৬৯. বিষরোগনিদানম্

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পারিশেষ্যাদ্বিষরোগনিদানমুচ্যতে– স্থাবরমিত্যাদি| বিষাদজনকত্বাদ্বিষং; তচ্চ দ্বিবিধম্– স্থাবরং, জঙ্গমং চ| মূলাদ্যাত্মকমিতি আদ্যং স্থাবরং মূলাদিরূপং দশবিধং; যদুক্তং সুশ্রুতে “মূলং পত্রং ফলং পুষ্পং ত্বক্ ক্ষীরং সার এব চ| নির্যাসো ধাতবশ্চৈব কন্দশ্চ দশমঃ স্মৃতঃ||” (সু. ক. অ. ২) ইতি| তত্র ক্লীতকাশ্বমারকগুঞ্জাসুগন্ধগর্গরকরঘাটবিদ্যুচ্ছিখাঽনন্তা-বিজযানীত্যষ্টৌ মূলবিষাণি, বিষপত্রিকালম্বাসুরদারুকরম্ভমহাকরম্ভাণি পঞ্চ পত্রবিষাণি, কুমুদ্বতীবেণুকাকরম্ভমহাকরম্ভকর্কোটকরেণুকখদ্যোতক-চর্মরীভগন্ধাসর্পঘাতিনন্দনসারপাকানি দ্বাদশ ফলবিষাণি, বেত্রকাদম্ববল্লীজকরম্ভমহাকরম্ভাণি পঞ্চ পুষ্পবিষাণি, অন্ত্রপাচককর্তরীযশৈলেযকরম্ভনন্দনকরঘাটবরাটকানি সপ্ত ত্বঙ্নির্যাসসারবিষাণি, কুমুদঘ্নীস্নুহীজালক্ষীরীণি ত্রীণি ক্ষীরবিষাণি, ফেনাশ্মভস্ম হরিতালং চ দ্বে ধাতুবিষে, কালকূটবত্সনাভসর্ষপকপালকর্দমকবৈরাটকমুস্তকমহাবিষ-প্রপৌণ্ডরীকমূলকহলাহলশৃঙ্গিমর্কটকানি ত্রযোদশ কন্দবিষাণি, এতানি প্রাণহরাণি; এবং পঞ্চপঞ্চাশত্ স্থাবরাণি বিষাণি ভবন্তি| এষাং চ ব্যাধপুলিন্দাদিভ্যো ব্যক্তিজ্ঞানং কর্তব্যম্| পরং সর্পাদিসম্ভবমিতি পরং জঙ্গমং, তচ্চ ষোডশাভিধানম্– দৃষ্টিনিঃশ্বাসদংষ্ট্রানখমূত্রপুরীষশুক্রলালার্তবমুখসন্দংশপর্দিতগুদাস্থি-পিত্তশূকশবভেদাত্| পর্দিতং পাযুকৃতঃ কুত্সিতশব্দঃ; ‘পর্দ’ কুত্সিতে শব্দে, ইত্যস্য প্রযোগাত্| তত্র দৃষ্টিনিঃশ্বাসবিষা দিব্যাঃ সর্পাঃ, ভৌমাঃ সর্পা দংষ্ট্রাবিষাঃ, মার্জারমকরব্যাঘ্রাদযো দংষ্ট্রানখবিষাঃ, পিচ্চিটকৌণ্ডিন্যাদযো মূত্রপুরীষবিষাঃ, মূষিকাঃ শুক্রবিষাঃ, বৃশ্চিকবরট্যুচ্চিটিঙ্গাদয আরাবিষাঃ, লূতা লালার্তববিণ্মূত্রশুক্রমুখসন্দংশবিষাঃ, চিত্রশীর্ষকশতদারুকশারিকাদযো মুখসন্দংশদংষ্ট্রাপর্দিতগুদপুরীষবিষাঃ, বিষহতাস্থিমত্স্যাস্থিপ্রভৃতযোঽস্থিবিষাঃ, শকুলীমত্স্যাদযঃ পিত্তবিষাঃ, সূক্ষ্মতুণ্ডভ্রমরাদযঃ শূকবিষাঃ, কীটসর্পদেহা গতাসবঃ শববিষাঃ| এষাং চ সুশ্রুতস্য কল্পস্থানে বিস্তরো দ্রষ্টব্যঃ||১||

আতঙ্কদর্পণ ব্যাখ্যা (বাচস্পতি বৈদ্য কৃত)

পারিশেষ্যাদ্বিষরোগনিদানমুচ্যতে| বিষাদজনকত্বাদ্বিষং, তচ্চ দ্বিবিধম্– স্থাবরং জঙ্গমং চ| তদ্দ্বৈবিধ্যমাহ– স্থাবরমিত্যাদি| মূলাদ্যাত্মকমিতি আদ্যং প্রথমম্, অদনীযমাদ্যমিত্যন্যে| স্থাবরং মূলাদিস্বরূপং দশবিধম্| যদুক্তং সুশ্রুতে– “দশাধিষ্ঠানমাদ্যং স্যাদ্দ্বিতীযং ষোডশাশ্রযম্|” ইতি, “মূলং পত্রং ফলং পুষ্পং ত্বক্ ক্ষীরং সার এব চ| নির্যাসো ধাতবশ্চৈব কন্দশ্চ দশমঃ স্মৃতঃ||” ইতি চ| তত্র ক্লীতকাশ্বমারকগুঞ্জাসুগন্ধগর্গরকরঘাটকবিদ্যুচ্ছিখাঽনন্তা-বিজযানীত্যষ্টৌ মূলবিষাণি, বিষপত্রিকালম্বাসুরদারুকরম্ভমহাকরম্ভাণি পঞ্চ পত্রবিষাণি, কুমুদ্বতীবেণুকাকরম্ভমহাকরম্ভকর্কোটকরেণুকখদ্যোতক-চর্মরীভগন্ধাসর্পঘাতিচন্দনকঙ্কোলসারপাকানি দ্বাদশ ফলবিষাণি, বেত্রকাদম্ববল্লীকরম্ভমহাকরম্ভাণি পঞ্চ পুষ্পবিষাণি, অন্ত্রপাচককর্তরীযশৈলেযকরম্ভনন্দনকরঘাটবরাটকানি সপ্ত ত্বঙ্নির্যাসসারবিষাণি, কুমুদঘ্নীস্নুহীজালক্ষীরীণি ত্রীণি ক্ষীরবিষাণি, ফেনাশ্ম হরিতালং চ দ্বে ধাতুবিষে, কালকূটবত্সনাভসর্ষপকপালকর্দমবৈরাটকমুস্তকশৃঙ্গীপ্রপৌণ্ডরীক-মূলকহালাহলমহাবিষমর্কটকানীতি ত্রযোদশ কন্দবিষাণি; এবং পঞ্চাশত্স্থাবরবিষাণি ভবন্তি| এষাং ব্যাধপুলিন্দাদিভ্যো ব্যক্তিজ্ঞানং কর্তব্যম্| পরং সর্পাদিসম্ভবমিতি পরং জঙ্গমং; তচ্চ ষোডশাভিধানম্| দৃষ্টিনিঃশ্বাসদংষ্ট্রানখমূত্রপুরীষশুক্রলালাস্পর্শমুখসন্দংশবিশর্ধিত-গুদাস্থিপিত্তশূকশবভেদাত্| পর্দিতং বিশর্ধিতং পাযুকৃতঃ কুত্সিতঃ শব্দঃ ‘শৃধু শব্দকুত্সাযাম্’ ইত্যস্য প্রযোগাত্| তত্র দৃষ্টিনিঃশ্বাসবিষা দিব্যাঃ সর্পাঃ, ভৌমাস্তু দংষ্ট্রাবিষাঃ, মার্জারশ্বমকরব্যাঘ্রাদযো দংষ্ট্রানখবিষাঃ, পিচ্চিটকৌণ্ডিন্যাদযো মূত্রপুরীষবিষাঃ, সর্পলাদযো মূষিকাঃ শুক্রবিষাঃ| বৃশ্চিকবরটীমত্স্যোচ্চিঙ্গটাদয আরাবিষাঃ, লূতা লালাস্পর্শবিণ্মূত্রশুক্রার্তবমুখসন্দংশবিষাঃ, মক্ষিকাজলাযুকাদযো মুখসন্দংশবিষাঃ, চিত্রশীর্ষকশতদারুকসারিকাদযো মুখসন্দংশদংষ্ট্রাবিশর্ধিতগুদপুরীষবিষাঃ, বিষহতাস্থিমত্স্যাস্থিপ্রভৃতযোঽস্থিবিষাঃ, শকুলীমত্স্যাদযঃ পিত্তবিষাঃ, সূক্ষ্মতুণ্ডভ্রমরাদযঃ শূকবিষাঃ, কীটসর্পদেহা ব্যসবঃ শববিষা ইতি| এষাং চ সুশ্রুতস্য কল্পস্থানে বিস্তরো দ্রষ্টব্যঃ||১||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

তত্র জঙ্গমবিষস্য বহ্বধিষ্ঠানত্বেন প্রাধান্যাত্ সর্ববেগানুগতং সামান্যলিঙ্গমাহ– নিদ্রামিত্যাদি| এতত্ সুবোধ্যম্||২||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

স্থাবরস্য সামান্যলিঙ্গমাহ– স্থাবরং চেত্যাদি| ফেনচ্ছর্দিরিতি ফেনস্য ছর্দিঃ||৩||

আতঙ্কদর্পণ ব্যাখ্যা (বাচস্পতি বৈদ্য কৃত)

তত্র জঙ্গমবিষস্য সামান্যেন লিঙ্গমাহ– নিদ্রামিত্যাদি| ফেনচ্ছর্দীতি ফেনস্য ছর্দিরিত্যবগম্যতে||৩||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

