৫৫. ক্ষুদ্ররোগনিদানম্

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

বিসর্পাদীনামক্ষুদ্রহেতুলক্ষণচিকিত্সিতানামভিধানেন ক্ষুদ্রহেতুলক্ষণচিকিত্সিতানাং ক্ষুদ্ররোগাণাং পারিশেষ্যাত্ ক্ষুদ্ররোগনিদানম্| ননু, যদি ক্ষুদ্রত্বমেষাং হেতুলক্ষণচিকিত্সাল্পত্বেন তর্হি অগ্নিরোহিণীবল্মীকাদীনাং ত্রিদোষজত্বেন হেত্বাদিবাহুল্যাত্ কথং ক্ষুদ্রত্বং? নৈবং, বাহুল্যেন তাবত্, ছত্রিণো গচ্ছন্তীতিবত্; কিংবা অবান্তরভেদবিরহঃ ক্ষুদ্রত্বং, যেনাত্র বক্তব্যানামজগল্লিকাদীনাং ন দোষদূষ্যাদিকৃতভূরিসঙ্খ্যাভেদেন ব্রণজ্বরাদিবান্নির্দেশঃ, কিন্তু প্রত্যেকং স্তোকসঙ্খ্যযাঽভিধানং তেষাম্| অন্যস্ত্বাহ– ক্ষুদ্রশব্দোঽল্পে রৌদ্রে চ বর্ততে, তেন যথাযোগ্যং সর্বত্র ব্যবস্থা দৃশ্যতে; রৌদ্রে ক্ষুদ্রশব্দো যথা– “ক্ষুদ্রা মৃগা যত্র শান্তাশ্চেরুরন্যৈঃ সমং মৃগৈঃ|” ইতি| ক্ষুদ্রাণাং বালানাং রোগাঃ ক্ষুদ্ররোগা ইতি কেচিত্| এবমপ্যজগল্লিকাহিপূতনাদীনামেব পরিগ্রহো ন ত্বন্যেষাম্| সঙ্ক্ষেপেণ চতুশ্চত্বারিংশদ্বিকারানত্র বক্তব্যান্ ক্রমেণ দর্শযতি– স্নিগ্ধেত্যাদি| ভোজে তু মূষিকাকর্ণমুষ্ককোশফলার্শঃপ্রভৃতযোঽধিকবিকারাঃ পঠ্যন্তে, তে চ সুশ্রুতে বিকারস্যানন্ত্যাদনুমতা এব| বালানামিতি প্রাযোভাবিত্বাদুক্তং, তেনাবালানামপি দৃশ্যমানাঃ সঙ্গচ্ছন্তে||১||

আতঙ্কদর্পণ ব্যাখ্যা (বাচস্পতি বৈদ্য কৃত)

ক্ষুদ্ররোগাণাং মসূরিকারম্ভকত্বাদতোঽনন্তরং ক্ষুদ্ররোগনিদানারম্ভঃ| ক্ষুদ্রা লঘবঃ, তিলকালকাভিপ্রাযেণ, অগ্নিরোহিণীবল্মীকপ্রভৃতীনামভিপ্রাযেণ ক্ষুদ্রাঃ তীক্ষ্ণাঃ; অন্যস্ত্বাহ– ক্ষুদ্রশব্দঃ স্বল্পে রৌদ্রে চ প্রবর্ততে, তেন যথাযোগ্যং সর্বত্র ব্যবস্থা দৃশ্যতে, রৌদ্রে চ ক্ষুদ্রশব্দো যথা– “অপি ক্ষুদ্রা মৃগা যত্র শান্তাশ্চেরুঃ সমং মৃগৈঃ” ইতি| ক্ষুদ্রাণাং বালানাং রোগাঃ ক্ষুদ্ররোগা ইতি কেচিত্| অথবা পূর্বাচার্যপঠিতা পারিভাষিকীযং সঞ্জ্ঞা, ক্বাথপাক্যসঞ্জ্ঞাবত্| এষাং সঙ্ক্ষেপেণ চতুশ্চত্বারিংশদ্বিকারা অত্র বক্তব্যাঃ ক্রমেণ দর্শযতি| তেষ্বজগল্লিকামাহ– স্নিগ্ধেত্যাদি| সবর্ণা শরীরসমবর্ণা, গ্রথিতাকারত্বেন ব্যবস্থিতা, প্রাযেণ বালানামন্যেষামপ্যজগল্লিকা ভবতি||১||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

যবপ্রখ্যামাহ– যবাকারেত্যাদি| যবাকারেতি যববন্মধ্যে স্থূলা||২||

আতঙ্কদর্পণ ব্যাখ্যা (বাচস্পতি বৈদ্য কৃত)

যবপ্রখ্যামাহ– যবাকারেত্যাদি| যববন্মধ্যে স্থূলা অন্তর্নিম্না||২||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অন্ত্রালজীমাহ– ঘনামিত্যাদি| অন্ত্রালজী স্নাযুগতা ভোজবচনাদবগন্তব্যা| যদুক্তম্– “শ্লেষ্মানিলৌ শ্রিতৌ স্নাযুং পিডকাং পরিমণ্ডলাম্| দুষ্টৌ জনযতোঽবক্ত্রামল্পপূযামকণ্ডুরাম্|| আমোদুম্বরসঙ্কাশাং বিদ্যাদন্ত্রালজীং তু তাম্||” ইতি||৩||

আতঙ্কদর্পণ ব্যাখ্যা (বাচস্পতি বৈদ্য কৃত)

অন্ত্রালজীমাহ– অন্ত্রালজী বহির্বক্ররহিতা| অন্তর্মুখী স্নায্বাশ্রিতা চ| যদুক্তং ভোজেন– “কফানিলৌ শ্রিতৌ স্নাযুং পিডকাং পরিমণ্ডলাম্| দুষ্টৌ জনযতোঽবক্ত্রামল্পপূযামকণ্ডুরাম্| আমোদুম্বরসঙ্কাশাং বিদ্যাদন্ত্রালজী তু তাম্||” ইতি||৩||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

বিবৃতামাহ– বিবৃতাস্যামিত্যাদি| পিত্তেনাধিকপাকাদ্বিবৃতমুখতাযাং বিবৃতাসঞ্জ্ঞা||৪||

আতঙ্কদর্পণ ব্যাখ্যা (বাচস্পতি বৈদ্য কৃত)

বিবৃতামাহ– বিবৃতাস্যামিত্যাদি| পিত্তেনাধিকপাকাদ্বিবৃতমুখতযা বিবৃতেতি সঞ্জ্ঞা||৪||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

কচ্ছপিকালক্ষণমাহ– গ্রথিতা ইত্যাদি| দারুণাঃ কঠিনাঃ| মধ্যোন্নতত্বেন পর্যন্তাল্পত্বেন চ কচ্ছপিকাসঞ্জ্ঞা||৫||

আতঙ্কদর্পণ ব্যাখ্যা (বাচস্পতি বৈদ্য কৃত)

কচ্ছপিকামাহ– গ্রথিতা ইত্যাদি| দারুণাঃ কঠিনাঃ, মধ্যে উন্নতত্বেন পর্যন্তে নতত্বেন চ কচ্ছপিকাসঞ্জ্ঞা||৫||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

বল্মীকলক্ষণমাহ– গ্রীবাংসেত্যাদি| বল্মীকবদিত্যনেন প্রচুরশিখরত্বেন সমুচ্ছ্রিতত্বং দূরাবগাঢমূলত্বং চ খ্যাপ্যতে| অত এব চিকিত্সাযামবগাঢমূলশোধনার্থমগ্নিক্ষারাভ্যাং চিকিত্সেদিত্যুক্তম্||৬-৭||

আতঙ্কদর্পণ ব্যাখ্যা (বাচস্পতি বৈদ্য কৃত)

বল্মীকমাহ– গ্রীবেত্যাদি| বল্মীকবদিত্যনেন প্রচুরশিখরিত্বমুচ্ছ্রিতত্বং দূরাবগাঢমূলত্বং চ খ্যাপ্যতে, অত এব চিকিত্সাযামবগাঢমূলশোধনায ‘অগ্নিক্ষারাভ্যামুপচরেত্’ ইত্যুক্তম্| নিষ্প্রত্যনীকমসাধ্যম্||৬-৭||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ইন্দ্রবিদ্ধামাহ– পদ্মকর্ণিকবদিত্যাদি| পদ্মকর্ণিকবন্মধ্যে ইতি পদ্মবরাটবত্||৮||

আতঙ্কদর্পণ ব্যাখ্যা (বাচস্পতি বৈদ্য কৃত)

ইন্দ্রবিদ্ধামাহ– পদ্মেত্যাদি| পদ্মকর্ণিকাবত্ মধ্যে পিডকাভিঃ যুক্তাম্||৮||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

গর্দভিকামাহ– মণ্ডলমিত্যাদি| গর্দভিকা যদ্যপি সমানতন্ত্রে ন পঠ্যতে, তথাঽপি সর্বত্র সুশ্রুতেঽভিধীযতে; অবিগীতপাঠেন ব্যবস্থিতৈব||৯||

আতঙ্কদর্পণ ব্যাখ্যা (বাচস্পতি বৈদ্য কৃত)

গর্দভিকামাহ– মণ্ডলমিত্যাদি| বৃত্তং বর্তুলম্| উত্সন্নমুন্নতম্||৯||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পাষাণগর্দভলক্ষণমাহট্ঠ বাতেত্যাদি| স্থিরঃ কঠিনঃ, পাষাণবত্ কাঠিন্যাত্ পাষাণগর্দভঃ| পাষাণগর্দভঃ লোকে ‘গলবট্ট’ ইতি খ্যাতঃ||১০||

আতঙ্কদর্পণ ব্যাখ্যা (বাচস্পতি বৈদ্য কৃত)

পাষাণগর্দভমাহ– বাতেত্যাদি| স্থিরঃ কঠিনঃ||১০||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পনসিকামাহ– কর্ণস্যেত্যাদি| এষা ভোজে ‘সমন্ততঃ’ ইতি বচনাত্ কর্ণস্য বহিরপি ভবতীতি কেচিদ্ব্যাচক্ষতে| যদুক্তম্– “কফবাতৌ প্রকুপিতৌ মাংসমাশ্রিত্য কর্ণযোঃ| সমন্ততঃ পরিস্তব্ধাং কুরুতঃ পিডকাং স্থিরাম্|| বিষমাং দাহসংযুক্তাং বিদ্যাত্ পনসিকাং তু তাম্|” ইতি| তত্তু ন সম্যক্, সমন্তত ইত্যস্য কর্ণাভ্যন্তর এবোপপন্নত্বাত্| দৃশ্যতে বাহ্যরন্ধ্রে শালূকাকারেযমিতি কেচিত্| অস্যাং বাতকফজাযাং ভোজে দাহপাঠো বিকৃতিবিষমসমবাযাদধিষ্ঠানভূতরক্তপ্রভাবাদ্বাঽবগন্তব্যঃ||১১||

