১২. রক্তাভিষ্যন্দপ্রতিষেধাধ্যাযঃ

বাতপিত্তকফকৃতানভিষ্যন্দান্ প্রতিপাদ্য পরিশিষ্টং রক্তাভিষ্যন্দপ্রতিষেধমাহ- অথাত ইত্যাদি||১-২||

মন্থমিত্যাদি| অত্র মন্থস্য প্রাগুপাদানং স্যন্দাদ্গরীযস্ত্বখ্যাপনার্থম্||৩||

তদেব বিধানমাহ- ব্যাধ্যার্তানিত্যাদি| ব্যাধিভিরার্তাঃ পীডিতা ব্যাধ্যার্তাঃ| কৌম্ভেন শতবর্ষস্থিতেনেত্যর্থঃ| রসৈরুদারৈরথবেতি মাংসরসৈরধিকস্নেহৈর্বা স্নিগ্ধানিত্যর্থঃ| দূষ্যহরণং প্রতিপাদযন্নাহ- সিরেত্যাদি||৪||

দূষ্যহরণং প্রতিপাদ্য দোষহরণং প্রতিপাদযন্নাহ- বিরিক্তানামিত্যাদি| শিরাংসীতি বহুবচনং প্রতিরোগাপেক্ষযা দূষ্যেঽপহৃতে বিরেচনেন দোষহরণং, ততঃ শিরোবিরেচনং; তদপি সর্পিষা নতু তৈলেন, ঘৃতস্য চক্ষুষ্যত্বাত্, রক্তাবিরুদ্ধত্বাচ্চ| তস্য সংস্কারমাহ- বৈরেচনিকসিদ্ধেনেতি; শিরোবিরেচনদ্রব্যসিদ্ধেন, কেচিত্ ত্রিবৃতাদিদ্রব্যসিদ্ধেনেত্যাহুঃ| কেচিদত্র ‘মজ্জ্ঞা বা তদ্বিপক্বেন’ ইত্যাদিপাঠং পঠন্তি, স চানার্ষঃ||৫||

অন্তঃশুদ্ধিকরং ক্রিযাক্রমমুক্ত্বা বহিঃশুদ্ধিকরং ক্রিযাক্রমসঙ্গ্রহমুদ্দিশন্নাহ- তত ইত্যাদি| ধূমাশ্চ যথাস্বমাত্মীযানতিক্রমেণ, রক্তস্য দূষ্যস্য কফানুবন্ধে কফহরদ্রব্যবর্তিকৃতাঃ, বাতানুবন্ধে তু স্নৈহিকাঃ; এবমন্যত্রাপি যথাস্বমিতি সম্বন্ধনীযম্| অভ্যঞ্জনম্ অঞ্জনং; তচ্চ প্রসাদনং রক্তপিত্তে, সব্রণশুক্রাদৌ তু রোপণং; অন্যে পুনরভ্যঞ্জনমেব শতধৌতঘৃতাদিনেচ্ছন্তি||৬||

ইদানীং প্রলেপদ্রব্যাণ্যাহ- নীলোত্পলেত্যাদি| কটঙ্কটেরী দারুহরিদ্রা| কালীযকং দারুহরিদ্রানুকারি প্রসিদ্ধম্| ধৌতঘৃতপ্রদিগ্ধৈঃ মিশ্রৈরিত্যর্থঃ||৭||

পরিষেচনাদ্যুদ্দিষ্টং যদনির্দিষ্টং তত্পিত্তাভিষ্যন্দনির্দিষ্টদ্রব্যৈরতিদিশন্ ক্রিযাক্রমেঽনির্দিষ্টং চ নির্দিশন্নাহ- রুজাযামিত্যাদি| রুজো হি ভবন্তি সিরাব্যধাদিকৃতবাতানুবন্ধাত্, বাতাবৃতাদ্রক্তাদ্বা; তত্র বাতজাযাং তীব্ররুজাযাং মৃদবঃ স্বেদাঃ, দূষ্যরক্তাবরোধাদ্বহুশোণিতজাযাং জলৌকঃপাতনং; বাতজাযামেবান্তরমৌষধং ঘৃতস্য মহত্যা মাত্রযা পানম্; অল্পশোণিতজাযাং পিত্তাভিষ্যন্দশমনো বিধিঃ| নিযচ্ছতি নিবারযতি||৮-৯||

