Adhikarana ১ (১-২) · Śloka ২
অথাতঃ সিরাব্যধবিধিং শারীরং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২||
अथातः सिराव्यधविधिं शारीरं व्याख्यास्यामः ||१|| यथोवाच भगवान् धन्वन्तरिः ||२||
🔊 Audio coming soon
সিরাবর্ণবিভক্ত্যনন্তরং জ্ঞাতব্যধ্যাব্যধ্যসিরস্য সিরাব্যধবিধির্যুজ্যত ইত্যাহ- অথাত ইত্যাদি||১-২||
Adhikarana ২ (৩) · Śloka ৩
বালস্থবিররূক্ষক্ষতক্ষীণভীরুপরিশ্রান্তমদ্যপাধ্বস্ত্রীকর্শিতবমিতবিরিক্তাস্থাপিতানুবাসিতজাগরিতক্লীবকৃশগর্ভিণীনাং কাসশ্বাসশোষপ্রবৃদ্ধজ্বরাক্ষেপকপক্ষাঘাতোপবাসপিপাসামূর্চ্ছাপ্রপীডিতানাং চ সিরাং ন বিধ্যেত্ , যাশ্চাব্যধ্যাঃ, ব্যধ্যাশ্চাদৃষ্টাঃ, দৃষ্টাশ্চাযন্ত্রিতাঃ, যন্ত্রিতাশ্চানুত্থিতা ইতি ||৩||
बालस्थविररूक्षक्षतक्षीणभीरुपरिश्रान्तमद्यपाध्वस्त्रीकर्शितवमितविरिक्तास्थापितानुवासितजागरितक्लीबकृशगर्भिणीनां कासश्वासशोषप्रवृद्धज्वराक्षेपकपक्षाघातोपवासपिपासामूर्च्छाप्रपीडितानां च सिरां न विध्येत् , याश्चाव्यध्याः, व्यध्याश्चादृष्टाः, दृष्टाश्चायन्त्रिताः, यन्त्रिताश्चानुत्थिता इति ||३||
🔊 Audio coming soon
বালেত্যাদি|- বালস্থবিরযোরসম্পূর্ণক্ষীণধাতুত্বাত্ সিরাং ন বিধ্যেত্| রূক্ষক্ষতক্ষীণানাং বাতপ্রকোপভযাত্ সিরাং ন বিধ্যেত্; ক্ষত ইতি উরঃক্ষতযুক্তঃ খড্গাদ্যভিহতো বা, ক্ষীণঃ ক্ষীণধাতুঃ; গযী তু “ক্ষতেন ক্ষীণঃ ক্ষতক্ষীণস্তস্যানিলব্যাধিভযান্ন বিধ্যেত্” ইতি ব্যাখ্যাতি| ভীরোশ্চ তমোবহুলত্বাল্লোহিতদর্শনেন মূর্চ্ছাভযান্ন বিধ্যেত্| পরিশ্রান্তস্য শ্রমকুপিতো বাতঃ শোণিতাবসেচনেনাতিপ্রাবল্যং প্রাপ্য শরীরব্যাপাদকঃ স্যাত্| মদ্যপস্য মদবিক্ষিপ্তচিত্তস্যাতিমূর্চ্ছাকরত্বাত্| অধ্বস্ত্রীকর্শিতস্য বাতপ্রকোপভযান্ন বিধ্যেত্| বান্তবিরিক্তযোরকৃতসংসর্জনযোরপীতস্নেহযোর্বমনবিরেকানন্তরমেব বাতপ্রকোপভযাত্ সিরাং ন বিধ্যেত্| আস্থাপিতজাগরিতযোর্মরুত্প্রকোপভযান্ন বিধ্যেত্, অনুবাসিতস্য মন্দেঽগ্নৌ ভূযোঽগ্নিমান্দ্যভযাত্, ক্লীবস্য প্রধানধাতুক্ষযেণাল্পসত্ত্বত্বেন চ নিশ্চিতবিনাশাত্, কৃশস্য গর্ভিণীনাং চোপক্ষীণধাতুত্বাদ্দেহসন্দেহভযাত্, কাসশ্বাসশোষিণামপ্যপচীযমানধাতুত্বেন দেহসন্দেহভযান্ন বিধ্যেত্| প্রবৃদ্ধজ্বরস্যাসৃক্স্রাবেণ প্রলাপাদিভযাত্ সিরাং ন বিধ্যেত্| যাশ্চাব্যধ্যা ইতি অশেষাব্যধ্যপ্রসঙ্গেনোক্তমিতি ন পুনরুক্তম্||৩||
Adhikarana ৩ (৪) · Śloka ৪
শোণিতাবসেকসাধ্যাশ্চ যে বিকারাঃ প্রাগভিহিতাস্তেষু চাপক্বেষ্বন্যেষু চানুক্তেষু যথাভ্যাসং যথান্যাযং চ সিরাং বিধ্যেত্ ||৪||
शोणितावसेकसाध्याश्च ये विकाराः प्रागभिहितास्तेषु चापक्वेष्वन्येषु चानुक्तेषु यथाभ्यासं यथान्यायं च सिरां विध्येत् ||४||
🔊 Audio coming soon
শোণিতাবসেকসাধ্যা ইতি “ত্বগ্দোষা গ্রন্থযঃ শোফা” (সূ.১৪) ইত্যাদিনা শোণিতবর্ণনীযে উক্তাঃ| তেষু চাপক্বেষ্বিতি যদ্যপি রক্তাভাবাত্ পক্বানাং রক্তস্রুতির্ন ক্রিযত ইত্যর্থাদেবাপক্বগ্রহণং লভ্যতে, তথাঽপি বাহ্যোপক্রমেষু মধ্যে শোণিতাবসেকস্য প্রাধান্যখ্যাপনাযাপক্বগ্রহণং কৃতম্| অন্যেষু চানুক্তেষ্বিতি যে বিপাকাভিমুখাঃ শোণিতাবসেকসাধ্যেষ্বনভিহিতাস্তেষ্বিত্যর্থঃ| যথাভ্যাসমিতি যথাসমীপমিত্যর্থঃ| যথান্যাযমিতি ন্যাযস্য স্নেহস্বেদাদিকস্যানতিক্রমেণেতি যথান্যাযম্||৪||
Adhikarana ৪ (৫) · Śloka ৫
প্রতিষিদ্ধানামপি চ বিষোপসর্গে আত্যযিকে চ সিরাব্যধনমপ্রতিষিদ্ধম্ ||৫||
प्रतिषिद्धानामपि च विषोपसर्गे आत्ययिके च सिराव्यधनमप्रतिषिद्धम् ||५||
🔊 Audio coming soon
ইদানীং কারণবশান্নিষিদ্ধানামপি শোণিতাবসেকং দর্শযন্নাহ- প্রতিষিদ্ধানামিত্যাদি| প্রতিষিদ্ধানামপীতি বালস্থবিরাদীনাম্| আত্যযিকে ইতি অত্যযো বিনাশো ভবত্যস্মাদিত্যাত্যযিকো বিদ্রধ্যাদিরনন্যসাধ্যঃ||৫||
Adhikarana ৫ (৬) · Śloka ৬
