Adhikarana 1 (1-2) · Śloka 2
athātō mahārōgādhyāyaṁ vyākhyāsyāmaḥ||1|| iti ha smāha bhagavānātrēyaḥ||2||
अथातो महारोगाध्यायं व्याख्यास्यामः||१|| इति ह स्माह भगवानात्रेयः||२||
🔊 Audio coming soon
pūrvaṁ sāmānyēna vātādijanyā gadā uktāḥ, sampratyavaśiṣṭān kēvalavātādijanyānabhidhātuṁ mahārōgādhyādhyō'bhidhīyatē ||1-2||
Adhikarana 2 (3) · Śloka 3
catvārō rōgā bhavanti- āgantuvātapittaślēṣmanimittāḥ; tēṣāṁ caturṇāmapi rōgāṇāṁ rōgatvamēkavidhaṁ bhavati, ruksāmānyāt; dvividhā punaḥ prakr̥tirēṣām, āgantunijavibhāgāt; dvividhaṁ caiṣāmadhiṣṭhānaṁ, manaḥśarīraviśēṣāt ; vikārāḥ punaraparisaṅkhyēyāḥ, prakr̥tyadhiṣṭhānaliṅgāyatanavikalpaviśēṣāparisaṅkhyēyatvāt ||3||
चत्वारो रोगा भवन्ति- आगन्तुवातपित्तश्लेष्मनिमित्ताः; तेषां चतुर्णामपि रोगाणां रोगत्वमेकविधं भवति, रुक्सामान्यात्; द्विविधा पुनः प्रकृतिरेषाम्, आगन्तुनिजविभागात्; द्विविधं चैषामधिष्ठानं, मनःशरीरविशेषात् ; विकाराः पुनरपरिसङ्ख्येयाः, प्रकृत्यधिष्ठानलिङ्गायतनविकल्पविशेषापरिसङ्ख्येयत्वात् ||३||
🔊 Audio coming soon
āgantōruktasyāpi triśōthīyē punariha viśēṣēṇa lakṣaṇādyabhidhānārthamabhidhānam| prakr̥tiriha svabhāvaḥ| manaḥśarīraviśēṣāditi āgantōrapi manaḥ śarīraṁ cādhiṣṭhānam, ēvaṁ nijasyāpi; āgantugrahaṇēna ca mānasō'pi kāmādirgr̥hyatē| ēvaṁ caturvidhatvādi pratipādya punaḥ prakārāntarēṇāparisaṅkhyēyatāṁ rōgāṇāmāha- vikārā ityādi| punariti vakṣyamāṇaprakārāntarēṇa| prakr̥tiḥ pratyāsannaṁ kāraṇaṁ vātādi, adhiṣṭhānaṁ dūṣyaṁ, liṅgāni lakṣaṇāni, āyatanāni bāhyahētavō duṣṭāhārācārāḥ; ēṣāṁ vikalparūpō viśēṣō vikalpaviśēṣaḥ, tēṣāmaparisaṅkhyēyatvāditi| atra dōṣāḥ saṁsargāṁśāṁśavikalpādibhirasaṅkhyēyāḥ, dūṣyāstu śarīrāvayavā aṇuśaḥ parasparamēlakēna vibhajyamānā asaṅkhyēyāḥ, liṅgāni kr̥tsnavikāragatānyasaṅkhyēyānyēva, āviṣkr̥tāni tu tantrē kathitāni, hētavaścāvāntaraviśēṣādasaṅkhyēyāḥ pravyaktā ēva| kēcit punaḥ ‘ēṣāṁ vikārāḥ’ iti paṭhanti, sa tu pāṭhō nānumatastāvat; yadi ca syāttadā dēhamanaḥpratyavamarśakam ēṣām iti padaṁ, bahuvacanaṁ tu manaḥśarīrayōrbahutvavivakṣayā||3||
Adhikarana 3 (4) · Śloka 4
mukhāni tu khalvāgantōrnakhadaśanapatanābhicārābhiśāpābhiṣaṅgābhighātavyadha- bandhanavēṣṭanapīḍanarajjudahanaśastrāśanibhūtōpasargādīni, nijasya tu mukhaṁ vātapittaślēṣmaṇāṁ vaiṣamyam||4||
मुखानि तु खल्वागन्तोर्नखदशनपतनाभिचाराभिशापाभिषङ्गाभिघातव्यध- बन्धनवेष्टनपीडनरज्जुदहनशस्त्राशनिभूतोपसर्गादीनि, निजस्य तु मुखं वातपित्तश्लेष्मणां वैषम्यम्||४||
🔊 Audio coming soon
mukhāni kāraṇāni; yathā “rajasvalāgamanamalakṣmīmukhānām” (sū. 25) iti||4||
Adhikarana 4 (5) · Śloka 5
dvayōstu khalvāgantunijayōḥ prēraṇamasātmyēndriyārthasaṁyōgaḥ, prajñāparādhaḥ, pariṇāmaścēti||5||
द्वयोस्तु खल्वागन्तुनिजयोः प्रेरणमसात्म्येन्द्रियार्थसंयोगः, प्रज्ञापराधः, परिणामश्चेति||५||
🔊 Audio coming soon
prēraṇamiti kāraṇam, anēkārthatvāddhātūnām||5||
Adhikarana 5 (6) · Śloka 6
sarvē'pi tu khalvētē'bhipravr̥ddhāścatvārō rōgāḥ parasparamanubadhnanti, na cānyōnyēna saha sandēhamāpadyantē ||6||
