Adhikarana ಅಥ ಗುಹ್ಯರೋಗವಿಜ್ಞಾನೀಯೋ ನಾಮಾಷ್ಟತ್ರಿಂಶೋಽಧ್ಯಾಯಃ, ಪ್ರತಿಜ್ಞಾ (೧) · Śloka ೧
ಅಥಾತೋ ಗುಹ್ಯರೋಗವಿಜ್ಞಾನೀಯಂ ನಾಮಾಧ್ಯಾಯಂ ವ್ಯಾಖ್ಯಾಸ್ಯಾಮಃ| ಇತಿ ಹ ಸ್ಮಾಹುರಾತ್ರೇಯಾದಯೋ ಮಹರ್ಷಯಃ||೧||
अथातो गुह्यरोगविज्ञानीयं नामाध्यायं व्याख्यास्यामः| इति ह स्माहुरात्रेयादयो महर्षयः||१||
🔊 Audio coming soon
ಶಶಿಲೇಕ ವ್ಯಾಖ್ಯಾ (ಇನ್ದು ಕೃತ)
ವ್ರಣಶಸ್ತ್ರಪ್ರಸಙ್ಗೇನ ಕ್ಷತಪ್ರಾಯತ್ವಾತ್ ಗುಹ್ಯರೋಗಾಣಾಂ ಹೇತ್ವಾದಿಕಂ ಪ್ರದರ್ಶಯಿತುಮಧ್ಯಾಯ ಆರಭ್ಯತೇ| ಗುಹ್ಯಶಬ್ದೇನೋಪಸ್ಥೋ ಭಣ್ಯತೇ|| ೧||
Adhikarana ಗುಹ್ಯರೋಗಹೇತುಃ (೨) · Śloka ೨
ಸ್ತ್ರೀವ್ಯವಾಯನಿವೃತ್ತಸ್ಯ ಸಹಸಾ ಭಜತೋಽಥವಾ| ದೋಷಾಧ್ಯುಷಿತಸಙ್ಕೀರ್ಣಮಲಿನಾಣುರಜಃ ಪಥಾಮ್| ಅನ್ಯಯೋನಿಮನಿಚ್ಛನ್ತೀಮಗಮ್ಯಾಂ ನವಸೂತಿಕಾಮ್| ದೂಷಿತಂ ಸ್ಪೃಶತಸ್ತೋಯಂ ರತಾನ್ತೇಷ್ವಪಿ ನೈವ ವಾ| ವಿವರ್ಧಯಿಷಯಾ ತೀಕ್ಷ್ಣಾನ್ ಪ್ರಲೇಪಾದೀನ್ ಪ್ರಯಚ್ಛತಃ| ಮುಷ್ಟಿದನ್ತನಖೋತ್ಪೀಡಾವಿಷವಚ್ಛೂಕಪಾತನೈಃ| ವೇಗನಿಗ್ರಹದೀರ್ಘಾತಿಖರಶಷ್ಪವಿಘಟ್ಟನೈಃ| ದೋಷಾ ದುಷ್ಟಾ ಗತಾ ಗುಹ್ಯಂ ತ್ರಯೋವಿಂಶತಿಮಾಮಯಾನ್| ಜನಯನ್ತ್ಯುಪದಂಶಾದೀನ್||೨||
स्त्रीव्यवायनिवृत्तस्य सहसा भजतोऽथवा| दोषाध्युषितसङ्कीर्णमलिनाणुरजः पथाम्| अन्ययोनिमनिच्छन्तीमगम्यां नवसूतिकाम्| दूषितं स्पृशतस्तोयं रतान्तेष्वपि नैव वा| विवर्धयिषया तीक्ष्णान् प्रलेपादीन् प्रयच्छतः| मुष्टिदन्तनखोत्पीडाविषवच्छूकपातनैः| वेगनिग्रहदीर्घातिखरशष्पविघट्टनैः| दोषा दुष्टा गता गुह्यं त्रयोविंशतिमामयान्| जनयन्त्युपदंशादीन्||२||
🔊 Audio coming soon
ಶಶಿಲೇಕ ವ್ಯಾಖ್ಯಾ (ಇನ್ದು ಕೃತ)
ಸ್ತ್ರೀವ್ಯವಾಯನಿವೃತ್ತತ್ವಾದಿಯುಕ್ತಸ್ಯ ಪುರುಷಸ್ಯ ತತ ಏವ ಹೇತೋರ್ಗುಹ್ಯಂ ಗತಾ ವಾತಾದಯೋ ದುಷ್ಟಾಸ್ತ್ರಯೋವಿಂಶತಿಮುಪದಂಶಾದೀನಾಮಯಾನ್ ವ್ಯಾಧೀನ್ ಜನಯನ್ತಿ| ಸ್ತ್ರೀವ್ಯವಾಯೋ ಮೈಥುನಮ್ ಅತಃ ಸಹಸಾ ಯೋ ನಿವೃತ್ತಿಃ ಸಹಸಾ ಸೇವನಞ್ಚ ದೋಷಕೋಪಹೇತುಃ| ಅಥವಾ ದೋಷಾಧ್ಯುತತ್ವಾದಿಗುಣರಜಃ ಪಥಾಮನ್ಯಯೋನಾದಿಕಾಂ ವಾ ಸ್ತ್ರಿಯಂ ಭಜತಃ| ದೋಷೈರ್ವಾತಾದಿಭಿರಧ್ಯುಷಿತಮಧಿಷ್ಠಿತಂ ಸಙ್ಕೀರ್ಣಞ್ಚ ಮಲಿನಂ ಚಾಣು ಚ ರಜಃ ಪಥಂ ಯೋನಿದ್ವಾರಂ ಯಸ್ಯಾಸ್ತಾಮ್| ಸಙ್ಕೀರ್ಣಂ ಕೇನಚಿತ್ ಬೀಭಾತ್ಸೇನ ಮಿಶ್ರಿತಮ್| ಮಲಿನಂ ಶೌಚಾದ್ಯಭಾವೇನ ಮಲಯುಕ್ತಮ್| ಅಣು ಸಂವ್ ಋತಮ್| ಅನ್ಯಯೋನಿರ್ವಿಜಾತೀಯವಡವಾಗವಾದಿಸ್ತಾಮ್| ಅನಿಚ್ಛನ್ತೀ ಯಾ ಮೈಥುನದ್ವೇಷೇಣಾಙ್ಗಸಙ್ಕೋಚನಪರಾ| ಅಗಮ್ಯಾ ಭಗಿನ್ಯಾದಿಃ| ತಥಾ ರತಾನ್ತೇಷು ದೂಷಿತಂ ಪಙ್ಕಾದ್ಯಾವಿಲಂ ತೋಯಂ ಸ್ಪೃಶತಸ್ತೇನ ಶೌಚಂ ಕುರ್ವತಃ ಅಪಿ ವಾ ನೈವ ಸ್ಪೃಶತಃ ಶೌಚಾದಿಕಂ ನೈವ ಕುರ್ವತಃ| ತಥಾ ವಿವರ್ಧಯಿಷಯಾ ಶೋಫಂ ವರ್ಧಯಿತುಮಿಚ್ಛಯಾ ತತ್ರೈವ ತೀಕ್ಷ್ಣಾನ್ ಪ್ರಲೇಪಸೇಕಾದೀನ್ ಪ್ರಯಚ್ಛತೋ ದದತಃ| ಮುಷ್ಟ್ಯಾದೀನಾಮುತ್ಪೀಡನಯಾ| ವಿಷವತಾಂ ಶೂಕಾನಾಂ ಪಾತನೈಃ| ವೇಗನಿಗ್ರಹಃ ಶುಕ್ರಾದಿವೇಗಧಾರಣಮ್| ದೀರ್ಘಣಾತಿಖರೇಣ ಚ ಶಷ್ಪೇಣ ತೃಣೇನ ವಿಘಟ್ಟನಂ ಕ್ಷೋದನಮ್| 'ಗುಹ್ಯರೋಮ ಶಷ್ಪಮಿ'ತಿ ಜೇಜ್ಜಟಃ| (ಸ್ತ್ರೀಂ ವ್ಯವಾಯನಿವೃತ್ತಸ್ಯೇತಿ ಪಾಠಃ| ವೇಗನಿಗ್ರಹದೀರ್ಘಾತಿಖರಸ್ಪರ್ಶವಿಘಟ್ಟನೈರಿತಿ ಚ| ವ್ಯಾವಾಯನಿವೃತ್ತಸ್ಯ ಚಿರಕಾಲೋಪೇಕ್ಷಿತಮೈಥುನಸ್ಯ ನರಸ್ಯ ಪುನಃ ಸಹಸಾ ಅತರ್ಕಿತಮೇವ ಸ್ತ್ರೀಂ ನಾರೀಂ ಭಜತಃ ಸೇವಮಾನಸ್ಯ| ಅಥವೇತಿ ವಿಕಲ್ಪೇ| ಸಙ್ಕೀರ್ಣಃ ಪ್ರಸವವೈಷಮ್ಯಾದಿನಾ ಗುದಬಸ್ತಿಭ್ಯಾಮೇಕೀಭೂತಃ| ಅಥವಾ ರಜಃ-ಶಬ್ದೋಽಪಿ ದೋಷಾಧ್ಯುಷಿತಾದಿವದ್ ಗುಣವಚನಃ, ತಥಾ ಸತಿ ತಜಃಪಥಾಂ ರಜೋಯುಕ್ತಯೋನಿಮಾರ್ಗಾಂ ರಜಸ್ವಲಾಸೂತಿಕಾದಿಮಿತ್ಯರ್ಥಃ| ಅಸ್ಮಿನ್ ಪಕ್ಷೇ ದೋಷಾಧ್ಯುಷಿತಾದಿಭಿಃ ಪಥಶಬ್ದೋಽಭಿಸಮ್ಬಧ್ಯಃ| ಅಗಮ್ಯಾಂ ಭಗಿನ್ಯಾದಿಕಾನ್ತಥಾ ಸತ್ಯನ್ಯಜನಜ್ಞಾನಶಙ್ಕಾಜುಗುಪ್ಸಾದಿಜನಿತವೈಕ್ಲವ್ಯದೂನೇ ಹೃದಿ ಕ್ರುದ್ಧಾ ದೋಷಾಸ್ತದ್ಗತೇನ ಮನಸಾ ಸಹ ಗುಹ್ಯಂ ಪ್ರಾಪ್ತಾಸ್ತತ್ರ ರೋಗಾನ್ ಜನಯನ್ತೀತ್ಯರ್ಥಃ| ಶ್ರುತಿಸ್ಮೃತಿವಿರುದ್ಧಾಚಾರತಶ್ಚ| ಮುಷ್ಟ್ಯುತ್ಪೀಡನಾದಯಃ ಕಾಮಸೂತ್ರವಿಹಿತಕರಣ ಭೇದಜನಿತಾಃ| ಊಷರಜಲೇಷು ಬಾಹುಲ್ಯೇನ ದೃಶ್ಯಮಾನೋ ಜನ್ತುತುಲ್ಯಾಕೃತಿಃ ಕಶ್ಚಿದೋಷಧಿವಿಶೇಷಃ ಶೂಕಃ| ತೇ ಚ ಶೂಕಾಃ ಸವಿಷನಿರ್ವಿಷಭೇದಾತ್ ದ್ವಿಧಾ ತತ್ರ ವಿಷವನ್ತೋ ರೋಗಕಾರಿಣಃ| ತದುಕ್ತಮ್- ಕೃಷ್ಣಾನಿ ಚಿತ್ರಾಣ್ಯಥವಾ ಶೂಕಾನಿ ಸವಿಷಾಣಿ ತು| ಪಾತಿತಾನಿ ಪಚನ್ತ್ಯಾಶು ಮೇಢ್ರಂ ನಿರವಶೇಷತಃ|| ಇತಿ| ಅಥವಾ ವಿಷದ್ರವ್ಯಕಲ್ಪಿತಾನಾಂ ವಚ್ಛೂಕಾನಾಂ ವಶ್ಯೌಷಧಾನಾಂ ಪಾತನಾತ್| ವೇಗನಿಗ್ರಹದೀರ್ಘಾತಿಖರಸ್ಪರ್ಶವಿಘಾಟ್ಟನಾತ್ ವೇಗನಿಗ್ರಹಾಚ್ಛುಕ್ರಾದಿವೇಗಧಾರಣಾತ್| ತಥಾ ದೀರ್ಘಾಣಾಮತಿಖರಣಾಞ್ಚ ಸ್ಪರ್ಶಾನಾಂ ವಿಘಟ್ಟನಾದಾಸ್ಫಾಲನಾತ್| ಸ್ಪರ್ಶಮಿತಿ ಕಾಮಾತಪತ್ರಸಂಜ್ಞಿತಸ್ತ್ವಗ್ವಿಶೇಷಃ| ತಸ್ಯ ಚ ಬಹುರೂಪತಾ ವಿದ್ಯತೇ ತತ್ಕಾಮಶಾಸ್ತ್ರಾದವಗನ್ತವ್ಯಮ್)|| ೨||
Adhikarana ಅಪದಂಶಾನಾಂ ಸಙ್ಖ್ಯಾಸಮ್ಪ್ರಾಪ್ತಿಃ (೩) · Śloka ೩
ಅಪದಂಶೋಽತ್ರ ಪಞ್ಚಧಾ| ಪೃಥಗ್ದೋಷೈಃ ಸರುಧಿರೈಃ ಸಮಸ್ತೈಶ್ಚ||೩||
अपदंशोऽत्र पञ्चधा| पृथग्दोषैः सरुधिरैः समस्तैश्च||३||
🔊 Audio coming soon
ಶಶಿಲೇಕ ವ್ಯಾಖ್ಯಾ (ಇನ್ದು ಕೃತ)
ಅತ್ರೈಷಾಂ ತ್ರಯೋವಿಂಶತೇರ್ಮಧ್ಯೇ ವಾತೇನ ಪಿತ್ತೇನ ಶ್ಲೇಷ್ಮಣಾ ರಕ್ತೇನ ಸನ್ನಿಪಾತೇನೇತಿ ಪಞ್ಚಧಾ ಅಪದಂಶಾಃ|| ೩||
Adhikarana ವಾತಜಾಪದಂಶಃ (೪) · Śloka ೪
ಅತ್ರ ಮಾರುತಾತ್| ಮೇಢಶೋಫೋ ರುಜಶ್ಚಿತ್ರಾಃ ಸ್ತಮ್ಭಸ್ತ್ವಕ್ಪರಿಪೋಟನಮ್||೪||
अत्र मारुतात्| मेढशोफो रुजश्चित्राः स्तम्भस्त्वक्परिपोटनम्||४||
🔊 Audio coming soon
ಶಶಿಲೇಕ ವ್ಯಾಖ್ಯಾ (ಇನ್ದು ಕೃತ)
ತ್ವಕ್ಪರಿಪೋಟನಾನ್ತಂ ವಾತೇನೋಪದಂಶೇ ಲಕ್ಷಣಮ್| (ಅತ್ರ ಪಞ್ಚಾನಾಂ ಮಧ್ಯೇ ವಾತೇನಾಪದಂಶೇ ಲಿಙ್ಗೇ ಶೋಫೋ ನಾನಾಪ್ರಕಾರರುಜಃ ಸ್ತಬ್ಧತಾ ತ್ವಚೋಭೇದನಂ ಚ ಸ್ಯಾತ್)|| ೪||
Adhikarana ಪಿತ್ತಜಾಪದಂಶಃ (೫) · Śloka ೫
ಪಕ್ವೋದುಮ್ಬರಸಙ್ಕಾಶಂ ಪಿತ್ತೇನ ಶ್ವಯಥುರ್ಜ್ವರಃ||೫||
पक्वोदुम्बरसङ्काशं पित्तेन श्वयथुर्ज्वरः||५||
🔊 Audio coming soon
ಶಶಿಲೇಕ ವ್ಯಾಖ್ಯಾ (ಇನ್ದು ಕೃತ)
ಜ್ವರಾನ್ತಂ ಪಿತ್ತೇನ| ಪಿತ್ತಜೇ ಅಪದಂಶೇ ಪಕ್ವೋದುಮ್ಬರಸಙ್ಕಾಶಃ ಶೋಫೋ ಜ್ವರಶ್ಚ ಸ್ಯಾತ್|| ೫||
Adhikarana ಶ್ಲೇಷ್ಮಜಾಪದಂಶಃ (೬) · Śloka ೭
ಶ್ಲೇಷ್ಮಣಾ ಕಠಿನಃ ಸ್ನಿಗ್ಧಃ ಕಣ್ಡೂಮಾಞ್ಛೀತಲೋ ಗುರುಃ||೬|| `|೭|
श्लेष्मणा कठिनः स्निग्धः कण्डूमाञ्छीतलो गुरुः||६|| `|७|
🔊 Audio coming soon
ಶಶಿಲೇಕ ವ್ಯಾಖ್ಯಾ (ಇನ್ದು ಕೃತ)