বিষদাতৃলক্ষণমাহ– ইঙ্গিতজ্ঞ ইত্যাদি| অভিপ্রাযসূচকম্ ঈহিতমিঙ্গিতং, তজ্জ্ঞো বৈদ্যো বাচা ক্রিযযা মুখবৈকৃত্যাদিনা চ বিষদাতারং জানীযাত্| এভির্বক্ষ্যমাণলক্ষণৈঃ| ন দদাত্যুত্তরং পৃষ্ট ইতি স্বীযাসত্কর্মজনিতব্যামোহাত্| অপার্থমিত্যনর্থকম্| সঙ্কীর্ণমিত্যস্ফুটম্| হসত্যকস্মাদিতি অহেতোরপি হসতি| ভযজবাযুজনিতপর্বব্যথাপনোদনাযাঙ্গুলীঃ স্ফোটযতি| ক্রিযান্তরকরণসূচনায মহীং বিলিখতি| ভীতঃ সন্ প্রত্যেকং বীক্ষতে| ধ্যাম ইতি দগ্ধসমবর্ণঃ| কিঞ্চিত্তৃণাদিকম্| বর্ততে বিপরীত ইতি বারং বারং পরিবর্ত্য তিষ্ঠতি||৪-৭||–

আতঙ্কদর্পণ ব্যাখ্যা (বাচস্পতি বৈদ্য কৃত)

অবনীপতেঃ পরিকর্মিণো বিষমবচারযন্তীতি তেষাং বিষদাতৄণাং লক্ষণমাহ– ইঙ্গিতজ্ঞ ইত্যাদি| অভিপ্রাযসূচকমীহিতমিঙ্গিতং, তজ্জ্ঞো বৈদ্যঃ বাচা ক্রিযামুখবৈবর্ণ্যাদিভির্বিষদাতারং জানীযাত্, এতৈর্লিঙ্গৈশ্চেতি বক্ষ্যমাণৈঃ| তান্যেব লিঙ্গান্যাহ– নেত্যাদি| আত্মীযাঽসত্কর্মজনিতব্যামোহাত্, অপার্থমিতি নিরর্থকং, সঙ্কীর্ণমিতি অস্ফুটম্| হসত্যকস্মাদিত্যাদি| অহাসহেতোরপি হসতি| ভযজবাযুসম্ভূতপর্বব্যথাপনোদাযাঙ্গুলীঃ স্ফোটযতি| ক্রিযান্তকরণসূচনায মহীং কিঞ্চিল্লিখতি| ত্রস্তশ্চান্যোন্যমীক্ষত ইতি স্বপাপকর্মোপলম্ভভযেনান্যোন্যমীক্ষতে| ধ্যাম ইতি দগ্ধসমবর্ণঃ, মলিনবস্ত্রবর্ণ ইতি ডল্লণঃ||৪-৭||–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

মূলাদিবিষাণাং প্রমাদাদুপযুক্তানাং প্রত্যেকং লক্ষণমাহ– উদ্বেষ্টনমিত্যাদি| উদ্বেষ্টনং দণ্ডবিমর্দনবদ্ব্যথা| মূলবিষৈরিত্যষ্টবিধৈরপি, এবং পত্রাদীনামুক্তানাং যাবত্সঙ্খ্যাকানামেকং সামান্যলক্ষণমবগন্তব্যম্| প্রাযেণ কালঘাতীনীতি এতানি নব মূলাদিবিষাণি কালান্তরেণ মারকাণি ভবন্তীত্যর্থঃ| কন্দবিষং তু ত্রযোদশবিধমতিতীক্ষ্ণত্বাদ্ব্যবাযিবিকাশ্যাদিগুণযোগাত্তদাত্বেন মারকম্||৮-১২||

আতঙ্কদর্পণ ব্যাখ্যা (বাচস্পতি বৈদ্য কৃত)

নবানাং মূলাদিবিষাণাং প্রমাদাদুপযুক্তানাং প্রত্যেকং লক্ষণমাহ– উদ্বেষ্টনমিত্যাদি, উদ্বেষ্টনং দণ্ডাদিমর্দনবদ্ব্যথা| মূলবিষৈরষ্টবিধৈরপি|| পত্রবিষলক্ষণমাহ– জৃম্ভণমিত্যাদি| জৃম্ভণং জৃম্ভাবাহুল্যম্| ফলবিষলক্ষণমাহ– মুষ্কেত্যাদি| মুষ্কযোঃ শ্বযথুঃ| পুষ্পবিষলক্ষণমাহ– ভবেদিত্যাদি| ত্বক্সারেত্যাদি ত্বগ্বিষৈঃ সারবিষৈর্নির্যাসবিষৈঃ পৃথক্ ত্রিভিঃ| পারুষ্যং খরস্পর্শত্বং মুখস্যৈব, কফসংস্রবঃ শ্লেষ্মাস্রাবঃ| ক্ষীরবিষলক্ষণমাহ– ফেনেত্যাদি| সুগমম্| ধাতুবিষমাহ– হৃদিত্যাদি| ধাতুবিষৈঃ হরিতালাদিকৈঃ| এষাং কালাবধিমাহ– প্রাযেণেত্যাদি| এতানি নব মূলাদিবিষাণি কালান্তরেণ ঘ্নন্তি| কন্দবিষমপি দশমমতিতীক্ষ্ণত্বাদ্ব্যবাযিবিকাশ্যাদিগুণযোগাত্তদাত্বেন মারকম্||৮-১২||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

বিষলিপ্তশস্ত্রহতস্য লিঙ্গমাহ– সদ্য ইত্যাদি| পচ্যতে চাপ্যভীক্ষ্ণমিতি সদ্যস্তাবত্ পচ্যতে, পশ্চাদপি পুনঃ পুনঃ পাকমেতি||১৩-১৫||

আতঙ্কদর্পণ ব্যাখ্যা (বাচস্পতি বৈদ্য কৃত)

বিষলিপ্তশস্ত্রহতস্য লিঙ্গমাহ– সদ্য ইত্যাদি| সদ্যস্তাবত্ পচ্যতে পশ্চাদপি পুনঃপুনঃ পাকমেতি| দিগ্ধাহতং বিষলিপ্তশস্ত্রহতম্| শত্রুভির্ব্রণসঞ্চারিতবিষলক্ষণমাহ– লিঙ্গানীত্যাদি| এতান্যেব পূর্বোক্তানি, অমিত্রৈঃ শত্রুভিঃ, ব্রণে শস্ত্রব্রণে, প্রমাদাত্ অনবধানাত্| তন্ত্রান্তরে বিষপীতলক্ষণম্– “সপীতং গৃহধূমাভং পুরীষং যোঽতিসার্যতে| ফেনমুদ্বমতে চাপি বিষপীতং তমাদিশেত্||” ইতি||১৩-১৫||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

স্থাবরমভিধায জঙ্গমেষ্বতিতীক্ষ্ণত্বেন সর্পবিষে বাচ্যে তদাশ্রযান্ সর্পানাহ– বাতপিত্তকফাত্মান ইত্যাদি| ভোগী ফণী, মণ্ডলী মণ্ডলবদ্রথাঙ্গলাঙ্গলাদিরূপমণ্ডলযুক্তঃ| রাজিলশ্চিত্রদীর্ঘরেখাবান্; এতে যথাক্রমং বাতাদ্যাত্মানো বাতাদিপ্রকৃতযঃ| ব্যতিকরজান্ সর্পান্ দর্শযতি– দ্ব্যন্তরা দ্বন্দ্বরূপিণ ইতি| দ্বযোরন্তরং বিশেষো যেষু তে তথা| যথা– ফণিনা মণ্ডলিন্যাং গোনসা জাতাঃ, মণ্ডলিনা গোনসেন চ ফণিন্যাং কৃষ্ণসর্পাঃ, এবমন্যেঽপি জাতিসঙ্করা ঊহ্যাঃ| ‘ব্যন্তরা’ ইতি পাঠে স এবার্থঃ, বিশব্দস্য দ্ব্যর্থত্বাত্; তথা ‘বিভবান্মহানাকাশঃ’ ইত্যত্র ব্যাখ্যাতং, বিভবাদিতি দ্বিভাবাত্; দ্বিভাবশ্চ সর্বমূর্তদ্রব্যৈঃ সংযোগঃ সর্বত্র উপলম্ভশ্চেতি| দ্বন্দ্বরূপিণ ইতি দ্বযোঃ ফণিমণ্ডলিনোর্বাতপিত্তপ্রকৃতযোর্যত্ প্রকৃতিত্বং তন্মিলিতপ্রকৃতিত্বমেষামিত্যর্থঃ, বাতপিত্তপ্রকৃতযোরথবা দ্বযোর্যদ্দোষযো রূপং তদ্রূপমিত্যর্থঃ||১৬||

আতঙ্কদর্পণ ব্যাখ্যা (বাচস্পতি বৈদ্য কৃত)

