২০. উন্মাদনিদানম্

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

মদাত্যযে ‘উন্মাদমিব চাপরম্’ ইত্যনেন উন্মাদসঙ্কীর্তনমুন্মাদসাদৃশ্যং চোক্তং, তথা মদাত্যযেঽপি দাহো ভবতীতি স্বল্পবক্তব্যতযা দাহমভিধাযোন্মাদারম্ভঃ, তস্য নিরুক্তিমাহ– মদযন্তীত্যাদি| মদযন্তি মনোবিভ্রমং কুর্বন্তি, উন্মার্গমাগতা বিমার্গমাগতা মনোবহাধমনীরনুপ্রাপ্তাঃ| উদ্গতা বৃদ্ধাঃ, অথবা ঊর্ধ্বং হৃদযং গতাঃ, এতেনোত্পূর্বেণৈব দোষাণাং বৃদ্ধত্বং বিমার্গগত্বং চ দর্শিতম্||১||

আতঙ্কদর্পণ ব্যাখ্যা (বাচস্পতি বৈদ্য কৃত)

মদাত্যযে ‘উন্মাদমিব চাপরম্’ ইত্যনেনোন্মাদসঙ্কীর্তনমুন্মাদসাদৃশ্যং চোক্তং, তথা মদাত্যযে দাহো ভবতীতি তুল্যলক্ষণতযা দাহমভিধাযোন্মাদারম্ভঃ, তস্য নিরুক্তিমাহ– মদযন্তীত্যাদি| যস্মাদ্দোষা মদযন্তি মনোবিভ্রমং কুর্বন্তি, অতোঽযং মানসো ব্যাধিরুন্মাদ ইতি কীর্ত্যত ইতি সম্বন্ধঃ| কীদৃশাঃ? উদ্গতা বৃদ্ধাঃ, অথবা ঊর্ধ্বং হৃদযং গতাঃ, উন্মার্গমাগতা বিমার্গগাঃ, মনোবহধমনীরনুপ্রাপ্তাঃ, তেন ততঃ পূর্বেণৈব দোষাণাং বৃদ্ধত্বং বিমার্গগত্বং চ দর্শিতম্||১||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

প্রকারভেদমাহ– একৈকশ ইত্যাদি| মানসেন চ দুঃখেনেতি শোকাদিনা| স চেতি ষড্বিধোঽপি| অত্রাপ্রবৃদ্ধপদমুপাদাযাপি তরুণপদপ্রযোগং কুর্বতা সুশ্রুতেন স্বতন্ত্রোঽপি দোষজনিতো মদো ভবতীতি দর্শিতম্| অত এব চরকে বিধিশোণিতীযাধ্যাযে (চ. সূ. অ. ২৪) উন্মাদাত্ পৃথগেব পঠিতঃ সনিদানচিকিত্সিত ইতি||২-৩||

আতঙ্কদর্পণ ব্যাখ্যা (বাচস্পতি বৈদ্য কৃত)

তস্য সঙ্খ্যামাহ– একৈকশ ইত্যাদি| বাতেন পিত্তেন শ্লেষ্মণা সর্বশ ইতি সন্নিপাতেন, অত্যর্থমূর্ছিতৈঃ অতিপ্রবৃদ্ধৈঃ, মানসেন তু দুঃখেনেতি শোকাদিনা, বিষাত্ ষষ্ঠো ভবতি| স চাপ্রবৃদ্ধ ইতি স চ বিকারঃ, যাবত্ প্রবৃদ্ধো বৃদ্ধিং গতো ন ভবতি, যাবচ্চ তরুণস্তাবন্মদ ইতি সঞ্জ্ঞাং বিভর্তি, মদ ইতি কথ্যত ইত্যর্থঃ| সুশ্রুতে স্বতন্ত্রোঽপি দোষজনিতো মদো ভবতীতি ব্যাখ্যাতম্| অত এব চরকে বিধিশোণিতীযাধ্যাযে উন্মাদাত্পৃথগেব পঠিতঃ স নিদানচিকিত্সিত ইতি||২-৩||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

সামান্যহেতুমাহ– বিরুদ্ধেত্যাদি| দুষ্টং গরসহিতমন্নাদি| প্রধর্ষণং ‘ধৃষ’ প্রধর্ষণে, ইত্যস্মাত্ প্রধর্ষণমভিভবঃ| ভযহর্ষপূর্বো মনোঽভিঘাত ইতি ভযহর্ষাভ্যাং মনসোঽভিভবঃ; ভযহর্ষপূর্ব ইতি ভযং হর্ষো দ্বৌ বা পূর্বং যস্য স তথা; পূর্বশব্দোঽত্র কারণবাচী, চকারোঽত্র লুপ্তনির্দিষ্টো দ্রষ্টব্যঃ, তেন কামক্রোধলোভাদযোঽপি কারণমিতি জেজ্জটঃ; অন্যে ত্বাহুঃ– ক্রোধাদিভিরপি ভযহর্ষপূর্বক এব ভবতীতি তেন তৌ নির্দিষ্টৌ| বিষমাশ্চ চেষ্টা ইতি বিষমাঙ্গন্যাসবলবদ্বিগ্রহাদয উন্মাদহেতব ইতি যোজ্যম্||৪||

আতঙ্কদর্পণ ব্যাখ্যা (বাচস্পতি বৈদ্য কৃত)

তস্য সামান্যহেতুমাহ– বিরুদ্ধেত্যাদি| দুষ্টং গরদুষ্টমন্নাদি, অশুচি ভোজনং চাণ্ডালাদিস্পৃষ্টং, প্রধর্ষণং নিন্দাদ্যভিভবনং, মনোভিঘাত ইতি ভযহর্ষাভ্যাং মনোভিভবঃ, ভযহর্ষপূর্ব ইতি ভযহর্ষৌ পূর্বৌ যস্ব স তথা| পূর্বশব্দোঽত্র কারণবাচী, চকারোঽত্র লুপ্তনির্দিষ্টো দ্রষ্টব্যঃ, তেন কামক্রোধলোভাদযোঽপি কারণমিতি জেজ্জটঃ| অন্যে ত্বাহুঃ– ক্রোধাদিভিরপি ভযহর্ষপূর্বক এব ভবতীতি, তেন তৌ নির্দিষ্টাবিতি| বিষমাশ্চেষ্টা ইতি বিষমাঙ্গন্যাসবলবদ্বিগ্রহাদযঃ, উন্মাদহেতুরিতি যোজ্যম্||৪||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

