৪. বাতব্যাধিচিকিত্সিতম্

প্রথমমামাশযগতবাযোশ্চিকিত্সিতমাহ- আমাশযেত্যাদি| ছর্দযিত্বা বমনং কারযিত্বা| বমনং চ সোত্ক্লেশে পুরুষে বহুদোষে বলবতি জ্ঞেযম্| আমাশযগতে ছর্দনং কফস্থানত্বাত্| যথাক্রমমিতি অত্র যথাক্রমশব্দেন পূর্বকালাপরকালকর্তব্যতাঃ সর্বৈবাক্ষিপ্তাঃ স্নেহস্বেদনপানলৈঙ্গিকবৈগিকমানিককাযশুদ্ধিসম্সর্জনভোজনাদযঃ| দেয ইতি দাতুমর্হঃ| ষড্ধরণ ইতি ষণ্ণাং চিত্রকাদীনাং ধরণা মানবিশেষা যত্র যোগে স ষড্ধরণো যোগঃ| তত্র ধরণপ্রমাণং মধ্যমৈরেকবিংশতিভির্নিষ্পাবৈর্ভবতি| সুখাম্বুনা ঈষদুষ্ণাম্বুনেত্যর্থঃ| ষড্ধরণানি কথং সপ্তদিনান্যুপযুজ্যন্তে? উচ্যতে- একস্মিন্ দিনে কর্ষযোগঃ, স চাষ্টাদশনিষ্পাবৈর্ভবতি, তত্র ষড্ধরণেভ্যঃ প্রতিদিনং ত্রযস্ত্রযো নিষ্পাবা উচ্ছ্রিতা ভবন্তি, ততঃ ষড্ভিস্ত্রিকৈরষ্টাদশনিষ্পাবাঃ, তৈরষ্টাদশভিঃ সপ্তমং দিনং পূর্যতে; অথবা সঞ্জ্ঞৈষা ষড্ধরণ ইতি| ইদানীং ষড্ধরণযোগমাহ- চিত্রকেত্যাদি| ‘কটুকাঽতিবিষা ক্ষপা’ ইতি কেচিত্ পঠন্তি| বাতব্যাধিপ্রশমন ইতি আমাশযগত এব বাতব্যাধির্গৃহীতব্যো ন পুনরাক্ষেপকাদযঃ, রূক্ষবিষযত্বেন বাতকারিত্বাদস্য| অন্যে তু ‘মহাব্যাধিপ্রশমন’ ইতি পঠন্তি, মহাব্যাধিরিহ মেদোযুতোঽনিলো নান্যঃ||১-৪||হ্

পক্বাশযগতবাযোশ্চিকিত্সামাহ- পক্বাশযেত্যাদি| স্নেহবিরেচনং তিল্বকসর্পিরাদিবিরেচনম্| বস্তযঃ শোধনীযাশ্চেতি “শোধনদ্রব্যনিষ্ক্বাথাস্তত্কল্কস্নেহসংযুতাঃ” (চি. ৩৮) ইত্যাদ্যাঃ| প্রাশাশ্চ লবণোত্তরা ইতি স্নেহলবণকল্যাণকলবণাদযঃ; অন্যে তু প্রাশ্যন্ত ইতি প্রাশা আহারাঃ, ন তু লেহাঃ; লবণোত্তরা লবণপ্রধানাঃ| গযী ত্বত্রাহ- পক্বাশযঃ পুনরিহ দ্বিবিধঃ- পিত্তবাতাশযভেদেন; তযোর্মধ্যে পিত্তাশযগতে বাযৌ স্নেহবিরেচনং তিল্বকসিদ্ধমেরণ্ডতৈলাদিভির্বা, বাতাশযগতস্য তু বাযোর্মলকফপিত্তৈরাবৃতস্য যথাদোষং কষাযকল্কস্নেহবস্তযঃ; তত্র মলাবৃতবাযৌ বিদারীকল্কসিদ্ধঃ স্নেহযুক্তো ব্যক্তোষ্ণক্ষারশ্চ বস্তিঃ, শ্লেষ্মাবৃতবাযৌ ব্যক্তক্ষারোষ্ণো বস্তিঃ; (ত্রিবৃদাদিদ্রব্যমূত্রবিদারীকল্কসিদ্ধঃ ) পিত্তাবৃতে পুনরক্ষারবস্তিঃ শীতঃ; শেষং সমম্||৫||

