৫৪. মসূরিকানিদানম্

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

বিস্ফোটপ্রভেদত্বাত্ প্রাযেণ তুল্যনিদানত্বাচ্চ মসূরিকানিদানম্| তস্যা নিদানপূর্বিকাং সম্প্রাপ্তিমাহ– কট্বম্লেত্যাদি| বিরুদ্ধাধ্যশনাশনৈরিতি বিরুদ্ধৈরন্নৈরধ্যশনৈশ্চ, ‘বিরুদ্ধাধ্যশনেন তু’ ইতি পাঠো বা| দুষ্টনিষ্পাবশাকাদ্যৈরিতি দুষ্টং ব্যাপন্নমন্নং, নিষ্পাবঃ শিম্বিবীজম্, আদ্যশব্দান্মধ্বালুকাদিগ্রহণম্| প্রদুষ্টপবনোদকৈরিতি বিষকুসুমাদিসংস্পর্শাত্ প্রদুষ্টঃ পবনস্তথোদকং চ, তৈঃ| ক্রূরগ্রহেক্ষণাচ্চেতি শনৈশ্চরাদযো দেশক্ষোভকরাঃ ক্রূরগ্রহাস্তেষামীক্ষণাত্| দুষ্টরক্তেন সঙ্গতা ইত্যনেন রক্তস্য কট্বম্লাদিভির্হেতুভির্বিশেষেণ কোপং দর্শযতি| অত এবোক্তং তন্ত্রান্তরে– “পিত্তং শোণিতসংসৃষ্টং যদা দূষযতি ত্বচম্| তদা করোতি পিডকাঃ সর্বগাত্রেষু দেহিনাম্|| মসূরমুদ্গমাষাণাং তুল্যাঃ কোলোপমা অপি| মসূরিকাস্তু তা জ্ঞেযাঃ পিত্তরক্তাধিকা বুধৈঃ||” ইতি||১-৩||–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

বাতজামাহ– স্ফোটা ইত্যাদি| চিরপাকা ইতি বিকারপ্রভাবাত্||৪-৫||–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পিত্তজামাহ– রক্তা ইত্যাদি| জ্বরস্তীব্রঃ সুদারুণ ইতি তীব্রশ্চণ্ডবেগঃ, সুদারুণো বহুদুঃখেনাতিদুঃসহ||৬-৭||–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

রক্তজামাহ– রক্তজাযামিত্যাদি| এতে বিকারাঃ পিত্তলক্ষণা ইতি পিত্তজমসূরীলক্ষণত্বেন উক্তাঃ| ‘ রক্তাঃ পীতাসিতাঃ স্ফোটা’ ইত্যাদযো যে যে বিকারাস্তে রক্তজাযাং ভবন্তি| অত্র কফজামনুক্ত্বৈব পিত্তজাযা অনন্তরং রক্তজাযা উক্তিঃ পিত্তলক্ষণস্যাতিদিষ্টস্যাব্যবহিতত্বেন সুখগ্রহণার্থং, রক্তরসসমত্বাত্ রক্তমলত্বাদ্বা পিত্তস্য পিত্তজামভিধায অস্যাঃ কথনং, সর্বত্র কৃতস্য সমর্থনায||৮-১০||

আতঙ্কদর্পণ ব্যাখ্যা (বাচস্পতি বৈদ্য কৃত)

রক্তজামাহ– রক্তজাযামিত্যাদি| এতে বিকারাঃ পিত্তমসূরিকালক্ষণত্বেন যে উক্তাঃ ‘রক্তাঃ পীতাসিতাঃ স্ফোটাঃ’ ইত্যাদযো যে বিকারাঃ তে রক্তজাযাং ভবন্তি| কফজামাহ– শ্বেতা ইত্যাদি| সুগমম্||৮-১০||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

সান্নিপাতিকলক্ষণমাহ– নীলা ইত্যাদি| চিপিটবিস্তীর্ণা ইতি চিপিটঃ ‘চিউডা’ ইতি খ্যাতঃ, তদ্বদ্বিস্তৃতাঃ| চর্মসঞ্জ্ঞিতা ইতি ‘চর্মদল’ ইতি খ্যাতাঃ||১১-১২||

আতঙ্কদর্পণ ব্যাখ্যা (বাচস্পতি বৈদ্য কৃত)

