৬৬. দোষভেদবিকল্পাধ্যাযঃ

তন্ত্রযুত্তযনন্তরং পরিশিষ্টত্বাদ্দোষভেদাধ্যাযারম্ভঃ- অথাত ইত্যাদি| অথেত্যাদিকং পূর্ববহ্যাখ্যেযম্| ধাতূন্ দূষযন্তীতি দোষা বাতাদযঃ, তেষাং ভেদঃ পৃথক্সংসর্গসন্নিপাতভেদেন, তস্য বিকল্পনমেকৈকদ্যনুগমনেন নানাত্বকরণং প্রপঞ্চনং দোষভেদবিকল্পঃ, তমধিকৃত্য কৃতঃ, তম্||১-২||

অষ্টাঙ্গেত্যাদি| অষ্টাঙ্গানি শল্যাদীনি বাজীকরণান্তানি, তান্যেব বেদ আযুর্বেদঃ, তেন তত্র বা বিদ্বান্ যস্তম্| মহৌজসং মহাপ্রভাবম্| সূক্ষ্মা লীনার্থাঃ , অগাধা দুরবগাহা যে আগমা এবোদধযস্তে সন্ত্যস্মিন্নিতি| শ্রীমানিতি রাজশ্রিযা ব্রাহ্বযা বা অলঙ্কৃতঃ| ননু, বিশ্বামিত্রো গাধিরাজঃ, তত্সুতত্বেন রাজশ্রিযা যোগো যুক্তঃ, কথং ব্রাহ্ম্যা শ্রিযেতি? সত্যং, বিশ্বামিত্রস্য ব্রাহ্মণ্যং তপসা, ততো ব্রাহ্ম্যা শ্রিযা যোগো যুক্ত এব| অন্যে তু ক্ষত্রিযাণাং ব্রহ্মর্ষিজাতত্বেনোভযযোগ ইতি মন্যন্তে, অপরে তু বিদ্যাসমাপ্ত্যা ব্রাহ্মযা শ্রিযা যোগ ইতি মন্যন্তে| তথা চোক্তম্- “বিদ্যাসমাপ্তৌ ব্রাহ্মং বা সত্ত্বমার্ষমথাপি বা| ধ্রুবমাবিশতি জ্ঞানাত্তস্মাদ্বৈদ্যো দ্বিজঃ স্মৃতঃ”- ইতি||৩||-

দ্বিষষ্টিরিত্যাদি| পুরস্তাত্পরিকীর্তিতাঃ ইতি রসভেদবিকল্পে| কুতো দ্বিষষ্টির্দোষভেদাস্ত্রিষষ্টী রসভেদা ইতি? উচ্যতে- ‘দ্বিষষ্টির্দোষভেদাঃ স্যূ রসভেদাস্ত্রিষষ্টিধা| স্বাস্থ্যং ত্রিষষ্টং বিজ্ঞেযং তত্র ষড্রসযোজনম্’- ইতি| কতি তত্রৈকশো জ্ঞেযা দ্বিশো বাঽপ্যথবা ত্রিশ ইত্যাহ- ‘একশঃ ষট্ দ্বিশস্ত্বেকবিংশতিশ্চতুরন্বিতা| ত্রিশো দ্বাত্রিংশদিত্যেবং ত্রযো দোষাস্ত্রিষষ্টিধা’- ইত||৪||-

শিষ্যপ্রশ্নমাকর্ণ্য গুরুরাহ- তস্যেত্যাদি| তস্যেতি সুশ্রুতস্য| তত্ ইতি পূর্বোক্তম্| সংশযচ্ছিদিতি সন্দেহচ্ছেত্তা| প্রীতাত্মা তৃপ্তান্তঃকরণঃ| নৃপশার্দূলো রাজসত্তমঃ| তত্ত্বত ইতি যথার্থভাবেন||৫||-

কিমাহ ভগবানিত্যাহ- ত্রয ইত্যাদি| ত্রযো দোষা বাতাদযঃ, ধাতবঃ সপ্ত রসাদযঃ| অব্যাপন্না অবিকৃতিঙ্গতাঃ| রসৈর্হিতৈরিতি মধুরাদিরসৈঃ পথ্যৈরিত্যর্থঃ| ননু, যথাপ্রশ্নং প্রত্যুত্তরে বাচ্যে কিমর্থং কতি তত্রৈকশ ইত্যাদিপ্রশ্নস্যোত্তরার্থে ত্রযো দোষা ইত্যাদ্যভিধানম্? উচ্যতে- ধাতূনাং মলানাং চ দোষসংসর্গে দোষব্যপদেশ ইত্যাদিপ্রতিপাদনার্থং; অত এবাসৃজা সহ পুরা পঞ্চদশ প্রসরা অভিহিতাঃ| যদ্যেবং তর্হি মাংসাদিভিঃ সহ প্রসরঃ কুতো ন কীর্তিতঃ? উচ্যতে- অসঙ্খ্যেযত্বাত্| অথ কথং তদধিগন্তব্যমিতি চেত্, দোষলিঙ্গেনৈব| তথা চাত্র বক্ষ্যতি- তস্মাত্ প্রসঙ্গং সংযম্যেত্যাদি| ননু, দোষধাতুমলমূলং হি শরীরমিত্যনেনৈব দোষাদিকার্যত্বমভিহিতং; ন চ শরীরাদ্দেহো ভিন্নার্থঃ, তযোঃ পর্যাযশব্দত্বাত্; তত্কথং পুনরুচ্যতে- এতে দেহং ধারযন্তীতি? উচ্যতে- দেহশব্দেনাত্র কর্মপুরুষস্য চিকিত্সাধিকৃতস্য বিবক্ষিতত্বাত্||৬||-