তত্র স্নিগ্ধস্বিন্নমাতুরং যথাদোষপ্রত্যনীকং দ্রবপ্রাযমন্নং ভুক্তবন্তং যবাগূং পীতবন্তং বা যথাকালমুপস্থাপ্যাসীনং স্থিতং বা প্রাণানবাধমানো বস্ত্রপট্টচর্মান্তর্বল্কললতানামন্যতমেন যন্ত্রযিত্বা নাতিগাঢং নাতিশিথিলং শরীরপ্রদেশমাসাদ্য প্রাপ্তং শস্ত্রমাদায সিরাং বিধ্যেত্ ||৬||
तत्र स्निग्धस्विन्नमातुरं यथादोषप्रत्यनीकं द्रवप्रायमन्नं भुक्तवन्तं यवागूं पीतवन्तं वा यथाकालमुपस्थाप्यासीनं स्थितं वा प्राणानबाधमानो वस्त्रपट्टचर्मान्तर्वल्कललतानामन्यतमेन यन्त्रयित्वा नातिगाढं नातिशिथिलं शरीरप्रदेशमासाद्य प्राप्तं शस्त्रमादाय सिरां विध्येत् ||६||
🔊 Audio coming soon
তত্র সিরাব্যধস্য পূর্বকর্মবিধিং প্রদর্শ্য প্রধানকর্মবিধিং দর্শযন্নাহ- তত্রেত্যাদি| তত্রেতি বাক্যোপক্রমে| আতুরমিতি অত্রাতুরগ্রহণং স্বস্থস্য রক্তং ন স্রাবযেদিতি বোধনার্থম্| দ্রবপ্রাযমিতি রক্তোত্ক্লেশনার্থং দ্রবাধিকমন্নং ভুক্তবন্তম্| যবাগূং পীতবন্তং বেতি সাত্ম্যাপেক্ষযা| যথাকালমিতি বর্ষাদিষু ব্যভ্রাদিকালানতিক্রমেণ| উপস্থাপ্য সন্নিধানে স্থাপযিত্বা| আসীনম্ উপবিষ্টং, স্থিতম্ ঊর্ধ্বীভূতম্| নাতিগাঢং নাতিশিথিলমিতি নাতিগাঢমুত্তমাঙ্গে, নাতিশিথিলং শাখাসু| শরীরপ্রদেশমাসাদ্যেতি মর্মরহিতং শরীরপ্রদেশং গৃহীত্বেত্যর্থঃ| প্রাপ্তং শস্ত্রমিতি উপযুক্তং শস্ত্রমিত্যর্থঃ||৬||
Adhikarana ৬ (৭) · Śloka ৭
নৈবাতিশীতে নাত্যুষ্ণে ন প্রবাতে ন চাভ্রিতে | সিরাণাং ব্যধনং কার্যমরোগে বা কদাচন ||৭||
नैवातिशीते नात्युष्णे न प्रवाते न चाभ्रिते | सिराणां व्यधनं कार्यमरोगे वा कदाचन ||७||
🔊 Audio coming soon
নৈবেত্যাদি| অভ্রিত ইতি অভ্রাণি সঞ্জাতানি যত্র দিনে তদভ্রিতং দিনং, তস্মিন্নিত্যর্থঃ||৭||
Adhikarana ৭ (৮) · Śloka ৮
তত্র ব্যধ্যসিরং পুরুষং প্রত্যাদিত্যমুখমরত্নিমাত্রোচ্ছ্রিতে উপবেশ্যাসনে সক্থ্নোরাকুঞ্চিতযোর্নিবেশ্য কূর্পরে সন্ধিদ্বযস্যোপরি হস্তাবন্তর্গূঢাঙ্গুষ্ঠকৃতমুষ্টী মন্যযোঃ স্থাপযিত্বা যন্ত্রণশাটকং গ্রীবামুষ্ট্যোরুপরি পরিক্ষিপ্যান্যেন পুরুষেণ পশ্চাত্স্থিতেন বামহস্তেনোত্তানেন শাটকান্তদ্বযং গ্রাহযিত্বা ততো ব্রূযাত্- দক্ষিণহস্তেন সিরোত্থাপনার্থং নাত্যাযতশিথিলং যন্ত্রমাবেষ্টযেতি, অসৃক্স্রাবণার্থং চ যন্ত্রং পৃষ্ঠমধ্যে পীডযেতি, কর্মপুরুষং চ বাযুপূর্ণমুখং স্থাপযেত্ ; এষ উত্তমাঙ্গগতানামন্তর্মুখবর্জানাং সিরাণাং ব্যধনে যন্ত্রণবিধিঃ | পাদব্যধ্যসিরস্য পাদং সমে স্থানে সুস্থিতং স্থাপযিত্বাঽন্যং পাদমীষত্সঙ্কুচিতমুচ্চৈঃ কৃত্বা ব্যধ্যসিরং পাদং জানুসন্ধেরধঃ শাটকেনাবেষ্ট্য হস্তাভ্যাং প্রপীড্য গুল্ফং ব্যধ্যপ্রদেশস্যোপরি চতুরঙ্গুলে প্লোতাদীনামন্যতমেন বদ্ধ্বা বা পাদসিরাং বিধ্যেত্ | অথোপরিষ্ঠাদ্ধস্তৌ গূঢাঙ্গুষ্ঠকৃতমুষ্টী সম্যগাসনে স্থাপযিত্বা সুখোপবিষ্টস্য পূর্ববদ্যন্ত্রং বদ্ধ্বা হস্তসিরাং বিধ্যেত্ | গৃধ্রসীবিশ্বাচ্যোঃ সঙ্কুচিতজানুকূর্পরস্য | শ্রোণীপৃষ্ঠস্কন্ধেষূন্নামিতপৃষ্ঠস্যাবাক্শিরস্কস্যোপবিষ্টস্য | বিস্ফূর্জিতপৃষ্ঠস্য বিধ্যেত্ | উদরোরসোঃ প্রসারিতোরস্কস্যোন্নামিতশিরস্কস্য বিস্ফূর্জিতদেহস্য | বাহুভ্যামবলম্বমানদেহস্য পার্শ্বযোঃ | অনামিতমেঢ্রস্য মেঢ্রে | উন্নমিতবিদষ্টজিহ্বাগ্রস্যাধোজিহ্বাযাম্ | অতিব্যাত্তাননস্য তালুনি দন্তমূলেষু চ | এবং যন্ত্রোপাযানন্যাংশ্চ সিরোত্থাপনহেতূন্ বুদ্ধ্যাঽবেক্ষ্য শরীরবশেন ব্যাধিবশেন চ বিদধ্যাত্ ||৮||
