Adhikarana মূত্রাঘাতনিদানম্ (১) · Śloka ১
অথ মূত্রাঘাতনিদানম্ |
জাযন্তে কুপিতৈর্দোষৈর্মূত্রাঘাতাস্ত্রযোদশ |
প্রাযো মূত্রবিঘাতাদ্যৈর্বাতকুণ্ডলিকাদযঃ ||১||
View original
अथ मूत्राघातनिदानम् |
जायन्ते कुपितैर्दोषैर्मूत्राघातास्त्रयोदश |
प्रायो मूत्रविघाताद्यैर्वातकुण्डलिकादयः ||१||
Hide commentary
মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)
মূত্রবিকারসাধর্ম্যাত্ মূত্রাঘাতানাহ– জাযন্ত ইত্যাদি| মূত্রকৃচ্ছ্রমূত্রাঘাতযোশ্চাযং বিশেষঃ– মূত্রকৃচ্ছ্রে কৃচ্ছ্রত্বমতিশযিতম্, ঈষদ্বিবন্ধঃ; মূত্রাঘাতে তু বিবন্ধো বলবান্, কৃচ্ছ্রত্বমল্পমিতি| মূত্রবিঘাতাদ্যৈর্মূত্রবেগবিধারণাদিভিঃ; আদ্যশব্দেন পুরীষশুক্রবেগবিঘাতাদীনাং রূক্ষাশনাদীনাং চ গ্রহণম্| বাতকুণ্ডলিকাদযস্ত্রযোদশেতি সম্বন্ধঃ||১||
আতঙ্কদর্পণ ব্যাখ্যা (বাচস্পতি বৈদ্য কৃত)
মূত্রবিকারসাধর্ম্যান্মূত্রাঘাতানাহ| মূত্রকৃচ্ছ্রমূত্রাঘাতযোশ্চাযমেব ভেদঃ– মূত্রকৃচ্ছ্রে কৃচ্ছ্রত্বমতিশযিতমীষদ্বিবন্ধঃ, মূত্রাঘাতে তু বিবন্ধো বলবান্ কৃচ্ছ্রত্বমল্পমিতি| তেষাং সম্প্রাপ্তিমাহ– জাযন্ত ইত্যাদি| মূত্রবেগবিধারণাদ্যৈঃ আদিশব্দেন পুরীষশুক্রাদিবেগবিঘাতানাং রূক্ষাশনাদীনাং চ গ্রহণম্| বাতকুণ্ডলিকাদযস্ত্রযোদশেতি সম্বন্ধঃ||১||
Adhikarana বাতকুণ্ডলিকালক্ষণম্ (২-৩) · Śloka ৩
রৌক্ষ্যাদ্বেগবিঘাতাদ্বা বাযুর্বস্তৌ সবেদনঃ |
মূত্রমাবিশ্য চরতি বিগুণঃ কুণ্ডলীকৃতঃ ||২||
মূত্রমল্পাল্পমথবা সরুজং সম্প্রবর্ততে |
বাতকুণ্ডলিকাং তাং তু ব্যাধিং বিদ্যাত্ সুদারুণম্ ||৩||
(সু. উ. তং. অ. ৫৮) |
View original
रौक्ष्याद्वेगविघाताद्वा वायुर्बस्तौ सवेदनः |
मूत्रमाविश्य चरति विगुणः कुण्डलीकृतः ||२||
मूत्रमल्पाल्पमथवा सरुजं सम्प्रवर्तते |
वातकुण्डलिकां तां तु व्याधिं विद्यात् सुदारुणम् ||३||
(सु. उ. तं. अ. ५८) |
Hide commentary
মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)
বাতকুণ্ডলিকামাহ– রৌক্ষ্যাদিত্যাদি| আবিশ্যেত্যাবৃত্য; ‘আবিধ্য’ ইতি পাঠান্তরে স এবার্থঃ| চরতি গচ্ছতি| বিগুণঃ কুপিতঃ| কুণ্ডলীকৃত ইতি বাত্যাবদ্বস্তাবেব ভ্রমংস্তিষ্ঠতীতি||২-৩||
আতঙ্কদর্পণ ব্যাখ্যা (বাচস্পতি বৈদ্য কৃত)
তেষাং মধ্যে বাতকুণ্ডলিকালক্ষণমাহ– রৌক্ষ্যেত্যাদি| রৌক্ষ্যাদিভির্বেগবিঘাতাদিভিশ্চ বিগুণো দুষ্টঃ, কুণ্ডলীভূতো বাযুঃ, বস্তৌ মূত্রাশযে, চরতি প্রধাবতি, আবদ্ধত্বাদ্ভ্রমংস্তিষ্ঠতীত্যর্থঃ বাত্যাবত্| আবিশ্য আবৃত্য মূত্রমিতি| তস্মান্মূত্রমল্পমল্পং সব্যথং প্রবর্ততে, তং ব্যাধিং বাতকুণ্ডলিকামাহুঃ| সুদারুণং মারণাত্মকত্বাত্||২-৩||
