৫২. বিসর্পনিদানম্

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অম্লপিত্তসম্ভবচ্ছর্দের্বেগবিধারণাদ্রক্তদুষ্টৌ সত্যাং বিসর্পোত্পত্তের্হেতুসাম্যাত্ তদনন্তরং বিসর্পনিদানম্| ছর্দিবেগবিঘাতস্য রক্তদূষকত্বে চরকবচনং যথা– “ ছর্দিবেগপ্রতীঘাতাত্ কালে চানবসেবনাত্| শরত্কালপ্রভাবাচ্চ শোণিতং সম্প্রদুষ্যতি||” (চ. সূ. অ. ২৪) ইতি| তস্য নিদানপূর্বিকাং সঙ্খ্যাং নিরুক্তিং চাহ– লবণাম্লেত্যাদি| “বিসর্পো ন হ্যসংসৃষ্টো রক্তপিত্তেন লক্ষ্যতে|” ইতি বচনাত্ লবণাম্লাদিকং বিশেষেণ রক্তপিত্তনিদানমুক্তম্| সংসেবযা সততসেবযা দোষকোপঃ সংসেবাদ্দোষকোপস্ততঃ| অত্র, আদিগ্রহণাত্ চরকোক্তানাং হরিতশাকশিণ্ডাকীপ্রভৃতীনাং গ্রহণম্| সপ্তধেতি উল্বণৈকৈকদোষজাস্ত্রযঃ, সন্নিপাতজ একঃ, ত্রযো দ্বন্দ্বজাঃ, ইতি সপ্তপ্রকারত্বমুক্তম্| সর্বতঃ পরিসর্পণাদিতি সর্বতঃ পরিসর্পণাত্ পরিসর্পঃ, বিবিধং সর্পাণাদ্বিসর্পঃ| যদুক্তং চরকে– “বিবিধং সর্পতি যতো বিসর্পস্তেন স স্মৃতঃ| পরিসর্পোঽথবা নাম্না সর্বতঃ পরিসর্পণাত্||” (চ. চি. অ. ২১) ইতি||১-৩||–

আতঙ্কদর্পণ ব্যাখ্যা (বাচস্পতি বৈদ্য কৃত)

অম্লপিত্তসম্ভবচ্ছর্দের্বেগবিঘাতাদ্রক্তদুষ্টৌ সত্যাং বিসর্পোত্পত্তের্হেতুসামান্যাচ্চানন্তরং বিসর্পনিদানমাহ– ছর্দিবেগবিঘাতস্য চ রক্তদূষকত্বে চরকবচনং যথা– “ছর্দিবেগবিঘাতাত্তু কালে চানবসেবনাত্| শরত্কালস্বভাবাচ্চ শোণিতং সম্প্রদুষ্যতি||” ইতি| তস্য নিদানপূর্বিকাং সঙ্খ্যাং নিরুক্তিং চাহ– লবণেত্যাদি| লবণাদিভির্বিসর্পো রোগো ভবতি, স সপ্তধা জ্ঞেযঃ| “বিসর্পো ন হ্যসংসৃষ্টো রক্তপিত্তেন” ইতি বচনাল্লবণাদিকং বিশেষেণ রক্তপিত্তনিদানমুক্তম্| এষাং সন্ততসেবযা দোষকোপঃ| আদিগ্রহণাচ্চরকক্তহরিতশাকশিণ্ডাকীপ্রভৃতীনাং গ্রহণম্| সর্বতঃ পরিসর্পণাত্ পরিসর্পঃ, বিবিধং সর্পতীতি বিসর্পঃ| যদুক্তং চরকে– “বিবিধং সর্পতি যতো বিসর্পস্তেন স স্মৃতঃ| পরিসর্পোঽথ বা নাম্না সর্বতঃ পরিসর্পণাত্||” ইতি| সঙ্খ্যাসম্প্রাপ্তিমাহ– পৃথক্ত্রযস্ত্রিভিশ্চৈকো বিসর্পা দ্বন্দ্বজাস্ত্রয ইত্যাদি সুগমম্| আগ্নেয ইত্যাদিসুগমম্||১-৩||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