সম্প্রাপ্তিমাহ– তৈরিত্যাদি| তৈরুক্তহেতুভিঃ| অল্পসত্ত্বস্য অল্পসত্ত্বগুণস্যেতি চক্রঃ; জেজ্জটস্ত্বাহ– সত্ত্বং মনঃ, তস্য চাল্পত্বং রজস্তমোভ্যামাবৃতত্বেনাল্পজ্ঞানজনকত্বাত্| মলা বাতাদযঃ| বুদ্ধের্নিবাসং হৃদযমিত্যনেন হৃদযস্যাশ্রযস্য দুষ্ট্যা তদাশ্রিতজ্ঞানস্যাপি দুষ্টির্ভবতীতি দর্শযতি| স্রোতাংসি মনোবহানীতি হৃদযাশ্রিতা দশ ধমন্যঃ; এতচ্চ বিশেষেণ বোধ্যং, নিখিলদেহস্রোতসামেব মনোঽধিষ্ঠানত্বেন চরকে দর্শিতত্বাত্| অধিষ্ঠায ব্যাপ্যেত্যর্থঃ||৫||

আতঙ্কদর্পণ ব্যাখ্যা (বাচস্পতি বৈদ্য কৃত)

সম্প্রাপ্তিমাহ– তৈরিত্যাদি| তৈরুক্তহেতুভিরল্পসত্ত্বস্য নরস্য মলা বাতাদযঃ প্রদুষ্টাঃ সন্তো বুদ্ধের্নিবাসং হৃদযং প্রদূষ্য মনোবহানি স্রোতাংসি অধিষ্ঠায ব্যাপ্য আশু চেতঃ প্রমোহযন্তি| অল্পসত্ত্বস্যাল্পসত্বগুণস্যেতি চক্রঃ; জেজ্জটস্ত্বাহ– সত্ত্বং মনঃ, তস্য চাল্পত্বং রজস্তমোভিভূতত্বেনাল্পজ্ঞানজনকত্বাত্| বুদ্ধের্নিবাসং হৃদযমিত্যনেন হৃদযমাশ্রিতা ধমন্যঃ, এতচ্চ বিশেষেণ বোধ্যং, নিখিলদেহস্রোতসামেব মনোধিষ্ঠানত্বেন চরকে দর্শিতত্বাত্| অধিষ্ঠায ব্যাপ্য||৫||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

সামান্যরূপমাহ– ধীবিভ্রম ইত্যাদি| এতত্ সামান্যং পূর্বরূপমিতি জেজ্জটঃ, সামান্যরূপমিতি চক্রঃ| ধীবিভ্রমো ভ্রান্তজ্ঞানত্বম্| সত্ত্বপরিপ্লবো মনসশ্চঞ্চলত্বম্| অধীরতা কাতরত্বম্| অবদ্ধবাক্ত্বমসম্বদ্ধবচনত্বম্| লিঙ্গ্যতেঽনেনেতি লিঙ্গ, তেন পূর্বরূপং রূপং চেতি ব্যাখ্যাতম্||৬||

আতঙ্কদর্পণ ব্যাখ্যা (বাচস্পতি বৈদ্য কৃত)

পূর্বরূপমাহ– ধীত্যাদি| ধীবিভ্রমো ভ্রান্তজ্ঞানত্বং, সত্ত্বপরিপ্লবো মনসশ্চঞ্চলত্বম্| অন্যে সত্ত্বগুণস্যেতি| পর্যাকুলা দৃষ্টিরিতি আকুলাবলোকনম্| অধীরতা কাতরত্বম্| অবদ্ধবাক্ত্বং অসম্বদ্ধবচনত্বম্| হৃদযং শূন্যমিত্যন্তং ধীবিভ্রমত্বাদি সামান্যলক্ষণমেবাহ||৬||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

বাতজমাহ– রূক্ষেত্যাদি| বিরেকশব্দেনাত্র বান্তিরপ্যভিধীযতে, বিরেচযতি দেহান্মলং পৃথক্করোতীতি ব্যুত্পত্ত্যা| অস্থানহাসেত্যাদি অস্থানেঽবিষযে হাসোঽস্থানহাসঃ; এবমস্থানশব্দঃ স্মিতাদিষু প্রযোজ্যঃ| স্মিতমীষদ্ধাসঃ| অঙ্গবিক্ষেপো বিরুদ্ধচেষ্টা| জীর্ণে বলমিতি জীর্ণে আহারে ব্যাধের্বলং ভবতি||৭-৮||

আতঙ্কদর্পণ ব্যাখ্যা (বাচস্পতি বৈদ্য কৃত)

বাতিকমাহ– রূক্ষেত্যাদি| এতদ্বাতিকোন্মাদলক্ষণম্| রূক্ষাল্পশীতান্নৈর্ভোজ্যৈঃ| বিরেকশব্দেনাত্র বান্তিরপ্যভিধীযতে, বিরেচযতি দেহান্মলং পৃথক্ করোতীতি ব্যাখ্যানাত্| ধাতুক্ষযো রসাদিধাতুক্ষযঃ| এতৈর্দুষ্টো বাযুশ্চিন্তাশোকাদিদুষ্টং হৃদযং মনঃ প্রবিশ্য বুদ্ধিং স্মৃতিং চ শীঘ্রমুপহন্তি| অনুভূতার্থস্মরণং স্মৃতিঃ| অস্থানহাস্যং অবিষযে হাস্যম্| এবমস্থানশব্দঃ স্মিতাদিষু যোজ্যঃ| স্মিতমীষদ্ধাসঃ, অঙ্গবিক্ষেপণং বিরুদ্ধচেষ্টা, পারুষ্যং রৌক্ষ্যং, কার্শ্যং কৃশতা, অরুণবর্ণতা ঈষদ্রক্তবর্ণতা, জীর্ণে বলমিতি জীর্ণে আহারে ব্যাধের্বলং ভবতীত্যর্থঃ||৭-৮||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পিত্তজমাহ– অজীর্ণেত্যাদি| অশীতৈরিতি উষ্ণৈঃ| উন্মাদমত্যুগ্রমিতি অত্যুগ্রং তীব্রবেগম্, ‘উন্মাদযত্যুগ্রম্’ ইতি পাঠান্তরে উগ্রং যথা ভবতি তথা উন্মাদং জনযতি| অনাত্মকস্য অনাত্মবতঃ| পূর্ববদিতি চিন্তাদিদুষ্টহৃদযস্য বুদ্ধ্যাদিকমুপহত্যেত্যাদিসম্প্রাপ্ত্যা| কুর্যাদিতি বক্ষ্যমাণং লিঙ্গমিতি শেষঃ| অত্র পক্ষে কিং তল্লিঙ্গমিত্যাহ– অমর্ষেত্যাদি– অমর্ষোঽসহিষ্ণুত্বং, ন তু রোষঃ; তস্য বক্ষ্যমাণত্বাত্| সংরম্ভ আরভটী; বিনগ্নভাবো নগ্নত্বম্| সন্তর্জনং পরিত্রাসনম্, অতিদ্রবণং পলাযনম্, ঔষ্ণ্যং গাত্রস্য; ‘ঔষ্ঠ্যম্ ইতি পাঠান্তরে বিকৃতৌষ্ঠত্বম্| প্রচ্ছাযশীতান্নজলাভিলাষ ইতি ছাযাযাং শীতযোরন্নজলযোরভিলাষঃ||৯-১০||

