১৮. পানাত্যযপরমদপানাজীর্ণপানবিভ্রমনিদানম্

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

‘মূর্ছা মদ্যেন চ বিষেণ চ’ ইতি বচনান্মূর্ছানন্তরং মদ্যবিকারান্ মদাত্যযাদীনাহ| ননু, কথং মদ্যং মোহযতীত্যাহ– যে বিষস্যেত্যাদি| তে চ বিষগুণা মূর্ছাধ্যাযে নিদর্শিতাঃ| মিথ্যোপযুক্তেনেতি অযথাবিধিপীতেন, বিধিশ্চাযং, তদ্যথা– কুসুমিতলতোপগূঢৈঃ প্ররূঢনিরন্তরনবাঙ্কুরনিকররোমাঞ্চৈর্মধুকরমধুরঝঙ্কারসীত্কারৈর্মুক্তকণ্ঠকলকণ্ঠকূজিতৈর্দক্ষিণসমীরণসমুল্লসিতপল্লবকরপ্রচারৈঃ তরুণতরুভিঃ উপক্রান্তলতাভিরতিশোভনেষু তুষারকরকিরণরাজিপরাজিতাশেষতাপদোষেষু প্রদেশেষু শৃঙ্গাররসসমুচিতালঙ্কৃতিকমনীযকামিনীসেবিতং ললিতললনোপনীযমানং সুরভিরুচিররূপরসোপদংশং কং নাম পরিমিতং পরার্ধমধুপানং ন সুখযতি? চরকে তু বিস্তরেণৈতদুক্তম্||১||

আতঙ্কদর্পণ ব্যাখ্যা (বাচস্পতি বৈদ্য কৃত)

‘মূর্ছা মদ্যেন বিষেণ চ’ ইতি বচনান্মূর্ছানন্তরং মদ্যবিকারানাচষ্টে, ননু কথং মদ্যং মোহযতীত্যাহ– য ইত্যাদি| যে বিষস্য গুণাঃ প্রোক্তাঃ, তে চ বিষগুণা মূর্ছাধ্যাযে নিদর্শিতাঃ, তে গুণা মদ্যেঽপি কীর্তিতাঃ, তেন মদ্যেন মিথ্যোপযুক্তেন অযথাবিধিপীতেনোগ্রো মদাত্যযো ভবতি| বিধিশ্চাযং; তদ্যথা– কুসুমিতলতোপগূঢৈঃ প্রকটনিরন্তরনবাঙ্কুরনিকররোমাঞ্চৈঃ মধুকরমধুরঝঙ্কারসীত্কারৈর্মুক্তকণ্ঠ-কলকণ্ঠকূজিতৈর্দক্ষিণসমীরণোদ্বীজিতসমুল্লসিতপল্লবকর-প্রচারৈস্তরুণতরুভিরুপক্রান্ততরললতাভিরতিশোভনেষু বনোপবনেষু তুষারকরকিরণারঞ্জিতপ্রদেশেষু শৃঙ্গারসরসমুচিতালঙ্কৃতিকমনীযকামিনীসম্মিতং ললিতললনোপনীযমানং সুরভিরুচিররসোপদংশং কং নাম পরিমিতং মধুপানং ন সুখযতি| চরকেণ তু বিস্তরেণৈতদুক্তম্| বিধিঃ প্রকারঃ||১||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ননু, বিষস্য যে গুণাস্তে চেন্মদ্যেঽপি সন্তি, তর্হি বিষবন্মদ্যমনুপযোজ্যং প্রসজ্যেত? অত আহ– কিন্ত্বিত্যাদি| যথৈবান্নমিতি দেহধারকস্বভাবং, তদেবাযুক্তিযুক্তমবিধিযুক্তং রোগায; তস্মাদহিতমপি বিশিষ্টবিধিনোপযুক্তং হিতং, হিতমপ্যবিধিনোপযুক্তমনর্থায ভবতীতি| অত্রৈব দৃষ্টান্তমাহ– প্রাণা ইত্যাদি| তদযুক্ত্যেতি অতিমাত্রত্বাদিনা বিসূচ্যাদিকং কৃত্বা মারযতীত্যর্থঃ| যুক্তিযুক্তমিতি যথা চরকরসাযনপ্রযোগে উক্তম্– “দ্বৌ যবাবত্র হেম্নস্তু তিলং দদ্যাদ্বিষস্য চ|” (চ. চি. অ. ১) ইতি| অত্র তিলমিতি তিলপ্রমাণম্||২-৩||

আতঙ্কদর্পণ ব্যাখ্যা (বাচস্পতি বৈদ্য কৃত)

ননু বিষস্য যে গুণাস্তে চেন্মদ্যেঽপি সন্তি তর্হি বিষবন্মদ্যমনুপযোজ্যং স্যাদিত্যত আহ– কিন্ত্বিত্যাদি| মদ্যং স্বভাবেন প্রকৃত্যা অন্নবত্ জ্ঞেযং দেহধারণস্বভাবং, তদেবান্নং মদ্যং বা অযুক্তিযুক্তমবিধিপ্রযুক্তং রোগায ভবতি, যুক্তিযুক্তমমৃতবদ্ভবতীত্যর্থঃ| তস্মাদহিতমপি বিশিষ্টবিধিনোপযুক্তং হিতং, হিতমপ্যবিধিনোপযুক্তমনর্থায ভবতি| অত্রৈব দৃষ্টান্তমাহ– প্রাণা ইতি| অন্নং প্রাণভৃতাং শরীরিণাং প্রাণাঃ, শরীরধারণাত্মকত্বাত্| তদেবান্নম্ অযুক্ত্যা অতিমাত্রত্বাদিনা বিসূচ্যাদীন্ কৃত্বা মারযতীত্যর্থঃ| প্রাণহরমপি তদ্বদ্বিষং যুক্তিযুক্তং রসাযনং ভবতি, শরীরং ধারযতীত্যর্থঃ||২-৩||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