Adhikarana অষ্ঠীলালক্ষণম্ (৪) · Śloka ৪
আধ্মাপযন্ বস্তিগুদং রুদ্ধ্বা বাযুশ্চলোন্নতাম্ |
কুর্যাত্তীব্রার্তিমষ্ঠীলাং মূত্রবিণ্মার্গরোধিনীম্ ||৪||
View original
आध्मापयन् बस्तिगुदं रुद्ध्वा वायुश्चलोन्नताम् |
कुर्यात्तीव्रार्तिमष्ठीलां मूत्रविण्मार्गरोधिनीम् ||४||
Hide commentary
মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)
অষ্ঠীলামাহ– আধ্মাপযন্নিত্যাদি| রুদ্ধ্বেতি বস্তিগুদমেব| অষ্ঠীলাতুল্যত্বাদষ্ঠীলা, সা চ বাতব্যাধাবুক্তা||৪||
আতঙ্কদর্পণ ব্যাখ্যা (বাচস্পতি বৈদ্য কৃত)
অষ্ঠীলামাহ– আধ্মাপযন্নিত্যাদি| আধ্মাপযন্ পূরযন্ বস্তিগুদং তথা বস্তিগুদমেব রুদ্ধ্বা বাযুরষ্ঠীলাং কুর্যাত্| অষ্ঠীলাতুল্যত্বাদষ্ঠীলা, অষ্ঠীলা উত্তরাপথে নদীষু পাষাণপিণ্ডী| চলোন্নতাং চলাং চলনশীলাম্| উন্নতাম্ ঊর্ধ্বস্থিতাম্| তীব্রার্তিমতিব্যথাম্| মূত্রমার্গঃ মেঢ্রং, বিণ্মার্গঃ পাযুঃ, তযোঃ রোধিনীম্||৪||
Adhikarana বাতবস্তিলক্ষণম্ (৫-৬) · Śloka ৬
বেগং বিধারযেদ্যস্তু মূত্রস্যাকুশলো নরঃ |
নিরুণদ্ধি মুখং তস্য বস্তের্বস্তিগতোঽনিলঃ ||৫||
মূত্রসঙ্গো ভবেত্তেন বস্তিকুক্ষিনিপীডিতঃ |
বাতবস্তিঃ স বিজ্ঞেযো ব্যাধিঃ কৃচ্ছ্রপ্রসাধনঃ ||৬||
(সু. উ. তং. অ. ৫৮) |
View original
वेगं विधारयेद्यस्तु मूत्रस्याकुशलो नरः |
निरुणद्धि मुखं तस्य बस्तेर्बस्तिगतोऽनिलः ||५||
मूत्रसङ्गो भवेत्तेन बस्तिकुक्षिनिपीडितः |
वातबस्तिः स विज्ञेयो व्याधिः कृच्छ्रप्रसाधनः ||६||
(सु. उ. तं. अ. ५८) |
Hide commentary
মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)
বাতবস্তিমাহ– বেগমিত্যাদি| বস্তিকুক্ষিনিপীডিত ইতি বস্তৌ কুক্ষৌ চ নিপীডিতঃ সম্পিণ্ডিতো বাযুরিতি সম্বন্ধঃ; ‘বস্তিকুক্ষী নিপীডযন্’ ইতি পাঠান্তরে বস্তিকুক্ষ্যো রুজাকর ইতি||৫-৬||
আতঙ্কদর্পণ ব্যাখ্যা (বাচস্পতি বৈদ্য কৃত)
বাতবস্তিমাহ– বেগমিত্যাদি| অকুশলো মূর্খঃ, তস্য পুরুষস্য বস্তের্মুখং নিরুণদ্ধি বস্তিগতো বাযুঃ, তেন বাযুনা মূত্রসঙ্গো বিদ্যাত্| বস্তিকুক্ষিনিপীডিত ইতি বস্তৌ কুক্ষৌ নিপীডিতঃ, সম্পিণ্ডিতো বাযুরিতি সম্বন্ধঃ| ‘বস্তিকুক্ষী নিপীডযন্’ ইতি পাঠে তত্র বস্তিকুক্ষৌ চরন্||৫-৬||
Adhikarana মূত্রাতীতলক্ষণম্ (৭) · Śloka ৭
চিরং ধারযতো মূত্রং ত্বরযা ন প্রবর্ততে |
মেহমানস্য মন্দং বা মূত্রাতীতঃ স উচ্যতে ||৭||
View original
चिरं धारयतो मूत्रं त्वरया न प्रवर्तते |
