১২. হিক্কাশ্বাসনিদানম্

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

সমাননিদানত্বাত্ কাসানন্তরং হিক্কাশ্বাসৌ| ননু, এতেষাং প্রাযস্তুল্যনিদানচিকিত্সিতত্বেনৈকাধিকারে কথমনভিধানম্? উচ্যতে– যদ্যপি কাসশ্বাসহিক্কানাং নিদানং সমানং, তথাপি কাসস্য দোষভেদাদ্ভেদঃ; যথা– বাতিকঃ, পৈত্তিকঃ, শ্লৈষ্মিক ইত্যাদি; হিক্কাশ্বাসৌ তু কফবাতাত্মকাবেব; যদাহ দৃঢবলঃ– “কফবাতাত্মকাবেতৌ পিত্তস্থানসমুদ্ভবৌ|” (চ. চি. অ. ১৭) ইতি| সুশ্রুতোঽপ্যাহ– “বাযুঃ কফেনানুগতঃ পঞ্চ হিক্কাঃ করোতি হি|” (সু. উ. তং. অ. ৫১) ইতি| ভেদস্ত্বনযোঃ সম্প্রাপ্তিভেদাদ্বেগক্রিযাদিনা চ, নতু কাসবদ্দোষভেদেন; শ্বাসকাসাভ্যাং হিক্কাযাঃ স্বনতোঽপি ভেদঃ| পিত্তস্থানসমুদ্ভবাবিতি বিশেষণং সুশ্রুতমতে ক্ষুদ্রাং ন প্রাপ্নোতি, সা হি ‘জত্রুমূলাত্ প্রধাবিতা’ ইতি পঠ্যতে; চরকমতে তু ব্যপেতাং ন প্রাপ্নোতি, সাঽপি ‘জত্রুমূলাদসন্ততা’ ইতি পঠ্যতে; তস্মাত্ পিত্তস্থানসমুদ্ভবাবিতি বিশেষণং ছত্রিণো গচ্ছন্তীতি ন্যাযেন বোধ্যম্| শীতশব্দঃ পানাদিভিস্ত্রিভিঃ সম্বধ্যতে| রজো ধূলিঃ, সা চ ধূমবন্নাসাদিপ্রবেশাত্ কারণম্| ব্যাযামকর্ম ধনুরাকর্ষণাদিব্যাপারঃ, বেগাঘাতো মলাদিবেগবিধারণম্, অপতর্পণমনশনাদি| কাসশ্চোক্তোঽপ্যেকনিদানত্বপ্রতিপাদনার্থং পুনরভিহিত ইতি||১-২||

আতঙ্কদর্পণ ব্যাখ্যা (বাচস্পতি বৈদ্য কৃত)

সমাননিদানত্বাত্কাসনিদানানন্তরং হিক্কাশ্বাসাবাহ– বিদাহীত্যাদি| বিদাহীনি যান্ত্রিকেক্ষুরসমদ্যমরিচাদীনি বিদহনশীলানি, গুরূণি গুণতঃ পাকতশ্চ, বিষ্টম্ভীনি চণকাদীনি, অভিষ্যন্দীনি আভিমুখ্যেন স্যন্দিতুং শীলং যেষাং তান্যভিষ্যন্দনশীলানি ফাণিতমাষমত্স্যক্ষীরাদীনি| শীতশব্দঃ পানাদিভিস্ত্রিভিঃ সম্বধ্যতে; রজো ধূলিঃ, সা চ ধূমবত্ নাসাদিপ্রবেশাত্ কারণম্| ব্যাযামকর্ম ধনুরাকর্ষণাদিব্যাপারঃ, বেগাঘাতো মলাদিবেগধারণম্, অপতর্পণমনশনাদি| ত্রযাণামেককারণত্বেন কথং ভেদঃ? উচ্যতে– দোষজন্যভেদাদ্ভেদঃ| কাসো বাতিকঃ, পৈত্তিকঃ, শ্লৈষ্মিকশ্চ; হিক্কাশ্বাসৌ তু কফবাতাত্মকাবেব| যদুক্তং দৃঢবলেন– “কফবাতাত্মকাবেতৌ পিত্তস্থানসমুদ্ভবৌ” ইতি| সুশ্রুতেঽপি– “বাযুঃ কফেনানুগতঃ পঞ্চ হিক্কাঃ করোতি হি” ইতি||১||২||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

হিক্কানাং স্বরূপং নিরুক্তিং চাহ– মুহুর্মুহুরিত্যাদি| বাযুরত্র সোদানঃ প্রাণ ইত্যাহুঃ| উদেতি ঊর্ধ্বং গচ্ছতি| সস্বন ইতি ‘হিক্’ ইতি শব্দবান্| ঊর্ধ্বগমনমেব বিশিনষ্টি– যকৃদিত্যাদি| অত্র প্লিহেতি হ্রস্বেকারশ্ছন্দোনুরোধাত্| মুখাদিতি ল্যব্লোপে কর্মণি পঞ্চমী, তেন যকৃত্প্লীহান্ত্রাণি মুখমানীয, আক্ষিপন্ নিঃসারযন্নিবেত্যর্থঃ| স ইতি বাযুঃ| ‘হিনস্ত্যসূন্’ ইতি হিক্কেতি নিরুক্তিঃ পৃষোদরাদিনা রূপসিদ্ধিঃ| ‘হিগিতি কৃত্বা কাযতি শব্দাযতে ইতি হিক্কা’ শাব্দিকাঃ||৩||