কীদৃশঃ পুনরযং দেহশব্দাভিঘেযঃ কর্মপুরুষ ইতি পূর্বপ্রতিপাদিতস্যৈব কর্মপুরুষস্য স্বরূপং বাচ্যং, তত্প্রসঙ্গেনাপরমপি প্রাণাদিকং যত্তত্প্রতিপাদযিতুং সুখস্মরণার্থং প্রতিপাদযতি- পুরুষ ইত্যাদি| অত্রৈকে কলাশব্দেন পঞ্চভূতানি একাদশেন্দ্রিযাণীতি ষোডশবিকারা ইতি ব্যাচক্ষতে, পরমেতন্নাযুর্বেদে প্রমাণীকৃতম্| অন্যে তু কলাশব্দমঙ্গপ্রত্যঙ্গেষ্বামনন্তি- শিরোগ্রীবাপাণিপাদপার্শ্বপৃষ্ঠোদরাংসীত্যষ্টাঙ্গানি, চিবুকনাসৌষ্ঠবঙ্ক্ষণাঙ্গুষ্ঠাঙ্গুলিপার্ষ্ণিগুল্ফাঃ প্রত্যঙ্গানীতি| স্বতন্ত্রপরতন্ত্রাভিপ্রাযানুবর্তিভিরাচার্যৈঃ কলাশব্দো গুণবাচী পঠিতঃ| তে চ সর্বভূতচিন্তাশারীরোক্তসুখদুঃখেচ্ছোদ্বেগপ্রযত্নাদীন্ ষোডশগুণানাচক্ষতে | চতুষ্পাদং ষোডশকলং ভেষজং চরকাচার্যেণোক্তং; তত্র ষোডশকলং ষোডশগুণমিতি ব্যাখ্যানযন্তি| প্রাণাশ্চৈকাদশেতি অগ্নিঃ সোমো বাযুঃ সত্ত্বং রজস্তমঃ পঞ্চেন্দ্রিযাণি ভূতাত্মেতি প্রাণাঃ| যোঽসৌ ভূতাত্মা স এব ষোডশকলঃ, সংযোগিন এব প্রাণব্যপদেশভাজঃ, ইত্যেকাদশত্বম্| রোগাণাং তু সহস্রং যচ্ছতং বিংশতিরেব চেতি বিশত্যধিকৈকাদশশতানি রোগাণাম্| অত্র সৌশ্রুতে তন্ত্রে ষট্স্থানেষু প্রোক্তা রোগাঃ শ্লোকৈরভিধীযন্তে|- ‘হীনাতিদগ্ধৈঃ ক্ষারেণ, ত্রযঃ প্লুষ্টাদযোঽগ্নিনা| চতুর্থো ধূমবিহতঃ পঞ্চ শোণিতদুষ্টযঃ||১|| দোষধাতুমলাদীনাং দ্বাত্রিংশত্ ক্ষযবৃদ্ধিতঃ| দ্বে স্থৌল্যকার্শ্যে ত্রিবিধো বিস্রংসাদ্যো বলক্ষযঃ||২|| ষট্ শোফাঃ ষড্ ব্রণা বহ্নিত্রিতযং বিষমাদিকম্| আমং বিদগ্ধং বিষ্টব্ধমজীর্ণং চ তথা ত্রিধা||৩|| ইতি ষট্ষষ্টিরাতঙ্কাঃ সূত্রস্থানে নিদর্শিতাঃ| আমপক্বাশযে শ্রোত্রে তথেন্দ্রিযচতুষ্টযে||৪|| ত্বগামিষসিরাস্নাযুসন্ধ্যস্থিমজ্জসম্ভবাঃ | শুক্রে চৈকাঙ্গসর্বাঙ্গগতাঃ সপ্তাধিকা দশ||৫|| ত্রযোদশাবৃতৈরন্যৈর্দোষৈঃ স্যুর্মারুতৈঃ খলু| চতুর্বিধং বাতরক্তমাক্ষেপশ্চাপতানকঃ| পক্ষাঘাতোঽপতন্ত্রশ্চ মন্যাস্তম্ভোঽর্দিতস্তথা||৬|| গৃধ্রসী সহ বিশ্বাচ্যা শিরঃ ক্রোষ্টুকপূর্বকম্| খঞ্জঃ পঙ্গুঃ কলাযাখ্যঃ কণ্টকঃ পাদদাহকৃত্||৭|| পাদহর্ষোঽববাহুশ্চ মূকমিন্মিণগদ্গদাঃ| তূন্যাধ্মানদ্বযেঽষ্ঠীলাদ্বযমর্শাংসি ষট্ তথা||৮|| চর্মকীলশ্চতস্রশ্চাশ্মর্যঃ পঞ্চ ভগন্দরাঃ| তথাঽষ্টাদশ কুষ্ঠানি কিলাসানি পুনস্ত্রিধা||৯|| প্রমেহা বিসংহতিঃ প্রোক্তাঃ পিডিকা নব তত্কৃতাঃ| উদরাণি তথাঽষ্টৌ চ মূঢগর্ভস্তথাঽষ্টধা||১০|| বাহ্যা বিদ্রধযঃ ষট্ স্যুস্তথাঽন্তঃস্থাঃ স্মৃতা দশ| বিসর্পনাডীস্তনজাস্তথৈব পঞ্চ পঞ্চ চ||১১|| গ্রন্থযঃ সপ্ত চৈকা স্যাদপচী সপ্তধাঽর্বুদম্| গলগণ্ডাস্ত্রযঃ সপ্ত বৃদ্ধযঃ পরিকীর্তিতাঃ||১২|| উপদংশা মতাঃ পঞ্চ শ্লীপদং চ তথা ত্রিধা| ভগ্না অষ্টাদশ জ্ঞেযাঃ শূকদোষাস্তথৈব চ| চত্বারিংশত্তথাঽষ্টৌ চ ক্ষুদ্ররোগাঃ প্রকীর্তিতাঃ||১৩|| অষ্টাবোষ্ঠভবা দন্তমূলেষু দশ পঞ্চ চ||১৪|| অষ্টৌ দন্তেষু জিহ্বাযাং পঞ্চ তালুগতা নব| কণ্ঠে চাষ্টাদশ জ্ঞেযাশ্চতুঃসর্বসরা গদাঃ||১৫|| এবং মুখে সপ্তষষ্টিরিতি স্থানে দ্বিতীযকে| দ্বাচত্বারিংশদধিকা ত্রিশতী পরিকীর্তিতা||১৬|| অষ্টৌ শুক্রগতা রোগা অষ্টাবার্তবদুষ্টযঃ| চত্বারোঽসৃগ্দরাঃ প্রোক্তা অপাতস্ত্বপরাকৃতঃ||১৭|| মক্কল্ললীনশোষাশ্চ নৈগমেশাহৃতস্তথা| নাগোদরঃ স্রুতির্গর্ভে শারীরে সপ্তবিংশতিঃ||১৮|| অথ মেদোনিলাবেগাচ্ছ্বযথুঃ সরুজশ্চ যঃ| আঢ্যবাতঃ সর্বসরাঃ শোফাঃ পঞ্চ প্রকীর্তিতাঃ| কর্ণপাল্যামযাঃ পঞ্চ ক্লৈব্যমুক্তং চতুর্বিধম্ ||১৯|| বান্তরেচিতযোঃ প্রোক্তা ব্যাপদো দশ পঞ্চ চ| ষণ্নেত্রপ্রণিধানস্য নেত্রস্যৈকাদশৈব তু||২০|| পঞ্চ বস্তিকৃতাস্তত্র চত্বারঃ পীডনে কৃতাঃ| একাদশ দ্রব্যকৃতাঃ সপ্ত শয্যাকৃতাস্তথা||২১|| চত্বারিংশচ্চতস্রশ্চ বৈদ্যতো ব্যাপদস্তথা| ক্রোধাযাসাদিকাঃ পঞ্চ দশ চাতুরহেতুকাঃ||২২|| স্নেহস্য কারণান্যষ্টাবপ্রত্যাগমকৃন্তি চ| ইতি নেত্রাদিদোষেণ ষষ্টিঃ সপ্ত সমাসতঃ||২৩|| এবং চিকিত্সিতস্থানে রুজোঽষ্টানবতিস্তথা| অন্নাদিরক্ষাবিজ্ঞানে বিংশতির্বিষহেতুকাঃ||২৪|| বেগাঃ স্যুঃ স্থাবরে দর্বীকরমণ্ডলিনাং বিষে| রাজিলবৈকরঞ্জানাং প্রত্যেকং সপ্ত সপ্ত চ||২৫|| মূষিকাস্তু দশাষ্টৌ চ সপ্ত বেগা অলর্কজাঃ| সপ্তষষ্টিশতং চাত্র কীটানাং বিষদাযিনাম্ ||২৬|| সপ্তচত্বারিংশদ্যুতং কল্পস্থানে শতদ্বযম্| নব সন্ধ্যাশ্রযাঃ প্রোক্তা বর্ত্মজাশ্চৈকবিংশতিঃ||২৭|| শুক্লভাগে দশৈকশ্চ চত্বারঃ কৃষ্ণভাগজাঃ| সর্বাশ্রযাঃ সপ্তদশ দৃষ্টিজা দ্বাদশৈব তু||২৮|| বাহ্যজৌ দ্বৌ নেত্ররোগাবিতি ষট্সপ্ততিঃ স্মৃতাঃ| কুকূণকঃ শিশোরেব কর্ণেঽষ্টাবিংশতির্নৃণাম্||২৯|| একত্রিংশদ্ঘ্রাণগতাঃ সপ্রতিশ্যাযপঞ্চকাঃ| একাদশ শিরোরোগাঃ পরং শালাক্যসঞ্জ্ঞিতে||৩০|| আতঙ্কানাং শতং প্রোক্তং ষট্চত্বারিংশতা যুতম্| নব বালগ্রহা যোনিব্যাপদো বিংশতিঃ স্ত্রিযাঃ||৩১|| এবং কুমারতন্ত্রেঽস্মিন্নেকোনত্রিংশদামযাঃ| অষ্টৌ জ্বরা হ্যতীসারাঃ ষট্ চতস্রঃ প্রবাহিকাঃ||৩২|| চত্বারো গ্রহণীদোষা যক্ষ্মৈকো গুল্মপঞ্চকম্| হৃদ্রোগাঃ পঞ্চ চত্বারঃ পাণ্ড্বাখ্যাঃ কামলাদ্বযম্||৩৩|| হলীমকঃ পানকী চ রক্তপিতং চতুর্বিধম্| ষট্প্রকারা মতা মূর্চ্ছা বিকারাঃ সপ্ত মদ্যজাঃ||৩৪|| দাহাঃ পঞ্চ তৃষঃ সপ্ত ছর্দযঃ পঞ্চ দেহিনাম্| হিক্কাঃ শ্বাসাস্তথা কাসাঃ প্রত্যেকং পঞ্চ পঞ্চ চ||৩৫|| স্বরভেদাস্তথা ষট্ স্যুর্বিশতিঃ কৃমিজাতযঃ| নবোদাবর্তকা দৃষ্টা বিসূচ্যস্তিস্র এব চ||৩৬|| আনাহৌ দ্বাবামবিট্কৌ তথাঽরোচকপঞ্চকম্| মূত্রাঘাতা দ্বাদশ স্যুরিতি কাযচিকিত্সিতে||৩৭|| আমযানাং শতং প্রোক্তং চত্বারিংশচ্চ সপ্ত চ| দেবতা-দৈত্য-গন্ধর্ব-যক্ষ-পিত্র-হি-রক্ষসাম্||৩৮|| পিশচস্যাভিষঙ্গেণ গদাশ্চাষ্টৌ প্রকীর্তিতাঃ| অপস্মারাশ্চ চত্বার উন্মাদাঃ ষডুদীরিতাঃ||৩৯|| অষ্টাদশগদা ভূতবিদ্যাযাং সূক্ষ্মদর্শিভিঃ| এবং হি সৌশ্রুতে তন্ত্রে কাশীরাজেন কীর্তিতাঃ||৪০|| রোগাণাং তু সহস্রং যচ্ছতং বিংশতিরেব চ| ব্যাসতো বিস্তরতঃ| হিশব্দো হেত্বর্থে, যস্মাত্ কারণাত্||৭-৮||-