সন্নিপাতজামাহ– নীলা ইত্যাদি| নীলাশ্চাষপক্ষপ্রতিমাঃ| চিপিটবিস্তীর্ণা ইতি চিপিটাশ্চিউডা ইতি খ্যাতাঃ, তদ্বদ্বিততাঃ| মধ্যে নিম্না ইত্যুক্তে প্রান্তোন্নতত্বং জ্ঞেযম্| প্রভূতাঃ প্রচুরাঃ কণ্ঠরোধঃ কণ্ঠগ্রহঃ, প্রলাপোঽবদ্ধভাষণং, দুশ্চিকিত্স্যাঃ অসাধ্যাঃ, চর্মসঞ্জ্ঞিতা ইতি ‘ চামঘাংস’ ইতি খ্যাতঃ||১১-১২||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

মসূরিকাযাঃ প্রকারং রোমান্তিকামাহ– রোমকূপোন্নতিসমা ইত্যাদি| রাগিণ্য ইতি লোহিতাঃ, জ্বরপূর্বিকা ইতি জ্বরপূর্বরূপাঃ||১৩||

আতঙ্কদর্পণ ব্যাখ্যা (বাচস্পতি বৈদ্য কৃত)

মসূরিকাযাঃ প্রকারান্তরং রোমান্তিকামাহ– রোমেত্যাদি| রোমকূপোচ্ছ্রাযাঃ, রাগিণ্য ইতি লোহিতাঃ, জ্বরপূর্বিকা ইতি জ্বরপূর্বরূপাঃ||১৩||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

রসাদিসপ্তধাতুগতমসূরিকালিঙ্গমাহ– তোযবুদ্বুদসঙ্কাশা ইত্যাদি| অত্র দুষ্টদূষ্যপ্রভাবাত্ তোযবুদ্বুদসঙ্কাশাদীনি দোষলক্ষণানি চ ভবন্তি, দোষমন্তরেণ দূষ্যদুষ্টেরভাবাত্; অত এব বক্ষ্যতি– “দোষমিশ্রাশ্চ সপ্তৈতা দ্রষ্টব্যা দোষলক্ষণৈঃ|” ইতি| ত্বক্শব্দেনাত্র রসোঽভিধীযতে, ধাতুগতপ্রস্তাবাত্| ত্বগ্গতাঃ সাধ্যাঃ, অল্পদোষসম্বন্ধাদ্রক্তজাযা অপি সাধ্যত্বেনাভিধানাত্| মাংসস্থাঃ কৃচ্ছ্রসাধ্যাঃ, অত্যবগাঢদোষদুষ্টেঃ| মেদোজাযাং কশ্চিদাভ্যো বিনিস্তরেদিত্যনেনাত্যন্তকৃচ্ছ্রসাধ্যত্বং বোধযতি, অস্থিমধ্যস্থিতত্বান্মজ্জ্ঞঃ| ক্ষুদ্রা ইত্যাদিনা অস্থিমজ্জগতযোঃ সমানং লিঙ্গম্| মজ্জোত্থা ইত্যত্র মজ্জগ্রহণাদস্থ্নোঽপি গ্রহণম্, আধারত্বাত্; অত এব বক্ষ্যতি– “ভ্রমরেণেব বিদ্ধানি কুর্বন্ত্যস্থীনি সর্বতঃ|” ইতি| মর্মধামানীতি মর্মস্থানানি| পক্বাভা ইত্যাদিনা শুক্রজাযা লিঙ্গম্| দৃশ্যতে ন তু জীবিতমিতি গম্ভীরধাতুগতদোষদুষ্টেঃ শুক্রজাযা অসাধ্যত্বম্| অস্য ন্যাযস্য সমানতযা অস্থিমজ্জগতযোরপ্যসাধ্যত্বং বোদ্ধব্যম্||১৪-২৩||

আতঙ্কদর্পণ ব্যাখ্যা (বাচস্পতি বৈদ্য কৃত)

