৯. রক্তপিত্তনিদানম্

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পাণ্ডুরোগবদ্রক্তপিত্তস্যাপি পিত্তজন্যত্বাত্তদনন্তরং রক্তপিত্তনিদানমাহ– ঘর্মেত্যাদি| ঘর্ম আতপঃ| তীক্ষ্ণং তীক্ষ্ণবীর্যং মরিচাদি, উষ্ণোঽগ্নিতাপঃ, ক্ষারো যবক্ষারাদিঃ, ঘণ্টাপাটল্যাদিকৃতশ্চ; বিদগ্ধং কুপিতম্| স্বগুণৈরিতি ‘পিত্তং তীক্ষ্ণং দ্রবং পূতি’ ইত্যাদিভিঃ, বিদহতি কোপযতি স্বগুণৈরেব, “বিদাহশ্চাস্য রক্তস্য পিত্তবত্” (সু. সূ. অ. ২১) ইত্যুক্তেঃ| ততঃ প্রবর্ততে নিঃসরতি, পিত্তং রক্তং চ ধাতুরূপং; নতু কেবলং রক্তং, রক্তপিত্তমিতি ব্যপদেশানুপপত্তেঃ| অথ পিত্তেন দুষ্টং রক্তং রক্তপিত্তমিত্যুচ্যতে, তদা পিত্তরক্তমিতি ব্যপদেশঃ প্রসজ্যেত, এতেন রক্তং চ পিত্তং চেতি দ্বন্দ্বসমাসান্নিরুক্তিরুক্তা সুশ্রুতেন| ননু, চরকে ‘রাগপরিপ্রাপ্তং পিত্তং রক্তপিত্তম্’ ইত্যুক্তং, তেন রক্তং চ তত্ পিত্তং চেতি কর্মধারযসমাসেন নিরুক্তিরুক্তা| অত্র চ কারণত্রযমুক্তম্| যদাহ– “সংযোগাদ্দূষণাত্তত্তু সামান্যাদ্গন্ধবর্ণযোঃ| রক্তস্য পিত্তমাখ্যাতং রক্তপিত্তং মনীষিভিঃ||” (চ. চি. অ. ৪) ইতি, তত্কথং ন বিরোধঃ? নৈবম্, অত্রাপি রক্তপ্রবৃত্তেঃ, দুষ্টং হি রক্তং পিত্তে রাগমাদধত্তত্সংসর্গি রক্তং স্বযমপি প্রবর্ততে ইতি পূর্ব এবার্থঃ| তেন রক্তং চ পিত্তং চেতি রক্তপিত্তং, রক্ত চ তত্ পিত্তং চেত্যুভযথাঽপি নিরুক্তাবদোষঃ||১-৩||

আতঙ্কদর্পণ ব্যাখ্যা (বাচস্পতি বৈদ্য কৃত)

অথ পাণ্ডুরোগবদ্রক্তপিত্তস্যাপি পিত্তজন্যত্বাত্তদনন্তরং রক্তপিত্তনিদানমাহ– ঘর্মেত্যাদি| এতৈঃ স্বকারণগুণৈর্বিদগ্ধং দুষ্ট পিত্তং শোণিতং বিদহতি কোপযতি| ঘর্ম আতপঃ, অধ্বা পন্থাঃ, ব্যবাযো মৈথুনম্, তীক্ষ্ণং তীক্ষ্ণবীর্যং মরিচাদি, উষ্ণোঽগ্নিতাপঃ অথবোষ্ণগুণদ্রব্যং, ক্ষারো যবক্ষারাদিঃ অপামার্গাদিকৃতশ্চ| ততো রক্তং প্রবর্ততে ঊর্ধ্বমধো বা দ্বিধা বা এককালমূর্ধ্বাধো বা, তস্য রক্তপিত্তমুচ্যতে| রক্তং চ পিত্তং চেতি দ্বন্দ্বসমাসান্নিরুক্তিঃ সুশ্রুতেনোক্তা| চরকে তু, রাগপরিপ্রাপ্তং পিত্তং রক্তপিত্তমুচ্যতে| তত্র রক্তং চ তত্পিত্তং চেতি কর্মধারযসমাসঃ| যদুক্তং চরকেণ কারণত্রযম্– “সংযোগাদ্দূষণাত্ তং তু সামান্যাদ্গন্ধবর্ণযোঃ| রক্তস্য পিত্তমাখ্যাতং রক্তপিত্তং মনীষিভিঃ” ইত্যুভযত্রাপি ন কশ্চিদ্দোষঃ| কেষু মার্গেষু প্রবর্ততে তানাহ– ঊর্ধ্বমিত্যাদি| কুপিতং তত্পিত্তং নাসাদিভিরূর্ধ্বং, মেঢ্রাদিভিরধঃ, অতিকুপিতং মার্গদ্বযৈরূর্ধ্বাধোভিঃ সমস্তরোমচ্ছিদ্রৈশ্চ||১-৩||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পূর্বরূপমাহ– সদনমিত্যাদি| কণ্ঠধূমাযনং কণ্ঠাদ্ধূমনির্গম ইব প্রতীতিঃ||৪||

