৩৬. নৈগমেষপ্রতিষেধাধ্যাযঃ

মুখমণ্ডিকাপ্রতিষেধানন্তরং পরিশিষ্ঠত্বান্নৈগমেষপ্রতিষেধারম্ভো যুক্ত ইত্যাহ- অথাতো নৈগমেষপ্রতিষেধমিত্যাদি||১-২||

বিল্বাগ্নিমন্থেত্যাদি| পূতীকঃ চিরবিল্বঃ| ‘সুরা সবীজং ধান্যাম্লং’ ইত্যত্রান্যে ‘সুরাসবীজধান্যাম্লৈঃ’ ইতি পঠন্তি; তথাপাঠে সবীজং ধান্যাম্লং বীজেন সহ কাঞ্জিকমিতি| অন্যে তু সুরাস্থানে তথেতি পঠন্তি| সবীজমপ্যত্র সৌবীরমিতি কেচিত্| প্রিযঙ্গুসরলেত্যাদি| সরলা শুক্লা ত্রিবৃত্, অনন্তা উত্পলসারিবা, কুটন্নটং তগরং; তত্র প্রিযঙ্গ্বাদিকল্কং চতুর্থাংশং, দধ্যাদিদ্রব্যৈশ্চতুর্ভিঃ প্রত্যেকং সমং তৈলং পচেদিতি ক্রমঃ||৩-৪||

পঞ্চমূলদ্বযক্বাথে ইতি পঞ্চমূলদ্বযক্বাথে দশমূলক্বাথে ত্রিগুণে, ক্ষীরে ঘৃতসমে, কাকোল্যাদিকল্কচতুর্থাংশং, খর্জূরীমজ্জচতুর্থাংশং বা ঘৃতং পানার্থং পচেদিত্যর্থঃ||৫||

বচামিত্যাদি| বযঃস্থা গুডূচী, ব্রাহ্মীত্যন্যে, গোলোমী দূর্বা, জটিলা মাংসী| উত্সাদনম্ উদ্বর্তনম্||৬||

সিদ্ধার্থকেত্যাদি| অক্ষতা যবাঃ||৭||

মর্কটেত্যাদি| মর্কটাদিপুরীষেণ রাত্রৌ সুপ্তে লোকে বালস্য ধূপনম্||৮||

তিলেত্যাদি| বিবিধান্ স্বস্তিকমোদকাদীন্| কুমারপিতৃমেষাযেতি কুমারাণাং পিতা রক্ষণাত্মকত্বাত্, মেষো নৈগমেষঃ, তস্মৈ নৈগমেষায| বৃক্ষমূলে ক্ষীরবৃক্ষমূলে| নিবেদযেত্তিলাদিকং বলিম্||৯||

রক্ষামাহ- অধস্তাদিত্যাদি| স্নপনং গাযত্র্যভিমন্ত্রিতাভিরদ্ভিঃ| বলিমপি তিলতণ্ডুলমিত্যাদিকং বটমূলে ষষ্ঠ্যাং নিবেদযেত্||১০-১১||

ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযামুত্তরতন্ত্রান্তর্গতে কৌমারভৃত্যতন্ত্রে নৈগমেষপ্রতিষেধাধ্যাযঃ ষট্ত্রিংশত্তমঃ||৩৬||