১৫. ছর্দিনিদানম্

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ছর্দ্যামপ্যরুচের্ভাবাত্তথাঽরোচকবত্পঞ্চবিধত্বাদরোচকানন্তরং ছর্দিঃ, তস্যা নিদানং নিরুক্তিং চাহ– দুষ্টৈরিত্যাদি| বীভত্সালোচনং বিকৃতিদর্শনম্; আদিগ্রহণেনানিষ্টগন্ধভক্ষণাদীনাং গ্রহণম্| নার্যাশ্চাপন্নসত্ত্বাযা ইতি গর্ভিণ্যাঃ, তস্যা গর্ভোত্পীডনেন বাতবৈগুণ্যাচ্ছর্দিঃ| ছাদযন্নাননমিত্যাদি বেগৈর্মুখং ছাদযন্ পূরযন্, অর্দযন্ পীডযন্, অঙ্গভঞ্জনৈঃ অঙ্গভেদৈঃ| ছাদযতি মুখম্, অর্দযতি চাঙ্গানীতি ছর্দিঃ; ‘ছদ অপবারণে’, ‘অর্দ হিংসাযাং’, অনযোঃ পৃষোদরাদিত্বেন রূপসিদ্ধিঃ||১-৪||

আতঙ্কদর্পণ ব্যাখ্যা (বাচস্পতি বৈদ্য কৃত)

ছর্দ্যামরুচের্ভাবাদরোচকানন্তরং ছর্দিরুচ্যতে, তস্যা নিদানং নিরুক্তিং চাহ– দুষ্টৈরিত্যাদি| এতৈঃ কারণৈর্বক্ষ্যমাণৈর্দুষ্টৈর্দোষৈঃ ছর্দযঃ পঞ্চ ভবন্তি| বাতাদিভিস্ত্রযঃ, ত্রিদোষেণৈকা, বীভত্সাদিভিরেকা, এবং পঞ্চ| বীভত্সং বিকৃতদর্শনম্, আদিশব্দেনানিষ্টগন্ধভক্ষণাদীনাং গ্রহণম্| নিদানপূর্বাং সম্প্রাপ্তিমাহ-অতীত্যাদি| নার্যাশ্চাপন্নসত্ত্বাযা ইতি গুর্বিণ্যাঃ, তস্যা গর্ভোত্পীডনেন বাতবৈগুণ্যাচ্ছর্দিঃ| বীভত্সৈর্হেতুভিশ্চান্যৈরিতি পূযামেধ্যাদিদর্শনগন্ধাস্বাদনৈর্ঘৃণাকারিভিঃ| ছাদযন্নাননমিতি দোষবেগেন মুখং পূরযন্, অর্দযন্ অঙ্গভঞ্জনৈরঙ্গভেদৈঃ; ছাদযতি মুখমর্দযতি চ অঙ্গানি স ছর্দিরিতি নিরুচ্যতে, বেগৈর্মুখং প্রতি প্রধাবিতো দোষ উদানো বাযুঃ ছর্দিং কুর্যাদিত্যর্থঃ||১-৪||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পূর্বরূপমাহ– হৃল্লাসেত্যাদি| উদ্গাররোধ উদ্গারাপ্রবৃত্তিঃ| প্রসেকো মুখপ্রসেকঃ, তস্য লবণত্বং প্রভাবাত্, আমাশযোত্ক্লেশভবত্বেন কফবিদাহাদ্বা; তনুরঘনোঽল্পো বা||৫||

আতঙ্কদর্পণ ব্যাখ্যা (বাচস্পতি বৈদ্য কৃত)

তস্যাঃ পূর্বরূপমাহ– হৃদিত্যাদি| ছর্দীনামিদং পূর্বরূপম্| উদ্গাররোধ উদ্গারাপ্রবৃত্তিঃ, প্রসেকো মুখপ্রসেকঃ উদকস্রাবঃ, তস্য লবণত্বং প্রভাবাদামাশযোত্ক্লেশভবত্বেন কফবিদাহাদ্বা, তনুঃ অঘনঃ অল্পো বা||৫||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

