৫৬. মুখরোগনিদানম্

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

রোগগণত্বসামান্যান্মুখরোগনিদানমুচ্যতে– আনূপেত্যাদি| মুখরোগাশ্চ পঞ্চষষ্টির্ভবন্তি| যদাহ ভোজঃ– “দন্তেষ্বষ্টাবোষ্ঠযোশ্চ মূলেষু দশ পঞ্চ চ| নব তালুনি জিহ্বাযাং পঞ্চ সপ্তদশামযাঃ| কণ্ঠে ত্রযঃ সর্বসরা একষষ্টিশ্চতুঃপরা||” ইতি||১||

আতঙ্কদর্পণ ব্যাখ্যা (বাচস্পতি বৈদ্য কৃত)

রোগগণত্বসামান্যান্মুখরোগারম্ভঃ– আনূপেত্যাদি| মুখরোগাঃ পঞ্চষষ্টির্ভবন্তি| যদুক্তং ভোজে– “দন্তেষ্বষ্টাবোষ্ঠযোশ্চ মূলেষু দশ পঞ্চ চ| নব তালুনি জিহ্বাযাং পঞ্চ সপ্তদশামযাঃ|| কণ্ঠে ত্রযঃ সর্বসরা একষষ্টিশ্চতুঃপরাঃ||” ইতি||১|

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

তত্রাষ্টাবোষ্ঠগতানাহ– বাতিকলক্ষণমাহ– কর্কশাবিত্যাদি| দাল্যেতে ইতি বিদার্যেতে| পরিপাট্যেতে ইতি কিঞ্চিদবদীর্ণত্বচৌ ভবত ইত্যর্থঃ||২||

আতঙ্কদর্পণ ব্যাখ্যা (বাচস্পতি বৈদ্য কৃত)

তত্রাষ্টাবোষ্ঠগতান্নির্দিশতি– কর্কশাবিত্যাদি| কর্কশৌ শাকপত্রসদৃশৌ, পরুষৌ রূক্ষৌ, স্তব্ধৌ নিশ্চলৌ| সম্প্রাপ্তানিলবেদনাবিত্যত্র “কৃষ্ণৌ তীব্ররুজান্বিতৌ” ইতি পাঠান্তরম্| দাল্যেতে ইতি বিদার্যেতে, দ্বিধা ভবত ইবেত্যর্থঃ| পরিপাট্যেতে ইতি কিঞ্চিদবদীর্ণত্বচৌ ভবত ইত্যর্থঃ||২||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পৈত্তিকলক্ষণমাহ– চীযেতে ইত্যাদি| সরুজাভিরিতি পিত্তকৃতরুজান্বিতাভিঃ| যদ্যেবং সদাহপাকপিডকাবিতি কিমর্থমুচ্যতে? পূর্বেণৈব গতার্থত্বাত্| নৈবং, পক্ষান্তরপ্রতীত্যর্থং পুনরুচ্যতে| অযমর্থঃ– কদাচিত্ পিত্তরুজান্বিতবহুপিডকাচিতাবোষ্ঠৌ, কদাচিত্ দাহপাকান্বিতপিডকাচিতৌ বা ভবতঃ; অন্যস্ত্বাহ– অনতিভিন্নার্থত্বাদব্যক্তশব্দার্থত্বাচ্চ দাহপাকাতিশযদর্শনার্থং পিডকানুবাদঃ||৩||

আতঙ্কদর্পণ ব্যাখ্যা (বাচস্পতি বৈদ্য কৃত)

পৈত্তিকমাহ– চীযেতে ইত্যাদি| সরুজাভিঃ পিত্তকৃতরুজাভিঃ পিত্তকৃতরুজাচিতাভিঃ, দাহপাকাবপি পিত্তকৃতৌ, তত্কথমুচ্যতে সদাহপাকপিডকাবিতি? নৈবং, দাহপাকাতিশযদর্শনার্থং পিডকানুবাদ ইতি||৩||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

কফজমাহ– সবর্ণাভিরিত্যাদি| সবর্ণাভিরিতি ওষ্ঠসমানবর্ণাভিঃ| অবেদনৌ ঈষদ্বেদনৌ||৪||

আতঙ্কদর্পণ ব্যাখ্যা (বাচস্পতি বৈদ্য কৃত)

শ্লৈষ্মিকমাহ– সবর্ণাভিরিত্যাদি| ওষ্ঠসমানবর্ণাভিঃ, অবেদনৌ ঈষদ্বেদনৌ||৪||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

সান্নিপাতিকলক্ষণমাহ– সকৃদিত্যাদি| সকৃদিতি কদাচিদ্বিকৃতিবশাদেবং ভবতি| অনেকপিডকাচিতাবিতি বাতাদিবেদনান্বিতবহুপিডকৌ, অনেকবর্ণপিডকাচিতাবিত্যন্যে| অনেকাশ্চ বর্ণা বাতাদীনাং কৃষ্ণপীতশ্বেতাঃ, অত্র পক্ষে সকৃত্কৃষ্ণাবিত্যাদিপিডকাতোঽন্যত্র কল্পনীযম্||৫||

আতঙ্কদর্পণ ব্যাখ্যা (বাচস্পতি বৈদ্য কৃত)

সান্নিপাতিকমাহ– সকৃদিত্যাদি| কদাচিদ্বিকৃতিবশাদেবং ভবতি| অনেকপিডকাচিতাবিতি বাতাদিবেদনাচিতবহুপিডকৌ, অনেকবর্ণপিডকান্বিতাবিত্যন্যে||৫||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

রক্তজমাহ– খর্জূরেত্যাদি| খর্জূরফলবর্ণাভিরিত্যনেন বর্ণমাত্রেণৈব সাধর্ম্যং প্রতিপাদ্যতে, যদি তু সর্বাত্মনা সাধর্ম্যমভীষ্টং স্যাত্, তদা ‘খর্জূরফলতুল্যাভিঃ’ ইত্যেবোচ্যেত| রক্তোপসৃষ্টাবিতি রক্তদূষিতৌ||৬||

আতঙ্কদর্পণ ব্যাখ্যা (বাচস্পতি বৈদ্য কৃত)

রক্তজমাহ– খর্জূরেত্যাদি| খর্জূরফলবর্ণাভিরিত্যনেন বর্ণমাত্রেণৈব সাম্যম্, নতু সর্বাত্মনা, অন্যথা খর্জূরফলতুল্যাভিরিত্যেবোচ্যেত| রক্তোপসৃষ্টাবিতি রক্তদূষিতৌ||৬||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

মাংসজমাহ– গুরূ স্থূলাবিত্যাদি| জন্তবশ্চাত্র মূর্ছন্তীতি ক্রিমযোঽপ্যত্র উচ্ছ্রিতা ভবন্তি| উভযতো মুখাদিতি মুখবিবরমপেক্ষ্যোভযভাগযোঃ, সৃক্কণীপ্রদেশযোরিতি যাবত্| মুখাদিতি ল্যব্লোপে পঞ্চমী| ‘উভযতোমুখা’ ইতি পাঠান্তরে উভযসৃক্কণীভাগো মুখমাশ্রযো যেষাং তে তথা| দ্বিমুখা ইত্যন্যে||৭||

আতঙ্কদর্পণ ব্যাখ্যা (বাচস্পতি বৈদ্য কৃত)

মাংসজমাহ– গুরুস্থূলাবিত্যাদি| মুখবিবরমপেক্ষ্যোভযভাগযোঃ সৃক্কিণীপ্রদেশযোরিতি যাবত্| ‘উভযতোমুখাঃ’ ইতি পাঠান্তরং, তত্র দ্বিমুখাঃ জন্তবঃ ক্রিমযোঽপ্যত্র মূর্ছন্তি উচ্ছ্রিতা ভবন্তীত্যর্থঃ||৭||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

মেদোজমাহ– সর্পির্মণ্ডপ্রতীকাশাবিত্যাদি| সর্পির্মণ্ডপ্রতীকাশাবিতি সর্পির্মণ্ডো ঘৃতস্যোপরিতনস্বচ্ছভাগঃ| তত্প্রতীকাশৌ তত্সদৃশৌ| তযোরিতি তাদৃশযোঃ||৮||–

আতঙ্কদর্পণ ব্যাখ্যা (বাচস্পতি বৈদ্য কৃত)

মেদোজমাহ– সর্পিরিত্যাদি| সর্পির্মণ্ডো ঘৃতস্যোপরিতনঃ স্বচ্ছো ভাগঃ, তত্প্রতীকাশৌ তত্সদৃশৌ| তযোরিত্যাদি তাদৃশযোঃ||৮||–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অভিঘাতজমাহ– ক্ষতজাভাবিত্যাদিনা| অত্র কফরক্তযোরপ্যনুবন্ধো বোদ্ধব্যঃ| যদুক্তং ভোজে– “ক্ষতাবভিহতৌ বাঽপি রক্তাবোষ্ঠৌ সবেদনৌ| ভবতঃ সপরিস্রাবৌ কফরক্তপ্রদূষিতৌ||” ইতি| বাযুরপ্যত্রাভিঘাতাল্লভ্যতে, অযং চাভিঘাতজশোথাত্ যথোক্তলক্ষণকারণভেদেন তথা বাতিকৌষ্ঠপ্রকোপাদপি কফরক্তরূপহেতুভেদযোগাদ্ভিদ্যতে||৯||–

আতঙ্কদর্পণ ব্যাখ্যা (বাচস্পতি বৈদ্য কৃত)