तत्र व्यध्यसिरं पुरुषं प्रत्यादित्यमुखमरत्निमात्रोच्छ्रिते उपवेश्यासने सक्थ्नोराकुञ्चितयोर्निवेश्य कूर्परे सन्धिद्वयस्योपरि हस्तावन्तर्गूढाङ्गुष्ठकृतमुष्टी मन्ययोः स्थापयित्वा यन्त्रणशाटकं ग्रीवामुष्ट्योरुपरि परिक्षिप्यान्येन पुरुषेण पश्चात्स्थितेन वामहस्तेनोत्तानेन शाटकान्तद्वयं ग्राहयित्वा ततो ब्रूयात्- दक्षिणहस्तेन सिरोत्थापनार्थं नात्यायतशिथिलं यन्त्रमावेष्टयेति, असृक्स्रावणार्थं च यन्त्रं पृष्ठमध्ये पीडयेति, कर्मपुरुषं च वायुपूर्णमुखं स्थापयेत् ; एष उत्तमाङ्गगतानामन्तर्मुखवर्जानां सिराणां व्यधने यन्त्रणविधिः | पादव्यध्यसिरस्य पादं समे स्थाने सुस्थितं स्थापयित्वाऽन्यं पादमीषत्सङ्कुचितमुच्चैः कृत्वा व्यध्यसिरं पादं जानुसन्धेरधः शाटकेनावेष्ट्य हस्ताभ्यां प्रपीड्य गुल्फं व्यध्यप्रदेशस्योपरि चतुरङ्गुले प्लोतादीनामन्यतमेन बद्ध्वा वा पादसिरां विध्येत् | अथोपरिष्ठाद्धस्तौ गूढाङ्गुष्ठकृतमुष्टी सम्यगासने स्थापयित्वा सुखोपविष्टस्य पूर्ववद्यन्त्रं बद्ध्वा हस्तसिरां विध्येत् | गृध्रसीविश्वाच्योः सङ्कुचितजानुकूर्परस्य | श्रोणीपृष्ठस्कन्धेषून्नामितपृष्ठस्यावाक्शिरस्कस्योपविष्टस्य | विस्फूर्जितपृष्ठस्य विध्येत् | उदरोरसोः प्रसारितोरस्कस्योन्नामितशिरस्कस्य विस्फूर्जितदेहस्य | बाहुभ्यामवलम्बमानदेहस्य पार्श्वयोः | अनामितमेढ्रस्य मेढ्रे | उन्नमितविदष्टजिह्वाग्रस्याधोजिह्वायाम् | अतिव्यात्ताननस्य तालुनि दन्तमूलेषु च | एवं यन्त्रोपायानन्यांश्च सिरोत्थापनहेतून् बुद्ध्याऽवेक्ष्य शरीरवशेन व्याधिवशेन च विदध्यात् ||८||
🔊 Audio coming soon
ইদানীমুত্তমাঙ্গসক্থিপাণিদ্বযপৃষ্ঠোদরবক্ষোমেঢ্রজিহ্বাদিষু সিরাণাং যেন প্রকারেণোত্থাপনং তং দর্শযন্নাহ- তত্রেত্যাদি| অরত্নিমাত্রোচ্ছ্রিতে ইতি কনিষ্ঠাঙ্গুলিপ্রমিতহস্তমাত্রোচ্ছ্রিত ইত্যর্থঃ| সন্ধিদ্বযস্যোপরীতি জানুসন্ধিদ্বযস্যোপরি কূর্পরে নিবেশ্যেত্যর্থঃ| কর্মপুরুষমিতি যস্য সিরাব্যধনং কর্ম ক্রিযতে স কর্মপুরুষঃ| অন্তর্মুখবর্জানামিতি মুখান্তর্গতবর্জিতানামিত্যর্থঃ| তত্র পাদব্যধ্যেত্যাদি| প্লোতাদীনামিতি প্লোতং বস্ত্রম্, আদিশব্দাদ্বল্কলাদীনাং গ্রহণম্| অথোপরিষ্ঠাদিত্যাদি| পূর্ববদিতি ব্যধ্যপ্রদেশস্যোপরি চতুরঙ্গুল ইত্যর্থঃ| গৃধ্রসীত্যাদি গৃধ্রস্যাং সঙ্কুচিতজানোঃ, বিশ্বাচ্যাং সঙ্কুচিতকূর্পরস্য, সিরাং বিধ্যেদিতি পূর্ববাক্যাত্ সম্বধ্যতে| শ্রোণীপৃষ্ঠস্কন্ধেষ্বিতি সিরামিতি পূর্বতরবাক্যাত্ সম্বধ্যতে| কীদৃশস্য পুরুষস্যেত্যাশঙ্ক্য বিশেষণত্রযমাহ - উন্নামিতপৃষ্ঠস্যেত্যাদি| বিস্ফূর্জিতমাযামিতং পৃষ্ঠং যেন সঃ, তথা| উদরোরসোঃ প্রসারিতোরস্কস্যোন্নমিতশিরস্কস্য বিস্ফূর্জিতদেহস্য ‘সিরাং বিধ্যেত্’ ইতি শেষঃ| বিস্ফূর্জিতদেহস্যেতি আযামিতমধ্যশরীরস্যেত্যর্থঃ| অবনামিতমেঢ্রস্যেতি স্তব্ধমেবাবনামিতং মেঢ্রং যস্য স তথা, তস্য মেঢ্রে ‘সিরাং বিধ্যেত্’ ইতি শেষঃ| অনুক্তানামপি যন্ত্রণপ্রকারাণাং বুদ্ধ্যা বীক্ষণেন করণীযতাং দর্শযন্নাহ- এবমিত্যাদি||৮||
Adhikarana ৮ (৯) · Śloka ৯
মাংসলেষ্ববকাশেষু যবমাত্রং শস্ত্রং নিদধ্যাত্, অতোঽন্যথাঽর্ধযবমাত্রং ব্রীহিমাত্রং বা ব্রীহিমুখেন, অস্থ্নামুপরি কুঠারিকযা বিধ্যেদর্ধযবমাত্রম্ ||৯||
मांसलेष्ववकाशेषु यवमात्रं शस्त्रं निदध्यात्, अतोऽन्यथाऽर्धयवमात्रं व्रीहिमात्रं वा व्रीहिमुखेन, अस्थ्नामुपरि कुठारिकया विध्येदर्धयवमात्रम् ||९||
🔊 Audio coming soon
ইদানীং প্রদেশবিশেষেণ শস্ত্রপ্রণিধানপ্রমাণং শস্ত্রবিশেষং চ দর্শযন্নাহ- মাংসলেষ্বিত্যাদি| মাংসলেষু জঠরস্ফিগাদিষু, যবমাত্রং যবপ্রমাণম্| ব্রীহিরত্র প্রধানকল্পনযা শূকধান্যং, তত্রাপি রক্তশালিরেব||৯||
Adhikarana ৯ (১০) · Śloka ১০
ব্যভ্রে বর্ষাসু বিধ্যেত্তু গ্রীষ্মকালে তু শীতলে | হেমন্তকালে মধ্যাহ্নে শস্ত্রকালাস্ত্রযঃ স্মৃতাঃ ||১০||
व्यभ्रे वर्षासु विध्येत्तु ग्रीष्मकाले तु शीतले | हेमन्तकाले मध्याह्ने शस्त्रकालास्त्रयः स्मृताः ||१०||
🔊 Audio coming soon
