১৯. দাহনিদানম্

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

মদাত্যযেঽপি দাহো ভবত্যতঃ সপ্তপ্রকারং দাহমাহ; তত্র মদ্যজমাহ– ত্বচমিত্যাদি| পানোষ্মা পা.| মদ্যপানকুপিতপিত্তস্যৌষ্ণ্যং; সমানোষ্মেতি পাঠান্তরমযুক্তং, সুশ্রুতে পানাত্যযে শ্লোকস্যাস্য পাঠাত্| পিত্তজোঽপ্যযং হেতুভেদাত্ পৃথক্ পঠিতঃ||১||

আতঙ্কদর্পণ ব্যাখ্যা (বাচস্পতি বৈদ্য কৃত)

মদাত্যযে দাহো ভবতীত্যতো মদাত্যযানন্তরং দাহনিদানারম্ভঃ| মদ্যজদাহমাহ– ত্বচমিত্যাদি| পানোষ্মা মদ্যপানকুপিতপিত্তোষ্মা, স ত্বচং প্রাপ্তো ঘোরং দাহং প্রকর্ষেণ কুরুত ইত্যর্থঃ| কীদৃশঃ পিত্তরক্তাভ্যামভিবর্ধিতঃ| অন্যে ‘সমানোষ্মা’ ইতি পাঠান্তরং পঠন্তি| তন্ন যুক্তং, সুশ্রুতে পানাত্যযে শ্লোকস্যাস্য পাঠাত্| পিত্তজোঽপ্যযং হেতুভেদাত্পৃথক্ পঠিতঃ||১||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

রক্তজমাহ– কৃত্স্নেত্যাদি| স উষ্যতে সমীপস্থেনেব বহ্নিনা তপ্যতে, ‘সন্ধূপ্যত’ ইতি পাঠান্তরে সন্ধূপনবদ্বেদনামনুভবতি| তাম্রাভ ইতি গাত্রে| লোহগন্ধাঙ্গবদন ইতি লোহস্যেব গন্ধোঽঙ্গে বদনে চ যস্য স তথা||২-৩||–

আতঙ্কদর্পণ ব্যাখ্যা (বাচস্পতি বৈদ্য কৃত)

রক্তজমাহ– কৃত্স্নেত্যাদি| উদ্রিক্তং বৃদ্ধং রক্তং কৃত্স্নদেহানুগং সত্ ধ্রুবং সন্দহতি, পুরুষস্তেন ঊষ্যতে সমীপস্থেন বহ্নিনেব তপ্যতে| সঞ্চূষ্যতে ইতি পাঠান্তরে আচূষণবদ্বেদনামনুভবতি| তাম্রাভ ইতি তাম্রাভগাত্রঃ| লোহস্যেব গন্ধোঽঙ্গে বদনে চ যস্য স তথা|২-৩|–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পিত্তজমাহ– পিত্তেত্যাদি| পিত্তজ্বরসমঃ পিত্তজ্বরলিঙ্গযুক্তঃ, পিত্তজ্বরে ত্বামাশযদুষ্ট্যাদযোঽধিকা ইতি ভেদঃ| স চাপ্যস্য বিধিরিতি পিত্তজ্বরচিকিত্সা||৩||

আতঙ্কদর্পণ ব্যাখ্যা (বাচস্পতি বৈদ্য কৃত)

পিত্তজমাহ– পিত্তজ্বরেত্যাদি| পিত্তজ্বরে অরত্যামাশযদুষ্ট্যাদযোঽধিকা ইতি ভেদঃ, অন্যানি সমানলক্ষণানি| স চাপ্যস্য বিধিরিতি পিত্তজ্বরোক্তচিকিত্সেত্যর্থঃ||৩||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

তৃষ্ণানিরোধজমাহ– তৃষ্ণেত্যাদি| তেজঃসমুদ্ধতং পিত্তোষ্মা বৃদ্ধ ইত্যর্থঃ| নিষ্কৃষ্য নিঃসার্য||৪||–

আতঙ্কদর্পণ ব্যাখ্যা (বাচস্পতি বৈদ্য কৃত)

