২৭. অন্নপানবিধ্যধ্যাযঃ

সম্প্রতি সামান্যেনোক্তানাং গুণকর্মভ্যাং প্রতিব্যক্ত্যনুক্তানাং প্রতিব্যক্তিপ্রায উপযোগিদ্রব্যস্য বিশিষ্টগুণকর্মকথনার্থমন্নপানবিধিরধ্যাযোঽভিধীযতে| অত্রোত্পন্নস্য ছপ্রত্যযস্য লুক্| অত্রান্নে কাঠিন্যসামান্যাত্ খাদ্যং, পানে চ দ্রবত্বসামান্যাল্লেহ্যমবরুদ্ধং জ্ঞেযম্| অন্নপানং বিধীযতে বিশিষ্টগুণকর্মযোগিতযা প্রতিপাদ্যতেঽনেনেত্যন্নপানবিধিঃ; দ্রব্যাণাং গুণকর্মকথনমেব চান্নপানবিধিঃ, যতস্তদ্ধি জ্ঞাত্বাঽন্নপানং বিধীযতে||১-২||

কিং তদন্নপানং করোতীত্যাহ- ইষ্টেত্যাদি| ইষ্টমিতি অভিমতং হিতং চ; কিংবা ইষ্টং প্রিযং, হিতং তু বিধিবিহিতশব্দেনৈব প্রাপ্যতে| বিধির্বক্ষ্যমাণরসবিমানে “তদেতদাহারবিধানম” (বি. ১) ইত্যাদিগ্রন্থবাচ্যঃ, তথেন্দ্রিযোপক্রমণীযে চ “নারত্নপাণিঃ” (সূ. ৮) ইত্যাদিনোক্তং বিধানং; তেন বিধিনা বিহিতং বিধিবিহিতম্| অত্র বর্ণাদিষু শব্দাগ্রহণমন্নপানে প্রাযঃ শব্দস্যাবিদ্যমানত্বাত্| বর্ণাদিষু যদ্যত্ প্রথমমন্নপানে গুহ্যতে, তত্তত্ পূর্বমুক্তম্| রসস্তু স্পর্শস্য পশ্চাদ্গৃহ্যমাণোঽপি প্রাধান্যখ্যাপনার্থং স্পর্শস্যাগ্রে কৃতঃ| প্রাণিনামিত্যনেনৈব লব্ধেঽপি “প্রাণিসঞ্জ্ঞকানাম্” ইতি বচনং স্থাবরপ্রাণিপ্রতিষেধার্থং; বৃক্ষাদযো হি বনস্পতিসত্ত্বানুকারোপদেশাচ্ছাস্ত্রে প্রাণিন উক্তাঃ; নতু লোকে প্রাণিসঞ্জ্ঞকাঃ, কিন্তর্হি জঙ্গমা এব| ইহ চ মনুষ্যস্যৈবাধিকৃতত্বেঽপি সামান্যেন সকলপ্রাণিপ্রাণহেতুতযাঽঽহারকথনং মনুষ্যব্যতিরিক্তেঽপি প্রাণিন্যাহারস্য প্রাণজনকত্বোপদর্শনার্থম্| প্রাণমিতি প্রাণহেতুত্বাত্; যথা- আযুর্ঘৃতম্| অথ কথং তত্ প্রাণমাচক্ষত ইত্যাহ- প্রত্যক্ষফলদর্শনাদিতি |- প্রত্যক্ষেণৈব হ্যাহারং বিধিনা কুর্বতাং প্রাণা অনুবর্তন্ত ইতি, তথা নিরাহারাণাং প্রাণা নহ্যবতিষ্ঠন্ত ইতি দৃশ্যত ইত্যর্থঃ| প্রত্যক্ষশব্দশ্চেহ স্ফুটপ্রমাণে বর্ততে, যতঃ প্রাণানামন্নকার্যত্বমনুমানগম্যমেব| অন্নকার্যত্ব এব প্রাণানাং হেতুমাহ- তদিন্ধনা হীত্যাদিনা| যস্মাদন্তরগ্নিস্থিতিশ্চান্নপানহেতুনা, অগ্নিস্থিতিশ্চ প্রাণহেতুঃ, ততোঽন্নং প্রাণা ইতি ভাবঃ; উক্তং হি- “বলমারোগ্যমাযুশ্চ প্রাণাশ্চাগ্নৌ প্রতিষ্ঠিতাঃ”| কিংবা, পূর্বমন্নপানস্য প্রাণহেতুত্বমুক্তং, তদিন্ধনা হীত্যাদিনাঽগ্নিহেতুত্বং বর্ণ্যতে| সত্ত্বমূর্জযতীতি মনোবলং করোতি| ধাতুব্যূহো ধাতুসঙ্ঘাতঃ| বিপরীতম্ অবিধিসেবিতম্||৩||

অন্নপানং বিধীযতে যেন তং বিধিং দ্রব্যগুণকর্মরূপং, তথা চরশরীরাবযবাদিরূপং চাখিলেন কার্ত্স্ন্যেনোপদেক্ষ্যামঃ| যদ্যপি চেহ দ্রব্যং প্রতি প্রতি গুণকর্মভ্যাং ন নির্দেক্ষ্যতি, বক্ষ্যতি হি- “অন্নপানৈকদেশোঽযমুক্তঃ প্রাযোপযোগিকঃ” ইতি, তথাঽপ্যনুক্তানামপি দ্রব্যাণাং চরশরীরাবযবাদ্যুপদেশেন, তথা পূর্বাধ্যাযোক্তপার্থিবাদিদ্রব্যগুণকর্মকথনেন চ তদ্বিধানমপ্যুক্তং ভবতীত্যত উক্তম্- অখিলেননেতি; বক্ষ্যতি হি- “যথা নানৌষধং কিং চিদ্দেশজানাং বচো যথা| দ্রব্যং তু তত্তথা বাচ্যমনুক্তমিহ যদ্ভবেত্”, তথা “চরঃ শরীরবযবাঃ” ইত্যাদি; কিংবা, বিধিশব্দোঽশিতপীতলীঢখাদিতপ্রকারবাচী, তেন চাশিতাদযঃ সর্ব এবাখিলেন বাচ্যঃ, তত্কারণভূতানি তু দ্রব্যাণি রক্তশাল্যাদীন্যেকদেশেনোক্তানি, অতো বক্ষ্যতি- ‘অন্নপানৈকদেশোঽযমুক্তঃ’ ইতি| অন্নপানে চ বক্তব্যে যদ্দ্রব্যং প্রায উপযুজ্যতে, তস্য সামান্যগুণমভিধায বর্গসঙ্গ্রহেণ গুণমুপদেক্ষ্যতি| উদকাভিধানং চাগ্রে কৃতম্, উদকস্যান্নে পানে চ ব্যাপ্রিযমাণত্বাত্| তদিত্যুদাহরণং; কিংবা স স্বভাবো যস্য স তত্স্বভাবঃ, তস্মাত্ ক্লেদনস্বভাবাদিত্যর্থঃ| যদ্যপি ‘উদকমাশ্বাসকরাণাং, জলং স্তম্ভনানাম্’ (সূ. ২৬) ইত্যুক্তং, তথাঽপীহানুক্তক্লেদনকর্মাভিধানার্থং পুনরুচ্যতে| ইহ জললবণাদীনাং যত্ কর্মোচ্যতে তত্তেষামিতরকর্মভ্যঃ প্রধানং জ্ঞেযম্, অগ্র্যাধিকারে তু তত্কর্মকর্তৃদ্রব্যান্তরপ্রশস্ততা জ্ঞেযা| ক্ষারঃ পচন্তমগ্নিং পাচযতি, তেন পাচযতীতি হেতৌ ণিচ্| স্নেহযতীত্যাদৌ তু “তত্করোতি তদাচষ্টে” ইতি ণিচ্| সন্দধাতীতি বিশ্লিষ্টানি ত্বঙ্মাংসাদীনি সংশ্লেষযতি| রসঃ মাংসরসঃ| প্রীণযতীতি ক্ষীণান্ পুষ্ণাতি, নত্বতিবৃহত্ত্বং করোতি; তেন মাংসকর্মণা বৃংহণেন সমং নৈক্যম্| জর্জরীকরোতীতি শ্লথমাংসাদ্যুপচযং করোতি; যদুক্তং হারীতে- “সুরা জর্জরীকরোত্যসৃঙ্মেদোবাহুল্যাত্” ইতি, তথা হ্যত্রৈবোক্তং- “সুরা কৃশানাং পুষ্ট্যর্থম্” ইতি| অবধমযতীতি বিলিখতীত্যর্থঃ, অনেকার্থত্বাদ্ধাতূনাং; বচনং হি- ‘লেখনঃ শীতরসিকঃ’ ইতি, তথা হারীতেঽপ্যুক্তং- “শীধুরবধমযতি বায্বগ্নিপ্রবোধনাত্” ইতি| আচিনোতি ‘দোষান্’ ইতি শেষঃ, তন্ত্রান্তরবচনং হি- “বাতপিত্তকফাংস্তস্মাদাচিনোতি চ ফাণিতম্” ইতি| পিণ্যাকঃ তিলকল্কঃ; নিঘণ্টুকারস্ত্বাহ- পিণ্যাকো হরিতশিগ্রুঃ| গ্লপযতি হর্ষক্ষযং করোতি| প্রভূতান্তর্মলস্য পুরীষস্য কর্তা প্রভূতান্তর্মলঃ; যদ্যপি ‘মাষো বহুমলঃ’ ইতি বক্ষ্যতি, তথাঽপি মাষবিকৃতেঃ সূপস্যেহ গুণকথনং, তেন ন পুনরুক্তং; ন চাবশ্যং প্রকৃতিধর্মো বিকৃতিমনুগচ্ছতি, যতঃ সক্তূনাং সিদ্ধপিণ্ডিকা গুর্বী এব ভবতি, তস্মান্মাষবিকৃতাবপি মলবৃদ্ধিদর্শনার্থমেতদভিধানম্| ক্ষারস্য পাচনত্বং গুণোঽভিহিতঃ, ইহ তু দৃষ্টিশুক্রঘ্নত্বং দোষ ইতি পৃথগুচ্যতে| প্রাযঃ পিত্তলমিতি বিশেষেণান্যেভ্যো লবণকটুকেভ্যোঽম্লং পিত্তলম্| এবমন্যত্রাপি প্রাযঃশব্দো বিশেষার্থো বাচ্যঃ; কিংবা প্রাযঃশব্দোঽম্লেন সম্বধ্যতে| অত্র পিত্তমাদাবম্লজন্যতযোক্তং, দোষপ্রাধান্যস্যানিযতত্বাত্; উক্তং হি- “ন তে পৃথক্ পিত্তকফানিলেভ্য” (সূ. ১৯) ইতি, তথা “সমপিত্তানিলকফা” (সূ. ৭) ইতি; কিংবা পিত্তোষ্মা বহ্নিঃ, স চেহান্নপানপচনে প্রধানং; যদুক্তং- “যদন্নং দেহধাত্বোজোবলবর্ণাদিপোষকম্| তত্রাগ্নির্হেতুরাহারান্নহ্যপক্বাদ্রসাদযঃ” (চি. ১৫) ইতি; তেনেহ বহ্নিকারণপিত্তজনকমেবাদাবুচ্যতে; যতশ্চ পিত্তজনকমগ্রে বক্তব্যম্, অতো রসপ্রধানমপি মধুরো নাদাবুক্তঃ| মধুন ইতি বিচ্ছেদপাঠেন নবানবস্য মধুনঃ কফাকর্তৃত্বং দর্শযতি| ইহ চ ষড্রসস্যৈব কথনমেতত্ত্রযেণৈব, অনুক্তানাং লবণতিক্তষাযাণামপি পাকদ্বারা গ্রহণাত্; যতো লবণঃ পাকাত্ প্রাযো মধুরঃ, তিক্তকষাযৌ কটুকৌ পাকতো ভবতঃ| ‘প্রাযঃ সর্বং তিক্তং’ ইত্যাদিস্তু গ্রন্থো হারীতীযঃ, ইহ কেনাপি প্রমাদাল্লিখিতঃ||৪||

বর্গেণ শূকধান্যাদীনাং আহারদ্রব্যাণাং সঙ্গ্রহো বর্গসঙ্গ্রহঃ| রসবীর্যেত্যাদৌ প্রভাবোঽল্পবিষযতযা পৃথক্পঠিতঃ| রসাদিনির্দেশশ্চ যথাযোগ্যতযা জ্ঞেযঃ, তেন ন সর্বদ্রব্যে সর্বরসাদ্যভিধানং ভবিষ্যতি| অত্র শূকধান্যমাদাবাহারপ্রধানত্বাত্; শূকবন্তি ধান্যানি শূকধান্যানি||৫-৭||

ইহ চ দ্রব্যনামানি নানাদেশপ্রসিদ্ধানি, তেন নামজ্ঞানে সামর্থ্যং তথাভূতং নাস্ত্যেবান্যেষামপি টীকাকৃতাং, তেন দেশান্তরিভ্যো নাম প্রাযশো জ্ঞেযং, যত্তু প্রচরতি গৌডে তল্লেখিষ্যামোঽন্যদেশপ্রসিদ্ধং চ কিঞ্চিত্| কলমো বেদাগ্রহারেষু স্বনামপ্রসিদ্ধঃ| শকুনাহৃতঃ শ্রাবস্ত্যাং বক্রনাম্না প্রসিদ্ধঃ| রক্তশালিঃ প্রসিদ্ধ এব| মহাশালির্মগধে প্রসিদ্ধঃ| অত্র চ শালির্হৈমন্তিকং ধান্যং, ষষ্টিকাদযশ্চ গ্রৈষ্মিকাঃ, ব্রীহযঃ শারদা ইতি ব্যবস্থা| রক্তশাল্যাদীনাং মধুরপাকিত্বেঽপি বদ্ধবর্চস্ত্বং প্রভাবাদেব| মহাংস্তস্যান্বিতি রক্তশালেরনু, তেন রক্তশালিগুণা মহাশালের্মনাগল্পাঃ; এবং তস্যানু কলম ইত্যত্রাপি বাচ্যম্| তস্যেতি মহাশালেঃ| ততঃ পরে ইতি শকুনাহৃতাদযঃ, উত্তরোত্তরমল্পগুণা ইত্যর্থঃ| গুণাগুণৈরিতি শালীনাং রক্তশাল্যাদীনাং যে গুণাস্তৃষ্ণাঘ্নত্বত্রিমলাপহত্বাদযঃ, তেষামগুণৈস্তদ্গুণবিপরীতৈর্দোষৈর্যবকাদযোঽনুকারং কুর্বন্তি, ততশ্চ যবকাস্তৃষ্ণাত্রিমলাদিকরা ইতি| গুণশব্দশ্চেহ প্রশংসাযাম্ ||৮-১২||