আতঙ্কদর্পণ ব্যাখ্যা (বাচস্পতি বৈদ্য কৃত)

পূর্বরূপমাহ– সদনমিত্যাদি| সদনমঙ্গানাং, শীতকামিত্বং শীতেঽভিলাষঃ, কণ্ঠধূমাযনমিতি কণ্ঠাদ্ধূমনির্গম ইব বেদনেত্যর্থঃ| লোহগন্ধিঃ ধ্মাযমানলোহস্যেব শ্বাসে গন্ধঃ||৪||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

শ্লৈষ্মিকমাহ– সান্দ্রমিত্যাদি| সান্দ্রং ঘনং, সপাণ্ডু সস্নেহমিতি ঈষত্পাণ্ডুস্নেহম্|৫|

আতঙ্কদর্পণ ব্যাখ্যা (বাচস্পতি বৈদ্য কৃত)

শ্লৈষ্মিকমাহ– সান্দ্রমিত্যাদি| সান্দ্রং ঘনং, সপাণ্ডু সস্নেহমিতি| ঈষত্পাণ্ডু ইষত্স্নেহম্|৫|–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

বাতিকমাহ– শ্যাবেত্যাদি| তনু অঘনম্||৫||

আতঙ্কদর্পণ ব্যাখ্যা (বাচস্পতি বৈদ্য কৃত)

বাতিকমাহ– শ্যাবেত্যাদি| তনু অঘনম্||৫||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পৈত্তিকমাহ– রক্তেত্যাদি| কষাযাভং বটাদিক্বাথবর্ণম্| মেচকাগারধূমাভমিতি মেচকাগারধূমযোরিবাভা যস্য তত্তথা; মেচকাভম্, আগারধূমাভং চ; মসৃণীকৃতকৃষ্ণমণিবর্ণস্যেববর্ণো মেচক ইতি জেজ্জটাদযঃ প্রাহুঃ, চিক্কণকৃষ্ণ ইত্যর্থঃ| অঞ্জনাভং সৌবীরাঞ্জনবর্ণাভম্| ননু, সর্বমেব রক্তপিত্তং দুষ্টেন পিত্তেনারভ্যতে তত্ কথং পৈত্তিকং রক্তপিত্তমিতি? উচ্যতে– সত্যং, কিন্তু যদা স্বস্থানস্থং পিত্তং রক্তপিত্তারম্ভকং স্থানান্তরাবস্থিতেন পিত্তেন সঙ্গৃহ্যতে, কিংবা দোষান্তরাসংশ্লিষ্টং কেবলং পিত্তমারম্ভকং, তদা পৈত্তিকমিতি ব্যপদেশ ইতি| ননু, কেবলং পৈত্তিকং ন সম্ভবত্যেব, যদ্বক্ষ্যতি– “ঊর্ধ্বগং কফসংসৃষ্টমধোগং পবনানুগম্|” ইতি; ন চ তস্য নির্দিষ্টো মার্গঃ| উচ্যতে– যদা স্বকারণোদ্ভূতেন কফেন বাতেন বা স্বলক্ষণকারিণা সংসৃষ্টং ভবতি, তদা শ্লৈষ্মিকাদিব্যপদেশঃ, ন তু মার্গসম্বন্ধানুগতেন কফবাতসম্বন্ধেন| ঊর্ধ্বগং হি মার্গসম্বন্ধমহিম্নাঽবশ্যং কফেন, অধোগং চাবশ্যং বাতেন, অনুবধ্যতে| নচ তত্র কফবাতৌ স্বলক্ষণং কুরুতঃ, যথা শরদি জ্বরকরং পিত্তং কালমহিম্নাঽনুগতেন কফেনানুবধ্যতে তথাঽপি পৈত্তিক এবাসৌ প্রাকৃতো জ্বরঃ| যদুক্তম্– “কুর্যাত্ পিত্তং চ শরদি তস্য চানুবলঃ কফঃ|” (চ. চি. অ. ৩) ইতি| তেন যদা একদোষলিঙ্গযুক্তং ভবতি তদা একদোষানুগম্, এবং দ্বিদোষলিঙ্গং ত্রিদোষলিঙ্গং চ বোধ্যম্| তেনোর্ধ্বগমধোগং চৈকদ্বিত্রিলিঙ্গং ভবতি| এতেন পৈত্তিকস্য মার্গো ন দর্শিত ইতি যদুক্তং তন্নিরস্তমিতি||৬||

আতঙ্কদর্পণ ব্যাখ্যা (বাচস্পতি বৈদ্য কৃত)

পৈত্তিকমাহ– রক্তেত্যাদি| কষাযাভং খদিরাদিক্বাথবর্ণং, মেচকাভং কৃষ্ণরাজিরঞ্জিতমণিমসৃণীকৃতকৃষ্ণবস্ত্রবর্ণ ইব বর্ণো মেচক ইতি জেজ্জটদযঃ, চিক্কণকৃষ্ণ ইত্যর্থঃ| অঞ্জনাভং চ সৌবীরাঞ্জনবর্ণাভম্| ননু সর্বমেব রক্তপিত্তং দুষ্টেন পিত্তমারম্ভকং তত্ কথং পৈত্তিকং রক্তপিত্তমিত্যুচ্যতে? সত্যং, যদা স্বস্থানস্থং পিত্তং রক্তপিত্তারম্ভকং স্থানান্তরাবস্থিতেনাপি পিত্তেন সংস্পৃশতি কিংবা দোষান্তরাসংশ্লিষ্টং কেবলমেব পিত্তমিত্যুচ্যতে তদা পৈত্তিকমিতি ব্যপদেশ ইতি| ননু, কেবলং পৈত্তিকং ন সম্ভবত্যেব, যদ্বক্ষ্যতি– “ঊর্ধ্বগং কফসংসৃষ্টমধোগং মারুতানুগম্” ইতি; ন চ তস্য নির্দিষ্টো মার্গঃ? উচ্যতে– যদা হি স্বকারণোদ্ভূতেন কফেন বাতেন বা স্বলক্ষণকারিণা সংসৃষ্টং ভবতি, তদা শ্লৈষ্মিকাদিব্যপদেশঃ, ন তু মার্গসম্বন্ধত্বাগতেন কফবাতৌ স্বলক্ষণং কুরুতঃ, যথা শরদি জ্বরজনকং পিত্তং কালমহিমাগতেন কফেনানুবধ্যতে তথাঽপি পৈত্তিকদোষোঽসৌ প্রাকৃতো জ্বরঃ| যদুক্তম্– “কুর্যাত্পিত্তং চ শরদি তস্য চানুবলঃ কফঃ” ইতি| তেন যদা একদোষলিঙ্গযুক্তং ভবতি তদা একদোষানুগম্, এবং দ্বিদোষলিঙ্গং বোদ্ধব্যং, তেনোর্ধ্বগমধোগং চৈকদ্বিত্রিলিঙ্গং ভবতি| এতেন পৈত্তিকস্য মার্গো ন দর্শিত ইতি যদুক্তং তন্নিরস্তমিতি| সংসর্গসন্নিপাতজানি রক্তপিত্তান্যাহ– সংসৃষ্টেত্যাদি| যদা দ্বিদোষলিঙ্গৈরুপলক্ষিতং ভবতি তদা দ্বিদোষজং, যদা চ ত্রিদোষলিঙ্গৈঃ সংসৃষ্টং মিলিতং ভবতি তদা সান্নিপাতিকম্||৬||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

সংসর্গবিশেষেণ মার্গভেদমাহ– ঊর্ধ্বগমিত্যাদি||৭||

আতঙ্কদর্পণ ব্যাখ্যা (বাচস্পতি বৈদ্য কৃত)