বস্তিগতস্য বাযোশ্চিকিত্সিতমাহ- কার্য ইত্যাদি| বস্তিবিশোধনো বিধিরিতি অশ্মরীচিকিত্সিতোক্তো মূত্রাঘাতাদ্যুক্তশ্চ|৬|-

শ্রোত্রাদিষু প্রকুপিতবাযোশ্চিকিত্সিতমাহ- শ্রোত্রেত্যাদি| আদিশব্দাত্ত্বগ্ঘ্রাণজিহ্বানেত্রাণীন্দ্রিযাণি গৃহ্যন্তে| অত্র ক্রমঃ “স্নেহঃ স্বেদস্তথাঽভ্যঙ্গ” ইত্যাদিকো দোষদূষ্যপ্রত্যনীকো যথাযথং কার্যঃ, স চেন্দ্রিযসাত্ম্যমপেক্ষ্য কর্তব্যঃ; তেন স্নেহশব্দসামান্যেঽপি নেত্রযোঃ ক্ষীরসর্পিস্তর্পণং, তৈলতর্পণং পুনঃ কর্ণাদিষ্বিতি||৬||

ধাতূপধাতুগস্য বাযোশ্চিকিত্সিতমাহ- স্নেহেত্যাদি| স্নেহাভ্যঙ্গোপনাহাংশ্চেত্যত্র চকারেণ ত্বগ্গতবাযৌ হৃদ্যমপ্যন্নপানমনুক্তং সমুচ্চীযতে| ত্বগত্র রসঃ, সিরাঃ পুনরসৃজ উপধাতুঃ, প্রাপ্তে গতে ইত্যর্থঃ| রক্তগতে বাযৌ রক্তস্রাবো রক্তাধিষ্ঠানবাতনিবৃত্ত্যর্থঃ| যদা দ্রব্যপ্রভাববিশেষেণ খর্জূরমাতুলুঙ্গসৌবর্চলাদিস্নেহাভ্যঙ্গাদিভির্ন প্রশমমেতি তদা নিযমেন রক্তাবরণং পরিজ্ঞায রক্তমোক্ষণং কর্তব্যং, ন পুনরন্যথা| মেদোগতে পুনরিহানিলে চিকিত্সা নোপদিষ্টা, তস্য স্নেহাবিষযত্বেন বাতব্যাধিকর্মণামবিষযত্বাত্; মহাবাতব্যাধৌ পুনরাবরণপ্রসঙ্গেন মেদোগতমনিলং বক্ষ্যতি||৭||

স্নাযুগতস্য সন্ধ্যস্থিগতস্য চ বাযোশ্চিকিত্সামাহ- স্নেহেত্যাদি| স্নেহোঽত্র বাহ্য আভ্যন্তরশ্চ| অতন্দ্রিতঃ অনলসঃ; এতেন চিরকালং নিরন্তরং ক্রিযেতি দর্শযতি||৮||

অস্থনি গতে মজ্জস্থে চ কর্ম নির্দিশন্নাহ- নিরুদ্ধে ইত্যাদি| ত্বঙ্মাংসং শস্ত্রেণ বিপাট্য, অস্থি পাণিমন্থেন আরাশস্ত্রেণ বিদ্ধ্বা, তত্র রন্ধ্রে দ্বিমুখীং নাডীং প্রণিধায, মুখমারুতা চূষণেন পবনাপকর্ষণং করণীযমিতি| বলী বলযুক্তঃ| ‘বাহ্যাভ্যন্তরস্নেহৈশ্চ’ ইত্যাদি কেচিত্ পঠন্তি| তত্র বাহ্যস্নেহঃ পরিষেকাবগাহাভ্যঙ্গমস্তিষ্ক্যশিরোবস্ত্যাদিঃ, আভ্যন্তরস্তু পানবস্ত্যাদিঃ; অস্য পাঠস্যাভাবান্নির্ণযো ন কৃতঃ||৯||

