২১. অপস্মারনিদানম্

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

মনোদুষ্টিসাধর্ম্যাত্ সমানচিকিত্স্যত্বাদুন্মাদানন্তরমপস্মারারম্ভঃ| তস্য নিরুক্তিঃ সুশ্রুতেন কৃতা– ‘‘স্মৃতির্ভূতার্থবিজ্ঞানমপস্তত্পরিবর্জনম্| অপস্মার ইতি প্রোক্তস্ততোঽযং ব্যাধিরন্তকৃত্||’’ (সু. উ. তং. অ. ৬১) ইতি| স্মৃতিশ্চ জ্ঞানোপলক্ষণং, তেনানুভবাগমোঽপি বোধ্যঃ| তস্য সামান্যলক্ষণমাহ– তমঃপ্রবেশ ইত্যাদি| তমঃপ্রবেশোঽন্ধকারপ্রবেশ ইব জ্ঞানাভাব ইত্যর্থঃ| সংরম্ভো নেত্রবিকৃতিঃ, হস্তপাদাদিক্ষেপণাদিকং চ||১||

আতঙ্কদর্পণ ব্যাখ্যা (বাচস্পতি বৈদ্য কৃত)

মনোদুষ্টিসাধর্ম্যাত্ সমানচিকিত্স্যত্বাদুন্মাদানন্তরমপস্মারারম্ভঃ| তস্য নিরুক্তিঃ সুশ্রুতেন কৃতা– “স্মৃতির্ভূতার্থবিজ্ঞানমপস্তত্পরিবর্জনম্| অপস্মার ইতি প্রোক্তস্ততোঽযং ব্যাধিরন্তকৃত্” ইতি| স্মরণাভাবো জলাদৌ প্রবেশাদিভিঃ| সুশ্রুতদপস্মারস্য নিদানং লিখ্যতে– “মিথ্যাদিযোগীন্দ্রিযার্থকর্মণামভিসেবনাত্| বিরুদ্ধমলিনাহারবিহারকুপিতৈর্মলৈঃ|| বেগনিগ্রহশীলানামহিতাশুচিভোজিনাম্| রজস্তমোভিভূতানাং গচ্ছতাং চ রজস্বলাম্|| তথা কামভযোদ্বেগক্রোধশোকাদিভির্ভৃশম্| চেতস্যভিহতে পুংসামপস্মারোঽভিজাযতে||” ইতি| অস্যার্থঃ– মিথ্যাদিযোগেযুক্তানামিন্দ্রিযার্থানাং কর্মণাং চাতিসেবনাদিতি জ্ঞেযং; তত্রেন্দ্রিযাণাং শ্রবণস্পর্শনদর্শনরসনঘ্রাণানামর্থা বিষযাঃ শব্দস্পর্শরসরূপগন্ধাঃ, তেষাং মিথ্যাদিসেবনাত্| তত্র পুরুষেষ্টবিনাশাদিশ্রবণং মিথ্যাযোগঃ, পটহাদীনামতিশব্দশ্রবণমতিযোগঃ, সর্বশোঽশ্রবণমযোগঃ; অভিঘাতভূতাশুচিসংস্পর্শো মিথ্যাযোগঃ, অতিমাত্রশীতোষ্ণাদীনাং স্পৃশ্যানাং স্নানাভ্যঙ্গাদীনাং চাতিসেবনমতিযোগঃ, তথা সর্বশোঽসেবনমযোগঃ; তথা অতিতেজসামতিদর্শনমতিযোগঃ, সর্বথাঽনবলোকনমযোগঃ, সূক্ষ্মাদিদর্শনং মিথ্যাযোগঃ; রসানামত্যাদানমতিযোগঃ, অনাদানমযোগঃ, তথা অযোগ্যরসানামাদানং মিথ্যাযোগঃ; তথা পূত্যাদ্যাঘ্রাণং মিথ্যাযোগঃ, অতিতীক্ষ্ণাদিগন্ধাঘ্রাণমতিযোগঃ, সর্বশোঽঘ্রাণমযোগঃ; তথা কাযিককর্মণো সেবনং মিথ্যাযোগঃ, অতিসেবনমতিযোগঃ, সর্বশোঽসেবনমযোগঃ; তথা বাচিককর্মণঃ পরুষানৃতাদিবচনং মিথ্যাযোগঃ, অতিবচনাদিকশ্চাতিযোগঃ, সর্বশো মৌনমযোগঃ; তথা মানসকর্মণঃ শোকাদি চিন্তনং মিথ্যাযোগঃ, অতিমাত্রচিন্তনাদিকমতিযোগঃ, সর্বশোঽচিন্তনমযোগঃ| মলিনাহারঃ পূতিদ্বিষ্টামেধ্যপর্যুষিতাহারঃ, বিহারোঽপি মলিনো দৃষ্টাদৃষ্টার্থঃ স্মৃতিষু বিজ্ঞাতব্য ইতি| বাগ্ভটত্সম্প্রাপ্তির্লিখ্যতে– “উন্মাদবত্প্রকুপিতৈশ্চিত্তদেহগতৈর্মলৈঃ| হতে সত্ত্বে হৃদি ব্যাপ্তে সঞ্জ্ঞাবাহিষু খেষু চ|| তমোবিশন্মূঢমতির্বীভত্সাঃ কুরুতে ক্রিযাঃ| দন্তান্ খাদন্বমন্ফেনং হস্তৌ পাদৌ চ বিক্ষিপন্|| পশ্যন্ন সন্তি রূপাণি প্রস্খলন্ পততি ক্ষিতৌ| বিজিহ্মাক্ষিভ্রুবো দোষবেগেঽতীতে প্রবুধ্যতে|| কালান্তরেণ স পুনশ্চৈবমেব বিচেষ্টতে|” ইতি| তস্য সামান্যলক্ষণমাহ– তম ইত্যাদি|| তমঃপ্রবেশোঽন্ধকারপ্রবেশ ইব জ্ঞানাভাব ইত্যর্থঃ| সংরম্ভো নেত্রবিকৃতির্হস্তপাদাদিবিক্ষেপণং চ|| তমঃ প্রবেশাদিলক্ষণো ঘোরোঽপস্মারাখ্যো গদো জ্ঞেযঃ| স চতুর্বিধ ইতি বাতাত্পিত্তাত্কফাত্সন্নিপাতাঞ্চতুর্বিধ ইতি বিধানং দ্বন্দ্বজপ্রতিষেধার্থং, দ্বন্দ্বজাভাবস্তু ব্যাধিস্বভাবাত্||১||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পূর্বরূপমাহ– হৃত্কম্প ইত্যাদি| শূন্যতা হৃদযস্যৈব| ধ্যানং জিহ্মাযনম্| অত্র মূর্ছা মনোমোহঃ, প্রমূঢতা ইন্দ্রিযমোহঃ||২||

