১১. কাসনিদানম্

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ক্ষযরূপে কাসপাঠাত্ কাসোপেক্ষযা চ ক্ষযোত্পত্তেস্তদনন্তরং কাসনিদানমাহ– ধূমোপঘাতাদিত্যাদি| ধূমেন মুখনাসাপ্রবিষ্টেনোপঘাতো ধূমোপঘাতঃ| রসত ইতি বাতেনোর্ধ্বং নীতাদামরসাত্, ‘রজস’ ইতি পাঠান্তরে মুখনাসাপ্রবিষ্টধূলেরিত্যর্থঃ| বিমার্গগত্বং চ হি ভোজনস্যাতিদ্রুতাভ্যবহারাদিনা| চশব্দঃ সমুচ্চযে, হি পাদপূরণে| বেগাবরোধাদিতি পুরীষাদেঃ, তেন হি বাযুরূর্ধ্বগঃ স্যাত্| ক্ষবথোস্তথৈবেতি বেগাবরোধাদিতি সম্বন্ধঃ| প্রাণো বাযুরুদানেন দুষ্টেনানুগতো বক্ত্রান্নিরেতি| স বাযুঃ, ভিন্নকাংস্যপাত্রবত্ হতস্বনঃ কাস ইতি প্রদিষ্টঃ| সদোষঃ সকফপিত্তঃ, বাতিকপৈত্তিকাদিভেদভিন্ন ইতি বা| এতেনৈব সমানস্থাননিদানাভ্যাং হিক্কাশ্বাসাভ্যামস্য ভেদঃ, ন হি তত্র বাতিকপৈত্তিকাদিভেদেন ব্যপদেশ ইতি গদাধরঃ| কসতি শিরঃকণ্ঠাদূর্ধ্বং গচ্ছতি বাযুরিতি কাসঃ, ‘কস’ গতৌ ইত্যস্মাত্; ‘কসনাত্ কাসঃ’ (চ. চি. অ. ১৮) ইতি চরকে পাঠঃ; কাসনং কাস ইতি বা, “ভিন্নস্বরঃ কাসতি শুষ্কমেব” (সু. উ. তং. অ. ৫২) ইতি সুশ্রুতদর্শনাত্||১-২||

আতঙ্কদর্পণ ব্যাখ্যা (বাচস্পতি বৈদ্য কৃত)

ক্ষযরূপে কাসপাঠাত্ তদনন্তরং কাসনিদানমাহ– ধূমেত্যাদি| ধূমেন মুখনাসাপ্রবিষ্টেন উপঘাতো ধূমোপঘাতঃ, রজসেতি রজসা মুখনাসাপ্রবিষ্টেন তথৈব, ‘রসতঃ’ ইতি পাঠান্তরং, তত্র রসো জলং, ব্যাযাম আযাসঃ, রূক্ষান্নং চণকাদি, বিমার্গগত্বাদিতি ভোজনস্য অতিদ্রুতাভ্যবহারাদিনা, বেগাবরোধাদিতি পুরীষাদেঃ| তস্য সম্প্রাপ্তিমাহ– প্রাণ ইত্যাদি| প্রাণো বাযুর্দুষ্টঃ উদানেন দুষ্টেনানুযাতঃ বক্ত্রান্নিরেতি গচ্ছতি, স দোষো রোগঃ কাস ইতি প্রদিষ্টঃ| কার্যে কারণোপচারাত্ দোষে রোগঃ ইতি সঞ্জ্ঞা| কিংবিশিষ্টঃ স দোষঃ? ভিন্নকাংস্যপাত্রস্বনঃ ভগ্নকাংস্যপাত্রস্বনঃ, স বাতপিত্তকফভেদৈর্ভিন্ন ইতি তস্য নিরুক্তিঃ| কাস ইতি ‘ কাসৃ’ দীপ্তৌ, ইত্যস্মাদ্ধাতোঃ, অপ্রত্যযান্তঃ; অনেকার্থত্বাত্প্রাপ্ত্যর্থঃ; কসতি শিরঃকণ্ঠাদূর্ধ্বং গচ্ছতি বাযুরিতি কাসঃ ‘কস’ গতাবিতি ধাতুঃ| অথবা কাসনং কাস ইতি ঘঞঃ “কসনাত্” কাস ইতি চরকপাঠাত্ | “ভিন্নস্বরঃ কাসতি শুষ্কমেব” ইতি সুশ্রুতবচনম্||১-২||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