सर्वेऽपि तु खल्वेतेऽभिप्रवृद्धाश्चत्वारो रोगाः परस्परमनुबध्नन्ति, न चान्योन्येन सह सन्देहमापद्यन्ते ||६||
🔊 Audio coming soon
anubadhnanti anugacchanti| na sandēhamāpadyanta iti na sandēhaviṣayatāmāpadyantē; miśrībhūtā api pratisvaṁ bhinnairlakṣaṇairbhēdēna jñāyanta ityarthaḥ||6||
Adhikarana 6 (7) · Śloka 7
āganturhi vyathāpūrvaṁ samutpannō jaghanyaṁ vātapittaślēṣmaṇāṁ vaiṣamyamāpādayati; nijē tu vātapittaślēṣmāṇaḥ pūrvaṁ vaiṣamyamāpadyantē jaghanyaṁ vyathāmabhinirvartayanti||7||
आगन्तुर्हि व्यथापूर्वं समुत्पन्नो जघन्यं वातपित्तश्लेष्मणां वैषम्यमापादयति; निजे तु वातपित्तश्लेष्माणः पूर्वं वैषम्यमापद्यन्ते जघन्यं व्यथामभिनिर्वर्तयन्ति||७||
🔊 Audio coming soon
āgantunijayōrbhēdakaṁ lakṣaṇamāha- āganturhītyādi| āganturutpannaḥ san, vyathāpūrvamiti pīḍāṁ prathamaṁ kr̥tvā, paścāddōṣāṇāṁ vaiṣamyamiti dōṣavaiṣamyalakṣaṇamuktaṁ; svalakṣaṇakārakaṁ tu vaiṣamyamāgantōrāditaḥprabhr̥ti vidyamānamapyakiñcitkaramiti bhāvaḥ||7||
Adhikarana 7 (8) · Śloka 8
tēṣāṁ trayāṇāmapi dōṣāṇāṁ śarīrē sthānavibhāga upadēkṣyatē; tadyathā- bastiḥ purīṣādhānaṁ kaṭiḥ sakthinī pādāvasthīni pakvāśayaśca vātasthānāni, tatrāpi pakvāśayō viśēṣēṇa vātasthānaṁ; svēdō rasō lasīkā rudhiramāmāśayaśca pittasthānāni, tatrāpyāmāśayō viśēṣēṇa pittasthānam; uraḥ śirō grīvā parvāṇyāmāśayō mēdaśca ślēṣmasthānāni, tatrāpyurō viśēṣēṇa ślēṣmasthānam||8||
तेषां त्रयाणामपि दोषाणां शरीरे स्थानविभाग उपदेक्ष्यते; तद्यथा- बस्तिः पुरीषाधानं कटिः सक्थिनी पादावस्थीनि पक्वाशयश्च वातस्थानानि, तत्रापि पक्वाशयो विशेषेण वातस्थानं; स्वेदो रसो लसीका रुधिरमामाशयश्च पित्तस्थानानि, तत्राप्यामाशयो विशेषेण पित्तस्थानम्; उरः शिरो ग्रीवा पर्वाण्यामाशयो मेदश्च श्लेष्मस्थानानि, तत्राप्युरो विशेषेण श्लेष्मस्थानम्||८||
🔊 Audio coming soon
āgantunijayōrbhēdakaṁ lakṣaṇamabhidhāya nijavikārakarāṇāṁ vātādīnāṁ bhēdajñānārthamāha- tēṣāmityādi| purīṣādhānaṁ pakvāśayaḥ| yadyapi prāṇādibhēdabhinnasya vāyōḥ pr̥thagēva sthānāni vakṣyati; yathā- “sthānaṁ prāṇasya śīrṣōraḥkaṇṭhajihvāsyanāsikāḥ ” (ci. 28) ityādi; tathā'pīdaṁ vaiśēṣikaṁ sthānaṁ jñēyaṁ, yatō'tra prāyō vātavikārā bhavanti, bhūtāśca durjayāḥ; atra ca vijitē vātē sarvavātavikārāvajaya iti| lasīkā udakasya picchābhāgaḥ| pittasthānēṣu āmāśaya iti āmāśayādhōbhāgāḥ, ślēṣmasthānēṣvāmāśaya āmāśayōrdhvabhāgaḥ||8||
Adhikarana 8 (9-11) · Śloka 11
sarvaśarīracarāstu vātapittaślēṣmāṇaḥ sarvasmiñcharīrē kupitākupitāḥ śubhāśubhāni kurvanti- prakr̥tibhūtāḥ śubhānyupacayabalavarṇaprasādādīni, aśubhāni punarvikr̥timāpannā vikārasañjñakāni||9|| tatra vikārāḥ sāmānyajā, nānātmajāśca| tatra sāmānyajāḥ pūrvamaṣṭōdarīyē vyākhyātāḥ, nānātmajāṁstvihādhyāyē'nuvyākhyāsyāmaḥ| tadyathā- aśītirvātavikārāḥ, catvāriṁśat pittavikārāḥ, viṁśatiḥ ślēṣmavikārāḥ||10|| tatrādau vātavikārānanuvyākhyāsyāmaḥ| tadyathā- nakhabhēdaśca, vipādikā ca, pādaśūlaṁ ca, pādabhraṁśaśca, pādasuptatā ca, vātakhuḍḍatā ca, gulphagrahaśca, piṇḍikōdvēṣṭanaṁ ca, gr̥dhrasī ca, jānubhēdaśca, jānuviślēṣaśca, ūrustambhaśca, ūrusādaśca, pāṅgulyaṁ ca, gudabhraṁśaśca, gudārtiśca, vr̥ṣaṇākṣēpaśca , śēphastambhaśca, vaṅkṣaṇānāhaśca, śrōṇibhēdaśca, viḍbhēdaśca, udāvartaśca, khañjatvaṁ ca, kubjatvaṁ ca, vāmanatvaṁ ca, trikagrahaśca, pr̥ṣṭhagrahaśca, pārśvāvamardaśca, udarāvēṣṭaśca, hr̥nmōhaśca , hr̥ddravaśca, vakṣaudgharṣaśca , vakṣauparōdhaśca, vakṣastōdaśca, bāhuśōṣaśca, grīvāstambhaśca, manyāstambhaśca, kaṇṭhōddhvaṁsaśca, hanubhēdaśca , ōṣṭhabhēdaśca, akṣibhēdaśca , dantabhēdaśca, dantaśaithilyaṁ ca, mūkatvaṁ ca , vāksaṅgaśca, kaṣāyāsyatā ca, mukhaśōṣaśca, arasajñatā ca, ghrāṇanāśaśca, karṇaśūlaṁ ca, aśabdaśravaṇaṁ ca, uccaiḥśrutiśca , bādhiryaṁ ca, vartmastambhaśca, vartmasaṅkōcaśca, timiraṁ ca, akṣiśūlaṁ ca, akṣivyudāsaśca, bhrūvyudāsaśca, śaṅkhabhēdaśca, lalāṭabhēdaśca, śirōruk ca, kēśabhūmisphuṭanaṁ ca, arditaṁ ca, ēkāṅgarōgaśca, sarvāṅgarōgaśca, pakṣavadhaśca , ākṣēpakaśca, daṇḍakaśca, tamaśca , bhramaśca, vēpathuśca, jr̥mbhā ca, hikkā ca, viṣādaśca, atipralāpaśca, raukṣyaṁ ca, pāruṣyaṁ ca, śyāvāruṇāvabhāsatā ca, asvapnaśca, anavasthitacittatvaṁ ca; ityaśītirvātavikārā vātavikārāṇāmaparisaṅkhyēyānāmāviṣkr̥tatamā vyākhyātāḥ||11||
सर्वशरीरचरास्तु वातपित्तश्लेष्माणः सर्वस्मिञ्छरीरे कुपिताकुपिताः शुभाशुभानि कुर्वन्ति- प्रकृतिभूताः शुभान्युपचयबलवर्णप्रसादादीनि, अशुभानि पुनर्विकृतिमापन्ना विकारसञ्ज्ञकानि||९|| तत्र विकाराः सामान्यजा, नानात्मजाश्च| तत्र सामान्यजाः पूर्वमष्टोदरीये व्याख्याताः, नानात्मजांस्त्विहाध्यायेऽनुव्याख्यास्यामः| तद्यथा- अशीतिर्वातविकाराः, चत्वारिंशत् पित्तविकाराः, विंशतिः श्लेष्मविकाराः||१०|| तत्रादौ वातविकाराननुव्याख्यास्यामः| तद्यथा- नखभेदश्च, विपादिका च, पादशूलं च, पादभ्रंशश्च, पादसुप्तता च, वातखुड्डता च, गुल्फग्रहश्च, पिण्डिकोद्वेष्टनं च, गृध्रसी च, जानुभेदश्च, जानुविश्लेषश्च, ऊरुस्तम्भश्च, ऊरुसादश्च, पाङ्गुल्यं च, गुदभ्रंशश्च, गुदार्तिश्च, वृषणाक्षेपश्च , शेफस्तम्भश्च, वङ्क्षणानाहश्च, श्रोणिभेदश्च, विड्भेदश्च, उदावर्तश्च, खञ्जत्वं च, कुब्जत्वं च, वामनत्वं च, त्रिकग्रहश्च, पृष्ठग्रहश्च, पार्श्वावमर्दश्च, उदरावेष्टश्च, हृन्मोहश्च , हृद्द्रवश्च, वक्षौद्घर्षश्च , वक्षौपरोधश्च, वक्षस्तोदश्च, बाहुशोषश्च, ग्रीवास्तम्भश्च, मन्यास्तम्भश्च, कण्ठोद्ध्वंसश्च, हनुभेदश्च , ओष्ठभेदश्च, अक्षिभेदश्च , दन्तभेदश्च, दन्तशैथिल्यं च, मूकत्वं च , वाक्सङ्गश्च, कषायास्यता च, मुखशोषश्च, अरसज्ञता च, घ्राणनाशश्च, कर्णशूलं च, अशब्दश्रवणं च, उच्चैःश्रुतिश्च , बाधिर्यं च, वर्त्मस्तम्भश्च, वर्त्मसङ्कोचश्च, तिमिरं च, अक्षिशूलं च, अक्षिव्युदासश्च, भ्रूव्युदासश्च, शङ्खभेदश्च, ललाटभेदश्च, शिरोरुक् च, केशभूमिस्फुटनं च, अर्दितं च, एकाङ्गरोगश्च, सर्वाङ्गरोगश्च, पक्षवधश्च , आक्षेपकश्च, दण्डकश्च, तमश्च , भ्रमश्च, वेपथुश्च, जृम्भा च, हिक्का च, विषादश्च, अतिप्रलापश्च, रौक्ष्यं च, पारुष्यं च, श्यावारुणावभासता च, अस्वप्नश्च, अनवस्थितचित्तत्वं च; इत्यशीतिर्वातविकारा वातविकाराणामपरिसङ्ख्येयानामाविष्कृततमा व्याख्याताः||११||