নিত্যগস্য কালস্য শীতোষ্ণবর্ষাভেদেন ত্রিবিধত্বান্ত্রিষ্বপি কালেষু বিশেষমাহ- ব্যভ্রে ইত্যাদি| বিগতানি অভ্রাণি যস্মিন্ দিনে তদ্ ব্যভ্রং দিনং তস্মিন্ ব্যভ্রে দিনে, বর্ষাসু বর্ষাকালে, সিরাং বিধ্যেদিত্যর্থঃ| গ্রীষ্মকালে তু শীতলে ইতি তৃতীযপ্রহরানন্তরমিত্যর্থঃ| হেমন্তকাল ইতি হেমন্তগ্রহণং শীতকালোপলক্ষণম্| এতচ্চাত্যন্তিকব্যাধিবশেন, ন পুনঃ স্বস্থস্য; তস্য হি শরদাদিসাধারণ এবৈকঃ কাল ইতি||১০||
Adhikarana ১০ (১১) · Śloka ১১
সম্যক্শস্ত্রনিপাতেন ধারযা যা স্রবেদসৃক্ | মুহূর্তং রুদ্ধা তিষ্ঠেচ্চ সুবিদ্ধাং তাং বিনির্দিশেত্ ||১১||
सम्यक्शस्त्रनिपातेन धारया या स्रवेदसृक् | मुहूर्तं रुद्धा तिष्ठेच्च सुविद्धां तां विनिर्दिशेत् ||११||
🔊 Audio coming soon
সুবিদ্ধসিরালক্ষণমাহ- সম্যগিত্যাদি| মুহূর্তমিতি মুহূর্তশব্দঃ স্রবেদসৃগিত্যত্র চ সম্বধ্যতে||১১||
Adhikarana ১১ (১২) · Śloka ১২
যথা কুসুম্ভপুষ্পেভ্যঃ পূর্বং স্রবতি পীতিকা | তথা সিরাসু বিদ্ধাসু দুষ্টমগ্রে প্রবর্ততে ||১২||
यथा कुसुम्भपुष्पेभ्यः पूर्वं स्रवति पीतिका | तथा सिरासु विद्धासु दुष्टमग्रे प्रवर्तते ||१२||
🔊 Audio coming soon
ইদানীং সিরাযাং বিদ্ধাযাং সত্যাং পূর্বং দুষ্টমেব রক্তং প্রবর্তত ইতি দর্শযন্নাহ- যথেত্যাদি||১২||
Adhikarana ১২ (১৩) · Śloka ১৩
মূর্চ্ছিতস্যাতিভীতস্য শ্রান্তস্য তৃষিতস্য চ | ন বহন্তি সিরা বিদ্ধাস্তথাঽনুত্থিতযন্ত্রিতাঃ ||১৩||
मूर्च्छितस्यातिभीतस्य श्रान्तस्य तृषितस्य च | न वहन्ति सिरा विद्धास्तथाऽनुत्थितयन्त्रिताः ||१३||
🔊 Audio coming soon
সিরাণাং সম্যগ্বিদ্ধানামপ্যস্রবণে কারণং দর্শযন্নাহ- মূর্চ্ছিতস্যেত্যাদি| অতিভীতাদিষ্বতিভযাদিজনিতবাতেন সিরামুখনিরোধাত্, অনুত্থিতযন্ত্রিতানাং শোণিতস্য প্রবৃত্তাবভিমুখীভাবাভাবান্ন বহন্তীতি| যদ্যপি “মদমূর্চ্ছাশ্রমার্তানাং” (সূ.১৪) ইত্যাদিনা| সূত্রস্থানোদিতেনাযমর্থ উক্তস্তথাঽপি প্রকরণান্তরত্বান্ন পৌনরুক্ত্যম্||১৩||
Adhikarana ১৩ (১৪) · Śloka ১৪
ক্ষীণস্য বহুদোষস্য মূর্চ্ছযাঽভিহতস্য চ | ভূযোঽপরাহ্ণে বিস্রাব্যা সাঽপরেদ্যুস্ত্র্যহেঽপি বা ||১৪||
क्षीणस्य बहुदोषस्य मूर्च्छयाऽभिहतस्य च | भूयोऽपराह्णे विस्राव्या साऽपरेद्युस्त्र्यहेऽपि वा ||१४||
🔊 Audio coming soon
ক্ষীণস্যাবশ্যস্রাবণীযে শোণিতে ক্রমস্রাবণং দর্শযন্নাহ- ক্ষীণস্যেত্যাদি| মূর্চ্ছযাঽভিহিতস্যেতি অক্ষীণস্যাপীত্যর্থঃ||১৪||
Adhikarana ১৪ (১৫) · Śloka ১৫
রক্তং সশেষদোষং তু কুর্যাদপি বিচক্ষণঃ | ন চাতিনিঃস্রুতং কুর্যাচ্ছেষং সংশমনৈর্জযেত্ ||১৫||
रक्तं सशेषदोषं तु कुर्यादपि विचक्षणः | न चातिनिःस्रुतं कुर्याच्छेषं संशमनैर्जयेत् ||१५||
🔊 Audio coming soon
ক্ষীণেঽতিস্রাবণস্য বহুদোষকরত্বান্নিষেধং কুর্বন্নাহ- রক্তমিত্যাদি||১৫||
Adhikarana ১৫ (১৬) · Śloka ১৬
বলিনো বহুদোষস্য বযঃস্থস্য শরীরিণঃ | পরং প্রমাণমিচ্ছন্তি প্রস্থং শোণিতমোক্ষণে ||১৬||
बलिनो बहुदोषस्य वयःस्थस्य शरीरिणः | परं प्रमाणमिच्छन्ति प्रस्थं शोणितमोक्षणे ||१६||
🔊 Audio coming soon
প্রস্থং সার্ধত্রযোদশপলানি| তথা চোক্তং- “বমনে চ বিরেকে চ তথা শোণিতমোক্ষণে| সার্ধত্রযোদশপলং প্রস্থমাহুর্মনীষিণঃ”- ইতি||১৬||
Adhikarana ১৬ (১৭) · Śloka ১৭
তত্র পাদদাহপাদহর্ষচিপ্পবিসর্পবাতশোণিতবাতকণ্টকবিচর্চিকাপাদদারীপ্রভৃতিষু ক্ষিপ্রমর্মণ উপরিষ্ঠাদ্ দ্ব্যঙ্গুলে ব্রীহিমুখেন সিরাং বিধ্যেত্, শ্লীপদে তচ্চিকিত্সিতে যথা বক্ষ্যতে, ক্রোষ্টুকশিরঃ- খঞ্জপঙ্গুলবাতবেদনাসু জঙ্ঘাযাং গুল্ফস্যোপরি চতুরঙ্গুলে, অপচ্যামিন্দ্রবস্তেরধস্তাদ্ দ্ব্যঙ্গুলে, জানুসন্ধেরুপর্যধো বা চতুরঙ্গুলে গৃধ্রস্যাং, ঊরুমূলসংশ্রিতাং গলগণ্ডে, এতেনেতরসক্থি বাহূ চ ব্যাখ্যাতৌ; বিশেষতস্তু বামবাহৌ কূর্পরসন্ধেরভ্যন্তরতো বাহুমধ্যে প্লীহ্নি কনিষ্ঠিকানামিকযোর্মধ্যে বা, এবং দক্ষিণবাহৌ যকৃদ্দাল্যে (কফোদরে চ,) এতামেব চ কাসশ্বাসযোরপ্যাদিশন্তি, গৃধ্রস্যামিব বিশ্বাচ্যাং, শ্রোণিং প্রতি সমন্তাদ্ দ্ব্যঙ্গুলে প্রবাহিকাযাং