আশ্চ্যোতনমাহ- কশের্বিত্যাদি| অম্বরসংবৃতং বস্ত্রবেষ্টিতং, ন্যস্তং ক্ষিপ্তং, আন্তরিক্ষোদকালাভে আকাশগুণভূযিষ্ঠং ভূমিস্থমুদকং গৃহ্যতে| কেচিত্ পরিষেকমপ্যনেনৈবেচ্ছন্তি||১০||

রক্তাভিষ্যন্দেঽঞ্জনমাহ- পাটলীত্যাদি| শ্রীপর্ণী কাশ্মরী| ধাত্রী আমলকী, বিম্বীলোটো ভিল্লোটো হিমাদ্রিজো বৃক্ষঃ| বিরেচনাদিভির্বিশুদ্ধদোষস্য পুরুষস্য শেষদোষোপশান্ত্যর্থমঞ্জনং যোজ্যং, ন পুনরশুদ্ধদোষস্যেতি||১১-১২||

চন্দনমিত্যাদি| পত্রং পত্রকম্| অঞ্জনং রসাঞ্জনম্| পুষ্পরসেনেতি মধুনেত্যর্থঃ| বিপুলা যাস্তা এব মন্থাদিষু চতুর্ষু লেখনাদিকর্মণি সামর্থ্যাত্ পূজিতা বর্তযঃ| তদুক্তং,- “হরেণুমাত্রা বর্তিঃ স্যাল্লেখনস্য প্রমাণতঃ| প্রসাদনস্য চাধ্যর্ধা দ্বিগুণা রোপণস্য তু”- ইতি||১৩-১৪||

মন্থাদীনাং চতুর্ণাং সামান্যচিকিত্সিতমুক্ত্বা সিরোত্পাতে বিশেষচিকিত্সিতমাহ- স্যাদঞ্জনমিত্যাদি| অঞ্জনং রসাঞ্জনং , ঘৃতং গব্যঘৃতম্| নেপালী মনঃশিলা| মরিচং প্রসিদ্ধং, কেচিত্ মরিচশব্দেন সিতমরিচং শোভাঞ্জনফলাপরপর্যাযং বদন্তি| গৈরিকং স্বর্ণগৈরিকম্| এতান্যঞ্জনান্যর্ধশ্লৌকিকান্যপ্যুক্তানি||১৫-১৬||-

সিরাহর্ষ ইত্যাদি| ফাণিতং মধুযুক্তমেকমঞ্জনমিতি; মধুযুক্তং তার্ক্ষ্যজং দ্বিতীযমঞ্জনং, তত্র তার্ক্ষ্যজং রসাঞ্জনং; কাসীসং সসৈন্ধবং মধুযুক্তং তৃতীযমঞ্জনং; বেত্রাম্লস্তন্যসংযুক্তং ফাণিতং চতুর্থমঞ্জনং; তত্র বেত্রাম্লম্ অম্লবেতসং, অন্যে তু বেত্রং বেত্রকরীরং, অম্লম্ অম্লবেতসম্, অম্লীকা বেতি ব্যাখ্যানযন্তি; যত্তু জেজ্জটাচার্যেণ দূষিতম্||১৭-১৮||

রক্তার্জুনচিকিত্সামাহ- পৈত্তমিত্যাদি| পৈত্তং পিত্তাভিষ্যন্দোদিতম্| অত্র অর্জুনে| অম্লৈঃ ধান্যাম্লাদিভিঃ| তত্র ইক্ষুক্ষৌদ্রাদিভিঃ সেকাঞ্জনে কর্তব্যে, অম্লৈঃ পুনরাশ্চ্যোতনমেব কর্তব্যম্| অর্জুনেঽপরমপ্যাশ্চ্যোতনমাহ- সিতেত্যাদি| এতৈঃ সিতাদিভির্দাডিমাম্লপর্যন্তৈর্ব্যস্তৈঃ সমস্তৈর্বা যুক্তিতো দোষবলাপেক্ষযাঽঽশ্চ্যোতনং কার্যমিতি পিণ্ডার্থঃ| অর্জুনেঽঞ্জনমাহ- স্ফটিকমিত্যাদি| বিদৃমঃ প্রবালঃ| অর্জুনেঽপরমপ্যঞ্জনমাহ- সৈন্ধবেত্যাদি| সৈন্ধবক্ষৌদ্রকতকা ইত্যেকমঞ্জনং, সক্ষৌদ্রং বা রসাঞ্জনমিত্যপরং, কাসীসং মধুনা বাঽপীতি তৃতীযমঞ্জনম্| অত্র অর্জুনে||১৯-২৩||-