বিধিনোপযুক্তস্য ফলমাহ– বিধিনেত্যাদি| কাল ইতি নিত্যগে চাবস্থিকে চ; তদ্যথা– গ্রীষ্মে শীতমধুরং মাধ্বীকাদি, শীতে উষ্ণতীক্ষ্ণং গৌডিকপৈষ্টিকাদি; তথা বাতে স্নিগ্ধাদি; এবং বযস্যুদাহার্যম্| হিতৈরন্নৈরিতি বক্ষ্যমাণস্নিগ্ধাদিভির্মদ্যবিপরীতগুণৈঃ| স্নিগ্ধৈরিত্যুপলক্ষণং, তেনান্যৈরপি মদ্যবিপরীতগুণৈরিতি বোদ্ধব্যম্| যদুক্তং সুশ্রুতেন “মদ্যমম্লং তথা তীক্ষ্ণং সূক্ষ্মং বিশদমেব চ| রূক্ষমাশুকরং চৈব ব্যবাযি চ বিকাশি চ||” (সু. উ. তং. অ. ৪৭) ইতি| অম্লরসত্বং চাস্যোদ্ভূতরসত্বেনোক্তং; যদুক্তমন্যত্র– “সর্বেষামম্লজাতীনাং মদ্যং মূর্ধ্নি ব্যবস্থিতম্||” ইতি| মূর্ধ্নি ব্যবস্থিতমুত্কৃষ্টম্| অন্যেঽপ্যত্র রসাঃ সন্তি| যদাহ ভোজঃ– “মৈরেযং মদিরা সীধু চতুর্থং মধু চোচ্যতে| একৈকং ষড্রসং তত্র রসতো মদ্যমীরিতম্||” ইতি| অন্নভক্ষ্যশব্দযোরুপাদানেন প্রাযো লেহ্যং দ্রবান্তরপানং চ মদ্যপানোচিতং ন ভবতীতি দর্শযতি| অন্নভক্ষ্যাভ্যাং লব্ধেঽপি মাংসে মাংসগ্রহণং বিশেষেণ হিতত্বোপদর্শনার্থম্| বলং শক্তিঃ, উপচযঃ স্থৌল্যম্| অপরমপি বিধিসেবাগুণমাহ– কাম্যতেত্যাদি| কাম্যতা কমনীযমূর্তিতা, মনসস্তুষ্টিঃ সন্তোষঃ| অথবা কাম্যতা মনস ইতি কমনীযবস্তুনি মনোবৃত্তিঃ, তুষ্টিশ্চ মনস এবেতি যোজ্যম্| তেজ উত্সাহঃ| বিক্রমঃ পরাভিভবার্থং বলবতী শরীরচেষ্টা||৪-৬||

আতঙ্কদর্পণ ব্যাখ্যা (বাচস্পতি বৈদ্য কৃত)