আতঙ্কদর্পণ ব্যাখ্যা (বাচস্পতি বৈদ্য কৃত)

সম্প্রাপ্তিমাহ– মুহুর্মুহুরিত্যাদি| বাযুরিতি, সোদানঃ প্রাণো বাযুঃ সস্বনঃ শব্দবান্, মুহুর্বারংবারম্, উদেতি ঊর্ধ্বং গচ্ছতি, ঊর্ধ্বগতত্বাত্| যকৃত্প্লীহান্ত্রাণি মুখাদিবেত্যত্র মুখশব্দেন প্রাণোদকান্নবাহীনি স্রোতাংসি ভণ্যন্তে; উক্তং চ তন্ত্রান্তরে– “প্রাণোদকান্নবাহীনি স্রোতাংসি বিকৃতোঽনিলঃ| হিক্কাঃ করোতি সংরুধ্য তাসাং লিঙ্গং পৃথক্ছৃণু” ইতি| হিক্কাশব্দোঽত্র দ্বিরাবর্তযিতব্যঃ; তেন হিক্কেতি হিক্কাস্বরূপকথনং স্যাত্, স ঘোষবানিত্যাদিনা হিক্কানিরুক্তিকথনমিতি| সস্বন ইত্যনেন গতত্বাত্ স ঘোষবানিত্যভিধানং নিরুক্তিপ্রদর্শনার্থম্| স ইতি বাযুঃ, হিনস্ত্যসূনিতি হিক্কেতি পৃষোদরাদিত্বাত্সাধুঃ| হিগিতি কৃত্বা কাযতি শব্দাযতে ইতি হিক্কেতি শাব্দিকাঃ||৩||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

তাসাং ভেদং সম্প্রাপ্তিং চাহ– অন্নজামিত্যাদি| যমলৈব চরকে ব্যপেতেতি নাম্না পঠিতা, অন্নপানে ব্যপেতে পরিণতে জাযতে ইত্যতো হেতোঃ; অস্যাং চানুক্তমপি যমলবেগত্বং সুশ্রুতদর্শনাদ্বিজ্ঞেযম্| অন্নজাযাঃ সাধ্যত্বেন প্রাশস্ত্যাত্ পূর্বমভিধানম্||৪||

আতঙ্কদর্পণ ব্যাখ্যা (বাচস্পতি বৈদ্য কৃত)

তাসাং ভেদং সম্প্রাপ্তিং চাহ– অন্নজামিত্যাদি| অন্নজেত্যাদীনি তাসাং নামানি||৪||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পূর্বরূপমাহ– কণ্ঠোরসোরিত্যাদি| বদনস্য কষাযতা বাতাত্, নতু কফান্মাধুর্যং, ব্যাধিপ্রভাবাত্||৫||

আতঙ্কদর্পণ ব্যাখ্যা (বাচস্পতি বৈদ্য কৃত)

পূর্বরূপমাহ– কণ্ঠ ইত্যাদি| বদনস্য কষাযতা বাতাত্, ন তু কফান্মাধুর্যং; ব্যাধিপ্রভাবাত্| কুক্ষেরুদরস্য, আটোপঃ পূর্ণত্বমিব||৫||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অন্নজাযা লক্ষণমাহ– পানান্নৈরিত্যাদি| হিক্কযতি হিক্কাং করোতি||৬||

আতঙ্কদর্পণ ব্যাখ্যা (বাচস্পতি বৈদ্য কৃত)

অন্নজালক্ষণমাহ– পানান্নৈরিত্যাদি| শীতৈরিতি শেষঃ| অতিসংযুক্তৈরিতি উপর্যুপর্যত্যুপযুক্তৈঃ| সহসা পীডিতোঽনিলো হৃদিস্থঃ প্রাণো বাযুরূর্ধ্বগতত্বাদ্ধিক্কযতি হিক্কাং করোতি, সা হিক্কা অন্নজেতি কথ্যতে||৬||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

যমলামাহ– চিরেণেত্যাদি| কম্পযন্তী শিরোগ্রীবমিত্যুপলক্ষণং, তেন চরকক্তপ্রলাপমূর্ছাবমিতৃষ্ণাবৈচিত্ত্যজৃম্ভাবিপ্লুতাক্ষত্বমুখশোষা বোধ্যা ইতি গযদাসঃ||৭||

আতঙ্কদর্পণ ব্যাখ্যা (বাচস্পতি বৈদ্য কৃত)