স্থাবরমভিধায জঙ্গমেষ্বতিতীক্ষ্ণত্বেন সর্পবিষে বাচ্যে তদাশ্রযান্ সর্পানাহ– বাতেত্যাদি| ভোগী ফণী, মণ্ডলী রথাঙ্গলাঙ্গলাদিরূপমণ্ডলযুক্তঃ, রাজিলশ্চিত্রদীর্ঘরেখাবান্, এতে যথাক্রমং বাতপিত্তকফপ্রকৃতযঃ| ব্যতিকরজান্ সর্পান্ দর্শযতি– দ্ব্যন্তরাদ্বন্দ্বরূপিণ ইতি| দ্ব্যন্তরাঃ দ্বযোরন্তরং বিশেষো যেষু তে তথা, যথা– ফণিনা কৃষ্ণসর্পেণ মণ্ডলিন্যাং গোনসা জাতাঃ, মণ্ডলিনা বা গোনসেন চ| ফণিন্যাং কৃষ্ণসর্পাঃ, এবমন্যেঽপি জাতিব্যতিকরা ঊহ্যাঃ| দ্বন্দ্বরূপিণ ইতি দ্বযোর্যো ভাবঃ; তদ্বন্ত ইত্যর্থঃ||১৬||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ভোগিপ্রভৃতিকৃতদংশেষু বাতাদীনাং লিঙ্গমাহ– দংশো ভোগিকৃত ইত্যাদি| সর্ববাতবিকারকৃদিত্যনেনৈব কৃষ্ণত্বে সিদ্ধে তদুক্তিরবশ্যম্ভাবিত্বখ্যাপনার্থম্, এবমুত্তরত্রাপি পীতাদ্যভিধানম্||১৭-১৮||

আতঙ্কদর্পণ ব্যাখ্যা (বাচস্পতি বৈদ্য কৃত)

ভোগিপ্রভৃতিভিঃ কৃতদংশেষু লক্ষণং বাতাদীনামাহ– দংশ ইতি| সর্ববাতবিকারকৃদিত্যনেনৈব কৃষ্ণত্বে সিদ্ধে তদুক্তিরবশ্যম্ভাবিতাখ্যাপনার্থম্| এবমুত্তরত্রাপি পীতাদ্যভিধানম্||১৭-১৮||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

বিশিষ্টদেশাদিদষ্টস্যাসাধ্যত্বমাহ– অশ্বত্থেত্যাদি| যাম্যে চেতি ভরণ্যাম্| ঋক্ষে নক্ষত্রে| মর্মস্বিতি আশুঘাতিষু| যাম্যে চেতি চকারেণার্দ্রাশ্লেষামঘামূলকৃত্তিকানাং গ্রহণম্| যদুক্তমন্যত্র– “চৈত্যাযতনবল্মীকশ্মশানেষু চতুষ্পথে| আর্দ্রাশ্লেষামঘামূলকৃত্তিকাভরণীষু চ|| পঞ্চম্যাং সন্ধ্যযোর্দংশে মর্মস্বাশুহরেষু চ| দষ্টাঃ কষ্টেন জীবন্তি যদি দূতাদিসম্পদঃ||” ইতি||১৯||

আতঙ্কদর্পণ ব্যাখ্যা (বাচস্পতি বৈদ্য কৃত)

বিশিষ্টদেশনক্ষত্রদষ্টস্যাসাধ্যত্বমাহ– অশ্বত্থেত্যাদি| যাম্যে চেতি ভরণ্যাং যাম্যে ইত্যত্র “পিত্র্যে” ইতি পাঠঃ| পিত্র্যে মঘাযাং, ঋক্ষে নক্ষত্রে| যে চ মর্মসু দষ্টাঃ স্যুস্তেঽপি ত্যাজ্যাঃ| মর্মস্বিতি আশুঘাতিষু| যাম্যে চেতি চকারেণার্দ্রাশ্লেষামঘামূলকৃত্তিকাদীনাং সমুচ্চযনম্| যদুক্তমন্যত্র– “চৈত্যাযতনবল্মীকশ্মশানেষু চতুষ্পথে| আর্দ্রাশ্লেষামঘামূলকৃত্তিকাভরণীষু চ|| পঞ্চম্যাং সন্ধ্যযোর্দংশে মর্মস্বাশুহরেষু চ| দষ্টাঃ কষ্টেন জীবন্তি যদি দূতাদিসম্পদঃ||” ইতি||১৯||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

দর্বীত্যাদি| দর্বীকরাণাং বিষমাশু হন্তি অশ্বত্থাদৌ বিশেষেণ দর্বীকরাণামাশুমারকং; দর্বীকরাঃ ফণিনঃ| সর্বাণি চোষ্ণে দ্বিগুণীভবন্তীতি উষ্ণসংযোগে সতি সর্বাণি বিষাণি স্বরূপতো দ্বৈগুণ্যং ভজন্তে; “সর্বাণি চোক্তানি যথাক্রমেণ” ইতি পাঠান্তরে অযমর্থঃ– সর্বাণি ভোগিমণ্ডলিরাজিলবিষাণি যথাক্রমেণ যথোদ্দিষ্টক্রমেণ উক্তান্যশ্বত্থাদিষ্বাশুঘাতীনি| দর্বীকরবিষস্য পৃথগুপাদানং বিশেষার্থম্|২০|–

আতঙ্কদর্পণ ব্যাখ্যা (বাচস্পতি বৈদ্য কৃত)

দর্বীকরাণামিত্যাদি| অশ্বত্থাদৌ বিশেষেণ দর্বীকরাণাং বিষমাশুঘাতকং, দর্বীকরাঃ ফণিনঃ| সর্বাণি চোষ্ণে বিগুণীভবন্তীতি উষ্ণসংযোগে সর্বাণি বিষাণি স্বরূপতো বৈগুণ্যং ভজন্তে “সর্বাণি চোষ্ণে দ্বিগুণীভবন্তি” ইতি পাঠে সর্বাণ্যশেষাণি বিষাণ্যুষ্ণকালে দ্বিগুণীভবন্তি দ্বিগুণশক্তীনি ভবন্তি| “সর্বাণি চোর্ধ্বে দ্বিগুণীভবন্তি” ইত্যপরে পঠন্তি| ঊর্ধ্বে দেশ ইত্যর্থঃ| “সর্বাণি চোক্তানি যথাক্রমেণ” ইতি পাঠান্তরং, তদাযমর্থঃ– সর্বাণি মণ্ডলিরাজিলবিষাণি যথাক্রমেণ যথোপদিষ্টক্রমেণোক্তাঽশ্বত্থাদিষ্বাশুঘাতীনি| দর্বীকরবিষস্য পৃথগুপাদানং বিশেষার্থম্|২০|–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

এবমপরেষ্বপি আশুঘাতিত্বং সম্ভবতি, তানাহ– অজীর্ণেত্যাদি| অজীর্ণপিত্তাতপপীডিতেষ্বিতি অজীর্ণিনি দোষত্রযপ্রকোপাত্, পিত্তাতপপীডিতযো রৌক্ষ্যাত্, বালবৃদ্ধযোরসম্পূর্ণক্ষীণধাতুত্বেন বিষবেগাসহত্বাত্, বুভুক্ষিতেষ্বিতি পিত্তবৃদ্ধ্যা উষ্ণদেহত্বাত্, ক্ষীণক্ষত ইতি ক্ষতক্ষীণে বহুলবাতদুষ্টেঃ, মেহিনি দোষত্রযপ্রকোপাত্, কুষ্ঠযুক্তে রক্তাদিদোষাত্, রূক্ষে বাতকোপাত্, অবলে ক্লেশাসহত্বাত্, গর্ভবতীষু গর্ভেণোত্ক্ষিপ্তদোষত্বাত্; এষু বিষমাশুঘাতীতি||২০||–

আতঙ্কদর্পণ ব্যাখ্যা (বাচস্পতি বৈদ্য কৃত)

অপরেষু যেষু যথাঽঽশুঘাতিত্বং সম্ভবতি তানাহ– অজীর্ণেত্যাদি| অজীর্ণিনি দোষত্রযপ্রকোপাদ্বিষমাশুঘাতি, পিত্তাতপপীডিতযো রৌক্ষ্যাত্, বালবৃদ্ধযোরসম্পূর্ণক্ষীণধাতুত্বেন বিষবেগাসহত্বাত্| বুভুক্ষিতেষ্বিতি বাতপিত্তবৃদ্ধ্যোষ্ণদেহত্বাত্| ক্ষীণক্ষত ইতি ক্ষতক্ষীণে বহুলবাতদুষ্টেঃ, মেহিনি দোষত্রযকোপাত্, কুষ্ঠজুষ্টে রক্তাদিদোষাত্, রূক্ষে বাতকোপাত্, অবলে বেগাসহত্বাত্, গর্ভবতীষু গর্ভেণোত্ক্ষিপ্তদোষত্বাত্; এষু বিষমাশুঘাতীতি||২০||–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ইদানীং সর্বথা বর্জনীযমাহ– শস্ত্রক্ষত ইত্যাদি| রাজ্যো লতাভিশ্চেতি রাজ্যো লেখাঃ লতাভিস্তাডনান্ন ভবন্তি| তদুক্তমালম্বাযনে– “নৈতি রক্তং ক্ষতাদ্যস্য লতাঘাতৈর্ন রাজিকাঃ| ন লোমহর্ষঃ শীতাদ্ভির্বর্জযেত্তং বিষার্দিতম্||” ইতি| জিহ্মং বক্রং, স্তব্ধমিতি কার্তিকঃ| কেশশাত ইতি কর্ষণাত্ কেশোত্পাটঃ| কণ্ঠভঙ্গো গ্রীবাযা অবিধারণম্| হন্বোঃ স্থিরত্বং হনুদ্বযস্য লগ্নত্বম্| বর্তির্ঘনেতি লালারূপা বর্তিঃ| রক্তং স্রবেদূর্ধ্বমধশ্চ যস্যেতি মুখনাসাগুদাদিভ্যঃ শোণিতস্রাবঃ| দংষ্ট্রানিপাতাশ্চতুরশ্চেতি চত্বার ইতি প্রাপ্তে চতুর ইতি নির্দেশঃ আগমবিধেরনিত্যত্বাত্, যথা– “অগ্রতশ্চতুরো বেদা” ইত্যাদি| উন্মত্তমত্যর্থমুপদ্রুতমিতি উন্মত্তমত্যর্থমুন্মাদবন্তম্, উপদ্রুতং জ্বরাতিসারাদিভিরত্যর্থমুপদ্রুতম্| হীনস্বরং বক্তুমসমর্থম্| বিবর্ণং কৃষ্ণবর্ণম্| সারিষ্টং নাসাভঙ্গাদিযুক্তম্| অবেগিনং গমনাদিবেগরহিতং, বিণ্মূত্রাদিবেগরহিতমিতি কার্তিকঃ||২১-২৪||–