मेहमानस्य मन्दं वा मूत्रातीतः स उच्यते ||७||
Hide commentary
মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)
মূত্রাতীতমাহ– চিরমিত্যাদি| ত্বরযা ন প্রবর্ততে ইতি মূত্রমিত্যর্থঃ| মেহমানস্য মূত্রং ত্যজতঃ| ‘বহমানস্য’ ইতি পাঠান্তরং সুগমম্||৭||
আতঙ্কদর্পণ ব্যাখ্যা (বাচস্পতি বৈদ্য কৃত)
মূত্রাতীতমাহ– চিরমিত্যাদি| চিরং চরকলং মূত্রং ধারযতঃ পুংসঃ ত্বরযা বেগেন ন প্রবর্ততে, মেহমানস্য মূত্রং ত্যজতঃ প্রবর্ততে চেত্তদা মন্দং শনৈঃ, ‘বাহমানস্য’ ইতি পাঠান্তরং সুগমম্||৭||
Adhikarana মূত্রজঠরলক্ষণম্ (৮-৯) · Śloka ৯
মূত্রস্য বেগেঽভিহতে তদুদাবর্তহেতুকঃ |
অপানঃ কুপিতো বাযুরুদরং পূরযেদ্ভৃশম্ ||৮||
নাভেরধস্তাদাধ্মানং জনযেত্তীব্রবেদনম্ |
তন্মূত্রজঠরং বিদ্যাদধোবস্তিনিরোধনম্ ||৯||
(সু. উ. তং. অ. ৫৮) |
View original
मूत्रस्य वेगेऽभिहते तदुदावर्तहेतुकः |
अपानः कुपितो वायुरुदरं पूरयेद्भृशम् ||८||
नाभेरधस्तादाध्मानं जनयेत्तीव्रवेदनम् |
तन्मूत्रजठरं विद्यादधोबस्तिनिरोधनम् ||९||
(सु. उ. तं. अ. ५८) |
Hide commentary
মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)
মূত্রজঠরমাহ– মূত্রস্য বেগ ইত্যাদি| তদুদাবর্তহেতুক ইতি মূত্রবেগধারণজনিতোদাবর্তনিমিত্তঃ| অধোবস্তিনিরোধনমিতি বস্তেরধোভাগে বিবন্ধকারকম্||৮-৯||
আতঙ্কদর্পণ ব্যাখ্যা (বাচস্পতি বৈদ্য কৃত)
মূত্রজঠরমাহ– মূত্রস্যেত্যাদি| তদুদাবর্তহেতুত ইতি মূত্রবেগধারণজনিতোদাবর্তনিমিত্ততঃ| অপানঃ ’অপানসঞ্জ্ঞকো বাতঃ কুপিতঃ’ অতিশযেনোদরং পূরযতি| ততো নাভেরধস্তাত্তীব্রবেদনমাধ্মানং কুর্যাত্| অধস্তাদ্বস্তিনিরোধনং বস্তেরধোভাগে বিবন্ধকারকম্||৮-৯||
Adhikarana মূত্রোত্সঙ্গলক্ষণম্ (১০-১১) · Śloka ১১
বস্তৌ বাঽপ্যথবা নালে মণৌ বা যস্য দেহিনঃ |
মূত্রং প্রবৃত্তং সজ্জেত সরক্তং বা প্রবাহতঃ ||১০||
স্রবেচ্ছনৈরল্পমল্পং সরুজং বাঽথ নীরুজম্ |
বিগুণানিলজো ব্যাধিঃ স মূত্রোত্সঙ্গসঞ্জ্ঞিতঃ ||১১||
(সু. উ. তং. অ. ৫৮) |
View original
बस्तौ वाऽप्यथवा नाले मणौ वा यस्य देहिनः |
मूत्रं प्रवृत्तं सज्जेत सरक्तं वा प्रवाहतः ||१०||
स्रवेच्छनैरल्पमल्पं सरुजं वाऽथ नीरुजम् |
विगुणानिलजो व्याधिः स मूत्रोत्सङ्गसञ्ज्ञितः ||११||
(सु. उ. तं. अ. ५८) |
Hide commentary
মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)
মূত্রোত্সঙ্গমাহ– বস্তাবিত্যাদি| নালে মেঢ্রে, মণৌ মেঢ্রাগ্রে| প্রবৃত্তং সজ্জেতেতি সংসক্তং সন্ন প্রবর্ততে| সরক্তং বা প্রবাহত ইতি প্রবাহণকুপিতবাযুনা বস্ত্যাদিভেদজনিতরক্তযুক্তং মূত্রং প্রবর্ততে||১০-১১||