যমলামাহ– চিরেণেত্যাদি| যা হিক্কা যমলৈর্বেগৈর্যুগ্মৈরুপক্রমৈঃ শিরোগ্রীবং কম্পযতি চরকলেন প্রবর্ততে তাং নামতো যমলামাহুঃ||৭||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ক্ষুদ্রামাহ– প্রকৃষ্টেত্যাদি| প্রকৃষ্টকালৈশ্চিরেণ| জত্রু কণ্ঠোরসোঃ সন্ধিরিতি জেজ্জটঃ; জত্রু গ্রীবামূলং, তদ্গ্রহণেনৈব হৃদযক্লোমকণ্ঠগ্রহণমিতি গযদাসঃ||৮||

আতঙ্কদর্পণ ব্যাখ্যা (বাচস্পতি বৈদ্য কৃত)

ক্ষুদ্রামাহ– বিকৃষ্টকালৈরিত্যাদি| বিকৃষ্টকালৈরচরকলৈঃ মন্দবেগৈঃ| জত্রুঃ কক্ষোরসোঃ সন্ধিরিতি জেজ্জটঃ, জত্রুমূলগ্রহণেন হৃদযক্লোমকণ্ঠস্য গ্রহণমিতি গযদাসঃ| ইযং নামতঃ ক্ষুদ্রিকা||৮||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

গম্ভীরামাহ– নাভীত্যাদি| নাভিপ্রবৃত্তেতি নাভিতঃ প্রভৃতি সঞ্জাতা, অত এবাস্যা গম্ভীরত্বম্| অনেকোপদ্রববতী তৃষ্ণাজ্বরাদিযুক্তা||৯||

আতঙ্কদর্পণ ব্যাখ্যা (বাচস্পতি বৈদ্য কৃত)

গম্ভীরামাহ– নাভীত্যাদি| য হিক্কা নাভিপ্রবৃত্তেতি নাভিতঃ প্রবৃত্তা সঞ্জাতা, অত এবাস্যা গম্ভীরত্বম্| অনেকোপদ্রববতী তৃষ্ণাজ্বরাদিযুক্তা| সেযং নামতো গম্ভীরা||৯||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

মহতীমাহ– মর্মাণীত্যাদি| মর্মাণীতি প্রধানানি বস্তিহৃদযশিরাংসি, ইযং নামতো মহাহিক্কা||১০||

আতঙ্কদর্পণ ব্যাখ্যা (বাচস্পতি বৈদ্য কৃত)

মহতীমাহ– মর্মাণীত্যাদি| মর্মাণীতি প্রধানানি বস্তিহৃদযশিরাংসি, ||১০||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অবস্থাযামসাধ্যত্বমাহ– আযম্যত ইত্যাদি| আযম্যতে বিস্তার্যত ইব| দৃষ্টিশ্চোর্ধ্বং ‘ভবতি’ ইতি শেষঃ| নাম্যতে আকুঞ্চ্যতে দেহ ইতি সম্বন্ধ ইতি জেজ্জটগযদাসৌ| ‘তাম্যতি’ ইতি পাঠান্তরে মুহ্যতি হিক্কী| ক্ষৌতি ছিক্কতি| তৌ দ্বাবিতি আযম্যত ইত্যাদিনা নিত্যমিত্যন্তেনৈকাবস্থো হিক্কী, ক্ষীণেত্যাদিনাঽতিমাত্রান্তেনাপরঃ; সাধ্যানামপি মধ্যে এবংবিধৌ বর্জযেদিত্যর্থঃ| গম্ভীরামহত্যোঃ স্বভাবাদেবাসাধ্যত্বমিতি তদ্যুক্তৌ হিক্কমানাবন্ত্যৌ শেষপঠিতাবসাধ্যৌ; পাঠান্তরাণি ব্যাখ্যাবিশেষাশ্চ বিস্তরভযান্ন লিখিতাঃ| আসাং যা সেতি আসাং সাধ্যহিক্কানাং মধ্যে যাঽতিসঞ্চিতদোষাদের্ভবতি সা হন্তীতি যোজ্যম্; অথবা আসামিতি পঞ্চবিধানামেব| তেন মহতীপ্রভৃতীনাং স্বরূপেণ যদসাধ্যত্বমুক্তং তত্ প্রাযিকম্| যদাহ জতূকর্ণঃ– “ আদ্যা দুঃসাধ্যা যমিকা মোহতৃষ্ণাবতঃ সদ্যঃপ্রাণহৃত্|” ইতি| যমিকেত্যাদি| যমিকা চেত্যনেন চকারাত্ ক্ষুদ্রা অন্নজা বা যা সাধ্যত্বেনোক্তা সা যমলৈর্বেগৈর্জাযমানা হন্তীতি যোজ্যম্| সৈবাক্ষীণাদেঃ সাধ্যা ভবতীত্যাহ– অক্ষীণ ইত্যাদি| অক্ষীণো বলবান্| অদীনঃ প্রসন্নমনাঃ| অন্যে তু অন্নজাং যমলামিত্যাদিসুশ্রুতগ্রন্থপঠিতাং যমলাং যমিকাশব্দেন ব্যাচক্ষতে| তন্ন, যমিকা চ প্রলাপার্তীত্যাদিশ্লোকশ্চরকে পঠিতঃ, অত্র যমলা যমিকানাম্না ন পঠিতৈব হিক্কেতি| যমিকাশব্দেনৈবার্থগত্যা ব্যপেতোচ্যতেতি চেত্, ন, তর্হি ব্যপেতা চ প্রলাপার্তীত্যেবমভিদধ্যাত্||১১-১৪||