সঙ্খ্যামাহ– পঞ্চেত্যাদি| পঞ্চ কাসা ইতি সঙ্খ্যেযনির্দেশাদেব সঙ্খ্যাযাং লব্ধাযাং পঞ্চগ্রহণং জরাকাসস্য দোষজেষ্বন্তর্ভূতস্যাধিকত্বনিরাসার্থং, পঞ্চানামপি বা ক্ষযকারণত্বপ্রতিপাদনার্থমিতি| ক্ষযায ধাতুক্ষযায||৩||

আতঙ্কদর্পণ ব্যাখ্যা (বাচস্পতি বৈদ্য কৃত)

তস্য সঙ্খ্যামাহ– পঞ্চেত্যাদি| সঙ্খ্যেযনির্দেশাদেব সঙ্খ্যাযাং লব্ধাযাং পঞ্চগ্রহণং জরাকাসস্য দোষজেষ্বেবান্তর্ভূতস্যাধিকত্বনিরাসার্থম্| উপেক্ষিতাস্তে অপ্রতিক্রিযমাণাঃ ক্ষযায ধাতুক্ষযায ভবন্তি; উত্তরোত্তরমিতি বাতাত্পৈত্তিকঃ, পৈত্তিকাত্ শ্লৈষ্মিকঃ, তস্মাত্ক্ষতজো বলী, তস্মাত্ ক্ষযজঃ||৩||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পূর্বরূপমাহ– পূর্বেত্যাদি| ভোজ্যানামবরোধ ইতি অরুচিরভ্যবহারাসামর্থ্যং বা||৪||

আতঙ্কদর্পণ ব্যাখ্যা (বাচস্পতি বৈদ্য কৃত)

তস্য পূর্বরূপমাহ– পূর্বরূপমিত্যাদি| শূকো ধান্যাগ্রসূক্ষ্মকণ্টকাকারঃ| ভোজ্যানামবরোধ ইতি অভ্যবহরণাসামর্থ্যম্ ||৪||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

বাতিককাসস্বরূপমাহ– হৃদিত্যাদি| শঙ্খো ললাটৈকদেশঃ| ক্ষামাননঃ শুষ্কমুখঃ, বাতেন শোষণাত্| প্রসক্তবেগঃ সততকাসবেগঃ| শুষ্কমিতি শ্লেষ্মাদিনিষ্ঠীবনরহিতম্||৫||

আতঙ্কদর্পণ ব্যাখ্যা (বাচস্পতি বৈদ্য কৃত)

বাতিককাসরূপমাহ– হৃদিত্যাদি| শঙ্খো ললাটৈকদেশঃ| ক্ষামাননঃ শুষ্কমুখঃ, বাতশোষণাত্| ক্ষীণবলস্বরৌজা ইতি ক্ষীণং বলং স্বর ওজশ্চ যস্য স তথা| প্রসক্তবেগঃ সততকাসবেগঃ| ভিন্নস্বরঃ দ্বিধাকৃত ইব| শুষ্কমিতি শ্লেষ্মনিষ্ঠীবনরহিতম্||৫||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পৈত্তিককাসমাহ– উর ইত্যাদি| অভ্যর্দিতঃ পীডিতঃ||৬||

আতঙ্কদর্পণ ব্যাখ্যা (বাচস্পতি বৈদ্য কৃত)

পৈত্তিকমাহ– উরোবিদাহেত্যাদি| এতৈরুপদ্রবৈঃ অভ্যর্দিতঃ পীডিতঃ| পীতানি বমেত্ পিত্তং কফসংসৃষ্টং নিষ্ঠীবতি; উক্তং চ তন্ত্রান্তরে– “শ্লেষ্মাণং পিত্তসংসৃষ্টং নিষ্ঠীবতি চ পৈত্তিকঃ” ইতি| পাণ্ডুনা সহ বর্তত ইতি সপাণ্ডুঃ, এতেন নযনাদীনামপি পাণ্ডুত্বমুক্তম্| পরিদহ্যমানঃ দাহপরিপ্লুতঃ||৬||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

কফজকাসমাহ– প্রলিপ্যমানেনেত্যাদি| প্রলিপ্যমানেন শ্লেষ্মলিপ্তেন মুখেনোপলক্ষিতঃ, সীদন্ অঙ্গাবসাদযুক্তঃ| অভক্তরুক্ অরুচিঃ||৭||

আতঙ্কদর্পণ ব্যাখ্যা (বাচস্পতি বৈদ্য কৃত)