ষষ্টিকগুণেঽকারপ্রশ্লেষাদগুরুরিতি বোদ্ধব্যং, মাত্রাশিতীযে (সূ. ৫) ষষ্টিকো লঘুঃ পঠিতঃ| ততোঽনু চেতি গৌরষষ্টিকাদল্পান্তরগুণঃ| বরকোদ্দালকাদযঃ ষষ্টিকবিশেষাঃ; কেচিত্ কুধান্যানি বরকাদীনি বদন্তি| ব্রীহিরিতি শারদাশুধান্যস্য সঞ্জ্ঞা| পাটলো ব্রীহিবিশেষঃ| তন্ত্রান্তরেঽপি পঠ্যতে- “ত্রিদোষস্ত্বেব পাটলঃ” ইতি, সুশ্রুতে পাটলশব্দেনৈতদ্ব্যতিরিক্তো ধান্যবিশেষো জ্ঞেযঃ, তেন তদ্গুণকথনেন নেহ বিরোধঃ||১৩-১৫||

কোরদূষাদযঃ কুধান্যবিশেষাঃ| কোরদূষঃ কোদ্রবঃ, কোরদূষস্য কেবলস্য শ্লেষ্মপিত্তঘ্নত্বং, তেন যদুক্তং রক্তপিত্তনিদানে- “যদা জন্তুর্যবকোদ্দালককোরদূষপ্রাযাণ্যন্নানি ভুঙ্ক্তে” (নি. ২) ইত্যাদিনা পিত্তকর্তৃত্বং কোরদূষস্য, তত্তত্রৈবোক্তনিষ্পাবকাঞ্জিকাদিযুক্তস্য সংযোগমহিম্না বোদ্ধব্যম্| শ্যামাকাদযোঽপি তৃণধান্যবিশেষাঃ| হস্তিশ্যামাকঃ শ্যামাকভেদ এব; নীবার উডিকা; গবেধুকো ঘুলুঞ্চঃ, স গ্রাম্যারণ্যভেদেন দ্বিবিধঃ| প্রশাতিকা উডিকৈব স্থলজা রক্তশূকা; অম্ভঃশ্যামাকা জলজা ওডিকা লোকে ‘ডে’ ইত্যুচ্যতে; প্রিযঙ্গুঃ ‘কাঙ্গনী’ ইতি প্রসিদ্ধা| মুকুন্দো ‘বাকসতৃণ’ ইতি; বরুকঃ শণবীজং; বরকঃ শ্যামবীজং; শিবিরস্তীরভুক্তৌ ‘সিদ্ধ(ক্তা)ক’ ইত্যুচ্যতে; জূর্ণাহ্বো ‘জোনার’ ইতি খ্যাতঃ||১৬-১৮||

যবস্য গুরোরপি বহুবাতত্বং রূক্ষত্বাত্; কিংবা সুশ্রুতে যবো লঘুঃ পঠিতঃ, তেনাত্রাপ্যগুরুরিতি মন্তব্যং; বল্যশ্চ স্রোতঃ- শুদ্ধিকরত্বাত্ প্রভাবাদ্বা| অস্য চ শীতমধুরকষাযত্বেনানুক্তমপি পিত্তহন্তৃত্বং লভ্যত এব, তেন সুশ্রুতে “কফপিত্তহন্তা” (সু. সূ. ৪৬) ইত্যুক্তমুপপন্নম্||১৯-২০||

গোধূমস্য স্বাদুশীতস্নিগ্ধাদিগুণোপযোগাচ্ছ্লেষ্মকর্তৃত্বং ভবত্যেব, অত এব সুশ্রুতে “শ্লেষ্মকর” (সু. সূ. ৪৬) ইত্যুক্তম্| যত্তু বসন্তে কফপ্রধানে “যবগোধূমভোজনঃ” (সূ. ৬) ইত্যুক্তং তত্ পুরাণগোধূমাভিপ্রাযেণ; পুরাণশ্চ গোধূমঃ কফং ন করোতীত্যুক্তমেব ‘প্রাযঃ শ্লেষ্মলং মধুরম্’ ইত্যাদিনা গ্রন্থেনাত্রৈবাধ্যাযে| নন্দীমুখী যবিকা, মধূলী গোধূমভেদঃ| ইত্যযমত্র ‘ইতি’ প্রকারার্থঃ| সমাপ্ত ইতি বক্তব্যে সমাপ্যত ইতি যত্ করোতি, তেন জ্ঞাপযতি- যত্- বহুদ্রব্যত্বান্নাযং সমাপ্তো গণঃ, কিন্তু যথাকথঞ্চিত্ প্রসিদ্ধগুণকথনেন সমাপ্যতে| এবমন্যত্রাপি ষষ্ঠো বর্গঃ সমাপ্যত ইত্যাদৌ ব্যাখ্যেযম্||২১-২২||

ধান্যত্বেন শমীধান্যবর্গেঽভিধাতব্যে প্রধানত্বান্মুদ্গো নিরুচ্যতে| সূপ্যং সূপযোগ্যং শমীধান্যং, তত্রোত্তমঃ সূপ্যোত্তমঃ | বৃষ্য ইত্যাদিমাষগুণে স্রিগ্ধোষ্ণমধুরত্বাদিগুণযোগাদেব বাতহরত্বে লব্ধে পুনস্তদভিধানং বিশেষবাতহন্তৃত্বপ্রতিপাদনার্থম্, এবমন্যত্রাপ্যেবঞ্জাতীযে ব্যাখ্যেযম্| পুংস্ত্বং শুক্রম্| শীঘ্রমিতিবচনেন শুক্রস্রুতিকরত্বলক্ষণমপি বৃষ্যত্বং মাষস্য দর্শযতি, শুক্রস্রুতিকরং চ বৃষ্যশব্দেনোচ্যত এব, বচনং হি- “শুক্রস্রুতিকরং কিঞ্চিত্ কিঞ্চিত্ শুক্রবিবর্ধনম্| স্রুতিবৃদ্ধিকরং কিঞ্চিত্ত্রিবিধং বৃষ্যমুচ্যতে” ইতি; তদেবং সম্পূর্ণবৃষ্যত্বং মাষে বোদ্ধব্যম্| রাজমাষগুণকথনে তত্স্বাদুরিতি মাষবত্স্বাদুঃ; কিংবা রূক্ষশ্চেত্যাদি পাঠান্তরম্| উষ্ণ ইত্যাদিনা কুলত্থগুণঃ, কুলত্থশ্চ শুক্লকৃষ্ণচিত্রলোহিতভেদেন চতুর্বিধো ভবতি, তথা গ্রাম্যবন্যভেদেন চ দ্বিবিধোঽপি; অত এব তন্ত্রান্তরে “বন্যঃ কুলত্থস্তদ্বচ্চ বিশেষান্নেত্ররোগনুত্” ইত্যুক্তম্| মকুষ্টকো ‘মোঠ’ ইতি খ্যাতঃ| চণকঃ প্রসিদ্ধঃ| খণ্ডিকা ত্রিপুটকলাযঃ, হরেণুঃ বর্তুলকলাযঃ| কলাযো বাতল ইতি ত্রিপুটকলাযঃ| তিলগুণো যদ্যপি বিশেষেণ নোক্তঃ, তথাঽপি প্রধানে কৃষ্ণতিলে জ্ঞেযঃ; উক্তং হি সুশ্রুতে- “তিলেষু সর্বেষ্বসিতঃ প্রধানো, মধ্যঃ সিতো, হীনতরাস্ততোঽন্যে” (সু. ৪৬) ইতি | বিবিধাঃ শিম্বীজাতয ইতি কৃষ্ণপীতরক্তশ্বেতকুশিম্বীভেদা ইত্যর্থঃ| ‘শিম্বী রূক্ষা’ ইত্যাদি কেচিত্ পঠন্তি| আঢকী তুবরী বাতলেতি চ্ছেদঃ| কফবাতনুদিত্যবল্গুজৈডগজযোর্বীজস্য গুণঃ| নিষ্পাবো বল্লঃ| কাকাণ্ডঃ শূকরশিম্বিঃ , উমা অতসী, ঊর্ণাপাঠপক্ষে তস্যৈবোর্ণা| শমীধান্যবর্গ ইত্যত্র শমী শিম্বিঃ, তদন্তর্গতং ধান্যম্||২৩-৩৪||

সূপ্যানন্তরং মাংসস্য ব্যঞ্জনত্বেন প্রাধান্যান্মাংসবর্গাভিধানম্| খরঃ গর্দভঃ; অশ্বতরঃ বেগসরঃ, স চাশ্বাযাং খরাজ্জাতঃ; দ্বীপিঃ চিত্রব্যাঘ্রঃ; ঋক্ষঃ ভল্লূকঃ| বৃকঃ কুক্কুরানুকারী পশুশত্রুঃ; তরক্ষুঃ ব্যাঘ্রভেদঃ ‘তরচ্ছ’ ইতি খ্যাতঃ; বভ্রুঃ অতিলোমশঃ কুক্কুরঃ পর্বতোপকণ্ঠে ভবতি, কেচিদ্বৃহন্নকুলমাহুঃ| লোপাকঃ স্বল্পশৃগালো মহালাঙ্গূলঃ| শ্যেনঃ পক্ষী প্রসিদ্ধঃ| বান্তাদঃ কুক্কুরঃ| চাসঃ(ষঃ) ‘কনকবাযস ’ ইতি খ্যাতঃ| শশঘ্নী ‘পাঞ্জিঃ’ ইতি খ্যাতা| ভাসঃ ভস্মবর্ণঃ পক্ষী শিখাবান্ প্রসহবর্গে| কুলিঙ্গঃ কালচটকঃ||৩৫-৩৬||-

কাকুলীমৃগঃ ‘মালুযাসর্প’ ইতি খ্যাতঃ, তস্য শ্বেত ইত্যাদযশ্চত্বারো ভেদাঃ| কূর্চিকা সঙ্কুচঃ| চিল্লটঃ চিযারঃ| শল্লকঃ মহাশকলী, ‘শলক’ ইতি খ্যাতঃ; গণ্ডকঃ গোধাভেদঃ| কদলী ‘কদলীহট্ট’ ইতি খ্যাতঃ| শ্বাবিত্ ‘সেজ্জক’ ইতি খ্যাতঃ| ভূমিশযা বিলেশযাঃ||৩৭-৩৮||

সৃমরঃ মহাশূকরঃ| চমরঃ কেশমৃত্যুঃ| খঙ্গঃ গণ্ডকঃ| গবযঃ গবাকারঃ| ন্যঙ্কুঃ ন্যঙ্কুশো হরিণঃ| রুরুঃ বহুশৃঙ্গো হরিণঃ||৩৯||

শিশুমারঃ গোতুণ্ডনক্রঃ| তিমিঙ্গিলঃ সামুদ্রো মহামত্স্যঃ| শুক্তিঃ মুক্তাপ্রভবো জন্তুঃ, ঊদ্রঃ জলবিডালঃ, কুম্ভীরঃ ঘটিকাবান্, চুলুকী ‘শুশু’ ইতি খ্যাতঃ| শিশুমারাদীনাং মত্স্যগ্রহণেন গ্রহণে প্রাপ্তে বিশেষব্যবহারার্থং পুনরভিধানম্||৪০||-

হংসশ্চতুর্বিধোঽপি রাজহংসাদির্গ্রাহ্যঃ| ক্রৌঞ্চঃ ‘কোঞ্চ’ ইতি খ্যাতঃ| বকঃ পাণ্ডুরপক্ষঃ| বলাকা শুক্লা| কারণ্ডবঃ কাকবক্ত্রঃ| প্লবঃ স্বনামপ্রসিদ্ধঃ প্রসেবগলঃ| শরারিঃ ‘শরালী’ ইতি লোকে| মদ্গুঃ পানীযকাকঃ| কাদম্বঃ কলহংসঃ| কাকতুণ্ডকঃ শ্বেতকারণ্ডবঃ| উত্ক্রোশঃ ‘কুরল’ ইতি খ্যাতঃ| পুণ্ডরীকাক্ষঃ পুণ্ডরঃ| মেঘরাবঃ মেঘনাদঃ; মেঘরাবশ্চাতক ইত্যন্যে, তন্ন তস্য বারিচরত্বাভাবাত্| অম্বুকুক্কুটী জলকুক্কুটী| আরা স্বনামখ্যাতা| নন্দীমুখী পত্রাটী| সারসঃ প্রসিদ্ধঃ| রক্তশীর্ষকঃ সারসভেদো লোহিতশিরাঃ| অম্বুচারিণ ইতি জলে প্লবন্ত ইত্যর্থঃ||৪১-৪৪||

পৃষতঃ চিত্রহরিণঃ| শরভঃ অষ্টাপদ উষ্ট্রপ্রমাণো মহাশৃঙ্গঃ পৃষ্ঠগতচতুষ্পাদঃ কাশ্মীরে প্রসিদ্ধঃ| রামঃ হিমালযে মহামৃগঃ| শ্বদংষ্ট্রঃ চতুর্দংষ্ট্রঃ কার্তিকপুরে প্রসিদ্ধঃ| মৃগমাতৃকা স্বল্পা পৃথূদরা হরিণজাতিঃ| কুরঙ্গঃ হরিণভেদঃ| গোকর্ণঃ গোমুখহরিণবিশেষঃ | হরিণঃ তাম্রবর্ণঃ, এণঃ কৃষ্ণসারঃ| ঋষ্যঃ নীলাণ্ডো হরিণঃ| চারুষ্কাদযোঽপি হরিণভেদা এব| শশস্তু সুশ্রুতে বিলেশযেষু পঠিতঃ, তদদূরান্তরার্থম্||৪৫-৪৬||

লাবঃ প্রসিদ্ধঃ| বর্তীরঃ কপিঞ্জলভেদঃ| কপিঞ্জলঃ গৌরতিত্তিরিঃ| বার্তীকঃ চটকভেদঃ সঙ্ঘাতচারী| উপচক্রঃ চকোরভেদঃ| কুক্কুভঃ প্রসিদ্ধঃ; রক্তবর্ত্মক ইতি কুক্কুভবিশেষণং, তেন স্থূলকুক্কুভো গৃহ্যতে| বর্তকঃ ‘বট্টহী’ ইতি খ্যাতঃ| বার্তিকা স্বল্পপ্রমাণা জাত্যন্তরমেব, কেচিত্তু বর্তকস্ত্রিযং বর্তিকাং বদন্তি; অস্যাশ্চ গ্রহণং স্ত্রীলিঙ্গভেদেঽপি বিশেষলাঘবপ্রতিষেধার্থম্, অন্যথা স্ত্রীত্বেন বর্তিকাদ্বর্তিকাযা লাঘবং স্যাত্| বর্হী মযূরঃ| শারপদেন্দ্রাভঃ মল্লকঙ্কঃ| গোনর্দো ‘ঘোডাকঙ্ক’ ইতি খ্যাতঃ| ক্রকরঃ প্রসিদ্ধঃ| লাবাদিবর্তিকাদিবিষ্কিরগণদ্বযকরণং গুণভেদকথনার্থম্||৪৭-৪৯||