দোষমিলিতত্বেন মার্গমাহ– ঊর্ধ্বগমিত্যাদি| যদা কফানুগতং রক্তপিত্তং ভবেত্তদা ঊর্ধ্বমার্গেষু প্রবর্ততে, যদি চ বাতানুগং তদাঽধোমার্গেষু, যদি তু উভাভ্যাং কফবাতাভ্যাং সংসৃষ্টং ভবতি তদা মার্গদ্বযেষু প্রবর্ততে| এতেন পৈত্তিকস্য মার্গো ন দর্শিতঃ, রোগস্য রক্তপিত্তপ্রাধান্যতৈব||৭||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

মার্গভেদেন সাধ্যত্বাদিকমাহ– ঊর্ধ্বমিত্যাদি| ঊর্ধ্বং সাধ্যমিতি ঊর্ধ্বগস্য কফপিত্তসংশ্লিষ্টত্বেন কষাযতিক্তৌ রসৌ কফপিত্তহরৌ যোগ্যৌ, পিত্তহরণে প্রধানং বিরেচনং চ যোগ্যম্| অধোগে তু এক এব মধুরো বাতপিত্তপ্রশমনঃ, বমনং চ প্রতিমার্গত্বেন বেগমাত্রবিরোধি, ন তু পিত্তহরণম্| উভযমার্গং চ বিরুদ্ধোপক্রমত্বাদেবাসাধ্যম্| যদুক্তং চরকে– “সাধ্যং লোহিতপিত্তং তদ্যদূর্ধ্বং প্রতিপদ্যতে| বিরেচনস্য যোগ্যত্বাদ্বহুত্বাদ্ভেষজস্য চ|| বিরেচনং হি পিত্তস্য জযায পরমৌষধম্|” (চ. চি. অ. ২) ইত্যাদি|৮|–

আতঙ্কদর্পণ ব্যাখ্যা (বাচস্পতি বৈদ্য কৃত)

মার্গপ্রবৃত্ত্যা তস্য সাধ্যাসাধ্যত্বমাহ– ঊর্ধ্বমিত্যাদি| যুগপদ্গতমেককালং মার্গদ্বযে প্রবৃত্তম্||৮|–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

সাধ্যত্বে হেতুমাহ– একমার্গমিত্যাদি| একমার্গমত্রোর্ধ্বগমভিপ্রেতম্, অধোগস্য যাপ্যত্বাত্| নবোত্থিতম্ অচিরজম্| সুখে কালে হেমন্তশিশিরযোঃ| নিরুপদ্রবং বক্ষ্যমাণদৌর্বল্যাদ্যুপদ্রবরহিতম্||৮-৯||–

আতঙ্কদর্পণ ব্যাখ্যা (বাচস্পতি বৈদ্য কৃত)

অসাধ্যত্বে হেতুমাহ– একেত্যাদি| ঊর্ধ্বমার্গমিতি ঊর্ধ্বমার্গপ্রবৃত্তং, বলযুক্তস্য পুংসঃ, নাতিবেগং মন্দবেগং, নবোত্থিতং অচরকলজাতম্| সুখে কালে হেমন্তশিশিরযোঃ| নিরুপদ্রবমিতি বক্ষ্যমাণদৌর্বল্যাদ্যুপদ্রবরহিতম্||৮-৯||–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

দোষভেদেন সাধ্যত্বাদিকমাহ– একদোষানুগমিত্যাদি| মার্গভেদদোষভেদাভ্যাং সাধ্যত্বাসাধ্যত্ববিরোধে অর্শঃস্বভিহিতদোষভেদবলিভেদাভ্যাং সাধ্যত্বাসাধ্যত্ববদ্ব্যাখ্যেযম্| মন্দাগ্নেস্তথা ব্যাধিভিঃ ক্ষীণদেহস্য যদতিবেগবত্তদসাধ্যম্| অনশ্নতঃ অরুচ্যাদিনা, অন্নাভাবাদ্বা||৯-১০||

আতঙ্কদর্পণ ব্যাখ্যা (বাচস্পতি বৈদ্য কৃত)

পুনরপি দোষানুসংসৃষ্টত্বেন সাধ্যাসাধ্যত্বমাহ– একদোষানুগমিত্যাদি| যাপ্যমপ্রতিক্রিযং, ত্রযো দোষাঃ প্রকোপহেতবো যস্য তত্ ত্রিদোষং রক্তপিত্তমিতি| মন্দাগ্নেস্তু ক্ষীণদেহস্য চ যদতিবেগবত্তদসাধ্যম্| অনশ্নতঃ অরুচ্যাদিনা, অন্নাভাবাদ্বা| শেষং সুগমম্||৯-১০||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