আতঙ্কদর্পণ ব্যাখ্যা (বাচস্পতি বৈদ্য কৃত)

পৈত্তিকমাহ– অজীর্ণেত্যাদি| অজীর্ণাদিভিশ্চিতং সঞ্চযতাং গতম্| উদীর্ণবেগং পিত্তং পূর্ববত্ চিন্তাদিদুষ্টহৃদযস্য বুদ্ধ্যাদিকমুপহন্তি| অজীর্ণমবিদগ্ধম্, অশীতৈঃ উষ্ণৈঃ, উগ্রং তীব্রং যথা ভবতি তথা উন্মাদং জনযতি| অনাত্মকস্য অনাত্মবতঃ| অমর্ষং অসহিষ্ণুত্বং, সংরম্ভ আরভটী, হস্তপাদাদিবিক্ষেপণমিত্যন্যে| বিনগ্নভাবো বস্ত্রাদিত্যাগঃ| সন্তর্জনং পরিত্রাসনং ভর্ত্সনমপরস্যেত্যর্থঃ| অভিদ্রবণং পলাযনম্| ঔষ্ণ্যং গাত্রস্য, ‘ঔষ্ঠ্যম্’ ইতি পাঠান্তরং, তত্র বিকৃতৌষ্ঠত্বম্| চোষো দাহবিশেষঃ| প্রচ্ছাযেত্যাদি ছাযাযাঃ শীতযোশ্চান্নজলযোরভিলাষঃ| পীতা চ ভাঃ পীতবর্ণতা||৯-১০||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

কফজমাহ– সম্পূরণৈরিত্যাদি| মন্দবিচেষ্টিতস্য আযাসশূন্যস্য| সম্পূরণৈর্ভোজনাদিভিঃ, কফো দুষ্ট ইতি সম্বন্ধঃ| সোষ্মা সপিত্তঃ| কফেনাপি ক্রিযমাণ উন্মাদোঽবশ্যং সপিত্তেন ক্রিযতে ব্যাধিমহিম্না, যথা মূর্ছা| অন্যে ত্বাহুঃ– কেবলকফেনাপি ক্রিযতে, সোষ্মপদেন তু দ্বন্দ্বজোঽপি ভবতীতি সূচ্যতে| অন্যে ত্বাহুঃ– ঊষ্মশব্দেন শক্তিরুচ্যতে, তেনোত্কৃষ্টশক্তিকঃ কফ ইত্যর্থঃ| মর্মণীতি হৃদযে| বিকারমুন্মাদম্| বাগিত্যাদি নারীবিবিক্তপ্রিযতেতি নারীপ্রিযতা বিজনপ্রিযতা চ| বলং চ ভুক্তে ইতি ‘ব্যাধেঃ’ ইতি শেষঃ| নখাদীত্যাদিশব্দেন ত্বঙ্মূত্রনেত্রাদীনাং গ্রহণম্||১১-১২||

আতঙ্কদর্পণ ব্যাখ্যা (বাচস্পতি বৈদ্য কৃত)

শ্লৈষ্মিকমাহ– সম্পূরণৈরিত্যাদি| মন্দবিচেষ্টিতস্য আযাসশূন্যস্য; সম্পূরণৈরতিভোজনাদিভিঃ কফো দুষ্ট ইতি সম্বন্ধঃ| সোষ্মা সপিত্তঃ| কফেনাপি ক্রিযমাণ উন্মাদোঽবশ্যং সপিত্তেন ক্রিযতে ব্যাধিমহিম্না, যথা মূর্ছা| অন্যে ত্বাহুঃ– কেবলেনাপি কফেন স ক্রিযতে, সোষ্মপদেন তু দ্বন্দ্বজোঽপি ভবতীতি সূচ্যতে| অন্যে ত্বাহুঃ– ঊষ্মশব্দেন শক্তিরুচ্যতে, তেনোত্কৃষ্টশক্তিকঃ কফ ইত্যর্থঃ| মর্মণি হৃদযে| চিত্তং প্রমোহযন্ বুদ্ধিং স্মৃতিং চোপহত্য বিকারমুন্মাদম্| বাক্চেষ্টিতং মন্দম্| অল্পম্ অরোচকতা| নারীবিবিক্তপ্রিযতা নারীপ্রিযতা, বিজনপ্রিযতা চ| নিদ্রাবাহুল্যং তথা ছর্দিঃ, লালাস্রাবশ্চ বলং চ ভুঙ্ক্তে নাশযতি, ‘ব্যাধেঃ’ ইতি শেষঃ| নখনেত্রাদীনাং শৌক্ল্যম্||১১-১২||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

সান্নিপাতিকমাহ– য ইত্যাদি| সর্বৈঃ সমস্তৈরিতি সর্বৈরিতি কৃত্বাঽপি যত্ সমস্তৈরিতি করোতি তেনৈবং বোধযতি– বাতাদযোঽনেকৈঃ স্বনিদানৈঃ কুপিতা উন্মাদং জনযন্তি, নতু প্রত্যেকমেকনিদানকুপিতাঃ| বিরুদ্ধভৈষজ্যবিধির্বিবর্জ্য ইতি অযমভিসন্ধিঃ– ত্রিদোষজে প্রত্যেকং বাতাদিপ্রত্যনীকা ক্রিযা কার্যা, সা চ পরস্পরবিরোধিনী, ত্রিদোষহরং চ কিঞ্চিদেব দ্রব্যমামলক্যাদি, তত্তু নাত্র যৌগিকং “ন হি সর্বাণি সর্বত্র যৌগিকানি ভবন্তি” ইতি বচনাত্| ননু, যদ্যেবং তদা সর্ব এব হি ত্রিদোষজবিকারা অসাধ্যাঃ ভবেযুরিত্যত উক্তম্– তাদৃগিতি| কোঽপ্যযং সম্প্রাপ্তিবিশেষো রোগবিশেষো বা, যেনাযং বিরুদ্ধভৈষজ্যবিধির্ন তু সর্ব ইত্যর্থঃ| অন্যে ত্বাহুঃ– সর্বৈঃ সমস্তৈর্হেতুভির্যৈঃ কৃতঃ স এবাসাধ্যঃ, ন ত্বল্পহেতুকৃত ইতি||১৩||

আতঙ্কদর্পণ ব্যাখ্যা (বাচস্পতি বৈদ্য কৃত)