সর্বেষামেব রক্তাদিদূষ্যচতুষ্টযদোষত্রযজন্যত্বমাহ– রক্তমিত্যাদি| বিসর্পস্য সমানসামগ্রীকত্বেঽপি কুষ্ঠাদ্ভেদঃ কুষ্ঠাধ্যাযে এব নিরূপিতঃ| দোষশব্দেনৈব বাতাদিগ্রহণে সিদ্ধে মলা ইতি যত্ কৃতং, তদত্যর্থদুষ্ট্যা শরীরমলিনীকরণত্বং দোষাণাং প্রতিপাদযিতুম্| সন্নিপাতজেঽসাধ্যত্বমপি “সর্বাত্মকঃ ক্ষতকৃতশ্চ ন সিদ্ধিমেতি|” (সু. নি. অ. ১০) ইতি বচনাত্| তেন বিকৃতিবিষমসমবেতত্বমস্য| চরকে ত্বন্তর্জবহির্জভেদেন বিসর্পঃ পঠিতঃ| যদাহ– “মর্মোপঘাতাত্ সম্মোহাদযনানাং বিঘট্টনাত্| তৃষ্ণাতিযোগাদ্বেগানাং বিষমং চ প্রবর্তনাত্|| বিদ্যাদ্বিসর্পমন্তর্জমাশু চাগ্নিবলক্ষযাত্| অতো বিপর্যযাদ্বাহ্যমন্যং বিদ্যাত্ স্বলক্ষণৈঃ||” (চ. চি. অ. ২১) ইতি||৪-৭||

আতঙ্কদর্পণ ব্যাখ্যা (বাচস্পতি বৈদ্য কৃত)

সর্বেষামেব রক্তাদিদূষ্যচতুষ্টযজন্যত্বমাহ– রক্তমিত্যাদি| বিসর্পস্য সমানসামগ্রীকত্বেঽপি কুষ্ঠাদ্ভেদঃ কুষ্ঠাধ্যায এব নিরূপিতঃ, দোষগ্রহণেনৈব বাতাদিগ্রহণে সিদ্ধে মলা ইতি যত্ কৃতং তদত্যর্থদুষ্ট্যা শরীরমলিনীকরণত্বং দোষাণাং প্রতিপাদযিতুম্| লসীকাজলং, ত্বক্শব্দেনাত্র রসস্য সপ্তধাতুষু ক্লৃপ্তত্বাত্| বাতজং বিসর্পমাহ– তত্রেত্যাদি| বাতজ্বরসমব্যথ ইতি ‘বেপথুর্বিষমো বেগঃ’ ইত্যাদিকঃ| নিস্তোদঃ শূলেন তুদ্যত ইব, ভেদো বিদীর্যত ইব, অর্তিঃ পীডা, আযামো বিস্তারবান্, হর্ষো রোমহর্ষঃ| পৈত্তিকমাহ– পিত্তাদিত্যাদি| দ্রুতগতিঃ শীঘ্রগতিঃ| পিত্তজ্বরলিঙ্গ ইতি “বেগস্তীক্ষ্ণোঽতিসারঃ” ইত্যাদিকঃ| অতিলোহিতোঽতিরিক্তঃ| কফজমাহ– কফাদিত্যাদি| কফজ্বরসমান ইতি “স্তৈমিত্যং স্তিমিতো বেগঃ” ইত্যাদিকঃ| সান্নিপাতিকমাহ– সন্নিপাতেত্যাদি| সর্বদোষলক্ষণৈর্যুক্ত ইত্যর্থঃ| সন্নিপাতজেঽসাধ্যত্বমুক্তং “সর্বাত্মকঃ ক্ষতকৃতশ্চ ন সিদ্ধিমেতি” ইতি বচনাত্| তেন বিকৃতিবিষমসমবেতত্বমস্য| চরকে ত্বন্তর্জবহির্জভেদেন বিসর্পঃ পঠিতঃ| যদাহ– “মর্মোপতাপাত্সম্মোহাদযনানাং চ ঘট্টনাত্| তৃষ্ণাতিযোগাদ্বেগানাং বিষমং চ প্রবর্তনাত্| বিদ্যাদ্বিসর্পমন্তর্জমাশু চাগ্নিবলক্ষযাত্| অতো বিপর্যযাদ্বাহ্যমন্যদ্বিদ্যাত্স্বলক্ষণৈঃ||” ইতি||৪-৭||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