শুক্রগতস্য বাযোশ্চিকিত্সামাহ- শুক্রেত্যাদি| শুক্রদোষচিকিত্সিতমিতি শুক্রশোণিতশুদ্ধ্যুক্তং চিকিত্সিতং বাজীকরণোক্তং মূত্রদোষচিকিত্সিতোক্তং চ কার্যং; “তেষ্বাদ্যান্ শুক্রদোষাংস্ত্রীন্” (শা. ২) ইত্যাদিকম্|১০|-

ধাতূপধাতুগতমভিধায সর্বাঙ্গগতস্য বাযোশ্চিকিত্সামাহ- অবগাহেত্যাদি| তত্র বাতহরক্বাথপূর্ণদ্রোণ্যাদিষ্ববগাহো দ্রবস্বেদঃ| কুটী চতুর্দ্বারা ভূমাবারোপিতাঽপনীতবিধূমাঙ্গারবাতহরদ্রবসিক্তা, সা চোষ্মস্বেদঃ| কর্ষূঃ পুরুষাযামমাত্রনিখাতদগ্ধাবনিপ্রদেশে বাতহরদ্রবসিক্তে শযনং, স চোষ্মস্বেদবিশেষঃ| স্বিন্নতুষধান্যাদিভিরাস্তৃতাযাং ভূমৌ পরিশযনং প্রস্তরঃ, সোঽপি চোষ্মস্বেদবিশেষ এব| স্নেহপূর্বা অবগাহাদযঃ | এতে চ সর্বাঙ্গগতে বাতে সর্বাঙ্গযোগিনঃ, উপনাহস্বেদস্ত্ববযবগেঽপি বাতে ; তাপস্বেদস্ত্বত্র রূক্ষত্বাদযুক্ত এব| যদ্যপি সর্বাঙ্গগো বাতপ্রকোপঃ প্রাযো ধাতুক্ষযনিমিত্তঃ, তথাঽপি শোণিতাধিষ্ঠানত্বাদ্রক্তমোক্ষোঽপি যুক্তঃ| সিরামোক্ষৈরিতি বহুবচনাত্ পঞ্চানাং সিরাণাং মোক্ষণং স্নেহাদিভিরপ্রশাম্যতি বাতে| একাঙ্গগতস্য বাযোশ্চিকিত্সিতমাহ- একাঙ্গগমিত্যাদি| শৃঙ্গৈশ্চেতি বহুবচনমসকৃত্প্রযোগজ্ঞাপনায| চকারেণ সর্বাঙ্গবাতোক্তাবগাহাদযোঽপ্যনুকৃষ্যন্তে| তৈশ্চাবগাহাদিভিরেকাঙ্গগতমনবস্থিতমেব বাতং জযেত্, অবস্থিতং শৃঙ্গৈরেব||১০-১১||

সংসর্গস্য চিকিত্সামাহ- বলাসপিত্তেত্যাদি| সুগমম্|১২|-

রক্তাবৃতস্য বাযোশ্চিকিত্সামাহ- সুপ্তীত্যাদি| রক্তাবরণকৃতযা সুপ্ত্যা লক্ষিতো বাতঃ সুপ্তিবাতঃ| সুপ্তিঃ স্পর্শাজ্ঞানম্| ন পুনা রসাবরণকৃতযা সুপ্ততযা লক্ষিতো বাতঃ, তস্য স্নেহোপনাহাদিবিষযত্বাত্; অন্যধাতুগতে বাযৌ রক্তাপকর্ষণস্যাযুক্তত্বাত্| বহুশো বহূন্ বারান্, অল্পাল্পস্রাবণাত্; অন্যথা বাতকোপঃ স্যাত্| দিহ্যাত্ লেপযেত্| অন্যে তু সুপ্তবাতস্ত্বগ্গতবাতঃ, ‘বৈবর্ণ্যং স্ফুরণং রৌক্ষ্যং সুপ্তিং চুমচুমাযনম্” (নি. ১) ইত্যুক্তত্বাত্| তেষাং মতে ত্বঙ্মাংসেত্যাদিনা প্রাগুক্তমপি শোণিতমোক্ষণমিহ পুনরুক্তং; লবণাগারধূমৈরিত্যাদিপ্রদেহোঽধিক উক্তঃ||১২||-