আতঙ্কদর্পণ ব্যাখ্যা (বাচস্পতি বৈদ্য কৃত)

সর্বথা বর্জনীযমাহ– শস্ত্রেত্যাদি| রাজ্যো লেখাঃ লতাভিস্তাডিতেঽঙ্গে ন সম্ভবন্তি নোচ্ছলন্তি| অত্রালম্বাযনেঽপ্যুক্তম্– “নৈতি রক্তং ক্ষতাদ্যস্য লতাঘাতে ন রাজিকাঃ| ন লোমহর্ষঃ শীতাদ্ভির্বর্জযেত্তং বিষার্দিতম্||” ইতি| অপরং বর্জ্যমাহ– জিহ্মমিত্যাদি| জিহ্মং বক্রং, স্তব্ধমিতি কার্তিকঃ| কেশশাতঃ ঘর্ষণাত্কেশোত্পাটঃ, কণ্ঠভঙ্গেন গ্রীবাযা অধারণং, হন্বোঃ স্থিরত্বং হনুদ্বযস্য লগ্নত্বম্| অপরমপি বর্জ্যমাহ– বর্তিরিত্যাদি| লালারূপা বর্তির্যস্য মুখান্নির্গচ্ছতি| রক্তং স্রবেদূর্ধ্বমধশ্চেতি মুখনাসাগুদমেহনাদিভ্যঃ শোণিতস্রাবঃ| দংশনিপাতাশ্চতুর ইতি চত্বার ইতি প্রাপ্তেঽনিত্যত্বাদাগমাভাবঃ| অন্যমপি বর্জ্যমাহ– উন্মত্তমিত্যাদি| উন্মত্তং উন্মাদবন্তং, জ্বরাতিসারাদিভিরত্যর্থমুপদ্রুতং চ, হীনস্বরং বক্তুমসমর্থং, বিবর্ণং কৃষ্ণবর্ণং, সারিষ্টং নাসাভঙ্গাদিযুক্তম্, অবেগিনং প্রথমাদিবেগরহিতং, বিণ্মূত্রবেগরহিতমিতি কার্তিকঃ||২১-২৪||–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

স্থাবরজঙ্গমবিষমেব জীর্ণত্বাদিভির্বিশেষৈর্দূষীবিষসঞ্জ্ঞাং লভতে; তদাহ– জীর্ণমিত্যাদি| বিষঘ্নৌষধিভিরিতি অগদাদিভিঃ| দাবাগ্নিবাতাতপশোষিতং বেতি দাবাগ্নির্বনাগ্নিঃ| স্বভাবতো বা গুণবিপ্রহীনমিতি স্বভাবাদেব কিমপি বিষং ব্যবাযিবিকাশিপ্রভৃতিষু দশসু গুণেষু মধ্যে একদ্বিত্র্যাদিগুণহীনং যদি ভবতি তদা দূষীবিষতামুপৈতি||২৫||–

আতঙ্কদর্পণ ব্যাখ্যা (বাচস্পতি বৈদ্য কৃত)

স্থাবরজঙ্গমবিষমেব জীর্ণত্বাদিভিঃ কারণৈর্দূষীবিষসঞ্জ্ঞাং লভতে; তদাহ– জীর্ণমিত্যাদি| বিষঘ্নৌষধিভিরিতি অগদাদিভির্হতবীর্যং, দাবাগ্নিবাতাতপশোষিতং চেতি দাবাগ্নির্বনাগ্নিঃ| স্বভাবত ইতি স্বভাবাদেব কিমপি বিকাশিব্যবাযিপ্রভৃতিষু দশসু গুণেষু মধ্যে একদ্বিত্র্যাদিগুণহীনং সদ্দূষীবিষতাং প্রাপ্নোতি||২৫||–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

গুণহীনতামেব কার্যেণ দর্শযতি– বীর্যাল্পভাবাদিত্যাদি| ন নিপাতযেদিতি ন মারযতি সদ্যশ্চিরেণ বা| কফান্বিতমিতি কফান্বিতং সত্ মন্দীভূতৌষ্ণ্যাদিগুণং ন মারযতি| বর্ষগণানুবন্ধীতি অপাকাচ্চিরস্থাযি| তেনার্দিতো ভিন্নপুরীষবর্ণ ইতি তেন দূষীবিষেণার্দিতঃ; ভিন্নশব্দোঽত্র পুরীষবর্ণাভ্যাং প্রত্যেকমভিসম্বধ্যতে, ভিন্নবর্ণো বিবর্ণঃ| বৈগন্ধ্যবৈরস্যযুত ইতি বিরুদ্ধগন্ধমুখবৈরস্যযুক্তঃ| বিচেষ্টমানো বিরুদ্ধাং চেষ্টাং কুর্বন্, অরতিমসুখং লভতে||২৬-২৭||

আতঙ্কদর্পণ ব্যাখ্যা (বাচস্পতি বৈদ্য কৃত)

তামেব গুণহীনতাং কার্যেণ দর্শযতি– বীর্যেত্যাদি| তদ্বীর্যস্যাল্পত্বাত্| ন নিপাতযেত্ ন মারযেত্, সদ্যশ্চিরেণ বা| কফান্বিতং সন্মন্দীভূতৌষ্ণ্যাদিগুণত্বাত্ ন মারযতি, বর্ষগণানুবন্ধি অপাকাচ্চিরস্থাযি| তেন গররূপেণ যে দোষা ভবন্তি, তান্দর্শযন্নাহ– তেনেতি| তেন গররূপেণ বিষেণ পীডিতো ভিন্নপুরীষবর্ণাদিকঃ স্যাত্, ভিন্নশব্দোঽত্র পুরীষবর্ণাভ্যাং প্রত্যেকং সম্বধ্যতে| ভিন্নবর্ণো বিবর্ণঃ| বিগন্ধবৈরস্যযুত ইতি বিরুদ্ধগন্ধমুখবৈরস্যযুক্তঃ, বিচেষ্টমান ইতি বিরুদ্ধাং চেষ্টাং কুর্বন্, অরতিমসুখং লভতে||২৬-২৭||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

স্থানবিশেষেণ বিশিষ্টলিঙ্গমাহ– আমাশযস্থ ইত্যাদি| কফাবৃতত্বেন বাতকোপ আমাশযে, তেন কফবাতরোগীত্যুক্তম্| অনিলপিত্তরোগীতি পক্বাশযে দুষ্টবাতসম্বন্ধেন প্রত্যাসন্নস্যাশযস্থস্য পিত্তস্য কোপঃ| ভবেত্ সমুদ্ধস্তশিরোরুহাঙ্গ ইতি অত্রাঙ্গশব্দাত্ পরং রুহশব্দো দ্রষ্টব্যঃ; তেনাযমর্থঃ– সমুদ্ধস্তশিরোরুহাঙ্গরুহঃ, শিরোরুহাঃ কেশাঃ, অঙ্গরুহং লোম; তদুক্তমালম্বাযনে– “সীদন্তি কেশলোমানি তস্মিন্ পক্বাশযং গতে|” ইত্যাদি| বিলূনপক্ষস্তু যথা বিহঙ্গ ইতি মুণ্ডিতপক্ষশকুনিসদৃশঃ, এতত্ পক্বাশযগতস্যৈব লিঙ্গম্||২৮||

আতঙ্কদর্পণ ব্যাখ্যা (বাচস্পতি বৈদ্য কৃত)

স্থানবিশেষেণ বিশিষ্টলিঙ্গমাহ– আমাশযস্থ ইত্যাদি| কফাবৃতত্বেন বাতকোপঃ আমাশযে, তেন কফবাতরোগীত্যুক্তম্| অনিলপিত্তরোগীতি পক্বাশযে দুষ্টবাতসম্বন্ধেন প্রত্যাসন্নাশযস্য পিত্তস্য কোপঃ| ভবেত্ সমুদ্ধস্তশিরোরুহাঙ্গ ইতি অত্রাঙ্গশব্দাত্ পরং রুহশব্দো দ্রষ্টব্যঃ, তেনাযমর্থঃ– সমুদ্ধস্তশিরোরুহাঙ্গরুহঃ| শিরোরুহঃ কেশঃ, অঙ্গরুহং লোমেত্যর্থঃ| তদুক্তমালম্বাযনে– “সীদন্তি কেশলোমানি তস্মিন্ পক্বাশযং গতে|” ইতি| বিলূনপক্ষস্তু যথা বিহঙ্গ ইতি মুণ্ডিতপক্ষশকুনিরিব| এতচ্চ পক্বাশযগতস্যৈব লিঙ্গম্||২৮||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

তস্য রসাদিধাতুগতস্য লিঙ্গমাহ– স্থিতং রসাদিষ্বিত্যাদি| যথোক্তান্ করোতি ধাতুপ্রভবান্ বিকারানিতি সুশ্রুতে ব্যাধিসমুদ্দেশীযাধ্যাযোক্তানন্নাঽশ্রদ্ধাদীন্ করোতি; কোপং চ শীতানিলদুর্দিনেষু যাতীতি কফসম্বন্ধাত্ শীতাদৌ কালে কোপং যাতি| পূর্বং শৃণু তস্য রূপমিতি পূর্বরূপং শৃণ্বিত্যর্থঃ||২৯||

আতঙ্কদর্পণ ব্যাখ্যা (বাচস্পতি বৈদ্য কৃত)

