Adhikarana মেদোরোগনিদান-সম্প্রাপ্তি-লক্ষণানি, অতিস্থূললক্ষণং চ (১-৯) · Śloka ৯
অথ মেদোরোগনিদানম্ | অব্যাযামদিবাস্বপ্নশ্লেষ্মলাহারসেবিনঃ | মধুরোঽন্নরসঃ প্রাযঃ স্নেহান্মেদঃ প্রবর্ধযেত্ ||১|| মেদসাঽঽবৃতমার্গত্বাত্ পুষ্যন্ত্যন্যে ন ধাবতঃ | মেদস্তু চীযতে তস্মাদশক্তঃ সর্বকর্মসু ||২|| ক্ষুদ্রশ্বাসতৃষামোহস্বপ্নক্রথনসাদনৈঃ | যুক্তঃ ক্ষুত্স্বেদদুর্গন্ধৈরল্পপ্রাণোঽল্পমৈথুনঃ ||৩|| মেদস্তু সর্বভূতানামুদরেষ্বস্থিষু স্থিতম্ | অত এবোদরে বৃদ্ধিঃ প্রাযো মেদস্বিনো ভবেত্ ||৪|| মেদসাঽঽবৃতমার্গত্বাদ্বাযুঃ কোষ্ঠে বিশেষতঃ | চরন্ সন্ধুক্ষযত্যগ্নিমাহারং শোষযত্যপি ||৫|| তস্মাত্ স শীঘ্রং জরযত্যাহারমভিকাঙ্ক্ষতি | বিকারাংশ্চাপ্নুতে ঘোরান্ কাংশ্চিত্ কালব্যতিক্রমাত্ ||৬|| এতাবুপদ্রবকরৌ বিশেষাদগ্নিমারুতৌ | এতৌ তু দহতঃ স্থূলং বনদাবো বনং যথা ||৭|| মেদস্যতীব সংবৃদ্ধে সহসৈবানিলাদযঃ | বিকারান্ দারুণান্ কৃত্বা নাশযন্ত্যাশু জীবিতম্ ||৮|| মেদোমাংসাতিবৃদ্ধত্বাচ্চলস্ফিগুদরস্তনঃ | অযথোপচযোত্সাহো নরোঽতিস্থূল উচ্যতে ||৯|| (চ. সূ. অ. ২১) |
View original
अथ मेदोरोगनिदानम् | अव्यायामदिवास्वप्नश्लेष्मलाहारसेविनः | मधुरोऽन्नरसः प्रायः स्नेहान्मेदः प्रवर्धयेत् ||१|| मेदसाऽऽवृतमार्गत्वात् पुष्यन्त्यन्ये न धावतः | मेदस्तु चीयते तस्मादशक्तः सर्वकर्मसु ||२|| क्षुद्रश्वासतृषामोहस्वप्नक्रथनसादनैः | युक्तः क्षुत्स्वेददुर्गन्धैरल्पप्राणोऽल्पमैथुनः ||३|| मेदस्तु सर्वभूतानामुदरेष्वस्थिषु स्थितम् | अत एवोदरे वृद्धिः प्रायो मेदस्विनो भवेत् ||४|| मेदसाऽऽवृतमार्गत्वाद्वायुः कोष्ठे विशेषतः | चरन् सन्धुक्षयत्यग्निमाहारं शोषयत्यपि ||५|| तस्मात् स शीघ्रं जरयत्याहारमभिकाङ्क्षति | विकारांश्चाप्नुते घोरान् कांश्चित् कालव्यतिक्रमात् ||६|| एतावुपद्रवकरौ विशेषादग्निमारुतौ | एतौ तु दहतः स्थूलं वनदावो वनं यथा ||७|| मेदस्यतीव संवृद्धे सहसैवानिलादयः | विकारान् दारुणान् कृत्वा नाशयन्त्याशु जीवितम् ||८|| मेदोमांसातिवृद्धत्वाच्चलस्फिगुदरस्तनः | अयथोपचयोत्साहो नरोऽतिस्थूल उच्यते ||९|| (च. सू. अ. २१) |