🔊 Audio coming soon
sāmānyajā iti vātādibhiḥ pratyēkaṁ militaiśca yē janyantē| nānātmajā iti yē vātādibhirdōṣāntarāsampr̥ktairjanyantē| vipādikā pāṇipādasphuṭanam| pādabhraṁśaḥ pādasyārōpaviṣayadēśādanyatra patanam| suptiḥ pādayōrniṣkriyatvaṁ sparśājñatā vā| vātakhuḍḍatā ‘cāluka’ iti prasiddhaḥ| gr̥dhrasīśabdēna gr̥dhrasīśūlaṁ gr̥hyatē| ūrustambhēna ca ūrustambhanamātraṁ vātajanyatvēna gr̥hyatē| ēvaṁ karṇākṣiśūlayōḥ śūlamātram| vātajātīsārē'pi viḍbhēdō vātajaḥ| ēvaṁ ca na gr̥dhrasyādīnāṁ sāmānyajatvaṁ, yathōktāṁśasya kēvalavātajanyatvāt| udarasyāvēṣṭanamivōdarāvēṣṭaḥ| aśabdaśravaṇaṁ śabdābhāvē'pi śabdaśravaṇam| uccaiḥśrutiḥ tārasvaramātraśravaṇam, alpaśabdasya tu sarvathaivāśravaṇam| bādhiryaṁ śabdamātrasyaivāśravaṇam| timiraṁ tu vātajamēva, dōṣāntarasambandhastatrānubandharūpaḥ| ēkāṅgarōgaḥ sarvāṅgarōgaścēti jvarādiṣu uṣṇatvaśītatvādīnāṁ kadācidēkāṅgavyāpakatvēnaikāṅgarōgaḥ, tēṣāmēva kadācit sarvāṅgavyāpakatvēna sarvāṅgarōgaḥ; dōṣāntarasambandhē'pi vyāptyavyāptī vātakr̥tē ēva, “vāyunā yatra nīyantē tatra varṣanti mēghavat” iti vacanāt| tathā bhramaśca vātikaḥ smr̥timōharūpaḥ| atra kasyacidaṅgasya pādādēḥ śūlādayō'bhihitā na hastādīnāṁ; tatra yē'bhihitāstē pradhānabhūtāḥ prāyōbhāvitvēna, anuktāstu vātavikārāṇāmaparisaṅkhyēyatvēna grāhyāḥ||9-11||
Adhikarana 9 (12) · Śloka 12
sarvēṣvapi khalvētēṣu vātavikārēṣūktēṣvanyēṣu cānuktēṣu vāyōridamātmarūpamapariṇāmi karmaṇaśca svalakṣaṇaṁ, yadupalabhya tadavayavaṁ vā vimuktasandēhā vātavikāramēvādhyavasyanti kuśalāḥ; tadyathā- raukṣyaṁ śaityaṁ lāghavaṁ vaiśadyaṁ gatiramūrtatvamanavasthitatvaṁ cēti vāyōrātmarūpāṇi; ēvaṁvidhatvācca vāyōḥ karmaṇaḥ svalakṣaṇamidamasya bhavati taṁ taṁ śarīrāvayavamāviśataḥ ; tadyathā- sraṁsabhraṁsavyāsasaṅgabhēdasādaharṣatarṣakampavartacālatōdavyathācēṣṭādīni , tathā kharaparuṣaviśadasuṣirāruṇavarṇakaṣāyavirasamukhatvaśōṣaśūlasuptisaṅkōcanastambhanakhañjatādīni ca vāyōḥ karmāṇi; tairanvitaṁ vātavikāramēvādhyavasyēt||12||
सर्वेष्वपि खल्वेतेषु वातविकारेषूक्तेष्वन्येषु चानुक्तेषु वायोरिदमात्मरूपमपरिणामि कर्मणश्च स्वलक्षणं, यदुपलभ्य तदवयवं वा विमुक्तसन्देहा वातविकारमेवाध्यवस्यन्ति कुशलाः; तद्यथा- रौक्ष्यं शैत्यं लाघवं वैशद्यं गतिरमूर्तत्वमनवस्थितत्वं चेति वायोरात्मरूपाणि; एवंविधत्वाच्च वायोः कर्मणः स्वलक्षणमिदमस्य भवति तं तं शरीरावयवमाविशतः ; तद्यथा- स्रंसभ्रंसव्याससङ्गभेदसादहर्षतर्षकम्पवर्तचालतोदव्यथाचेष्टादीनि , तथा खरपरुषविशदसुषिरारुणवर्णकषायविरसमुखत्वशोषशूलसुप्तिसङ्कोचनस्तम्भनखञ्जतादीनि च वायोः कर्माणि; तैरन्वितं वातविकारमेवाध्यवस्येत्||१२||
🔊 Audio coming soon
vāyōridamityādau vāyōridamātmarūpaṁ svarūpam| apariṇāmīti sahajasiddhaṁ nānyōpādhikr̥tamityarthaḥ| karmaṇaścēti vikr̥tasya vāyōḥ karmaṇaḥ| svalakṣaṇamiti ātmīyaṁ lakṣaṇam| atrāpyapariṇāmīti sambadhyatē; apariṇāmīti pittaślēṣmasambandhanirapēkṣaṁ, na tu śarīrāvayavānapēkṣamiti; yataḥ brūtē- taṁ taṁ śarīrāvayavamāviśataḥ iti; ata ēva ca sraṁsādīnāṁ śarīrāvayavāpēkṣatvēna na sarvadā bhāvaḥ| ēvaṁ ca pittaślēṣmaṇōrapi cātmarūpādi vyākhyēyam| amūrtatvamiti adr̥śyatvam| ēvaṁvidhatvāditi raukṣyādiyuktatvādvāyōriti sambandhaḥ| sraṁsaḥ kiñcitsvasthānacalanam, bhraṁśastu dūragatiḥ| vyāsaḥ vistaraṇam| harṣaḥ vāyōranavasthitatvēna prabhāvādvā kriyatē| vartulīkaraṇaṁ vartaḥ| cālaḥ spandaḥ| rasavarṇau vāyunā rasavarṇarahitēnāpi prabhāvāt kriyētē||12||
Adhikarana 10 (13) · Śloka 13
taṁ madhurāmlalavaṇasnigdhōṣṇairupakramairupakramēta, snēhasvēdāsthāpanānuvāsananastaḥkarmabhōjanābhyaṅgōtsādanapariṣēkādibhirvātaharairmātrāṁ kālaṁ ca pramāṇīkr̥tya; tatrāsthāpanānuvāsanaṁ tu khalu sarvatrōpakramēbhyō vātē pradhānatamaṁ manyantē bhiṣajaḥ, taddhyādita ēva pakvāśayamanupraviśya kēvalaṁ vaikārikaṁ vātamūlaṁ chinatti; tatrāvajitē'pi vātē śarīrāntargatā vātavikārāḥ praśāntimāpadyantē, yathā vanaspatērmūlē chinnē skandhaśākhāprarōhakusumaphalapalāśādīnāṁ niyatō vināśastadvat||13||
तं मधुराम्ललवणस्निग्धोष्णैरुपक्रमैरुपक्रमेत, स्नेहस्वेदास्थापनानुवासननस्तःकर्मभोजनाभ्यङ्गोत्सादनपरिषेकादिभिर्वातहरैर्मात्रां कालं च प्रमाणीकृत्य; तत्रास्थापनानुवासनं तु खलु सर्वत्रोपक्रमेभ्यो वाते प्रधानतमं मन्यन्ते भिषजः, तद्ध्यादित एव पक्वाशयमनुप्रविश्य केवलं वैकारिकं वातमूलं छिनत्ति; तत्रावजितेऽपि वाते शरीरान्तर्गता वातविकाराः प्रशान्तिमापद्यन्ते, यथा वनस्पतेर्मूले छिन्ने स्कन्धशाखाप्ररोहकुसुमफलपलाशादीनां नियतो विनाशस्तद्वत्||१३||
🔊 Audio coming soon
prastāvāgatatvēna cikitsāsūtramāha- taṁ madhurētyādi| ādita ēvēti śīghramēva| kēvalaṁ vaikārikamiti sakalavikārakārakam ||13||
Adhikarana 11 (14-16) · Śloka 16
pittavikārāṁścatvāriṁśatamata ūrdhvamanuvyākhyāsyāmaḥ- ōṣaśca, plōṣaśca, dāhaśca, davathuśca, dhūmakaśca, amlakaśca, vidāhaśca, antardāhaśca, aṁsadāhaśca , ūṣmādhikyaṁ ca, atisvēdaśca (aṅgasvēdaśca), aṅgagandhaśca, aṅgāvadaraṇaṁ ca, śōṇitaklēdaśca, māṁsaklēdaśca, tvagdāhaśca, (māṁsadāhaśca ), tvagavadaraṇaṁ ca, carmadalanaṁ ca, raktakōṭhaśca, raktavisphōṭaśca, raktapittaṁ ca, raktamaṇḍalāni ca, haritatvaṁ ca, hāridratvaṁ ca, nīlikā ca, kakṣā(kṣyā)ca, kāmalā ca, tiktāsyatā ca, lōhitagandhāsyatā ca, pūtimukhatā ca, tr̥ṣṇādhikyaṁ ca, atr̥ptiśca, āsyavipākaśca, galapākaśca, akṣipākaśca, gudapākaśca, mēḍhrapākaśca, jīvādānaṁ ca , tamaḥpravēśaśca, haritahāridranētramūtravarcastvaṁ ca; iti catvāriṁśatpittavikārāḥ pittavikārāṇāmaparisaṅkhyēyānāmāviṣkr̥tatamā vyākhyātāḥ||14|| sarvēṣvapi khalvētēṣu pittavikārēṣūktēṣvanyēṣu cānuktēṣu pittasyēdamātmarūpamapariṇāmi karmaṇaśca svalakṣaṇaṁ, yadupalabhya tadavayavaṁ vā vimuktasandēhāḥ pittavikāramēvādhyavasyanti kuśalāḥ; tadyathā- auṣṇyaṁ taikṣṇyaṁ dravatvamanatisnēhō varṇaśca śuklāruṇavarjō gandhaśca visrō rasau ca kaṭukāmlau saratvaṁ ca pittasyātmarūpāṇi; ēvaṁvidhatvācca pittasya karmaṇaḥ svalakṣaṇamidamasya