তস্য রসাদিধাতুগতস্য লিঙ্গমাহ– স্থিতমিত্যাদি| যথোক্তান্ সুশ্রুতে ব্যাধিসমুদ্দেশীযোক্তান্ অন্নাঽশ্রদ্ধাদীন্ করোতি| কোপং চ শীতেত্যাদি কফসম্বন্ধাত্ শীতাদৌ কালে শীঘ্রং কোপং যাতি| পূর্বং শৃণু তস্য রূপমিতি পূর্বরূপং শৃণ্বিত্যর্থঃ||২৯||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

তদেবাহ– নিদ্রেত্যাদি| বিশ্লেষহর্ষাবিতি বিশ্লেষো গাত্রস্য শৈথিল্যং, হর্ষো রোমহর্ষঃ| এতানি বাতকফজানি লিঙ্গানি| তত ইতি পূর্বরূপাদনন্তরম্| অন্নমদাবিপাকাবিতি অন্নমদঃ অন্নে ভুক্তে মদো হর্ষঃ অন্নমদঃ; কার্তিকস্তু অন্নবিক্ষেপণমন্নমদমাহ– অন্নমদো রসাজীর্ণমিতি গদাধরঃ; অবিপাকোঽন্নস্যাপাকঃ| পাদকরপ্রশোথমিতি পাদে করে চ প্রকৃষ্টং শোথং করোতি| “মূর্ছাং তথা ছর্দিমথাতিসারম্” ইত্যস্য স্থানে “প্রলেপকং ছর্দিম্” ইত্যাদি পাঠান্তরে প্রলেপকং স্বেদপ্রবৃত্ত্যা পিচ্ছিলং গাত্রং, জ্বরবিশেষং বা||৩০-৩১||

আতঙ্কদর্পণ ব্যাখ্যা (বাচস্পতি বৈদ্য কৃত)

তদেবাহ– নিদ্রেত্যাদি| বিশ্লেষো গাত্রশৈথিল্যং, হর্ষো রোমহর্ষঃ, অঙ্গমর্দো বেদনাবিশেষঃ; এতানি বাতকফজানি, তত ইতি পূর্বরূপাদনন্তরম্| অন্নমদাবিপাকাবিতি অন্নে ভুক্তে মদো হর্ষোঽন্নমদঃ, কার্তিকস্তু অন্নবিক্ষেপণমন্নমদমাহ, অন্নমদো রসাজীর্ণমিতি গদাধরঃ; অবিপাকোঽন্নস্য পাকাভাবঃ| পাদকরপ্রশোথমিত্যাদি পাদে করে চ প্রকৃষ্টং শোফং করোতি| মূর্ছাং তথা ছর্দিমথাতিসারমিত্যস্য স্থানে “প্রলেপকং ছর্দিমথাতিসারম্” ইতি পাঠান্তরম্| তত্র প্রলেপকং পিচ্ছিলস্বেদপ্রবৃত্ত্যা গাত্রলিপ্তিং, জ্বরবিশেষং বা করোতি||৩০-৩১||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

তদেব নানাপ্রকারং যদ্যত্ করোতি তত্তদাহ– উন্মাদমন্যদিত্যাদি| ক্ষপযেচ্চ শুক্রমিতি ষাণ্ঢ্যং করোতীত্যর্থঃ| তাংস্তানিতি বিসর্পবিস্ফোটকাদীন্||৩২||

আতঙ্কদর্পণ ব্যাখ্যা (বাচস্পতি বৈদ্য কৃত)

তদেব নানাপ্রকারং যদ্যত্করোতি তত্তদাহ– উন্মাদমিত্যাদি| গাদ্গদ্যং গদ্গদবাক্যতাম্| তাংস্তানিতি বিস্ফোটকাদীন্||৩২||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

দূষীবিষস্য নিরুক্তিমাহ– দূষিতমিত্যাদি| দেশকালান্নদিবাস্বপ্নৈরিতি দেশঃ প্রচুরানিলশীতবৃষ্টিরনূপাদিঃ, কালঃ শীতানিলদুর্দিনাদিঃ, অন্নং যবতিলকুলত্থাদি, তৈর্দূষিতং কোপিতম্| অভীক্ষ্ণশঃ পুনঃ পুনঃ| ধাতুদূষকত্বেন দূষীবিষম্| সংযোগজং বিষং দ্বিবিধম্– একং সবিষাবিষসংযোগকৃতং কৃত্রিমসঞ্জ্ঞম্, অপরং নির্বিষদ্রব্যকৃতং গরসঞ্জ্ঞম্| যদাহ বৃদ্ধকাশ্যপঃ– “ সংযোগজং চ দ্বিবিধং তৃতীযং বিষমুচ্যতে| গরঃ স্যাদবিষং তত্র, সবিষং কৃত্রিমং মতম্||” ইতি| অত এব রসাযনে চরকঃ– “দংষ্ট্রাবিষে মূলবিষে সগরে কৃত্রিমে বিষে|” ইতি||৩৩-৩৪||

আতঙ্কদর্পণ ব্যাখ্যা (বাচস্পতি বৈদ্য কৃত)

দূষীবিষলক্ষণমাহ– দূষিতমিত্যাদি| দেশঃ প্রচুরানিলশীতবর্ষাতপঃ, কালঃ শীতানিলদুর্দিনাদিঃ, অন্নং যবতিলকুলত্থাদি; অন্নস্যোপলক্ষণত্বাদ্ব্যবাযব্যাযামক্রোধাদযোঽপি গ্রাহ্যাঃ; তৈর্দূষিতং কোপিতম্, অভীক্ষ্ণশঃ পুনঃপুনঃ| ধাতুদূষকত্বেন দূষীবিষম্|| ইদানীং সাধ্যযাপ্যপ্রত্যাখ্যেযং চ দর্শযন্নাহ– সাধ্যমিত্যাদি| সুগমম্| সংযোগজবিষং দ্বিবিধম্– একং সবিষাঽবিষসংযোগকৃতং কৃত্রিমবিষম্, অপরং নির্বিষদ্রব্যকৃতং গরসঞ্জ্ঞম্| যদাহ বৃদ্ধকাশ্যপঃ– “সংযোগজং চ দ্বিবিধং তৃতীযং বিষমুচ্যতে| গরঃ স্যাদবিষং তত্র সবিষং কৃত্রিমং মতম্||” ইতি| অত এব রসাযনে চরকঃ– “দংষ্ট্রাবিষে মূলবিষে সগরে কৃত্রিমে বিষে|” ইতি| আত্মবতঃ পথ্যাশিনঃ| ক্ষীণস্য ক্ষীণধাতোঃ||৩৩-৩৪||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

এতদ্দ্বযমপি দর্শযিতুমাহ– সৌভাগ্যার্থমিত্যাদি| স্ত্রিযঃ সৌভাগ্যার্থং শত্রুপ্রযুক্তা বা সবিষজন্তূনাং স্বেদং, রজশ্চূর্ণং, নানাঙ্গজান্ নানাগরকরান্ মলান্ অন্নাদৌ দদতি| তৈরিতি স্বেদরজঃপ্রভৃতিভিঃ| গরশ্চাস্যেতি অপাকাজ্জঠরাবস্থিতস্বেদাদিরেব গরঃ, অত এব তস্যোদরামযঃ; কিংবা বক্ষ্যমাণমর্মপ্রধমনাদিলক্ষণো ব্যাধির্গরঃ| মর্মপ্রধমনং মর্মব্যথা| শোথলক্ষণমিতি শোথ এব লক্ষণম্| জঠরমুদরম্| অন্যস্য ব্যাধের্লিঙ্গানি দর্শযেদিতি অন্যস্য বিস্ফোটাদের্লিঙ্গং দর্শযতি||৩৫-৩৭||

আতঙ্কদর্পণ ব্যাখ্যা (বাচস্পতি বৈদ্য কৃত)

এতচ্চ দ্বযমপি দর্শযিতুমাহ– সৌভাগ্যার্থমিত্যাদি| স্ত্রিযঃ সৌভাগ্যার্থং শত্রুপ্রযুক্ত্যা বা সবিষজন্তূনাং স্বেদং, রজঃ চূর্ণং, নানাঙ্গজান্মলান্ অন্নাদৌ দদতি| তৈরিতি স্বেদরজঃপ্রভৃতিভিঃ| গর এবাস্যোপজাযত ইতি অপাকাত্ জঠরাবস্থিতস্বেদাদিরেব গরঃ, অত এব তস্যোদরামযঃ| মর্মপ্রধমনং মর্মব্যাধিঃ| শোথলক্ষণমিতি শোথ এব লক্ষণম্| জঠরং উদরম্| অন্যস্য ব্যাধে রক্তপিত্তাদেঃ||৩৫-৩৭||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

সম্প্রতি লূতানাং ঘোরবিষত্বপ্রতিপাদনার্থমৈতিহ্যমাহ– যস্মাল্লূনং তৃণমিত্যাদি| ইতি কিল শ্রুতিঃ– “বিশ্বামিত্রো নরপতিঃ কামধেনোর্বলাত্কারপরিগ্রহেণ মুনিসত্তমং বশিষ্ঠং কোপযাঞ্চকার, কুপিতেন তেনান্তর্জ্বলদবিরলকোপানলজ্বলিতং কুকুলযুগলমিব বহলপাটলং লোচনদ্বযং বহতা ভগবান্ রবিরবলোকিতঃ| ততস্তস্য ভ্রূকুটিভযঙ্করললাটতটপ্রস্যন্দী স্বেদবিন্দূত্করঃ প্রচণ্ডতরঃ প্রত্যাসন্নলূনতৃণে ধেন্বর্থং সম্ভৃতে নিপতিতো লূতাঽভূত্|” ইতি| তাস্তু ষোডশ| যদাহ সুশ্রুতঃ– “ত্রিমণ্ডলা তথা শ্বেতা কপিলা পীতকা তথা| লালামূত্রবিষা রক্তা কঠিনা চাষ্টমী স্মৃতা| সৌবর্ণিকা লাজবর্ণা জালিন্যেকপদী তথা| কৃষ্ণাঽগ্নিবক্ত্রা কাণ্ডা চ মালাগুণ্যষ্টমী মতা||” (সু. ক. অ. ৮) ইতি||৩৮||

