২৫. শিরোরোগবিজ্ঞানীযাধ্যাযঃ

তানেব শিরোরোগান্ সঙ্খ্যযা আহ- শিরো রুজতীত্যাদি| ত্রিভিরিতি পৃথগর্থদ্যোতনার্থম্| ‘শিরো রুজতি মর্ত্যানাম্’ ইত্যত্র কেচিত্ ‘শিরোরোগা মনুষ্যাণাম্’ ইতি পঠন্তি| রোগশব্দো যদ্যপি সামান্যব্যাধিবাচকস্তথাঽপি যে পীডাকরা ব্যাধযস্তেঽত্র গৃহ্যন্তে, তেন খালিত্যাদীনামত্রানুপাদানমিতি ব্যাখ্যানযন্তি| একাদশপ্রকারস্যেত্যাদি| একাদশৈবাত্র শিরোরোগাঃ| অন্যতোবাতশব্দেন অনন্তবাতস্য সর্বগতনযনরোগবিজ্ঞানীযে প্রোক্তত্বাত্| ব্রহ্মদেবস্তু বিদেহাদিষু অনন্তবাতস্য পৃথক্ পাঠাত্ পৃথগেবাত্র পঠনীযঃ, তেন চৈকাদশ শিরোরোগা ইতি ব্রূতে| অত্র কেচিদ্বিদেহদর্শনাত্ সূর্যাবর্তকবিপর্যযমপি পঠন্তি| তথা চ তদ্বচঃ- “তত্র বাতানুগং পিত্তং চিতং শিরসি তিষ্ঠতি| মধ্যাহ্নে তেজসাঽর্কস্য তদ্বিবৃদ্ধং শিরোরুজম্|| করোতি পৈত্তিকীং ঘোরাং সংশাম্যতি দিনক্ষযে| অস্তং গতে প্রভাহীনে সূর্যে বাযুর্বিবর্ধতে|| পিত্তং শান্তিমবাপ্নোতি ততঃ শাম্যতি বেদনা| এষ পিত্তানিলকৃতঃ সূর্যাবর্তবিপর্যযঃ”- ইতি| কেচিত্সুশ্রুতাধ্যাযিনোঽনেন পাঠেন সূর্যাবর্তকবিপর্যযং পঠন্তি,- “বাতপিত্তাত্ পুরোজাতা রুজাঽপৈত্যপরাহ্ণতঃ| সূর্যাবর্তঃ স তু প্রোক্তো বিপরীতে বিপর্যযঃ”- ইতি| অসৌ সূর্যাবর্তবিপর্যযশ্চাতুর্থিকবিপর্যযবদসূত্রিতোঽপি গৃহ্যতে| অত্র কেচিত্ “আলুঞ্চযতে কম্পতি চাপি মূর্ধা সর্পন্তি মধ্যে চ পিপীলিকা বা| স্কন্ধঃ শিরশ্চাপ্যবঘূর্ণতে চ মূর্চ্ছা প্রলাপশ্চ তথৈব নিদ্রা|| সঞ্জ্ঞাপ্রণাশং জনযেদ্বিনিদ্রাং প্রাতস্ততঃ পশ্যতি চাতিচিত্রম্| গৃহ্ণাতি মন্যে হৃদযং চ রূপৈঃ সর্বৈরমীভিঃ সমভিদ্রুতস্তু|| তিস্রো হি রাত্রীর্ন স জাতু জীবেত্তং শীর্ষকং সম্প্রবদন্তি রোগম্”- ইতি পঠন্তি| স চ নিবন্ধকারৈর্নাঙ্গীকৃতঃ||১-৪||

ইদানীং বাতিকশিরোরোগলক্ষণমাহ- যস্যেত্যাদি| অনিমিত্তম্ ঈষত্কারণম্| তীব্রবচনাত্ পিত্তে মধ্যাঃ রুজো, মধ্যঃ কফে ইতি বুধ্যতে| বিশেষ উপশমঃ| শিরোভিতাপঃ শিরোরোগঃ||৫||

পৈত্তিকশিরোরোগলক্ষণমাহ- যস্যেত্যাদি||৬||

কফজশিরোরোগলক্ষণমাহ- শিরোগলমিত্যাদি| উপদিগ্ধম্ উপলিপ্তং, গুরু ভারিকং, প্রতিষ্টব্ধম্ অপ্রচলিতরূপমিব, হিমং শীতপূর্ণমিব| শিরোভিতাপঃ শিরোরোগঃ| অত্রানুক্তোঽপি বিপর্যয সেবযোপশমো গৃহ্যতে| ‘শিরোগলং’ ইত্যত্র ‘শিরোভবং’ ইতি কেচিত্ পঠন্তি||৭||