bhavati taṁ taṁ śarīrāvayavamāviśataḥ; tadyathā- dāhauṣṇyapākasvēdaklēdakōthakaṇḍūsrāvarāgā yathāsvaṁ ca gandhavarṇarasābhinirvartanaṁ pittasya karmāṇi; tairanvitaṁ pittavikāramēvādhyavasyēt||15|| taṁ madhuratiktakaṣāyaśītairupakramairupakramēta snēhavirēkapradēhapariṣēkābhyaṅgādibhiḥ pittaharairmātrāṁ kālaṁ ca pramāṇīkr̥tya; virēcanaṁ tu sarvōpakramēbhyaḥ pittē pradhānatamaṁ manyantē bhiṣajaḥ; taddhyādita ēvāmāśayamanupraviśya kēvalaṁ vaikārikaṁ pittamūlamapakarṣati, tatrāvajitē pittē'pi śarīrāntargatāḥ pittavikārāḥ praśāntimāpadyantē, yathā'gnau vyapōḍhē kēvalamagnigr̥haṁ śītībhavati tadvat||16||
पित्तविकारांश्चत्वारिंशतमत ऊर्ध्वमनुव्याख्यास्यामः- ओषश्च, प्लोषश्च, दाहश्च, दवथुश्च, धूमकश्च, अम्लकश्च, विदाहश्च, अन्तर्दाहश्च, अंसदाहश्च , ऊष्माधिक्यं च, अतिस्वेदश्च (अङ्गस्वेदश्च), अङ्गगन्धश्च, अङ्गावदरणं च, शोणितक्लेदश्च, मांसक्लेदश्च, त्वग्दाहश्च, (मांसदाहश्च ), त्वगवदरणं च, चर्मदलनं च, रक्तकोठश्च, रक्तविस्फोटश्च, रक्तपित्तं च, रक्तमण्डलानि च, हरितत्वं च, हारिद्रत्वं च, नीलिका च, कक्षा(क्ष्या)च, कामला च, तिक्तास्यता च, लोहितगन्धास्यता च, पूतिमुखता च, तृष्णाधिक्यं च, अतृप्तिश्च, आस्यविपाकश्च, गलपाकश्च, अक्षिपाकश्च, गुदपाकश्च, मेढ्रपाकश्च, जीवादानं च , तमःप्रवेशश्च, हरितहारिद्रनेत्रमूत्रवर्चस्त्वं च; इति चत्वारिंशत्पित्तविकाराः पित्तविकाराणामपरिसङ्ख्येयानामाविष्कृततमा व्याख्याताः||१४|| सर्वेष्वपि खल्वेतेषु पित्तविकारेषूक्तेष्वन्येषु चानुक्तेषु पित्तस्येदमात्मरूपमपरिणामि कर्मणश्च स्वलक्षणं, यदुपलभ्य तदवयवं वा विमुक्तसन्देहाः पित्तविकारमेवाध्यवस्यन्ति कुशलाः; तद्यथा- औष्ण्यं तैक्ष्ण्यं द्रवत्वमनतिस्नेहो वर्णश्च शुक्लारुणवर्जो गन्धश्च विस्रो रसौ च कटुकाम्लौ सरत्वं च पित्तस्यात्मरूपाणि; एवंविधत्वाच्च पित्तस्य कर्मणः स्वलक्षणमिदमस्य भवति तं तं शरीरावयवमाविशतः; तद्यथा- दाहौष्ण्यपाकस्वेदक्लेदकोथकण्डूस्रावरागा यथास्वं च गन्धवर्णरसाभिनिर्वर्तनं पित्तस्य कर्माणि; तैरन्वितं पित्तविकारमेवाध्यवस्येत्||१५|| तं मधुरतिक्तकषायशीतैरुपक्रमैरुपक्रमेत स्नेहविरेकप्रदेहपरिषेकाभ्यङ्गादिभिः पित्तहरैर्मात्रां कालं च प्रमाणीकृत्य; विरेचनं तु सर्वोपक्रमेभ्यः पित्ते प्रधानतमं मन्यन्ते भिषजः; तद्ध्यादित एवामाशयमनुप्रविश्य केवलं वैकारिकं पित्तमूलमपकर्षति, तत्रावजिते पित्तेऽपि शरीरान्तर्गताः पित्तविकाराः प्रशान्तिमापद्यन्ते, यथाऽग्नौ व्यपोढे केवलमग्निगृहं शीतीभवति तद्वत्||१६||
🔊 Audio coming soon
ōṣaḥ pārśvasthitēnēva vahninā pīḍā| plōṣaḥ kiñciddahanamiva| dāhaḥ sarvāṅgadahanamiva| davathuḥ ‘dhakadhakikā’ iti lōkē khyātā| dhūmakaḥ dhūmōdvamanamiva| tvagavadaraṇaṁ bāhyatvaṅmātrāvadaraṇaṁ; carmāvadaraṇaṁ tu ṣaṇṇāmapi tvacāṁ daraṇam| raktapittaṁ dōṣāntarāsampr̥ktaṁ raktapittaṁ paittikaṁ jñēyam| ēvaṁ tr̥ṣṇāyāṁ ca tr̥ṣṇāmātram| kakṣā kakṣadēśagatamāṁsadāraṇāḥ sphōṭāḥ suśrutakṣudrarōgōktāḥ| gandhō visra āmagandhaḥ| yathāsvamiti ātmagandhavarṇarasasadr̥śam| agnimadgr̥hamagnigr̥ham||14-16||
Adhikarana 12 (17-19) · Śloka 19