কফজমাহ– প্রলিপ্যমানেন কফোপলিপ্তেন মুখেনোপলক্ষিতঃ, সীদন্ সাদযুক্তঃ, অভক্তরুক্ অরুচিঃ, কফপূর্ণদেহত্বাদ্গৌরবং, কণ্ডূঃ কণ্ঠস্যৈব, সান্দ্রকফঃ ঘনশ্লেষ্মা||৭||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ক্ষতকাসমাহ– অতিব্যবাযেত্যাদি| বিগ্রহো বিধারণং যুদ্ধস্যোপাত্তত্বাত্; ‘নিগ্রহ’ ইতি পাঠে স এবার্থঃ| ততঃ ষ্ঠীবেত্ সশোণিতমিতি কাসাভিঘাতেন হৃদযস্য বিদারণাত্| কণ্ঠেনেতি উপলক্ষণে তৃতীযা, এবমুরসেতি| বিরুগ্ণেনেব ভগ্নেনেব, সূচীভিরিব তুদ্যমানেন, শূলিনা দুঃখস্পর্শেন চোরসেতি সম্বন্ধঃ| দুঃখস্পর্শত্বং স্পর্শাসহত্বম্| শূলেনোপলক্ষিতঃ, তচ্চ পার্শ্বাদৌ বোধ্যম্| বাগ্ভটেনাপি পঠ্যতে– ‘পার্শ্বশূলী’ (বা. নি. অ. ৩) ইতি| ভেদপীডাভিতাপিনেতি শূলবিশেষণম্| পারাবত ইব কূজন্, ভবতীতি শেষঃ||৮-১১||

আতঙ্কদর্পণ ব্যাখ্যা (বাচস্পতি বৈদ্য কৃত)

ক্ষতকাসমাহ– অতীত্যাদি| বিগ্রহো বিধারণং, যুদ্ধস্যোক্তত্বাত্| এতৈঃ কারণৈ রূক্ষস্য পুরুষস্য উরঃক্ষতং গৃহীত্বা বাযুঃ কাসমাবহেত্ করোতি| যুদ্ধং মল্লযুদ্ধাদিকম্| ততঃ ষ্ঠীবেত্ শোণিতমিতি কাসাভিঘাতেন হৃদযস্য বিদারণাত্| অত্যর্থং রুজতা পীডাযুক্তেন, কণ্ঠেনেত্যুপলক্ষণে তৃতীযা, এবমুরসেতি| বিরুগ্ণেনেব দ্বিধেব বিদীর্ণেন, তীক্ষ্ণাভিঃ সূচীভিরিব তুদ্যমানেন, শূলিনা রুজাযুক্তেন , দুঃখস্পর্শেন চোরসেতি সম্বন্ধঃ| দুঃখস্পর্শত্বং স্পর্শাসহত্বম্| শূলেন চোপলক্ষিতঃ, তচ্চ পার্শ্বাদৌ বোদ্ধব্যং “পার্শ্বশূলী” ইতি বাগ্ভটেন পঠ্যমানত্বাত্| ‘ভেদপীডাভিতাপিনা’ ইতি শূলবিশেষণম্| পারাবত ইবাকূজন্ ‘ভবতি’ ইতি শেষঃ||৮-১১||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ক্ষযজকাসমাহ– বিষমেত্যাদি| ঘৃণিনাং শোচতাং চাহারাভাবাত্ কুপিতেন বাযুনাঽগ্নেরুপ্লবাদ্দোষত্রযপ্রকোপ ইতি| ক্ষযজমিতি শুক্রাদিধাতুক্ষযজং, নতু রাজযক্ষ্মজম্| ত্রিদোষজেঽপি রাজযক্ষ্মণি কাসঃ কফেনৈব ক্রিযতে| যদুক্তম্– “কাসঃ কণ্ঠস্য চোদ্ধ্বংসো বিজ্ঞেযঃ কফকোপতঃ|” ইতি; ক্ষযজকাসস্তু ত্রিদোষজ ইতি| ননু, কাসাদেব ক্ষযো জাযতে তত্ কথং ক্ষযজঃ কাস ইতি? উক্তং হি– “কাসাত্ সঞ্জাযতে ক্ষযঃ|” (চ. চি. অ. ৮) ইতি| উচ্যতে– দৃষ্টো হি পরস্পরং ব্যক্তিভেদেন কার্যকারণভাবো বহুশঃ, যথাঽতীসারার্শোগ্নিমান্দ্যাদাবিতি| ননু স গাত্রশূলেত্যাদিশ্লোকার্ধস্য ক্ষযজকাসমধ্যে পাঠোঽযুক্তঃ প্রতিভাতি, সুশ্রুতে ক্ষতজকাসে পঠিতত্বাত্; ক্ষযকাসশ্চাত্র চরকসুশ্রুতবাক্যে মেলযিত্বা মাধবকরেণ লিখিতঃ; উচ্যতে– স গাত্রশূলেত্যাদ্যনন্তরং ক্ষযকাসঃ সুশ্রুতেন পঠিতঃ; তেন ‘সগাত্রশূল’ ইত্যাদিশ্লোকার্ধস্য পরেণ সম্বন্ধাত্ ক্ষযকাসলিঙ্গত্বমিতি মাধবকরস্যাভিপ্রায; এতচ্চান্যে নানুমন্যন্তে, যতঃ ক্ষতকাসস্যাবস্থাযামসাধ্যত্বখ্যাপনপরমেতদ্ব্যাখ্যাতং জেজ্জটেন, গযদাসেনাপি ক্ষতজকাসরূপত্বেনেতি||১২-১৩||

