৫৭. কর্ণরোগনিদানম্

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

মুখরোগে জিহ্বাশ্রযরোগোঽভিহিতঃ, জিহ্বা চেন্দ্রিযাধিষ্ঠানম্, অত ইন্দ্রিযাধিষ্ঠানদুষ্টিসাম্যাত্ কর্ণরোগনিদানমুচ্যতে; কর্ণশব্দেন চ কর্ণশষ্কুল্যবচ্ছিন্নমদৃষ্টোপগৃহীতং শ্রোত্রমুচ্যতে, তত্র যদ্যপ্যেকদেশগতো রোগস্তথাঽপ্যবযবেঽপি সমুদাযোপচারতঃ কর্ণব্যপদেশঃ| তত্র কর্ণশূলং কষ্টত্বাত্ প্রাগাহ– সমীরণ ইত্যাদি| অত্রানযৈব সম্প্রাপ্ত্যাঽর্থতো নিদানসঞ্চযাদ্যাক্ষিপ্তং; যতো নিদানাত্ সঞ্চযঃ, সঞ্চযাত্ প্রকোপঃ, প্রকোপাত্ প্রসরঃ, প্রসরাত্ স্থানসংশ্রযঃ, ততো ব্যক্তিঃ, ততো ভেদ ইতি| কর্ণশূলস্য চ কষ্টত্বং মূর্ছাদ্যুপদ্রবযোগাত্| যদাহ বিদেহঃ– “মূর্ছা দাহো জ্বরঃ কাসো হৃল্লাসো বমথুস্তথা| উপদ্রবাঃ কর্ণশূলে ভবন্ত্যেতে মরিষ্যতঃ||” ইতি| অন্যথাচরন্নিতি প্রতিলোমং চরন্| দোষৈরিতি কফপিত্তরক্তৈঃ; রক্তেঽপি রুজাকর্তৃত্বাত্ সামান্যেন দোষব্যপদেশঃ| যথাস্বমাবৃত ইতি স্বনিদানকুপিতদোষৈর্যথাস্বীযলক্ষণৈরাবৃতো ন তু কোপিতৈর্বাযুনা; “একঃ প্রকুপিতো দোষঃ সর্বানেব প্রকোপযেত্” ইতি ন্যাযাত্; যতঃ স্বতন্ত্রকুপিতা দোষাঃ সংসর্গভাজো ভবন্তি, পরতন্ত্রকুপিতাস্ত্বনুবন্ধরূপা ভবন্তি; অথবা যথাস্বমিতি শূলবিশেষণং, যথাস্বীযমিত্যর্থঃ| দুরাচার ইতি দুঃখেনাচর্যতে ইতি দুরাচরঃ||১||

আতঙ্কদর্পণ ব্যাখ্যা (বাচস্পতি বৈদ্য কৃত)

মুখরোগে জিহ্বাশ্রযা রোগা অভিহিতাঃ, জিহ্বা চেন্দ্রিযাধিষ্ঠানম্, অত ইন্দ্রিযাধিষ্ঠানদুষ্টিসাম্যাত্কর্ণরোগনিদানমুচ্যতে| কর্ণশব্দেন কর্ণশষ্কুল্যবচ্ছিন্নমদৃষ্টোপগৃহীতং শ্রোত্রমুচ্যতে| অত্র যদ্যপ্যেকদেশে রোগঃ, তথাঽপ্যবযবেঽপি সমুদাযোপচারাত্কর্ণরোগব্যপদেশঃ| অত্র কর্ণশূলং কষ্টসাধ্যত্বাত্প্রাগাহ– সমীরণ ইত্যাদি| অত্রানযৈব সম্প্রাপ্ত্যাঽর্থতো নিদানসঞ্চযাদ্যাক্ষিপ্তং বোদ্ধব্যম্| যতো নিদানাত্ সঞ্চযঃ, সঞ্চযাত্ প্রকোপঃ, প্রকোপাত্প্রসরঃ, প্রসরাত্ স্থানসংশ্রযঃ, ততো ব্যক্তিঃ, ততো ভেদ ইতি| কর্ণশূলস্য চ কষ্টত্বং মূর্ছাদ্যুপদ্রবযোগাত্| যদাহ বিদেহঃ– “মূর্ছা দাহো জ্বরঃ কাসঃ কুত্সাঽন্নে বমথুঃ সতৃট্| উপদ্রবাঃ কর্ণশূলে ভবন্ত্যেতে মরিষ্যতঃ||” ইতি| শ্রোত্রগতঃ শ্রোত্রং শষ্কুলীপরিচ্ছিন্নমাকাশঃ, সমীরণো বাযুঃ, শ্রোত্রগতঃ শ্রোত্রপ্রাপ্তঃ, অন্যথা চরন্নিতি প্রতিলোমং চরন্ বিমার্গগ ইতি বা; চরন্ সমন্ততঃ কর্ণযোরতীব শূলং করোতীতি সম্বন্ধনীযম্| কথম্ভূতো বাযুঃ? দোষৈরিতি পিত্তকফরক্তৈঃ, রক্তেঽপি রুজাদিকর্তৃত্বেন দোষসাম্যাদ্দোষব্যপদেশঃ| যথাস্বমাবৃত ইতি যথাস্বমত্র স্বস্য দোষস্যানতিক্রমেণ যথাস্বং, তেন স্বনিদানকুপিতৈর্দোষৈর্যথাত্মীযলক্ষণাবৃতো ন তু কুপিতেন বাযুনা কোপিতৈঃ, অথ বা যথাস্বমিতি শূলবিশেষণং, যথাত্মীযমিত্যর্থঃ| স তথাবিধো রোগঃ কর্ণশূলঃ কথিতঃ| কিংবিশিষ্টঃ? দুরাসদো দুর্বারঃ, ‘দুরাচরঃ’ ইতি পাঠে দুঃখেন চর্যতে উপচর্যত ইতি দুরাচরঃ||১||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