রসাদিসপ্তধাতুগতমসূরিকাযা লিঙ্গমাহ– তোযেত্যাদি| অত্র দুষ্টদূষ্যপ্রভাবাত্তোযবুদ্বুদসঙ্কাশাদীনি লক্ষণানি দোষলক্ষণানি চ ভবন্তি, দোষমন্তরেণ দূষ্যদুষ্টেরভাবাত্| অত এব বক্ষ্যতি– “দোষমিশ্রাস্তু সপ্তৈতা দ্রষ্টব্যা দোষলক্ষণৈঃ|” ইতি| ত্বক্শব্দেনাত্র রসো গৃহ্যতে, ধাতুগতপ্রস্তাবাত্| ত্বগ্গতাঃ সাধ্যাঃ, স্বল্পদোষসম্বন্ধাত্| রক্তজামাহ– রক্তোত্থা ইত্যাদি| অত্যর্থং চেন্ন দুষ্টা তদা সাধ্যা| অত্রাপি স্বল্পদোষানুবন্ধত্বেন সাধ্যত্বম্| মাংসস্থামাহ– মাংসস্থা ইত্যাদি| মাংসস্থাঃ কৃচ্ছ্রসাধ্যাঃ, অত্যবগাঢদোষদুষ্টেঃ| মেদোগতামাহ– মেদোজা ইত্যাদি| মৃদবো মৃদুস্পর্শাঃ, ঘোরজ্বরপরীতা ইতি দারুণজ্বরো যতঃ| সম্মোহ ইন্দ্রিযাণাম্| কশ্চিদাভ্যো বিনিস্তরেদিত্যনেনাত্যন্তং কৃচ্ছ্রসাধ্যত্বং বোধযতি| অস্থিমজ্জগতামাহ– ক্ষুদ্রা ইত্যাদি| অত্র অস্থিমজ্জাগতযোঃ সমানং লক্ষণং জ্ঞেযম্| মজ্জোত্থা ইত্যত্র মজ্জগ্রহণাদস্থ্নোঽপি গ্রহণমাধারত্বাত্, ক্ষুদ্রাঃ তন্ব্যঃ, গাত্রসমাঃ শরীরসমবর্ণাঃ, চিপিটাঃ চিউডাকারাঃ, অত এব বক্ষ্যতি– “ভ্রমরেণেব বিদ্ধানি ভবন্ত্যস্থীনি সর্বতঃ|” ইতি| মর্মধামানি মর্মস্থানানি হৃদযাদীনি| শুক্রগতামাহ– পক্বাভা ইত্যাদি| পক্বাকারা অননুপক্বা| অন্যে ‘পঙ্কাভাঃ’ ইতি পঠন্তি, তত্র কর্দমাভাঃ| শ্লক্ষ্ণাঃ মসৃণাঃ| চিহ্নং দৃশ্যতে ন তু জীবিতমিতি| গম্ভীরধাতুগতদোষদুষ্টেঃ শুক্রজাযামসাধ্যত্বং বোদ্ধব্যম্| ধাতুগতানাং দোষজানামপি সাধ্যত্বমাহ– ত্বগ্গতা ইত্যাদি| রসগতাঃ||১৪-২৩||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

বাতজা ইত্যাদি| বাতজাদযঃ সন্নিপাতোত্থান্তা অসাধ্যাঃ| এতাসাং সম্মূর্ছনবিশেষজনিতবক্ষ্যমাণপ্রবালাদিবর্ণযোগাদসাধ্যত্বং, তেনৈতদ্বর্ণবিরহে বাতজাযাশ্চিকিত্সাবিধিরপ্যুক্ত উপপদ্যত ইতি কেচিত্| অন্যে তু বাতজাদয এতাঃ স্বরূপত এবাসাধ্যাঃ, চিকিত্সোক্তিস্তু বাতজাদীনাং মহাত্যযনিষেধার্থং, লিঙ্গান্তরসম্ভবার্থং চ তাসাং বক্ষ্যামি লক্ষণমিত্যুক্তমিত্যাহুঃ| তাসামিতি অসাধ্যবাতজাদীনাম্| লোহজালসমা ইতি জালং জালকং গুডকমিতি যাবত্, তদ্বত্কৃষ্ণবর্ণাঃ| অতসীফলসন্নিভা ইতি উমাফলবর্ণতুল্যবর্ণাঃ| অনুক্তবর্ণান্তরসঙ্গ্রহার্থমাহ– আসাং বহুবিধা ইত্যাদি| দোষভেদত ইতি বাতপিত্তাদিদোষবিশেষাত্, দুষ্টিবিশেষাদিত্যন্যে||২৪-২৬||

আতঙ্কদর্পণ ব্যাখ্যা (বাচস্পতি বৈদ্য কৃত)