আতঙ্কদর্পণ ব্যাখ্যা (বাচস্পতি বৈদ্য কৃত)

পনসিকামাহ– কর্ণস্যেত্যাদি| ভোজে ‘সমন্ততঃ’ ইতি বচনাত্ কর্ণস্য বহিরপি ভবতীতি ব্যাচক্ষতে| যদুক্তম্– “কফবাতৌ প্রকুপিতৌ মাংসমাশ্রিত্য কর্ণযোঃ| সমন্ততঃ পরিস্রাবাং কুরুতঃ পিডকাং স্থিরাম্|| বিষমাং দাহসংযুক্তাং বিদ্যাত্পনসিকাং তু তাম্|” ইতি||১১||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

জালগর্দভলক্ষণমাহ– বিসর্পবদিত্যাদি| অপাকবানিতি ঈষত্পাকবান্, পিত্তকৃতত্বেন সর্বথা পাকাভাবস্যাযুক্তত্বাদিতি চক্রঃ; কিন্তু পাকরহিত এবাযমুপলভ্যতে [ পিত্তাদিত্যুদ্ভূতপিত্তাত্, তেন ভোজোক্তং পিত্তোল্বণদোষত্রযজন্যত্বমস্যাবিরুদ্ধং ভবতি| স যদাহ– “পিত্তোত্কটাস্ত্রযো দোষা জনযন্তি ত্বগাশ্রিতাঃ| শ্যাবং রক্তং তনুং শোথমপাকং বহুবেদনম্|| বিসর্পিণং সদাহং চ তৃষ্ণাজ্বরসমন্বিতম্| বিসর্পমাহুস্তং ব্যাধিমপরে জালগর্দভম্||” ইতি| জতুকর্ণস্ত্বাহ– “ পিত্তাধিকস্তত্র তীব্রদাহো রক্তপাকো বিসর্পজ্বরকরো জালগর্দভঃ|” ইতি| অযমগ্নিবাত ইতি খ্যাতো বিকারঃ||১২||

আতঙ্কদর্পণ ব্যাখ্যা (বাচস্পতি বৈদ্য কৃত)

জালগর্দভমাহ– অপাকবানিত্যাদি| ঈষত্পাকবান্, পিত্তকৃতত্বেন; সর্বথা পাকাভাবস্যাযুক্তত্বাদিতি চক্রঃ; কিন্তু পাকরহিত এবাযমুপলভ্যতে, তেন ভোজক্তং পিত্তোল্বণদোষত্রযজন্যত্বমস্যাবিরুদ্ধং ভবতি| স যদাহ– “পিত্তোত্কটাস্ত্রযো দোষা জনযন্তি ত্বগাশ্রিতাঃ| শ্যাবং রক্তং তনুং শোথমপাকং বহুবেদনম্|| বিসর্পিণং সদাহং চ তৃষ্ণাজ্বরসমন্বিতম্| বিসর্পমাহুস্তং ব্যাধিমপরে জালগর্দভম্|” ইতি||১২||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ইরিবেল্লিকালক্ষণমাহ– পিডকামিত্যাদি| সর্বাত্মিকাং সর্বলিঙ্গামিতি সর্বাত্মিকাং সর্বদোষজাম্| সর্বাত্মিকামিত্যনেনৈব সর্বলিঙ্গত্বে সিদ্ধে পুনঃ সর্বলিঙ্গামিতি বচনং বিকৃতিবিষমসমবাযারব্ধলিঙ্গব্যতিরেকেণ প্রত্যেকদোষলিঙ্গযুক্ততাং খ্যাপযতি||১৩-১৪||

আতঙ্কদর্পণ ব্যাখ্যা (বাচস্পতি বৈদ্য কৃত)

ইরিবেল্লিকামাহ– পিডকামিত্যাদি| উত্তমাঙ্গস্থাং শিরোগতাম্| সর্বাত্মিকামিত্যনেনৈব সর্বলিঙ্গত্বং সিদ্ধং, পুনঃ সর্বলিঙ্গামিতি গ্রহণং বিকৃতিবিষমসমবাযারব্ধলিঙ্গব্যতিরেকেণ প্রত্যেকদোষলিঙ্গযুক্ততাং খ্যাপযতি| কক্ষামাহ– বাহ্বিত্যাদি| কক্ষামিতি নামতঃ প্রসিদ্ধাম্||১৩-১৪||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

গন্ধমালামাহ– একামিত্যাদি| একামেতাদৃশীমিতি কক্ষোক্তৈককৃষ্ণস্ফোটসদৃশীম্||১৫||

আতঙ্কদর্পণ ব্যাখ্যা (বাচস্পতি বৈদ্য কৃত)

গন্ধমালানাম্নীমাহ– একামিত্যাদি| স্ফোটসদৃশীম্||১৫||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অগ্নিরোহিণীলক্ষণমাহ– কক্ষেত্যাদি| সপ্তাহাদ্বা দশাহাদ্বেত্যভিধানমসাধ্যত্বখ্যাপকমনুপক্রমাদ্বোদ্ধব্যম্| উপক্রমাত্ পুনরিযং সাধ্যৈব, অত এবাস্যাশ্চিকিত্সাভিধানং; চরকেণাপ্যগ্নিরোহিণীং প্রত্যভিহিতম্– “সন্তি হ্যেবংবিধা রোগাঃ সাধ্যা দারুণসম্মতাঃ| যে হন্যুরনুপক্রান্তা মিথ্যারম্ভেণ বা পুনঃ||” (চ. সূ. অ. ১৮) ইতি| তন্ত্রান্তরমপি– “পিত্তরক্তোত্কটা দোষাঃ প্রদীপ্তাঙ্গারসন্নিভান্| কক্ষভাগেষু কুর্বন্তি তীব্রদাহরুজাজ্বরান্|| মাংসাবদারণান্ স্ফোটান্ যে হন্যুরনুপক্রমাত্| পক্ষাদ্দশাহাদর্বাগ্বা সা জ্ঞেযা বহ্নিরোহিণী||” ইতি| বাতপিত্তকফাধিক্যাদ্যথাক্রমং সপ্তাহাদিবিকল্পঃ||১৬-১৭||

আতঙ্কদর্পণ ব্যাখ্যা (বাচস্পতি বৈদ্য কৃত)

অগ্নিরোহিণীমাহ– কক্ষেত্যাদি| অস্যামসাধ্যত্বমনুক্রমাদ্বোদ্ধব্যম্, উপক্রমাত্পুনরিযং সাধ্যা; অত এবাস্যাশ্চিকিত্সাভিধানং চরকেণাপ্যগ্নিরোহিণী প্রত্যভিহিতম্– “সন্তি হ্যেবংবিধা রোগাঃ সাধ্যা দারুণসম্মতাঃ| যে হন্যুরনুপক্রান্তা মিথ্যাচারেণ বা পুনঃ||” ইতি| তন্ত্রান্তরমপি– “রক্তপিত্তোত্কটা দোষাঃ প্রদীপ্তাঙ্গারসন্নিভান্| কক্ষাভাগেষু কুর্বন্তি তীব্রদাহরুজাজ্বরান্|| মাংসাবদারণান্ স্ফোটান্ যে হন্যুরনুপক্রমাত্| পক্ষাদ্দশাহাদর্বাগ্বা সা জ্ঞেযা বহ্নিরোহিণী||” ইতি| বাতপিত্তকফাধিক্যাদ্যথাক্রমং সপ্তাহাদিবিকল্পঃ; তেন বাতাধিকৈঃ সপ্তাহাত্ পিত্তাধিকৈর্দশাহাত্কফাধিকৈঃ পক্ষাদিত্যূহ্যম্||১৬-১৭||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

চিপ্পমাহ– নখেত্যাদি| তং ব্যাধিং চিপ্পমিতি চিপ্পমঙ্গুলীবেষ্টকমিতি খ্যাতম্| চরকে ত্বক্ষতনামাযং বিকারঃ| যদুক্তম্– “রোগোঽক্ষতশ্চর্মনখান্তরে স্যান্মাংসাস্রদোষী ভৃশদাহপাকঃ|” (চ. চি. অ. ১২) ইতি||১৮-১৯||

আতঙ্কদর্পণ ব্যাখ্যা (বাচস্পতি বৈদ্য কৃত)

চিপ্পমাহ– নখমাংসেত্যাদি| তন্ত্রান্তরেঽঙ্গুলীবেষ্টকমিতি খ্যাতম্| চরকে ত্বক্ষতনামাযং বিকারঃ| যদুক্তম্– “রোগোঽক্ষতশ্চর্মনখান্তরে স্যান্মাংসাস্রদোষাদ্ভৃশদাহপাকঃ|” ইতি| অন্যে তু “তমেবাক্ষতরোগাখ্যং তথোপনখমিত্যপি” ইত্যধিকং গ্রন্থমধীযতে| তদেব চিপ্যমিতি| সুগমম্||১৮-১৯||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অনুশযীলক্ষণমাহ– গম্ভীরামিত্যাদি| গম্ভীরামিত্যন্তঃপাকেন| অল্পসংরম্ভামিত্যল্পশোথাম্||২০||

আতঙ্কদর্পণ ব্যাখ্যা (বাচস্পতি বৈদ্য কৃত)

অনুশযীমাহ– গম্ভীরামিত্যাদি| অন্তঃপাকেন গম্ভীরাম্| অল্পসংরভামিতি স্বল্পশোথাম্| “কফাদন্তঃপ্রপাকান্তাং বিদ্যাদনুশযীং ভিষক্” ইতি কেচন পাঠং পঠন্তি; তদা উপরিস্থিতাং মস্তকে স্থিতামিতি ব্যাচক্ষতে||২০||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