আতঙ্কদর্পণ ব্যাখ্যা (বাচস্পতি বৈদ্য কৃত)

অবস্থাযামসাধ্যলক্ষণমাহ– আযম্যত ইত্যাদি| আযম্যতে বিস্তার্যত ইব দেহঃ| দৃষ্টিশ্চোর্ধ্বং ‘ভবতি’ ইতি শেষঃ| নাম্যতে আকুঞ্চতে দেহ ইতি সম্বন্ধ ইতি জেজ্জটগযদাসৌ| ‘তাম্যতে’ ইতি পাঠান্তরং, তত্র মুহ্যতীত্যর্থঃ| যশ্চ ক্ষীণোঽন্নদ্বেষী, অতিক্ষৌতি ছিক্কতি তাং হিক্কাং বর্জযেত্, দ্বৌ চান্ত্যৌ বর্জযেত্| অন্ত্যাবিতি গম্ভীরা মহতী চেতি| সাধ্যানামপ্যবস্থাবিশেষেণাসাধ্যত্বমাহ– অতিসঞ্চিতদোষস্যেত্যাদি| আসাং সাধ্যানাং মধ্যে যা হিক্কা অতিসঞ্চিতদোষাদের্ভবতি সা নরং হন্তীতি বোদ্ধব্যম্| মহতীপ্রভৃতীনাং তু স্বরূপেণৈবাসাধ্যত্বমুক্তং তত্প্রাযিকমিতি| পুনরবস্থাবিশেষেণাসাধ্যত্বমাহ– যমিকেত্যাদি| অত্রান্নজা ক্ষুদ্রা চ সাধ্যৈব, যমলবেগবতোঽসাধ্যেত্যুচ্যতে; ন তু যমলা, চরকোক্তত্বাত্| অক্ষীণো বলবান্, অদীনঃ প্রসন্নমনাঃ, স্থিরাণি ধাত্বিন্দ্রিযাণি যস্য স তথা; অন্যথা এতদ্বিপরীত ইতি||১১-১৪||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

শ্বাসানাহ– মহোর্ধ্বেত্যাদি| একো বিশেষত ইতি শ্বাসত্বেনৈক এব সন্ বিশেষং হেতুলিঙ্গভেদং প্রাপ্য পঞ্চধা ভিদ্যতে, পঞ্চসু শ্বাসত্বং বেগবদূর্ধ্ববাতত্বং; যদুক্তমন্যৈঃ– “শ্বাসস্তু ভস্ত্রিকাধ্মানসমবাতোর্ধ্বগামিতা|” ইতি| সঙ্খ্যেযনির্দেশাদেব পঞ্চপ্রকারত্বে সিদ্ধে পঞ্চবচনং তমকভেদস্য প্রতমকস্য পৃথক্ত্বসঙ্খ্যানিরাসার্থম্||১৫||

আতঙ্কদর্পণ ব্যাখ্যা (বাচস্পতি বৈদ্য কৃত)

হিক্কাশ্বাসযোরেকহেতুত্বাদ্ধিক্কানন্তরং শ্বাসমাহ– মহেত্যাদি| স মহাব্যাধিঃ শ্বাসত্বেন এক এব সন্ বিশেষহেতুলিঙ্গভেদং প্রাপ্য মহোর্ধ্বাদিভেদৈঃ পঞ্চধা ভিদ্যতে| পঞ্চস্বপি শ্বাসত্বং বেগবদূর্ধ্ববাতত্বম্| উক্তং চ তন্ত্রান্তরে– “শ্বাসস্তু ভস্ত্রিকাধ্মানসমবাতোর্ধ্বগামিতা” ইতি| সঙ্খ্যেযনির্দেশাদেব পঞ্চপ্রকারকে সিদ্ধে পঞ্চবচনং তমকভেদস্য প্রতমকস্যাধিক সঙ্খ্যানিষেধার্থম্| তন্ত্রান্তরে পঞ্চানামপি দোষোত্কটত্বমুক্তম্– “বাতেন ক্ষুদ্রকঃ, শ্লেষ্মভূযিষ্ঠস্তমকঃ স্মৃতঃ| ছিন্নঃ পিত্তপ্রধানঃ স্যাদন্যৌ মারুতকোপজৌ” ইতি||১৫||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

সম্প্রাপ্তিমাহ– যদেত্যাদি| স্রোতাংসীতি হিক্কানির্দিষ্টপ্রাণোদানবহানি | কফঃ পূর্বং প্রধানং যস্য স তথা| তেনৈব কফেন রুদ্ধঃ বিমার্গগতির্বিমার্গগত্বেন বিষ্বগ্ব্রজতি বিষ্বগঞ্চতীতি বিষ্বক্ সর্বত ইত্যর্থঃ||১৬-১৭||

আতঙ্কদর্পণ ব্যাখ্যা (বাচস্পতি বৈদ্য কৃত)

