৩২. অশ্মরীনিদানম্

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

মূত্ররোধিত্বসাধর্ম্যাদশ্মরীমাহ– বাতেত্যাদি| শ্লেষ্মাশ্রযা ইতি শ্লেষ্মসমবাযিকারণাঃ, শুক্রজাং বিনা; তত্র শুক্রস্যৈব সমবাযিকারণত্বাত্| তথাচ দৃঢবলঃ– “বিশোষযেদ্বস্তিগতং সশুক্রং” (চ. চি. অ. ২৬) ইত্যাদি, এতচ্চ সামান্যোক্তমপি বিশেষেণ সম্বধ্যতে| যথা– হল্ঙ্যাদিসূত্রে ‘দীর্ঘাত্’ ইতি বিশেষণং ঙ্যাভ্যাং সম্বধ্যতে, ন তু হলা| অত এবাত্র প্রাযোগ্রহণং কৃতবান্| অন্যে তু শুক্রাশ্মর্যামপি কফকারণত্বমিচ্ছন্ত্যেব, বিরোধাভাবাত্| প্রাযঃশব্দশ্চাত্র বিশেষার্থঃ| যমোপমা ইতি অসতি চিকিত্সিতে অবশ্যমেব মারকত্বাত্| বিশোষযেদিত্যাদি পিত্তেষ্বিবেতি বাতশোষিতেষু| নৈকদোষাশ্রয ইতি ত্রিদোষজাঃ, উদ্গতদোষেণ ব্যপদেশঃ||১-২||

আতঙ্কদর্পণ ব্যাখ্যা (বাচস্পতি বৈদ্য কৃত)

মূত্ররোধিত্বসামান্যাদশ্মরীমাহ– বাতেত্যাদি| শ্লেষ্মাশ্রযাঃ শ্লেষ্মসমবাযিকারণাঃ পরং শুক্রজাং বিনা, তত্র শুক্রস্যৈব সমবাযিকারণত্বাত্| তথা চ দৃঢবলঃ– “বিশোষযেদ্বস্তিগতং সশুক্রং মূত্রম্” ইত্যাদি| অত এবাত্র প্রাযোগ্রহণম্| অন্যে তু শুক্রাশ্মর্যামপি কফকারণত্বমিচ্ছন্ত্যেব, বিরোধাভাবাত্| প্রাযঃশব্দশ্চাত্র বিশেষার্থঃ| যমোপমাঃ অসতি চিকিত্সিতেঽবশ্যমেব মারকত্বাত্| তস্যাঃ সম্প্রাপ্তিমাহ– বিশোষযেদিত্যাদি| পবনো বস্তিগতং সশুক্রং মূত্রং সপিত্তং কফং বা শোষমুপনযেদ্যদা তদাঽশ্মরী ভবতি, ক্রমেণ শনৈর্বর্ধমানা যথা গোঃ পিত্তেষু রোচনা ভবতি| তস্যামনেকদোষাশ্রযত্বমাহ– নৈকেত্যাদি| ত্রিদোষজা ইত্যর্থঃ||১-২||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পূর্বরূপমাহ– অথেত্যাদি| বস্তসগন্ধত্বং বস্তসমানগন্ধত্বম্||৩||–

আতঙ্কদর্পণ ব্যাখ্যা (বাচস্পতি বৈদ্য কৃত)

পূর্বরূপমাহ– অথেত্যাদি| বস্ত্যাধ্মানমিত্যাদি| বস্ত্যাধ্মানং বস্তেরাপূরঃ, তদাসন্নদেশেষু বস্তিশিরোমুষ্কমেঢ্রাদিষু, পরিতঃ সমন্তাত্, অতিরুক্ অতিবেদনা| মূত্রে বস্তসগন্ধত্বং বৃহত্তমবস্তসমানগন্ধত্বং, তথা মূত্রকৃচ্ছ্রং জ্বরোঽরুচিশ্চ ভবতি||৩||–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

