৯. জ্বরচিকিত্সিতম্

স্বস্থোর্জস্করমভিধায ব্যাধিনির্ঘাতকরচিকিত্সিতং বক্তব্যম্| সর্বরোগপ্রধানত্বেন জ্বরস্যৈবাদৌ চিকিত্সিতং তত্রোচ্যতে| জ্বরস্য চ যথা প্রাধান্যং তথাঽত্রৈব বক্ষ্যতি| জ্বরচিকিত্সিতাভিধাযকোঽধ্যাযো জ্বরচিকিত্সিতমুচ্যতে, অভিধানাভিধেযযোরভেদোপচারাত্| এবমুত্তরাধ্যাযেষ্বপি ব্যাখ্যেযম্||১-২||

বিজ্বরমিতি বিজ্বরশব্দো নীরোগোপদর্শকঃ ; যতো জ্বরশব্দেন চাত্র সামান্যেন রোগোঽভিমতঃ, যথা- “জ্বরো বিকারো রোগশ্চ” ইত্যাদি| নীরোগত্বেনেহ রোগপ্রশমনপৃচ্ছাশ্রযতাং গুরোর্ব্রবীতি| জ্বরসন্দেহমিতি জ্বরনিদানোক্তাতিরিক্তজ্বরধর্মবিষযং সন্দেহম্| বিবিক্ত ইত্যাদিনা এবং গুরবঃ প্রষ্টব্যা ইতি দর্শযতি||৩||

দেহেন্দ্রিযমনস্তাপীত্যাদি হেতুগর্ভং জ্বরপ্রধানত্বে বিশেষণম্| কেচিদ্দেহমাত্রতাপিনোঽর্বুদাদযঃ, কেচিন্মনস্তাপিন এবাতত্ত্বাভিনিবেশাদযঃ, কেচিদিন্দ্রিযতাপিন এব তিমিরাদযঃ; অযং তু ত্রিতযতাপী| বক্ষ্যতি হি- “জ্বরেণাবিশতা ভূতং ন হি কিঞ্চিন্ন তপ্যতে” ইতি| তত্র শরীরতাপিত্বং সন্তাপাদিনা, মন-ইন্দ্রিযতাপিত্বং চ “বৈচিত্ত্যং” ইত্যাদিনা বক্ষ্যতি| সর্বরোগাগ্রজ ইতি শারীরসর্বরোগাগ্রজঃ; মানসাস্তু রোগা জ্বরাদেঃ প্রাগবস্থিতা এব সত্যযুগাদাবপি| বলিত্বং চাস্য ভূরিবিকারকর্তৃত্বাত্| প্রধানত্বং চ দেহমনস্তাপিত্বাদিধর্মযোগাত্| প্রাণিসপত্নস্যেতি মারকত্বেন প্রাণিশত্রোঃ| ধ্রুবস্যেতি অবশ্যম্ভাবিনঃ| প্রলযোদযে মরণে জন্মনি চ| অত্র চ তমোরূপো জ্বরো জ্ঞেযঃ| বক্ষ্যতি হি- “জ্বরপ্রভাবো জন্মাদৌ নিধনে চ মহত্তমঃ” ইতি| প্রকৃত্যাদযঃ সমস্তাধ্যাযব্যাকরণীযা যথাবসরং ব্যাখ্যেযাঃ| বলং চ কালশ্চাত্মলক্ষণং চেতি বলকালাত্মলক্ষণমিতি দ্বন্দ্বঃ| ব্যাসতো বিধিভেদাচ্চেতি প্রপঞ্চেন বিধিভেদাত্| যত ইতি যেভ্যো ব্যবাযাদিভ্যো রক্ষ্যঃ| দ্বিতীযো যতঃশব্দো যেন হেতুনা রক্ষণীয ইত্যর্থঃ| জগদ্ধিতার্থমিত্যনেন যচ্চ শ্রুত্বা জগদ্ধিতং চিকিত্সাপ্রবর্তনং করিষ্যামীত্যগ্নিবেশঃ কারুণিকতাং শিষ্যগুণেষূপাদেযামাত্মনো দর্শযতি| জ্বরাধিকারে ইত্যাদির্নির্দেশগ্রন্থঃ||৪-১০||

জ্বরো বিকার ইত্যাদি| প্রশ্নগ্রন্থাসূচিতস্যাপি পর্যাযকথনং বৃত্তমেব, তথাঽপি পুনঃপ্রকরণবশাদভিধানমিতি ন পুনরুক্তদোষ ইতি ব্রুবতে; কিংবা জ্বরস্যৈবাধিকৃতস্যৈতত্পর্যাযকথনম্| বিকারাদযশ্চ যদ্যপি সামান্যেন রোগাভিধাযিনঃ, তথাঽপি প্রকরণাদিহ জ্বর এব বিশিষ্টে ব্যাধৌ বর্তন্তে| যথা- ব্রাহ্মণং ভোজযেদিত্যত্র ভোজনপ্রকরণাত্ সামান্যোঽপি ব্রাহ্মণশব্দ আমন্ত্রিতব্রাহ্মণে বর্ততে| তস্মিংশ্চ ব্যাখ্যানে জ্বরাদিপর্যাযাভিধেযরূপা বিবৃতিঃ ‘জ্বরো বিকারঃ’ ইত্যাদিনা উচ্যত ইতি নাপি পুনরুক্তিশঙ্কা| নামশব্দঃ প্রকাশনে, তেন একোঽর্থো নাম জ্বরলক্ষণো রোগলক্ষণো বা পর্যাযৈরুচ্যত ইত্যর্থঃ| পর্যাযা একার্থাভিধাযিনো ভিন্নজাতীযাঃ শব্দাঃ; কিংবা, নামপর্যাযৈরিতি নামরূপৈঃ পর্যাযৈঃ; ব্যবহ্রিযমাণৈঃ পর্যাযৈরিত্যর্থঃ| যতঃ পর্যাযোঽব্যবহ্রিযমাণোঽপি ভবতি, যথা- আযুষি নিত্যগানুবন্ধশব্দরূপৌ পর্যাযাবুক্তৌ||১১||

প্রকৃতিশব্দেনেহ স্বভাবঃ, তথা যত্কারণমযং কার্যং ভবতি তদুচ্যতে; তত্র প্রত্যাসন্নকারণরূপাং প্রকৃতিমাহ- তস্যেত্যাদি| উদ্দিষ্টেতি সঙ্ক্ষেপাদভিহিতা| দোষাণাং জ্বরপ্রকৃতিত্বে হেতুমাহ- দেহিনমিত্যাদি| সর্বদোষাব্যভিচারাজ্জ্বরস্য দোষপ্রকৃতিত্বং সিদ্ধমিতি ভাবঃ| দেহিশব্দেন শরীরবান্ পুরুষোঽভিপ্রেতো ন কেবল আত্মা, তস্য নির্বিকারত্বাত্| ‘সমুপসেবতে’ ইতি ভাষযা ভূতবিশেষরূপস্য জ্বরস্যাবেশং দর্শযতি; বিগ্রহশ্চ জ্বরস্য স্বতন্ত্রে বক্তব্য এব- ‘জ্বরস্ত্রিপাদস্ত্রিশিরাঃ’ ইত্যাদিনোক্তঃ||১২||

স্বভাবরূপাং জ্বরপ্রকৃতিমাহ- ক্ষয ইত্যাদি| দেহক্ষযহেতুত্বাত্ ক্ষযঃ, মোহকর্তৃত্বাত্তমঃ, পাপনির্বর্ত্যত্বাত্ পাপ্মা, মৃত্যুকারণত্বান্মৃত্যুর্জ্বর এবোচ্যতে| অত্র চ ‘উক্তাঃ’ ইতি তথা ‘যমাত্মকাঃ’ ইতি বহুবচনমেকস্মিন্নর্থে জ্বরে ক্ষযকর্তৃত্বাদিধর্মভেদবিবক্ষযা জ্ঞেযম্| যমাত্মকা ইতি যমস্বরূপাঃ; যমো হি যথা মারকঃ, তথাঽমী মারকা ইত্যতো যমাত্মকা ইত্যর্থঃ| কিংবা ‘যমাত্মজাঃ’ ইতি পাঠঃ; অত্রাপি যমপুত্রত্বেন পিতৃসমানক্রিযাকর্তৃত্বমুচ্যতে| কিঞ্চ ক্ষযাদযঃ স্বনামপ্রসিদ্ধা যমস্বরূপা ভিন্না এব জ্বরাত্, ইহ তু জ্বরস্য যমাত্মকত্বাভিধানপ্রসঙ্গাত্তেঽপ্যুচ্যন্তে| অস্মিন্ ব্যাখ্যানে মৃত্যুশব্দেন মৃত্যুসূচকং রিষ্টমুচ্যতে, যতো ন মৃত্যুরেব মৃত্যুকরো ভবতি| যমাত্মকত্বে হেতুমাহ- পঞ্চত্বপ্রত্যযান্নৄণাং ক্লিশ্যতাং স্বেন কর্মণেতি| এতেন, যথা যমঃ স্বকর্মক্লিশ্যমানানাং প্রাণিনাং পঞ্চত্বে হেতুর্ভবতি, তথা ক্ষযাদযোঽপি প্রাক্তনকর্মণা ক্লিশ্যমানান্ মারযন্তীত্যর্থঃ| ‘পঞ্চত্বপ্রত্যযা’ ইতি বা পাঠঃ, তথাঽপি স এবার্থো জ্ঞেযঃ ||১৩||-

ক্রমাগতাং প্রবৃত্তিমাহ- প্রবৃত্তিস্ত্বিত্যাদি| প্রবৃত্তিঃ প্রথমাবির্ভাবঃ| পরিগ্রহাদিতি জনপদোদ্ধ্বংসনীযে “ভ্রশ্যতি তু কৃতযুগে” (বি.অ.৩) ইত্যাদিনা পরিগ্রহাজ্জ্বরাদিপ্রবৃত্তিমুক্তাং স্মারযতি| তথা রুদ্রকোপাদ্দারুণাদ্যা প্রবৃত্তির্জ্বরস্য, সা নিদানে পূর্বমুদ্দিষ্টা; “জ্বরস্তু খলু মহেশ্বরকোপপ্রভবঃ” (নি.অ.১) ইতি গ্রন্থেন নিদানে সঙ্ক্ষেপেণোক্তেত্যর্থঃ| পূর্বমিতি পদেন রুদ্রকোপপ্রভবা প্রথমা, পরিগ্রহপ্রভবা তু দ্বিতীযা প্রবৃত্তিরিতি দর্শযতি||১৪||

যতশ্চ পরিগ্রহভবত্বং বিস্তরোক্তং রুদ্রকোপভবত্বং চ সঙ্ক্ষেপোক্তম্, অতো রুদ্রকোপোদ্ভবত্বমেব বিবৃণোতি- দ্বিতীযে হীত্যাদি| বিনা ক্রোধং চর্যতে যত্ তদক্রোধব্রতম্| তপোবিঘ্নাশনাঃ তপোবিঘ্নোপজীবিনঃ| ধ্রুবমিতি অবশ্যদেযম্| সত্রনাশনমিতি যজ্ঞনাশনম্| শৈবে ইতি কল্যাণকরে| অপচারান্তরেষ্বিতি জ্বরনিদানসেবাসু| অত্র চ সত্যযুগেঽপি জন্মমরণযোর্মোহরূপজ্বরস্য বিদ্যমানত্বাদ্ দ্বিতীযযুগেঽপি জন্মরণযোর্ভবনং ন জ্বরস্যানুপপন্নম্| তেন, যো জন্মাদৌ নিধনে চ ব্যবস্থিতঃ স ইদানীমপচারান্তরেষু ভবিষ্যসীতি যোজনীযম্| কিংবা, সত্যযুগে চ জন্মমরণযোর্মোহরূপজ্বরো নিষ্কল্মষাণাং পুরুষাণাং নাসীদেবেতি মন্তব্যম্| কল্যাণকরস্বরূপস্যাপি শিবস্য প্রাণিপীডাকরজ্বরবিসর্গঃ প্রাণিনামেবাধর্মপ্রভাবাদবশ্যোপভোগ্যাং পীডাং দৃষ্ট্বেতি মন্তব্যম্||১৫-২৫||

সন্তাপ ইত্যাদিনা প্রভাবমাহ| প্রভাবশ্চানৌপাধিকা শক্তিরুচ্যতে, তেন সন্তাপাদীনাং প্রভাবব্যপদেশঃ| যতশ্চাযং রোগপ্রভাবঃ, ততো বাতশ্লেষ্মকৃতেঽপি জ্বরেঽনুষ্ণরূপস্তাপো ভবতি, তথা জন্মাদৌ নিধনে চ মহত্তমোরূপত্বং জ্বরপ্রভাব ইত্যর্থঃ| প্রকৃতিশ্চেত্যাদিনা প্রকরণসঙ্গ্রহং করোতি, ‘ইত্যস্য প্রকৃতিঃ প্রোক্তা’ ইত্যনেন তু প্রস্তাবসঙ্গ্রহঃ কৃতঃ, অধ্যাযান্তে ত্বধ্যাযার্থসঙ্গ্রহং করিষ্যতি| এতচ্চ পুনঃ পুনঃ সঙ্গ্রহকরণং তন্ত্রর্মত্বাচ্ছিষ্যবুদ্ধিসমাধানার্থং কৃতং জ্ঞেযম্||২৬||-

নিদান ইত্যাদিনা কারণমাহ| অষ্টৌ কারণানীতি রূক্ষাদযস্ত্রযো জ্বরারম্ভকবাতাদিকর্তৃত্বেনোক্তাঃ, তথা “যথোক্তানাং হেতূনাং মিশ্রীভাবাত্” (নি.অ.১) ইত্যাদিনা তু দ্বন্দ্বানাং সন্নিপাতস্য চ কারণমুক্তং, তথা আগন্তোঃ কারণং তত্র কণ্ঠরবেণৈবোক্তম্| অন্যে তু বাতাদীনেব জ্বরারম্ভকসম্প্রাপ্তিপ্রাপ্তান্ “ইহ খল্বষ্টাভ্যঃ কারণেভ্যো জ্বরঃ সঞ্জাযতে” (নি.অ.১) ইত্যাদিগ্রন্থেন নিদানোক্তান্ কারণানীতি পদেন গ্রাহযন্তি; প্রকৃতিশব্দেন তু বীজভূতা অব্যবহিতসম্বদ্ধা দোষা গৃহ্যন্তে, রূক্ষাদযস্তু দোষপ্রকোপকারণভূতা ন জ্বরকারণানীতি বদন্তি| তস্মিন্ পক্ষে রূক্ষাদীনাং জ্বরহেতুভূতানামিহাগ্রহণং স্যাত্; রূক্ষাদীনাং তু জ্বরে হেতুত্বং দোষপ্রকোপাবান্তরব্যাপারত্বেন ভবত্যেব, যথা- যাগস্য স্বর্গকর্তৃত্বম্| দ্বিবিধং চ কারণং রোগাণাং- ব্যবহিতং রূক্ষাদি, প্রত্যাসন্নং চ দোষা ইতি শাস্ত্রসিদ্ধান্ত এব| ‘নিদানে’ ইতি পদেনৈব পূর্বত্বে লব্ধে, পূর্বোক্তানীতি পদমিহ বক্তব্যজ্বরনিদানব্যুদাসার্থম্||২৭||

যদ্যপি নিদানেঽপি পূর্বরূপাণ্যুক্তানি, তথাঽপীহ প্রকরণবশাদ্যনি প্রাযঃ প্রাদুর্ভবন্তি, তানি পঠ্যন্তে- আলস্যমিত্যাদি||২৮-২৯||

কেবলমিতি কৃত্স্নং, তেন বাহ্যেন্দ্রিযাণামপ্যবরোধঃ| অনেন দেহমনসী অপ্যবশ্যং জ্বরেণ তপ্যেতে ইত্যুক্তম্| বলস্যাভিবৃদ্ধিলক্ষণস্য জ্বরাভ্যাগমনলক্ষণস্য বা কালো বলকালঃ, স চ নিদানে “দিবসান্তে ঘর্মান্তে জরণান্তে বা জ্বরাগমনমভিবৃদ্ধির্বা” (নি.অ.১) ইত্যেবম্প্রকারগ্রন্থেনোক্তঃ||৩০||

জ্বরপ্রত্যাত্মিকং লিঙ্গমিত্যাদিনাঽঽত্মলক্ষণমাহ| আত্মলিঙ্গমিতি অব্যভিচারিলক্ষণম্| ইহ সন্তাপশব্দেন সামান্যেন পীডা বক্তব্যা, সা চ দেহবিশেষণাভিধানাত্তাপলক্ষণৈব ভবতি, মনসি তু তথা চেন্দ্রিযেষু দেহগুণগৃহীতেষু বৈচিত্ত্যাদিরূপা “বৈচিত্ত্যং” ইত্যাদিগ্রন্থবক্তব্যা জ্ঞেযা| জ্বরপ্রভাবে সন্তাপোঽচিন্ত্যকার্যতযোক্তঃ, ইহ তু জ্বরাব্যভিচারিত্বেনেতি বিশেষঃ| অন্যে তু, অরুচ্যাদিযুক্তঃ সন্তাপঃ প্রভাবো ভবতি, অরুচ্যাদিরহিতস্ত্বাত্মলক্ষণং ভবতি| সন্তাপস্য প্রত্যাত্মলক্ষণত্বে হেতুমাহ- জ্বরেণেত্যাদি| ভূতশব্দেন সর্বপ্রাণিন উচ্যন্তে| ততশ্চ জ্বরেণ ভূতমাবিশতা ন কিঞ্চিন্মনুষ্যাদি ন তপ্যতে, কিন্তু তপ্যত এব, ততো জ্বরাব্যভিচারিতযা জ্বরাত্মলক্ষণমেব তদুপপন্নমিতি ভাবঃ| অত্র পক্ষে গজাদিষ্বপি কূটপাকলাদিশব্দাভিধেযেষু জ্বরেষ্বন্তর্দাহরূপা বেদনা ভবতীতি জ্ঞেযম্| কিংবা, অত্র দেহসন্তাপৌ মিলিতৌ বা পর্যাযেণ বা জ্বরাত্মলিঙ্গং ভবেতাং; ন তাবত্ পর্যাযেণ, তথা হি সতি ক্বচিজ্জ্বরে দেহসন্তাপ এব ক্বচিজ্জ্বরে মনঃসন্তাপ এব ভবতীতি বাচ্যং, ততশ্চানযোর্ব্যভিচারান্নাব্যভিচারিলিঙ্গত্বং; তস্মান্মিলিতাবেব দেহমনঃসন্তাপাবাত্মলক্ষণং জ্বরস্যেতি বাচ্যম্; এবং ব্যবস্থিতে কস্মাত্ সর্বজ্বরেষু দেহমনস্তাপৌ ভবত ইত্যাহ- জ্বরেণেত্যাদি| জ্বরেণ ভূতমাবিশতা নহি কিঞ্চিচ্ছরীরং মনো বা ন তপ্যতে, কিন্তু তপ্যত এব; অতো দেহমনস্তাপঃ সর্বজ্বরেষূপপন্ন ইত্যর্থঃ| অস্মিংশ্চ পক্ষে শারীরমানসজ্বরভেদোপদর্শনে “শারীরো জাযতে পূর্বং দেহে” ইত্যাদিনা শারীরস্য যদ্দেহমাত্রাশ্রযত্বং মানসস্য যন্মনোমাত্রাশ্রযত্বং বক্তব্যং তত্ সূক্ষ্মকালাভিপ্রযেণ; তস্মিংশ্চ সূক্ষ্মকালে জ্বর উভযাতাপকোঽপ্যনন্তরোত্পদ্যমানোভযতাপিত্বধর্মাপেক্ষযা ভবত্যেব দেহমনস্তাপী, যথা প্রথমক্ষণোত্পন্নং দ্রব্যং নির্গুণম্, অনন্তরোত্পদ্যমানং সগুণং দ্রব্যমুক্তং দ্রব্যলক্ষণে||৩১||

দ্বিবিধ ইত্যাদিনা বিধিভেদমাহ| এতে চ ভেদা বিবরণে ব্যক্তা ভবিষ্যন্তি| সৌম্য ইতি শীতকারণারব্ধত্বেন সোমদেবতাকঃ, আগ্নেযোঽপ্যুষ্ণকারণারব্ধত্বেনাগ্নিদেবতাকঃ| পুনঃ পঞ্চবিধো দৃষ্ট ইত্যত্র ন পঞ্চবিধেন ভেদেন সর্বজ্বরব্যাপ্তিঃ, যতঃ “প্রাযশঃ সন্নিপাতেন দৃষ্টঃ পঞ্চবিধো জ্বরঃ” ইতি বক্ষ্যতি| ততশ্চ কেবলবাতাদিজ্বরাণাং ন সন্ততাদিভেদেন গ্রহণং; তথা সন্ততাদীনাং কালনিযমো বক্তব্যঃ, ততশ্চ যে কালানিযতাস্তে সন্ততাদিভিন্না এব; তস্মাদ্দোষকালবলাবলাদ্যে জ্বরা ভবন্তি, তে পঞ্চদ্বিধা এবেতি বাক্যার্থঃ| দোষকালবলাবলাদিতি দোষকৃতাত্ কালবলাবলাত্; কালবলাবলে জ্বরকালপ্রকর্ষাপ্রকর্ষৌ| তত্র সন্ততে জ্বরে বলবতা দোষেণ সপ্তাহাদিঃ প্রকৃষ্টত্বাদ্বলবান্ কালো নিযম্যতে, সততকে তু সন্ততকালাপেক্ষযা হীনবলেন দোষেণাবলো জ্বরকালঃ, স হ্যহোরাত্রে দ্বিকালেনাত্র ব্যাপকো ভবতি, তথাঽযমেব সততকজ্বরকালো হীনবলকালান্যেদ্যুষ্কাপেক্ষযা বলবান্ ভবতি; এবমন্যেদ্যুষ্কাদিজ্বরকালোঽপি ব্যাখ্যেযঃ | কিংবা, দোষকালো দুষ্টিকালো জ্বরকাল ইত্যর্থঃ, তস্য বলাবলাত্ প্রকর্ষাপ্রকর্ষাদিত্যর্থঃ| কালপ্রকর্ষাপ্রকর্ষনিযমাশ্চ ব্যাখ্যাতা এব| অন্যে তু, দোষশ্চ কালশ্চ দোষকালৌ, তযোর্বলাবলাদিতি বদন্তি| তত্র দোষবলাত্ কালবলাচ্চ সন্ততো ভবতি; যদুক্তং- “কালদূষ্যপ্রকৃতিভির্দোষস্তুল্যো হি সন্ততম্” ইত্যাদিনা| দোষকালবলত্বমবলত্বং চ বিবরণগ্রন্থেনোক্তং; তথা দোষস্যাবলত্বং সপ্রত্যনীকতযা সততকাদিষু ভবতি, তথা জ্বরবেগবিগমে চ সততকাদৌ কালস্যাবলত্বং ভবতি| অত্র পক্ষে দোষকালবলাবলাভ্যাং সর্বজ্বরা ব্যাপ্যন্তে, ততশ্চ সন্ততাদিপঞ্চজ্বরনিযমো দুর্ঘটঃ স্যাত্| অন্যে তু ব্যুত্ক্রমাভিধানেন ‘দোষবলাবলকালাত্’ ইতি কৃত্বা ব্যাখ্যানযন্তি| এতচ্চাশব্দং ব্যাখ্যানম্| তৃতীযকচতুর্থকাবিতি সমাসনির্দেশেন তৃতীযচতুর্থকযোরাগন্ত্বনুবন্ধত্বাদিসাধারণধর্মযোগিতাং দর্শযতি||৩২-৩৫||

‘পৃথগ্ভিন্নস্য চাকৃতিম্’ ইতি প্রশ্নস্য ক্রমাগতমুত্তরং- শারীর ইত্যাদি| পূর্বমিতি বচনাদুত্তরকালং শারীরো জ্বরো মনস্যপি ভবতি, এবং মানসো মনস্যুত্পাদানন্তরং দেহেঽপি ভবতীতি জ্ঞেযম্| এবং চ যদ্যপি সর্বজ্বরাণাং দেহমনোধিষ্ঠানত্বং, তথাঽপি যো দেহাশ্রযী প্রথমং শরীরদোষেণ বলবতা প্রারব্ধঃ স্যাত্ স তদ্দোষচিকিত্সযৈব চিকিত্স্যঃ; এবং মানসোঽপি মানসদোষচিকিত্সযৈব চিকিত্স্য ইতি দর্শযিতুং শারীরমানসভেদোপদর্শনং সাধু| ননু শারীরস্য জ্বরস্য সন্তাপলক্ষণং ব্যক্তং, মানসস্য তু জ্বরস্য কথং সন্তাপঃ, যত্তস্য লক্ষণং ভবতীত্যাহ- বৈচিত্ত্যমিত্যাদি| বৈচিত্ত্যাদযো মানসসন্তাপশব্দেনোচ্যন্তে, তাপশব্দস্য পীডাবচনত্বাদিত্যর্থঃ| মনস্তাপপ্রস্তাবেন ‘দেহেন্দ্রিযমনস্তাপী’ ইত্যত্র য ইন্দ্রিযতাপো জ্বরস্যোক্তস্তং চ ব্যাচক্ষতে- ইন্দ্রিযাণাং চেত্যাদি| বৈকৃত্যমিতি স্বভাবান্যথাত্বং, তচ্চার্থাগ্রহণাদ্যনুমেযম্||৩৬||-