আতঙ্কদর্পণ ব্যাখ্যা (বাচস্পতি বৈদ্য কৃত)
মূত্রোত্সঙ্গমাহ– বস্তাবিত্যাদি| বস্তৌ মূত্রাশযে, অথবা নালে মেঢ্রে, অথবা মণৌ মেঢ্রাগ্রে, মূত্রং সজ্জতে ন প্রবর্ততে, সরক্তং বা প্রবর্ততে প্রবাহত ইতি; শনৈর্মন্দম্, অল্পমল্পং স্তোক্তং সব্যথং বা রুজারহিতং বা প্রবর্ততে মূত্রমিতি সম্বন্ধঃ||১০-১১||
Adhikarana মূত্রক্ষযলক্ষণম্ (১২) · Śloka ১২
রূক্ষস্য ক্লান্তদেহস্য বস্তিস্থৌ পিত্তমারুতৌ |
মূত্রক্ষযং সরুগ্দাহং জনযেতাং তদাহ্বযম্ ||১২||
(সু. উ. তং. অ. ৫৮) |
View original
रूक्षस्य क्लान्तदेहस्य बस्तिस्थौ पित्तमारुतौ |
मूत्रक्षयं सरुग्दाहं जनयेतां तदाह्वयम् ||१२||
(सु. उ. तं. अ. ५८) |
Hide commentary
মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)
মূত্রক্ষযমাহ– রূক্ষস্যেত্যাদি| তদাহ্বযমিতি মূত্রক্ষযাখ্যং, কারণে কার্যোপচারাত্||১২||
আতঙ্কদর্পণ ব্যাখ্যা (বাচস্পতি বৈদ্য কৃত)
মূত্রক্ষযমাহ– রূক্ষস্যেত্যাদি| ক্লান্তদেহস্য শ্রান্তশরীরস্য, বস্তিস্থৌ মূত্রাশযস্থৌ, পিত্তমারুতৌ মূত্রনাশং কুরুতঃ ব্যথাদাহযুক্তম্| তদাহ্বযং মূত্রক্ষযাখ্যং, কারণে কার্যোপচারাত্||১২||
Adhikarana মূত্রগ্রন্থিলক্ষণম্ (১৩) · Śloka ১৩
অন্তর্বস্তিমুখে বৃত্তঃ স্থিরোঽল্পঃ সহসা ভবেত্ |
অশ্মরীতুল্যরুগ্গ্রন্থির্মূত্রগ্রন্থিঃ স উচ্যতে ||১৩||
(বা. নি. অ. ৯) |
View original
अन्तर्बस्तिमुखे वृत्तः स्थिरोऽल्पः सहसा भवेत् |
अश्मरीतुल्यरुग्ग्रन्थिर्मूत्रग्रन्थिः स उच्यते ||१३||
(वा. नि. अ. ९) |
Hide commentary
মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)
মূত্রগ্রন্থিমাহ– অন্তরিত্যাদি| অন্তর্বস্তিমুখে বস্তিমুখস্যাভ্যন্তরে| গ্রন্থির্গুডকাকারঃ| ননু, স্থানবেদনাকারণানামভিন্নত্বাদশ্মর্যা সহ কো ভেদঃ? উচ্যতে– অশ্মর্যাং পিত্তাদিকং সংহন্যতে, অত্র তু রক্তমেব| উক্তং হি তন্ত্রান্তরে– “রক্তং বাতকফাদ্দুষ্টং বস্তিদ্বারে সুদারুণম্| গ্রন্থিং কুর্যাত্ স কৃচ্ছ্রেণ সৃজেন্মূত্রং তদাবৃতম্|| অশ্মরীসমশূলং তং রক্তগ্রন্থিং প্রচক্ষতে||” ইতি| বিশেষজ্ঞানং তু কুত ইতি চেত্? অশ্মরীপূর্বরূপোক্তস্য মূত্রে বস্তসগন্ধত্বাদের্ভাবাভাবাভ্যাম্||১৩||
আতঙ্কদর্পণ ব্যাখ্যা (বাচস্পতি বৈদ্য কৃত)