🔊 Audio coming soon
Hide commentary
মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)
“বিনা প্রমেহমপ্যেতা জাযন্তে দুষ্টমেদসঃ|” ইত্যত্র মেদঃসঙ্কীর্তনাত্ মেদোদুষ্টেরভিধানং, মেদোদুষ্ট্যা চ স্থৌল্যম্| মধুরোঽন্নরস ইতি মধুরপ্রায আম ইবান্নরসঃ সম্ভবন্ স্নেহান্মেদো জনযতি| সুশ্রুতেঽপ্যুক্তম্– “আম ইবান্নরসো মধুরতরশ্চ ভবতি” ইত্যাদি| ননু, মেদস্বিনস্তীক্ষ্ণাগ্নিত্বাত্ কথমাম ইবান্নরসো ভবতি? যদুক্তং চরকেণ– “চরন্ সন্ধুক্ষযত্যগ্নিং” (চ. সূ. অ. ২১) ইতি| অগ্নৌ চ মন্দে আমোত্পাদঃ, যদাহ– “আমাশযস্থঃ কাযাগ্নের্দৌর্বল্যাদবিপাচিতঃ| আদ্য আহারধাতুর্যঃ স আম ইতি কীর্তিতঃ||” ইতি| উচ্যতে– শ্লেষ্মলাহারাধ্যশনশীলত্বেন কদাচিত্ কালব্যতিক্রমভোজনেন চ বহুবিকারকরণাগ্নিব্যাপত্তেরন্নরসস্যামতুল্যতা, অথবা মধুরতরান্নরসোপলিপ্তেঽন্নবহস্রোতসি সর্ব এবান্নরসো মধুরতরো নিষ্পদ্যতে| যথা পিত্তযুক্তেঽন্নবহস্রোতসি মধুররসস্যাপি বিদাহঃ| যদুক্তম্– “স্রোতস্যন্নবহে পিত্তং পক্তৌ বা যস্য তিষ্ঠতি| বিদাহি ভুক্তমন্যদ্বা তস্যাপ্যন্নং বিদহ্যতে||” (সু. সূ. অ. ৪৬) ইতি| স চামতুল্যত্বাদাম ইত্যুচ্যতে| অশক্তঃ সর্বকর্মস্বিতি মেদসঃ সৌকুমার্যাত্| ক্ষুদ্রশ্বাসঃ ‘রূক্ষাযাসোদ্ভব’ (মা. নি. অ. ১২) ইত্যাদিনাঽভিহিতঃ| ক্রথনমকস্মাদুচ্ছ্বাসাবরোধঃ| মেদসেত্যাদি| চরন্ সন্ধুক্ষযত্যগ্নিমিতি মেদোরুদ্ধমার্গত্বাত্ কুম্ভকারপবনন্যাযেনান্তর্বলবান্ বৃদ্ধো বাযুরগ্নিং দীপযতি| অতিবৃদ্ধস্তু বাযুরগ্নিবৈষম্যজনকঃ| বিকারাংশ্চাপ্নুতে ঘোরানিতি বাতবিকারাণামন্যতমান্| কালব্যতিক্রমাত্ ভোজনকালব্যতিক্রমাত্| বিকারান্ দারুণানিতি প্রমেহপিডকাজ্বরভগন্দরবিদ্রধিবাতরোগাণামন্যতমান্| অযথোপচযোত্সাহ ইতি অযথাবন্মাংসোপচয উত্সাহশ্চ যস্য স তথা||১-৯||
আতঙ্কদর্পণ ব্যাখ্যা (বাচস্পতি বৈদ্য কৃত)
