৫০. শীতপিত্তোদর্দকোঠনিদানম্

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ত্বগ্দুষ্টিদোষত্রযজন্যত্বসামান্যাত্ কুষ্ঠানন্তরং শীতপিত্তোদর্দাদিনিদানম্| তস্য দোষত্রযজন্যত্বমাহ– শীতমারুতসংস্পর্শাদিত্যাদি| পিত্তেন সহ সম্ভূযেতি স্বহেতূপচিতেন পিত্তেন সম্ভূয মিলিত্বা| বহিরন্তরিতি বহিস্ত্বচি, অন্তঃ শোণিতাদৌ; বিসর্পতঃ প্রসরতঃ||১||

আতঙ্কদর্পণ ব্যাখ্যা (বাচস্পতি বৈদ্য কৃত)

ত্বগ্দুষ্টিদোষত্রযজন্যত্বসামান্যাত্কুষ্ঠানন্তরং শীতপিত্তাদিনিদানম্| তস্য দোষত্রযজন্যত্বমাহ– শীতেত্যাদি| প্রদুষ্টৌ কুপিতৌ কফমারুতৌ স্বহেতূপচিতেন পিত্তেন সহ মিলিত্বা, বহিস্ত্বচি, অন্তঃ শোণিতাদৌ, বিসর্পতঃ প্রসরতঃ||১||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পূর্বরূপমাহ– পিপাসেত্যাদি| রক্তলোচনতা প্রভাবাত্| পূর্বরূপস্য লক্ষণমিতি পূর্বরূপস্য স্বরূপমিত্যর্থঃ; ন তু লক্ষণমত্র লিঙ্গং, পিপাসাদিব্যতিরিক্তস্য পূর্বরূপস্যাভাবাত্||২||

আতঙ্কদর্পণ ব্যাখ্যা (বাচস্পতি বৈদ্য কৃত)

তস্য পূর্বরূপমাহ– পিপাসেত্যাদি| অত্র রক্তলোচনতা প্রভাবাত্| পূর্বরূপস্য লক্ষণমিতি পূর্বরূপস্যোপলম্ভনং, ন তু লক্ষণং লিঙ্গং; পিপাসাদিব্যতিরিক্তস্য পূর্বরূপস্যাভাবাত্||২||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

উদর্দলক্ষণমাহ– বরটীত্যাদি| সকণ্ডূস্তোদবহুলশ্ছর্দিজ্বরবিদাহবানিতি অত্র কণ্ডূঃ কফাত্, তোদো বাতাত্, ছর্দিজ্বরবিদাহাঃ পিত্তাদিতি দোষত্রযলিঙ্গম্| অনযোঃ শীতপিত্তোদর্দযোঃ সমানসংস্থানত্বেঽপি বাতাধিকং শীতপিত্তং, কফাধিক উদর্দঃ||৩-৪||

আতঙ্কদর্পণ ব্যাখ্যা (বাচস্পতি বৈদ্য কৃত)

উদর্দলক্ষণমাহ– বরটীত্যাদি| বরটী কীটবিশেষঃ, তদ্দষ্টসদৃশাকারঃ, বহিঃ শরীরে শোথো জাযতে| অত্র কণ্ডূঃ কফাত্, তোদো বাতাত্, ছর্দিজ্বরবিদাহাঃ পিত্তাদিতি দোষত্রযলিঙ্গম্; অপরে শীতপিত্তমিত্যাহুঃ| অনযোর্দোষদ্বযাধিকত্বমাহ– বাতাধিকমিত্যাদি| অনযোঃ শীতপিত্তোদর্দযোঃ সমানসংস্থানত্বেঽপি বাতাধিকং শীতপিত্তং, কফাধিক উদর্দঃ||৩-৪||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

উদর্দস্য ধর্মান্তরমাহ– সোত্সঙ্গৈরিত্যাদি| উত্সঙ্গৈঃ মধ্যনিম্নৈঃ| শৈশির ইতি শিশিরসম্ভবঃ||৫||

আতঙ্কদর্পণ ব্যাখ্যা (বাচস্পতি বৈদ্য কৃত)