আগ্নেযবিসর্পমাহ– বাতপিত্তাদিত্যাদিনা| দীপ্তাঙ্গারাবকীর্ণবদিতি জ্বলদঙ্গারেণৈব ব্যাপ্তমঙ্গং মন্যতে| শান্তাঙ্গারাসিত ইতি নির্বাণাঙ্গারবত্ কৃষ্ণবর্ণঃ স দেশো ভবতি| নীলো রক্তো বেতি স দেশঃ স্নিগ্ধনীলো রক্তো বা ভবতি| অগ্নিদগ্ধ ইবেতি অগ্নিদগ্ধদেশ ইব| শীঘ্রগত্বাদিতি শীঘ্রকারিত্বাত্| মর্মানুসারী হৃদযাদ্যনুসারী| ব্যথতেঽঙ্গমিত্যত্রান্তর্ভাবিতো ণ্যর্থঃ, তেন ব্যথযতীত্যর্থঃ| নিদ্রাং চেত্যত্র হরেদিতি সম্বধ্যতে| শর্ম সুখম্| দুষ্প্রবোধোঽশ্নুতে নিদ্রামিতি নিদ্রাং মরণরূপাং প্রাপ্নোতি||৮-১৩||

আতঙ্কদর্পণ ব্যাখ্যা (বাচস্পতি বৈদ্য কৃত)

বাতপিত্তজমাগ্নেযাখ্যং বিসর্পমাহ– বাতপিত্তাদিতি| বাতপিত্তজোঽযং সঞ্জ্ঞেযঃ| জ্বরাদিভিরুপদ্রবৈর্যুতঃ| দীপ্তাঙ্গারাবকীর্ণবদিতি জ্বলদঙ্গারেণেব ব্যাপ্তমঙ্গং মন্যতে| শান্তাঙ্গারাসিত ইতি নির্বাণাঙ্গারবত্কৃষ্ণবর্ণঃ, নীলঃ চাষপক্ষিবদ্বা রক্তো বা স দেশো ভবতি| অগ্নিদগ্ধ ইবেতি আশু শীঘ্রমগ্নিদগ্ধ ইব স্ফোটৈরুপচীযতে বৃদ্ধিং নীযতে, শীঘ্রগত্বাত্ শীঘ্রকারিত্বাত্, দ্রুতং শীঘ্রং, স বিসর্পঃ, মর্মানুসারী হৃদযানুসারী, অতীব বলবান্ বাতঃ| ব্যথতেঽঙ্গমিতি অত্রান্তর্ভাবিতো ণ্যর্থঃ, তেন ব্যথযতীত্যর্থঃ| নিদ্রাং সঞ্জ্ঞাং চ হরেন্নাশযেত্| শ্বাসং হিক্কাং চ ঈরযেত্ প্রকোপযেত্| ঈদৃশীমবস্থাং গতো না পুরুষঃ, ক্বচিচ্ছর্ম সুখং ন প্রাপ্নোতি, কেষু ভূমিশয্যাসনাদিষু, স্বতঃ আত্মনৈব, ক্লিষ্টঃ পীডিতঃ, চেষ্টমানো বিদ্ধতাং চেষ্টাং কুর্যাত্, দুঃখপ্রবোধঃ মনোদেহশ্রমোদ্ভবাং নিদ্রাং মরণরূপাম্, অশ্নুতে প্রাপ্নোতি||৮-১৩||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

গ্রন্থিবিসর্পমাহ– কফেন রুদ্ধ ইত্যাদি| কফেনেতি স্বহেতুকুপিতেন, পবনঃ স্বহেতুকুপিতঃ, তেন কফমারুতজত্বমস্যোপপন্নং ভবতি| ভিত্ত্বা তং বহুধা কফমিতি কফং বিস্তার্য| রক্তং বেতি দূষযিত্বেত্যনেন বক্ষ্যমাণেন সম্বধ্যতে| দীর্ঘাণুবৃত্তস্থূলখরাত্মনামিতি বৃত্তং বর্তুলং, স্থূলমুচ্ছূনং, খরং কঠিনম্, এবংরূপাণাং গ্রন্থীনাং মালাং করোতি, অযং চ গ্রন্থিবিসর্পঃ সুশ্রুতেঽপচীসঞ্জ্ঞযা পঠ্যতে||১৪-১৬||–