শতপত্রঃ কাষ্ঠকুক্কুটকঃ| ভৃঙ্গরাজঃ প্রসিদ্ধো ভ্রমরবর্ণঃ| কোযষ্টিঃ ‘কোডা’ ইতি খ্যাতঃ| জীবঞ্জীবকঃ বিষদর্শনমৃত্যুঃ| অত্যূহঃ ডাহুকঃ, ‘দাত্যূহ’ ইতি বা পাঠঃ, স চ প্রসিদ্ধঃ| লট্টা ফেঞ্চাকো রক্তপুচ্ছাধোভাগঃ, লটূষকোঽপি তদ্ভেদঃ| ডিণ্ডিমানকঃ ডিণ্ডিমবদুত্কটধ্বনিঃ| কুলিঙ্গ ইতি বনচটকাকারঃ পীতমস্তকঃ ‘বাঐ’ ইতি লোকে| কলবিঙ্কঃ গ্রাম্যচটকঃ| চটকস্তু দেবকুলচটকঃ স্বল্পপ্রমাণঃ| যান্যত্রানুক্তান্যপ্রসিদ্ধানি তানি তদ্বিদ্ভ্যো দেশান্তরিভ্যশ্চ জ্ঞেযানি||৫০-৫২||-

প্রসহাদিসঞ্জ্ঞানিরুক্ত্যা লক্ষণমাহ| প্রসহ্যেতি হঠাত্| আনূপানূপসংশ্রযাদিতি পূর্বত্রাসিদ্ধবিধেরনিত্যত্বেনানূপা ইত্যত্র যলোপস্য সিদ্ধত্বেনৈব সংহিতা জ্ঞেযা| জলেচর্যাদিতি জলবাসিনামেব হংসাদীনাং জলে চরণমাত্রত্বং বোদ্ধব্যম্| ‘স্থলজা’ ইত্যুক্তে গজাদিষ্বপি স্থলজাতেষু প্রসক্তিঃ স্যাদিত্যাহ- জাঙ্গলচারিণ ইতি| বিকীর্যেত্যত্র ‘ভক্ষযন্তি’ ইতি শেষঃ; এবং প্রতুদ্যেত্যত্রাপি, প্রতুদ্যেতি বহুধাঽভিহত্য||৫৩-৫৫||-

প্রসহা দ্বিবিধা মাংসাদা ব্যাঘ্রশ্যেনাদযঃ, তথা অমাংসাদাশ্চ গবাদযঃ; তেন মাংসাদানাং বিশেষমাহ- প্রসহানামিত্যাদি| জীর্ণত্বেনার্শঃপ্রভৃতীনাং চিরানুবন্ধং দর্শযতি| প্রতুদা ইত্যত্র তথা জাঙ্গলা ইত্যত্র চকারো লুপ্তনির্দিষ্টঃ| কফানুগে ইতি চ্ছেদঃ||৫৬-৬০||-

শরীরধাতুসামান্যাদিতি মনুষ্যমাংসসমানত্বাত্| এতেন শীতগুরুস্নিগ্ধত্বেন যুক্তমপ্যাজমাংসং শরীরধাতুসাম্যাত্ কফং ন করোতীত্যুক্তং ভবতি| আবিকং মাংসং মধুরশীতত্বেন পিত্তহরমপি বোদ্ধব্যম্, অত এব শরদ্বিধাবপ্যুক্তম্- “উরভ্রশরভান্” (সূ. ৬) ইতি| রক্তপিত্তনিদানে (নি. ২) তু বরাহমহিষেত্যাদিনা দ্রব্যান্তরসংযুক্তস্যৈবাবিকমাংসস্য রক্তপিত্তকর্তৃত্বং জ্ঞেযম্| যোনাবিতি প্রসহাদ্যষ্টবিধজাতৌ| মিশ্রগোচরত্বাদিতি কদাচিদনূপসেবনাত্, কদাচিদ্ধন্বসেবনাত্, কদাচিদুভযসেবনাদজাব্যোরনিশ্চিতযোনিত্বমিত্যর্থঃ| অত্র, ‘অনিশ্চিতে’ ইতি যোনিবিশেষণং, কিংবা অজা চ অবী চ এতে অনিশ্চিতে| ননু যদ্যেবং তদা তিত্তিরিরপি ধন্বানূপসেবনান্ন বিষ্কিরগণে পঠনীযঃ| নৈবং, তিত্তিরিজাতিবিশেষস্য ধন্বানূপযোর্নিযমেন নিষেবণাদ্গুণনিযমঃ পার্যতে কর্তুম্; অব্যজযোস্তু নিযমোঽযং নাস্তি, যতঃ কেচিদজাবী ধন্বমাত্রচরে, কেচিচ্চানূপমাত্রচরে, কেচিচ্চোভযামাত্রচরে; তেন তযোর্নিযমচরকৃতো যোনিভেদঃ কর্তুং ন পার্যতে||৬১-৬২||-

কেষাঞ্চিদিতি বক্ষ্যমাণমযূরাদীনাম্| গুণবৈশেষ্যাদিতি বিশিষ্টগুণশালিত্বাত্| মযূরস্য গুরুত্বস্নিগ্ধত্বং বর্তকাদিগণপঠিতত্বেনৈব লব্ধং সত্ পুনরুচ্যতে বিশেষার্থম্| এবমন্যত্রাপি গণোক্তগুণকথনেন লব্ধস্য পুনঃ কথনে ব্যাখ্যেযম্| চরণাযুধঃ কুক্কুটঃ| ধন্বানূপনিষেবণাদিতি হেতুকথনেন য এব ধন্বানূপনিষেবী তিত্তিরিঃ স এব যথোক্তগুণ ইতি জ্ঞেযম্| এবমন্যেঽপি যে গবাদযো ধন্বানূপনিষেবিণস্তেঽপি তিত্তিরিসমানগুণা ভবন্তি, তিত্তিরিস্তু বিশেষেণেতি তিত্তিরিঃ সাক্ষাদুক্তঃ| কিংবা, তিত্তিরেরেব এবঙ্গুণত্বে ধন্বানূপনিষেবণং হেতুঃ, নান্যত্র গবাদেরনূপদেশাদেরিতি জ্ঞেযম্| কপোতা গৃহবাসিন ইতি পারাবতাঃ| চটকা মধুরা ইত্যাদি কেচিত্ পঠন্ত্যেব, যে তু ন পঠন্তি তেষাং মতে চটকস্য প্রতুদসামান্যগুণলব্ধং বৃষ্যত্বং “তৃপ্তিং চটকমাংসানাং গত্বা যোঽনুপিবেত্ পযঃ” (চি. ২) ইত্যাদিবৃষ্যপ্রযোগাদেব লভ্যতে| মযূরাদীনাং তু বহবো গুণা গণোক্তগুণাধিকা ইতি পৃথক্ পাঠঃ কৃতঃ| “মাংসং বৃংহণানাম্” (সূ. ২৫) ইত্যনেনৈবাগ্র্যাধিকারবচনেন মাংসস্য বৃংহণত্বে লব্ধে ‘শরীরবৃংহণে নান্যত্’ ইত্যাদিবচনং প্রকরণপ্রাপ্তত্বেন তথা তস্যৈবার্থস্য দার্ঢ্যার্থং চ জ্ঞেযম্||৬৩-৮৭||-

শাকানামপি ব্যঞ্জনত্বেনানন্তরমুপদেশঃ| শুষা কাসমর্দঃ| শটী স্বনামপ্রসিদ্ধা| বাস্তুকং টঙ্কবাস্তুকম্| নাত্যুষ্ণশীতবীর্যেতি নোষ্ণত্বং প্রকর্ষপ্রাপ্তমস্যা নাপি শীতত্বমিত্যর্থঃ| যত্তু সুশ্রুতে “তিক্তা কাকমাচী বাতং শমযতি, উষ্ণবীর্যত্বাত্” (সু. সূ. ৪০) ইত্যুক্তং তদ্বীর্যবাদিমতেন, অত এব দ্রব্যগুণে সুশ্রুতেঽপি “নাত্যুষ্ণশীতা” (সু. সূ. ৪৬) ইত্যেবমেব পঠিতম্| রাজক্ষবকঃ দুগ্ধিকা| কালশাকং ‘কালিযা’ ইতি খ্যাতং, কালাখ্যমিতি কালশাকমেবোচ্যতে পুনঃ; অন্যে তু ‘কালাযং’ ইতি পঠন্তি| মণ্ডূকপর্ণী মণিমণীতি খ্যাতা| কুচেলা অকর্ণবিদ্ধকাভেদঃ| বনতিক্তকং পথ্যসুন্দরম্| অবল্গুজো বাল্গুজী| শকুলাদনী কটুরোহিণী| শার্ঙ্গেষ্টা কাকতিক্তা| কঠিল্লকঃ পুনর্নবা| নাডী নাডীচঃ| কলাযো বর্তুলকলাযঃ| তিলপর্ণিকা হুলহুলিকা| গোজিহ্বা দার্বিপত্রিকা| কুলকঃ কারবেল্লকঃ, কেচিত্তু কুলকং পটোলভেদমাহুঃ| কর্কশঃ স্বল্পকর্কোটকঃ||৮৮-৯৭||-

সূপ্যশাকানি মাষপর্ণ্যাদীনি| ফঞ্জী ব্রাহ্মণযষ্টিকা| চিল্লী গৌডবাস্তুকঃ| কুতুম্বকঃ দ্রোণপুষ্পিকা| আলুকানি পিণ্ডালুকাদীনি| কর্বুদারঃ কাঞ্চনঃ| সুবর্চলা সূর্যভক্তিকা, কেচিত্ ফপ্পুকমাহুঃ| পত্তূরঃ শালিঞ্চঃ| চুচ্চুপর্ণিকা নাডীচভেদঃ| কুমারজীবঃ জীবশাকম্| লোট্টাকঃ লোট্টামারিষঃ| নালিকা গোনাডীচঃ| আসুরী রাজিকা মণ্ডকো বা| বৃকধূমকঃ ভূমিশিরীষঃ| লক্ষ্মণা স্বনামখ্যাতা| নলিনী পদ্মমৃণালং, নীলিনীতিপাঠপক্ষে বুহ্না| যবশাকং ক্ষেত্রবাস্তুকম্| কূষ্মাণ্ডঃ সর্পচ্ছত্রম্| অবল্গুজমিতি অবল্গুজভেদঃ| যাতুকঃ শুক্লা শালপর্ণী| শালকল্যাণী শালিঞ্চভেদঃ| ত্রিপর্ণী হংসপাদিকা| পীলুপর্ণী মোরটকঃ| গণ্ডীরঃ শমঠঃ| বিল্বপর্ণী বিল্বার্জকম্| ভণ্ডী স্বনামখ্যাতা| পর্বণী পর্বশাকম্| পর্বপুষ্পী কুক্কুটী| পঞ্চাঙ্গুলঃ চিত্রৈরণ্ডঃ| এর্বারুকং রাজকর্কটী| কূষ্মাণ্ডকং সুশ্রুতে বাল্যাদ্যবস্থাভেদেন পঠিতং তদপ্যবিরুদ্ধভেব, যতো বালমধ্যযোস্তত্র পিত্তহরত্বং কফকরত্বং চোক্তং, তদপীহ পিত্তোত্তরে কফোত্তরে সন্নিপাতে বোদ্ধব্যম্||৯৮-১১৩||

কেলুটে হারীতবচনং- “কেলুটং স্বাদু বিটপং তত্কন্দঃ স্বাদুশীতলঃ” ইতি| কদম্বং কদম্বিকাং বদন্তি, কেচিত্তু স্বল্পকদম্বকমাহুঃ| নদীমাষকঃ ‘উদীমানক’ ইতি খ্যাতঃ| ঐন্দুকং নিক্ষারঃ| তালপ্রলম্বঃ তালাঙ্কুরঃ| শস্যশব্দেনেহ মস্তকমজ্জা গৃহ্যতে| তরুটঃ কহ্লারকন্দঃ| ক্রৌঞ্চাদনং ধিঞ্চুলিকা| কশেরুকশব্দেন চিঞ্চোডকা রাজকশেরুকশ্চ গৃহ্যতে| অঙ্কালোড্যং হ্রস্বোত্পলকন্দঃ| মুঞ্জাতক ঔত্তরাপথিককন্দঃ| অম্লিকা স্বল্পবিটপা প্রাযঃ কামরূপাদৌ ভবতি| সর্পচ্ছত্রং সর্পফণাকারং ছত্রকম্| অন্যাশ্ছত্রজাতযঃ করীষপলালাদিজা বহুলা জ্ঞেযাঃ| পত্রকন্দফলাশ্রয ইতি প্রাধান্যেন, তেন পুষ্পাদ্যাশ্রযত্বমপি শাকবর্গস্য জ্ঞেযম্||১১৪-১২৪||

ফলানামপি কেষাঞ্চিচ্ছাকবদুপযোগাত্ ফলবর্গমাহ| মৃদ্বীকাঽগ্রেঽভিধীযতে শ্রেষ্ঠগুণত্বাত্| ফল্গু ঔদুম্বরম্| মধূকশব্দেন সমানগুণত্বাত্ ফলং কুসুমং চ জ্ঞেযম্| পরূষকং চেহ মধুরপরূষকং জ্ঞেযম্| আম্রাতম্ ‘আমডা’ ইতি খ্যাতমাম্রফলসদৃশমিতি চন্দ্রিকা; এতচ্চ দ্বিবিধং মধুরমম্লং চ; অত্র মধুরস্যৈব গুণঃ, অম্লস্য বক্ষ্যমাণত্বাত্| তালশস্যানীতি তালফলানি, যথা “হরীতকীনাং শস্যানি” (চি. ১) ইত্যত্র ফলমেব শস্যমুচ্যতে| সিদ্ধানি পক্বানি; তেন পক্বতালস্য গ্রহণম্| ভব্যং কর্মরঙ্গফলং; কেচিত্ত্বক্সংহতিমাত্রফলং বদন্তি| আরুকং কার্তিকেযপুরে প্রসিদ্ধম্| কর্কন্ধূঃ শৃগালবদরী, কর্কন্ধূনিকুচযোর্বিচ্ছিদ্য পাঠেন নিত্যং পিত্তশ্লেষ্মকর্তৃত্বং তযোর্দর্শযতি| পরূষকাদীনাং তু মধুরাম্লভেদেন দ্বিরূপাণাং য এব পরূষকাদযোঽম্লাস্ত এব পিত্তশ্লেষ্মকরা ইতি| পারাবতঃ কামরূপপ্রসিদ্ধঃ| অত্র যো মধুরঃ স শীতঃ, যশ্চাম্লঃ স উষ্ণ ইতি জ্ঞেযম্| এবং রসনির্দেশেনৈব বীর্যে লব্ধেঽপি পুনর্বীর্যাখ্যানমম্লস্যামলকস্য শীততাদর্শনাদ্বোদ্ধব্যম্| টঙ্কং কাশ্মীরপ্রসিদ্ধম্| সিদ্ধমিতি কালবশাত্ পক্বম্| কপিত্থবিল্বাম্রাণামবস্থাভেদেন গুণকথনং সর্বাবস্থাসু তেষামুপযোজ্যত্বাত্| বদরং মধ্যপ্রমাণং; তদ্ধি মধুরমেব ভবতি| গাঙ্গেরুকং নাগবলাফলম্| করীরো মরুজো দ্রুমঃ| তোদনং ধন্বনভেদঃ| রাজাদনং ক্ষীরী| অবদংশক্ষমমিতি লবলীফলং প্রাশ্য দ্রব্যান্তরে রুচির্ভবতি| নীপং কদম্বকম্| শতাহ্বকফলং ‘সেহ’ ইতি খ্যাতম্| পীলু ঔত্তরাপথিকম্| তৃণশূন্যং কেতকীফলম্| প্রাচীনামলকং পানীযামলকম্| তিন্দুকং কেন্দুঃ| দাডিমগুণে কফপিত্তাবিরোধীতি অম্লদাডিমং পিত্তাবিরোধি, মধুরং তু কফাবিরোধি, এবং চ ত্রিদোষহরত্বমস্যোপপন্নং; যদুক্তং সুশ্রুতে- “দ্বিবিধং তত্তু বিজ্ঞেযং মধুরং চাম্লমেব চ| ত্রিদোষঘ্নং তু মধুরমম্লং বাতকফাপহম্” (সু. সূ. ৪৬) ইতি| বৃক্ষাম্লং মহার্দ্রকম্| অম্লিকা তিন্তিডী| শেষমিতি ত্বঙ্মাংসম্, অতোঽন্যথেতি গুরু; কিংবা, শূলেঽরুচাবিত্যাদ্যুক্তকেশরগুণবিপরীতম্| বাতামাদয ঔত্তরাপথিকাঃ| প্রিযালোঽযং মগধপ্রসিদ্ধঃ| দন্তশঠঃ জম্বীরঃ; কেচিদম্লোটং বদন্তি| ইহাম্রাতকমম্লং গ্রাহ্যং, পূর্বং তু মধুরমাম্রাতকমুক্তম্| করমর্দং দ্বিবিধং গ্রামজং বনজং চ| ঐরাবতম্ অম্লাতকং; কিংবা নাগরঙ্গম্| বার্তাকং দক্ষিণাপথে ফলবত্ খাদ্যতে যদ্গোষ্ঠবার্তাকসঞ্জ্ঞকং, তস্যেহ গুণঃ; কিংবা ফলবদসিদ্ধস্যৈব বার্তাকস্যোপযোজ্যস্যাযং গুণঃ| আক্ষিকী লতা তস্যাঃ ফলমাক্ষিকম্| অনুপাকি ‘অনুযা’ ইতি খ্যাতা| অগ্নিসমমিতি স্ফোটাদিজনকত্বাত্||১২৫-১৬৫||