ভিন্না ইত্যাদি| ভিন্না ভেদঙ্গতা দ্বিষষ্টিধা ভবন্তীত্যর্থঃ| ত্রযো দোষা বাতপিত্তশ্লেষ্মাণঃ| গুণা গুণমযাঃ সত্ত্বরজস্তমোমযাঃ| তদ্যথা- রজোভূযিষ্ঠো মারুতঃ, রজো হি প্রবর্তকং সর্বভাবানাং; পিত্তং সত্ত্বোত্কটং, লঘুপ্রকাশকত্বাত্, রজোযুক্তং বেত্যেকে; কফঃ তমোবহুলঃ, গুরুপ্রাবরণাত্মকত্বাদিত্যাহুর্ভিষজঃ| যদ্যেবং তত্ কথং কফপ্রকৃতিকে পুংসি সত্ত্বগুণোপপন্নতা পঠিতা? উচ্যতে- গুণাদ্বিতযমপি কফে জ্ঞাতব্যং, ‘সত্ত্বতমোবহুলা আপঃ’ ইত্যুক্তত্বাত্||৯||

কথমেতে দ্বিষষ্টিধা ভবন্তীত্যাহ- ত্রয এবেত্যাদি| তত্র পৃথক্ প্রত্যেকং, দোষা বাতপিত্তশ্লেষ্মাণস্ত্রয এব, ইতরৌ চ দ্বৌ স্বস্থাবিতি জ্ঞেযৌ| বৃদ্ধো বাতঃ স্বস্থৌ পিত্তশ্লেষ্মাণৌ (১), বৃদ্ধং পিত্তং স্বস্থৌ বাতশ্লেষ্মাণৌ (২), বৃদ্ধঃ শ্লেষ্মা স্বস্থে বাতপিত্তে (৩), ইতি| দ্বিশো নব সমাধিকৈরিতি তত্র সমবৃদ্ধাভ্যাং দ্বাভ্যাং দোষাভ্যাং ত্রযঃ সংসর্গা ভবন্তি; যথা - বাতপিত্তে সমে বৃদ্ধে স্বস্থঃ শ্লেষ্মা (১), বাতশ্লেষ্মাণৌ সমৌ বৃদ্ধৌ স্বস্থং পিত্তং (২), পিত্তশ্লেষ্মাণৌ সমৌ বৃদ্ধৌ স্বস্থো বাতঃ (৩), ইতি| অন্যতরাধিকবৃদ্ধাভ্যাং ষট্ ; তদ্যথা- বাতপিত্তযোর্বৃদ্ধযোর্বাতোঽধিকো বৃদ্ধঃ স্বস্থঃ শ্লেষ্মা (১), বাতপিত্তযোর্বৃদ্ধযোঃ পিত্তমধিকবৃদ্ধং স্বস্থঃ শ্লেষ্মা (২), বাতশ্লেষ্মণোর্বৃদ্ধযোর্বাতোঽধিকবৃদ্ধঃ স্বস্থং পিত্তং (৩), বাতশ্লেষ্মণোর্বৃদ্ধযোঃ শ্লেষ্মাঽধিকবৃদ্ধঃ স্বস্থং পিত্তং (৪), পিত্তশ্লেষ্মণোর্বৃদ্ধযোঃ পিত্তমধিকং বৃদ্ধং স্বস্থো বাতঃ (৫), পিত্তশ্লেষ্মণোর্বৃদ্ধযোঃ শ্লেষ্মা অধিকবৃদ্ধঃ স্বস্থো বাতঃ (৬)| ত্রিশস্তু বৃদ্ধৈস্ত্রযোদশ; তত্র ত্রিভিরধিকৈরেকঃ অধিকৈকদোষাস্ত্রযঃ, অধিকদ্বিদোষাস্ত্রযঃ, সমমধ্যোল্বণদোষাঃ ষট্| তদ্যথা- বাতপিত্তশ্লেষ্মণাং বৃদ্ধানাং বাতোঽধিকবৃদ্ধঃ (১), বাতপিত্তশ্লেষ্মণাং বৃদ্ধানাং পিত্তমধিকবৃদ্ধং (২), বাতপিত্তশ্লেষ্মণাং বৃদ্ধানাং শ্লেষ্মাঽধিকবৃদ্ধঃ (৩)| অথাধিকদ্বিবৃদ্ধদোষাঃ; তদ্যথা- বাতপিত্তশ্লেষ্মণাং বৃদ্ধানাং বাতপিত্তে অধিকবৃদ্ধে (১), বাতপিত্তশ্লেষ্মাণাং বৃদ্ধানাং বাতশ্লেষ্মাণৌ অধিকবৃদ্ধৌ (২), বাতপিত্তশ্লেষ্মণাং বৃদ্ধানাং পিত্তশ্লেষ্মাণাবধিকবৃদ্ধৌ (৩)| ক্ষীণো বাতঃ স্বস্থৌ পিত্তশ্লেষ্মাণৌ (১), ক্ষীণং পিত্তং স্বস্থৌ বাতশ্লেষ্মাণৌ (২), ক্ষীণঃ শ্লেষ্মা স্বস্থে বাতপিতে (৩), এবং পৃথক্ ত্রয