৬৫. সূতিকারোগনিদানম্

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ক্রমপ্রাপ্তত্বাত্ সূতিকারোগনিদানারম্ভঃ– অঙ্গমর্দ ইত্যাদি| সূতিকারোগলক্ষণমিতি সূতিকারোগ এব লক্ষণম্, অঙ্গমর্দাদিব্যতিরিক্তস্য রোগস্যানভিধানাত্| এতেঽঙ্গমর্দাদযঃ প্রাযেণ সূতিকাযা ভবন্তঃ সূতিকারোগত্বেন লক্ষ্যন্তে ইত্যর্থঃ||১||

আতঙ্কদর্পণ ব্যাখ্যা (বাচস্পতি বৈদ্য কৃত)

সূতিকারোগলক্ষণমাহ– অঙ্গমর্দ ইত্যাদি| সূতিকারোগ এব লক্ষণম্, অঙ্গমর্দাদিব্যতিরিক্তস্য রোগস্যানভিধানাত্| এতেনাঙ্গমর্দাদযঃ প্রাযেণ সূতিকাযা ভবন্তঃ সূতিকারোগত্বেন লক্ষ্যন্ত ইত্যর্থঃ||১||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

সূতিকারোগনিদানমাহ– মিথ্যেত্যাদি| সঙ্ক্লেশাদিতি সঙ্ক্লিশ্যতে উত্ক্লিশ্যতে দোষোঽনেনেতি সঙ্ক্লেশো দোষজনকমন্নম্| বিষমাজীর্ণভোজনাদিতি বিষমভোজনাদজীর্ণভোজনাচ্চ| জ্বরাতীসারাদীনামঙ্গমর্দাদিভ্যঃ পৃথক্ পুনরুপাদানং রোগাধিক্যং কৃচ্ছ্রত্বমুপদ্রবত্বং চ খ্যাপযিতুম্| কফবাতামযোদ্ভবাঃ ইতি তন্দ্রারুচিপ্রসেকাদ্যা ইত্যস্য বিশেষণম্| মন্যন্তে কেচিত্, অন্যে সর্বস্য জ্বরাতিসারাদেঃ| কফবাতজে বিকারে সতি যেষামুদ্ভবস্তে কফবাতামযোদ্ভবাঃ জ্বরাতীসারাদযঃ কৃচ্ছ্রসাধ্যা ইত্যর্থঃ| তে সর্বে সূতিকানাম্নেতি তে জ্বরাতীসারাদযঃ সর্বে সূতিকাভবত্বেনাশ্রযাশ্রিতযোরভেদোপচারাত্ সূতিকানাম্নোচ্যন্তে; তে চাপ্যুপদ্রবাঃ তে উপদ্রবাশ্চ ভবন্তি উক্তানাং রোগাণামন্যতমং প্রধানীকৃত্য||২-৪||

আতঙ্কদর্পণ ব্যাখ্যা (বাচস্পতি বৈদ্য কৃত)

মিথ্যোপচারাদিত্যাদি| মিথ্যোপচারাদিভিঃ সূতিকাযা যে রোগা জাযন্তে| সঙ্ক্লেশাদিতি সঙ্ক্লিশ্যতে উত্ক্লিশ্যতে দোষোঽনেনেতি সঙ্ক্লেশো দোষজনকমন্নম্| বিষমাজীর্ণভোজনাদিতি বিষমভোজনাদজীর্ণভোজনাচ্চ| জ্বরাতীসারাদীনামঙ্গমর্দাদিভ্যঃ পৃথগুপাদানং কৃচ্ছ্রসাধ্যা ইত্যর্থঃ| তে সর্বে সূতিকানাম্নেত্যাদি| জ্বরাতীসারাদযঃ সর্বে সূতিকাভবত্বেনাশ্রযাশ্রিতযোরভেদোপচারাত্সূতিকানাম্নোচ্যন্তে| তে চাপ্যুপদ্রবা ইতি, তে উপদ্রবাশ্চ ভবন্তি রোগাণামন্যতমং প্রধানীকৃত্য ||২-৪||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ইতি শ্রীকণ্ঠদত্তকৃতাযাং মধুকোশব্যাখ্যাযাং সূতিকারোগনিদানং সমাপ্তম্||৬৫||

আতঙ্কদর্পণ ব্যাখ্যা (বাচস্পতি বৈদ্য কৃত)

ইতি শ্রীবাচস্পতিবৈদ্যবিরচিতাযাং মাধবনিদানটীকাযামাতঙ্কদর্পণাখ্যাযাং সূতিকারোগনিদানম্||৬৫||