ಗುರ್ವನ್ತಂ ಶ್ಲೇಷ್ಮಣಾ| ಕಠಿನ ಇತ್ಯಾದ್ಯನನ್ತರಪ್ರಕೃತಸ್ಯ ಶ್ವಯಥೋರ್ವಿಶೇಷಣಮ್| (ವಿಶೇಷಣಸಾಮರ್ಥ್ಯಾಚ್ಛ್ವಯಥುರೇವಾತ್ರ ವಿಶೇಷ್ಯಃ| ಶ್ಲೇಷ್ಮ ಕೃತೇ ಅಪದಂಶೇ ಕಾಠಿನ್ಯಯುಕ್ತಃ ಸ್ನೇಹಲೇಪಪ್ರತೀತಿಕರಃ ಕಣ್ಡೂಸಹಿತಃ ಶೀತಸ್ಪರ್ಶಶ್ಚ ಶೋಫೋ ಜಾಯತೇ)|| ೬||
Adhikarana ರಕ್ತಜಾಪಂದಶಃ (೭) · Śloka ೭
ಶೋಣಿತೇನಾಸಿತಸ್ಫೋಟಸಮ್ಭವೋಽಸ್ರಶ್ರುತಿರ್ಜ್ವರಃ||೭||
शोणितेनासितस्फोटसम्भवोऽस्रश्रुतिर्ज्वरः||७||
🔊 Audio coming soon
ಶಶಿಲೇಕ ವ್ಯಾಖ್ಯಾ (ಇನ್ದು ಕೃತ)
ಜ್ವರಾನ್ತಂ ರಕ್ತೇನ| ರಕ್ತಕೃತೇ ಅಪದಂಶೇ ಕೃಷ್ಣವರ್ಣಾನಾಂ ಸ್ಫೋಟಾನಾಮುತ್ಪತ್ತಿರಸ್ರಸ್ರಾವೋ ಜ್ವರಶ್ಚ ಸ್ಯಾತ್|| ೭||
Adhikarana ಸನ್ನಿಪಾತಜಾಪದಂಶಃ (೮) · Śloka ೮
ಸರ್ವಜೇ ಸರ್ವಲಿಙ್ಗತ್ವಂ ಶ್ವಯಥುರ್ಮುಷ್ಕಯೋರಪಿ| ತೀವ್ರಾ ರುಗಾಶು ಪಚನಂ ದರಣಂ ಕೃಮಿಸಮ್ಭವಃ||೮||
सर्वजे सर्वलिङ्गत्वं श्वयथुर्मुष्कयोरपि| तीव्रा रुगाशु पचनं दरणं कृमिसम्भवः||८||
🔊 Audio coming soon
ಶಶಿಲೇಕ ವ್ಯಾಖ್ಯಾ (ಇನ್ದು ಕೃತ)
ಕೃಮಿಸಮ್ಭವಾನ್ತಂ ಸನ್ನಿಪಾತೇನ| ಸರಕ್ತಸನ್ನಿಪಾತಜೇ ಅಪದಂಶೇ ಸರ್ವಲಿಙ್ಗತ್ವಂ ವಾತಾದ್ಯಪದಂಶಾನಾಂ ಪ್ರತ್ಯೇಕೋಕ್ತಲಕ್ಷಣನಿಚಯಸಮ್ಭವಃ| ತಥಾ ವೃಷಣಯೋರಪಿ ಶೋಫಃ| ಅಪಿಶಬ್ದೇನಾನ್ಯತ್ರಾಪಿ| ಮೇಢ್ರಮಾತ್ರೇ ಶೋಫೋದ್ಭವಂ ಸೂಚಿತಮ್| ರಕ್ತಾಪದಂಶೇಽಪಿ ಶೋಫ ಉಕ್ತಃ| ತೀವ್ರಾ ಅತ್ಯರ್ಥಮಸಹನೀಯಾ ರುಕ್ಪೀಡಾವಿಶೇಷಃ| ಆಶುಪಚನಂ ದ್ವಿತ್ರಿದಿನೈರೇವ ಪಾಕಃ| ಆಶುಶಬ್ದೋಕ್ತ್ಯಾ ಪೂರ್ವೇಷಾಂ ಕ್ರಮೇಣ ಪಾಕಃ ಸೂಚಿತಃ| ದರಣಂ ಭೇದನಮ್| ಕೃಮಿಸಮ್ಭವಃ ಅನ್ತಃ ಸ್ವಯಮೇವ ಜನ್ತೂನಾಮುದ್ಭವಃ)|| ೮||
Adhikarana ಅಪದಂಶಾನಾಂ ಸಾಧ್ಯಾಸಾಧ್ಯತಾ (೯) · Śloka ೯
ಯಾಪ್ಯೋ ರಕ್ತೋದ್ಭವಸ್ತೇಷಾಂ ಮೃತ್ಯವೇ ಸನ್ನಿಪಾತಜಃ||೯||
याप्यो रक्तोद्भवस्तेषां मृत्यवे सन्निपातजः||९||
🔊 Audio coming soon
ಶಶಿಲೇಕ ವ್ಯಾಖ್ಯಾ (ಇನ್ದು ಕೃತ)
ತೇಷಾಂ ಪಞ್ಚಾನಾಮಪದಂಶಾನಾಂ ಮಧ್ಯೇ ರಕ್ತಾಪದಂಶೋ ಯಾಪ್ಯಃ| ಸನ್ನಿಪಾತಜಸ್ತು ಮೃತ್ಯವೇ ಭವತಿ|| ೯||
Adhikarana ಅರ್ಶಾಂಸಿ (೧೦) · Śloka ೧೦
ಜಾಯನ್ತೇ ಕುಪಿತೈರ್ದೋಷೈರ್ಗುಹ್ಯಾಸೃಕ್ಪಿಶಿತಾಶ್ರಯೈಃ| ಅನ್ತರ್ಬಹಿರ್ವಾ ಮೇಢ್ರಸ್ಯ ಕಣ್ಡೂಲಾ ಮಾಂಸಕೀಲಕಾಃ| ಪಿಚ್ಛಿಲಾಸ್ರಸ್ರವಾ ಯೋನೌ ತದ್ವಚ್ಚ ಛತ್ರಸನ್ನಿಭಾಃ| ತೇಽರ್ಶಾಂಸ್ಯುಪೇಕ್ಷ್ಯಾ ಘ್ನನ್ತಿ ಮೇಢ್ರಪುಂಸ್ತ್ವಭಗಾರ್ತವಮ್||೧೦||
जायन्ते कुपितैर्दोषैर्गुह्यासृक्पिशिताश्रयैः| अन्तर्बहिर्वा मेढ्रस्य कण्डूला मांसकीलकाः| पिच्छिलास्रस्रवा योनौ तद्वच्च छत्रसन्निभाः| तेऽर्शांस्युपेक्ष्या घ्नन्ति मेढ्रपुंस्त्वभगार्तवम्||१०||
🔊 Audio coming soon
ಶಶಿಲೇಕ ವ್ಯಾಖ್ಯಾ (ಇನ್ದು ಕೃತ)
ಗುಹ್ಯೇ ಯದಸೃಗ್ರಕ್ತಂ ಪಿಶಿತಂ ಮಾಂಸಞ್ಚ ತತ್ರೋಕ್ತಾತ್ಕಾರಣಾತ್ ಕುಪಿತೈರ್ದೋಷೈರ್ಮೇಢ್ರಸ್ಯಾನ್ತರ್ವಾ ಬಹಿರ್ವಾ ಕಣ್ಡೂಲಾಃ ಪಿಚ್ಛಿಲಾಸ್ರಸ್ರವಾಶ್ಚ ಮಾಂಸಕೀಲಕಾ ಜಾಯನ್ತೇ| ತೇ ಅನೇನೈವ ಪ್ರಕಾರೇಣ ಸ್ತ್ರಿಯಾ ಅಪಿ ಯೋನೌ ಛತ್ತಾಕೃತಯೋ ಮಾಂಸಕೀಲಕಾ ಜಾಯನ್ತೇ ನಾಮ್ನಾ ಅರ್ಶಾಂಸಿ| ತೇ ಚ ಪುರುಷೇ ಜಾತಾ ಉಪೇಕ್ಷಿತಾಃ ಸನ್ತೋ ಮೇಢ್ರಂ ಪುಂಸ್ತ್ವಂ ಚ ನಾಶಯನ್ತಿ| ಸ್ತ್ರಿಯಾಸ್ತದ್ವದ್ಭಗಮಾರ್ತವಂ ಚ| ಲಾಘವಾರ್ಥಮತ್ರ ಯೋನಿರೋಗ ಉಕ್ತಃ| (ಕುಪಿತೈರ್ಯಯೋಕ್ತೇನ ಕಾರಣಜಾತೇನ ಕ್ರುದ್ಧೈರ್ಗುಹ್ಯಾಸೃಕ್ಪಿಶಿತಾಶ್ರಯೈಃ ಗುಹ್ಯಗತಮಸೃಕ್ಪಿಶಿತಞ್ಚಾಶ್ರಯೋ ಯೇಷಾಂ ತೈಃ ಮೇಢ್ರಸ್ಯಾನ್ತರ್ಭಾಗೇ ಬಹಿರ್ಭಾಗೇ ವಾ ಕಣ್ಡೂಲಾಃ ಕಣ್ಡೂಯುಕ್ತಾಃ ಪಿಚ್ಛಿಲಾಸ್ರಸ್ರವಾಃ ಪೈಚ್ಛಿಲ್ಯಯುಕ್ತಂ ರಕ್ತಂ ಸ್ರವನ್ತಃ ಮಾಂಸಕೀಲಕಾ ಕೀಲಕಾಕಾರಾ ಮಾಂಸಾಙ್ಕುರಾಃ ಜಾಯನ್ತೇ| ಯೋನೌ ಚ ಸ್ತ್ರೀಣಾಂ ಗುಹ್ಯೇಽಪಿ ತದ್ವತ್ ಯೋನಿವ್ಯಾಪದುಕ್ತಕಾರಣದುಷ್ಟೈರ್ದೋಷೈರನ್ತರ್ಬಹಿರ್ವಾ ಕಣ್ಡ್ವಾದಿಯುಕ್ತಾ ಮಾಂಸಕೀಲಕಾ ಜಾಯನ್ತೇ| ತತ್ರ ತ್ವಯಂ ವಿಶೇಷಃ ತೇ ಛತ್ರಸನ್ನಿಭಾಃ ಛತ್ರತುಲ್ಯಾಕಾರಾಃ ಕೃಶ ಮೂಲಾಃ ಸ್ಥೂಲಾಗ್ರಾಶ್ಚ ಭವನ್ತಿ| ಮೇಢ್ರಜಾ ಮಾಂಸಕೀಲಕಾಃ ಯೋನಿಜಾಶ್ಚರ್ಶಾಂಸೀತಿ ಕಥ್ಯನ್ತೇ| ಉಪೇಕ್ಷಯಾ ತು ಪುನಃ ಮೇಢ್ರಪುಂಸ್ತ್ವಭಗಾರ್ತವಂ, ಮೇಢ್ರೇ ಚೇನ್ಮೇಢ್ರಮ್| ಪುಂಸ್ತ್ವಂ ಸ್ತ್ರೀಗಮನಸಾಮರ್ಥ್ಯಂ ಶುಕ್ರಂ ವಾ| ತಥಾ ಭಗೇ ಚೇತ್ ಭಗಮೃತುತ್ವಯೋಗ್ಯಂ ಆರ್ತವಂ ರಕ್ತಂ ಚ ಘ್ನನ್ತಿ| ಪುಂರೋಗಾಣಾಂ ಮಧ್ಯೇ ಸ್ತ್ರೀರೋಗಕಥನಂ ಕಾರಣಾದಿಸಾಮ್ಯೇನ ಲಾಘವಾತ್)|| ೧೦||
Adhikarana ಸರ್ಷಪಿಕಾಃ (೧೧) · Śloka ೧೧
ಗುಹ್ಯಸ್ಯ ಬಹಿರನ್ತರ್ವಾ ಪಿಟಕಾಃ ಕಫರಕ್ತಜಾಃ| ಸರ್ಷಪಾಮಾನಸಂಸ್ಥಾನಾ ಘನಾಃ ಸರ್ಷಪಿಕಾಃ ಸ್ಮೃತಾಃ||೧೧||
गुह्यस्य बहिरन्तर्वा पिटकाः कफरक्तजाः| सर्षपामानसंस्थाना घनाः सर्षपिकाः स्मृताः||११||
🔊 Audio coming soon
ಶಶಿಲೇಕ ವ್ಯಾಖ್ಯಾ (ಇನ್ದು ಕೃತ)
ಕಫರಕ್ತಾಭ್ಯಾಂ ಗುಹ್ಯಸ್ಯ ಬಹಿರನ್ತರ್ವಾ ಸರ್ವತ್ರ ವಾ ಸರ್ಷಪತುಲ್ಯಪ್ರಮಾಣಸಂಸ್ಥಾನಾ ಘನಾಃ ಸಂಹತಾಃ ಪಿಟಕಾ ಭವನ್ತಿ ತಾ ನಾಮ್ನಾ ಸರ್ಷಪಿಕಾ ಸ್ಮೃತಾಃ| (ಗುಹ್ಯಸ್ಯ ಮೇಢ್ರಸ್ಯ ಗುಹ್ಯಶಬ್ದೋಕ್ತ್ಯಾ ಯೋನೇರಪಿ ಬಹಿರನ್ತಃ ಬಹಿರ್ಭಾಗೇಽನ್ತರ್ಭಾಗೇ ವಾ ಕಫರಕ್ತಜಾಃ ಶ್ಲೇಷ್ಮರಕ್ತಸಂಸರ್ಗನಿಮಿತ್ತಾಃ ಸರ್ಷಪಾಮಾನಸಂಸ್ಥಾನಾಃ ಮಾನಸಸ್ಥಾನಾಭ್ಯಾಂ ಸರ್ಷಪತುಲ್ಯಾಃ ಘನಾ ನಿರನ್ತರನಿಚಿತಾಃ ಪಿಟಕಾಃ ಸರ್ಷಪಿಕಾಸಂಜ್ಞೋ ಗುಹ್ಯತೋಗಃ)|| ೧೧||
Adhikarana ಅವಮನ್ಥಃ (೧೨) · Śloka ೧೨
ಪಿಟಕಾ ಬಹವೋ ದೀರ್ಘಾ ದೀರ್ಯನ್ತೇ ಮಧ್ಯತಶ್ಚ ಯಾಃ| ಸೋಽವಮನ್ಥಃ ಕಫಾಸೃಗ್ಭ್ಯಾಂ ವೇದನಾರೋಮಹರ್ಷವಾನ್||೧೨||
पिटका बहवो दीर्घा दीर्यन्ते मध्यतश्च याः| सोऽवमन्थः कफासृग्भ्यां वेदनारोमहर्षवान्||१२||
🔊 Audio coming soon
ಶಶಿಲೇಕ ವ್ಯಾಖ್ಯಾ (ಇನ್ದು ಕೃತ)
ಗುಹ್ಯೇ ಯಾಃ ಪಿಟಕಾ ಬಹವೋ ದೀರ್ಘಾ ಮಧ್ಯತಶ್ಚ ದೀರ್ಯನ್ತೇ ಸ ರೋಗೋ ನಾಮ್ನಾಽವಮನ್ಥಃ| ಸ ಚ ಕಫವಾತಾಭ್ಯಾಂ ಭವತಿ| ವೇದನಾರೋಮಹರ್ಷವಾಂಶ್ಚ ಭವತಿ| (ಕಫಾಸೃಗ್ಭ್ಯಾಂ ಕಫೇನಾಸೃಜಾ ಚ ಸಂಸೃಷ್ಟಾಭ್ಯಾಂ ಜಾತಾಃ ಬಹವೋ ಬಹುಸಙ್ಖ್ಯಾಃ ದೀರ್ಘಾ ಆಯಾಮಯುಕ್ತಾಃ ಯಾ ಪಿಟಕಾ ಮಧ್ಯತೋ ಮಧ್ಯಪ್ರದೇಶೇ ದೀರ್ಯನ್ತೇ ವಿದೀರ್ಣಾ ಭವನ್ತಿ| ವೇದನಾರೋಮಹರ್ಷವಾನ್ ವೇದನಯಾ ರೋಮಹರ್ಷೇಣ ಚ ಯುಕ್ತಃ ಸ ರೋಗೋಽವಮನ್ಥಾಖ್ಯಃ)|| ೧೨||
Adhikarana ಕುಮ್ಭೀಕಾ (೧೩) · Śloka ೧೩
ಕುಮ್ಭೀಕಾ ರಕ್ತಪಿತ್ತೋತ್ಥಾ ಜಾಮ್ಬವಾಸ್ಥಿನಿಭಾಽಶುಜಾಃ||೧೩||
कुम्भीका रक्तपित्तोत्था जाम्बवास्थिनिभाऽशुजाः||१३||
🔊 Audio coming soon
ಶಶಿಲೇಕ ವ್ಯಾಖ್ಯಾ (ಇನ್ದು ಕೃತ)
ರಕ್ತಪಿತ್ತಹೇತುರ್ಜಾಮ್ಬವಾಸ್ಥಿಮಸದೃಶಾ ಕ್ಷಿಪ್ರಜಾ ಯಾ ಪಿಟಕಾ ಸಾ ನಾಮ್ನಾ ಕುಮ್ಭೀಕಾ| (ರಕ್ತಪಿತ್ತಾಭ್ಯಾಂ ಜಾತಾ ಜಾಮ್ಬವಬೀಜಾಸ್ಥಿಸದೃಶಾ ಆಶುಜಾ ಅತಿವೇಗೇನೋತ್ಥಿತಾ ಪಿಟಕಾ ಕುಮ್ಭೀಕಾ ತತ್ಸಂಜ್ಞೋ ಗುಹ್ಯರೋಗಃ)|| ೧೩||
Adhikarana ಅಲಜೀ (೧೪) · Śloka ೧೪
ಅಲಜೀಂ ಮೇಹವದ್ವಿದ್ಯಾತ್||೧೪||
अलजीं मेहवद्विद्यात्||१४||
🔊 Audio coming soon
ಶಶಿಲೇಕ ವ್ಯಾಖ್ಯಾ (ಇನ್ದು ಕೃತ)
ಅಲಜ್ಯಾಖ್ಯಾಂ ಗುಹ್ಯಪಿಟಕಾಂ ಮೇಹವಚ್ಛಾರಾವಿಕಾದಿಪಠಿತಾಲಜೀವಲ್ಲಕ್ಷಣೈರ್ವಿದ್ಯಾತ್|| ೧೪||
Adhikarana ಉತ್ತಮಾ (೧೫) · Śloka ೧೫
ಉತ್ತಮಾಂ ರಕ್ತಪಿತ್ತಜಾಮ್| ಪಿಟಕಾಂ ಮಾಷಮುದ್ಗಾಭಾಮ್||೧೫||
उत्तमां रक्तपित्तजाम्| पिटकां माषमुद्गाभाम्||१५||
🔊 Audio coming soon
ಶಶಿಲೇಕ ವ್ಯಾಖ್ಯಾ (ಇನ್ದು ಕೃತ)
ಪಿತ್ತರಕ್ತಜಾಂ ಮಾಷಮುದ್ಗಸದೃಶಾಂ ಪಿಟಕಾಂ ನಾಮ್ನೋತ್ತಮಾಂ ವಿದ್ಯಾತ್| (ಉತ್ತಪಾಮಿತಿ ಪಾಠಃ| ಪಿತ್ತರಕ್ತಕಾರಣಜನಿತಾಂ ಸಂಸ್ಥಾನಮಾನಾಭ್ಯಾಂ ಮಾಷೇಣ ಮುದ್ಗೇನ ವಾ ತುಲ್ಯಾಂ ಪಿಟಕಾಮುತ್ತಮಾಖ್ಯಂ ಕ್ಷುದ್ರರೋಗಂ ವಿದ್ಯಾತ್)|| ೧೫||
Adhikarana ಪುಷ್ಕರಿಕಾ (೧೬) · Śloka ೧೬
ಪಿಟಕಾ ಪಿಟಕಾಚಿತಾ| ಕರ್ಣಿಕಾ ಪುಷ್ಕರಸ್ಯೇವ ಜ್ಞೇಯಾ ಪುಷ್ಕರಿಕೇತಿ ಸಾ||೧೬||
पिटका पिटकाचिता| कर्णिका पुष्करस्येव ज्ञेया पुष्करिकेति सा||१६||
🔊 Audio coming soon
ಶಶಿಲೇಕ ವ್ಯಾಖ್ಯಾ (ಇನ್ದು ಕೃತ)
ಪುಷ್ಕರಸ್ಯ ಪದ್ಮಸ್ಯ ಕರ್ಣಿಕೇವ ಯಾ ಪಿಟಕಾ ಅನ್ಯಾಭಿರ್ವಹ್ನೀಭಿಃ ಪಿಟಕಾಭಿರಾಚಿತಾ ಸಾ ನಾಮ್ನಾ ಪುಷ್ಕರಿಕೇತಿ ಜ್ಞೇಯಾ| (ಪಿತ್ತರಕ್ತಾಭ್ಯಾಮೇವ ಪದ್ಮಕರ್ಣಿಕಾ ತುಲ್ಯಾ ತಥಾ ಪಿಟಕೈರಾಚಿತಾ ಸ್ವಯಮಪ್ಯಣುಭಿಃ ಪಿಟಕಾಭಿರ್ವ್ಯಾಪ್ತೇತ್ಯರ್ಥಃ)|| ೧೬||
Adhikarana ಸಂವ್ಯೂಢಪಿಟಕಾ (೧೭) · Śloka ೧೭
ಪಾಣಿಭ್ಯಾಂ ಭೃಶಸಂವ್ಯೂಢೇ ಸಂವ್ಯೂಢಪಿಟಕಾ ಭವೇತ್||೧೭||
पाणिभ्यां भृशसंव्यूढे संव्यूढपिटका भवेत्||१७||
🔊 Audio coming soon
ಶಶಿಲೇಕ ವ್ಯಾಖ್ಯಾ (ಇನ್ದು ಕೃತ)
ಸಂವ್ಯೂಢಖ್ಯೇ ರಾಗೇ ಮೇಢ್ರೇ ಭೃಶಸಂವ್ಯೂಢೇ ವಿಮರ್ದಿತೇ ಪಿಟಕಾ ಭವೇತ್| (ಹಸ್ತಾಭ್ಯಾಮತಿಶಯೇನ ಸಂವ್ಯೂಢೇ ಸಂವಾಹಿತೇ ಮರ್ದಿತ ಇತಿ ಯಾವತ್ ಮೇಢ್ರ ಇತ್ಯರ್ಥಾತ್| ಸಂವ್ಯೂಢಪಿಟಕಾ ತತ್ಸಂಜ್ಞೋ ಗುಹ್ಯರೋಗೋ ಭವೇತ್| ಅತ್ರಾಪಿ ಪಿತ್ತರಕ್ತಾಭ್ಯಾಮಿತ್ಯೂಹ್ಯಮ್)|| ೧೭||
Adhikarana ಮೃದಿತಮ್ (೧೮) · Śloka ೧೮
ಮೃದಿತಂ ಮೃದಿತಂ ವಸ್ತು ಸಂರಬ್ಧಂ ವಾತಕೋಪತಃ||೧೮||
मृदितं मृदितं वस्तु संरब्धं वातकोपतः||१८||
🔊 Audio coming soon
ಶಶಿಲೇಕ ವ್ಯಾಖ್ಯಾ (ಇನ್ದು ಕೃತ)
ವಸ್ತು ಮೇಢ್ರಾಖ್ಯಂ ಮೃದಿತಂ ಸದ್ವಾತಕೋಪಾತ್ ಸಂರಬ್ಧಂ ಭವತಿ ಸ ನಾಮ್ನಾ ಮೃದಿತಮ್| (ಹರ್ಷಣಾರ್ಥಂ ಹಸ್ತಾಭ್ಯಾಂ ಮರ್ದಿತಂ ಯದ್ವಸ್ತು ಮೇಢ್ರಾಖ್ಯಂ ತದ್ವಾತಕೋಪತಃ ಮರ್ದನಸ್ಯೈವಾತಿಯೋಗಾತ್ ಕಾರಣಾನ್ತರಾದ್ವಾ ಕುಪಿತಾದ್ವಾತಾತ್ಸಂರಬ್ಧಂ ಹೃಷ್ಟಮೇವ ಸದಾ ವರ್ತತೇ ಚೇನ್ಮೃದಿತಂ ಮೃದಿತಾಖ್ಯೋ ಗುಹ್ಯರೋಗಃ|| ೧೮||
Adhikarana ಅಷ್ಠೀಲಿಕಾ (೧೯) · Śloka ೧೯
ವಿಷಮಾ ಕಠಿನಾ ಭುಗ್ನಾ ವಾಯುನಾಷ್ಠೀಲಿಕಾ ಸ್ಮೃತಾ||೧೯||
विषमा कठिना भुग्ना वायुनाष्ठीलिका स्मृता||१९||
🔊 Audio coming soon
ಶಶಿಲೇಕ ವ್ಯಾಖ್ಯಾ (ಇನ್ದು ಕೃತ)
ಯಾ ವಿಷಮತ್ವಾದಿಗುಣಾ ಪಿಟಕಾ ವಾಯುನಾ ಭವತಿ ಸಾ ನಾಮ್ನಾಽಷ್ಠೀಲಿಕಾ ಸ್ಮೃತಾ| (ಕುಪಿತೇನ ವಾಯುನಾ ವಿಷಮಾ ಕ್ವಚಿನ್ನಿಮ್ನಾ ಕ್ವಚಿದುನ್ನತಾ ಕಠಿನಾ ಪ್ರಾಯೇಣ ಕಾಠಿನ್ಯುಕ್ತಾ ಭುಗ್ನಾ ಕುಟಿಲಾಕಾರಾ ಸ್ತ್ರೀಲಿಙ್ಗ ಸಾಮರ್ಥ್ಯಾತ್ ಪಿಟ-ಕೇತ್ಯೂಹ್ಯಂ ಇಯಮಷ್ಠೀಲಿಕಾಖ್ಯೋ ಗುಹ್ಯರೋಗಃ|| ೧೯||
Adhikarana ನಿವೃತ್ತಮ್ (೨೦) · Śloka ೨೦
ವಿಮರ್ದನಾದಿದುಷ್ಟೇನ ವಾಯುನಾ ಚರ್ಮ ಮೇಢ್ರಜಮ್| ನಿವರ್ತ್ತತೇ ಸರುಗ್ದಾಹಂ ಕ್ವಚಿತ್ಪಾಕಞ್ಚ ಗಚ್ಛತಿ| ಪಿಣ್ಡಿತಂ ಕುಥಿತಂ ಚರ್ಮ ತತ್ಪ್ರಲಮ್ಬಮಧೋಮಣೇಃ| ನಿವೃತ್ತಸಂಜ್ಞಂ ಸಕಫಂ ಕಣ್ಡೂಕಾಠಿನ್ಯವತ್ತು ತತ್||೨೦||
विमर्दनादिदुष्टेन वायुना चर्म मेढ्रजम्| निवर्त्तते सरुग्दाहं क्वचित्पाकञ्च गच्छति| पिण्डितं कुथितं चर्म तत्प्रलम्बमधोमणेः| निवृत्तसंज्ञं सकफं कण्डूकाठिन्यवत्तु तत्||२०||
🔊 Audio coming soon
ಶಶಿಲೇಕ ವ್ಯಾಖ್ಯಾ (ಇನ್ದು ಕೃತ)
ವಿಮರ್ದನಾದಿನಾ ದುಷ್ಟೇನ ವಾಯುನಾ ಮೇಢ್ರಜಂ ಚರ್ಮ ಸರುಗ್ದಾಹಂ ಸನ್ನಿವರ್ತತೇ ಪರಾವೃತ್ಯ ತಿಷ್ಠತಿ| ಕ್ವಚಿತ್ತು ಪಾಕಮಪಿ ಗಚ್ಛತಿ| ತತಶ್ಚರ್ಮಪಿಣ್ಡಿತಂ ಸಙ್ಕುಚಿತಂ ಕುಥಿತಂ ಕ್ಲಿನ್ನಂ ಮಣೇರ್ಮೇಢ್ರಾಗ್ರಭಾಗಸ್ಯಾಧಃ ಪ್ರಲಮ್ಬಂ ಭವತಿ ತಸ್ಯ ನಿವೃತ್ತಮಿತಿ ಸಂಜ್ಞಾ| ತಚ್ಚ ನಿವೃತ್ತಂ ಕಫಸಂಯೋಗಾತ್ ಕಣ್ಡೂಕಾಠಿನ್ಯವಚ್ಚ ಭವತಿ ನ ತು ಸರ್ವತ್ರ| (ವಿಮರ್ದನಾದ್ಧಿ ದುಷ್ಟೇನೇತಿ ಪಾಠಃ| ಪಿಣ್ಡಿತಂ ಗ್ರಥಿತಮಿತಿ ಚ| ವಿಮರ್ದನಾದ್ವಿವಿಧಾನ್ಮರ್ದನಾತ್ ದುಷ್ಟೇನ ವಾಯುನಾ ಮೇಢ್ರಜಂ ಚರ್ಮ ಮೇಢ್ರಸ್ಯ ತ್ವಕ್ ನಿವರ್ತತೇ ಪರಾವೃತ್ಯ ತಿಷ್ಠತಿ| ಹಿ ಪ್ರಸಿದ್ಧೌ| ಕ್ವಚಿತ್ ಕೇಷುಚಿತ್ ಪುರುಷೇಷು ದೋಷಭೇದವಶಾತ್ ಸರುಗ್ದಾಹಂ ರುಜಯಾ ಊಷ್ಮಾತಿಶಯೇನ ಚ ಯುಕ್ತಂ ಸತ್ಪಾಕಂ ಗಚ್ಛತಿ ಚ| ತತ್ತಥಾಭೂತಂ ಚರ್ಮಪಿಣ್ಡಿತಂ ಗ್ರಥಿತಂ ಪಿಣ್ಡಾಕಾರತಯಾ ಗ್ರನ್ಥಿಭಾವಮಾಪನ್ನಂ ಮಣೇರ್ಮೇಢ್ರಾಗ್ರಭಾಗಸ್ಯಾಧಃಪ್ರಲಮ್ಬಂ ಲಮ್ಬಮಾನಂ ನಿವೃತ್ತಸಂಜ್ಞಂ ನಿವೃತ್ತಾಖ್ಯೋ ರೋಗಃ| ಸಕಫಂ ಕಫಸಮ್ಬದ್ಧಂ ತತ್ತು ನಿವೃತ್ತಂ ಕಣ್ಡ್ವಾ ಕಾಠಿನ್ಯೇನ ಚ ಯುಕ್ತಂ ಭವತಿ)|| ೨೦||
Adhikarana ಅವಪಾಟಿಕಾ (೨೧) · Śloka ೨೧
ದಾರೂಢಂ ಸ್ಫುಟಿತಂ ಚರ್ಮ ನಿರ್ದಿಷ್ಟಮವಪಾಟಿಕಾ||೨೧||
दारूढं स्फुटितं चर्म निर्दिष्टमवपाटिका||२१||
🔊 Audio coming soon
ಶಶಿಲೇಕ ವ್ಯಾಖ್ಯಾ (ಇನ್ದು ಕೃತ)
ಮೇಢ್ರಭವಂ ಚರ್ಮ ದುಷ್ಟಂ ಕೃತ್ವೋಢಂ ಮರ್ದಿತಂ ಸ್ಫುಟಿತಂ ಸದವಪಾಟಿಕೇತಿ ನಾಮ್ನಾ ನಿರ್ದಿಷ್ಟಮ್| (ದುರುಢಂ ದುಷ್ಟಂ ಕೃತ್ವೋಢಂ ಅಯಥಾವತ್ ಗೃಹೀತಮರ್ದಿತಮಿತ್ಯರ್ಥಃ| ಅತ ಏವ ಸ್ಫುಟಿತಂ ಭಿನ್ನಂ ಯಚ್ಚರ್ಮತ್ವಕ್ ತದವಪಾಟಿಕಾ ತತ್ಸಂಜ್ಞೋ ಗುಹ್ಯರೋಗಃ)|| ೨೧||
Adhikarana ನಿರುದ್ಧಮಣಿಃ (೨೨) · Śloka ೨೨
ವಾತೇನ ದೂಷಿತಂ ಚರ್ಮ ಮಣೌ ಸಕ್ತಂ ರುಣದ್ಧಿ ಚೇತ್| ಸ್ರೋತೋ ಮೂತ್ರಂ ತತೋಽಭ್ಯೇತಿ ಮನ್ದಧಾರಮವೇದನಮ್| ಮಣೇರ್ವಿಕಾಸರೋಧಶ್ಚ ಸ ನಿರುದ್ಧಮಣಿರ್ಗದಃ||೨೨||
वातेन दूषितं चर्म मणौ सक्तं रुणद्धि चेत्| स्रोतो मूत्रं ततोऽभ्येति मन्दधारमवेदनम्| मणेर्विकासरोधश्च स निरुद्धमणिर्गदः||२२||
🔊 Audio coming soon
ಶಶಿಲೇಕ ವ್ಯಾಖ್ಯಾ (ಇನ್ದು ಕೃತ)
ವಾತೇನ ದೂಷಿತಂ ಚರ್ಮ ಮೇಢ್ರಮಣೌ ಸಕ್ತಂ ಶ್ಲಿಷ್ಟಂ ಯದಿ ಮೇಢ್ರಸ್ರೋತೋರುಣಾದ್ಧಿ ತತೋ ಮೂತ್ರಂ ಮನ್ದಧಾರಮವೇದನಂ ಚಾಭ್ಯೇತಿ ಮಣೇಶ್ಚ ಹರ್ಷಣೇ ವಿಕಾಸರೋಧೋ ಭವತಿ ಸ ಗದೋ ನಾಮ್ನಾ ನಿರುದ್ಧಮಣಿಃ| (ವಾತೇನ ಕೃತದೂಷಣಂ ಚರ್ಮ ಮಣೌ ಲಿಙ್ಗಾಗ್ರೇ ಸಕ್ತಂ ಸಂಶ್ಲಿಷ್ಟಂ ಸ್ರೋತೋ ಮೂತ್ರಮಾರ್ಗಂ ರುಣದ್ಧಿ ಯದಿ ತತಸ್ತಸ್ಮಾದ್ಧೇತೋಃ ಮೂತ್ರಃ ಮನ್ದಧಾರಂ ಸ್ರೋತೋರೋಧಾದನ್ತರಾನ್ತರಾ ವಿಚ್ಛಿನ್ನಂ ಅವೇದನಂ ವೇದನಾರಹಿತಮ್| ಅರ್ಶ್ಮರ್ಯಾದೌ ಹಿ ನಿರೋಧಸ್ಯಾಭ್ಯನ್ತರತ್ವಾದ್ವೇದನಾಸಮ್ಭವಃ ಇಹ ತು ಬಾಹ್ಯತ್ವಾತ್ತದಭಾವಃ| ಅಭ್ಯೇತಿ ನಿರ್ಗಚ್ಛತಿ| ಮಣೇಃ ಕರ್ಣಿಕಾಯಾಸ್ತ್ವಕ್ಪರಿವರ್ತನಾಶಕ್ಯತಯಾ ವಿಕಾಸಯಿತುಮಶಕ್ಯತ್ವಞ್ಚ ಸ್ಯಾತ್| ಯ ಏವಂ ವಿಧಃ ಸ ಗದೋ ನಿರುದ್ಧಮಣಿಸಂಜ್ಞೋ ಗುಹ್ಯರೋಗಃ)|| ೨೨||
