Adhikarana ১ (১-২) · Śloka ২
অথাতো ধামার্গবকল্পং ব্যাখ্যাস্যামঃ||১|| ইতি হ স্মাহ ভগবানাত্রেযঃ||২||
अथातो धामार्गवकल्पं व्याख्यास्यामः||१|| इति ह स्माह भगवानात्रेयः||२||
🔊 Audio coming soon
উক্তসম্বন্ধাদ্ধামার্গবকল্পোঽভিধীযতে||১-২||
Adhikarana ২ (৩) · Śloka ৩
কর্কোটকী কোঠফলা মহাজালিনিরেব চ| ধামার্গবস্য পর্যাযা রাজকোশাতকী তথা||৩||
कर्कोटकी कोठफला महाजालिनिरेव च| धामार्गवस्य पर्याया राजकोशातकी तथा||३||
🔊 Audio coming soon
তত্র কর্কোটকীত্যাদিনা পর্যাযকথনম্| ধামার্গবঃ পীতঘোষকঃ||৩||
Adhikarana ৩ (৪) · Śloka ৫
গরে গুল্মোদরে কাসে বাতে শ্লেষ্মাশযস্থিতে| কফে চ কণ্ঠবক্রস্থে কফসঞ্চযজেষু চ||৪|| রোগেষ্বেষু প্রযোজ্যং স্যাত্ স্থিরাশ্চ গুরবশ্চ যে|৫|
गरे गुल्मोदरे कासे वाते श्लेष्माशयस्थिते| कफे च कण्ठवक्रस्थे कफसञ्चयजेषु च||४|| रोगेष्वेषु प्रयोज्यं स्यात् स्थिराश्च गुरवश्च ये|५|
🔊 Audio coming soon
স্থিরাশ্চ গুরবশ্চ যে ইত্যত্র ‘গদাঃ’ ইতি শেষঃ||৪||-
Adhikarana ৪ (৫) · Śloka ৫
ফলং পুষ্পং প্রবালং চ বিধিনা তস্য সংহরেত্||৫||
फलं पुष्पं प्रवालं च विधिना तस्य संहरेत्||५||
🔊 Audio coming soon
বিধিনেতি ভেষজগ্রহণোক্তেন বিধিনা||৫||
Adhikarana ৫ (৬) · Śloka ৬
প্রবালস্বরসং শুষ্কং কৃত্বা চ গুলিকাঃ পৃথক্| কোবিদারাদিভিঃ পেযাঃ কষাযৈর্মধুকস্য চ||৬||
प्रवालस्वरसं शुष्कं कृत्वा च गुलिकाः पृथक्| कोविदारादिभिः पेयाः कषायैर्मधुकस्य च||६||
🔊 Audio coming soon
প্রবালেত্যাদিনা নবযোগানাহ| প্রবালস্য স্বরসঃ প্রবালস্বরসঃ| অত্র কোবিদারাদিকষাযৈর্গুডিকাকরণং পানং চ জ্ঞেযম্||৬||
Adhikarana ৬ (৭) · Śloka ৭
পুষ্পাদিষু পযোযোগাশ্চত্বারঃ পঞ্চমী সুরা| পূর্ববত্...|৭|
पुष्पादिषु पयोयोगाश्चत्वारः पञ्चमी सुरा| पूर्ववत्...|७|
🔊 Audio coming soon
পুষ্পাদিষ্বিত্যাদিনা জীমূতককল্পবিধানেন নির্দিষ্টাশ্চত্বারঃ ক্ষীরপ্রযোগাঃ, পঞ্চমশ্চ সুরাযোগোঽতিদিশ্যতে; তে চ ‘পযঃ পুষ্পেঽস্য’ (ক. অ. ২) ইত্যাদিনোক্তা জ্ঞেযাঃ| পূর্ববদিতি পূর্বেণ সম্বধ্যতে|৭|-