কর্ণনাদমাহ– কর্ণস্রোতঃস্থিত ইত্যাদি| যদা কর্ণস্রোতসি বিবিধপ্রকারেণাবস্থিতো বাযুর্ভবতি তদা তস্য বিবিধাভিহননাদুক্তবিবিধশব্দশ্রবণং, ভেরীমৃদঙ্গশঙ্খানামিত্যুপলক্ষণং, তেন ভৃঙ্গারাদিশব্দশ্রবণং চ ভবতি| যদুক্তং বিদেহে– “শিরোগতো যদা বাযুঃ শ্রোত্রযোঃ প্রতিপদ্যতে| তদা তু বিবিধান্ শব্দান্ সমীরযতি কর্ণযোঃ|| ভৃঙ্গারক্রৌঞ্চনাদং বা মণ্ডূককাকযোস্তথা| তন্ত্রীমৃদঙ্গশব্দং বা সামতূর্যস্বনং তথা|| গীতাধ্যযনবংশানাং নির্ঘোষং ক্ষ্বেডনং তথা| অপামিব পতন্তীনাং শকটস্যেব গচ্ছতঃ|| শ্বসতামিব সর্পাণাং সদৃশঃ শ্রূযতে স্বনঃ|” ইতি||২-৩||

আতঙ্কদর্পণ ব্যাখ্যা (বাচস্পতি বৈদ্য কৃত)

কর্ণনাদমাহ– কর্ণেত্যাদি| ভেরীমৃদঙ্গশঙ্খানামিত্যুপলক্ষণং, তেন ভৃঙ্গারাদিশব্দগ্রহণং চ ভবতি| যদুক্তং বিদেহে– “শিরোগতো যদা বাযুঃ শ্রোত্রযোঃ প্রতিপদ্যতে| তদা তু বিবিধাঞ্ছব্দান্সমীরযতি কর্ণযোঃ|| ভৃঙ্গারক্রৌঞ্চনাদং বা মণ্ডূককাকযোস্তথা| তন্ত্রীমৃদঙ্গশব্দং বা সামতূর্যস্বনং তথা|| গীতাধ্যযনবংশানাং নির্ঘোষং ক্ষ্বেডনং তথা| অপামিব পতন্তীনাং শকটস্যেব গচ্ছতঃ|| শ্বসতামিব সর্পাণাং সদৃশঃ শ্রূযতে স্বনঃ|” ইতি| প্রণাদস্যাপীডাকরত্বেঽপি রোগাখ্যা, তিলকালকবন্মনোদুঃখজনকত্বাত্| বাধির্যমাহ– যদেত্যাদি| শব্দবহং স্রোতঃ কর্ণশষ্কুলীপরিচ্ছিন্নমাকাশং, তদ্গতবাতজনিতমত্র বাধির্যম্, অপিশব্দাদ্রক্তপিত্তাবরণযোরুপগ্রহ ইতি||২-৩||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