তস্য পূর্বরূপমাহ– প্রাগ্রূপমিত্যাদি| শূলমুদরে, আধ্মানমাটোপঃ, আনাহঃ আমং শকৃদ্বা বিগুণানিলেন বিবদ্ধম্ (অযথাবত্প্রবৃত্তম্)| শঙ্খনিস্তোদঃ শঙ্খযোর্ব্যথা|| তস্য সম্প্রাপ্তিমাহ– যদেত্যাদি| যদা কফপূর্বকঃ কফপ্রধানো বাযুঃ, তেনৈব কফেন সংরুদ্ধগতিঃ বিমার্গগঃ, প্রাণোদকান্নবাহীনি স্রোতাংসি সংরুধ্য, বিষ্বগ্ব্রজতি সর্বত্র প্রসরতি, তদা শ্বাসান্ করোতি||১৬-১৭||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

মহাশ্বাসলক্ষণমাহ– উদ্ধূযমানেত্যাদি| উদ্ধূযমানবাত ইতি উত্ ঊর্ধ্বং ধূযমানো নীযমানো বাতো যস্য স তথা| শব্দবত্ সশব্দং যথা ভবতি| উচ্চৈর্দীর্ঘম্| সংরুদ্ধো মত্তর্ষভ ইবেতি স্বরবিশেষজ্ঞাপনার্থমযং দৃষ্টান্তঃ| জ্ঞানং শাস্ত্রং, বিজ্ঞানং তদর্থনিশ্চযঃ| বিভ্রান্তলোচনঃ চঞ্চলনেত্রঃ| বিবৃতে স্তব্ধে অক্ষ্যাননে যস্য স তথা; নেত্রস্য বিভ্রান্তস্তব্ধত্বে কালভেদাদিতি জেজ্জটঃ| বিশীর্ণবাক্ বক্তুমক্ষমঃ, মন্দবচনো বা| দীনঃ ক্লান্তমনাঃ; হীনমিতি পাঠান্তরমযুক্তং, দূরাদ্বিজ্ঞাযতে ভৃশমিত্যনুপপত্তেরিত্যাহুঃ||১৮-২০||

আতঙ্কদর্পণ ব্যাখ্যা (বাচস্পতি বৈদ্য কৃত)

মহাশ্বাসলক্ষণমাহ– উদ্ধূযমানেত্যাদি| উত্ ঊর্ধ্বং ধূযমানো বাতো যস্য স তথা, শব্দবত্ সশব্দো যথা ভবতি তথা, এবমুচ্চৈঃ শ্বসিতি, দুঃখিতো দুঃখযুক্তঃ, অনিশমনবরতম্, ক ইব? সংরুদ্ধো মত্তর্ষভ ইব মত্তমহোক্ষ ইব, স্বরবিশেষজ্ঞাপনার্থমযং দৃষ্টান্তঃ| জ্ঞানং শাস্ত্রং, বিজ্ঞানং তদর্থনিশ্চযঃ| বিভ্রান্তলোচনশ্চঞ্চলাক্ষঃ| বিবৃতে স্তব্ধে অক্ষিণী নযনে আননং চ যস্য স তথা| নেত্রস্য বিভ্রান্তস্তব্ধত্বে কালভেদাদিতি জেজ্জটঃ| বিশীর্ণবাক্ বক্তুমক্ষমো মন্দবচনো বা| দীনঃ ক্লান্তমনাঃ| অস্য চ শ্বাসবতঃ শ্বসিতমত্যর্থং দূরাদেব শ্রূযতে| অনেন মহাশ্বাসেনোপসৃষ্টো যুক্তঃ শীঘ্রমেব বিনশ্যতি||১৮-২০||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ঊর্ধ্বশ্বাসলক্ষণমাহ– ঊর্ধ্বমিত্যাদিনা| ঊর্ধ্বমিতি বিশেষপরং, সর্বশ্বাসানাং তথাবিধত্বাত্| দীর্ঘমিতি দীর্ঘকালম্| নচ প্রত্যাহরত্যধ ইতি ন শ্বাসমধঃ করোতি দীর্ঘকালমিত্যর্থঃ| শ্লেষ্মাবৃতমুখস্রোতা ইতি শ্লেষ্মণা আবৃতানি মুখং স্রোতাংসি চ যস্য স তথা| ক্রুদ্ধগন্ধবহার্দিতঃ কুপিতবাতপীডিতঃ; সমস্তপাঠে তু শ্লেষ্মাবৃতমুখস্রোতস্ত্বেন ক্রুদ্ধো যো গন্ধবহস্তেনার্দিতঃ| বিপশ্যংস্তু ইতস্তত ইতি ইতস্ততো বিকৃতিং পশ্যন্| ‘ঊর্ধ্বং শ্বসিতি যো দীর্ঘং ন চ প্রত্যাহরত্যধঃ’ ইতি যদুক্তং তত্র হেতুমাহ– ঊর্ধ্বশ্বাস ইত্যাদি| নিরুধ্যত ইতি হৃদয এবাতিস্তম্ভিতঃ| অথবা শ্বাসো বাতঃ সোঽধো ন বর্ততে| ঊর্ধ্বং শ্বাস ঊর্ধ্বশ্বাসঃ| তাম্যতো গ্লাযতো মুহ্যতশ্চাসূন্ প্রাণান্ হন্তি, নান্যথেতি||২১-২৩||