আতঙ্কদর্পণ ব্যাখ্যা (বাচস্পতি বৈদ্য কৃত)

প্রাগ্রূমাহ– হৃদিত্যাদি| তস্মিন্নপস্মারে ভবিষ্যতি সতি হৃত্কম্পাদীনি পূর্বরূপাণি ভবন্তি| শূন্যতা হৃদযস্যৈব| ধ্যানং জিহ্মাযনম্| অত্র মূর্ছা মনোমোহঃ, প্রমূঢতা ইন্দ্রিযমোহঃ||২||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

বাতিকলক্ষণমাহ– কম্পত ইত্যাদি| শ্বসিতি খরশ্বাসো ভবতি| রূপাণীতি প্রাণিনঃ, ‘নীলো মামনুধাবতি’ ইতি সুশ্রুতবচনাত্, এবং পৈত্তিকে “পীতো মামনুধাবতি” ইতি, এবং শ্লৈষ্মিকে “শ্বেতো মামনুধাবতি” (সু. উ. তং. অ. ৬১) ইতি||৩||

আতঙ্কদর্পণ ব্যাখ্যা (বাচস্পতি বৈদ্য কৃত)

বাতাপস্মারলক্ষণমাহ– কম্পতে ইত্যাদি| অনিলাত্ তথা দন্তান্ দশতি, তথা ফেনমুদ্বমতি, তথা শ্বসিতি খরশ্বাসো ভবতি, পরুষারুণকৃষ্ণানি রূপাণি পশ্যেত্; রূপাণীতি পুরুষাঃ প্রাণিনঃ, ‘নীলো মামনুধাবতি’ ইতি সুশ্রুতবচনাত্; এবং পৈত্তিকেঽপি ‘পীতো মামনুধাবতি’ ইতি শ্লৈষ্মিকে”– শুক্লো মামনুধাবতি” ইতি||৩||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পৈত্তিকলক্ষণমাহ– পীতেত্যাদি| পীতাসৃগ্রূপদর্শক ইতি পীতলোহিতবর্ণসমস্তবস্তুদর্শী| সতৃষ্ণেত্যাদি সতৃষ্ণশ্চাসাবুষ্ণশ্চেতি সতৃষ্ণোষ্ণঃ, সতৃষ্ণোষ্ণশ্চাসাবনলব্যাপ্তলোকদর্শী চেতি সমাসঃ||৪||

