৪৪. ভগ্ননিদানম্

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

আগন্তুসামান্যাত্ ভগ্ননিদানম্| দ্বিবিধং হি ভগ্নং সব্রণমব্রণং চ, তত্র সব্রণমভিধাযাব্রণমাহ– ভগ্নং সমাসাদিত্যাদি| হুতাশ ইতি অগ্নিবেশসম্বোধনং, চরকে হুতাশশব্দেনাগ্নিবেশোঽভিধীযতে, একদেশেনাপি সমুদাযপ্রতীতেঃ| কাণ্ডে চ সন্ধৌ চেতি সন্ধিবিচ্ছিন্নমেকং, দ্বিতীযং কাণ্ডভগ্নং; কাণ্ডমস্থিকাণ্ডঃ, কাণ্ডেন চ নলককপালবলযতরুণরুচকানাং গ্রহঃ, তত্র ভগ্নং কাণ্ডে ভগ্নং; দ্বযোরস্থ্নোঃ, সন্ধানং সন্ধিঃ, তদ্বিশ্লেষঃ সন্ধিমুক্তম্| তত্র সন্ধাবিতি সন্ধৌ মুক্তে ‘লিঙ্গমভিধীযতে’ ইতি শেষঃ| ননু কথং সন্ধিমুক্তং ভগ্নমুচ্যতে? অস্থ্নাং হি ভঙ্গো যুক্তঃ| উচ্যতে– অস্থিবিশ্লেষোঽত্র ভগ্নোঽভিপ্রেতঃ, স চ কাণ্ডভগ্নে সন্ধিমুক্তে চাস্তীতি ন দোষঃ||১||

আতঙ্কদর্পণ ব্যাখ্যা (বাচস্পতি বৈদ্য কৃত)

আগন্তুত্বসামান্যাদ্ভগ্নমাহ– ভগ্নমিত্যাদি| তং চাগন্তুব্রণং সমাসাত্ দ্বিবিধমাহুঃ, কথমিত্যাহ– কাণ্ডে ভগ্নং তথা সন্ধৌ চেতি; সন্ধিবিচ্ছিন্নমেকং, কাণ্ডমস্থিকাণ্ডঃ, কাণ্ডেন চ নলককপালবলযতরুণরুচকানাং গ্রহণং, তত্র ভগ্নং কাণ্ডে ভগ্নম্| দ্বযোরস্থ্নোঃ সন্ধানং সন্ধিঃ, তদ্বিশ্লেষঃ সন্ধিমুক্তম্| সন্ধিমুক্তস্য ষাড্বিধ্যমাহ– উত্পিষ্টেত্যাদি| তত্র সন্ধাবিতি তত্র তযোঃ কাণ্ডভগ্নসন্ধিভগ্নযোর্মধ্যে, সন্ধৌ মুক্তেঽপি ‘লিঙ্গমভিধীযত’ ইতি শেষঃ| উত্পিষ্টাদিভেদেন ষোঢা ভবতি| ননু, কথং সন্ধিমুক্তং ভগ্নমুচ্যতে? অস্থ্নাং ভঙ্গো যুক্তঃ; উচ্যতে অস্থিবিশ্লেষোঽত্র ভগ্নোঽভিপ্রেতঃ, স চ কাণ্ডভগ্নে সন্ধিমুক্তে চাস্তীতি ন দোষঃ||১||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

সন্ধিভগ্নস্য সামান্যলিঙ্গমাহ– প্রসারণেত্যাদি| প্রসারণাকুঞ্চনবর্তনোগ্রা রুগিতি প্রসারণাদিষু উগ্রা রুক্| বর্তনং নিষ্ক্রিযতযাঽবস্থানম্|১|–

আতঙ্কদর্পণ ব্যাখ্যা (বাচস্পতি বৈদ্য কৃত)

তত্র সন্ধিমুক্তস্য সামান্যলক্ষণমাহ– প্রসারণেত্যাদি| প্রসারণাদিষু উগ্রা রুক্ ব্যথা, বর্তনমিতি নিষ্ক্রিযতযাঽবস্থানম্| এতত্সামান্যলিঙ্গম্|১|–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