অভিঘাতজমাহ– ওষ্ঠাবিত্যাদি| পর্যবদীর্যেতে পাট্যেতে খণ্ডীক্রিযেতে| অত্র কফপিত্তযোরনুবন্ধো জ্ঞাতব্যঃ| যদুক্তং ভোজে– “ক্ষতাবভিহতৌ চাপি রক্তাবোষ্ঠৌ সবেদনৌ| ভবতঃ সপরিস্রাবৌ কফরক্তপ্রদূষিতৌ||” ইতি| বাতজঃ কেবলঃ স্বকারণকুপিতঃ, অত্র তু বাযুরভিঘাতাল্লভ্যতে; তযোরযমেব ভেদঃ| এবমষ্টাবোষ্ঠগতাঃ||৯||–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

দন্তমূলগতান্ পঞ্চদশ ব্যাকরোতি| শীতাদমাহ– শোণিতমিত্যাদি| দন্তবেষ্টেভ্য ইতি দন্তবন্ধনমাংসেভ্যঃ| অকস্মাদিতি অভিঘাতাদিনিমিত্তং বিনা| ‘শীর্যন্ত’ ইত্যস্য স্থানে, ‘পচ্যন্ত’ ইতি গদাধরঃ, ব্যাচষ্টে চ– ‘স্বযম্’ ইতি শেষঃ| পচন্তি চ পরস্পরমিত্যন্যোন্যং পচন্তি, পাকোষ্মদূষিতশোণিতসঞ্চরণেন||১০-১১||

আতঙ্কদর্পণ ব্যাখ্যা (বাচস্পতি বৈদ্য কৃত)

দন্তমূলগতান্ পঞ্চদশ ব্যাকরোতি– শোণিতমিত্যাদি| যস্য দন্তবেষ্টেভ্যঃ দন্তবন্ধনমাংসেভ্যঃ, অকস্মাদিতি অভিঘাতাদিনিমিত্তং বিনা, রক্তং প্রবর্ততে; দন্তমাংসানি দুর্গন্ধীনি ঈষদসিতানি ক্লেদযুক্তানি মৃদূনি চ ভবন্তি, তথা শীর্যন্তে গলন্তি, ‘শীর্যন্ত’ ইত্যস্য স্থানে ‘পচ্যন্তে’ ইতি গদাধরঃ, ব্যাচষ্টে চ ‘স্বযম্’ ইতি শেষঃ| পচন্তি চ পরস্পরমিতি| অন্যোন্যং চ পচন্তি, পাকোষ্মদূষিতশোণিতসংবরণেন| স শীতাদো নাম ব্যাধিরিতি||১০-১১||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

দন্তপুপ্পুটকমাহ– দন্তযোরিত্যাদি| অযং চ দন্তযোস্ত্রিষ্বিত্যভিধানাত্ দ্বিত্রিদন্তনিযতঃ; কফরক্তজত্বেঽপি শৌষিরাদ্ভিন্নোঽযং, রুজালালাস্রাবাভাবাত্||১২||

আতঙ্কদর্পণ ব্যাখ্যা (বাচস্পতি বৈদ্য কৃত)

দন্তপুপ্পুটকমাহ– দন্তযোরিত্যাদি| দন্তযোর্দ্বযোঃ ত্রিষু বাঽনিযতঃ কফরক্তজঃ, শৌষিরাদ্ভিন্নোঽযং রুজালালাভাবাত্||১২||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

দন্তবেষ্টমাহ– স্রবন্তীত্যাদি| স্রবন্তি পূযরুধিরমিত্যত্র ‘দন্তমূলানি’ ইতি শেষঃ| চলা দন্তা ভবন্তি চেতি চকারেণ পচন্তি চেতি দ্রষ্টব্যম্||১৩||

আতঙ্কদর্পণ ব্যাখ্যা (বাচস্পতি বৈদ্য কৃত)

দন্তবেষ্টমাহ– স্রবন্তীত্যাদি| অত্র ‘দন্তমূলানি’ ইতি শেষঃ| চলা দন্তা ভবন্তীতি চেতি চকারেণ পচন্তি ইতি দ্রষ্টব্যং, স ব্যাধির্দন্তবেষ্টো বিজ্ঞেযঃ||১৩||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

শৌষিরলিঙ্গমাহ– শ্বযথুরিত্যাদি| নামত ইতি প্রসিদ্ধিতঃ||১৪||

আতঙ্কদর্পণ ব্যাখ্যা (বাচস্পতি বৈদ্য কৃত)

শৌষিরমাহ– শ্বযথুরিত্যাদি| দন্তমূলেষু শ্বযথুঃ পীডাবান্ কফরক্তোত্থো লালাস্রাবী স শৌষিরো নাম নামতঃ প্রসিদ্ধ ইতি||১৪||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

মহাশৌষিরলিঙ্গমাহ– দন্তা ইত্যাদি| তালু চাপ্যবদীর্যত ইত্যত্র চকারেণ দন্তা ওষ্ঠৌ চাপ্যবদীর্যন্তে ইতি বোদ্ধব্যম্| সপ্তরাত্রাচ্চাযং মারকঃ| যদাহ ভোজঃ– “সদাহো দন্তমূলেষু শোথঃ পিত্তকফানিলাত্| জাতঃ কফং ক্ষপযতি ক্ষীণে তস্মিংস্তু শোণিতম্|| বিবৃদ্ধমনিশং দন্তান্ তাল্বোষ্ঠমপি দারযেত্| মহাশৌষির ইত্যেতত্ সপ্তরাত্রান্নিহন্ত্যসূন্||” ইতি| যস্মিন্ শৌষিরে এবমপি ভবতি, স মহাশৌষির ইতি গদাধরঃ||১৫||

আতঙ্কদর্পণ ব্যাখ্যা (বাচস্পতি বৈদ্য কৃত)

মহাশৌষিরমাহ– দন্তা ইত্যাদি| যস্মিন্ ব্যাধৌ বেষ্টেভ্যো দন্তাশ্চলন্তি, তালু চাপ্যবদীর্যত ইতি অত্র চকারেণ দন্তাবোষ্ঠৌ চাপ্যবদীর্যেতে ইতি ব্যাখ্যানযন্তি| সপ্তরাত্রাচ্চাযং মারকঃ| যদাহ ভোজঃ– “সদাহো দন্তমূলেষু শোফঃ পিত্তকফানিলাত্| জাতঃ কফং ক্ষপযতি ক্ষীণে তস্মিন্সশোণিতম্|| বিবৃদ্ধমনিশং দন্তাস্তাল্বোষ্ঠমপি দারযত্| মহাশৌষির ইত্যেতত্সপ্তরাত্রান্নিহন্ত্যসূন্||” ইতি| সর্বজঃ সর্বদোষজঃ| যস্মিন্ শৌষিরে এবমপি ভবতি, স মহাশৌষির ইতি গদাধরঃ||১৫||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পরিদরমাহ– দন্তমাংসানীত্যাদি| দন্তমাংসস্য পরিদারণাত্ পরিদরসঞ্জ্ঞা||১৬||

আতঙ্কদর্পণ ব্যাখ্যা (বাচস্পতি বৈদ্য কৃত)

পরিদরমাহ– দন্তেত্যাদি| যস্মিন্ মাংসানি শীর্যন্তে, ষ্ঠীবতি চাপ্যসৃগিতি রোগী লোহিতং থূত্করোতীত্যর্থঃ| স ব্যাধিঃ পরিদরো জ্ঞেযঃ| কথম্ভূতঃ? পিত্তাসৃক্কফজঃ| দন্তমাংসপরিদারণাত্পরিদরসঞ্জ্ঞা||১৬||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

উপকুশলক্ষণমাহ– বেষ্টেষ্বিত্যাদি| তাভ্যামিতি দাহপাকাভ্যাম্| সোপকুশ ইতি নির্দেশোঽসিদ্ধত্বানিত্যত্বাত্ সাধুঃ, তেন স উপকুশ ইত্যর্থঃ||১৭||

আতঙ্কদর্পণ ব্যাখ্যা (বাচস্পতি বৈদ্য কৃত)

উপকুশলক্ষণমাহ– বেষ্টেষ্বিত্যাদি| বেষ্টেষু দন্তবেষ্টনমাংসেষু দাহঃ পাকশ্চ স্যাত্| তাভ্যামিতি দাহপাকাভ্যাং দন্তাশ্চলন্তি| ( অঘট্টিতা অচালিতাঃ শোণিতং স্রবন্তি, মন্দরুজঃ রক্তে স্রুতে সতি, তে তস্যাধ্মাযন্তে মুখং পূতি চ ভবতি|) তাভ্যামিত্যত্র ‘তেভ্য’ ইতি পাঠে, তেভ্যো দন্তবেষ্টেভ্যঃ| সোপকুশ ইতি নির্দেশোঽসিদ্ধত্বাত্সাধুঃ, তেনোপকুশ ইত্যর্থঃ||১৭||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

বৈদর্ভলিঙ্গমাহ– ঘৃষ্টেষ্বিত্যাদি| সংরম্ভ ইতি শোথঃ, বেদনাপাকৌ বা||১৮||

আতঙ্কদর্পণ ব্যাখ্যা (বাচস্পতি বৈদ্য কৃত)

বৈদর্ভলিঙ্গমাহ– ঘৃষ্টেষ্বিত্যাদি| দন্তমূলেষু দন্তমাংসেষু দন্তকাষ্ঠাদিনা| ঘৃষ্টেষু সত্সু মহান্ সংরম্ভো জাযতে, সংরম্ভ ইতি শোফঃ বেদনাপাকৌ বা, দন্তাশ্চ চলা ভবন্তি, স ব্যাধিরভিঘাতজো বৈদর্ভাখ্যঃ||১৮||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

খলিবর্ধনলিঙ্গমাহ– মারুতেনেত্যাদি| জাতে রুক্ চ প্রশাম্যতীতি উত্থিতে অধিকে দন্তে প্রভাবাদ্বেদনাযা অভাবঃ||১৯||

আতঙ্কদর্পণ ব্যাখ্যা (বাচস্পতি বৈদ্য কৃত)