Adhikarana ಗ್ರಥಿತಮ್ (೨೩) · Śloka ೨೩
ಲಿಙ್ಗಂ ಶೂಕೈರಿವಾಕೀರ್ಣಂ ಗ್ರಥಿತಾಖ್ಯಂ ಕಫೋದ್ಭವಮ್||೨೩||
लिङ्गं शूकैरिवाकीर्णं ग्रथिताख्यं कफोद्भवम्||२३||
🔊 Audio coming soon
ಶಶಿಲೇಕ ವ್ಯಾಖ್ಯಾ (ಇನ್ದು ಕೃತ)
ಕಫೇನ ಹೇತುನಾ ಲಿಙ್ಗಂ ಮೇಢ್ರಮನ್ತಃ ಶೂಕೈಃ ಕಿಂಶಾರುಭಿರಿವಾವೃತಂ ಭವತಿ ತಸ್ಯ ಗ್ರಥಿತ ಇತ್ಯಾಖ್ಯಾ| (ಶೂಕಾಚಿತಪ್ರತೀತಿಯುಕ್ತಂ ಮೇಢ್ರಂ ಗ್ರಥಿತಾಖ್ಯಂ ತಚ್ಚ ಕಫೋದ್ಭವಂ ಕಫೇನ ಜಾಯತ ಇತ್ಯರ್ಥಃ| (ಕಿಂಶಾರುರ್ಧಾನ್ಯಶೂಕಮ್)|| ೨೩||
Adhikarana ಸ್ಪರ್ಶಹಾನಿಃ (೨೪) · Śloka ೨೪
ಶೂಕದೂಷಿತರಕ್ತೋತ್ಥಾ ಸ್ಪರ್ಶಹಾನಿಸ್ತದಾಹ್ವಯಾ||೨೪||
शूकदूषितरक्तोत्था स्पर्शहानिस्तदाह्वया||२४||
🔊 Audio coming soon
ಶಶಿಲೇಕ ವ್ಯಾಖ್ಯಾ (ಇನ್ದು ಕೃತ)
ಶೂಕೇನ ದೂಷಿತಂ ಯನ್ಮೇಢ್ರೇ ರಕ್ತಂ ತದುತ್ಥಾ ಮೇಢ್ರೇ ಸ್ಪರ್ಶಸ್ಯ ಹಾನಿರಚೇತನತ್ವಂ ಭವತಿ| ತತ್ತದಾಹ್ವಯಂ ನಾಮ್ನಾ ಸ್ಪರ್ಶಹಾನಿಃ| (ಲಿಙ್ಗವೃದ್ಧ್ಯರ್ಥಂ ಪ್ರಲಿಪ್ತ ಶೂಕದೂಷಿತಾದ್ರಕ್ತಾದುತ್ಪನ್ನಾ ಸ್ಪರ್ಶಹಾನಿಃ ಸ್ವಾಪಪ್ರಯುಕ್ತಂ ಸ್ಪರ್ಶಾಜ್ಞಾನಂ ತದಾಹ್ವಯೋ ಸ್ಪರ್ಶಹಾನ್ಯಾಖ್ಯೋ ರೋಗಃ|| ೨೪||
Adhikarana ಶತಪೋನಕಮ್ (೨೫) · Śloka ೨೫
ಛಿದ್ರೈರಣುಮುಖೈರ್ಯತ್ತು ಮೇಹನಂ ಸರ್ವತಶ್ಚಿತಮ್| ವಾತಶೋಣಿತಕೋಪೇನ ತೇ ವಿದ್ಯಾಚ್ಛತಪೋನಕಮ್||೨೫||
छिद्रैरणुमुखैर्यत्तु मेहनं सर्वतश्चितम्| वातशोणितकोपेन ते विद्याच्छतपोनकम्||२५||
🔊 Audio coming soon
ಶಶಿಲೇಕ ವ್ಯಾಖ್ಯಾ (ಇನ್ದು ಕೃತ)
ಯತ್ತು ಮೇಹನಂ ಮೇಢ್ರಂ ಸರ್ವತ್ರ ಅಣುಮುಖೈಃ ಸೂಕ್ಷ್ಮಾಸ್ಯೈಶ್ಛಿದ್ರೈಶ್ಚಿತಂ ವಾತಶೋಣಿತಕೋಪೇನ ಹೇತುನಾ ಭವತಿ ತಂ ನಾಮ್ನಾ ಶತಪೋನಕಂ ವಿದ್ಯಾತ್| (ಯತ್ತು ಲಿಙ್ಗಂ ವಾತರಕ್ತಯೋಃ ಕೋಪಾದಣುಮುಖೈಃ ಸೂಕ್ಷ್ಮಾಸ್ಯೈರ್ಮುಖಸ್ಯಾಣುತ್ವೋಕ್ತ್ಯಾ ಮೂಲಸ್ಯ ಸ್ಥೂಲತ್ವಮಪಿ ವ್ಯಕ್ತಿತಮ್| ಅತ್ರ ಏವ ಹಿ ತೇಭ್ಯೋ ಮೂತ್ರಾದಿಪರಿಸ್ರುತಿಃ| ಛಿದ್ರೈಃ ಸೂಷಿರೈಃ ಸರ್ವತಶ್ಚಿತಂ ವ್ಯಾಪ್ತಂ ತಂ ಶತಪೋನಕಾಖ್ಯಂ ವಿದ್ಯಾತ್| ಭಗನ್ದರೋಕ್ತಶತಪೋನಕವತ್ ಬಹುಚ್ಛಿದ್ರತ್ವಾತ್)|| ೨೫||
Adhikarana ತ್ವಕ್ಪಾಕಃ (೨೬) · Śloka ೨೬
ಪಿತ್ತಾಸೃಗ್ಭ್ಯಾಂ ತ್ವಚಃ ಪಾಕಸ್ತ್ವಕ್ಪಾಕೋ ಜ್ವರದಾಹವಾನ್||೨೬||
पित्तासृग्भ्यां त्वचः पाकस्त्वक्पाको ज्वरदाहवान्||२६||
🔊 Audio coming soon
ಶಶಿಲೇಕ ವ್ಯಾಖ್ಯಾ (ಇನ್ದು ಕೃತ)
ಪಿತ್ತಾಸೃಗ್ಭ್ಯಾಂ ಹೇತುಭ್ಯಾಂ ಜ್ವರದಾಹವಾನ್ ಯಸ್ತ್ವಚಃ ಪಾಕಃ ಸ ನಾಮ್ನಾ ತ್ವಕ್ಪಾಕಃ| (ಪಿತ್ತೇನಾಸೃಜಾ ಚ ಹೇತುನಾ ಜ್ವರದಾಹವಾನ್ ಜ್ವರೇಣ ದಾಹೇನ ಚ ಯುಕ್ತೋ ಮೇಢ್ರಾ ತ್ವಚಃ ಪಾಕೋ ತ್ವಕ್ಪಾಕಾಖ್ಯೋ ಗುಹ್ಯರೋಗಃ)|| ೨೬||
Adhikarana ಮಾಂಸಪಾಕಃ (೨೭) · Śloka ೨೭
ಮಾಂಸಪಾಕಃ ಸರ್ವಜಃ ಸರ್ವವೇದನೋ ಮಾಂಸಶಾತನಃ||೨೭||
मांसपाकः सर्वजः सर्ववेदनो मांसशातनः||२७||
🔊 Audio coming soon
ಶಶಿಲೇಕ ವ್ಯಾಖ್ಯಾ (ಇನ್ದು ಕೃತ)
ಸರ್ವಜಃ ಸನ್ನಿಪಾತಜೋ ಮಾಂಸಪಾಕಃ ಸರ್ವಾಭಿರ್ವೇದನಾಭಿರ್ಯುಕ್ತೋ ಮಾಂಸಶಾತನೋ ಭವತಿ| (ಸರ್ವಜಃ ಸನ್ನಿಪಾತಜಃ ಸರ್ವವೇದನಃ ಛೇದಭೇದತೋದಸ್ಫುರಣವ್ಯಾಸವ್ಯಧಸ್ರಂಸಸ್ವಾಪಾದ್ಯಖಿಲವೇದನಾನ್ವಿತಃ ಮಾಂಸಶಾತನಃ ಮಾಂಸಂ ಪಕ್ತ್ವಾ ಮೇಢ್ರಾದಣುಶಃ ಪಾತಯನ್ ಮಾಂಸಪಾಕಃ ಮಾಂಸಪಾಕಾಖ್ಯೋ ರೋಗಃ)||೨೭||
Adhikarana ಅಸೃಗರ್ಬುದಮ್ (೨೮) · Śloka ೨೮
ಸರಾಗೈರಸಿತೈಃ ಸ್ಫೋಟೈರ್ವೇದನಾಭಿಶ್ಚ ಪೀಡಿತಮ್| ಮೇಹನಂ ವೇದನಾ ಚೋಗ್ರಾ ತಂ ವಿದ್ಯಾದಸೃಗರ್ಬುದಮ್||೨೮||
सरागैरसितैः स्फोटैर्वेदनाभिश्च पीडितम्| मेहनं वेदना चोग्रा तं विद्यादसृगर्बुदम्||२८||
🔊 Audio coming soon
ಶಶಿಲೇಕ ವ್ಯಾಖ್ಯಾ (ಇನ್ದು ಕೃತ)
ಸರಾಗತ್ವಾದಿಯುಕ್ತೈಃ ಸ್ಫೋಟೈಸ್ತದ್ವಿಧಾಭಿಶ್ಚ ಸೂಕ್ಷ್ಮಾಭಿಃ ಪಿಟಕಾಭಿರ್ಯತ್ರ ಮೇಹನಂ ಪೀಡಿತಂ ಭವತ್ಯುಗ್ರಾ ಚ ವೇದನಾ ತಸ್ಯ ರೋಗಸ್ಯಾಸೃಗರ್ಬುದಮಿತಿ ನಾಮ ವಿದ್ಯಾತ್| (ಮೇಢ್ರಂ ಸರಾಗೈರೀಷದ್ರಕ್ತವರ್ಣೈರಸಿತೈಃ ಕೃಷ್ಣವರ್ಣೈರ್ವಾ ಸ್ಫೋಟೈರಥಾತ್ತಾದೃಶೀಭಿರೇವ ಪಿಟಕಾಭಿಶ್ಚ ಪೀಡಿತಂ ವ್ಯಾಪ್ತಂ ತಥಾ ಉಗ್ರಾ ಅತ್ಯರ್ಥಮಸಹನೀಯಾ ವೇದನಾ ಚ ಸ್ಯಾದ್ಯ ಏವಂವಿಧೋ ರೋಗಸ್ತಮಸೃಗರ್ಬುದಂ ವಿದ್ಯಾತ್)||೨೮||
Adhikarana ಮಾಂಸಾರ್ಬುದಂ ವಿದ್ರಧಿಶ್ಚ (೨೯) · Śloka ೨೯
ಮಾಂಸಾರ್ಬುದಂ ಪ್ರಾಗುದಿತಂ ವಿದ್ರಧಿಶ್ಚ ತ್ರಿದೋಷಜಃ||೨೯||
मांसार्बुदं प्रागुदितं विद्रधिश्च त्रिदोषजः||२९||
🔊 Audio coming soon
ಶಶಿಲೇಕ ವ್ಯಾಖ್ಯಾ (ಇನ್ದು ಕೃತ)
ಗುಹ್ಯೇ ತು ಯನ್ಮಾಂಸಾರ್ಬುದಂ ತತ್ ಲಕ್ಷಣೈಃ ಪ್ರಾಕ್ ಗ್ರನ್ಥ್ಯಾದ್ಯಧ್ಯಾಯ ಉದಿತಮ್| ಗುಹ್ಯೇ ಚ ತ್ರಿಭಿರ್ದೋಷೈರ್ವಿದ್ರಧಿರ್ಭವತಿ| (ಅರ್ಬುದಾನಾಂ ಮಧ್ಯೇ ಮಾಂಸಾರ್ಬುದಂ ವಿದ್ರಧೀನಾಂ ಮಧ್ಯೇ ಸನ್ನಿಪಾತಜೋ ವಿದ್ರಧಿಶ್ಚಾತ್ರಾಪಿ ಭವತಃ| ತೌ ಚ ಸ್ವಸ್ವ ನಿದಾನೇನ ಬೋದ್ಧವ್ಯಾವಿತ್ಯರ್ಥಃ)|| ೨೯||
Adhikarana ತಿಲಕಾಲಕಾಃ (೩೦) · Śloka ೩೦
ಕೃಷ್ಣಾನಿ ಭೂತ್ವಾ ಮಾಂಸಾನಿ ವಿಶೀರ್ಯನ್ತೇ ಸಮನ್ತತಃ| ಪಕ್ವಾನಿ ಸನ್ನಿಪಾತೇನ ತಾನ್ ವಿದ್ಯಾತ್ತಿಲಕಾಲಕಾನ್||೩೦||
कृष्णानि भूत्वा मांसानि विशीर्यन्ते समन्ततः| पक्वानि सन्निपातेन तान् विद्यात्तिलकालकान्||३०||
🔊 Audio coming soon
ಶಶಿಲೇಕ ವ್ಯಾಖ್ಯಾ (ಇನ್ದು ಕೃತ)
ಸನ್ನಿಪಾತೇನ ಹೇತುನಾ ಗುಹ್ಯೇ ಪಕ್ವಾನಿ ಮಾಂಸಾನಿ ಕೃಷ್ಣಾನಿ ಭುತ್ವಾ ಸಮನ್ತಾದ್ವಿಶೀರ್ಯನ್ತೇ ತಾಂಸ್ತಿಲಕಾಲಕಾನ್ ವಿದ್ಯಾತ್| (ಸನ್ನಿಪಾತಕೋಪೇನ ಪಕ್ವಾನಿ ಮೇಢ್ರಮಾಂಸಾನಿ ಕೃಷ್ಣಾನಿ ಕೃಷ್ಣವರ್ಣಾನಿ ಭೂತ್ವಾ ಸಮನ್ತತಃ ಆಬಸ್ತಿಪರ್ಯನ್ತಂ ವಿಶೀರ್ಯನ್ತೇ ಶಕಲೀಭೂಯ ನಿಪತನ್ತಿ ಬಹುವಚನಂ ಶಕಲಾಪೇಕ್ಷಯಾ| ಯ ಏವಂವಿಧಾಸ್ತಾನ್ ತಿಲಕಾಲಕಸಂಜ್ಞಾನ್ ಜಾನೀಯಾತ್)| ಇತ್ಯಪದಂಶಾರ್ಶಃಸರ್ಷಪಿಕಾಽವಮನ್ಥಕುಮ್ಭೀಕಾಲಜ್ಯುತ್ತಮಾಪುಷ್ಕರಿಕಾಸಂವ್ಯೂಢಾಮೃದಿತಾಽಷ್ಠೀಲಿಕಾ- ನಿವೃತ್ತಾಽವಪಾಟಿಕಾನಿರುದ್ಧಮಣಿಗ್ರಥಿತಸ್ಪರ್ಶಹಾನಿಶತಪೋನಕತ್ವಕ್ಪಾಕಮಾಂಸಪಾಕಾಽಸೃಗರ್ಬುದ- ಮಾಂಸಾರ್ಬುದವಿದ್ರಧಿತಿಲಕಾಲಕಾಖ್ಯಾಸ್ರಯೋವಿಂಶತಿಃ ಪುಂಗುಹ್ಯರೋಗಾಃ ಉಕ್ತಾಃ|| ೩೦||
Adhikarana ಸಾಧ್ಯಾಸಾಧ್ಯತಾ (೩೧) · Śloka ೩೧
ಮಾಂಸೋತ್ಥಮರ್ಬುದಂ ಪಾಕಂ ವಿದ್ರಧಿಂ ತಿಲಕಾಲಕಾನ್| ಚತುರೋ ವರ್ಜಯೇದೇಷಾಂ ಶೇಷಾನ್ ಶೀಘ್ರಮುಪಾಚರೇತ್||೩೧||
मांसोत्थमर्बुदं पाकं विद्रधिं तिलकालकान्| चतुरो वर्जयेदेषां शेषान् शीघ्रमुपाचरेत्||३१||
🔊 Audio coming soon