সান্নিপাতিকমাহ– য ইত্যাদি| সন্নিপাতগ্রহণেনৈব সর্বাত্মকত্বং লব্ধং পুনঃ সর্বৈরিতি যদ্গ্রহণং কৃতং তদ্রজস্তমোগ্রহণার্থং, তেন রজস্তমোমিলিতৈরিত্যর্থঃ; তেন বাতাদযো রজস্তমোভিঃ মনোদোষৈর্মিলিতাঃ সমস্তৈশ্চ নিদানৈঃ কুপিতা উন্মাদং জনযন্তি| সর্বাণি রূপাণি সর্বদোষলক্ষণানি বিভর্তি| তাদৃগিতি তাদৃশঃ| কোঽপ্যেষ ত্রিদোষসম্প্রাপ্তিবিশেষো রোগবিশেষো বা, যেনাযং বিরুদ্ধভৈষজ্যবিধির্বিবর্জ্যঃ; বিরুদ্ধভৈষজ্যবিধিরিতি কোঽর্থঃ? ত্রিদোষজে প্রত্যেকং বাতাদিপ্রত্যনীকা ক্রিযা কার্যা, সা চ পরস্পরবিরোধিনী, ত্রিদোষহরং চ কিঞ্চিদেব দ্রব্যমামলকাদি, তচ্চ নাত্র যৌগিকমিত্যর্থঃ||১৩||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

শোকাদিজমাহ– চোরৈরিত্যাদি| ক্ষতে উপহতে, প্রিযযা রিরংসোঃ কামুকস্য অপ্রাপ্তযা প্রিযযা ক্ষতে মনসীতি সম্বন্ধঃ| তস্য লক্ষণমাহ– চিত্রমিত্যাদি| চিত্রং বিবিধম্| মনোঽনুগতং গোপ্যমপি| বিসঞ্জ্ঞো বিপরীতজ্ঞানঃ, অত এব মূঢঃ||১৪||–

আতঙ্কদর্পণ ব্যাখ্যা (বাচস্পতি বৈদ্য কৃত)

মনোদুঃখজমাহ– চৌরৈরিত্যাদি| নরেন্দ্রপুরুষৈঃ নৃপাধিকারিভিঃ, অরিভিঃ, অন্যৈরিতি সিংহগজাদিভিঃ, বিত্রাসিতস্য ক্রোধশস্ত্রাদিভিঃ; দ্রব্যবিনাশাত্ পুত্রাদিমরণাদ্বা, তথা রিরংসোঃ কামুকস্য প্রিযাযা অপ্রাপ্ত্যা, গাঢং ক্ষতে মনসীতি সম্বন্ধঃ| তস্য রূপমাহ– চিত্রমিত্যাদিনা| চিত্রং বিবিধং মনোঽনুগতং গোপ্যমপি ব্রবীতি| বিসঞ্জ্ঞো বিপরীতজ্ঞানঃ, অত এব মূঢঃ||১৪||–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

বিষজমাহ– রক্তেক্ষণ ইত্যাদি| হতবলেন্দ্রিযভা ইতি হতং বলমিন্দ্রিযাণি ভাশ্চ যস্য স তথা| ভা দীপ্তিঃ||১৫||

আতঙ্কদর্পণ ব্যাখ্যা (বাচস্পতি বৈদ্য কৃত)

রক্তেক্ষণ ইত্যাদি| হতং বলমিন্দ্রিযাণি ভাঃ শরীরদীপ্তিশ্চ যস্য স তথা| শ্যাবাননঃ কৃষ্ণমুখঃ বিষজনিতোন্মাদেন||১৫||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অসাধ্যলক্ষণমাহ– অবাঞ্চীত্যাদি| অবাঞ্চী অধোমুখঃ, উদঞ্চী ঊর্ধ্বমুখঃ, অত এবান্যে ‘অবাঙ্মুখস্তূন্মুখো বা’ ইতি পঠন্তি| জাগরূকোঽনিদ্রঃ||১৬||

আতঙ্কদর্পণ ব্যাখ্যা (বাচস্পতি বৈদ্য কৃত)

অসাধ্যলক্ষণমাহ– অবাঞ্চীত্যাদি| অবাঞ্চী অবাঙ্মুখঃ, উদঞ্চী ঊর্ধ্বমুখঃ| ‘অবাঙ্মুখস্তূন্মুখো বা’ ইতি কেচিত্পঠন্তি| ক্ষীণং মাংসং বলমোজশ্চ যস্য স তথা| জাগরূকঃ গতনিদ্রঃ||১৬||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ভৌতিকোন্মাদস্য সামান্যলক্ষণমাহ– অমর্ত্যবাগিত্যাদি| অমর্ত্যা অমনুষ্যা অনুচিতা বা বাগাদযো যস্য স তথা| বিক্রমঃ পরাক্রমঃ, বীর্যং শক্তিঃ, চেষ্টা শারীরিকী ক্রিযা| জ্ঞানাদিবিজ্ঞানবলাদিভিরিতি উপলক্ষণে তৃতীযা| জ্ঞানং তত্ত্বজ্ঞানং, বিজ্ঞানং শিল্পাদিজ্ঞানং; কিংবা জ্ঞানং শাস্ত্রজ্ঞানং, বিজ্ঞানং তদর্থনিশ্চযঃ; আদিশব্দেন স্মৃত্যাদীনাং গ্রহণং, তেষাং বলম্| অনিযত ইতি ন বাতজাদিবদাহারজীর্ণাদিকালবত্ কালনিযমঃ| নিযত ইতি পাঠে তু বক্ষ্যমাণনিযততিথ্যাদীনাং গ্রহণং “দেবগ্রহাঃ পৌর্ণমাস্যাং” ইত্যাদি| ভূতশব্দেনাত্র সর্ব এব বক্ষ্যমাণা দেবদযোঽভিধীযন্তে||১৭||

আতঙ্কদর্পণ ব্যাখ্যা (বাচস্পতি বৈদ্য কৃত)

ভূতজমুন্মাদমাহ– অমর্ত্যবাগিত্যাদি| অমর্ত্যানামমনুষ্যাণামনুচিতা বাগাদযো যস্য স তথা| বিক্রমঃ পরাক্রমঃ, বীর্যং শক্তিঃ, চেষ্টা শরীরক্রিযা| জ্ঞানাদিবিজ্ঞানবলাদিভিরিতি উপলক্ষণে তৃতীযা| জ্ঞানং তত্বজ্ঞানং, বিজ্ঞানং শিল্পাদিজ্ঞানং, কিংবা জ্ঞানং শাস্ত্রং, বিজ্ঞানং তদর্থনিশ্চযঃ| আদিশব্দেন স্মৃত্যাদীনাং গ্রহণং, তেষাং বলম্| অনিযত ইতি কদাচিন্মধ্যাহ্নে, কদাচিত্প্রদোষে, ন তু বাতাদিজবদাহারজীর্ণাদিকালনিযমঃ, তং ভূতোত্থমুন্মাদং কথযেত্| ‘নিযতা’ ইতি পাঠে তু বক্ষ্যমাণনিযততিথ্যাদীনাং গ্রহণং, দেবগ্রহাঃ পৌর্ণমাস্যামিত্যাদি| ভূতশব্দেনাত্র সর্বে বক্ষ্যমাণা দেবাদযোঽভিধীযন্তে||১৭||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