খলিবর্ধনলিঙ্গমাহ– মারুতেনেত্যাদি| মারুতেন বাযুনা তীব্রবেদনোঽধিকো দন্তো জাযতে| রুক্ প্রশাম্যতীতি উত্থিতেঽধিকদন্তে প্রভাবাদ্বেদনাযা অভাবঃ| অসৌ বিকারঃ খলিবর্ধনসঞ্জ্ঞঃ||১৯||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

করাললক্ষণমাহ– শনৈরিত্যাদি| করালন্ বিষমান্| করালস্তু সুশ্রুতেঽনুক্তোঽধিকঃ সঙ্গ্রহকারেণ পঠিতঃ, তেন সুশ্রুতোক্তপঞ্চদশসঙ্খ্যাহানিঃ||২০||

আতঙ্কদর্পণ ব্যাখ্যা (বাচস্পতি বৈদ্য কৃত)

করাললক্ষণমাহ– শনৈঃশনৈরিত্যাদি| বাযুর্দন্তসমাশ্রিতঃ সন্ শনৈঃশনৈর্দন্তান্ করালন্বিষমান্ বিকটান্ কুরুতে, স ব্যাধিঃ করাল ন সিদ্ধ্যতি| করালস্তু সুশ্রুতেঽনুক্তোঽধিকঃ সঙ্গ্রহকারেণ পঠিতঃ, তেন ন সুশ্রুতোক্তপঞ্চদশসঙ্খ্যাহানিঃ||২০||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অধিমাংসকমাহ– হানব্য ইত্যাদি| অধিমাংসক ইতি সঞ্জ্ঞাযাং কন্| হানব্য ইতি হনুকুহরে| পশ্চিম ইত্যবসানজে, অন্তজে ইতি যাবত্|২১|–

আতঙ্কদর্পণ ব্যাখ্যা (বাচস্পতি বৈদ্য কৃত)

অধিমাংসকমাহ– হানব্য ইত্যাদি| হনুভবে, পশ্চিম ইতি অবসানজে, অন্তজ ইতি যাবত্|২১|–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পঞ্চ দন্তনাডীরাহ– দন্তেত্যাদি| নাড্যঃ পঞ্চ জ্ঞেযা যথেরিতা ইতি নাডীনিদানে যথোক্তা বাতপিত্তকফসন্নিপাতাগন্তুনিমিত্তাস্তথা দন্তমাংসগতা অপি নাড্যঃ| এতাশ্চ নাডীব্রণসমানলক্ষণা অপি শালাক্যসিদ্ধান্তেন সঙ্খ্যাপূরণায চিকিত্সাভেদাচ্চ পুনরুক্তাঃ||২১||

আতঙ্কদর্পণ ব্যাখ্যা (বাচস্পতি বৈদ্য কৃত)

পঞ্চ দন্তনাডীরাহ– নাড্যঃ পঞ্চ জ্ঞেযা যথেরিতা ইতি নাডীনিদানে যথোক্তা বাতপিত্তকফসন্নিপাতাগন্তুনিমিত্তজাঃ, তথা দন্তমূলগতা অপি নাড্যঃ| এতাশ্চ নাডীব্রণসমানলক্ষণা অপি শালাক্যসিদ্ধান্তেন সঙ্খ্যাপূরণায চিকিত্সিতভেদাচ্চ পুনরুক্তাঃ| তাসাং মধ্যে ত্রিলিঙ্গা নাডী অসাধ্যা||২১||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

দন্তগতানষ্টৌ প্রাহ– দালনমাহ– দীর্যমাণেষ্বিত্যাদি| সদাগতিনিমিত্তজ ইতি সদাগতির্বাযুঃ, তস্মান্নিমিত্তাজ্জাত ইতি| সদাগতিনিমিত্তত ইতি বক্তব্যে সদাগতিনিমিত্তজ ইতি যত্ কৃতং তদ্বলবদ্ধেতুজন্যবাতকৃতত্ববোধনার্থমিতি কার্তিকঃ, কেবলবাতজত্বখ্যাপনার্থমিত্যন্যে ||২২||

আতঙ্কদর্পণ ব্যাখ্যা (বাচস্পতি বৈদ্য কৃত)

দন্তগতানষ্টৌ প্রাহ, তত্র দালনমাহ– দীর্যমাণেষ্বিত্যাদি| দন্তেষু দীর্যমাণেষ্বিব দাল্যমানেষ্বিব ভৃশং রুজা ভবতি, স দালনো নাম ব্যাধিঃ| কথম্ভূতঃ? সদাগতিনিমিত্তজ ইতি সদাগতির্বাযুঃ, তস্মান্নিমিত্তাজ্জাতঃ; সদাগতিনিমিত্ত ইতি বক্তব্যে সদাগতিনিমিত্তজ ইতি যত্ কৃতং, তদ্বলবদ্ধেতুজবাতকৃতত্ববোধনার্থমিতি কার্তিকঃ, কেবলবাতজত্বখ্যাপনার্থমিত্যন্যে| অসাধ্যোঽযং ব্যাধিঃ||২২||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ক্রিমিদন্তকমাহ– কৃষ্ণচ্ছিদ্র ইত্যাদি| কৃষ্ণচ্ছিদ্র ইতি দুষ্টরক্তজক্রিমিকৃতশোথপাকদ্বারেণ কৃষ্ণচ্ছিদ্র ইত্যর্থঃ| অন্যে ‘কৃষ্ণশ্চিত্র’ ইতি পঠন্তি; চিত্র ইতি চিত্রবান্, অর্শআদিত্বাদচ্| স্রাবীতি দন্তমূলেষু স্রাবো বোদ্ধব্যঃ, দন্তানাং নীরসত্বেন স্রাবাভাবাত্| অনিমিত্তরুজ ইতি অবঘট্টনাদিনিমিত্তং বিনৈব মহারুজত্বেন রুজাবানিতি কার্তিকঃ||২৩||

আতঙ্কদর্পণ ব্যাখ্যা (বাচস্পতি বৈদ্য কৃত)

কৃমিদন্তকমাহ– কৃষ্ণেত্যাদি| কৃষ্ণঃ কৃষ্ণদন্তকঃ, ছিদ্র ইতি ছিদ্রবান্, অর্শআদিত্বাদচ্| কৃমিকৃতচ্ছিদ্রত্বাত্সচ্ছিদ্রদন্ত ইত্যর্থঃ| চলশ্চলদন্তঃ| স্রাবী তু দন্তমূলেষু স্রাবো বোদ্ধব্যঃ, দন্তানাং নীরসত্বেন স্রাবাভাবাত্| সসংরম্ভঃ সশ্বযথুঃ| অনিমিত্তরুজ ইতি অবঘট্টনাদিনিমিত্তং বিনৈব মহারুজত্বেন রুজাবানিতি, স তথাবিধো বাতাত্কৃমিদন্তকো জ্ঞেযঃ||২৩||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ভঞ্জনকলক্ষণমাহ– বক্ত্রমিত্যাদি| বক্ত্রং বক্রমিতি দন্তভঙ্গকারিণা দোষেণ বক্ত্রস্যাপি বক্রত্বম্||২৪||

আতঙ্কদর্পণ ব্যাখ্যা (বাচস্পতি বৈদ্য কৃত)

দন্তভঞ্জনলক্ষণমাহ– বক্ত্রমিত্যাদি| যস্মিন্ রোগে দন্তভঙ্গকারিণা দোষেণ বক্ত্রস্যাপি বক্রত্বং ভবেত্ দন্তভঙ্গশ্চ ভবেত্| জাযতে ইত্যত্র ‘তীব্ররুক্’ ইতি পাঠান্তরম্| স ব্যাধির্ভঞ্জনক ইতি খ্যাতঃ| কথম্ভূতঃ? কফবাতকৃতঃ| অসাধ্যোঽযং ব্যাধিঃ||২৪||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

দন্তহর্ষলক্ষণমাহ– শীতেত্যাদি| “শীতমুষ্ণং চ দশনাঃ সহন্তে স্পর্শনং ন চ| যস্য তং দন্তহর্ষং তু ব্যাধিং বিদ্যাত্ সমীরণাত্||” (সু. নি. অ. ১৬) ইতি শ্লোকান্তরং কেচিত্ পঠন্তি| তত্র দন্তহর্ষস্য বাতজত্বেঽপি উষ্ণাসহত্বং ব্যাধিপ্রভাবাত্, কফরক্তাবৃতত্বাদ্বা বোদ্ধব্যম্||২৫||

আতঙ্কদর্পণ ব্যাখ্যা (বাচস্পতি বৈদ্য কৃত)

দন্তহর্ষমাহ– শীতেত্যাদি| যস্য দ্বিজা দন্তাঃ শীতস্য ভক্ষ্যস্য প্রবাতস্য প্রচণ্ডবাতস্যাম্লস্যাসহা অক্ষমা ভবন্তি, স নামতঃ প্রসিদ্ধিতঃ কফমারুতকোপেন দন্তহর্ষো জ্ঞেযঃ| ভক্ষ্য ইত্যত্র “রূক্ষঃ” ইতি পাঠান্তরম্||২৫||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

দন্তশর্করালক্ষণমাহ– মল ইত্যাদি| ‘শর্করেব খরস্পর্শা’ ইত্যস্য স্থানে ‘সা দন্তানাং গুণহরী’ ইতি ক্বচিত্ পঠ্যতে, দন্তানাং গুণস্য শুক্লত্বদৃঢত্বাদিকস্য হরণশীলা||২৬||

আতঙ্কদর্পণ ব্যাখ্যা (বাচস্পতি বৈদ্য কৃত)