Adhikarana ৭ (৭-৮) · Śloka ৯
... জীর্ণশুষ্কাণামতঃ কল্পঃ প্রবক্ষ্যতে||৭|| মধুকস্য কষাযেণ বীজকণ্ঠোদ্ধৃতং ফলম্| সগুডং ব্যুষিতং রাত্রিং কোবিদারাদিভিস্তথা||৮|| দদ্যাদ্গুল্মোদরার্তেভ্যো যে চাপ্যন্যে কফামযাঃ|৯|
... जीर्णशुष्काणामतः कल्पः प्रवक्ष्यते||७|| मधुकस्य कषायेण बीजकण्ठोद्धृतं फलम्| सगुडं व्युषितं रात्रिं कोविदारादिभिस्तथा||८|| दद्याद्गुल्मोदरार्तेभ्यो ये चाप्यन्ये कफामयाः|९|
🔊 Audio coming soon
জীর্ণশুষ্কাণামিত্যাদিনা নবকষাযযোগানাহ, তথা ‘জাত্যাঃ’ ইত্যাদিনা একাদশ কষাযযোগান্ বক্ষ্যতি; এবং বিংশতিঃ কষাযযোগাঃ সঙ্গ্রহে বক্ষ্যমাণাঃ পূর্যন্তে| বীজকণ্ঠোদ্ধৃতং ফলমিতি যত্র বীজানি বদ্ধানি সন্তি স বীজকণ্ঠ উদ্ধৃতো যস্মিন্ তদ্বীজকণ্ঠোদ্ধৃতং ফলম্| অত্র চ পূর্বনিপাতানিযম আহিতাগ্ন্যাদিপূর্বনিপাতবদ্বোধ্যঃ| এবম্ভূতং চ ফলং কষাযেণ সগুডেন পূরিতং রাত্রিব্যুষিতং কর্তব্যম্| উক্তং হি জতূকর্ণে- ধামার্গবকল্পে- “ধামার্গবফলেষূদ্ধৃতবীজমধ্যেষু সগুডোষিতাঃ কোবিদারাদিকষাযা নব” ইতি| গুল্মিনাং চাবস্থাযাং বমনং হিতমেব, তেনেহ গুল্মবিষযতযা বমনোপদর্শনং ন বিরোধি||৭-৮||-
Adhikarana ৮ (৯) · Śloka ৯
দদ্যাদন্নেন সংযুক্তং ছর্দিহৃদ্রোগশান্তযে||৯||
दद्यादन्नेन संयुक्तं छर्दिहृद्रोगशान्तये||९||
🔊 Audio coming soon
দদ্যাদিত্যাদিনা একোঽন্নযোগ উচ্যতে| অন্নে চ ধামার্গবস্য সংযোগেনৈকো যোগঃ||৯||
Adhikarana ৯ (১০) · Śloka ১০
চূর্ণৈর্বাঽপ্যুত্পলাদীনি ভাবিতানি প্রভূতশঃ| রসক্ষীরযবাগ্বাদিতৃপ্তো ঘ্রাত্বা বমেত্ সুখম্||১০||
चूर्णैर्वाऽप्युत्पलादीनि भावितानि प्रभूतशः| रसक्षीरयवाग्वादितृप्तो घ्रात्वा वमेत् सुखम्||१०||
🔊 Audio coming soon
চূর্ণৈরিত্যাদিনা ঘ্রেযে একযোগমাহ| উত্পলাদীনাং চাত্র ভেদোঽবিবক্ষিতঃ উত্পলস্যৈক এব ঘ্রেযযোগঃ| অত্র আদিশব্দেন সৌগন্ধিকপদ্মাদীনাং গ্রহণম্| প্রভূতশশ্চূর্ণৈর্ভাবিতানীতি জ্ঞেযম্||১০||
Adhikarana ১০ (১১-১২) · Śloka ১২