তৃষ্ণানিরোধজমাহ– তৃষ্ণেত্যাদি| তৃষ্ণাবিধারণাদব্ধাতৌ রসে ক্ষীণে সতি, তেজঃ সমুত্থিতং পিত্তোষ্মা বৃদ্ধ ইত্যর্থঃ| স বাহ্যাভ্যন্তরং দেহং প্রদহেত্| মন্দচেতসঃ বিসঞ্জ্ঞস্য| নিষ্কৃষ্য নিঃসার্য কম্পতে||৪||–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অবগাঢশস্ত্রপ্রহারজনিতরক্তপূর্ণকোষ্ঠজমাহ– অসৃজ ইত্যাদি| ন চোক্তরক্তজেনাস্য পৌনরুক্ত্যং, কৃত্স্নদেহানুগমিতি বচনাত্ কারণভেদাচ্চ| অসৃজঃ পূর্ণকোষ্ঠস্যেতি ‘পূরণগুণসুহিতার্থ’ ইত্যাদিনা জ্ঞাপকেন কর্তরি ষষ্ঠী, রক্তেন পূরিতকোষ্ঠস্যেত্যর্থঃ| কোষ্ঠশব্দেন হৃদযাদযো গৃহ্যন্তে| যদাহ সুশ্রুতঃ– “স্থানান্যামাগ্নিপক্বানাং মূত্রস্য রুধিরস্য চ| হৃদুণ্ডুকঃ ফুপ্ফুসশ্চ কোষ্ঠ ইত্যভিধীযতে||” (সু. চি. অ. ২) ইতি||৫||

আতঙ্কদর্পণ ব্যাখ্যা (বাচস্পতি বৈদ্য কৃত)

অবগাঢশস্ত্রপ্রহারজনিতরক্তপূর্ণকোষ্ঠজমাহ– অসৃজ ইত্যাদি| অসৃজঃ রুধিরস্যেতি “পূরণগুণসহিত” ইত্যাদিনা জ্ঞাপকেন কর্তরি ষষ্ঠী; রক্তেন পূরিতকোষ্ঠস্যেত্যর্থঃ| কোষ্ঠশব্দেন হৃদযাদযো গৃহ্যন্তে| যদাহ সুশ্রুতঃ– “স্থানান্যামাগ্নিপাক্বানাং মূত্রস্য রুধিরস্য চ| হৃদুণ্ডুকঃ ফুপ্ফুসশ্চ কোষ্ঠ ইত্যভিধীযতে||” ইতি| ন চোক্তরক্তজে নাস্য পৌনরুক্ত্যং, ‘কৃত্স্নদেহানুগম্’ ইতি বচনাত্, কারণভেদাচ্চেতি||৫||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ধাতুক্ষযজমাহ– ধাত্বিত্যাদি| ধাতবো রসাদযঃ| ক্রিযাহীনো নিশ্চেষ্টঃ; কিংবা ভৃশপীডিতো দাহেন ক্রিযাহীনশ্চিকিত্সাহীনো যদি ভবেত্তদা সীদেন্ম্রিযেত ইত্যর্থঃ||৬||

আতঙ্কদর্পণ ব্যাখ্যা (বাচস্পতি বৈদ্য কৃত)