বিদারীলক্ষণমাহ– বিদারীত্যাদি| ‘বিদারিকা ভবেদ্রক্তা সর্বজা সর্বলক্ষণা’ ইত্যত্র কেচিদসর্বজা, অসর্বলক্ষণেতি উভযত্রাপি নঞঃ প্রযোগমিচ্ছন্তি; তেনাসর্বজা ইতি সর্বদোষৈঃ সন্নিপতিতৈর্ন ভবতি, অসর্বলক্ষণেতি সন্নিপাতলক্ষণরহিতেত্যর্থঃ| তেন প্রত্যেকদোষদ্বন্দ্বজত্বেন ষড্বিধা সন্নিপাতমাত্রেণ ন ভবতীতি বাক্যার্থঃ| কিন্ত্বযং পক্ষো যদ্যভিমতঃ স্যাদাচার্যস্য, তদা ব্যক্ত্যর্থং ‘ষড্বিধা দ্ব্যেকদোষজা’ ইতি পদং কৃতং স্যাত্; কিঞ্চ বহুপ্রপঞ্চত্বেন ক্ষুদ্রত্বাসঙ্গতিশ্চ| অপরে ‘ সর্বজা সর্বলক্ষণা’ ইতি পঠন্তি; তদপি ন সঙ্গতং, সর্বৈর্দোষৈর্ন ভবতি অথ সর্বদোষলক্ষণা ভবতি হন্ত তর্হি লিঙ্গিনমন্তরেণ লিঙ্গপ্রাদুর্ভাবপ্রসঙ্গঃ| অন্যে তূত্তরপদ এব নঞঃ প্রযোগাত্ ‘সর্বজাঽসর্বলক্ষণা’ ইতি বদন্তি; তত্র যদি সর্বেষাং লক্ষণানি সর্বলক্ষণানি তান্যবিদ্যমানানি যস্যামিতি, তদা কথং লিঙ্গমন্তরেণ লিঙ্গিনঃ পরোক্ষস্য পরিচ্ছেদোদযঃ| অথ সর্বাণি চ তানি লক্ষণানি অবিদ্যমানানি যস্যামিতি, সন্নিপাতজত্বেঽপ্যসম্পূর্ণলক্ষণেত্যর্থঃ| এতদপি ন সঙ্গতং, যদ্যযং পক্ষোঽভীষ্টঃ স্যাত্তদাঽসর্বলক্ষণেতি ন বক্তব্যমত্র স্যাত্, সর্বত্র ন্যাযস্যাস্য সমানত্বাত্; হেত্বনুরূপকোপবলেন হি সর্বত্র সর্বার্ধাল্পলিঙ্গসঙ্গতিঃ; অসম্পূর্ণলক্ষণত্বেন দোষাণাং হীনবলত্বং সমবৃদ্ধানামনারম্ভকত্বং বা শক্যমেবাস্মিন্ পক্ষে বক্তুং, কিন্তু তন্নাদ্রিযন্তে; ততশ্চোভযত্রাপি নঞঃ প্রযোগং বিনা ‘সর্বজা সর্বলক্ষণা’ ইতি পাঠো যুক্তঃ| সর্বজেত্যভিধাযাপি সর্বলক্ষণেতি বচনমিরিবেল্লিকাযামিব প্রকৃতিসমসমবাযজন্যবাতাদিলক্ষণদর্শনার্থং, তেন বিকৃতিবিষমসমবাযজন্যাসাধ্যত্বাদিলক্ষণানি ন ভবন্তি| অস্মিন্নপি পাঠে সর্বজা সর্বৈরেকাদিপ্রকারৈর্বাতাদিভির্জন্যতে, এবং সর্বলক্ষণেতি বক্তুং পার্যতে, কিন্তু ক্ষুদ্ররোগত্বাদ্দোষভেদেন গণনা ন যুক্তা| চরকে ত্বিযং কফমারুতজা পঠ্যতে| যদুক্তম্– “জ্বরান্বিতা বঙ্ক্ষণকক্ষসন্ধৌ বর্তির্নিরর্তিঃ কঠিনা মতা যা| বিদারিকা সা কফমারুতাভ্যাম্|” (চ. চি. অ. ১২) ইতি| তেনাত্রাপ্যল্পপিত্তযুক্তকফবাতজত্বেন সর্বজত্বং জ্ঞেযম্| যথা– জ্বরযোগেনাল্পপিত্তত্বম্| যদুক্তম্– “ঊষ্মা পিত্তাদৃতে নাস্তি জ্বরো নাস্ত্যূষ্মণা বিনা|” (বা. চি. অ. ১) ইতি, “বিদারীমিতি তাং বিদ্যাত্ সর্বজাং সর্বলক্ষণাম্|” ইতি পাঠান্তরে ন কশ্চিদ্ব্যাখ্যানপ্রপঞ্চঃ||২১||

আতঙ্কদর্পণ ব্যাখ্যা (বাচস্পতি বৈদ্য কৃত)

বিদারিকালক্ষণমাহ– বিদারীত্যাদি| সর্বজা সর্বলক্ষণেত্যত্র কেচিদসর্বজা অসর্বলক্ষণেত্যুভযত্রাপি নঞঃ প্রযোগমিচ্ছন্তি, তেনাসর্বজেতি সর্বৈর্দোষৈঃ সন্নিপতিতৈনং ভবতি, অসর্বলক্ষণেতি সন্নিপাতলক্ষণরহিতেত্যর্থঃ| তেন প্রত্যেকদোষদ্বন্দ্বজত্বেন ষড্বিধা ন সন্নিপাতমাত্রেণ ভবতীতি বাক্যার্থঃ| কিন্ত্বযং যদি পক্ষোঽভিমত আচার্যস্য স্যাত্, তদা ব্যক্ত্যর্থং ষড্বিধা দ্ব্যেকদোষজেতি পদং কৃতং স্যাত্| কিঞ্চ, বহুপ্রপঞ্চত্বেন ক্ষুদ্রত্বাসঙ্গতিশ্চ| অপরে “ (অ)সর্বজা সর্বলক্ষণা” ইতি পঠন্তি, তদপি ন সঙ্গতং ন সর্বৈর্দোষৈর্ভবতীতি| অথ সর্বদোষলক্ষণা ভবতি হন্ত তর্হি লিঙ্গিনমন্তরেণ লিঙ্গপ্রাদুর্ভাবপ্রসঙ্গঃ| অন্যে তু উত্তরপদ এব নঞঃ প্রযোগাত্ “সর্বজা (অ)সর্বলক্ষণা” ইতি পঠন্তি| তত্র যদি সর্বেষাং লক্ষণানি সর্বলক্ষণানি তান্যবিদ্যমানানি যস্যামিতি; তদা কথং লিঙ্গমন্তরেণ লিঙ্গিনঃ পরোক্ষস্য পরিচ্ছেদোদযঃ| অথ সর্বাণি চ তানি লক্ষণানি চ তানি অবিদ্যমানানি যস্যাম্| সন্নিপাতজত্বেঽপ্যসম্পূর্ণলক্ষণেত্যর্থঃ| এতদপি ন সঙ্গতং, যদ্যপ্যযং পক্ষোঽভীষ্টঃ স্যাত্তদা অসর্বলক্ষণেতি ন বক্তব্যমত্র স্যাত্, সর্বত্র ন্যাযস্য সমানত্বাত্| তদুক্তম্– “দোষে বিবদ্ধে নষ্টেঽগ্নৌ সর্বসম্পূর্ণলক্ষণাঃ|” ইতি| হেত্বনুরূপকোপবলেন হি সর্বত্র সর্বার্ধাল্পলিঙ্গসঙ্গতিঃ| অসম্পূর্ণলক্ষণত্বেন দোষাণাং হীনবলত্বং সমবৃদ্ধানামনারম্ভকত্বং বা শক্যমেবাস্মিন্পক্ষে বক্তুং, কিন্তু তন্নাদ্রিযন্তে, ততশ্চোভযত্রাপি নঞঃ প্রযোগং বিনা “সর্বজা সর্বলক্ষণা” ইতি পাঠো যুক্তঃ| সর্বজেত্যভিধাযাপি সর্বলক্ষণেতি বচনমিরিবেল্লিকাযামিব প্রকৃতিসমসমবাযজন্যবাতাদিলক্ষণদর্শনার্থং, তেন বিকৃতিবিষমসমবাযজন্যাসাধ্যত্বাদিলক্ষণানি ন ভবন্তি| অস্মিন্নপি পাঠে সর্বজা সর্বৈরেকাদিপ্রকারৈর্বাতাদিভির্জন্যতে, এবং সর্বলক্ষণেতি চ বক্তুং পার্যতে, কিন্তু ক্ষুদ্ররোগত্বাদ্দোষভেদেন গণনা ন যুক্তা| চরকে ত্বিযং কফমারুতজা পঠ্যতে| যদুক্তম্– “জ্বরান্বিতা বঙ্ক্ষণকক্ষসন্ধৌ বর্তির্নিরর্তিঃ কঠিনা মতা বা| বিদারিকা সা কফমারুতাভ্যাম্” ইতি| তেনাত্রাপ্যল্পপিত্তযুক্তকফবাতজত্বেন সর্বজত্বং জ্ঞেযম্| জ্বরযোগেনাল্পপিত্তত্বং চরকে দ্রষ্টব্যম্| যদুক্তম্– “ঊষ্মা পিতাদৃতে নাস্তি জ্বরো নাস্ত্যূষ্মণা বিনা” ইতি| “বিদারীমিতি তাং বিদ্যাত্সর্বজাং সর্বলক্ষণাম্” ইতি পাঠান্তরে ন কশ্চিদ্ব্যাখ্যানপ্রসঙ্গঃ||২১||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

শর্করামাহ– প্রাপ্যেত্যাদি| ইযমেব শর্করার্বুদস্য হেতুঃ| অস্যাং কফানিলৌ দোষৌ, মাংসসিরাস্নাযুমেদাংসি দূষ্যাণি| অনিলস্তত্র বৃদ্ধিং গত ইতি পূর্বমেব তাবদ্বৃদ্ধোঽনিলো ধাতুক্ষযেণ বৃদ্ধিমতিশযেন গতো মাংসং বিশোষ্য কাঠিন্যাত্ শর্করাতুল্যাং শর্করাং জনযতি অতঃ শর্করাযাস্তুল্যং শর্করার্বুদং ভবতি| দুর্গন্ধি ক্লিন্নমিত্যাদিনা শর্করোত্পন্নং শর্করার্বুদলক্ষণং, শর্করার্বুদং চ শর্করাবস্থৈবেত্যেক এবাযং বিকারঃ; তেন ন সঙ্খ্যাতিরেকঃ| নানাবর্ণমিতি ঘৃতমেদোবসাবর্ণং রক্তম্| তত ইতি শর্করার্বুদাদেব| ভোজেঽপি পঠ্যতে– “তমেব ভিন্নং দুর্গন্ধং ঘৃতমেদোনিভং সিরাঃ| স্রবন্তি স্রাবমনিশং তদা স্যাচ্ছর্করার্বুদম্||” ইতি| তমেবেতি গ্রন্থিম্||২২-২৪||