হরিতানামপ্যার্দ্রকাদীনাং ফলবদগ্নিপাকমন্তরেণ ভোজনস্য প্রাক্ পশ্চাচ্চোপযোগাত্ ফলমনু হরিতকথনং, ফলেভ্যস্তু পশ্চাদভিধানং হরিতস্য তৃপ্ত্যনাধাযকত্বাত্| আর্দ্রকমিতি বিশেষণং শুণ্ঠীব্যবৃত্ত্যর্থং, শুণ্ঠীগুণশ্চাহারসংযোগিবর্গে ভবিষ্যতি| জম্বীরঃ পর্ণাসভেদঃ, জম্বীরফলং সুগন্ধি| বালং দোষহরমিতি তরুণাবস্থাযামব্যক্তরসাযাং ত্রিদোষহরম্| তন্ত্রান্তরবচনং হি- “যাবদ্ধি চাব্যক্তরসান্বিতানি নবপ্ররূঢানি চ মূলকানি| ভবন্তি তাবল্লঘুদীপনানি পিত্তানিলশ্লেষ্মহরাণি চৈব”| বৃদ্ধং ত্রিদোষমিতি তদেব প্রবৃদ্ধম্, এনামেব মূলকাবস্থামভিপ্রেত্য চোক্তং- “মূলকং কন্দানামপথ্যত্বে প্রকৃষ্টতমম্” (সূ. ২৫) ইতি| মারুতাপহং স্নিগ্ধসিদ্ধমিতি সামান্যেন বালং বৃদ্ধং চ| ‘শুষ্কাণি কফবাতঘ্নান্যেতানি’ ইতি বক্ষ্যমাণগ্রন্থেনৈব শুষ্কমূলকস্য কফবাতহন্তৃত্বে লব্ধে পুনর্বচনং প্রকর্ষপ্রাপ্ত্যর্থম্| পূতিগন্ধহেতি শরীরস্য তথা ব্যঞ্জনার্থং মাংসস্য চ পূতিগন্ধতাং হন্তি| অর্জকঃ শ্বেতপর্ণাসঃ| শিগ্রুঃ বিটপশোভাঞ্জনঃ; শালেযশ্চাণক্যমূলং মরৌ প্রসিদ্ধং, কিংবা শালেযমিতি মিস্তেযং পাটকপ্রসিদ্ধং, বচনং হি- “চাণক্যমূলমিস্তেযে শালেযাভিখ্যযা জগুঃ” ইতি; মৃষ্টকং রাজিকা| গণ্ডীরো দ্বিবিধো রক্তঃ শুক্লশ্চ; তত্র যো রক্তঃ স হি কটুত্বেন হরিতবর্গে পঠ্যতে, যস্তু শুক্লো জলজঃ স শাকবর্গে পঠিত ইতি নৈকস্য বর্গদ্বযে পাঠঃ| জলপিপ্পলী জলে পিপ্পল্যাকারা ভবতি| শৃঙ্গবেরী গোজিহ্বিকা, কিংবা আর্দ্রকাকৃতিঃ শৃঙ্গবেরী; যদুক্তং- “শৃঙ্গবেরবদাকৃত্যা শৃঙ্গবেরীতি ভাষিতা| কুস্তুম্বুরুসমাকৃত্যা তুম্বুরূণি বদন্তি চ” ইতি| ভূস্তৃণো গন্ধতৃণঃ| খরাহ্বা কৃষ্ণজীরকম্| অজগন্ধা বনযবানী| সুমুখঃ পর্ণাসভেদঃ| অযং চ ধান্যকাদীনামার্দ্রাণাং গুণঃ, শুষ্কাণাং ত্বাহারযোগিগণে “কারবী কুঞ্চিকা” ইত্যাদিনা গুণং নির্দেক্ষ্যতি| গৃঞ্জনকঃ স্বল্পনালপত্রঃ পলাণ্ডুরেব| এতানীতি হরিতবর্গোক্তানি| শুষ্কাণীত্যাদিনা যদ্যপি শুষ্কাণামপি শুণ্ঠীপ্রভৃতীনাং গুণ উক্তো ভবতি, তথাঽপি বিশেষগুণান্তরকথনার্থং পুনস্তদভিধানমাহারসংযোগিবর্গে ভবিষ্যতীতি ন পৌনরুক্ত্যম্||১৬৬-১৭৭||

অন্নমভিধায পানং বক্তব্যং, তত্রাপি পানপ্রধানমপি পানীযমুল্লঙ্ঘ্য হর্ষাদিকর্তৃত্বাজ্জনানাং মুখ্যপেযত্বাচ্চ মদ্যমাহ| প্রকৃত্যেতি স্বভাবাত্| যদ্যপি চ মদ্যে পীযমানে নাম্লরসতা প্রতীযতে ব্যক্তা, তথাঽপি দন্তহর্ষমুখস্রাবাদ্যম্লকার্যকর্তৃত্বাদম্লমেব| বচনং হি- “মধুরাণি মধুরপ্রভাবাণি মধুরাণ্যেব কৃত্বোপদেক্ষ্যামঃ, তথেতরাণ্যপি” (বি. ৮) ইতি| তেন, অম্লপ্রভাবস্য মদ্যস্যাম্লরসত্বমেব; অত এবোক্তং- “সর্বেষাং মদ্যমম্লানামুপর্যুপরি বর্ততে” (চি. ২৪) ইতি| বিপাকত ইতি তৃতীযাযাং তসিঃ||১৭৮||

সুরা অনুদ্ধৃতমণ্ডা| মদিরা তু সুরামণ্ডঃ| জগলঃ ভক্তকিণ্বকৃতা সুরা| অরিষ্ট ঔষধক্বাথমধ্বাদিসম্পাদিতো বক্ষ্যমাণো দন্ত্যভযারিষ্টাদিঃ| শার্করঃ শর্করাপ্রকৃতিক আসবঃ| পক্বরসঃ যঃ ক্বথিতেনেক্ষুরসেন ক্রিযতে| শীতরসিকস্তু শীতেক্ষুরসকৃতঃ| গৌডঃ গুডপ্রকৃতিকঃ| সুরাসবঃ যত্র সুরযৈব তোযকার্যং ক্রিযতে| মধূকপুষ্পকৃতো মধ্বাসবঃ| মৈরেযলক্ষণং যথা- “আসবস্য সুরাযাশ্চ দ্বযোরেকত্র ভাজনে| সন্ধানং তদ্বিজানীযান্মৈরেযমুভযাশ্রযম্” ইতি| ধাতক্যাঽভিষুতো ধাতকীফলাসবঃ| মাধ্বীকং মধুপ্রধানং ‘রোচনং দীপনং’ ইত্যাদিনা বক্ষ্যমাণং; তদ্বন্মৃদ্বীকেক্ষুরসাভ্যাং মিলিতাভ্যাং কৃত আসবো জ্ঞেযঃ| মধ্বিতি মধুপ্রধান আসবঃ| সুরা সমণ্ডেতি যবতণ্ডুলকৃতা বোদ্ধব্যা| বিষ্টভ্যেতি বিচ্ছেদঃ| মধূলকঃ গোধূমভেদঃ, তত্কৃতং মদ্যং মধূলকম্; অন্যে তু মেদকমাহুঃ| দীপনমিত্যাদি সৌবীরতুষোদকগুণঃ| অম্লকাঞ্জিকমিতি কাঞ্জিকমেবাম্লগুণম্||১৭৯-১৯৫||

সম্প্রতি পানপ্রধানস্য জলস্য গুণমাহ- জলমিত্যাদি| সর্বমিতি সুশ্রুতপ্রতিপাদিতধারকারহৈমতৌষারমপি| একবিধমিতি “শিবাঃ খল্বাপঃ” (সূ. ২৬) ইত্যাদিনোক্তগুণং, তথা ‘শীতং শুচি’ ইত্যাদিবক্ষ্যমাণগুণম্| ঐন্দ্রমিতি প্রাণ্যদৃষ্টবশেনেন্দ্রপ্রেরিতম্|১৯৬|-

একবিধত্বেঽপি তস্য ভেদহেতুমাহ- তত্ পতদিত্যাদি| পতদ্ দেশমাকাশগতভূতরূপং, কালং চ শীতোষ্ণাদিরূপং; তথপতিতং চ ভূমিবিশেষরূপং দেশং, কালং চ তথৈবাপেক্ষতে; ‘গুণদোষা সম্বন্ধে ’ ইতি শেষঃ||১৯৬||

এনমেব দেশকালসম্বন্ধমাহ- খাদিত্যাদি| সোমগ্রহণেন সৌম্যত্বাত্ পৃথিব্যা অপি গগনগতধূলীরূপাযাস্তথা মেঘসহচরিতলূতাদিবিষাদিরূপাযাশ্চ গ্রহণং বক্তব্যং; কিংবা বাযুগ্রহণাদেব বাযুনা নীযমানাযাঃ পৃথিব্যা গ্রহণম্| স্পৃষ্টং ‘ভবতি’ ইতিশেষঃ| কালানুবর্তিভিরিতি কালপরাধীনৈঃ; এতেন কালকৃত এব সোমাদিসম্বন্ধবিশেষো জলে বিশেষং করোতি, তেন ন কালস্যাকিঞ্চিত্করতা| পতিতজলস্য দেশকালসম্বন্ধমাহ- শীতোষ্ণেত্যাদি| যথাসন্নমিতি যস্মিন্ কালে যস্যাং মহ্যাং যে গুণাঃ শীতাদয উদ্রিক্তা ভবন্তি, তৈঃ স্পৃষ্টং জলং ভবতি| এতেন সুশ্রুতে প্রতিপাদিতগাঙ্গসামুদ্রভেদো গুণদোষসম্বন্ধমাত্রকৃত এব দিব্যজলস্যেতি দর্শযতি| তেন, যদ্বিষাদিজুষ্টং তত্ সামুদ্রসমানগুণত্বাত্ সামুদ্রং, যদ্ধূল্যাদিনা বিষাদিনা চ রহিতং তত্তদ্গুণত্বাদ্গাঙ্গমিত্যুক্তং সুশ্রুতে| আশ্বিনে তু মাসি দিব্যজলস্য ধূলীবিষাদিসম্বন্ধো ন ভবত্যেব, কালমহিম্না ভবন্নপি বা ন জলং তথা দূষযতি; অত উক্তং সূশ্রুতে- “সামুদ্রং তন্ন পাতব্যং মাসাদাশ্বযুজাদ্বিনা” (সু. সূ. ৪৫) ইতি| অত্র হারীতবচনাত্ কার্তিকাগ্রহাযণযোরপ্যান্তরীক্ষং জলং গ্রাহ্যমেব ভবতি; যদাহ- “প্রবৃত্তাযাং শরদ্যস্মাত্ পশ্চাদ্বাতে প্রবাতি চ| হেমন্তে চাপি গৃহ্নীযাত্তজ্জলং মৃন্মযৈর্ঘটৈঃ” ইতি| তেন ‘আশ্বযুজাদ্বিনা’ ইতি বচনং আশ্বযুজাত্ প্রভৃতি জলোপাদেযতোপদর্শনার্থং, ন ত্বাশ্বিন এবোপাদেযতোপদর্শনপরম্| অন্যে ত্বাহুঃ- আশ্বিন এব পরমান্তরীক্ষং গ্রাহ্যমিতি| জতূকর্ণবচনং হি- “বর্ষাসু চরন্তি ঘনৈঃ সহোরগা বিযতি কীটলূতাশ্চ| তদ্বিষজুষ্টমপেযং খজলমগস্ত্যোদযাত্ পূর্বম্” ইতি||১৯৭||

দিব্যজলস্য প্রাকৃতগুণমাহ- শীতমিত্যাদি| শিবমিতি কল্যাণকরত্বেন| মৃষ্টমিতি বদনপ্রিযত্বেন|১৯৮|-

বক্ষ্যমাণগুণবিশেষহেতুমাহ- ভ্রষ্টমিত্যাদি| পাত্রমপেক্ষত ইতি নদ্যাদিপাত্রবিশেষসম্বন্ধমপেক্ষ্য গুণবিশেষবদ্ভবতি| এতচ্চ যদ্যাপি ‘দেশকালাবপেক্ষত’ ইত্যনেন পূর্বমেবোক্তং, তথাঽপি কালাপেক্ষযা দেশবিশেষস্য প্রকর্ষেণ গুণবিশেষে হেতুতাপ্রদর্শনার্থং পুনরুক্তম্| কেচিত্তু “শ্বেতে কষাযং ভবতি” ইত্যাদিগ্রন্থং পঠন্তি, স তু নাতিপ্রসিদ্ধঃ||১৯৮-২০৮||