আতঙ্কদর্পণ ব্যাখ্যা (বাচস্পতি বৈদ্য কৃত)

পৈত্তিকমাহ– পীতেত্যাদি| পৈত্তিকঃ পিত্তাপস্মারযুক্তঃ পুরুষঃ পীতফেনাঙ্গবক্ত্রাক্ষো ভবতি| পীতাসৃগ্রূপদর্শন ইতি পীতলোহিতবর্ণসমস্তবস্তুদর্শনঃ| সতৃষ্ণেত্যাদি সতৃষ্ণশ্চাসাবুষ্ণশ্চেতি সতৃষ্ণোষ্ণঃ, সতৃষ্ণোষ্ণশ্চাসাবনলব্যাপ্তলোকদর্শী চেতি সমাসঃ||৪||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

শ্লৈষ্মিকলক্ষণমাহ– শুক্লেত্যাদি| হৃষ্টাঙ্গজো হৃষ্টরোমা| চিরাদিত্যনেনৈব বাতপিত্তযোরচিরেণ বেগমোক্ষ ইতি সূচযতি||৫||

আতঙ্কদর্পণ ব্যাখ্যা (বাচস্পতি বৈদ্য কৃত)

শ্লৈষ্মিকলক্ষণমাহ– শুক্ল ইত্যাদি| শ্লৈষ্মিকো নরঃ শুক্লফেনাঙ্গবক্ত্রাক্ষো ভবতি| শীতহৃষ্টাঙ্গজ ইতি শীতঃ শীতগাত্রঃ| তথা হৃষ্টাঙ্গজো হৃষ্টরোমা| চিরাদিত্যনেন বাতপিত্তযোরচিরেণ বেগমোক্ষ ইতি সূচযতি| কৃষ্ণপীতশুক্লদর্শনং বাতাদীনাং প্রভাবো ন তু পৈশাচাদিকং রূপমভিপ্রেতম্||৫||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

সান্নিপাতিকলক্ষণমাহ– সর্বৈরিত্যাদি| স চেতি স সান্নিপাতিকঃ ক্ষীণস্যৈকদোষজোঽপ্যসাধ্যঃ| এবমনবশ্চ বোধ্যঃ| প্রস্ফুরন্তং প্রকম্পন্তম্| নেত্রাভ্যাং চ বিকুর্বাণমিতি নেত্রাভ্যাং বিকৃতিমাসাদযন্তম্||৬-৭||

আতঙ্কদর্পণ ব্যাখ্যা (বাচস্পতি বৈদ্য কৃত)

সন্নিপাতজমাহ– সর্বৈরিত্যাদি| এতৈঃ সর্বৈস্ত্রিভিঃ সমস্তৈশ্চ লিঙ্গৈস্ত্রিদোষজঃ সান্নিপাতিকো জ্ঞেযঃ| স চেতি সান্নিপাতিকঃ| ক্ষীণস্যৈকদোষজোঽপ্যসাধ্যঃ| এবমনবশ্চ বোধ্যঃ| অসাধ্যমাহ– বিস্ফুরন্তমিতি| বিস্ফুরন্তং প্রকম্পন্তম্| ‘বহুশোঽপ্যপস্মরন্তং তু’ ইতি পাঠান্তরং; বহুশো বহূন্ বারানপস্মরন্তমপস্মারবেগবন্তম্| ক্ষীণং ‘পুরুষম্’ ইতি শেষঃ| নেত্রাভ্যাং চ বিকুর্বাণমিতি নেত্রাভ্যাং বিকৃতিমাসাদযন্তম্| ইত্থম্ভূতং পুরুষমপস্মারবেগাদ্যুপদ্রবসহিতমপস্মারো বিনাশযেদিতি সম্বন্ধঃ||৬-৭||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অপস্মারপ্রকোপকালমাহ– পক্ষাদিত্যাদি| পক্ষাত্ পৈত্তিকঃ, দ্বাদশাহাদ্বাতিকঃ, মাসাত্ শ্লৈষ্মিকঃ| দ্বাদশাহানন্তরং পক্ষে বক্তব্যে তত্পূর্বং পক্ষাভিধানং, তেনাতোঽধিককালেনাপি বেগং করোতীত্যাহুঃ| কিঞ্চিদথান্তরমিতি উক্তকালেভ্যোঽর্বাগপি দোষতারতম্যাদিতি| ননু, বেগং কৃত্বা অপস্মারারম্ভকো দোষোঽস্ত্যেব তত্ কুতঃ সর্বদা বেগং ন কুরুতে? দ্বাদশাহাদিষ্বেব কুরুত ইত্যাহ– দেবে বর্ষতীত্যাদি| অযমভিসন্ধিঃ– তেজোঽবনীপবনপযঃসনাথং বিদ্যমানমপি বীজং কালবিশেষ এবাঙ্কুরং জনযতি, কালবিশেষস্য অপি সহকারিত্বাত্; তথা গতস্যাপ্যপস্মারস্য পুনরুদ্ভবঃ সম্ভবতি| শরদীতি তত্কালোচিতবীজাভিপ্রাযেণ, তেন কানিচিদ্বীজানি বর্ষাস্বপি ভবন্তীতি| অযং চ ন্যাযঃ চাতুর্থিকজ্বরাদিষ্বপি বোধ্যঃ||৮-৯||

