মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)
এষাং নিদানাদীনাং মধ্যে সমানাসমানজাতীযব্যাবর্তকং কারণরূপনিদানস্য লক্ষণমাহ– নিমিত্তেত্যাদিনা পর্যাযৈরিত্যন্তেন| এতৈঃ শব্দৈর্যোঽর্থোঽভিধীযতে তন্নিদানং; যথা– “বুদ্ধিরুপলব্ধির্জ্ঞানমিত্যনর্থান্তরম্|” (ন্যা. দ. প্র. আ. সূ. ১৫) ইতি| ননু, কিং মিলিতৈরেকৈকশো বা? নাদ্যঃ, একার্থাভিধাযিনাং শব্দানাং মিলিতানামপ্রযোগাত্; দ্বিতীযশ্চেত্তদা সব্যভিচারঃ; নিমিত্তস্য শকুনাদৌ, হেতোঃ প্রযোজকে কর্তরি, আযতনস্য স্থানে, প্রত্যযস্য লডাদৌ, উত্থানস্য উদ্গমনোত্সর্গযোশ্চ দর্শনাত্| নৈবং, শকুনাদীনাং নিমিত্তাদিভিঃ সর্বৈরনভিধানাত্| অত এবাহ– পর্যাযৈরিতি| নহি তেষাং তে পর্যাযাঃ, যতঃ ক্রমেণৈকার্থবাচকাঃ শব্দাঃ পরস্পরং পর্যাযা উচ্যন্তে| তস্মান্নিমিত্তাদিশব্দৈঃ পর্যাযৈরভিধীযমানত্বং নিদানত্বম্| এতচ্চ পর্যাযকথনং শাস্ত্রে ব্যবহারার্থম্| ইদং তু সঙ্ক্ষেপতো লক্ষণম্– “সেতিকর্তব্যতাকো রোগোত্পাদকহেতুর্নিদানম্|” ইতি| যন্মতে দোষেতিকর্তব্যতারূপা সম্প্রাপ্তিরিষ্যতে তন্মতে সম্প্রাপ্তিব্যুদাসার্থং ‘সেতিকর্তব্যতাক’ ইতি পদং, তস্যা দোষেতিকর্তব্যতারূপাযা ইতিকর্তব্যতান্তরাভাবাত্| যন্মতে ব্যাধিজন্ম সম্প্রাপ্তিঃ, তন্মতে ‘ব্যাধ্যুত্পত্তিহেতুর্নিদানম্’ ইতি লক্ষণম্| উভযত্রাপি ‘উত্পত্তি’ এতত্পদং জ্ঞপ্তিহেতুপূর্বরূপাদিব্যবচ্ছেদার্থম্| স চ হেতুরনেকধা; তত্র প্রথমশ্চতুর্বিধঃ, যদাহ উপকল্পনীযাধ্যাযে হরিচন্দ্রঃ– “সন্নিকৃষ্টবিপ্রকৃষ্টব্যভিচারিপ্রাধানিকভেদাচ্চতুর্ধা|” ইতি| সন্নিকৃষ্টো যথা– নক্তন্দিনর্তুভুক্তাংশা দোষপ্রকোপস্য হেতবঃ, ন তে চযাদিকমপেক্ষন্তে| বিপ্রকৃষ্টো যথা– “হেমন্তে নিচিতঃ শ্লেষ্মা বসন্তে কফরোগকৃত্|” (সু. উ. তং. অ. ৬৪); কিংবা সন্নিকৃষ্টো জ্বরস্য রূক্ষাদিসেবা, বিপ্রকৃষ্টো রুদ্রকোপঃ| ব্যভিচারী যথা– যো দুর্বলত্বাদ্ব্যাধ্যধিকরণাসমর্থঃ| যদাহ চরকঃ– “( নিদানাদিবিশেষা) অবলীযাংসোঽথবাঽনুবন্ধ্নন্তি, ন তদা