মূত্রগ্রন্থিমাহ– অন্তরিত্যাদি| অন্তর্বস্তিমুখস্যাভ্যন্তরে, গ্রন্থির্গুটিকাকারঃ, স্থিরঃ অচলঃ, অল্পো লঘুরামলকাকারঃ| ননু, স্থানবেদনাকারণামভিন্নত্বাদশ্মর্যা সহ কো ভেদঃ? উচ্যতে– অশ্মর্যাং পিত্তাদিকং সংহন্যতে, অত্র তু রক্তমেব; অথবা অযং সহসা ভবেত্, অশ্মরী তু সঞ্চযেন| অন্যচ্চ অশ্মরী পিত্তেন পচ্যতে, বাযুনা শোষ্যতে, কফেন বধ্যতে, অত্র তু রক্তমেব| উক্তং হি তন্ত্রান্তরে– “রক্তং বাতকফাদ্দুষ্টং বস্তিদ্বারে সুদারুণম্| গ্রন্থিং কুর্যাত্স কৃচ্ছ্রেণ সৃজেন্মূত্রং তদাবৃতম্|| অশ্মরীসমশূলং হি রক্তগ্রন্থিং প্রচক্ষতে|” ইতি| তথা অশ্মরীপূর্বরূপোক্তস্য মূত্রে বস্তসগন্ধত্বাদেরভাবাত্||১৩||
Adhikarana মূত্রশুক্রলক্ষণম্ (১৪) · Śloka ১৪
মূত্রিতস্য স্ত্রিযং যাতো বাযুনা শুক্রমুদ্ধতম্ |
স্থানাচ্চ্যুতং মূত্রযতঃ প্রাক্ পশ্চাদ্বা প্রবর্ততে ||১৪||
ভস্মোদকপ্রতীকাশং মূত্রশুক্রং তদুচ্যতে |
(বা. নি. অ. ৯) |
View original
मूत्रितस्य स्त्रियं यातो वायुना शुक्रमुद्धतम् |
स्थानाच्च्युतं मूत्रयतः प्राक् पश्चाद्वा प्रवर्तते ||१४||
भस्मोदकप्रतीकाशं मूत्रशुक्रं तदुच्यते |
(वा. नि. अ. ९) |
Hide commentary
মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)
মূত্রশুক্রমাহ– মূত্রিতস্যেত্যাদি| মূত্রিতস্য মূত্রবেগিতস্য| স্থানাচ্চ্যুতং স্বস্থানাদ্ভ্রষ্টং শুক্রম্||১৪||–
আতঙ্কদর্পণ ব্যাখ্যা (বাচস্পতি বৈদ্য কৃত)
মূত্রশুক্রমাহ– মূত্রিতস্যেত্যাদি| মূত্রিতস্য মূত্রবেগযুক্তস্য বাতেনোদ্ধূতং স্থানাচ্চ্যুতং স্বস্থানাদ্ভ্রষ্টং, মূত্রযতো মূত্রং কুর্বতঃ পুরুষস্য প্রাক্ প্রথমং প্রবর্ততে, অথবা পশ্চাত্ ভস্মমিলিতোদকসদৃশম্||১৪||–
Adhikarana উষ্ণবাতলক্ষণম্ (১৫-১৬) · Śloka ১৬
ব্যাযামাধ্বাতপৈঃ পিত্তং বস্তিং প্রাপ্যানিলান্বিতম্ ||১৫||
বস্তিং মেঢ্রং গুদং চৈব প্রদহেত্ স্রাবযেদধঃ |
মূত্রং হারিদ্রমথবা সরক্তং রক্তমেব বা ||১৬||
কৃচ্ছ্রাত্ পুনঃ পুনর্জন্তোরুষ্ণবাতং ব্রুবন্তি তম্ |
(সু. উ. তং. অ. ৫৮) |
View original
व्यायामाध्वातपैः पित्तं बस्तिं प्राप्यानिलान्वितम् ||१५||
बस्तिं मेढ्रं गुदं चैव प्रदहेत् स्रावयेदधः |
मूत्रं हारिद्रमथवा सरक्तं रक्तमेव वा ||१६||
कृच्छ्रात् पुनः पुनर्जन्तोरुष्णवातं ब्रुवन्ति तम् |
(सु. उ. तं. अ. ५८) |
Hide commentary
মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)
উষ্ণবাতমাহ– ব্যাযামেত্যাদি| ব্যাযামাত্ বিরোধিসৌম্যধাতুক্ষযাত্তেজোবৃদ্ধ্যা পিত্তবৃদ্ধিঃ| অনিলান্বিতমনিলসংযুতম্| ‘অনিলাবৃতম্’ ইতি পাঠান্তরং সুগমম্| সরক্তমীষল্লোহিতম্||১৫-১৬||–
আতঙ্কদর্পণ ব্যাখ্যা (বাচস্পতি বৈদ্য কৃত)