এব| অথ হীনমধ্যোল্বণবৃদ্ধাঃ ষডুচ্যন্তে, তত্র সমঃ সমবৃদ্ধো হীনবৃদ্ধ ইত্যর্থঃ; তদ্যথা- হীনবৃদ্ধো বাতঃ, মধ্যবৃদ্ধং পিত্তং, অধিকবৃদ্ধঃ শ্লেষ্মা (১); হীনবৃদ্ধো বাতঃ, মধ্যবৃদ্ধঃ শ্লেষ্মা, অধিকবৃদ্ধং পিত্তং (২); হীনবৃদ্ধং পিত্তং, অধিকবৃদ্ধো বাতঃ, মধ্যবৃদ্ধঃ শ্লেষ্মা (৩), মধ্যবৃদ্ধো বাতঃ, হীনবৃদ্ধং পিত্তং, অধিকবৃদ্ধোঃ শ্লেষ্মা (৪); হীনবৃদ্ধঃ শ্লেষ্মা, অধিকবৃদ্ধং পিত্তং, মধ্যবৃদ্ধো বাতঃ (৫); অধিকবৃদ্ধো বাতঃ, মধ্যবৃদ্ধং পিত্তং হীনবৃদ্ধঃ শ্লেষ্মা ৬| সর্বদোষৈঃ সমবৃদ্ধৈরেকঃ| উক্তং চ তন্ত্রান্তরে- ‘দ্ব্যুল্বণৈকোল্বণৈঃ ষট্ স্যুর্হীনমধ্যাধিকৈশ্চ ষট্| সমৈশ্চৈকো বিকারাস্তে সন্নিপাতাস্ত্রযোদশ”- ইতি| পঞ্চাশদিত্যাদি| এবমনেন প্রকারেণ ক্ষযমাগতৈঃ পঞ্চবিংশতিদোষভেদৈঃ সহ পঞ্চাশদ্ভবন্তি| তদ্যথা- বাতপিত্তকফৈরেকৈকৈঃ ক্ষীণৈস্ত্রযো ভেদা ভবন্তি, দ্বিশো নব প্রোচ্যন্তে| তদ্যথা- বাতপিত্তে সমক্ষীণে স্বস্থঃ শ্লেষ্মা (১), বাতশ্লেষ্মাণৌ সমক্ষীণৌ স্বস্থং পিত্তং (২), পিত্তশ্লেষ্মাণৌ সমহীনৌ স্বস্থে বাতঃ ৩| অধিকক্ষীণাঃ ষট্; তদ্যথা- বাতপিত্তযোঃ ক্ষীণযোর্বাতোঽধিকক্ষীণঃ স্বস্থঃ শ্লেষ্মা (১), বাতপিত্তযোঃ ক্ষীণযোঃ পিত্তমধিকক্ষীণং স্বস্থঃ শ্লেষ্মা (২), বাতশ্লেষ্মাণোঃ ক্ষীণযোর্বাতোঽধিকক্ষীণঃ স্বস্থং পিত্তং (৩), বাতশ্লেষ্মণোঃ ক্ষীণযোঃ শ্লেষ্মাঽধিকক্ষীণঃ স্বস্থং পিত্তং (৪), পিত্তশ্লেশ্মণোঃ ক্ষীণযোঃ পিত্তমধিকক্ষীণং স্বস্থো বাতঃ (৫), পিত্তশ্লেষ্মণোঃ ক্ষীণযোঃ শ্লেষ্মঽধিকক্ষীণঃ স্বস্থো বাতঃ (৬)| অথ ক্ষীণদোষত্রযভেদাস্ত্রযোদশ প্রোচ্যন্তে; তত্র- ত্রিভিরপি সমক্ষীণৈরেকঃ; অধিকৈকৈকক্ষীণৈশ্চ ত্রযঃ| যথা- বাতপিত্তশ্লেষ্মণাং ক্ষীণানাং বাতোঽধিকক্ষীণঃ (১), বাতপিত্তশ্লেষ্মণাং ক্ষীণানাং পিত্তমধিকক্ষীণং (২), বাতপিত্তশ্লেষ্মণাং ক্ষীণানাং শ্লেষ্মা অধিকক্ষীণঃ (৩)| অথাধিকক্ষীণদ্বিদোষাঃ; তদ্যথা- বাতপিত্তশ্লেষ্মণাং ক্ষীণানাং বাতপিত্তে অধিকক্ষীণে (১), বাতপিত্তশ্লেষ্মণাং ক্ষীণানাং বাতশ্লেষ্মণাবধিকক্ষীণৌ (২), বাতপিত্তশ্লেষ্মণাং ক্ষীণানাং পিত্তশ্লেষ্মাণাবধিকক্ষীণৌ (৩)| অথ হীনমধ্যোল্বণক্ষীণাঃ ষট্ প্রোচ্যন্তে; তদ্যথা,- হীনক্ষীণো বাতঃ, মধ্যক্ষীণং পিত্তং, অধিকক্ষীণঃ শ্লেষ্মা (১); মধ্যক্ষীণো বাতঃ, হীনক্ষীণং পিত্তং, অধিকক্ষীণঃ শ্লেষ্মা (২); অধিকক্ষীণো বাতঃ, মধ্যক্ষীণং পিত্তং হীনক্ষীণঃ শ্লেষ্মা (৩); হীনক্ষীণো বাতঃ, অধিকক্ষীণং পিত্তং মধ্যক্ষীণঃ শ্লেষ্মা (৪); অধিকক্ষীণো বাতঃ, হীনক্ষীণং পিত্তং, মধ্যক্ষীণঃ শ্লেষ্মা (৫); মধ্যক্ষীণো বাতঃ, অধিকক্ষীণং পিত্তং, হীনক্ষীণঃ শ্লেষ্মা (৬)| ক্ষীণেত্যাদি অত্র মধ্যশব্দেন স্বস্থোঽভিধীযতে, অধিকশব্দেন চ বৃদ্ধঃ| তত্র ক্ষীণমধ্যাধিকভেদেন ষট্| তদ্যথা- ক্ষীণো