চূর্ণীকৃতস্য বর্তিং বা কৃত্বা বদরসম্মিতাম্| বিনীযাঞ্জলিমাত্রে তু পিবেদ্গোঽশ্বশকৃদ্রসে ||১১|| পৃষতর্ষ্যকুরঙ্গাহ্বগজোষ্ট্রাশ্বতরাবিকে| শ্বদংষ্ট্রখরখঙ্গানাং চৈবং পেযা শকৃদ্রসে ||১২||
चूर्णीकृतस्य वर्तिं वा कृत्वा बदरसम्मिताम्| विनीयाञ्जलिमात्रे तु पिबेद्गोऽश्वशकृद्रसे ||११|| पृषतर्ष्यकुरङ्गाह्वगजोष्ट्राश्वतराविके| श्वदंष्ट्रखरखङ्गानां चैवं पेया शकृद्रसे ||१२||
🔊 Audio coming soon
চূর্ণীকৃতস্যেত্যাদিনা গোঽশ্বশকৃদ্রসে ইতি দ্বৌ যোগৌ| তথা পৃষতেত্যাদিদশযোগৈঃ সমং শকৃদ্রসযোগসম্বন্ধাদ্দ্বাদশ শকৃদ্যোগা উচ্যন্তে| পৃষতঃ বিন্দুচিত্রিতহরিণঃ; ঋষ্যঃ নীলাণ্ডঃ, কুরঙ্গঃ চঞ্চলগতিঃ, অশ্বতরঃ বেগসরঃ, শ্বদংষ্ট্রঃ চতুর্দংষ্ট্রো মৃগবিশেষঃ||১১-১২||
Adhikarana ১১ (১৩-১৪) · Śloka ১৫
জীবকর্ষভকৌ বীরামাত্মগুপ্তাং শতাবরীম্| কাকোলীং শ্রাবণীং মেদাং মহামেদাং মধূলিকাম্||১৩|| একৈকশোঽভিসঞ্চূর্ণ্য সহ ধামার্গবেণ তে| শর্করামধুসংযুক্তা লেহা হৃদ্দাহকাসিনাম্||১৪|| সুখোদকানুপানাঃ স্যুঃ পিত্তোষ্মসহিতে কফে|১৫|
जीवकर्षभकौ वीरामात्मगुप्तां शतावरीम्| काकोलीं श्रावणीं मेदां महामेदां मधूलिकाम्||१३|| एकैकशोऽभिसञ्चूर्ण्य सह धामार्गवेण ते| शर्करामधुसंयुक्ता लेहा हृद्दाहकासिनाम्||१४|| सुखोदकानुपानाः स्युः पित्तोष्मसहिते कफे|१५|
🔊 Audio coming soon
জীবকেত্যাদিনা দশ লেহানাহ| মধূলিকা ‘মর্কটহস্ত’ ইতি খ্যাতা| অত্র লেহেষু ধামার্গবাদিতরদ্রব্যচূর্ণস্য সমানত্বং; মধুশর্করযোশ্চ তাবতী মাত্রা যাবত্যা লেহত্বাপত্তির্ভবতি| পিত্তোষ্মসহিতে কফে ইতি উদ্যতোষ্মগুণেন পিত্তেন যুক্তে কফে; অন্যে তু পিত্তোষ্মশব্দেন পিত্তোষ্মণা কৃতং জ্বরমাহুঃ||১৩-১৪||-
Adhikarana ১২ (১৫) · Śloka ১৫
ধান্যতুম্বুরুযূষেণ কল্কঃ সর্ববিষাপহঃ||১৫||
धान्यतुम्बुरुयूषेण कल्कः सर्वविषापहः||१५||
🔊 Audio coming soon
ধান্যেত্যাদিনৈকং কল্কযোগমাহ| ধান্যতুম্বরুক্বাথ এব ধান্যতুম্বুরুযূষঃ| উক্তং হি জতূকণ “ধান্যতুম্বুরুরসেন কল্কো বিষনুত্” ইতি||১৫|
Adhikarana ১৩ (১৬-১৭) · Śloka ১৮