লেখ্যাঞ্জনমাহ- লোহেত্যাদি| সর্বাণি সুবর্ণত্রপুসীসতাম্ররজতকৃষ্ণলোহাদিজাতানি| ধাতবো মনঃশিলাগৈরিকাদযঃ| লবণানি সৈন্ধবাদীনি পঞ্চ| রত্নানি বৈদূর্যমরকতপ্রভৃতীনি| দন্তা গবাদীনামশ্বাদীনাং চ| শৃঙ্গাণি গবাদীনামেব| অবসাদনো মিশ্রকোক্তঃ কাসীসাদিঃ| এতদনির্দিষ্টানামপি লেখ্যাঞ্জনসঞ্জ্ঞকং জ্ঞেযম্| অপরমপি লেখ্যাঞ্জনমাহ- কুক্কুটাণ্ডেত্যাদি| লেখ্যাঞ্জনং কীদৃগ্বিধস্যাতুরস্য প্রযোজ্যমিত্যাহ- পুটপাকাবসানেনেত্যাদি| রক্তবিস্রাবণাদিনা পুটপাকাবসানেন, স্যন্দঘাতিনা অভিষ্যন্দহননশীলেন, কৃত্স্নেন সকলেন বিধিনা, সম্পাদিতস্য সম্যগ্যোজিতস্য; স পুনর্বিধিঃ সিরাব্যধবিরেচনশিরোবিরেচনান্যন্তঃপরিমার্জনানি; তথা হি,- “ততঃ প্রদেহান্ পরিষেচনানি নস্যানি ধূমাশ্চ যথাস্বমেব| আশ্চ্যোতনাভ্যঞ্জনতর্পণানি তথৈব কার্যাঃ পুটপাকযোগাঃ”- ইতি; লেখ্যাঞ্জনং প্রযোজনীযমিতি পিণ্ডার্থঃ| ‘পুটপাকাবসাদেন’ ইতি কেচিত্ পঠন্তি, পুটপাক এবাবসাদোঽবধির্যস্য স তথা তেনেতি খ্যানযন্তি||২৪-২৬||-

ইমাং চিকিত্সামব্রণে শুক্রেঽপ্যতিদিশন্নাহ- অনেনেত্যাদি| অনেন লেখ্যাঞ্জনেন পূর্বোক্তেন রক্তবিস্রাবণাদ্যুপক্রমেণ সম্পাদিতস্যাতুরস্যাব্রণং শুক্রমপহরেদিতি বাক্যার্থঃ||২৭||