তাসাং সামান্যলক্ষণমাহ– সামান্যেত্যাদি| রুক্ শূলং, বস্তিমূর্ধা নাভেরধোদেশঃ| বিশীর্ণধারং সবিচ্ছেদধারম্| তযা অশ্মর্যা| মার্গো মূত্রবাহিস্রোতঃ| তদ্ব্যপাযাত্ বাযুনা কদাচিদশ্মরীকৃতমার্গরোধব্যপগমাত্| মেহেত্ মূত্রযেত্| অচ্ছমনাবিলম্| গোমেদকোপমমিতি গোমেদকো লোহিতমণিস্তদ্বর্ণম্| তত্সঙ্ক্ষোভাত্ নিরুদ্ধমার্গমূত্রেণ পীডনাদশ্মরীসম্পাতাদ্বা ক্ষতে জাতে মূত্রবহাদৌ, সাস্রং সরক্তং মূত্রং প্রবর্ততে| আযাসাত্ প্রবাহণাদিজনিতক্লমাত্||৪-৫||–

আতঙ্কদর্পণ ব্যাখ্যা (বাচস্পতি বৈদ্য কৃত)

তাসাং সামান্যলক্ষণমাহ– বিশীর্ণেত্যাদি| বিশীর্ণধারং সবিচ্ছেদং, তথা অশ্মর্যা, মার্গনিরোধনে মূত্রবাহিস্রোতস আবরণে সতি| বস্তিমূর্ধা নাভেরধোদেশঃ, তস্মিন্ রুদ্ধে সতি রুক্ শূলম্| পুনঃ স্বলক্ষণান্তরমাহ– তদ্ব্যপাযাদিত্যাদি| তদ্ব্যপাযাত্ বাযুনা কদাচিদশ্মরীকৃতমার্গনিরোধব্যপগমাত্| মেহেত্ মূত্রযেত্| অচ্ছমনাবিলম্| গোমেদকোপমমিতি গোমেদক আলোহিতপীতমণিস্তদ্বর্ণম্| তত্সঙ্ক্ষোভাত্ নিরুদ্ধমার্গমূত্রপীডনাদশ্মরীসঙ্ঘট্টনাদ্বা ক্ষতে জাতে সতি মূত্রবহস্রোতসি সাস্রং সরক্তং মূত্রং প্রবর্ততে| আযাসাত্ প্রবাহণাদিকজনিতাত্, প্রবাহণং কণ্ঠবলেন শব্দম্, মূত্রস্যাজননং নিকুন্থনমিতি লোকে||৪-৫||–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

বাতজামাহ– তত্রেত্যাদি| ক্বণন্ আর্তনাদং কুর্বন্| সানিলং সশব্দং মূত্রপ্রবৃত্ত্যর্থং কৃতাতিকুন্থনাত্| মেহতি বিন্দুশ ইতি বিন্দুং বিন্দুং মূত্রযতি, “বহ্বল্পার্থাচ্ছস্ কারকাদন্যতরস্যাম্” ইতি অল্পার্থে শস্প্রত্যযঃ| শ্যাবেত্যাদি| অশ্মর্যা আকারকথনম্; এতচ্চাকৃষ্টানাং প্রত্যক্ষসংবাদেন শাস্ত্রপ্রামাণ্যখ্যাপনার্থমিত্যাহুঃ, আকৃষ্টাসু দোষোচিতচিকিত্সার্থমিত্যন্যে||৬-৭||–

আতঙ্কদর্পণ ব্যাখ্যা (বাচস্পতি বৈদ্য কৃত)