জাত্যাঃ সৌমনসাযিন্যা রজন্যাশ্চোরকস্য চ| বৃশ্চীরস্য মহাক্ষুদ্রসহাহৈমবতস্য চ||১৬|| বিম্ব্যাঃ পুনর্নবাযা বা কাসমর্দস্য বা পৃথক্ | একং ধামার্গবং দ্বে বা কষাযে পরিমৃদ্য তু||১৭|| পূতং মনোবিকারেষু পিবেদ্বমনমুত্তমম্|১৮|
जात्याः सौमनसायिन्या रजन्याश्चोरकस्य च| वृश्चीरस्य महाक्षुद्रसहाहैमवतस्य च||१६|| बिम्ब्याः पुनर्नवाया वा कासमर्दस्य वा पृथक् | एकं धामार्गवं द्वे वा कषाये परिमृद्य तु||१७|| पूतं मनोविकारेषु पिबेद्वमनमुत्तमम्|१८|
🔊 Audio coming soon
জাত্যা ইত্যাদিনা একাদশকষাযযোগানাহ| জাতী সৌমনস্যাযিনী, অন্যে যূথিকাং বদন্তি| বৃশ্চীরঃ শ্বেতপুনর্নবা| মহাসহা ক্ষুদ্রসহা মুদ্গমাষপর্ণ্যৌ| হৈমবতী বচা||১৬-১৭||-
Adhikarana ১৪ (১৮) · Śloka ১৮
তচ্ছৃতক্ষীরজং সর্পিঃ সাধিতং বা ফলাদিভিঃ||১৮||
तच्छृतक्षीरजं सर्पिः साधितं वा फलादिभिः||१८||
🔊 Audio coming soon
তচ্ছৃতেত্যাদিনৈকং ঘৃতযোগমাহ||১৮||
Adhikarana ১৫ (১৯-২০) · Śloka ২০
তত্র শ্লোকৌ- পল্লবে নব চত্বারঃ ক্ষীর একঃ সুরাসবে| কষাযে বিংশতিঃ কল্কে দশ দ্বৌ চ শকৃদ্রসে||১৯|| অন্ন একস্তথা ঘ্রেযে দশ লেহাস্তথা ঘৃতম্| কল্পে ধামার্গবস্যোক্তাঃ ষষ্টির্যোগা মহর্ষিণা||২০||
तत्र श्लोकौ- पल्लवे नव चत्वारः क्षीर एकः सुरासवे| कषाये विंशतिः कल्के दश द्वौ च शकृद्रसे||१९|| अन्न एकस्तथा घ्रेये दश लेहास्तथा घृतम्| कल्पे धामार्गवस्योक्ताः षष्टिर्योगा महर्षिणा||२०||
🔊 Audio coming soon
পল্লবে নবেত্যাদিসঙ্গ্রহে ব্যুত্ক্রমসঙ্গ্রহাভিধানং ছন্দোঽনুরোধাত্| দশ দ্বৌ চেতি দ্বাদশেত্যর্থঃ||১৯-২০||
Adhikarana পুষ্পিকা · Śloka ৪
ইত্যগ্নিবেশকৃতে তন্ত্রে চরকপ্রতিসংস্কৃতেঽপ্রাপ্তে দৃঢবলসম্পূরিতে কল্পস্থানে ধামার্গবকল্পো নাম চতুর্থোঽধ্যাযঃ||৪||
इत्यग्निवेशकृते तन्त्रे चरकप्रतिसंस्कृतेऽप्राप्ते दृढबलसम्पूरिते कल्पस्थाने धामार्गवकल्पो नाम चतुर्थोऽध्यायः||४||
🔊 Audio coming soon
ইতি শ্রীচক্রপাণিদত্তবিরচিতাযামাযুর্বেদদীপিকাযাং চরকতাত্পর্যটীকাযাং কল্পস্থানে ধামার্গবকল্পো নাম চতুর্থোঽধ্যাযঃ||৪||