দন্তশর্করালক্ষণমাহ– মল ইত্যাদি| যো দন্তগতো মলঃ কফমারুতশোষিতো ভবতি সা দন্তশর্করা| তথা চ বাগ্ভটঃ– “অধাবনান্মলো দন্তে কফবাতেন শোষিতঃ| পূতিগন্ধঃ স্থিরীভূতঃ শর্করা সাঽপ্যুপেক্ষিতা||” ইতি| শর্করেব খরস্পর্শেত্যত্র স্থানে “সা দন্তানাং গুণহরী” ইতি ক্বাপি পঠ্যতে, দন্তানাং গুণস্য শুক্লদৃঢত্বাদিকস্য হরণশীলা||২৬||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

কপালিকালক্ষণমাহ– কপালেষ্বিত্যাদি| কপালেষ্বিবেতি মলসহিতদন্তাবযবেষু কাঠিন্যাত্ কপালতুল্যেষু; দন্তমল এব কঠিনে কপালপ্রাযে দীর্যমাণে সৈব শর্করা কপালিকা| সদেতি বাল্যাদৌ| অত্রাবকাশে হনুমোক্ষঃ সুশ্রুতে দন্তদেশসামীপ্যাদ্দন্তপীডনাচ্চ পঠিতঃ, স ইহ সঙ্গ্রহকারেণ মুখ্যদন্তগতত্বাভাবান্ন পঠিতঃ, পঠিতস্তু হনুগ্রহসঞ্জ্ঞযা বাতব্যাধৌ ভোজবচনাত্| যদুক্তম্– “বাতাভিঘাতাজ্জন্তোর্হি হনুসন্ধির্বিমুচ্যতে| নিরস্তজিহ্বঃ কৃচ্ছ্রেণ ভাষিতং তত্র গচ্ছতি|| সম্যক্ তমনিলব্যাধিং হনুমোক্ষং বিনির্দিশেত্|” ইতি||২৭||

আতঙ্কদর্পণ ব্যাখ্যা (বাচস্পতি বৈদ্য কৃত)

কপালিকালক্ষণমাহ– কপালেষ্বিত্যাদি| দন্তানাং কপালেষু মলসহিতদন্তাবযবেষু কাঠিন্যাত্কপালতুল্যেষু দীর্যমাণেষু সৈব শর্করা কপালিকা জ্ঞেযা| দন্তমূলঃ স চ কঠিনে কপালপ্রাযে দীর্যমাণে ইতি ডল্লনঃ| সদেতি বাল্যাদৌ| দন্তবিনাশিনী| “দলন্তি দন্তবল্কানি যদা শর্করযা সহ” ইতি কেচিত্পঠন্তি, তত্রাপি স এবার্থঃ||২৭||

আতঙ্কদর্পণ ব্যাখ্যা (বাচস্পতি বৈদ্য কৃত)

শ্যাবদন্তকমাহ– য ইত্যাদি| যো দন্তোঽসৃগ্বিমিশ্রেণ পিত্তেনাশেষতো দগ্ধঃ তথা শ্যাবতামথবা নীলতাং গতো ভবতি, স শ্যাবদন্তকো জ্ঞেযঃ| শ্যাবদন্তক ইতি সঞ্জ্ঞাযাং কন্| অসাধ্যোঽযং ব্যাধিঃ| অত্রাবকাশে হনুমোক্ষঃ সুশ্রুতে দন্তদেশসামীপ্যাদ্দন্তপীডনাচ্চ দন্তরোগঃ পঠিতঃ, স ইহ সঙ্গ্রহকারেণ মুখ্যদন্তগতত্বাভাবান্ন পঠিতঃ, পঠিতস্তু সঙ্গ্রহে হনুগ্রহসঞ্জ্ঞযা বাতব্যাধৌ ভোজবচনাত্| যদুক্তম্– “বাতা(ভারা)ভিঘাতাজ্জন্তোর্হি হনুসন্ধির্বিমুচ্যতে| নিরস্তজিহ্বঃ কৃচ্ছ্রেণ ভাষিতং তত্র গচ্ছতি| সম্যক্ তমনিলব্যাধিং হনুমোক্ষং বিনির্দিশেত্||” ইতি||২৮-২৯||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

সম্প্রতি জিহ্বাগতানাহ– জিহ্বাঽনিলেনেত্যাদি| স্ফুটিতেতি মনাগ্বিদীর্ণা| প্রসুপ্তেতি সুপ্তেব, রসস্যানববোধাত্| শাকচ্ছদনপ্রকাশেতি শাকতরুপত্রবত্ কণ্টকাচিতেত্যর্থঃ; শাকো মরুজদ্রুমঃ| পৈত্তিককণ্টকলক্ষণে দহ্যতীতি আত্মনেপদানিত্যত্বাত্ সাধু| অযং চ রোগো জাডীতি খ্যাতঃ||৩০||

আতঙ্কদর্পণ ব্যাখ্যা (বাচস্পতি বৈদ্য কৃত)

সম্প্রতি জিহ্বাগতান্নির্দিশতি| তত্র বাতকণ্টকানাহ– জিহ্বেত্যাদি| অনিলেন জিহ্বা স্ফুটিতেতি মনাগ্বিদীর্ণা ভবেত্, তথা সুপ্তেতি সুপ্তেব রসস্যানববোধাদচেতনেত্যর্থঃ| শাকচ্ছদনপ্রকাশেতি শাকতরুপত্রবত্কণ্টকচিতেত্যর্থঃ| শাকো মরুজদ্রুমঃ| পৈত্তিককণ্টকলক্ষণমাহ– পিত্তেনেত্যাদি| পিত্তেন জিহ্বা পরিদহ্যতে| দহ্যতীতি আত্মনেপদস্যানিত্যত্বাত্ সাধুঃ| তথা সরক্তৈঃ কণ্টকৈর্ব্যাপ্তা| অযং চ রোগো নাডীতি খ্যাতঃ| ‘পিত্তাত্সদাহৈরুপচীযতে তু দীর্ঘৈরিতি পাঠান্তরে পিত্তাজ্জিহ্বা এবংবিধৈঃ কণ্টকৈর্ব্যাপ্যতে| কফকণ্টকানাহ– কফেনেত্যাদি| কফেন দূষিতা জিহ্বা গুর্বী বহুলা স্থূলা শাল্মলিকণ্টকাভৈর্মাংসোচ্ছ্রযৈর্মাংসাঙ্কুরৈশ্চিতা ব্যাপ্তা ভবতীতি সম্বন্ধঃ||৩০||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অলাসমাহ– জিহ্বেত্যাদি| প্রগাঢ ইতি প্রকর্ষেণ গাঢো দারুণ ইত্যর্থঃ| তেন ‘জিহ্বাগতেষ্বলাসস্তু’ ইত্যাদিনা অলাসস্যাসাধ্যতোক্তা সূচ্যতে| কফরক্তমূর্তিরিতি কফরক্তাভ্যাং হেতুভ্যাং লব্ধমূর্তিঃ| কফরক্তজ ইত্যর্থঃ| জিহ্বাস্তম্ভেন বাযুরপ্যত্র বোদ্ধব্যঃ, ভৃশপাকেন পিত্তম্, অতস্ত্রিদোষজো জ্ঞেযঃ; অত এবাস্যানুপক্রমেণাসাধ্যত্বং, কফরক্তযোস্তু প্রাধান্যেনাভিধানম্| ‘অধোগতঃ’ ইতি পাঠান্তরে জিহ্বাযা অধোগতঃ||৩১||

আতঙ্কদর্পণ ব্যাখ্যা (বাচস্পতি বৈদ্য কৃত)

অলাসমাহ– জিহ্বাতল ইত্যাদি| যো জিহ্বাতলে শ্বযথুঃ, সোঽলাসনামা বিকারঃ, স তু শোফঃ প্রবৃদ্ধো জিহ্বাং স্তম্ভযতি, জিহ্বা মূলে ভৃশং পাকং প্রাপ্নোতি| প্রগাঢ ইতি প্রকর্ষেণ গাঢো দারুণ ইত্যর্থঃ| তেন জিহ্বাগতেষ্বলাসস্ত্বিত্যাদিনা অলাসস্যাসাধ্যতোক্তা সূচ্যতে| কফরক্তাভ্যাং লব্ধমূর্তিঃ কফরক্তজ ইত্যর্থঃ, জিহ্বাস্তম্ভেন তু বাযুরপ্যত্র বোদ্ধব্যঃ, ভৃশং পাকেন পিত্তম্, অতস্ত্রিদোষজোঽযম্, অত এবাস্যানুপক্রমেণাসাধ্যত্বং, কফরক্তযোস্তু প্রাধান্যেনাভিধানম্| ‘অধোগতঃ’ ইতি পাঠান্তরে জিহ্বাযা অধোগতঃ||৩১||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

উপজিহ্বিকামাহ– জিহ্বাগ্ররূপ ইত্যাদি| সচোষ ইতি চোষঃ সাক্ষাদগ্নিসম্বন্ধেনেবোপতাপঃ, চোষশ্চাত্র রক্তযোনিনা পিত্তেন||৩২||

আতঙ্কদর্পণ ব্যাখ্যা (বাচস্পতি বৈদ্য কৃত)

উপজিহ্বিকামাহ– জিহ্বেত্যাদি| উন্নম্য ঊর্ধ্বীকৃত্য, এতেন জিহ্বাযা অধো ভবতীত্যুক্তং, জিহ্বাগ্ররূপঃ জিহ্বাগ্রসন্নিভঃ, কফরক্তমূলঃ কফরক্তকারণম্| সচোষ ইতি চোষঃ সাক্ষাদগ্নিসম্বন্ধেনোপতাপঃ, চোষশ্চাত্র রক্তযোনিনা পিত্তেন, ভিষগ্ভিঃ সা উপজিহ্বিকা পঠিতা||৩২||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

তালুগতানাহ| কণ্ঠশুণ্ডীমাহ– শ্লেষ্মাসৃগ্ভ্যামিত্যাদি| ধ্মাতবস্তিপ্রকাশ ইতি বাযুপূরিতচর্মপুটতুল্যঃ||৩৩||