আতঙ্কদর্পণ ব্যাখ্যা (বাচস্পতি বৈদ্য কৃত)

ঊর্ধ্বশ্বাসমাহ– ঊর্ধ্বমিত্যাদি| ঊর্ধ্বশ্বাসে পুমান্ দীর্ঘকালমূর্ধ্বং শ্বাসিতি, ন চ প্রত্যাহরত্যধ ইতি ন শ্বাসমধঃ করোতি দীর্ঘকালমিত্যর্থঃ; সর্বশ্বাসানামূর্ধ্বগত্বাদত্রোর্ধ্বমিতি বিশেষপরম্| শ্লেষ্মণা আবৃতং মুখং স্রোতাংসি চ যস্য স তথা; অথবা শ্লেষ্মাবৃতানি মুখসম্বন্ধীনি স্রোতাংসি যস্য স তথা| ক্রুদ্ধগন্ধবহার্দিতঃ কুপিতবাতপীডিতঃ, অথবা শ্লেষ্মাবৃতমুখস্রোতস্ত্বেন ক্রুদ্ধো যো গন্ধবহস্তেনার্দিতঃ| ঊর্ধ্বং দৃষ্টির্দর্শনং যস্য স ঊর্ধ্বদৃষ্টিঃ| বিপশ্যন্নিতস্ততো বিকৃতং পশ্যন্, বিভ্রান্তাক্ষঃ পরিক্ষিপ্তনেত্রঃ, প্রমুহ্যন্ মোহমুপগচ্ছন্, শুষ্কাস্যঃ শুষ্কমুখঃ, অরতিঃ কস্মিন্নপি বিষযে ন চিরাবস্থিতিঃ| ঊর্ধ্বং শ্বসিতি ন চাধঃ প্রত্যাহরতীতি যদুক্তং তত্র হেতুমাহ– ঊর্ধ্বেত্যাদি| নিরুধ্যত ইতি হৃদয এব স্তম্ভিতঃ স্যাত্, অথবা শ্বাসো বাতঃ সোঽধো ন প্রবর্ততে ঊর্ধ্বশ্বাসে| তাম্যতো গ্লাযতঃ; মুহ্যতস্তমসি মজ্জত ইব, অথবা নিশ্চেষ্টাবতঃ, তস্যৈবংবিধপুরুষস্য অসূন্ প্রাণান্ হন্তি নান্যথেতি||২১-২৩||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ছিন্নশ্বাসলক্ষণমাহ– যস্ত্বিত্যাদি| বিচ্ছিন্নং সবিচ্ছেদম্| সর্বপ্রাণেন ন বা শ্বসিতি শ্বাসং ন লভতে| মর্মচ্ছেদরুগর্দিত ইতি হৃদযচ্ছেদবেদনযা পীডিতঃ| দহ্যমানেন বস্তিনোপলক্ষিতঃ, এতেন বাতস্য পিত্তানুবন্ধো দর্শিতঃ| বিপ্লুতাক্ষঃ চঞ্চলনেত্রোঽশ্রুপূর্ণচক্ষুর্বা| রক্তৈকলোচনত্বং ব্যাধিপ্রভাবাত্, দোষাত্তু দ্বযোরপি স্যাত্| বিচেতা উদ্বিগ্নচিত্তঃ| বিচ্ছিন্নো বিমোক্ষিতসন্ধিঃ, ‘পীডিত’ ইত্যন্যে; ‘বিহতঃ’ ইতি পাঠান্তরম্||২৪-২৬||

আতঙ্কদর্পণ ব্যাখ্যা (বাচস্পতি বৈদ্য কৃত)

অথ ছিন্নং লক্ষযতি– য ইত্যাদি| বিচ্ছিন্নমিব বিচ্ছিন্নমন্তরাঽন্তরা বিচ্ছিদ্যমানমনুবর্ততে সান্তরাযমিত্যর্থঃ| সর্বপ্রাণেন সমস্তযা শক্ত্যা, দুঃখার্তঃ সন্, ন বা শ্বসিতি| মর্মচ্ছেদরুগর্দিত ইতি মর্মাণি হৃদযবস্তিশিরাংসি তেষাং ছেদনেনেব পীডিতঃ| দহ্যমানেন বস্তিনোপলক্ষিতঃ| এতেন বাতস্য পিত্তানুবন্ধো দর্শিতঃ| বিপ্লুতাক্ষঃ চলচ্চক্ষুঃ অশ্রুপূর্ণচক্ষুর্বা| রক্তৈকলোচনত্বং ব্যাধিদোষাত্, অন্যথা দ্বযোরপি স্যাত্||২৪-২৬||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