দেবজুষ্টমাহ– সন্তুষ্ট ইত্যাদি| অতিদিব্যমাল্যগন্ধ ইতি অতিমাত্রো দিব্যমাল্যস্যেব গন্ধো যস্য স তথা| নিস্তন্দ্রীঃ অনিদ্রঃ| অবিতথং সত্যম্| বিদেহেঽপি “নিঃস্বপ্নং সত্যসংস্কৃতভাষিণম্” ইতি পঠিতম্| ব্রহ্মণ্যো ব্রাহ্মণানুরক্তঃ| দেবজুষ্টো দেবগ্রহপীডিতঃ| দেবগ্রহণেন গণমাতৃকাদযোঽপি গ্রাহ্যাঃ| বিদেহেঽপি পঠ্যতে “ক্রোধনঃ স্রস্তসর্বাঙ্গো লালাফেনাবিলাননঃ| নিদ্রালুঃ কম্পনো মূকো গণমাতৃভিরর্দিতঃ||” ইতি||১৮||

আতঙ্কদর্পণ ব্যাখ্যা (বাচস্পতি বৈদ্য কৃত)

দেবজুষ্টমাহ– সন্তুষ্ট ইত্যাদি| সন্তুষ্টঃ সন্তোষবান্| শুচিঃ স্নানাচমনাদিনা| অতিমাত্রং দিব্যমাল্যস্যেব গন্ধো যস্য স তথা| নিস্তন্দ্রীঃ নিদ্রারহিতঃ, অবিতথং সত্যং সংস্কৃতং চ প্রভাষত ইতি| বিদেহেঽপ্যুক্তম্– “নিঃস্বপ্নং সত্যসংস্কৃতভাষণম্” ইতি| তেজস্বী তেজোযুক্তঃ, স্থিরনযনঃ নিমেষরহিতঃ, বরদাতা যতঃ ব্রহ্মণ্যঃ ব্রাহ্মণানুরক্তঃ| দেবভূতজুষ্টঃ দেবগ্রহপীডিতঃ| দেবগ্রহণেন গণমাতৃকাদযো গ্রাহ্যাঃ| যদুক্তং বিদেহে– “ক্রোধনঃ স্তব্ধসর্বাঙ্গো লালাফেনাবিলাননঃ| নিদ্রালুঃ কম্পনো মূকো গণমাতৃভিরর্দিতঃ” ইতি||১৮||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

দেবশত্রুজুষ্টমাহ– সংস্বেদীত্যাদি||১৯||

আতঙ্কদর্পণ ব্যাখ্যা (বাচস্পতি বৈদ্য কৃত)

অসুরজুষ্টমাহ– সংস্বেদীত্যাদি| যঃ সংস্বেদী স্বেদবান্, ব্রাহ্মণগুরুদেবানাং নিন্দকঃ, জিহ্মাক্ষঃ কুটিলদৃষ্টিঃ, বিমার্গদৃষ্টিঃ, শ্রুতিধর্মনিন্দকঃ; অন্নং শালিমাংসাদি, পানং ক্ষীরমদ্যাদি, তৈঃ সন্তুষ্টো ন ভবতি| দুষ্টাত্মা পাপবুদ্ধিঃ| এবংবিধো দেবশত্রুজুষ্টো ভবতি||১৯||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

গন্ধর্বাবিষ্টমাহ– হৃষ্টেত্যাদি| পুলিনং তোযোজ্ঝিতং তটম্, অন্তরং মধ্যং বিশেষো বা| স্বাচারোঽনিন্দিতাচারঃ| প্রিযেত্যাদি প্রিযাণি পরি সর্বতো গীতগন্ধমাল্যানি যস্য স তথা| নৃত্যন্নিত্যাদি চারু (যথা ভবতি তথা) নৃত্যন্নল্পশব্দং যথা ভবতি তথা প্রহসতীতি যোজ্যম্||২০||

আতঙ্কদর্পণ ব্যাখ্যা (বাচস্পতি বৈদ্য কৃত)

গন্ধর্বাবিষ্টমাহ– হৃষ্টাত্মেত্যাদি| হৃষ্টাত্মা চিন্তাদিরহিতঃ সন্তুষ্টাত্মা| পুলিনং নদ্যাদিতটং, বনমুদ্যানং, তযোরন্তরং মধ্যং, তদ্বিশেষাত্ সেবত ইতি| স্বাচারঃ অনিন্দিতাচারঃ| প্রিযাণি পরি সমন্ততোভাবেন গীতগন্ধমাল্যানি যস্য স তথা| নৃত্যন্নিত্যাদি চারু যথা ভবতি তথা নৃত্যন্; অল্পশব্দো যথা ভবতি তথা প্রহসন্নিতি যোজ্যম্||২০||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

যক্ষাবিষ্টমাহ– তাম্রাক্ষ ইত্যাদি| প্রিযেত্যাদি প্রিযং শোভনং, তনু সূক্ষ্মং রক্তং চ বস্ত্রং ধর্তুং শীলং যস্য স তথা||২১||

আতঙ্কদর্পণ ব্যাখ্যা (বাচস্পতি বৈদ্য কৃত)

যক্ষজুষ্টমাহ– তাম্রাক্ষ ইত্যাদি| তাম্রাক্ষো রক্তনেত্রঃ| প্রিযং শোভনং তনু সূক্ষ্মং রক্তবস্ত্রং ধর্তুং শীলং যস্য স তথা| গম্ভীরঃ অনাকুলিতান্তঃকরণঃ, দ্রুতগতিঃ উত্তালগতিঃ; অল্পবাক্ অল্পভাষী, সহিষ্ণুঃ সহনশীলঃ| কস্মৈ কিং দদামীত্যেবং বদতি||২১||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পিতৃজুষ্টমাহ– প্রেতানামিত্যাদি| প্রেতানাং মৃতপিতৄণাং, সম্বন্ধমাত্রবিবক্ষযা ন চতুর্থী| দিশতি দদাতি| সংস্তরেষু কুশপত্রাদিরচিতাস্তরণেষু| অপসব্যবস্ত্রো বামোত্তরীযঃ| মাংসেপ্সুরিত্যাদি| এতদভিধানপ্রযোজনং যস্মিন্ যস্যেচ্ছা ভবতি তস্য তেনৈব বলির্দাতব্যঃ; এবমন্যত্রাপি দ্রষ্টব্যম্| তদ্ভক্তঃ পিতৃভক্তঃ||২২||