সর্ববাতবিকারিণাং ভোজনান্যাহ- পঞ্চমূলীত্যাদি| পঞ্চমূলী আদ্যা দ্বিতীযা বা| ফলৈর্দাডিমাদিভিরম্লঃ| রসো মাংসরসঃ| ধান্যযূষঃ কুলত্থাদিবাতহরধান্যযূষঃ| সুস্নিগ্ধশব্দো যূষরসাভ্যাং সহ সম্বধ্যতে| দোষপ্রকৃতিসাত্ম্যাপেক্ষযা ক্ষীরাদি প্রযোজ্যম্| ‘বাতিভ্যো ভোজনং হিতম্’ ইতি কেচিত্ পঠন্তি||১৩||-

উপনাহস্বেদমাহ- কাকোল্যাদিরিত্যাদি| কাকোল্যাদিঃ প্রসিদ্ধঃ| সবাতঘ্ন ইতি সহ বাতঘ্নৈর্ভদ্রদার্বাদিভির্বিদারিগন্ধাদিভির্বর্তত ইতি সবাতঘ্নঃ| সর্বাম্লদ্রব্যসংযুত ইতি অম্লদ্রব্যাণি শুক্তকাঞ্জিকসুরাসৌবীরকদধিমস্ত্বাদীনি; কেচিদাচার্যা এবং বদন্তি- অম্লদ্রব্যাণি দাডিমাদীনি| আনূপৌদকমাংসেন সহ বর্তত ইতি সানূপৌদকমাংসঃ; অত্রানূপশব্দোঽযং কূলচরেষ্বেব বর্ততে, ঔদকশব্দেন তু কোশস্থাঃ পাদিনো মত্স্যাশ্চ গৃহ্যন্তে; যে পুনরৌদকগ্রহণং ন পঠন্তি তে তু পঞ্চস্বপি বর্তযন্তি| সর্বস্নেহা ঘৃততৈলবসামজ্জানস্তৈঃ সমন্বিতঃ| সুখোষ্ণ ঈষদুষ্ণঃ| স্পষ্টলবণ ইতি স্পষ্টানি ব্যক্তানি সৈন্ধবাদীনি লবণানি যত্র সঃ স্পষ্টলবণঃ| সহ আসমন্তাল্লবণেন বর্তত ইতি সাল্বণঃ| উপনাহো বন্ধনম্| এষাং চ ভাগমানমাহ- “মাংসেনাত্রৌষধং তুল্যং যাবতাঽম্লেন চাম্লতা| তাবন্তশ্চ চতুঃস্নেহাঃ স্নিগ্ধত্বং চ যথা ভবেত্”- ইতি| দ্রব্যস্বভাবং স্বেদ্যদেশমপ্যবেক্ষ্য কল্পনীয ইত্যেকে বদন্তি||১৪-১৫||-

অনগ্নিমেব স্বেদং দর্শযন্নাহ- কুঞ্চ্যমানমিত্যাদি| কুঞ্চ্যমানং সঙ্কোচ্যমানং, তচ্চ সিরাগতেন বাযুনা; যদাহ- “কুর্যাত্ সিরাগতঃ শূলং সিরাকুঞ্চনপূরণম্” (নি. ১) ইতি| রুজার্তং বেদনার্তম্, অত্র প্রধানেন বাযুনা; এতেন পিত্তরক্তাবৃতে বাতে বন্ধনবিধির্নিষিদ্ধঃ| অন্যে তু ‘বাল্ককার্পাসিকৌর্ণিকৈঃ’ ইতি পঠন্তি; তত্র বাল্কং বল্কলমযম্| উন্দ্রঃ পানীযবিডালঃ| চর্মগোণী চর্মপ্রসেবকঃ , ছগলাদিগল্ল ইত্যর্থঃ||১৬-১৭||-