ইদানীমব্রণশুক্রচিকিত্সিতমভিধায সব্রণেঽপি পূর্বং চিকিত্সিতমুদ্দিশন্নাহ- উত্তানমিত্যাদি| সব্রণমপি শুক্রমুত্তানমেকপটলগতম্, অবগাঢং বা দ্বিত্র্যাদিপটলগতং, রক্তস্রাবণেত্যাদিনা পূর্বোক্তেন বিধিনোপপাদ্য, লেখযেদিতি সমুদাযার্থঃ| ননু সব্রণস্য সন্তর্পণসাধ্যত্বাত্ কথং সব্রণে লেখনমুপযুজ্যতে? সত্যং, কর্কশাবস্থাযাং পূর্বং লেখনং প্রযুজ্যতে পশ্চাত্ সন্তর্পণমিতি ন দোষঃ| ‘কর্কশং বাপি সব্রণং’ ইত্যত্র ‘কর্ষযেচ্চাপি সব্রণং’ ইতি কেচিত্ পঠন্তি| এতদবস্থে এব শুক্রে ঘর্ষণমাহ - শিরীষবীজেত্যাদি| শিলা মনঃশিলা| কুর্যাদিত্যাদি| কৌ তৌ শ্লোকার্ধিকৌ দ্বৌ যোগাবিত্যাহ- শঙ্খকোলাস্থীত্যাদি| কোলাস্থি বদরাস্থি, কতকং শশপুরীষানুকার্যম্বুপ্রসাদনং ফলং, মধুকং যষ্টীমধু, দন্তো গোদন্তঃ, অর্ণবমলং সমুদ্রফেনম্| ক্ষারাঞ্জনমিত্যাদি| ক্ষারাঞ্জনং ‘নীলান্ যবান্ গব্যপযোঽনুপীতান্’ ইত্যাদিনা শ্লেষ্মাভিষ্যন্দোক্তম্| মুদ্গানিত্যাদি| মুদ্গান্ শঙ্খক্ষৌদ্রসিতাযুতানিত্যেকো যোগঃ, মধূকসারং মধুনেতি দ্বিতীযো যোগঃ| বিভীতকেত্যাদি| বিভীতকাস্থিমজ্জা মধুনেত্যেকো যোগঃ; শঙ্খাদিকতকপর্যন্তং মধুনেতি দ্বিতীযো যোগঃ, মধুকং যষ্টীমধু| কেচিত্ শঙ্খশুক্তীত্যত্র শঙ্খাশ্মন্তেতি পঠন্তি| দ্বিত্বগ্গত ইত্যাদি| দ্বিত্বগ্গতে দ্বিপটলাশ্রিতে শুক্র ইত্যর্থঃ| কেচিদমুং পাঠং ন পঠন্তি, জেজ্জটেন পঠিতত্বাদস্মাভিঃ পঠিতঃ| বংশজেত্যাদি| বংশজো বংশকরীরঃ, বংশাঙ্কুর ইতি যাবত্| অরুষ্করাদীনাং পরিপক্বাস্থি, অন্যে জটামাহুঃ| এতেষাং বংশজাদীনাং তিলনালদীপিতানাং ভস্ম, তচ্চ করভাস্থিচূর্ণসমং প্রত্যহমাকৃষ্য, ষড্গুণোদকেনাষ্টগুণোদকেন বা নিষ্ক্বাথ্য, পাদশেষং বহুশো বিস্রাব্য, স্বস্থেন তেন সপ্তাহং করভাস্থিচূর্ণং ভাবযিত্বাঽঽতপে শোষযেত্, তচ্চূর্ণং পুনশ্চ চূর্ণিতং কৃত্বা, মধ্বাক্তেনাঙ্গুল্যগ্রেণ শলাকযা বা সঙ্গৃহ্য শুক্রদেশমাত্রং ঘর্ষযেত্, ততস্ত্রিফলোদকেনাক্ষি প্রক্ষালযেত্| শুক্রবৈবর্ণ্যনাশনমিতি শুক্রস্য বৈবর্ণ্যং বিনাশযতি ন তু শুক্রং, এতেন শুক্রস্য কৃষ্ণতামুত্পাদযতীত্যর্থঃ||২৮-৩৫||-

অসাধ্যশুক্রবৈবর্ণ্যনাশনপ্রসঙ্গেনাসাধ্যাজকাজাতস্য বৈকৃতনাশনার্থং চিকিত্সামাহ- অজকামিত্যাদি| কেচিদমুং পাঠং ন পঠন্তি, জেজ্জটপঠিতত্বাদস্মাভিঃ পঠিতঃ| অত্রাজকাযামবস্থাযাং লেখনমপি কর্মাতিদিশন্নাহ- বহুশোঽবলিখেদিত্যাদি| অস্য অজকাজাতস্য, বর্ত্ম তুণ্ডং , উপগতং যদ্যুচ্চতাং প্রাপ্তং, তদা তং বহুশোঽবলিখেত্||৩৬-৩৭||

ইদানীং বাতপিত্তকফশোণিতানাং পৃথগভিষ্যন্দপ্রতিষেধমভিধায সান্নিপাতিকানামপ্যুপদেষ্টুমাহ- সশোফ ইত্যাদি| তত্রেতি তযোঃ পাকযোঃ| সিরাশ্চাত্র আপাঙ্গ্যা ঔপনাসিকা লালাঠ্যা বা| আশ্চ্যোতনম্ অক্ষিপূরণম্||৩৮||-