কর্ণক্ষ্বেডমাহ– বাযুরিত্যাদি| ক্ষ্বেডমেব ব্যাকরোতি– বেণুঘোষোপমং স্বনমিতি| ননু, কর্ণনাদাত্ কথমস্য ভেদঃ? উচ্যতে– কর্ণনাদে কেবলানিলজে নানাশব্দান্ শৃণোতি, অত্র তু বেণুশব্দমেব নিযমেন; তথাঽযং পিত্তাদিসংসৃষ্টবাতজন্য ইতি| তথাহ বিদেহঃ– “মারুতঃ কফপিত্তাভ্যাং সংসৃষ্টঃ শোণিতেন চ| কর্ণক্ষ্বেডং সঞ্জনযেত্ ক্ষ্বেডনং বেণুঘোষবত্||” ইতি||৪||

আতঙ্কদর্পণ ব্যাখ্যা (বাচস্পতি বৈদ্য কৃত)

কর্ণক্ষ্বেডমাহ– বাযুরিত্যাদি| ননু? কর্ণনাদকর্ণক্ষ্বেডযোঃ কো ভেদঃ? উচ্যতে– কর্ণনাদে কেবলানিলজে নানাশব্দান্ শৃণোতি, অত্র তু বেণুশব্দমেব নিযমেন, তথাঽযং পিত্তাদিসংসৃষ্টবাতজন্যঃ| তথাচ বিদেহঃ– “মারুতঃ কফপিত্তাভ্যাং সংসৃষ্টঃ শোণিতেন চ| কর্ণক্ষ্বেডং সঞ্জনযেত্ক্ষ্বেডনং বেণুঘোষবত্||” ইতি||৪||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

কর্ণস্রাবমাহ– শিরোঽভিঘাতাদিত্যাদি| স্রবেদ্ধি পূযমিত্যুপলক্ষণং, তেন রক্তজলে চ স্রবত ইতি মন্তব্যং, শিরোঽভিঘাতজলমজ্জনমাত্রেণ পূযস্যাসম্ভবাত্; অথবা প্রপাকাদিতি সর্বত্র সম্বধ্যতে; তর্হি ন পাকাত্ পৃথক্ স্রাব উক্তঃ, সর্বত্র পাকস্যাবিশিষ্টত্বাদিতি কার্তিকঃ| ননু, পাকাত্ বিদ্রধেঃ স্রাবসম্ভবোঽস্তু, বিদ্রধৌ তু বাতেতরদোষস্যাপি সম্ভবাত্ কথমনিলার্দিত ইত্যুক্তম্? উচ্যতে– অতিস্রাবেণাত্রানিলকোপাদনিলার্দিতত্বং বোদ্ধব্যম্||৫||

আতঙ্কদর্পণ ব্যাখ্যা (বাচস্পতি বৈদ্য কৃত)

কর্ণস্রাবমাহ– শিরোঽভিঘাতাদিত্যাদি| অত্র পূযমিত্যুপলক্ষণং, তেন রক্তজলে চ স্রবত ইতি মন্তব্যম্| অত্র প্রপাকাদিতি সর্বত্র সম্বধ্যতে, তর্হি ন পাকাত্পৃথক্ স্রাব উক্তঃ স্যাত্, সর্বত্র পাকস্যাবিশিষ্টত্বাদিতি কার্তিকঃ| ননু, পাকাদ্বিদ্রধেঃ স্রাবসম্ভবোঽস্তু, বিদ্রধৌ তু বাতেতরদোষস্যাপি সদ্ভাবাত্তত্কথমনিলার্দিত ইত্যুক্তং? উচ্যতে, অতিস্রাবেণাত্রানিলকোপাদনিলার্দিতত্বং বোদ্ধব্যম্| শিরোঽভিঘাতাত্, অথবা জলে নিমজ্জতঃ, অথবা বিদ্রধেঃ কর্ণবিদ্রধেঃ প্রপাকাদনিলার্দিতঃ শ্রবণঃ পূযং স্রবেত্, স কর্ণসংস্রাবাখ্যো রোগ উক্তঃ||৫||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