বাতজাযা লক্ষণমাহ– হৃত্পার্শ্বেত্যাদি| শীর্ষনাভ্যর্তিঃ মস্তকে নাভৌ চ শূলং; তোদৈরিত্যনন্তরং ‘যুক্ত’ ইতি শেষঃ, উপলক্ষণে বা তৃতীযা| আর্তো নরশ্ছর্দযতীতি যোজ্যম্| কিম্ভূতং ছর্দযতীত্যাহ– উদ্গারেত্যাদি| উদ্গারশব্দাভ্যাং প্রবলমুদ্গারশব্দপ্রবলম্| বিচ্ছিন্নং সান্তরবেগমল্পদ্রবং বা, বাতস্য স্বতো দ্রবত্বাভাবাত্| তনুকমঘনম্| কষাযং কষাযরসং, কষাযস্য বাতকৃতত্বাত্||৬||

আতঙ্কদর্পণ ব্যাখ্যা (বাচস্পতি বৈদ্য কৃত)

বাতজামাহ– হৃদিত্যাদি| শীর্ষনাভ্যর্তিরিতি মস্তকে নাভৌ চ শূলম্| তোদৈরিত্যনন্তরং ‘যুক্ত’ ইতি শেষঃ, উপলক্ষণে বা তৃতীযা| বাতান্নরশ্ছর্দযতীতি যোজ্যম্| কিম্ভূতং ছর্দযতীত্যাহ– উদ্গারশব্দাভ্যাং প্রবলমুদ্গারশব্দপ্রবলম্| বিচ্ছিন্নং বিরলবেগং অল্পদ্রবং বা, বাতস্য দ্রবত্বাভাবাত্| তনুকমঘনম্| কষাযং কষাযরসং, কষাযরসস্য বাতকৃতত্বাত্| কৃচ্ছ্রেণ কষ্টেন, অল্পং স্তোকং, মহতা বেগেন||৬||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পিত্তজামাহ– মূর্ছেত্যাদি| তমোঽন্ধকারদর্শনমিব| ধ্রূম্রং কৃষ্ণলোহিতবর্ণম্||৭||

আতঙ্কদর্পণ ব্যাখ্যা (বাচস্পতি বৈদ্য কৃত)

পিত্তজামাহ– মূর্ছেত্যাদি| মূর্ধ্নি শিরসি তাল্বক্ষ্ণোশ্চ সন্তাপবান্| তমোঽন্ধকারদর্শনমিব, ভ্রমশ্চক্রারূঢস্যেব, পদার্থস্য অন্যথাজ্ঞানং বা, তৈরার্তঃ| কীদৃশং বমেদিত্যাহ– পীতমিত্যাদি| ভৃশোষ্ণমত্যুষ্ণং, হরিতং শাকবর্ণং, ধূম্রং কৃষ্ণলোহিতবর্ণং, পিত্তেনেতি যোজ্যম্||৭||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

কফজামাহ– তন্দ্রেত্যাদি| আস্যমাধুর্যং মুখস্য মধুররসত্বম্| সন্তোষ ইতি সন্তোষ ইব সন্তোষঃ, অন্নানভিলাষ ইত্যর্থঃ; তৃপ্তো হি নান্নমভিলষতি| অরুচিরভ্যবহারাসামর্থ্যম্| স্বাদু মধুরম্| বিশুদ্ধমতিশুভ্রং, সুশ্রুতে “শুক্লং হিমং সান্দ্রকফং কফেন|” (সু. উ. তং. অ. ৪৯) ইতি পাঠাত্||৮||

আতঙ্কদর্পণ ব্যাখ্যা (বাচস্পতি বৈদ্য কৃত)

কফজামাহ– তন্দ্রেত্যাদি| এতৈরুপদ্রবৈরার্তঃ স্নিগ্ধাদিকং বমেত্| আস্যমাধুর্যং মুখস্য মধুররসত্বম্| সন্তোষ ইব সন্তোষঃ অন্নানভিলাষ ইত্যর্থঃ, তৃপ্তো হি নান্নমভিলষতি| অরুচিরভ্যবহারাসামর্থ্যম্| স্বাদু মধুরম্| বিশুদ্ধমিতি বিশুদ্ধং কেবলং কফং; যদুক্তং সুশ্রুতে– “শুক্লং হিমং সান্দ্রকফং কফেন|” ইতি| অল্পরুজমিতি কফস্য দ্রবরূপত্বাত্ মুখেন নিঃসরণমিত্যর্থঃ||৮||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ত্রিদোষজামাহ– শূলেত্যাদি| শূলাদিভিঃ প্রমোহান্তৈঃ প্রবলা শূলাদিপ্রবলা| প্রসক্তং নিরন্তরম্| ত্রিদোষাদিত্যত্র ‘ত্রিদোষা’ ইতি পাঠান্তরে ত্রিদোষজেত্যর্থঃ||৯||