বাতজাশ্মরীমাহ– তত্রেত্যাদি| ভৃশমত্যর্থমার্তঃ পুমান্ দন্তৈর্দন্তান্ খাদতি কটকটাযতে, বেপতে কম্পতে, মেহনং লিঙ্গং, মৃদ্নাতি মথ্নাতি, অনিশং ক্বণন্ ক্রন্দযন্ নাভিদেশং পীডযতি| শকৃত্পুরীষং, সানিলং সশব্দং মুঞ্চতি, মুহুর্বারংবারং, বিন্দুশঃ বিন্দুং বিন্দুং, মেহতি মূত্রযেত্| শ্যাবেত্যাদি| শ্যাবা অরুণা কিঞ্চিত্ শ্যামা, অরুণা কিঞ্চিদ্রক্তা, এতচ্চাশ্মর্যা বর্ণাকারকথনমাকৃষ্টানাং প্রত্যক্ষসংবাদেন শাস্ত্রস্য প্রামাণ্যখ্যাপনার্থমিত্যাহুঃ, আকৃষ্টাসু দোষোচিতক্রিযার্থমিত্যন্যে, কণ্টকৈরন্বিতেব||৬-৭||–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পিত্তজামাহ– পিত্তেনেত্যাদি| পচ্যমানঃ ক্ষারেণেব| ঊষ্মবান্ উষ্ণস্পর্শঃ| অসিতা কৃষ্ণা||৮||–

আতঙ্কদর্পণ ব্যাখ্যা (বাচস্পতি বৈদ্য কৃত)

পিত্তজামাহ– পিত্তেনেত্যাদি| পিত্তেন যাঽশ্মরী তযা বস্তির্মূত্রকোশো দহ্যতে, পচ্যমানঃ ক্ষারেণেব, ঊষ্মবান্ উষ্ণস্পর্শঃ, ভল্লাতকাস্থিসংস্থানা ভল্লাতকমজ্জাকারা, অসিতা কৃষ্ণা||৮||–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

শ্লেষ্মজামাহ– বস্তিরিত্যাদি| শ্লক্ষ্ণা মসৃণা| মধুবর্ণা ঈষত্ পিঙ্গলশুক্লা||৯||–

আতঙ্কদর্পণ ব্যাখ্যা (বাচস্পতি বৈদ্য কৃত)

শ্লেষ্মজামাহ– বস্তিরিত্যাদি| বস্তির্নিস্তুদ্যত ইব শূলেনেব, শীতস্পর্শঃ, গুরুর্গৌরবযুক্তঃ, মহতী কুক্কুটাণ্ডতুল্যা, শ্লক্ষ্ণা মসৃণা, মধুবর্ণা ঈপত্পীতশুক্লা, সিতা শুভ্রা||৯||–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

এতা ইতি ত্রিদোষজা বালানাং স্যুঃ, তেষাং তন্নিদানাভ্যাসাত্| ভূযসা প্রাযেণ, তেন মহতামপি ত্রিদোষজা ভবন্তি| তেষামেব বালানাং গ্রহণাহরণে সুখা ইতি সম্বন্ধঃ| আশ্রযোপচযাল্পত্বাদিতি আশ্রযো বস্তিঃ, উপচযঃ স্থৌল্যং, তযোরল্পত্বং; তচ্চ তদ্দেহাল্পত্বাত্| আহরণং পাটনাদিপূর্বকমাকর্ষণং, গ্রহণং তদর্থমেবাঙ্গুলিভ্যাং ধারণম্| উক্তং হি সুশ্রুতে– “প্রাযেণৈতাস্তিস্রোঽশ্মর্যো দিবাস্বপ্নসমশনাধ্যশনশীতস্নিগ্ধমধুরাহারপ্রিযত্বাদ্বিশেষেণ বালানাং ভবন্তি, তেষামেবাল্পবস্তিকাযত্বাদল্পমাংসোপচযাচ্চ বস্তেঃ সুখগ্রহণাহরণা ভবন্তি|” (সু. নি. অ. ৩) ইতি||১০||–

আতঙ্কদর্পণ ব্যাখ্যা (বাচস্পতি বৈদ্য কৃত)