শূলিন্যাং, পরিবর্তিকোপদংশশূকদোষশুক্রব্যাপত্সু মেঢ্রমধ্যে, (বৃষণযোঃ পার্শ্বে মূত্রবৃদ্ধ্যাং, নাভেরধশ্চতুরঙ্গুলে সেবন্যা বামপার্শ্বে দকোদরে ,) বামপার্শ্বে কক্ষাস্তনযোরন্তরেঽন্তর্বিদ্রধৌ পার্শ্বশূলে চ, বাহুশোষাববাহুকযোরপ্যেকে বদন্ত্যংসযোরন্তরে, ত্রিকসন্ধিমধ্যগতাং তৃতীযকে, অধঃস্কন্ধসন্ধিগতামন্যতরপার্শ্বসংস্থিতাং চতুর্থকে, হনুসন্ধিমধ্যগতামপস্মারে, শঙ্খকেশান্তসন্ধিগতামুরোঽপাঙ্গললাটেষু চোন্মাদে, জিহ্বারোগেষ্বধোজিহ্বাযাং দন্তব্যাধিষু চ, তালুনি তালব্যেষু, কর্ণযোরুপরি সমন্তাত্ কর্ণশূলে তদ্রোগেষু চ, গন্ধাগ্রহণে নাসারোগেষু চ নাসাগ্রে, তিমিরাক্ষিপাকপ্রভৃতিষ্বক্ষ্যামযেষূপনাসিকে লালাট্যামপাঙ্গ্যাং বা, এতা এব শিরোরোগাধিমন্থপ্রভৃতিষু রোগেষ্বিতি ||১৭||
तत्र पाददाहपादहर्षचिप्पविसर्पवातशोणितवातकण्टकविचर्चिकापाददारीप्रभृतिषु क्षिप्रमर्मण उपरिष्ठाद् द्व्यङ्गुले व्रीहिमुखेन सिरां विध्येत्, श्लीपदे तच्चिकित्सिते यथा वक्ष्यते, क्रोष्टुकशिरः- खञ्जपङ्गुलवातवेदनासु जङ्घायां गुल्फस्योपरि चतुरङ्गुले, अपच्यामिन्द्रबस्तेरधस्ताद् द्व्यङ्गुले, जानुसन्धेरुपर्यधो वा चतुरङ्गुले गृध्रस्यां, ऊरुमूलसंश्रितां गलगण्डे, एतेनेतरसक्थि बाहू च व्याख्यातौ; विशेषतस्तु वामबाहौ कूर्परसन्धेरभ्यन्तरतो बाहुमध्ये प्लीह्नि कनिष्ठिकानामिकयोर्मध्ये वा, एवं दक्षिणबाहौ यकृद्दाल्ये (कफोदरे च,) एतामेव च कासश्वासयोरप्यादिशन्ति, गृध्रस्यामिव विश्वाच्यां, श्रोणिं प्रति समन्ताद् द्व्यङ्गुले प्रवाहिकायां शूलिन्यां, परिवर्तिकोपदंशशूकदोषशुक्रव्यापत्सु मेढ्रमध्ये, (वृषणयोः पार्श्वे मूत्रवृद्ध्यां, नाभेरधश्चतुरङ्गुले सेवन्या वामपार्श्वे दकोदरे ,) वामपार्श्वे कक्षास्तनयोरन्तरेऽन्तर्विद्रधौ पार्श्वशूले च, बाहुशोषावबाहुकयोरप्येके वदन्त्यंसयोरन्तरे, त्रिकसन्धिमध्यगतां तृतीयके, अधःस्कन्धसन्धिगतामन्यतरपार्श्वसंस्थितां चतुर्थके, हनुसन्धिमध्यगतामपस्मारे, शङ्खकेशान्तसन्धिगतामुरोऽपाङ्गललाटेषु चोन्मादे, जिह्वारोगेष्वधोजिह्वायां दन्तव्याधिषु च, तालुनि तालव्येषु, कर्णयोरुपरि समन्तात् कर्णशूले तद्रोगेषु च, गन्धाग्रहणे नासारोगेषु च नासाग्रे, तिमिराक्षिपाकप्रभृतिष्वक्ष्यामयेषूपनासिके लालाट्यामपाङ्ग्यां वा, एता एव शिरोरोगाधिमन्थप्रभृतिषु रोगेष्विति ||१७||
🔊 Audio coming soon
ইদানীং নিযতদেহদেশগতরোগবিশেষেণ ব্যধ্যানাং সিরাণাং দেহদেশবিশেষং নিযমযন্নাহ- তত্রেত্যাদি| প্রভৃতিগ্রহণাদন্যেঽপি পাদরোগা রক্তানুবন্ধিদোষজাতা গৃহ্যন্তে| তচ্চিকিত্সিতে যথা বক্ষ্যত ইতি শ্লীপদচিকিত্সিতে যেন প্রকারেণ বক্ষ্যতে, তথা শ্লীপদে সিরাং বিধ্যেদিত্যর্থঃ| ক্রোষ্টুকশির ইত্যাদি| ক্রোষ্টুকশীর্ষাদিষু বাতবেদনাসু জঙ্ঘাযাং সিরাং বিধ্যেত্| তত্রাপি প্রদেশবিশেষজ্ঞানাযাহ- গুল্ফস্যোপরীত্যাদি| অপচ্যামিতি উত্পন্নমাত্রাযামিত্যর্থঃ, ন তু রূঢাযাং, তস্যাং “পার্ষ্ণিং প্রতি দ্বে দশ চাঙ্গুলানি” (চি.১৮) ইত্যাদিনা চিকিত্সিতস্যোক্তত্বাত্| এতেনেত্যাদি| যস্মাদ্ধস্তযোরপি দাহাদযো রোগা ভবন্ত্যতো বাহুগ্রহণং কৃতম্| কিং সর্বত্রৈব সক্থিবাহ্বোঃ সমানঃ সিরাব্যধ আহোস্বিত্ কুত্রচিদ্ভিন্ন ইতি দর্শযন্নাহ- বিশেষত ইত্যাদি| কূর্পরসন্ধেরিত্যত্র সন্ধিশব্দেন সন্ধিসমীপ উচ্যতে, সন্ধৌ শস্ত্রপ্রণিধানস্য নিষিদ্ধত্বাত্| যকৃদ্দাল্যে ইতি যকৃদ্দাল্যুদরস্য সর্বাবস্থাযামিত্যর্থঃ| এতামেব দক্ষিণবাহুমধ্যাশ্রিতামিত্যর্থঃ| কাসশ্বাসযোরিতি কফোত্যযোঃ কফাবৃতমারুতজন্যযোর্বা| গযী তু “কাসশ্বাসযোরল্পযোর্মার্গবিশুদ্ধ্যর্থং, নতূদ্রিক্তযোঃ, তত্র সিরাব্যধপ্রতিষেধস্য প্রাগেব প্রতিপাদিতত্বাত্” ইতি ব্যাখ্যাতি| গৃধ্রস্যামিব- বিশ্বাচ্যাং যথা গৃধ্রস্যাং জানুসন্ধেরুপর্যধো বা চতুরঙ্গুলে, এবং বিশ্বাচ্যাং কূর্পরসন্ধেরুপর্যধো বা চতুরঙ্গুল ইত্যর্থঃ| শ্রোণিমিত্যাদি| শূলিন্যামিতি কালেনানুবন্ধভূতরক্তাবৃতবাতকৃতশূলযুক্তাযামিত্যর্থঃ| পরিবর্তিকা “মর্দনাত্ পীডনাদ্বাযুঃ” (নি.১৩) ইত্যাদিপ্রোক্তলিঙ্গা| বৃষণযোরিত্যাদি| মূত্রবৃদ্ধ্যামিতি পরিপক্বাযামিত্যর্থঃ| সেবন্যা বামপার্শ্ব ইতি সেবনীপ্রদেশাদ্বামপার্শ্বে ইত্যর্থঃ| বামপার্শ্বে ইত্যাদি| বৃদ্ধবাগ্ভটে তু “বিদ্রধৌ পার্শ্বশূলে চ পার্শ্বকক্ষাস্তনান্তরস্থাং” (অ.সং.সূ.৩৬) ইতি সামান্যেনৈব পার্শ্বশব্দোপাদানং কৃতং, তস্মাদত্রাপি বামপার্শ্বগ্রহণং দক্ষিণপার্শ্বোপলক্ষণং, তেন দক্ষিণপার্শ্বে যদা শূলবিদ্রধী ভবতস্তদা দক্ষিণপার্শ্বে কক্ষাস্তনান্তরস্থাং সিরাং বিধ্যেদিত্যর্থঃ| অস্যাগ্রে ‘এতামেব কফোদরে’ ইতি কেচিত্ পঠন্তি, স পাঠো ন সঙ্গচ্ছতে, যতো ‘দক্ষিণবাহৌ যকৃদ্দাল্যে কফোদরে চ’ ইতি প্রাগেব কফোদরে সিরাব্যধস্য প্রতিপাদিতত্বাত্| বাহুশোষেত্যাদি| শোণিতাবৃতবাতজনিতযোর্বাহুশোষাববাহুকযোরপ্যংসযোঃ সিরাব্যধঃ, নতু কেবলবাতকৃতযোরিত্যেকে বদন্তি, পরমতং চাপ্রতিষিদ্ধমনুমতমেবেতি জেজ্জটাচার্যঃ| গযী তু “বাহুমধ্যে বাহুশোষাববাহুকযোরপ্যেকে বদন্ত্যংসযোরন্তরে” ইতি পঠিত্বা ব্যাখ্যাতি- বাহুশোষাঽববাহুকযোর্বাহুমধ্যে কূর্পরাংসযোর্মধ্যে ইত্যর্থঃ; মতান্তরমাহ- একে বদন্ত্যংসযোরন্তর ইতি| ননু চান্যত্রাববাহুকাদিতি সিরাব্যধপ্রতিষেধাত্ কথমত্র সিরাব্যধো বিহিতঃ? নৈবম্, অন্যত্রাববাহুকাদিত্যনেন বাতব্যাধিচিকিত্সিতাবেক্ষণস্য প্রতিষেধো, ন তু সিরাব্যধস্যতি তত্রৈব বাতব্যাধিচিকিত্সিতে বর্ণযিষ্যামঃ| বাহুশোষে চ কেবলানিলজেঽপ্যবস্থাবশাত্ সিরাব্যধঃ; তথা হ্যুষ্ণাম্বুলবণাদের্বাতহরস্যোপযোগাত্ কুপিতেন শোণিতেনাবৃতো বাতো যদা বেদনাকারী তদা সিরাব্যধ ইতি| ত্রিকেত্যাদি| অংসযোরন্তর ইত্যত্রাপি সম্বধ্যতে| তেনাংসযোরন্তরে যস্ত্রিকসন্ধিস্তত্সমীপগতাং, ন পুনস্ত্রিকসন্ধিমধ্যগতাং, ত্রিকসন্ধের্মর্মত্বাত্| অধ ইত্যাদি| স্কন্ধসন্ধেরধোগতাং বামদক্ষিণপার্শ্বযোরেকতরপার্শ্বসংশ্রিতাং সিরাং বিধ্যেদিতি সমুদাযার্থঃ| হন্বিত্যাদি| হনুসন্ধিমধ্যগতাং হনুসমীপসন্ধিমধ্যগতামিত্যর্থঃ| শঙ্খেত্যাদি| কেচিদত্র ‘উন্মাদেঽপস্মারে চ’ ইতি পঠন্তি, তত্রাপস্মারস্য পাঠো ন সঙ্গচ্ছতে, তথাচ বাগ্ভটঃ- “উরোঽপাঙ্গললাটস্থামুন্মাদেঽপস্মৃতৌ পুনঃ| হনুসন্ধৌ সমুদ্ভূতাং সিরাং ভ্রূমধ্যগামিনীম্”- (বা.সূ.২৭) ইতি| জিহ্বেত্যাদি| জিহ্বারোগেষু কণ্টকাদিষু, দন্তব্যাধিষু কৃমিদন্তাদিষু| তালু নীত্যাদি| তালব্যেষ্বিতি তালুভবেষু বিকারেষু| কর্ণযোরিত্যাদি অত্রোপরিগ্রহণমধোনিবৃত্ত্যর্থং, বিধুরমর্মাশ্রিতত্বাদধোভাগস্য| কর্ণশূল ইতি রক্তাবৃতানিলজে ইত্যর্থঃ| কর্ণরোগদ্বারেণৈব কর্ণশূলে প্রাপ্তে তদুপাদানং বিশেষার্থম্| তদ্রোগেষু কর্ণরোগেষু| গন্ধেত্যাদি| নাসারোগদ্বারেণৈব গন্ধাগ্রহণে প্রাপ্তে বিশেষার্থমুপাদানম্| তিমিরেত্যাদি| পাকোঽক্ষিপাকঃ| উপনাসিকে নাসাসমীপস্থে সিরে| অপাঙ্গ্যা ভ্রূপুচ্ছান্তস্থা| শিরোরোগাধিমন্থপ্রভৃতিষু রোগেষ্বিতি প্রভৃতিগ্রহণাত্ ক্ষুদ্ররোগে পঠিতারূংষিকাদেরপি গ্রহণম্| সর্বেষু পূর্বোক্তেষু রক্তানুবন্ধজেষু রক্তজেষু বা সিরাব্যধো নান্যাদৃশেষু||১৭||
Adhikarana ১৭ (১৮) · Śloka ১৮
দুষ্টব্যধা বিংশতিঃ- দুর্বিদ্ধাঽতিবিদ্বা কুঞ্চিতা পিচ্চিতা কুট্টিতাঽপ্রস্রুতাঽত্যুদীর্ণাঽন্তে বিদ্ধা পরিশুষ্কা কূণিতা বেপিতাঽনুত্থিতবিদ্ধা শস্ত্রহতা তির্যগ্বিদ্ধাবিদ্ধাঽব্যধ্যা বিদ্রুতা ধেনুকা পুনঃ পুনর্বিদ্ধা সিরাস্নায্বস্থিসন্ধিমর্মসু চেতি ||১৮||
दुष्टव्यधा विंशतिः- दुर्विद्धाऽतिविद्वा कुञ्चिता पिच्चिता कुट्टिताऽप्रस्रुताऽत्युदीर्णाऽन्ते विद्धा परिशुष्का कूणिता वेपिताऽनुत्थितविद्धा शस्त्रहता तिर्यग्विद्धाविद्धाऽव्यध्या विद्रुता धेनुका पुनः पुनर्विद्धा सिरास्नाय्वस्थिसन्धिमर्मसु चेति ||१८||
🔊 Audio coming soon