আধারবিশেষে গুণবিশেষমাহ- নদ্য ইত্যাদি| পাষাণৈর্বিচ্ছিন্নং বিক্ষুব্ধমভিহতং চোদকং যাসাং তাস্তথা; এতেন, অধিত্যকাপ্রভবা এব হিমালযে নদ্যঃ পথ্যা উক্তা ভবন্তি নোপত্যকাপ্রভবাঃ, যতোঽধিত্যকাপ্রভবাস্বেব পাষাণবিচ্ছিন্নত্বাদি; অতশ্চ সুশ্রুতে যদুক্তং- “হিমবত্প্রভবা হৃদ্রোগাদীন্ জনযন্তি” (সু. সূ. ৪৫) ইতি, তদুপত্যকাপ্রভবাভিপ্রাযেণেতি ন বিরোধঃ| যত্তু তত্রোক্তং “মলযপ্রভবাঃ ক্রিমীঞ্জনযন্তি” (সু. সূ. ৪৫) তদপাষাণসিকতাবাহিনদ্যভিপ্রাযেণ, ইহ পাষাণসিকতাবাহিনদীষ্বমৃতোপমিতি ন বিরোধঃ| যত্তু, পারিযাত্রভবানাং শিরোরোগাদিকর্তৃত্বং, তত্ পারিযাত্রদরীভবনদীজলাভিপ্রাযেণ, সুশ্রুতে তু পারিযাত্রতডাগভবনদীজলাভিপ্রাযেণোক্তং- “পারিযাত্রভবাঃ পথ্যাঃ” (সু. সূ. ৪৫) ইতি| তদুক্তং বিশ্বামিত্রেণ- “তডাগজং দরীজং চ তডাগাদ্যত্ সরিজ্জলম্| বলারোগ্যকরং তত্ স্যাদ্দরীজং দোষলং মতম্” ইতি| প্রাযোগ্রহণাত্ পূর্বসমুদ্রগমনেঽপি গাঙ্গং পথ্যং ভবতি; কিংবা যথোক্তলক্ষণহিমালযভবত্বাদেব গাঙ্গং জলং পথ্যম্| পারিযাত্রাদযঃ পর্বতাঃ স্বনামপ্রসিদ্ধাঃ||২০৯-২১২||

বর্ষাসু জলং বহন্তীতি বর্ষাজলবহাঃ; যদুক্তমগ্র্যাধিকারে “বর্ষানাদেযমুদকানাম্” (সূ. ২৫) ইতি, তস্যেহাপথ্যত্বে উপপত্তিবর্ণনমিতি ন পৌনরুক্ত্যম্| প্রস্রবণাদিষ্বিত্যত্র ‘জলং’ ইতি শেষঃ| বাপ্যাদযোঽনূপদেশে ধন্বনি হিমালিযাদিপর্বতেষু চ ভবেযুঃ, ততশ্চানূপাদিজলগুণৈরেব তদ্গুণনির্দেশঃ কর্তব্যঃ; পশ্চিমাভিমুখনদীজলপূর্বাভিমুখনদীজলানূপজলখধন্বজলপর্বতজলগুণাশ্চোক্তা এব, তেন তদ্গুণাতিদেশো বাপ্যাদিষু বোদ্ধব্যঃ| উক্তং চ হারীতেন- “অনূপদেশে যদ্বারি গুরু তচ্ছ্লেষ্মবর্ধনম্| বিপরীতমতো মুখ্যং জাঙ্গলং লঘু চোচ্যতে” ইতি| সুশ্রুতেঽপি বাপ্যাদীনাং পৃথগেব গুণ উক্তঃ; স চেহ কূপাদীনাং সক্ষারত্বাদিঃ প্রত্যক্ষদৃষ্টো গ্রন্থবিস্তরভযান্নোক্ত ইতি মন্তব্যম্| বাপী ইষ্টকাদিবদ্ধতীর্থা দীর্ঘিকা; কূপঃ প্রসিদ্ধঃ; তটাদাগো গতির্যস্য স তডাগঃ, স পুনরুচ্চদেশাদাগচ্ছজ্জলবন্ধনাদ্ভবতি, অন্যে তু পুষ্করীণীং তডাগমাহুঃ; উত্সা নিম্নাদুত্তিষ্ঠজ্জলস্থানং; সরো দিব্যখাতং পুরুষব্যাপারং বিনা, তত্পুনঃ পম্পাদি; প্রস্রবণঃ নির্ঝরঃ| অন্যে তু ‘হ্রদধারাজলাদিষু’ ইতি পঠন্তি; তত্র হ্রদঃ নদীস্থজলপ্রদেশো গম্ভীরো জলাশযঃ, ধারা তু পর্বতাদেব জলধারারূপা পতন্তী; আদিগ্রহণাত্ কেদারচুণ্ডাদীনাং গ্রহণম্| ক্লিন্নং পর্ণাদিভির্যুতং সদিত্যর্থঃ| বরুণালযে সমুদ্রে| বিস্রম্ আমগন্ধি| সুবিনিশ্চিত ইতি সর্বজলগুণকথনাত্||২১৩-২১৬||

জীবনীযসামান্যাজ্জলমনু ক্ষীরমুচ্যতে , ক্ষীরজত্বাদ্দধ্যাদযশ্চোচ্যন্তে| প্রসন্নমিতি নির্দোষং, নির্দোষতা তু প্রশস্তত্বেন গুণ ইত্যুচ্যতে; কিংবা গুণানামসঙ্খ্যেযত্বেন প্রসন্নত্বং গুর্বাদ্যপঠিতমপি গুণ এবেতি জ্ঞেযম্| এবঙ্গুণমেবেতি স্বাদ্বাদিদশগুণম্| সামান্যাদিতি সমানত্বাত্| মহিষীক্ষীরগুণে স্নেহাদূনমিতি মহিষীক্ষীরং গব্যক্ষীরাত্ স্নেহোনং, গৌরবশৈত্যাভ্যাং তু তদধিকমিতি কেচিদ্ব্রুবতে; তন্ন, প্রত্যক্ষমেব হি মহিষীক্ষীরাদধিকমেব ঘৃতং দৃশ্যতে; তথা জতূকর্ণেঽপ্যুক্তং- “গুরু শীতং স্নিগ্ধতরং মাহিষমতিবল্যং বৃংহণং চাগ্র্যম্” ইতি, সুশ্রুতেঽপ্যুক্তং- “গব্যাত্ স্নিগ্ধতরং” (সূ. ৪৫) ইতি; তস্মাত্ ‘স্নেহান্যূনং’ ইতি পাঠঃ; তেন স্নেহাদধিকমিত্যর্থঃ; কিংবা স্নেহান্যূনমিতি স্নেহপূর্ণমিত্যর্থঃ| উষ্ট্রীক্ষীরাদীনাং সলবণত্বাদি মধুরানুরসত্বেন বোদ্ধব্যং; মধুরস্তু রসঃ প্রধান এব, দীর্ঘঞ্জীবিতীযে ‘প্রাযশো মধুরং’ (সূ. ১) ইত্যুক্তং, ন তু সর্বথা মধুরমেব| ঐকশফমিতি বডবাযাঃ | কেচিত্তু সর্বশব্দেন খরবেগসরযোরপি ক্ষীরস্যাযং গুণ ইতি বদন্তি| উষ্ণমিতি ক্ষীরান্তরাপেক্ষযা, তেন সামান্যগুণে শীতত্বমুক্তমবিরুদ্ধং ভবতি, যতো লঘূত্তমাত্তিক্তরসাদ্গুরুরপি কটু লঘুরেবোচ্যতে মধুরাদ্যপেক্ষযা, এবং শীততমাদিতরক্ষীরাদুষ্ণমপি বডবাযাঃ ক্ষীরং শীতমেব মূত্রমধ্বাদ্যপেক্ষযা ভবতি; এবং রূক্ষমিত্যেতদপি ব্যাখ্যেযম্| যদ্যপি চ হস্তিনীক্ষীরাদীনি শাস্ত্রে প্রযোগেষু নোক্তানি, তথাঽপি কথিতগুণং বুদ্ধ্বা তত্র তত্র প্রযোজ্যানি||২১৭-২২৪||

দধিগুণমাহ- রোচনমিত্যাদি| অত্র রোচনমিত্যুক্ত্বাঽপি অরুচাবিতি বচনমরুচিরোগহরত্বেন, রোচনতা তূপযোগকাল এব দ্রব্যান্তররুচিকরত্বেনোক্তা| বৃংহণমিতি রোগাদিকৃশস্য বৃংহণং, কার্শ্যে চেতি সহজে কার্শ্যে শস্যত ইতি বোদ্ধব্যং; তেন ন পৌনরুক্ত্যম্| পীনসে চতুর্বিধেঽপি প্রভাবাদ্ধিতং; কিংবা পীনসপাচকত্বাত্ সর্বত্র হিতম্| যচ্চ বৃষ্যশীতকহিতত্বাদি দধিগুণপর্যালোচনযাঽনুপপদ্যমানমিহ দৃশ্যতে, তত্ প্রভাবাদ্বোদ্ধব্যম্| যচ্চ গুণান্তরাদেবাম্লত্বোষ্ণত্বস্নিগ্ধত্বাল্লভ্যমানমপি বাতঘ্নত্বং পুনরুচ্যতে তত্ প্রকর্ষার্থং, তথা অম্লত্বাদিযুক্তস্যাপি বাতহন্তৃতাদিব্যভিচারদর্শনাদিতি বোদ্ধব্যম্| ব্যভিচারোদাহরণানি চ মন্দকমন্দজাতমদ্যাদীন্যনুসর্তব্যানি| ন্যাযশ্চাযং সর্বান্নপানগুণকথনে যথাসম্ভবং বর্ণনীযঃ, গ্রন্থপ্রচুরতরতাভীত্যা সর্বং বস্তু বযমত্র নোদ্ভাবযামঃ| প্রাযশ ইতি বচনাত্ কালান্তরেঽপি গর্হিতত্বং শরদাদাবপি চ প্রকৃত্যাদিবশাদ্ধিতত্বং দর্শযতি||২২৫-২২৭||

মন্দকং যদা ক্ষীরং বিক্রিযামাপন্নং ঘনত্বং ন যাতি তদা তন্মন্দকম্| জাতং বাতঘ্নমিতি যদা তু মন্দকাবস্থামুত্সৃজ্য ঘনতযা জাতং সন্মধুরমীষদম্লং চ ভবতি, তদা বাতঘ্নং বিশেষেণ ভবতীত্যর্থঃ| পূর্বে তু দধিগুণাঃ সুজাতস্য ব্যক্তাম্লস্য বোদ্ধব্যাঃ| শুক্রলঃ সর ইতি চ্ছেদঃ| সরো দধ্যুপরিস্নেহঃ, শুক্রলঃ শুক্রস্রুতিবৃদ্ধিকরঃ; অত এব সুশ্রুতে সরগুণে “বৃষ্যঃ শুক্রবিবর্ধনঃ” (সু. সূ. ৪৫) ইতি পদদ্বযোপাদানং কৃতম্| মণ্ড ইতি প্রকরণাদ্দধিমণ্ডো মস্ত্বিত্যর্থঃ||২২৮||

শোফেত্যাদিনা তক্রগুণঃ| মূত্রগ্রহো মূত্রকৃচ্ছ্রাদি| গরোঽত্র কৃত্রিমবিষম্||২২৯||

সঙ্গ্রাহীত্যাদি নবনীতগুণঃ| নবোদ্ধৃতং সদ্যস্কং; নবোদ্ধৃতমিতি বচনাদভিনবস্যৈব নবনীতস্য যথোক্তগুণাঃ প্রকর্ষবন্তো ভবন্তি, পুরাণস্য তু নৈতে বলবন্তো গুণা ভবন্তীতি||২৩০||

উত্পাদক্রমাগতস্য ঘৃতস্য গুণমাহ- স্মৃতীত্যাদি| সহস্রবীর্যমিতি ভূরিশক্তিকম্| কথং সহস্রবীর্যমিত্যাহ- বিধিবদিতি| বিধিবদ্ বিধিযুক্তং সদিত্যর্থঃ, বিধিশ্চ নানাকর্মকারিভির্দ্রব্যৈঃ সংস্কারঃ সংযোগশ্চ, অত এবোক্তং- “নান্যঃ স্নেহস্তথা কশ্চিত্ সংস্কারমনুবর্ততে” (নি. ১) ইতি, তথা তন্ত্রান্তরে “ঘৃতং যোগবাহি” ইতি; তস্মাত্ সহস্রবীর্যতঃ কর্মসহস্রকৃদিতি যোজ্যম্| যত্তু সুশ্রুতটীকাকৃতঃ সুশ্রুতোক্তঘৃতগুণেষু “ত্রিদোষাপকর্ষণং” ইতি পঠন্তি, তত্ সংস্কারেণ কফহরণাদিতি জ্ঞেযম্| মদেত্যাদি| জীর্ণং তু দশবর্ষাতীতং; বচনং হি- “পুরাণং দশবর্ষং স্যাত্ প্রপুরাণমতঃ পরম্” ইতি| যথা যথা চ জীর্ণত্বপ্রকর্ষস্তথা তথা গুণোত্কর্ষো জ্ঞেযঃ| উক্তং হি হারীতে- “যথা যথা জরাং যাতি গুণবত্ স্যাত্তথা তথা” ইতি| অনুক্তসর্পির্গুণানতিদিশতি- সর্পীংষীত্যাদি| সর্পীংষি স্বানীতি সম্বন্ধঃ; তেন, অজাক্ষীরবদজাসর্পির্নির্দিশেদিতি| এবং শেষযোরপি বাচ্যম্| অনেন চ ন্যাযেন হস্তিন্যাদিসর্পিরপি বোদ্ধব্যং, হস্তিন্যাদিসর্পির্ব্যবহারাভাবাত্ সাক্ষান্নোক্তম্||২৩১-২৩৩||-

পীযূষঃ সদ্যঃপ্রসূতাযাঃ ক্ষীরম্| তদেব যাবন্ন পরতঃ প্রসন্নতাং যাতি তাবত্ ‘মোরট’ ইত্যুচ্যতে| কিলাটো নষ্টক্ষীরভাগঃ, যং লোকাঃ ক্ষীরসামিত্যাহুঃ| বিশদ ইত্যাদিস্তক্রপিণ্ডকগুণঃ, তক্রপিণ্ডঃ তক্রকূর্চিকাযা এব স্রুতদ্রবো ঘনো ভাগঃ| গোরসানামিত্যত্র আদিশব্দো লুপ্তনির্দিষ্টো দ্রষ্টব্যঃ, তেন মহিষীক্ষীরাদীনামপি গ্রহণং; কিংবা প্রাধান্যাদ্গোরসনির্দেশঃ; গোরসভাষযা গোরসনিষ্পন্নাঃ সর্ব এব ক্ষীরদধিতক্রাদযো গৃহ্যন্তে; লোকে হি সর্বেষ্বেবৈষু গোরসসঞ্জ্ঞা||২৩৪-২৩৬||