আতঙ্কদর্পণ ব্যাখ্যা (বাচস্পতি বৈদ্য কৃত)

তালুগতানাহ| তত্র গলশুণ্ডিকামাহ– শ্লেষ্মেত্যাদি| শ্লেষ্মরক্তাভ্যাং তালুমূলে প্রবৃদ্ধস্তথা দীর্ঘঃ প্রলম্বঃ শোফঃ কণ্ঠশুণ্ডীতি গলশুণ্ডীতি নাম্নাঽযং ব্যাধিঃ পঠিতঃ| ধ্মাতবস্তিপ্রকাশ ইতি বাযুপূরিতচর্মপুটকতুল্যঃ||৩৩||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

তুণ্ডিকেরীলক্ষণমাহ– শোথ ইত্যাদি| প্রাগুক্তাভ্যামিতি শ্লেষ্মাসৃগ্ভ্যাম্| তুণ্ডিকেরী বনকার্পাসীফলং, তত্তুল্যশোথতযা তুণ্ডিকেরী| তোদদাহাভ্যামিহ বাতপিত্তানুবন্ধো জ্ঞেযঃ|৩৪|–

আতঙ্কদর্পণ ব্যাখ্যা (বাচস্পতি বৈদ্য কৃত)

তুণ্ডিকেরীলক্ষণমাহ– শোফ ইত্যাদি| প্রাগুক্তাভ্যামিতি কফাসৃগ্ভ্যাং, তুণ্ডিকেরী বনকার্পাসীফলং, তত্তুল্যশোফতযা তুণ্ডিকেরী| তোদদাহাভ্যামত্র বাতপিত্তানুবন্ধোঽস্তি|৩৪|–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অধ্রুষলক্ষণমাহ– মৃদুরিত্যাদি| শোণিতোত্থ ইতি রক্তসমুত্থঃ||৩৪||

আতঙ্কদর্পণ ব্যাখ্যা (বাচস্পতি বৈদ্য কৃত)

অধ্রুষলক্ষণমাহ– মৃদুঃ শোথ ইত্যাদি| স্তব্ধাদিলক্ষণঃ শোথঃ অধ্রুষো জ্ঞেযঃ| অধ্রুষ ইতি ছন্দোনুরোধাত্| লোহিতোত্থ ইতি রক্তসমুত্থঃ||৩৪||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

কচ্ছপলক্ষণমাহ– কূর্মোন্নত ইত্যাদি| অবেদন ইত্যল্পবেদনঃ| অশীঘ্রজন্মেতি চিরজঃ|৩৫|–

আতঙ্কদর্পণ ব্যাখ্যা (বাচস্পতি বৈদ্য কৃত)

কচ্ছপলক্ষণমাহ– কূর্মেত্যাদি| কূর্মোত্সন্নঃ কূর্মবদুন্নতঃ, অবেদন ইত্যব্যথঃ, অশীঘ্রজন্মেতি চিরজঃ মন্দানুসারীত্যর্থঃ, অরক্তঃ পাণ্ডুরঃ|৩৫|–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

তাল্বর্বুদমাহ– পদ্মাকারমিত্যাদি| পদ্মাকারমিতি পদ্মকর্ণিকাকারম্| তথাচ ভোজঃ– “উপর্যেব ভবেন্নদ্ধো যথা পদ্মস্য কর্ণিকা| পার্শ্বতশ্চাঙ্কুরৈর্দীর্ঘৈর্নাসা চাপ্যবসীদতি|| শ্লেষ্মরক্তসমুত্থানং তত্তাল্বর্বুদসঞ্জ্ঞিতম্||” ইতি| রক্তজত্বাল্লোহিতম্| প্রোক্তলিঙ্গমিতি পূর্বোক্তরক্তার্বুদতুল্যলিঙ্গমিত্যর্থঃ||৩৫||–

আতঙ্কদর্পণ ব্যাখ্যা (বাচস্পতি বৈদ্য কৃত)

তাল্বর্বুদমাহ– পদ্মাকারমিত্যাদি| তালুমধ্যে উক্তলিঙ্গং শোফং রক্তার্বুদং বিদ্যাত্| কথম্ভূতং? পদ্মাকারং পদ্মকর্ণিকাকারম্| তথা চ ভোজঃ– “উপর্যেব ভবেন্মধ্যে যথা পদ্মস্য কর্ণিকা| পার্শ্বতশ্চাঙ্কুরৈর্দীর্ঘৈর্নাসা চাপ্যবসীদতি|| শ্লেষ্মরক্তসমুত্থানং তালুন্যর্বুদসঞ্জ্ঞিতম্|” ইতি| প্রোক্তলিঙ্গমিতি পূর্বোক্তরক্তার্বুদস্য তুল্যলিঙ্গম্| রক্তজত্বাল্লোহিতম্| অসাধ্যোঽযম্| মাংসসঙ্ঘাতমাহ– দুষ্টমিত্যাদি| অত্র কেচিত্ “দুষ্টং মাংসং শ্লেষ্মণা নীরুজং বা তাল্বন্তঃস্থম্|” ইতি পঠন্তি||৩৫||–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পুপ্পুটমাহ– নীরুগিত্যাদি| পুপ্পুটস্তালুদেশে ইতি তালুপুপ্পুটঃ| তালুশব্দোঽত্র লুপ্তনির্দিষ্টো দ্রষ্টব্যঃ| “তালুশোষস্তু পিত্তাত্” ইতি কেচিত্ পঠন্তি, পিত্তস্যাপি শোষকত্বাত্| কেচিত্তু বক্ষ্যমাণং “পিত্তং কুর্যাত্” ইতি পদমত্রাপি সম্বধ্য শ্বাসশ্চোগ্র ইতি চকারং ভিন্নক্রমেণ যোজযিত্বা বিভক্তিবিপরিণামং চ কৃত্বা পিত্তং তালুশোষং কুর্যাদিতি ব্যাচক্ষতে| কিন্ত্বযং ভোজেঽপি বাতাদেব পঠিতঃ| যদুক্তম্– “তালুশোষো ভবেদ্বাতাত্” ইত্যাদি||৩৬-৩৭||

আতঙ্কদর্পণ ব্যাখ্যা (বাচস্পতি বৈদ্য কৃত)

তালুপুপ্পুটমাহ– নীরুগিত্যাদি| স্থাযী স্থিরঃ, কোলমাত্রঃ কোলসমঃ ‘পুপ্পুট’ ইতি তালুনি দেশে পুপ্পুটঃ তালুপুপ্পুটঃ, তালুশব্দোঽত্র লুপ্তনির্দিষ্টো দ্রষ্টব্যঃ| তালুশোষমাহ– শোষ ইত্যাদি| তালুন্যত্যর্থং শোষঃ, তথা তালু দীর্যতে, তথা উগ্রঃ শ্বাসো ভবতি, সোঽনিলোত্থস্তালুশোষো জ্ঞেযঃ| তালুশোষস্তু পিত্তাদিতি কেচিত্পঠন্তি, পিত্তস্যাপি শোষকারকত্বাত্; কিন্ত্বযং ভোজেঽপি বাতাদেব পঠিতঃ| তদুক্তম্– “তালুশোষো ভবেদ্বাতাদ্বাধির্যং ক্ষ্বেডসংযুতম্” ইতি| বাগ্ভটেন তু বাতপিত্তাভ্যাং তালুশোষঃ পঠিতঃ| তথাহি– “বাতপিত্তজ্বরাযাসৈস্তালুশোষস্তদাহ্বযঃ” ইতি| তালুপাকমাহ– পিত্তমিত্যাদি| সুগমম্||৩৬-৩৭||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

কণ্ঠগতাস্তু রোহিণ্যাদযঃ সপ্তদশোচ্যন্তে, তত্র পঞ্চানাং রোহিণীনাং সামান্যসম্প্রাপ্তিমাহ– গলেঽনিল ইত্যাদি| সর্বরোহিণ্যঃ সন্নিপাতজাঃ, উত্কর্ষাদ্বাতজাদিব্যপদেশঃ| অন্যে তু “পৃথক্ সমস্তাশ্চ তথৈব শোণিতং” ইতি পঠিত্বা সুশ্রুতে একদোষজত্বমপ্যাহুঃ| ভোজেঽপ্যুক্তম্– “ বাতপিত্তকফা রক্তমেকশঃ সর্বশোঽপি বা| কণ্ঠং যদা নিষেবন্তে” ইত্যাদি| নিহন্ত্যসূনিত্যনেন যদ্যপি সামান্যেনাসাধ্যত্বমুক্তং তথাঽপি সপ্তাহাদিনা পৃথগ্দোষত্রযজানামনুপক্রমেণাসাধ্যত্বম্, এবং রক্তজাযা অপি; সন্নিপাতজাযাস্তু জন্মনৈবাসাধ্যত্বম্| তদুক্তং ভোজেন– “তালুঃ শুষ্যতি কণ্ঠশ্চ বাতেনাযাম্যতে যদা| কণ্ঠেঽস্যান্নং প্রসজ্যেত সপ্তাহাত্ স জহাত্যসূন্|| উষ্যতে চুষ্যতে পিত্তাত্ ধূপ্যতে পরিদহ্যতে| অঙ্গারৈরিব জহ্যাত্ স প্রাণানাশু চতুর্দিনাত্||” ইতি| “কফাদন্তর্বহিঃ শোথঃ শ্বাসঃ কণ্ঠশ্চ বাধ্যতে| যস্য সোঽসূন্ ত্যজেদ্রোগী ত্র্যহাদ্রোহিণিপীডিতঃ|| লক্ষণং পিত্তরোহিণ্যা তুল্যং শোণিতজন্মনঃ| সর্বদোষকৃতা যা তু সর্বলিঙ্গসমন্বিতা|| অসাধ্যাং তাং বিজানীযাদ্রোহিণীং সন্নিপাতজাম্| এষা সদ্যো মারযতি তিস্র আদ্যাঃ ক্রিযাং বিনা||” ইতি ক্বচিত্| ভোজে “অন্যা সদ্যো মারযতি” ইতি পাঠঃ, তদা রক্তজাযামপ্যসাধ্যত্বমাযাতি; কিন্ত্বিযং সাধ্যৈব, যদুক্তম্– “লেখ্যাশ্চতস্রো রোহিণ্যঃ” (সু. সূ. অ. ২৫) ইতি| তথা– “সাধ্যানাং রোহিণীনাং তু হিতং শোণিতমোক্ষণম্|” (সু. চি. অ. ২২) ইত্যনেন রক্তজাযা অপি চিকিত্সোক্তা| কিঞ্চ গলগতেষ্বেকৈব রোহিণী সন্নিপাতজা “রোহিণী গলে” ইত্যনেনাসাধ্যোক্তা| ভোজে তু “তিস্র আদ্যাঃ ক্রিযাং বিনা” ইত্যভিধানং ত্রিদোষজত্বেন প্রাধান্যমভিপ্রেত্য, খরনাদেঽপি সন্নিপাতজাযা এব সদ্যোমারকত্বমুক্তম্| যদাহ– “সদ্যস্ত্রিদোষজা হন্তি ত্র্যহাচ্ছ্লেষ্মসমুদ্ভবা| পঞ্চাহাত্ পিত্তসম্ভূতা, সপ্তাহাত্ পবনোত্থিতা||” ইতি||৩৮||