ಶಶಿಲೇಕ ವ್ಯಾಖ್ಯಾ (ಇನ್ದು ಕೃತ)
ಏಷಾಂ ಚ ಮಧ್ಯಾನ್ಮಾಂಸೋತ್ಥಮರ್ಬುದಂ ಮಾಂಸೋತ್ಥಮೇವ ಚ ಪಾಕಂ ವಿದ್ರಧಿಂ ತಿಲಕಾಲಕಾಂಶ್ಚೇತಿ ಚತುರೋ ವರ್ಜಯೇತ್ ನ ಚಿಕಿತ್ಸೇತ್| ಶೇಷಾಂಸ್ತು ಶೀಘ್ರಮೇವೋಪಚರೇತ್| (ಅಪದಂಶಾನಾಂ ಸಾಧ್ಯಾಸಾಧ್ಯವಿಭಾಗಸ್ಯೋಕ್ತತ್ವಾದೇಷಾಮನನ್ತರೋಕ್ತಾನಾಮರ್ಶಃಪ್ರಭೃತೀನಾಂ ಮಧ್ಯೇ ಮಾಂಸೋತ್ಥಮರ್ಬುದಂ ಮಾಂಸಾರ್ಬುದಂ ಪಾಕಂ ಮಾಂಸಪಾಕಂ ವಿದ್ರಧಿಂ ತಿಲಕಾಲಕಾನಿತಿ ಚತುರಃ ವರ್ಜಯೇತ್| ಉದ್ದೇಶತ ಏವೈಷಾಂ ಚತುಷ್ಟ್ವೇ ಸಿದ್ಧೇಽಪಿ ಚತುರೈತಿ ಚತುರ ಇತಿ ಪುನರುಕ್ತಿಃ ಸುಖನಿಶ್ಚಯಾರ್ಥಾ ಬಹುವಚನೋಕ್ತಾನಾಂ ತಿಲಕಾಲಕಾನಾಂ ಬಹುತ್ವಶಙ್ಕಾನಿರಾಸಾರ್ಥಂ ಚ| ಶೇಷಾನರ್ಶಃ ಸರ್ಷಪಿಕಾದೀನ್ ಶೀಘ್ರಮಾಶ್ವೇವೋಪಾಚರೇತ್ ತೇಷಾಮಪಿ ಕಾಲಾತಿಪಾತೇ ಮಹಾನ ಪ್ರತ್ಯವಾಯಃ ಸ್ಯಾದಿತಿ ಭಾವಃ)|| ೩೧||
Adhikarana ಸ್ತ್ರೀಗುಹ್ಯರೋಗಾಣಾಂ ಹೇತುಃ (ಯೋನಿವ್ಯಾಪದಃ) (೩೨) · Śloka ೩೨
ವಿಂಶತಿರ್ವ್ಯಾಪದೋ ಯೋನೇರ್ಜಾಯನ್ತೇ ದುಷ್ಟಭೋಜನಾತ್| ವಿಷಮಸ್ಥಾಙ್ಗಶಯನಭೃಶಮೈಥುನಸೇವನೈಃ| ದುಷ್ಟಾರ್ತವಾದಪದ್ರವ್ಯೈರ್ಬೀಜದೋಷೇಣ ದೈವತಃ||೩೨||
विंशतिर्व्यापदो योनेर्जायन्ते दुष्टभोजनात्| विषमस्थाङ्गशयनभृशमैथुनसेवनैः| दुष्टार्तवादपद्रव्यैर्बीजदोषेण दैवतः||३२||
🔊 Audio coming soon
ಶಶಿಲೇಕ ವ್ಯಾಖ್ಯಾ (ಇನ್ದು ಕೃತ)
ಏವಂ ಪುಂಗುಹ್ಯರೋಗಾನುಕ್ತ್ವಾ ಸ್ತ್ರೀಗುಹ್ಯರೋಗಾನಾಹ-ಯೋನೇಃ ಸ್ತ್ರೀಗುಹ್ಯಸ್ಯ ದುಷ್ಟಭೋಜನಾದಿಹೇತೋರ್ವಿಂಶತಿರ್ವ್ಯಾಪದೋ ಜಾಯನ್ತೇ| ವಿಷಮಸ್ಥೈರಙ್ಗೈಃ ಶಯನಂ ತಥೋಕ್ತಮ್| ದುಷ್ಟಾರ್ತವೇನ ಸ್ರವತಾ| ಅಪದ್ರವ್ಯಾಣಿ ಲೋಹಾದಿಮಯಾನಿ ದಾಕ್ಷಿಣಾತ್ಯಾಸು ಪ್ರಸಿದ್ಧಾನಿ| ಬೀಜದೋಷಃ ಸ್ತ್ರಿಯೋ ಜನ್ಮಕಾಲೇ ಯೋನ್ಯಾರಮ್ಭಕಸ್ಯ ಬೀಜಸ್ಯೋಪಹತತ್ವಮ್| ದೈವಮನ್ಯಜನ್ಮಕೃತಂ ಕರ್ಮ| ಇತಿ ಯೋನಿವ್ಯಾಪದಾ ಮವಿಶೇಷೇಣ ಹೇತುರುಕ್ತಃ| (ದುಷ್ಟಭೋಜನಾತ್ ಪರ್ಯುಷಿತಾದ್ಯನ್ಯಭೋಜನಾತ್| ಉಕ್ತಂ ಚ- ಭವೇತ್ ಪರ್ಯುಷಿತಂ ಪೂತಿಕ್ಲಿನ್ನಮುಷ್ಣೀಕೃತಂ ಪುನಃ| ದುಷ್ಟಂ ಕೃಮ್ಯಾದಿಜುಷ್ಟಂ ಚ ಶೋಷಿತಂ ಚಾನ್ನಮಾತಪೇ|| ಇತಿ| ವಿಷಮಸ್ಥಾಙ್ಗಶಯನಭೃಶಮೈಥುನಸೇವನೈಃ ಅಯಥಾವದ್ವಿನ್ಯಸ್ತೈರಙ್ಗೈಃ ಶಯನಸ್ಯ ಭೃಶಮೈಥುನಸ್ಯ ಚ ಶೀಲನೈಃ| ದುಷ್ಟಾರ್ತವಾದ್ವಾತಾದಿದೂಷಿತಾದೃತುಜರಕ್ತಾತ್| ಉಪದ್ರವ್ಯೈರಿತಿ ಪಾಠಃ| ಉಪದ್ರವ್ಯೈರ್ಲೋಹಾದಿಕೃತೈರುಪಲಿಙ್ಗೈಃ| ಉಪಲಿಙ್ಗಸುರತಂ ದೇಶಾನ್ತರೇಷು ಪ್ರಸಿದ್ಧಮ್| ಉಕ್ತಞ್ಚ ರತಿರಹಸ್ಯೇ- ವಿಮೃದ್ಯಮಾನಾಃ ಕೃತಕಧ್ವಜೇನ ದ್ರವನ್ತಿ ಹೃಷ್ಯನ್ತಿ ದೃಢಪ್ರಹಾರೈಃ| ಸ್ತ್ರೀರಾಜ್ಯಜಾಃ ಕೋಸಲಜಾಶ್ಚ ನಾರ್ಯಃ ಪ್ರಚಣ್ಡಕಣ್ಡೂತಿಭಗಾ ಭವನ್ತಿ|| ಇತಿ|| ಬೀಜದೋಷೇಣ ಯೋನ್ಯಾರಮ್ಭಕಸ್ಯಾಕಾಶಾದಿಕಸ್ಯ ಬೀಜಸ್ಯೋಪಹತತ್ವೇನ ದೈವತೋ ಜನ್ಮಾನ್ತರಕೃತಪಾಪಫಲಪರಿಣಾಮಾಚ್ಚ ಹೇತೋಃ ಯೋನೇರ್ವಿಂಶತಿರ್ವ್ಯಾಪದೋ ಭವನ್ತಿ| ಇಯತಾ ಗ್ರನ್ಥಜಾಲೇನ ಯೋನಿವ್ಯಾಪದಾಂ ಸಾಮಾನ್ಯಕಾರಣಮುಕ್ತಮ್)||೩೨||
Adhikarana ವಾತಿಕೀ ಯೋನಿವ್ಯಾಪದ್ (೩೩) · Śloka ೩೩
ಯೋನೌ ಕ್ರುದ್ಧೋಽನಿಲಃ ಕುರ್ಯಾದ್ರುಕ್ತೋದಾಯಾಮಸುಪ್ತತಾಃ| ಪಿಪೀಲಿಕಾಸೃಪ್ತಿಮಿವ ಸ್ತಮ್ಭಂ ಕರ್ಕಶತಾಂ ಸ್ವನಮ್| ಫೇನಿಲಾರುಣಕೃಷ್ಣಾಲ್ಪತನುರೂಕ್ಷಾರ್ತ್ತವಸ್ರುತಿಮ್| ಭ್ರಂಶಂ ವಙ್ಕ್ಷಣಪಾರ್ಶ್ವಾದೌ ವ್ಯಥಾಂ ಗುಲ್ಮಂ ಕ್ರಮೇಣ ಚ| ತಾಂಸ್ತಾಂಶ್ಚ ಸ್ವಾನ್ ಗದಾನ್ ವ್ಯಾಪದ್ವಾತಿಕೀ ನಾಮ ಸಾ ಸ್ಮೃತಾ||೩೩||
योनौ क्रुद्धोऽनिलः कुर्याद्रुक्तोदायामसुप्तताः| पिपीलिकासृप्तिमिव स्तम्भं कर्कशतां स्वनम्| फेनिलारुणकृष्णाल्पतनुरूक्षार्त्तवस्रुतिम्| भ्रंशं वङ्क्षणपार्श्वादौ व्यथां गुल्मं क्रमेण च| तांस्तांश्च स्वान् गदान् व्यापद्वातिकी नाम सा स्मृता||३३||
🔊 Audio coming soon
ಶಶಿಲೇಕ ವ್ಯಾಖ್ಯಾ (ಇನ್ದು ಕೃತ)
ಯೋನಾವಿತ್ಯಾದಿನಾ ಲಿಙ್ಗಾನ್ಯುಚ್ಯನ್ತೇ| ಯೋನೌ ಕ್ರುದ್ಧೋ ವಾಯುಃ ರುಗಾದೀನ್ ಕುರ್ಯಾತ್| ಫೇನಿಲೇತ್ಯಾದ್ಯಾರ್ತ್ತವವಿಶೇಷಣಂ ತಸ್ಯ ಸ್ರುತ್ಯಾ ಸಮ್ಬನ್ಧಃ| ಭ್ರಂಶೋ ಯೋನಿಭ್ರಂಶಃ| ವಙ್ಕ್ಷಣಾದೌ ವ್ಯಥಾಂ ಕ್ರಮೇಣ ಗುಲ್ಮಮಪಿ ಕುರ್ಯಾತ್| ತಾಂಸ್ತಾಂಶ್ಚ ಸ್ವಾನ್ ವಾತಜಾನ್ ಸ್ತಮ್ಭಾದೀನ್ ಗದಾನ್| ಇಯಂ ವಾತಿಕೀ ನಾಮ ಯೋನಿವ್ಯಾಪತ್ ಸ್ಮೃತಾ| (ದುಷ್ಟಭೋಜನಾದಿನಾ ಕುಪಿತೋ ವಾಯುರ್ಯೋನೌ ರುಗಾದೀನ್ ಕುರ್ಯಾತ್| ಪಿಪೀ-ಲಿಕಾಸೃಪ್ತಿಮಿವ ತಾಸಾಂ ಸಞ್ಚರಣಪ್ರತೀತಿಮಿತ್ಯರ್ಥಃ| ಕರ್ಕಶತಾ ಕಾಠಿನ್ಯಮ್| ಫೇನಿಲಂ ಫೇನಯುಕ್ತಮರುಣವರ್ಣಂ ಕೃಷ್ಣಂ ಕೃಷ್ಣವರ್ಣಂ ವಾ ಅಲ್ಪಮಬಹು ತನು ಸ್ವಚ್ಛಂ ರೂಕ್ಷಮಸ್ನಿಗ್ಧಂ ಏವಮ್ಭೂತಸ್ಯಾರ್ತ್ತವಸ್ಯ ಸ್ರುತಿಃ ಸ್ರವಣಮ್| ಸ್ರಂಸಮಿತಿ ಪಾಠಃ| ಸ್ರಂಸೋ ವೇದನಾವಿಶೇಷಃ (ಕಲತ್ತುನೋಕ್ಕ)| ವಙ್ಕ್ಷಣಪಾರ್ಶ್ವಾದೌ ವ್ಯಥಾಂ ವಙ್ಕ್ಷಣ್ಯೋಃ ಪಾಱ್ಶ್ವಯೋಶ್ಚ ಕಟೀಪೃಷ್ಠಪರಿಗ್ರಹಃ| ಕ್ರಮೇಣ ಉಪೇಕ್ಷಯಾ ಕಾಲಾತಿಪಾತಾತ್ ಗುಲ್ಮಂ ಗುಲ್ಮಾಖ್ಯಂ ರೋಗಂ ತಾಂಸ್ತಾನಾಯಾಮಾಕ್ಷೇಪಕಸ್ತಮ್ಭಾದೀನ್ ಸ್ವಾನ್ ವಾತವ್ಯಾಧಿಸಮ್ಬನ್ಧಿನೋ ಗದಾಂಶ್ಚ ಕರೋತಿ| ಯೈವಂವಿಧಾ ಸಾ ವಾತಿಕೀ ನಾಮ ಯೋನಿವ್ಯಾಪತ್ ಸ್ಮೃತಾ)|| ೩೩||
Adhikarana ಅತಿಚರಣಾ (೩೪) · Śloka ೩೪
ಸೈವಾತಿಚರಣಾ ಶೋಫಸಂಯುಕ್ತಾತಿವ್ಯವಾಯತಃ||೩೪||
सैवातिचरणा शोफसंयुक्तातिव्यवायतः||३४||
🔊 Audio coming soon
ಶಶಿಲೇಕ ವ್ಯಾಖ್ಯಾ (ಇನ್ದು ಕೃತ)
ಸೈವ ವಾತಿಕೀ ಅತಿವ್ಯವಾಯಾಚ್ಛೋಫಸಂಯುಕ್ತಾ ಸತ್ಯತಿಚರಣೇತ್ಯುಚ್ಯತೇ| (ಸಾ ವಾತಿಕ್ಯೇವ ಅತಿವ್ಯವಾಯತಃ ಭೃಷಮೈಥುನಾದ್ಧೇತೋಃ ಶೋಫ ಸಂಯುಕ್ತಾ ಯೋನಿಪ್ರದೇಶೇ ಶ್ವಯಥುಮತೀ ಸಞ್ಜಾತಾ ಚೇದತಿಚರಣಾ ಅತಿಚರಣೇತಿ ಸಂಜ್ಞಾನ್ತರಂ ಲಭತೇ)|| ೩೪||
Adhikarana ಪ್ರಾಕ್ಚರಣಾ (೩೫) · Śloka ೩೫
ಮೈಥುನಾದತಿಬಾಲಾಯಾಃ ಪೃಷ್ಠಜಙ್ಘೋರುವಙ್ಕ್ಷಣಮ್| ರುಜನ್ ಸನ್ದೂಷಯೇದ್ಯೋನಿಂ ವಾಯುಃ ಪ್ರಾಕ್ಚರಣೇತಿ ಸಾ||೩೫||
मैथुनादतिबालायाः पृष्ठजङ्घोरुवङ्क्षणम्| रुजन् सन्दूषयेद्योनिं वायुः प्राक्चरणेति सा||३५||
🔊 Audio coming soon
ಶಶಿಲೇಕ ವ್ಯಾಖ್ಯಾ (ಇನ್ದು ಕೃತ)
ಅತಿಬಾಲಾಯಾ ಸ್ತ್ರಿಯಾ ಮೈಥುನಾದ್ವಾಯುಃ ಪೃಷ್ಠಾದಿಕಂ ರುಜನ್ ಯೋನಿಂ ಸನ್ದೂಷಯೇತ್| ಸಾ ವ್ಯಾಪನ್ನಾಮ್ನಾ ಪ್ರಾಕ್ಚರಣಾ| (ಬಾಲಾಯಾ ಅಸಮ್ಪೂರ್ಣಷೋಡಶವಯಸ್ಕಾಯಾ ಅತಿಮೈಥುನಾದನಲ್ಪವ್ಯವಾಯಾತ್ ಪೃಷ್ಠಜಙ್ಘೋರುವಙ್ಕ್ಷಣಂ ಪೃಷ್ಠಂ ಜಙ್ಘೇ ಊರು ವಙ್ಕ್ಷಣೌ ಚ ರುಜನ್ ಯೋನಿಂ ಸನ್ದೂಷಯೇತ್| ರುಕ್ತೋದಾದಿಯುಕ್ತಾಂ ಕರೋತಿ ಸಾ ಪ್ರಾಕ್ಚರಣೇತಿ ಯೋನಿವ್ಯಾಪತ್)||೩೫||
Adhikarana ಉದಾವೃತ್ತಾ (೩೬) · Śloka ೩೬
ವೇಗೋದಾರ್ವತ್ತನಾದ್ಯೋನಿಂ ಪ್ರಪೀಡಯತಿ ಮಾರುತಃ| ಸಾ ಫೇನಿಲಂ ರಜಃಕೃಚ್ಛ್ರಾದುದಾವೃತ್ತಂ ವಿಮುಞ್ಚತಿ| ಇಯಂ ವ್ಯಾಪದುದಾವೃತ್ತಾ||೩೬||
वेगोदार्वत्तनाद्योनिं प्रपीडयति मारुतः| सा फेनिलं रजःकृच्छ्रादुदावृत्तं विमुञ्चति| इयं व्यापदुदावृत्ता||३६||
