Adhikarana ঊরুস্তম্ভস্য নিদানসম্প্রাপ্তিপূর্বকং লক্ষণম্ (১-৫) · Śloka ৫
অথোরুস্তম্ভনিদানম্ | শীতোষ্ণদ্রবসংশুষ্কগুরুস্নিগ্ধৈর্নিষেবিতৈঃ | জীর্ণাজীর্ণে তথাঽঽযাসসঙ্ক্ষোভস্বপ্নজাগরৈঃ ||১|| সশ্লেষ্মমেদঃপবনঃ সামমত্যর্থসঞ্চিতম্ | অভিভূযেতরং দোষমূরূ চেত্ প্রতিপদ্যতে ||২|| সক্থ্যস্থিনী প্রপূর্যান্তঃ শ্লেষ্মণা স্তিমিতেন চ | তদা স্তভ্নাতি তেনোরূ স্তব্ধৌ শীতাবচেতনৌ ||৩|| পরকীযাবিব গুরূ স্যাতামতিভৃশব্যথৌ | ধ্যানাঙ্গমর্দস্তৈমিত্যতন্দ্রাচ্ছর্দ্যরুচিজ্বরৈঃ ||৪|| সংযুক্তৌ পাদসদনকৃচ্ছ্রোদ্ধরণসুপ্তিভিঃ | তমূরুস্তম্ভমিত্যাহুরাঢ্যবাতমথাপরে ||৫|| (বা. নি. অ. ১৫) |
View original
अथोरुस्तम्भनिदानम् | शीतोष्णद्रवसंशुष्कगुरुस्निग्धैर्निषेवितैः | जीर्णाजीर्णे तथाऽऽयाससङ्क्षोभस्वप्नजागरैः ||१|| सश्लेष्ममेदःपवनः साममत्यर्थसञ्चितम् | अभिभूयेतरं दोषमूरू चेत् प्रतिपद्यते ||२|| सक्थ्यस्थिनी प्रपूर्यान्तः श्लेष्मणा स्तिमितेन च | तदा स्तभ्नाति तेनोरू स्तब्धौ शीतावचेतनौ ||३|| परकीयाविव गुरू स्यातामतिभृशव्यथौ | ध्यानाङ्गमर्दस्तैमित्यतन्द्राच्छर्द्यरुचिज्वरैः ||४|| संयुक्तौ पादसदनकृच्छ्रोद्धरणसुप्तिभिः | तमूरुस्तम्भमित्याहुराढ्यवातमथापरे ||५|| (वा. नि. अ. १५) |
🔊 Audio coming soon
Hide commentary
মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)
বাতব্যাধিবিশেষত্বাদূরুস্তম্ভমাহ– শীতোষ্ণেত্যাদি| শীতোষ্ণগ্রহণমনুক্তপরস্পরবিরোধিদ্বন্দ্বোপলক্ষণার্থং, তেন গুরুস্নিগ্ধাভ্যাং লঘুরূক্ষযোর্গ্রহণং বোধ্যমিতি জেজ্জটঃ| সংশুষ্কং কঠিনং, দ্রববিরোধিত্বাত্| জীর্ণাজীর্ণে ইতি প্রভূতং জীর্ণং, স্তোকমজীর্ণমিত্যাহুঃ, তস্মিন্; ‘ভোজনে’ ইতি শেষঃ| অত এব দৃঢবলেন– ‘জীর্ণাজীর্ণে সমশ্নতঃ|’ (চ. চি. অ. ২৭) ইতি পঠিতম্| এতে চ যথাসম্ভবং শ্লেষ্মাদীনাং হেতবঃ| সশ্লেষ্মমেদঃপবনঃ ইতি সশ্লেষ্মমেদশ্চাসৌ পবনশ্চেতি সশ্লেষ্মমেদঃপবনঃ ইতি বিগ্রহঃ| ইতরং দোষং পিত্তম্| অস্যাং সম্প্রাপ্তৌ বাতস্য প্রাধান্যমুক্তম্, অত এব সুশ্রুতেন মহাবাতব্যাধাবযং রোগঃ পঠিতঃ| চরকে তু কফস্য প্রাধান্যমুক্তম্| যদাহ– “ঊরূ শ্লেষ্মা সমেদস্কো বাতপিত্তেঽভিভূয তু|” (চ. চি. অ. ২৭) ইত্যাদি| তত্র চরকে আবরকস্য শ্লেষ্মণঃ প্রাক্চিকিত্স্যত্বেন প্রাধান্যম্, আরম্ভকত্বেন তু সুশ্রুতে পবনস্যেতি ন বিরোধঃ| পরকীযাবিবেত্যনেন উত্ক্ষেপণগমনাদিষ্বপ্রভুত্বং দর্শযতি| ধ্যানাদিভির্জ্বরান্তৈরুপলক্ষিতঃ ‘পুরুষ’ ইতি শেষঃ||১-৫||
আতঙ্কদর্পণ ব্যাখ্যা (বাচস্পতি বৈদ্য কৃত)
বাতব্যাধিবিশেষত্বাদূরুস্তম্ভনিদানারম্ভঃ| তস্য নিদানপূর্বাং সম্প্রাপ্তিমাহ– শীতেত্যাদি| শীতোষ্ণাদিগ্রহণমনুক্তপরস্পরবিরোধিদ্বন্দ্বদোষোপলক্ষণার্থং, তেন গুরুস্নিগ্ধাভ্যাং লঘুরূক্ষযোর্গ্রহণং বোদ্ধব্যমিতি জেজ্জটঃ| সংশুষ্কং কঠিনং, দ্রববিরোধিত্বাত্| জীর্ণাজীর্ণে ইতি প্রভূতং জীর্ণং, স্তোকমজীর্ণমিত্যাহুঃ, তস্মিন্; ‘ভোজনে’ ইতি শেষঃ| অত এব দৃঢবলেন ‘জীর্ণাজীর্ণে সমশ্নতঃ’ ইতি পঠিতম্| আযাসো ব্যাযামঃ| স্বপ্নং দিবা, জাগরণং নিশি| সশ্লেষ্মমেদঃপবন ইতি সশ্লেষ্মমেদশ্চাসৌ পবনশ্চ সশ্লেষ্মমেদঃ পবনঃ| অত্যর্থসঞ্চিতমিতরং দোষং পিত্তম্| অস্যাং সম্প্রাপ্তৌ বাতস্য প্রাধান্যমুক্তম্, অত এব সুশ্রুতে মহাবাতব্যাধাবযং পঠিতঃ; চরকে তু কফপ্রাধান্যম্| তত্র চরকে আবরকস্য কফস্য প্রাক্চিকিত্স্যত্বেন প্রাধান্যম্| আরম্ভকত্বেন তু সুশ্রুতে পবনস্যেতি ন বিরোধঃ| স্তিমিতেন মন্দেন, স্তভ্নাতি স্তম্ভযতি, অচেতনৌ স্পর্শজ্ঞানরহিতৌ| পরকীযাবিবেত্যনেন উত্ক্ষেপণগমনাদিষ্বপ্রভুত্বং দর্শযতি| ধ্যানাদিভিঃ জ্বরান্তৈরুপলক্ষিতঃ, ‘পুরুষ’ ইতি শেষঃ| ঊরুস্তম্ভমপরে আঢ্যবাতমাহুঃ||১-৫||