আতঙ্কদর্পণ ব্যাখ্যা (বাচস্পতি বৈদ্য কৃত)

কণ্ঠগতাস্তু রোহিণ্যাদযঃ সপ্তদশোচ্যন্তে, তত্র পঞ্চানাং রোহিণীনাং সামান্যেন সম্প্রাপ্তিমাহ– গল ইত্যাদি| গলেঽনিলো বৃদ্ধঃ, তথা পিত্তকফৌ মূর্ছিতৌ বিদগ্ধৌ, মাংসং প্রদূষ্য তথা শোণিতং প্রদূষ্য , গলোপসংরোধকরৈরঙ্কুরৈরসূন্নিহন্তি, অযং ব্যাধিঃ রোহিণীসঞ্জ্ঞো জ্ঞেযঃ| সর্বা রোহিণ্যঃ সন্নিপাতজাঃ, উত্কর্ষাত্তু বাতজাদিব্যপদেশঃ| অস্মিন্ পাঠে তু সঙ্খ্যা বাতপিত্তকফসম্বন্ধিক্রিযাপদং চ ন বিদ্যতে| তস্মাদন্যে “গলেঽনিলঃ পিত্তকফৌ চ মূর্ছিতৌ পৃথক্সমস্তাশ্চ তথৈব শোণিতম্| প্রদূষ্য মাংসং গলরোধিনোঽঙ্কুরান্সৃজন্তি যান্ সাঽসুহরা তু রোহিণী||” ইতি পঠিত্বা সুশ্রুতে একদোষজত্বমিত্যাহুঃ| পৃথগিতি তিস্রঃ, সমস্তাদেকা, একা শোণিতাত্, এবং পঞ্চ রোহিণ্যঃ| অসুহরাঃ প্রাণহরাঃ| ভোজেঽপ্যুক্তম্– “বাতপিত্তকফা রক্তমেকশঃ সর্বশোঽপি বা| কণ্ঠং যদা নিষেবন্তে প্রদূষ্য চোর্ধ্বমাগতাঃ|| অঙ্কুরাঞ্জনযন্ত্যাশু জিহ্বামূলে সমন্ততঃ| রোহিণীং তাং বিজানীযাদাহুঃ পঞ্চবিধাং তু তাম্||” ইতি||৩৮||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

বাতজাদিভেদেন রোহিণীলক্ষণমাহ– জিহ্বেত্যাদি| জিহ্বাসমন্তাদিতি জিহ্বাযাঃ সর্বত ইত্যর্থঃ| বাতাত্মকোপদ্রবগাঢযুক্তেতি বাতাত্মকা উপদ্রবাঃ কম্পবিনামস্তম্ভাদযস্তৈরতিশযমনুগতাঃ| ত্রিদোষজাযামনিবার্যবীর্যেতি ক্রিযযাঽপি ন নিবার্যং বীর্যমস্যাঃ, সদ্যোমারকত্বাদিত্যর্থঃ| ত্রিতযোত্থিতেতি দোষত্রযোত্থিতা| পিত্তলিঙ্গাতিদেশস্যাব্যবহিতত্বপ্রতীত্যর্থং পিত্তরোহিণ্যনন্তরং রক্তজাযা বক্তুমুচিতাযাঃ শেষেঽভিধানমিতররোহিণ্যপেক্ষযা সুখসাধ্যত্বখ্যাপনার্থমিতি কেচিত্||৩৯-৪১||

আতঙ্কদর্পণ ব্যাখ্যা (বাচস্পতি বৈদ্য কৃত)

বাতিকরোহিণীলক্ষণমাহ– জিহ্বেত্যাদি| যে মাংসাঙ্কুরা জিহ্বাসমন্তাদ্ভবন্তি তে ভৃশবেদনাঃ, তথা কণ্ঠনিরোধনাঃ, সা বাতকৃতা রোহিণী প্রদিষ্টা| জিহ্বাসমন্তাদিতি জিহ্বাযাঃ সর্বত্রেত্যর্থঃ| বাতাত্মকোপদ্রবগাঢযুক্তেত্যাদি বাতাত্মকা যে উপদ্রবাঃ কম্পবিনামস্তম্ভাদযঃ তৈরতিশযমনুগতাঃ| পিত্তজামাহ– ক্ষিপ্রোদ্গমেত্যাদি| সুগমম্| ত্রিদোষজামাহ– গম্ভীরেত্যাদি| ত্রিদোষলিঙ্গা দোষত্রযলিঙ্গযুক্তা, ত্রিতযোত্থিতেতি দোষত্রযোত্থিতা| রক্তজামাহ– স্ফোটৈরিত্যাদি| সুগমম্||৩৯-৪১||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

কণ্ঠশালূকলক্ষণমাহ– কোলেত্যাদি| কণ্টকশূকভূত ইতি কণ্টকবত্ শূকবচ্চ বেদনাজনকঃ, ভূতশব্দঃ উপমানার্থে; কিংবা কণ্টকোপলক্ষিতঃ শূকো জলশূকঃ, স ইব ভূতো জাতঃ| কঠিনগুডকতযা শালূকসমত্বেন কণ্ঠশালূকম্| শালূকং জলোত্পলকন্দম্||৪২||

আতঙ্কদর্পণ ব্যাখ্যা (বাচস্পতি বৈদ্য কৃত)

কণ্ঠশালূকলক্ষণমাহ– কোলেত্যাদি| কণ্টকশূকভূত ইতি কণ্টকবত্কশ্চিচ্ছূকবচ্চ বেদনাজনকঃ, ভূতশব্দ উপমানে; কিংবা– কণ্টকোপলক্ষিতঃ শূকো জলশূকঃ, স ইব ভূতো জাতঃ, কঠিনগুডকতযা পিশিতাঙ্কুরচিতত্বাত্| শালূকং জলোত্পলকন্দম্||৪২||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অধিজিহ্বিকামাহ– জিহ্বাগ্ররূপ ইত্যাদি| জিহ্বোপরিষ্টাদিত্যনেন জিহ্বাতলজাতামুপজিহ্বাং ব্যাবর্তযতি| অপি রক্তমিশ্রাদিতি ন কেবলাত্ কফাদ্ভবতি, কিন্তু রক্তমিশ্রাদেব কফাদিত্যর্থঃ| অপ্যবধারণে| আগতপাকত্বেন পিত্তমপ্যত্র দ্রষ্টব্যম্||৪৩||

আতঙ্কদর্পণ ব্যাখ্যা (বাচস্পতি বৈদ্য কৃত)

অধিজিহ্বিকামাহ– জিহ্বাগ্রেত্যাদি| জিহ্বোপরিষ্টাদিত্যনেন জিহ্বাতলজাতামুপজিহ্বাং ব্যাবর্তযতি, জিহ্বোপরিষ্টাদিত্যত্র ‘জিহ্বাপ্রবন্ধোপরি’ ইতি পাঠান্তরে, জিহ্বাপ্রবন্ধস্যোপরি জিহ্বামূলস্যোপরিষ্টাদিত্যর্থঃ| অপি রক্তমিশ্রাদিতি| ন কেবলাত্ কফাত্ ভবতি, কিন্তু রক্তমিশ্রাদেব কফাদিত্যর্থঃ| অপ্যবধারণে| আগতপাকত্বেন পিত্তমপ্যত্র দ্রষ্টব্যম্||৪৩||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

বলযমাহ– বলাশ এবেত্যাদি| বলাশঃ কফঃ| অন্নগতিমিতি অন্নস্য গতির্যেন স্রোতসা সোঽন্নগতিঃ অন্নবহমার্গঃ, অন্নস্য প্রবেশো বা| কফজোঽপ্যযং প্রভাবাদসাধ্যঃ||৪৪||

আতঙ্কদর্পণ ব্যাখ্যা (বাচস্পতি বৈদ্য কৃত)

বলযমাহ– বলাশ ইত্যাদি| বলাশঃ কফঃ| অন্নগতিমিতি অন্নস্য গতির্যেন স্রোতসা সোঽন্নগতিরন্নবহস্রোতঃ অন্নপ্রবেশো বা, তং নিবার্য আযতমুন্নতং শোফং করোতি, বুধাস্তং সর্বথা অপ্রতিবার্যবীর্যং বিবর্জনীযং বলযাখ্যং ব্যাধিং বদন্তি| কফজোঽপ্যযং স্থানপ্রভাবাত্ স্বভাবাচ্চাসাধ্যঃ||৪৪||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