আতঙ্কদর্পণ ব্যাখ্যা (বাচস্পতি বৈদ্য কৃত)

সম্প্রতি লূতানাং ঘোরবিষত্বপ্রতিপাদনার্থমৈতিহ্যমাহ– যস্মাদিত্যাদি| যস্মাত্ কারণাত্ মুনেঃ প্রস্বেদবিন্দবো লূনং তৃণং প্রাপ্তাঃ, তস্মাল্লূতা ভাষ্যন্তে, তা লূতাঃ সঙ্খ্যযা ষোডশ ভবন্তি| ইতি কিল শ্রুতিঃ– ‘যত্কামধেনোর্বলাত্পরিগ্রহেণ বিশ্বামিত্রো নৃপতির্বশিষ্ঠং কোপযামাস, তেন চ কুপিতেনান্তর্জ্বলদবিরলকোপানলজ্বলিতং কুকুলযুগলমিব বহলপাটলং নযনযুগলং বহতা ভগবান্ রবিরবলোকিতঃ| ততস্তস্য ভৃকুটিভযঙ্করললাটতটপ্রস্যন্দী স্বেদবিন্দূত্করঃ প্রচণ্ডতরঃ প্রত্যাসন্নলূনতৃণে ধেন্বর্থং সম্ভৃতে নিপতিতো লূতাঽভূত||’ ইতি| তাস্তু ষোডশ| যদাহ সুশ্রুতাচার্যঃ– “ত্রিমণ্ডলা তথা শ্বেতা কপিলা পীতিকা তথা| লালামূত্রবিষা রক্তা কঠিনা চাষ্টমী স্মৃতা|| সৌবর্ণিকা লাজবর্ণা জালিন্যেণীপদী তথা| কৃষ্ণা স্নিগ্ধমুখী কাণ্ডা মালাতুণ্ড্যষ্টমী তথা|| তাসামষ্টৌ কৃচ্ছ্রসাধ্যা বর্জ্যাস্তাবত্য এব তু|” ইতি| মতান্তরেণোত্পত্তিরন্যথা বর্ণ্যতে– “অন্যে বদন্তি ভুক্তস্য দুষ্টস্যান্নস্য মূর্ছনাত্| সম্ভবন্তি বিষস্ফোটা যে লূতাকীটলক্ষণাঃ|| যথাস্বং ধারযন্তস্তে লূতাকীটাস্তু কীর্তিতাঃ|” ইতি||৩৮||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

তাসাং সামান্যদংশলক্ষণমাহ– তাভির্দষ্ট ইত্যাদি| দংশকোথ ইতি দংশদেশে পূতিভাব ইত্যর্থঃ| প্রবৃত্তিঃ ক্ষতজস্যেতি রক্তস্য প্রবর্তনম্| সর্বলূতানামিতি অসাধ্যাষ্টবিধসৌবর্ণিকাদিলূতানামেব সামান্যলক্ষণং জ্ঞেযম্| যতস্ত্রিমণ্ডলাদীনামষ্টানাং কৃচ্ছ্রসাধ্যত্বং, তাভির্দষ্টে শিরোদুঃখমিত্যাদিনা সামান্যলক্ষণমভিধায সৌবর্ণিকাদ্যনন্তরমেতত্ পঠিতবান্ সুশ্রুতঃ| মাধবকরেণ তু ষোডশানাং লূতানাং সামান্যলক্ষণমেতদিত্যভিপ্রাযেণ পঠিতমিতি||৩৯-৪০||–

আতঙ্কদর্পণ ব্যাখ্যা (বাচস্পতি বৈদ্য কৃত)

তাসাং সামান্যদংশলক্ষণমাহ– তাভিরিত্যাদি| দংশকোথঃ দংশদেশে পূতিভাব ইত্যর্থঃ| প্রবৃত্তিঃ ক্ষতজস্যেতি রক্তপ্রবর্তনম্| সর্বলূতানামিত্যাদি| অসাধ্যাষ্টবিধসৌবর্ণিকাদিলূতানামেতত্সামান্যলক্ষণমিতি প্রত্যেতব্যম্| যতঃ কৃচ্ছ্রসাধ্যত্বম্ অষ্টবিধত্রিমণ্ডলাদিলূতানাম্| “তাভির্দষ্টে শিরোদুঃখং কণ্ডূর্দশে চ বেদনা| ভবন্তি চ বিশেষেণ গদাঃ শ্লৈষ্মিকবাতিকাঃ||” ইতি| এবং সামান্যলক্ষণমভিধায সৌবর্ণিকাদ্যনন্তরমেতত্, তাভির্দষ্টে ‘দংশকোথ’ ইত্যাদিকং পঠিতবান্ সুশ্রুতঃ| মাধবকরেণ তু ষোডশলূতানাং সামান্যলক্ষণমেতদিত্যভিপ্রাযেণ পঠিতমিতি||৩৯-৪০||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ত্রিমণ্ডলাদযোঽষ্টৌ দূষীবিষাস্তাসাং লক্ষণমাহ– দংশমধ্যে ত্বিত্যাদি| ঊর্ধ্বাকৃতীতি ঊর্ধ্বগস্বরূপম্; অন্যে ‘দগ্ধাকৃতি’ ইতি পঠন্তি, তদ্ব্যক্তার্থম্| দূষীবিষাভিরিতি কালান্তরপ্রকোপিবিষাভিঃ| দষ্টমিতি দংশম্||৪১-৪২||

আতঙ্কদর্পণ ব্যাখ্যা (বাচস্পতি বৈদ্য কৃত)

ত্রিমণ্ডলাদযোঽষ্টৌ দূষীবিষাস্তাসাং লক্ষণমাহ– দংশমধ্য ইত্যাদি| ঊর্ধ্বাকৃতি ঊর্ধ্বগস্বরূপম্| দূষীবিষাভিরিতি কালান্তরপ্রকোপিবিষাভিঃ, দষ্টমিতি দংশনম্||৪১-৪২||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

সৌবর্ণিকাদীনামষ্টানামসাধ্যানাং প্রাণহরাণাং সামান্যলক্ষণমাহ– শোথ ইত্যাদি| প্রাণান্তিকা ইতি প্রাণহরাঃ||৪৩||

আতঙ্কদর্পণ ব্যাখ্যা (বাচস্পতি বৈদ্য কৃত)

সৌবর্ণিকাদযোঽষ্টাবসাধ্যাঃ প্রাণহরাঃ, তাসাং লক্ষণমাহ– শোথ ইত্যাদি| অন্যে “শ্বেতা সিতা রক্তাঃ পীতা চ” ইতি পঠন্তি| তত্র পিডকা জ্বরশ্চ| প্রাণান্তিকাঃ প্রাণহরাঃ||৪৩||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

আখুদূষীবিষলক্ষণমাহ– আদংশাদিত্যাদি| আদংশাত্ শোণিতমিত্যত্র ‘গলতি’ ইতি শেষঃ| আখবঃ শুক্রবিষাঃ| যদুক্তম্– “শুক্রং পততি যত্রৈষাং শুক্রস্পৃষ্টৈঃ স্পৃশন্তি যত্|” (সু. ক. অ. ৭) ইতি||৪৪||

আতঙ্কদর্পণ ব্যাখ্যা (বাচস্পতি বৈদ্য কৃত)

আখুদূষীবিষলক্ষণমাহ– আদংশাদিত্যাদি| আদংশাচ্ছোণিতমিত্যত্র গলতীতি শেষঃ||৪৪||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

প্রাণহরমূষিকলক্ষণমাহ– মূর্ছেত্যাদি| অঙ্গশোথেতি মূষিকাকার এবাঙ্গশোথো জ্ঞেযঃ| যদুক্তমন্যত্র– “চীযতে গ্রন্থিভিশ্চাঙ্গমাখুশাবকসন্নিভৈঃ|” (সু. ক. অ. ৭) ইতি| শব্দাশ্রুতিঃ বাধির্যম্; অন্যে ‘মন্দা রুচিঃ’ ইতি পঠন্তি অসাধ্যমূষিকৈঃ মারণাত্মকৈঃ||৪৫||

আতঙ্কদর্পণ ব্যাখ্যা (বাচস্পতি বৈদ্য কৃত)

প্রাণহরমূষকলক্ষণমাহ– মূর্ছেত্যাদি| অঙ্গশোথেতি মূষিকাকারোঽঙ্গশোফো বোদ্ধব্যঃ| যদুক্তমন্যত্র– “চীযতে গ্রন্থিভিশ্চাঙ্গমাখুশাবকসন্নিভৈঃ|” ইতি| মন্দশ্রুতিরিতি বাধির্যম্| অন্যে ‘মন্দারুচিঃ’ ইতি পঠন্তি| অসাধ্যমূষিকৈঃ মারণাত্মকৈঃ||৪৫||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

কৃকলাসদষ্টলিঙ্গমাহ– কার্ষ্ণ্যমিত্যাদি| বর্চসো ভেদোঽতিসারঃ||৪৬||

আতঙ্কদর্পণ ব্যাখ্যা (বাচস্পতি বৈদ্য কৃত)

কৃকলাসদষ্টলক্ষণমাহ– বর্চসো ভেদ ইত্যাদি| বর্চসো ভেদঃ অতিসারঃ| কৃকণ্টকঃ কৃকলাসঃ||৪৬||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