ধাতুক্ষযজমাহ– ধাত্বিত্যাদি| ধাতবো রসাদযঃ, তেষাং ক্ষযেণ যো দাহো ভবতি তেন ধাতুক্ষযজদাহেন| ক্ষামস্বরো দুর্বলস্বরঃ, ক্রিযাহীনো নিশ্চেষ্টঃ, ভৃশপীডিতো দাহেন চিকিত্সাহীনো যদি ভবেত্তদা সীদেন্ম্রিযত ইত্যর্থঃ||৬||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ক্ষতজমাহ– ক্ষতজ ইত্যাদি| মর্মাভিঘাতজমাহ– মর্মেত্যাদি| মর্মাণি শিরোহৃদযবস্ত্যাদীনি| জেজ্জটস্তু সপ্তত্বমন্যথা গণযতি– ‘ত্বচং প্রাপ্ত’ ইত্যাদিনা প্রথমঃ, ‘কৃত্স্নদেহানুগং রক্তম্’ ইত্যত্র রক্তস্থানে পিত্তং পঠিত্বা এতদাদিনা ‘স চাপ্যস্য বিধিঃ স্মৃতঃ’ ইত্যন্তেন পৈত্তিকো দ্বিতীযঃ, তৃষ্ণানিরোধজস্তৃতীযঃ, ‘অসৃজঃ পূর্ণকোষ্ঠস্য’ ইতি চতুর্থঃ, ধাতুক্ষযজঃ পঞ্চমঃ, ষষ্ঠস্য তু ক্ষতজস্য লক্ষণং পঠতি– “ক্ষতজোঽনশ্নতশ্চান্নং শোচতশ্চাপ্যনেকধা| তেনান্তর্দহ্যতেঽত্যর্থং তৃষ্ণাদাহপ্রলাপবান্|” ইতি, মর্মাভিঘাতজস্তু সপ্তম ইতি||৭-৮||

আতঙ্কদর্পণ ব্যাখ্যা (বাচস্পতি বৈদ্য কৃত)

মর্মাভিঘাতজমাহ– মর্মেত্যাদি| মর্মাণি হৃদযশিরোবস্ত্যাদীনি| ‘স চাসাধ্যতমঃ স্মৃতঃ’ ইত্যত্রান্যে ‘সোঽসাধ্যঃ সপ্তমো মতঃ’ ইতি পঠন্তি| জেজ্জটস্তু সপ্তত্বমন্যথা গণযতি– ত্বচং প্রাপ্ত ইত্যাদিনা প্রথমঃ, ‘কৃত্স্নদেহানুগং রক্তম্’ ইত্যত্র রক্তস্থানে পিত্তং পঠিত্বা এতদাদিনা ‘স চাপ্যস্য বিধিঃ স্মৃতঃ’ ইত্যন্তেন পৈত্তিকো দ্বিতীযঃ, তৃষ্ণানিরোধজস্তৃতীযঃ, ‘অসৃজঃ পূর্ণকোষ্ঠস্য’ ইতি চতুর্থঃ, ধাতুক্ষযজঃ পঞ্চমঃ, ষষ্ঠস্য ক্ষতজস্য লক্ষণং পঠতি– “ক্ষতজেনাশ্নতশ্চান্নং শোচতো বাঽপ্যনেকধা| তেনাঙ্গং দহ্যতেঽত্যর্থং তৃষ্ণাদাহপ্রলাপবান্||” ইতি| অস্যার্থঃ– পূর্বমসৃজঃ পূর্ণকোষ্ঠস্যেত্যাদিনা কোষ্ঠস্থেন রক্তেন দাহমভিধাযেদানীং প্রকারান্তরেণাহ– ক্ষতজেন রক্তেন, অনশ্নতো ভোজনং কুর্বতঃ, শোকং কুর্বতো বাঽপি নরস্যান্যো দাহো রক্তেন ভবতীতি সম্বন্ধঃ, তেন দাহেনাভ্যন্তরং দহ্যতে, তৃষ্ণামূর্ছাপ্রলাপবান্ ‘নরো ভবতি’ ইতি শেষঃ| মর্মাভিঘাতজস্তু সপ্তমঃ| সর্বেষামপি দাহানামবস্থাযাং বর্জনীযত্বমাহ– সর্ব ইতি| সর্ব এব হি ‘দাহা’ ইতি শেষঃ| শেষং সুগমম্||৭-৮||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ইতি শ্রীবিজযরক্ষিতকৃতাযাং মধুকোশব্যাখ্যাযাং দাহনিদানং সমাপ্তম্||১৯||

আতঙ্কদর্পণ ব্যাখ্যা (বাচস্পতি বৈদ্য কৃত)

ইতি শ্রীবৈদ্যবাচস্পতিকৃতে আতঙ্কদর্পণে নিদানব্যাখ্যানে দাহনিদানম্||১৯||