বাতঃ, স্বস্থং পিত্তং, বৃদ্ধঃ শ্লেষ্মা (১); ক্ষীণো বাতঃ, বৃদ্ধং পিত্তং, স্বস্থঃ শ্লেষ্মা (২); স্বস্থো বাতঃ, পিত্তম্ ক্ষীণং, বৃদ্ধঃ শ্লেষ্মা (৩); বৃদ্ধো বাতঃ, ক্ষীণং পিত্তং, স্বস্থঃ, শ্লেষ্মা (৪); স্বস্থো বাতঃ, পিত্তং বৃদ্ধং, ক্ষীণঃ শ্লেষ্মা (৫); বৃদ্ধো বাতঃ, স্বস্থং পিত্তং, ক্ষীণঃ শ্লেষ্মা (৬)| অথ দ্বিক্ষীণৈকবৃদ্ধাস্ত্রীনাহ- বাতপিত্তে ক্ষীণে বৃদ্ধঃ শ্লেষ্মা (১), বাতশ্লেষ্মাণৌ ক্ষীণৌ পিত্তং বৃদ্ধং (২), পিত্তশ্লেষ্মাণৌ ক্ষীণৌ বাতো বৃদ্ধঃ (৩)| অথ দ্বিবৃদ্ধৈকক্ষীণানাহ- বাতপিত্তে বৃদ্ধে ক্ষীণঃ শ্লেষ্মা (১), বাতশ্লেষ্মাণৌ বৃদ্ধৌ ক্ষীণং পিত্তং (২), পিত্তশ্লেষ্মাণৌ বৃদ্ধৌ ক্ষীণো বাতঃ (৩)| এবমনেন প্রকারেণ, সমাখ্যাতাঃ কথিতাঃ, ত্রযো দোষা বাতপিত্তশ্লেষ্মাণঃ| স্বস্থৈস্তু বাতপিত্তশ্লেষ্মভিঃ স্বাস্থ্যং ত্রিষষ্টমিতি অযমেবার্থঃ শ্লোকৈরুচ্যতে| তদ্যথা- পৃথগ্বৃদ্ধৈর্মরুত্পিত্তককৈর্ভেদত্রযং ভবেত্| সংসর্গে তু ভবত্যেষাং ভেদস্তুল্যাধিকেন চ||১|| বাতপিত্তে সমে বৃদ্ধে সমাবেবং মরুত্কফৌ| সমৌ পিত্তকফাবেবং স্যুস্ত্রযস্তুল্যবৃদ্ধিতঃ||২|| বৃদ্ধিঙ্গতে মরুত্পিত্তে পবনস্ত্বধিকস্তযোঃ| অন্যস্মিন্ পিত্তমধিকং বৃদ্ধযোর্বাতপিত্তযোঃ||৩|| বৃদ্ধৌ সমীরণকফাবেতযোরধিকোঽনিলঃ| অধিকে তু তযোরেব ভবেদ্ভেদান্তরং কফে||৪|| বৃদ্ধৌ পিত্তকফৌ তদ্বদেতযোঃ পিত্তমুত্কটম্|| বৃদ্ধযোরেতযোরেব বলাসস্ত্বধিকঃ পুনঃ||৫|| ইত্যেকাধিকসংসর্গদোষভেদা ভবন্তি ষট্| এবমেতৈঃ সমুদ্দিষ্টা ভেদাস্তুল্যাধিকৈর্নব||৬|| পূর্বৈঃ সহ ভবন্ত্যেবং বিকল্পা দ্বৌ তথা দশ| সন্নিপাতেষু জাযন্তে দোষভেদাস্ত্রযোদশ| একস্তত্র বিকল্পঃ স্যাদ্বৃদ্ধিম্প্রাপ্তৈঃ সমৈস্ত্রিভিঃ| বৃদ্ধিঙ্গতেষু সর্বেষু তেষু বৃদ্ধতমো মরুত্||৭|| পুনঃ পিত্তং পুনঃ শ্লেষ্মেত্যেকাধিকতমৈস্ত্রযঃ| প্রবৃদ্ধে বাতপিত্তে চ ভেদোঽন্যস্মিন্ বলাসতঃ||৮|| মরুত্কফৌ তথা পিত্তাদ্বাতঃ পিত্তকফাদপি| আধিক্যেন দ্বযোরেবং দোষভেদাস্ত্রযো মতাঃ||৯|| হীনমধ্যাধিকৈর্দোষৈর্বিকল্পাঃ সম্ভবন্তি ষট্| অন্যোন্যাপেক্ষযা তেষাং হীনবৃদ্ধঃ সমীরণঃ||১০|| মধ্যবৃদ্ধং তথা পিত্তং শ্লেষ্মা তত্রাধিকো মতঃ| মধ্যঃ সমীরণোঽন্যস্মিন্ হীনং পিত্তং কফোঽধিকঃ||১১|| মধ্যং পিত্তং মরুত্তীব্রঃ স্বল্পঃ শ্লেষ্মাঽপরত্র তু| মধ্যঃ শ্লেষ্মোল্বণং পিত্তং হীনো বাতস্তথা স্থিতঃ ||১২|| মধ্যঃ শ্লেষ্মোল্বণো বাযুঃ পিত্তং হীনং তথা স্থিতম্||১৩|| মধ্যবাতোঽধিকং পিত্তং হীনবৃদ্ধস্তথা কফঃ| এবমেতে ভবন্ত্যত্র সন্নিপাতাস্ত্রযোদশ||১৪|| পূর্বৈর্দ্বাদশভিঃ সার্ধং বিকল্পাঃ পঞ্চবিংশতিঃ| যথা বৃদ্ধৈস্তথা ক্ষীণৈর্দোষৈঃ স্যুঃ পঞ্চবিংশতিঃ ||১৫|| ক্ষীণস্বস্থাধিকৈরেভির্দোষভেদা ভবন্তি ষট্| ক্ষীণঃ সমীরণস্তত্র স্বস্থং পিত্তং