মাধুর্যসামান্যাদিক্ষুবিকৃতিপ্রাযো বর্গ উচ্যতে| ভক্ষিতস্যেতি দন্তপীডিতস্য| যান্ত্রিক ইতি যন্ত্রপীডিতঃ| বিদাহশ্চাস্য প্রাযশস্ত্বগ্গ্রন্থিযুক্তস্য যন্ত্রেণ পীডনাত্, তথা কালান্তরাবস্থানাচ্চ| বচনং হি- “মূলত্বগ্গ্রন্থিসংযোগাদ্যান্ত্রিকস্তু বিদহ্যতে”; উক্তং চ হারীতে- “ব্যাপিত্বাত্ সুকুমারো হি রসো যন্ত্রনিপীডিতঃ| সৌক্ষ্ম্যাত্ স্পৃষ্টোঽনিলার্কাভ্যাং ভৃশং কাযে বিদহ্যতে” ইতি| অত্র ব্যাপিত্বাদিতি ত্বগাদিযুক্তেক্ষুকাণ্ডভবত্বাত্| যদুচ্যতে- বিদাহিত্বে যান্ত্রিকস্য রক্তপিত্তহন্তৃত্বমুক্তং বিরুধ্যতে, যথা “মধূদকস্যেক্ষুরসস্য চৈব পানাচ্ছমং গচ্ছতি রক্তপিত্তম্” (চি.অ.৪) ইতি; তন্ন, যতো দন্তনিষ্পীডিতস্যৈবাবিদাহিনো রক্তপিত্তে গ্রহণং ভবিষ্যতি, কিংবা যান্ত্রিকেঽপি বিদাহকারকত্বগাদিসংযোগস্য তথা কালান্তরাবস্থানস্য চ ত্যাগং কৃত্বোপযোগঃ কর্তব্যঃ; ‘যান্ত্রিকস্তু বিদহ্যতে’ ইতি বচনং প্রাযোবাদমাশ্রিত্য বোধ্যম্| অন্যে ত্বেতদ্দোষভযাদ্বিদহ্যত ইতি শীঘ্রং পচ্যত ইতি ব্যাখ্যানযন্তি||২৩৭||-

প্রভূতক্রিম্যাদিকারণত্বাত্ প্রভূতক্রিম্যাদিকরো গুড উচ্যতে| ক্ষুদ্রগুডস্তথা চতুর্ভাগত্রিভাগার্ধাবশেষিতো রস ইত্যত্র চকারলোপো দ্রষ্টব্যঃ; তেন ক্ষুদ্রগুডশ্চতুর্ভাগাবশেষিতাদ্রসাদ্গুরুঃ, তথা ত্রিভাগাচ্চতুর্ভাগাবশেষিতো গুরুরিত্যাদি জ্ঞেযম্| ক্ষুদ্রগুডোঽসিতগুড ইত্যুচ্যতে| ফাণিতং চ তন্তুলীভাবাদ্ভবতি| ধৌতঃ স্বল্পমল ইতি মলাবসেকেন ধৌতোঽল্পমলো ভবতি, তেনাল্পক্রিম্যাদির্ভবতীতি ভাবঃ| তত ইতি ধৌতগুডাত্| মত্স্যণ্ডিকা খণ্ডমধ্যে পাকাদ্ঘনীভূতা মত্স্যাণ্ডনিভা ভবতি| বিমলাঃ পরমিত্যুত্তরোত্তরং বিমলাঃ| ভবেচ্ছৈত্যং তথা তথেতি মত্স্যণ্ডিকাযাশ্চ খণ্ডঃ শীততরঃ, ততশ্চ শর্করা শীততমেত্যর্থঃ| গুডশর্করেতি যাসমধুশর্করযোর্ব্যবচ্ছেদার্থম্| যাসশর্করা দুরালভাক্বাথকৃতা শর্করা| মধুশর্করা তু মধুভাণ্ডেষু শর্করাকারা ভবতি||২৩৮-২৪২||

মধুশর্করাপ্রসঙ্গেন মধ্বভিধানম্| মক্ষিকাঃ পিঙ্গলাঃ, তদ্ভবং মাক্ষিকম্| ভ্রমরঃ প্রসিদ্ধঃ| ক্ষুদ্রমক্ষিকাভবং ক্ষৌদ্রম্| পিঙ্গলা মক্ষিকা মহত্যঃ পুত্তিকাঃ, তদ্ভবং পৌত্তিকম্| ছত্রাদযশ্চাপরে চত্বারো মধুভেদাঃ সুশ্রুতোক্তাঃ সামান্যমধুগুণা এব জ্ঞেযাঃ; কিংবা অপ্রশস্তত্বাদিহ নোক্তাঃ| কেচিত্ ‘মাক্ষিকং তৈলবর্ণং স্যাত্’ ইত্যাদিশ্লোকং পঠন্তি| উষ্ণার্তমথবেতি ভাষযা, যথা উষ্ণং মধু হন্যান্ন তথা উষ্ণার্তমিতি সূচযতি| তত্রৈব হেতুমাহ- সবিষান্বযাদিতি|- সবিষাণি নানাপুষ্পাণি, কিংবা সবিষা এব মক্ষিকাদযঃ, অন্বযা উত্পত্তিস্থানানি যস্য তত্ সবিষান্বযং মধু; তেন বিষানুগতস্যোষ্ণবিরোধিত্বস্যৈব মধুনোঽনুগমো ভবতি, ন তু সবিষত্বস্য; তথা সত্যুষ্ণমপি মারকং স্যাত্; কিংবা অথবেতি সবিষান্বযাদিত্যনেন সম্বধ্যতে, তেন সবিষান্বযাদন্যতশ্চ শৈত্যাত্ সৌকুমার্যাচ্চোষ্ণেন মধু বিরুধ্যত ইত্যর্থো ভবতি| উক্তং হি হারীতে- “নানাপুষ্পপ্রকারাণাং রসসারাত্মকং মধু| তচ্ছৈত্যাত্ সৌকুমার্যাচ্চ সর্বৈরুষ্ণৈর্বিরুধ্যতে” ইতি; সুশ্রুতেঽপ্যুক্তং- “তত্ সৌকুমার্যাচ্চ তথৈব শৈত্যাত্” (সু. সূ. ৪৫) ইত্যাদি| অল্পস্য মধুনো হিতত্বে হেতুমাহ- গুর্বিত্যাদি| গুরুত্বান্মধ্বামকারকং ভবতি, রূক্ষং কষাযশীতং তু মহাত্যযবাতকরমিতি ভাবঃ||২৪৩-২৪৬||

মধ্বামস্য মহাত্যযতামাহ- নাত ইত্যাদি| উপক্রমবিরোধিত্বং মধ্বামে যথা- আমে তূষ্ণং পথ্যং, তন্মধুনি বিরুদ্ধং; যত্তু মধুহিতং শীতং, তদামে বিরুদ্ধম্||২৪৭-২৪৮||

মধুনো যোগবাহিত্বমাহ- নানেত্যাদি| যস্মান্নানারসবীর্যাদিভ্যঃ পুষ্পেভ্য উত্পন্নং তন্মধু, তেনানভিব্যক্তনানাশক্তিকমেব| ততশ্চ যেন দ্রব্যেণ বামনীযেন বাঽঽস্থাপনীযেন বা বৃষ্যেণ কার্যান্তরকারকেণ বা যুজ্যতে তস্যৈব কর্ম করোতি, সমানানুকারিদ্রব্যপ্রবোধিতশক্তিত্বাদিতি ভাবঃ| চকারোঽত্র হেত্বন্তরসমুচ্চযে, তেন প্রভাবাচ্চেতি বোদ্ধব্যম্| তেন সত্যপি নানৌষধিসম্ভবত্বে প্রভাবান্ন ক্ষীরমদ্যাদযো যোগবাহিনঃ; তথা, অনানাত্মকা অপি শিলাজতুতৈলাদযো যোগবাহিনো ভবন্তি| যোগবাহিত্বেঽপি মধু স্নেহনে ন প্রযুজ্যতে বাতে, রূক্ষাদিগুণযুক্তত্বাত্| নানাদ্রব্যাত্মকত্বেঽপি মধু রূক্ষকষাযত্বাভ্যামেবাবির্ভূতং ভবতি, প্রাযেণ রূক্ষকষাযগুণাধিকে এব পুষ্পে মধুমক্ষিকাণাং চরণাদিতি বোদ্ধব্যম্| অনেন চ ন্যাযেন নানাদ্রব্যাত্মকত্বেন সর্বগুণতাপ্রসঙ্গো মধুনো নিরস্তো ভবতি| সুশ্রুতেঽপ্যেবমেব যোগবাহিত্বং “তচ্চ নানা” (সু.সূ.অ.৪৫) ইত্যাদিনা গ্রন্থেন মধুন উক্তম্| ইক্ষুবিকৃতিপ্রায ইতি ইক্ষুবিকৃতিপ্রধানঃ, তেন যাসশর্করাদিকথনমপ্যত্রাবিরুদ্ধমিতি ভাবঃ||২৪৯||

সম্প্রতি শূকধান্যাদিবর্গৌর্যথাসম্ভবং সম্পাদিতস্য কৃতান্নস্য পেযাদের্গুণান্ বক্তুং কৃতান্নবর্গ উচ্যতে | তে চ পেযাদীনাং গুণাঃ কেচিত্ সংস্কারসংযোগাদিজাঃ, কেচিত্ প্রাকৃতা অপি জ্ঞেযাঃ| ন চ বাচ্যং- পেযাদীনামেব গুণেন বাধিতত্বাচ্ছূকধান্যাদীনাং পৃথগ্গুণো ন বাচ্য ইতি; যতঃ পেযাদযো হি প্রকৃতিগুণানুবিধাযিনঃ সন্তঃ স্বগুণমাবহন্তি, তেন কৃতান্নস্য যো গুণ উচ্যতে স যদি রক্তশাল্যাদিপ্রকৃতাবপি ভবতি তদা বলবান্ ভবতি, অথ প্রকৃতৌ বিপরীতো গুণো ভবতি তদা কৃতান্নগুণস্যাল্পত্বং ভবতীতি মন্তব্যম্| অত্র স্বস্থাতুরহিতত্বেনাদৌ পেযোচ্যতে; পেযা বহুদ্রবা যবাগূঃ, বিলেপী বিরলদ্রবা যবাগূঃ| পেযাদিক্রমেণান্নে বক্তব্যে অন্নাত্ প্রথমোত্পদ্যমানত্বেন মণ্ডগুণকথনম্| দীপনলঘুত্বাভ্যামগ্নিং যস্মাত্ করোতি, তস্মাল্লঙ্ঘিতাদীনাং প্রাণধারণ ইতি জ্ঞেযম্| সুসংস্কৃত ইতি ধান্যকপিপ্পল্যাদিসুসংস্কৃতঃ| শুদ্ধানাং মলাপহ ইতি সম্যক্শুদ্ধানামপি কোষ্ঠোপলেপকদোষাপহরত্বেন; যদুচ্যতে- শুদ্ধানামিতি ঈষচ্ছুদ্ধানাং; তেন, ঈষচ্ছুদ্ধ্যা শেষদোষসম্বন্ধান্মলাপহ ইত্যুপপন্নং, সুশ্রুতেঽপি (সু.সূ.অ.৪৬) “লাজমণ্ডোঽবিশুদ্ধানাং” ইত্যকারপ্রশ্লেষাদীষদ্বিশুদ্ধানামিতি বোধ্যম্| তন্ন সত্, ঈষদ্বিশুদ্ধে পেযা নিষিদ্ধৈব, বচনং হি- “কফপিত্তে বিশুদ্ধেঽল্পে মদ্যপে বাতপৈত্তিকে| তর্পণাদিক্রমঃ কার্যঃ পেযাঽভিষ্যন্দযেদ্ধি তান্” (সি.অ.৬) ইতি||২৫০-২৫৬||-

স্বিন্ন ইত্যুত্স্বিন্নধান্যতণ্ডুলকৃতঃ, কিংবা সম্যক্স্বিন্নত্বেন মৃদুভূতঃ| সন্তপ্ত ইতি সহজেনোষ্মণা, ন তু পুনস্তাপনেন; বচনং হি- “বিবর্জযেত্ স্থিরং শীতমন্নমুষ্ণীকৃতং পুনঃ” ইতি| ভৃষ্টতণ্ডুলকৃত ওদনো ভৃষ্টতণ্ডুলঃ| অধাতঃ অধৌততণ্ডুলকৃতঃ| অত্র সুধৌতত্বাদিগুণবিশিষ্টস্যাদনস্য লঘুত্বংবচনেন তদ্বিপরীতানামধৌতাদীনাং গুরুত্বমর্থতঃ সিদ্ধমপি যত্ পুনরুচ্যতে তত্ স্পষ্টার্থম্| সন্তর্পণা ইতি তদাত্বেঽপি বলকরাঃ| মাংসাদিসংযোগসাধিতাশ্চৌদনা এব বোদ্ধব্যাঃ| অত্র রূক্ষাভ্যাং শাকমুদ্গাভ্যামপি সংযুক্তস্যৌদনস্য বল্যত্বাদি সংযোগমহিম্না তথা ঘৃতাদিসংস্কারাচ্চ লোকব্যবহারক্রিযমাণত্বাদ্বোদ্ধব্যম্ ||২৫৭-২৫৯||-

যবপিষ্টমুষ্ণোদকসিক্তমীষত্স্বিন্নমপূপীকৃতং কুল্মাষমাহুঃ| স্বিন্নভক্ষ্যা ইত্যুত্স্বেদনমাত্রকৃতা হণ্ডরিকাদযঃ| যথাদ্রব্যমিতি বদতা নাত্র প্রকৃতিগুণোপমর্দেন লাজাদাবিব গুণান্তরোদয ইতি দর্শযতি||২৬০-২৬১||

অকৃতকৃতযূষলক্ষণম্- “অস্নেহলবণং সর্বমকৃতং কটুকৈর্বিনা| বিজ্ঞেযং লবণস্নেহকটুকৈঃ সংস্কৃতং কৃতম্” (সু. সূ. ৪৬) ইতি| তনুমিতি স্বল্পমাংসত্বেনাঘনং, সাংস্কারিকমিতি বহুমাংসস্নেহাদিসংস্কৃতত্বাদ্ঘনম্||২৬২||

সক্তূনাং রূক্ষত্বেঽপি বাতলত্বাভিধানং তক্রস্য রূক্ষস্যাপি বাতহারিত্বদর্শনাত্| পীতা ইত্যনেন সক্তূনাং পিণ্ডোপযোগে নিষেধং দর্শযতি| তর্পযন্তি তৃপ্তিং জনযন্তি| সদ্যোবলাঃ তদাত্বেনৈব বাজীকরণবদ্বলকরাঃ; এতেন পরিণামে বলাপহত্বমপ্যুক্তং ভবতি||২৬৩-২৬৪||

যবকৃতো বাট্যো যাবকো বাট্যঃ, বাট্যশ্চ ভৃষ্টযবৌদনঃ| ধানা ভৃষ্টযবাঃ| অঙ্কুরিতস্য যবস্য ধানা বিরূঢধানাঃ| শষ্কুল্যঃ শালিপিষ্টৈঃ সতিলৈস্তৈলপক্বাঃ ক্রিযন্তে| মধুক্রোডাঃ পাকঘনীভূতমধুগর্ভাঃ| সপিণ্ডকা ইতি মধুক্রোডা এব সপিষ্টকপিণ্ডাঃ; নলস্ত্বাহ- “বিমর্দ্য সমিতাচূর্ণং মৃদুপাকং গুডান্বিতম্| ঘৃতাবগাহে গুডিকাং বৃত্তাং পক্বাং সকেশরাম্|| সৌগন্ধিকাধিবাসাং চ কুর্যাত্ পূপলিকাং বুধঃ| স এব খণ্ডসংযাবঃ সিতাম্রাতকপূরিতঃ|| মাতুলুঙ্গত্বচা চৈব বেষ্টিতো মধুশীর্ষকঃ” ইতি| মধুশীর্ষক এব মধুক্রোডঃ| পূপাঃ পিষ্টিকাঃ| পূপলিকা চাপডিকেতি খ্যাতা||২৬৫-২৬৭||