সৌম্যাগ্নেযভেদযোঃ প্রতিলোমব্যাখ্যাক্রমেণ বিবরণং- বাতপিত্তাত্মক ইত্যাদি| বাতাপিত্তাত্মক ইতি বাতপিত্তকারণকঃ| অত্র চ কেবলবাতারব্ধঃ, তথা কেবলকফারব্ধশ্চ শীতস্বভাবকারণতযা সৌম্যত্বেনোষ্ণমিচ্ছতি, তথা বাতকফাত্মকোঽপ্যুপলভ্যতে, তথা কেবলপিত্তাত্মকোঽপ্যাগ্নেযত্বাদনুষ্ণাভিপ্রায ইতি ব্যক্তং, তেনেদানীং বাতপিত্তাত্মকঃ শীতেন বাতেন পিত্তেন চোষ্ণেন কৃতস্তস্য দুরুপপন্নাযামাগ্নেযতাযাং ব্রুবতে- বাতপিত্তাত্মকঃ শীতমিতি| এবং ব্যবস্থিতে বাতপিত্তজ্বরে চেদ্বাযুঃ সংযোগমহিম্না বিপরীতানুকারী দৃষ্টঃ, তত্ কিং কফসংযুক্তোঽপি বাযুর্বিপরীতমর্থং করোতীত্যাশঙ্ক্যাহ- উষ্ণং বাতকফাত্মক ইতি; বাতকফাত্মকো বিশেষেণোষ্ণমিচ্ছতীত্যর্থঃ| ব্যামিশ্রলক্ষণ ইতি উক্তব্যামিশ্রদোষলক্ষণজ্বরব্যতিরিক্তঃ কফপৈত্তিকঃ সান্নিপাতিকশ্চ, স চোষ্ণশীতাভিপ্রাযতযা সৌম্যাগ্নেযরাশিদ্বযাতিরিক্ত এব জ্বরঃ; যথা- অঙ্গুলীদ্বযব্যতিরিক্তং ত্র্যঙ্গুলম্| এবং শারীরমানসমিশ্রীভাবেঽপি চিন্তনীযম্| জ্বর ইচ্ছতীতি বচনং জ্বরযুক্তপুরুষেচ্ছাযা জ্বরে উপচারাজ্জ্ঞেযম্||৩৭||-

বাতপিত্তজ্বরে শীতাভিপ্রাযতামুপপাদযিতুং বাযোর্যোগবাহিতামাহ- যোগবাহ ইত্যাদি| যোগাদ্যোগিনো গুণং বহতীতি যোগবাহঃ| পরমিতি অত্যর্থম্| সংযোগাদিতি উষ্ণেন শীতেন চ সংযোগাত্| উভযার্থকৃদিতি যথাসঙ্খ্যমিহ উষ্ণশীতার্থকারী| এতদেব বিভজতে- দাহকৃদিত্যাদি| ‘পিত্তেন’ ইতি বক্তব্যে যত্ ‘তেজসা’ ইতি করোতি, তেন বাহ্যেনাপ্যাতপাদিনা যুক্তো বাযুর্দাহং করোতীতি লোকপ্রসিদ্ধমর্থং দৃষ্টান্তার্থং সূচযতি| শীতকারিত্বং তু বাযোঃ শীতত্বেনৈব যত্ সিদ্ধং তত্ সোমরূপকফপানীযাদিযোগাদ্বিশেষেণ ভবতীতি জ্ঞেযম্||৩৮||-

অন্তর্দাহ ইত্যাদিনা অন্তর্বেগবহির্বেগবিবরণম্||৩৯-৪১||

প্রাকৃত ইত্যাদিনা প্রকরণেন প্রাকৃতবৈকৃতবিবরণম্| তত্রেহ কালস্বভাবপ্রকুপিতো দোষঃ প্রকৃতিরুচ্যতে , তজ্জাতীযাচ্চ দোষাদুদ্ভূতো জ্বরঃ প্রাকৃত উচ্যতে| যদ্বক্ষ্যতি- “কালপ্রকৃতিমুদ্দিশ্য নির্দিষ্টঃ প্রাকৃতো জ্বরঃ” ইতি| এবমপি বর্ষাকালপ্রকৃতিভূতেন বাতেন কৃতো জ্বরঃ প্রাকৃতঃ স্যাত্, তন্নিষেধাযাহ- সুখসাধ্যস্তু বসন্তশরদুদ্ভব ইতি| তুশব্দোঽবধারণে| তেন, য এব সুখসাধ্যো বসন্তশরদুদ্ভবঃ প্রাকৃতঃ স এবেহ প্রাকৃতশব্দেনোচ্যত ইত্যর্থঃ; বর্ষাকালভববাতিকস্তু ন সুখসাধ্য ইতি, তেন নাসৌ প্রাকৃত উচ্যতে| প্রাকৃতবৈকৃতসঞ্জ্ঞাব্যবহারো হি যথাক্রমং সুখসাধ্য-কৃচ্ছ্রসাধ্যবোধপ্রযোজনকঃ ; তদ্যদি কৃচ্ছ্রেঽপি বাতজে প্রাকৃতত্বং স্যাত্তদা কিং প্রাকৃতব্যবহারেণ| যতশ্চ বসন্তশরদুদ্ভবাবেব প্রাকৃতৌ, তেন তযোরেব ‘উষ্ণং’ ইত্যাদিন গ্রন্থেন বিবরণং প্রপঞ্চেন করিষ্যতি ন বাতিকস্যেতি| অত্রার্থে জতূকর্ণে- “সৌম্যাগ্নেযাবুষ্ণশীতকামৌ, জীর্ণস্ত্রযোদশে| দিনে, বসন্তশরদোঃ প্রাকৃতোঽন্যত্র বৈকৃতঃ” ইতি| যদ্যপি বসন্তজঃ পূর্বমুক্তস্তথাঽপি প্রতিলোমব্যাখ্যযা ‘উষ্ণং’ ইত্যাদিনা শরদুদ্ভবং নির্দিশতি| উষ্ণং পিত্তং চিতং বর্ষাসু শরদ্যুদীর্ণেনাতপেন কুপ্যতীতি বিজ্ঞেযম্| শীতে ইতি হেমন্তে| উষ্ণমিত্যাদিনা নির্দিষ্টস্য বর্ষাস্বিত্যাদি ভাষ্যম্| ননু যদি বর্ষাস্বম্লবিপাকিত্বং সর্বাসামোষধীনাং, তদা প্রতিদ্রব্যাভিহিতবিপাকস্যাব্যবস্থা স্যাত্, তস্য কালবশেনাম্লত্বদর্শনাত্ | মৈবং, যথা নিষ্ঠাপাকেন যন্মধুরং দ্রব্যং, তদ্যথাঽঽবস্থিকেন পাকেনাম্লং ভবতি, যদুক্তং- “পরং তু পচ্যমানস্য বিদগ্ধস্যাম্লভাবতঃ” (চি.অ.১৫) ইত্যাদিনা, তথেহাপি কালমহিম্নাঽম্লবিপাকিত্বমপি ভবিষ্যতি; এবং হেমন্তে যন্মধুরপাকিত্বমোষধীনাং তত্রাপি ব্যাখ্যেযম্| অন্যে তু, বর্ষাসু বহ্নিমান্দ্যাদ্বিদাহনিমিত্তমোষধীনামম্লবিপাকিত্বমিতি ব্রুবতে| যদুক্তং- “বর্ষাসু বিদহত্যন্নং........| তদা হি সর্বমেবান্নং প্রাযো হ্যস্য বিদহ্যতে” ইতি| এবমপি তৈর্হেমন্তে মধুরপাকিত্বং নোক্তমেব; তস্মাত্ কালমহিম্নৈব পাকান্তরমোষধীনাং সাধু| আশ্বিতি পিত্তস্যাশুকারিত্বাচ্ছীঘ্রং জনযতি| অনুবল ইতি অনুবন্ধরূপঃ কফো ভবতি| এবং জ্বরস্য লঙ্ঘনীযতামাহ- প্রকৃত্যৈবেত্যাদি| বিসর্গস্য প্রকৃত্যেতি বিসর্গরূপকালজযা প্রকৃত্যা সৌম্যাদিরূপযাঽনশনাদ্ভযং ন ভবতি| বিসর্গো হি সৌম্যঃ স্নিগ্ধঃ , তত্র বলবন্তশ্চ পুরুষাঃ তেন তত্রোত্পন্নো জ্বর আমাশযসমুত্পন্নত্বেন লঙ্ঘনার্হো লঙ্ঘনীয এব| কিংবা, ‘প্রকৃত্যৈব বিসর্গাচ্চ’ ইতি পাঠঃ| তদা প্রকৃত্যেতি জ্বরকারণেন কফপিত্তরূপেণ লঙ্ঘনহেতুনা, তথা বিসর্গাচ্চ কালাল্লঙ্ঘনে ভযং নাস্তি| উক্তং হি- “কফপিত্তে দ্রবে ধাতূ সহেতে লঙ্ঘনং মহত্” ইতি| হেমন্তে চিতঃ কফো বসন্তে কুপ্যতীতি যুক্তমেব, যতো দোষচযাদিক্রমে শিশিরো নাস্ত্যেব| আদানমধ্যে তস্যাপি বাতপিত্তং ভবেদন্বিতি তস্যাপি বসন্তজকফজ্বরস্য বাতপিত্তম্ অন্বিতি অনুবন্ধরূপং ভবতি| তত্র বসন্তাদৌ দুর্বলং বাতপিত্তং, মধ্যে তু মধ্যং, অন্তে তু প্রবলং ভবতি; এবং শরদ্যপি কফো ভবতি||৪২-৪৬||-

তদেতান্ বিশেষান্ বুদ্ধ্বা চিকিত্সা কর্তব্যেতি দর্শযন্নাহ- আদাবিত্যাদি| শরদ্বসন্তযোরাদৌ মধ্যে চান্তে চ জ্বরস্য দোষবলাবলং বুদ্ধ্বেতি যোজনা||৪৭||-

কালপ্রকৃতিমুদ্দিশ্য নির্দিষ্টঃ প্রাকৃতো জ্বর ইতি প্রাকৃত জ্বরবোধিকা পরিভাষা| কালপ্রকৃতিমিতি কালস্বভাবসম্বদ্ধং দোষম্; উদ্দিশ্যেতি কারণত্বেন লক্ষ্যীকৃত্য| নন্বেবমপি বর্ষাকালপ্রকৃতিনা বাতেন কৃতো জ্বরঃ প্রাকৃতঃ স্যাদিত্যাহ- প্রাযেণানিলজো দুঃখ ইতি; অনিলজো জ্বরঃ কালপ্রকৃতিসমানোঽপি দুঃখো ভবতি, বিরুদ্ধোপক্রমত্বাত্| যতো জ্বরস্যামাশযোত্থত্বেন লঙ্ঘনাদি পথ্যং, তচ্চ বাযোরপথ্যমিতি বিরুদ্ধোপক্রমত্বাদ্দুঃখত্বেন ন প্রাকৃতত্বং বাতিকস্য; যতঃ প্রাকৃতত্বেঽপি যঃ সুখসাধ্যঃ স এব প্রাকৃত উচ্যত ইতি ভাবঃ| এবং তাবত্ সর্বো বাতজো বৈকৃতঃ, তথা বসন্তশরদ্ব্যতিরিক্তকালভবঃ | কফজস্তথা পৈত্তিকোঽপি বৈকৃত এবেতি দর্শযন্নাহ- কালেষ্বন্যেষু বৈকৃত ইতি; ‘কফজঃ পিত্তজো বা ’ ইতি শেষঃ| অথ বৈকৃতস্য জ্বরস্য কো হেতুরিত্যাহ- হেতব ইত্যাদি| অন্যে তু ব্রুবতে- বর্ষাকালে বাতজোঽপি প্রাকৃতঃ, কিন্ত্বযং কৃচ্ছ্রঃ, বসন্তশরদুদ্ভবস্তু প্রাকৃতঃ সুখসাধ্যো ভবতীতি বিশেষঃ; তথা চ বাগ্ভটেন- “প্রাকৃতশ্চানিলোদ্ভবঃ” (বা. নি.অ.২) ইতি কৃতমিতি||৪৮-৪৯||

বলবত্স্বিত্যাদিনা সুখসাধ্যজ্বরবিবরণম্| জ্বরোপদ্রবা যদ্যপি সাক্ষান্ন পঠিতাঃ, তথাঽপি সামান্যোপদ্রবলক্ষণযুক্তা রোগা ইহ জ্ঞেযাঃ; যদুক্তম্- “উপদ্রবস্তু খলু রোগোত্তরকালজো রোগাশ্রযো রোগ এব স্থূলোঽণুর্বা, রোগাত্ পশ্চাজ্জাযত ইত্যুপদ্রবসঞ্জ্ঞঃ” (চি.অ.২১) ইতি; তন্ত্রান্তরে চ- “হিক্কাশ্বাসকাসতৃষ্ণাচ্ছর্দ্যতীসারমূর্চ্ছাঙ্গভেদারোচকাঃ কৃচ্ছ্রবিট্কতা চেতি দশোপদ্রবা জ্বরমুপদ্রবন্তি” ইত্যুক্তাঃ|৫০|

ননু বলিভির্বহুভিশ্চ হেতুভির্জাতো বহুলক্ষণ এব ভবিষ্যতি, তত্ কিং ‘বহুলক্ষণঃ’ ইতি পদেন? উচ্যতে- পুরুষস্যাগ্নিবলাদিবিশেষেণ দোষহেতবো যথোক্তদোষগুণা অপি ন বহুলক্ষণং রোগং কুর্বন্তি, তথা সম্প্রাপ্তিবিশেষাভাবাচ্চ ন বহুলক্ষণত্বং ভবতি| যদুক্তম্- “একং দ্বৌ ত্রীন্ বহূন্ বাঽপি দেহে ধাত্বাদিযোগতঃ| দর্শযন্তি বিকারাংস্তু কুপিতাঃ পবনাদযঃ” ইতি| শীঘ্রমিতি উত্পন্নমাত্র এব||৫০||-

সপ্তাহাদ্বেত্যাদি| সপ্তাহাদ্বাতোত্তরঃ সপ্রলাপভ্রমশ্বাসস্তীক্ষ্ণো হন্তি, এবঙ্গুণ এব পৈত্তিকো দশাহাত্, তথৈবঙ্গুণ এব কফজো দ্বাদশাহাদ্ধন্তি, শীঘ্রতম-শীঘ্রতর-শীঘ্রবিকারকারিত্বাদ্বাতপিত্তকফানামিতি বর্ণযন্তি| বাশব্দশ্চ বিকল্পার্থঃ; তেন সপ্তাহাদিষ্বপ্যর্বাগপি পরেণ বা হননং লক্ষ্যতে| অন্যে তু সপ্তাহাত্ সপ্রলাপঃ, দশাহাত্ সভ্রমঃ, দ্বাদশাহাত্ সশ্বাসো হন্তীতি ব্যাখ্যানযন্তি||৫১||-

গম্ভীরঃ অন্তর্বেগঃ; কিংবা, গম্ভীরধাতুস্থঃ | দৈর্ঘরাত্রিকঃ দীর্ঘকালানুবন্ধী; কিংবা দীর্ঘাং রাত্রিং মরণরূপাং করোতীতি দৈর্ঘরাত্রিকঃ||৫২||-

স্রোতোভিরিত্যাদিনা সন্ততাদিভেদমাহ| গুরব ইতি বৃদ্ধাঃ| দশাহমিত্যাদি দশাহাদীন্ ব্যাপ্য| সুদুঃসহঃ ‘ভবতি’ ইতি শেষঃ| শীঘ্রমিতি দশাহাদয এব প্রভূততরকালান্তরাপেক্ষযা শীঘ্রশব্দবাচ্যাঃ| দশাহাদিবিকল্পশ্চ যথাক্রমং পিত্তকফানিলোত্তরসন্নিপাতারব্ধত্বাত্ সন্ততজ্বরস্য জ্ঞেযঃ| যদুক্তমন্যত্রাপি- “পিত্তকফানিলবৃদ্ধ্যা দশদিবস-দ্বাদশাহ- সপ্তাহাত্| হন্তি বিমুঞ্চতি বাঽঽশু ত্রিদোষজো ধাতুমলপাকাত্” ইতি| তথা “দশ-দ্বাদশ-সপ্তাহৈঃ পিত্তশ্লেষ্মানিলাধিকঃ| দগ্ধ্বোষ্মণা ধাতুমলান্ হন্তি মুঞ্চতি বা জ্বরঃ” ইতি| হননমোচনবিকল্পস্তু রসাদীনামপ্যশুদ্ধ্যা শুদ্ধ্যা চ বক্তব্যঃ| কস্মাদেবমযং দুঃসহঃ শীঘ্রকারী চ সন্ততো ভবতীত্যাহ- কালেত্যাদি| কালঃ বর্ষাদিঃ, দূষ্যঃ রসাদিঃ, প্রকৃতিঃ দেহপ্রকৃতিঃ শ্লেষ্মপ্রকৃত্যাদিকা| ননু কালাদিতুল্যতা দোষস্য কদাচিদেব সম্ভবতি, যথা- বসন্তে, শ্লেষ্মপ্রকৃতৌ, মেদসি দূষ্যে, কফো দোষঃ; এবং শরদি পিত্তমপি জ্ঞেযম্; ইতরেষাং তু ত্রিদোষাদীনাং কালাদিতুল্যত্বং দুষ্প্রাপম্; অতস্তত্কৃতসন্ততঃ কথং ভবতু, সন্ততশ্চ দ্বাদশাশ্রযত্বেন ত্রিদোষজ এব বক্তব্যঃ| উচ্যতে- তুল্য ইত্যভিধাযাপি যত্ ‘নিষ্প্রত্যনীকঃ’ ইতি করোতি, তেন কালাদ্যনুগুণতামেব কালাদিতুল্যতাং স্ফোটযতি | কালাদীনাং চাসমানানামপি বলবতা দোষেণ পরিগৃহীতানাং প্রতীপার্থকরণাসামর্থ্যেনানুগুণতৈব ভবতি; যথা- বলবতো রাজ্ঞো হৃদযেন প্রতিকূলা অপি ক্ষুদ্ররাজানোঽনুগুণা এব ভবন্তি| কিঞ্চ, ত্রিদোষারব্ধ এবাস্মন্মতে সন্ততঃ, তস্য চান্যতরং দোষং প্রতি কালাদীনাং তুল্যত্বং সম্ভবত্যেব| অত্রৈকে ‘তস্মাজ্জ্ঞেযঃ সুদুঃসহঃ’ ইত্যতোঽনন্তরং ‘যথা ধাতূন্’ ইত্যাদি পঠন্তি, ইতশ্চ ‘প্রাযঃ প্রাগপতর্পণৈঃ’ ইত্যন্তং পঠিত্বা ‘রক্তধাত্বাশ্রযঃ’ ইত্যাদিনা সততকাদিলক্ষণং পঠন্তি| অন্যে তু- ‘সুদুঃসহঃ’ ইতি পঠিত্বা সততান্যেদ্যুষ্কলক্ষণে পঠন্তি, তদনু ‘যথা ধাতূন্’ ইত্যাদিগ্রন্থং, ততঃ পুনরাচার্যান্তরমতেনান্যেদ্যুষ্কাদিজ্বরত্রযলক্ষণং পঠন্তি| তত্র প্রথমপাঠক্রমে ‘যথা ধাতূন্’ ইত্যাদিনা সন্ততস্যোত্পাদাদিক্রমং ব্রুবতে| ধাতূনিতি রসাদিধাতুসপ্তকম্| রসদুষ্ট্যভিধানেন বিশেষেণ রসদুষ্টির্জ্ঞেযা| যথেতি যেন প্রকারেণ গুরুত্বস্তব্ধত্বাদিনা| যুগপদিতি এককালম্| নিযমাদিতি সর্বানেব ধাত্বাদীন্ সর্ব এব দোষাশ্চানুপদ্যন্তে| স শুদ্ধ্যা বেত্যাদি| স সন্ততঃ; যদা সর্বে রসাদযঃ সর্বথা বিশুদ্ধা ভবন্তি তদা প্রশাম্যতি সপ্তাহাদিষু, যদা রসাদযঃ সর্বে সর্বথা বাঽবিশুদ্ধা ভবন্তি তদা হন্তীত্যর্থঃ| অথ যদা স্তোকা শুদ্ধিস্তদা কা বিধেত্যাহ- যদা ত্বিত্যাদি| নাতিশুধ্যন্তীতি সর্ব এব নাতিবিশুদ্ধা ভবন্তি সাবশেষদোষা ভবন্তীত্যর্থঃ| ন বা শুধ্যন্তি সর্বশ ইতি রসাদিষু মধ্যে কতিচিচ্ছুধ্যন্তি, কতিচিচ্চাবিশুদ্ধা বর্তন্ত ইত্যর্থঃ| দ্বাদশেতি সপ্ত ধাতবস্ত্রযো দোষা মূত্রং পুরীষং চ| দোষাণাং চেহ শুদ্ধিঃ প্রকৃতিগমনেন জ্ঞেযা| দ্বাদশাশ্রযত্বেন সন্ততস্যৈকদোষারব্ধত্বং যদুচ্যতে, তন্নিরস্তমেব জ্ঞেযম্| বিসর্গমিতি পরিত্যাগম্| বিসর্গস্বরূপমাহ- অব্যক্তলক্ষণমিতি; অব্যক্তং লক্ষণং যস্য তমব্যক্তলক্ষণং বিসর্গম্; এতেন, তদাঽপি জ্বরো লীনোঽস্ত্যেব, পরং লক্ষণানি তস্য ব্যক্তানি ন ভবন্তীতি দর্শযতি; তদনু ত্রযোদশদিনাদারভ্য দীর্ঘকালমনুবর্ততে, ততো দুর্লভোপশমো ভবতীতি যুক্তমুক্তম্| এভিশ্চ ধাত্বাদিদ্বাদশাশ্রযিত্ব-দশাহাদিব্যাপকত্বাদিভির্ধর্মৈঃ সন্ততো ভিন্ন এব বাতাদিজ্বরেভ্যঃ কালানিযমেন দ্বিত্র্যাদিদিনেষু ব্যবচ্ছেদেনানুসক্তেভ্যঃ| যস্তু তন্ত্রান্তরে “তথা সন্তত এবান্যঃ স্বল্পদুর্বলকারণঃ| একদোষো দ্বিদোষো বা স্বল্পোপদ্রবলক্ষণঃ|| অতুল্যদূষ্যপ্রকৃতিঃ” ইত্যাদিনা গ্রন্থেনোচ্যতে, সোঽস্মাদন্য এবেতি তন্ত্রান্তরেঽপ্যন্যশব্দপ্রযোগাত্ প্রতিপাদিতমিতি ন বিরোধঃ||৫৩-৬০||-

সততকং বিবৃণোতি- রক্তধাত্বাশ্রয ইত্যাদি| প্রযোগ্রহণাত্ সততকো রক্তব্যতিরিক্তং মাংসাদিধাতুমপ্যাশ্রযত ইতি দর্শযতি| সপ্রত্যনীক ইতি কালাদিষু মধ্যেঽন্যতমঃ প্রত্যনীকঃ| কালবৃদ্ধিক্ষযাত্মকমিতি কালে বৃদ্ধিক্ষযোচিতে কালে বৃদ্ধিঃ ক্ষযশ্চ যস্য স কালবৃদ্ধিক্ষযাত্মা| তেন , দোষানুগুণে কালে জ্বরো ভবতি, দোষানুগুণকালব্যতিরিক্তে চ কালে ক্ষযো ভবতি| জ্বরস্য কালপ্রকৃতিদূষ্যাণাং মধ্যেঽন্যতমাদ্বলপ্রাপ্তৌ সত্যামপি দোষসম্প্রাপ্তি মহিম্না হি কালভাবিত্বনিযমো জ্ঞেযঃ||৬১-৬২||

মেদোবহা ইত্যত্র মেদোবহনাডীরোধাদেব মেদোদুষ্টির্জ্ঞেযা| উক্তং হি- “তেষাং স্রোতসাং রোধাত্ স্থানস্থাশ্চৈব মার্গগাশ্চ শরীরধাতবঃ প্রকোপমাপদ্যন্তে” (বি.অ.৫) ইতি| ‘মাংসস্রোতাংস্যনুসৃতঃ’ ইত্যাদি তৃতীযকচতুর্থকলক্ষণং কেচিত্ পঠন্তি| অত্রাপি স্রোতোদুষ্ট্যা ধাতুদুষ্টিরবগন্তব্যা| যে তু তৃতীযকচতুর্থকযোর্দূষ্যপ্রতিপাদকং গ্রন্থং ন পঠন্তি, তেষাং তন্ত্রান্তরপ্রত্যযাদ্দূষ্যাবরোধঃ| তৃতীযকচতুর্থকসঞ্জ্ঞযৈব তৃতীযদিনচতুর্থদিনভাবিত্বং জ্ঞেযম্||৬৩-৬৭||

জ্বরাণাং বিচ্ছেদাভ্যাগমে দৃষ্টান্তমাহ- অধিশেতে ইত্যাদি| অধিশেতে ইতি অধিষ্ঠায তিষ্ঠতি| ধাতুমিতি সততকাদিদূষ্যত্বেন পঠিতং রক্তাদিধাতুম্| কালে ইতি স্বকালে| যদি স্বকালে জ্বরং করোতি দোষঃ, তদা তৃতীযকচতুর্থকযোঃ কিমিতি বিশ্রামদিনেঽপি দোষানুগুণে পূর্বাহ্ণাদিকালে ন করোতীত্যাহ- স বৃদ্ধিং চেত্যাদি| ন কেবলং কালমাত্রমপেক্ষতে, কিন্তু বৃদ্ধিমপ্যপেক্ষতে তৃতীযকাদিকরণে দোষঃ; সা চ বৃদ্ধিস্তৃতীযকে ত্র্যহেণ, চতুর্থকে চতুরহেণৈব ভবতীতি ভাবঃ| প্রত্যনীকস্য কালপ্রকৃত্যাদের্দোষবিরুদ্ধস্য বলক্ষযঃ; তেন দোষবৃদ্ধ্যা যদা প্রত্যনীকস্য ক্ষযো ভবতি তদা জ্বরযতীত্যর্থঃ||৬৮-৬৯||