কফোঽধিকঃ||১৬|| ক্ষীণো বাযুঃ কফঃ স্বস্থঃ পিত্তমত্রাধিকং তথা| ক্ষীণং পিত্তং মরুত্ স্বস্থো ভেদোঽন্যস্মিন্ বলী কফঃ||১৭|| ক্ষীণং পিত্তং কফঃ স্বস্থঃ প্রবৃদ্ধস্ত্বধিকো মরুত্| শ্লেষ্মা ক্ষীণোঽনিলঃ স্বস্থঃ পিত্তমত্র তথোল্বণম্||১৮|| কফঃ ক্ষীণঃ সমং পিত্তং প্রবৃদ্ধস্তু সমীরণঃ| ক্ষীণস্বস্থাধিকৈরেবং ভেদাঃ ষট্ পরিকীর্তিতা||১৯|| ক্ষযঙ্গতে মরুত্পিত্তে প্রাপ্তো বৃদ্ধিং তথা কফঃ| ক্ষীণৌ সমীরণকফৌ তথা স্যাত্ পিত্তমুত্কটম্||২০|| ক্ষীণৌ পিত্তকফৌ তদ্বন্নভস্বান্ স্যাত্তু বৃদ্ধিমান্| দ্বৌ ক্ষীণাবেকবৃদ্ধশ্চ ভেদত্রযমিতি স্মৃতম্||২১|| বাতপিত্তে গতে বৃদ্ধিং সম্প্রাপ্তশ্চ ক্ষযং কফঃ| বৃদ্ধৌ বাতকফৌ তদ্বত্ পিত্তং চাথ ক্ষযং গতম্||২২|| তদ্বত্ পিত্তকফৌ বৃদ্ধৌ প্রক্ষীণঃ পবনঃ পুনঃ| একক্ষীণদ্বিবৃদ্ধৈশ্চ ত্রযো ভেদা ভবন্ত্যমী||২৩|| ক্ষীণমধ্যাধিকৈস্ত্বেবং ভেদা দ্বাদশ কীর্তিতাঃ| প্রকৃতিস্থৈঃ সমীরাদ্যৈস্তথৈকঃ পরিকীর্তিতঃ||২৪|| ত্রিষষ্টির্দোষভেদানামিতি সম্যঙ্নিরূপিতা|| ইতি| এতেষাং বাতপিত্তশ্লেষ্মণাং বৃদ্ধক্ষীণানাং লক্ষণান্যুচ্যন্তে- তদ্যথা- বাতবৃদ্ধৌ বাগ্বাহুল্যং কার্শ্যং কার্ষ্ণ্যং গাত্রস্ফুরণমূষ্মকামিতা নিদ্রানাশোঽল্পবলত্বং গাঢবর্চস্ত্বং চেতি, পিত্তবৃদ্ধৌ পীতাবভাসতা সন্তাপঃ শীতকামিত্বমল্পনিদ্রতা মূর্চ্ছা বলহানিরিন্দ্রিযদৌর্বল্যং পীতবিণ্মূত্রনেত্রত্বং চেতি, শ্লেষ্মবৃদ্ধৌ শৌক্ল্যং শৈত্যং স্থৈর্যং গৌরবমবসাদস্তন্দ্রা নিদ্রা সন্ধ্যস্থিবিশ্লেষশ্চ| বাতক্ষযে মন্দচেষ্টতা অল্পবাক্ত্বমপ্রহর্ষো মূঢসঞ্জ্ঞতা চ, পিত্তক্ষযে মন্দোষ্মাগ্নিতা নিষ্প্রভতা চ, শ্লেষ্মক্ষযে রূক্ষতাঽন্তর্দাহ আমাশযেতরশ্লেষ্মাশযশিরসাং শূন্যতা সন্ধিশৈথিল্যং তৃষ্ণা দৌর্বল্যং চ| এবমেতৈর্লক্ষণৈঃ প্রকৃতিসমসমবেতানাং বৃদ্ধানাং ক্ষীণানাং চ বাতপিত্তশ্লেষ্মণামবগমো মিশ্রৈশ্চ লক্ষণৈঃ সংসর্গসন্নিপাতাবগম ইতি| ক্ষীণমধ্যাধিকদ্ব্যেকক্ষীণবৃদ্ধানাং কেষাঞ্চিল্লক্ষণানি লিখ্যন্তে| তদ্যথা- একো বৃদ্ধঃ সমশ্চৈকঃ ক্ষীণস্ত্বেকো যদা ভবেত্| ক্ষীণ একঃ প্রবৃদ্ধৌ দ্বৌ ক্ষীণৌ দ্বৌ বৃদ্ধিমাংস্তথা||২৫|| এক এব স্থিতস্তত্র ব্যক্তরূপেণ দেহিনি| প্রবৃদ্ধো মারুতঃ পিত্তং প্রকৃতিস্থং কফক্ষযে||২৬|| গৃহীত্বা স্থানতো যত্র যত্রাঙ্গেষু বিসর্পতি| তত্র তত্রাস্থিরো দাহঃ শ্রমঃ স্বেদো বলক্ষযঃ||২৭|| ক্ষীণে পিত্তে যদা বাযুর্বৃদ্ধাবস্থঃ সমং কফম্| বিকর্ষতি তদা শূলং শৈত্যমত্যন্তগৌরবম্||২৮|| বৃদ্ধং কফক্ষযে পিত্তং প্রকৃতিস্থং প্রভঞ্জনম্|| যদা রুণদ্ধ্যস্য তদা দাহঃ শূলঃ প্রজাযতে||২৯|| বৃদ্ধং বাতক্ষযে পিত্তং প্রকৃতিস্থং যদা কফম্| নিরুণদ্ধি তদা তস্য স্যুস্তন্দ্রাগৌরবজ্বরাঃ||৩০|| শ্লেষ্মা বৃদ্ধো যদা বাযুঃ সমঃ পিত্তপরিক্ষযে| নিরুণদ্ধি তদা তস্য