উত্পিষ্টাদিলিঙ্গমাহ– উত্পিষ্টসন্ধেরিত্যাদি| উত্পিষ্টং দ্বাভ্যামস্থিভ্যাং সন্ধৌ ঘর্ষণম্| শ্বযথুঃ সমন্তাদিতি উভযভাগে শোথঃ, উভযতঃ সন্ধ্যস্থ্নোর্ঘর্ষিতত্বাত্| বিশেষতো রাত্রিভবা রুজা চেতি অভিঘাতকুপিত এব রাত্রৌ শৈত্যেনাত্যন্তং বৃদ্ধো বাযুঃ রুজাং করোতি| অত্র চূর্ণিতত্বেন মার্গাবরণাত্ বাতকোপ ইত্যর্থঃ| বিশ্লিষ্টজে ইতি বিশ্লিষ্টজাতে সন্ধিমুক্তে, বিশ্লিষ্টং মনাক্ সন্ধিবিশ্লেষঃ শিথিলতামাত্রং, বিশ্লিষ্টমিতি ভাবে ক্তঃ| তৌ চেতি বিশ্লিষ্টে রাত্রিরুজাসমন্তাচ্ছোথৌ; সমন্তাচ্ছোথোঽপ্যত্রাল্পো বোধ্যঃ, সন্ধেরনভিঘাতাত্| সন্ধিবিক্রিযযা অস্থ্নোরপসৃতত্বাত্ মধ্যনিম্নত্বং, “উত্পিষ্টমথ বিশ্লিষ্টং সন্ধিং বৈদ্যো ন ঘট্টযেত্|” (সু. চি. অ. ২) ইতি বচনাত্; মনাগ্বিক্রিযযা বা| রুজা চ নিত্যমিতি সর্বদা রুজা বলবতী ভবতীত্যুত্পিষ্টাদ্বিশেষঃ| বিবর্তিতে ইতি ‘সন্ধৌ’ ইতি শেষঃ, বিবর্তিতে বিপরীতং বর্তিতে; বিবর্তনং সন্ধৌ দ্বযোরস্থ্নোর্বিবৃতির্বিভ্রমণমনার্জবতা| পার্শ্বরুজশ্চ তীব্রা ইতি আভ্যন্তরসন্ধিস্থানযোঃ পার্শ্বসন্ধ্যস্থ্নোঃ পার্শ্বগমনাত্তীব্রাঃ পার্শ্বরুজঃ| তির্যগ্গত ইতি তির্যক্ক্ষিপ্তে| অত্র হ্যেকং সন্ধ্যস্থি সন্ধিস্থানং ত্যক্ত্বা তির্যগ্যাতি| ক্ষিপ্তেঽতীতি অতিক্ষিপ্তে; ‘ঊর্ধ্বম্’ ইতি শেষঃ| অত্র হ্যেকাস্থিবিক্রিযযা উভযাস্থিবিক্রিযযা বা দ্বযোরপ্যস্থ্নোঃ পরস্পরাতিক্রমণং দূরগমনং বা; বিশ্লিষ্টে তু মনাক্ শিথিলতামাত্রম্; অধঃক্ষিপ্তে তু কিঞ্চিদধোগমনমিতি বিশেষঃ| “বিষমাশ্চ সক্থ্নোঃ” ইতি পাঠে তু ‘রুজ’ ইতি শেষঃ| ক্ষিপ্তে ত্বধোরুগ্বিঘটশ্চ সন্ধেরিতি অধঃক্ষিপ্তে রুক্ রুজা, সন্ধের্বিঘটশ্চ বিঘটনম্| ‘বিরুদ্ধচেষ্টা বিঘটস্য’ ইতি পাঠান্তরে বিঘটিতস্য সন্ধেরিত্যর্থঃ| অত্র অধোঽস্থিগমনম্| অধঃ ক্ষিপ্তবদূর্ধ্বং ক্ষিপ্তস্যাপ্যভিধানে প্রাপ্তে অনুক্তিরতিক্ষিপ্তেঽবরোধাত্||২-৩||–