উপদ্রবানাহ– দৌর্বল্যেত্যাদি| দৌর্বল্যং ‘শক্ত্যুপচযযোরভাব’ ইতি গযদাসঃ| ভক্তে ঘোরো বিদাহ ইতি ‘ষষ্ঠ্যর্থে সপ্তমী’ ইতি কার্তিকঃ| হৃদ্যতুল্যেতি হৃদি অতুল্যা অসদৃশী পীডা| কোষ্ঠস্য ভেদঃ কোষ্ঠমলস্যভেদঃ| তপনং তাপঃ| ‘প্রবিততশিরস’ ইতি পাঠান্তরে প্রবিততং বিস্তীর্যমাণমিব; ‘প্রবিততা বিস্তীর্ণা বেদনা শিরসি যস্য স তথা’ ইতি কার্তিকঃ| ‘ প্রবিততসিরতা’ ইতি পাঠান্তরে সিরাব্যাপ্তগাত্রতা| অবিপাক আহারস্য| বিকৃতিরপি ভবেদ্রক্তপিত্তোপসর্গা ইতি এতে রক্তপিত্তস্য উপসর্গা উপদ্রবাঃ; তথা তস্য বিকৃতিরপি ভবেদিতি যোজ্যম্| সা চ বক্ষ্যমাণামাংসপ্রক্ষালনাভমিত্যাদিরূপা| ‘রক্তপিত্তোপসর্গাত্’ ইতি পাঠান্তরং সুগমম্||১১||

আতঙ্কদর্পণ ব্যাখ্যা (বাচস্পতি বৈদ্য কৃত)

উপদ্রবানাহ– দৌর্বল্যমিতি| শক্ত্যুপচযযোরভাব ইতি গযদাসঃ| বমথুঃ ছর্দিঃ, মদঃ ধত্তূরাদিফলভক্ষণবত্| আ সমন্ততঃ পাণ্ডুতা| দাহঃ সর্বাঙ্গগতঃ| মূর্ছা চেতনাচ্যুতিঃ| ভুক্তে ঘোরো বিদাহ ইতি ভুক্তস্যাহারস্য দারুণো বিদাহঃ, ষষ্ঠ্যর্থে সপ্তমীতি কার্তিকঃ| হৃদ্যতুল্যেতি হৃদি অতুল্যেতি ছেদঃ, হৃদযেঽতুল্যা অসদৃশী পীডা| কোষ্ঠস্য ভেদ ইতি কোষ্ঠমলভেদঃ| শিরসি তপনং তাপঃ| পূতিনিষ্ঠীবনত্বং পিত্তমযোদ্গিরণম্, অবিপাকঃ আহারস্য| এতে রক্তপিত্তস্য উপসর্গা উপদ্রবাঃ| বিকৃতিরপি ভবেদিতি তস্য রক্তপিত্তস্য বিকৃতিরপি ভবেদিতি যোজ্যম্| সা চ মাংসপ্রক্ষালনাভমিত্যাদিরূপা||১১||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অসাধ্যলক্ষণমাহ– মাংসেত্যাদি| কুথিতমিব পূতিতাং গতমিব| কর্দমম্ আবিলমিবাম্ভঃ কর্দমাম্ভঃ, অথবা কর্দমনিভমম্ভোনিভং চ| তথা মেদঃপূযাস্রকল্পমিতি কল্পশব্দো মেদঃপ্রভৃতিভিস্ত্রিভিঃ সম্বধ্যতে ইতি গযদাসঃ| যকৃদিব যকৃত্খণ্ডমিব| পক্বজম্বূফলাভং স্নিগ্ধকৃষ্ণম্| কৃষ্ণম্ অঞ্জনাভম্| নীলং চাষপক্ষপ্রতিমম্| ননু, পৈত্তিকে কৃষ্ণত্বং পঠিতং ন চ তদসাধ্যং? নৈবম্, অতিশব্দেনাত্র বিশেষিতত্বাত্, তেন তত্র মনাক্কৃষ্ণত্বং বোধ্যম্ ইতি জেজ্জটঃ; অথবা জম্বূফলাভং যত্ কৃষ্ণং তদিতি যোজ্যম্| উক্তা বিকারাঃ শ্বাসকাসাদযঃ| সুরপতিধনুষা তুল্যং নানাবর্ণম্| যেনেত্যাদি| যেন রক্তপিত্তেনেতি যোজ্যম্| পশ্যেদ্দৃশ্যং বিযচ্চাপি অদৃশ্যমপি বিযদ্দৃশ্যমিতি পশ্যতীতি যোজ্যং, রক্তপিত্তোপহতনেত্রত্বাদিতি; অথবা দৃশ্যং ঘটপটাদি, বিযচ্চ রক্তং পশ্যতীতি| অপরমসাধ্যলক্ষণমাহ– লোহিতমিত্যাদি| যো বহুশশ্ছর্দযেদিতি সম্বন্ধঃ| লোহিতোদ্গারদর্শীতি লোহিতোদ্গারো লোহিতদর্শীং চ, উদ্গারোঽপি লোহিতঃ প্রবর্ততে ইত্যর্থঃ; অথবা লোহিতমুদ্গারং পশ্যতীতি লোহিতোদ্গারদর্শীতি||১২-১৪||