উষ্ণবাতমাহ– ব্যাযামেত্যাদি| ব্যাযামাদ্বিরোধিত্বেন সৌম্যধাতুক্ষযাত্তেজোবৃদ্ধ্যা পিত্তবৃদ্ধিঃ, তত্ কুপিতং পিত্তমনিলান্বিতমনিলসংযুতং বস্তিং প্রাপ্য বস্ত্যাদিকং প্রদহন্ মূত্রমধঃ স্রাবযেত্| কীদৃশং? হারিদ্রম্, অথবা সরক্তং ঈষদ্রক্তম্, অথবা কেবলং রক্তমেব| ‘অনিলাবৃতম্’ ইতি পাঠান্তরম্||১৫-১৬||–
Adhikarana মূত্রসাদলক্ষণম্ (১৭-১৮) · Śloka ১৮
পিত্তং কফো দ্বাবপি বা সংহন্যেতেঽনিলেন চেত্ ||১৭||
কৃচ্ছ্রান্মূত্রং তদা পীতং শ্বেতং রক্তং ঘনং সৃজেত্ |
সদাহং রোচনাশঙ্খচূর্ণবর্ণং ভবেত্তু তত্ ||১৮||
শুষ্কং সমস্তবর্ণং বা মূত্রসাদং বদন্তি তম্ |
(বা. নি. অ. ৯) |
View original
पित्तं कफो द्वावपि वा संहन्येतेऽनिलेन चेत् ||१७||
कृच्छ्रान्मूत्रं तदा पीतं श्वेतं रक्तं घनं सृजेत् |
सदाहं रोचनाशङ्खचूर्णवर्णं भवेत्तु तत् ||१८||
शुष्कं समस्तवर्णं वा मूत्रसादं वदन्ति तम् |
(वा. नि. अ. ९) |
Hide commentary
মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)
মূত্রসাদমাহ– পিত্তমিত্যাদি| সংহন্যেতে স্ত্যানীক্রিযেতে| শুষ্কমল্পং, তন্মূত্রং পিত্তেন রোচনাভং, কফেন শঙ্খচূর্ণাভং, সমস্তবর্ণমুক্তসকলবর্ণং সন্নিপাতাত্||১৭-১৮||–
আতঙ্কদর্পণ ব্যাখ্যা (বাচস্পতি বৈদ্য কৃত)
মূত্রসাদমাহ– পিত্তমিত্যাদি| বাতেন সংহন্যেতে স্ত্যানীক্রিযেতে, তদা কৃচ্ছ্রাত্ মূত্রযেত্| পিত্তেন পীতরক্তং কফেন শ্বেতং ঘনং, ত্রিদোষেণ সমস্তবর্ণং, তদেব শুষ্কং, পিত্তেন রোচনাচূর্ণাভং, কফেন শঙ্খচূর্ণাভং, সন্নিপাতাদুক্তসকলবর্ণম্||১৭-১৮||–
Adhikarana বিড্বিঘাতলক্ষণম্ (১৯-২০) · Śloka ২০
রূক্ষদুর্বলযোর্বাতেনোদাবৃত্তং শকৃদ্যদা ||১৯||
মূত্রস্রোতোঽনুপদ্যেত বিট্সংসৃষ্টং তদা নরঃ |
বিড্গন্ধং মূত্রযেত্ কৃচ্ছ্রাদ্বিড্বিঘাতং বিনির্দিশেত্ ||২০||
(বা. নি. অ. ৯) |
View original
रूक्षदुर्बलयोर्वातेनोदावृत्तं शकृद्यदा ||१९||
मूत्रस्रोतोऽनुपद्येत विट्संसृष्टं तदा नरः |
विड्गन्धं मूत्रयेत् कृच्छ्राद्विड्विघातं विनिर्दिशेत् ||२०||
(वा. नि. अ. ९) |
Hide commentary
মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)
বিড্বিঘাতমাহ– রূক্ষেত্যাদি| অনুপদ্যেত প্রাপ্নুযাত্| বিড্গন্ধমিত্যত্র বাশব্দো দ্রষ্টব্যঃ||১৯-২০||
আতঙ্কদর্পণ ব্যাখ্যা (বাচস্পতি বৈদ্য কৃত)
বিড্বিঘাতমাহ– রূক্ষেত্যাদি| দ্বযোস্তযোর্বাতেন অধোবৃতং মূত্রাশযাত্স্রোতাংসি অনুপদ্যেত আপ্নুযাত্, তদা বিট্সংসৃষ্টং পুরীষমিশ্রং বিড্গন্ধং মূত্রং কৃচ্ছ্রাত্ মূত্রযেত্| ‘উদাবর্তম্’ ইতি পাঠান্তরং, তত্রাপি স এবার্থঃ||১৯-২০||