বিধিনোপযুক্তস্য ফলমাহ– বিধিনেত্যাদি| বিধিঃ পূর্বোক্তঃ, তন্ত্রান্তরোক্তশ্চ– “শুদ্ধকাযঃ পিবেত্প্রাতঃ সোপদংশং পলদ্বযম্| মধ্যাহ্নে দ্বিগুণং তচ্চ স্নিগ্ধাহারেণ বৈ পিবেত্, প্রদোষেঽষ্টপলং তদ্বন্মাত্রা মদ্যে রসাযনম্| আরোগ্যং ধাতুসাম্যং চ বহ্নিকান্তিবলপ্রদম্|| অনেন বিধিনা সেব্যং মদ্যং নিত্যমতন্দ্রিতৈঃ|” ইতি| অন্যে, “বুদ্ধ্যাদযো গুণা যাবদুল্লসন্তি নিরত্যযাঃ| মাত্রেযং বিহিতা মদ্যে পানে রোগায চাপরাঃ||” কাল ইতি তত্র কালো দ্বিবিধো নিত্যগঃ, আবস্থিকশ্চ; তত্র নিত্যগে ঋতুসম্বন্ধিনি, যথা– গ্রীষ্মে শীতমধুরং মাধ্বীকাদি, শীতে উষ্ণতীক্ষ্ণং গৌডিকপৈষ্টিকাদি; আবস্থিকে কালে বাতে স্নিগ্ধাদি, এবং বযস্যপ্যুদাহার্যম্| হিতৈরন্নৈরিতি বক্ষ্যমাণস্নিগ্ধত্বাদিভির্মদ্যবিপরীতগুণৈঃ| যথাবলং স্বশক্ত্যা| এবং হৃষ্টো হর্ষযুক্তো যো মদ্যং পিবেত্তস্যামৃতোপমং স্যাত্| কৈঃ সহ পীতং বলোপচযায ভবতি তানাহ– স্নিগ্ধৈরিত্যাদি| এতৈর্বস্তুভিঃ সেব্যমানং মদ্যমাযুঃপ্রকর্ষায ভবতি তথা বলবর্ধকমিতি| স্নিগ্ধৈরিত্যুপলক্ষণং, তেনান্যৈর্মদ্যবিপরীতগুণৈরপি বোদ্ধব্যং, তেন তীক্ষ্ণাদিদশগুণবিপরীতৈর্মৃদ্বাদিগুণৈঃ সহ মদ্যং সেব্যমিতি| যদুক্তং তন্ত্রান্তরে– “লঘুতীক্ষ্ণোষ্ণসূক্ষ্মাম্লব্যবায্যাশুগমেব চ| রুক্ষং বিকাশি বিশদং মদ্যং দশগুণং স্মৃতম্” ইতি| তথা চ সুশ্রুতে– মদ্যমম্লং তথা তীক্ষ্ণং সূক্ষ্মং বিশদমেব চ| রূক্ষমাশুকরং চৈব ব্যবাযি চ বিকাশি চ” ইতি| অম্লরসত্বং চাস্যোদ্ভূতরসত্বেনোক্তম্| যদুক্তমন্যত্র “সর্বেষামম্লজাতীনাং মদ্যং মূর্ধ্নি ব্যবস্থিতম্” ইতি| মূর্ধ্নি ব্যবস্থিতমুত্কৃষ্টম্| অন্যেঽপ্যত্র রসাঃ সন্তি| যদুক্তং তন্ত্রান্তরে– “মদ্যস্যাম্লস্বভাবস্য চত্বারোঽনুরসাঃ স্মৃতাঃ| মধুরশ্চ কষাযশ্চ কটুকস্তিক্ত এব চ” ইতি| যদাহ ভোজঃ– ষড্রসা ইতি”মদিরাযা রসা ব্যক্তা মধুরোষণতিক্তকাঃ| লবণাম্লকষাযাশ্চ ত্রযঃ সূক্ষ্মতরাঃ স্মৃতাঃ|| বিপর্যযেণৈতদেবং মৈরেযে কথিতা রসাঃ| মাধ্বীকে সীধুসঞ্জ্ঞে চ ব্যক্তৌ চাম্লকটূ রসৌ| ব্যক্তা হি শেষাশ্চত্বারো রসা ভোজেন কীর্তিতাঃ” ইতি| অন্নৈরিতি গোধূমাদিভিঃ| অন্নভক্ষ্যাভ্যাং লব্ধেঽপি মাংসে মাংসগ্রহণং বিশেষেণ হিতত্বোপদর্শনার্থম্| বলং শক্তিঃ, উপচযঃ স্থৌল্যম্| অপরমপি বিধিসেবাগুণমাহ– কাম্যতেত্যাদি| কাম্যতা কমনীযমূর্তিতা, মনসস্তুষ্টিঃ সন্তোষঃ, তেজ উত্সাহঃ, বিক্রমঃ পরাভিভবার্থং বলবতী শরীরচেষ্টা||৪-৬||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

উক্তবিধিবিপর্যযেণ সেব্যমানং মদ্যং মদাত্যযায সম্পদ্যতে; স চ ত্রিবিধো ভবতি– পূর্বো, মধ্যমোঽন্তিমশ্চেতি; তেষাং ক্রমেণলক্ষণমাহ– বুদ্ধীত্যাদি| বুদ্ধিরনুভবঃ, স্মৃতিরনুভূতার্থানুসন্ধানম্| পানান্ননিদ্রারতিবর্ধনশ্চেতি পানাদিষু রতিরনুরাগস্তদ্বর্ধনঃ| সম্পাঠঃ সম্যক্ পাঠঃ| গযদাসস্তু ‘সম্পাঠ্য’ ইতি পঠিত্বা গীতনৃত্যবাদ্যানি মিলিতানি সম্পাঠ্যমুচ্যতে, গীতং তু কেবলমেবেতি ব্যাচষ্টে| স্বরো ধ্বনিঃ| প্রোক্তোঽতিরম্য ইতি| ননু মনোবিকারকারিত্বাত্ কথমস্যাতিরম্যতা? উচ্যতে– মনোবিকারকারিত্বেঽপি তদাত্বেন ন দুঃখাবহত্বাত্ অত এব সুশ্রুতেন মানসবিকারেষু হর্ষঃ পঠিতঃ||৭||

আতঙ্কদর্পণ ব্যাখ্যা (বাচস্পতি বৈদ্য কৃত)

উক্তবিধিবিপর্যযেণ সেব্যমানং মদ্যং মদাত্যযায ভবতি| স চ ত্রিধা ভবতি মদাত্যযঃ পূর্বো মধ্যোঽন্তিম ইতি| তেষাং ক্রমেণ লক্ষণমাহ– তত্র প্রথমো যথা– বুদ্ধীত্যাদি| বুদ্ধিরনুভবঃ, স্মৃতিঃ পূর্বানুভূতস্মরণং, প্রীতিঃ পরেণ মৈত্রী| সুখ ইতি শোকাদ্যস্মরণেন মনসঃ প্রসাদাদনুপহতেন্দ্রিযবৃত্তিত্বাত্| পানান্ননিদ্রারতিবর্ধন ইতি পানাদিষু বিষযে রতিরনুরাগঃ, তদ্বর্ধনঃ| সম্পাঠঃ সম্যক্পাঠঃ, গীতং গানং, স্বরো ধ্বনিঃ| প্রোক্তোঽতিরম্য ইতি| ননু মনোবিকারকরত্বাত্ কথমস্যাতিরম্যতা? উচ্যতে– মনোবিকারকারিত্বেঽপি তদাত্বেন দুঃখাবহত্বাত্| অত এব সুশ্রুতেন মানসবিকারেষু হর্ষঃ পঠিত ইতি||৭||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