গৌরবং শীতকজ্বরম্||৩১|| কফোঽনিলক্ষযে পিত্তং প্রকৃতিস্থং যদা বলী| নিরুণদ্ধি তদা তস্য মৃদ্বগ্নিত্বং শিরোব্যথা||৩২|| প্রলাপো গুরুতা তন্দ্রা নিদ্রা স্যাত্তু সুহৃদ্রুজা| ষ্ঠীবনং পিত্তকফযোর্নখাদীনাং চ পীততা||৩৩|| কফঃ পিত্তেন সংযুক্তো বলহানিং ভৃশং ক্ষযম্| করোত্যপাকমরুচিং গৌরবং গাত্রসাদতাম্||৩৪|| মারুতেন যুতঃ শ্লেষ্মা হীনপিত্তঃ সমাচরন্| করোতি মৃদুতাং বহ্নের্ভক্তে নান্নাভিলাষিতাম্||৩৫|| বেপনং গৌরবং স্তম্ভশৈত্যতোদাংস্তথাঽচিরাত্| শুক্লত্বং চ নখাদীনাং পারুষ্যং বপুষোঽপি চ||৩৬|| কুপিতৌ পিত্তপবনৌ পরিক্ষীণকফে যদা| উদ্বেষ্টনং শ্রমং তোদং কুরুতে স্ফোটনং তথা||৩৭|| তথাঽঙ্গমর্দদাহৌ চ চোষং দূযনধূপনে| শ্লেষ্মাঽপিধত্তে স্রোতাংসি যদা পিত্তানিলক্ষযে||৩৮|| চেষ্টানাশং তদা কুর্যান্মূর্চ্ছাং বাগ্ভঙ্গমেব চ| দেহৌজঃ স্রংসযত্ পিত্তং বাতশ্লেষ্মক্ষ্যে তৃষাম্||৩৯|| কুর্যাদিন্দ্রিযদৌর্বল্যং মূর্চ্ছাং গ্লানিং ক্রিযাক্ষযম্| মর্মাণি পীডযন্ বাযুঃ শ্লেষ্মপিত্তপরিক্ষযে||৪০|| সঞ্জ্ঞাপ্রণাশং কুরুতে প্রকম্পং বিদধাতি চ| দর্শযন্তি প্রবৃদ্ধাঃ স্বং লিঙ্গং দোষা হি কেবলম্||৪১|| ক্ষীণা জহতি লিঙ্গ স্বং সমাঃ স্বং কর্ম কুর্বতে| সমং রক্ষঞ্জযন্ বৃদ্ধং ক্ষীণং দোষং চ বর্ধযন্||৪২|| বিধিনাঽনেন বিষমং সন্নিপাতং জযেদ্ভিষক্| ইতি||১০-১১||-

ধাতুভিরসৃগাদিভির্মিশ্রা মলৈশ্চাসঙ্খ্যেযতাং যান্তি| তত্র বাতস্য ধাতুমলমিশ্রস্য লক্ষণং বাতব্যাধিনিদানে প্রোক্তম্| পিত্তশ্লেষ্মণোস্তু বৃদ্ধবাগ্ভটঃ প্রাহ- পিত্তং ত্বচি স্থিতং কুর্যাদ্বিস্ফোটকমসূরিকাঃ| রক্তে বিসর্পং দাহং চ মাংসে মাংসাবকোথনম্||১|| সদাহান্ মেদসি গ্রন্থীন্ স্বেদতৃড্বমনং ভৃশম্| অস্থিদাহং ভৃশং মজ্জ্ঞি হারিদ্রনখনেত্রতাম্||২|| পূতিপীতাবভাসং চ শুক্রং শুক্রসমাশ্রিতম্| সিরাগতং ক্রোধনতাং প্রলাপং স্নাযুগং তৃষাম্||৩|| কোষ্ঠগং মদতৃড্দাহান্ ব্যাপিনোঽন্যাংশ্চ যক্ষ্মণঃ| শ্লেষ্মা ত্বচি স্থিতঃ কুর্যাত্ স্তম্ভং শ্বেতাবভাসতাম্||৪|| পাণ্ড্বামযং শোণিতগো মাংসস্থশ্চার্বুদাপচীঃ| আর্দ্রচর্মাবনদ্ধাভগাত্রতাং ত্বচি গৌরবম্||৫|| মেদোগঃ স্থূলতাং মেহমস্থ্নাং স্তব্ধত্বমস্থিগঃ| মজ্জগঃ শুক্লনেত্রত্বং শুক্রস্থঃ শুক্রসঞ্চযম্||৬|| বিবন্ধং গৌরবং চাতি সিরাস্থঃ স্তব্ধগাত্রতাম্ স্নাযুগঃ সন্ধিশূনত্বং কোষ্ঠগো জঠরোন্নতিম্||৭|| অরোচকাবিপাকৌ চ তাংস্তাংশ্চ কফজান্ গদান্| বিণ্মূত্রযোঃ সাশ্রযযোস্তত্র তত্রোপদিশ্যতে||৮|| উপতাপোপঘাতৌ চ স্বাশ্রযেন্দ্রিযগৈর্মলৈঃ ||ইতি ||১২-১৪||

নিবন্ধান্ বহুশো বীক্ষ্য বৈদ্যঃ শ্রীভরতাত্মজঃ| উত্তরস্থানমকরোত্ সুস্পষ্টং ডল্হণো ভিষক্||১৫-১৭||

ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযামুত্তরতন্ত্রে ষট্ষষ্টিতমোঽধ্যাযঃ||৬৬||