আতঙ্কদর্পণ ব্যাখ্যা (বাচস্পতি বৈদ্য কৃত)

বিশিষ্টলিঙ্গমাহ– উত্পিষ্টসন্ধেরিত্যাদি| উত্পিষ্টং দ্বাভ্যামস্থিভ্যাং সন্ধৌ ঘর্ষণং, শ্বযথুঃ সমন্তাদিতি উভযভাগে শোফঃ, উভযতঃ সন্ধ্যস্থ্নোর্ঘর্ষণাত্| বিশেষত ইত্যাদ্যভিঘাতকুপিত এব রাত্রৌ শৈত্যেনাত্যন্তং বৃদ্ধো বাযুঃ রুজং করোতি, অত্র চূর্ণিতত্বেন মার্গাবরণাদ্বাতপ্রকোপ ইত্যর্থঃ| বিশ্লিষ্টমাহ– বিশ্লিষ্টজ ইত্যাদি| বিশ্লিষ্টে সন্ধিমুক্তে তৌ চ নিত্যং চ রুজা চ ভবতি| বিশ্লিষ্টং মনাক্সন্ধিবিশ্লেষঃ, শিথিলতামাত্রং; বিশ্লিষ্টমিতি ভাবে ক্তঃ| তেনাল্পঃ শোফো বোদ্ধব্যঃ| তৌ চেতি রাত্রিরুজাসমন্তাচ্ছোথৌ, সমন্তাচ্ছোথোঽপ্যত্রাল্পো বোধ্যঃ, সন্ধেরনভিঘাতাত্| সন্ধিবিক্রিযযা অস্থ্নোরপসৃতত্বান্মধ্যনিম্নত্বম্| “উত্পিষ্টমথ বিশ্লিষ্টং সন্ধিমুক্তং তথা চ্যুতম্| জঘনং প্রতিপিষ্টং চ ভগ্নং যত্তদ্বিবর্জযেত্||” ইতি| মনাক্ বিক্রিযযা বা| রুজা চ নিত্যমিতি সর্বদা রুজা বলবতী ভবতীত্যুত্পিষ্টাদ্বিশেষঃ| বিবর্তিতমিতি, সন্ধাবিতি শেষঃ| বিবর্তিতে বিপরীতং বর্তিতে, বিবর্তনং সন্ধৌ দ্বযোরস্থ্নোর্বিবৃতির্বিভ্রমণমনার্জবতা| পার্শ্বে রুজাশ্চ তীব্রাঃ সন্তি, অত্যন্তসন্ধিস্থানযোঃ পার্শ্বসন্ধ্যস্থ্নোঃ পার্শ্বগতত্বাত্তীব্রাঃ পার্শ্বরুজঃ, চকারাত্ সন্ধিসংশ্রযযোরপ্যস্থ্নোর্ব্যাবর্তনেন পার্শ্বোপগমনাদ্বিষমাঙ্গতেতি ডল্লণঃ| তির্যগিত্যাদি– তির্যক্ ক্ষিপ্তে, সন্ধাবিতি শেষঃ| অত্র হ্যেকসন্ধ্যস্থি সন্ধিস্থানং ত্যক্ত্বা তির্যগ্যাতি| অতিক্ষিপ্তমাহ– ক্ষিপ্ত ইত্যাদি| ক্ষিপ্তে ঊর্ধ্বমিতি শেষঃ| অত্র তু দ্বযোরপি অস্থ্নোঃ পরস্পরাতিক্রমণং, দূরগমনং বা, বিশ্লিষ্টে তু মনাক্ শিথিলতামাত্রমিতি ভেদঃ| অধঃক্ষিপ্তে তু কিঞ্চিদধোগমনমিতি বিশেষঃ| সক্থ্নোরূরুকটিসন্ধ্যোর্বিষমমিতি| শূলং বিষমমিতি কদাচিদ্ধীনং কদাচিদ্বিবৃদ্ধম্| ‘বিষমাশ্চ সক্থ্নোঃ’ ইতি পাঠান্তরম্| তত্র রুজা ইতি শেষঃ| অধঃক্ষিপ্তমাহ– ক্ষিপ্তে ত্বিত্যাদি| অধঃক্ষিপ্তেঽধোগতে সন্ধৌ রুক্ রুজা, সন্ধের্বিঘটশ্চ, বিঘটো বিঘটনম্| ‘বিরুদ্ধচেষ্টা বিঘটস্য’ ইতি পাঠান্তরে বিঘটিতস্য সন্ধেরিত্যর্থঃ| অত্রাধোঽস্থিগমনম্| অধঃক্ষিপ্তবদূর্ধ্বক্ষিপ্তস্যাপ্যভিধানে প্রাপ্তেঽনুক্তিরতিক্ষিপ্তেঽবরোধাত্||২-৩||–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অতঃ পরং কাণ্ডে ভগ্নমভিধীযতে– কাণ্ডে ত্বত ইত্যাদি| কাণ্ডে ইত্যত্র ভগ্নমিতি শেষঃ| অত ইতি অতঃ পরম্| কর্কটকেতি উভযোঃ পার্শ্বযোর্নিপীডনেনাবনতম্, অত এব মধ্যে গ্রন্থিরিবোন্নতং কর্কটতুল্যত্বাত্ কর্কটকম্| অশ্বকর্ণেতি অশ্বকর্ণবত্ বিপুলাস্থিনির্গমাদশ্বকর্ণম্| বিচূর্ণিতমিতি ক্ষুণ্ণমস্থি, তচ্চ শব্দস্পর্শাভ্যামবগন্তব্যম্| পিচ্চিতমিতি যন্ত্রিতং বহুশোথম্| অস্থিছল্লিকেতি ছল্লং বল্কলং তদত্রাস্তীতি অস্থিছল্লিকা, অত্র মত্বর্থীযষ্ঠিকন্| অত্র তু আ ন ভবতি, বৃদ্ধেরনিত্যত্বাত্| এষা পার্শ্বগতস্তোকাস্থিবিশ্লেষাদ্ভবতি| ‘অস্থিছল্লিতম্’ ইতি বা পাঠঃ, ছল্লমস্য সঞ্জাতমিতি ছল্লিতম্| কাণ্ডেষু ভগ্নমিত্যনেন কাণ্ডভগ্নমভিধীযতে, প্রসারণে কম্পমানং কাণ্ডভগ্নম্| যদ্যপি কাণ্ডে ভগ্নং সর্বমেব কর্কটাদি, তথাঽপি বিশিষ্টে কাণ্ডভগ্নে কাণ্ডভগ্নসঞ্জ্ঞেযং বোদ্ধব্যা| যথা– জাঙ্গলশব্দো জঙ্ঘালাদ্যষ্টবিধমাংসবর্গে সামান্যে, বিশেষে পুনরেণাদাবেব চ বর্ততে| অতিপাতিতমিতি অস্থিনিঃশেষতশ্ছিন্নমতিপাতিতম্| মজ্জাগতমিতি অস্থ্যবযবোঽস্থিমধ্যমনুপ্রবিশ্য মজ্জানং নিঃসারযতীতি মজ্জাগতম্| স্ফুটিতং স্তোকং বহুধা বিদীর্ণং শূকপূর্ণমিব বেদনাবত্| বক্রমিতি অবিমুক্তাস্থি কুব্জীভূতং বক্রম্| বক্রতাঽপি ভগ্নত্বং জ্ঞেযম্| ছিন্নং দ্বিধেতি একমণুবিদীর্ণং, বহুবিদীর্ণমন্যত্; একং বিদীর্ণং, সংলগ্নমপরং বিদীর্ণং দ্বিধাভূতম্; অন্যস্তু বিপুলৈকবিদরণমিত্যাহ; সুশ্রুতে এতত্ পাটিতসঞ্জ্ঞম্| কাণ্ডে ভগ্নস্য দ্বাদশবিধত্বং নিযমযতি– কাণ্ড ইতি| অত্র ভগ্নমিতি শেষঃ| অপিশব্দোঽত্র ভিন্নক্রমঃ, স চাবধারণার্থং, তেন ছিন্নমিত্যত্র সম্বধ্যতে| ছিন্নমেব দ্বিধা, ন কর্কটাদি||৪-৬||