🔊 Audio coming soon
ಶಶಿಲೇಕ ವ್ಯಾಖ್ಯಾ (ಇನ್ದು ಕೃತ)
ವೇಗೋದಾವರ್ತ್ತನಾದಧೋವಾತಾದಿವೇಗಧಾರಣನಿಮಿತ್ತಾದೂರ್ಧ್ವಮುದ್ಗಮಾದ್ವಾಯುರ್ಯೋನಿಂ ಪ್ರಪೀಡಯತಿ ಸಾ ಪೀಡತಾ ಸತ್ಯುದಾವೃತ್ತಂ ಬದ್ಧಂ ಫೇನಿಲಂ ಫೇನಯುಕ್ತಂ ರಜೋ ರಕ್ತಂ ಕೃಚ್ಛ್ರಾದ್ವಿಮುಞ್ಚತಿ| ಇಯಂ ವ್ಯಾಪನ್ನಮ್ನಾಽಪ್ಯುದಾವೃತ್ತಾ| (ಪ್ರಪೀಡಯತ್ಯತಿವ್ಯಥಾಂ ಕರೋತಿ| ಸಾ ಅನಿಲಪೀಡಿತಾ ಯೋನಿಃ ಋತುಕಾಲೇ ಪ್ರಾಪ್ತೇ ರಜೋ ರಕ್ತಂ ಫೇನಿಲಂ ಫೇನಯುಕ್ತಂ ಕೃಚ್ಛ್ರಾದಲ್ಪಾಲ್ಪಮುದಾವೃತ್ತಂ ಮಧ್ಯೇ ಮಧ್ಯೇ ಊರ್ಧ್ವಮಾವರ್ತಮಾನಂ ವಿಸೃಜತಿ)|| ೩೬||
Adhikarana ಜಾತಘ್ನೀ (೩೭) · Śloka ೩೭
ಜಾತಘ್ನೀ ತು ಯದಾನಿಲಃ| ಜಾತಂ ಜಾತಂ ಸುತಂ ಹನ್ತಿ ರೌಕ್ಷ್ಯಾದ್ದುಷ್ಟಾರ್ತ್ತವೋದ್ಭವಮ್||೩೭||
जातघ्नी तु यदानिलः| जातं जातं सुतं हन्ति रौक्ष्याद्दुष्टार्त्तवोद्भवम्||३७||
🔊 Audio coming soon
ಶಶಿಲೇಕ ವ್ಯಾಖ್ಯಾ (ಇನ್ದು ಕೃತ)
ಯದಾ ತು ದುಷ್ಟಾರ್ತ್ತವೋದ್ಭವಂ ಸುತಂ ಜಾತಂ ತತ್ಕಾಲ ಏವ ವಾಯೂ ರೌಕ್ಷ್ಯಾದ್ಧನ್ತಿ ತದಾ ಜಾತಘ್ನೀ ನಾಮ ವ್ಯಾಪದ್ಭವತಿ| (ಯದಾ ಯಸ್ಮಿನ್ ಕಾಲೇ ವಾಯೂ ರೌಕ್ಷ್ಯಾತ್ ಸ್ನೇಹಕ್ಷಯೋದ್ಭೂತರೂಕ್ಷಗುಣಾಧಿಕ್ಯಾತ್ ಕ್ರುದ್ಧೋ ದುಷ್ಟಾವರ್ತ್ತವೋದ್ಭವಂ ದುಷ್ಟಶೋಣಿತಸಮ್ಭೂತಂ ಜಾತಂ ಜಾತಂ ಸಞ್ಜಾತಾನ್ ಸರ್ವಾನಿತ್ಯರ್ಥಃ| ಜಾತಶಬ್ದಶಕ್ತ್ಯಾ ಜನ್ಮಾನನ್ತರತ ಏವೇತಿ ಚ ದ್ಯೋತ್ಯತೇ| ಹನ್ತಿ ಮಾರಯತಿ ತದಾ ತು ಜಾತಘ್ನೀ| ಜಾತಘ್ನೀ ನಾಮ ಯೋನಿವ್ಯಾಪತ್| ದುಷ್ಟಶೋಣಿತಸ್ಯಾಪಿ ಗರ್ಭಾಧಾನಸಾಮರ್ಥ್ಯಮಸ್ತೀತ್ಯುಕ್ತಂ ಶಾರೀರೇ)|| ೩೭||
Adhikarana ಅನ್ತರ್ಮುಖೀ (೩೮) · Śloka ೩೮
ಅತ್ಯಾಶಿತಾಯಾ ವಿಷಮಂ ಸ್ಥಿತಾಯಾಃ ಸುರತೇ ಮರುತ್| ಅನ್ನೇನೋತ್ಪೀಡಿತೋ ಯೋನೇಃ ಸ್ಥಿತಃ ಸ್ರೋತಸಿ ವಕ್ರಯೇತ್| ಸಸ್ಥಿಮಾಂಸಂ ಮುಖಂ ತೀವ್ರರುಜಮನ್ತರ್ಮುಖೀತಿ ಸಾ||೩೮||
अत्याशिताया विषमं स्थितायाः सुरते मरुत्| अन्नेनोत्पीडितो योनेः स्थितः स्रोतसि वक्रयेत्| सस्थिमांसं मुखं तीव्ररुजमन्तर्मुखीति सा||३८||
🔊 Audio coming soon
ಶಶಿಲೇಕ ವ್ಯಾಖ್ಯಾ (ಇನ್ದು ಕೃತ)
ಯಾ ತು ಸ್ತ್ರೀ ಅತ್ಯಾಶಿತಾ ಸತೀ ಸುರತೇ ಪುಂಯೋಗೇ ವಿಷಮಂ ಕೃತ್ವಾ ತಿಷ್ಠತಿ ತದಾ ತಸ್ಯಾ ಮರುದ್ವಾಯುರನ್ನೇನೋತ್ಪೀಡಿತೋ ಯೋನೇಃ ಸ್ರೋತಸಿ ಸ್ಥಿತಃ ಸನ್ ತಸ್ಯಾ ಮುಖಂ ತೀವ್ರರುಜಂ ಸಾಸ್ಥಿಮಾಂಸಂ ವಕ್ರಯೇತ್ ಸಾ ವ್ಯಾಪನ್ನಾಮ್ನಾಽನ್ತರ್ಮುಖೀ| (ಅತ್ಯಾಶಿತಾಯಾ ಅತಿಭುಕ್ತಾಯಾಃ ಸುರತೇ ಕರಣವೈಚಿತ್ರ್ಯಾದಙ್ಗಂ ವಿಷಮಂ ಕೃತ್ವಾ ಸ್ಥಿತಾಯಾ ನಾರ್ಯಾಃ ವಾಯೂರನ್ನೇನ ನಿರವಕಾಶಂ ನಿಷ್ಪೀಡಿತೋ ವಿಷಮಸ್ಥಿತ್ಯಾ ಸಾವಕಾಶೇ ಯೋನಿಸ್ರೋತಸ್ಯೇವ ಸ್ಥಿತಸ್ತಸ್ಯಾ ಮುಖಮಸ್ಥ್ನಾ ಮಾಂಸೇನ ಚ ಸಹ ತೀವ್ರರುಜಮತ್ಯರ್ಥಂ ವೇದನಂ ವಕ್ರೇಯೇತ್| ಸಾ ಅನ್ತರ್ಮುಖೀತಿ ನಾಮ ಯೋನಿವ್ಯಾಪತ್)|| ೩೮||
Adhikarana ಸೂಚೀಮುಖೀ (೩೯) · Śloka ೩೯
ವಾತಲಾಹಾರಸೇವಿನ್ಯಾ ಜನನ್ಯಾಂ ಕುಪಿತೋಽನಿಲಃ| ಸ್ತ್ರಿಯಾ ಯೋನಿಮಣುದ್ವಾರಾಂ ಕುರ್ಯಾತ್ ಸೂಚೀಮುಖೀತಿ ಸಾ||೩೯||
वातलाहारसेविन्या जनन्यां कुपितोऽनिलः| स्त्रिया योनिमणुद्वारां कुर्यात् सूचीमुखीति सा||३९||
🔊 Audio coming soon
ಶಶಿಲೇಕ ವ್ಯಾಖ್ಯಾ (ಇನ್ದು ಕೃತ)
ಜನನ್ಯಾಂ ಮಾತರಿ ವಾತಲಾಹಾರಸೇವಿನ್ಯಾಮನಿಲಃ ಕುಪಿತೋ ಯೋಷಾಯಾ ಯೋನಿಂ ಸಂವೃತಮುಖೀಂ ಕುರ್ಯಾತ್ ಸಾ ವ್ಯಾಪನ್ನಾಮ್ನಾ ಸೂಚೀಮುಖೀ|| ೩೯||
Adhikarana ಯೋನಿಶೋಷಃ (೪೦) · Śloka ೪೦
ವೇಗರೋಧಾದೃತೌ ವಾಯುರ್ದುಷ್ಟೋ ವಿಣ್ಮೂತ್ರಸಂಗ್ರಹಮ್| ಕರೋತಿ ಯೋನಿಶೋಷಞ್ಚ ಶುಷ್ಕಾಖ್ಯಾ ಸಾತಿವೇದನಾ||೪೦||
वेगरोधादृतौ वायुर्दुष्टो विण्मूत्रसंग्रहम्| करोति योनिशोषञ्च शुष्काख्या सातिवेदना||४०||
🔊 Audio coming soon
ಶಶಿಲೇಕ ವ್ಯಾಖ್ಯಾ (ಇನ್ದು ಕೃತ)
ಋತುಕಾಲೇ ವೇಗರೋಧಾದ್ದೃಷ್ಟೋ ವಾಯುರ್ವಿಣ್ಮೂತ್ರಸಂಗ್ರಹಂ ಯೋನಿಶೋಷಂ ಚ ಕರೋತಿ| ಸಾ ವ್ಯಾಪಚ್ಛುಷ್ಕಾಖ್ಯಾ| ಸಾ ಚಾತಿವೇದನಾ ಭವತಿ| (ಋತುಕಾಲೇ ವೇಗರೋಧಾತ್ ಅಧೋವಾತಾದಿವೇಗಧಾರಣಾತ್ ದುಷ್ಟಃ ಕ್ರುದ್ಧೋ ವಾಯುರ್ವಿಣ್ಮೂತ್ರಸಂಗ್ರಹಂ ಮಲಮೂತ್ರಯೋರ್ನಿರೋಧಂ ಯೋನಿಶೋಷಂ ಯೋನಿದ್ವಾರೇ ದ್ರವಾಭಾವಂ ಚ ಕರೋತಿ| ಅತಿವೇದನಾ ಅಧಿಕವೇದನಾಯುಕ್ತಾ ಯಾ ಏವಂವಿಧಾ ಸಾ ಶುಷ್ಕಾಖ್ಯಾ ಶುಷ್ಕಾ ಸಂಜ್ಞಾ ಯೋನಿವ್ಯಾಪತ್)|| ೪೦||
Adhikarana ವಾಮಿನೀ (೪೧) · Śloka ೪೧
ಷಡಹಾತ್ ಸಪ್ತರಾತ್ರಾದ್ವಾ ಶುಕ್ರಂ ಗರ್ಭಾಶಯಾನ್ಮರುತ್| ವಮೇತ್ಸರುಙ್ನೀರುಜೋ ವಾ ಯಸ್ಯಾಂ ಸಾ ವಾಮಿನೀ ಮತಾ||೪೧||
षडहात् सप्तरात्राद्वा शुक्रं गर्भाशयान्मरुत्| वमेत्सरुङ्नीरुजो वा यस्यां सा वामिनी मता||४१||
🔊 Audio coming soon
ಶಶಿಲೇಕ ವ್ಯಾಖ್ಯಾ (ಇನ್ದು ಕೃತ)
ಯಸ್ಯಾಂ ವ್ಯಾಪದಿ ನಿಷಿಕ್ತಂ ಶುಕ್ರಂ ಗರ್ಭಾಶಯಾನ್ಮರುತ್ ಸರುಜೋ ವಾ ನೀರುಜೋ ವಾ ಷಡಹಾತ್ ಸಪ್ತರಾತ್ರಾದ್ವಾ ಬಹಿಃ ಕ್ಷಿಪೇತ್ ಸಾ ವ್ಯಾಪದ್ವಾಮಿನೀ ಮತಾ| (ಯಸ್ಯಾಂ ವ್ಯಾಪದಿ ವಾಯುಃ ಷಡಹಾತ್ ಷಣ್ಣಾಮಹ್ನಾಂ ಸಮಾಹಾರಾತ್ ಹೇತ್ವರ್ಥಂ ಪಞ್ಚಾಮ್ಯಾಃ ಕರಣಾರ್ಥೇ ಪರಿಣಾಮಾತ್ ಷಡ್ಭಿರಹೋಭಿರಿತ್ಯರ್ಥಃ| ಸಪ್ತಾಹಾತ್ ಸಪ್ತಭಿರಹೋಭಿರ್ವಾ| ಅತ್ರ ಸಪ್ತಾಹಶಬ್ದಸ್ಯ ಮರ್ಯಾದಾತ್ವೇನಾಭಿವಿಧಿತ್ವೇನ ಚೇಷ್ಟತ್ವಾದತ್ರ ಷದಹಾತ್ ಸಪ್ತರಾತ್ರಾದ್ವೇತಿ ಪಕ್ಷದ್ವಯಂ ಪರಿಗೃಹೀತಮ್| ಸರುಕ್ ರುಜಾ ಸಹಿತಃ ನೀರುಜೋ ರುಜಾ ರಹಿತಃ ವಾಶಬ್ದೋ ವಿಕಲ್ಪೇ ಕ್ವಚಿತ್ ಸರುಜಃ ಕ್ವಚಿನ್ನೀರುಜಶ್ಚೇತ್ಯರ್ಥಃ| ಶುಕ್ರಂ ಪುಂಸಾ ನಿಷಿಕ್ತಂ ಗರ್ಭಾಶಯಾತ್ ಗರ್ಭಕೋಷ್ಠಂ ಪ್ರವಿಷ್ಟಮಪೀತಿ ಭಾವಃ| ವಮೇತ ಬಹಿರ್ನಿರಸ್ಯೇತ್| ನುದೇದಿತಿ ವಕ್ತವ್ಯೇ ವಮೇದಿತ್ಯುಕ್ತಿರ್ವಾಮಿನೀಶಬ್ದಸ್ಯ ನಿರುಕ್ತಿದ್ಯೋತನಾಯ| ಏವಂವಿಧಾ ಸಾ ವ್ಯಾಪದ್ವಾಮಿನೀಸಂಜ್ಞಾ)|| ೪೧||
Adhikarana ಷಣ್ಡಾ (೪೨) · Śloka ೪೨
ಯೋನೌ ವಾತೋಪತಪ್ತಾಯಾಂ ಸ್ತ್ರೀಗರ್ಭೇ ಬೀಜದೋಷತಃ| ನೃದ್ವೇಷಿಣ್ಯಸ್ತನೀ ಚ ಸ್ಯಾತ್ ಷಣ್ಡಸಂಜ್ಞಾನುಪಕ್ರಮಾ||೪೨||
योनौ वातोपतप्तायां स्त्रीगर्भे बीजदोषतः| नृद्वेषिण्यस्तनी च स्यात् षण्डसंज्ञानुपक्रमा||४२||
🔊 Audio coming soon
ಶಶಿಲೇಕ ವ್ಯಾಖ್ಯಾ (ಇನ್ದು ಕೃತ)
ಸ್ತ್ರ್ಯಾಖ್ಯಗರ್ಭೇ ಬೀಜದೋಷಾದ್ವಾತೋಪತಪ್ತಾಯಾಂ ಯೋನೌ ಪುರುಷದ್ವೇಷಿಣೀ ಸ್ತನರಹಿತಾ ಚ ಸ್ತ್ರೀ ಸ್ಯಾತ್ ಸಾ ವ್ಯಾಪತ್ ಷಣ್ಡಸಂಜ್ಞಾನುಪಕ್ರಮಾ ತ್ಯಾಜ್ಯಾ| (ಯೋನೌ ಕುತಶ್ಚಿತ್ ಕಾರಣಾತ್ ಕ್ರುದ್ಧೇನ ವಾಯುನಾ ಪೀಡಿತಾಯಾಂ ಸತ್ಯಾಂ ಮಾತುರಿತ್ಯರ್ಥಾತ್| ಗರ್ಭೇ ಗರ್ಭಾಧಾನಸಮಯೇ ಬೀಜದೋಷತಃ ಆರ್ತ್ತವದುಷ್ಟ್ಯಾ ಸ್ತ್ರೀ ಜಾಯಮಾನಾ ಪುತ್ರೀ ನೃದ್ವೇಷಿಣೀ ಪುಂಸಮ್ಭೋಗವಿರಕ್ತಾ ಅಸ್ತನೀ ಯೌವನೇಽತ್ಯಲ್ಪಸ್ತನೀ ಚ ಸ್ಯಾತ್ ಸಾ ವ್ಯಾಪತ್ಷಣ್ಡಾಖ್ಯಾ ಅನುಪಕ್ರಮಾ ಅಸಾಧ್ಯತ್ವಾಚ್ಚಿಕಿತ್ಸಾರಹಿತಾ ಚ )|| ೪೨||