আতঙ্কদর্পণ ব্যাখ্যা (বাচস্পতি বৈদ্য কৃত)

শর্করামাহ– প্রাপ্যেত্যাদি| অস্যাং কফানিলৌ দোষৌ, মাংসসিরাস্নাযুমেদাংসি দূষ্যাণি, অনিলস্তত্র বৃদ্ধিং গত ইতি পূর্বমেব তাবদ্বৃদ্ধোঽনিলো ধাতুক্ষযাত্ পুনর্বৃদ্ধিমতিশযং গতঃ মাংসং বিশোষ্য কাঠিন্যাত্ শর্করাতুল্যাং শর্করাং জনযতি| শর্করা পাষাণকর্করঃ| শর্করার্বুদমাহ– দুর্গন্ধীত্যাদি| শর্করার্বুদং শর্করৈর্বার্বুদত্বেনাবস্থিতেত্যেক এবাযং বিকারঃ, তেন ন সঙ্খ্যাতিরেকঃ| নানাবর্ণমিতি ঘৃতমেদোবসাবর্ণং যুক্তম্, তত ইতি শর্করার্বুদদেশে, অত্র সপ্তম্যর্থে পঞ্চমী, ভোজেঽপি পঠ্যতে– “তমেব ভিন্নং দুর্গন্ধং ঘৃতমেদোনিভং সিরাঃ| স্রবন্তি স্রাবমনিশং তদা স্যাচ্ছর্করার্বুদম্||” ইতি| তমেবেতি গ্রন্থিম্||২২-২৪||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পাদদারীমাহ– পরিক্রমণশীলস্যেত্যাদি| পরিক্রমণং পাদবিহরণং, দারী দারণমাত্রং, বিপাদিকাকুষ্ঠং তু পিডকা সবিদারণেতি ভেদঃ||২৫||

আতঙ্কদর্পণ ব্যাখ্যা (বাচস্পতি বৈদ্য কৃত)

পাদদারীমাহ– পরিক্রমণশীলস্যেত্যাদি| পাদবিহরণশীলস্য দারী বিদরণমাত্রং, বিপাদিকাকুষ্ঠং তু পিডকানাং বিদরণমিতি ভেদঃ||২৫||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

কদরমাহ– শর্করোন্মথিত ইত্যাদি| কদরং কোলাষ্ঠীতি খ্যাতম্| ‘কোলবত্’ ইত্যস্য স্থানে ‘কীলবত্’ ইতি পাঠান্তরম্| কদরং হস্তেঽপি ভবতি| তথাচ ভোজঃ– “হস্তযোঃ পাদযোশ্চাপি গম্ভীরানুগতং খরম্| মাংসকীলং জনযতঃ কুপিতৌ কফমারুতৌ|| সশল্যমিব তং দেশং মন্যতে তেন পীডিতঃ| শর্করাকদরং কেচিন্মন্যন্তে বাতকণ্টকম্||” ইতি| কোলবদিতি বদরবত্||২৬||

আতঙ্কদর্পণ ব্যাখ্যা (বাচস্পতি বৈদ্য কৃত)

কদরমাহ– শর্করেত্যাদি| পাদে শর্করা ঘটকর্পরখণ্ডাদযঃ, তাভিরুন্মথিতে পীডিতে কণ্টকাদিভির্বা ক্ষতে কোলবদুত্সন্নো গ্রন্থির্জাযতে, তত্কদরং নাম; ‘কোলবত্’ ইতি স্থানে ‘কীলবত্’ ইতি পাঠান্তরম্| কদরং হস্তেঽপি ভবতি| যদুক্তং ভোজেন– “হস্তযোঃ পাদযোশ্চাপি গম্ভীরানুগতং খরম্| মাংসকীলং জনযতঃ কুপিতৌ কফমারুতৌ|| সশল্যমিব তং দেশং মন্যতে তেন পীডিতঃ| শর্করাকদরং কেচিন্মন্যন্তে বাতকণ্টকম্||” ইতি| কোলবত্ বদরবত্||২৬||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অলসকলক্ষণমাহ– ক্লিন্নেত্যাদি| অযং কফরক্তজো বিকারঃ ‘পাকুযা’ ইতি খ্যাতঃ| অত্র কণ্ডূঃ কফস্য, দাহরুজে রক্তস্য||২৭||

আতঙ্কদর্পণ ব্যাখ্যা (বাচস্পতি বৈদ্য কৃত)

অলসকলক্ষণমাহ– ক্লিন্নেত্যাদি| অযং চ কফরক্তজো বিকারঃ; তত্র কণ্ডূঃ কফস্য, দাহরুজে রক্তস্য||২৭||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ইন্দ্রলুপ্তস্য লক্ষণমাহ– রোমকূপেত্যাদি| এতত্ত্রিভির্দোষৈঃ সশোণিতৈঃ স্বভাবান্নিযতকালব্যাপারৈর্ভবতি| এতচ্চ স্ত্রীণাং ন ভবতীতি বিদেহবচনাদ্ব্যাখ্যানযন্তি| যদুক্তম্– “অত্যন্তসুকুমারাঙ্গ্যো রজো দুষ্টং স্রবন্তি চ| অব্যাযামরতা যস্মাত্তস্মান্ন খলিতিঃ স্ত্রিযাঃ||” ইতি| অব্যাযামাদ্বাতপিত্তযোরকোপেন নাতিরোমচ্যুতিঃ, রজঃস্রাবেণ চ স্রোতোঽবরোধাভাবাচ্চ্যুতানামপি রোম্ণাং পুনর্বিরোহঃ; কিন্তু স্ত্রীষ্বপি খলিতিদর্শনাত্ প্রাযিকং বিদেহবচনম্| খালিত্যং রুহ্যেতি চ তস্য পর্যাযকথনম্| তথাচ ভোজঃ– “তদিন্দ্রলুপ্তমিত্যাহুঃ খল্লীং রুহ্যাং চ কেচন|” ইতি| কার্তিকস্ত্বাহ– “ইন্দ্রলুপ্তং শ্মশ্রুণি ভবতি, খালিত্যং শিরস্যেব, রুহ্যা চ সর্বদেহে|” ইতি| আগমস্ত্বত্র নাস্তি||২৮-২৯||

আতঙ্কদর্পণ ব্যাখ্যা (বাচস্পতি বৈদ্য কৃত)

ইন্দ্রলুপ্তমাহ– রোমেত্যাদি| এতত্ত্রিভির্দোষৈঃ সশোণিতৈঃ স্বভাবান্নিযতকালব্যাপারৈর্ভবতি, মূর্ছিতং বৃদ্ধিগতং, প্রচ্যাবযতি পাতযতি| ততোঽন্যেষামসম্ভব ইতি অন্যেষাং রোম্ণামপ্রাদুর্ভাবঃ| এতচ্চ স্ত্রীণাং ন ভবতি বিদেহবচনাদিতি ব্যাখ্যানযন্তি, যদুক্তম্– “অত্যন্তসুকুমারাঙ্গ্যো রজো দুষ্টং স্রবন্তি চ| অব্যাযামরতা যস্মাত্তস্মান্ন খলিতিঃ স্ত্রিযাঃ||” ইতি| খল্বী রুহ্যাং চ কেচন ইতি| খালিত্যং রুহ্যেতি চ তস্য পর্যাযকথনম্| কার্তিকস্ত্বাহ– “ইন্দ্রলুপ্তং শ্মশ্রুণি ভবতি, খালিত্যং শিরস্যেব, রুহ্যা চ সর্বদেহে” ইতি| আগমস্ত্বত্র নাস্তি||২৮-২৯||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

দারুণলক্ষণমাহ– দারুণেত্যাদি| দারুণেতি কঠিনা| কফমারুতকোপেনেতি যদ্যপ্যুক্তং তথাপি পিত্তরক্তানুবন্ধোঽপ্যত্র দ্রষ্টব্যঃ| তথাহি বিদেহঃ– “যদত্র পটলাভাসং সরুজস্কং শিরস্ত্বচি| পরুষং জাযতে জন্তোস্তস্য রূপং বিশেষতঃ|| তোদৈঃ সমন্বিতং বাতাত্ সকণ্ডূগৌরবং কফাত্| সপিপাসং সদাহার্তিরাগং পিত্তাস্রজং তথা||” ইতি| অত্র বচনে সদাহরাগং চ পিত্তাত্, সার্তি তু রক্তাত্, অর্তির্হি রক্তজাঽপি ভবতি| যদুক্তম্– “রক্তং হি ব্যম্লতাং যাতি তচ্চেন্নাস্তি ন চাস্তি রুক্|” ইতি| দারুণং ‘রুক্খী’ ইতি লোকে||৩০||

আতঙ্কদর্পণ ব্যাখ্যা (বাচস্পতি বৈদ্য কৃত)

দারুণমাহ– দারুণেত্যাদি| প্রপাট্যতে পুটপুটাযতে, কফমারুতকোপেনেতি যদ্যপ্যুক্তং, তথাপি পিত্তরক্তানুবন্ধোঽপ্যত্র দ্রষ্টব্যঃ| তথাহি বিদেহঃ– “যদত্র পটলাভাসং সরুজস্কং শিরস্ত্বচি| পরুষং জাযতে জন্তোস্তস্য রূপং বিশেষতঃ|| তোদৈঃ সমন্বিতং বাতাত্সকণ্ডূগৌরবং কফাত্| সপিপাসং সদাহার্তিরাগং পিত্তাস্রজং তথা||” ইতি| অত্র বচনে সদাহরাগং চ পিত্তাত্, সার্তি তু রক্তাত্, অর্তির্হি রক্তজাঽপি ভবতি| দারুণকং ‘রুক্খী’ ইতি লোকে||৩০||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অরূংষিকামাহ– অরূংষীত্যাদিনা| অরূংষীতি ব্রণাঃ||৩১||

আতঙ্কদর্পণ ব্যাখ্যা (বাচস্পতি বৈদ্য কৃত)