Adhikarana বস্তিকুণ্ডললক্ষণম্ (২১-২২) · Śloka ২৪
দ্রুতাধ্বলঙ্ঘনাযাসৈরভিঘাতাত্ প্রপীডনাত্ |
স্বস্থানাদ্বস্তিরুদ্বৃত্তঃ স্থূলস্তিষ্ঠতি গর্ভবত্ ||২১||
শূলস্পন্দনদাহার্তো বিন্দুং বিন্দুং স্রবত্যপি |
পীডিতস্তু সৃজেদ্ধারাং সংস্তম্ভোদ্বেষ্টনার্তিমান্ ||২২||
বস্তিকুণ্ডলমাহুস্তং ঘোরং শস্ত্রবিষোপমম্ |
পবনপ্রবলং প্রাযো দুর্নিবারমবুদ্ধিভিঃ |২৪|
View original
द्रुताध्वलङ्घनायासैरभिघातात् प्रपीडनात् |
स्वस्थानाद्बस्तिरुद्वृत्तः स्थूलस्तिष्ठति गर्भवत् ||२१||
शूलस्पन्दनदाहार्तो बिन्दुं बिन्दुं स्रवत्यपि |
पीडितस्तु सृजेद्धारां संस्तम्भोद्वेष्टनार्तिमान् ||२२||
बस्तिकुण्डलमाहुस्तं घोरं शस्त्रविषोपमम् |
पवनप्रबलं प्रायो दुर्निवारमबुद्धिभिः |२४|
Hide commentary
মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)
বস্তিকুণ্ডলমাহ– দ্রুতেত্যাদি| লঙ্ঘনমুত্পতনম্| উদ্বৃত্তঃ স্বস্থানাদূর্ধ্বং গতঃ, গর্ভবদিতি গর্ভিণ্যা উদরান্তর্গতাপত্যবত্, এতেন বস্তিপুটস্য পার্শ্বগমনং দর্শিতম্| পীডিত ইতি নাভেরধঃ| উদ্বেষ্টনার্তিঃ উদ্বেষ্টনরূপাঽঽর্তিঃ| শস্ত্রবিষোপমং শস্ত্রবিষসদৃশমিতি বিভিন্নার্থসূচনার্থং প্রসিদ্ধানুভবোপদর্শনার্থম্||২১-২২||
আতঙ্কদর্পণ ব্যাখ্যা (বাচস্পতি বৈদ্য কৃত)
বস্তিকুণ্ডলমাহ– দ্রুতেত্যাদি| দ্রুতাধ্বলঙ্ঘনং দ্রুতেন অধ্বগমনং, লঙ্ঘনমুত্পতনং বা, অভিঘাতাল্লগুডাদিভিঃ, প্রপীডনাদ্বা নিষ্পীডনাত্, এতৈর্হেতুভির্বস্তিরুদ্বৃত্তঃ স্বস্থানাদূর্ধ্বং গতঃ| গর্ভবদিতি গর্ভিণ্যা উদরান্তর্গতাঽপত্যবত্তিষ্ঠতি, এতেন বস্তিপুটস্য পার্শ্বগমনমপি সূচিতম্| পীডিত ইতি নাভেরধঃ, তথা সংস্তম্ভাদিযুক্তঃ, উদ্বেষ্টনরূপা অর্তিঃ| উদ্বেষ্টনরূপপীডাতিযুক্তম্| শস্ত্রবিষোপমমিতি বিভিন্নার্থসূচনার্থং, প্রসিদ্ধপ্রভাবোপদর্শনার্থং চ| শস্ত্রোপমং শীঘ্রেণ মারণাত্মকং, বিষোপমমিতি কালান্তরেণ| বিষমত্র গরঃ প্রাযেণ বাতবহুলম্||২১-২২||–
Adhikarana বস্তিকুণ্ডলস্য দোষান্তরসংসৃষ্টস্য লক্ষণম্ (২৩) · Śloka ২৪
তস্মিন্ পিত্তান্বিতে দাহঃ শূলং মূত্রবিবর্ণতা ||২৩||
শ্লেষ্মণা গৌরবং শোথঃ স্নিগ্ধং মূত্রং ঘনং সিতম্ |২৪|
View original
तस्मिन् पित्तान्विते दाहः शूलं मूत्रविवर्णता ||२३||
श्लेष्मणा गौरवं शोथः स्निग्धं मूत्रं घनं सितम् |२४|
Hide commentary
মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)
বাতস্যৈব দোষান্তরানুবন্ধিনো লক্ষণমাহ– তস্মিন্নিত্যাদি| শ্লেষ্মণা অন্বিতে তস্মিন্নিতি বোদ্ধব্যম্||২৩||–