অবযববিশেষগতে বাযৌ ক্রিযাবিশেষমাহ- স্কন্ধেত্যাদি| বক্ষঃ স্তনান্তরালম্| ত্রিকম্ ঊর্ধ্বত্রিকম্| নস্যমত্র শিরোবিরেচনম্| কুশলেন ক্রিযাবিদা অবস্থাবিদা ভিষজেত্যর্থঃ||১৮||-

শিরোগতেঽপি বিশেষমাহ- শির ইত্যাদি| চকারোঽত্র বমনং শিরোবিরেচনং চানুক্তমপি সমুচ্চিনোতি| রক্তমোক্ষণং পুনরত্র ক্রিযান্তরেণাপ্রশাম্যতি বাতে কর্তব্যম্| শিরোবস্তিধারণে কালাবধারণং নির্দিশন্নাহ- স্নেহমিত্যাদি| মাত্রা কালবিশেষঃ| তথাহি- “নিমিষোন্মেষণে পুংসাং স্ফোটনং বা তথাঽঙ্গুলেঃ| অক্ষরস্য লঘোর্বাঽপি মাত্রা তূচ্চারণং ভবেত্”- ইতি| যোগতো যুক্তিতঃ| যুক্তিং চোত্তরতন্ত্রে ক্রিযাকল্পে ব্যাখ্যাস্যামঃ| ননু বাতে দশসহস্রাণ্যুক্তানি, অত্র তু সহস্রমাত্রাধারণমুক্তমিতি বিরোধঃ? সত্যম্, অত্রাক্ষিণি স্থিতানাং সিরাণামত্যন্তসূক্ষ্মত্বাত্তাবতৈব কালেন গুণো ভবতীতি জেজ্জটঃ; গযী তু যোগত ইতি যোগে স্বস্থবৃত্তে মাত্রাসহস্রধারণোপদেশং মন্যতে| তত্র হি শালাক্যক্রিযাকল্পোক্তে শিরোবস্তৌ যথাদোষং ষডষ্টদশসহস্রাণি ধারণমাত্রোক্তা, ন স্বস্থস্য শিরোবস্তিধারণমাত্রা তত্রোক্তা, অত ইহ স্বস্থস্য মাত্রাসহস্রধারণোপদেশঃ কৃত ইতি||১৯||-

তত্র স্নেহবস্তিমেব বাতব্যাধৌ দর্শযন্নাহ- সর্বাঙ্গেত্যাদি||২০||-

ইদানীং সর্ববাতব্যাধীনামুক্তানামনুক্তানাং চ সামান্যেন সকলং প্রত্যনীকং দর্শযন্নাহ- স্নেহস্বেদ ইত্যাদি| স্নেহস্বেদ ইতি স্নেহস্বেদো ন রূক্ষস্বেদঃ, তস্য বাতকারিত্বাত্; অন্যে তু স্নেহঃ স্বেদ ইতি বিচ্ছিদ্য পঠন্তি, তন্মতে স্নেহান্বিতং চ যদিতি স্নেহগ্রহণং পুনরুক্তম্| রসা মাংসরসাঃ| স্নেহা ঘৃতাদযঃ| স্নেহান্বিতং চ যদিতি যত্ কিচ্চিদ্বস্তু ঘৃতাদিযুক্তমিত্যর্থঃ, অথবা স্নেহগুণযুক্তং যত্ কিঞ্চিদ্বস্তু| ফলাম্লানি দাডিমাদ্যম্লীকৃতানি| সংবাহনং সুখকরস্পর্শঃ| কৌশেযেত্যাদি ‘আবরণানি’ ইতি শেষঃ| কৌশেযং কোশকারকৃমিলালোদ্গতং ‘তসর’ ইতি লোকে, রৌমণি মূষকাদিরোমজাতানি রৌমাণীত্যর্থঃ| গর্ভগৃহাণি অপবরকাদীনীত্যর্থঃ| এতানি চ যথাবস্থং যথাব্যাধি চ প্রযোজ্যানি||২১-২৬||-