বলাশলিঙ্গমাহ– গল ইত্যাদি| মর্মচ্ছিদমিতি প্রাণাযতনহৃদযমর্মচ্ছিদম্||৪৫||

আতঙ্কদর্পণ ব্যাখ্যা (বাচস্পতি বৈদ্য কৃত)

বলাশলিঙ্গমাহ– গলে ইত্যাদি| প্রবৃদ্ধৌ শ্লেষ্মানিলৌ শ্বাসরুজাভ্যামুপপত্রং সহিতং শোফং কুরুতঃ, নিপুণা ধীমন্তঃ এনং বিকারং বলাশসঞ্জ্ঞমাহুঃ| কথম্ভূতং? মর্মচ্ছিদমিতি, প্রাণাযতনহৃদযমর্মচ্ছিদম্||৪৫||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

একবৃন্দমাহ– বৃত্তোন্নত ইত্যাদি| অন্তঃশ্বযথুরিতি গলস্যান্তর্মধ্যে| সদাহ ইতি মন্দদাহঃ, সহশব্দ ঈষদর্থে| অপাক্যমৃদুরিতি অপাকী ঈষত্পাকী, অমৃদুরীষন্মৃদুঃ; অন্যে ‘ অপাকমৃদুঃ’ ইতি পঠন্তি, অপাকশ্চাসৌ মৃদুশ্চেতি অপাকমৃদুঃ| বলাশক্ষতজপ্রসূত ইতি কফরক্তভব ইত্যর্থঃ||৪৬||

আতঙ্কদর্পণ ব্যাখ্যা (বাচস্পতি বৈদ্য কৃত)

একবৃন্দমাহ– বৃত্তেত্যাদি| সদাহঃ মন্দদাহঃ, সহশব্দ ঈষদর্থে অপাকী ঈষত্পাকী, অমৃদুরীষন্মৃদুঃ| অন্যে ‘অপাকমৃদুঃ’ ইতি পঠন্তি, অপাকশ্চাসৌ মৃদুশ্চেতি অপাকমৃদুঃ| বলাশক্ষতজপ্রসূত ইতি কফরক্তভবঃ||৪৬||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

বৃন্দমাহ– সমুন্নতমিত্যাদি| বৃন্দমেব পবনানুবিদ্ধং সতোদং স্যাত্| ননু, সপ্তদশ কণ্ঠগতা উক্তাঃ; উক্তং হি– “সপ্তদশামযাঃ কণ্ঠে” ইতি, বৃন্দেন সহাষ্টাদশ স্যুঃ? উচ্যতে– একবৃন্দস্যাবস্থাবিশেষ এব বৃন্দঃ, তুল্যস্থানাকৃতিতো ন সঙ্খ্যাতিরেকঃ; যদ্যপ্যেকবৃন্দঃ কফরক্তজঃ, বৃন্দস্তু পিত্তরক্তজঃ পঠিতঃ, তথা বৃন্দস্যৈব সতোদত্বেন বাতাত্মকত্বমুক্তং, তথাঽপ্যেকবৃন্দস্যাবস্থাবিশেষত্বেন বৃন্দঃ সঙ্গচ্ছত এব; যথা কামলাযাং তদ্ভিন্নহেতুলক্ষণস্যাপি হলীমকস্য সঙ্গ্রহঃ, যথা বাতমদাত্যযেন ধ্বংসকবিক্ষেপকযোরত্যন্তাভেদেঽপি স এব স্যান্ন পুনস্তেন সঙ্গ্রহঃ; ভোজেঽপ্যযমেকবৃন্দজ এব পঠিতঃ| যদাহ– “শ্লেষ্মরক্তসমুত্থানমেকবৃন্দং বিভাবযেত্| তুল্যস্থানাকৃতির্বৃন্দো বৃন্দজো রক্তপিত্তজঃ||” ইতি| বৃন্দজ ইত্যেকবৃন্দজঃ| গদাধরস্তু কারণভেদাত্ ধর্মভেদাচ্চ উত্পন্নত্বেন চৈককার্যকারণযোরভেদপ্রসঙ্গমভিধায বৃন্দশব্দং ছন্দোঽনুরোধাদাদিলোপাদেকবৃন্দ এব বর্ণযতি, তথাচ সতি সমুন্নতমিত্যাদিনা পিত্তানুবন্ধসহিতবহুলরক্তকৃতৈকবৃন্দস্য লক্ষণমুচ্যতে, সতোদং পবনাত্মকং চেত্যনেন চ বাতানুবন্ধৈকবৃন্দলক্ষণমিতি ব্যাখ্যেযম্| পরন্তু বৃন্দজো বৃন্দ ইতি ভোজবচনেনাসঙ্গতমিদং ব্যাখ্যানম্||৪৭||

আতঙ্কদর্পণ ব্যাখ্যা (বাচস্পতি বৈদ্য কৃত)

বৃন্দমাহ– সমুন্নতমিত্যাদি| ননু, সপ্তদশকণ্ঠগতা উক্তাঃ, উক্তং হি– “সপ্তদশামযাঃ কণ্ঠে” ইতি, বৃন্দেন সহাষ্টাদশ স্যুঃ? উচ্যতে– একবৃন্দস্যাবস্থাবিশেষ এব বৃন্দঃ, তুল্যস্থানকৃতিশ্চাতো ন সঙ্খ্যাতিরেকঃ| ভোজেঽপ্যযমেকবৃন্দজ এব পঠিতঃ| যদাহ– “শ্লেষ্মরক্তসমুত্থানমেকবৃন্দং বিভাবযেত্| তুল্যস্থানাকৃতির্বৃন্দো বৃন্দজো রক্তপিত্তজঃ||” ইতি| বৃন্দজে ইত্যেকবৃন্দজ ইতি||৪৭||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

শতঘ্নীলক্ষণমাহ– বর্তিরিত্যাদি| অনেকরুগিতি বাতপিত্তকফজতোদদাহকণ্ড্বাদিবেদনান্বিতেত্যর্থঃ| শতঘ্নিরূপেতি অযঃকণ্টকাচ্ছন্না মহতী শিলা শতঘ্নী, তত্তুল্যা| প্রাণহরীত্যসাধ্যা| ভোজেঽপ্যুক্তম্– “শঙ্কুনেব গলে বিদ্ধা শতঘ্ন্যেষা ন সিধ্যতি|” ইতি||৪৮||

আতঙ্কদর্পণ ব্যাখ্যা (বাচস্পতি বৈদ্য কৃত)

শতঘ্নীলক্ষণমাহ– বর্তিরিত্যাদি| অনেকরুগিতি বাতপিত্তকফজতোদদাহকণ্ড্বাদিবেদনান্বিতেত্যর্থঃ| শতঘ্নিরূপেতি ‘অযঃকণ্টকসঞ্ছন্না শতঘ্নী মহতী শিলা’ তত্তুল্যা| প্রাণহরীত্যসাধ্যা| ভোজেঽপ্যুক্তম্ “বাতপিত্তকফা দুষ্টা মাংসাঙ্কুরসমাচিতাম্| মধ্যকণ্টচযাং বর্তিং জনযন্তি হ্যুপেক্ষিতাঃ|| শঙ্কুনেব গলে বিদ্ধা শতঘ্ন্যেষা ন সিধ্যতি|” ইতি||৪৮||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

গলাযুলক্ষণমাহ– গ্রন্থিরিত্যাদি| কফরক্তমূর্তিরিতি কফরক্তজঃ| সক্তমিবেতি লগ্নমিব| অশনং ভুক্তম্||৪৯||

আতঙ্কদর্পণ ব্যাখ্যা (বাচস্পতি বৈদ্য কৃত)

গলাযুলিঙ্গমাহ– গ্রন্থিরিত্যাদি| সক্তমিবেতি লগ্নমিব, অশনং ভোজনং, সংলক্ষ্যতে, স গলাযুসঞ্জ্ঞো বিকারঃ, স শস্ত্রসাধ্যঃ||৪৯||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

গলবিদ্রধিলিঙ্গমাহ– সর্বমিত্যাদি| তস্যৈব তুল্যঃ খলু সর্বজস্যেতি প্রাগুক্তস্য বিদ্রধেঃ সন্নিপাতজস্য তুল্য ইত্যর্থঃ| স চ স্থানপ্রভাবেণ সন্নিপাতজ এব, চিকিত্সাভেদার্থং চ পুনঃ পঠিতঃ||৫০||

আতঙ্কদর্পণ ব্যাখ্যা (বাচস্পতি বৈদ্য কৃত)

গলবিদ্রধিমাহ– সর্বমিত্যাদি| তস্যৈবেত্যাদিপ্রাগুক্তবিদ্রধেঃ সন্নিপাতজস্য তুল্য ইত্যর্থঃ| অযং চ স্থানপ্রভাবেণ সন্নিপাতজ এব, চিকিত্সাভেদার্থং চ পুনঃ পঠিতঃ||৫০||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

গলৌঘলক্ষণমাহ– শোথ ইত্যাদি| বাযুগতের্নিহন্তেতি অতিমহত্ত্বাদুদানবাযুগতিরোধক ইত্যর্থঃ||৫১||

আতঙ্কদর্পণ ব্যাখ্যা (বাচস্পতি বৈদ্য কৃত)

গলৌঘলক্ষণমাহ– শোফ ইত্যাদি| বাযুগতের্নিহন্তেত্যাদি| অতিমহত্ত্বাদুদানবাযুগতিরোধক ইত্যর্থঃ||৫১||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