দ্বিতীযমদমাহ– অব্যক্তেত্যাদি| বিচেষ্টো বিরুদ্ধচেষ্টঃ| উন্মত্তস্য লীলাকৃতিভ্যাং সহ বর্ততে ইতি সোন্মত্তলীলাকৃতিঃ; উন্মত্তপ্রায ইত্যর্থঃ| অপ্রশান্তঃ প্রচণ্ডঃ||৮||

আতঙ্কদর্পণ ব্যাখ্যা (বাচস্পতি বৈদ্য কৃত)

মধ্যমদমাহ– অব্যক্তেত্যাদি| উন্মত্তস্য লীলাকৃতিভ্যাং সহ বর্তত ইতি সোন্মত্তলীলাকৃতিঃ উন্মত্তপ্রায ইত্যর্থঃ| অপ্রশান্তঃ প্রচণ্ডঃ| মুহুর্বারংবারম্, আলস্যনিদ্রাভ্যামভিহতঃ পীডিতঃ, স চৈবংবিধোঽত্যনুপহতেন্দ্রিযবৃত্তিত্বাত্||৮||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

তৃতীযমদমাহ– গচ্ছেদিত্যাদি| ননু চরকে দ্বিতীযতৃতীযযোর্মধ্যে মদান্তরং পঠিতং, যদাহ– “মধ্যমং মদমুত্ক্রম্য মদমপ্রাপ্য চোত্তমম্| ন কিঞ্চিদশুভং কুর্যুর্নরা রাজসতামসাঃ|| কো মদং তাদৃশং গচ্ছেদুন্মাদমিব চাপরম্|” (চ. চি. অ. ২৪) ইতি; তত্ কুতোঽত্র ন পঠিতম্? উচ্যতে– দ্বিতীযমদান্তে তৃতীযমদস্য পূর্বাবস্থৈবাতিনিন্দনীযা, সুতরাং তৃতীযো মদ ইতি প্রতিপাদনার্থং তত্পঠিতং, ন তু তযোঃ পরমার্থতোঽন্তরালে পৃথঙ্মদান্তরমস্তি, যথা– “কুম্ভমীনর্ক্ষযোর্মধ্যে যদা চরতি চন্দ্রমাঃ| নাহরেত্তৃণকাষ্ঠানি ন গচ্ছেদ্দক্ষিণাং দিশম্||” ইতি| অত্র হি কুম্ভস্য শেষাংশো মীনস্য প্রথমাংশ এতদ্দ্বযং মধ্যশব্দেনোচ্যতে ইত্যাহুঃ জেজ্জটাদযঃ, হরিচন্দ্রব্যাখ্যানং তু বিস্তরত্বান্ন লিখিতম্| অগম্যান্ গুরুদারাদীন্ দুষ্টযানাদীংশ্চ| নষ্টসঞ্জ্ঞ ইতি সঞ্জ্ঞা নামোল্লেখেন জ্ঞানং, তন্নষ্টং যস্য স তথা| গুহ্যানি গোপ্যানি| অস্বতন্ত্রো মদপরবশঃ||৯||

আতঙ্কদর্পণ ব্যাখ্যা (বাচস্পতি বৈদ্য কৃত)

তৃতীযং মদমাহ– গচ্ছেদিত্যাদি| অগম্যান্ গুরুদারাদীন্| গুরূন্ জ্যেষ্ঠান্, ন মন্যেত অবগণযেদিত্যর্থঃ| অভক্ষ্যাণি শাস্ত্রনিষিদ্ধানি, চকারাদ্দুষ্টপানাদীংশ্চ| সঞ্জ্ঞা নামোল্লখেন সঞ্জ্ঞাজ্ঞানং তন্নষ্টং যস্য স তথা| হৃদি স্থিতানি গুহ্যানি গোপ্যানি, ব্রূযাত্| তথা অস্বতন্ত্রো মদপরবশঃ| স চৈবংবিধোঽতীবোপহতেন্দ্রিযত্বাদ্ভবতি||৯||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