ślēṣmavikārāṁśca viṁśatimata ūrdhvaṁ vyākhyāsyāmaḥ; tadyathā- tr̥ptiśca, tandrā ca, nidrādhikyaṁ ca, staimityaṁ ca, gurugātratā ca, ālasyaṁ ca, mukhamādhuryaṁ ca, mukhasrāvaśca, ślēṣmōdgiraṇaṁ ca, malasyādhikyaṁ ca, balāsakaśca , apaktiśca, hr̥dayōpalēpaśca, kaṇṭhōpalēpaśca, dhamanīprati(vi)cayaśca, galagaṇḍaśca, atisthaulyaṁ ca, śītāgnitā ca, udardaśca, śvētāvabhāsatā ca, śvētamūtranētravarcastvaṁ ca; iti viṁśatiḥ ślēṣmavikārāḥ ślēṣmavikārāṇāmaparisaṅkhyēyānāmāviṣkr̥tatamā vyākhyātā bhavanti||17|| sarvēṣvapi khalvētēṣu ślēṣmavikārēṣūktēṣvanyēṣu cānuktēṣu ślēṣmaṇa idamātmarūpamapariṇāmi karmaṇaśca svalakṣaṇaṁ yadupalabhya tadavayavaṁ vā vimuktasandēhāḥ ślēṣmavikāramēvādhyavasyanti kuśalāḥ; tadyathā- snēhaśaityaśauklyagauravamādhuryasthairyapaicchilyamārtsnyāni ślēṣmaṇa ātmarūpāṇi; ēvaṁvidhatvācca ślēṣmaṇaḥ karmaṇaḥ svalakṣaṇamidamasya bhavati taṁ taṁ śarīrāvayavamāviśataḥ; tadyathā- śvaityaśaityakaṇḍūsthairyagauravasnēhasuptiklēdōpadēhabandhamādhuryacirakāritvāni ślēṣmaṇaḥ karmāṇi; tairanvitaṁ ślēṣmavikāramēvādhyavasyēt||18|| taṁ kaṭukatiktakaṣāyatīkṣṇōṣṇarūkṣairupakramairupakramēta svēdavamanaśirōvirēcanavyāyāmādibhiḥ ślēṣmaharairmātrāṁ kālaṁ ca pramāṇīkr̥tya; vamanaṁ tu sarvōpakramēbhyaḥ ślēṣmaṇi pradhānatamaṁ manyantē bhiṣajaḥ, taddhyādita ēvāmāśayamanupraviśyōrōgataṁ kēvalaṁ vaikārikaṁ ślēṣmamūlamūrdhvamutkṣipati, tatrāvajitē ślēṣmaṇyapi śarīrāntargatāḥ ślēṣmavikārāḥ praśāntimāpadyantē, yathā bhinnē kēdārasētau śāliyavaṣaṣṭikādīnyanabhiṣyandyamānānyambhasā praśōṣamāpadyantē tadvaditi||19||
श्लेष्मविकारांश्च विंशतिमत ऊर्ध्वं व्याख्यास्यामः; तद्यथा- तृप्तिश्च, तन्द्रा च, निद्राधिक्यं च, स्तैमित्यं च, गुरुगात्रता च, आलस्यं च, मुखमाधुर्यं च, मुखस्रावश्च, श्लेष्मोद्गिरणं च, मलस्याधिक्यं च, बलासकश्च , अपक्तिश्च, हृदयोपलेपश्च, कण्ठोपलेपश्च, धमनीप्रति(वि)चयश्च, गलगण्डश्च, अतिस्थौल्यं च, शीताग्निता च, उदर्दश्च, श्वेतावभासता च, श्वेतमूत्रनेत्रवर्चस्त्वं च; इति विंशतिः श्लेष्मविकाराः श्लेष्मविकाराणामपरिसङ्ख्येयानामाविष्कृततमा व्याख्याता भवन्ति||१७|| सर्वेष्वपि खल्वेतेषु श्लेष्मविकारेषूक्तेष्वन्येषु चानुक्तेषु श्लेष्मण इदमात्मरूपमपरिणामि कर्मणश्च स्वलक्षणं यदुपलभ्य तदवयवं वा विमुक्तसन्देहाः श्लेष्मविकारमेवाध्यवस्यन्ति कुशलाः; तद्यथा- स्नेहशैत्यशौक्ल्यगौरवमाधुर्यस्थैर्यपैच्छिल्यमार्त्स्न्यानि श्लेष्मण आत्मरूपाणि; एवंविधत्वाच्च श्लेष्मणः कर्मणः स्वलक्षणमिदमस्य भवति तं तं शरीरावयवमाविशतः; तद्यथा- श्वैत्यशैत्यकण्डूस्थैर्यगौरवस्नेहसुप्तिक्लेदोपदेहबन्धमाधुर्यचिरकारित्वानि श्लेष्मणः कर्माणि; तैरन्वितं श्लेष्मविकारमेवाध्यवस्येत्||१८|| तं कटुकतिक्तकषायतीक्ष्णोष्णरूक्षैरुपक्रमैरुपक्रमेत स्वेदवमनशिरोविरेचनव्यायामादिभिः श्लेष्महरैर्मात्रां कालं च प्रमाणीकृत्य; वमनं तु सर्वोपक्रमेभ्यः श्लेष्मणि प्रधानतमं मन्यन्ते भिषजः, तद्ध्यादित एवामाशयमनुप्रविश्योरोगतं केवलं वैकारिकं श्लेष्ममूलमूर्ध्वमुत्क्षिपति, तत्रावजिते श्लेष्मण्यपि शरीरान्तर्गताः श्लेष्मविकाराः प्रशान्तिमापद्यन्ते, यथा भिन्ने केदारसेतौ शालियवषष्टिकादीन्यनभिष्यन्द्यमानान्यम्भसा प्रशोषमापद्यन्ते तद्वदिति||१९||