পললং তিলচূর্ণম্| বেশবারঃ সূদশাস্ত্রে- “মাংসং নিরস্থি সুস্বিন্নং পুনর্দৃষদি পেষিতম্| পিপ্পলীশুণ্ঠিমরিচগুডসর্পিঃসমন্বিতম্|| ঐকধ্যং বিপচেত্ সম্যগ্বেশবার ইতি স্মৃতঃ”| ক্ষীরপ্রধানাঃ পূপাঃ ক্ষীরপূপাঃ| সগুডা ইত্যাদৌ ‘সক্ষীরাঃ’ ইতি ক্ষীরযোগমাত্রং, ন ক্ষীরপ্রধানতেতি ন পৌনরুক্ত্যম্||২৬৮-২৭০||

সস্নেহা ইতি পিষ্টাবস্থাযামেব স্নেহযোগাত্| গুরুত্বেনোক্তানামপি ভূর্যগ্নিসংযোগাদিনা সংস্কারাল্লাঘবং ভবতীত্যাহ- সংস্কারাল্লঘব ইত্যাদি| বুদ্ধ্বা নির্দিশেদিতি সংস্কারগুণং তথা প্রকৃতিগুণং চ বুদ্ধ্বা যথোচিতং গুণং নির্দিশেত্||২৭১-২৭২||

পৃথুকাঃ চিপিটাঃ| যাবা ইতি যবচিপিটাঃ, অন্যে তু গান্ধারদেশপ্রসিদ্ধান্ সম্পিষ্টসঞ্জ্ঞানাহুঃ | সরসা অভৃষ্টাঃ||২৭৩||

সূপ্যবিকৃতা ইতি মুদ্রমাষাদিবিকারাঃ||২৭৪||

মৃদুপাকাঃ স্তোকাগ্নিসংযোগসাধ্যাঃ| ব্যতিক্রান্তপাকা ইতি চিরেণ জরাং গচ্ছন্তি||২৭৫||

অনুক্তভক্ষ্যগুণাতিদেশার্থমাহ- দ্রব্যসংযোগেত্যাদি | দ্রব্যমানং পৃথগিতি ভক্ষ্যকরণে সংযুক্তানাং দ্রব্যাণাং মধ্যে কস্য কিযন্মানমিতি বুদ্ধ্বা| যথাস্বমিতি যস্য দ্রব্যস্য গৌরবং লাঘবং বা বলবদ্ভবতি তং নির্দিশেত্||২৭৬||

রসালালক্ষণং- “সচতুর্জাতকাজাজি সসিতার্দ্রকনাগরম্| রসালা স্যাচ্ছিখরিণী সঙ্ঘৃষ্টং সসরং দধি” ইতি| রসালাপ্রসঙ্গেন সগুডদধিগুণমাহ- স্নেহনমিত্যাদি||২৭৭-২৭৮||

পানকানামপি কৃতান্নভেদত্বাত্তদ্গুণমাহ- দ্রাক্ষেত্যাদি| যচ্চেক্ষুবিকৃতিং প্রতি পানকমিতি সম্বন্ধঃ| রাগষাডবং কেচিদেবং বদন্তি- “ক্বথিতং তু গুডোপেতং সহকারফলং নবম্| তৈলনাগরসংযুক্তং বিজ্ঞেযো রাগষাডবঃ” ইতি; কিংবা , “সিতারুচকসিন্ধূত্থৈঃ সবৃক্ষাম্লপরূষকৈঃ| জম্বূফলরসৈর্যুক্তো রাগো রাজিকযাঽন্বিতঃ” ইতি| ষাডবস্তু মধুরাম্লদ্রব্যকৃতঃ| আম্রামলকলেহাস্তু তযোঃ পৃথক্ক্বাথেন সশর্করেণ ঘনাঃ ক্রিযন্তে| অনুক্তপানকগুণাতিদেশার্থমাহ- বুদ্ধ্বেত্যাদি| অস্য দ্রব্যসংযোগেত্যাদিবদ্ব্যাখ্যানম্||২৭৯-২৮৩||

শুক্তলক্ষণং- “যন্মস্ত্বাদি শুচৌ ভাণ্ডে সগুডক্ষৌদ্রকাঞ্জিকম্| ধান্যরাশৌ ত্রিরাত্রস্থং শুক্রং চুক্রং তদুচ্যতে” ইতি| তদাসুতমিতি শুক্তমধ্যস্থিতং মূলককূষ্মাণ্ডাদি| শিণ্ডাকী স্বনামপ্রসিদ্ধা তীরভুক্তৌ| আসুতং চান্যদিতি সন্ধানান্তরম্| কালাম্লমিতি চিরকালাবস্থানাদম্লং, নত্বম্লদ্রব্যসংযোগাত্| কৃতান্নানামিতি করণনিষ্পাদিতমণ্ডপেযাদীনাম্||২৮৪-২৮৫||

আহারমভিধায তদ্যোগিদ্রব্যং ব্রূতে| তত্র সর্পিষ উক্তত্বাত্তৈলমেবান্নসংস্কারকপ্রধানত্বাদাহ- কষাযেত্যাদি| সংযোগাচ্চ সংস্কারাচ্চেতি সংযোগসংস্কারাত্; সংস্কারস্তৈলস্য ভেষজৈঃ পাকঃ, সংযোগস্ত্ববচারণাযাং জ্ঞেযঃ| সঙ্খ্যে যুদ্ধে| আতস্যম্ উমাতৈলম্| অনুক্ততৈলগুণনির্দেশার্থমাহ- ফলানামিত্যাদি| ফলানামিত্যুপলক্ষণং; তেন সারস্নেহা অপি সুশ্রুতোক্তা বোদ্ধব্যাঃ| যথাফলমিতি যাদৃশগুণং ফলং তাদৃশ এব তত্স্নেহোঽপীত্যর্থঃ||২৮৬-২৯৪||

যথাসত্ত্বমিতি যঃ প্রাণী আনূপাদিরুষ্ণস্তস্যোষ্ণঃ, যস্তু প্রাণী জাঙ্গলাদিঃ শীতস্তস্য শীত ইত্যর্থঃ| সামান্যতস্তু বসামজ্জ্ঞোরনুষ্ণাশীতত্বং যথা ভবতি তথা স্নেহাধ্যাযে এব প্রোক্তম্||২৯৫||

সৌক্ষ্ম্যাদিত্যাদিনা সৌবর্চলগুণঃ| তৈক্ষ্ণ্যাদিত্যাদিনা বিডগুণঃ| ঔদ্ভিদম্ উত্কারিকালবণম্ | কাললবণং সৌবর্চলমেবাগন্ধম্| দক্ষিণসমুদ্রসমীপে ভবতীতি সামুদ্রং করকচম্| পাংশুজং পূর্বসমুদ্রজম্||২৯৬-৩০৪||

ক্ষারাণামপি লবণসত্ত্বাত্ ক্ষারগুণমাহ- হৃদিত্যাদি| যবক্ষারগুণঃ| সর্বঃ ক্ষার ইতি স্বর্জিকাক্ষারটঙ্কনক্ষারাদিঃ||৩০৫-৩০৬||

কারবী কৃষ্ণজীরকম্| কুঞ্চিকা স্থূলজীরকম্| অজাজী জীরকম্||৩০৭||

উক্তাত্তৈলাদেরন্যদপ্যাহারসংস্কারকত্বেনাহারযোগি ভবতীত্যাহ- আহারেত্যাদি| ভক্তিঃ বিভাগ ইযত্তেতি যাবত্; কিংবা ভক্তিঃ ইচ্ছা; তেন পুরুষেচ্ছানামনিযমাদুক্তমপি কিঞ্চিত্ প্রায আহারযোগি ন ভবতি, তথা অনুক্তমপি রসোনাম্রপেষিকাদ্যাহারসংযোগি ভবতীত্যুক্তং ভবতি||৩০৮||

সম্প্রত্যুক্তানাং শূকধান্যাদীনাং যদনুক্তগুণং তদ্বক্তুমাহ- শূকধান্যমিত্যাদি| সমাতীতমিতি একবর্ষাতীতম্| প্রশস্যত ইতি লাঘবাত্; হেমন্তে নবধান্যবিধানং ত্বপবাদঃ| আগচ্ছতি ক্ষিপ্রমিতি উপ্তং সচ্ছীঘ্রং ভবতি; তেন ষষ্টিকাঃ সর্বধান্যেষু লঘবঃ, তে হি ষষ্টিরাত্রেণ ভবন্তি| অস্মিংশ্চ ব্যাখ্যানে, ব্রীহেঃ শারদস্য চ হৈমন্তং শালিং প্রত্যল্পকালত্বেন লঘুত্বং প্রাপ্নোতি, তস্মাত্ সজাতীয এব শীঘ্রগমনং লাঘবহেতুরিতি বাচ্যম্| কিংবা, আগচ্ছতি ক্ষিপ্রমিতি ভুক্তং সত্ ক্ষিপ্রং পচ্যতে| যুক্তিভৃষ্টম্ ঈষদ্ভৃষ্টমিতি যাবত্| সূপ্যং সূপায যোগ্যং মুদ্গমাষাদি||৩০৯-৩১০||

মৃতমিতি স্বযং মৃতম্| মেদ্যং মেদুরম্| কৃশগ্রহণেন শুষ্কমপি গ্রাহ্যম্| অগোচরভৃতং যথা- আনূপং ধন্বদেশে পুষ্টম্| ব্যালা ব্যাঘ্রাদযঃ; কিংবা ব্যালঃ সর্পঃ| বিষহতং তু বিষদিগ্ধশস্ত্রবিদ্ধম্||৩১১||-

মাংসরসগুণাঃ- প্রীণন ইত্যাদি| সর্বরোগপ্রশমনমিতি সর্বশব্দো ভূরিবচনঃ; এতেন উন্মাদাদৌ মাংসনিষেধো ন বিরোধবান্ ভবতি; উক্তং হি উন্মাদে- “নিবৃত্তামিষমদ্যো যঃ” (চি. ৯) ইত্যাদি| যথাস্বমিতি যস্য ব্যাধের্যো বিহিতঃ, তাদৃশং রসম্||৩১২-৩১৫||

স্নেহেন বিনা সিদ্ধং নিঃস্নেহসিদ্ধম্| আমমিতি অপক্বম্; এতচ্চ বিল্বাদীন্ বিহায বোদ্ধব্যম্| অদেশজমিতি অনুচিতদেশভবম্| অকালজম্ অনার্তবম্| সাধনাদৃত ইতি হরিতানামার্দ্রকপলাণ্ডুপ্রভৃতীনাং নিঃস্নেহসিদ্ধানামপি তথা অপরিস্রুতানামপি নির্দোষত্বমিত্যর্থঃ| বিনিশ্চযঃ ‘কৃত’ ইতি শেষঃ; তথাচ মদ্যানাং ‘প্রাযশোঽভিনবম্’ ইত্যাদিনা গুণদোষকথনং কৃতমেব, এবং জলেঽপি ‘পিচ্ছিলং ক্রিমিলম্’ ইত্যাদিনা, গোরসকৃতান্নাহারযোগিবর্গেষু তু যথোক্তকর্তৃগুণবদ্বিপরীতে বিপরীতগুণমনুমেযমিতি ভাবঃ||৩১৬-৩১৮||

সম্প্রতি যেষাং যদনুপানং কর্তব্যং তদেবাহ- যদিত্যাদি| আহারগুণৈরিতি শীতস্নেহমধুরাদিভিঃ; বিপরীতমিতি বিপরীতগুণমনুপেযম্| এবং চ দধ্নোঽম্লস্য মধুরং ক্ষীরং তথা পাযসস্য কাঞ্জিকানুপানং স্যাদিত্যাহ- ধাতূনাং যন্ন বিরোধি চেতি| এবং চাম্লে পযোঽনুপীযমানং বিরুদ্ধত্বাদ্ধাতুবিরোধেন প্রত্যুক্তং ভবতি, এবমন্যদপি বিরুদ্ধং বোদ্ধব্যম্| সমুদ্দিষ্টমিতি যজ্জঃপুরুষীযে (সূ. ২৫)| পেযমপেযং চেতি সহজগুণদোষবত্ত্বাত্ তথোপযুক্তভোজনাপেক্ষযা| স্নিগ্ধোষ্ণমিত্যাদিনা দোষভেদেনাপ্যনুপানমাহ| অনুশস্তমিতি অনুপানং শস্তম্||৩১৯-৩২৪||

অনুপানগুণানাহ- অথেত্যাদি| পর্যাপ্তিঃ তৃপ্তিঃ| ||৩২৫-৩২৬||

যৈরনুপানং ন কর্তব্যং তানাহ- নোর্ধ্বাঙ্গেত্যাদি| কণ্ঠোরসি স্থিতমিতি অনেনোর্ধ্বাঙ্গমারুতাদীনামনুপানং কণ্ঠোরসি স্থিতমেব ভবতি, নাধো যাতীতি দর্শযতি| স্নেহমাহারজং হত্বেতি আহারজাতং স্নেহমভিভূয ভূযো দোষায কল্পতে, বাতলক্ষণং দোষং করোতীত্যর্থঃ| আহারস্নেহেন যো বাতপ্রশমঃ কর্তব্যস্তং শৈত্যপ্রকর্ষাত্ পানীযমভিভবতীত্যর্থঃ| এতেন যদুচ্যতে- অপাং স্নিগ্ধত্বেন স্নেহনমুপপন্নমিতি, তন্ন ভবতি| যে তু ব্রুবতে- ‘হন’ হিংসাগত্যোরিতি বচনাত্ স্নেহং হত্বেতি স্নেহং গত্বেত্যর্থঃ; তদপি ন ভবতি, যতঃ স্নেহযুক্তত্বেনোর্ধ্বাঙ্গমারুতাদিহননমেব যুক্তং, ন তু করণম্| কিংবা স্নেহমিতি সারং, যথা- “দেহঃ স্নেহপরিক্ষযাত্” (চি. ৮) ইতি দেহসারপরিক্ষযাদিত্যর্থঃ, সারহননং চ জলেনাহারস্নেহং গৃহীত্বা কণ্ঠোরস্যবস্থানাদপাকাত্ ক্রিযতে ||৩২৭-৩২৮||