অথ সততকাদৌ যথা বৃদ্ধো দোষো জ্বরবেগং জনযতি, তস্য যথোপশমো ভবতি, তদাহ- কৃত্বেত্যাদি| সততকাদৌ দোষা বেগং কৃত্বা গতবলা ভবন্তি, গতবলাশ্চ পুনঃ স্বে স্বে রক্তাদৌ স্থানে স্থিতা ভবন্তি, পুনস্ত এব বৃদ্ধাঃ স্বে কালে জ্বরযন্তি||৭০||

দোষোদ্রেকবিশেষেণ তৃতীযকচতুর্থকযোঃ প্রভাবমাহ- কফপিত্তাদিত্যাদি| পৃষ্ঠমভীতি পৃষ্ঠাত্, পৃষ্ঠগ্রাহীত্যর্থঃ; কিংবা, পৃষ্ঠাদিতি ল্যব্লোপে পঞ্চমী, তেন পৃষ্ঠমধিষ্ঠাযেত্যর্থঃ| জঙ্ঘাভ্যাং পূর্বমিতি জঙ্ঘযোঃ প্রথমং পীডাং করোতি| অত্র চ ন স্বপ্রধানঃ পৈত্তিকশ্চতুর্থকঃ পিত্তগৃধ্রসীবদ্ভবত্যেবানভিধানাদিতি মন্তব্যং; হারীতে তু পিত্তজন্যত্বং যদুক্তং তদনুবন্ধরূপপিত্তজন্যত্বং, পৃথক্প্রভাবাকর্তৃত্বাত্; ন হি প্রভাবশ্চতুর্থকাভ্যুপগমবিরোধী ||৭১-৭২||

সম্প্রতি মধ্যে অহনী জ্বরযত্যাদাবন্তে চ যো মুঞ্চতি স চতুর্থকবিপর্যযত্বেন চতুর্থকগ্রহণগৃহীত এবেতি দর্শযন্নাহ- বিষমেত্যাদি| ত্রিবিধো ধাতুরিতি বাতাদিঃ| দ্বিধাতুস্থ ইতি অস্থিমজ্জগতঃ| অযং চ বিষমজ্বর ইবেতি সামান্যেনোক্তং, তথাঽপি চতুর্থকস্য প্রকাররূপবিষমজ্বর এবেতি মন্তব্যম্| অত্র তন্ত্রান্তরম্- “অস্থিমজ্জোভযগতে চতুর্থকবিপর্যযঃ| ত্র্যহাদ্দ্ব্যহং জ্বরযতি হ্যাদাবন্তে চ মুঞ্চতি” ইতি||৭৩||

চতুর্থকবিপর্যযেণ সংযুক্তপঞ্চবিধজ্বরাণাং সমানং ধর্মমাহ- প্রাযশ ইত্যাদি| প্রাযশোগ্রহণাত্ সততকাদীনাং দ্বন্দ্বাদিজন্যত্বমপি সূচযতি| ননু, যদি সন্নিপাতারব্ধত্বমেষাং তর্হি যদুচ্যতে চতুর্থকে শ্লৈষ্মিকত্বাদি, তত্ কথমিত্যাহ - সন্নিপাতে তু যো ভূযানিত্যাদি; যত ‘আগন্তুরনুবন্ধো হি প্রাযশো বিষমজ্বর’ ইতি গ্রন্থেন ভূতানুবন্ধো বক্তব্যঃ; জতূকর্ণেঽপি তৃতীযকচতুর্থকবিপর্যযাবুক্ত্বাঽভিহিতং- “বিষমজ্বরাস্ত্রিদোষজত্বেঽপ্যধিকদোষলব্ধাখ্যাঃ” ইতি| এতে পঞ্চাপি জ্বরাঃ কেষাঞ্চিদ্বিষমজ্বরত্বেন সম্মতাঃ| তথাহি- বিষমত্বং বিষম(বেগ)কালত্বেন ভবতি; যদুক্তমন্যত্র- “বিষমো বিষমারম্ভক্রিযাকালোঽনুষঙ্গবান্” (বা. নি.অ.২) ইতি| সন্ততে তু দ্বাদশাহবিসর্গেণ ত্রযোদশাহে পুনরনুবন্ধাত্ কালেবৈষম্যমস্তি, তেন সোঽপি বিষম ইতি| অন্যে তু, সন্ততং পরিত্যজ্য সততকাদীংশ্চতুরো বিষমজ্বরানিচ্ছন্তি; যতঃ সন্ততে কালবৈষম্যং তাদৃশং নাস্তি; উক্তং চ খরনাদেন- “জ্বরাঃ পঞ্চ মযোক্তা যে পূর্বং সন্ততকাদযঃ| চত্বারঃ সন্ততং হিত্বা জ্ঞেযাস্তে বিষমজ্বরাঃ” ইতি| অন্যে তু- তৃতীযকচতুর্থকাবেব বিষমৌ, বিষমাণাং চিরেণোত্পাদাত্; যদাহ দারুবাহঃ- “সূক্ষ্মসূক্ষ্মতরাস্যেষু দূরদূরতরেষু চ| দোষো রক্তাদিমার্গেষু শনৈরল্পং চিরেণ যত্|| যাতি দেহং ন বা(ঽ)শেষং ভূযিষ্ঠং প্রতিপদ্যতে| ক্রমোঽযং তেন বিচ্ছিন্নসন্তাপো লক্ষ্যতে জ্বরে” ইত্যাহুঃ||৭৪||

সম্প্রতি সন্ততজ্বর এব যথা সততকাদিরূপো ভবতি, তথা সততকাদযঃ সন্ততাদিরূপা ভবন্তি, তদাহ- ঋত্বহোরাত্রেত্যাদি| বলাবলাদিতি মনোঽন্তেন সম্বধ্যতে, বলং চাবলং চ বলাবলম্| অর্থবশাদিতি কর্মবশাত্| ঋত্বাদীনাং বলাত্তথা ঋত্বাদ্যবলাজ্জ্বরস্তং তং সততাদিজ্বরোক্তং কালং প্রপদ্যতে| তত্র ঋতুবলাদ্বাতোত্তরঃ সততকো বর্ষাকালজঃ প্রত্যনীকাং শরদং প্রাপ্য অন্যেদ্যুষ্কাদিরূপো ভবতি| অহোরাত্রবলাবলাবলাত্ কালবিশেষপ্রাপ্তির্যথা- বসন্তস্য মধ্যেষ্বহোরাত্রেষু বাতিকশ্চাতুর্থিকো জাতো যঃ স বসন্তস্য পশ্চিমান্যহোরাত্রাণি রূক্ষাণি প্রাপ্য বলবান্ তৃতীযকাদিরূপো ভবতি, তথোক্তদিনেষ্বেব শ্লৈষ্মিকঃ সততকো জাতঃ শেষদিনেষু শ্লেষ্মপ্রত্যনীকেষু অন্যেদ্যুষ্কাদিরূপো ভবতি| দোষবলাবলাদ্দুষ্টহেতুসেবাভূতাজ্জ্বরপরাবৃত্তির্যুক্তৈব| মনোবলাত্ সততজ্বরী মনোনিবৃত্ত্যাদিনা অন্যেদ্যুষ্কাদিজ্বরবান্ ভবতি; মনোদৌর্বল্যাদ্ভযাদিনা চতুর্থকাদিজ্বরী তৃতিযকাদিজ্বরবান্ ভবতি| কর্মবশাজ্জ্বরপরাবৃত্তৌ শুভকর্মণা দুঃখজ্বরপরাবৃত্ত্যা যো যঃ সুখঃ স ভবতি; পাপকর্মণা তু দুঃখজ্বরো ভবতীতি জ্ঞেযম্||৭৫-৮৩||

সম্প্রত্যষ্টবিধজ্বরাকৃতৌ বক্তব্যানাহ- হেতুভিরিত্যাদি| হেতবোঽপি জ্বরবিশেষগমকত্বেনাকৃতিরূপা ভবন্ত্যেবেতি কৃত্বা হেতুকথনমপি যত্ কৃতং তদপ্যুচিতম্| পূর্বমিতি নিদানে| সমাসেনোপদিষ্টস্যেতি যে নিদানে দ্বান্দ্বিকসান্নিপাতিকাগন্তবঃ সমাসেনোক্তাঃ, তেষামিহ বিস্তরেণ লক্ষণং শৃণ্বিতি; যে পুনরেকদোষজন্যা বাতজ্বরাদযস্তে তত্রৈব প্রপঞ্চেনোক্তা ইতি নেহ পুনর্বক্তব্যাঃ| ভ্রমঃ যেন চক্রস্থিতমিবাত্মানং মন্যতে, কিংবা ভ্রমঃ ভ্রান্তিঃ| শীতকঃ শীততা| স্তৈমিত্যমিতি বস্ত্রাবগুণ্ঠিতত্বমিব| সন্তাপো মধ্যবেগ ইতি নাতিতীব্রঃ সন্তাপঃ| স্বেদস্তম্ভ ইতি স্বেদাপ্রবর্তনম্||৮৪-৮৮||-

সন্নিপাতজ্বরস্যোর্ধ্বমিতি অত্রোর্ধ্বশব্দেনাধিকবাচিনা প্রকৃতিসমসমবাযারব্ধসন্নিপাতজ্বরাদ্যান্যধিকানি বিকৃতিবিষমসমবাযারব্ধজ্বরস্য লক্ষণানি, তানি বক্ষ্যামীত্যর্থ ইতি কেচিদ্ব্যাখ্যানযন্তি; যদিহ সাস্রাবকলুষনির্ভুগ্নলোচনত্বাদি বক্তব্যং ন তত্ পৃথগ্বাতাদিজ্বরোক্তলক্ষণমেলকে ভবতি, কিন্তু বিকৃতিবিষমসমবাযারব্ধে জ্বরে সংযোগমহিম্না ভবতীতি| বযং তু ব্রূমঃ- যদ্যূর্ধ্বশব্দেন বিকৃতিবিষমসমবাযারব্ধজ্বরলক্ষণাভিধানমিহ প্রতিজ্ঞাযতে, তদা যত্ প্রত্যেকদোষলক্ষণমেলকেনোপপন্নং লক্ষণং ‘ক্ষণে দাহঃ ক্ষণে শীতং’ ইত্যাদি, তদিহানভিহিতং স্যাত্; সামান্যেন যান্যত্র প্রাযঃ প্রাদুর্ভবন্তি তানি বিকৃতিবিষমসমবাযারব্ধানি তথা প্রকৃতিসমসমবাযারব্ধানি চ লক্ষণান্যুচ্যন্তে; অত ঊর্ধ্বমিতি পদস্য চাতঃ পরেণেত্যর্থঃ| নির্ভুগ্নে ইতি অতিকুটিলে| পরিদগ্ধা দগ্ধবত্ কৃষ্ণবর্ণা| খরস্পর্শা গোজিহ্বাবত্| স্রস্তাঙ্গতা নিঃসহাবযবতা| ষ্ঠীবনং রক্তস্য পিত্তস্য বা মুখেন স্বল্পোদ্গিরণম্| শিরসো লোঠনমিতি ইতস্ততো নযনম্| কৃশত্বং নাতিগাত্রাণাং দোষপূর্ণত্বেন| প্রততং নিরন্তরম্| কোঠো ভালুকীযে- “বরটীদষ্টসঙ্কাশঃ কণ্ডূমাংল্লোহিতোঽস্রকফপিত্তাত্| ক্ষণিকোত্পাদবিনাশঃ ‘কোঠ’ ইতি নিগদ্যতে তজ্জ্ঞৈঃ” ইতি| মূকত্বং মন্দবচনত্বম্, অবচনতা বা||৮৯-১০৮||-

সন্নিপাতস্যাসাধ্যতাকৃচ্ছ্রসাধ্যতালক্ষণমাহ- দোষ ইত্যাদি| অত্র দোষশব্দো বিবদ্ধোপপদান্মলে বর্ততে| নষ্টেঽগ্নাবিতি ইতরজ্বরাপেক্ষযাঽধিকতযা নষ্টেঽগ্নাবিত্যর্থঃ| সর্বাণি চ সম্পূর্ণানি বলীযাংসি লক্ষণানি যস্য স সর্বসম্পূর্ণলক্ষণঃ| অসাধ্যকৃচ্ছ্রসাধ্যাভিধানেন সুখসাধ্যো ন ভবতীতি দর্শিতম্| যদুক্তং- “সন্নিপাতো দুঃশ্চিকিত্স্যানাং” (সূ.অ.২৫) ইতি, তথা চ ভালুকিনা- “মৃত্যুনা সহ যোদ্ধব্যং সন্নিপাতং চিকিত্সতা” ইতি||১০৯||-

নিদান ইত্যাদি| নিদানে জ্বরনিদানে, প্রোক্তা “তত্র যথোক্তানাং লিঙ্গানাং” (নি.অ.১) ইত্যাদিনা গ্রন্থেন প্রাগুক্তেত্যর্থঃ; পুনঃ প্রকরণাগতত্বাদুচ্যত ইতি ন পৌনরুক্ত্যম্| তযা চোক্তং স্বলক্ষণমিতি তযা দ্বন্দ্বরূপযা দ্বন্দ্বলক্ষণং, তথা সন্নিপাতরূপযা সন্নিপাতলক্ষণমুক্তমিত্যর্থঃ||১১০||-

আগন্তুং চতুর্বিধং বিভজন্নাহ- আগন্তুরিত্যাদি| কশা ‘সার’ ইতি খ্যাতা, মুষ্টিঃ ‘কীল’ ইতি খ্যাতঃ| হতে অভিহতে| প্রাযো রক্তমিতি অত্যর্থং রক্তং দূষযন্ মাংসাদি চাল্পং দূষযতীত্যর্থঃ| যদ্যপি নিদানেঽপি “তত্রাভিঘাতজেন বাযুনা দুষ্টশোণিতাধিষ্ঠানেন” (নি.অ.১) ইত্যুক্তং, তথাঽপীহ রক্তস্য সাক্ষাদ্দুষ্টিঃ, তথা মাংসাদীনাং মনাগ্দুষ্টিঃ সূচ্যত ইতি বিশেষঃ||১১১-১১৩||-

অভিষঙ্গজ্বরেষু দোষানুবন্ধবিশেষানাহ- কামেত্যাদি| ননু নিদানে- “অভিষঙ্গজঃ পুনর্বাতপিত্তাভ্যামনুবধ্যতে” (নি.অ.১) ইত্যুক্তং, তত্ কিমিহ ভূতাভিষঙ্গজস্য ত্রিদোষানুবন্ধ উচ্যতে- ন, তত্র কামাদ্যভিষঙ্গজো যঃ প্রাযো ভবতি, তদভিপ্রাযেণোক্তং “বাতপিত্তাভ্যামনুবধ্যতে” (নি.অ.১) ইতি; কামাদিকেষু হি ক্বচিদ্বাতঃ ক্বচিত্ পিত্তমিতি বাতপিত্তানুবন্ধো জ্ঞেযঃ| ভূতসামান্যলক্ষণা ইতি দেবাদযোঽষ্টৌ উন্মাদে ভূতা উক্তাঃ, তেষাং মধ্যে আবেশকর্তৃভূতস্য যল্লক্ষণং তেন সমান্যত্র দোষলক্ষণানি ভূতজ্বরে ভবন্তি| অত্র কাশ্মীরাঃ “বিষবৃক্ষানিলস্পর্শাত্” ইত্যাদিগ্রন্থং বিষজ্বরাভিধাযকং পঠন্তি, বিষজোঽপ্যভিষঙ্গজ এব প্রবিশতি| যে তু ন পঠন্তি, তন্মতেঽপ্যভিষঙ্গজে এব বিষৌষধিগন্ধজস্যাপ্যবরোধঃ| অন্যে তু বিষজং বিষজনিতপিত্তকৃতত্বেন দোষজ এব ক্ষিপন্তি| অভিচারঃ হিংসার্থোঽথর্বমন্ত্রহোমাদিঃ| অভিশাপঃ অভিশপনমেব| সিদ্ধা মন্ত্রৌষধতপঃশমাদিসিদ্ধাঃ| ‘সন্নিপাতজ্বরস্যোক্তং’ ইত্যাদিগ্রন্থমত্র কাশ্মীরাঃ পঠন্তি, স চ নাতিপ্রসিদ্ধঃ||১১৪-১২৭||-

আগন্তোর্নিজাদ্ভেদকং ধর্মমাহ- তে পূর্বমিত্যাদি| কেবলা ইতি নিজদোষরহিতাঃ| নিজৈরিতি নিজদোষলক্ষণৈঃ| হেত্বৌষধবিশিষ্টাশ্চেতি নিজজ্জ্বরাদ্বিশিষ্টহেতবো বিশিষ্টৌষধাশ্চ ভবন্তি; তত্র বিশিষ্টো হেতুরভিঘাতাদিঃ, ভেষজং চ পরিষেকমন্ত্রাদি||১২৮||-

সংসৃষ্টা ইত্যাদিনা সর্বজ্বরসাধারণাং সম্প্রাপ্তিমন্তে ব্রূতে| সম্প্রাপ্তিরপি হি সর্বজ্বরাণামাকৃতিরেব, তেন নোত্সূত্রমস্যাভিধানম্ | কিংবা, ক্রমপ্রাপ্তে সামজ্বরলক্ষণে বক্তব্যেঽরুচ্যাদীনাং সামজ্বরলক্ষণানামুত্পাদে উপপত্তিং দর্শযিতুং সম্প্রাপ্তিরুচ্যতে| সংসৃষ্টা ইতি যুগ্মভূতাঃ| সন্নিপতিতা ইতি ত্রযোঽপি মিলিতাঃ| পক্তিমিতি পক্তিহেতুতযা জাঠরাগ্নিং ব্রূতে| স্থানাদিতি গ্রহণ্যাঃ, গ্রহণী হি জাঠরাগ্নিস্থানম্| স্বেনেতি দোষোষ্মণা; তেনেতি জাঠরাগ্ন্যূষ্মণা| দেহোষ্মণ ইতি সকলদেহচারিণঃ প্রাকৃতোষ্মণঃ| বাতশ্লেষ্মণোস্তু যদ্যপি পিত্তবদুষ্মা নাস্তি, তথাঽপি তযোর্ভূতত্বেন ঊষ্মা যোঽস্তি, স ইহ গ্রাহ্যঃ; বক্তব্যং হি গ্রহণ্যধ্যাযে- “ভৌমাপ্যাগ্নেযবাযব্যাঃ পঞ্চোষ্মাণঃ সনাভসাঃ” (চি.অ.১৫) ইতি| কিংবা, তেনেত্যনেন দিব্যরূপজ্বরাধিষ্ঠানপ্রভাবকৃতং দোষাণামূষ্মাণং গ্রাহযতি; কিংবা, জ্বরসামান্যসম্প্রাপ্তিপ্রাপ্তপিত্তোষ্মাণং নিদর্শযতি , সর্বত্র হি জ্বরে পিত্তমবশ্যং ভবতি; যদুক্তং- “ঊষ্মা পিত্তাদৃতে নাস্তি জ্বরো নাস্ত্যূষ্মণা বিনা” (বা.চি.অ.১) ইতি| কেবলমিতি সমস্তম্||১২৯-১৩১||-

স্বেদং না নাধিগচ্ছতীত্যত্র প্রায ইতি যোজ্যং, ক্বচিজ্জ্বরে স্বেদস্যাপ্যভিহিতত্বাত্| না ইতি পুরুষঃ||১৩২||-

অবিসর্গীতি নিত্যানুষক্তঃ| দোষাণামিতি মলসম্বদ্ধানাং দোষাণাম্| অপ্রবর্তনম্ অবিসর্গঃ| ক্ষুন্নাশ ইতি বুভুক্ষাভাবঃ| ন বিড্ জীর্ণেতি ন পুরীষং পক্বম্| ন চ গ্লানিরিতি ন ক্ষীণমাংসতা||১৩৩-১৩৬||-

ক্ষুত্ ক্ষামতেত্যাদিনা নিরামজ্বরলক্ষণমাহ| অত্র চ ক্ষুদাদযো দোষপাকাদ্ভবন্তো বিনাঽপ্যষ্টাহং নিরামদোষারব্ধজ্বরলক্ষণং ভবন্তি| অষ্টাহস্তু ক্ষুদাদীন্ বিনা দোষপাকেঽসত্যপি ভেষজদানযোগ্যাং জ্বরস্য ব্যাধের্নিরামতাং ব্রূতে, অত এব “পাচনং শমনীযং বা কষাযং পাযযেত্তু তম্” ইতি বিকল্পদ্বযেন যদাঽষ্টাহে ক্ষুদাদিদোষপাকলক্ষণানুদযস্তদা দোষপাকার্থং পাচনীযং দেযম্, অথ ক্ষুধাদিসমুদযোঽপি জাতস্তদা শমনীযং দেযং সর্বথা নিরামত্বাজ্জ্বরস্য| এতামেব সর্বথানিরামতামুপদিশতা খরনাদেনোক্তং যত্- “ন চ নিঃসপ্ততৈবৈকা নিরামজ্বরলক্ষণম্| চিরাদপি হি পচ্যন্তে সন্নিপাতজ্বরে মলাঃ|| সপ্তরাত্রাতিবৃত্তিং চ ক্ষামতাদি চ লক্ষণম্| তস্মাদেতদ্দ্বযং দৃষ্ট্বা নিরামং জ্বরমাদিশেত্” ইতি| অষ্টাহাদর্বাগ্দোষপাকজনিতক্ষুদাদিদর্শনান্নিরামতা সুশ্রুতেনাষ্টাহাদর্বাগ্ভেষজদান দর্শযতা প্রতিপাদিতা| যদুক্তম্- “অর্বাগপি চ দেযং স্যাদ্ভেষজং দোষপাকতঃ” (সু.উ.অ.৩৯) ইতি| তস্মাত্ ক্ষুদাদযোঽষ্টাহশ্চ ব্যস্তং সমস্তং চ লক্ষণং যথোক্তন্যাযাজ্জ্ঞেযম্||১৩৭||-

সৌষধং চ ক্রিযাক্রমমিত্যনেন যদ্যপ্যৌষধমাদাবুক্তং, তথাঽপি তস্য ক্রিযাক্রমবিশেষণতযা অপ্রাধান্যমিতি কৃত্বা ঔষধমতিক্রম্য ‘নবজ্বরে’ ইত্যাদিনা ক্রিযাক্রমং ব্রূতে| ক্রিযাযাশ্চিকিত্সাযাঃ ক্রমঃ পরিপাটী| তত্রাপ্যহিতস্যৈব প্রথমং নিষেধঃ| অন্নশব্দেন গুর্বন্নমভিধত্তে| হারীতেন হি- “নবজ্বরে ব্যবাযাদি প্রত্যেকং দোষকোপনম্| গুর্বন্নভোজনাচ্চাপি বিষ্টম্ভো দোষকোপনম্ ” ইত্যুক্তম্| কষাযাংশ্চেতি জাতৌ বহুবচনং; তেন কষাযং বর্জযেদিত্যর্থঃ| উক্তং হ্যত্র জতূকর্ণেন- “কষাযরসগুরূষ্ণস্নিগ্ধান্নস্নানাভ্যঙ্গান্ নবজ্বরে বর্জযেত্” ইতি||১৩৮||-

জ্বরে ইত্যাদি| লঙ্ঘনশব্দেনেহানশনং বিবক্ষিতং, যদ্যপি “চতুষ্প্রকারা সংশুদ্ধিঃ” (সূ.অ.২২) ইত্যাদিনা লঙ্ঘনবৃংহণীযে দশবিধমেব লঙ্ঘনমুক্তং, তথাঽপি তেষামিহাবস্থাবিশেষেণ বিনিযোগাল্লঙ্ঘনমেবেতি নিযমোঽপবাদবিষযং ত্যক্ত্বা সমুচ্চীযমানাবধারণে জ্ঞেযঃ, যথা- “নরং চ নারাযণমেব চোভৌ স্বতঃ সুতৌ সঞ্জনযাম্বভূব” ইত্যত্র| তেনাবস্থাযাং বমনমপি ভবতি বক্ষ্যমাণম্| যত্তু লঙ্ঘনবৃংহণীযে কফপিত্তজ্বরচ্ছর্দ্যাদিষু মধ্যে জ্বরং পঠিত্বোক্তং- “পাচনৈস্তান্ ভিষক্ প্রাজ্ঞঃ প্রাযেণাদাবুপাচরেত্” (সূ.অ.২২) ইতি, তত্র ভেষজপ্রযোগস্যাদৌ পাচনং কর্তব্যমিতি ব্রূতে, ন জ্বরাদৌ; তেনেহাদৌ লঙ্ঘনাভিধানং ন বিরুধ্যতে| হারীতে তু “পিত্তশ্লেষ্মবিশুদ্ধ্যর্থং কুর্যাদ্বমনমাদিতঃ” ইতি যদুক্তং, তত্ ‘কফপ্রধানান্’ ইত্যাদিবক্ষ্যমাণাবস্থাযাং জ্ঞেযম্| ক্ষযশব্দেন ধাতুক্ষযকৃতং জ্বরং কিংবা রাজযক্ষ্মজ্বরং গৃহ্ণাতি, অনিলশব্দেন নিরামানিলগ্রহণং; কিংবা ক্ষযনিলশব্দেন ধাতুক্ষযকুপিতানিলগ্রহণম্| যদুক্তং- “বাযোর্ধাতুক্ষযাত্ কোপো মার্গস্যাবরণেন চ” (চি.অ.২৮) ইতি| যস্তু মার্গাবরণেন বাযুঃ কুপ্যতি, স আবরকধর্মিতযা প্রাযেণ সামো ভবতি, তত্র চ লঙ্ঘনং মাত্রযা কর্তব্যমেব| যদুক্তং- “সামে বাতেঽপি লঙ্ঘনম্| কুর্যাদেবামপক্ত্যর্থং যুক্ত্যা, ন তু যথা কফে” ইতি| অনিলজ্বরমুক্ত্বাঽপি কামাদিজ্বরাভিধানং তেষু কালান্তরেণ বাতসম্বন্ধো ভবতি, তেন প্রথমমপি বাতাসম্বন্ধে কামাদিজ্বরাণামলঙ্ঘনীযত্বোপদর্শনার্থম্||১৩৯||-