আতঙ্কদর্পণ ব্যাখ্যা (বাচস্পতি বৈদ্য কৃত)

তস্য বিকৃতিরূপত্বেনাসাধ্যত্বমাহ– মাংসেত্যাদি| কুথিতমিব পূতিতাং গতমিব| কর্দমাবিলমিবাম্ভঃ কর্দমাম্ভঃ অথবা কর্দমনিভমম্ভোনিভং বা| অত্র কল্পশব্দো মেদঃপ্রভৃতিভিঃ ত্রিভিঃ প্রত্যেকং সম্বধ্যতে| যকৃদিব যকৃত্পিণ্ডমিব| পক্বজম্বূফলাভং স্নিগ্ধকৃষ্ণং, কৃষ্ণং অঞ্জনাভং, নীলং চাষপক্ষনিভম্| ননু, পৈত্তিকে কৃষ্ণং পঠিতং তচ্চ সাধ্যং? নৈবং,– অপিশব্দেনাত্র বিশেষিতত্বাত্| তেন তত্র মনাক্কৃষ্ণত্বং বোদ্ধব্যমিতি জেজ্জটঃ| অথবা জম্বূফলাভং যত্কৃষ্ণমিতি যোজ্যম্| ভৃশমিতি অত্যর্থম্| অতি সর্বত্র| কুণপং শবগন্ধি| যত্র চোক্তা বিকারাঃ শ্বাসকাসাদয উপদ্রবাঃ; ‘ভবন্তি’ ইতি শেষঃ| সুরপতিধনুষেতি সুরপতিধনুর্বন্নানাবর্ণমিত্যর্থঃ| এভিঃ পূর্বোক্তৈরুপদ্রবৈর্যুক্তং বিকৃতৈর্বর্ণৈশ্চ রক্তপিত্তং ত্যাজ্যম্| অসাধ্যলক্ষণান্তরমাহ– যেনেত্যাদি| যেন রক্তপিত্তেনোপহতো মনুষ্যঃ দৃশ্যং ঘটপটাদিকং বিযচ্চ অদৃশ্যং পশ্যতি স নশ্যতি| অন্যে “ পশ্যেদ্রক্তং বিযচ্চাপি” ইতি পঠন্তি| অদৃশ্যমপি বিযত্ রক্তং পশ্যতি, রক্তপিত্তোপহতনেত্রত্বাত্| লক্ষণান্তরমাহ– লোহিতমিত্যাদি| যো বহুশঃ রক্তং ছর্দযেত্, রক্তনযনশ্চ লোহিতোদ্গারদর্শীতি লোহিতোদ্গারো লোহিতদর্শীং চ, উদ্গারোঽপি লোহিতঃ প্রবর্তত ইত্যর্থঃ; অথবা লোহিতমুদ্গারং পশ্যতীতি লোহিতোদ্গারদর্শী; স ম্রিযতে||১২-১৪||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ইতি শ্রীবিজযরক্ষিতকৃতাযাং মধুকোশব্যাখ্যাযাং রক্তপিত্তনিদানং সমাপ্তম্||৯||

আতঙ্কদর্পণ ব্যাখ্যা (বাচস্পতি বৈদ্য কৃত)

ইতি শ্রীবৈদ্যবাচস্পতিকৃতে আতঙ্কদর্পণে রুগ্বিনিশ্চযব্যাখ্যানে রক্তপিত্তনিদানম্||৯||