আতঙ্কদর্পণ ব্যাখ্যা (বাচস্পতি বৈদ্য কৃত)

ক্ষযজমাহ– বিষমেত্যাদি| ঘৃণিনাং ঘৃণাং কুর্বতাং, শোচতাং শোকং কুর্বতাং, পুংসামগ্নৌ ব্য্পন্নে সতি ত্রযো মলাঃ কুপিতাঃ সন্তো দেহক্ষযপ্রদং ক্ষযজং কাসং কুর্যুঃ| ক্ষযজমিতি রক্তাদিক্ষযজম্| অস্যোপদ্রবানাহ-স ইত্যাদি| স কাসী গাত্রশূলাদীন্ প্রাণক্ষযং চোপলভেত| শুষ্যন্নিতি প্রতিদিনং শুষ্যমাণঃ, দুর্বলঃ উপচযরহিতঃ, প্রক্ষীণমাংসস্ত্বগস্থিভূতঃ, সর্বলিঙ্গমিতি ত্রিদোষলিঙ্গত্বাদসাধ্যম্||১২-১৩||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অসাধ্যত্বাদিলক্ষণমাহ– ইতীত্যাদি| পাদগুণান্বিতাবিতি বৈদ্যাদিচতুষ্পাদসম্পন্নৌ| স্থবিরাণাং বৃদ্ধানাং; স্থবিরাণামিত্যুক্তেঽপি জরাশব্দোপাদানং জরানিমিত্তধাতুক্ষযজ এব কাসো যাপ্যঃ, অপচারজনিতদোষজস্তু সাধ্য ইতি বোধনার্থম্||১৪-১৫||

আতঙ্কদর্পণ ব্যাখ্যা (বাচস্পতি বৈদ্য কৃত)

অসাধ্যসাধ্যযাপ্যত্বমাহ– ইতীত্যাদি| বলবতাং কদাচিত্সাধ্যো বা স্যাদ্যাপ্যশ্চ, এবং ক্ষতজঃ কদাচিত্সাধ্যো যাপ্যো বা| পুনঃ সাধ্যত্বমাহ– নবাবিত্যাদি| অচিরোত্থৌ ক্ষতক্ষযজৌ দ্বৌ পাদগুণান্বিতৌ বৈদ্যাদিচতুষ্পাদসম্পত্তিযুক্তৌ কদাচিত্ সিধ্যেতাং সাধ্যৌ ভবত ইত্যর্থঃ| যাপ্যত্বমাহ– স্থবিরাণামিতি| বৃদ্ধানাম্ এতস্য দোষজেষ্বন্তর্ভূতত্বান্ন পৃথক্ত্বম্| পঞ্চানামপি চিকিত্সাদ্বারেণ সাধ্যযাপ্যত্বমাহ– ত্রীনিতি| বাতপিত্তশ্লেষ্মজান্ পথ্যৈঃ সাধযেত্, এতেন ত্রযঃ কাসাঃ সাধ্যা উক্তাঃ; অপরান্ পথ্যৈর্যাপযেত্ যাপ্যতাং নযেত্| জরাকাসা ইতি বহুবচনাজ্জরাকাস উপেক্ষিতঃ অসাধ্যো ভবতীতি দর্শযতি| “পূযাভমরুণং শ্যাবং হরিতং পীতনীলকম্| নিষ্ঠীবেচ্ছ্বাসকাসার্তো ন জীবতি হতস্বরঃ|| কাসশ্বাসক্ষযচ্ছর্দিস্বরভেদাদযো গদাঃ| ভবন্ত্যুপেক্ষযাঽসাধ্যাস্তস্মাত্তান্ ত্বরযা জযেত্||” ইতি||১৪-১৫||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ইতি শ্রীবিজযরক্ষিতকৃতাযাং মধুকোশব্যাখ্যাযাং কাসনিদানং সমাপ্তম্||১১||

আতঙ্কদর্পণ ব্যাখ্যা (বাচস্পতি বৈদ্য কৃত)

ইতি শ্রীবৈদ্যবাচস্পতিবিরচিতে আতঙ্কদর্পণে রুগ্বিনিশ্চযব্যাখ্যানে কাসনিদানম্||১১||