Adhikarana स्तनरोगसम्प्राप्तिः (१) · Śloka १
अथ स्तनरोगनिदानम् | सक्षीरौ वाऽप्यदुग्धौ वा प्राप्य दोषः स्तनौ स्त्रियाः | प्रदूष्य मांसरुधिरं स्तनरोगाय कल्पते ||१||
🔊 Audio coming soon
Hide commentary
मधुकोश व्याख्या (विजयरक्षित, श्रीकण्ठदत्त कृत)
सूतिकारोगाधिकारात् स्तनरोगा उच्यन्ते| पारिभाषिकस्तनरोगसम्प्राप्तिमाह– सक्षीरौ वाऽपीत्यादि| सक्षीरौ गर्भवत्याः, अदुग्धौ वेति दोहदायोगेन प्रसूतायाः, स्तनौ प्राप्येति विवृतधमनीमुखेनाविश्य, स्तनरोगशब्देन ‘स्तनकोप’ इति प्रसिद्धो रोग उच्यते||१||
आतङ्कदर्पण व्याख्या (वाचस्पति वैद्य कृत)
सूतिकारोगाधिकारात्स्तनरोगा उच्यन्ते| पारिभाषिकस्तनरोगसम्प्राप्तिमाह– सक्षीरावित्यादि| गर्भवत्याः सक्षीरौ | अदुग्धौ वेति दोहदायोगेन प्रसूतायाः| स्तनौ प्राप्येति विवृतधमनीमुखेन प्रविश्य| स्तनरोगशब्देनात्र ‘स्तनकोप’ इति प्रसिद्धो रोग उच्यते||१||