চতুর্থমদমাহ– চতুর্থে ত্বিত্যাদি| কার্যাকার্যবিভাগজ্ঞঃ কার্যমকার্যমিতি বুদ্ধ্যা জানাতি| ‘কার্যাকার্যবিভাগজ্ঞঃ’ ইতি পাঠে কার্যাকার্যবিভাগযোরজ্ঞ ইত্যর্থঃ| মৃতাদপ্যপরো মৃত ইতি মৃতমপেক্ষ্যাপরোঽযং মৃত ইব, অত্যন্তাজ্ঞানসাধর্ম্যাত্| ‘অবরঃ’ ইতি পাঠান্তরে মৃতাদপ্যধম ইত্যর্থঃ, তথাবিধাবস্থাযাঃ স্বযং কৃতত্বাত্| ক ইত্যাদি| কঃ কৃতী কুশলঃ, সুকৃতী বা, কৃতকৃত্যো বা; স্ববশোঽপরাধীনঃ, তাদৃশমুক্তপ্রকারেণ নিন্দিতং মদং গচ্ছেত্ প্রাপ্নুযাত্; ন কশ্চিদেবংবিধং প্রাপ্নুযাদিত্যর্থঃ| কমিবেত্যাহ– বহুদোষমিবামূঢঃ কান্তারমিতি বহুদোষং হিংস্রাদিযুক্তং, কান্তারং দূরশূন্যমধ্বনম্| যদুক্তং চরকে– “গচ্ছেদধ্বানমস্বন্তং বহুদোষমিবাঽধ্বগঃ|” (চ. চি. অ. ২৪) ইতি; এবং বিদেহেঽপি পঠিতমিতি| অত্রাস্বন্তমশোভমানমনিষ্টফলত্বেন| ননু, চরকবিদেহবাগ্ভটাদিভিশ্চতুর্থো মদো ন পঠিতস্তত্কথং সুশ্রুতেন পঠিতঃ? উচ্যতে– চরকে যা দ্বিতীযতৃতীযযোরন্তরালাবস্থা পঠিতা, সৈব সুশ্রুতেন তৃতীযো মদ ইতি কৃত্বা পঠিতঃ, যস্তু চরকে তৃতীযঃ স চ সুশ্রুতে চতুর্থঃ পঠিত ইত্যাবিরোধঃ| বস্তুগত্যা তু ত্রয এব মদা ইত্যুপপাদিতম্| ননু, কিঙ্কারণমেতত্ত্রৈবিধ্যমিতি চেত্? উচ্যতে– মদ্যং হি বহ্নিতুল্যং, যথা হ্যগ্নিঃ সুবর্ণানামুত্তমমধ্যমাধমানামভিব্যঞ্জকস্তথা মদ্যমপি প্রাণিনাং সত্ত্বরজস্তমোভূযিষ্ঠানাং ক্রমেণাভিব্যঞ্জকমিতি| তথাহি চরকঃ– “প্রধানাধমমধ্যানাং রুক্মাণাং ব্যক্তিদর্শকঃ| যথাঽগ্নিরেবং সত্বাদ্যৈর্মদ্যং প্রকৃতিদর্শকম্| তস্মাত্ প্রথমদ্বিতীযতৃতীযমদাঃ সত্ত্বরজস্তমোভূযিষ্ঠানাং ক্রমেণ ভবন্তীত্যর্থঃ||১০-১১||

আতঙ্কদর্পণ ব্যাখ্যা (বাচস্পতি বৈদ্য কৃত)

চতুর্থমদমাহ-চতুর্থে মদে পুরুষো মূঢোঽজ্ঞঃ, ভগ্নদার্বিব নিষ্ক্রিযো ভবতি ভগ্নবৃক্ষ ইব ক্রিযারহিতঃ, তথা কার্যাকার্যবিভাগজ্ঞঃ কার্যমকার্যং বুদ্ধ্যা জানাতি| ‘কার্যাকার্যবিভাগজ্ঞঃ’ ইতি পাঠান্তরে কার্যাকার্যবিভাগযোরনভিজ্ঞ ইত্যর্থঃ| মৃতাদপ্যপরো মৃত ইতি মৃতমপেক্ষ্যাপরোঽযং মৃত ইব, অত্যন্তাজ্ঞানসাধর্ম্যাত্| ‘অবরঃ’ ইতি পাঠান্তরে মৃতাদপ্যবর ইত্যর্থঃ, তথাবিধাবস্থাযাঃ স্বযং কৃতত্বাত্| ক ইতি কঃ কৃতী সুকৃতী কৃতকৃত্যো বা স্ববশোঽপরাধীনস্তাদৃশমুক্তপ্রকারেণ নিন্দিতং মদং গচ্ছেত্ প্রাপ্নুযাত্ ন কশ্চিদেবংবিধং প্রাপ্নুযাদিত্যর্থঃ| কমিবেত্যাহ– বহুদোষমিবামূঢঃ কান্তারমিতি; বহুদোষং হিংস্রা ইতি যুক্তং কান্তারং শূন্যমধ্বানং কো মূঢো গচ্ছেদপি তু ন কোঽপি| যদুক্তং চরকে “গচ্ছেদধ্বানমস্বন্তং বহুদোষমিবাধ্বগঃ” ইতি| অস্বন্তমশোভনমনিষ্টফলত্বেন| ননু চরকবিদেহবাগ্ভটদিভিশ্চতুর্থো মদো ন পঠিতঃ, তত্কথং ন বিরোধঃ? উচ্যতে; চরকে যা দ্বিতীযতৃতীযযোরন্তরালাবস্থা পঠিতা, সৈব সুশ্রুতেন তৃতীযো মদ ইতি কৃত্বা পঠিতঃ| কেযমন্তরালাবস্থা? যথোক্তং জ্যোতিঃশাস্ত্রে– “কুম্ভমীনর্ক্ষযোর্মধ্যে যদা চরতি চন্দ্রমাঃ| নাহরেত্তৃণকাষ্ঠানি ন গচ্ছেদ্দক্ষিণাং দিশম্” ইতি| অত্র কুম্ভস্য শেষাংশো মীনস্য প্রথমাংশ এতদ্দ্বযং মধ্যশব্দেনোচ্যতে ইতি সৈবান্তরালাবস্থা| যস্তু চরকে তৃতীযঃ সুশ্রুতে স চতুর্থঃ পঠিত ইত্যবিরোধঃ| বস্তুগত্যা ত্রয এব মদা ইত্যুপপাদিতম্| ননু, কিং কারণকমিদং ত্রৈবিধ্যমিতি চেত্? উচ্যতে– মদ্যং হি বহ্নিতুল্যং, যথা বহ্নিঃ সুবর্ণানামধমমধ্যমোত্তমানামভিব্যঞ্জকঃ, তথা মদ্যমপি প্রাণিনাং সত্ত্বরজস্তমোভূযিষ্ঠানামভিব্যঞ্জকম্| তথা হি চরকঃ– “প্রধানাধমমধ্যানাং রুক্মাণাং ব্যক্তিদর্শকঃ| যথাঽগ্নিরেবং সত্ত্বানাং মদ্যং প্রকৃতিদর্শকম্” ইতি| তস্মাত্প্রথমদ্বিতীযতৃতীযমদাঃ সত্ত্বরজস্তমোভূযিষ্ঠানাং ক্রমেণ ভবন্তীত্যর্থঃ||১০-১১||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অবিধিমদ্যপানস্য বিকারান্তরহেতুত্বমাহ– নির্ভক্তমিত্যাদি| ননু, অযমর্থঃ স্নিগ্ধৈস্তদন্নৈরিত্যাদিনা যদুক্তং তদ্বিপর্যযেণৈব লব্ধঃ, তত্কথং পুনরুচ্যতে? নৈবং, পূর্বং মদ্যপানগুণাভিধানার্থমুক্তম্, ইদং তু কৃচ্ছ্রতমব্যাধিকর্তৃত্বাভিধানার্থমিতি ভেদঃ| যত্পরঃ শব্দঃ স শব্দার্থ ইত্যভিপ্রাযঃ| কষ্টতমান্ বিকারানিতি বক্ষ্যমাণপানাত্যযাদীন্| ভেদং বিনাশং শরীরস্য||১২||