কর্ণপ্রতিনাহমাহ– স কর্ণগূথো দ্রবতামিত্যাদি| বিলাযিত ইতি স্নেহস্বেদাভ্যাং বিলীনীকৃতঃ সন্| ঘ্রাণমুখমিতি দ্বন্দ্বত্বাদেকবদ্ভাবঃ, তেন ঘ্রাণং চ মুখং চ প্রতিপদ্যতে ইত্যর্থঃ| অন্যে ‘ঘ্রাণমুখাত্’ ইতি পঠন্তি, তদা ঘ্রাণমুখাত্ নাসাসকাশাত্ প্রতিপদ্যতে গচ্ছতীত্যর্থঃ| অযং কফজো বিকারঃ; অথবা কর্ণগূথশোষে মারুতপিত্তব্যাপারাত্ত্রযাণামপি সম্বন্ধোঽস্তি, তেন সন্নিপাতজোঽযং; তথাচ বিদেহঃ– “কফাদ্বা মারুতাদ্বাঽপি সন্নিপাতেন বা পুনঃ|” ইতি| শিরসোঽর্ধভেদকৃদিতি অর্ধাবভেদশিরোরোগকৃত্||৬-৭||

আতঙ্কদর্পণ ব্যাখ্যা (বাচস্পতি বৈদ্য কৃত)

কর্ণকণ্ডূমাহ– মারুত ইত্যাদি| সুগমম্| কর্ণগূথমাহ– পিত্তেত্যাদি| সুগমম্| কর্ণপ্রতিনাহমাহ– স ইত্যাদি| যদা স কর্ণগূথো বিলাযিত ইতি স্নেহস্বেদাভ্যাং বিলীনীকৃতো দ্রবতাং গতঃ সন্| ঘ্রাণমুখমিতি দ্বন্দ্বৈকবদ্ভাবঃ, তেন ঘ্রাণং মুখং চ প্রতিপদ্যত ইত্যর্থঃ| অন্যে ‘ঘ্রাণমুখাদ্’ ইতি পঠন্তি, তদা ঘ্রাণমুখাত্সকাশাত্প্রতিপদ্যতে গচ্ছতীত্যর্থঃ| তদা স কর্ণপ্রতিনাহসঞ্জ্ঞিতো বিকারো ভবেত্| অযং কফজো বিকারঃ; অথবা কর্ণগূথশোথে মারুতপিত্তব্যাখ্যাপারাত্তযোরপ্যত্র সম্বন্ধোঽস্তি, তেন সন্নিপাতজোঽযম্| তথাহি বিদেহঃ– “কফাদ্বা মারুতাদ্বাঽপি সহ পিত্তেন বা পুনঃ|” ইতি| শিরসোঽর্ধভেদকৃদিতি অর্ধাবভেদশিরোরোগকৃত্||৬-৭||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ক্রিমিকর্ণকমাহ– যদা তু মূর্ছন্তীত্যাদি| মূর্ছন্তি উচ্ছ্রিতা ভবন্তি| জন্তবঃ ক্রিমযঃ| ক্রিমিমূর্ছনং চ মাংসশোণিতকোথে সতি জ্ঞেযং, তদন্তরেণ ক্রিমীণামসম্ভবাত্| অপত্যানীতি ডিম্ভকান্| তদ্ব্যঞ্জনত্বাদিতি ক্রিমিলক্ষণত্বাত্| শ্রবণো নিরুচ্যতে ইতি ক্রিমিকর্ণকো গদ ইতি আশ্রযাশ্রিতযোরভেদোপচারাচ্ছ্রবণঃ ক্রিমিকর্ণকো গদো ভণ্যতে| শ্রবণশব্দঃ পুংলিঙ্গোঽপ্যস্তীত্যস্মাদেব নির্দেশাত্ প্রতীযতে| অযং বিকারস্ত্রিদোষজো মন্তব্যঃ| তথা চ নিমিঃ– “শ্লেষ্মপিত্তজলোন্মিশ্রে কোথে শোণিতমাংসজে| মূর্ছন্তি জন্তবস্তত্র কৃষ্ণাস্তাম্রাঃ সিতারুণাঃ|| ভক্ষযন্তীব তে কর্ণং কুর্বন্তো বিবিধা রুজঃ| ক্রিমিকর্ণং তু তং বিদ্যাত্ সন্নিপাতপ্রকোপজম্||” ইতি||৮||

আতঙ্কদর্পণ ব্যাখ্যা (বাচস্পতি বৈদ্য কৃত)