স্বরঘ্নলক্ষণমাহ– য ইত্যাদি| তাম্যমান ইতি মূর্ছাং গচ্ছন্, অথবা তমঃ পশ্যন্| শ্বসিতি প্রসক্তমিতি নিরন্তরং শ্বসিতি| শুষ্কবিমুক্তকণ্ঠ ইতি শুষ্কো নীরসো বিমুক্তশ্চাস্বাধীনঃ কণ্ঠো যস্য স তথা| অস্বাধীনতা চ কিমপি গিলিতুমশক্যতযা বোদ্ধব্যা| অনিলাযনেষ্বিতি অনিলমার্গেষু কফরুদ্ধেষু সত্সু, বাযুগতস্রোতসোর্দ্বিত্বেঽপি বহুবচনং প্রতানবহুত্বাত্| শ্বসনাদিতি বাতাত্||৫২||

আতঙ্কদর্পণ ব্যাখ্যা (বাচস্পতি বৈদ্য কৃত)

স্বরঘ্নলক্ষণমাহ– য ইত্যাদি| প্রসক্তমিতি নিরন্তরং নিঃশ্বসিতি, শুষ্কবিমুক্তকণ্ঠ ইতি শুষ্কো নীরসো বিমুক্তশ্চাস্বাধীনঃ কণ্ঠো যস্য স তথা, অস্বাধীনতা চ কিমপি গিলিতুমশক্যতযা বোদ্ধব্যা| কেষু সত্সু? অনিলাযনেষ্বিতি অনিলমার্গেষু কফোপদিগ্ধেষু কফরুদ্ধেষু সত্সু, বাযুবহস্রোতসোর্দ্বিত্বেঽপি বহুবচনং প্রতানবহুত্বাত্| স রোগঃ শ্বসনাত্ বাতাত্ স্বরঘ্নো জ্ঞেযঃ||৫২||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

মাংসতানলিঙ্গমাহ– প্রতানবানিত্যাদি| প্রতানবানিতি বিস্তারবান্| সুকষ্ট ইতি মহাদুঃখপ্রদাযী; ন তু কৃচ্ছ্রসাধ্যঃ, প্রাণপ্রণুদিতি বচনাত্; অথবা পাকতঃ কষ্টসাধ্যঃ, সমস্তগলোপরোধে তু প্রাণপ্রণুত্| ‘স মাংসতানঃ কথিতোঽবলম্বী’ ইত্যস্য স্থানে ‘স মাংসতানেতি বিভর্তি সঞ্জ্ঞাম্’ ইতি পাঠান্তরে মাংসতানেত্যত্র ইতিশব্দেন প্রাতিপদিকার্থস্যোক্তত্বাদ্বিভক্ত্যভাবঃ| ‘বিভর্তি সঞ্জ্ঞাম্’ ইত্যস্য স্থানে ‘নিরুণদ্ধি চেষ্টাম্’ ইতি কার্তিকঃ| অস্মিন্ ব্যাখ্যানে ‘স মাংসতান’ ইত্যস্যানন্তরং ‘খ্যাত’ ইতি দ্রষ্টব্যম্||৫৩||

আতঙ্কদর্পণ ব্যাখ্যা (বাচস্পতি বৈদ্য কৃত)

মাংসতানলিঙ্গমাহ– প্রতানেত্যাদি| প্রতানবানিতি বিস্তারবান্, সুকষ্টঃ মহাদুঃখদাযী নতু কৃচ্ছ্রসাধ্যঃ, প্রাণপ্রণুদিতি বচনাত্; অথবা পাকতঃ কষ্টসাধ্যঃ, সমস্তগলোপরোধে তু প্রাণপ্রণুত্| অবলম্বী লম্বনশীলঃ||৫৩||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

বিদারীলক্ষণমাহ– সদাহতোদমিত্যাদি| বদন ইতি স্বরূপপরমিদম্, অন্তর্গল ইত্যনেনৈব বদনশব্দস্য লব্ধত্বাত্| পার্শ্বে বিশেষাত্ স তু যেন শেতে ইতি স পুরুষো যেন পার্শ্বেন বিশেষাদ্বাহুল্যেন শেতে তস্মিন্নেব পার্শ্বে বিদারী ভবতীত্যর্থঃ| বিশেষগ্রহণাদন্যস্মিন্ পার্শ্বেঽপি সম্ভবোঽস্যাঃ| বিদারীসঞ্জ্ঞা চ মাংসবিদারণেন| ভোজেঽপ্যুক্তম্– “পিত্তেন জাতো বদনে বিকারঃ পার্শ্বে বিশেষাত্ স তু যেন শেতে| স্নাযুপ্রতানপ্রভবো বিশেষাদ্দাহপ্রপাকপ্রচুরো বিদারী||” ইতি||৫৪||

আতঙ্কদর্পণ ব্যাখ্যা (বাচস্পতি বৈদ্য কৃত)

বিদারীলক্ষণমাহ– সদাহেত্যাদি| পূতিবিশীর্ণমাংসং দুর্গন্ধশটিতমাংসম্| বদন ইতি স্বরূপপরমিদং, অন্তর্গলমিত্যনেনৈব বদনসম্বন্ধস্য লব্ধত্বাত্| পার্শ্বে ইত্যাদি স পুরুষো যেন পার্শ্বেন বিশেষাত্ বাহুল্যেন শেতে তস্মিন্ পার্শ্বে বিশেষেণ ভবতীত্যর্থঃ; বিশেষগ্রহণাদন্যপার্শ্বেঽপি সম্ভবোঽস্যাঃ| বিদারীসঞ্জ্ঞা চ মাংসবিদারণেন, ভোজেঽপ্যুক্তম্– “পিত্তেন জাতো বদনে বিকারঃ পার্শ্বে বিশেষাত্ স তু যেন শেতে| স্নাযুপ্রতানপ্রভবো বিশেষাদ্দাহপ্রপাকপ্রচুরো বিদারী||” ইতি||৫৪||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

সর্বসরাস্ত্রযোঽভিধীযন্তে– স্ফোটৈরিত্যাদিনা| মুখগতোষ্ঠাদিসপ্তস্থানব্যাপকতযা সর্বসরত্বং জ্ঞেযম্| স্ফোটৈরিতি বদনমিতি চ উত্তরত্র সম্বন্ধনীযম্| আচিতং ব্যাপ্তম্| সর্বসরা মুখপাকা উচ্যন্তে| কেচিদ্বিদেহক্তরক্তজসর্বসরলক্ষণং পঠন্তি| যথা– “রক্তেন পিত্তোদিত এব চাপি কৈশ্চিত্ প্রদিষ্টো মুখপাকসঞ্জ্ঞঃ|” ইতি| অযং চ পৈত্তিক এবান্তর্ভূত ইতি নেহ দর্শিত ইতি||৫৫||

আতঙ্কদর্পণ ব্যাখ্যা (বাচস্পতি বৈদ্য কৃত)

সর্বসরাস্ত্রযোঽভিধীযন্তে| তত্র বাতজং সর্বসরমাহ– স্ফোটৈরিত্যাদি| আচিতং ব্যাপ্তম্| মুখদন্তৌষ্ঠাদিসপ্তস্থানব্যাপকতযা তেষাং সর্বসরত্বং জ্ঞেযম্| স্ফোটৈরিতি বদনমিতি চোত্তরত্র সম্বন্ধনীযম্| পিত্তজং সর্বসরমাহ– রক্তৈরিত্যাদি| সুগমম্| কফজসর্বসরমাহ– অবেদনৈরিত্যাদি| সুগমম্| সর্বসরা মুখপাকা উচ্যন্তে| কেচিদ্বিদেহক্তরক্তজসর্বসরলক্ষণং পঠন্তি| তদ্যথা– “রক্তেন পিত্তোদিত এব চাপি কৈশ্চিত্প্রদিষ্টো মুখপাকসঞ্জ্ঞঃ|” ইতি| অযং চ পৈত্তিকসর্বসরে প্রদিষ্ট এবেতি নেহ দর্শিতঃ||৫৫||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ওষ্ঠপ্রকোপাদিষ্বসাধ্যানাহ– ওষ্ঠপ্রকোপে বর্জ্যাঃ স্যুরিত্যাদি| ত্রিলিঙ্গগতিশৌষিরাবিতি ত্রিদোষজনাডী ত্রিদোষজশ্চ মহাশৌষিরোঽসাধ্যঃ| রোহিণী গল ইতি ত্রিদোষজা রোহিণী||৫৬-৫৯||

আতঙ্কদর্পণ ব্যাখ্যা (বাচস্পতি বৈদ্য কৃত)

অসাধ্যানাহ– ওষ্ঠেত্যাদি| ওষ্ঠজাস্ত্রযঃ, দন্তমূলে দ্বৌ, দন্তভবেষু ত্রযঃ, জিহ্বাগতেষ্বেকঃ, তালুন্যপ্যেক এব, স্বরঘ্নাদযো নব গলে, সমুদাযসঙ্খ্যা নবদশৈবেতি| ত্রিলিঙ্গগতিশৌষিরাবিতি ত্রিদোষজনাডী ত্রিদোষজশ্চ মহাশৌষিরোঽসাধ্যঃ| বলাশঃ সহ দারিণেতি| বিদার্যা সহ, ছন্দোঽনুরোধাদ্দারিণেতি নির্দেশঃ, রোহিণী গল ইতি ত্রিদোষজা রোহিণী||৫৬-৫৯||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ইতি শ্রীকণ্ঠদত্তকৃতাযাং মধুকোশব্যাখ্যাযাং মুখরোগনিদানং সমাপ্তম্||৫৬||

আতঙ্কদর্পণ ব্যাখ্যা (বাচস্পতি বৈদ্য কৃত)

ইতি শ্রীবাচস্পতিবৈদ্যবিরচিতাযাং মাধবনিদানব্যাখ্যাযামাতঙ্কদর্পণাখ্যাযাং মুখরোগনিদানম্||৫৬||