Adhikarana ಮಹಾಯೋನಿಃ (೪೩) · Śloka ೪೩
ದುಷ್ಟೋ ವಿಷ್ಟಭ್ಯ ಯೋನ್ಯಾಸ್ಯಂ ಗರ್ಭಕೋಷ್ಠಂ ಚ ಮಾರುತಃ| ಕುರುತೇ ವಿವೃತಾಂ ಸ್ರಸ್ತಾಂ ವಾತಿಕೀಮಿವ ದುಃಖಿತಾಮ್| ಉತ್ಸನ್ನಮಾಂಸಾಂ ತಾಮಾಹುರ್ಮಹಾಯೋನಿಂ ಮಹಾರುಜಮ್||೪೩||
दुष्टो विष्टभ्य योन्यास्यं गर्भकोष्ठं च मारुतः| कुरुते विवृतां स्रस्तां वातिकीमिव दुःखिताम्| उत्सन्नमांसां तामाहुर्महायोनिं महारुजम्||४३||
🔊 Audio coming soon
ಶಶಿಲೇಕ ವ್ಯಾಖ್ಯಾ (ಇನ್ದು ಕೃತ)
ದುಷ್ಟೋ ವಾಯುರ್ಯೋನ್ಯಾಸ್ಯಂ ಗರ್ಭಕೋಷ್ಠಞ್ಚಾ ವಿಷ್ಟಭ್ಯ ಯೋನಿಂ ವಿವೃತಾಂ ಸ್ಥಾನಾಚ್ಚ ಸ್ರಸ್ತಾಂ ವಾತಿಕ್ಯಾಖ್ಯವ್ಯಾಪದಮಿವ ಚ ದುಃಖಿತಾಂ ವ್ಯಥಿತಾಮುತ್ಸನ್ನಮಾಂಸಾಂ ಮಹಾರುಜಞ್ಚ ಕುರುತೇ ತಾಂ ನಾಮ್ನಾ ಮಹಾಯೋನಿಮಾಹುಃ| (ಯಥಾಸ್ವೈಃ ಗುಹ್ಯರೋಗಕಾರಣಾಭೂತೈರ್ದೂಷಣೈರ್ದುಷ್ಟೋ ವಾಯುರ್ಯೋನಿಮುಖಂ ಗರ್ಭಾಶಯಞ್ಚ ವಿಷ್ಟಭ್ಯ ಸ್ತಮ್ಭಯಿತ್ವಾ ವಿವೃತಾಂ ನ ಕದಾಚಿದಪಿ ಸಂವರಣಯುಕ್ತಾಂ ಸ್ರಸ್ತಾಂ ಸ್ಥಾನಾಚ್ಚಲಿತಾಂ ಬಹಿರ್ನಿಸ್ಸೃತಾಮಿತ್ಯರ್ಥಃ| ವಾತಿಕೀಮಿವ ವಾತಿಕ್ಯಾಖ್ಯಾಂ ವ್ಯಾಪದಮಿವ ದುಃಖಿತಾಂ ರುಕ್ತೋದಾಯಾಮಾದಿವಿವಿಧೋಪದ್ರವಯುಕ್ತಾಮಿತ್ಯರ್ಥಃ| ಉತ್ಸನ್ನಮಾಂಸಾಂ ಉದ್ವಾನ್ತಮುಖತ್ವಾದುತ್ಸನ್ನಮಾಂಸಾಂ ಮಹಾರುಜಾಂ ಅತ್ಯರ್ಥವೇದನಾಯುಕ್ತಾಂ ಕುರುತೇ ಯೋನಿರಿತಿ ಮಹಾಯೋನಿಶಬ್ದಸಾನ್ನಿಧ್ಯಾಹಾರ್ಯಂ ತಾಂ ವ್ಯಾಪದಂ ಮಹಯೋನಿಂ ಮಹಾಯೋನ್ಯಾಖ್ಯಾಮಾಹುಃ)|| ೪೩||
Adhikarana ಪೈತ್ತಿಕೀ ಯೋನಿವ್ಯಾಪತ್ (೪೪) · Śloka ೪೪
ಯಥಾಸ್ವೈರ್ದೂಷಣೈರ್ದುಷ್ಟಂ ಪಿತ್ತಂ ಯೋನಿಸಮಾಶ್ರಿತಮ್| ಕರೋತಿ ದಾಹಪಾಕೋಷಾ ಪೂತಿಗನ್ಧಜ್ವರಾನ್ವಿತಾಮ್| ಭೃಶೋಷ್ಣಭೂರಿಕುಣಪನೀಲಪೀತಾಸಿತಾರ್ತ್ತವಾಮ್| ಸಾ ವ್ಯಾಪತ್ ಪೈತ್ತಿಕೀ||೪೪||
यथास्वैर्दूषणैर्दुष्टं पित्तं योनिसमाश्रितम्| करोति दाहपाकोषा पूतिगन्धज्वरान्विताम्| भृशोष्णभूरिकुणपनीलपीतासितार्त्तवाम्| सा व्यापत् पैत्तिकी||४४||
🔊 Audio coming soon
ಶಶಿಲೇಕ ವ್ಯಾಖ್ಯಾ (ಇನ್ದು ಕೃತ)
ಯಥಾಸ್ವೈರ್ದೂಷಣೈರ್ನಿದಾನಕಥಿತೈರ್ದುಷ್ಟಂ ಪಿತ್ತಂ ಯೋನಿಮಾಶ್ರಿತ್ಯ ತಾಮೇವ ದಾಹಾದ್ಯನ್ವಿತಾಂ ಭೃಶೋಷ್ಣಾದಿಗುಣಾಂ ಚ ಕರೋತಿ ಸಾ ವ್ಯಾಪನ್ನಾಮ್ನಾ ಪೈತ್ತಿಕೀ| (ಯಥಾಸ್ವೈಃ ಸರ್ವರೋಗನಿದಾನೋಕ್ತೈಃ ಕಟ್ವಮ್ಲಾದಿಭಿರ್ದುಷ್ಟಂ ಪ್ರಾಪ್ತದೂಷಣಂ ಯೋನಿಂ ಪ್ರಾಪ್ತಂ ಪಿತ್ತಂ ತಾಂ ಯೋನಿಂ ದಾಹಾದ್ಯನ್ವಿತಾಂ ಭೃಶೋಷ್ಣಾದಿಗುಣಯುಕ್ತಾರ್ತ್ತವಾಂ ಚ ಕರೋತಿ| ದಾಹಃ ಸರ್ವಾಙ್ಗೀಣಃ ದಾಹಃ| ಊಷಾ ಪ್ರಾದೇಶಿಕಾ ದಾಹಃ| ಪೂತಿಗನ್ಧೋ ದುರ್ಗನ್ಧಃ| ಕುಣಪಾಱ್ತ್ತವಂ ರಕ್ತದೋಷಜಂ ಪ್ರಾಕ್ ಪುತ್ರಕಾಮೀಯಾಧ್ಯಾಯ ಉಕ್ತಮ್| ಏವಂವಿಧಾ ವ್ಯಾಪತ್ಸಾ ಪೈತ್ತಿಕೀ ನಾಮ ಭವತಿ)|| ೪೪||
Adhikarana ರಕ್ತಯೋನಿಃ (೪೫) · Śloka ೪೫
ರಕ್ತಯೋನ್ಯಾಖ್ಯಾಸೃಗತಿಸ್ರುತೇಃ||೪೫||
रक्तयोन्याख्यासृगतिस्रुतेः||४५||
🔊 Audio coming soon
ಶಶಿಲೇಕ ವ್ಯಾಖ್ಯಾ (ಇನ್ದು ಕೃತ)
ಏಷೈವಾತಿರಕ್ತಸ್ರುತೇಃ ರಕ್ತಯೋನ್ಯಾಖ್ಯಾ ಭವತಿ| (ಸಾ ಪೈತ್ತಿಕೀ ವ್ಯಾಪದೇವಾತ್ಯಸೃಕ್ಸ್ರಾವಾದ್ಧೇತೋಃ ರಕ್ತಯೋನಿಸಂಜ್ಞಾ ಸ್ಯಾತ್)|| ೪೫||
Adhikarana ಶ್ಲೈಷ್ಮಿಕೀ ಯೋನಿವ್ಯಾಪತ್ (೪೬) · Śloka ೪೬
ಕಫೋಽಭಿಷ್ಯನ್ದಿಭಿಃ ಕ್ರುದ್ಧಃ ಕುರ್ಯಾದ್ಯೋನಿಮವೇದನಾಮ್| ಶೀತಲಾಂ ಕಣ್ಡುಲಾಂ ಪಾಣ್ಡುಂ ಪಿಚ್ಛಿಲಾಂ ತದ್ವಿಧಸ್ರುತಿಮ್| ಸಾ ವ್ಯಾಪಚ್ಛ್ಲೈಷ್ಮಿಕೀ||೪೬||
कफोऽभिष्यन्दिभिः क्रुद्धः कुर्याद्योनिमवेदनाम्| शीतलां कण्डुलां पाण्डुं पिच्छिलां तद्विधस्रुतिम्| सा व्यापच्छ्लैष्मिकी||४६||
🔊 Audio coming soon
ಶಶಿಲೇಕ ವ್ಯಾಖ್ಯಾ (ಇನ್ದು ಕೃತ)
ಅಭಿಷ್ಯನ್ದಿಭಿಃ ಸ್ರೋತೋಮಾಲಿನ್ಯಕರೈರಾಹಾರೈಃ ಕಫಃ ಕ್ರುದ್ಧೋ ವೇದನಾರಹಿತಾಂ ಶೀತಲಾದಿಗುಣಾಂ ಚ ಯೋನಿಂ ಕುರ್ಯಾತ್| ತದ್ವಿಧಸ್ರುತಿಂ ಶೀತಲಾದಿ ಗುಣಸ್ರುತಿಂ ಸಾ ವ್ಯಾಪನ್ನಾಮ್ನಾ ಶ್ಲೈಷ್ಮಿಕೀ| (ಯೋನಿಂ ಅವೇದನಾಮೀಷದ್ವೇದನಾಯುಕ್ತಾಂ ಶೀತಲಾಂ ಶೀತಸ್ಪರ್ಶಾಂ ಕಣ್ಡೂಲಾಂ ಕಣ್ಡುಯುಕ್ತಾಂ ಪಾಣ್ಡು ಪಿಚ್ಛಿಲಾಂ ಪಾಣ್ಡುರವರ್ಣಾಂ ಪೈಚ್ಛಿಲ್ಯಯುಕ್ತಾಂ ಚ ತದ್ವಿಧಸ್ರುತಿಂ ಪಾಣ್ಡುಪಿಚ್ಛಿಲಾಮ್ಬು ಸ್ರವಣಯುಕ್ತಾಂ ಚ ಕರೋತಿ)|| ೪೬||
Adhikarana ಲೋಹಿತಕ್ಷಯಾಖ್ಯಾ (೪೭) · Śloka ೪೭
ವಾತಪಿತ್ತಾಭ್ಯಾಂ ಕ್ಷೀಯತೇ ರಜಃ| ಸದಾಹಕಾಱ್ಶ್ಯವೈವರ್ಣ್ಯ ಯಸ್ಯಾಂ ಸಾ ಲೋಹಿತಕ್ಷಯಾ||೪೭||
वातपित्ताभ्यां क्षीयते रजः| सदाहकाऱ्श्यवैवर्ण्य यस्यां सा लोहितक्षया||४७||
🔊 Audio coming soon
ಶಶಿಲೇಕ ವ್ಯಾಖ್ಯಾ (ಇನ್ದು ಕೃತ)
ಯಸ್ಯಾಂ ವ್ಯಾಪದಿ ವಾತಪಿತ್ತಾಭ್ಯಾಂ ರಜಃ ಕ್ಷೀಯತೇ ದಾಹಾದಿಕೃಚ್ಚ ಭವತಿ ಸಾ ವ್ಯಾಪನ್ನಾಮ್ನಾ ಲೋಹಿತಕ್ಷಯಾ| (ಯಸ್ಯಾಂ ಯೋನಿವ್ಯಾಪದ್ಯನಿಲಪಿತ್ತಾಭ್ಯಾಂ ಕಾರಣಾಭ್ಯಾಂ ರಜೋ ರಕ್ತಂ ದಾಹಾದ್ಯನ್ವಿತಂ ಕ್ಷೀಯತೇ ಕ್ಷಯಂ ಯಾತಿ ಸಾ ಲೋಹಿತಕ್ಷ್ಯಾಖ್ಯಾ ವ್ಯಾಪತ್)|| ೪೭||
Adhikarana ಪರಿಪ್ಲುತಾ (೪೮) · Śloka ೪೮
ಪಿತ್ತಲಾಯಾ ನೃಸಂವಾಸೇ ಕ್ಷವಥೂದ್ಗಾರಧಾರಣಾತ್| ಪಿತ್ತಯುಕ್ತೇನ ಮರುತಾ ಯೋನಿರ್ಭವತಿ ದೂಷಿತಾ| ಶೂನಾ ಸ್ಪರ್ಶಾಸಹಾ ಸಾರ್ತ್ತಿರ್ನೀಲಪೀತಾಸ್ರವಾಹಿನೀ| ಬಸ್ತಿಕುಕ್ಷಿಗುರುತ್ವಾತಿಸಾರಾರೋಚಕಕಾರಿಣೀ| ಶ್ರೋಣಿವಙ್ಕ್ಷಣರುಕ್ತೋದಜ್ವರಕೃತ್ಸಾ ಪರಿಪ್ಲುತಾ||೪೮||
पित्तलाया नृसंवासे क्षवथूद्गारधारणात्| पित्तयुक्तेन मरुता योनिर्भवति दूषिता| शूना स्पर्शासहा सार्त्तिर्नीलपीतास्रवाहिनी| बस्तिकुक्षिगुरुत्वातिसारारोचककारिणी| श्रोणिवङ्क्षणरुक्तोदज्वरकृत्सा परिप्लुता||४८||
🔊 Audio coming soon
ಶಶಿಲೇಕ ವ್ಯಾಖ್ಯಾ (ಇನ್ದು ಕೃತ)
ಪಿತ್ತಲಾಯಾಃ ಪಿತ್ತಪ್ರಕೃತೇಃ ಸ್ತ್ರಿಯಾ ನೃಸಂವಾಸೇ ಕ್ಷವಥೋರುದ್ಗಾರಸ್ಯ ಚ ಧಾರಣಾತ್ ಪಿತ್ತಯುಕ್ತೇನ ವಾಯುನಾ ದೂಷಿತಾ ಯೋನಿಃ ಶೂನಾದಿಗುಣಾ ಭವತಿ ಸಾ ವ್ಯಾಪನ್ನಾಮ್ನಾ ಪರಿಪ್ಲುತಾ| (ಪಿತ್ತಲಾಯಾಃ ಪ್ರಭೂತಪಿತ್ತಾಯಾಃ ಪಿತ್ತಪ್ರಕೃತೇರಿತ್ಯರ್ಥಃ| ನೃಸಂವಾಸೇ ಪುಂಸಙ್ಗತೌ ಕ್ಷವಥೂದ್ಗಾರಯೋರ್ಧಾರಣಾತ್ ಪಿತ್ತಯುಕ್ತೇನ ಮರುತಾ ದೂಷಿತಾ ಯೋನಿಃ ಶೂನಾ ಶೋಫಯುಕ್ತಾ ಸ್ಪರ್ಶಾಸಹಾ ಸ್ಪರ್ಶಂ ಕಿಞ್ಚಿದಪ್ಯಸಹಮಾನಾ ಸಾರ್ತ್ತಿಃ ರುಜಾ ಯುಕ್ತಾ ನೀಲಪೀತಾಸ್ರವಾಹಿನೀ ನೀಲವರ್ಣಂ ಪೀತವರ್ಣಂ ವಾ ಅಸ್ರಂ ರಕ್ತಂ ವಹಮಾನಾ ತಥಾ ಬಸ್ತೈಃ ಕುಕ್ಷೇಶ್ಚ ಗುರುತ್ವಮತಿಸಾರಮರೋಚಕಂ ಚ ಕುರ್ವಾಣಾ ಶ್ರೋಣ್ಯಾಂ ವಙ್ಕ್ಷಣ್ಯೋಃ ರುಕ್ತೋದೌ ಚ ಜ್ವರಂ ಚ ಕುರ್ವತೀ ಭವತಿ ಸಾ ವ್ಯಾಪತ್ ಪರಿಪ್ಲುತಾಖ್ಯಾ)|| ೪೮||
Adhikarana ಉಪಪ್ಲುತಾ (೪೯) · Śloka ೪೯
ವಾತಶ್ಲೇಷ್ಮಾಮಯವ್ಯಾಪ್ತಾ ಶ್ವೇತಪಿಚ್ಛಿಲವಾಹಿನೀ| ಉಪಪ್ಲುತಾ ಸ್ಮೃತಾ ಯೋನಿಃ||೪೯||