🔊 Audio coming soon
tr̥ptiryēna tr̥ptamivātmānaṁ sarvadā manyatē| balāsakaḥ balakṣayaḥ; kiṁvā ślēṣmōdrēkānmandajvaritvaṁ, sthūlāṅgatā vā balāsakaḥ| dhamanīpraticayō dhamanyupalēpaḥ | śītāgnitā mandāgnitā| mārtsnyaṁ masr̥ṇatā| ślēṣmakarmasu suptirniṣkriyatvēna, vātē tu sparśājñānēna| atrāmāśayamanupraviśyēti vacanēna ślēṣmasthānēṣvāmāśayasya prādhānyaṁ, pūrvaṁ tu ‘tatrāpi urō viśēṣēṇa’ iti vacanēnōraḥ pradhānam; ēvamubhayamapi tulyaṁ jñēyam||17-19||
Adhikarana 13 (20-22) · Śloka 22
bhavanti cātra- rōgamādau parīkṣēta tatō'nantaramauṣadham| tataḥ karma bhiṣak paścājjñānapūrvaṁ samācarēt||20|| yastu rōgamavijñāya karmāṇyārabhatē bhiṣak| apyauṣadhavidhānajñastasya siddhiryadr̥cchayā||21|| yastu rōgaviśēṣajñaḥ sarvabhaiṣajyakōvidaḥ| dēśakālapramāṇajñastasya siddhirasaṁśayam||22||
भवन्ति चात्र- रोगमादौ परीक्षेत ततोऽनन्तरमौषधम्| ततः कर्म भिषक् पश्चाज्ज्ञानपूर्वं समाचरेत्||२०|| यस्तु रोगमविज्ञाय कर्माण्यारभते भिषक्| अप्यौषधविधानज्ञस्तस्य सिद्धिर्यदृच्छया||२१|| यस्तु रोगविशेषज्ञः सर्वभैषज्यकोविदः| देशकालप्रमाणज्ञस्तस्य सिद्धिरसंशयम्||२२||
🔊 Audio coming soon
samprati rōgajñānasya cikitsāyāmupayōgamāha- rōgamityādi| auṣadhaṁ parīkṣētēti sambandhaḥ| auṣadhaparīkṣā rōgāpēkṣiṇī, tēna tadanantaramēva sā bhavatīti bhāvaḥ| tataḥ karmēti cikitsām| jñānapūrvamiti karmadarśanajanitajñānapūrvam||20-22||
Adhikarana 14 (23-25) · Śloka 25
tatra ślōkāḥ- saṅgrahaḥ prakr̥tirdēśō vikāramukhamīraṇam | asandēhō'nubandhaśca rōgāṇāṁ samprakāśitaḥ||23|| dōṣasthānāni rōgāṇāṁ gaṇā nānātmajāśca yē| rūpaṁ pr̥thak ca dōṣāṇāṁ karma cāpariṇāmi yat||24|| pr̥thaktvēna ca dōṣāṇāṁ nirdiṣṭāḥ samupakramāḥ| samyaṅmahati rōgāṇāmadhyāyē tattvadarśinā||25||
तत्र श्लोकाः- सङ्ग्रहः प्रकृतिर्देशो विकारमुखमीरणम् | असन्देहोऽनुबन्धश्च रोगाणां सम्प्रकाशितः||२३|| दोषस्थानानि रोगाणां गणा नानात्मजाश्च ये| रूपं पृथक् च दोषाणां कर्म चापरिणामि यत्||२४|| पृथक्त्वेन च दोषाणां निर्दिष्टाः समुपक्रमाः| सम्यङ्महति रोगाणामध्याये तत्त्वदर्शिना||२५||
🔊 Audio coming soon
saṅgrahē saṅgraha iti ‘catvārō rōgā’ ityādisaṅkṣēpōktiḥ| prakr̥tiriti ‘dvividhā punaḥ’ ityādinā| dēśa iti ‘dvividhaṁ caiṣāmadhiṣṭhānam’ ityādinā| vikārāśca mukhaṁ ca vikāramukhaṁ, tatra ‘vikārāḥ punaḥ’ ityādinā vikārāḥ, ‘mukhāni’ ityādinā mukham| ‘dvayōstu’ ityādinā īraṇam| asandēhaḥ ‘na cānyōnya’ ityādinā| ‘sarvēṣu’ ityādinā anubandhaḥ| nānātmajāḥ sarvē iti dōṣāntarāsampr̥ktadōṣajanyā uktāḥ||23-25||
Adhikarana puṣpikā · Śloka 5
ityagnivēśakr̥tē tantrē carakapratisaṁskr̥tē ślōkasthānē mahārōgādhyāyō nāma viṁśō'dhyāyaḥ||20|| samāptō rōgacatuṣkaḥ||5||
इत्यग्निवेशकृते तन्त्रे चरकप्रतिसंस्कृते श्लोकस्थाने महारोगाध्यायो नाम विंशोऽध्यायः||२०|| समाप्तो रोगचतुष्कः||५||
🔊 Audio coming soon
iti śrīcakrapāṇidattaviracitāyāṁ carakatātparyavyākhyāyāmāyurvēdadīpikāyāṁ sūtrasthānē rōgacatuṣkē mahārōgādhyāyō viṁśatitamaḥ||20||