আতঙ্কদর্পণ ব্যাখ্যা (বাচস্পতি বৈদ্য কৃত)

কফমারুতজং গ্রন্থিবিসর্পমাহ– কফেনেত্যাদি| কফেন স্বহেতুকুপিতেন, স্বহেতুকুপিতঃ পবনঃ, কফং ভিত্ত্বা বিদার্য, রক্তং চ দূষযিত্বেত্যনেন বক্ষ্যমাণেন সম্বধ্যতে, বৃদ্ধরক্তস্য মনুষ্যস্য| ত্বক্সিরাস্নাযুমাংসগমিতি রক্তবিশেষণম্| দীর্ঘাণুবৃত্তস্থূলখরাত্মনামিতি অণু সূক্ষ্মং, বৃত্তং বর্তুলং, স্থূলমসূক্ষ্মং, খরং কঠিনম্, এবংরূপাণাং গ্রন্থীনাং মালাং করোতি||১৪-১৬||–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

কর্দমবিসর্পমাহ– কফপিত্তাদিত্যাদি| স্তম্ভ ইতি গাত্রস্য স্তব্ধতা, আমোপবেশনমামস্য বর্চসস্ত্যজনম্| স চ সর্পতি প্রাযেণামাশযং গৃহ্ণন্নেকদেশমিতি কফপিত্তযোরামাশযস্থত্বাত্ প্রাযেণামাশযে ভবন্নেকদেশব্যাপী ভবতীত্যর্থঃ| পিডকৈরিতি পিডকাভিঃ| মলিন ইতি মলদিগ্ধঃ| গম্ভীরপাক ইত্যন্তঃপাকঃ, প্রাজ্যোষ্মা প্রচুরোষ্মা| স্পষ্টস্নাযুসিরাগণ ইতি পূতিমাংসগলনেন স্নায্বাদীনাং স্পষ্টতা| কর্দমাখ্যমুশন্তি তমিতি তং কর্দমসারূপ্যাত্ কর্দমাখ্যমিচ্ছন্তি||১৭-২১||–

আতঙ্কদর্পণ ব্যাখ্যা (বাচস্পতি বৈদ্য কৃত)

কফপিত্তাত্মকং কর্দমবিসর্পমাহ– কফপিত্তাদযং জ্ঞেযঃ| স্তম্ভো গাত্রস্য স্তব্ধতা, অঙ্গাবসাদঃ অঙ্গখেদঃ, বিক্ষেপঃ অঙ্গানামিতশ্চেতশ্চ প্রেরণম্| ইন্দ্রিযগৌরবমিতি চক্ষুরাদীনাং গৌরবম্| আমোপবেশনমিত্যাদি| আমস্য বর্চসস্ত্যজনম্| লেপঃ স্রোতসাং শুষিরাণাং লিপ্ততা শ্লেষ্মাদিনা| প্রাযেণামাশযং গৃহ্ণন্নিতি কফপিত্তযোরামাশযস্থানত্বাত্; প্রাযেণামাশযে ভিন্নৈকদেশব্যাপী ভবতীত্যর্থঃ| ন চাতিপীডাকরঃ| পিডকৈঃ পিডকাভিরবকীর্ণো ব্যাপ্তঃ, কিম্ভূতৈঃ অতিপীতলোহিতপাণ্ডুরৈঃ| অসিতঃ কৃষ্ণঃ, মেচকাভঃ অঞ্জনাভঃ, মলিনো মলদিগ্ধঃ| গম্ভীরপাক ইতি অন্তঃপাকঃ, প্রাজ্যোষ্মা প্রচুরোষ্মা| স্ফুটস্নাযুসিরাগণ ইতি পূতিমাংসাপগমেন স্নায্বাদীনাং স্ফুটতা| কর্দমাখ্যমুশন্তি তং কর্দমসারূপ্যাত্ কর্দমাখ্যং কথযন্তি||১৭-২১||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ক্ষতবিসর্পমাহ– বাহ্যহেতোরিত্যাদি| অযং চ পিত্তজে বিসর্পেঽন্তর্ভাবনীযঃ, তেন ন সঙ্খ্যাধিক্যম্| তথা চ ভোজঃ– “শস্ত্রপ্রহারৈস্তৈস্তৈস্তু ব্যাডদন্তনখৈরপি| ক্ষতে বাঽপ্যথবা ভগ্নে বহুদোষস্য দেহিনঃ|| রক্তং পিত্তং চ কুপিতং ব্রণমাশু প্রপদ্যতে| কুরুতস্তে সমেতে তু ব্রণোত্সেধং সুদারুণম্|| আচিতং তনুবিস্ফোটৈঃ কৃষ্ণৈঃ পীতকসন্নিভৈঃ| পিত্তবীসর্পবল্লিঙ্গং তস্য শেষং বিনির্দিশেত্||” ইতি||২২-২৪||

