Adhikarana শূলস্য সন্নিকৃষ্টনিদানম্ (১) · Śloka ১
অথ শূলপরিণামশূলান্নদ্রবশূলনিদানম্ | দোষৈঃ পৃথক্ সমস্তামদ্বন্দ্বৈঃ শূলোঽষ্টধা ভবেত্ | সর্বেষ্বেতেষু শূলেষু প্রাযেণ পবনঃ প্রভুঃ ||১||
View original
अथ शूलपरिणामशूलान्नद्रवशूलनिदानम् | दोषैः पृथक् समस्तामद्वन्द्वैः शूलोऽष्टधा भवेत् | सर्वेष्वेतेषु शूलेषु प्रायेण पवनः प्रभुः ||१||
🔊 Audio coming soon
Hide commentary
মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)
আমবাতেঽপি শূলং ভবতীত্যতস্তদনন্তরং শূলনিদানম্| জ্বরাদিবত্ শূলস্যাপি প্রাগুত্পত্তিরস্তি| যদাহ হারীতঃ– “অনঙ্গনাশায হরস্ত্রিশূলং মুমোচ কোপান্মকরধ্বজশ্চ| তমাপতন্তং সহসা নিরীক্ষ্য ভযার্দিতো বিষ্ণুতনুং প্রবিষ্টঃ|| স বিষ্ণুহুঙ্কারবিমোহিতাত্মা পপাত ভূমৌ প্রথিতঃ স শূলঃ| স পঞ্চভূতানুগতং শরীরং প্রদূষযত্যস্য হি পূর্বসৃষ্টিঃ||” ইতি| এতেন শূলসম্ভবত্বাদস্য শূলমিতি সঞ্জ্ঞা, শূলনিখাতবদ্বেদনাজনকত্বাচ্চ| তদাহ বৃদ্ধসুশ্রুতঃ– “শঙ্কুস্ফোটনবত্তস্য যস্মাত্তীব্রা হি বেদনা| শূলাসক্তস্য ভবতি তস্মাচ্ছূলমিহোচ্যতে||” (সু. উ. তং. অ. ৪২) ইতি| কফপিত্তাদিশূলেষ্ববশ্যম্ভাবী বাযুরিত্যাহ– সর্বেষ্বিত্যাদি| প্রভুঃ কর্তা||১||
আতঙ্কদর্পণ ব্যাখ্যা (বাচস্পতি বৈদ্য কৃত)
আমবাতে চ শূলং ভবতি, অতস্তদনন্তরং শূলনিদানমাহ– দোষৈরিত্যাদি| জ্বরাদিবচ্ছূলস্যাপি প্রাগুত্পত্তিরস্তি| যদুক্তং হারীতে– “অনঙ্গনাশায হরস্ত্রিশূলং মুমোচ কোপান্মকরধ্বজশ্চ| তমাপতন্তং সহসা নিরীক্ষ্য ভযার্দিতো বিষ্ণুতনুং প্রবিষ্টঃ|| স বিষ্ণুহুঙ্কারবিমোহিতাত্মা পপাত ভূমৌ প্রথিতঃ স শূলঃ| স পঞ্চভূতানুগতং শরীরং প্রদূষযত্যস্য হি পূর্বসৃষ্টিঃ||” ইতি| স চ দেহিনাং শরীরং দূষযত্যস্য হি প্রাগুত্পত্তিরিতি| অত এবাস্য শূলিসম্ভবত্বাত্ শূল ইতি সঞ্জ্ঞা, শূলনিখাত ইব বেদনাজনকত্বাচ্চ| যদাহ বৃদ্ধসুশ্রুতঃ– “শঙ্কুস্ফোটনবত্তস্য যস্মাত্তীব্রা চ বেদনা| শূলাসক্তস্য ভবতি তস্মাচ্ছূলমিহোচ্যতে||” ইতি| সঙ্খ্যাযাং সম্প্রাপ্তৌ চ কফপিত্তাদিশূলেষ্বপি বাযোঃ প্রাধান্যমিত্যত আহ– সর্বেষ্বিত্যাদি| প্রভুঃ কর্তা||১||