আতঙ্কদর্পণ ব্যাখ্যা (বাচস্পতি বৈদ্য কৃত)

ত্রিদোষজামাহ– শূলেত্যাদি| ত্রিদোষাত্ যা ছর্দিঃ তযা বমতাং নৃণামিত্যর্থঃ| শূলাদিভিঃ প্রমোহান্তৈঃ প্রবলা, প্রসক্তং নিরন্তরং, ত্রিদোষাদিত্যত্র ‘ত্রিদোষা’ ইতি পাঠস্তত্র ত্রিদোষজেত্যর্থঃ||৯||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অসাধ্যামাহ– বিডিত্যাদি| উত্সন্নদোষস্য উদ্গতদোষস্য | দোষমিতি পিত্তং কফং বা, স্বেদাদিকান্ বা তদ্দুষ্টান্ ধাতুমলান্| তদিতি যস্মাদ্বিডাদিবাহিস্রোতোদুষ্টিস্ততো হেতোর্বিণ্মূত্রযোঃ সমগন্ধবর্ণং ছর্দযতীতি যোজ্যম্| ইযং তু ছর্দির্বিকৃতিবিষমসমবাযারব্ধা ত্রিদোষজেতি কেচিত্, অন্যে ত্বাহুঃ– সর্বা এব ছর্দযঃ প্রবলা এবংবিধাঃ সত্যোঽসাধ্যাঃ স্যুরিতি||১০-১১||

আতঙ্কদর্পণ ব্যাখ্যা (বাচস্পতি বৈদ্য কৃত)

অসাধ্যামাহ– বিডিত্যাদি| উত্পন্নদোষস্য উদ্গতদোষস্য পিত্তং কফং বা, বাযুঃ কোষ্ঠাদুদ্ধূয ঊর্ধ্বং নীত্বেতি| স্বেদাদিকান্ দোষান্ ধাতুমলান্ বা স্বস্থানাত্ সঞ্চাল্য ঊর্ধ্বমেত্যাগচ্ছতি| তদিতি যস্মাদ্বিডাদিবাহিস্রোতোদুষ্টিস্ততো বিণ্মূত্রযোঃ সমগন্ধবর্ণং ছর্দযতীতি যোজ্যম্| ইযং তু ছর্দিস্ত্রিদোষজেত্যেকে| অন্যে তু সর্বা এব ছর্দযঃ প্রবলাঃ এবংবিধাঃ সত্যঃ অসাধ্যা ইত্যর্থঃ||১০-১১||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

আগন্তুজামাহ– বীভত্সজেত্যাদি| দৌর্হৃদজা দৌর্হৃদালাভজা, আমজা অজীর্ণজা, অসাত্ম্যজা অসাত্ম্যভক্ষণাদিসম্ভূতা, ক্রিমিজা কোষ্ঠক্রিমিসম্ভবা; বীভত্সজেত্যাদিনা ক্রিমিজান্তেনৈকত্বেনৈব গণনীযা, আগন্তুজত্বসামান্যাত্| সা পঞ্চমীতি ত্রিদোষজাপেক্ষযা সামান্যেনাগন্তুজৈব, আগন্তুজ্বরবত্; যদি তু বীভত্সজাপেক্ষযা ক্রিমিজা পঞ্চমীতি গণ্যতে, তদা তাং চ বিভাবযেত্| দোষোচ্ছ্রযেণৈবেত্যনেন ক্রিমিজাযা এব দোষসম্বন্ধঃ স্যাত্, ততশ্চ বীভত্সজাদীনাং চিকিত্সোপযোগিদোষসম্বন্ধো ন লভ্যতে| অন্যে তু তদ্দোষপরিহারার্থং’ ‘সা পঞ্চমী তাশ্চ’ ইতি বহুবচনান্তং পঠন্তি, এবং সত্যন্তর্গণনযা ন প্রযোজনমিত্যন্তর্গণনাং নাদ্রিযন্তে| কথমত্র দোষোচ্ছ্রযো বিভাবনীয ইত্যাহ– যথোক্তমাদাবিতি| আদৌ বাতাদিলক্ষণে ইত্যর্থঃ||১২||

আতঙ্কদর্পণ ব্যাখ্যা (বাচস্পতি বৈদ্য কৃত)