উদর্দস্য ধর্মান্তরমাহ– সোত্সঙ্গৈরিত্যাদি| মধ্যনিম্নৈঃ, শৈশিরঃ শিশিরসম্ভবঃ||৫||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ত্বগ্দুষ্টিসাম্যাদত্রৈব কোঠোঽভিধীযতে– অসম্যগ্বমনেত্যাদি| অসম্যক্ত্বং বমনস্যাযোগমিথ্যাযোগাদিনা, তথোদীর্ণানাং পিত্তশ্লেষ্মান্নানাং নিগ্রহো বেগবিধারণং, তৈর্মণ্ডলানি জাযন্তে, স কোঠঃ| অথবাঽযমর্থঃ– অসম্যগ্বমনোদীর্ণৌ পিত্তশ্লেষ্মাণৌ, তথাঽন্ননিগ্রহ উপস্থিতবেগস্যান্নস্য নিগ্রহঃ ছর্দিনিগ্রহঃ ইতি যাবত্, তৈর্হেতুভির্ভবন্তি| বমনস্য চাসম্যক্ত্বমযোগমিথ্যাযোগাভ্যাং জ্ঞেযম্, অতিযোগস্য তু পিত্তশ্লেষ্মকোঠাকরত্বাত্| এতেন হেতুলক্ষণভেদাদ্ভিন্নঃ কোঠ উদর্দাত্| কোঠো নিরনুবন্ধঃ| তথা চোক্তম্– “ক্ষণিকোত্পাদবিনাশঃ কোঠ ইতি নিগদ্যতে তজ্জ্ঞৈঃ|” ইতি সানুবন্ধ উত্কোঠোঽভিধীযতে| সানুবন্ধতা চ পুনঃপুনর্ভবনেন||৬||

আতঙ্কদর্পণ ব্যাখ্যা (বাচস্পতি বৈদ্য কৃত)

ত্বগ্দোষসামান্যাদত্রৈব কোঠঃ প্রোচ্যতে| সানুবন্ধ উত্কোঠোঽভিধীযতে| অসম্যক্ত্বং বমনস্যাযোগমিথ্যাযোগাদিনা, উদীর্ণানি প্রেরিতানি পিত্তশ্লেষ্মান্নানি, তেষাং নিগ্রহৈঃ শরীরে মণ্ডলানি বর্তুলকমলাদীনি অতিকণ্ডুমন্তি লৌহিত্যযুক্তানি বহূনি চ জাযন্তে, অথবাঽযমেবার্থঃ– অসম্যগ্বমনেনোদীর্ণৌ পিত্তশ্লেষ্মাণৌ, তথাঽন্ননিগ্রহঃ উপস্থিতবেগস্যান্নস্য নিগ্রহঃ ছর্দিনিগ্রহ ইতি যাবত্, তৈর্ভবন্তি| বমনস্য চাসম্যক্ত্বমযোগমিথ্যাযোগাভ্যাং জ্ঞেযম্, অতিযোগস্য পিত্তশ্লেষ্মকোপকত্বাত্, এতেন হেতুলক্ষণভেদাদ্ভিন্নঃ কোঠ উদর্দাদিতি| কোঠো নিরনুবন্ধঃ, তথা চোক্তম্– “ক্ষণিকোত্পাদবিনাশঃ কোঠ ইতি নিগদ্যতে তজ্জ্ঞৈঃ” ইতি| সানুবন্ধ উত্কোঠোঽভিধীযতে| সানুবন্ধতা চ পুনঃপুনর্ভবনেনেতি||৬||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ইতি শ্রীকণ্ঠদত্তকৃতাযাং মধুকোশব্যাখ্যাযাং শীতপিত্তোদর্দকোঠনিদানং সমাপ্তম্||৫০||

আতঙ্কদর্পণ ব্যাখ্যা (বাচস্পতি বৈদ্য কৃত)

ইতি শ্রীবাচস্পতিবৈদ্যবিরচিতাযাং মাধবনিদানব্যাখ্যাযামাতঙ্কদর্পণাখ্যাযাং শীতপিত্তোদর্দকোঠনিদানম্||৫০||