বৃশ্চিকবিষলিঙ্গমাহ– দহত্যগ্নিরিবেত্যাদি| বৃশ্চিকঃ স্বনামখ্যাতঃ, স চ আরাবিষঃ| দষ্টোঽসাধ্যশ্চ হৃদ্ঘ্রাণরসনোপহতো নর ইতি যদা হৃদযনাসাজিহ্বোপঘাতো ভবতি তদা তদ্দষ্টো ন সাধ্যঃ| মাংসৈঃ পতদ্ভিরত্যর্থং বেদনার্তো জহাত্যসূনিত্যাদিনাঽযমপরোঽসাধ্যপ্রকারঃ| ‘দষ্টোঽসাধ্যৈস্তু’ ইতি পাঠপক্ষেঽসাধ্যৈঃ সদ্যঃপ্রাণহরৈর্বৃশ্চিকৈর্দষ্টো যথোক্তলিঙ্গো ভবতি| চরকেঽপ্যযমেব পাঠঃ||৪৭-৪৮||

আতঙ্কদর্পণ ব্যাখ্যা (বাচস্পতি বৈদ্য কৃত)

বৃশ্চিকদষ্টলক্ষণমাহ– দহতীত্যাদি| ঊর্ধ্বম্ উপরিষ্টাদাশু যাতি পশ্চাচ্চ দংশে তিষ্ঠতি| বৃশ্চিকদষ্টাসাধ্যলক্ষণমাহ– হৃদ্ঘ্রাণরসনোপহতো নর ইত্যাদি| যদা হৃদযনাসাজিহ্বোপঘাতো ভবতি, তদা দষ্টো ন সাধ্যঃ| মাংসৈঃ পতদ্ভিরত্যর্থং বেদনার্তো জহাত্যসূনিত্যযমপরোঽসাধ্যঃ| ‘দষ্টোঽসাধ্যৈঃ’ ইতি পাঠে অসাধ্যৈঃ সদ্যঃপ্রাণহরৈর্বৃশ্চিকৈর্দষ্টো যথোক্তলিঙ্গো ভবতি||৪৭-৪৮||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

কণভদষ্টলিঙ্গমাহ– বিসর্প ইত্যাদি| কণভঃ কীটবিশেষঃ||৪৯||

আতঙ্কদর্পণ ব্যাখ্যা (বাচস্পতি বৈদ্য কৃত)

কণভদষ্টলক্ষণমাহ– বিসর্প ইত্যাদি| কণভঃ কীটবিশেষঃ| বিশীর্যতে গলতি||৪৯||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

উচ্চিটিঙ্গদষ্টলিঙ্গমাহ– হৃষ্টরোমেত্যাদি||৫০||

আতঙ্কদর্পণ ব্যাখ্যা (বাচস্পতি বৈদ্য কৃত)

উচ্চিটিঙ্গদষ্টলিঙ্গমাহ– হৃষ্টরোমেতি| উচ্চিটিঙ্গনাম্না বৃশ্চিকেন দষ্টঃ পুমান্, হৃষ্টরোমা কণ্টকিতদেহঃ, স্তব্ধমেহনঃ, তথা ভৃশার্তিযুক্তঃ| শীতোদকেনেবাঙ্গানি সিক্তানি মন্যতে| সুশ্রুতস্তু উচ্চিটিঙ্গং কীটবিশেষমাহ||৫০||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

সবিষমণ্ডূকাদিদষ্টলিঙ্গমাহ– একদংষ্ট্রার্দিত ইত্যাদি| স্বভাবাদেকযা দংষ্ট্রযা কৃতো দংশো ভবতি||৫১-৫২||

আতঙ্কদর্পণ ব্যাখ্যা (বাচস্পতি বৈদ্য কৃত)

সবিষমণ্ডূকদষ্টলক্ষণমাহ– একেত্যাদি| স্বভাবাদেকদংষ্ট্রযা কৃতো দংশো ভবতি|| সবিষমত্স্যলক্ষণমাহ– মত্স্যা ইত্যাদি| সুগমম্| সবিষজলৌকাদষ্টলক্ষণমাহ– কণ্ডূমিত্যাদি| কুর্যুরিতি পূর্বক্রিযযা সম্বন্ধঃ||৫১-৫২||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

গৃহগোধিকাদষ্টলিঙ্গমাহ– বিদাহমিত্যাদি| গৃহগোধিকা জ্যেষ্ঠী, অন্যে তু ভ্রামরকমাহুঃ| অত্র বক্ষ্যমাণং কুর্যাদিতি সম্বন্ধনীযং, তেন বিদাহাদীনাং কর্মত্বম্|৫৩|–

আতঙ্কদর্পণ ব্যাখ্যা (বাচস্পতি বৈদ্য কৃত)

গৃহগোধিকাদষ্টলক্ষণমাহ– বিদাহমিত্যাদি| গৃহগোধিকা ব্রাহ্মণীতি লোকে, অন্যে ভ্রমরকমাহুঃ| অত্র বক্ষ্যমাণং ‘কুর্যাত্’ ইতি সম্বন্ধনীযম্|৫৩|–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

শতপদীদষ্টলক্ষণমাহ– দংশে ইত্যাদি| কুর্যাচ্ছতপদীবিষমিতি শতপদী কারুণ্ডিকা||৫৩||

আতঙ্কদর্পণ ব্যাখ্যা (বাচস্পতি বৈদ্য কৃত)

শতপদীবিষং দংশে স্বেদং রুজং দাহং কুর্যাত্| শতপদী কারণ্ডী||৫৩||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

মশকদষ্টলিঙ্গমাহ– কণ্ডূমানিত্যাদি| অসাধ্যকীটসদৃশমিতি অসাধ্যকীটৈর্লূতাদিভিঃ সমলক্ষণমিতি| অসাধ্যং মশকক্ষতমিতি পঞ্চসু মশকেষু মধ্যে পার্বতীযমশকক্ষতমসাধ্যম্| যদাহ সুশ্রুতঃ– “ পার্বতীযৈস্তু কীটৈশ্চ প্রাণহরৈস্তুল্যলক্ষণম্|” ইতি||৫৪||

আতঙ্কদর্পণ ব্যাখ্যা (বাচস্পতি বৈদ্য কৃত)

মশকদষ্টলক্ষণমাহ– কণ্ডূমানিত্যাদি| সুগমম্| অসাধ্যকীটসদৃশমিত্যাদি অসাধ্যকীটৈর্লূতাদিভিঃ সমবেদনমিত্যর্থঃ| অসাধ্যং মশকক্ষতমিতি পঞ্চসু মশকেষু পর্বতীযমশকক্ষতমসাধ্যম্| সুশ্রুতেঽপ্যুক্তম্– “পর্বতীযৈস্তু কীটকৈঃ প্রাণহরৈস্তুল্যলক্ষণম্|” ইতি||৫৪||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

মক্ষিকাদষ্টলিঙ্গমাহ– সদ্য ইত্যাদি| তাসাং চ স্থগিকাঽসুহৃদিতি তাসাং সুশ্রুতোক্তষণ্মক্ষিকাণাং মধ্যে স্থগিকা প্রাণহরেত্যর্থঃ||৫৫||

আতঙ্কদর্পণ ব্যাখ্যা (বাচস্পতি বৈদ্য কৃত)

মক্ষিকাদষ্টলক্ষণমাহ– সদ্য ইত্যাদি| তাসাং তু সুশ্রুতোক্তানাং মধ্যে স্থগিকাখ্যা মক্ষিকা অসুহৃত্ প্রাণহরীত্যর্থঃ||৫৫||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

চতুষ্পদ্ভিরিতি চতুষ্পাদা ব্যাঘ্রাদযঃ| দ্বিপাদা বনমানুষবানরাদযঃ||৫৬||

আতঙ্কদর্পণ ব্যাখ্যা (বাচস্পতি বৈদ্য কৃত)

চতুষ্পদদ্বিপদদষ্টলক্ষণমাহ– চতুষ্পদ্ভিরিত্যাদি| চতুষ্পদা ব্যাঘ্রাদযঃ, দ্বিপদা মানববানরাদযঃ, তৈর্যত্ নখক্ষতং দন্তক্ষতং চ, তচ্ছূযতে শোফযুক্তং ভবতি, তথা পচ্যতে, তথা স্রবতি, তথা জ্বরযতি||৫৬||

আতঙ্কদর্পণ ব্যাখ্যা (বাচস্পতি বৈদ্য কৃত)

অত্র কেচিত্ বিষাধিকারসামান্যাত্ শ্বাদীনামপি ব্যাঘ্রাদীনাং ভল্লকানাং বিষলক্ষণং ভণন্তি| তদাহ– শ্বেতেত্যাদি| শ্বা কুক্কুরঃ, শৃগালঃ প্রসিদ্ধঃ, তরক্ষুর্মৃগশত্রুর্ব্যাঘ্রবিশেষঃ, চরষ ইতি লোকে, ঋক্ষো ভল্লূকঃ অতিলোমশঃ, ঋচ্ছ ইতি লোকে প্রসিদ্ধঃ| আদিশব্দাদ্ বৃকচিত্রাদযো হিংস্রাঃ পশবো গ্রাহ্যাঃ| শ্বাদীনাং যদা অনিলো বাযুঃ শ্লেষ্মপ্রদুষ্টঃ সন্ সঞ্জ্ঞাবহাশ্রিতঃ সঞ্জ্ঞাবহস্রোতোগতঃ সঞ্জ্ঞাং সম্যগ্জ্ঞানং মুষ্ণাতি হরতি| সম্যগ্জ্ঞানহরণাচ্চ হীদৃশো ভবতীত্যাহ– তদেত্যাদি| প্রস্রস্তং স্থানচ্যুতং, লাঙ্গূলং বালধিঃ, মেহনং চ| প্রস্রস্তশব্দো লাঙ্গূলাদিভিঃ প্রত্যেকং সম্বন্ধনীযঃ| অতিলালাবান্ অতিশযেন লালাস্রাবযুক্তঃ| অব্যক্তবধিরোঽন্ধশ্চ ন ব্যক্তো বধিরোঽন্ধো বেত্যর্থঃ| অন্যোন্যমভিধাবতি পরস্পরং দষ্টুমভিধাবতি| হনুস্কন্ধস্থানে ‘শূনস্কন্ধঃ’ ইতি কেচিত্পঠন্তি| ‘প্রমূঢোঽন্যতমস্তেষাং খাদন্বিপরিধাবতি|’ ইত্যত্রোত্তরার্ধং কেচিত্পঠন্তি| এষাং মধ্যেঽন্যতম একতমঃ প্রমূঢঃ সন্ খাদন্ বিশেষেণ পরিধাবতি| তেনেতি দংষ্ট্রিণা| সুপ্ততা বাধির্যম্| উপলক্ষিতো যুক্ত ইত্যর্থঃ||৫৭-৬০||