তিল্বকসর্পিরুত্পাদযতি- ত্রিবৃদিত্যাদি| ত্রিবৃদাদযো বিডঙ্গান্তা অক্ষসমাঃ কর্ষপ্রমাণা ইত্যর্থঃ| সুবর্ণক্ষীরী কঙ্কুষ্ঠম্| সপ্তলা যবতিক্তাভেদঃ, শঙ্খিন্যপি তদ্ভেদঃ| বিল্বমাত্র ইত্যাদি| তিল্বকঃ পট্টিকারোধ্রঃ| কম্পিল্লকো রোচনিকাবৃক্ষঃ ফলারুণরেণুঃ| এতযোঃ প্রত্যেকং কল্কো বিল্বমাত্রো বিল্বপ্রমাণ ইত্যর্থঃ| ত্রিফলেত্যাদি| ত্রিফলাক্বাথপাত্রে দ্বে, দধিপাত্রে অপি দ্বে; পাত্রমাঢকশ্চতুঃষষ্টিপলানি, স চ দ্রবত্বাদ্ দ্বিগুণো জ্ঞেযঃ; ঘৃতপাত্রমপ্যেবম্| তিল্বকবিধিমতিদিশন্নাহ- তিল্বকেত্যাদি| কল্পনা চেযং- তিল্বকস্থানেঽশোকঃ, অন্যত্র রম্যকঃ; শেষং পুনঃ কম্পিল্লকত্রিবৃদ্দন্ত্যাদি ত্রিফলারসাদি সমানং পূর্বেণ| রম্যকো দ্রেক্কা পর্বতনিম্বঃ ‘রাজনিম্ব’ ইতি লোকে||২৭||

অণুতৈলমুত্পাদযন্নাহ- তিলেত্যাদি| তিলপরিপীডনোপকরণকাষ্ঠানি চক্রযষ্টিমর্কটিকাপ্রভৃতীনি| অনল্পকালং তৈলপরিপীতানি চিরকালং তৈলভাবিতানীত্যর্থঃ| অণূনি সূক্ষ্মাণি| খণ্ডশঃ কল্পযিত্বা কৃত্বেত্যর্থঃ| অবক্ষুদ্য সুষ্ঠু পিষ্ট্বা চূর্ণযিত্বা চ| অভিপ্লাব্য প্রক্ষিপ্য| অম্বুপৃষ্ঠাত্ পানীযোপরি, যদুদেতি যদুত্পদ্যতে, তত্ সরকপাণ্যোরন্যতরেণৈকেন, আদায গৃহীত্বা; সরকং মৃন্মযং পাত্রং ‘শরাব’ ইতি লোকে, গযী তু সরকং কাংস্যতাম্রাদিভাজনং; পাণির্হস্তঃ| বাতঘ্নৌষধানি ভদ্রদার্বাদীনি| প্রতিবাপঃ কল্কঃ| স্নেহপাককল্পেন বিপচেদিতি স্নেহচতুর্থাংশো ভেষজকল্কঃ, স্নেহাচ্চতুর্গুণো দ্রব ইত্যর্থঃ| দ্রবাঃ পুনরত্র বক্ষ্যমাণতৈলোদিতাঃ ক্বাথমাংসরসক্ষীরাম্লানি চত্বারি সমভাগানি; দ্রবানুক্তেশ্চতুর্গুণমেবাত্র জলমিত্যন্যে| অণুভ্য ইত্যাদি কারণাণুত্বেন কার্যেষ্বণুত্বব্যপদেশ ইত্যর্থঃ||২৮||