কষ্টসাধ্যা আহ– বাতজা ইত্যাদি| এতা বাতজাদযঃ স্বরূপত এব কষ্টসাধ্যাঃ, চিকিত্সিতোক্তিস্তু বাতজাযা মহাত্যযনিষেধার্থম্| অসাধ্যা আহ– অসাধ্যা ইত্যাদি| তাসামিতি বাতাদীনাম্| দোষদূষ্যসম্মূর্ছনাদ্বিশেষবর্ণত্বেন লক্ষণমাহ– প্রবালেত্যাদি| লোহজালনিভাঃ লোহজালকং লোহগুলিকং, তদ্বত্কৃষ্ণবর্ণাঃ, কশ্চিদতসীফলতুল্যবর্ণাঃ| অনুক্তবর্ণান্তরসঙ্গ্রহার্থমাহ– আসামিত্যাদি| আসাং মসূরিকাণাং বর্ণা বহুবিধা জাযন্তে| কথমিত্যাহ– দোষভেদত ইত্যাদি| বাতপিত্তাদিদোষবিশেষাত্, দুষ্টিবিশেষাদিত্যর্থঃ||২৪-২৬||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

সর্বমসূরিকাযা আবস্থিকং লিঙ্গমাহ– কাস ইত্যাদি| জ্বরস্তীব্রঃ সুদারুণ ইতি, অত্র সুদারুণ ইতি পরেণ সম্বধ্যতে, তেন সুদারুণঃ প্রলাপঃ| অতিঘূর্ণতা জিহ্মাযনম্| তথা ঘ্রাণেন চক্ষুষেত্যত্র রক্তং স্রবেদিতি সম্বধ্যতে| শ্বসিতীতি শ্বাসো ভবতি||২৭-২৯||

আতঙ্কদর্পণ ব্যাখ্যা (বাচস্পতি বৈদ্য কৃত)

তাসামাবস্থিকলক্ষণমাহ– কাস ইত্যাদি| প্রমোহ ইন্দ্রিযাণাম্| জ্বরস্তীব্র ইতি তীব্রবেগঃ| সুদারুণো ঘোরঃ; অন্যে সুদারুণ ইতি পরেণ সম্বধ্যত ইত্যাহুঃ, তেন সুদারুণঃ প্রলাপঃ| অতিঘূর্ণতা জিহ্মাযনম্| তথা ঘ্রাণেন চক্ষুষেতি অত্র রক্তং প্রস্রবেদিতি সম্বধ্যতে| শ্বসিতীতি শ্বাসো ভবতি||২৭-২৯||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

সামান্যেনাসাধ্যত্বমাহ– মসূরিকাভিভূতো য ইত্যাদি| ঘ্রাণেন নিঃশ্বসেদিতি মুখব্যতিরেকেণ ঘ্রাণেনৈব নিঃশ্বসেত্, সর্ববাক্যানামবধারণফলত্বাত্||৩০||

আতঙ্কদর্পণ ব্যাখ্যা (বাচস্পতি বৈদ্য কৃত)

সামান্যেনাসাধ্যতামাহ– মসূরিকেত্যাদি| যো মসূরিকাভিভূতো নরো ভৃশং ঘ্রাণেন নিঃশ্বসেদিতি মুখব্যতিরেকেণ ঘ্রাণেনৈব নিঃশ্বসেত্, সর্ববাক্যানামবধারণত্বাত্; তথা যঃ প্রদূষিতো মসূরিকাভিঃ পীডিতো নরো ভৃশং তৃষার্তো ভবতি, স তথাবিধো নরঃ প্রাণাংস্ত্যজতি||৩০||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

মসূরিকাযা উপদ্রবমাহ– মসূরিকান্তে ইত্যাদি| দুশ্চিকিত্স্য ইতি দুঃশব্দোঽযং নিষেধে, তেন অসাধ্য ইত্যর্থঃ||৩১||

আতঙ্কদর্পণ ব্যাখ্যা (বাচস্পতি বৈদ্য কৃত)

মসূরিকাযা উপদ্রবমাহ– মসূরিকান্ত ইত্যাদি| কূর্পরে জানুকূর্পরে, মণিবন্ধনে ঘুটিকাযাম্, অংসফলকে পার্শ্বযোরুপরি, দুশ্চিকিত্স্য ইতি অসাধ্য ইত্যর্থঃ||৩১||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ইতি শ্রীকণ্ঠদত্তকৃতাযাং মধুকোশব্যাখ্যাযাং মসূরিকানিদানং সমাপ্তম্||৫৪||

আতঙ্কদর্পণ ব্যাখ্যা (বাচস্পতি বৈদ্য কৃত)

ইতি শ্রীবাচস্পতিবৈদ্যবিরচিতাযাং মাধবনিদানব্যাখ্যাযামাতঙ্কদর্পণাখ্যাযাং মসূরিকানিদানম্||৫৪||