আতঙ্কদর্পণ ব্যাখ্যা (বাচস্পতি বৈদ্য কৃত)

পিতৃগ্রহজুষ্টমাহ– প্রেতানামিত্যাদি| প্রেতানাং পিতৄণাং, সম্বন্ধমাত্রস্য বিবক্ষিতত্বান্ন চতুর্থী| দিশতি দদাতি, সংস্তরেষু কুশপত্রাদিরচিতসংস্তরণেষু, পিণ্ডান্ অন্নমযান্, শান্তাত্মা শান্তস্বভাবঃ, জলমপি চেতি ন পরং দর্ভসংস্তরেষু পিণ্ডান্ অপসব্যবস্ত্রো বামোত্তরীযো দদাতি কিন্তু জলমপি চেত্যর্থঃ| ‘অপসব্যহস্তঃ’ ইতি পাঠে দক্ষিণহস্তঃ| মাংসেপ্সুরিত্যাদি এতদভিধানপ্রযোজনং যস্য যত্রেচ্ছা ভবতি তস্য তেনৈব বলির্দাতব্যঃ| এবমন্যত্রাপি দ্রষ্টব্যম্| পাযসঃ ক্ষীরসিদ্ধাস্তণ্ডুলাঃ, অভিকামোঽভিলাষুকঃ| তদ্ভক্তঃ পিতৃভক্তঃ; তদ্ভক্তঃ তিলাদিভোজন ইতি ডল্হণঃ||২২||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

নাগাবিষ্টমাহ– যস্ত্বিত্যাদি| প্রসরতি সর্পবদিতি উরসা গচ্ছতি| সৃক্কণ্যৌ ওষ্ঠপ্রান্তৌ| সৃক্কণীশব্দ ঈকারান্তোঽপ্যস্তীত্যুন্নেযম্||২৩||

আতঙ্কদর্পণ ব্যাখ্যা (বাচস্পতি বৈদ্য কৃত)

সর্পগ্রহজুষ্টমাহ– য ইত্যাদি| উর্ব্যাং ভূমৌ সর্পবদুরসা গচ্ছতি, সৃক্কণ্যৌ ওষ্ঠপ্রান্তৌ জিহ্বযা বিলিহতি| ক্রোধালুঃ কোপনঃ, গুডাদিপ্রিযঃ, ভুজঙ্গমগ্রহেণ জুষ্টো জ্ঞেযঃ||২৩||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

রাক্ষসাবিষ্টমাহ– মাংসেত্যাদি| নিশাবিহারী নিশাযামেব ভ্রমণশীলঃ| রাক্ষসশব্দেন ব্রহ্মরাক্ষসাদযোঽপি গ্রাহ্যাঃ| তথা রাক্ষসানন্তরং বিদেহোঽপি পঠতি– “দেববিপ্রগুরুদ্বেষী বেদবেদাঙ্গনিন্দকঃ| আত্মপীডাকরো হাসী ব্রহ্মরাক্ষসসেবিতঃ||” ইতি||২৪||

আতঙ্কদর্পণ ব্যাখ্যা (বাচস্পতি বৈদ্য কৃত)

রাক্ষসজুষ্টমাহ– মাংসেত্যাদি| বিবিধসুরাবিকারাঃ পৈষ্টীপ্রভৃতযঃ, ভৃশমতিশযেন লজ্জারহিতঃ, অতিনিষ্ঠুরঃ দযারহিতঃ, বিপুলবলঃ অন্নাদ্বিনাঽপি প্রভূতবলঃ, নিশাবিহারী নিশাযামেব ভ্রমণশীলঃ, শৌচদ্বিট্ অশুচিঃ| রাক্ষসগ্রহণেন ব্রহ্মরাক্ষসাদযোঽপি গৃহ্যন্তে| যতো রাক্ষসানন্তরং বিদেহে পঠ্যতে– “দেববিপ্রগুরুদ্বেষী বেদবেদাঙ্গনিন্দকঃ| আত্মপীডাকরো হাসী ব্রহ্মরাক্ষসসেবিতঃ” ইতি||২৪||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পিশাচাবিষ্টমাহ– উদ্ধস্ত ইত্যাদি| উদ্ধস্ত ঊর্ধ্ববাহুঃ; ‘উদ্বস্ত্র’ ইতি পাঠান্তরং ন্যায্যং, বিদেহেঽপি দিগম্বরপাঠাত্; উদ্বস্ত্রো নগ্নঃ| পরুষো রূক্ষঃ| লোলঃ সর্বস্মিন্নন্নে পানে চ সতৃষ্ণঃ| ‘লোলুঃ’ ইতি পাঠান্তরে স এবার্থঃ| ব্যাচেষ্টন্নিতি বিরুদ্ধমাচেষ্টন্||২৫||

আতঙ্কদর্পণ ব্যাখ্যা (বাচস্পতি বৈদ্য কৃত)

পিশাচজুষ্টমাহ– উদ্ধস্ত ইত্যাদি| উদ্ধস্ত ঊর্ধ্ববাহুঃ| ‘উদ্বস্ত্রঃ’ ইতি পাঠে উদ্বস্ত্রো নগ্নঃ, বিদেহেঽপি দিগম্বর ইতি পাঠাত্| কৃশো নির্মাংসঃ, পরুষো রূক্ষঃ, বিরুদ্ধলাপী বিরুদ্ধভাষী| ‘অচিরপ্রলাপী’ ইতি পাঠান্তরম্| দুর্গন্ধঃ, অতিলোলঃ সর্বস্মিন্নন্নপানে সতৃষ্ণঃ, অতিচপল ইত্যন্যে; ‘অতিলোলুঃ’ ইতি পাঠান্তরে অশনলোলুপ ইত্যর্থঃ| বহ্বাশী প্রচুরভোক্তা| বিজনং নির্জনস্থানং, হিমাম্বু শীতাম্বু, তযোঃ সেবী, রাত্রেঃ সেবী রাত্রিবিচারীত্যর্থঃ| ‘বিজনবনান্তরোপসেবী’ ইতি পাঠান্তরম্| ব্যাচেষ্টন্ বিবিধং চেষ্টন্; ‘ব্যাচেষ্টম্’ ইতি পাঠান্তরে বিরুদ্ধচেষ্টং যথা ভবতি তথা ভ্রমতি||২৫||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ত্রিবিধং হি হিংসাক্রীডাপূজার্থং গ্রহা গৃহ্ণন্তি| যদুক্তম্– “অশুচিং ভিন্নমর্যাদং ক্ষতং বা যদি বাঽক্ষতম্| হিংস্যুর্হিংসাবিহারার্থং সত্কারার্থমথাপি চ||” (সু. উ. তং. অ. ৬০) ইতি| তত্র হিংসার্থং গৃহীতোঽসাধ্যো ভবতি, তস্য শ্লোকার্ধদ্বযেন লক্ষণমাহ– স্থূলাক্ষ ইত্যাদি| স্থূলাক্ষো বিকৃতনেত্র ইতি জেজ্জটঃ| দ্রুতমটনো দ্রুতগতিঃ, অত এব ‘ত্বরিতগতিঃ’ ইতি জেজ্জটেন পঠিতম্| যশ্চেত্যাদি| পর্বতাদিপতিতঃ সন্ যো গৃহ্যতে সোঽপ্যসাধ্যঃ, নগো বৃক্ষঃ| সর্ব এবোন্মাদী ত্রযোদশেঽব্দে দেবতাদিগৃহীতোঽপ্যসাধ্যঃ| বিদেহেঽধিকমপ্যসাধ্যলক্ষণং পঠ্যতে– “মেঢ্রপ্রবৃত্তঃ ক্ষতজঃ সাস্রাক্ষঃ স্রুতনাসিকঃ| রূক্ষজিহ্বঃ পূতিগর্ভো হতবাগতিদুর্বলঃ||” ইত্যাদি||২৬||