আতঙ্কদর্পণ ব্যাখ্যা (বাচস্পতি বৈদ্য কৃত)

অবিধিমদ্যপানস্য বিকারান্তরহেতুত্বমাহ– নির্ভক্তমিত্যাদি| নির্ভক্তমাহাররহিতম্, একান্ততো নৈরন্তর্যেণ সেব্যমানং, কষ্টতমান্ বক্ষ্যমাণান্ পানাত্যযাদীন্ জনযেত্| শরীরভেদং শরীরবিনাশম্| ননু ‘স্নিগ্ধৈস্তদন্নৈঃ’ ইত্যাদীনাং বিপর্যযেণৈবাযমর্থো লব্ধস্তত্কিং পুনঃ কথনং? নৈবং, পূর্বং মদ্যপানগুণাভিধানার্থমুক্তম্, ইদং তু কৃচ্ছ্রতমব্যাধিকর্তৃত্বাভিধানার্থমুক্তমিতি ভেদঃ||১২||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অন্নসহিতস্যাপি মদ্যস্য ক্রুদ্ধত্বাদিকারণসহিতস্য বিকারকারিত্বপ্রদর্শনার্থমাহ– ক্রুদ্ধেনেত্যাদি| পরিক্ষতেন ক্ষীণেন| অবততং ব্যাপ্তম্| বিবিধান্ বিকারান্ পানাত্যযাদীনিতি||১৩-১৪||

আতঙ্কদর্পণ ব্যাখ্যা (বাচস্পতি বৈদ্য কৃত)

অন্নসহিতস্যাপি মদ্যস্য ক্রুদ্ধত্বাদিকারণসহিতস্য বিকারকারিত্বপ্রদর্শনার্থমাহ– ক্রুদ্ধেনেত্যাদি| ব্যাযামভারাধ্বভিঃ পরিক্ষতেন ক্ষীণেন বেগাবরোধাভিহতেন মূত্রাদীনাং বেগাভিঘাতপীডিতেন| অত্যম্বুভক্ষৈঃ অবততোদরেণ ব্যাপ্তোদরেণ| সাজীর্ণভুক্তেন সাজীর্ণং ভুক্তং যস্য স তথা তেন| অবলেন বলরহিতেন, বলম্ ওজঃ| উষ্ণাভিতপ্তেন ঘর্মসন্তপ্তেন| ঈদৃশেন পুরুষেণ সেব্যমানং বিবিধান্ নানাবিধান্, বিকারান্ পানাত্যযাদীন্ করোতি||১৩-১৪||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

তানেব বিবৃণোতি– পানাত্যযমিত্যাদি| ননু, অযমর্থঃ ‘আপাদযেত্ কষ্টতমান্ বিকারান্’ ইত্যনেনৈবোক্তত্বাত্ কথং পুনরুক্তঃ? উচ্যতে– পূর্বেণ কষ্টতমবিকারকারিত্বমুক্তম্, অনেন তু নানাবিধবিকারকারিত্বমিতি ভেদঃ||১৫||

আতঙ্কদর্পণ ব্যাখ্যা (বাচস্পতি বৈদ্য কৃত)

তানত্র বিকারান্ বিবৃণোতি– পানাত্যযমিত্যাদি| পানাত্যযমিত্যেকো বিকারঃ, পানাজীর্ণমিত্যেকঃ, পানবিভ্রমমিতি চান্যঃ| তেষাং ক্রমেণ লক্ষণং বক্ষ্যামি||১৫||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

তেষামুদ্দিষ্টানাং লক্ষণমাহ– হিক্কেত্যাদি| প্রজাগরো নিদ্রাবিচ্ছেদঃ| বাতপ্রাযমিত্যনেন সর্বে বাতাদিপ্রাযা মদাত্যযাস্ত্রিদোষজাঃ, উদ্ভূতত্বেন ব্যপদেশ ইতি চরকে দর্শিতম্| যদাহ– “যে বিষস্য গুণাঃ প্রোক্তাঃ সর্বদোষপ্রকোপণাঃ|” ইত্যারভ্য যাবত্ “সর্বং মদাত্যযং বিদ্যাত্ত্রিদোষং” (চ. চি. অ. ২৪) ইতি| এবং চরকসংবাদাত্ সুশ্রুতেঽপি বোধ্যম্| বিভ্রমো ভ্রমঃ| হরিতবর্ণস্যেত্যনেন হরিতবর্ণতাঽপি লক্ষণম্||১৬-১৮||