অরূংষিকামাহ– অরূংষীত্যাদি| নৃণাং পুরুষাণাং কফাঽসৃক্ক্রিমিকোপেন মূর্ধনি মস্তকে বহুবক্ত্রাণি তথা বহুক্লেদানি, অরূংষীতি ব্রণা ভবন্তি, তামরূংষিকাং বিদ্যাত্||৩১||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পলিতমাহ– ক্রোধেত্যাদি| শরীরোষ্মেতি দেহাগ্নিঃ| পিত্তং চেতি পিত্তমপি শিরোগতং পলিতহেতুঃ| ননু, পিত্তমেবাগ্নিঃ, তত্র তত্র পিত্তস্য পাচকত্বেনাভিধানাত্; যদুক্তবান্ সুশ্রুতঃ– “ ন পাকঃ পিত্তাদৃতে” (সু. সূ. অ. ১৭) ইতি, তথা– “পিত্তে তস্মিন্ পাচকোঽগ্নিরিতি সঞ্জ্ঞা” (সু. সূ. অ. ২১) ইতি, তথা স এব– “ন খলু পিত্তব্যতিরেকেণান্যোঽগ্নিরুপলভ্যতে, আগ্নেযে তু পিত্তে দহনপচনদারণাদিষ্বভিবর্তমানেঽগ্নিদুপচারঃ ক্রিযতে অন্তরগ্নিরিতি, ক্ষীণে হ্যগ্নিগুণে তত্সমানদ্রব্যোপযোগাদতিবৃদ্ধে শীতক্রিযোপযোগাদাগমাচ্চ পশ্যামঃ ন খলু পিত্তব্যতিরেকেণান্যোঽগ্নিঃ|” (সু. সূ. অ. ২১) ইতি; চরকাচার্যোঽপ্যাহ– “দর্শনং পক্তিরূষ্মা চ ক্ষুত্তৃষ্ণা দেহমার্দবম্| প্রভাপ্রসাদৌ মেধা চ পিত্তকর্মাবিকারজম্|” (চ. সূ. অ. ১৮) ইতি; পাকস্যান্যথানুপপত্ত্যা চাগ্নেরঙ্গীকারঃ; কিঞ্চ মন্দেঽগ্নৌ পিত্তকরমরীচাদিদ্রব্যোপযোগাদগ্নের্বৃদ্ধিঃ, পিত্তপ্রতিকূলশীতমধুরাদিদ্রব্যোপযোগাচ্চোপশম উপলভ্যতে; যদি হি পিত্তাদ্ভিন্নোঽগ্নিঃ স্যাত্তদা পিত্তস্য বৃদ্ধিহ্রাসানুবিধানমস্যানুপপন্নং স্যাত্, ন হি তুহিনকরমণ্ডলে হিমভাজি অহিমোপলম্ভঃ, অতুহিনমণ্ডলে অহিমভাজি ভগবতি ভাস্করে অভিমতহিমোপলম্ভঃ, যদ্যতো ভিন্নং তত্ততো ভেদেনোপলভ্যতে, যথা সাগরাদজগরঃ, ন চৈবং পিত্তাদগ্নিঃ, তত্ কুতঃ পিত্তাদগ্নেঃ পৃথগুপাদানমিতি? অত্র প্রত্যভিধীযতে– ন তাবদন্তরগ্নিঃ পিত্তাদভিন্নঃ, ভেদসাধকপ্রমাণস্য ভূযঃ সদ্ভাবাত্; তথাহ্যভেদে “সমদোষঃ সমাগ্নিশ্চ” (সু. সূ. অ. ১৫) ইত্যত্র, “সমপ্রকোপৌ দোষাণাং সর্বেষামগ্নিসংশ্রযৌ” ইত্যত্র চ দোষপদলব্ধত্বাদগ্নেঃ পৃথগুপাদানমসঙ্গতং; তীক্ষ্ণঃ পিত্তেন চেতি স্বাত্মনি ক্রিযাবিরোধাদসঙ্গতং; যত্ পুনঃ “ন খলু পিত্তব্যতিরেকেণান্যোঽগ্নিঃ” ইত্যাদ্যুক্তং তদ্ভেদমেব সাধযতি, উপচারাভিধানাত্; ন হ্যভেদে উপচারঃ সম্ভবতি| যদপ্যগ্নেঃ পিত্তবৃদ্ধিহ্রাসানুবিধানমভিহিতং তদপ্রযোজকং, ভেদেঽপি সমানত্বেন তদুপপত্তেঃ| যথা কফবৃদ্ধিহ্রাসকরসৌম্যাগ্নেযদ্রব্যাভ্যাং শুক্রস্য বৃদ্ধিহ্রাসৌ দৃষ্টৌ, ন চ কফশুক্রযোরৈক্যং; কিঞ্চ ঘৃতং পিত্তশমনমগ্নেশ্চ দীপনং, পিত্তস্য সঞ্চযাদৌ নাগ্নের্বৃদ্ধিঃ; পেযাদিকং চাগ্নিকরং, ন পিত্তকৃত্; ততশ্চ পিত্তাদ্বিলক্ষণোঽন্তরগ্নিঃ| স চ দ্রবতেজঃসমুদাযাত্মকস্য পিত্তস্য তেজোভাগো ন বহিরনলবদ্ভস্মাঙ্গারাকারঃ, সমুদাযতশ্চ সমুদাযী অন্য এব করচরণাদিভ্য ইব শরীরম্; অত্যন্তভেদেন চাগ্রহণং তস্য নিত্যসংশ্লেষণশালিত্বাত্| পিত্তস্য তেজোংঽশঃ এব পাচ(ব)কঃ, তদাহ ভোজঃ– “দৃঢমুষ্ণোচিতং হ্যেতত্ পিত্তোষ্মা পচতীতি যত্| মূর্ছিতো রসবীর্যাভ্যাং সমানব্যানসংহিতঃ||” ইত্যারভ্য, “তস্মাত্ তেজোমযং পিত্তং পিত্তোষ্মা যঃ স পক্তিমান্| স কাযাগ্নিঃ স কাযোষ্মা স পক্তা স চ জীবনঃ||” ইতি| পিত্তৈকদেশত্বাত্তেজসি পিত্তোপচারমাশ্রিত্য সুশ্রুতেনোক্তম্– “ ন পাকঃ পিত্তাদৃতে|” ইতি, তথা “ন খলু পিত্তব্যতিরেকেণান্যোঽগ্নিঃ|” ইতি| এবমন্যদপ্যগ্নেরভেদসাধকং বচনং সমাধেযম্| ননু, যদি তীক্ষ্ণঃ পিত্তেনেত্যুক্তং, তত্ কথং পিত্তেনৈবাগ্নেঃ প্রশমনমভিধীযতে| যদুক্তং চরকে– “কট্বজীর্ণবিদাহ্যম্লক্ষারাদ্যৈঃ পিত্তমুল্বণম্| আপ্লাবযদ্ধন্ত্যনলং জলং তপ্তমিবানলম্||” (চ. চি. অ. ১৫) ইতি; উচ্যতে– যদা কটুকেন রূক্ষোষ্ণেন পিত্তং বৃদ্ধং ভবতি, তদা তেজোভাগরূপাযাঃ পিত্তস্যাবস্থাযা উল্বণত্বাত্তীক্ষ্ণঃ পিত্তেনেতি সঙ্গতং; যদা অম্ললবণেন স্নিগ্ধোষ্ণেন কফানুগমনভাজা বৃদ্ধং পিত্তং তদা পিত্তস্য দ্রবাবস্থাযা উদ্রিক্তত্বাত্ নির্বাপণমগ্নেরুক্তমিতি| জতুকণেঽপ্যুক্তম্– “কুপিতেন বাযুনা দীপস্যেবাগ্নের্নির্বাপণং, পিত্তেনোষ্ণজলবত্, কফেনাম্বুবত্|” ইতি| ততশ্চ যুক্তমগ্নেঃ পৃথগুপাদানমিতি| অগ্নিশ্চ পিত্তগতত্বেন ক্রোধকৃতো ভবত্যেব, ক্রোধেন পিত্তকোপাত্; শোকশ্রমাভ্যাং তু জনিতবাতেন শরীরোষ্মণোঽপি বিক্ষেপণাত্ শিরোগতত্বং, তেনানিলোঽপি লভ্যতে, পিত্তং চ সাক্ষাদুপাত্তং, চকারেণ শ্লেষ্মাঽপি কেশশুক্লতাকরো গৃহ্যতে| এতেন দোষত্রযসহিতশরীরোষ্মা পলিতহেতুরিতি বাক্যার্থশ্চরকোক্তার্থেন সহ সংবাদী ভবতি| যদাহ– “তেজোঽনিলাদ্যৈঃ সহ কেশভূমিং দগ্ধ্বা তু কুর্যাত্ খলিতং নরস্য| কিঞ্চিত্তু দগ্ধ্বা পলিতানি কুর্যাদ্ধরিত্প্রভত্বং চ শিরোরুহাণাম্||” (চ. চি. অ. ২) ইতি| এতচ্চাকালজপলিতব্যাপকং লক্ষণম্| কালজে তু ক্রোধাদিগ্রহণং কারণান্তরোপলক্ষণং, তেন বযঃপরিণামকৃতশ্চোষ্মা দোষত্রযযুক্তঃ কালজপলিতহেতুঃ, অন্যথা কালজপলিতস্য সঙ্গ্রহো ন স্যাত্| কিংবা কালজং স্বাভাবিকত্বাদেব নোচ্যতে| অন্যে তু পিত্তগতশ্চেচ্ছরীরোষ্মা তত্ কিমুভযোরুপাদানেনেত্যভিধায শরীরোষ্মা পিত্তং চেতি কর্তৃদ্বযমাচক্ষতে; তেন নাত্রৈকস্মিন্ বিষযে সমুচ্চযঃ, কিং তর্হি বিষযভেদাত্| কর্তৃদ্বযং; তত্র শরীরোষ্মা বৈকৃতং পলিতং করোতি, পিত্তং চ প্রাকৃতং পিত্তপ্রকৃতেঃ পলিতং করোতি| যদুক্তম্– “পিত্তপ্রকৃতিরকালজবলীপলিতযুক্তশ্চ ভবতি” ইতি| এবং স্বাভাবিকজরাপলিতমপি পিত্তেনৈবাস্য হেতোঃ ক্লৃপ্তত্বাত্| ন চোষ্মকৃতত্বেন পলিতস্যাদোষজত্বপ্রসঙ্গঃ, ঊষ্মণঃ পিত্তধর্মত্বেন পিত্তেঽন্তর্ভাবাত্||৩২||

আতঙ্কদর্পণ ব্যাখ্যা (বাচস্পতি বৈদ্য কৃত)