আতঙ্কদর্পণ ব্যাখ্যা (বাচস্পতি বৈদ্য কৃত)

অতঃ পরং কাণ্ডে ভগ্নমাহ– কাণ্ডে ত্বিত্যাদি| ছিন্নং দ্বিধা কাণ্ডে ইত্যত্র ভগ্নম্ ইতি শেষঃ| অত ইতি অতঃ পরম্| কর্কটকেতি উভযোঃ পার্শ্বযোঃ নিপীডনেনাবনতম্, অত এব মধ্যে গ্রন্থিরিবোন্নতং কর্কটতুল্যত্বাত্কর্কটকম্| অশ্বকর্ণেতি অশ্বকর্ণবদ্বিপুলাস্থিনির্গমাদশ্বকর্ণম্| বিচূর্ণিতমিতি ক্ষুণ্ণমস্থি, তচ্চ শব্দস্পর্শাভ্যামবগন্তব্যম্| পিচ্চিতমিতি যন্ত্রিতং বহুশোথম্| অস্থিচ্ছল্লিকেতি– ছল্লং বল্কলং, তদত্রাস্তীতি অস্থিচ্ছল্লিকা, এষা পার্শ্বগতস্তোকাস্থ্যবযববিশ্লেষাদ্ভবতি| “অস্থিচ্ছল্লিতম্” ইতি বা পাঠঃ| ছল্লমস্য জাতং ছল্লিতম্| কাণ্ডেষু ভগ্নমিত্যাদি| অনেন কাণ্ডভগ্নমিত্যভিধীযতে| প্রসারণে কম্পমানং কাণ্ডভগ্নম্| যদ্যপি কাণ্ডে ভগ্নং সর্বমেব কর্কটকাদি, তথাঽপি বিশিষ্টে কাণ্ডে ভগ্নে সঞ্জ্ঞেযং বোদ্ধব্যা| অতিপাতিতমিতি অস্থি নিঃশেষতশ্ছিন্নমতিপাতিতম্| মজ্জাগতমিতি অস্থ্যবযবোঽস্থিমধ্যমনুপ্রবিশ্য মজ্জানং নিঃসারযতীতি মজ্জাগতম্| স্ফুটিতং স্তোকং বহুধা বিদীর্ণং শূকপূর্ণমিব বেদনাবত্| বক্রমিতি অবিমুক্তাস্থি কুব্জীভূতং বক্রং, বক্রতাঽপি ভগ্নত্বং জ্ঞেযম্| ছিন্নং দ্বিধেতি একমণুবিদীর্ণং, বহুবিদীর্ণমন্যত্| কশ্চিদেকতরপার্শ্বলগ্নমপরত্র বিদীর্ণমিত্যাহ, অন্যশ্চ বিপুলৈকবিদরণম্, এতচ্চ সুশ্রুতে পাটিতসঞ্জ্ঞম্| কাণ্ডে ভগ্নস্য দ্বাদশবিধত্বং নিযমযতি– দ্বাদশধাঽপি কাণ্ড ইতি কাণ্ডে; ইত্যত্র ভগ্নমিতি শেষঃ| অপিশব্দোঽত্র ভিন্নক্রমঃ, স চাবধারণার্থঃ, তেন ছিন্নমিত্যত্র সম্বধ্যতে, ছিন্নমেব দ্বিধা ন কর্কটকাদি| সামান্যেন কাণ্ডভগ্নলক্ষণমাহ– স্রস্তাঙ্গতেত্যাদি| কাণ্ডে ভগ্নস্যৈতচ্চিহ্নং স্রস্তাঙ্গতা শোফরুজযোরতিবৃদ্ধিঃ| সম্পীড্যমানে হস্তাদিনা মৃদিতে সতি শব্দঃ, স্পর্শাসহশ্চ, তথা স্পন্দনতোদশূলা ভবন্তি| সর্বাসু শযনাসনাদিকাস্ববস্থাসু শর্মলাভো ন ভবতি||৪-৬||–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