আতঙ্কদর্পণ ব্যাখ্যা (বাচস্পতি বৈদ্য কৃত)

বাতাদিজনিতাপস্মারবেগদিননিযমলক্ষণমাহ– পক্ষাদিত্যাদি| মলা বাতাদযঃ কুপিতাঃ সন্তঃ অপস্মারায পক্ষাদথ বা দ্বাদশাহান্মাসাদ্বা বেগং কুর্বন্তি| পক্ষাত্পৈত্তিকঃ, দ্বাদশাহাদ্বাতিকঃ, মাসাত্ শ্লৈষ্মিকঃ; দ্বাদশাহাদনন্তরং পক্ষে বক্তব্যো যত্পক্ষাভিধানং প্রথমং তেনাতোঽধিককালেঽপি বেগং করোতীত্যাহুঃ| কিঞ্চিদথান্তরমিতি উক্তকালেভ্যোঽর্বাগপি দোষতারতম্যাদিতি| ননু, বেগং কৃত্বা অপস্মারারম্ভকো দোষোঽস্ত্যেব তত্কুতঃ সর্বদা বেগং ন কুরুতে দ্বাদশাহাদিষ্বেব কুরুত ইত্যত আহ– দেব ইত্যাদি| অযমভিসন্ধিঃ– তেজোঽবনীপবনতোযসনাথং বিদ্যমানমপি বীজং কালবিশেষ এবাঙ্কুরং জনযতি, কালবিশেষস্যাপি সহকারিত্বাত্; তথাঽঽগতস্যাপ্যপস্মারস্য পুনরুদ্ভবঃ সম্ভবতি| শরদীতি তত্কালনিযতবীজাভিপ্রাযেণ, তেন কানিচিদ্বর্ষাদিষ্বপি জনযন্তীতি| অযং ন্যাযশ্চাতুর্থিকজ্বরাদিষ্বপি বোধ্য ইতি| অথ ডল্লণাভিপ্রাযঃ– যথা বর্ষত্যপি দেবে ভূমাবুপ্তানি কানিচিদ্বীজানি শরদ্যেব প্রবিরোহন্তি, তথা সর্বরোগবীজানাং বাতাদীনাং কদাচিত্ কস্যচিদপস্মারাদিব্যাধিবিশেষস্য নিদানাদিসঙ্গমেঽপি সন্দূষ্যাদিসমুদাযেনৈব সমুদ্ভবো ভবতীত্যর্থঃ| অন্যে ত্বন্যথা ব্যাখ্যানযন্তি– ননু, সঞ্চযাদিক্রমেণোপযোগো দোষাণাং তদা পুনঃ কথমল্পেনৈব কালেন তদ্বিকারোদ্গমঃ স্যাদিত্যত্রাহ– দেবেঽবর্ষতীত্যাদি| অবর্ষত্যপি দেবে যথা শরত্কালে ভূমৌ স্তিমিতত্বাত্ কানিচিদ্বীজানি প্ররোহন্ত্যেব, তথা অল্পেনাপি কালেন শরীরস্থা দোষাঃ কিঞ্চিদুপচিতা বিকারং জনযন্তীতি||৮-৯||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ইতি শ্রীবিজযরক্ষিতকৃতাযাং মধুকোশব্যাখ্যাযামপস্মারনিদানং সমাপ্তম্||২১||

আতঙ্কদর্পণ ব্যাখ্যা (বাচস্পতি বৈদ্য কৃত)

ইতি শ্রীবাচস্পতিবৈদ্যবিরচিতাযাং মাধবনিদানব্যাখ্যাযামাতঙ্কদর্পণাখ্যাযামপস্মারনিদানম্||২১||