কৃমিকর্ণকমাহ– যদেত্যাদি| মূর্ছন্তি উচ্ছ্রিতা ভবন্তি, জন্তবঃ কৃমযঃ, কৃমিমূর্ছনং চ মাংসশোণিতকোথে সতি জ্ঞেযং, তমন্তরেণ কৃমীণামসম্ভবাত্| অপত্যানি ডিম্ভকান্ সূক্ষ্মকৃমীনিতি যাবত্| মক্ষিকা মম্মণাখ্যা নীলবর্ণাঃ| আদ্যৈর্গ্ভিষভির্বিদেহাদিভিঃ, তদ্ব্যঞ্জনত্বাদিতি কৃমিলক্ষণত্বাত্, আশ্রযাশ্রিতযোরভেদোপচারাত্ শ্রবণঃ কৃমিকর্ণকো গদো ভণ্যতে| শ্রবণশব্দঃ পুংল্লিঙ্গোঽপ্যস্তীত্যস্মাদেব নির্দেশাত্প্রতীযতে| অযং বিকারস্ত্রিদোষজো মন্তব্যঃ| তথাচ নিমিঃ– “শ্লেষ্মপিত্তজলোন্মিশ্রে কোথে শোণিতমাংসজে| জাযন্তে জন্তবস্তত্র কৃষ্ণাস্তাম্রাঃ সিতারুণাঃ|| ভক্ষযন্তীব তে কর্ণং কুর্বন্তো বিবিধা রুজঃ| কৃমিকর্ণং তু তং বিদ্যাত্সন্নিপাতপ্রকোপজম্||” ইতি||৮||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

কর্ণপ্রবিষ্টপতঙ্গকীটাদিলিঙ্গমাহ– পতঙ্গা ইত্যাদি| শতপদ্য ইতি কারণ্ডিকাঃ| নিষ্পন্দে ইতি স্থিরে||৯-১০||

আতঙ্কদর্পণ ব্যাখ্যা (বাচস্পতি বৈদ্য কৃত)

কর্ণপ্রবিষ্টকীটপতঙ্গাদিলিঙ্গমাহ– পতঙ্গা ইত্যাদি| শতপদ্যঃ কারণ্ডিকাঃ| নিস্তুদ্যতে প্রাজনেনেব| অন্যত্ সুগমম্||৯-১০||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

কর্ণবিদ্রধিমাহ– ক্ষতাভিঘাতপ্রভবস্ত্বিত্যাদি| ক্ষতপ্রভবোঽভিঘাতপ্রভবশ্চ, ক্ষতাভিঘাতপ্রভবযোরাগন্তুকত্বাদেকত্বম্, এবং বাতাদিজস্যাপি দোষজত্বাদেকত্বম্| সরক্তপীতারুণমস্রমাস্রবেদিতি অস্রমাস্রাবং, সরক্তপীতারুণবর্ণত্বং চাস্রাবস্য বাতপিত্তকফসম্ভবাত্||১১||

আতঙ্কদর্পণ ব্যাখ্যা (বাচস্পতি বৈদ্য কৃত)

কর্ণবিদ্রধিমাহ– ক্ষতেত্যাদি| ক্ষতপ্রভবশ্চাভিঘাতপ্রভবশ্চ, ক্ষতাভিঘাতপ্রভবযোরাগন্তুকত্বাদৈক্যম্| এবং বাতাদিজস্যাপি দোষজত্বাদেকত্বম্| ক্ষতবিদ্রধের্লক্ষণমাহ– সেত্যাদি| অস্রং আস্রাবং, রক্তপীতারুণবর্ণত্বং চাস্রাবস্য বাতপিত্তরক্তসম্ভবত্বাত্| ধূমাযনং ধূমোদ্বমনমিব বেদনাবিশেষঃ, চোষ আচূষ্যত ইব বেদনাবিশেষঃ| দোষবিদ্রধের্লক্ষণং তৈরেব জ্ঞাতব্যম্||১১||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

কর্ণপাকলক্ষণমাহ– কর্ণপাক ইত্যাদি| কোথবিক্লেদকৃদিতি কোথঃ পূতিভাবঃ, বিক্লেদ আর্দ্রতা| ননু, কর্ণগূথলক্ষণে পিত্তেন শোষণমুক্তং, তত্কথমার্দ্রতা? নৈবম্, এবংবিকারজনককর্মসহকারিণা দ্রবাংশোদ্রিক্তেন পিত্তেনার্দ্রতা, তত্র ত্বেতদ্বিপরীতত্বেন শোষঃ||১২||

আতঙ্কদর্পণ ব্যাখ্যা (বাচস্পতি বৈদ্য কৃত)