কাণ্ডে ভগ্নস্য দ্বাদশপ্রকারাদপ্যধিকত্বমাহ– ভগ্নমিত্যাদি| সমাসতো নামভিরেব তুল্যমিতি সঙ্ক্ষেপতো নামানুরূপমেতদবগন্তব্যমিত্যর্থঃ||৭||

আতঙ্কদর্পণ ব্যাখ্যা (বাচস্পতি বৈদ্য কৃত)

কাণ্ডে ভগ্নস্য দ্বাদশপ্রকারাদপ্যধিকত্বমাহ– ভগ্নমিত্যাদি| সঙ্ক্ষেপতো নামানুরূপমেতদেবাবগন্তব্যং, যস্যেদৃশাস্থি ভগ্নং তস্যৈব নামেত্যর্থঃ||৭||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

কষ্টসাধ্যতামাহ– অল্পেত্যাদি| বাতাত্মকস্যেতি বাতপ্রকৃতেঃ| উপদ্রবৈরিতি উপদ্রবা জ্বরাধ্মানমূত্রপুরীষসঙ্গাদযঃ||৮||

আতঙ্কদর্পণ ব্যাখ্যা (বাচস্পতি বৈদ্য কৃত)

ভগ্নস্য কৃচ্ছ্রসাধ্যত্বমাহ– অল্পাশিন ইতি| আহাররহিতস্য, অনাত্মবতোঽপথ্যাশিনঃ, বাতাত্মকস্য বাতপ্রকৃতেঃ| উপদ্রবৈরিত্যাদি উপদ্রবা জ্বরমোহমূত্রপুরীষসঙ্গাদযঃ||৮||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অসাধ্যতামাহ– ভিন্নং কপালমিত্যাদি| ভগ্নমিতি বাচ্যে ভিন্নমিতি যত্ কৃতং, তত্ কপালানাং প্রাযশো ভেদাত্| অত এবোক্তম্– “কপালানি বিভজ্যন্তে” (সু. শা. অ. ৫) ইতি| ননু, কট্যস্থ্নঃ কপালসঞ্জ্ঞাযা অভাবাত্ কথমুচ্যতে ভিন্নং কপালং কট্যামিতি? তদুক্তং সুশ্রুতে– “জানুনিতম্বাংসগণ্ডতালুশঙ্খবঙ্ক্ষণশিরঃসু কপালানি|” (সু. শা. অ. ৫) ইতি; উচ্যতে– নিতম্বগ্রহণেন তত্র কটীগ্রহণাদদোষঃ; অথবা সর্বং কপালসঞ্জ্ঞিতম্ অস্থিভিন্নং, তথা কট্যাং চাস্থিভিন্নং বর্জযেত্| অসংশ্লিষ্টকপালং চেতি তু নিযমার্থং; তেন ললাটে কপালস্যাসংশ্লিষ্টস্যাসাধ্যত্বং, নান্যথা ভিন্নস্যেতি| ভিন্নং কপালমিতি কাণ্ডভগ্নমেতত্| সন্ধিমুক্তমিতি নানাবিধমপি সন্ধিমুক্তং কট্যাং ন সিধ্যতীতি| চ্যুতমিতি অধঃক্ষিপ্তম্, অন্যস্তু বিশ্লিষ্টমাহ; অথবা কট্যাং সন্ধিমুক্তং চ্যুতলক্ষণং ন সর্বম্| জঘনং প্রতিপিষ্টং চেতি জঘনস্থানে পিষ্টমুত্পিষ্টমেতত্তথা চ্যুতমিতি চ| সন্ধিমুক্তং পুনর্বিশেষার্থমুক্তং, বিশেষাভিধানাদন্যস্য কটীসন্ধিমুক্তস্য কদাচিত্ সাধ্যতা সূচ্যতে, অত এব চিকিত্সিতে “ততঃ স্থানস্থিতে সন্ধৌ” (সু. চি. অ. ৩) ইতি বক্ষ্যতি| অসংশ্লিষ্টকপালং চ ললাটে চূর্ণিতং চ যদিতি যথা অবিদ্যমানসংশ্লেষং যত্ কপালং, তথা ললাটে চূর্ণিতং চ যত্ বিঘটিতসন্ধি তদসাধ্যম্| ভগ্নমিতি সামান্যেন সন্ধিমুক্তং কাণ্ডভগ্নং চ গৃহ্যতে| অন্যে তু ভগ্নমিত্যনেন কাণ্ডভগ্নবিশেষং ‘প্রসারণে কম্পমানম্’ ইত্যনেনোক্তং বদন্তি| উক্তং চ ভালুকিনা– “শঙ্খে মূর্ধ্নি স্তনান্তরে বা কাণ্ডে ভগ্নং মরণায|” ইতি| স্তনান্তরে উরসি, মূর্ধ্নি চূডাস্থানে||৯-১০||

