. ৪০) ইতি| বিবদ্ধসম্বদ্ধযুতমিতি বিবদ্ধং চ তত্ সম্বদ্ধযুতং চেতি বিবদ্ধসম্বদ্ধযুতম্| অত্র বিবদ্ধং বদ্ধমিব, ভক্ষণাদ্যসামর্থ্যাত্; সম্বদ্ধযুতং ‘কফস্য’ ইতি শেষঃ; ভাবে ক্তঃ, কফলিপ্তমিত্যর্থঃ| ‘বিদগ্ধসম্বদ্ধযুতম্’ ইতি পাঠান্তরং সুগমম্| ‘বিবদ্ধসন্নদ্ধযুতম্’ ইতি পাঠে বিবদ্ধঃ সন্নদ্ধঃ স চ প্রকৃতত্বাত্ কফস্য, সন্নদ্ধো বদ্ধঃ; ‘ণহ’ বন্ধনে ইত্যস্মাদ্ধাতোঃ পূর্ববত্ ক্তাদি| ‘বিবদ্ধসংস্তম্ভযুতম্’ ইতি কাশ্মীরাঃ||২||

আতঙ্কদর্পণ ব্যাখ্যা (বাচস্পতি বৈদ্য কৃত)

কফজমাহ– লবণমিত্যাদি| কফেন লবণং চ বক্ত্রমিতি যোজ্যং, মাধুর্যাদিযুতমিতি বক্ত্রেণৈব| বিবদ্ধসম্বদ্ধযুতমিতি নিবদ্ধং চ তত্সম্বদ্ধযুতং চ তত্তথা; বিবদ্ধমিব ভক্ষণাক্ষমং, সম্বদ্ধযুতং কফস্যেতি শেষঃ, কফলিপ্তমিত্যর্থঃ| অন্যে বিবদ্ধসন্নদ্ধযুতমিতি পঠন্তি, বিবদ্ধঃ সন্নদ্ধঃ স চ প্রকৃতত্বাত্ কফস্য; সন্নদ্ধো বদ্ধঃ, ‘ণহ’ বন্ধনে, ইত্যস্য ধাতোঃ প্রযোগঃ||২||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

আগন্তুজমাহ– অরোচক ইত্যাদি| অহৃদ্যগন্ধো ঘ্রাণোদ্বেজকো গন্ধঃ| স্বাভাবিকং চাস্যমিতি অবিকৃতমুখরসত্বং, ন তু বাতাদিবত্ কষাযত্বাদি|৩|–

আতঙ্কদর্পণ ব্যাখ্যা (বাচস্পতি বৈদ্য কৃত)

আগন্তুজমাহ– অহৃদ্যঃ প্রাণোদ্বেজকো গন্ধঃ, অশুচিঃ উচ্ছিষ্টং, স্বাভাবিকং চাস্যমিতি অবিকৃতমুখরসত্বং ন তু বাতাদিবদ্বক্ত্রকষাযত্বাদিকম্, অথ অরুচিরিতি বিশেষত্বম্|৩|–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ত্রিদোষজমাহ– ত্রিদোষজ ইত্যাদি| ত্রিদোষজে নৈকরসমিতি বাতজাদ্যুক্তকষাযাদ্যনেকরসত্বম্||৩||

আতঙ্কদর্পণ ব্যাখ্যা (বাচস্পতি বৈদ্য কৃত)

ত্রিদোষজমাহ– অনেকরসমাস্যমিত্যর্থঃ||৩||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