কর্ণপাকলক্ষণমাহ– কর্ণেত্যাদি| কোথবিক্লেদকৃদিতি কোথঃ পূতিভাবঃ, বিক্লেদ আর্দ্রতা| কর্ণবিদ্রধিপাকাত্, অথবা অম্বুপূরণাত্ কর্ণপাকো জাযতে| ননু, কর্ণগূথলক্ষণে পিত্তেন শোষণমুক্তং, তত্কথমার্দ্রতা? মৈবম্, এতদ্বিকারজনককর্মসহকারিণা দ্রবাংশোদ্রিক্তেন পিত্তেনার্দ্রতা, তত্র ত্বেতদ্বিপরীতেন শোষঃ||১২||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পূতিকর্ণলক্ষণমাহ– পূযমিত্যাদি| পূযং স্রবতি বা পূতীতি ক্রিযাবিশেষণং, বাশব্দোঽত্র সমুচ্চযে; তেনাবেদনত্বং, সবেদনত্বং বা, ঘনস্রাবিত্বং চ সমুচ্চীযতে| ঘনস্রাবনিযমাচ্চ কর্ণস্রাবাদস্য ভেদঃ| তথাচোক্তং সুশ্রুতে– “স্রোতঃস্থিতে শ্লেষ্মণি পিত্ততেজসা বিলীযমানে ভৃশসম্প্রতাপিতে| অবেদনো বাঽথ সবেদনো বা ঘনং স্রবেত্ পূতি চ পূতিকর্ণঃ||” ইতি| (সু. উ. তং. অ. ২০)| পূতিমান্ কর্ণঃ পূতিকর্ণঃ|১৩|–

আতঙ্কদর্পণ ব্যাখ্যা (বাচস্পতি বৈদ্য কৃত)

পূতিকর্ণলক্ষণমাহ– পূযমিত্যাদি| পূতীতি ক্রিযাবিশেষণং, বাশব্দোঽত্র সমুচ্চযে; তেনাবেদনত্বং সবেদনত্বং বা, ঘনস্রাবিত্বং চ সমুচ্চীযতে| ঘনস্রাবনিযমাচ্চ কর্ণস্রাবাদস্য ভেদঃ| তথাচোক্তং সুশ্রুতে– “ শ্রোতঃস্থিতে শ্লেষ্মণি পিত্ততেজসা বিলীযমানে ভৃশসম্প্রতাপিতে| অবেদনো বাঽপ্যথবা সবেদনো ঘনং স্রবেত্পূতি চ পূতিকর্ণঃ||” ইতি| (সু. উ. তং. অ. ২০)| পূতিমান্ কর্ণঃ পূতিকর্ণকঃ|১৩|–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ইদানীং সঙ্খ্যাপূরণার্থং কর্ণগতশোথার্বুদার্শসামতিদেশেন লক্ষণমাহ– কর্ণশোথেত্যাদি| কর্ণশোথাশ্চত্বারো বাতপিত্তকফরক্তজত্বেন; এবমর্শশ্চতুর্বিধং, সহজসন্নিপাতজার্শসোঃ সন্নিপাতাগন্তুজশোথযোশ্চাত্রাসম্ভূতিরাধারপ্রভাবাত্| অর্বুদং চ সপ্তবিধং বাতপিত্তকফরক্তমাংসমেদঃসিরানিমিত্তভেদাত্; সিরাজস্য বাতজাবরুদ্ধস্যাত্র পৃথগ্গণনং শালাক্যসিদ্ধান্তসংবাদাদিতি কার্তিকঃ| যথা সুশ্রুতে এব কর্ণরোগানন্তরম্– “দোষৈস্ত্রিভিস্তৈঃ পৃথগেকশশ্চ ব্রূযাত্তথাঽর্শাংসি তথৈব শোথান্| শালাক্যসিদ্ধান্তমবেক্ষ্য চাপি সর্বাত্মকং সপ্তমমর্বুদং তু||” (সু. উ. তং. অ. ২২) ইতি| নাসারোগেঽভিধাস্যতি, তথেহাপি যুজ্যতে; তেন রক্তজস্য পিত্তসমানলিঙ্গত্বাত্ পিত্তজেঽন্তর্ভাবঃ, তথাঽঽগন্তুজস্যাপি রক্তপিত্তলিঙ্গত্বাত্ পিত্তজ এবান্তর্ভাবঃ; তেন শোথঃ সন্নিপাতজোঽত্র অগণনীযঃ, এবং সহজরক্তজযোর্দোষজ এবান্তর্ভাবাত্ সন্নিপাতজমর্শোঽপৃথগ্গণনীযম্, অর্বুদং চ সন্নিপাতজং সপ্তমিতি, এবমেভিঃ সহাষ্টাবিংশতিঃ সুশ্রুতোক্তাঃ কর্ণরোগা ভবন্তি||১৩||