দুষ্টো ব্যধো যাসাং তা দুষ্টব্যধাঃ| কতিসঙ্খ্যা ইত্যাহ- বিংশতিঃ| কথং বিংশতিরিত্যাহ- দুর্বিদ্ধেত্যাদি||১৮||
Adhikarana ১৮ (১৯) · Śloka ১৯
তত্র যা সূক্ষ্মশস্ত্রবিদ্ধাঽব্যক্তমসৃক্ স্রবতি রুজাশোফবতী চ সা দুর্বিদ্ধা, প্রমাণাতিরিক্তবিদ্ধাযামন্তঃ প্রবিশতি শোণিতং শোণিতাতিপ্রবৃত্তির্বা সাঽতিবিদ্ধা, কুঞ্চিতাযামপ্যেবং, কুণ্ঠশস্ত্রপ্রমথিতা পৃথুলীভাবমাপন্না পিচ্চিতা, অনাসাদিতা পুনঃ পুনরন্তযোশ্চ বহুশঃ শস্ত্রাভিহতা কুট্টিতা, শীতভযমূর্চ্ছাভিরপ্রবৃত্তশোণিতা অপ্রস্রুতা, তীক্ষ্ণমহামুখশস্ত্রবিদ্ধাঽত্যুদীর্ণা, অল্পরক্তস্রাবিণ্যন্তেবিদ্ধা, ক্ষীণশোণিতস্যানিলপূর্ণা পরিশুষ্কা, চতুর্ভাগাসাদিতা কিঞ্চিত্প্রবৃত্তশোণিতা কূণিতা, দুঃস্থানবন্ধনাদ্বেপমানাযাঃ শোণিতসম্মোহো ভবতি সা বেপিতা, অনুত্থিতবিদ্ধাযামপ্যেবং, ছিন্নাঽতিপ্রবৃত্তশোণিতা ক্রিযাসঙ্গকরী শস্ত্রহতা, তির্যক্প্রণিহিতশস্ত্রা কিঞ্চিচ্ছেষা তির্যগ্বিদ্ধা, বহুশঃ ক্ষতা হীনশস্ত্রপ্রণিধানেনাবিদ্ধা, অশস্ত্রকৃত্যা অব্যধ্যা, অনবস্থিতবিদ্ধা বিদ্রুতা, প্রদেশস্য বহুশোঽবঘট্টনাদারোহদ্ব্যধা মুহুর্মুহুঃ শোণিতস্রাবা ধেনুকা, সূক্ষ্মশস্ত্রব্যধনাদ্বহুশো ভিন্না পুনঃ পুনর্বিদ্ধা, স্নায্বস্থিসিরাসন্ধিমর্মসু বিদ্ধা রুজাং শোফং বৈকল্যং মরণং চাপাদযতি ||১৯||
तत्र या सूक्ष्मशस्त्रविद्धाऽव्यक्तमसृक् स्रवति रुजाशोफवती च सा दुर्विद्धा, प्रमाणातिरिक्तविद्धायामन्तः प्रविशति शोणितं शोणितातिप्रवृत्तिर्वा साऽतिविद्धा, कुञ्चितायामप्येवं, कुण्ठशस्त्रप्रमथिता पृथुलीभावमापन्ना पिच्चिता, अनासादिता पुनः पुनरन्तयोश्च बहुशः शस्त्राभिहता कुट्टिता, शीतभयमूर्च्छाभिरप्रवृत्तशोणिता अप्रस्रुता, तीक्ष्णमहामुखशस्त्रविद्धाऽत्युदीर्णा, अल्परक्तस्राविण्यन्तेविद्धा, क्षीणशोणितस्यानिलपूर्णा परिशुष्का, चतुर्भागासादिता किञ्चित्प्रवृत्तशोणिता कूणिता, दुःस्थानबन्धनाद्वेपमानायाः शोणितसम्मोहो भवति सा वेपिता, अनुत्थितविद्धायामप्येवं, छिन्नाऽतिप्रवृत्तशोणिता क्रियासङ्गकरी शस्त्रहता, तिर्यक्प्रणिहितशस्त्रा किञ्चिच्छेषा तिर्यग्विद्धा, बहुशः क्षता हीनशस्त्रप्रणिधानेनाविद्धा, अशस्त्रकृत्या अव्यध्या, अनवस्थितविद्धा विद्रुता, प्रदेशस्य बहुशोऽवघट्टनादारोहद्व्यधा मुहुर्मुहुः शोणितस्रावा धेनुका, सूक्ष्मशस्त्रव्यधनाद्बहुशो भिन्ना पुनः पुनर्विद्धा, स्नाय्वस्थिसिरासन्धिमर्मसु विद्धा रुजां शोफं वैकल्यं मरणं चापादयति ||१९||
🔊 Audio coming soon
ইদানীং দুষ্টব্যধানাং বিবরণমাহ- তত্রেত্যাদি| অব্যক্তমিতি অল্পতযা অস্পষ্টম্| অন্তঃ প্রবিশতীতি শরীরাভ্যন্তরং প্রবিশতীত্যর্থঃ| কুঞ্চিতাযামিতি কুটিলীভূতাযামিত্যর্থঃ| পৃথুলীভাবমাপন্নেতি কুণ্ঠশস্ত্রাভিপাতেন চিপ্পটতযা প্রসরং প্রাপ্তা| অনাসাদিতা অপ্রাপ্তা| চতুর্ভাগাসাদিতেতি চতুর্ভাগেন প্রাপ্তা| বেপমানাযা ইতি কম্পমানাযাঃ| শোণিতসম্মোহঃ শোণিতাপ্রবৃত্তিঃ| ছিন্নেতি দ্বিধাভূতা| ক্রিযাসঙ্গকরীতি গমনাদিক্রিযাবিনাশকরী| প্রদেশস্যেতি সিরাব্যধনপ্রদেশস্য, বহুশো ঘট্টনাদিতি বহূন্ বারান্ তাডনাত্| আরোহদ্ব্যধা উপর্যুপর্যারোপিতশস্ত্রপদা, অত এব তৈঃ শস্ত্রপদৈর্ধেনুস্তনেরিব স্রবণাদ্ ধেনুকা| বহুশো ভিন্নেতি ‘একস্থানে এব’ ইতি শেষঃ| আসু ব্যাপত্সু প্রাগেব ব্যাপত্কারণপ্রতিষেধঃ, জাতাসু তত্কারণবিপরীতগুণাচরণং, তত্কারণজেষু বিকারেষু যথাস্বং শমনেন প্রশমনমিতি||১৯||
Adhikarana ১৯ (২০) · Śloka ২০
ভবন্তি চাত্র- সিরাসু শিক্ষিতো নাস্তি চলা হ্যেতাঃ স্বভাবতঃ | মত্স্যবত্ পরিবর্তন্তে তস্মাদ্যত্নেন তাডযেত্ ||২০||
भवन्ति चात्र- सिरासु शिक्षितो नास्ति चला ह्येताः स्वभावतः | मत्स्यवत् परिवर्तन्ते तस्माद्यत्नेन ताडयेत् ||२०||
🔊 Audio coming soon