এতাঃ প্রাযেণ শিশূনাং ভবন্তীত্যাহ– এতা ইত্যাদি| ত্রিদোষজা বালানাং ভবন্তি, তেষামেব তন্নিদানাভ্যাসাত্| ভূযসা প্রাযেণেতি, তেন মহতামপি হেতুনা ত্রিদোষজা ভবন্তি, তেষামেব বালানাং গ্রহণাহরণে সুখা ইতি সম্বন্ধঃ| অত্রৈব হেতুমাহ– আশ্রযোপচযাল্পত্বাদিতি| আশ্রয আধারো বস্তিঃ, উপচযঃ স্থৌল্যং, তযোরল্পত্বং; তচ্চ তদ্দেহাল্পত্বাত্| অতস্তা গ্রহণাহরণে সুখাঃ সুখেনাহর্তুং শক্যাঃ| মহতাং তু যথোক্তহেত্বভাবাদ্গ্রহণাহরণে তা দুঃখাবহা ইতি| গ্রহণং বডিশাদিনা, আহরণং পাটনাদিপূর্বং কর্মাকর্ষণং, তদর্থমেবাঙ্গুলীভ্যাং ধারণং গ্রহণম্| উক্তং হি সুশ্রুতে– “প্রাযেণৈতাস্তিস্রোঽশ্মর্যো দিবাস্বপ্নসমশনাধ্যশনশীতস্নিগ্ধগুরুমধুরাহারপ্রিযত্বাদ্বিশেষেণ বালানাং ভবন্তি, তেষামেবাল্পবস্তিকাযত্বান্মাংসোপচযাল্পত্বাচ্চ বস্তেঃ সুখগ্রহণাহরণা ভবন্তি|” ইতি||১০||–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

শুক্রাশ্মরীমাহ– শুক্রেত্যাদি| তুশব্দোঽবধারণে; তেন মহতামেব নতু বালানাং, তেষাং বক্ষ্যমাণসম্প্রাপ্তেরভাবাত্; ন তু শুক্রাভাবাত্, অন্যথা ষড্ধাতুকত্বং স্যাত্| শুক্রধারণাদুপস্থিতশুক্রবেগস্য মৈথুনাকরণাত্| মুষ্কযোরন্তরে ‘মেঢ্রেণ সহ’ ইতি শেষঃ| সুশ্রুতে হি ‘মেঢ্রবৃষণযোরন্তরে’ (সু. নি. অ. ৩) ইত্যেবোক্তম্| মেঢ্রবৃষণমধ্যগতবস্তিমুখ ইত্যর্থঃ, তত্রৈব শুক্রবহস্রোতসো বস্তিমুখেন সহ সম্বন্ধাত্| তথাভূতং শুক্রমেবাশ্মরীতি| বস্তিরুক্ বস্তিশূলং, মুষ্কশ্বযথুকারিণী বৃষণযোঃ শোথকারিণী| তস্যাং শুক্রাশ্মর্যাম্| এতি বর্ততে| তুশব্দোঽবধারণে| অবকাশেঽস্মিন্নিতি মেঢ্রবৃষণযোরন্তরে| অস্মিন্নেব পীডিতে সতি বিলীযতে প্রবিলযমাপদ্যত ইত্যর্থঃ| অত এব সুশ্রুতঃ– “পীডিতমাত্রে চ তস্মিন্নেবাবকাশে প্রবিলযমাপদ্যতে|” (সু. নি. অ. ৩) ইতি||১১-১৩||–

আতঙ্কদর্পণ ব্যাখ্যা (বাচস্পতি বৈদ্য কৃত)

শুক্রাশ্মরীমাহ– শুক্রেত্যাদি| শুক্রাশ্মরী তু মহতামেব জাযতে নতু বালানাং, তুশব্দোঽবধারণে, তেষাং বক্ষ্যমাণসম্প্রাপ্তেরভাবাত্, ন তু শুক্রাভাবাত্| অন্যথা ষড্ধাতুকত্বং স্যাত্| চ্যুতমমুক্তামিতি মৈথুনাদুপস্থিতবেগস্য শুক্রস্য ধারণাদিত্যর্থঃ| অমুক্তং ধৃতমিত্যর্থঃ| মুষ্কযোরন্তরে মেঢ্রবৃষণমধ্যগতবস্তিমুখ ইত্যর্থঃ| তথাভূতং শুক্রমনিলঃ একীকৃত্য শোষযতি, সা শুক্রাশ্মরীতি| তস্যা লক্ষণমাহ– বস্তিরুগিতি| বস্তিরুগিত্যাদি সুগমম্| উত্পন্নমাত্রাযাং তস্যাং যদা সা কথমপি বিলীযতে বিলযং যাতি, তদা শুক্রমেতি মূত্রপথাদাগচ্ছতি, পরমবকাশে ছিদ্রে পীডিতে সতি||১১-১৩||–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