আতঙ্কদর্পণ ব্যাখ্যা (বাচস্পতি বৈদ্য কৃত)

ত্রিবিধং হি হিংসাক্রীডাপূজার্থং গ্রহা গৃহ্ণন্তি| যদুক্তম্– “অশুচিং ভিন্নমর্যাদং ক্ষতং বা যদি বাঽক্ষতম্| হিংস্যুর্হিংসাবিহারার্থং সত্কারার্থমথাপি চ” ইতি| অস্যার্থঃ ভিন্নমর্যাদং শ্রুতিস্মৃত্যুদিতকর্মণোঽন্যত্র কর্মণি প্রবৃত্তং অভক্ষ্যাগম্যাহিংসাদিপ্রবৃত্তত্বাত্| ক্ষতং সব্রণং, মাংসশোণিতপ্রিযত্বাত্| অক্ষতমপি শৌচাদিরহিতম্| অত্র বিহারশব্দেন রতিরভিধীযতে| সত্কারঃ পূজা| তত্র হিংসার্থং গৃহীতোঽসাধ্যো ভবতি| তস্য লক্ষণমাহ– স্থূলাক্ষ ইত্যাদি| স্থূলাক্ষো বিবৃতনেত্রঃ, বিদ্রুতগতিঃ, যশ্চাতিকম্পতে সোঽসাধ্যঃ| যশ্চৈতেভ্যঃ পতিতঃ স্যাত্ সোঽপ্যসাধ্যঃ| অদ্রিঃ পর্বতঃ, দ্বিরদো গজঃ, নগো বৃক্ষঃ| আদিগ্রহণাত্ তটপ্রাসাদাদযো গৃহ্যন্তে সর্বত্রোন্মাদাদিতি শেষঃ| এতেভ্যঃ পতিতঃ স্যাদিত্যর্থঃ| ত্রযোদশে বর্ষে দেবাদিগৃহীতোঽপ্যসাধ্যঃ| বিদেহেঽধিকমপ্যসাধ্যলক্ষণং পঠিতং যথা– “মেঢ্রপ্রবৃত্তঃ ক্ষতজঃ সাস্রাক্ষঃ স্রুতনাসিকঃ| রূক্ষজিহ্বঃ পূতিগর্ভো হতবাগতিদুর্বলঃ” ইত্যাদি||২৬||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

দেবাদীনাং গ্রহণকালমাহ– দেবগ্রহাঃ ইত্যাদি| পৌর্ণমাস্যাং পূর্ণিমাযাম্| কৃষ্ণক্ষযেঽমাবাস্যাযাম্| প্রাযোগ্রহণাদন্যত্রাপি| তিথ্যভিধানপ্রযোজনং লক্ষণার্থং, তত্তিথৌ বলিদানার্থং চ||২৭-২৮||

আতঙ্কদর্পণ ব্যাখ্যা (বাচস্পতি বৈদ্য কৃত)

ইদানীং দেবগ্রহাণাং গ্রহণকালমাহ– দেবগ্রহা ইত্যাদি| দেবগ্রহাঃ পৌর্ণমাস্যাং পূর্ণিমাযাং বিশন্তি অনুপ্রবেশং কুর্বন্তি| অসুরা অসুরগ্রহাঃ| সন্ধ্যযোরপীত্যপিশব্দঃ পাদপূরণে; অন্যে অপিশব্দাত্ পৌর্ণমাস্যামপি গৃহ্ণন্তীতি বর্ণযন্তি| প্রাযশোঽষ্টম্যামিতি প্রাযঃশব্দাত্ সন্ধ্যযোরপি গন্ধর্বা বিশন্তীতি লভ্যতে| পিত্র্যাঃ পিতৃগ্রহাঃ| কৃষ্ণক্ষযে কৃষ্ণপক্ষক্ষযে, অমাবাস্যাযামিত্যর্থঃ| প্রাযোগ্রহণাদন্যত্রাপি| পঞ্চম্যামপীত্যপিশব্দাত্ কৃষ্ণক্ষযেঽপি| উরগা নাগগ্রহাঃ| তিথ্যভিধানপ্রযোজনং লক্ষণার্থং, তেষাং তিথৌ বলিদানার্থং চ| তথা চোক্তম্– “গ্রহা গৃহ্ণন্তি যে যেষু তেষাং তেষু বিশেষতঃ| দিনেষু বলিহোমাদীন্ প্রযুঞ্জীত চিকিত্সকঃ||” ইতি||২৭-২৮||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ননু, যদি গ্রহাবিষ্টানাং পুংসামুন্মাদঃ স্যাত্, তদা বিশন্তো গ্রহাঃ কুতো ন লক্ষ্যন্তে? ইত্যত আহ– দর্পণাদীনিত্যাদি| অস্মদাদিদর্শনাযোগ্যত্বান্ন দৃশ্যন্ত ইত্যর্থঃ| আদিশব্দেন প্রকারবাচিনাং জলতৈলাদীনাং গ্রহণম্| ছাযা প্রতিকৃতিঃ| শীতোষ্ণমিতি কর্তৃপদং, প্রাণিন ইতি কর্মপদম্| স্বমণিমিতি সূর্যকান্তম্| দেহধৃক্ আত্মা, মন ইতি জেজ্জটঃ| অনেকদৃষ্টান্তপ্রযোজনং জেজ্জটলিখিতং তচ্চাত্রানুপযুক্তত্বেন বিস্তরভযান্ন লিখিতম্| দেবশব্দেন চাত্র দেবস্যানুচরা দেবসধর্মাণো গৃহ্যন্তে, দেবানাং মনুষ্যশরীরেণাশুচিনা সম্বন্ধাভাবাত্| যদাহ সুশ্রুতঃ– “ন তে মনুষ্যৈঃ সহ সংবিশন্তি ন তে মনুষ্যান্ ক্বচিদাবিশন্তি| যে ত্বাবিশন্তীতি বদন্তি মোহাত্তে ভূতবিদ্যাবিষযাদপেতাঃ||” (সু. উ. তং. অ. ৬০) ইতি||২৯-৩০||