লঙ্ঘনফলমাহ- লঙ্ঘনেনেত্যাদি| প্রাণাবিরোধিনেতি বলাবিরোধিনা, বিরোধশ্চাতিক্ষযকরত্বেনেহোচ্যতে| আরোগ্যং বলবত এব ভবতীতি বলাধিষ্ঠানমারোগ্যমুক্তম্| যদিত্যনেনারোগ্যং প্রত্যবমৃশতি||১৪০-১৪১||-

প্রকৃতস্য লঙ্ঘনস্য পাচনতাং দর্শযন্নপরাণ্যপি স্বেদাদীনি পাচনান্যাহ- লঙ্ঘনমিত্যাদি| কাল ইতি অষ্টাহঃ| তিক্তকো রসোঽত্র যবাগূপানীযাদিসংস্কারকত্বেন জ্ঞেযঃ, স্বতন্ত্রভেষজপ্রযোগস্তরুণে নিষিদ্ধ এব| উক্তং হি- “ভেষজং হ্যামদোষস্য ভূযো জ্বলযতি জ্বরম্” ইতি| ‘অবিপক্বানাং দোষাণাম্’ ইতি কৃত্বাঽপি ‘তরুণে জ্বরে’ ইতি যত্ করোতি, তেনাষ্টাহাদূর্ধ্বমতরুণে জ্বরেঽপক্বেষু দোষেষু প্রাধান্যেন কষাযপানং পাচনমধিকৃতং, ন লঙ্ঘনাদয ইতি দর্শযতি||১৪২||-

লঙ্ঘনাদিকালে এব অবস্থাবিশেষে দেযং জলমাহ- তৃষ্যত ইত্যাদি| বাতকফজ্বরে ইতি বাতজ্বরে, কফজ্বরে, বাতকফজ্বরে চ| মদ্যোত্থে কফাদিজ্বরেঽপি শীতলং জলং জ্ঞেযম্| তিক্তকৈঃ শৃতমিতি বক্ষ্যমাণমুস্তাদিভিঃ শৃতম্| উভযমিতি উষ্ণং তথা তিক্তকশৃতশীতং চ| ত্রিদোষকফপিত্তজ্বরযোস্তু যদ্যপীহ পানীযং নোক্তং; তথাঽপি সামান্যেন বিমানস্থানে যদুক্তং- “কিন্নু খলু জ্বরিতেভ্যঃ পানীযমুষ্ণং প্রযচ্ছন্তি” (বি.অ.৩) ইত্যাদিনা, তত্প্রামাণ্যাদুষ্ণমেব জলং দেযং; বাতপৈত্তিকে তু জ্বরেঽত্যর্থদাহাদিকারকে শীতলমেব দেযমিত্যপি বিমান এব “অত্যর্থোত্সন্নপিত্তে” (বি.অ.৩) ইত্যাদিনা গ্রন্থেন সূচিতম্||১৪৩-১৪৪|-

মুস্তেত্যাদিঃ পানীযসাধকঃ ষডঙ্গপ্রযোগঃ| অত্র শুণ্ঠী অতিক্তাঽপ্যামাশযদুষ্টিকারকজ্বরহিতত্বাদ্বিহিতা; অত্র শৃতশীতং জলং দদ্যাদিতি জলসংস্কারশ্রুত্যা ন ক্বাথপরিভাষযা ক্বাথকরণং, কিন্তু জলসংস্কারপরিভাষযা| পরিভাষা চ স্বতন্ত্রানুক্তাঽপি বৃদ্ধব্যবহারসিদ্ধা প্রমাণীভূতৈব| সা চ “যদপ্সু শৃতশীতাসু ষডঙ্গাদি প্রযুজ্যতে| কর্ষমাত্রং ততো দ্রব্যং সাধযেত্ প্রাস্থিকেঽম্ভসি|| অর্ধশৃতং প্রযোক্তব্যং পানে পেযাদিসংবিধৌ” ইতি; পরিভাষার্থশ্চ ব্যক্ত এব||১৪৫||-

অবিশেষেণ তরুণাতরুণজ্বরেঽবস্থাবিধেযং বমনমাহ- কফপ্রধানানিত্যাদি| কফঃ প্রধানো যেষাং তে কফপ্রধানাঃ| উত্ক্লিষ্টানিতি হৃল্লাসাদিনা বহির্গমনোন্মুখান্| আমাশযস্থিতানিত্যনেন সর্বশরীরং পরিত্যজ্যামাশযগমনং দর্শযতি| জ্বরকরানিত্যনেন জ্বরকরান্ হি দোষানেবংবিধানেব নবজ্বরে বমনৈর্হরেত্, নান্যথেতি দর্শযতি| কালে ইতি যথোক্তাযামবস্থাযাম্| বমনৈরিতি বহুবচনেন প্রকৃত্যাদ্যপেক্ষযা বহূনাং বমনদ্রব্যযোগানাং প্রযোগং দর্শযতি| বম্যানামিত্যনেন অবম্যগর্ভিণ্যাদিষু বমনং নিষেধযতি| অত্র চ স্বযমেবোত্ক্লিষ্টত্বাদ্দোষস্য দোষোত্ক্লেশপ্রযোজনকৌ স্নেহস্বেদৌ ন ক্রিযেতে, অল্পৌ বা ক্রিযেতে||১৪৬||-

উক্তাবস্থাব্যতিরেকেণ বমনে দোষমাহ- অনুপস্থিতেত্যাদি| সর্বদেহানুগা ইতি সূক্ষ্মসিরাত্বগাদ্যনুগতাঃ | সামা ইতি সামত্বেন স্ত্যানা অপ্রচলাশ্চ| ধাতুস্থা ইতি ধাতুষু অত্যন্তানুপ্রবেশব্যবস্থিতাঃ| ন সুখেন নিহ্রিযন্তে ইতি অসুনির্হরাঃ; কিংবা, অসূন্ প্রাণান্ নির্হরন্তীতি অসুনির্হরাঃ| অত্রার্থা ফলানামিত্যাদিনা দৃষ্টান্তমাহ| আমানাং ফলানাং যথা স্বরসা নির্হরণে সাত্যযা ভবন্তি, তথা যথোক্তা অপি দোষা ইত্যর্থঃ; সাত্যযা ইতি সব্যাপদঃ ||১৪৭-১৪৮||-

বমনলঙ্ঘনযোরনন্তরং যদ্বিধেযং তদাহ- বমিতমিত্যাদি| বমিতং লঙ্ঘিতমিতি অবস্থাবশাত্ কদাচিদ্বমিতং, কদাচিল্লঙ্ঘিতং, কদাচিচ্চ বমিতলঙ্ঘিতম্| বমনানন্তরং হি যদা সম্যগ্বিশুদ্ধির্ন ভূতা তদা তদহর্লঙ্ঘনমপি ক্রিযতে| কালে ইতি অন্নদানযোগ্যে কালে| যথাস্বৌষধসিদ্ধাভিরিতি যথাবিষযং যস্যাং যবাগ্বাং যদ্ভেষজং পিপ্পলীনাগরাদি বক্তব্যং, তত্সিদ্ধাভিঃ; কিংবা, যস্মিঞ্জ্বরে যদ্ভেষজং পাচনং বক্তব্যং, তত্সিদ্ধাভিঃ| উক্তং হি সুশ্রুতে- “অন্নকালে হিতা পেযা যথাস্বং পাচনৈঃ কৃতা” (সু.উ.অ.৩৯) ইতি| মণ্ডপূর্বাভিরিতি মণ্ডপ্রধানাভিঃ| তত্র প্রথমং মণ্ডং পীত্বা তদনু তনুপেযাভাগো যোজ্যঃ| যাবজ্জ্বরমৃদূভাবাদিতি যাবজ্জ্বরস্য দোষপাকাত্তীক্ষ্ণতা নিবর্ততে; অসতি জ্বরমৃদুভাবেঽপি ষডহং যাবত্| অযং চ ষডহঃ কিং পেযাদিনাত্ প্রভৃতি আহোস্বিজ্জ্বরোত্পাদদিনাদিতি পক্ষদ্বযমুত্তরত্র ‘জ্বরিতং ষডহেঽতীতে’ ইত্যত্র নির্লোচযিষ্যামঃ| স্বেদনাযেত্যাদৌ ‘ভবন্তি’ ইতি শেষঃ| জ্বরসাত্ম্যত্বমভিধায যবগূনামবিষযং জ্বরিতমাহ- ঋত ইত্যাদি| ঋতে মদ্যসমুত্থিতাদিতি মদ্যকারণে জ্বরে নিষেধঃ| তথা মদাত্যযেঽপি ব্যাধাবন্যহেতুজোঽপি যো জ্বরঃ, তথা গ্রীষ্মে, তথা পিত্তকফাধিকে যো জ্বরঃ, তথোর্ধ্বরক্তপিত্তিনো যো জ্বরঃ, তেষু সর্বেষু পেযা ন দেযা| ইহ মদাত্যযাদীনাং পেযার্হেষু জাতোঽপি জ্বরঃ পেযানর্হঃ| ‘পিত্তকফাধিকে’ ইত্যনেন পিত্তকফযো রতিমাত্রোদ্গমে সতি পেযাযা অদানং বোধযতি| তেন, কফজে জ্বরে পিত্তজে জ্বরেঽনুদ্ভূতদোষে চ পেযা দাতব্যা| তথা হি তন্ত্রান্তরে- “কফজেঽপি যদা ক্ষীণো লঙ্ঘনাদিক্রমাত্ কফঃ| শস্তা এব যবাগ্বস্তু তথা পিত্তেঽপ্যযং ক্রমঃ” ইতি| তথাঽত্রেব- “পৈত্তিকো বাঽথ শীতাং মধুযুতাং পিবেত্| লাজপেযাং” ইত্যনেন পিত্তেঽপি যবাগূং বক্ষ্যতি| যত্তু- “পাংশুধানে যথা বৃষ্টিঃ ক্লেদযত্যতি কর্দমম্| তথা শ্লেষ্মণি সংবৃদ্ধে যবাগূঃ শ্লেষ্মবর্ধনী” ইতি হারীতেনোক্তং, তদতিবৃদ্ধকফবিষযং জ্ঞেযম্| অন্যে তু মিলিতপিত্তকফাধিকেষু পুরুষেষু যবাগূপ্রতিষেধমিচ্ছন্তি| যদি তু ‘ঊর্ধ্বগে কফপিত্তে চ’ ইতি পাঠস্তদা বাতজ্বরিণোঽপি যদা ঊর্ধ্বগং কফপিত্তং বমনেনাযাতি স্বযং তদাঽপি পেযা ন দেযেত্যর্থঃ | সুশ্রুতে তু “কফপিত্তপরীতস্য ঊর্ধ্বাসৃক্পিত্তিনস্তথা| মদ্যনিত্যস্য ন হিতা যবাগূঃ” (সু.উ.তং.অ.৩৯) ইত্যুক্তং, তেন ‘ঊর্ধ্বগে রক্তপিত্তে’ ইতি পাঠো যুক্তঃ||১৪৯-১৫৪||-

‘ঊর্ধ্বগে তর্পণং পূর্বং’ (চি.অ.৪) ইতি বচসা যবাগূং বাধিত্বা ঊর্ধ্বগে রক্তপিত্তে তর্পণং যদ্যপি বিহিতমেব, তথাঽপ্যূর্ধ্বগরক্তপিত্তিনো যো জ্বরস্তত্রাপি তর্পণাদিক্রমবিধানমেতত্| তর্পণং তোযপরিপ্লুতাঃ সক্তবঃ| জ্বরাপহানি ফলানি দ্রাক্ষাদাডিমাদীনি| বচনং হি- “দ্রাক্ষাদডিমখর্জূরপ্রিযালৈঃ সপরূষকৈঃ| তর্পণার্হেষু কর্তব্যং তর্পণং জ্বরনাশনম্” ইতি||১৫৫||-

জীর্ণং তর্পণং যস্য তং জীর্ণতর্পণম্| মুদ্গযূষস্য জাঙ্গলরসস্য চ বিকল্পঃ সাত্ম্যাপেক্ষো বলাপেক্ষশ্চ জ্ঞেযঃ| দুর্বলো হি দুর্বলাগ্নিঃ প্রাযো ভবতি, তস্য চ মুদ্গযুষো লঘুত্বেন দেযঃ, ইতরস্য তু জাঙ্গলো রসঃ||১৫৬-১৫৯||-

সম্প্রতি কষাযপানবিষযমাহ- পাচনমিত্যাদি| পাচনমিতি আমদোষপচনম্| শমনীযমিতি পক্বদোষোপশমনম্| এতচ্চ বিকল্পদ্বযং যোগ্যতযা যথাক্রমমামদোষবিষযং তথা পক্বদোষবিষযং জ্ঞেযম্| ষডহেঽতীতে ইতি জ্বরাহাদারভ্য ষডহেঽতিক্রান্তে; অতঃ সপ্তমেঽহনি লঘ্বন্নং মাত্রযা স্বরূপেণ চ যত্, তত্প্রতিভোজিতং জ্বরিতমষ্টমেঽহনি কষাযং পাযযেদিতি বাক্যার্থঃ| এবং চ পূর্বোক্তাষ্টাহকৃতনিরামতাব্যবস্থাযাঃ পাচনস্য শমনীযস্য বা উপযোগ উপপন্নো ভবতি| ননু পেযাপ্রযোগে “যাবজ্জ্বরমৃদুভাবাত্ ষডহং বা বিচক্ষণঃ” ইত্যুক্তং, ততশ্চ পেযযৈব তাবত্ ষডহো ব্যাপ্যতে, পূর্বং চ জ্বরাদৌ লঙ্ঘনমুক্তং, তচ্চানির্দিষ্টকালমপি ‘লঙ্ঘনেন ক্ষযং নীতে’ ইত্যাদিগ্রন্থোক্তলঙ্ঘিতফলং যাবতা কালেন ভবতি তাবত্কালং কর্তব্যং; হারীতেন তু কালোঽপি দর্শিতঃ, যথা- “লঙ্ঘনং লঙ্ঘনীযানাং কুর্যাদ্দোষানুরূপতঃ| ত্রিরাত্রমেকরাত্রং বা ষড্রাত্রমথবা জ্বরে” ইতি; তেন জ্বরলঙ্ঘনদিনৈস্তথা ষডহেন চ সমং জ্বরাহাদারভ্যাষ্টাহাতিক্রমোঽপি ভবতি, ততশ্চ জ্বরাহাদারভ্যাষ্টাহে পাচনশমনীযকষাযো ভবতু, তস্মাত্ পেযাপ্রযোগষডহেঽতীতে “পাচনং শমনীযং বা কষাযং পাযযেত্” ইত্যভিপ্রাযঃ , তথা ‘জ্বরে পেযাঃ কষাযাশ্চ ক্ষীরং সর্পির্বিরেচনম্| ষডহে ষডহে দেযং বীক্ষ্য দোষবলাবলে” (চি.অ.৩০) ইত্যনেন গ্রন্থেনাপি পেযাপ্রযোগষডহাদূর্ধ্বং কষাযষডহ উক্তঃ, ন তু জ্বরোত্পাদাদিষডহাদূর্ধ্বম্| অত্র ব্রূমঃ- “যাবজ্জ্বরমৃদূভাবাত্ ষডহং বা বিচক্ষণঃ” ইত্যনেনাপি জ্বরোত্পাদদিনাদারভ্য ষডহপর্যন্তং পেযাপ্রযোগ উচ্যতে, পেযা হি জ্বরে প্রাধান্যেন দোষপাচনার্থং প্রযুজ্যতে| যদুক্তং- “লঙ্ঘনং স্বেদনং কালো যবাগ্বস্তিক্তকো রসঃ| পাচনান্যবিপক্বানাং দোষাণাং তরুণে জ্বরে” ইতি| লঙ্ঘনাদিপাচনীযত্বং দোষাণামষ্টাহদর্বাগেব, অষ্টাহাদূর্ধ্বং তু কষাযেণৈব পাচনমুক্তম্ | তত্রালঙ্ঘনীযে বাতজ্বরে আদিদিনাত্ প্রভৃতি পেযা ষডহমপি ব্যাপ্নোতি , একদ্বিত্রদিনলঙ্ঘিতে জ্বরে পেযা পঞ্চচতুস্ত্রিদিনপ্রযোগেণ জ্বরদিনাদারভ্য ষডহপর্যন্তং কর্তব্যা| যত্র তু দোষাণামপি সামতযা সন্নিপাতজ্বরে বা লঙ্ঘনমেব ষড্রাত্রং ষড্রাত্রাদিক্রমেণ বা ক্রিযতে, তত্র প্রাদেশিকে বিধৌ নাযং পেযাষড্রাত্রনিযম ঔত্সর্গিকঃ প্রবর্ততে| কিঞ্চাতিমাত্রলঙ্ঘনপ্রযোগে পেযা ন দোষপাচনার্থং ক্রিযতে, কিন্তু ভূরিলঙ্ঘনক্ষযিতাগ্নেঃ সন্ধুক্ষণার্থং, তত্রাগ্নিসন্ধুক্ষণে জাতে পুনরৌষধপানমেব ভবতি| “জ্বরে পেযাঃ কষাযশ্চ” (চি.অ.৩০) ইত্যাদৌ পেযা সমানকার্যাণাং লঙ্ঘনাদীনামুপলক্ষণভূতা; ততশ্চ পেযা যত্র প্রতিষিদ্ধা মদ্যোত্থজ্বরাদৌ তত্র তর্পণাদিক্রমেণাপি ষডহো গ্রাহ্যঃ| তেন, প্রথমষডহে উত্সর্গতো লঙ্ঘনাদিপাচনং কর্তব্যমিতি পেযা ষডহে দেযেতি; বচনমপ্যত্রোচ্যতে, তথাহি সুশ্রুতে- “লঙ্ঘনাম্বুযবাগূভির্যদা দোষো ন পচ্যতে| তদা তং মুখবৈরস্যতৃষ্ণারোচকনাশনৈঃ|| কষাযৈঃ পাচনৈর্হৃদ্যৈর্জ্বরঘ্নৈঃ সমুপাচরেত্” (সু.উ.তং.অ.৩৯) ইত্যুক্ত্বা, কষাযপানকালনিযমে প্রোক্তং- “সপ্তরাত্রাত্ পরং কেচিন্মন্যন্তে দেযমৌষধম্” (সু.উ.তং.অ.৩৯) ইত্যাদি| ততশ্চ লঙ্ঘনাদিষডহেঽতিক্রান্তে সপ্তরাত্রাদ্ভেষজদানং সুশ্রুতেনাস্থাপ্যাপ্রতিষেধাদনুমতমেব| তথা চরকে “লঙ্ঘনং স্বেদনং” ইত্যাদিনা তরুণজ্বরে লঙ্ঘনাদি বিহিতং, তরুণতা চ জ্বরস্য সপ্তাহমাত্রং ভবতি| যদুক্তং পুষ্কলাবতে- “আসপ্তরাত্রং তরুণং জ্বরমাহুর্মনীষিণঃ| মধ্যং দ্বাদশরাত্রং তু, পুরাণমত উত্তরম্” ইতি| সপ্তাহাদূর্ধ্বমতরুণে জ্বরে উত্সর্গতস্তাবল্লঙ্ঘনপেযাদি ন বিহিতমেব চরকেণাপি, তথা হারীতেনাপি লঙ্ঘনোষ্ণোদকমুস্তাদিশৃতজলপানপেযাভিধানানন্তরমুক্তম্- “এতাং ক্রিযাং প্রযুঞ্জীত ষড্রাত্রং সপ্তমেঽহনি| পিবেত্ কষাযসংযোগান্ জ্বরঘ্নান্ সাধুসাধিতান্ ” ইতি| তথা খরনাদেনাপি- “লঙ্ঘিতালঙ্ঘিতং তস্মাদ্বমিতং বা জ্বরার্দিতম্| তত্সাত্ম্যত্বাদতস্তস্মিন্নাদৌ জ্বরমুপাচরেত্|| যবাগূভির্যথাদোষং” ইত্যাদিনা তর্পণাদিক্রমং চাভিধাযোক্তম্- “ইতি ষড্রাত্রিকঃ প্রোক্তো নবজ্বরহরো বিধিঃ| ততঃ পরং পাচনীযং শমনং বা জ্বরে হিতম্” ইতি| তন্ত্রান্তরে চ যদেতত্ সপ্তমেঽহনি কষাযপানবিধানং, তদষ্টাহে বিহিতকষাযপানেন সমমদূরান্তরত্বান্ন বিরোধীতি মন্তব্যং, তস্মাজ্জ্বরাহাদারভ্য ষডহেঽতীতে লঘ্বন্নপ্রতিভোজিতে কষাযপানং, তথা ষডহং যাবত্ যবাগূপচার ইতি, তথা “জ্বরে পেযাঃ কষাযাশ্চ” (চি.অ.৩০) ইত্যাদয উত্সর্গবিধযঃ, তেনৈষাং ক্বচিদ্বাধনমপি ভবতীতি যুক্তমেব||১৬০||-

সম্প্রতি কষাযশব্দসামান্যেন নবজ্বরনিষিদ্ধকষাযস্য মহাত্যযকারকস্য নবজ্বরে প্রযোগে দোষমাহ- স্তভ্যন্ত ইত্যাদি| স্তভ্যন্ত ইতি অবিচলধর্মাণো ভবন্তি| ন বিপচ্যন্ত ইতি চিরেণাপি ন সুখং পচ্যন্তে| স্তম্ভিত্বাদিতি স্তম্ভনস্বভাবত্বাত্| উক্তং হি- “কষাযঃ স্তম্ভনঃ শীতঃ” (সূ.অ.২৬) ইতি| অযমর্থো হারীতেঽপ্যুক্তঃ- “ন কষাযং প্রশংসন্তি নরাণাং তরুণে জ্বরে| কষাযেণাকুলীভূতা দোষা জেতুং সুদুস্তরাঃ” ইতি| পূর্বং ষড্বিরেচনশতাশ্রিতীযে পঞ্চরসকৃতেষ্বপি স্বরসাদিষু কষাযশব্দ উক্তঃ, তদিহ যদি কষাযশব্দেন সামান্যেন মধুরাদিকৃতানাং স্বরসাদীনাং প্রতিষেধঃ স্যাত্, তদা ষডঙ্গপানীযস্য পঞ্চবিধকল্পনাযামবশ্যনিবেশনীযস্য তথা যবাগূসাধনার্থস্য চ পাঠেন তত্তদ্দ্রবস্য নিষেধঃ স্যাত্; যেন, ষডঙ্গস্য তথা যবাগূসাধনদ্রবস্য চ প্রযোগোঽত্র পঞ্চবিধকল্পনাযামন্তর্ভাবনীযঃ, ভেষজপ্রযোগস্য পঞ্চবিধকল্পনার্থেঽন্তর্ভাবাত্; অতঃ সর্বকল্পনাকষাযপ্রতিষেধো মা স্যাদিত্যাহ- ন ত্বিত্যাদি| নতু কল্পমুদ্দিশ্যেতি স্বরসকল্কশৃতশীতফাণ্টরূপকল্পনং লক্ষ্যীকৃত্য; যঃ কষাযকষায ইতি যঃ কষাযৈরামলকাদিভিঃ কৃতঃ স্বরসাদিরূপঃ কষাযঃ স নিষিধ্যত ইত্যর্থঃ| ন চানেন কষাযরসকৃতস্বরসাদিনিষেধেন মধুরাদিকৃতস্বরসাদীনাং তরুণজ্বরে প্রযোগো ভবতি, স্বরসাদিভেষজস্যাতিগুরোস্তরুণজ্বরেঽবিধানাত্| তেন, কষাযকষাযপ্রতিষেধেন তিক্তদ্রব্যকৃতষডঙ্গাদিকল্পনাকষাযস্য বিহিতস্যাবিরোধঃ সাধ্যতে, ন ত্ববিহিতস্বরসাদিবিধানং ক্রিযতে| স্বরসাদিগুরুভেষজস্য তরুণজ্বরে নিষেধবচনং- “ভেষজং হ্যামদোষস্য ভূযো জ্বলযতি জ্বরম্” (সু.উ.তং.অ.৩৯) ইতি| অন্যে তু ব্রুবতে- যত্- ষডরাত্রাত্ পরতঃ সপ্তমে দিবসে কষাযপানং বিহিতং “পাচনং শমনীযং চ” ইত্যাদিনা স্বতন্ত্রেণ; তত্র সপ্তমে দিবসে তরুণ এব জ্বরো ভবতি, তরুণে চ জ্বরে কষাযপানং নিষিদ্ধমিতি বিরোধং পশ্যন্ মধুরাদিদ্রব্যকৃতকষাযস্য সপ্তমেঽহন্যপ্রতিষেধঃ, কষাযকষাযস্য তু সপ্তমেঽহ্নি প্রতিষেধ ইত্যুপদর্শনার্থং ‘ন তু কল্পনমুদ্দিশ্য’ ইত্যাদি কৃতং; ততশ্চ জ্বরাদিষডহে সর্বকষাযপ্রতিষেধ এব, সপ্তমদিবসপ্রাপ্তে তু তরুণে কষাযদ্রব্যকৃতকষাযমাত্রপ্রতিষেধ ইতি বাক্যার্থো ভবতি||১৬১-১৬২||-