আতঙ্কদর্পণ ব্যাখ্যা (বাচস্পতি বৈদ্য কৃত)

ক্ষতজমাহ– বাহ্যহেতোরিত্যাদি| শ্যাবলোহিতং বর্ণেন| অযং ক্ষতজো বিসর্পঃ পিত্তজেঽন্তর্ভাবনীযঃ, তেন ন সঙ্খ্যাধিক্যম্| তথা চ ভোজঃ– “শস্ত্রপ্রহারৈস্তৈস্তৈস্তু ব্যালদন্তনখৈরপি| ক্ষতে বাঽপ্যথ বা ভগ্নে বহুদোষস্য দেহিনঃ|| রক্তং পিত্তং চ কুপিতং ব্রণমাশু প্রপদ্যতে| কুরুতস্তে সমেতে তু ব্রণোত্সেধং সুদারুণম্|| আচিতং ব্রণবিস্ফোটৈঃ কৃষ্ণপীতসমন্বিতৈঃ| পিত্তবীসর্পবল্লিঙ্গং তস্য শেষং বিনির্দেশেত্||” ইতি| বিসর্পোপদ্রবানাহ– জ্বরেত্যাদি| মাংসদরণং মাংসবিদরণম্| শেষং সুগমম্||২২-২৪||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

সাধ্যত্বাদিকমাহ– সিধ্যন্তীত্যাদি| পিত্তাত্মকোঽঞ্জনবপুরিতি অত্যন্তমুদ্রিক্তপিত্তোঽঞ্জনসমবর্ণতনুঃ, অগ্নিবিসর্পাখ্যো ন সাধ্য ইতি ব্যাখ্যানযন্তি| কৃচ্ছ্রাশ্চ মর্মস্বিতি অসাধ্যত্বেন কৃচ্ছ্রত্বং বোদ্ধব্যম্| যদাহ ভোজঃ– “বর্জ্যস্তু ক্ষতজস্তেষাং সন্নিপাতাত্তু যো ভবেত্| ভিষজা জানতা ত্যাজ্যাঃ সর্ব এব তু মর্মজাঃ||” ইতি||২৫||

আতঙ্কদর্পণ ব্যাখ্যা (বাচস্পতি বৈদ্য কৃত)

সাধ্যাসাধ্যানাহ– সিদ্ধ্যন্তীত্যাদি| একৈকদোষজনিতাস্ত্রযঃ সাধ্যাঃ, ত্রিদোষজঃ ক্ষতজশ্চাসাধ্যঃ| পিত্তাত্মকোঽঞ্জনবপুরিতি পৈত্তিকো যোঽত্যন্তমুদ্রিক্তপিত্তত্বাদঞ্জনসবর্ণঃ সোঽসাধ্যঃ, অগ্নিবীসর্পো ন সাধ্যঃ; কৃচ্ছ্রাশ্চ মর্মস্বিতি অসাধ্যত্বং কৃচ্ছ্রত্বেন বোদ্ধব্যম্| তথা চ ভোজঃ– “ত্যাজ্যস্তু ক্ষতজস্তেষাং সন্নিপাতাচ্চ যো ভবেত্| ভিষজা জানতা ত্যাজ্যাঃ সর্ব এব তু মর্মজাঃ||” ইতি||২৫||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ইতি শ্রীকণ্ঠদত্তকৃতাযাং মধুকোশব্যাখ্যাযাং বিসর্পনিদানং সমাপ্তম্||৫২||

আতঙ্কদর্পণ ব্যাখ্যা (বাচস্পতি বৈদ্য কৃত)

ইতি শ্রীবাচস্পতিবৈদ্যবিরচিতাযাং মাধবনিদানব্যাখ্যাযামাতঙ্কদর্পণাখ্যাযাং বিসর্পনিদানম্||৫২||