আতঙ্কদর্পণ ব্যাখ্যা (বাচস্পতি বৈদ্য কৃত)

ননু, যদি গ্রহাবিষ্টানাং পুংসামুন্মাদঃ স্যাত্, তদা বিশন্তো গ্রহাঃ কুতো ন লক্ষ্যন্তে? ইত্যত আহ– দর্পণাদীনিত্যাদি| অস্মদাদিদর্শনাযোগ্যত্বান্ন দৃশ্যন্তে| আদিশব্দেন প্রকারবাচিনা জলতৈলাদীনাং গ্রহণম্| ছাযা প্রতিকৃতিঃ| শীতোষ্ণমিতি কর্তৃপদং, প্রাণিন ইতি কর্মপদম্| স্বমণিমিতি সূর্যকান্তম্| দেহধৃক্ অত্মা, মন ইতি জেজ্জটঃ| অনেকদৃষ্টান্তপ্রযোজনং জেজ্জটেন নিশ্চিতং, তচ্চাত্রানুপযুক্তত্বেন লিখিতং বিস্তরভযাচ্চ| ননু ভূতৈঃ শরীরেঽনুপ্রবেশঃ ক্রিযতে ন তু শরীরিণি, তত্কথং শরীরিণ ইত্যভিধানং ন বিরুধ্যতে? উচ্যতে– শরীরিশব্দেনাত্র শরীরমভিপ্রেতং, স্থানিনি স্থানোপচারাত্; যথা– মঞ্চাঃ ক্রোশন্তীতি| যথা ছাযাশীতোষ্ণাদযো দর্পণপ্রাণিপ্রভৃতীন্ বিশন্তো ন দৃশ্যন্তে তদ্বদ্গ্রহা ইত্যর্থঃ| দেবাদিশব্দেনাত্র দেবস্যানুচরা দেবসধর্মাণো গৃহ্যন্তে, দেবাদীনাং মনুষ্যশরীরেণাশুচিনা সম্বন্ধাভাবাত্| যদাহ সুশ্রুতঃ– “ন তে মনুষ্যৈঃ সহ” ইত্যাদি||২৯-৩০||

আতঙ্কদর্পণ ব্যাখ্যা (বাচস্পতি বৈদ্য কৃত)

ইদানীং গ্রহাণাং তীব্রতপাদি যমাদিযুক্তাং প্রভাববত্তাং সুশ্রুতোক্তেন শ্লোকত্রযেণ দর্শযিতুমাহ– তপাংসীত্যাদি| তপস্তাপনলক্ষণমুপবাসাদি, ব্রতানি শাস্ত্রোদিতবিধিনা ভোজনাদিনিযমনানি, কর্ম কাযবাঙ্মনসাং সুচরিতম্| গুণাস্তথাষ্টাবিতি অণিমা ১, মহিমা ২, লঘিমা ৩, প্রাকাম্যং ৪, প্রাকাশ্যম্ ৫, ঈশিত্বং ৬, বশিত্বং ৭, যত্র কামাবসাযিত্বং ৮, চেতি| অন্যে তু– “আবেশশ্চেতসো জ্ঞানমর্থানাং শব্দনক্রিযা| দৃষ্টিঃ শ্রোত্রং স্মৃতিঃ কান্তিরিষ্টতশ্চাপ্যদর্শনম্||” ইত্যষ্টবিধমৈশ্বর্যমাহুঃ| তেষু গ্রহেষু এতে গুণা নিত্যাঃ, ন কাদাচিত্কাঃ, ব্যস্তা দ্বিত্রিচত্বার ইত্যাদি; সমস্তাঃ সর্বে; যো যস্য প্রভাব ইতি যথাপ্রভাবং; তত্র ব্যস্তা গুণা অসুরাদিগ্রহাণাং, সমস্তা দেবগ্রহাণাম্| অথ তে নিযমাদিযুক্তাশ্চেত্ কথমশুচিং দেহমাবিশন্তি, ন কথঞ্চন, অত এবাহ– নেত্যাদি| তে দেবাদযো মনুষ্যৈঃ সহ ন বিশন্তি ন একীভবন্তীত্যর্থঃ| ন বা মনুষ্যান্ মানুষদেহান্, ক্বচিদপ্যনুপ্রবিশন্তীত্যর্থঃ| যে পুনর্বৈদ্যা ‘আবিশন্তি’ ইতি মোহাদজ্ঞানাত্ প্রবদন্তি, তে বৈদ্যা ভূতবিদ্যাবিষযাত্তজ্জ্ঞানাদপোহ্যা অপসারণীযাস্ত্যাজ্যা ইত্যর্থঃ| কে তর্হি গৃহ্ণন্তীত্যাহ– তেষামিতি তেষাং দেবাদীনাং পরিচারকাঃ প্রেষ্যাঃ, কর্মকরা ইত্যর্থঃ| কোট্যঃ শতলক্ষপ্রমাণাঃ, অযুতং দশসহস্রম্, এতেন কোটিঘ্নং শতলক্ষপ্রমাণগুণিতং যত্ সহস্রং তাদৃশৈঃ দশভিঃ সহস্রৈরত্রাযুতং বোদ্ধব্যং; তেষাং পদ্মং, পদ্মং চতুর্দশবিন্দুকং, তদেব সঙ্খ্যা যেষাং তে তথা| সুভীমা অত্যর্থং ভযানকাঃ| নিশাবিহারা রাত্রৌ ভ্রমণশীলাঃ||৩১-৩৩||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ইতি শ্রীবিজযরক্ষিতকৃতাযাং মধুকোশব্যাখ্যাযামুন্মাদনিদানং সমাপ্তম্||২০||

আতঙ্কদর্পণ ব্যাখ্যা (বাচস্পতি বৈদ্য কৃত)

ইতি শ্রীবাচস্পতিবৈদ্যবিরচিতাযাং মাধবনিদানব্যাখ্যাযামাতঙ্কদর্পণাখ্যাযামুন্মাদনিদানম্||২০||