পলিতমাহ– ক্রোধেত্যাদি| ক্রোধাদিকৃতেন শরীরোষ্মণা শিরোগতেন বৈকৃতং পিত্তেন বযঃকৃতং তু প্রাপ্তেনেত্যর্থঃ| অন্যে তু পিত্তাগ্ন্যোর্ভেদবাদিন উভাভ্যাং মন্যন্তে কালজলক্ষণম্, অন্যেঽপি ত্রিভিরেব দোষৈঃ স্যাদিতি কথযন্তি| শোকশ্রমাভ্যাং জনিতবাতেন শরীরোষ্মণো বিক্ষেপাচ্ছিরোগতত্বং, তেনানিলোঽপি লভ্যতে, পিত্তং চ সাক্ষাদুপাত্তং, চকারেণ শ্লেষ্মাপি কেশশুক্লতাকারকো গৃহ্যতে| এতেন দোষত্রযসহিতঃ শরীরোষ্মা পলিতহেতুরিতি বাক্যার্থঃ| যদাহ চরকঃ– “তেজোনিলাদ্যৈঃ সহ কেশভূমিং দগ্ধ্বা তু কুর্যা| খলতিং নরস্য| কিঞ্চিত্তু দগ্ধ্বা পলিতানি কুর্যাদ্ধরিত্প্রভত্বং চ শিরোরুহাণাম্||” ইতি||৩২||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

যুবানপিডকালক্ষণমাহ– শাল্মলীত্যাদি| যুবানপিডকা লোকে ‘বরণ্ডকা’ উচ্যতে| যূনামাননপিডকা যুবানপিডকা, পৃষোদরাদিত্বান্নকারলোপঃ; এষা চ যূনামেব, মুখ এব, স্বভাবাত্||৩৩||

আতঙ্কদর্পণ ব্যাখ্যা (বাচস্পতি বৈদ্য কৃত)

যৌবনপিডকামাহ– শাল্মলীত্যাদি| এষা স্বভাবাদ্যূনামেব মুখে ভবতি| মুখে দূষকা মুখকান্তিহারকাঃ, যুবানপিডকাঃ যূনামাননপিডকাঃ| পৃষোদরাদিত্বান্নকারস্য লোপঃ||৩৩||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পদ্মিনীকণ্টকমাহ– কণ্টকৈরিত্যাদি| তদাখ্যমিতি পদ্মিনীকণ্টকাখ্যম্||৩৪||

আতঙ্কদর্পণ ব্যাখ্যা (বাচস্পতি বৈদ্য কৃত)

পদ্মিনীকণ্টকমাহ– কণ্টকৈরিত্যাদি| পদ্মিনীকণ্টকসদৃশৈঃ কণ্টকৈরাচিতং বৃত্তাদিলক্ষণং যন্মণ্ডলং ভবতি, তত্তদাখ্যমিতি পদ্মিনীকণ্টকাখ্যম্||৩৪||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

জতুমণিমাহ– সমমিত্যাদি| সমং মসৃণম্| উত্সন্নমুদ্গতম্| অযং ‘জটুল’ ইতি লোকে প্রসিদ্ধঃ| কফরক্তজমিতি প্রাধান্যেনোক্তং, তেন– চরকোক্তং ত্রিদোষজত্বমপ্যস্যোপপন্নং ভবতি| যদুক্তং তেন– “কৃষ্ণঃ স্নিগ্ধো জতুমণির্জ্ঞেযো বাতোত্তরৈস্ত্রিভিঃ| অরুজং ত্বপরৈরুক্তং লক্ষ্মেত্যাহুর্ভিষগ্বরাঃ||” ইতি| সহজং লক্ষ্ম চৈকেষামিতি একেষামাচার্যাণাং মতেন সহজং লক্ষ্ম লক্ষণং স্ত্রীপুংসযোরঙ্গভেদেন শুভাশুভফলপ্রদং ভবতি| সহজং শরীরেণ সহ জাতং জন্মকালপ্রবৃত্তমিত্যর্থঃ||৩৫||

আতঙ্কদর্পণ ব্যাখ্যা (বাচস্পতি বৈদ্য কৃত)

জতুমণিমাহ– সমমিত্যাদি| সমং মসৃণম্, উত্সন্নমুদ্গতম্| অযং ‘জটুল’ ইতি লোকে প্রসিদ্ধঃ| কফরক্তজমিতি প্রাধান্যেনোক্তং, তেন চরকেণোক্তং ত্রিদোষজত্বপ্যস্য ভবতি| যদুক্তং তেন– “কৃষ্ণঃ স্নিগ্ধো জতুমণির্জ্ঞেযো বাতোত্তরৈস্ত্রিভিঃ| অরুজং ত্বপরৈরুক্তং লক্ষ্মেত্যাহুর্ভিষগ্বরাঃ” ইতি| একেষামাচার্যাণাং মতে সহজং লক্ষ্ম লক্ষণং স্ত্রীপুংসযোরঙ্গভেদেন শুভফলপ্রদং ভবতি| সহজং শরীরেণ সহ জাতং জন্মকালপ্রবৃত্তমিত্যর্থঃ||৩৫||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

মষকলিঙ্গমাহ– অবেদনমিত্যাদি| স্থিরং কঠিনমিতি গযদাসঃ; অচলমিতি যুক্তং, ভোজে মৃদ্বিতি পাঠাত্| মষকমাদিশেদিতি মাষশব্দাত্ “ইবে প্রতিকৃতৌ” ইতি কন্, নৈরুক্ত্যেন চ বিধিনা হ্রস্বত্বম্| অত্র চকারেণ কফমেদসী সমুচ্চীযেতে| তথা চ ভোজঃ– “বাতেরিতে ত্বচি যদা দূষ্যেতে কফমেদসী| শ্লক্ষ্ণং মৃদু সবর্ণং চ কুরুতো মষকং বদেত্||” ইতি||৩৬||

আতঙ্কদর্পণ ব্যাখ্যা (বাচস্পতি বৈদ্য কৃত)

মষকমাহ– অবেদনমিত্যাদি| স্থিরমচলং ভোজে মৃদ্বিতি পাঠাত্| অত্র চকারেণ কফমেদসী সমুচ্চীযেতে| তথাচ ভোজঃ– “বাতেরিতে ত্বচি যদা দূষ্যেতে কফমেদসী| শ্লক্ষ্ণং মৃদু সবর্ণং চ কুরুতে মষকং বদেত্||” ইতি||৩৬||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

তিলকালকলক্ষণমাহ– কৃষ্ণানীত্যাদি| ‘বাতপিত্তকফোচ্ছোষাত্’ ইতি পাঠে বাতপিত্তাভ্যাং হেতুভ্যাং কফস্যোচ্ছোষঃ শোষণং তস্মাত্| অন্যে চরকং দৃষ্ট্বা ‘বাতপিত্তাসৃগুচ্ছোষাত্’ ইতি পঠন্তি| তথাচ চরকঃ– “যস্য পিত্তং প্রকুপিতং শোণিতং প্রাপ্য শুষ্যতি| তিলকা বিপ্লবা ব্যঙ্গা নীলিকা চাস্য জাযতে||” (চ. সূ. অ. ১৮) ইতি; অস্মিন্ বচনে বাতোঽপ্যবগন্তব্যঃ, তেনাপি শোষস্য ক্রিযমাণত্বাত্| অন্যেঽপি তন্ত্রান্তরং দৃষ্ট্বা ‘বাতপিত্তকফোত্সেকাত্’ ইতি পঠন্তি| উত্সেকাদিত্যুদ্রেকাত্| তথাহি তন্ত্রান্তরম্– “মারুতঃ পিত্তমাদায কফরক্তসমাশ্রিতঃ| চিনোতি তিলমাত্রাণি ত্বচি তে তিলকালকাঃ||” ইতি; কিন্ত্বস্মিন্নপি তন্ত্রে কফরক্তসমাশ্রিত ইত্যনেন কফরক্তযোরাশ্রিতবাতেন পিত্তসহিতেনোচ্ছোষাদেব তিলকালকে কার্ষ্ণ্যস্য সম্ভবোঽবগম্যতে, ততশ্চ ‘বাতপিত্তকফোচ্ছোষাত্’ ইতি পাঠো যুজ্যতে| ‘বাতপিত্তরসোদ্রেকাত্’ ইতি পাঠান্তরম্||৩৭||

আতঙ্কদর্পণ ব্যাখ্যা (বাচস্পতি বৈদ্য কৃত)

তিলকালকলক্ষণমাহ– নীলানীত্যাদি| শরীরত্বক্সমানি নোদ্গতানীত্যর্থঃ| বাতপিত্তকফোদ্রেকাদিত্যত্র “বাতপিত্তকফোচ্ছোষাত্” ইতি পাঠে বাতপিত্তাভ্যাং হেতুভ্যাং কফস্যোচ্ছোষঃ শোষণং, তস্মাত্| অন্যে তু “বাতপিত্তাসৃগুচ্ছোষাত্” ইতি পঠন্তি| তত্র বাতপিত্তাভ্যাং রক্তস্য শোষাদিত্যর্থঃ| অত এব তিলকালকে কার্ষ্ণ্যং; তথাচ চরকঃ– “যস্য পিত্তং প্রকুপিতং শোণিতং প্রাপ্য শুষ্যতি| তিলকা বিপ্লবো ব্যঙ্গা নীলিকা চাস্য জাযতে||” ইতি| অস্মিন্ বচনে বাতোঽপ্যবগন্তব্যঃ, তেনাপি শোষস্য ক্রিযমাণত্বাত্| অন্যে তন্ত্রান্তরং দৃষ্ট্বা “বাতপিত্তকফোত্সেকাত্” ইতি পঠন্তি| উত্সেকাদিতি উদ্রেকাত্| তথাহি তন্ত্রান্তরে– “মারুতঃ পিত্তমাদায কফরক্তসমাশ্রিতঃ| চিনোতি তিলমাত্রাণি ত্বচি তে তিলকালকাঃ||” ইতি||৩৭||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ন্যচ্ছলিঙ্গমাহ– মহদ্বেত্যাদি| অসিতং কৃষ্ণম্| ‘নীরুজং মণ্ডলম্’ ইত্যস্য স্থানে ‘সহজং মণ্ডলম্’ ইতি কেচিত্ পঠন্তি, তেন জন্মকালপ্রবৃত্তং ন্যচ্ছমিচ্ছন্তি, অত এব ন্যচ্ছস্য পর্যাযে লাঞ্ছনমিতি তৈঃ পঠ্যতে| যথা– “ন্যচ্ছং লাঞ্ছনমুচ্যতে” ইতি| লাঞ্ছনং লক্ষণম্| অত্র ভোজবচনাত্ পিত্তরক্তান্বিতো বাযুঃ কারণম্| যদাহ– “রক্তপিত্তান্বিতো বাযুস্ত্বক্প্রদেশাশ্রিতো যদা| জনযেন্মণ্ডলং কৃষ্ণং শ্যাবং বা ন্যচ্ছমাদিশেত্||” ইতি| অত্র শ্যাবত্বপক্ষে মুখেতরদেশ এব সম্ভবেন বহুলত্বেন ব্যঙ্গাদ্ভেদোঽবগন্তব্যঃ||৩৮||