অন্নপানদ্রব্যৈকদেশকথনং সহেতুকমাহ- অন্নেত্যাদি| অন্নপানৈকদেশঃ প্রাযোপযোগিক ইতি বাহুল্যেন যদুপযুজ্যতে; এতেন যদ্বাহুল্যেনোপযুজ্যতে তস্য শৃঙ্গগ্রাহিকযা কথনং, প্রাযোঽনুপযুজ্যমানানাং শৃঙ্গগ্রাহিকযাঽকথনমল্পদোষমিতি দর্শযতি; তথা অল্পদোষস্যাপি পরিহারার্থং তদপি কিমিতি নোচ্যত ইত্যাহ- দ্রব্যাণীত্যাদি| দ্রব্যাণি কার্ত্স্ন্যেনেতি সাকল্যেন নির্দেষ্টুং; নামভিরিতি নামভিরপি ন শক্যং, ‘কেনচিত্’ ইতি শেষঃ; হিশব্দো যস্মাদর্থে, এতেন যস্মাত্ সর্বাণি দ্রব্যাণি নামমাত্রেণাপি বক্তুং কশ্চিন্ন পারযত্যতিবহুত্বাত্, তত্ কা কথা অশেষান্নপানদ্রব্যস্য শৃঙ্গগ্রাহিকযা গুণকথনং প্রতীতি ভাবঃ| কিংবা, নামভির্নির্দিষ্টানি কার্ত্স্ন্যেন নির্দেষ্টুমিতি গুণতঃ কথযিতুং ন শক্যং কেনচিদিতি যোজনা| অথ কথং হ্যত্রাকীর্তিতান্নপানস্য তর্হি গুণা নির্দেষ্টব্যা ইত্যাহ- যথেত্যাদি| যথা যেন প্রকারেণ “নানৌষধং কিঞ্চিত্” (সূ. ২৬) ইতি পূর্বাধ্যাযে প্রোক্তং তথা তেন প্রকারেণানুক্তং দ্রব্যং বাচ্যং; ‘গুণতঃ’ ইতি শেষঃ| পূর্বাধ্যাযে হি “তত্র দ্রব্যাণি গুরুখর” (সূ. ২৬) ইত্যাদিনা গ্রন্থেন পার্থিবাদিভেদেন বিশিষ্টেন চ কর্মণা প্রোক্তানি দ্রব্যাণি, ততশ্চানুক্তং দ্রব্যং তেনৈব গুরুখরাদিনা গুণেন পার্থিবত্বাদি প্রতিপাদ্য যথোক্তোপচযাদিকর্মকর্তৃকতযা ব্যপদেষ্টব্যমিত্যর্থঃ| তদেবানির্দিষ্টদ্রব্যস্য গুরুখরত্বাদি কথং জ্ঞেযমিত্যাহ- দেশজানাং বচো যথেতি; দেশজা দেশান্তরীযাঃ, তদ্দেশীযবচনাত্তে তে গুরুখরত্বাদযো জ্ঞেযা ইত্যর্থঃ; কিংবা, দেশজা যথা তত্তদ্দ্রব্যং ব্যবহরন্তি ‘ইদং মধুরম্, ইদমম্লম্’ ইত্যাদি, তত্ প্রতিপাদ্য মধুরত্বাম্লত্বাদিপ্রতিপন্নপৃথিব্যাদ্যস্য কারণমিতি পৃথিব্যাদীনাং গুর্বাদিগুণগণেন কর্মণা চ রসোক্তেন তদ্বক্তব্যমিত্যর্থঃ||৩২৯-৩৩০||

অপরমপ্যনুক্তান্নপানগুণজ্ঞানকারণমাহ- চর ইত্যাদি| চর্যত ইতি চরো দেশঃ ভক্ষ্যশ্চ সামান্যেন গৃহ্যতে| ক্রিযা ব্যাপারঃ| প্রমাণং মানম্| অত্রেতি অন্নপানগুণাধিকরণে||৩৩১||

চরং বিবৃণোতি- চরোঽনূপেত্যাদি| ভক্ষ্যস্য সংবিধিঃ ভক্ষ্যভক্ষণম্| তত্রানূপজলাকাশধন্বাদ্য ইত্যনেন গতিরূপশ্চর উচ্যতে, ভক্ষ্যসংবিধিবচনেন চ ভক্ষ্যরূপশ্চর উচ্যতে| অত্রৈবোদাহরণমাহ- জলজেত্যাদি| অত্র জলজত্বেনানূপজত্বেন চ জলে বাঽনূপে বা গতিরেব দৃশ্যতে, ন হি জলাদৌ যে জাতাস্তে প্রাযোঽন্যত্রাবতিষ্ঠন্তে; যে ত্বন্যত্র জাতা অপ্যন্যত্র তিষ্ঠন্তে প্রাযঃ কাকমদ্গুপ্রভৃতযস্তদ্গ্রহণার্থমাহ- জলানূপচরাশ্চ যে ইতি| এতেন সামান্যেন জলে প্রাযোঽবস্থানাদিহ জলচরত্বম্; এবমনূপচরত্বাদ্যপি জ্ঞেযম্| ভক্ষ্যরূপচরকৃতং গুণমাহ- গুরুভক্ষ্যা ইত্যাদি| ধন্বজা ধন্বচারিণ ইত্যত্র চকারো লুপ্তনির্দিষ্টো দ্রষ্টব্যঃ; তেন, আকাশচারিণামপি শ্যেনাদীনামনুক্তমপি লাঘবং স্বজাতিপ্রসহান্তরাপেক্ষযা বোদ্ধব্যম্, আকাশস্য লঘুত্বাত্| যে তু ব্রুবতে- আকাশচারিণাং গৌরবলাঘবানিযমাদকথনমিতি; তন্ন, তথা সত্যাকাশস্যাপ্রযোজকত্বেন ‘চরোঽনূপজলাকাশধন্বাদ্যঃ’ ইত্যত্রাকাশকথনং নিষ্প্রযোজনং স্যাত্||৩৩২-৩৩৩||

মাংসাদ্গুরুতরং বিদ্যাদিতি গুরুত্বেন প্রতিপাদিতসক্থ্যাদিমাংসাদ্বৃষণাদি গুরুতরং বিদ্যাদিতি| যথাস্বমিতি একশরীরসক্থ্যাদীনামেবৈতদ্গৌরবাদি, নত্বন্যশরীরাপেক্ষযা| মধ্যমিতি অন্তরাধিঃ| অস্থি ইতি অস্থিস্থিতং মাংসম্| অন্যে তু মধ্যমিতি অস্থিমধ্যগতং মজ্জানং ব্রুবতে; তন্নাতিসুন্দরং, তস্যোত্তরোত্তরধাতুগৌরবকথনেনৈব লব্ধত্বাত্||৩৩৪-৩৩৫||

স্বভাবাদিতি প্রকৃত্যা| ক্রিযোদাহরণম্- অলসেভ্য ইত্যাদি; অলসেভ্য ইতি অল্পক্রিযেভ্যঃ| বিশিষ্যন্ত ইতি বিশিষ্টা ভবন্তি, লঘবো ভবন্তীত্যর্থঃ||৩৩৬-৩৩৭||

লিঙ্গ্যন্তে জ্ঞাযন্তে গবাদযোঽনেনেতি লিঙ্গং জাতিঃ, তেন লিঙ্গসামান্যে জাতিসামান্যে; এতচ্চ চতুষ্পাদাভিপ্রাযেণ বোদ্ধব্যং, পক্ষিষু বিপর্যযঃ; যদাহ হারীতঃ- “চতুষ্পাদেষু লঘ্বী স্ত্রী বিহগেষু লঘুঃ পুমান্” ইতি, অত্রাপ্যুক্তং- “স্ত্রিযশ্চতুষ্পাত্সু পুমান্ বিহগেষু লঘুঃ” ইতি| পুংসাং চ গৌরবে অত্যর্থগুরোঃ শুক্রস্যারম্ভকস্য ভূযস্ত্বং হেতুং ব্রুবতে; কিন্তু স্বভাবস্তত্র হেতুরপবাদ ইতি পশ্যামঃ, বিহঙ্গেষু বিপর্যযদর্শনাদিতি||৩৩৮||

সবিপর্যযমিতি সংস্কারাল্লঘূনামপি গৌরবং বিদ্যাদিত্যর্থঃ| তদেব সংস্কারজন্যং লাঘবং গৌরবং চাহ- ব্রীহেরিত্যাদি| গুরোরপি ব্রীহেঃ সংস্কারাল্লাজা লঘব ইত্যর্থঃ| সক্তূনাং চ লঘূনাং সিদ্ধপিণ্ডিকা গুর্ব্যঃ, সিদ্ধপিণ্ডিকা অগ্নিপাচিতাঃ পিণ্ডাঃ||৩৩৯||

অল্পাদান ইত্যাদি| গুরূণাং দ্রব্যাণামল্পস্য স্তোকমাত্রস্যাদানে যল্লাঘবং, তস্মিন্ লাঘবে মাত্রা কারণং; ন দ্রব্যং, তস্য গুরুত্বাত্| এবং লঘূনামতিসেবনে গৌরবং মাত্রাকৃতম্| উদ্দিষ্টমিতি মাত্রাশিতীযে (সূ. ৫), অস্মাভিরপি চ তত্রৈবৈতত্ সপ্রপঞ্চং ব্যাখ্যাতম্; প্রকরণাগতত্বেন অভ্যর্হিতত্বাচ্চ পুনরুক্তম্ | দ্রব্যাণি মাত্রামপেক্ষন্তে ইতি যথোচিতমাত্রাবন্তি সুখং পচ্যন্ত ইত্যর্থঃ| মাত্রা চাগ্নিমপেক্ষত ইতি প্রতিপুরুষং প্রতিদিনং চাগ্নিভেদমপেক্ষ্য মাত্রা মহতী স্বল্পা বা ভবতি, ন প্রতিনিযতা মাত্রা বিদ্যত ইতি ভাবঃ||৩৪০-৩৪১||

কুতঃ পুনরগ্ন্যপেক্ষা মাত্রা ক্রিযত ইত্যাহ- বলমিত্যাদি| অগ্নিমপেক্ষ্য মাত্রযা প্রযুক্তযাঽগ্ন্যনাশাদ্বলাদযো ভবন্তীতি ভাবঃ| অগ্নৌ প্রতিষ্ঠিতা ইতি অগ্ন্যধীনাঃ; যথা- রাজাশ্রিতাঃ প্রজা ইতি| প্রাণা ইতি বাযবঃ; কিংবা, প্রাণাশ্রযাঃ শঙ্খাদযো দশ প্রাণাঃ| ইন্ধনং কাষ্ঠম্, ইন্ধনমিবেন্ধনং, তৈঃ; কিংবা অগ্নিদাহ্যমিন্ধনমুচ্যতে| অন্যথেতি অনিন্ধনম্||৩৪২||

ইযং চরাদিকৃতা গুরুলাঘবচিন্তাঽল্পাগ্নিং প্রতি প্রায ইতি দর্শযন্নাহ- গুর্বিত্যাদি| অত্রাপ্যবলত্বেন মন্দকাদ্যৈরপি বহ্নিমান্দ্যমেব লক্ষণীযম্||৩৪৩||

খরাহারা ইতি কঠিনাহারসাত্ম্যাঃ| মহোদরত্বেনাপি মেদোবরোধান্মহাগ্নিত্বং দর্শযতি| নাবশ্যং চিন্ত্যমিতি অনেন দীপ্তাগ্নীনামপি প্রতি স্তোকপ্রযোজনা গুরুলাঘবচিন্তা বিদ্যত এবেতি দর্শযতি| যতো দীপ্তাগ্ন্যাদীনামপি গুরুদ্রব্যমগ্নেঃ প্রতিপক্ষমাবহত্যেব, স্বভাবতোঽগ্নিবিরুদ্ধত্বাত্||৩৪৪||

অন্নং সমিধ ইব সমিধঃ| আহিতাগ্নিরিতি সাত্ম্যেন ব্যবস্থাপিতাগ্নিঃ; কিংবা আহিতাগ্নিরিবাহিতাগ্নিঃ; তেন আহিতাগ্নির্যথা প্রাতঃ সাযং জুহোতি, তথাঽযমপি প্রাতঃ সাযং চ পথ্যান্যন্তরগ্নৌ জুহোতি| ব্রহ্ম জপতীতি প্রণবাদিমন্ত্রমাবর্তযতি| দদাতি চেতি যথাশক্তি দানমাচরতি| তং নরং নিঃশ্রেযসে কল্যাণে যুক্তমামযা ন ভজন্তে| ভাবিনোঽপীতি জন্মান্তরেঽপি; ইহ জন্মনি পথ্যাশিত্বান্ন ভবন্তি গদাঃ, জন্মান্তরেঽপি ব্রহ্মজপদানাভ্যামর্জিতধর্মপ্রভাবাদেব ন ভবন্তি| অত এবাহ- অন্তরাদৃত ইতি; অন্তরাদিতি কারণাত্, ঋতে বিনা; অপথ্যস্য তথা অধর্মস্য রোগকরণস্যাভাবাদ্গদা ন ভবন্তীতি ভাবঃ||৩৪৫-৩৪৭||

বর্ষশতাযুষ্ট্বমপি হিতাদ্ভোজনাদ্ভবতীত্যাহ- ষট্ত্রিংশতমিত্যাদি| এতাবতীভী রাত্রিভির্বর্ষশতমেব ভবতি| জিতাত্মা জিতেন্দ্রিযঃ| সম্মতঃ পূজিতঃ||৩৪৮||

কিমর্থমন্নপানবিধাবেতত্ পরীক্ষ্যমিত্যাহ- প্রাণা ইত্যাদি| অভিধাবতীতি প্রার্থযতি| প্রতিভা প্রজ্ঞা| মেধা ধারণাবতী ধীঃ| লৌকিকমিতি অপরীক্ষকলোকে ভবম্; অপরীক্ষকা এব হি বর্তমানমাত্রে প্রবর্তন্তে, পরীক্ষকাস্তু জন্মান্তরোপকারিণ্যেব| কর্ম যদ্বৃত্তাবিতি বর্তমানে সাধ্যে যত্ কর্ম কৃষ্যাদি| স্বর্গতাবিতি স্বর্গগমনে| বৈদিকমিতি যজ্ঞাদি| অপবর্গ ইতি মোক্ষে| এতাশ্চ নিমিত্তসপ্তম্যঃ| যচ্চোক্তমিতি মোক্ষশাস্ত্রে সত্যব্রহ্মচর্যাদি| অন্নে প্রতিষ্ঠিতমিতি নিরন্নস্য দেহস্থিত্যভাবেন সর্বারম্ভাভাবাত্| যস্মাদন্নং সর্বত্র কারণং, ততস্তত্রাবধাতব্যমিতি||৩৪৯-৩৫০||-

সঙ্গ্রহেঽন্নপানগুণা ইতি ‘ইষ্টবর্ণ’ ইত্যাদিনোক্তাঃ| সাগ্র্যা ইতি উদকং ক্লেদযতি ইত্যাদিনা; উদকাদযো হি ক্লেদনাদিষু অগ্র্যাঃ শ্রেষ্ঠা ইত্যর্থঃ||৩৫১-৩৫২||

ইতি শ্রীচক্রপাণিদত্তবিরচিতাযাং চরকতাত্পর্যব্যাখ্যাযামাযুর্বেদদীপিকাযামন্নপানচতুষ্কেঽন্নপানবিধির্নাম সপ্তবিংশোঽধ্যাযঃ||২৭||