তমকশ্বাসলক্ষণমাহ– প্রতিলোমমিত্যাদি| শ্লেষ্মাণং সমুদীর্য চেত্যনেন সামান্যসম্প্রাপ্তিলব্ধস্যাপি শ্লেষ্মণঃ পুনরভিধানাদিহ বিশেষেণ কারণত্বং বোধযতি| তেন রুদ্ধঃ কফেনাবৃতঃ| ঘুর্ঘুরকং কণ্ঠে ঘুর্ঘুরশব্দম্| প্রাণপ্রপীডকং প্রাণাধিষ্ঠানহৃদযস্য পীডকম্| প্রতাম্যতি তমসি প্রবিশতীব| সন্নিরুধ্যতে ‘নিশ্চেষ্টো ভবতি’ ইতি চক্রঃ, জেজ্জটস্তু সন্নিরুধ্যতে ‘শ্বাসঃ’ ইতি | তস্যৈবেতি শ্লেষ্মণঃ| সুখং সুখমিব| উদ্ধ্বংসতে কণ্ডূযতে| পার্শ্বে ইতি কর্মপদম্, অবগৃহ্ণাতি পীডযতি| উষ্ণমভিনন্দতি বাতকফারব্ধত্বাত্| উচ্ছ্রিতাক্ষ উচ্ছূননেত্রঃ| ললাটেনেত্যুপলক্ষণে তৃতীযা| অবধম্যতে গজারূঢস্যেব সর্বগাত্রং চাল্যতে||২৭– ৩৪||

আতঙ্কদর্পণ ব্যাখ্যা (বাচস্পতি বৈদ্য কৃত)

তমকলক্ষণমাহ– প্রতীত্যাদি| যদি বাযুঃ প্রতিলোমং বৈপরীত্যেন স্রোতাংসি প্রতিপদ্যতে প্রাপ্নোতি, তদা স বাযুঃ শ্লেষ্মাণং সমুদীর্যং ঊর্ধ্বপ্রেরণযা গ্রীবাং শিরশ্চ সঙ্গৃহ্য সমন্তাত্ গৃহীত্বা পীনসং করোতি, পশ্চাত্তেনৈবাবৃতঃ কণ্ঠে ঘুরঘুরশব্দং করোতি, প্রাণপ্রপীডকং প্রাণাধিষ্ঠানহৃদযপ্রপীডকং শ্বাসং করোতি, তেন শ্বাসবেগেন প্রতাম্যতি তমসি প্রবিশতীবেতি, সন্নিরুধ্যতে নিশ্চেষ্টো ভবতীতি চরকঃ, জেজ্জটস্তু সংরুধ্যতে ‘শ্বাসঃ’ ইতি শেষঃ| মুচ্যমানেন কফেনাতীব দুঃখিতো ভবতি| তস্যৈব শ্লেষ্মণো বিমোক্ষান্তে মুহূর্তং সুখং প্রাপ্নোতি | উদ্ধ্বংসতে কণ্ডূযতে| পার্শ্বেঽবগৃহ্ণাতি পীডযতি পরং শযানস্য, আসীনঃ সন্ সুখং লভতে| উষ্ণমভিনন্দতি বাতকফারব্ধত্বাত্| উচ্ছ্রিতাক্ষঃ উচ্ছূনাক্ষঃ, স্বিদ্যতা ললাটেনোপলক্ষিতঃ| অবধম্যতে গজারূঢস্যেবাখিলগাত্রং চাল্যতে||২৭-৩৪||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

তমকস্যৈব পিত্তানুবন্ধত্বাজ্জ্বরাদিযোগেন প্রতমকসঞ্জ্ঞামাহ– জ্বরেত্যাদি| জ্বরমূর্ছাভ্যাং পরীতো জ্বরমূর্ছাপরীতঃ; জ্বরেণ মূর্ছা জ্বরমূর্ছেতি জেজ্জটঃ| এতস্যৈবাপরকারণং লক্ষণং চাহ– উদাবর্তেত্যাদি| উদাবর্তো রোগঃ, রজো ধূলিঃ, অজীর্ণমামাদি, ক্লিন্নং বিদগ্ধং, কাযে বেগানাং নিরোধঃ কাযনিরোধঃ; অথবা ক্লিন্নকাযো বৃদ্ধনর ইত্যাহুঃ, নিরোধঃ বেগনিরোধঃ, অথবা কুযোগিনাং কুম্ভকাদিরূপবাতনিরোধ ইতি জেজ্জটঃ| তমসা অন্ধকারেণ, মানসদোষেণ বা; অত্যর্থমিতি ইতরকারণাপেক্ষযা বিশেষেণ; বাতকফারব্ধোঽপি পিত্তসম্বন্ধাত্ শীতৈরুপশাম্যতীত্যাহুঃ| সন্তমকঃ প্রতমক এবেতি| অন্যে তু উদাবর্তেত্যাদিনা প্রতমকস্যোপসর্গমাহুরিতি জেজ্জটঃ||৩৫-৩৬||

আতঙ্কদর্পণ ব্যাখ্যা (বাচস্পতি বৈদ্য কৃত)