আতঙ্কদর্পণ ব্যাখ্যা (বাচস্পতি বৈদ্য কৃত)
তস্যৈবেতরদোষানুবন্ধেন লক্ষণমাহ– তস্মিন্নিত্যাদি||২৩||–
Adhikarana বস্তিকুণ্ডলস্য সাধ্যাসাধ্যবিচারঃ (২৪) · Śloka ২৫
শ্লেষ্মরুদ্ধবিলো বস্তিঃ পিত্তোদীর্ণো ন সিধ্যতি ||২৪||
অবিভ্রান্তবিলঃ সাধ্যো, ন তু যঃ কুণ্ডলীকৃতঃ |২৫|
View original
श्लेष्मरुद्धबिलो बस्तिः पित्तोदीर्णो न सिध्यति ||२४||
अविभ्रान्तबिलः साध्यो, न तु यः कुण्डलीकृतः |२५|
Hide commentary
মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)
তস্যৈব সাধ্যত্বাসাধ্যত্বমাহ– শ্লেষ্মরুদ্ধবিল ইত্যাদি| বিলং বস্তিমুখশুষিরম্| পিত্তোদীর্ণঃ উপচিতপিত্তঃ, স এব অবিভ্রান্তবিলোঽনাবৃতবিলঃ| কফেন কুণ্ডলীকৃতোঽসাধ্য ইতি বোধ্যম্| অকুণ্ডলীকৃতস্তু সাধ্যত্বেনোক্তঃ||২৪||–
আতঙ্কদর্পণ ব্যাখ্যা (বাচস্পতি বৈদ্য কৃত)
অবিভ্রান্তবিলঃ কফেনারুদ্ধমুখঃ, ঘনকফেন কুণ্ডলীকৃতো ন ভবতি স সাধ্যঃ, কুণ্ডলীকৃতস্ত্বসাধ্যঃ| বিলং বস্তিমুখসুষিরম্||২৪||
Adhikarana কুণ্ডলীভূতবস্তের্লক্ষণম্ (২৫) · Śloka ২৫
স্যাদ্বস্তৌ কুণ্ডলীভূতে তৃণ্মোহঃ শ্বাস এব চ ||২৫||
View original
स्याद्बस्तौ कुण्डलीभूते तृण्मोहः श्वास एव च ||२५||
Hide commentary
মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)
কুণ্ডলীভূতস্যৈব লিঙ্গমাহ– স্যাদিত্যাদি| এতৌ বিড্বিঘাতবস্তিকুণ্ডলৌ সুশ্রুতেন ন পঠিতৌ, তেন হি মূত্রোদকসাদমেব দ্বিধা পঠিত্বা ‘দ্বাদশ মূত্রাঘাতা’ ইত্যুক্তং, সর্বানভিধানং তু পরাধিকারত্বেনেতি মন্তব্যম্||২৫||
আতঙ্কদর্পণ ব্যাখ্যা (বাচস্পতি বৈদ্য কৃত)
কুণ্ডলীভূতস্য তস্যৈব লিঙ্গমাহ– স্যাদিত্যাদি| শ্লেষ্মণা রুদ্ধবিলঃ বস্তিঃ কুণ্ডলাকারত্বেন তিষ্ঠতি| “বাতকুণ্ডলিকাঽষ্ঠীলা বাতবস্তিস্তথৈব চ| মূত্রাতীতঃ সজঠরো মূত্রোত্সঙ্গঃ ক্ষযস্তথা|| মূত্রগ্রন্থির্মূত্রশুক্রমুষ্ণবাতস্তথৈব চ| মূত্রসাদো বিড্বিঘাতো বস্তিকুণ্ডলিকা তথা||” এতে মূত্রাঘাতাস্ত্রযোদশ জ্ঞেযাঃ||২৫||
Adhikarana পুষ্পিকা · Śloka ৩১
ইতি শ্রীমাধবকরবিরচিতে মাধবনিদানে মূত্রাঘাতনিদানং সমাপ্তম্ ||৩১||
View original
इति श्रीमाधवकरविरचिते माधवनिदाने मूत्राघातनिदानं समाप्तम् ||३१||
Hide commentary
মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)
ইতি শ্রীবিজযরক্ষিতকৃতাযাং মধুকোশব্যাখ্যাযাং মূত্রাঘাতনিদানং সমাপ্তম্||৩১||
আতঙ্কদর্পণ ব্যাখ্যা (বাচস্পতি বৈদ্য কৃত)
ইতি শ্রীবাচস্পতিবৈদ্যবিরচিতাযাং মাধবনিদানব্যাখ্যাযামাতঙ্কদর্পণাখ্যাযাং মূত্রাঘাতনিদানং সমাপ্তম্||৩১||