“বিনা প্রমেহমপ্যেতা জাযন্তে দুষ্টমেদসঃ” ইতি কীর্তনাত্ পিডকানন্তরং মেদোনিদানমাহ– তস্যোত্পত্তৌ হেতুমাহ– অব্যাযামেত্যাদি| অব্যাযামাদিসেবিনঃ পুরুষস্য প্রাযো বাহুল্যেন আম ইব মধুরোঽন্নরসঃ সম্ভবন্ স্নেহান্মেদো জনযতি| উক্তং চ সুশ্রুতে– “আম ইবান্নরসো মধুরতরশ্চ ভবতি|” ইতি| ননু মেদস্বিনস্তীক্ষ্ণাগ্নিত্বাত্কথমাম ইবান্নরসো ভবতি| যদুক্তং চরকে– “চরন্সন্ধুক্ষযত্যগ্নিমাহারং শোষযত্যপি|” ইতি, অগ্নৌ চ মন্দে আমোত্পাদঃ, যদাহ– “আমাশযস্থঃ কাযাগ্নের্দৌর্বল্যাদবিপাচিতঃ| আদ্য আহারধাতুর্যঃ স আম ইতি কীর্তিতঃ|” ইতি| উচ্যতে– শ্লেষ্মলাহারাধ্যশনশীলত্বেন কদাচিত্কালব্যতিক্রমভোজনেন চ তস্য মহাবিকারোদযঃ, ‘বিকারাংশ্চাপ্নুতে ঘোরান্কাংশ্চিত্কালব্যতিক্রমাত্|” ইতি; অথবা মধুরতরান্নরসোপলিপ্তেঽন্নবহে স্রোতসি সর্ব এবান্নরসো মধুরতরো নিষ্পদ্যতে, যথা পিত্তযুক্তান্নবহে স্রোতসি মধুরস্যাপি বিদাহঃ| যদুক্তম্– “স্রোতস্যন্নবহে পিত্তং পক্তৌ বা যস্য তিষ্ঠতি| বিদাহি ভুক্তমন্যদ্বা তস্যাপ্যন্নং বিদহ্যতে||” ইতি| স চামতুল্যত্বাদাম ইত্যুচ্যতে| তস্যাতিবৃদ্ধাং শক্তিমাহ– মেদসেত্যাদি| অন্যে ধাতবো রসাদযঃ শুক্রান্তাঃ ন পুষ্যন্তি, মেদশ্চীযতে বৃদ্ধিং গচ্ছতি| তস্যাপি প্রবৃদ্ধস্যোপদ্রবানাহ– ক্ষুদ্রেত্যাদি| শ্বাসনিদানোক্তঃ ক্ষুদ্রশ্বাসঃ, স্বপ্নঃ নিদ্রা, ক্রথনমকস্মাত্ শ্বাসাবরোধঃ, অন্যে– ক্রথনং তস্য কণ্ঠে ঘুর্ঘুররবঃ, সাদনং শরীরস্য, ক্ষুত্ ছিক্কা, অল্পপ্রাণো হীনবলঃ, অল্পমৈথুনঃ শুক্রস্যাবৃদ্ধিত্বাত্| তস্য স্থানসংশ্রযমাহ– মেদ ইত্যাদি| সুগমম্| তস্যাতিবৃদ্ধস্য বহ্নের্দীপ্তিতামাহ– মেদসেত্যাদি| মেদোরুদ্ধমার্গত্বাত্ যদি কুম্ভকারপবনন্যাযেনান্তর্বলবানতিপ্রবৃদ্ধো বাযুর্বিশেষাদগ্নিং দীপযতি, দীপ্তাগ্নিত্বাদাহারমভিলষতি| অতিপ্রবৃদ্ধস্তু বাযুরগ্নিবৈষম্যকৃত্ স্যাত্| কাংশ্চিদ্বিকারান্ বাতবিকারাণামন্যতমান্, ঘোরান্ দারুণান্| কালব্যতিক্রমাদিতি ভোজনকালব্যতিক্রমাত্, প্রমেহপিডকাজ্বরভগন্দরবিদ্রধিবাতরোগাণামন্যতমান্| কোষ্ঠান্তঃরুদ্ধমার্গত্বাত্ প্রবৃদ্ধৌ বিনাশায ভবত ইত্যত আহ– এতাবিত্যাদি| বিশেষাত্প্রবৃদ্ধাবেতৌ রোগোত্পাদকৌ ভবতঃ| এতৌ হি স্থূলং নরং নাশযতঃ, যথা দাবাগ্নির্বনম্| পুনরতিপ্রবৃদ্ধস্য মেদসো বিশেষহেতুমাহ– মেদসীত্যাদি| বিকারান্ পূর্বোক্তানেব| স্থূললক্ষণমাহ– স্ফিক্ ঊর্বোরুপরিতনো ভাগঃ, অযথাবন্মাংসোপচয উত্সাহশ্চ যস্য স তথা||১-৯||