সৈবাবস্থাভেদাদশ্মরী শর্করা, পঞ্চমী ন ভবতীত্যাহ– অশ্মর্যেব চেতি| চকারাত্ সিকতাঽপি ভবতীতি মন্তব্যম্| অত এব ‘শর্করা সিকতান্বিতা’ ইতি বক্ষ্যতি| শর্করাসিকতযোশ্চ মহত্ত্বাল্পত্বাভ্যাং ভেদঃ|১৪|–

আতঙ্কদর্পণ ব্যাখ্যা (বাচস্পতি বৈদ্য কৃত)

চতুর্থপাদেন শর্করালক্ষণম্|১৪|–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

কথমশ্মরী শর্করা ভবতীত্যাহ– অণুশ ইত্যাদি| অণুশোঽল্পশঃ| অত্রার্থে সুশ্রুতঃ– ‘পবনেঽনুগুণে সা তু নিরেত্যল্পা বিশেষতঃ| সা ভিন্নমূর্তির্বাতেন শর্করেত্যভিধীযতে||’ (সু. নি. অ. ৬) ইতি| মূত্রস্রোতঃপ্রবৃত্তা সা সক্তেতি মূত্রমার্গগা সতী সংলগ্নেত্যর্থঃ||১৪-১৬||

আতঙ্কদর্পণ ব্যাখ্যা (বাচস্পতি বৈদ্য কৃত)

অণুশ ইত্যাদি| সৈবাশ্মরী অণুশো বাযুনা ভিন্না বিদারিতা শর্করা কথ্যতে| সা শর্করা অনুলোমগে মূত্রস্রোতসাঽধঃপ্রবৃত্তে তস্মিন্বাযৌ মূত্রেণ সহ এতি, প্রতিলোমগে ঊর্ধ্বং প্রবৃত্তে বাযৌ বিবধ্যতে বন্ধং প্রাপ্নোতি, ন বহির্মূত্রেণ নিষ্ক্রামতি, অশ্মরী ত্বনুলোমগে মারুতে ন নিরেতি, শর্করা তু মূত্রেণ সহ নিষ্ক্রামতীত্যনযোর্ভেদঃ| সাঽশ্মরী মূত্রমার্গপ্রবৃত্তা সক্তা নির্গতা দৌর্বর্ল্যাদীনুপদ্রবান্ কুর্যাত্| তানেবাহ– দৌর্বল্যমিতি| দৌর্বল্যমিন্দ্রিযাণাং, সদনং গ্লানিঃ, কার্শ্যমঙ্গানাং, কুক্ষিশূলং হৃদযশূলম্, উষ্ণবাতং মূত্রাঘাতনিদানোক্তং, শেষং সুগমম্||১৪-১৬||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অসাধ্যলক্ষণমাহ– প্রশূনেত্যাদি| রুজাতুরং শূলপীডিতমিত্যর্থঃ||১৭||

আতঙ্কদর্পণ ব্যাখ্যা (বাচস্পতি বৈদ্য কৃত)

তস্যা অসাধ্যত্বমাহ– প্রশূনেত্যাদি| প্রশূননাভিবৃষণং শ্বযথুযুক্তনাভিবৃষণং পুরুষমশ্মরী ক্ষপযতি বিনাশযতি, সিকতা বালুকা তত্সদৃশী যা শর্করা তযা সহিতা অশ্মরীত্যর্থঃ||১৭||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ইতি শ্রীবিজযরক্ষিতকৃতাযাং মধুকোশব্যাখ্যাযামশ্মরীনিদানং সমাপ্তম্||৩২||

আতঙ্কদর্পণ ব্যাখ্যা (বাচস্পতি বৈদ্য কৃত)

ইতি শ্রীবাচস্পতিবৈদ্যবিরচিতাযাং মাধবনিদানব্যাখ্যাযামাতঙ্কদর্পণাখ্যাযামশ্মরীনিদানম্||৩২||