আতঙ্কদর্পণ ব্যাখ্যা (বাচস্পতি বৈদ্য কৃত)

তত্র বাতিকমদাত্যযমাহ– হিক্কেত্যাদি| সর্বে মদাত্যযাস্ত্রিদোষজাঃ, কিং তু ঔদ্ধত্যেন ব্যপদেশঃ| যদুক্তং চরকেণ– “যে বিষস্য গুণাঃ প্রোক্তাঃ সর্বদোষপ্রকোপণাঃ” ইতি| তথা চ– “সর্বং মদাত্যযং বিদ্যাত্ ত্রিদোষজম্” ইতি| প্রজাগরো নিদ্রানাশঃ, শেষং সুগমম্| পৈত্তিকমাহ– তৃষ্ণেত্যাদি| বিভ্রমো বস্তুবিপরীতজ্ঞানম্| হরিতবর্ণস্য পুরুষস্যেতি হরিতবর্ণতা পিত্তলক্ষণং, শেষং সুগমম্| শ্লৈষ্মিকমাহ– ছর্দীত্যাদি| স্তৈমিত্যং নিশ্চলতা| শীতপরীতস্য শীতযুক্তস্য| ত্রিদোষজমাহ– জ্ঞেয ইত্যাদি| সর্বলিঙ্গৈঃ সর্বদোষলক্ষণৈঃ||১৬-১৮||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পরমদমাহ– শ্লেষ্মোচ্ছ্রয ইত্যাদি| শ্লেষ্মোচ্ছ্রযশ্চাত্র নাসাস্রাবাদিনা জ্ঞেযঃ| সক্তিঃ সঙ্গঃ, অপ্রবৃত্তিরিতি যাবত্| তন্দ্রিস্তন্দ্রা| পরস্য মদস্যেতি পরমদস্য; ছন্দোঽনুরোধাদসমাসনির্দেশঃ||১৯||

আতঙ্কদর্পণ ব্যাখ্যা (বাচস্পতি বৈদ্য কৃত)

পরমদমাহ– শ্লেষ্মেত্যাদি| শ্লেষ্মোচ্ছ্রযো নাসাস্রাবাদিনা জ্ঞেযঃ| অঙ্গগুরুতা শরীরগৌরবম্| বিরসাস্যতা মুখস্য বৈরস্যম্| বিণ্মূত্রসক্তিঃ বিণ্মূত্রযোরপ্রবৃত্তিঃ| তন্দ্রিস্তন্দ্রা| পরস্যেতি ছন্দোনুরোধাদসমাসনির্দেশঃ, পরমদস্যেতি জ্ঞেযম্| শিরসি রুজা পীডা, সন্ধিষু ভেদঃ স্ফুটনমিব||১৯||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পানাজীর্ণমাহ– আধ্মানমিত্যাদি| উদ্গিরণং বান্তিঃ, উদ্গারো বা| পানে মদ্যে, অজরাম্ অজীর্ণমুপগচ্ছতি অপক্বত্বমুপগচ্ছতীতি পানাজীর্ণবিকার ইত্যর্থঃ|২০|–

আতঙ্কদর্পণ ব্যাখ্যা (বাচস্পতি বৈদ্য কৃত)

পানাজীর্ণমাহ– আধ্মানমিত্যাদি| উদ্গিরণং বান্তিরুদ্গারো বা| পানে মদ্যে, অজরামজীর্ণং, সমুপগচ্ছতি প্রাপ্তবতি, পানাজীর্ণং ইত্যর্থঃ|২০|–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পানবিভ্রমমাহ– হৃদিত্যাদি| কণ্ঠধূমঃ কণ্ঠাদ্ধূমনির্গমবত্পীডা| শিরোরুজনং শিরঃশূলম্| সুরান্নবিকৃতেষ্বিতি সুরাবিকৃতেষু অন্নবিকৃতেষু চ; ভাবে ক্তঃ| তেষু তেষ্বিতি নানাবিকারেষু সুরামৈরেযপিষ্টকলড্ডুকাদিষু| উশন্তি ইচ্ছন্তি| এতে চ পরমদাদযস্ত্রযো ন চরকে পঠিতাঃ, সন্নিপাতজেঽন্তর্ভূতত্বাত্; সুশ্রুতেন তূক্তত্রিদোষজমদাত্যযাত্ পৃথগেতে পঠিতাঃ, বিকৃত্যা পূর্বলক্ষণবৈলক্ষণ্যাভিধানার্থমিত্যাহুঃ||২০||–

আতঙ্কদর্পণ ব্যাখ্যা (বাচস্পতি বৈদ্য কৃত)

পানবিভ্রমমাহ– হৃদিত্যাদি| হৃদিত্যাদি| হৃদ্গাত্রযোস্তোদঃ ব্যথাবিশেষঃ, কণ্ঠধূমঃ কণ্ঠাদ্ধূমনির্গমবত্পীডা, শিরোরুজনং শিরঃশূলং, প্রদেহঃ শ্লেষ্মলিপ্তমিব মুখম্| সুরাবিকৃতেষু অন্নবিকৃতেষু চ ভাবেষু দ্বেষঃ| তেষু তেষ্বিতি নানাপ্রকারেষু সুরামৈরেযপিষ্টকাদিষু| অখিলেন লক্ষণেন পানবিভ্রমং উশন্তি কথযন্তি| এতে পরমদাদযস্ত্রযো ন চরকে পঠিতাঃ, সন্নিপাতজেঽন্তর্ভূতত্বাত্, সুশ্রুতেন তূক্তত্রিদোষজমদাত্যযাঃ পৃথগেব পঠিতাঃ, পূর্বোক্তলক্ষণবৈলক্ষণ্যাত্||২০||–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অসাধ্যলক্ষণমাহ– হীনেত্যাদি| হীনোত্তরৌষ্ঠং প্রলম্বমানোপরিতনৌষ্ঠম্| অতিশীতং বহিঃ, অমন্দদাহমভ্যন্তরে| তৈলপ্রভাস্যং তৈলাক্তমুখমিব||২১||–