যবাগূত্তরকালং ভোজনসাধনমাহ- যূষৈরিত্যাদি| যদি কফপ্রবলতা বলবদগ্নিশ্চ তদা যূষৈঃ, বাতপ্রাবল্যে তু দুর্বলত্বে চ রসৈরিতি ব্যবস্থা| অম্লবিকল্পোঽপি সাত্ম্যাপেক্ষযাঽগ্ন্যপেক্ষযা চ জ্ঞেযঃ| বক্ষ্যতি হি- “মন্দাগ্নযেঽম্লসাত্ম্যায তত্সাম্লমপি কল্পযেত্” ইতি| অম্লং চাত্র জ্বরঘ্নং দাডিমাদ্যেব কার্যম্| লঘ্বিতি মাত্রালঘু প্রকৃতিলঘু চ রক্তশাল্যাদিকম্||১৬৩||-

দশাহাত্ পরতঃ প্রাযঃ কর্তব্যমাহ- অত ইত্যাদি| কফে মন্দে ইতি মন্দেঽপি কফে; যদি কফো নাস্ত্যেব দোষরূপস্তদা সর্পির্বাতপিত্তোত্তরে জ্বরে দেযমিত্যর্থঃ| পরিপক্বেষ্বিতি সর্বথা পক্বেষু| সর্পিরিতি বক্তব্যে অধিকপানগ্রহণেনানুবাসনাভ্যঙ্গাদিনা সর্পিষ উপযোগমস্মিন্ কালে নিষেধযতি| অনুবাসনাভ্যঙ্গৌ হি পশ্চাত্কালবক্তব্যৌ| ইযং চ মন্দকফবাতপিত্তোত্তরত্বরূপাঽবস্থা প্রাযেণ দশাহাদূর্ধ্বং কালমহিম্নৈব সর্বজ্বরে ব্যক্তা ভবতি; যথা- বৃদ্ধে পুরুষে প্রবলবাতত্বং, তরুণজ্বরে সামদোষতা, তথাঽঽমাশযসমুত্থতযা কফপ্রবলত্বং ভবতি; দশাহাদুত্তরং তু লঙ্ঘনাদিনা কফঃ ক্ষীণো ভবতি, জ্বরসন্তাপেন চ রূক্ষেণ ধাতুশোষণাচ্চ বাতপিত্তে বর্ধেতে| যত্তু পেযাকষাযসর্পিঃক্ষীরবিরেচনানাং ষডহে ষডহে দেযত্বং তত্ প্রাযিকম্| তেন দশাহাদূর্ধ্বং দ্বিতীযষডহ এবাবস্থাবিশেষপ্রাপ্তৌ সর্পির্দানং ন বিরোধি||১৬৪||-

উক্তসর্পিষ্পানাপবাদবিষযমাহ- নির্দশাহমিত্যাদি| নির্গতো দশাহো যস্য স নির্দশাহঃ| অলঙ্ঘিতমিতি অসঞ্জাতলঙ্ঘিতলক্ষণম্, ইযং চাবস্থা প্রবলসামদোষারব্ধত্বাজ্জ্বরস্য তথাঽসম্যগুপচারাচ্চ ভবতীতি জ্ঞেযম্| কষাযৈস্তং কফোত্তরমলঙ্ঘিতং চোপাচরেত্| যাবল্লঘুত্বাদিতি চ্ছেদঃ| লঘুত্বে তু জাতে কফোত্তরতাঽলঙ্ঘিততা চ নাপযাতি ন তদা সর্পিষ্পানমেবানুবৃত্তং কর্তব্যমিত্যর্থঃ| কফোত্তরেঽলঙ্ঘিতেঽপি নির্দশাহজ্বরে মাংসরসেন কিমর্থমেবমশনং কফবিরুদ্ধং দেযমিত্যাহ- বলং হীত্যাদি| বলকৃচ্চ তদিতি মাংসরসেনাশনং বলকারকমিত্যর্থঃ||১৬৫-১৬৬||-

দাহেত্যাদিন ক্ষীরাবস্থামাহ| বদ্ধপ্রচ্যুতদোষং বেত্যত্র বদ্ধদোষত্বম্ অপ্রবর্তমানদোষত্বং, প্রচ্যুতদোষত্বং তু স্তোকেন প্রবর্তমানদোষত্বম্| তত্র ক্ষীরং তাবদ্ যথা বদ্ধে প্রবর্তকং ভবতি, তথা প্রচ্যুতেঽপি সবিবন্ধদোষপ্রবর্তকতযোপকারকং ভবতি, অত এব ক্ষীরগুণেষু-“পুরীষে গ্রথিতে পথ্যং”, তথা “অতীসারে চ পথ্যং” (সূ.অ.১) ইত্যুক্তম্| কিংবা, বদ্ধদোষে গব্যং ক্ষীরং সরত্বাদ্দেযং, প্রচ্যুতে তু সঙ্গ্রাহিত্বাচ্ছাগং দেযম্||১৬৭||-

‘আভিঃ ক্রিযাভির্যদা ন প্রশমং যাতি জ্বরস্তদা বিরেচনৈঃ শমযেত্’ ইতি ভাষযা বিরেচনস্য বহুব্যাপত্কতযা ইতরকর্মাসিদ্ধাবেব কর্তব্যতাং দর্শযতি| বিরেচনৈরিতি বহুবচনেন বমনবিরেচনে অপি গৃহ্যেতে; যদুক্তং- “উভযমপি দোষমলবিরেচনাদ্বিরেচনশব্দং লভতে” (ক.অ.১) ইতি, তথা বিরেচনযোগবিবরণে বমনবিরেচনযোগানেবাভিধাস্যতি||১৬৮||-

জ্বরেণাক্ষীণস্য শোধনমুক্ত্বা জ্বরক্ষীণস্য শোধনমাহ- জ্বরক্ষীণস্যেত্যাদি| পযসেতি পযঃপানেন| পযস্ত্বনুলোমকতযা দোষহরং ভবতি| অনুলোমকত্বং চ বিরেচনত্বেন ব্যবহ্রিযত ইতি বিরেচনাদেযত্বে ক্ষীরমুক্তম্| অত্র ক্ষীরস্য পূর্বোক্তবিষযেণৈব গুণানাং লব্ধত্বাদবশিষ্টং নিরূহগুণমাহ- নিরূহ ইত্যাদি||১৬৯-১৭০||-

বিরেচনাস্থাপনযোর্দোষভেদেন স্থানভেদেন চ বিষযমাহ- পিত্তমিত্যাদি| বমনস্য তু দোষভেদেন স্থানভেদেন চ বিষযঃ ‘কফপ্রধানান্’ ইত্যাদিনৈবোক্ত ইতি নেহ পুনরুচ্যতে; পরং পূর্বমবস্থাবিহিতং বমনং স্বযমুত্ক্লিষ্টদোষে জ্ঞেযম্, এতচ্চ জীর্ণজ্বরবিহিতং বমনং স্নেহস্বেদাভ্যাং দোষমুত্ক্লেশ্য কর্তব্যমিতি বিশেষঃ| পিত্তাশয আমাশযাধোভাগ এব| স্রংসনমিতি চ্ছেদঃ||১৭১||-

অনুবাসনবিষযমাহ- জ্বর ইত্যাদি| প্রকরণাগতাযামপি পুরাণতাযাং ‘পুরাণে’ ইতি পদমত্যর্থপুরাণতামাহ||১৭২||-

গৌরব ইত্যাদিনা শিরোবিরেচনবিষযমাহ| শিরস ইতি পূর্বেণোত্তরেণ চ যোজ্যম্| ইন্দ্রিযাণাং বিবন্ধঃ স্ববিষযপ্রবৃত্তৌ জাড্যম্||১৭৩||-

অন্তঃপরিমার্জনমভিধায বহিঃপরিমার্জনমাহ- অভ্যঙ্গাংশ্চেত্যাদি| প্রাদেহঃ সামান্যেন বহলোঽবহলশ্চ লেপ ইহ গৃহ্যতে| যে তু সুশ্রুতমতেন বহলং বিশোষিণং প্রদেহং গ্রাহযন্তি, তন্মতেন দাহপ্রশমনে লেপো বহলঃ কর্তব্যঃ স্যাত্, স চ তনুরেব কর্তব্যঃ, উক্তং হি- “শ্লক্ষ্ণপিষ্টঘনো লেপশ্চন্দনস্যাপি দাহকৃত্” (চি.অ.৩০) ইত্যাদি| বিভজ্য শীতোষ্ণকৃতমিতি উষ্ণাভিপ্রাযং শীতাভিপ্রাযং চ বিভজ্য যথাসঙ্খ্যং শীতকৃতান্ তথোষ্ণকৃতান্; বক্ষ্যতি হি- “অভ্যঙ্গাংশ্চ প্রদেহংশ্চ পরিষেকাংশ্চ কারযেত্| যথাভিলাষং শীতোষ্ণং বিভজ্য দ্বিবিধং জ্বরম্” ইতি| শীতোষ্ণতা চ দ্রব্যমহিম্না সংস্কারেণ চ জ্ঞেযা||১৭৪-১৭৫||-

ত্বঙ্মাত্রশেষা ইতি ধাত্বন্তরত্যাগেন ত্বঙ্মাত্রাবস্থিতদোষজন্যাঃ, যেষাং চাগন্তুর্ভূতরূপোঽন্বযঃ কারণং ভবতি জ্বরাণাং, তে ধূপাদিনা শমং যান্তি||১৭৬||-

ক্রমপ্রাপ্তৌষধপ্রশ্নস্যোত্তরার্ধমাহ- যেষামিত্যাদি| ‘রক্তশাল্যাদযঃ শস্তাঃ শালযঃ ষষ্টিকৈঃ সহ’ ইতি কেচিত্ পঠন্তি, অত্র ‘শালযঃ’ ইতি পদেন যবকাদীনাং নিরাসঃ ক্রিযতে| কেচিত্তু ‘রক্তশাল্যাদযঃ শস্তাঃ পুরাণাঃ’ ইতি পঠন্তি, তত্র যদ্যপি ‘শূকধান্যং শমীধান্যং সমাতীতং প্রশস্যতে’ (সূ.অ.২৭) ইত্যুক্তমেব, তথাঽপি প্রমাদাদপুরাণগ্রহণনিষেধার্থং ‘পুরাণাঃ’ ইতি পদম্ ||১৭৭-১৭৮||-

লাজপেযামিত্যাদিকা দশ যবাগ্বঃ| তত্র প্রথমা শ্লেষ্মণীতি হরিচন্দ্রঃ; কিংবা লাজপেযাং সুখজরামিত্যেকা, তথা পিপ্পলীনাগরৈঃ শৃতামিতি দ্বিতীযা, এবং শেষাভিঃ সমমেকাদশ পেযাঃ| সনাগরাং সৃষ্টবিট্ পিবেদিতি যোজনা, সনাগরামেব শীতাং মধুযুতাং পিবেত্ পৈত্তিক ইত্যপরা| শুণ্ঠ্যাস্তু মধুরপাকিত্বেন পাচনত্বেন চ পিত্তে প্রযোগঃ| ইহ বিদারীগন্ধাদ্যং হ্রস্বপঞ্চমূলম্| সযবামিতি পদেন ষষ্টিতণ্ডুলকার্যাং পিবেদিতি| সবিল্বামিত্যাদিনা ধাবনীশৃতামিত্যন্তেন চৈকা যবাগূঃ| পরিকর্তিকা কর্তিকাকারা বেদনা| কলশী সিংহপুচ্ছী| ধাবনী কণ্টকারী| অত্র চ যবাগূনাং সাধনদ্রব্যজলতণ্ডুলপরিমাণে বৃদ্ধবৈদ্যব্যবহারাঃ পূজিতাঃ প্রমাণীকর্তব্যাঃ| অত্রাগ্নিবেশসংহিতাযামধীযতে- “ক্বাথ্যদ্রব্যাঞ্জলিং ক্ষুণ্ণং শ্রপযিত্বা জলাঢকে| পাদশেষেণ তেনাথ যবাগূরুপকল্পযেত্|| কর্ষার্ধং বা কণাশুণ্ঠ্যোঃ কল্কদ্রব্যস্য বা পলম্| বিনীয পাচযেদ্ যুক্ত্যা বারিপ্রস্থেন চাপরাম্ ” ইতি| অপরামিতি ক্বাথসাধ্যযবাগ্বা উক্তাযা ভিন্নাং কল্কসাধ্যামিত্যর্থঃ| এবং চ কল্কপলেন যা তত্র যবাগূসাধনপরিভাষা, সা ইহাপি দ্রব্যপলকল্কেন যবাগূসাধনমুপদিশতাঽনুমতৈব, তথাহি জীবন্ত্যাদিযবাগ্বামষ্টভির্দ্রব্যৈঃ কোলপ্রমাণৈঃ সাধনমুক্তম্| যত্তু তত্র বৃক্ষাম্লযুক্তেত্যাদ্যুক্তং, তদম্লতামাত্রার্থং বৃক্ষাম্লদানং, ন তদষ্টমাষকপ্রমাণং; কিংবা, তদপ্যষ্টমাষকমানপ্রমাণমস্তু, তথাঽপ্যদূরান্তরার্থতযা কল্কপলসাধনোপদেশিকা পরিভাষাঽনুমতৈব ভবত্যষ্টমাষকাধিকপলকল্কসাধনোপদেশেন; উক্তং হি- “জীবন্ত্যজাজীশঠিপুষ্করাহ্বৈঃ সকারবীদীপ্যকবিল্বমধ্যৈঃ| সযাবশূকৈর্বদরপ্রমাণৈর্বৃক্ষাম্লযুক্তা ঘৃততৈলভৃষ্টা|| অর্শোতিসারানিলগুল্মশোফহৃদ্রোগমন্দাগ্নিহিতা যবাগূঃ|| যা পঞ্চকোলৈর্বিধিনৈব তেন সিদ্ধা ভবেত্ সাঽপি সমা তযৈব” (চি.অ.১২) ইতি; তস্মাদেতদ্যবাগূক্তমানলিঙ্গদর্শনাত্ কল্কপলসাধ্যযবাগ্বভিধাযিকা পরিভাষাঽনুমতৈব, তদন্যা তত্সহচরিতা কর্ষার্ধকণাশুণ্ঠীমানদর্শিকাঽনুমতৈব| ক্বাথসাধ্যযবাগ্বাদিদ্রব্যমানে তু বৃদ্ধব্যবহারপূজিতেযং পরিভাষা- “যদপ্সু শৃতশীতাসু ষডঙ্গাদি প্রযুজ্যতে| কর্ষমাত্রং ততো দ্রব্যং সাধযেত্ প্রাস্থিকেঽম্ভসি|| অর্ধশৃতং প্রযোক্তব্যং পানে পেযাদিসংবিধৌ” ইতি| আদিশব্দেনাত্র যূষরসাদিগ্রহণম্| “ক্বাথ্যদ্রব্যাঞ্জলিং ক্ষুণ্ণং” ইত্যাদিপরিভাষাযাস্তথাঽনুক্তপরিভাষাযাশ্চ কর্তব্যব্যবস্থা, তথা সকলযবাগূসাধনতণ্ডুলজলাদিমানব্যবস্থাবিচারশ্চাপামার্গতণ্ডুলীয (সূ.অ.৪) এব নির্লোচিতোঽনুসরণীযঃ||১৭৯-১৮৭||-

মুদ্গানিত্যাদির্জ্বরহিতযূষদ্রব্যসঙ্গ্রহঃ| যূষকরণং চ যবাগূসাধনবত্| মুদ্গঃ স্বনামপ্রসিদ্ধঃ||১৮৮||-

কুলকং কারবেল্লকম্| পাপচেলিকং পাঠাশাকম্| কঠিল্লকং রক্তপুনর্নবা||১৮৯||-

কপিঞ্জলঃ গৌরতিত্তিরিঃ| এণঃ কৃষ্ণসারঃ| উপচক্রকঃ চকোরঃ| কালপুচ্ছঃ হরিণবিশেষঃ| হরিণঃ তাম্রবর্ণঃ| পৃষতঃ বিন্দুচিত্রিতো হরিণঃ| রসকরণে সূদশাস্ত্রং- “পলানি দ্বাদশ প্রস্থে ঘনেঽথ তনুকে তু ষট্| মাংসস্য বণ্টনং কুর্যাত্ পলমচ্ছতরে রসে” ইতি| যত্র তু রসস্য দ্রব্যান্তরেণ সাধনং, তত্র যবাগূবত্ সাধনং ব্যাখ্যেযম্| মাত্রাবিকল্পজ্ঞ ইত্যনেন তাবত্যা মাত্রযা, তেন চ সংস্কারকৃতেন বিকল্পেনানুষ্ণলঘুনা লাবাদযো দেযাঃ, যেন গৌরবাদগ্নিবধমুষ্ণত্বাদ্বা জ্বরাবৃত্তিং ন জনযন্তীতি দর্শযতি||১৯০-১৯৩||-

ঘর্মাম্বু উষ্ণাম্বু| ঘর্মাম্ব্বাদিশ্লেকং চৈকেঽনার্ষং বদন্তি; তন্ন, অনুপানব্যবস্থাযামুষ্ণপানীযমদ্যযোর্হিতত্বং পূর্বমনুক্তমেবেতি তদুপাদানং; তথাচ তন্ত্রান্তরে- “জ্বরে পিবেদনুষ্ণাম্বু মদ্যসাত্ম্যস্তু যো ভবেত্| তস্মৈ দোষবলং দৃষ্ট্বা যুক্ত্যা মদ্যং বিধীযতে” ইতি||১৯৪||-

গুরূষ্ণেত্যাদিনা গুরূষ্ণাদিনিষেধঃ; পূর্বং তু কষাযনিষেধো যদ্যপি সামান্যেন কৃতঃ, তথাঽপীহান্নপ্রতিষেধপ্রস্তাবাদত্যহিতপ্রতিষেধাচ্চ পুনঃ ক্রিযতে||১৯৫-১৯৬||