আতঙ্কদর্পণ ব্যাখ্যা (বাচস্পতি বৈদ্য কৃত)

অসাধ্যতামাহ– ভিন্নমিত্যাদি| ভগ্নমিতি বাচ্যে ভিন্নমিতি যত্কৃতং, তত্কপালানাং প্রাযশো ভেদাত্| যদুক্তমিহৈব– ‘কপালানি বিভিদ্যন্তে’ ইত্যাদি| ননু, কট্যস্থ্নঃ কপালসঞ্জ্ঞাযা অভাবাত্ কথমুচ্যতে ভিন্নং কপালং কট্যামিতি? যদুক্তং সুশ্রুতে– “জানুনিতম্বাংসগণ্ডতালুশঙ্খবঙ্ক্ষণশিরস্সু কপালানি” ইতি| উচ্যতে– নিতম্বগ্রহণেন তত্র কটীগ্রহণাদদোষঃ, অথবা সর্বং কপালসঞ্জ্ঞিতমস্থিভিন্নং, ছেদাত্তথা কট্যাং চাস্থিভিন্নং চ বর্জযেত্| সন্ধিমুক্তমিত্যাদি নানাবিধমপি সন্ধিমুক্তং কট্যাং ন সিদ্ধ্যতি| তথা কট্যাং চ্যুতমিতি অধঃক্ষিপ্তং, সঞ্জ্ঞেযম্| পিষ্টমুত্পিষ্টমসঞ্জ্ঞং চ, জঘনং প্রতি লক্ষীকৃতং ন সিদ্ধ্যতি| পুনর্বর্জ্যং ভগ্নমাহ– অসংশ্লিষ্টমিত্যাদি| যথা তথা অবিদ্যমানসংশ্লেষং যত্ কপালং তথা ললাটে চূর্ণিতং যত্ বিঘটিতসন্ধি তদসাধ্যম্| ভগ্নমিতি সামান্যেন সন্ধিমুক্তং কাণ্ডে ভগ্নং চ গৃহ্যতে, অন্যে তু ভগ্নমিতি কাণ্ডে ভগ্নমাহুঃ| যদুক্তং ভালুকিনা– “শঙ্খে মূর্ধ্নি স্তনান্তরে বা কাণ্ডে ভগ্নং মরণায|” ইতি| স্তনান্তরে উরসি, স্তনগ্রহণেন স্তনান্তরং বোদ্ধব্যম্||৯-১০||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

সর্বেষামনবধানতোঽসাধ্যত্বমাহ– সম্যগিত্যাদি| সন্ধিতং সংযমিতম্| দুর্নিক্ষেপনিবন্ধনাদিতি দুঃস্থাপনাত্তথা দুষ্টবন্ধনাত্| সঙ্ক্ষোভাদ্বেতি অভিঘাতভযাদিসঙ্ক্ষোভাত্| অযমর্থঃ– সম্যক্সংযমিতমপি দুঃস্থাপনাত্, সুন্যস্তমপি দুষ্টবন্ধনাত্, সুন্যস্তং সুবদ্ধমপি সঙ্ক্ষোভাদ্বিকৃতমসাধ্যম্||১১||