তযোরঞ্জনাবস্থামুদ্দিশন্নাহ- সর্বত ইত্যাদি| সর্বতশ্চাপি শুদ্ধস্যেতি অন্তঃপরিমার্জনবহিঃপরিমার্জনাভ্যাং শুদ্ধস্যেত্যর্থঃ| ইদং বক্ষ্যমাণম্| তদেবাঞ্জনমাহ- তাম্রপাত্রস্থিতমিত্যাদি| মৈরেযং সুরাসবযোরেকত্র সন্ধানং, দধি প্রসিদ্ধং, এবমিতি পূর্ববত্ তাম্রপাত্রস্থিতং সৈন্ধবচূর্ণযুক্তমিত্যর্থঃ, দধ্যুত্তরকং দধ্নঃ সরঃ| স্নেহাঞ্জনং রক্তাপকর্ষণাদিনা বিরূক্ষিতাক্ষস্য যোজ্যং; বাতোল্বণপাকস্য বা মৈরেযং দধি চ তাম্রপাত্রস্থিতং সৈন্ধবযুক্তং, পিত্তোল্বণে নাতিবিরূক্ষিতে দধ্যুত্তরকং চ, সশোফস্য চ রক্তাস্রাবাদিসম্পাদিতস্য ঘৃতং কাংস্যমলযুক্তঞ্জনং স্তন্যং বা সৈন্ধবযুক্তমঞ্জনং, মধূকসারং বা গৈরিকেণ তুল্যাংশং মধুনাঽঞ্জনং, ঘৃতাদীনি ত্রীণি স্তন্যেনাঞ্জনং, এতানি সাবশেষরক্তযোঃ পাকযোর্যোজ্যানি||৩৯-৪১||-

রসক্রিযামাহ- দাডিমেত্যাদি| আরেবতঃ কৃতমালকঃ; ‘ঐরাবত’ ইতি কেচিত্ পঠন্তি, তত্র ঐরাবতো নারঙ্গম্| সসৈন্ধবাম্ অল্পসৈন্ধবাং, ন সমসৈন্ধবামিত্যর্থঃ| রসক্রিযা ফাণিতাকৃতিঃ, তস্যাশ্চ কল্পনা পিত্তাভিষ্যন্দপ্রতিষেধে ব্যাখ্যাতা| ‘কোলাম্লৈশ্চ সসৈন্ধবাম্’ ইত্যত্র ‘কোলাম্লমধুসৈন্ধবৈঃ’ ইতি কেচিত্ পঠন্তি||৪২||

আশ্চ্যোতনমাহ- মাসমিত্যাদি| অবলাক্ষীরং স্ত্রীস্তন্যং, তচ্চ পেষণে বোদ্ধব্যম্| এতচ্চাশ্চ্যোতনং সশোফে পাকে কফোল্বণে||৪৩||

জাত্যা ইত্যাদি| কৃষ্ণাবীজং পিপ্পলীতণ্ডুলঃ| কীটশত্রুঃ বিডঙ্গঃ| নির্বিশঙ্কং প্রযোজ্যমিতি পাকযোরঞ্জনাবস্থাযাং দেযং তদঞ্জনমিতি তাত্পর্যার্থঃ||৪৪||

পূযালসে সন্নিপাতজে ক্রিযামাহ- পূযালসে ইত্যাদি| শোণিতমোক্ষণং চ স্নেহস্বেদপূর্বকমেব| উপনাহনমিতি যথাদোষহরব্রণশোধনচক্ষুষ্যদ্রব্যকৃতঃ প্রলেপো বন্ধনং বা| কৃত্স্নো বিধিরিতি অন্তঃশুদ্ধিকরো বহিঃশুদ্ধিকরশ্চেত্যর্থঃ| যথাবিধানমিতি হিতানতিক্রমেণেত্যর্থঃ||৪৫||

কাসীসাদিরসক্রিযাঞ্জনমাহ- কাসীসেত্যাদি| চকারাত্ পাকযোরুক্তমঞ্জনং সমুচ্চীযতে| অত্র পূযালসে| ক্ষৌদ্রান্বিতৈরিত্যাদি| এভিরেব কাসীসাদিভির্মধুনা পিষ্টৈস্তাম্রাযসচূর্ণযুক্তৈরন্যদঞ্জনমিতি পিণ্ডার্থঃ| ‘ক্ষৌদ্রান্বিতৈরেভিরথোপযুঞ্জ্যাত্’ ইত্যত্র ‘ক্ষৌদ্রান্বিতৈরেভিরবান্তরোক্তৈঃ’ ইতি কেচিত্ পঠন্তি||৪৬||