বিকারাভিনির্বৃতিঃ|” ইতি (চ. নি. অ. ৪)| প্রাধানিকো যথা– বিষাদিঃ; ত্রিবিধো বা, অসাত্ম্যেন্দ্রিযার্থসংযোগপ্রজ্ঞাপরাধপরিণামভেদাত্| তত্র, অসাত্ম্যেন্দ্রিযার্থসংযোগোঽযোগাতিযোগমিথ্যাযোগযুক্তা রূপরসাদযঃ, প্রজ্ঞাপরাধো মিথ্যাজ্ঞানাদিঃ, পরিণামোঽযোগাদিযুক্তা ঋতুস্বভাবজাঃ শীতাদযঃ| “অধর্মস্য চ রোগহেতোরত্রৈবান্তর্ভাবঃ” ইতি ভট্টারহরিচন্দ্রঃ, তস্যাপি কালান্তরপরিণতস্য দুঃখকর্তৃত্বাত্| চক্রস্তু প্রজ্ঞাপরাধে তস্যান্তর্ভাবমাহ; মিথ্যাজ্ঞানকৃতব্রহ্মবধাদিজন্মনোঽধর্মস্য প্রজ্ঞাপরাধ এব মূলং; বলাবলং ত্বত্র ন নিরূপ্যতে, রোগকারণত্বেনাধর্মস্য সর্বথা সিদ্ধত্বাদিতি| দোষব্যাধ্যুভযহেতুভেদাচ্চ স ত্রিবিধঃ| দোষহেতবো যথা– চযপ্রকোপপ্রশমনিমিত্তা যথর্তূত্পন্না মধুরাদযঃ| ব্যাধিহেতবো যথা– মৃদ্ভক্ষণং পাণ্ডুরোগস্য কারণম্| যদ্যপি মৃদপি দোষং প্রকোপযত্যেব; যদুক্তং চরকে– “কষাযা মারুতং, পিত্তমূষরা, মধুরা কফম্|” ইতি (চ. চি. অ. ১৬) তথাঽপি তজ্জৈর্দোষৈঃ পাণ্ডুরোগ এবারভ্যতে ন ত্বন্যো বিকার ইতি ব্যাধিহেতুতা ভবতি| উভযহেতুর্যথা বাতরক্তে– “হস্ত্যশ্বোষ্ট্রৈর্গচ্ছতশ্চাশ্নতশ্চ” (সু. নি. অ. ১) ইত্যাদি| তত্র যদ্যপি দোষপ্রকোপপূর্বকমেব ব্যাধিজননং, তথাঽপি দোষবদ্ব্যাধাবপি তস্য কারণত্বমিতি বোধযতি| তেন তত্র ন ব্যাধিহরমাত্রং ভেষজং প্রযোজ্যং, কিন্তূভযপ্রত্যনীকম্| ন চ বাচ্যং কারণভূতদোষনিবৃত্ত্যৈব কার্যভূতস্য ব্যাধের্নিবৃত্তিরিতি; যতঃ প্রতিনিযতশক্তিকানি ভেষজদ্রব্যাণি ভবন্তি; কথমন্যথা শ্লৈষ্মিকতিমিরে শ্লেষ্মহরমেব বমনং ন প্রযুজ্যতে| যদুক্তং সুশ্রুতে– “ন বামযেত্তৈমিরিকং ন গুল্মিনং ন চাপি পাণ্ডূদররোগপীডিতম্|” (সু. চি. অ. ৩৩) ইতি| স এবোত্পাদকব্যঞ্জকভেদাচ্চ দ্বিধা| তত্রোত্পাদকো যথা– হেমন্তজো মধুররসঃ কফস্য| ব্যঞ্জকো যথা– তস্যৈব কফস্য ব্যঞ্জকো বসন্তে সূর্যসন্তাপঃ ইতি ভট্টারহরিচন্দ্রঃ| তত্র ব্যঞ্জকঃ প্রেরক ইত্যর্থঃ| বাহ্যাভ্যন্তরভেদাচ্চ দ্বিধা| তত্র বাহ্যা আহারাচারকালাদযঃ| এতদভিপ্রাযেণ তীসটাচার্যঃ– “ব্যাযামাদপতর্পণাত্ প্রপতনাদ্ভঙ্গাত্ ক্ষযাজ্জাগরাদ্বেগানাং চ বিধারণাদতিশুচঃ শৈত্যাদতিত্রাসতঃ| রূক্ষক্ষোভকষাযতিক্তকটুকৈরেভিঃ প্রকোপং ব্রজেদ্বাযুর্বারিধরাগমে পরিণতে চান্নেঽপরাহ্ণেঽপি চ|| কট্বম্লোষ্ণবিদাহিতীক্ষ্ণলবণক্রোধোপবাসাতপস্ত্রীসম্পর্কতিলাতসীদধি-সুরাশুক্তারনালাদিভিঃ| ভুক্তে জীর্যতি ভোজনে চ শরদি গ্রীষ্মে সতি প্রাণিনাং মধ্যাহ্নে চ তথাঽর্ধরাত্রিসমযে পিত্তং প্রকোপং ব্রজেত্|| গুরুমধুররসাতিস্নিগ্ধদুগ্ধেক্ষুভক্ষ্যদ্রবদধিদিননিদ্রাপূপসর্পিষ্প্রপূরৈঃ| তুহিনপতনকালে শ্লেষ্মণঃ সম্প্রকোপঃ প্রভবতি দিবসাদৌ ভুক্তমাত্রে বসন্তে||” (চ. ক. অ. ২৯-৩১) ইতি| আভ্যন্তরা যথা– দোষা দূষ্যাশ্চ| তত্র দোষোঽপি প্রকুপিতঃ প্রাকৃতাদিভেদাদনেকধা| প্রাকৃতো যথা– বসন্তে শ্লেষ্মা, শরদি পিত্তং, প্রাবৃষি বাযুঃ| বৈকৃতস্তু যথা– বসন্তে পিত্তং বাযুর্বা, বর্ষাসু কফঃ পিত্তং বা, শরদি কফো বাযুর্বা| অস্য প্রযোজনং সুখসাধ্যত্বাদি| যদুক্তং চরকে– “প্রাকৃতঃ সুখসাধ্যস্তু বসন্তশরদুদ্ভবঃ|” (চ. চি. অ. ৩) ইত্যাদি| অনুবন্ধ্যানুবন্ধভেদাচ্চ দ্বিধা| অনুবন্ধ্যঃ প্রধানম্, অনুবন্ধোঽপ্রধানম্| যদাহ চরকঃ– “স্বতন্ত্রো ব্যক্তলিঙ্গো যথোক্তসমুত্থানোপশমো ভবত্যনুবন্ধ্যঃ, তদ্বিপরীতলক্ষণস্ত্বনুবন্ধঃ|” (চ. বি. অ. ৬) ইতি| অস্য প্রযোজনং সংসর্গজে ব্যাধাবনুবন্ধ্যো বিশেষেণ চিকিত্স্যোঽনুবন্ধাবিরোধেন| তদুক্তং চরকে– “তত্রোপদ্রবস্য প্রাযঃ প্রধানপ্রশমাত্ প্রশমঃ|” (চ. চি. অ. ২১) ইতি| উপদ্রবোঽনুবন্ধঃ| প্রকৃতিবিকৃতিতো যথা– বাতপ্রকৃতের্বাতরোগঃ কষ্টসাধ্যো ভবতি, কফপিত্তপ্রকৃতেস্তু সুখসাধ্যঃ| যদাহ সুখসাধ্যলক্ষণে চরকঃ– “ন চ তুল্যগুণো দূষ্যো ন দোষঃ প্রকৃতির্ভবেত্” (চ. সূ. অ. ১০) ইতি| আশযাপকর্ষতো যথা– যদা স্বমানস্থিতমেব দোষং স্বাশযাদাকৃষ্য বাযুঃ স্থানান্তরং গমযতি তদা স্বমানস্থোঽপি স বিকারং জনযতি| যদাহ চরকঃ– “প্রকৃতিস্থং যদা পিত্তং মারুতঃ শ্লেষ্মণঃ ক্ষযে| স্থানাদাদায গাত্রেষু যত্র