সহস্রপাকং ব্যুত্পাদযন্নাহ- অথেত্যাদি| পঞ্চমূলপ্রমাণং তৈলং পরিপ্লাব্য ভূমিভাগপ্রমাণেন| অসিতং কৃষ্ণভূমিপ্রদেশমিত্যর্থঃ| উষিতং স্থিতম্| অপোহ্য স্ফোটযিত্বা| নিবৃত্তাং ভূমিম্ উপশান্ততাপামিত্যর্থঃ| বিদারিগন্ধাদীত্যাদি| কল্ককষাযকল্পেন বিদারিগন্ধাদিপক্বেন তৈলঘটশতেন তুল্যপযসা ভূমিমভিসিঞ্চযেত্| তৈলমত্র তিলতৈলম্| স্নিগ্ধেতি তৈলক্ষীরাভ্যামার্দ্রীকৃতেত্যর্থঃ| মহতি কটাহে অত্রৈকবচনং জাত্যপেক্ষযা| তেনৈকস্মিন্ দ্বযোস্ত্রিষু বা| অভ্যাষিঞ্চেত্ প্লাবযেত্| বাতহরৌষধানি ভদ্রদার্বাদীনি, তেষাং ক্বাথঃ ক্বাথকল্পেন সিদ্ধঃ, মাংসরসঃ জাঙ্গলমাংসরসকল্পেন সিদ্ধঃ, ক্ষীরং গোক্ষীরম্, অম্লং কাঞ্জিকম্| ভাগসহস্রেণেতি অত্র ভাগশ্চতুর্থাংশঃ; তেন বাতহরক্বাথমাংসরসক্ষীরাম্লানাং প্রত্যেকং ভাগসহস্রং; তেনৈতদুক্তং ভবতি- প্রতিপাকং ক্বাথাদিভিস্তৈলাপেক্ষযা প্রত্যেকং পাদিকৈঃ সমুদাযতস্তৈলসমৈঃ সহস্রপাকং যথা ভবত্যেবং বারসহস্রং পচেদিতি গযী| জেজ্জটস্তু ক্বাথাদীনাং সমুদাযতস্তৈলাপেক্ষযা চতুর্থাংশানাং সহস্রমপ্যেকবারমেব নিক্ষিপ্য বিপচেদিতি মন্যতে, সহস্রপাকমিতি তু সঞ্জ্ঞা, প্রত্যেকং সহস্রবারান্ পাকে সতি তৈলোপক্ষযঃ স্যাত্| এতচ্চ গযদাসেন দূষিতং; তদ্যথা- নহি সর্বতৈলোপক্ষযো ভবতি, কিন্তু কিঞ্চিদেব, প্রতিপাকং ক্ষীরস্য পাদিকস্য প্রবেশাত্, অল্পঃ পুনরুপক্ষযো রাজ্ঞাং মহাধনানাং যত্কিঞ্চিদেবেতি| তস্মাত্ মহাচার্যাভ্যাং ব্যাখ্যাতত্বাত্ পাকপ্রকারদ্বযমপি প্রমাণম্| যদ্যপি দ্রবসহস্রভাগেন শতং বারান্ বিপচেদিতি কেনচিদুক্তং, তথাঽপীদৃশং ন বোদ্ধব্যং, প্রমাদব্যাখ্যানত্বাত্| প্রতিবাপশ্চাত্র গন্ধকল্কস্যাবাপ ইত্যর্থঃ| হৈমবতা ইতি হৈমবতা উত্তরাপথসম্ভূতাঃ, তে পুনঃ কস্তূরীশটীকুষ্ঠমাংসীসরলসুরদারুমুরাদযঃ| দক্ষিণপথগাঃ চন্দনজাতীফলকঙ্কোললবঙ্গাদযঃ| তৈঃ কল্কীকৃতৈস্তৈলপাদিকৈঃ| বাতঘ্নানি চেতি বাতঘ্নৈরপি শতপুষ্পামিশ্রিপ্রভৃতিভির্বাতহরগণপরিপঠিতৈঃ| তত্র শঙ্খাধ্মাপনাদ্যচিন্ত্যশক্তিত্বাদতিশযব্যুত্পাদনার্থম্| অন্যে তু “তৈলঘটশতেন দুগ্ধবসাভ্যামভ্যাষিঞ্চেত্” ইতি পঠন্তি; তন্ন পঠিতব্যং, বিবেককর্তৃভিরুপাধ্যাযৈরব্যাখ্যাতত্বাত্| শতপাকমুত্পাদযন্নাহ- এবং ভাগশতেত্যাদি| এতত্ সুবোধম্||২৯||হ্