ইদানীং প্রক্লিন্নবর্ত্মনঃ পিল্লাখ্যস্য চিকিত্সামুদ্দিশন্নাহ- স্নেহাদিভিরিত্যাদি| স্নেহাদিভিরিতি স্নেহসিরাব্যধবিরেচনশিরোবিরেচনাস্থাপনৈঃ| অপাস্য নির্হৃত্য| তৃপ্তিঃ তর্পণম্| যথাস্বং যথাত্মীযম্||৪৭||

সেকাশ্চ্যোতনযোর্দ্রব্যাণ্যাহ- মুস্তেত্যাদি| ক্ষুণ্ণাভিরিতি অন্তরীক্ষোদকে তদ্গুণে বাঽন্যস্মিন্ ন্যস্তাভিরিত্যর্থঃ | আশ্চ্যোতনমেব কার্যমিতি অত্রানুক্তোঽপি সেকঃ কার্যঃ| অন্যে এতৈরাশ্চ্যোতনমেকমেবেচ্ছন্তি| অত্রাঞ্জনমিত্যাদি| অত্রাক্লিন্নবর্ত্মনি রসাঞ্জনমাক্ষিকমঞ্জনং স্যাত্| ‘রোধ্রোত্পলসারিবাভিঃ’ ইত্যত্র কেচিত্ ‘লোধ্রাসিতসারিবাভিঃ’ ইতি পঠন্তি, অসিতসারিবা শ্যামালতা; অসিতং রসাঞ্জনমিত্যন্যে ব্যাখ্যানযন্তি||৪৮||

রসক্রিযাঞ্জনমাহ- পত্রমিত্যাদি| পক্ত্বেতি কষাযকল্পেন বিপাচ্যেত্যর্থঃ| ক্রিযাং রসাক্রিযাং, বংশস্য মূলরসেন বা রসক্রিযাং, তামেব বা রসক্রিযামতিশোষণেন বর্তীকৃতাম্| তাম্রকপালং তাম্রকটাহঃ| ত্রিফলাযা অন্যা রসক্রিযা, পলাশপুষ্পৈরন্যা, খরমঞ্জরেরপামার্গস্যান্যা রসক্রিযেতি||৪৯||-

ইদানীং তীক্ষ্ণাঞ্জনদুর্বলস্য নযনস্য প্রত্যাশ্বাসনার্থং প্রত্যঞ্জনমাহ- পিষ্ট্বেত্যাদি| কাংস্যস্য মলং কার্পাসবস্ত্রেণ সহ দগ্ধ্বা সিতমরিচতাম্রজোযুক্তং ছগলীদুগ্ধেন পিষ্ট্বা প্রত্যঞ্জনং যোজ্যমিতি পিণ্ডার্থঃ| পশ্চাত্ প্রশান্তদোষে যদঞ্জনং ক্রিযতে তত্ প্রত্যঞ্জনশব্দবাচ্যম্||৫০||-

চূর্ণাঞ্জনমাহ- সমুদ্রফেনমিত্যাদি| লবণোত্তমং সৈন্ধবম্||৫১||

সর্বানপ্যক্লিন্নর্ত্মোক্তান্ প্রক্লিন্নবর্ত্মন্যতিদিশন্নাহ- প্রক্লিন্নেত্যাদি| এত এবেতি পূর্বোক্তাঃ| সমীক্ষ্য দোষমিতি প্রক্লিন্নবর্ত্মনঃ কফজত্বাদেষু মধ্যে যে কফহরা যোগাস্তে প্রযোজ্যা ইত্যর্থঃ||৫২||

প্রক্লিন্নবর্ত্মনঃ সামান্যচিকিত্সামুক্ত্বা বিশেষচিকিত্সামাহ- সকজ্জলমিত্যাদি| তুত্থকং কজ্জলতুল্যভাগং তাম্রপাত্রে ঘৃষ্টং সর্পির্যুতমঞ্জনমিতি||৫৩||

ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযামুত্তরতন্ত্রান্তর্গতে শালাক্যতন্ত্রে দ্বাদশোঽধ্যাযঃ সমাপ্তঃ||১২||