ইদানীং সিরাব্যধনে যত্নং দর্শযন্নাহ- সিরাস্বিত্যাদি| শিক্ষিতোঽভ্যাসেন নিপুণঃ সিরাসু নাস্তি, মত্স্যবচ্চলনাত্; তস্মাত্তদ্ব্যধে যত্নো বিধেয ইত্যর্থঃ||২০||
Adhikarana ২০ (২১) · Śloka ২১
অজানতা গৃহীতে তু শস্ত্রে কাযনিপাতিতে | ভবন্তি ব্যাপদশ্চৈতা বহবশ্চাপ্যুপদ্রবাঃ ||২১||
अजानता गृहीते तु शस्त्रे कायनिपातिते | भवन्ति व्यापदश्चैता बहवश्चाप्युपद्रवाः ||२१||
🔊 Audio coming soon
ইদানীং শস্ত্রকর্মানিপুণবৈদ্যাদ্ব্যাপত্সম্ভবং দর্শযন্নাহ- অজানতা ইত্যাদি||২১||
Adhikarana ২১ (২২) · Śloka ২২
স্নেহাদিভিঃ ক্রিযাযোগৈর্ন তথা লেপনৈরপি | যান্ত্যাশু ব্যাধযঃ শান্তিং যথা সম্যক্ সিরাব্যধাত্ ||২২||
स्नेहादिभिः क्रियायोगैर्न तथा लेपनैरपि | यान्त्याशु व्याधयः शान्तिं यथा सम्यक् सिराव्यधात् ||२२||
🔊 Audio coming soon
ইদানীং স্নেহাদিকর্মণঃ সিরাব্যধস্য গুণোত্কর্ষং প্রতিপাদযন্নাহ- স্নেহাদিভিরিত্যাদি||২২||
Adhikarana ২২ (২৩) · Śloka ২৩
সিরাব্যধশ্চিকিত্সার্ধং শল্যতন্ত্রে প্রকীর্তিতঃ | যথা প্রণিহিতঃ সম্যগ্বস্তিঃ কাযচিকিত্সিতে ||২৩||
सिराव्यधश्चिकित्सार्धं शल्यतन्त्रे प्रकीर्तितः | यथा प्रणिहितः सम्यग्बस्तिः कायचिकित्सिते ||२३||
🔊 Audio coming soon
অধুনা সিরাব্যধস্য চিকিত্সার্ধত্বং দর্শযন্নাহ- সিরেত্যাদি| চিকিত্সার্ধমিতি চিকিত্সামধ্যে প্রধানমিত্যর্থঃ; অপরেঽর্ধশব্দং সঙ্খ্যাবাচকমাহুঃ| (“মাংসমেদোঽস্থিমজ্জানঃ শোণিতস্যাবসেচনাত্| ধমন্যশ্চ বিশুদ্ধ্যন্তি দুষ্টরক্তাস্ত্বচশ্চ যাঃ|| রসস্বেদাদিনিষ্যন্দাদ্বিশুদ্ধ্যন্তি ন পুষ্কলম্ ” - ইতি)||২৩||
Adhikarana ২৩ (২৪) · Śloka ২৪
তত্র স্নিগ্ধস্বিন্নবান্তবিরিক্তাস্থাপিতানুবসিতসিরাবিদ্ধৈঃ পরিহর্তব্যানি- ক্রোধাযাসমৈথুনদিবাস্বপ্নবাগ্ব্যাযামযানাধ্যযনস্থানাসনচঙ্ক্রমণশীতবাতাতপবিরুদ্ধাসাত্ম্যাজীর্ণান্যাবললাভাত্ , মাসমেকে মন্যন্তে | এতেষাং বিস্তরমুপরিষ্ঠাদ্বক্ষ্যামঃ ||২৪||
तत्र स्निग्धस्विन्नवान्तविरिक्तास्थापितानुवसितसिराविद्धैः परिहर्तव्यानि- क्रोधायासमैथुनदिवास्वप्नवाग्व्यायामयानाध्ययनस्थानासनचङ्क्रमणशीतवातातपविरुद्धासात्म्याजीर्णान्याबललाभात् , मासमेके मन्यन्ते | एतेषां विस्तरमुपरिष्ठाद्वक्ष्यामः ||२४||
🔊 Audio coming soon
ইদানীং স্নিগ্ধাদিভিঃ পুরুষৈঃ ক্রোধাদীনি সামান্যেন পরিহর্তব্যানীতি দর্শযন্নাহ- তত্রেত্যাদি| স্থানম্ ঊর্ধ্বীভবনম্, আসনম্ উপবেশনম্| এতেষাং ক্রোধাযাসাদীনাং পঞ্চদশানাম্| উপরিষ্ঠাত্ আতুরোপদ্রবচিকিত্সিতে||২৪||
Adhikarana ২৪ (২৫) · Śloka ২৫
সিরাবিষাণতুম্বৈস্তু জলৌকাভিঃ পদৈস্তথা | অবগাঢং যথাপূর্বং নির্হরেদ্দুষ্টশোণিতম্ ||২৫||
सिराविषाणतुम्बैस्तु जलौकाभिः पदैस्तथा | अवगाढं यथापूर्वं निर्हरेद्दुष्टशोणितम् ||२५||
🔊 Audio coming soon
ইদানীং সিরাবিষাণাদীনাং রক্তাবসেচনোপাযানাং যথাপূর্বং গুরুতাং দর্শযন্নাহ- সিরাবিষাণেত্যাদি| পদৈঃ প্রচ্ছন্নৈঃ | অবগাঢম্ অভ্যন্তরাশ্রযম্| যথাপূর্বং পূর্বানতিক্রমেণ; এতেনোত্তানং পদৈঃ, অবগাঢং জলৌকোভিঃ, অবগাঢতরং তুম্বৈঃ, অবগাঢতমং বিষাণেন; সার্বাঙ্গিকমবগাঢতমং চ সিরাভিরিতি||২৫||
Adhikarana ২৫ (২৬) · Śloka ২৬
অবগাঢে জলৌকা স্যাত্ প্রচ্ছন্নং পিণ্ডিতে হিতম্ | সিরাঽঙ্গব্যাপকে রক্তে শৃঙ্গালাবূ ত্বচি স্থিতে ||২৬||
अवगाढे जलौका स्यात् प्रच्छन्नं पिण्डिते हितम् | सिराऽङ्गव्यापके रक्ते शृङ्गालाबू त्वचि स्थिते ||२६||
🔊 Audio coming soon
তত্র সিরাবিষাণতুম্বজলৌকঃপ্রচ্ছন্নানাং বিষযং কশ্চিদাহ- অবগাঢে ইত্যাদি||২৬||
Adhikarana পুষ্পিকা · Śloka ৮
ইতি সুশ্রুতসংহিতাযাং শারীরস্থানে সিরাব্যধবিধিশারীরং নামাষ্টমোঽধ্যাযঃ ||৮||
इति सुश्रुतसंहितायां शारीरस्थाने सिराव्यधविधिशारीरं नामाष्टमोऽध्यायः ||८||
🔊 Audio coming soon
ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযাং শারীরস্থানেঽষ্টমোঽধ্যাযঃ||৮||