আতঙ্কদর্পণ ব্যাখ্যা (বাচস্পতি বৈদ্য কৃত)

ইদানীং শ্বাদিদষ্টস্য রিষ্টমাহ– যেনেত্যাদি| চেষ্টাং ক্রিযাং, রুতং শব্দং, বহুশঃ অনেকবারং, প্রতিকুর্বাণঃ অনুকুর্বন্, ক্রিযাহীনঃ স্বকীযকাযাদিব্যাপাররহিতঃ| ইদানীমপরমপ্যরিষ্টং নির্দিশন্নাহ– দংষ্ট্রিণেত্যাদি| তদ্দংষ্ট্রিরূপদর্শনমরিষ্টং মরণলক্ষণম্| পুনরপরমরিষ্টং নির্দিশন্নাহ– ত্রস্যতীত্যাদি| অকস্মাজ্জলত্রাসহেতুং বিনা, অপিশব্দাত্ শ্রুত্বাঽপি জলত্রাসরোগং জানীযাত্তস্যেতি সম্বন্ধঃ| রিষ্টমিত্যাদি| তদপি জলত্রসনমরিষ্টং মরণং কীর্তিতম্| এতচ্চারিষ্টং দষ্টস্য| অত্রার্থে তন্ত্রান্তরে– “ব্যাধিতেন শ্বাদিনা দষ্টস্য শ্লেষ্মা কুপিতঃ স্রোতোবাহিনীর্ধমনীরনুপ্রবিশ্য সঞ্জ্ঞানাশমাপাদযতি| ততো নরঃ স্পৃষ্ট্বা দৃষ্ট্বা শ্রুত্বা চ জলং ত্রস্যতি, তস্যাপি তদ্রিষ্টং জানীযাত্|” ইতি| এবমদষ্টস্যাপি জলত্রাসো রিষ্টমেবেতি দর্শযন্নাহ– অদষ্ট ইত্যাদি| অস্মিন্নর্থে তন্ত্রান্তরে– “ অদষ্টস্যাপি জন্তোর্হি জলত্রাসো ভবেদ্যদি| তস্যারিষ্টং হি ভিষজো ব্রুবতে বিষচিন্তকাঃ|| জলং বিনা জলত্রাসো জাযতে শ্লেষ্মসঞ্চযাত্|” ইতি| অথ চোক্তম্– “বুদ্ধিস্থানং যদা শ্লেষ্মা কেবলঃ প্রতিপদ্যতে| তদা বুদ্ধৌ নিরুদ্ধাযাং শ্লেষ্মণাঽধিষ্ঠিতো নরঃ|| জাগ্রত্সুপ্তোঽথবাঽঽত্মানং মজ্জন্তমিব মন্যতে| সলিলাত্ত্রস্যতি তদা জলত্রাসং তু তং বিদুঃ|| শ্লেষ্মঘ্নং তত্র কর্তব্যং শোধনং শমনানি চ| আহারস্য বিধানেন যাবত্স প্রকৃতিং ব্রজেত্||” ইতি| অযং জলত্রাসঃ কুপিতকফস্য ভবতীতি রিষ্টং ন ভবতি| অত এবাঽত্র চিকিত্সোপদেশঃ| দষ্টস্য তু রিষ্টমেব, তথা স্বস্থস্য জাগ্রতো বা জলমন্তরেণ ত্রাসো রিষ্টমেবেতি দর্শযন্নাহ– প্রসুপ্ত ইতি| সুগমম্||৬১-৬৪||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

বিষাতুরঃ কীদৃশো নির্বিষো ভবতীতি দর্শযিতুমাহ– প্রশান্তদোষমিত্যাদি| অন্নাভিকামমিত্যনেন প্রকৃতিস্থাগ্নিতোক্তা| যদাহ চরকঃ– “প্রাযেণোপহতাগ্নিত্বাত্ সপিচ্ছমতিসার্যতে| প্রাপ্নোতি চাস্যবৈরস্যং ন চান্নমভিনন্দতি||” ইতি| সমমূত্রবিট্কমিতি অক্ষীণানতিরিক্তমূত্রপুরীষম্| অন্যে ‘ সমসূত্রজিহ্বম্’ ইতি পঠন্তি, তদাঽযমর্থঃ– সমমবিকৃতং সূত্রং জিহ্বা চ যস্য স তথা; এতেন বিষজুষ্টা জিহ্বা ন রসবোধিনী ভবতি, সূত্রমপি জিহ্বাযাং বিষপ্রভাবেণ বৈকৃতং ভবতীতি প্রতিপাদযতি| জিহ্বাগ্রহণেনৈব সূত্রগ্রহণে সিদ্ধে তস্য চ রসগ্রহণে অনুগুণত্বপ্রতিপাদনার্থং পৃথগুপাদানম্| অনেন শ্লোকেন “সমদোষঃ সমাগ্নিশ্চ” (সু. সূ. অ. ১৫) ইত্যাদিশ্লোকস্য সকল এবার্থ উপবদ্ধঃ||৬৫||

আতঙ্কদর্পণ ব্যাখ্যা (বাচস্পতি বৈদ্য কৃত)

অবিষো নরঃ কীদৃশো ভবতি তদ্দর্শযিতুমাহ– প্রসন্নদোষমিত্যাদি| প্রসন্নদোষং সমাবস্থিতবাতাদিকম্| প্রকৃতিস্থধাতুমিতি দধতীতি ধাতবো রসাদযো মলাদযশ্চ| অন্নাভিকামং ভোজনাভিলাষম্, অন্নাভিকামমিত্যনেন প্রকৃতিস্থাগ্নিতোক্তা| যদাহ চরকঃ– “প্রাযেণোপহতাগ্নিত্বাত্সপিচ্ছমতিসার্যতে| প্রাপ্নোতি চাস্যবৈরস্যং ন চান্নমভিনন্দতি||” ইতি| সমমূত্রবিট্কমিতি অক্ষীণানতিরিক্তমূত্রপুরীষম্| অন্যে ‘সমমূলজিহ্বম্’ ইতি পঠন্তি, তদাযমর্থঃ– সমম্ অবিকৃতং মূলং জিহ্বা চ যস্য স তথা| এতেন বিষদুষ্টজিহ্বা রসবেদিনী ন ভবতি, মূলমপি জিহ্বাবত্ বিষপ্রভাবেণ বিকৃতং ভবতীতি প্রতিপাদযতি| জিহ্বাগ্রহণেনৈব মূলগ্রহণে সিদ্ধে, তস্য রসগ্রহণেঽর্ধগুণত্বপ্রতিপাদনার্থং পৃথগুপাদানম্| অনেন শ্লোকেন “সমদোষঃ সমাগ্নিশ্চ” ইত্যাদেঃ শ্লোকস্য সকল এবার্থো নিবদ্ধঃ| বৈদ্যোঽবগচ্ছেদবিষং মনুষ্যমিতি উক্তলক্ষণঃ পুরুষোঽবিষো ভবতি, বিপরীতলক্ষণস্তু বিষাতুরঃ| তথাহি– “প্রবৃদ্ধদোষাঽপ্রকৃতিস্থধাতুমনন্নকাঙ্ক্ষং হতমূলজিহ্বম্| বিরুদ্ধবর্ণেন্দ্রিযবিত্তচেষ্টং বৈদ্যোঽবগচ্ছেত্সবিষং মনুষ্যম্||” ইতি| ইদং সবিষাবিষলক্ষণমিতি||৬৫||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ইতি শ্রীকণ্ঠদত্তকৃতাযাং মধুকোশব্যাখ্যাযাং বিষনিদানং সমাপ্তম্||৬৯|| সূক্তিমুক্তাবলীগ্রন্থে গুরুণা যন্ন গুম্ফিতম্|| মযা সমস্তমগ্রন্থি তদ্গিরা শুদ্ধিযুক্তযা||১|| গুণনিধিগুরুবদ্ধে দাম্নি বাঙ্মালতীনাং পরমপরিমলশ্রীধাম্নি লব্ধাবলম্বম্|| স্ফুরতি বচনকুন্দং মন্দসৌরভ্যলেশাদ্বচনমপি মদীযং কিঞ্চিদেতত্ কদাচিত্||২|| ইতি শ্রীবিজযরক্ষিতশ্রীকণ্ঠদত্তাভ্যাং বিরচিতা মধুকোশব্যাখ্যা সমাপ্তা||৬৯||

আতঙ্কদর্পণ ব্যাখ্যা (বাচস্পতি বৈদ্য কৃত)

ইতি শ্রীবাচস্পতিবৈদ্যবিরচিতাযাং মাধবনিদানব্যাখ্যাযামাতঙ্কদর্পণাখ্যাযাং বিষনিদানম্||৬৯||