যত্র বিসর্পতি|| তদা ভেদশ্চ দাহশ্চ তত্র তত্রানবস্থিতঃ| গাত্রদেশে ভবত্যস্য শ্রমো দৌর্বল্যমেব চ||” ইতি (চ. সূ. অ. ১৭)| অস্য প্রযোজনং বাতস্যৈব তত্র বিগুণস্য স্বস্থানানযনং কার্যং, নতু পিত্তস্য হ্রাসনং; “যে ত্বেনাং পিত্তস্য স্থানাকৃষ্টিং ন বিদন্তি, তে দাহোপলম্ভেন পিত্তবৃদ্ধিং মন্যমানাঃ পিত্তং হ্রাসযন্তঃ পিত্তক্ষযলক্ষণং রোগান্তরমেবোত্পাদযন্ত আতুরমতিপাতযন্তি|” ইতি ভট্টারহরিচন্দ্রঃ| অন্যে ত্বাহুঃ– ভ্রাজকাদিভেদেন সর্বদেহস্থিতে পিত্তে যদা স্বাশযাকৃষ্টং পিত্তমবযবান্তরমনিলেন প্রাপিতং তদা তদবযবান্তরস্থং পিত্তমাগন্তুপিত্তসম্বন্ধেনাধিকমেব জাতং, ততশ্চ পিত্তবৃদ্ধিলক্ষণৈবেযং দুষ্টির্ন দুষ্ট্যন্তরম্, অন্যথা দাহ এব ন স্যাত্ নহি স্বমানস্থো দোষো বিকারং জনযতীতি| ভট্টারহরিচন্দ্রস্য ত্বযমভিপ্রাযঃ– যদ্যপ্যেবং তথাঽপি চিকিত্সাভেদার্থং বৃদ্ধিক্ষযব্যতিরিক্তস্থানান্তরগতিরূপো দুষ্টিবিশেষোঽবশ্যমেবেষ্টব্যঃ, অন্যথা বৃদ্ধং পিত্তমিতি মত্বা বিরেচনং পিত্তহ্রাসনং বা কার্যং, নচ তত্তত্র যোগ্যং, কিং তু স্বস্থানানযনম্| যচ্চোক্তং চরকেণ– “ক্ষযঃ স্থানং চ বৃদ্ধিশ্চ বিজ্ঞেযা ত্রিবিধা গতিঃ|” (চ. সূ. অ. ১৭) ইত্যাদি, তত্ প্রাযিকমিতি| গতিতো যথা– গতির্দোষাণাং ক্ষীণবৃদ্ধত্বাদযঃ| যদুক্তং চরকে “ক্ষযঃ স্থানং চ বৃদ্ধিশ্চ দোষাণাং ত্রিবিধা গতিঃ| ঊর্ধ্বং চাধশ্চ তির্যক্চ বিজ্ঞেযা ত্রিবিধা পরা|| ত্রিবিধা চাপরা কোষ্ঠশাখামর্মাস্থিসন্ধিষু|” (চ. সূ. অ. ১৭) ইতি|| অত্র স্থানমিতি সমত্বম্| তত্র ক্ষযাদিলক্ষণং যথা– “দোষাঃ প্রবৃদ্ধাঃ স্বং লিঙ্গং দর্শযন্তি যথাবলম্| ক্ষীণা জহতি স্বং লিঙ্গং, সমাঃ স্বং কর্ম কুর্বতে||” (চ. সূ. অ. ১৭)– ইতি| স্বং লিঙ্গমিতি কুপিতস্য বাযো রৌক্ষ্যাদযো ধর্মাঃ, কর্মাণি চ স্রংসশূলাদীনি| যদাহ চরকপাঠসংবাদী সুদান্তসেনঃ– “আধ্মানস্তম্ভরৌক্ষ্যস্ফুটনবিমথনক্ষোভকম্পপ্রতোদাঃ, কণ্ঠধ্বংসাবসাদৌ শ্রমকবিলপনং স্রংসশূলপ্রভেদাঃ| পারুষ্যং কর্ণনাদো