সান্নিপাতিকশিরোরোগলক্ষণমাহ- শিরোভিতাপে ইত্যাদি|৮|-

রক্তজশিরোরোগলক্ষণমাহ- রক্তাত্মক ইত্যাদি| পিত্তজশিরোরোগদ্রক্তজে স্পর্শাসহত্বমধিকম্||৮||

ক্ষযজশিরোরোগস্য লিঙ্গমাহ- বসেত্যাদি| বসাশব্দ উপলক্ষণার্থঃ; তেন দেহস্নেহমস্তিষ্কমেদোমজ্জাশুক্রাণি গৃহ্যন্তে| ‘বসাবলাসক্ষতসম্ভবানাং’ ইত্যত্র কেচিত্ ‘অসৃগ্বসাশ্লেষ্মসমীরণানাং’ ইতি পঠন্তি; তন্নেচ্ছতি গযী||৯||-

কৃমিকৃতশিরোরোগলক্ষণমাহ- নিস্তুদ্যতে ইত্যাদি| নিস্তুদ্যতে শূল্যতে ব্যথ্যত ইত্যর্থঃ| স্ফুটতীব শীর্যত ইব||১০||-

সুর্যাবর্তমাহ- সূর্যোদযমিত্যাদি| সূর্যাপবৃত্তৌ সূর্যাস্তসমযে| কস্মাত্প্রবৃত্তিনিবৃত্তী ভবত ইতি প্রতিপাদযন্ নিমিরাহ,- “স্বভাবশীতা তমসোঽভিমূলা রাত্রিস্তযোদ্ভূতকফেন মার্গে| রুদ্ধে মরুত্কোপমিযাত্ প্রভাতে রুজং করোত্যত্র শিরোভিতাপে|| মধ্যাহ্নসূর্যাতপতাপযোগাত্ কফে বিলীনে মরুতি প্রপন্নে| স্বমার্গমাযাতি তদা দিনান্তে প্রশান্তিমাবর্ত ইহার্কপূর্বে” ইতি| সূর্যাতপবিলীনমস্তুলুঙ্গকারণোত্পন্নসূর্যাবর্ত ইতি দৃঢবলাচার্যঃ| ‘উষ্ণেন জন্তুঃ সুখমাপ্নুযাচ্চ’ ইতি পাঠাত্সূর্যাবর্তবিপর্যযঃ কথিতো বোদ্ধব্যঃ| কেচিদত্র ‘আবর্তসঞ্জ্ঞঃ স চ সূর্যপূর্বোব্যাধির্মতঃ পিত্তসমীরণাভ্যাম্’ ইতি পঠন্তি||১১-১২||-

অনন্তবাতমাহ- দোষাস্তু দুষ্টাস্ত্রয ইত্যাদি| সাত্যকিপ্রভৃতিভিস্তু শিরঃকম্পরোগোঽসাধ্যঃ পঠিতঃ; অস্মিংস্তু শাস্ত্রে সান্নিপাতিকশিরোরোগোঽনন্তবাত এবান্তর্ভবতি||১৩-১৪||-

অর্ধাবভেদমাহ- যস্যোত্তমেত্যাদি| ‘তস্যার্ধভেদং পবনাত্ সপিত্তাত্’ ইতি কেচিত্ ‘ত্রিতযাদ্ব্যবস্যেত্’ ইত্যত্র ‘দ্বিতযাত্’ ইতি বা পাঠঃ||১৫||-

শঙ্খকলক্ষণমাহ- শঙ্খাশ্রিত ইত্যাদি| কৃতানুযাত্রঃ কৃতানুগমঃ| উদ্গতমৃত্যুকল্পঃ উপস্তিতমৃত্যুসমঃ| এষ ব্যাধিস্তু ত্র্যহান্মারযতি, ত্র্যহাদনন্তরং কুশলেনোপক্রান্তঃ সিধ্যতি||১৬-১৮||

ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযামুত্তরতন্ত্রান্তর্গতে শালাক্যতন্ত্রে পঞ্চবিংশোঽধ্যাযঃ||২৫||