পাক্যমিতি শৃতম্| শীতকষাযস্তু দ্রব্যং সঙ্ক্ষুণ্ণমুষ্ণোদকে প্রক্ষিপ্য নিশাস্থিতম্| অত্র শীতকষাযপরিভাষা- “দ্রব্যাদাপোথিতাত্তোযে প্রতপ্তে নিশি সংস্থিতাত্| যঃ কষাযোঽভিনির্যাতি স শীতঃ সমুদাহৃতঃ” (সূ.অ.৪) ইতি| অত্রাপি যদ্যপি দ্রব্যস্য পানীযস্য চ মানং নোক্তং, তথাঽপি ক্বাথ্যদ্রব্যসমং দ্রব্যং গ্রাহ্যং, পানীযং তু যাবন্মানঃ পেযঃ ক্বাথো ভবতি তাবন্মনং গ্রাহ্যং, নহ্যত্র পানীযহ্রাসোঽস্তি; কিংবা পরিভাষযৈব জলং দেযং- “ষড্ভিঃ পলৈশ্চতুর্ভির্বা সলিলাচ্ছীতফাণ্টযোঃ| আপ্লুতং ভেষজপলং রসাখ্যাযাং পলদ্বযম্” ইতি| শীতকষাযঃ স্বল্পবীর্যতযা তথা শৈত্যগুণযোগাচ্চাত্পবলদোষে দাহাভিভূতেচ দেযঃ| পর্পটকং সদুরালভং বেতি তৃতীযো যোগো মন্দাগ্নিপিত্তকফে| কিরাততিক্তাদিশ্চতুর্থো বাতকফে| পাঠাদিশ্চ পিত্তে| কিরাততিক্তাদিনা চ ভেলকে সতি পাঠাসপ্তকং জতূকর্ণপ্রত্যযাত্ কফপিত্তে ভবতি| উক্তং হি তত্র- “ভূনিম্বঘনগুডূচীশুণ্ঠ্যুদীচ্যোশীরহ্বযপাঠাঃ” ইতি| অত্র ক্বাথকরণে দ্রব্যাদিমানস্যানুক্তত্বান্ন্যাযতো মানব্যবস্থা| তত্রেহ যদ্যপি ক্বাথসংবিধানং বিশেষেণ নোক্তং, তথাঽপি ব্যাধিতরূপীযে যত্ ক্বাথকরণসংবিধানমুক্তং- “ছেদ্যানি খণ্ডশশ্ছেদযিত্বা মেদ্যানি চাণুশো ভেদযিত্বা, প্রক্ষাল্য, পানীযেনাভ্যাসিঞ্চেত্” ইত্যাদিনা “গতরসেষ্বৌষধেষু স্থালীমবতার্য পরিপূতং কষাযং” (বি.অ.৭) ইত্যন্তেন, তদেব সর্বকষাযকরণসংবিধানং জ্ঞেযম্| তত্র হি যদ্যপি ক্বাথ্যদ্রব্যমানং তথা দ্রবমানং স্থাপ্যকষাযমানং চ নোক্তং, তথাঽপি যাবদ্দ্রব্যং যাবতা জলেন পক্বং সত্ গতরসং ভবতি, তাবতি জলে তাবদ্দ্রব্যং দেযমিতি লভ্যতে; তথা যাবতা ক্বাথশেষেণ গতরসান্যৌষধানি ভবন্তি তাবান্ ক্বাথঃ স্থাপ্যত ইতি চ লভ্যতে; এতচ্চৌষধানাং গতরসত্বং দ্রবভাগত্রযক্ষয এব ভবতীতি দৃশ্যতে, তেন চতুর্ভাগাবশিষ্টতা সর্বক্বাথে বিশেষবচনং বিনা কর্তব্যা| ক্বাথার্থজলদানং তু দ্রব্যাপেক্ষযা ভবতি| তত্র মৃদুনি দ্রব্যে চতুর্গুণেন জলেন, কঠিনেঽষ্টগুণেন, কঠিনতরে তু ষোডশগুণেন পাকে সতি চতুর্ভাগাবশেষে গতরসত্বং ভবতি; এতদপি দৃশ্যতে- স্নেহাদিসাধনকভূরিক্বাথকরণে ইযং প্রযুজ্যতে; যত্র ত্বল্পং ক্বাথ্যদ্রব্যং তত্র যথা যথাঽল্পত্বং ভবতি তথা তথা মৃদুন্যল্পেঽপি দ্রব্যে ভূরিজলং দীযতে, স্তোকেন জলেন ক্বাথ্যদ্রব্যস্য গতরসত্বাভাবাত্| তেন, কর্ষাদারভ্য পলপর্যন্তক্বাথে মৃদুন্যপি ষোডশগুণং জলং দীযতে, পলাদূর্ধ্বং তু কুডবপর্যন্তমষ্টগুণং জলং দীযতে| তদেবমনির্দিষ্টদ্রব্যজলশেষমানমপ্যাচার্যেণ গতরসত্বাভিধানাত্ সর্বকষাযদ্রব্যাদিপরিমাণমুক্তম্| যদি হি দ্রব্যাদীনাং নিযতং প্রমাণং ব্রূযাত্, তদা দ্রব্যাপেক্ষযা তথা স্নেহাদিসাধনাপেক্ষযা দেযক্বাথ্যাপেক্ষযা চ যদ্ভিন্নং পরিমাণং তন্ন গৃহীতং স্যাত্| তদর্থাভিধাযিকাশ্চ স্বতন্ত্রান্তরপরিভাষা লিখ্যন্তে| পাতব্যকষাযে কৃষ্ণাত্রেযঃ- “ক্বাথ্যদ্রব্যপলে কুর্যাত্ প্রস্থার্ধং পাদশেষিতম্” ইতি; অন্যত্রাপ্যুক্তং- “ক্বাথ্যদ্রব্যপলে বারি দ্বিরষ্টগুণমিষ্যতে” ইতি; তথা “কর্ষাদৌ তু পলং যাবদ্দদ্যাত্ ষোডশিকং জলম্| ততস্তু কুডবং যাবত্তোযমষ্টগুণং ভবেত্” ইতি; সুশ্রুতে চ স্নেহাদিক্বাথপরিভাষা- “চতুর্গুণেনাষ্টগুণেন ষোডশগুণেন বাঽম্ভসাঽভ্যাষিচ্য চতুর্ভাগাবশিষ্টং ক্বাথযিত্বাঽবতারযেত্ ” (সু.চি.অ.৩১); ইত্যাদিপাঠভেদাচ্চতুর্গুণাষ্টগুণষোডশগুণজলদাপিকাঃ শ্রূযন্তে, তাঃ কঠিনাদিদ্রব্যভেদাদ্বোদ্ধব্যাঃ| যদুক্তং- “মৃদৌ চতুর্গুণং দেযং, কঠিনেঽষ্টগুণং তথা| কঠিনাত্ কঠিনতরে দেযং ষোডশিকং জলম্” ইতি| এবং তন্ত্রান্তরপরিভাষাযাং চ ব্যবস্থা বক্তব্যা| অগ্নিবেশে হি শ্রূযতে- “দ্রব্যমাপোথিতং ক্বাথ্যং দত্ত্বা ষোডশিক জলম্| পাদশেষং চ কর্তব্যমেষ ক্বাথবিধিঃ স্মৃতঃ|| চতুর্গুণেনাম্ভসা বা দ্বিতীযঃ সমুদাহৃতঃ” ইতি; অত্র মধ্যবিধযাঽষ্টগুণত্বমপি পানীযস্য লভ্যতে; তেনাপ্যুক্তং- “দ্রব্যাণাং মধ্যপাকার্থং যত্র মাত্রা ন দর্শিতা| পাদাংশাদৌষধাত্তত্র জলং দদ্যাচ্চতুর্গুণম্|| চতুর্ভাগাবশিষ্টং চ কষাযং কারযেদ্ভিষক্” ইতি| এবমন্যা অপি তন্ত্রান্তরপরিভাষা অবিরোধেন নেযাঃ| অত্রৈকে বদন্তি- যদেতদ্ব্যাধিতরূপীযে কষাযকরণমুদ্দিষ্টং তন্নিরূহাধিকারে, তদ্বিশিষ্টার্থবিষয এব, তথাবিধকষাযকরণং নান্যত্র; যথা বলাতৈলে- “বলাশতং গুডূচ্যাশ্চ পাদং রাস্নাষ্টভাগিকম্| জলাঢকশতে পক্ত্বা” (চি.অ.২৮) ইত্যাদ্যুক্তং মানং ন ক্বাথান্তরে যাতি, কিন্তু তত্রৈব নিযমিতমিতি| মৈবং, বিষযবিশেষোদ্দেশবিহিতোঽপি বিধির্বিষযান্তরেঽপি বৃদ্ধবৈদ্যব্যবহারানুমত্যা তথা তন্ত্রান্তরপরিভাষাসংবাদেন চ বিষমতন্ত্রং বা দৃষ্ট্বা সমানত্বেনৈব ব্যবস্থাপ্যতে; যথা ইক্ষ্বাকুকল্পে উক্তং- “যাবত্ স্যাত্তন্তুমত্তোযে পতিতং তু ন শীর্যতে” (ক.অ.৩) ইত্যাদি লেহপাকলক্ষণং বিষযবিশেষোক্তং বিষযান্তরেঽপি সাধারণং ভবতি| অত্র পেযক্বাথমাত্রাঽপি তু ইযত্তযা নোক্তা, তস্যাঃ পুরুষাদ্যপেক্ষযা নানাত্বাত্; সামান্যেন চ যদুক্তং- “দোষপ্রমাণানুরূপো হি ভৈষজ্যপ্রমাণবিকল্পো বলপ্রমাণবিশেষাপেক্ষো ভবতি” (বি.অ.৮) ইতি; এতেন, যাবন্মাত্রমৌষধং বলাগ্ন্যাদ্যপেক্ষযোপপদ্যতে যস্য পুরুষস্য, তাবন্মাত্রমৌষধং তস্য দেযমিত্যুক্তং ভবতি| উক্তং চান্যত্র- “মাত্রাযা নাস্ত্যবস্থানং দোষমগ্নিং বলং বযঃ| ব্যাধিং দ্রব্যং চ কোষ্ঠং চ বীক্ষ্য মাত্রাং প্রযোজযেত্” ইতি| তত্রাদূরান্তরা মধ্যপুরুষাভিপ্রাযেণ যা মাত্রা ভবতি, সা সূচিতৈব তন্ত্রকর্ত্রা “পলং বত্সকবীজস্য শ্রপযিত্বা রসং পিবেত্” (চি.অ.১৯) ইত্যাদিনা, তথা পটোলদ্যেঽপি “পলং তথৈষাং সহ চূর্ণিতানাং জলে শৃতং দোষহরং পিবেন্না” ইত্যাদিনা| সুশ্রুতেঽযুক্তং- “ব্যাধ্যাদিষু তু মধ্যেষু ক্বাথস্যাঞ্জলিরিষ্যতে” (সু.সূ.অ.৩৯) ইতি, পলে চ ক্বাথ্যে ষোডশপলস্য পাদশেষতাযাং চতুঃপলরূপোঽঞ্জলিরেব ভবতি| দারুকোঽপ্যাহ- “জঘন্যা দ্বিপলা প্রোক্তা মাত্রা, মধ্যা চতুষ্পলা| উত্তমা ষট্পলা প্রোক্তা ক্বাথস্নেহৌষধেষু তু” ইতি| অন্যত্র চোক্তম্- “উত্তমস্য পলং মাত্রা, ত্রিভিশ্চাক্ষৈশ্চ মধ্যমা| জঘন্যস্য পলার্ধং তু স্নেহক্বাথ্যৌষধেষু চ” ইতি| এতাশ্চাদূরান্তরার্থা বলাগ্ন্যাদিমানেন ব্যবহ্রিযমাণা এব পরিভাষাঃ| অন্যচ্চিন্ত্যতে- যদেতচ্চতুর্গুণত্বাদিনা জলমুক্তং, তত্ কিং কৃতদ্বৈগুণ্যং সর্বত্র গ্রহীতব্যম্, উক্তং হি- “শুষ্কদ্রব্যেষ্বিদং মানং দ্বিগুণং তদ্দ্রবার্দ্রযোঃ” ইতি; মৈবং, সুনিষণ্ণকাদের্ঘৃতদ্রব্যস্য দ্বাত্রিংশত্পলপরিমাণে দ্রবপ্রস্থে সিদ্ধেঽপি যদযং- “ত্রিংশত্পলানি প্রস্থোঽত্র বিজ্ঞেযো দ্বিপলাধিকঃ” (চি.অ.১৪) ইতি করোতি, তেন তন্ত্রান্তরপরিভাষানুমতং কুডবাদাবেব মানে দ্বৈগুণ্যং ভবতি, কুডবপূর্বমানে তু দ্রবার্দ্রাণাং দ্বৈগুণ্যং নাস্তীতি দর্শযতি| যেন, পূর্বপরিভাষযৈব দ্বৈগুণ্যে লব্ধে যত্ পুনর্দ্বাত্রিংশত্পলপ্রস্থকীর্তনং, তত্ পূর্বপরিভাষাব্যভিচারে সতি ক্বচিদ্বৈগুণ্যং দর্শযতি| তেন, রক্তিকাদৌ তত্পরিভাষার্থব্যভিচারস্তন্ত্রান্তরপ্রমাণাদুন্নীযতে| তথাচাত্রেযঃ- “দ্বৈগুণ্যং কুডবাদৌ তু শুষ্কমানাদ্দ্রবস্য হি| আর্দ্রস্যাত্যল্পবীর্যত্বাজ্জ্ঞেযমন্যত্র তত্ সমম্” ইতি; তথা জতূকর্ণেঽপ্যুক্তম্- “আর্দ্রাণাং চ দ্রবাণাং চ দ্বিগুণাঃ কুডবাদযঃ” ইতি; অন্যত্রাপ্যুক্তং- “রক্তিকাদিষু মানেষু যাবন্ন কুডবো ভবেত্| শুষ্কে দ্রবার্দ্রযোশ্চৈব তুল্যং মানং প্রকীর্তিতম্” ইতি| এবং চ কুডবাদিমানযোগ্যস্যাপি যত্র দ্রব্যস্য পলোল্লেখেন মানং গৃহ্যতে, তত্রাপি ন দ্বৈগুণ্যম্| তেন “রাস্নাসহস্রনির্যূহে তৈলদ্রোণং বিপাচযেত্” (চি.অ.২৮) ইত্যাদিষু পলোল্লেখেন জলং গৃহ্যমাণং ন দ্বিগুণং ভবতি| ক্বচিত্ পলোল্লেখমানবিধানেঽপি তন্ত্রান্তরদর্শনাত্ কুডবাদিবিবক্ষাং কৃত্বা পলোল্লেখাগতেঽপি দ্রবে দ্বৈগুণ্যং ভবতি| যথা ক্ষতক্ষীণচিকিত্সিতে “মধুকাষ্টপলদ্রাক্ষাপ্রস্থক্বাথে” (চি.অ.১১) ইত্যাদিনা যঃ প্রযোগ উক্তঃ, স জতূকর্ণে “দ্রাক্ষাযাঃ প্রস্থঃ, মধুকস্যার্ধক্বাথঃ” ইত্যাদিনা গ্রন্থেন পঠিতঃ; তেন, জতূকর্ণে মধুকস্যার্ধপ্রস্থোল্লেখপাঠাত্ কৃতদ্বৈগুণ্যমেব দ্রবং ভবতি, তত্প্রত্যযাচ্চেহাপি মধুকাষ্টপলোল্লেখবিহিতক্বাথ্যে কুডবদ্বযবিবক্ষযা কৃতদ্বৈগুণ্যমেব জলং দেযম্| এবমন্যত্রাপ্যনুসরণীযম্| অন্যে তু, “কুডবাদাবিত্যত্র অতদ্গুণসংবিজ্ঞানবহুব্রীহিণা কুডবে ন দ্বৈগুণ্যমস্তি” ইতি ব্রুবতে; ততশ্চ সুশ্রুতে “স্নেহকুডবে সাধ্যে ভেষজপলং পিষ্টং কল্কং” (সু.চি.অ.৩১) ইত্যুক্তং, তত্ কুডবে স্নেহচতুঃপলে ভেষজপলং ভবতীতি কৃত্বা স্নেহপ্রস্থেঽষ্টপলকল্কদানব্যবহার উপপন্নঃ; যদি তু কুডবেনাষ্টৌ পলানি স্নেহস্য গৃহ্যন্তে, তদা প্রস্থে চতুঃপলকল্কদানমব্যবহারসিদ্ধং স্যাত্; এতন্নাতিসাধু; যতস্তৈব স্নিহকুডবে সাধ্যে ক্বাথ্যদ্রব্যপ্রস্থো বিধেয ইত্যুক্তং, তত্র যদি কুডবেন স্নেহপলচতুষ্টযং গৃহ্যতে তদা চতুঃপলে স্নেহে ষোডশপলক্বাথ্যগ্রহণং স্যাত্, ন চ তথা ব্যবহরতি, ক্বাথ্যষোডশপলং হি অষ্টপলে স্নেহ এব গৃহ্যতে, তস্মাদসাধকমেতত্ কুডবাদ্বৈগুণ্যস্যেতি| দ্বৈগুণ্যং কুডবে যুক্তং, যথাঽগস্ত্যহরীতক্যাং মধুনঃ কুডবং যদিহোক্তং, তত্তন্ত্রান্তরে “মধুনশ্চ পলাষ্টকম্” ইতি পঠ্যতে; তথা তন্ত্রান্তরে- “ত্রাযমাণা চতুঃপলং দশকেঽম্ভসি শেষিতে| কুডবে কুডবান্ সর্পিঃক্ষীরধাত্রীরসান্ পচেত্” ইতি শ্রূযতে; তত্র যদি চতুঃপলঃ কুডবঃ স্যাত্, তদাঽত্রোক্তত্রাযমাণাঘৃতেন সহ বিরোধঃ স্যাত্; উক্তং হি- “জলে দশগুণে সাধ্যং ত্রাযমাণাচতুঃপলম্” ইত্যাদি, যাবত্ “রসস্যামলকানাং চ ক্ষীরস্য চ ঘৃতস্য চ| পলানি পৃথগষ্টাষ্টৌ দত্ত্বা সম্যগ্বিপাচযেত্” (চি.অ.৫) ইতি, তথাঽন্যত্রাপ্যুক্তম্- “আর্দ্রদ্রব্যদ্রবদ্রব্যপলৈরষ্টভিরেব চ| শুষ্কদ্রব্যচতুষ্কেণ কুডবঃ সমুদাহৃতঃ” ইতি; তস্মাত্ কুডবে দ্বৈগুণ্যং সাধু| আর্দ্রদ্বৈগুণ্যে তু, যেষাং দ্রব্যাণাং শুষ্কাণামুপযোগ উক্তস্তেষামার্দ্রপ্রযোগে দ্বৈগুণ্যং ভবতি; যে তু নিত্যমার্দ্রা এবোপযুজ্যন্তে, ন তেষাং দ্বৈগুণ্যম্| যদুক্তং- “বাসাকুটজকূষ্মাণ্ডশতপত্রীসহাচরাঃ | নিত্যমার্দ্রাঃ প্রযোক্তব্যা ন তেষাং দ্বিগুণং ভবেত্” ইতি| এতত্ সর্বং পেযক্বাথপ্রসঙ্গেনোক্তং স্নেহপাকেঽপি চিন্তনীযম্| স্নেহপাকে তু স্নেহাত্ পাদিকঃ কল্কো দেযঃ, তথাহি বক্ষ্যতি- “জলস্নেহৌষধানাং তু প্রমাণং যত্র নেরিতম্| তত্র স্যাদৌষধাত্ স্নেহঃ স্নেহাত্তোযং চতুর্গুণম্” (ক.অ.১২) ইতি| চতুর্গুণ এব স্নেহো দ্রবত্বেঽপি ন দ্বৈগুণ্যাত্ কল্কাদষ্টগুণো ভবতি| অন্যত্রাপ্যুক্তং- “ক্বাথ্যাচ্চতুর্গুণং বারি পাদস্থং স্যাচ্চতুর্গুণম্| স্নেহাত্ স্নেহসমং ক্ষীরং কল্কস্তু স্নেহপাদিকঃ” ইতি| যত্তু, অষ্টপল এব স্নেহে কল্কস্য পলমানত্বং, তদাগমসিদ্ধমপি ন ব্যবহ্রিযতে; উক্তং হি কৃষ্ণাত্রেযে- “স্নেহপাকবিধৌ যত্র প্রমাণং নোদিতং ক্বচিত্| স্নেহস্য কুডবং তত্র পচেত্ কল্কপলেন তু” ইতি| তথা সুশ্রুতেঽপি স্নেহকুডবে কল্কপলমুক্তম্| তদেতদকল্কসাধ্যত্বং স্নেহস্য স্বরসেনাতিগুরুণা সাধ্যে স্নেহে পুষ্পকল্কসাধ্যে বা ব্যবস্থাপনীযম্| দ্রব্যস্য হি সসারত্বনিঃ- সারত্বাভ্যাং কল্কস্যাল্পত্বভূযস্ত্বে দৃষ্টে| যদুক্তং শৌনকবচনমনুবদতা বাগ্ভটেন- “স্নেহে সিধ্যতি শুদ্ধাম্বুনিষ্ক্বাথস্বরসৈঃ ক্রমাত্| কল্কস্য যোজযেদংশং চতুর্থং ষষ্ঠমষ্টমম্” ইতি; তথা “শণস্য কোবিদারস্য কর্বুদারস্য শাল্মলেঃ| কল্কাঢ্যত্বাত্ পুষ্পকল্কং প্রশংসন্তি চতুঃপলম্” ইতি| অত্র স্নেহপ্রস্থাপেক্ষযা চতুঃপলঃ কল্কঃ স্নেহাদষ্টমভাগ এব ভবতীত্যাদিবিশেষবচনেন “কল্কশ্চ স্নেহাপাদিকঃ” ইতি সামান্যবচনস্য বাধা ক্বচিদ্বিষযবিশেষে ভবতীহ ন বিরোধমাবহতি| ভবতু, অলমতিপ্রপঞ্চেন, সর্বথা ব্যবহারানুগতমেব শাস্ত্রং প্রমাণীকর্তব্যম্||১৯৭-১৯৯||-

পঞ্চ পঞ্চবিধং জ্বরমিতি যথাসঙ্খ্যং সন্ততাদিষু কলিঙ্গাদযো জ্ঞেযাঃ| অন্যে তু পঞ্চসু পঞ্চৈব যৌগিকানাহুঃ ||২০০-২০৩||

বত্সকারগ্বধমিত্যাদিনা বলামিত্যন্তেন কেচিদ্যোগত্রযং, কেচিদেকমেব যোগং বদন্তি| নিশি স্থিতমিতি শীতকষাযম্||২০৪-২০৬||-

জাতীত্যাদৌ জাতীপল্লবাঃ| সগুডং পিবেদিত্যত্র গুডস্য প্রক্ষেপ্যত্বেন ক্বাথ্যদ্রব্যাপেক্ষযা পাদিকত্বম্| এবমন্যত্রাপি প্রক্ষেপে বোদ্ধব্যম্||২০৭-২০৯||

অত্র কষাযপ্রকরণাগতত্বাত্ সন্নিপাতচিকিত্সাবসরমপ্যুল্লঙ্ঘ্য সন্নিপাতহরৌ শট্যাদিবৃহত্যাদিপ্রযোগৌ পঠতি||২১০-২১৪||

ভেষজাধ্যাযে ভেষজচতুষ্কে; চতুষ্কেঽপি হি ‘অধীযন্তে অস্মিন্নর্থা’ ইতি কৃত্বা অধ্যাযশব্দো বর্তত এব| যোগমাত্রেণ তু তত্র ষড্বিরেচনশতাশ্রিতীযেঽধ্যাযে (সূ.অ.৪) জ্বরঘ্নতৃষ্ণাঘ্নৌ মহাকষাযৌ প্রোক্তৌ; তযোশ্চ প্রত্যেকদ্রব্যকৃতাঃ কষাযা বহবো ভবন্তীতি কষাযা ইতি বহুবচনং সাধু| যবাগ্বশ্চ অপামার্গতণ্ডুলীযে (সূ.অ.২) প্রোক্তাঃ||২১৫||

ইদানীং সর্পিঃপ্রযোগানভিধাতুং সর্পিষো বিষযমাহ - জ্বরা ইত্যাদি| বমনৈরিত্যনেনেহাবস্থাবিধেযবমনপ্রযোগান্ সর্পিঃষডহভাবিনো দর্শযতি| লঙ্ঘনবচনেন চ লঙ্ঘনসমানকালাঃ স্বেদাদযো গৃহ্যন্তে| রূক্ষস্যেতি বচনেন কষাযাদিপ্রযোগে সত্যপি সামতানুবন্ধাত্ কফোত্তরতযা বা যত্র রূক্ষত্বং ন ভবতি তত্র সর্পির্ন দাতব্যমিতি দর্শযতি| অত্র কষাযৈরিত্যাদ্যসমাসনির্দেশেন ব্যস্তৈঃ সমস্তৈরপি কষাযাদিপ্রযোগৈ রূক্ষস্য সর্পিঃপানং কর্তব্যমিতি দর্শযতি| নন্ববিশেষেণ সর্বজ্বরেষু কষাযানন্তরং সর্পিরুচ্যতে, তত্কথমুপপন্নং ভবতীত্যাহ- রূক্ষং তেজ ইত্যাদি| তত্র তেজঃশব্দো যদ্যপি পিত্তানলস্নেহশক্তিদ্যুতিষু গ্রীষ্মে চ বর্ততে, তথাঽপীহ তেজঃশব্দেনোষ্মাঽভিধীযতে; তেন রূক্ষস্বরূপ ঊষ্মা সর্বত্র জ্বরকর ইত্যুক্তং ভবতি| স চোষ্মা আমাশযবিক্ষিপ্তস্যাগ্নেস্তথা দেহভবো জ্বরপ্রভাবকৃতশ্চ জ্বররূপো জ্ঞেযঃ| যদুক্তং- “স্বেন তেনোষ্মণা চৈব কৃত্বা দেহোষ্মণৌ বলম্| সন্তাপমধিকং দেহে জনযন্তি” ইত্যাদি| অযং চ ঊষ্মা সূক্ষ্মবিচারে যদ্যপি পিত্তস্য ভবতি, যদুক্তং- “ঊষ্মা পিত্তাদৃতে নাস্তি জ্বরো নাস্ত্যূষ্মণা বিনা” (বা.চি.অ.১) ইতি, পিত্তং চ যদ্যপি “সস্নেহমুষ্ণং তীক্ষ্ণং চ” (সূ.অ.১০) ইত্যাদিনা গ্রন্থেন স্নিগ্ধমুক্তং, তথাঽপ্যবস্থাবশাত্ পিত্তং নিরামং সন্নিঃস্নেহং ভবতি, স্নেহশ্চ পিত্তগুণো দ্রবযোগনিমিত্তকো ন সাংসিদ্ধিকঃ; তেন স্নেহাপগমঃ পিত্তস্যোহ্যত এবাবস্থাযাং; তেন নিঃস্নেহস্য পিত্তস্যোষ্মা রূক্ষ এব ভবতি| ইযং চ ব্যাধ্যবস্থা ব্যাধিপ্রভাবাদেব জীর্ণাবস্থাযাং ভবতি, যথা- মদাত্যযস্যান্তে বাতপিত্তত্বং; যদুক্তং “পিত্তমারুতপর্যন্তঃ প্রাযেণ হি মদাত্যযঃ” (চি.অ.২৪) ইতি| ক্ষারপাণিনাঽপ্যুক্তং- “জ্বরোষ্মণা রূক্ষিতেষু ধাতুষু বলবান্ মারুতো জ্বরানুবন্ধং বিষমজ্বরাণামন্যতমং বা কুর্যাত্” ইত্যাদি| তত্র রূক্ষেণ তেজসা জ্বরকালসম্বন্ধাদ্রূক্ষিতস্য জ্বরিণো যোঽনুবন্ধো ধাতুরনিলঃ স্যাত্ স চ স্নেহবধ্য ইতি সর্পিঃকৃতস্নেহগুণবধ্য ইত্যর্থঃ; চকারাদ্রূক্ষং তেজো যজ্জ্বরকরং তদপি সর্পিঃকৃতস্নেহবধ্যমিতি সমুচ্চিনোতি| ধাতুরিতি বিশেষণেন বাযোর্ধারণাত্মকতা উচ্যতে; ততশ্চ ধারণাত্মকস্য বাযোঃ প্রকোপো মহাত্যয ইতি সূচযতি| অনু পশ্চাদ্বলং ভবতি যস্য সোঽনুবলঃ| তেন সর্বজ্বরেষু কষাযাদিনা দ্বাদশাহেন চ কালেন কফংশবিক্ষযে সতি জ্বরোষ্মা বৃদ্ধো ভবতি, তদ্বিরূক্ষণাচ্চ বাযুরপি বৃদ্ধো ভবতি| অত্র জ্বরোষ্মণি পিত্তধর্মে সর্পিস্তাবচ্ছৈত্যাদ্বিহিতং ভবতীতি প্রসিদ্ধত্বানোক্তং; স্নেহাংশেনৈব তু সর্পির্যথা পিত্তোষ্মাণং জ্বরকরং রূক্ষস্বরূপং তথা বাতং চ স্নেহাচ্ছমযতি, তত্ ‘রূক্ষং তেজ’ ইত্যাদিনা শ্লোকেনোক্তং ভবতি| অন্যে তু তেজঃশব্দেনেহ পিত্তমেব গ্রাহযন্তি| পিত্তং হি দ্বিবিধং- সদ্রবং নির্দ্রবং চ| যত্ সদ্রবং তত্ সস্নেহং, যত্তু লঙ্ঘনাদিনা ক্ষপিতার্দ্রভাগং নির্দ্রবং তদ্রূক্ষং ভবতি, তদিহ ‘রূক্ষং তেজ’ ইত্যনেন গৃহ্যতে| অন্যে তু ‘যঃ স্যাদনুবলো ধাতুঃ’ ইত্যনেনানুবন্ধরূপং কফং গ্রাহযন্তি, ততোঽনুবন্ধঃ কফো রূক্ষং পিত্তং বাতশ্চ স্নেহাসাধ্যো ভবতীত্যর্থঃ; স্নেহশব্দেন চ প্রকরণাত্ সর্পিরুচ্যতে, সর্পিশ্চ কফজিত্ সংস্কারাদ্ভবতি; যদুক্তং- “ঘৃতং তুল্যগুণং দোষং সংস্কারাত্তু জযেত্ কফম্” ইতি (নি.অ.১); কিঞ্চ “অত ঊর্ধ্বং কফে মন্দে” ইত্যাদিনা ত্রিষ্বপি দোষেষু সর্পিঃপ্রযোগোঽনুমতঃ; তদিহাপি ত্রয এব দোষা যথোক্তব্যাখ্যযা সর্পির্বিষযাঃ প্রতিপাদিতা ভবন্তীতি| অস্মকং তু পূর্ব এব ব্যাখ্যানে স্বরসঃ| অন্যে তু ‘রূক্ষে তেজো জ্বরকরং’ ইতি পঠন্তি| তত্র রূক্ষে ইতি কষাযাদিভী রূক্ষীকৃতশরীরে ইতি জ্ঞেযং, শেষং চ পূর্ববত্| অযং চ পাঠঃ পূর্বটীকাকৃদ্ভির্ভাসদত্ত-স্বামিদাসাষাঢবর্ম-ব্রহ্মদেবপ্রভৃতিভিরপি ব্যাখ্যাতত্বান্ন প্রতিক্ষেপণীযঃ| খরনাদেনাপি সমানোঽযং পাঠঃ| উক্তং হি তত্র- “কষাযপানাদ্বমনাল্লঙ্ঘনাল্লঘুভোজনাত্| রূক্ষিতানাং জ্বরো মোক্ষে সর্পিঃপানমুদীক্ষতে|| রূক্ষতেজোঽধিকে দেহে” ইত্যাদিনা||২১৬-২১৭||