আতঙ্কদর্পণ ব্যাখ্যা (বাচস্পতি বৈদ্য কৃত)

সর্বেষামনবধানতোঽসাধ্যত্বমাহ– সম্যগিত্যাদি| দুর্নিক্ষেপনিবন্ধনাত্ দুঃস্থাপনাত্ তথা দুষ্টবন্ধনাত্| সঙ্ক্ষোভাদ্বেতি অভিঘাতভযাদিসঙ্ক্ষোভাত্| অযমর্থঃ– সম্যক্সংযমিতমপি দুষ্টবন্ধনাত্তথা সুন্যস্তং সুবদ্ধমপি সঙ্ক্ষোভাত্ বিকৃতমসাধ্যম্||১১||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অস্থিবিশেষেণ ভগ্নবিশেষমাহ– তরুণাস্থীনীত্যাদি| নম্যন্তে বক্রীভবন্তি, তেনাত্র বক্রলক্ষণং ভগ্নম্| ঘ্রাণকর্ণাক্ষিপুটেষু তরুণং কোমলমস্থি| ভিদ্যন্তে নলকানি চেতি অস্থ্যন্তরানুপ্রবেশাদ্ভিদ্যন্তে, অতিপাতিতলক্ষণেন চ ভগ্নেন নলকানি যুজ্যন্তে; অন্যে তু দ্বাদশবিধমপি ভগ্নমত্রেচ্ছন্তি| কপালানি বিভজ্যন্ত ইতি কপালেষু বিদরণলক্ষণো ভগ্নঃ| ‘বিভিদ্যন্তে’ ইতি পাঠান্তরম্, অর্থস্তু স এব| রুচকানি দন্তাঃ, তেষু স্ফুটিতলক্ষণো ভগ্নঃ| অস্থীনি পঞ্চবিধানি তরুণনলককপালবলযরুচকভেদাত্| রুচকানি চেতি চকারাত্ বলযান্যপি স্ফুটিতানি ভবন্তীতি| এতত্ সুশ্রুতে স্ফুটিতং ভগ্নম্||১২||

আতঙ্কদর্পণ ব্যাখ্যা (বাচস্পতি বৈদ্য কৃত)

অস্থিবিশেষেণ ভগ্নবিশেষমাহ– তরুণেত্যাদি| ঘ্রাণকর্ণাক্ষিকূটেষু তরুণাস্থীনি কোমলাস্থীনি, নম্যন্তে বক্রীভবন্তি| অত্র বক্রলক্ষণং ভগ্নম্| ভিদ্যন্তে নলকানীত্যাদি| অস্থ্যন্তরানুপ্রবেশাদ্ভিদ্যন্তে, অতিপাতিতলক্ষণেন চ ভগ্নেন নলকানি যুজ্যন্তে| অন্যে তু দ্বাদশবিধমপি ভগ্নমাত্রমিচ্ছন্তি| কপালেষু বিদরণলক্ষণো ভগ্নঃ| রুচকানি দন্তাঃ, তেষু স্ফুটিতলক্ষণো ভঙ্গঃ| অস্থীনি পঞ্চবিধানি, তরুণনলককপালবলযরুচকভেদাত্| চকারাদ্ বলযান্যপি স্ফুটন্তীতি জ্ঞেযম্| এতচ্চ সুশ্রুতে স্ফুটিতং ভগ্নম্||১২||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ইতি শ্রীকণ্ঠদত্তকৃতাযাং মধুকোশব্যাখ্যাযাং ভগ্ননিদানং সমাপ্তম্||৪৪||

আতঙ্কদর্পণ ব্যাখ্যা (বাচস্পতি বৈদ্য কৃত)

ইতি শ্রীবাচস্পতিবৈদ্যবিরচিতাযাং মাধবনিদানব্যাখ্যাযামাতঙ্কদর্পণাখ্যাযাং ভগ্ননিদানম্||৪৪||