বাতপ্রধানেষু কফপ্রধানেষু বা তথা স্তব্ধসঙ্কুচিতাধ্মাতাদিষু ভোজনোপযোগীনি লবণান্যুত্পাদযন্নাহ- গন্ধর্বেত্যাদি| গন্ধর্বহস্ত এরণ্ডঃ, মুষ্ককঃ কৃষ্ণপুষ্পমুষ্ককঃ, নক্তমালঃ করঞ্জঃ, পূতীকশ্চিরবিল্বঃ, সর্বপত্রসমং লবণং সৈন্ধবং দেযমিতি বৃদ্ধবৈদ্যাঃ| এতদ্বাতরোগেষু কফপ্রাযেষু||৩০||

এবমিত্যাদি| স্নুহীকাণ্ডঃ সেহুণ্ডযষ্টিঃ| চতুঃস্নেহস্য লবণস্য সৈন্ধবস্য চ সর্বদ্রব্যেণ সমত্বং বোদ্ধব্যম্| বাতরোগেষু বাতপ্রাযেষু||৩১||

গণ্ডীরেত্যাদি| গণ্ডীরো দ্বিবিধঃ স্থলজো জলজশ্চ; তত্র স্থলজো হরিতশাকপঠিতঃ, জলজো জলপিপ্পলীগণ্ডীরঃ; পলাশঃ শটী; নাদেযী জলজম্বূঃ; কৃষ্ণগন্ধা শোভাঞ্জনকঃ; নীপো মহাকদম্বঃ; নির্দহনী মোরটঃ, অগ্নিমন্থ ইত্যেকে, অপরে চিত্রকমাহুঃ; বৈজযন্তী অরণিকা; বাষ্পদ্বযং বাষ্পিকাদ্বযং তচ্চ লোহিতং কৃষ্ণং চ সিন্ধুবিষযে, কেচিদ্বর্ষাভূদ্বযমিতি পঠন্তি; ইক্ষুরকস্তালমখানা ; সর্বদ্রব্যসমং সৈন্ধবলবণম্; এতত্ সর্বমুদূখলে সঙ্ক্ষুদ্য দহেত্| তদ্ভস্ম পৃথক্ কৃত্বা লবণাত্, ক্ষারকল্পেন পরিস্রাব্য, তত্র লবণং প্রক্ষিপ্য, ক্ষারবন্মৃদ্বগ্নিনা পচেত্| প্রতিবাপশ্চাত্র লবণপাদঃ পিপ্পল্যাদের্হিঙ্গ্বাদের্বা| অগ্নিসঙ্গোঽগ্নিমান্দ্যম্| অজীর্ণম্ অলসকবিসূচিকাদি| কাসাদিভিরিত্যাদিশব্দাচ্ছ্বাসহিক্কাদযঃ কফবাতজাঃ| কেচিত্ প্রতিবাপং পিপ্পল্যাদিং মন্যন্তে, হিঙ্গ্বাদিমপরে, হিঙ্গ্বাদিং পিপ্পল্যাদিং চান্যে, এতত্ত্রযমপি প্রমাণং, পূর্বেষামাচার্যাণাং সম্মতত্বাত্||৩২||

লবণফলানুশংসামাহ- বিষ্যন্দনাদিত্যাদি| বিষ্যন্দনাত্ স্রবণাত্| লবণফলানুশংসাং কেচিদভিদধতি, অন্যেঽনার্ষমাহুরিমং পাঠম্||৩৩||

ইতি শ্রীডল্হণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযাং চিকিত্সাস্থানে চতুর্থোঽধ্যাযঃ||৪||