আতঙ্কদর্পণ ব্যাখ্যা (বাচস্পতি বৈদ্য কৃত)

কর্ণগতশোফার্বুদার্শসামতীতাবেক্ষণেন লক্ষণমাহ– কর্ণেত্যাদি| যদ্যপি শোফাদযঃ প্রাঙ্নির্দিষ্টাঃ, তথাপি কর্ণরোগসঙ্গ্রহার্থং সাধ্যাসাধ্যবিভাগার্থং চ পুনর্নির্দিষ্টাঃ কর্ণশোফাশ্চত্বারঃ, বাতপিত্তকফরক্তজত্বেনেতি; এবমর্শশ্চতুর্বিধম্| সহজসন্নিপাতজার্শসোঃ সন্নিপাতজাগন্তুজশোফযোশ্চাত্রাসম্ভূতিরাধারশ্চ প্রভাবাত্| অর্বুদং চ সপ্তবিধং বাতপিত্তকফরক্তমাংসমেদঃসিরানিমিত্তভেদাত্; সিরাজন্যস্য বাতজাবরুদ্ধস্যাত্র পৃথগ্দর্শনং শালাক্যসিদ্ধান্তসংবাদাদিতি কার্তিকঃ| যদাহ সুশ্রুত এব কর্ণরোগানন্তরম্– “দোষৈস্ত্রিভিস্তৈঃ পৃথগেকশশ্চ ভূযাত্তথাঽর্শাংসি তথৈব শোফান্| শালাক্যসিদ্ধান্তমবেক্ষ্য চাপি সর্বাত্মকং সপ্তমমর্বুদং স্যাত্||” (সু. উ. তং. অ. ২২) ইতি| নাসারোগেঽভিধাস্যতি, তথেহাপি যুজ্যতে; তেন রক্তজস্য পিত্তলিঙ্গত্বাত্ পিত্তজেঽন্তর্ভাবঃ, আগন্তুজস্যাপি রক্তপিত্তলিঙ্গত্বাত্ পিত্তজ এবান্তর্ভাবঃ; তেন শোফঃ সন্নিপাতজোঽত্রাগণনীযঃ, এবং সহজরক্তজযোর্দোষজ এবান্তর্ভাবাত্ সন্নিপাতজমর্শসোঽপৃথগ্গণনীযম্, অর্বুদং চ সন্নিপাতজং সপ্তমিতি, এবমেভিঃ সহাষ্টাবিংশতিঃ সুশ্রুতোক্তাঃ কর্ণরোগা ভবন্তি||১৩||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ইদানীং চরকোক্তং কর্ণরোগচতুষ্টযং বাতপিত্তকফসন্নিপাতজভেদাদাহ– নাদোঽতিরুগিত্যাদি| অশ্রবণমিতি অশব্দশ্রুতিঃ| বৈশ্রুত্যমিতি বিরুদ্ধশ্রবণম্||১৪-১৫||

আতঙ্কদর্পণ ব্যাখ্যা (বাচস্পতি বৈদ্য কৃত)

ইদানীং চরকোক্তকর্ণরোগচতুষ্টযং বাতপিত্তকফসন্নিপাতজভেদাদাহ– নাদ ইত্যাদি| সুগমম্| বৈশ্রুত্যেতি বৈশ্রুত্যং বিরুদ্ধং শ্রবণং, স্রুতিঃ স্রাবঃ, স্নিগ্ধা স্যাত্||১৪-১৫||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

কর্ণাবযবত্বাত্ কর্ণপাল্যাস্তদ্বিকারানাহ– সৌকুমার্যাদিত্যাদি| সৌকুমার্যাদ্ধেতোশ্চিরং বর্ধনেন ত্যক্তে সহসা চ বর্ধযিতুমারব্ধে কর্ণে শোথঃ, পরিপোটবান্ মনাক্ত্বগবদরণবানিত্যর্থঃ||১৬||

আতঙ্কদর্পণ ব্যাখ্যা (বাচস্পতি বৈদ্য কৃত)