আতঙ্কদর্পণ ব্যাখ্যা (বাচস্পতি বৈদ্য কৃত)

ন্যচ্ছমাহ– মহদিত্যাদি| শ্যাবং শুক্লানুবিদ্ধং কৃষ্ণবর্ণম্, অসিতং কৃষ্ণং, ‘নীরুজং মণ্ডলম্’ ইত্যস্য স্থানে ‘সহজং মণ্ডলম্’ ইতি কেচিত্ পঠন্তি, তেন জন্মকালপ্রবৃত্তং ন্যচ্ছমিচ্ছন্তি, ন্যচ্ছস্য পর্যাযো লাঞ্ছনমিতি তৈঃ পঠ্যতে| অভিধানে– ‘ন্যচ্ছং লাঞ্ছনমুচ্যতে’ ইতি| অত্র ভোজবচনাত্ পিত্তরক্তান্বিতো বাযুঃ কারণম্, যদাহ– ‘রক্তপিত্তান্বিতঃ’ ইত্যাদি||৩৮||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ব্যঙ্গলিঙ্গমাহ– ক্রোধাযাসেত্যাদি| শ্যাবমিতি শুক্লানুবিদ্ধকৃষ্ণবর্ণম্| অস্য ‘ছ্যাবক’ ইতি ‘মেছেতা’ ইতি চ লোকে খ্যাতিঃ||৩৯||–

আতঙ্কদর্পণ ব্যাখ্যা (বাচস্পতি বৈদ্য কৃত)

ব্যঙ্গমাহ– ক্রোধেত্যাদি| শ্যাবং শুক্লানুবিদ্ধকৃষ্ণবর্ণম্| ‘মুখছাঈ’ ইতি লোকে||৩৯||–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

নীলিকালক্ষণমাহ– কৃষ্ণমেবঙ্গুণমিত্যাদি| এবঙ্গুণমিতি নীরুজতনুকমণ্ডলধর্মম্| ব্যঙ্গোক্তদোষোঽত্রাপি বোদ্ধব্যঃ, সম্মূর্ছনবিশেষাত্তু নীলত্বকারী| কৃষ্ণন্যচ্ছাদতিকৃষ্ণত্বেন ভিন্না নীলিকা, ব্যঙ্গনীলিকযোস্তু ব্যক্ত এব ভেদঃ– শ্যাবো ব্যঙ্গঃ, কৃষ্ণা নীলিকা; ভোজে তু নীলিকা গাত্র এবোক্তা| যদুক্তম্– “মারুতঃ ক্রোধহর্ষাভ্যামূর্ধ্বগো মুখমাশ্রিতঃ| পিত্তেন সহ সংযুক্তঃ করোতি বদনত্বচি|| নীরুজং তনুকং শ্যাবং ব্যঙ্গং তমিতি নির্দিশেত্| কৃষ্ণমেবঙ্গুণং গাত্রে নীলিকাং তাং বিনির্দিশেত্||” ইতি||৪০||

আতঙ্কদর্পণ ব্যাখ্যা (বাচস্পতি বৈদ্য কৃত)

নীলিকামাহ– কৃষ্ণমিত্যাদি| এবঙ্গুণমিতি নীরুজং তনুকং মণ্ডলধর্মকম্| ব্যঙ্গোক্তো দোষোঽত্রাপি বোদ্ধব্যঃ; সম্মূর্ছনবিশেষাত্তু নীলত্বকারী| কৃষ্ণন্যচ্ছাদতিনীলত্বেন ভিন্না নীলিকা, ব্যঙ্গনীলিকযোস্তু ব্যক্ত এব ভেদঃ– শ্যাবো ব্যঙ্গঃ, কৃষ্ণা নীলিকা; ভোজে তু নীলিকা গাত্র এবোক্তা| যদুক্তম্– “মারুতঃ ক্রোধহর্ষাভ্যামূর্ধ্বগো মুখমাশ্রিতঃ| পিত্তেন সহ সংযুক্তঃ করোতি বদনত্বচি|| নীরুজং তনুকং শ্যাবং ব্যঙ্গং তমিতি নির্দিশেত্| কৃষ্ণমেবঙ্গুণং গাত্রে নীলিকাং তাং বিনির্দিশেত্||” ইতি||৪০||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

মেঢ্রগতাভিঘাতজে রোগত্রযে পরিবর্তিকামাহ– মর্দনাদিত্যাদি| পীডনাদ্বাঽতীত্যতিশব্দো মর্দনপীডনাভ্যাং সহ সম্বধ্যতে| অতিযোগাদেব তে বাতং কোপযতঃ| সর্বতশ্চরন্নিতি ব্যানঃ, ‘সর্বতশ্চরঃ’ ইতি পাঠে স এবার্থ| পরিবর্তত ইতি সর্বতো বিবর্ততে| কোষ ইতি চর্মকোষঃ| পরিবর্তিকেতি বৃতধাতোঃ “রোগাখ্যাযাং ণ্বুল্ বহুলম্” ইতি ণ্বুল্ (বৃত-ণক-আপ্)| এবমবপাটিকাযাং চ বোদ্ধব্যম্| অস্যাং বাতজাযামপি পিত্তানুবন্ধাদ্দাহপাকৌ ভবতঃ, কফসম্বন্ধস্তু ‘সকণ্ডূঃ কঠিনা বাপি’ ইত্যাদিনাঽভিহিতঃ| ভোজেঽপ্যুক্তম্– “মণেরধো মেঢ্রচর্ম ব্যানস্তু পরিবর্তযেত্| সশূলতোদদাহাদ্যৈর্বিজ্ঞেযা পরিবর্তিকা|| শ্লৈষ্মিকী কঠিনা স্নিগ্ধা কণ্ডূমত্যল্পবেদনা|” ইতি||৪১-৪৩||

আতঙ্কদর্পণ ব্যাখ্যা (বাচস্পতি বৈদ্য কৃত)

লিঙ্গপরিবর্তিকামাহ– মর্দনাদিত্যাদি| অতিশব্দো মর্দনপীডনাভ্যাং প্রত্যেকমভিসম্বধ্যতে| অতিযোগাদেব তে বাতং কোপযতঃ| “ সর্বতশ্চরন্” ইতি পাঠে স এবার্থঃ| পরিবর্তত ইতি সর্বতো বিবর্ততে| কোষ ইতি চর্মকোষঃ| পরিবর্তিকাখ্যোঽযম্| অস্যাং বাতজাযাং পিত্তানুবন্ধাদ্দাহপাকৌ ভবতঃ, কফসম্বন্ধাত্ কণ্ডূঃ কঠিনা বা| যদুক্তং ভোজে– “মণেরধো মেঢ্রচর্ম ব্যানস্তু পরিবর্তযেত্| সশূলতোদদাহাদ্যৈর্বিজ্ঞেযা পরিবর্তিকা| শ্লৈষ্মিকী কঠিনা স্নিগ্ধা কণ্ডূমত্যল্পবেদনা||” ইতি||৪১-৪৩||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অবপাটিকামাহ– অল্পীযঃখামিত্যাদি| অল্পীযঃখামিত্যল্পতরং খং যোনিমুখং যস্যাঃ সা তথা, কন্যা হি অনার্তবা অল্পীযঃখা ভবতি| অত্র হেত্বন্তরং হস্তাভিঘাতাদপি বেতি| উদ্বর্তিত ইতি ঊর্ধ্বং বর্তিতে| যস্যাবপাট্যত ইতি স্বযমেব বিদীর্যতে| এষা চ পৃথক্ দোষত্রযেণানুবধ্যতে| তথা চ ভোজঃ– “মর্দনাদভিঘাতাদ্বা কন্যাযোনিপ্রপীডনাত্| লক্ষ্যতে যদি মেঢ্রস্য চর্ম দর্ভৈরিব ক্ষতম্|| জ্ঞেযাঽবপাটিকা সা তু পৃথগ্দোষৈঃ সমন্বিতা| বাতাত্ সা পরুষা রূক্ষা শূলনিস্তোদকারিণী|| পিত্তাত্ সদাহা রক্তাদ্বা দাহতৃষ্ণাসমন্বিতা| শ্লৈষ্মিকী কঠিনা স্নিগ্ধা কণ্ডূমত্যল্পবেদনা||” ইতি||৪৪||–

আতঙ্কদর্পণ ব্যাখ্যা (বাচস্পতি বৈদ্য কৃত)

অবপাটিকামাহ– অল্পীযঃখামিত্যাদি| অল্পতরং খং যোনিমুখং যস্যাঃ সা তথা, কন্যা হ্যনার্তবা অল্পীযঃখা ভবতি| হস্তাভিঘাতাদিতি হেত্বন্তরম্| উদ্বর্তিত ইতি ঊর্ধ্বং বর্তিতে| যস্যাবপাট্যত ইতি স্বযমেব বিদীর্যতে| এষা পৃথগ্দোষত্রযেণানুবধ্যতে| তথাচ ভোজঃ– “মর্দনাভিঘাতাদ্বা কন্যাযোনিপ্রপীডনাত্| লক্ষ্যতে যদি মেঢ্রস্য চর্ম দর্ভৈরিব ক্ষতম্|| জ্ঞেযাঽবপাটিকা সা তু পৃথগ্দোষৈঃ সমন্বিতা| বাতাত্সা পরুষা রূক্ষা শূলনিস্তোদকারিণী|| পিত্তাত্পীতা সরক্তা বা দাহতৃষ্ণাসমন্বিতা| শ্লৈষ্মিকী কঠিনা স্নিগ্ধা কণ্ডূমত্যল্পবেদনা||” ইতি||৪৪||–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

