৬৩. যোনিকন্দনিদানম্

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

যোন্যাশ্রযত্বাত্ যোনিকন্দনিদানমাহ– দিবাস্বপ্নাদিত্যাদি| নখদন্তাদ্যৈরিত্যত্রাদিশব্দাত্ কণ্টকাদিপরিগ্রহঃ| বাতাদ্যাঃ কুপিতা ইতি যথানিদানং প্রত্যেকং বাতাদযঃ কুপিতাঃ| নিকুচাকৃতিসন্নিভমিতি বর্তুলমিত্যর্থঃ; অস্যানন্তরং গুডকমিতি দ্রষ্টব্যং, তেন নপুংসকলিঙ্গতা সঙ্গতা ভবতি| কন্দঃ প্রাযেণ জরন্নারীযোনিগতো নিকুচাকারো রোগঃ||১-২||

আতঙ্কদর্পণ ব্যাখ্যা (বাচস্পতি বৈদ্য কৃত)

ইহৈব যোনিসংশ্রিতত্বেন কন্দনিদানমাহ– দিবেত্যাদি| নখদন্তাদ্যৈরিত্যুপলক্ষণম্| আদিগ্রহণাত্ কণ্টকাদিপরিগ্রহঃ| বাতাদ্যাঃ কুপিতা ইতি যথানিদানেন বাতাদযঃ প্রত্যেকং কুপিতাঃ| লকুচাকৃতিসন্নিভমেতস্যানন্তরং গুডকমিতি দ্রষ্টব্যম্| কন্দঃ প্রাযেণ জরন্নারীযোনিগতো লকুচাকারো রোগঃ||১-২||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

বাতজাদিভেদেন রূপমাহ– রূক্ষমিত্যাদি| নীলপুষ্পপ্রতীকাশমিতি অতসীকুসুমবর্ণম্| কফজেঽপি নীলতা ব্যাধিপ্রভাবাদেব; অন্যে তু পৈত্তিকলক্ষণ এব সম্বধ্নন্তি, যোগ্যত্বাত্||৩-৪||

আতঙ্কদর্পণ ব্যাখ্যা (বাচস্পতি বৈদ্য কৃত)

বাতজমাহ– রূক্ষমিত্যাদি| সুগমম্| পৈত্তিকমাহ– দাহেত্যাদি| সুগমম্| শ্লৈষ্মিকমাহ– নীলেত্যাদি| অতসীকুসুমাদেববর্ণম্| এবংবিধবর্ণতা চ কফজেঽপি রোগপ্রভাবাত্, অন্যে ত্বেতত্পৈত্তিকে এব সম্বধ্নন্তি, যোগ্যত্বাত্, বদন্তি চ– “দাহরাগজ্বরযুতম্” ইত্যভিধানাদিকল্পিতমেতদবগন্তব্যমিতি| সন্নিপাতিকমাহ– সর্বেত্যাদি; সুগমম্||৩-৪||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ইতি শ্রীকণ্ঠদত্তকৃতাযাং মধুকোশব্যাখ্যাযাং যোনিকন্দনিদানং সমাপ্তম্||৬৩||

আতঙ্কদর্পণ ব্যাখ্যা (বাচস্পতি বৈদ্য কৃত)

ইতি শ্রীবাচস্পতিবৈদ্যপ্রণীতাযাং মাধবনিদানব্যাখ্যাযামাতঙ্কদর্পণাখ্যাযাং যোনিকন্দনিদানম্||৬৩||