কর্ণাবযবত্বাত্ কর্ণপাল্যাস্তদ্বিকারানাহ– সৌকুমার্যাদিত্যাদি| সৌকুমার্যাদ্ধেতোশ্চিরোত্সৃষ্টে শ্চিরংবর্ধনেন পরিত্যক্তে সহসা চ বর্ধযিতুমারব্ধে কর্ণে শোফঃ, পরিপোটক ইতি পরিপোটবান্ মনাক্ত্বগবদরণবানিত্যর্থঃ| অথ ডল্লনাভিপ্রাযঃ– কর্ণে চিরোত্সৃষ্টে বহুকালমুপেক্ষিতে সহসা ঝটিতি প্রবর্ধিতে সতি সৌকুমার্যাত্ পাল্যাং শোফঃ সরুগিত্যাদিলক্ষণযুক্তঃ স্যাত্ স বাতাত্ পরিপোটকো রোগঃ স্যাত্; চিরোত্সৃষ্টত্বে সৌকুমার্যং হেতুঃ||১৬||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

উত্পাতলক্ষণমাহ– গুর্বিত্যাদি| শ্যাবত্বং ব্যাধিপ্রভাবাত্, পিত্তরক্তযোঃ শ্যাবত্বাজনকত্বাত্; কিংবা বাতানুবন্ধাদত্র শ্যাবত্বম্||১৭||–

আতঙ্কদর্পণ ব্যাখ্যা (বাচস্পতি বৈদ্য কৃত)

উত্পাতলক্ষণমাহ– গুর্বিত্যাদি| শ্যাবত্বং ব্যাধেঃ প্রভাবাত্, পিত্তরক্তযোঃ শ্যাবত্বজনকত্বাভাবাত্; কিঞ্চ বাতানুবন্ধাদত্র শ্যাবত্বম্||১৭||–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

উন্মন্থকমাহ– কর্ণমিত্যাদি| স্তব্ধত্বং বাতকৃতং, কণ্ডূঃ কফাত্, ইতি বাতকফলিঙ্গম্||১৮-২০||

আতঙ্কদর্পণ ব্যাখ্যা (বাচস্পতি বৈদ্য কৃত)

উন্মন্থকমাহ– কর্ণমিত্যাদি| কর্ণং বলাদ্বর্ধযতঃ পাল্যাং বাযুঃ কোপং যাতি, স বাযুঃ কুপিতঃ সন্ কফং সঙ্গৃহ্য স্তব্ধং তথা অবেদনং শোফং কুরুতে, স কফবাতজঃ উন্মন্থকাখ্যো রোগঃ স্যাত্| স কিংলক্ষণঃ? সকণ্ডূকঃ কণ্ডূযুক্তঃ, স্তব্ধত্বং বাতকৃতং, কণ্ডূঃ কফাদিতি বাতকফলিঙ্গম্| দুঃখবর্ধনমাহ– সংবর্ধমান ইত্যাদি| কর্ণে দুর্বিদ্ধে দৈবকৃতচ্ছিদ্রমতিক্রম্য বিদ্ধে সংবর্ধমানে সতি কণ্ড্বাদিযুক্তঃ শোফো ভবতি, পাকশ্চাত্র দোষত্রযোত্থঃ| দুঃখবর্ধনাত্ দুঃখবর্ধনকো নাম রোগঃ||১৮-২০||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পরিলেহীমাহ– কফাসৃগিত্যাদি| স বিসর্পন্নিতি স ইতি পিডকাত্মকো বিকার; ‘বিসর্পান্বিতঃ’ ইতি পাঠান্তরে বিসর্পেণান্বিতঃ| লিহেদিতি নির্মাংসীং করোতি আচ্ছাদযেদ্বা||২১-২২||

আতঙ্কদর্পণ ব্যাখ্যা (বাচস্পতি বৈদ্য কৃত)

পরিলেহীমাহ– কফেত্যাদি| লিহেদিতি নির্মাংসীং করোতি উত্সাদযতি বা, ‘সবিসর্পান্বিতঃ’ ইতি পাঠান্তরে বিসর্পেণান্বিতঃ||২১-২২||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ইতি শ্রীকণ্ঠদত্তকৃতাযাং মধুকোশব্যাখ্যাযাং কর্ণরোগনিদানং সমাপ্তম্||৫৭||

আতঙ্কদর্পণ ব্যাখ্যা (বাচস্পতি বৈদ্য কৃত)

ইতি শ্রীবাচস্পতিবৈদ্যবিরচিতাযাং মাধবনিদানব্যাখ্যাযামাতঙ্কদর্পণাখ্যাযাং কর্ণরোগনিদানম্||৫৭||