তমকস্যৈব পিত্তানুবন্ধকত্বাজ্জ্বরাদিযোগেন প্রতমকসঞ্জ্ঞামাহ– জ্বরেত্যাদি| জ্বরমূর্ছাভ্যাং পরীতো জ্বরমূর্ছাপরীতঃ, জ্বরেণ বা মূর্ছা, ইতি জেজ্জটঃ| এতস্যৈবাপরলক্ষণং কারণং চাহ– উদাবর্তেত্যাদি| উদাবর্তো রোগবিশেষঃ, রজো ধূলিঃ, অজীর্ণমামাদি, ক্লিন্নং বিদগ্ধং, কাযবেগানাং নিরোধঃ, এতৈর্হেতুভিঃ জনিতঃ; অন্যে “ক্লিন্নকাযো বৃদ্ধনরঃ” ইত্যাহুঃ, নিরোধো বেগনিরোধঃ| জেজ্জটস্তু কুযোগিনাং কুম্ভকাদিবাতনিরোধজঃ| তমসা অন্ধকারেণ, মানসতমোগুণাদিদোষেণ বা| অত্যর্থমিতি ইতরকারণাপেক্ষযা বিশেষেণ বাতকফারব্ধপিত্তসম্বন্ধাত্| শীতৈরুপশাম্যতীতি তমস্যন্ধকারে মজ্জত ইবাস্য পুরুষস্য তং প্রতমকমাহুঃ||৩৫-৩৬||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ক্ষুদ্রশ্বাসমাহ– রূক্ষেত্যাদি| রূক্ষমন্নপানম্| ক্ষুদ্রোঽল্পনিদানলিঙ্গঃ| উদীরযন্ ঊর্ধ্বং গচ্ছন্| ইতরে উর্ধ্বশ্বাসাদযঃ| স সাধ্য উক্ত ইতি ছেদঃ| সর্বে মহাশ্বাসাদযোঽব্যক্তলক্ষণাঃ সন্তঃ সাধ্যা ইতি যোজ্যম্| ত্রযঃ শ্বাসা ন সিধ্যন্তি মহোর্ধ্বচ্ছিন্নাঃ সম্পূর্ণলক্ষণাঃ ||৩৭-৪০||

আতঙ্কদর্পণ ব্যাখ্যা (বাচস্পতি বৈদ্য কৃত)

ক্ষুদ্রমাহ– রূক্ষেত্যাদি| রূক্ষমন্নপানম্, আযাসো ব্যাযামঃ, তজ্জনিতঃ| ক্ষুদ্র ইতি ক্ষুদ্রশ্বাসঃ, অল্পনিদানলিঙ্গত্বাত্ ক্ষুদ্রঃ| কোষ্ঠে বাতং প্রকোপযত্ ক্ষুদ্রশ্বাসং করোতি| স দুঃখেন ক্ষুদ্রশ্বাসঃ নাঙ্গপ্রবাধকো ভবতি| কিন্তু স গাত্রাণি ন হিনস্তি মারণাত্মকো ন ভবতি| ন চ দুঃখকারী যথা ইতরে চত্বারঃ| ইন্দ্রিযাণাং ব্যথাং নাপাদযেত্| কাঞ্চিদপি রুজং রোগং নাপাদযেত্| সর্বেষাং সাধ্যত্বমাহ– স ইত্যাদি| স ক্ষুদ্রশ্বাসো বলিনঃ পুরুষস্য সাধ্যঃ, সর্বে মহাশ্বাসাদযোঽব্যক্তলক্ষণাঃ সন্তঃ সাধ্যা ইতি যোজ্যম্| সাধ্যাসাধ্যানাহ– ক্ষুদ্র ইত্যাদি| তেষাং শ্বাসানাং ক্ষুদ্রঃ সাধ্যতমঃ, তমকো যাপ্যঃ, মহোর্ধ্বচ্ছিন্নাস্ত্রযঃ সম্পূর্ণলক্ষণা অসাধ্যাঃ, দুর্বলস্য তমকোঽসাধ্যঃ||৩৭-৪০||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

উপেক্ষণাসম্যগুপক্রমাভ্যাং হিক্কাশ্বাসযোঃ শীঘ্রাবশ্যমারকত্বমাহ– কামমিত্যাদি| কামমনুমতৌ, প্রাণহরাঃ সন্নিপাতজ্বরাদযঃ| শেষং সুবোধমিতি||৪১||

আতঙ্কদর্পণ ব্যাখ্যা (বাচস্পতি বৈদ্য কৃত)

হিক্কাশ্বাসযোঃ শীঘ্রাবশ্যমারকত্বমাহ– কামমিত্যাদি| কামমিত্যনুমতৌ, প্রাণহরাঃ সন্নিপাতাদযো রোগাঃ বহবঃ সন্তি, তে তথা প্রাণহরা ন ভবন্তি, যথা শ্বাসশ্চ হিক্কা চ এতৌ রোগাবাশু শীঘ্রং প্রাণান্ হরতঃ||৪১||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ইতি শ্রীবিজযরক্ষিতকৃতাযাং মধুকোশব্যাখ্যাযাং হিক্কাশ্বাসনিদানং সমাপ্তম্||১২||

আতঙ্কদর্পণ ব্যাখ্যা (বাচস্পতি বৈদ্য কৃত)

ইতি শ্রীবাচস্পতিবৈদ্যবিরচিতাযাং মাধবনিদানটীকাযামাতঙ্কদর্পণাভিধাযাং শ্বাসনিদানং সমাপ্তম্||১২||