সম্প্রতি সর্পীংষি প্রাহ- কষাযা ইত্যাদি| য এতে জ্বরঘ্না কষাযা উক্তাস্তে সর্পিষা সহ যোজিতাঃ সর্পিঃসাধনত্বেন প্রযুক্তাঃ প্রযোজ্যাঃ; যথোক্তকষাযদ্রব্যৈঃ স্ববিষয এব সর্পীংষি সাধযিত্বা প্রযোজ্যানীতি বাক্যার্থঃ| অন্যে তু কষাযাণাং সর্পিষা মিশ্রীকৃতানামনেন বচসা প্রযোগমিচ্ছন্তি||২১৮||

পিপ্পল্য ইত্যাদি| পিপ্পল্যাদৌ ঘৃতে পিপ্পল্যাদীনাং বিশেষানুক্তেঃ কষাযত্বং কল্কত্বং চৈকে ব্রুবতে, অন্যে তু কল্কমেবেচ্ছন্তি| দ্রবকার্যং তু দ্রবস্যানুক্তত্বাত্তোযেনৈব কর্তব্যং, “দ্রবকার্যেঽপি চানুক্তে সর্বত্র সলিলং স্মৃতম্” (ক.অ.১২) ইতি বচনাত্| ননু যত্র কল্কত্বেন দ্রব্যশ্রুতিঃ, দ্রবং চ ন শ্রুতং, তত্র জলং গ্রহীতব্যং, যথা- “ত্র্যূষণত্রিফলাকল্কে বিল্বমাত্রে গুডাত্ পলে| সর্পিষোঽষ্টপলং পক্ত্বা মাত্রাং মন্দানলঃ পিবেত্” (চি.অ.১৫) ইতি; যত্র তু কষাযত্বং কল্কত্বং বা নোক্তং তত্র ক্বাথকল্কাবেব কর্তব্যৌ, যদুক্তং সুশ্রুতে- “কল্কক্বাথাবনির্দেশে গণাত্তস্মাত্ প্রযোজযেত্” (সু.চি.অ.৩১) ইতি| মৈবং, সুশ্রুতোক্তপরিভাষা হীযং গণবিষযা এব, ‘গণাত্তস্মাত্ প্রযোজযেত্’ ইতি বচনাত্; ন চ পিপ্পল্যাদযোঽমী গণত্বেনোক্তাঃ, গণোঽপি যত্রাধিকরণেন শ্রুতস্তত্রৈব ক্বাথকল্ককরণং; যদুক্তমন্যত্র- “যত্রাধিকরণেনোক্তির্গণস্য স্নেহসংবিধৌ| তত্রৈব কল্কনির্যূহাবিষ্যেতে স্নেহবেদিভিঃ” ইতি; কিঞ্চ সামান্যেন দ্রব্যস্য স্নেহসাধনাভিধানে যদি কল্ককষাযত্বং স্যাত্তদা বলাতৈলাদৌ “বলাকষাযকল্কাভ্যাং তৈলং ক্ষীরসমং পচেত্” (চি.অ.২৯) ইতি ন কুর্যাত্ কল্ককষাযযোরুপাদানং, সামান্যসাধনবচনেনৈব লব্ধত্বাত্, তস্মাত্ কল্কমাত্রেণৈব পিপ্পল্যাদিদ্রব্যং জলং চ চতুর্গুণং দেযম্; এবমন্যত্রাপি বোদ্ধব্যম্| অত্র চ পক্তব্যঘৃতস্য প্রমাণানির্দেশাদব্যবস্থিতমানমেব সর্পিরিচ্ছাতঃ পক্তব্যং, যত্র তু প্রস্থাদিমাননির্দেশং করোতি তত্র তাবন্মাত্রেণৈব স্নেহসাধ্যরোগোপশমো ভবতীতি জ্ঞেযম্| তথাহি বাতব্যাধৌ প্রভূতস্নেহসাধ্যে ভূযসীমেব স্নেহমাত্রাং বক্ষ্যতি, প্রপৌণ্ডরীকাদ্যে নস্যযোগিতযা কুডবমানং স্নেহং বক্ষ্যতি, কুষ্ঠোক্ততিক্তকষট্পলাদৌ অত্যল্পপাকসংবিধানেন পক্বস্য ঘৃতস্য কার্যকর্তৃত্বং ভবতীতি ভেষজপ্রভাবদর্শী মহর্ষির্বোধযতি| তত্র যদি কুষ্ঠস্য দীর্ঘরোগতযা ভূযো ভূযস্তিক্তষট্পললেপেন প্রযোজনং তদা পুনঃ পুনঃ ষট্পলমানং পক্তব্যং ঘৃতং, “যথা কুর্বন্তি স উপায” (সূ.অ.২৬) ইতি বচনাত্| এবমগস্ত্যহরীতক্যাদাবপি প্রতিনিযতমানকথনপ্রযোজনং বাচ্যম্| তস্মান্ন যাদৃচ্ছিকং ক্বচিদাচার্যস্য মানাভিধানমনভিধানং চ| তামলকী ‘ভূম্যামলকী’ ইতি খ্যাতা| হলীমকং কামলাভেদম্| সন্নিযচ্ছতি সমীকরোতি||২১৯-২২১||

বাসাদ্যে ঘৃতে ক্বাথস্য পরিমাণং যদ্যপি নোক্তং, তথাঽপি দ্বিগুণ এব ক্বাথো গ্রাহ্যঃ; স্নেহপাকে চতুর্গুণ এব দ্রবঃ, “স্নেহাত্তোযং চতুর্গুণম্” (ক.অ.১২) ইতি বচনাত্; জলশব্দশ্চাত্র দ্রবোপলক্ষণঃ| অত্র চ “দ্বাভ্যামপি চাতুর্গুণ্যম্” ইতি পরিভাষযা যদ্যপি ক্ষীরং কষাযবদ্বিগুণমত্র লভ্যতে, তথাঽপি ত্রিবিধশিষ্যবুদ্ধিহিতায স্পষ্টার্থং ক্ষীরদ্বৈগুণ্যাভিধানমিতি ব্রুবতে| তত্র ক্ষীরস্য মানানুক্তৌ “ক্বাথ্যাচ্চতুর্গুণং বারি পাদস্থং স্যাচ্চতুর্গুণম্| স্নেহাত্ স্নেহসমং ক্ষীরং কল্কশ্চ স্নেহপাদিকঃ” ইতি বচনাত্ ক্ষীরস্য দ্রবান্তরসত্ত্বে সতি স্নেহসমত্বমেব স্যাত্; ততশ্চ কষাযভাগত্রযং ক্ষীরং চৈকভাগমিতি কৃত্বা দ্বাভ্যামপি চাতুর্গুণ্যমিতি পরিভাষা স্যাত্; তস্মাত্ কর্তব্যং ক্ষীরদ্বৈগুণ্যবচনম্| অন্যে তু- “দ্বাভ্যামপি চাতুর্গুণ্যমিতি পরিভাষযা প্রত্যেকমেব দ্রবেণ চাতুর্গুণ্যমিচ্ছন্তি”, ততশ্চেহ কষাযস্য চাতুর্গুণ্যং ক্ষীরস্য তু দ্বৈগুণ্যং ভবতি| তত্র “একেনাপি চাতুর্গুণ্যং, দ্বাভ্যামপি চাতুর্গুণ্যং, ত্রিভিরপি চাতুর্গুণ্যং, চতুর্ভিঃ সমম্” ইতি বচনেন চতুর্ভিঃ স্নেহসমতাভিধানেন স্নেহচাতুর্গুণ্যমেব দ্রবস্যোক্তম্| অতো দ্বাভ্যাং ত্রিভিরপি তথা চাতুর্গুণ্যং কর্তব্যং যথা স্নেহাচ্চতুর্গুণং স্যাত্, তচ্চ মিলিত্বৈব চাতুর্গুণ্যং ভবতি ন প্রত্যেকম্| চতুর্গুণদ্রবপরিভাষা তু পঞ্চপ্রভৃতিদ্রবসান্নিধ্যে বিশেষবচনাদ্বাধ্যতে| বচনং হি- “পঞ্চপ্রভৃতি যত্র স্যুর্দ্রবাণি স্নেহসংবিধৌ| তত্র স্নেহসমান্যাহুরর্বাক্ স্যাত্তু চতুর্গুণম্” ইতি||২২২-২২৩||

বলাদ্যেঽপি ক্বাথপযসোঃ পূর্বোক্তক্বাথক্ষীরসাহচর্যাত্ প্রত্যেকং দ্বিগুণত্বং জ্ঞেযম্||২২৪-২২৬||

সম্প্রতি ক্রমসূচিতবমনবিরেচনযোগানাহ- জ্বরিভ্য ইত্যাদিনা| বহুদোষেভ্য ইত্যনেন অল্পদোষেষু সংশোধনং নিষিদ্ধমিতি স্ফোরযতি| কাল ইতি যথোক্তবমনবিরেচনযোগ্যজ্বরাবস্থাযাম্| কল্প ইতি কল্পস্থানে| মদনপিপ্পলীযুক্তং কফে, কলিঙ্গযুক্তং পিত্তশ্লেষ্মণি, মধুকযুক্তং তু দাহপ্রাযে | ক্ষৌদ্রযোগান্মধুরীকৃতমম্বু ক্ষৌদ্রাম্বু| সৈন্ধবযোগাল্লবণীকৃতমম্বু লবণাম্বু| প্রস্কন্দনমিতি বিরেচনম্| আবাপ্যেতি উপযোজ্য||২২৭-২৩৩||

পাঠক্রমাগতক্ষীরপ্রযোগানাহ- কাসাদিত্যাদি| অত্র পঞ্চমূল্যাদিদ্রব্যস্য তথা ক্ষীরস্য পানীযস্য চ মানানুক্তৌ বৃদ্ধবৈদ্যব্যবহারসিদ্ধযা পরিভাষযা মানকল্পনা; যদুক্তং- “দ্রব্যাদষ্টগুণং ক্ষীরং ক্ষীরাত্তোযং চতুর্গুণম্| ক্ষীরাবশেষঃ কর্তব্যঃ ক্ষীরপাকে ত্বযং বিধিঃ” ইতি| এতচ্চ দ্রব্যস্যার্ধপলং, ক্ষীরং পলচতুষ্টযং, পানীযং পলানি ষোডশ দত্ত্বা, ক্ষীরাবশেষঃ পাকঃ কর্তব্যঃ; এবম্প্রকারা মানব্যবস্থা| যত্র তু মাষপর্ণীভৃতীযে “মেদাং পযস্যাং জীবন্তীং বিদারীং কণ্টকারিকাম্| শ্বদংষ্ট্রাং ক্ষীরিকাং মাষান্ গোধূমাংশ্ছালিষষ্টিকান্|| পযস্যর্ধোদকে পক্ত্বা কার্ষিকানাঢকোন্মিতে| বিবর্জযেত্ ক্ষীরশেষং” (চি.অ.২) ইত্যাদিনা ক্ষীরদ্রব্যাদিমানমুক্তং তত্তত্রৈব বিষযে জ্ঞেযং, তন্ত্রান্তরপরিভাষা- গৃহীতত্বাদস্য মানস্য| প্রদেশান্তরযোগোক্তং হি মানং তদেব প্রদেশান্তরেঽপি মানলিঙ্গং ভবতি যত্ পরিভাষানুগতং, যত্তু পরিভাষান্তরবাধকং মানং তত্ স্ববিষয এবাবতিষ্ঠতে; যথা- “সাধযেচ্ছুদ্ধশুষ্কস্য লশুনস্য চতুষ্পলম্| ক্ষীরে জলাষ্টগুণিতে ক্ষীরশেষং চ না পিবেত্” (চি.অ.৫) ইতি; এবমন্যদপি তন্ত্রান্তরে যত্ পরিভাষাবিরুদ্ধমানকথনং তত্তত্রৈব প্রযোগে ব্যবস্থিতং জ্ঞেযম্| পরিকর্তিকা পরিকর্তনাকারা গুদাদিবেদনা| নাগরমিত্যাদৌ ক্ষৌদ্রস্য পাকানর্হত্বেনোত্তরকালং দ্রব্যান্তরতুল্যমানস্যৈব প্রক্ষেপো জ্ঞেযঃ| উষ্ণং শীতং চেতি বিকল্প ইচ্ছাবিশেষকৃতঃ; প্রবলে বাতে উষ্ণং, পিত্তে ত্বতিবলে শীতম্||২৩৪-২৩৯||

নিরূহবিধৌ জ্বরহরানিতি বচনেন জ্বরহরৈর্দ্রব্যৈর্নিরূহানুবাসনকল্পনাং দর্শযতি| পটোলাদ্যে নিরূহে পযস্যর্ধোদকে শৃতমিতি বচনেন ক্ষীরতুল্যস্য জলস্য গ্রহণমর্ধশব্দস্য সমবিভাগবচনত্বাজ্জ্ঞেযম্| অত্র চ ক্বাথকল্কস্নেহাদিমানব্যবস্থা সিদ্ধিস্থানে বক্তব্যৈব বোদ্ধব্যা| গুডূচ্যাদৌ সাধযেদ্রসমিতি ক্বাথং কুর্যাত্| ঈষত্সলবণমিষত্ক্ষৌদ্রসর্পিষা যুক্তমিতি যোজ্যম্||২৪০-২৪৯||

জীবন্ত্যাদ্যেঽনুবাসনে যমকে ক্ষীরং স্নেহসমং, জলং তু ত্রিগুণমিতি স্নেহাচ্চাতুর্গুণ্যং দ্রবস্য কার্যম্| মদনৈশ্চ শৃতঃ স্নেহ ইত্যত্রানন্তরোক্তঃ সর্পিস্তৈলরূপ এব যমকস্নেহো জ্ঞেযঃ| এবং ‘সিদ্ধঃ স্নেহ’ ইত্যত্রাপি জ্ঞেযম্||২৫০-২৫৩||

যদুক্তমিত্যাদিনা শিরোবিরেচনদ্রব্যমাহ| ভেষজাধ্যাযে ইতি অপামার্গতণ্ডুলীযে (সূ.অ.২)| যচ্চ নাবনিকং তৈলমিতি অণুতৈলম্||২৫৪-২৫৫||

অভ্যঙ্গাংশ্চেত্যাদিনা ক্রমাগতং বহিঃপরিমার্জনমাহ| যথাভিলাষমিতি যথেচ্ছম্| শীতোষ্ণং বিভজ্যেতি শীতসমুত্থং জ্বরমুষ্ণসমুত্থং চ জ্বরং বিভজ্য; তত্র শীতসমুত্থে উষ্ণাভ্যঙ্গাদযঃ, উষ্ণে চ শীতাঃ কর্তব্যাঃ||২৫৬||

অত্র চ প্রতিলোমব্যাখ্যযা শীতাভিপ্রাযিণোঽভ্যঙ্গাদীনাহ- সহস্রেত্যাদি| সহস্রশব্দো বিপুলার্থঃ; তেনানেকধা ধৌতং সর্পিরিত্যর্থঃ সূচিতঃ||২৫৭||

সূচিতং চন্দনাদ্যং তৈলং ব্রূতে- অথেত্যাদি| অথশব্দোঽধিকারে| চন্দনাদ্যেন দ্রব্যেণ সংস্কৃতং তৈলমপি চন্দনাদ্যমুচ্যতে| চন্দনং রক্তচন্দনং, ভদ্রশ্রিযং শ্বেতচন্দনং, কালানুসার্যং শীতলং, নলিনং পদ্মভেদঃ, বিসং মৃণালসূত্রং, বেতসঃ সুগন্ধিমূলং, বানীরস্তদ্ভেদোঽপ্যসুগন্ধিমূলঃ, অশ্বকর্ণঃ শালভেদঃ, অরিষ্টঃ পর্বতীযনিম্বঃ, স্যন্দনঃ নেমিবৃক্ষঃ, বাতপোথঃ পলাশঃ, তিনিশঃ বঞ্জুলঃ, কদরঃ বিট্খদিরঃ, কপীতনঃ ‘গন্ধমুণ্ড’ ইতি খ্যাতঃ, বটঃ নিষ্প্ররোহো বটঃ, ন্যগ্রোধস্তু প্ররোহবান্, জ্যোতিষ্মতী কাঙ্গণিকা, সংবর্তকঃ বিভীতকঃ, শতপর্বা শ্বেতদূর্বা, শীতকুম্ভিকা , কাষ্ঠপাটলা, মহাশ্রাবণী অলম্বুষা স্থূলফলা, শীতপাকী গণ্ডদূর্বা, ওদনপাকী নীলভেণ্ডী, কালা কাকোলী, ঋষ্যপ্রোক্তা ঋদ্ধিঃ, তৃণশূন্যং কেতকী| যথালাভমিত্যনেন দুঃখপ্রাপ্যভেষজপরিত্যাগেনাপি চন্দনাদিপাকং দর্শযতি| দ্বিগুণং পযো যস্মিন্ ক্বাথে তেন দ্বিগুণপযসা ক্বাথেন| অত্র কল্কমানানির্দেশেঽপি স্নেহপাদিকত্বং কল্কস্য, “কল্কশ্চ স্নেহপাদিকঃ” ইতি বচনাত্| অত্র যদ্যপি তৈলমুষ্ণং ঘৃতং চ শীতলং, শীতং চ দাহপ্রশমনে প্রশস্তং, তথাঽপি সূক্ষ্মমার্গানুসারিতযা ব্যবাযিতযা তথা স্পর্শনেনাধিকবাতহরতযা তৈলমেবাভ্যঙ্গপ্রস্তাবে চন্দনাদ্যং কৃতং ন ঘৃতম্; অন্যে ঘৃতাদপি তৈলং সংস্কারবাহিতরমিতি কৃত্বা তৈলমিহোক্তমিতি ব্রুবতে| ননু চন্দনাদ্যমিতি সঞ্জ্ঞাকরণেন কিং? প্রদেশান্তরে ব্যবহারার্থমিতি চেত্; ন, বিনাঽপি সঞ্জ্ঞাকরণে প্রদেশান্তরে যৌগিকসঞ্জ্ঞযা ব্যবহারো দৃষ্টঃ, যথা- “ষট্পলং পাযযেত্ সর্পিঃ” (চি.অ.৫), তথা “বাসাঘৃতং দাধিকং চ পিবেত্ত্র্যূষণমেব চ” (চি.অ.১৭) ইত্যাদৌ; তথা কৃতাযামপি সঞ্জ্ঞাযাং ব্যবহারো ন দৃশ্যতে, যথা- “এতত্ প্রাযোগিকং সর্পিঃ পারূষকমিতি স্মৃতম্” (চি.অ.২৯) ইতি, তথা ষড্ভাগকষাযকাদিসঞ্জ্ঞাং কৃত্বা ন চ তাভিঃ প্রদেশান্তরে ব্যবহারঃ কৃতঃ| মৈবং পারূষকাদিসঞ্জ্ঞযা যদ্যপি শাস্ত্রে ব্যবহারো নাস্তি, তথাঽপি তদ্বিদ্যানাং বৈদ্যানাং তযা সঞ্জ্ঞযা ব্যবহারো ভবিষ্যতি, এতদর্থং সঞ্জ্ঞাকরণম্| সঞ্জ্ঞানাং চ প্রযোগকথনসমযেঽকরণেঽপি যোগসিদ্ধাঃ সঞ্জ্ঞা ভবন্ত্যেব ষট্পলাদিকাঃ| তেন প্রদেশান্তরেঽপি যৌগিকসঞ্জ্ঞাব্যবহারো ভবতি ক্বচিত্, ক্বচিচ্চান্যথোপাদেযতযা বৈদ্যপ্রসিদ্ধ্যা চ প্রযোগসময এব সঞ্জ্ঞা ক্রিযত ইতি ন কাচিত্ ক্ষতিঃ| এবমন্যত্রাপি সঞ্জ্ঞাকরণে ব্যাখ্যেযম্| অশ্লক্ষ্ণপিষ্টৈরিতি বচনেন শ্লক্ষ্ণপিষ্টলেপস্য দাহকর্তৃতাং সুচযতি; যদুক্তং- “শ্লক্ষ্ণপিষ্টঘনো লেপশ্চন্দনস্যাপি দাহকৃত্| ত্বগগতস্যোষ্মণো রোধাচ্ছীতকৃত্ত্বন্যথাঽগুরোঃ” (চি.অ.৩০) ইতি||২৫৮-২৫৯||

সংস্পর্শানুরসান্ স্পৃশেদিতি বচনান্ন চিরং ধারযেদিতি দর্শযতি; চিরধারণে হি তেষামপ্যুষ্ণতা স্যাত্| বাযবশ্চন্দ্রপাদাশ্চ শীতা ইতি অত্র শীতা ইতি বিশেষণং বাযোঃ; ন চন্দ্রপাদানাং, তেষাং সর্বদা শীতত্বাত্; কিংবা চন্দ্রপাদা অপি উষ্ণকালে উষ্ণসম্পর্কাদুষ্ণা ভবন্তি, তন্নিরাসার্থং শীতা ইতি||২৬০-২৬৬||

অগুর্বাদ্যে ক্ষেমকঃ চোরকঃ, রোহিষঃ ‘রামকর্পূর’ ইতি খ্যাতঃ, শিগ্রুঃ শোভাঞ্জনভেদঃ, মূলকপর্ণী গুগ্গুলুঃ, তিলপর্ণী ‘হুল্হুল’ ইতি খ্যাতা, পীলুপর্ণী মোরটা, মূর্বেত্যন্যে, গণ্ডীরঃ শমঠভেদঃ, স হি জলস্থলজভেদাদ্বিবিধঃ, আত্মজা পুত্রঞ্জীবখ্যাতা, একৈষিকা অম্বষ্ঠা, সুমুখাদযঃ পর্ণাসভেদাঃ, রুহা বৃক্ষরুহা, রোহা অঞ্জলিকারিকা, শীতপর্ণী বৃক্ষকলম্বুকা, নাকুলী চবিকা, গন্ধনাকুলী রাস্নাভেদঃ, অধ্যণ্ডা শূকশিম্বী| অন্যেষাং চেত্যনেন রোগভিষগ্জিতীযাদ্যুক্তোষ্ণদ্রব্যাণি গ্রাহযতি| সৌবীরতুষোদকে ত্রিবৃত্কল্পে বক্ষ্যমাণে, মৈরেযং সুরাকৃতা সুরা, মেদকো জগলঃ, কট্বরং সস্নেহদধিদ্রবঃ| পাত্রম্ আঢকম্| অত্র কষাযাদীনি দ্রবদ্রব্যাণি স্নেহসমানি প্রত্যেকং কর্তব্যানি; যদুক্তং- “পঞ্চপ্রভৃতি যত্র স্যুর্দ্রবাণি স্নেহসংবিধৌ| তত্র স্নেহসমান্যাহুঃ” ইতি||২৬৭||

স্বেদাধ্যাযে ত্রযোদশবিধস্যোক্তত্বাত্ পুনস্ত্রযোদশবিধবচনং সর্বেষামেব করণার্থং; কিংবা অধিকানাগ্নিস্বেদনিষেধার্থম্| ত্রযোদশবিধস্বেদান্তর্গতাঽপি কুটী বিশেষেণ হিতত্বাত্ পুনরুচ্যতে| তচ্চ শযনমিতি কুটীপরিকরতযা প্রতিপাদিতং শযনম্; এবমাচ্ছাদনমপি| এতচ্চ শযনাচ্ছাদনং পৃথগপ্যত্র হিতমিতি পৃথক্পাঠাদ্দর্শযতি| ঘনা ইতি বহলাঃ| স্বেদনানি উষ্ণানি কুক্কুটমদিরাকুলত্থাদীনি| সংসর্গবলযোজনাদিত্যত্র অনন্তরোক্ত এবোষ্ণাভিপ্রাযজ্বরকরো বাতকফসংসর্গঃ সংসর্গশব্দেন গৃহ্যতে; তেন বাতকফসংসর্গে যদা বাতো বলবান্ তদা গুরূষ্ণস্নিগ্ধভূযিষ্ঠমন্নপানং, যদা তু কফো বলবাংস্তদা লঘূষ্ণরূক্ষপ্রাযং বিধেযমিত্যর্থঃ| অযং চ বাতকফজো জ্বরো বিশেষেণ বাযোর্যোগবাহিতযা শীতো ভবতীতি কৃত্বেহোক্তঃ ; তেন কেবলকফজঃ কেবলবাতজোঽপি শীতাভিপ্রাযো জ্ঞেয এব||২৬৮-২৭১||

সম্প্রতি বাতজাদীনাং জ্বরাণাং পূর্বং নিষিদ্ধং লঙ্ঘনমপকৃষ্য বিশেষচিকিত্সামাহ- বাতজ ইত্যাদি| শমনৈরিতি কষাযসর্পিঃপানাদিভিঃ শমনৈঃ||২৭২-২৮২||-

সম্প্রতি বাতজাদীনামপ্যাবস্থাযাং লঙ্ঘনং, তথা কফজাদীনামপি স্বরূপেণৈব সামান্যেন লাঘবকরং লঙ্ঘনমাহ- সামা ইত্যাদি| সামা ইত্যনেন বাতিকস্যাপি সামস্য লঙ্ঘনীযত্বং ব্রূতে| উক্তং হ্যন্যত্র- “সামে বাতেঽপি লঙ্ঘনম্” ইতি| কফজে তু নিরামেঽপি লঙ্ঘনং শস্যতে| কফপিত্তজশব্দেন কফযুক্তপিত্তজস্যৈব লঙ্ঘনীযত্বং ন কেবলং নিরামপিত্তজস্য, সামপিত্তজস্য তু আমক্ষযার্থং লঙ্ঘনং শস্যত এব| যদুক্তমন্যত্র- “সামে পিত্তেঽপি লঙ্ঘনম্| কুর্যাদেবামপক্ত্যর্থং” ইতি| যত্তূক্তং- “কফপিত্তে দ্রবে ধাতু সহেতে লঙ্ঘনং মহত্” ইতি; তদপি সামত্বেন সদ্রবপিত্তাপেক্ষ্যা, ক্ষীণদ্রবাংশে তু পিত্তে লঙ্ঘনং ন কর্তব্যমেব| লঙ্ঘনীযোক্তমিতিবচনেন লঙ্ঘনবৃংহণীযোক্তং দশবিধং লঙ্ঘনমবস্থানিষিদ্ধবমনাদিসর্বথানিষিদ্ধব্যাযামাদিরহিতং চ গ্রাহ্যম্||২৮৩||-