আতঙ্কদর্পণ ব্যাখ্যা (বাচস্পতি বৈদ্য কৃত)

অসাধ্যলক্ষণমাহ– হীনেত্যাদি| হীনোত্তরৌষ্ঠং প্রলম্বমানোপরিতনৌষ্ঠম্| অতিশীতং বহিঃ, অমন্দদাহমভ্যন্তরে; অথবা অতিশীতমমন্দদাহমিতি বিকল্পেন প্রত্যেতব্যম্, একদৈকত্র বিরুদ্ধধর্মদ্বযাসম্ভবাত্; কদাচিদতিশীতং, কদাচিত্তীব্রদাহম্| উল্বণমিতি| তৈলপ্রভাস্যমিতি তৈলাক্তমুখমিব||২১||–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

উপদ্রবানাহ– হিক্কেত্যাদি| এতৈঃ কৃচ্ছ্রসাধ্যং ভবতি, ন ত্বসাধ্যম্; অসাধ্যলক্ষণেভ্যঃ পৃথক্পাঠাদিতি জেজ্জটঃ| ধ্বংসকবিক্ষেপকাখ্যৌ মদ্যবিকারৌ চরকে পৃথক্ পঠিতৌ; তদ্যথা– “বিচ্ছিন্নমদ্যঃ সহসা যোঽতিমদ্যং নিষেবতে| ধ্বংসো বিক্ষেপকশ্চৈব রোগস্তস্যোপজাযতে|| শ্লেষ্মপ্রসেকঃ কণ্ঠাস্যশোষঃ শব্দাসহিষ্ণুতা| তন্দ্রানিদ্রাভিযোগশ্চ জ্ঞেযং ধ্বংসকলক্ষণম্|| হৃত্কণ্ঠরোধঃ সম্মোহশ্ছর্দিরঙ্গরুজা জ্বরঃ| তৃষ্ণা কাসঃ শিরঃশূলমেতদ্বিক্ষেপলক্ষণম্||” (চ. চি. অ. ২৪) ইতি; তৌ চ সুশ্রুতেন “বিচ্ছিন্নমদ্যঃ সহসা যোঽতিমদ্যং নিষেবতে| তস্য পানাত্যযোদ্দিষ্টা বিকারাঃ সম্ভবন্তি হি||” (সু. উ. তং. অ. ৪৭) ইত্যনেন সঙ্গৃহীতৌ বোদ্ধব্যৌ| ন বা চিকিত্সাভেদস্তযোরুক্তঃ; যতশ্চরক এবোক্তবান্– “তযোঃ কর্ম চিকিত্সা চ বাতিকে যন্মদাত্যযে|” (চ. চি. অ. ২৪) ইতি||২২||

আতঙ্কদর্পণ ব্যাখ্যা (বাচস্পতি বৈদ্য কৃত)

উপদ্রবানাহ– জিহ্বেত্যাদি| এতে উপদ্রবাঃ পানহতান্ পুরুষান্ ভজন্তে| অসিতং কৃষ্ণম্, অথবা নীলং চাষপক্ষপ্রতিমম্| রুধিরপ্রভে অতীবরক্তে| হিক্কেত্যাদি| বমথুশ্ছর্দিঃ, বেপথুঃ কম্পঃ| ভ্রমশ্চক্রারূঢস্যেব| এতৈশ্চ কৃচ্ছ্রসাধ্যত্বং ভবতি ন ত্বসাধ্যত্বম্, অসাধ্যলক্ষণেভ্যঃ পৃথক্পাঠাদিতি জেজ্জটঃ| ধ্বংসকবিক্ষেপকাখ্যৌ মদ্যবিকারৌ চরকে পঠিতৌ| তদ্যথা– “বিচ্ছিন্নমদ্যঃ সহসা যোঽতি মদ্যং নিষেবতে| ধ্বংসো বিক্ষেপকশ্চৈব রোগস্তস্যোপজাযতে|| শ্লেষ্মপ্রসেকঃ কণ্ঠরোধঃ সম্মোহশ্ছর্দিরঙ্গরুজা জ্বরঃ| তৃষ্ণাকাসঃ শিরঃশূলমেতদ্বিক্ষেপলক্ষণম্” ইতি| ন বা তযোশ্চিকিত্সাভেদ উক্তঃ, যতশ্চরক এবোক্তবান্– “তযোঃ কর্ম চিকিত্সা চ বাতিকে যন্মদাত্যযে” ইতি||২২||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ইতি শ্রীবিজযরক্ষিতকৃতাযাং মধুকোশব্যাখ্যাযাং পানাত্যযপরমদপানাজীর্ণপানবিভ্রমনিদানং সমাপ্তম্||১৮||

আতঙ্কদর্পণ ব্যাখ্যা (বাচস্পতি বৈদ্য কৃত)

ইতি শ্রীবৈদ্যবাচস্পতিকৃতে আতঙ্কদর্পণাখ্যে রুগ্বিনিশ্চযব্যাখ্যানে পানাত্যপরমদপানাজীর্ণপানবিভ্রমনিদানম্||১৮||