বাতজাদিভেদেন মুখবিকৃতিমভিধাযান্যদেশবিকৃতিমাহ– হৃচ্ছূলেত্যাদি| হৃদি শূলেন পীডনম্ | চোষশ্চূষণবত্ পীডা| বহুভিরিতি ত্রিদোষৈঃ| বৈগুণ্যমোহজডতাভিরথাপরমিতি উপলক্ষণে তৃতীযা, বৈগুণ্যং মনসো ব্যাকুলত্বম্| অপরমিতি দোষজাদন্যমাগন্তুজমিত্যর্থঃ| সত্যামপি বুভুক্ষাযামভ্যবহারাসামর্থ্যমরুচিঃ, অভিলষিতমপ্যন্নং দীযমানং নাভ্যবহরতীত্যন্নানভিনন্দনম্, অন্নস্য শ্রবণস্মরণদর্শনগন্ধস্পর্শনৈর্যত্রোদ্বিজতে স ভক্তদ্বেষঃ; এবং ত্রিবিধোঽপি রোগশ্চরকসুশ্রুতাভ্যামরোচকশব্দেন সঙ্গৃহীতঃ| উক্তং হি বৃদ্ধভোজেন– “প্রক্ষিপ্তং তু মুখে চান্নং জন্তোর্ন স্বদতে মুহুঃ| অরোচকঃ স বিজ্ঞেযো, ভক্তদ্বেষমতঃ শৃণু|| চিন্তযিত্বা তু মনসা দৃষ্ট্বা শ্রুত্বাঽপি ভোজনম্| দ্বেষমাযাতি যো জন্তুর্ভক্তদ্বেষঃ স উচ্যতে|| কুপিতস্য ভযার্তস্য যশ্চ ভক্তনিরোধজঃ” ইতি||৪||

আতঙ্কদর্পণ ব্যাখ্যা (বাচস্পতি বৈদ্য কৃত)

বাতাদিভেদেন মুখে বিকৃতিমভিধাযান্যদেশবিকৃতিমাহ– হৃচ্ছূলেত্যাদি| হৃদি শূলেন পীডনং হৄচ্ছূলপীডনং তেন যুক্তং, চোষঃ চূষণবত্পীডা| অরোচকমিতি শেষঃ| শ্লেষ্মাত্মকং সকফপ্রসেকং স্যাত্| বহুভিরিতি ত্রিদোষৈঃ, বহুরুজমনেকপীডাকরম্| বৈগুণ্যমোহজডতাভিরথাপরং চেতি উপলক্ষণে তৃতীযা, বৈগুণ্যং মনসো ব্যাকুলত্বম্, অপরমিতি দোষজাদন্যত্ আগন্তুজমিত্যর্থঃ| অরোচকলক্ষণম্– সত্যাং বুভুক্ষাযামভ্যবহারাসামর্থ্যমিতি অরুচিঃ, অভিলষিতমপ্যন্নং দীযমানং নাভ্যবহরতীতি নান্নাভিনন্দনম্, অন্নস্য শ্রবণস্মরণদর্শনস্পর্শনগন্ধৈর্যত্রোদ্বিজতে স ভক্তদ্বেষঃ| এবং ত্রিবিধোঽপি রোগশ্চরকসুশ্রুতাভ্যামরোচকশব্দেন সঙ্গৃহীতঃ| উক্তং হি বৃদ্ধভোজেন– “প্রক্ষিপ্তং তু মুখে চান্নং জন্তোর্ন স্বদতে মুহুঃ| অরোচকঃ স বিজ্ঞেযো ভক্তদ্বেষমতঃ শৃণু|| চিন্তযিত্বা তু মনসা দৃষ্ট্বা শ্রুত্বা চ ভোজনম্| দ্বেষমাযাতি যো জন্তুর্ভক্তদ্বেষঃ স উচ্যতে|| কুপিতস্য ভযার্তস্য অভিচারাভিভূতযে| যস্যান্নে ন ভবেচ্ছ্রদ্ধা স ভক্তদ্বেষ উচ্যতে” ইতি||৪||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ইতি শ্রীবিজযরক্ষিতকৃতাযাং মধুকোশব্যাখ্যাযামরোচকনিদানং সমাপ্তম্||১৪||

আতঙ্কদর্পণ ব্যাখ্যা (বাচস্পতি বৈদ্য কৃত)

ইতি শ্রীবাচস্পতিবৈদ্যবিরচিতাযাং মাধবনিদানটীকাযামাতঙ্কদর্পণাখ্যামরোচকনিদানম্||১৪||