বিষমপরিণতিভ্রংশদৃষ্টিপ্রমোহা, বিস্পন্দোদ্ঘট্টনানি গ্লপনমশযনং তাডনং পীডনং চ|| নামোন্নামৌ বিষাদো ভ্রমপরিপতনং জৃম্ভণং রোমহর্ষো, বিক্ষেপাক্ষেপশোষগ্রহণশুষিরতাচ্ছেদনং বেষ্টনং চ| বর্ণঃ শ্যাবোঽরুণো বা তৃডপি চ মহতী স্বাপবিশ্লেষসঙ্গা, বিদ্যাত্ কর্মাণ্যমূনি প্রকুপিতমরুতঃ স্যাত্ কষাযো রসশ্চ|| বিস্ফোটাম্লকধূমকাঃ প্রলপনং স্বেদস্রুতির্মূর্ছনং, দৌর্গন্ধ্যং দরণং মদো বিসরণং পাকোঽরতিস্তৃড্ভ্রমৌ| ঊষ্মাঽতৃপ্তিতমঃ প্রবেশদহনং কট্বম্লতিক্তা রসা, বর্ণঃ পাণ্ডুবিবর্জিতঃ ক্বথিততা কর্মাণি পিত্তস্য বৈ|| তৃপ্তিস্তন্দ্রা গুরুতা স্তৈমিত্যং কঠিনতা মলাধিক্যম্| স্নেহাপক্ত্যুপলেপাঃ শৈত্যং কণ্ডূঃ প্রসেকশ্চ|| চরকর্তৃত্বং শোথো নিদ্রাধিক্যং রসৌ পটুস্বাদূ| বর্ণঃ শ্বেতোঽলসতা কর্মাণি কফস্য জানীযাত্|| দ্বিদোষলিঙ্গঃ সংসর্গঃ সন্নিপাতস্ত্রিলিঙ্গকঃ|” ইতি| লিঙ্গজ্ঞানপ্রযোজনং চ চিকিত্সাভেদার্থম্| যদাহ সুশ্রুতঃ– “ক্ষীণা বর্ধযিতব্যাঃ, বৃদ্ধা হ্রাসযিতব্যাঃ, সমাঃ পালযিতব্যাঃ” (সু. চি. অ. ৩৩)– ইতি| ঊর্ধ্বাদিগতির্যথা– ঊর্ধ্বগং রক্তপিত্তমিত্যাদি| অস্য প্রযোজনং রক্তপিত্তস্যোর্ধ্বগস্য বিরেচনম্, অধোগস্য বমনম্| যথোক্তং চরকে– “ প্রতিমার্গং চ হরণং রক্তপিত্তে বিধীযতে|” (চ. নি. অ. ২) ইতি| যস্তু গতিভেদানভিজ্ঞঃ সঃ “বিরেকঃ পিত্তহরাণাং” (চ. সূ. অ. ২৫) ইতি বচনাদধোগে রক্তপিত্তে বিরেকং প্রযুঞ্জান আতুরস্যানর্থমেবোত্পাদযতি; জ্বরাদিষু তির্যগ্দোষগতিষু যথোক্তং চিকিত্সিতমিতি| বৃদ্ধা দোষাঃ কদাচিত্ কোষ্ঠং, কদাচিচ্ছাখাঃ, কদাচিন্মর্মাস্থিসন্ধীনাশ্রিত্য রুজন্তি; মর্মাস্থিসন্ধিষু গতিঃ কৃচ্ছ্রসাধ্যত্বোপাদকত্বাদেকত্বেন নির্দিষ্টা| কোষ্ঠ আমাশযাদিঃ, শাখা রক্তাদযো ধাতবস্ত্বক্চেতি, চরককৃতৈবেযং সঞ্জ্ঞা| কোষ্ঠাদ্যভিধানপ্রযোজনং চিকিত্সাভেদার্থম্| যথোক্তং চরকে– “আমাশযগতে বাতে কফে পক্বাশযাশ্রিতে| রূক্ষপূর্বো হিতঃ স্বেদঃ স্নেহপূর্বস্তথৈব চ||” (চ. সূ. অ. ১৪); তথা– “সন্ততং রসরক্তস্থঃ সোঽন্যেদ্যুঃ পিশিতাশ্রিতঃ|” (সু. উ. তং. অ. ৩৯) ইত্যাদি; তথা– “নাগ্নিকর্মোপদেষ্টব্যং স্নাযুমর্মব্রণেষু চ|” (চ. চি. অ. ২৫) ইতি| এতে চ দোষাঃ সামত্বনিরামত্বাভ্যামপি জ্ঞাতব্যাঃ| যদুক্তম্– “ঊষ্মণোঽল্পবলত্বেন ধাতুমাদ্যমপাচিতম্| দুষ্টমামাশযগতং রসমামং প্রচক্ষতে|| আমেন তেন সংযুক্তা দোষা দূষ্যাশ্চ দূষিতাঃ| সামা ইত্যুপদিশ্যন্তে যে চ রোগাস্তদুদ্ভবাঃ|| স্রোতোরোধবলভ্রংশগৌরবানিলমূঢতাঃ| আলস্যাপক্তিনিষ্ঠীবমলভেদারুচিক্লমাঃ|| লিঙ্গং মলানাং সামানাং নিরামাণাং বিপর্যযঃ|” (বা. সূ. অ. ১৩)| “বাযুঃ সামো বিবন্ধাগ্নিসাদতন্দ্রান্ত্রকূজনৈঃ|| বেদনাশোথনিস্তোদৈঃ ক্রমশোঽঙ্গানি পীডযেত্| বিচরেদ্যুগপচ্চাপি গৃহ্ণাতি কুপিতো ভৃশম্| স্নেহাদ্যৈর্বৃদ্ধিমাপ্নোতি সূর্যমেঘোদযে নিশি| নিরামো বিশদো রূক্ষো নির্বিবন্ধোঽল্পবেদনঃ|| বিপরীতগুণৈঃ শান্তিং স্নিগ্ধৈর্যাতি বিশেষতঃ| দুর্গন্ধং হরিতং শ্যাবং পিত্তমম্লং স্থিরং গুরু|| অম্লিকাকণ্ঠহৃদ্দাহকরং সামং বিনির্দিশেত্| আতাম্রং পিত্তমত্যুষ্ণং রসে কটুকমস্থিরম্|| পক্বং বিগন্ধং বিজ্ঞেযং রুচিপক্তৃবলপ্রদম্| আবিলস্তন্তুলঃ স্ত্যানঃ কণ্ঠদেশেঽবতিষ্ঠতে| সামো বলাসো দুর্গন্ধঃ ক্ষুদুদ্গারবিঘাতকৃত্|| ফেনবান্ পিণ্ডিতঃ পাণ্ডুর্নিঃসারোঽগন্ধ এব চ| পক্বঃ স এব বিজ্ঞেযশ্ছেদবান্ বক্ত্রশুদ্ধিকৃত্||” ইতি| অস্য প্রযোজনং সামে পাচনং, নিরামে শমনমিতি| এতে চ দোষাঃ পরস্পরসম্বদ্ধাস্তরতমাদিভেদেন দ্বিষষ্টিধা ভবন্তি| তদুদাহরণানি বিস্তরত্বাপত্তেরত্র ন লিখ্যন্তে, সৌশ্রুতদোষভেদবিকল্পাধ্যাযে (সু. উ. তং. অ. ৬৬) দ্রষ্টব্যানি| উক্তহেতুদোষভেদযোঃ সঙ্গ্রহশ্লোকৌ– “চত্বারো ব্যভিচারিদূরনিকটপ্রাধানিকত্বাত্, পুনস্তেঽসাত্ম্যেন্দ্রিযকার্থযুক্পরিণতিপ্রজ্ঞাপরাধাত্ত্রিধা| রুগ্দোষোভযকারণাদপি তথা, দ্বৌ ব্যঞ্জকোত্পাদকৌ, বাহ্যাভ্যন্তরভেদতোঽপি কথিতা হেতোঃ প্রভেদা অমী|| দোষস্য চ প্রাকৃতবৈকৃতাভ্যাং, ভেদোঽনুবন্ধ্যাদপি চানুবন্ধাত্| তথা প্রকৃত্যপ্রকৃতিত্বযোগাত্তথাঽঽশযাকর্ষবশাদ্গতেশ্চ||” ইতি নিদানম্|৫|–