वातश्लेष्मामयव्याप्ता श्वेतपिच्छिलवाहिनी| उपप्लुता स्मृता योनिः||४९||
🔊 Audio coming soon
ಶಶಿಲೇಕ ವ್ಯಾಖ್ಯಾ (ಇನ್ದು ಕೃತ)
ವಾತಶ್ಲೇಷ್ಮಲೈರಾಮಯೈರ್ವ್ಯಾಪ್ತಾ ಯೋನಿಃ ಶ್ವೇತಂ ಪಿಚ್ಛಿಲಂ ಚ ವಹತಿ ಸಾ ನಾಮ್ನೋಽಪಪ್ಲುತಾ ಸ್ಮೃತಾ| (ವಾತನಿಮಿತ್ತೈಃ ಶ್ಲೇಷ್ಮನಿಮಿತ್ತೈಶ್ಚಾಮಯೈರ್ವ್ಯಾಪ್ತಾ ಪರಿವೃತಾ ಶ್ವೇತಪಿಚ್ಛಿಲವಾಹಿನೀ ಶ್ವೇತವರ್ಣಂ ಪೈಚ್ಛಿಲ್ಯಯುಕ್ತಂ ಚಾಸ್ರಂ ವಹಮಾನಾ ಯೋನಿಃ ಯೋನಿವ್ಯಾಪತ್ ಉಪಪ್ಲುತಾಖ್ಯಾ ಸ್ಮೃತಾ)|| ೪೯||
Adhikarana ವಿಪ್ಲುತಾ (೫೦) · Śloka ೫೦
ವಿಪ್ಲುತಾಖ್ಯಾ ತ್ವಧಾವನಾತ್| ಸಞ್ಜಾತಜನ್ತುಃ ಕಣ್ಡೂಲಾ ಕಣ್ಡ್ವಾ ಚಾತಿರತಿಪ್ರಿಯಾ||೫೦||
विप्लुताख्या त्वधावनात्| सञ्जातजन्तुः कण्डूला कण्ड्वा चातिरतिप्रिया||५०||
🔊 Audio coming soon
ಶಶಿಲೇಕ ವ್ಯಾಖ್ಯಾ (ಇನ್ದು ಕೃತ)
ಯಾ ತು ಯೋನಿರಧಾವನಾದಪ್ರಕ್ಷಾಲನಾದ್ಧೇತೋಃ ಸಞ್ಜಾತಜನ್ತುಃ ಕಣ್ಡೂಲಾ ಚ ಭವತಿ ಕಣ್ಡ್ವಾ ಚಾತಿರತಿಪ್ರಿಯಾ ಅತಿವ್ಯವಾಯಪ್ರಿಯಾ ಚ ಭವತಿ ಸಾ ನಾಮ್ನಾ ವಿಪ್ಲುತಾ| (ವಿಪ್ಲುತಾಖ್ಯಾ ತು ಯೋನಿಃ ತುಶಬ್ದಃ ಪರಿಪ್ಲುತಾತೋ ವಿಶೇಷದ್ಯೋತಕಃ| ಅಧಾವನಾದನ್ತರ್ಮಲಾಪರಿಶೋಧನಾತ್ ಸಞ್ಜಾತಜನ್ತುಃ ಯೋನ್ಯನ್ತರ್ಗತರಕ್ತಜಕ್ರಿಮಿಯುತತ್ವಾದಾಗನ್ತು ಕ್ರಿಮಿಸಮ್ಭವೇ ತ್ವತಿರತಿ ಪ್ರಿಯೇತ್ಯಸ್ಯಾನುಪಪತ್ತೇಶ್ಚಾನ್ತಃಪ್ರವೃದ್ಧನೈಸರ್ಗಿಕಕ್ರಿಮಿರಿತ್ಯರ್ಥಃ| ರತಿರಹಸ್ಯೇ ಚೈತತ್ಸ್ಪಷ್ಟಮುಕ್ತಮ್- ರಕ್ತಜಾಃ ಕ್ರಿಮಯಃ ಸೂಕ್ಷ್ಮಾ ಮೃದುಮಧ್ಯೋಗ್ರಶಕ್ತಯಃ| ಸ್ಮರಸದ್ಮನಿ ಕಣ್ಡೂತಿಂ ಜನಯನ್ತಿ ಯಥಾಬಲಮ್|| ಧ್ವಜದಣ್ಡಾಭಿಘಾತೇನ ಕಣ್ಡೂತ್ಯಪನಯಾದತಃ| ರಕ್ಷಣಾಚ್ಚ ಸುಖಮ್|| ಇತಿ| ಕಣ್ಡೂಲಾ ಅಮರ್ಷಣೀಕಣ್ಡೂಯುಕ್ತಾ| ಕಣ್ಡ್ವಾ ಕಣ್ಡೂತಿಹೇತೋಃ| ಚಶಬ್ದಃ ಸಞ್ಜಾತಜನ್ತುತ್ವಾತ್ ಕಣ್ಡೂಃ ಕಣ್ಡುತ್ಯಾ ರತ್ಯಭಿನಿವೇಶಶ್ಚೇತಿಹೇತುಪಾರಮ್ಪರ್ಯದ್ಯೋತನಾರ್ಥಃ| ಅತಿರತಿಪ್ರಿಯಾ ಅತೀವ ಸುರತೇಚ್ಛುಃ)|| ೫೦||
Adhikarana ಕರ್ಣಿನೀ (೫೧) · Śloka ೫೧
ಅಕಾಲವಾಹನಾದ್ವಾಯುಃ ಶ್ಲೇಷ್ಮರಕ್ತವಿಮೂರ್ಚ್ಛಿತಃ| ಕರ್ಣಿಕಾಂ ಜನಯೇದ್ಯೋನೌ ರಜೋಮಾರ್ಗನಿರೋಧಿನೀಮ್| ಸಾ ಕರ್ಣಿನೀ||೫೧||
अकालवाहनाद्वायुः श्लेष्मरक्तविमूर्च्छितः| कर्णिकां जनयेद्योनौ रजोमार्गनिरोधिनीम्| सा कर्णिनी||५१||
🔊 Audio coming soon
ಶಶಿಲೇಕ ವ್ಯಾಖ್ಯಾ (ಇನ್ದು ಕೃತ)
ಅಕಾಲವಾಹನಾದಪ್ರಾಪ್ತಾಮ್ಬ್ವೀರಣಾದ್ವಾಯುಃ ಶ್ಲೇಷ್ಮರಕ್ತಾಭ್ಯಾಂ ಮಿಶ್ರಿತೋ ಯೋನೌ ರಜೋಮಾರ್ಗನಿರೋಧಿನೀಂ ಕರ್ಣಿಕಾಂ ಜನಯೇತ್| ಸಾ ವ್ಯಾಪನ್ನಾಮ್ನಾ ಕರ್ಣಿನೀ| (ವಾಯುರಕಾಲವಾಹನಾದ್ವೇಗೋದೀರಣಾತ್| ಕಾಶ್ಚಿದ್ರತಾನ್ತೇ ಕಾಮಾಮ್ಬು ಛಲಾದ್ವಞ್ಚಯಿತುಂ ಪ್ರಿಯಾನ್| ಮೂತ್ರಂ ಸೃಜನ್ತ್ಯಕಾಲೇ ಯಾ ಮದನಾಮ್ಬವೇವ ತತ್ ದ್ವಯಮ್| ಅಕಾಲವಾಹನಸ್ಯಾರ್ಥ ಇತಿ ವ್ಯಾಚಷ್ಟಸಾರಕೃತ್| ದ್ವೇಧಾಽಪ್ಯನಿಚ್ಛಾಸುರತೇ ದ್ರುತಿಭಾವಃ ಪ್ರತೀಯತೇ| ಶ್ಲೇಷ್ಮರಕ್ತವಿಮೂರ್ಚ್ಛಿತಃ ಶ್ಲೇಷ್ಮ ರಕ್ತಾಭ್ಯಾಂ ವಿಮೂರ್ಚ್ಛಿತೋ ವರ್ದ್ಧಿತಃ ಶ್ಲೇಷ್ಮಸಮ್ಬನ್ಧಾತ್ ಘನೀಭೂಯ ದುರ್ಮಾಂಸ ಪ್ರಾಯತಾಂ ಪ್ರಾಪ್ತಸ್ಯ ರಕ್ತಸ್ಯ ವಾಯುನೋದೀರಣೇ ಕರ್ಣಿನ್ಯಾಃ ಸಮ್ಪ್ರಾಪ್ತಿರಿತಿ ಭಾವಃ| ಯೋನೌ ಗರ್ಭಾಶಯದ್ವಾರಮುಖೇ ರಜೋಮಾರ್ಗನಿರೋಧಿನೀಂ ಗರ್ಭಾಶಯದ್ವಾರ ಸಂವೃತಿಕರೀಂ| ಅತ ಏವ ನಿಷಿಕ್ತಸ್ಯ ಶುಕ್ರಸ್ಯಾಪ್ರತಿಗ್ರಹಾದ್ಗರ್ಭೋ ನ ಜಾಯತ ಇತಿ ಭಾವಃ| ಕರ್ಣಿಕಾಂ ಪದ್ಮಕರ್ಣಿಕಾತುಲ್ಯಂ ಮಾಂಸಾಙ್ಕುರಮಿತ್ಯರ್ಥಃ| ಜನಯೇದಾವಿಷ್ಕುರ್ಯಾತ್| ಸಾ ಕರ್ಣಿನೀಸಂಜ್ಞಾ ವ್ಯಾಪತ್)|| ೫೧||
Adhikarana ಸಾನ್ನಿಪಾತಿಕೀ ಯೋನಿವ್ಯಾಪತ್ (೫೨) · Śloka ೫೨
ತ್ರಿಭಿರ್ದೋಷೈರ್ಯೋನಿಗರ್ಭಾಶಯಾಶ್ರಿತೈಃ| ಯಥಾಸ್ವೋಪದ್ರವಕರೈರ್ವ್ಯಾಪತ್ ಸಾ ಸಾನ್ನಿಪಾತಿಕೀ||೫೨||
त्रिभिर्दोषैर्योनिगर्भाशयाश्रितैः| यथास्वोपद्रवकरैर्व्यापत् सा सान्निपातिकी||५२||
🔊 Audio coming soon
ಶಶಿಲೇಕ ವ್ಯಾಖ್ಯಾ (ಇನ್ದು ಕೃತ)
ತ್ರಿಭಿರ್ದೋಷೈರ್ಯೋನೌ ಗರ್ಭಾಶಯೇ ವಾಶ್ರಿತೈರ್ಯಥಾಸ್ವೋಪದ್ರವಕರೈಃ ಸೂತ್ರೋಕ್ತವಾತಾದ್ಯುಪದ್ರವ್ಯಕರೈರ್ಯಾ ವ್ಯಾಪತ್ ಸಾ ನಾಮ್ನಾ ಸಾನ್ನಿಪಾತಿಕೀ| (ಯೋನಿಂ ಗರ್ಭಾಶಯಂ ಚಾಶ್ರಿತ್ಯ ರುಕ್ತೋದದಾಹಪಾಕಶೈತ್ಯಕಣ್ಡ್ವಾದಿಸ್ವಸ್ವೋಪದ್ರವಂ ಕುರ್ವದ್ಭಿರ್ವಾತಾದಿಭಿರ್ಯಾ ವ್ಯಾಪತ್ ಸಾ ಸಾನ್ನಿಪಾತಿಕೀ ಸಂಜ್ಞಾ)|| ೫೨||
Adhikarana ಯೋನಿವ್ಯಾಪದುಪದ್ರವಾಃ (೫೩-೩೮) · Śloka ೩೮
ಇತಿ ಯೋನಿಗದಾ ನಾರೀ ಯೈಃ ಶುಕ್ರಂ ನ ಪ್ರತೀಚ್ಛತಿ| ತತೋ ಗರ್ಭಂ ನ ಗೃಹ್ಣಾತಿ ರೋಗಾಂಶ್ಚಾಪ್ನೋತಿ ದಾರುಣಾನ್| ಅಸೃಗ್ದರಾರ್ಶೋಗುಲ್ಮಾದೀನಾಬಾಧಾಂಶ್ಚಾನಿಲಾದಿಭಿಃ||೫೩|| ಇತಿ ವೈದ್ಯಪತಿಸಿಂಹಗುಪ್ತಸ್ಯ ಸೂನೋರ್ವಾಗ್ಭಟಸ್ಯ ಕೃತಾ- ವಷ್ಟಾಙ್ಗಸಂಗ್ರಹಸಂಹಿತಾಯಾಮುತ್ತರತನ್ತ್ರೇ ಗುಹ್ಯರೋಗ- ವಿಜ್ಞಾನೀಯೋ ನಾಮಾಷ್ಟತ್ರಿಂಶೋಽಧ್ಯಾಯಃ||೩೮||
इति योनिगदा नारी यैः शुक्रं न प्रतीच्छति| ततो गर्भं न गृह्णाति रोगांश्चाप्नोति दारुणान्| असृग्दरार्शोगुल्मादीनाबाधांश्चानिलादिभिः||५३|| इति वैद्यपतिसिंहगुप्तस्य सूनोर्वाग्भटस्य कृता- वष्टाङ्गसंग्रहसंहितायामुत्तरतन्त्रे गुह्यरोग- विज्ञानीयो नामाष्टत्रिंशोऽध्यायः||३८||
🔊 Audio coming soon
ಶಶಿಲೇಕ ವ್ಯಾಖ್ಯಾ (ಇನ್ದು ಕೃತ)
ಇತಿ ವಿಂಶತಿರ್ವಾತಿಕ್ಯತಿಚರಣಾಪ್ರಾಕ್ವರಣೋದಾವೃತಾಜಾತಘ್ನ್ಯನ್ತರ್ಮುಖೀಸೂಚೀ -ಶುಷ್ಕಾಖ್ಯಾ-ವಾಮಿನೀ-ಷಣ್ಡಾ-ಮಹಾಯೋನಿ-ಪಿತ್ತಯೋನಿ-ರಕ್ತಯೋನಿ-ಶ್ಲೈಷ್ಮಿಕೀ-ಲೋಹತಕ್ಷಯೋಽಪಪ್ಲುತಾ-ಪರಿಪ್ಲುತಾ-ವಿಪ್ಲುತಾ-ಕರ್ಣಿನೀ-ಸಾನ್ನಿಪಾತಿಕ್ಯಾಖ್ಯಾಃ ಯೋನಿಗದಾ ಉಕ್ತಾಃ ಯೈರ್ಗದೈರ್ನಾರೀ ನಿಷಿಕ್ತಂ ಶುಕ್ರಂ ನ ಪ್ರತೀಚ್ಛತಿ ಗರ್ಭಾಶಯೇನ ನ ಗೃಹ್ಣಾತಿ ಶುಕ್ರಸ್ಯಾಗ್ರಹಣಾದ್ಗರ್ಭಂ ನ ಗೃಹ್ಣಾತಿ ಅಸೃಗ್ದರಾದೀಂಶ್ಚ ರೋಗಾನ್ ದಾರುಣಾನತಿ- ಕೃಚ್ಛ್ರಾನಾಪ್ನೋತಿಯನಿಲದಿಭಿಶ್ಚ ದೋಷೈರ್ದಾರುಣಾನಾಬಾಧಾನ್ ವ್ಯಾಧೀನ್ ಸ್ತಮ್ಭಶೂಲಾದೀನಾಪ್ನೋತೀತಿ| (ಯೋನಿಗದಾ ಯೋನಿವ್ಯಾಪದಃ ಇತ್ಯನೇನ ಪ್ರಕಾರೇಣೋಕ್ತಾಃ ಯೈರ್ಯೋನಿಗತೈರ್ನಾರೀ ವ್ಯಾಪದ್ಯಮಾನಾಸ್ತ್ರೀ ಶುಕ್ರಂ ಪುಂಸಾ ನಿಷಿಕ್ತಂ ನ ಪ್ರತೀಚ್ಛತಿ ನ ಪ್ರತಿಗೃಹ್ಣಾತಿ| ತತಸ್ತಸಮಾದ್ಧೇತೋಃ ಗರ್ಭಂ ನ ಗೃಹ್ಣಾತಿ, ಗರ್ಭೋ ನ ಜಾಯತೇ| ಅಪತ್ಯಾರ್ಥಮೇವ ಯಸ್ಯಾಃ ಪರಿಗ್ರಹೋ ವಿಧೀಯತೇ ತದಭಾವೇ ತಯಾ ಕಿಂ ಫಲಮಿತಿ ಭಾವಃ| ಕಿಞ್ಚ ದಾರುಣಾನತಿಕೃಚ್ಛ್ರಾನಸೃಗ್ದರಾರ್ಶೋಗುಲ್ಮಾದೀನ್ ಆದಿಶಬ್ದೇನ ಮೂತ್ರಕೃಚ್ಛ್ರಾಸ್ಥಿಸ್ರಾವಾದಯೋ ಗೃಹ್ಯನ್ತೇ ರೋಗಾನಾಪ್ನೋತಿ| ತಥಾ ಅನಿಲಾದಿಭಿರ್ವಾತಪಿತ್ತಕಫೈಃ ಕೃತಾನಾಬಾಧಾನ್ ಅಸಮ್ಭಾವನೀಯಾನ್ ವ್ಯಾಪದನ್ತರಂಶ್ಚ ಪ್ರಾಪ್ನೋತಿ)|| ೫೩|| ಇತಿ ಶ್ರೀಮನ್ಮಹಾಮಹೋಪಾಧ್ಯಾಯೇನ್ದುವಿರಚಿತಾಯಾ ಮಷ್ಟಾಙ್ಗಸಂಗ್ರಹವ್ಯಾಖ್ಯಾಯಾಂ ಶಶಿಲೇಖಾಯಾ ಮುತ್ತರತನ್ತ್ರೇ ಅಷ್ಟತ್ರಿಂಶೋಽಧ್ಯಾಯಃ