আগন্তুজামাহ– বীভত্সজেত্যাদি| বীভত্সজা পূযামেধ্যাদিদর্শনগন্ধস্বাদজা, আপন্নসত্ত্বাযা স্ত্রিযা দৌর্হৃদালাভজা, আমজা অজীর্ণজা, অসাত্ম্যজা অসাত্ম্যভোজনজা, ক্রিমিজা কোষ্ঠক্রিমিসম্ভবা, বীভত্সজেত্যাদিনা ক্রিমিজান্তা একৈব গণনীযা| এবং সর্বাভিরেকৈবাগন্তুজত্বসামান্যাত্, আগন্তুজ্বরবত্| পঞ্চমীতি ত্রিদোষজাপেক্ষযা| আগন্তুজাং দোষোচ্ছ্রযেণৈব জানীযাত্| যথোক্তমাদাবিতি যথা বাতাদিলক্ষণেন আদাবিতি পূর্বোক্তেন||১২||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ক্রিমিজাযা লক্ষণমাহ– শূলেত্যাদি| ক্রিমিহৃদ্রোগতুল্যেন লক্ষণেন লক্ষিতেতি ক্রিমিহৃদ্রোগে ক্রিমিলক্ষণাত্ যত্ পীডাদিকং তদস্যাং ভবতীত্যর্থঃ||১৩||

আতঙ্কদর্পণ ব্যাখ্যা (বাচস্পতি বৈদ্য কৃত)

ক্রিমিজাযা বিশেষলক্ষণমাহ– শূলেত্যাদি| কৃমিজাযা অযং বিশেষঃ– হৃচ্ছূলহৃল্লাসাধিকা ক্রিমিজহৃদ্রোগতুল্যলক্ষণেন চ লক্ষিতেতি; যথা– “উত্ক্লেদঃ ষ্ঠীবনং তোদঃ শূলং হৃল্লাসকস্তমঃ| অরুচিঃ শ্যাবনেত্রত্বং শোষশ্চ ক্রিমিজে ভবেত্|” ইতি||১৩||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অসাধ্যলক্ষণমাহ– ক্ষীণস্যেত্যাদি| সচন্দ্রিকামিতি মেদঃপ্রভৃতিধাতূনাং স্নেহঃ প্রবর্তমানো মযূরপিচ্ছচন্দ্রিকাবত্ প্রতিভাতি| নিরুপদ্রবামিতি কাসাদ্যুপদ্রবরহিতাম্| তদুক্তম্– “কাসঃ শ্বাসো জ্বরো হিক্কা তৃষ্ণা বৈচিত্ত্যমেব চ| হৃদ্রোগস্তমকশ্চৈব জ্ঞেযাশ্ছর্দেরুপদ্রবাঃ||” ইতি||১৪||

আতঙ্কদর্পণ ব্যাখ্যা (বাচস্পতি বৈদ্য কৃত)

অসাধ্যাং সাধ্যাং চাহ– অতিপ্রসক্তা অতিশযেন নিরন্তরা, সোপদ্রবা বক্ষ্যমাণোপদ্রবযুক্তা| সচন্দ্রিকমিতি| মেদঃপ্রভৃতিধাতূনাং স্নেহঃ প্রবর্তমানো মযূরপিচ্ছচন্দ্রিকাবত্প্রতিভাতি| ইত্থং পঞ্চবিধামপি ছর্দিমসাধ্যাং প্রবদেত্ বর্জযেদিত্যর্থঃ| নিরুপদ্রবাং কাসাদ্যুপদ্রবরহিতাং সাধ্যাং চিকিত্সেত্ ‘ভিষক্’ ইতি শেষঃ||১৪||

আতঙ্কদর্পণ ব্যাখ্যা (বাচস্পতি বৈদ্য কৃত)

তস্যা উপদ্রবমাহ– কাস ইত্যাদি| বৈচিত্ত্যং বিমতচিত্ততা||১৫||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ইতি শ্রীবিজযরক্ষিতকৃতাযাং মধুকোশব্যাখ্যাযাং ছর্দিনিদানং সমাপ্তম্||১৫||

আতঙ্কদর্পণ ব্যাখ্যা (বাচস্পতি বৈদ্য কৃত)

ইতি শ্রীবাচস্পতিবৈদ্যবিরচিতাযাং মাধবনিদানটীকাযামাতঙ্কদর্পণাখ্যাযাং ছর্দিনিদানম্||১৫||