নিরুদ্ধপ্রকশমাহ– বাতোপসৃষ্ট ইত্যাদি| সংশ্রযত ইতি সমগ্রং শ্রযতে, অত্রৈব নীযত ইত্যর্থঃ| অবপাটিকা ত্বরূঢা চর্মসঙ্কোচান্নিরুদ্ধপ্রকশো ভবতীতি ব্রুবতে, সন্নিরুদ্ধগুদবত্ স্বতন্ত্রোঽপি ভবতীতি শক্যতে বক্তুং; নিরুদ্ধপ্রকাশ ইত্যস্মিন্নর্থে নিরুদ্ধপ্রকশঃ, নৈরুক্তেন চ রূপসিদ্ধিঃ| মূত্রস্রোতঃ সঙ্কুচিতচর্মপীডনেন মণেঃ স্বল্পদ্বারত্বান্মূত্রস্রোতো রুণদ্ধি| অবেদনমিত্যস্য স্থানে সবেদনমিতি কেচিত্| অত্র ভোজাভিপ্রাযেণ ব্যাচক্ষতে– একদা নিরুদ্ধে স্রোতসি সবেদনমন্যদা তু প্রকাশে মূত্রং মন্দধারং প্রবর্ততে, মণিশ্চ নাবদীর্যতে মূত্রেণেতি| তথা চ ভোজঃ– “মেঢ্রান্তে চর্মণি যদা মারুতঃ কুপিতো ভৃশম্| দ্বারং রুণদ্ধি স শনৈঃ প্রকাশশ্চ মুহুর্ভবেত্|| মূত্রং মূত্রযতে কৃচ্ছ্রাত্ প্রকাশস্তু যদা ভবেত্| বাতোপসৃষ্টমেঢ্রস্তু মণির্ন চ বিদীর্যতে|| নিরুদ্ধং চ প্রকাশং চ ব্যাধিং বিদ্যাত্ সুদারুণম্||” ইতি| সুশ্রুতে তু নিরুদ্ধপ্রকাশত্বাত্ নিরুদ্ধপ্রকশঃ| মণির্বিব্রিযতে ন চেতি মণির্বিবৃতো ন ভবতি||৪৫-৪৭||

আতঙ্কদর্পণ ব্যাখ্যা (বাচস্পতি বৈদ্য কৃত)

নিরুদ্ধপ্রকশমাহ– বাতেত্যাদি| বাতদুষ্টমেঢ্রে চর্ম সংশ্রযত ইতি সমগ্রং শ্রযতে, তত্রৈব লীযত ইত্যর্থঃ| চর্মসঙ্কোচান্মূত্রস্রোতো রুধ্যতে, অবপাটিকা দুরূঢা চর্মসঙ্কোচান্নিরুদ্ধপ্রকাশা ভবতীতি ব্রুবতে| সন্নিরুদ্ধগুদবত্স্বতন্ত্রোঽপি ভবতীতি শক্যতে বক্তুম্| নিরুদ্ধপ্রকাশ ইত্যস্মিন্নর্থে নিরুদ্ধপ্রকশঃ, নৈরুক্তেন রূপসিদ্ধিঃ| অবেদনমিত্যস্য স্থানে সবেদনমিত্যন্যে ভোজভিপ্রাযেণ ব্যাচক্ষতে| একদা নিরুদ্ধস্রোতসি সবেদনম্, অন্যদা তু প্রকাশে মূত্রং মন্দধারং প্রবর্ততে| মণিশ্চ বিদার্যতে মূত্রেণেতি শেষঃ| তথাচ ভোজঃ– “মেঢ্রান্তে চর্মণি যদা মারুতঃ কুপিতো ভৃশম্| দ্বারং রুণদ্ধি স শনৈঃ প্রকাশশ্চ মুহুর্ভবেত্|| মূত্রং মূত্রযতে কৃচ্ছ্রাত্প্রকাশস্তু যদা ভবেত্| বাতোপসৃষ্টমূত্রস্তু মণির্ন চ বিদীর্যতে| নিরুদ্ধং চ প্রকাশং চ ব্যাধিং বিদ্যাত্সুদারুণম্||” ইতি||৪৫-৪৭||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

মূত্রমার্গরোধকনিরুদ্ধপ্রকাশানন্তরং পুরীষমার্গরোধকং সন্নিরুদ্ধগুদমাহ– বেগসন্ধারণাদিত্যাদি| তস্যেতি গুদস্য| ‘মহত্স্রোত’| ইতি পাঠে তু মহত্স্রোতো গুদবিবরং, নিরুদ্ধপ্রকাশবদত্রাপি চর্মসঙ্কোচাত্ সন্নিরুদ্ধগুদম্||৪৮-৪৯||

আতঙ্কদর্পণ ব্যাখ্যা (বাচস্পতি বৈদ্য কৃত)

সন্নিরুদ্ধগুদমাহ– বেগেত্যাদি| মহত্স্রোতো গুদবিবরং নিরুদ্ধপ্রকশবদত্রাপি চর্মসঙ্কোচান্নিরুদ্ধগুদম্||৪৮-৪৯||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অহিপূতনমাহ– শকৃন্মূত্রেত্যাদি| অপান ইতি গুদে, স্বিন্নে স্বেদবতি, অস্নাপ্যমানে অক্রিযমাণক্ষালনে; স্বেদমলক্লেদাদেব কণ্ডূর্ভবতীত্যর্থঃ| একীভূতমিতি অপানং ব্রণৈঃ সহৈকীভূতম্| অহিপূতনং চ বালানামেব ভবতি, ভোজে পুনরিদং দুষ্টস্তন্যপানাদপি ভবতীতি পঠিতম্| যদুক্তম্– “দুষ্টস্তন্যস্য পানেন মলস্যাক্ষালনেন চ| কণ্ডূদাহরুজাবদ্ভিঃ পিডকৈশ্চ সমাচিতা|| সম্ভবন্তি যথাদোষং দারুণা হ্যহিপূতনা||” ইতি||৫০-৫১||

আতঙ্কদর্পণ ব্যাখ্যা (বাচস্পতি বৈদ্য কৃত)

অহিপূতনমাহ– শকৃদিত্যাদি| অপানে গুদে, স্বিন্নে স্বেদবতি, অস্নাপ্যমানে অক্রিযমাণপ্রক্ষালনে, স্বেদমলক্লেদাদেব কণ্ডূর্ভবতি| ততঃ স্ফোটঃ জাযতে| একীভূতমিতি অপানং ব্রণৈঃ সহৈকীভূতম্, অহিপূতনং বালানামেব ভবতি, ভোজে পুনরিদং দুষ্টস্তন্যপানাদপি ভবতীতি পঠিতম্| যদুক্তম্– “দুষ্টস্তন্যস্য পানেন মলস্যাক্ষালনেন চ| কণ্ডূদাহরুজাবদ্ভিঃ পিডকৈশ্চ সমাচিতা|| দারুণা চ যথাদোষং সম্ভবত্যহিপূতনা|” ইতি||৫০-৫১||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অহিপূতনাসমানহেতুলিঙ্গতযা গুদাশ্রযং গুদভ্রংশমুল্লঙ্ঘ্যানন্তরং বৃষণকচ্ছূমাহ– স্নানোত্সাদনহীনস্যেত্যাদি| এষা চ নিদানবিশেষাত্ প্রাযো বৃষণভাবিত্বাত্ বিশিষ্টচিকিত্সোপযোগিত্বাচ্চ কুষ্টোক্তকচ্ছূতো ভেদেন পঠ্যতে||৫২-৫৩||

আতঙ্কদর্পণ ব্যাখ্যা (বাচস্পতি বৈদ্য কৃত)

অহিপূতনাসমানলিঙ্গহেতুতযা, গুদাশ্রযং গুদভ্রংশমুল্লঙ্ঘ্যানন্তরং বৃষণকণ্ডূমাহ– স্নানেত্যাদি| উত্সাদনমাহরণবস্ত্রম্| এষা চ স্নানোত্সাদনহীনত্বনিদানবিশেষাত্প্রাযো বৃষণভাবিত্বাদ্বিশিষ্টচিকিত্সাযোগিত্বাচ্চ কুষ্ঠোক্তকণ্ডূতো ভিন্না||৫২-৫৩||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

গুদভ্রংশলিঙ্গমাহ– প্রবাহণেত্যাদি| প্রবাহণং প্রকর্ষেণ কুন্থনম্| ‘বাহ প্রযত্নে’ ইত্যস্য রূপম্| প্রবাহণেনাতিবেগোদীরণেন বাতকোপঃ, অতীসারেণ তু ধাতুক্ষযাত্; যদি বা প্রবাহণেনাতীসারেণ চাধোগতমারুতত্বেন গুদনির্গমো রূক্ষাদিদেহস্য||৫৪||

আতঙ্কদর্পণ ব্যাখ্যা (বাচস্পতি বৈদ্য কৃত)

গুদভ্রংশমাহ– প্রবাহণেত্যাদি| প্রবাহণং প্রকর্ষেণ কুন্থনং, হৃত্কণ্ঠবলেন বাযোরানযনম্| ‘বাহ প্রযত্নে’ ইত্যস্য রূপম্| প্রবাহণেন বাতকোপঃ, অতিসারে তু ধাতুক্ষযাত্| যদি বা প্রবাহণাতিসারেণৈব অধোগতমারুতত্বেন গুদনির্গমো রূক্ষাদিদেহস্য; অযং বাতকোপজঃ||৫৪||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

বরাহদংষ্ট্রলিঙ্গমাহ– সদাহ ইত্যাদি| অযং ‘বরাহদাঢ’ ইতি লোকে প্রসিদ্ধঃ||৫৫||

আতঙ্কদর্পণ ব্যাখ্যা (বাচস্পতি বৈদ্য কৃত)

সূকরদংষ্ট্রমাহ– সদাহেত্যাদি| সূকরদংষ্ট্রাকারত্বেন সূকরদংষ্ট্রকঃ বিসর্পলিঙ্গঃ ‘বরাহদাঢ’ ইতি লোকে প্রসিদ্ধঃ| ইতি ক্ষুদ্ররোগাশ্চত্বারিংশদুক্তাঃ||৫৫||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ইতি শ্রীকণ্ঠদত্তকৃতাযাং মধুকোশব্যাখ্যাযাং ক্ষুদ্ররোগনিদানং সমাপ্তম্||৫৫||

আতঙ্কদর্পণ ব্যাখ্যা (বাচস্পতি বৈদ্য কৃত)

ইতি শ্রীবাচস্পতিবৈদ্যবিরচিতাযাং মাধবনিদানব্যাখ্যাযামাতঙ্কদর্পণাখ্যাযাং ক্ষুদ্ররোগনিদানম্||৫৫||