পূর্বং যদ্ ‘বমনৈর্হরেত্’ ইত্যুক্তং তত্সংসৃষ্টদোষেষু জ্বরেষু কফাধিক্যেন, সম্প্রতি তু একৈকদোষজে বমনৈশ্চেত্যাদিনা বমনাদীনি প্রাহেতি ন পৌনরুক্ত্যম্||২৮৪||-

সংসর্গসন্নিপাতচিকিত্সাসূত্রমাহ- সংসৃষ্টানিত্যাদি| তরতমৈঃ সমৈরিতি সংসর্গে একোল্বণে উল্বণতরৈঃ; সন্নিপাতে চ বৃদ্ধতরবৃদ্ধতমদোষারব্ধে দোষানুসারেণৈব; তথা দ্ব্যুল্বণতরেঽপি সন্নিপাতে দ্বৌ দোষৌ তরেণৈব জ্ঞেযৌ, বৃদ্ধবৃদ্ধতরবৃদ্ধতমদোষারব্ধে চ ত্রিদোষেঽত্যর্থবৃদ্ধা দোষাস্তমৈর্জ্ঞেযাঃ| যেন ‘ত্রিষু তমঃ’ ইতি যদুক্তং তত্রিষু মধ্যে একস্য প্রকর্ষাবধারণে ভবতি; যদা তু ত্রিষু দ্বৌ প্রকৃষ্টৌ বিবক্ষিতৌ তদা একপ্রকৃষ্টাপেক্ষযা ‘দ্বযোস্তরঃ’ ইত্যস্যৈব বিষযঃ| সমৈস্তু সমদোষারব্ধসংসর্গঃ সন্নিপাতশ্চ জ্ঞেযঃ| দোষক্রমাপেক্ষীতি দোষাপেক্ষীত্যনেন অনেকসকলদোষগতবৃদ্ধবৃদ্ধতরত্বাদিবিশেষে চিকিত্সিতোপযুক্তে অপেক্ষণীযত্বমুক্তং, ক্রমাপেক্ষীত্যনেন চ জ্বরিতচিকিত্সিতোক্তলঙ্ঘনাদিক্রমাপেক্ষা দর্শিতা| যথোক্তৈরৌষধৈরিতি লঙ্ঘনাদিভিরঞ্জনপর্যন্তৈঃ| ননু ত্রিদোষজে জ্বরে চিকিত্সা নোপপদ্যতে, যতো ন ত্রিদোষশমনং প্রাযো দ্রব্যং ভবতি, যদ্ধি বাতস্য পথ্যং তচ্ছ্লেষ্মণ্যপথ্যং, যত্ পিত্তে পথ্যং তচ্চ প্রাযঃ শ্লেষ্মণ্যপথ্যং; যথা হি তিক্তকষাযং কফপিত্তহরং তদ্বাতকরং, যচ্চ মধুরং বাতপিত্তহরং তত্ কফকরং, যত্তু ত্রিদোষহরমামলকাদি তত্ স্তোকং প্রতিনিযতরোগবিষযং নাবশযং জ্বরযৌগিকং চ, সন্নিপাতশ্চাযং মহাত্যযিকঃ, তত্ কথমস্য চিকিত্সা কর্তব্যেত্যাহ- বর্ধনেনেত্যাদি| পঞ্চবিংশতিপ্রকারোঽত্র সন্নিপাত উচ্যতে “দ্ব্যুল্বণৈকোল্বণৈঃ ষট্ স্যুর্হীনমধ্যাদিকৈশ্চ ষট্” (সূ.অ.১৭) ইত্যাদিনা; তত্র স্বমতে ক্ষীণদ্বাদশসু সন্নিপাতেষু জ্বরারম্ভকত্বং নাস্তি, ক্ষীণা হি দোষাঃ স্বলিঙ্গহানিমাত্রবিকারা নাধিকং জ্বরাদিকং কর্তুং সমর্থাঃ; শেষেষু তু ত্রযোদশসু ত্রিদোষহরদ্রব্যস্যাভাবাদভ্যর্হিতদোষাপেক্ষযা চিকিত্সোচ্যতে, গত্যন্তরাভাবাত্| তত্র বর্ধনেনৈকদোষস্যেত্যনেনৈকদোষস্য বর্ধনেনাপীত্যর্থঃ; একশব্দেন চ দ্বিত্রিবৃদ্ধো দোষ এবা পেক্ষিতো ন বৃদ্ধতরো নাপি বৃদ্ধতমঃ| তযোর্হি অতিবৃদ্ধযোর্বর্ধনেনাতিমাত্রবৃদ্ধ্যাঽত্যহিতমেব স্যাত্| বর্ধনেনৈকদোষস্যেত্যনেন বৃদ্ধতরবৃদ্ধতমদোষদ্বযক্ষপণকেনৈকদোষবর্ধনেন; যথা- বৃদ্ধে কফে বৃদ্ধতরযোশ্চ বাতপিত্তযোর্মধুরং, তদ্ধি বৃদ্ধতরবাতপিত্তদ্বযহন্তৃতযা কফং ক্ষীণং বর্ধযদপি জ্বরং বলবদ্দোষহন্তৃতযা হরতি; তথা বৃদ্ধে কফে বৃদ্ধতরে চ্ পিত্তে মধুরপ্রযোগো জ্ঞেযঃ| এবমুদাহরণান্তরাণি জ্ঞেযানি| অতশ্চ বর্ধনেনৈকদোষস্যেত্যনেন দ্ব্যুল্বণানাং ত্রযাণাং তথা হীনমধ্যাধিকদোষাণাং সন্নিপাতানাং চিকিত্সোক্তা| ক্ষপণেনৈকদোষস্যেত্যনেন চ ক্ষীণদ্বযসংবর্ধকমপি যন্মহাত্যযবৃদ্ধতরবৃদ্ধতমদোষক্ষযকরং ভবতি তদ্ভেষজং কর্তব্যং; বৃদ্ধতমো হ্যপ্রতিকৃতঃ সদ্যো হন্তি, তত্প্রতিক্রিযাযাং চ ক্ষীণযোর্বৃদ্ধিরল্পাত্যযা, সা ক্রমেণ প্রতিকর্তব্যেতি ভাবঃ| অনেনৈকোল্বণাস্ত্রযঃ সন্নিপাতাশ্চিকিত্সিতাঃ| অস্মিন্নর্থে তন্ত্রান্তরং “ন্যূনৈকদোষসংবৃদ্ধিরেবং বৃদ্ধজযোঽপি বা| সন্নিপাতে তু কর্তব্যঃ সন্নিপাতবশেন তু” ইতি| পরিশিষ্টসমসন্নিপাতচিকিত্সামাহ- ক্ফস্থানানুপূর্ব্যা বেতি| বাশব্দো ব্যবস্থিতবিকল্পবাচী, কফস্য স্থানং কফস্থানম্, আমাশযোর্ধ্বভাগ ইত্যর্থঃ; আনুপূর্বী অনুক্রমঃ; তেন কফস্থানুপূর্ব্যা জযেদিতি কফস্থানং প্রথমং জযেত্, স্থানগ্রহণেন স্থানিনঃ কফস্যাপি গ্রহণম্| কফজযস্তু সাক্ষান্নোক্তঃ, তত্স্থানস্যৈবামাশযস্য জ্বরারম্ভকদোষেণ দুষ্টস্য চিকিত্স্যত্বোপদর্শনার্থম্ | উক্তং হি- “জ্বরো হ্যামাশযসমুত্থঃ” (বি.অ.৩) ইতি| এবং চ সমা অপি দোষা জ্বরারম্ভকা যস্মাদামাশযং বিশেষেণ দূষযিত্বা জ্বরং কুর্বন্তি, তস্মাত্ স্থানানুগুণৈব জ্বরে প্রথমং চিকিত্সা কর্তব্যা| স্থানিদোষাপেক্ষযা হি স্থানমেব প্রথমং চিকিত্স্যম্| যদুক্তং- “স্থানং জযেদ্ধি পূর্বং” ইতি| কফস্য স্থানং কফস্থানম্| তত্র লঙ্ঘনপাচনাদিক্রিযা জ্বরে প্রথমং প্রতিপাদিতাঃ ক্রিযন্তে| এতচ্চ যদ্যপি সর্বজ্বরসাধারণং চিকিত্সিতং, তথাঽপি সন্নিপাতে বলবত্তরবাতচিকিত্সাপূর্বকজ্বরচিকিত্সাপ্রসক্তিনিরাসার্থং সমসন্নিপাতে প্রোচ্যতে| জ্বরাদন্যত্র হি সন্নিপাতে সম এব বাতঃ পূর্বং চিকিত্স্যতে; উক্তং হি- “বাতস্যানুজযেত্ পিত্তং, পিত্তস্যানু জযেত্ কফম্” ইত্যাদি| কফস্থানানুপূর্ব্যা চিকিত্সিতে ক্রিযমাণে যো দোষ উল্বণো ভবতি তত্র ‘বর্ধনেনৈকদোষস্য ক্ষপণেনোচ্ছ্রিতস্য বা’ ইতি চিকিত্সা কার্যা| এতদেব ভেলেনোক্তং- “সন্নিপাতজ্বরে পূর্বং কুর্যাদামকফাপহম্| পশ্চাচ্ছ্লেষ্মণি সঙ্ক্ষীণে শমযেত্ পিত্তমারুতৌ” ইতি| অন্যে কফস্থানমামাশযরূপং স্থানং যস্য তত্ কফস্থানং পিত্তমিতি পশ্চাত্পদলোপাদুষ্ট্রমুখবদ্বহুব্রীহিং বদন্তি, ততশ্চ পিত্তানুপূর্ব্যা জযেদিত্যর্থঃ| তদর্থানুবাদকং চ সুশ্রুতবচনং পঠন্তি- “শমযেত্ পিত্তমেবাদৌ জ্বরেষু সমবাযিষু| দুর্নিবারতরং তদ্ধি জ্বরার্তেষু বিশেষতঃ” (সু.চি.অ.৩৯) ইতি| তত্রৈবং তর্হি স্পষ্টার্থং ‘পিত্তানুপূর্ব্যা’ ইত্যেবমেব পঠেত্| সুশ্রুতবচনং হি জীর্ণত্রিদোষাভিপ্রাযেণ জ্ঞেযম্, এতচ্চ প্রথমোত্পন্নসন্নিপাতজ্বরচিকিত্সিতং কফস্থানানুপূর্ব্যা জ্ঞেযম্| যে তু কপশ্চ স্থানং চেতি দ্বন্দ্বং কুর্বতে, তেষাং মতে কফস্যামাশযস্যাপি চ জ্বরস্থানস্য পূর্বং জযঃ কর্তব্য ইত্যর্থঃ, স চ ষষ্ঠীতত্পুরুষেঽপি স্থানস্যামাশযস্য স্থানিকফাপেক্ষযা ক্রিযমাণচিকিত্সযা লভ্যত এবেতি নার্থবিরোধঃ| ইযং চৈকদোষবর্ধনাদিরূপা সন্নিপাতচিকিত্সা যদ্যপি ন বিশুদ্ধা, যদুক্তং- “প্রযোগঃ শমযেদ্ব্যাধিং যোঽন্যমন্যমুদীরযেত্| নাসৌ বিশুদ্ধঃ শুদ্ধস্তু শমযেদ্যো ন কোপযেত্” (নি.অ.৮) ইতি, তথাঽপি সন্নিপাতচিকিত্সাযাং গত্যন্তরাসম্ভবে সতি অল্পদোষবহুগুণতযা ক্রিযত ইতি জ্ঞেযম্| অন্যে তু ‘বর্ধ’ চ্ছেদনে, ইত্যস্মাদ্বর্ধনেনেতি সাধযন্তি, বর্ধনশব্দেন চ মূলচ্ছেদকারকং সংশোধনমুচ্যতে; একগ্রহণেন চ ন যুগপদ্বাতাদীনাং বস্ত্যাদিশোধনং কর্তব্যং, কিন্ত্বেকৈকেনেতি দর্শযতি; ক্ষপণেনোচ্ছ্রিতস্যেত্যনেন সংশোধনবিষযে সংশমনমুচ্যতে; শেষস্য তু ব্যাখ্যা পূর্ববত্| অনেন শ্লোকেন ত্রযোদশবিধসন্নিপাতারব্ধজ্বরচিকিত্সিতমুক্তং ভবতি| ক্ষীণবৃদ্ধদোষবিকল্পকৃতষড্বিধসন্নিপাতেষু যো জ্বরস্তত্র ন কেবলং বৃদ্ধস্য দোষদ্বযস্যৈকস্য বা বৃদ্ধস্য জ্বরারম্ভকস্য চিকিত্সা কার্যা, কিন্তু স্বমানক্ষীণবর্ধনমপি তত্র কর্তব্যং ভবতি; স্বমানক্ষীণদ্বাদশসন্নিপাতস্য তু জ্বরানারম্ভকত্বমেব||২৮৫-২৮৬||-

সন্নিপাতপ্রস্তাবাত্তজ্জং ত্রিশোথীযোক্তশোথমনূদ্য চিকিত্সামাহ- সন্নিপাতেত্যাদি| কশ্চিদেব প্রমুচ্যতে ইত্যনেন দারুণত্বমস্য দর্শযতি; “সন্তি হ্যেবংবিধা রোগাঃ সাধ্যা দারুণসম্মতাঃ| যে হন্যুরনুপক্রান্তা মিথ্যারম্ভেণ বা পুনঃ” (সূ.অ.১৮); কিংবা সাধ্য এবাযং প্রাযো ভবতি, কদাচিচ্চ কৃচ্ছ্রসাধ্য ইতি| ননু ত্রিশোথীযে “জ্বরান্তে দুর্জযোঽন্তায শোফস্তস্যোপজাযতে” (সূ.অ.১৮) ইত্যনেনানুপক্রমণীযত্বমস্যোক্তম্, ইহ তু কশ্চিদেব প্রমুচ্যত ইতি কথং ন বিরোধঃ? মৈবং, তত্রাপি দুর্জযো ভবতি, অন্তায বেত্যর্থঃ; অতো ন বিরোধঃ||২৮৭-২৮৮||-

শাখানুসারীত্যত্র যদ্যপি “শাখা রক্তাদযো ধাতবঃ” (সূ.অ.১১) ইত্যুক্তং, তথাঽপীহ রক্তদূষকো বিশেষেণ জ্বরো জ্ঞেযঃ, রক্তাশ্রযে এব দোষে রক্তমোক্ষস্য বিশেষেণ সমর্থত্বাত্| রক্তমোক্ষস্থানং চ বাহুমধ্যং জ্ঞেযং; যদুক্তমন্যত্র- “শীতোষ্ণস্নিগ্ধরূক্ষাদ্যৈর্জ্বরো যস্য ন শাম্যতি| শাখানুসারী তস্যাশু মুঞ্চেদ্বাহ্বোঃ ক্রমাত্ সিরাঃ” ইতি| শীতোষ্ণাদিসেবাবচনাত্ সকলদোষানুরূপচিকিত্সাক্রমে সতি রক্তদুষ্ট্যৈব প্রাযো জ্বরানুবন্ধো ভবতীতি দর্শযতি||২৮৯||-

বিকারান্তরানুবন্ধজ্বরচিকিত্সামাহ- বিসর্পেণেত্যাদি| কফোত্তরশ্চ পিত্তোত্তরশ্চেতি কৃত্বৈকশেষাত্ কফপিত্তোত্তরত্বং জ্ঞেযং; কিংবা কফপিত্তযোর্মিলিতযোরুত্তরত্বং জ্ঞেযম্| তেনানূর্ধ্বগে পিত্তে দেযমেব সর্পিঃ||২৯০||-

দৌর্বল্যাদিত্যাদৌ দেহগ্রহণেনাত্মাদিতো ব্যাবৃত্য রসাদিষুধাতুশব্দং প্রবর্তযতি, রসাদয এব হি বিশেষেণ দেহধারকাঃ| বৃংহণং পুষ্টিজননম্||২৯১||-

ভূতানুবন্ধিনোস্তৃতীযকচতুর্থকযোশ্চিকিত্সামাহ- কর্মেত্যাদি| কর্ম সাধারণমিতি ভূতানুবন্ধে দোষে চ সাধারণী চিকিত্সা দৈবব্যপাশ্রযা বল্যাদিরূপা, যুক্তিব্যপাশ্রযা দোষানুরূপকষাযপানাদিরূপা চ| বিষমজ্বরশব্দেন তৃতীযচতুর্থকাবেবাভিমতৌ, চতুর্থকেন চতুর্থকবিপর্যযোঽপি গৃহ্যতে| তিক্তশীতৈরনুপানৈর্ভেষজৈশ্চেতি বিজ্ঞেযম্| কষাযোষ্ণমিতি উষ্ণাঃ কষাযাঃ||২৯২-২৯৫||-

দোষাদীন্ প্রবিভজ্যেতি দোষকালদেশপ্রকৃত্যাদীনপেক্ষ্য যদ্যত্র যৌগিকং তত্তত্র কার্যমিত্যর্থঃ| ষট্পলমিতি গুল্মে বক্ষ্যমাণম্| নীলিনী নীলিকা, নীলবুহ্না বা| নীলিন্যাদিশ্চ বিরেচনযোগো জ্বরাগমনদিনে বিরেকাত্ কার্যকরো ভবতি প্রভাবাত্| মহতী মাত্রা অহোরাত্রপরিণমনীযা; অন্যত্র তু ষট্পলী মাত্রা মহতী মাত্রোক্তা| অন্যত্র “অন্যেদ্যুষ্কো দ্ব্যহগ্রাহী তৃতীযকচতুর্থকৌ” ইত্যারভ্য যাবত্ “অনাগতে চিকিত্স্যাস্তে বলকালৌ বিজানতা” ইত্যন্তেন বেগদিনাত্ প্রাগ্ যা চিকিত্সোক্তা সেহোক্তবমনাদিব্যতিরিক্তা জ্ঞেযা| বমনাদযাস্ত্বিহ প্রকোপদিনে ক্রিযমাণাঃ প্রকুপিতস্য দোষস্য কোষ্ঠমাগতস্য সম্যক্ সদ্যোহা ভবন্তীতি কৃত্বা ক্রিযন্তে ইতি জ্ঞেযম্| সান্নং প্রভূতং মদ্যং পীত্বা পুনরুল্লিখেদিতি যোজনা, তথা মদ্যং সান্নং পীত্বা তদহঃ স্বপেদিতি যোজনা| যাপনা মুস্তাদিকা বস্তযো বক্ষ্যমাণাঃ| বৃষদংশো বিডালঃ| বৃষস্যেত্যত্রাপি শকৃদিতি সম্বন্ধঃ| মেদ্যানামিতি মেদুরাণাং, কিংবা মেধ্যানাং পবিত্রাণাম্| বৈব্যাঘ্রীত্যত্র পুংলিঙ্গমেব প্রযোজকং বচনাদুন্নীযতে| সিংহো ব্যাঘ্র এবেতি বদন্তি| ‘অঞ্জু’ ব্যক্তিম্রক্ষণগতিষু, ইতি পাঠান্ম্রক্ষণমাত্রেঽপ্যঞ্জনং স্যাদিত্যত আহ- নেত্রাঞ্জনমিতি| মনোবিকারে উন্মাদেঽপস্মারে চ| ধারণাদিতি চ্ছেদঃ; অগদানাং চ সেবনাদিতি যোজনা||২৯৬-৩০৯||-

দৈবব্যপাশ্রযচিকিত্সামাহ- সোমমিত্যাদি| সহ উমযেতি সোমঃ, তম্| সানুচরমিতি নন্দ্যাদিগণযুক্তম্| সমাতৃগণমিতি সমাতৃসমূহম্| প্রযতঃ পবিত্রঃ| সহস্রমূর্ধনমিতি “সহস্রশীর্ষা” ইত্যাদি বেদপ্রতিপাদিতম্| নামসহস্রেণেত্যাদি মহাভারতোক্তনামসহস্রেণ| ইষ্ট্যেতি যজ্ঞেন||৩০৯-৩১৬||-

শাপেত্যাদিনাঽঽগন্তুজ্বরচিকিত্সামাহ| নশ্যেদিতি প্রশাম্যতীত্যর্থঃ| সানাহ ইতি অভিঘাতজ্বর এব সানাহঃ| ক্ষতানামিতি উরঃক্ষতিনাম্| ক্ষতচিকিত্সযা ব্রণচিকিত্সযা চ ব্রণিনাং জ্বরোঽপৈতীত্যর্থঃ| অযং হ্যুপদ্রবরূপো জ্বরঃ; উপদ্রবশ্চ মূলব্যাধিচিকিত্সযৈব শাম্যতীতি ভাবঃ| বাযোঃ প্রশমনেনেতি কামাদিজ্বরেষু বাতানুবন্ধাদুপপন্নম্| সদ্বাক্যৈরিতি শোভনৈর্বচনৈঃ| কামাদীনাং প্রতিদ্বন্দ্বেন চিকিত্সামাহ- কামাদিত্যাদি||৩১৭-৩২২||-

জ্বরবেগকালচিন্তাজোঽপি জ্বরঃ কামাদিবন্মানসাপচারাদ্ভবতীতি তচ্চিকিত্সামাহ- জ্বরস্যেত্যাদি||৩২৩||-

সম্প্রত্যৌষধমভিধায ‘বিমুঞ্চতি’ ইত্যাদিপ্রশ্নস্যোত্তরমাহ- জ্বরপ্রমোক্ষে ইত্যাদি| লীযত ইতি মুহ্যতি| উষ্ণসর্বাঙ্গঃ শীতসর্বাঙ্গশ্চ ভবত্যপীতি উষ্ণসর্বাঙ্গো বা শীতসর্বাঙ্গো বা ভবতীত্যর্থঃ| সদোষশব্দমিতি সদোষং সশব্দং চ| এতানি চ লক্ষণানি সন্নিপাতজ্বরে এব ভবন্তীতি জ্ঞেযং; নান্যত্র, অদর্শনাদেব| অত এব বদ্দুদোষস্য বলিন ইত্যাদি গ্রন্থং কেচিত্ পঠন্ত্যেবাত্র| এতানি লক্ষণানি জ্বরমোক্ষকালে ক্ষীণেনাপি দোষেণ ক্রিযন্তে, যথানির্বাপ্যতা প্রদীপেনালোকো মহান্ ক্রিযতে||৩২৪-৩২৮||

সম্প্রতি প্রশান্তজ্বরলক্ষণপ্রশ্নস্যোত্তরং- বিগতেত্যাদি| প্রকৃতিসত্ত্বেনেতি সহজসত্ত্বেন||৩২৯||

‘জ্বরাবশিষ্টো রক্ষ্যশ্চ যাবত্কালং যতো যতঃ’ ইতি প্রশ্নস্যোত্তরং- সজ্বর ইত্যাদি| ‘তথা জ্বরঃ শমং যাতি প্রশান্তো জাযতে ন চ’ ইত্যনেন ‘যতঃ’ ইতি প্রশ্নস্য জ্বরমুক্তাসেব্যহেতুপ্রশ্নরূপস্যোত্তরং জ্ঞেযম্| ‘ব্যবাযমতিচেষ্টাশ্চ’ ইত্যত্র ব্যবাযং কৃত্বাঽপি পুনঃ ‘ব্যাযামং চ’ ইত্যাদৌ ব্যবাযপাঠেন ব্যবাযস্যাত্যন্তনিষিদ্ধতোচ্যতে; অন্যে তু প্রমাদপাঠ এবাযমিত্যাহুঃ| স্নানমূর্জস্করমপি প্রভাবাজ্জ্বরং প্রত্যানযতি; যদুক্তমন্যত্র- “স্নানমাশু জ্বরং কুর্যাজ্জ্বরমুক্তস্য দেহিনঃ| তস্মান্মুক্তজ্বরঃ স্নানং বিষবত্ পরিবর্জযেত্” ইতি||৩৩০-৩৩২||

অনন্তরম্ ‘অসঞ্জাতবলো যস্তু’ ইত্যাদি গ্রন্থং কাশ্মীরাঃ পঠন্তি; তে চ প্রকৃত্যাদিসূত্রেঽপ্যস্য গ্রন্থস্যানুগুণং প্রশ্নগ্রন্থং পঠন্তি||৩৩৩-৩৪৩||

উক্তানুক্তচিকিত্সাপরিগ্রহার্থমাহ- তস্যামিত্যাদি||৩৪৪||

জ্বরচিকিত্সাযাং যত্নং কারযিতুমাহ- রোগরাডিত্যাদি||৩৪৫||

যথাক্রমমিতি অধ্যাযার্থসঙ্গ্রহশ্লোকঃ| ভূতানাং হিতকাম্যযেত্যনেন সর্বভূতহিতেযং চিকিত্সেতি দর্শযতি||৩৪৬||

ইতি শ্রীচক্রপাণিদত্তকৃতাযামাযুর্বেদদীপিকাযাং চরকতাত্পর্যটীকাযাং চিকিত্সাস্থানে জ্বরচিকিত্সিতাধ্যাযস্তৃতীযঃ||৩||